𑁮. 𑀉𑀢𑁆𑀢𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁬𑁯. ‘‘𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑁂, 𑀲𑀼𑀲𑀼𑀫𑀸𑀭𑁄 𑀅𑀳𑀁 𑀢𑀤𑀸;

𑀲𑀕𑁄𑀘𑀭𑀧𑁆𑀧𑀲𑀼𑀢𑁄𑀳𑀁 [𑀲𑀪𑁄𑀚𑀦𑀧𑀲𑀼𑀢𑀸𑀳𑀁 (𑀲𑁆𑀬𑀸. 𑀓.)], 𑀦𑀤𑀻𑀢𑀺𑀢𑁆𑀣𑀁 𑀅𑀕𑀘𑁆𑀙𑀳𑀁.

𑁧𑁭𑁦. ‘‘𑀲𑀺𑀤𑁆𑀥𑀢𑁆𑀣𑁄 𑀢𑀫𑁆𑀳𑀺 𑀲𑀫𑀬𑁂, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀦𑀤𑀺𑀁 𑀢𑀭𑀺𑀢𑀼𑀓𑀸𑀫𑁄 𑀲𑁄, 𑀦𑀤𑀻𑀢𑀺𑀢𑁆𑀣𑀁 𑀉𑀧𑀸𑀕𑀫𑀺.

𑁧𑁭𑁧. ‘‘𑀉𑀧𑀸𑀕𑀢𑁂 𑀘 [𑀉𑀧𑀸𑀕𑀢𑀫𑁆𑀳𑀺 (𑀲𑁆𑀬𑀸. 𑀓.)] 𑀲𑀫𑁆𑀩𑀼𑀤𑁆𑀥𑁂, 𑀅𑀳𑀫𑁆𑀧𑀺 𑀢𑀢𑁆𑀣𑀼𑀧𑀸𑀕𑀫𑀺𑀁;

𑀉𑀧𑀕𑀦𑁆𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀇𑀫𑀁 𑀯𑀸𑀘𑀁 𑀉𑀤𑀻𑀭𑀬𑀺𑀁.

𑁧𑁭𑁨. ‘‘‘𑀅𑀪𑀺𑀭𑀽𑀳 𑀫𑀳𑀸𑀯𑀻𑀭, 𑀢𑀸𑀭𑁂𑀲𑁆𑀲𑀸𑀫𑀺 𑀅𑀳𑀁 𑀢𑀼𑀯𑀁;

𑀧𑁂𑀢𑁆𑀢𑀺𑀓𑀁 𑀯𑀺𑀲𑀬𑀁 𑀫𑀬𑁆𑀳𑀁, 𑀅𑀦𑀼𑀓𑀫𑁆𑀧 𑀫𑀳𑀸𑀫𑀼𑀦𑀺’.

𑁧𑁭𑁩. ‘‘𑀫𑀫 𑀉𑀕𑁆𑀕𑀚𑁆𑀚𑀦𑀁 𑀲𑀼𑀢𑁆𑀯𑀸, 𑀅𑀪𑀺𑀭𑀽𑀳𑀺 𑀫𑀳𑀸𑀫𑀼𑀦𑀺;

𑀳𑀝𑁆𑀞𑁄 𑀳𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀢𑀸𑀭𑁂𑀲𑀺𑀁 𑀮𑁄𑀓𑀦𑀸𑀬𑀓𑀁.

𑁧𑁭𑁪. ‘‘𑀦𑀤𑀺𑀬𑀸 𑀧𑀸𑀭𑀺𑀫𑁂 𑀢𑀻𑀭𑁂, 𑀲𑀺𑀤𑁆𑀥𑀢𑁆𑀣𑁄 𑀮𑁄𑀓𑀦𑀸𑀬𑀓𑁄;

𑀅𑀲𑁆𑀲𑀸𑀲𑁂𑀲𑀺 𑀫𑀫𑀁 𑀢𑀢𑁆𑀣, 𑀅𑀫𑀢𑀁 𑀧𑀸𑀧𑀼𑀡𑀺𑀲𑁆𑀲𑀲𑀺.

𑁧𑁭𑁫. ‘‘𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸𑀦, 𑀤𑁂𑀯𑀮𑁄𑀓𑀁 𑀆𑀕𑀘𑁆𑀙𑀳𑀁;

𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁧𑁭𑁬. ‘‘𑀲𑀢𑁆𑀢𑀓𑁆𑀔𑀢𑁆𑀢𑀼𑀜𑁆𑀘 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀲𑀳𑀁;

𑀢𑀻𑀡𑀺𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀯𑀢𑁆𑀢𑀻, 𑀫𑀳𑀺𑀬𑀸 𑀇𑀲𑁆𑀲𑀭𑁄 𑀅𑀳𑀼𑀁.

𑁧𑁭𑁭. ‘‘𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄𑀳𑀁, 𑀦𑀺𑀧𑀓𑁄 𑀘 𑀲𑀼𑀲𑀁𑀯𑀼𑀢𑁄;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁭𑁮. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀢𑀸𑀭𑁂𑀲𑀺𑀁 𑀬𑀁 𑀦𑀭𑀸𑀲𑀪𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀭𑀡𑀸𑀬 𑀇𑀤𑀁 𑀨𑀮𑀁.

𑁧𑁭𑁯. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀉𑀢𑁆𑀢𑀺𑀬𑁄 [𑀉𑀢𑁆𑀢𑀺𑀭𑀺𑀬𑁄 (𑀲𑀻.)] 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀉𑀢𑁆𑀢𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.