𑁭. 𑀢𑀺𑀦𑁆𑀤𑀼𑀓𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁫. ‘‘𑀕𑀺𑀭𑀺𑀤𑀼𑀕𑁆𑀕𑀘𑀭𑁄 𑀆𑀲𑀺𑀁, 𑀫𑀓𑁆𑀓𑀝𑁄 𑀣𑀸𑀫𑀯𑁂𑀕𑀺𑀓𑁄;

𑀨𑀮𑀺𑀦𑀁 𑀢𑀺𑀦𑁆𑀤𑀼𑀓𑀁 𑀤𑀺𑀲𑁆𑀯𑀸, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀦𑀼𑀲𑁆𑀲𑀭𑀺𑀁.

𑁩𑁬. ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀢𑀺𑀧𑀸𑀳𑀁, 𑀯𑀺𑀘𑀺𑀦𑀺𑀁 𑀮𑁄𑀓𑀦𑀸𑀬𑀓𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀺𑀤𑁆𑀥𑀢𑁆𑀣𑀁 𑀢𑀺𑀪𑀯𑀦𑁆𑀢𑀕𑀼𑀁.

𑁩𑁭. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀢𑁆𑀣𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄;

𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁩𑁮. ‘‘𑀧𑀸𑀫𑁄𑀚𑁆𑀚𑀁 𑀚𑀦𑀬𑀺𑀢𑁆𑀯𑀸𑀦, 𑀨𑀮𑀳𑀢𑁆𑀣𑁄 𑀉𑀧𑀸𑀕𑀫𑀺𑀁;

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸, 𑀲𑀩𑁆𑀩𑀜𑁆𑀜𑀽 𑀯𑀤𑀢𑀁 𑀯𑀭𑁄.

𑁩𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀨𑀮𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀨𑀮𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁪𑁦. ‘‘𑀲𑀢𑁆𑀢𑀧𑀜𑁆𑀜𑀸𑀲𑀓𑀧𑁆𑀧𑀫𑁆𑀳𑀺, 𑀉𑀧𑀦𑀦𑁆𑀤𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀦𑁆𑀤𑀼𑀓𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀦𑁆𑀤𑀼𑀓𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀲𑀢𑁆𑀢𑀫𑀁.