𑁩. 𑀢𑀺𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦𑁬. ‘‘𑀦𑀕𑀭𑁂 𑀘𑀦𑁆𑀤𑀯𑀢𑀺𑀬𑀸 [𑀩𑀦𑁆𑀥𑀼𑀫𑀢𑀺𑀬𑀸 (𑀅𑀝𑁆𑀞.)], 𑀫𑀸𑀢𑀼𑀉𑀧𑀝𑁆𑀞𑀸𑀓𑁄 [𑀫𑀸𑀢𑀼𑀧𑀝𑁆𑀞𑀸𑀬𑀓𑁄 (𑀲𑀻.), 𑀫𑀸𑀢𑀼𑀧𑀝𑁆𑀞𑀸𑀦𑀓𑁄 (𑀲𑁆𑀬𑀸.)] 𑀅𑀳𑀼𑀁;

𑀅𑀦𑁆𑀥𑀸 𑀫𑀸𑀢𑀸 𑀧𑀺𑀢𑀸 𑀫𑀬𑁆𑀳𑀁, 𑀢𑁂 𑀧𑁄𑀲𑁂𑀫𑀺 𑀅𑀳𑀁 𑀢𑀤𑀸.

𑁧𑁦𑁭. ‘‘𑀭𑀳𑁄𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸;

𑀧𑁄𑀲𑁂𑀦𑁆𑀢𑁄 𑀫𑀸𑀢𑀸𑀧𑀺𑀢𑀭𑁄, 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀸𑀫𑀳𑀁.

𑁧𑁦𑁮. ‘‘𑀫𑀳𑀦𑁆𑀥𑀓𑀸𑀭𑀧𑀺𑀳𑀺𑀢𑀸 [𑀢𑀫𑀦𑁆𑀥𑀓𑀸𑀭𑀧𑀺𑀳𑀺𑀢𑀸 (𑀲𑁆𑀬𑀸.)], 𑀢𑀺𑀯𑀺𑀥𑀕𑁆𑀕𑀻𑀳𑀺 𑀟𑀬𑁆𑀳𑀭𑁂;

𑀏𑀢𑀸𑀤𑀺𑀲𑁂 𑀪𑀯𑁂 [𑀪𑀬𑁂 (𑀲𑀻.)] 𑀚𑀸𑀢𑁂, 𑀦𑀢𑁆𑀣𑀺 𑀓𑁄𑀘𑀺 𑀯𑀺𑀦𑀸𑀬𑀓𑁄.

𑁧𑁦𑁯. ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀤𑀺𑀧𑁆𑀧𑀢𑀺 [𑀤𑀺𑀩𑁆𑀩𑀢𑀺 (𑀓.)] [𑀚𑀺𑀦𑀲𑀸𑀲𑀦𑀁 (𑀲𑀻.)] 𑀤𑀸𑀦𑀺 𑀲𑀸𑀲𑀦𑀁;

𑀲𑀓𑁆𑀓𑀸 𑀉𑀤𑁆𑀥𑀭𑀺𑀢𑀼𑀁 𑀅𑀢𑁆𑀢𑀸, 𑀧𑀼𑀜𑁆𑀜𑀓𑀸𑀫𑁂𑀦 𑀚𑀦𑁆𑀢𑀼𑀦𑀸.

𑁧𑁧𑁦. ‘‘𑀉𑀕𑁆𑀕𑀬𑁆𑀳 𑀢𑀻𑀡𑀺 𑀲𑀭𑀡𑁂, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀕𑁄𑀧𑀬𑀺𑀁;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀧𑀝𑀺𑀫𑁄𑀓𑁆𑀔𑀸𑀫𑀺 𑀤𑀼𑀕𑁆𑀕𑀢𑀺𑀁.

𑁧𑁧𑁧. ‘‘𑀦𑀺𑀲𑀪𑁄 𑀦𑀸𑀫 𑀲𑀫𑀡𑁄, 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄;

𑀢𑀫𑀳𑀁 𑀉𑀧𑀕𑀦𑁆𑀢𑁆𑀯𑀸𑀦, 𑀲𑀭𑀡𑀕𑀫𑀦𑀁 𑀕𑀳𑀺𑀁.

𑁧𑁧𑁨. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀲𑀭𑀡𑀕𑀫𑀦𑀁, 𑀧𑀭𑀺𑀧𑀼𑀡𑁆𑀡𑀁 𑀅𑀕𑁄𑀧𑀬𑀺𑀁.

𑁧𑁧𑁩. ‘‘𑀘𑀭𑀺𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀭𑀡𑀁 𑀢𑀁 𑀅𑀦𑀼𑀲𑁆𑀲𑀭𑀺𑀁;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀁 𑀅𑀕𑀘𑁆𑀙𑀳𑀁.

𑁧𑁧𑁪. ‘‘𑀤𑁂𑀯𑀮𑁄𑀓𑀕𑀢𑁄 𑀲𑀦𑁆𑀢𑁄, 𑀧𑀼𑀜𑁆𑀜𑀓𑀫𑁆𑀫𑀲𑀫𑀸𑀳𑀺𑀢𑁄;

𑀬𑀁 𑀤𑁂𑀲𑀁 [𑀬𑀁 𑀬𑀁 𑀤𑁂𑀲𑀁 (𑀲𑁆𑀬𑀸.)] 𑀉𑀧𑀧𑀚𑁆𑀚𑀸𑀫𑀺 [𑀉𑀧𑀕𑀘𑁆𑀙𑀸𑀫𑀺 (𑀲𑀻.)], 𑀅𑀝𑁆𑀞 𑀳𑁂𑀢𑀽 𑀮𑀪𑀸𑀫𑀳𑀁.

𑁧𑁧𑁫. ‘‘𑀤𑀺𑀲𑀸𑀲𑀼 𑀧𑀽𑀚𑀺𑀢𑁄 𑀳𑁄𑀫𑀺, 𑀢𑀺𑀓𑁆𑀔𑀧𑀜𑁆𑀜𑁄 𑀪𑀯𑀸𑀫𑀳𑀁;

𑀲𑀩𑁆𑀩𑁂 𑀤𑁂𑀯𑀸𑀦𑀼𑀯𑀢𑁆𑀢𑀦𑁆𑀢𑀺, 𑀅𑀫𑀺𑀢𑀪𑁄𑀕𑀁 𑀮𑀪𑀸𑀫𑀳𑀁.

𑁧𑁧𑁬. ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀩𑁆𑀩𑀢𑁆𑀣, 𑀧𑀝𑀺𑀓𑀦𑁆𑀢𑁄 𑀪𑀯𑀸𑀫𑀳𑀁;

𑀫𑀺𑀢𑁆𑀢𑀸𑀦𑀁 𑀅𑀘𑀮𑁄 𑀳𑁄𑀫𑀺, 𑀬𑀲𑁄 𑀅𑀩𑁆𑀪𑀼𑀕𑁆𑀕𑀢𑁄 𑀫𑀫𑀁.

𑁧𑁧𑁭. ‘‘𑀅𑀲𑀻𑀢𑀺𑀓𑁆𑀔𑀢𑁆𑀢𑀼 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀤𑀺𑀩𑁆𑀩𑀲𑀼𑀔𑀁 𑀅𑀦𑀼𑀪𑀯𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁧𑁧𑁮. ‘‘𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁧𑁯. ‘‘𑀧𑀘𑁆𑀙𑀺𑀫𑁂 𑀪𑀯𑁂 𑀲𑀫𑁆𑀧𑀢𑁆𑀢𑁂, 𑀧𑀼𑀜𑁆𑀜𑀓𑀫𑁆𑀫𑀲𑀫𑀸𑀳𑀺𑀢𑁄;

𑀧𑀼𑀭𑁂 𑀲𑀸𑀯𑀢𑁆𑀣𑀺𑀬𑀁 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁧𑁨𑁦. ‘‘𑀦𑀕𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀤𑀸𑀭𑀓𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀳𑀲𑀔𑀺𑀟𑁆𑀟𑀲𑀫𑀗𑁆𑀕𑀻𑀳𑀁 [𑀲𑀸𑀳𑀁 𑀔𑀺𑀟𑁆𑀟𑀲𑀫𑀗𑁆𑀕𑀻 (𑀲𑁆𑀬𑀸.)], 𑀲𑀗𑁆𑀖𑀸𑀭𑀸𑀫𑀁 𑀉𑀧𑀸𑀕𑀫𑀺𑀁.

𑁧𑁨𑁧. ‘‘𑀢𑀢𑁆𑀣𑀤𑁆𑀤𑀲𑀸𑀲𑀺𑀁 [𑀢𑀢𑁆𑀣𑀤𑁆𑀤𑀲𑀸𑀳𑀁 (𑀓.)] 𑀲𑀫𑀡𑀁, 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀭𑀽𑀧𑀥𑀺𑀁;

𑀲𑁄 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀲𑀭𑀡𑀜𑁆𑀘 𑀅𑀤𑀸𑀲𑀺 𑀫𑁂.

𑁧𑁨𑁨. ‘‘𑀲𑁄𑀳𑀁 𑀲𑀼𑀢𑁆𑀯𑀸𑀦 𑀲𑀭𑀡𑀁, 𑀲𑀭𑀡𑀁 𑀫𑁂 𑀅𑀦𑀼𑀲𑁆𑀲𑀭𑀺𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁨𑁩. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀫𑁂 𑀯𑀲𑁆𑀲𑁂, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀺 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸.

𑁧𑁨𑁪. ‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀲𑀭𑀡𑀸𑀦𑀺 𑀅𑀕𑀘𑁆𑀙𑀳𑀁;

𑀢𑀢𑁄 𑀫𑁂 𑀲𑀼𑀓𑀢𑀁 𑀓𑀫𑁆𑀫𑀁, 𑀨𑀮𑀁 𑀤𑀲𑁆𑀲𑁂𑀲𑀺 𑀫𑁂 𑀇𑀥.

𑁧𑁨𑁫. ‘‘𑀲𑀼𑀕𑁄𑀧𑀺𑀢𑀁 𑀫𑁂 𑀲𑀭𑀡𑀁, 𑀫𑀸𑀦𑀲𑀁 𑀲𑀼𑀧𑁆𑀧𑀡𑀻𑀳𑀺𑀢𑀁;

𑀅𑀦𑀼𑀪𑁄𑀢𑁆𑀯𑀸 𑀬𑀲𑀁 𑀲𑀩𑁆𑀩𑀁, 𑀧𑀢𑁆𑀢𑁄𑀫𑁆𑀳𑀺 𑀅𑀘𑀮𑀁 𑀧𑀤𑀁.

𑁧𑁨𑁬. ‘‘𑀬𑁂𑀲𑀁 𑀲𑁄𑀢𑀸𑀯𑀥𑀸𑀦𑀢𑁆𑀣𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄;

𑀅𑀳𑀁 [𑀅𑀢𑁆𑀣𑀁 (𑀲𑁆𑀬𑀸.)] 𑀯𑁄 𑀓𑀣𑀬𑀺𑀲𑁆𑀲𑀸𑀫𑀺, 𑀲𑀸𑀫𑀁 𑀤𑀺𑀝𑁆𑀞𑀁 𑀧𑀤𑀁 𑀫𑀫.

𑁧𑁨𑁭. ‘‘‘𑀩𑀼𑀤𑁆𑀥𑁄 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑁄, 𑀯𑀢𑁆𑀢𑀢𑁂 𑀚𑀺𑀦𑀲𑀸𑀲𑀦𑀁;

𑀅𑀫𑀢𑀸 𑀯𑀸𑀤𑀺𑀢𑀸 𑀪𑁂𑀭𑀻, 𑀲𑁄𑀓𑀲𑀮𑁆𑀮𑀯𑀺𑀦𑁄𑀤𑀦𑀸.

𑁧𑁨𑁮. ‘‘‘𑀬𑀣𑀸𑀲𑀓𑁂𑀦 𑀣𑀸𑀫𑁂𑀦, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂;

𑀅𑀥𑀺𑀓𑀸𑀭𑀁 𑀓𑀭𑁂𑀬𑁆𑀬𑀸𑀣, 𑀧𑀲𑁆𑀲𑀬𑀺𑀲𑁆𑀲𑀣 𑀦𑀺𑀩𑁆𑀩𑀼𑀢𑀺𑀁.

𑁧𑁨𑁯. ‘‘‘𑀧𑀕𑁆𑀕𑀬𑁆𑀳 𑀢𑀻𑀡𑀺 𑀲𑀭𑀡𑁂, 𑀧𑀜𑁆𑀘𑀲𑀻𑀮𑀸𑀦𑀺 𑀕𑁄𑀧𑀺𑀬;

𑀩𑀼𑀤𑁆𑀥𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣.

𑁧𑁩𑁦. ‘‘‘𑀲𑀫𑁆𑀫𑀸 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸𑀦 [𑀫𑀫𑁄𑀧𑀫𑀁 𑀓𑀭𑀺𑀢𑁆𑀯𑀸𑀦 (𑀲𑀻. 𑀲𑁆𑀬𑀸.)], 𑀲𑀻𑀮𑀸𑀦𑀺 𑀧𑀭𑀺𑀕𑁄𑀧𑀺𑀬;

𑀅𑀘𑀺𑀭𑀁 𑀅𑀭𑀳𑀢𑁆𑀢𑀁 𑀯𑁄, 𑀲𑀩𑁆𑀩𑁂𑀧𑀺 𑀧𑀸𑀧𑀼𑀡𑀺𑀲𑁆𑀲𑀣.

𑁧𑁩𑁧. ‘‘‘𑀢𑁂𑀯𑀺𑀚𑁆𑀚𑁄 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀺, 𑀘𑁂𑀢𑁄𑀧𑀭𑀺𑀬𑀓𑁄𑀯𑀺𑀤𑁄;

𑀲𑀸𑀯𑀓𑁄 𑀢𑁂 𑀫𑀳𑀸𑀯𑀻𑀭, 𑀲𑀭𑀡𑁄 [𑀘𑀭𑀡𑁂 (𑀲𑀻. 𑀲𑁆𑀬𑀸.)] 𑀯𑀦𑁆𑀤𑀢𑀺 𑀲𑀢𑁆𑀣𑀼𑀦𑁄’.

𑁧𑁩𑁨. ‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀲𑀭𑀡𑀁 𑀩𑀼𑀤𑁆𑀥𑀲𑁆𑀲 𑀕𑀘𑁆𑀙𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀲𑀭𑀡𑀁 𑀕𑀫𑀦𑁂 𑀨𑀮𑀁.

𑁧𑁩𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀲𑀭𑀡𑀕𑀫𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀲𑀭𑀡𑀕𑀫𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.