𑁪. 𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁩𑁪. ‘‘𑀦𑀕𑀭𑁂 𑀘𑀦𑁆𑀤𑀯𑀢𑀺𑀬𑀸, 𑀪𑀢𑀓𑁄 𑀆𑀲𑀳𑀁 𑀢𑀤𑀸;

𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄, 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀸𑀫𑀳𑀁.

𑁧𑁩𑁫. ‘‘𑀫𑀳𑀦𑁆𑀥𑀓𑀸𑀭𑀧𑀺𑀳𑀺𑀢𑀸, 𑀢𑀺𑀯𑀺𑀥𑀕𑁆𑀕𑀻𑀳𑀺 𑀟𑀬𑁆𑀳𑀭𑁂;

𑀓𑁂𑀦 𑀦𑀼 𑀔𑁄 𑀉𑀧𑀸𑀬𑁂𑀦, 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑁂 𑀅𑀳𑀁.

𑁧𑁩𑁬. ‘‘𑀤𑁂𑀬𑁆𑀬𑀥𑀫𑁆𑀫𑁄 𑀘 𑀫𑁂 𑀦𑀢𑁆𑀣𑀺, 𑀯𑀭𑀸𑀓𑁄 𑀪𑀢𑀓𑁄 𑀅𑀳𑀁;

𑀬𑀁𑀦𑀽𑀦𑀸𑀳𑀁 𑀧𑀜𑁆𑀘𑀲𑀻𑀮𑀁, 𑀭𑀓𑁆𑀔𑁂𑀬𑁆𑀬𑀁 𑀧𑀭𑀺𑀧𑀽𑀭𑀬𑀁.

𑁧𑁩𑁭. ‘‘𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀫𑀼𑀦𑀺𑀦𑁄, 𑀦𑀺𑀲𑀪𑁄 𑀦𑀸𑀫 𑀲𑀸𑀯𑀓𑁄;

𑀢𑀫𑀳𑀁 𑀉𑀧𑀲𑀗𑁆𑀓𑀫𑁆𑀫, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀕𑁆𑀕𑀳𑀺𑀁.

𑁧𑁩𑁮. ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀧𑀜𑁆𑀘𑀲𑀻𑀮𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀕𑁄𑀧𑀬𑀺𑀁.

𑁧𑁩𑁯. ‘‘𑀫𑀘𑁆𑀘𑀼𑀓𑀸𑀮𑁂 𑀘 𑀲𑀫𑁆𑀧𑀢𑁆𑀢𑁂, 𑀤𑁂𑀯𑀸 𑀅𑀲𑁆𑀲𑀸𑀲𑀬𑀦𑁆𑀢𑀺 𑀫𑀁;

‘𑀭𑀣𑁄 𑀲𑀳𑀲𑁆𑀲𑀬𑀼𑀢𑁆𑀢𑁄 𑀢𑁂, 𑀫𑀸𑀭𑀺𑀲𑀸𑀬𑀁 [𑀫𑀸𑀭𑀺𑀲𑀲𑁆𑀲 (𑀓.)] 𑀉𑀧𑀝𑁆𑀞𑀺𑀢𑁄’.

𑁧𑁪𑁦. ‘‘𑀯𑀢𑁆𑀢𑀦𑁆𑀢𑁂 𑀘𑀭𑀺𑀫𑁂 𑀘𑀺𑀢𑁆𑀢𑁂, 𑀫𑀫 𑀲𑀻𑀮𑀁 𑀅𑀦𑀼𑀲𑁆𑀲𑀭𑀺𑀁;

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀢𑀸𑀯𑀢𑀺𑀁𑀲𑀁 𑀅𑀕𑀘𑁆𑀙𑀳𑀁.

𑁧𑁪𑁧. ‘‘𑀢𑀺𑀁𑀲𑀓𑁆𑀔𑀢𑁆𑀢𑀼𑀜𑁆𑀘 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀤𑀺𑀩𑁆𑀩𑀲𑀼𑀔𑀁 [𑀤𑀺𑀩𑁆𑀩𑀁 𑀲𑀼𑀔𑀁 (𑀲𑀻.)] 𑀅𑀦𑀼𑀪𑀯𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁧𑁪𑁨. ‘‘𑀧𑀜𑁆𑀘𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀁.

𑁧𑁪𑁩. ‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀧𑀼𑀭𑁂 𑀯𑁂𑀲𑀸𑀮𑀺𑀬𑀁 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁧𑁪𑁪. ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑁂 𑀓𑀸𑀮𑁂, 𑀤𑀺𑀧𑁆𑀧𑀦𑁆𑀢𑁂 [𑀤𑀺𑀩𑁆𑀩𑀦𑁆𑀢𑀺 (𑀓.)] 𑀚𑀺𑀦𑀲𑀸𑀲𑀦𑁂;

𑀫𑀸𑀢𑀸 𑀘 𑀫𑁂 𑀧𑀺𑀢𑀸 𑀘𑁂𑀯, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀕𑁆𑀕𑀳𑀼𑀁.

𑁧𑁪𑁫. ‘‘𑀲𑀳 𑀲𑀼𑀢𑁆𑀯𑀸𑀦𑀳𑀁 𑀲𑀻𑀮𑀁, 𑀫𑀫 𑀲𑀻𑀮𑀁 𑀅𑀦𑀼𑀲𑁆𑀲𑀭𑀺𑀁;

𑀏𑀓𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁧𑁪𑁬. ‘‘𑀚𑀸𑀢𑀺𑀬𑀸 𑀧𑀜𑁆𑀘𑀯𑀲𑁆𑀲𑁂𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁;

𑀉𑀧𑀲𑀫𑁆𑀧𑀸𑀤𑀬𑀺 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸.

𑁧𑁪𑁭. ‘‘𑀧𑀭𑀺𑀧𑀼𑀡𑁆𑀡𑀸𑀦𑀺 𑀕𑁄𑀧𑁂𑀢𑁆𑀯𑀸, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀸𑀦𑀳𑀁;

𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀳𑀁.

𑁧𑁪𑁮. ‘‘𑀲𑁆𑀯𑀸𑀳𑀁 𑀬𑀲𑀫𑀦𑀼𑀪𑀯𑀺𑀁, 𑀢𑁂𑀲𑀁 𑀲𑀻𑀮𑀸𑀦 𑀯𑀸𑀳𑀲𑀸;

𑀓𑀧𑁆𑀧𑀓𑁄𑀝𑀺𑀫𑁆𑀧𑀺 𑀓𑀺𑀢𑁆𑀢𑁂𑀦𑁆𑀢𑁄, 𑀓𑀺𑀢𑁆𑀢𑀬𑁂 𑀏𑀓𑀤𑁂𑀲𑀓𑀁.

𑁧𑁪𑁯. ‘‘𑀧𑀜𑁆𑀘𑀲𑀻𑀮𑀸𑀦𑀺 𑀕𑁄𑀧𑁂𑀢𑁆𑀯𑀸, 𑀢𑀬𑁄 𑀳𑁂𑀢𑀽 𑀮𑀪𑀸𑀫𑀳𑀁;

𑀤𑀻𑀖𑀸𑀬𑀼𑀓𑁄 𑀫𑀳𑀸𑀪𑁄𑀕𑁄, 𑀢𑀺𑀓𑁆𑀔𑀧𑀜𑁆𑀜𑁄 𑀪𑀯𑀸𑀫𑀳𑀁.

𑁧𑁫𑁦. ‘‘𑀲𑀁𑀓𑀺𑀢𑁆𑀢𑁂𑀦𑁆𑀢𑁄 𑀘 [𑀧𑀓𑀺𑀢𑁆𑀢𑁂𑀦𑁆𑀢𑁄𑀯 (𑀲𑀻.), 𑀧𑀓𑀺𑀢𑁆𑀢𑁂𑀦𑁆𑀢𑁂 𑀘 (𑀲𑁆𑀬𑀸.)] 𑀲𑀩𑁆𑀩𑁂𑀲𑀁, 𑀅𑀪𑀺𑀫𑀢𑁆𑀢𑀜𑁆𑀘 𑀧𑁄𑀭𑀺𑀲𑀁;

𑀪𑀯𑀸𑀪𑀯𑁂 𑀲𑀁𑀲𑀭𑀺𑀢𑁆𑀯𑀸, 𑀏𑀢𑁂 𑀞𑀸𑀦𑁂 𑀮𑀪𑀸𑀫𑀳𑀁.

𑁧𑁫𑁧. ‘‘𑀅𑀧𑀭𑀺𑀫𑁂𑀬𑁆𑀬𑀲𑀻𑀮𑁂𑀲𑀼, 𑀯𑀢𑁆𑀢𑀦𑁆𑀢𑀸 𑀚𑀺𑀦𑀲𑀸𑀯𑀓𑀸;

𑀪𑀯𑁂𑀲𑀼 𑀬𑀤𑀺 𑀭𑀚𑁆𑀚𑁂𑀬𑁆𑀬𑀼𑀁, 𑀯𑀺𑀧𑀸𑀓𑁄 𑀓𑀻𑀤𑀺𑀲𑁄 𑀪𑀯𑁂.

𑁧𑁫𑁨. ‘‘𑀲𑀼𑀘𑀺𑀡𑁆𑀡𑀁 𑀫𑁂 𑀧𑀜𑁆𑀘𑀲𑀻𑀮𑀁, 𑀪𑀢𑀓𑁂𑀦 𑀢𑀧𑀲𑁆𑀲𑀺𑀦𑀸 [𑀯𑀺𑀧𑀲𑁆𑀲𑀺𑀦𑀸 (𑀲𑀻.)];

𑀢𑁂𑀦 𑀲𑀻𑀮𑁂𑀦𑀳𑀁 𑀅𑀚𑁆𑀚, 𑀫𑁄𑀘𑀬𑀺𑀁 𑀲𑀩𑁆𑀩𑀩𑀦𑁆𑀥𑀦𑀸.

𑁧𑁫𑁩. ‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀧𑀜𑁆𑀘𑀲𑀻𑀮𑀸𑀦𑀺 𑀕𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀧𑀜𑁆𑀘𑀲𑀻𑀮𑀸𑀦𑀺𑀤𑀁 𑀨𑀮𑀁.

𑁧𑁫𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀲𑀻𑀮𑀲𑀫𑀸𑀤𑀸𑀦𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.