𑁮. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀅𑀧𑀤𑀸𑀦𑀁

𑁯𑁭. ‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀯𑀭𑀦𑀸𑀕𑁄 𑀫𑀬𑀸 𑀤𑀺𑀦𑁆𑀦𑁄, 𑀈𑀲𑀸𑀤𑀦𑁆𑀢𑁄 𑀉𑀭𑀽𑀴𑁆𑀳𑀯𑀸.

𑁯𑁮. ‘‘𑀲𑁂𑀢𑀘𑁆𑀙𑀢𑁆𑀢𑁄 𑀧𑀲𑁄𑀪𑀺𑀢𑁄, 𑀲𑀓𑀧𑁆𑀧𑀦𑁄 𑀲𑀳𑀢𑁆𑀣𑀺𑀧𑁄;

𑀅𑀕𑁆𑀖𑀸𑀧𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀲𑀗𑁆𑀖𑀸𑀭𑀸𑀫𑀁 𑀅𑀓𑀸𑀭𑀬𑀺𑀁.

𑁯𑁯. ‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀺𑀁 𑀅𑀳𑀁;

𑀫𑀳𑁄𑀖𑀤𑀸𑀦𑀁 [𑀫𑀳𑀸𑀪𑀢𑁆𑀢𑀁 (𑀲𑀻.), 𑀫𑀳𑁄𑀖𑀜𑁆𑀘 (𑀓.), 𑀫𑀳𑀸𑀤𑀸𑀦𑀁 (?)] 𑀓𑀭𑀺𑀢𑁆𑀯𑀸𑀦, 𑀦𑀺𑀬𑁆𑀬𑀸𑀤𑁂𑀲𑀺𑀁 𑀫𑀳𑁂𑀲𑀺𑀦𑁄.

𑁧𑁦𑁦. ‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀲𑀩𑁆𑀩𑁂 𑀚𑀦𑁂 𑀳𑀸𑀲𑀬𑀦𑁆𑀢𑁄, 𑀤𑁂𑀲𑁂𑀲𑀺 𑀅𑀫𑀢𑀁 𑀧𑀤𑀁.

𑁧𑁦𑁧. ‘‘𑀢𑀁 𑀫𑁂 𑀩𑀼𑀤𑁆𑀥𑁄 𑀯𑀺𑀬𑀸𑀓𑀸𑀲𑀺, 𑀚𑀮𑀚𑀼𑀢𑁆𑀢𑀭𑀦𑀸𑀫𑀓𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁧𑁦𑁨. ‘‘‘𑀘𑀢𑀼𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺, 𑀧𑀸𑀲𑀸𑀤𑁂 𑀓𑀸𑀭𑀬𑀻 𑀅𑀬𑀁;

𑀓𑀣𑀬𑀺𑀲𑁆𑀲𑀸𑀫𑀺 𑀯𑀺𑀧𑀸𑀓𑀁, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

𑁧𑁦𑁩. ‘‘‘𑀅𑀝𑁆𑀞𑀸𑀭𑀲𑀲𑀳𑀲𑁆𑀲𑀸𑀦𑀺, 𑀓𑀽𑀝𑀸𑀕𑀸𑀭𑀸 𑀪𑀯𑀺𑀲𑁆𑀲𑀭𑁂;

𑀩𑁆𑀬𑀫𑁆𑀳𑀼𑀢𑁆𑀢𑀫𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸, 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀘 𑀢𑁂.

𑁧𑁦𑁪. ‘‘‘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀁 𑀤𑁂𑀯𑀺𑀦𑁆𑀤𑁄, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺.

𑁧𑁦𑁫. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁦𑁬. ‘‘‘𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀅𑀟𑁆𑀠𑁂 𑀓𑀼𑀮𑁂 𑀫𑀳𑀸𑀪𑁄𑀕𑁂, 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺 𑀢𑀸𑀯𑀤𑁂.

𑁧𑁦𑁭. ‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀭𑀝𑁆𑀞𑀧𑀸𑀮𑁄𑀢𑀺 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼 𑀲𑀸𑀯𑀓𑁄.

𑁧𑁦𑁮. ‘‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁧𑁦𑁯. ‘‘𑀉𑀝𑁆𑀞𑀸𑀬 𑀅𑀪𑀺𑀦𑀺𑀓𑁆𑀔𑀫𑁆𑀫, 𑀚𑀳𑀺𑀢𑀸 𑀪𑁄𑀕𑀲𑀫𑁆𑀧𑀤𑀸;

𑀔𑁂𑀴𑀧𑀺𑀡𑁆𑀟𑁂𑀯 𑀪𑁄𑀕𑀫𑁆𑀳𑀺, 𑀧𑁂𑀫𑀁 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺.

𑁧𑁧𑁦. ‘‘𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂.

𑁧𑁧𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀭𑀝𑁆𑀞𑀧𑀸𑀮𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀅𑀝𑁆𑀞𑀫𑀁.