𑁨. 𑀢𑀺𑀡𑀲𑀦𑁆𑀣𑀸𑀭𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁬. ‘‘𑀬𑀤𑀸 𑀯𑀦𑀯𑀸𑀲𑀻 [𑀬𑀁 𑀤𑀸𑀬𑀯𑀸𑀲𑀺𑀓𑁄 (𑀲𑀻.)] 𑀇𑀲𑀺, 𑀢𑀺𑀡𑀁 𑀮𑀸𑀬𑀢𑀺 𑀲𑀢𑁆𑀣𑀼𑀦𑁄;

𑀲𑀩𑁆𑀩𑁂 𑀧𑀤𑀓𑁆𑀔𑀺𑀡𑀸𑀯𑀝𑁆𑀝𑀸 [𑀧𑀤𑀓𑁆𑀔𑀺𑀡𑀸𑀯𑀢𑁆𑀢𑀸 (𑀲𑀻. 𑀲𑁆𑀬𑀸.)], 𑀧𑀣𑀩𑁆𑀬𑀸 [𑀧𑀼𑀣𑀯𑁆𑀬𑀸 (𑀲𑀻.)] 𑀦𑀺𑀧𑀢𑀺𑀁𑀲𑀼 𑀢𑁂.

𑁭. ‘‘𑀢𑀫𑀳𑀁 𑀢𑀺𑀡𑀫𑀸𑀤𑀸𑀬, 𑀲𑀦𑁆𑀣𑀭𑀺𑀁 𑀥𑀭𑀡𑀼𑀢𑁆𑀢𑀫𑁂;

𑀢𑀻𑀡𑁂𑀯 𑀢𑀸𑀮𑀧𑀢𑁆𑀢𑀸𑀦𑀺, 𑀆𑀳𑀭𑀺𑀢𑁆𑀯𑀸𑀦𑀳𑀁 𑀢𑀤𑀸.

𑁮. ‘‘𑀢𑀺𑀡𑁂𑀦 𑀙𑀤𑀦𑀁 𑀓𑀢𑁆𑀯𑀸, 𑀲𑀺𑀤𑁆𑀥𑀢𑁆𑀣𑀲𑁆𑀲 𑀅𑀤𑀸𑀲𑀳𑀁;

𑀲𑀢𑁆𑀢𑀸𑀳𑀁 𑀥𑀸𑀭𑀬𑀼𑀁 𑀢𑀲𑁆𑀲 [𑀢𑀢𑁆𑀣 (𑀲𑁆𑀬𑀸.)], 𑀤𑁂𑀯𑀫𑀸𑀦𑀼𑀲𑀲𑀢𑁆𑀣𑀼𑀦𑁄.

𑁯. ‘‘𑀘𑀢𑀼𑀦𑁆𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀢𑀺𑀡𑀁 𑀅𑀤𑀤𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀢𑀺𑀡𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁧𑁦. ‘‘𑀧𑀜𑁆𑀘𑀲𑀝𑁆𑀞𑀺𑀫𑁆𑀳𑀺𑀢𑁄 𑀓𑀧𑁆𑀧𑁂, 𑀘𑀢𑁆𑀢𑀸𑀭𑁄𑀲𑀼𑀁 𑀫𑀳𑀤𑁆𑀥𑀦𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁧𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀡𑀲𑀦𑁆𑀣𑀸𑀭𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀡𑀲𑀦𑁆𑀣𑀸𑀭𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.