𑁮. 𑀅𑀓𑁆𑀓𑀦𑁆𑀢𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭. ‘‘𑀓𑀼𑀲𑀸𑀝𑀓𑀁 𑀕𑀳𑁂𑀢𑁆𑀯𑀸𑀦, 𑀉𑀧𑀚𑁆𑀛𑀸𑀬𑀲𑁆𑀲𑀳𑀁 𑀧𑀼𑀭𑁂;

𑀫𑀦𑁆𑀢𑀜𑁆𑀘 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀕𑀦𑁆𑀣𑀸𑀤𑁄𑀲𑀲𑁆𑀲 [𑀓𑀡𑁆𑀟𑀪𑁂𑀤𑀲𑁆𑀲 (𑀲𑀻.), 𑀕𑀡𑁆𑀟𑀪𑁂𑀤𑀲𑁆𑀲 (𑀲𑁆𑀬𑀸.)] 𑀧𑀢𑁆𑀢𑀺𑀬𑀸.

𑁩𑁮. ‘‘𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀉𑀲𑀪𑀁 𑀧𑀯𑀭𑀁 𑀅𑀕𑁆𑀕𑀁, 𑀢𑀺𑀲𑁆𑀲𑀁 𑀩𑀼𑀤𑁆𑀥𑀁 𑀕𑀡𑀼𑀢𑁆𑀢𑀫𑀁 [𑀕𑀚𑀼𑀢𑁆𑀢𑀫𑀁 (𑀲𑁆𑀬𑀸.)].

𑁩𑁯. ‘‘𑀓𑀼𑀲𑀸𑀝𑀓𑀁 𑀧𑀢𑁆𑀣𑀭𑀺𑀢𑀁, 𑀅𑀓𑁆𑀓𑀫𑀦𑁆𑀢𑀁 𑀦𑀭𑀼𑀢𑁆𑀢𑀫𑀁;

𑀲𑀫𑀼𑀕𑁆𑀕𑀢𑀁 𑀫𑀳𑀸𑀯𑀻𑀭𑀁, 𑀮𑁄𑀓𑀚𑁂𑀝𑁆𑀞𑀁 𑀦𑀭𑀸𑀲𑀪𑀁.

𑁪𑁦. ‘‘𑀤𑀺𑀲𑁆𑀯𑀸 𑀢𑀁 𑀮𑁄𑀓𑀧𑀚𑁆𑀚𑁄𑀢𑀁, 𑀯𑀺𑀫𑀮𑀁 𑀘𑀦𑁆𑀤𑀲𑀦𑁆𑀦𑀺𑀪𑀁;

𑀅𑀯𑀦𑁆𑀤𑀺𑀁 𑀲𑀢𑁆𑀣𑀼𑀦𑁄 𑀧𑀸𑀤𑁂, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑁪𑁧. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀅𑀤𑀸𑀲𑀺𑀁 𑀓𑀼𑀲𑀸𑀝𑀓𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀓𑀼𑀲𑀸𑀝𑀓𑀲𑁆𑀲𑀺𑀤𑀁 𑀨𑀮𑀁.

𑁪𑁨. ‘‘𑀲𑀢𑁆𑀢𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀏𑀓𑁄 𑀆𑀲𑀺𑀁 𑀚𑀦𑀸𑀥𑀺𑀧𑁄;

𑀲𑀼𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀅𑀓𑁆𑀓𑀦𑁆𑀢𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀅𑀓𑁆𑀓𑀦𑁆𑀢𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.