𑁪. 𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁮. ‘‘𑀢𑀺𑀲𑁆𑀲𑁄 𑀦𑀸𑀫𑀸𑀲𑀺 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀧𑀼𑀭𑀓𑁆𑀔𑀢𑁄 𑀲𑀸𑀯𑀓𑁂𑀳𑀺, 𑀭𑀣𑀺𑀬𑀁 𑀧𑀝𑀺𑀧𑀚𑁆𑀚𑀣.

𑁧𑁯. ‘‘𑀧𑀜𑁆𑀘 𑀉𑀧𑁆𑀧𑀮𑀳𑀢𑁆𑀣𑀸 𑀘, 𑀘𑀸𑀢𑀼𑀭𑀸 𑀞𑀧𑀺𑀢𑀸 𑀫𑀬𑀸;

𑀆𑀳𑀼𑀢𑀺𑀁 𑀤𑀸𑀢𑀼𑀓𑀸𑀫𑁄𑀳𑀁, 𑀧𑀕𑁆𑀕𑀡𑁆𑀳𑀺𑀁 𑀯𑀢𑀲𑀺𑀤𑁆𑀥𑀺𑀬𑀸 [𑀧𑀼𑀢𑁆𑀢𑁄𑀫𑁆𑀳𑀺 𑀳𑀺𑀢𑀲𑀺𑀤𑁆𑀥𑀺𑀬𑀸 (𑀲𑁆𑀬𑀸.)].

𑁨𑁦. ‘‘𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑁆𑀩𑀼𑀤𑁆𑀥𑀁, 𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀧𑀡𑁂;

𑀩𑀼𑀤𑁆𑀥𑀭𑀁𑀲𑀻𑀳𑀺 𑀨𑀼𑀝𑁆𑀞𑁄𑀲𑁆𑀫𑀺 [𑀩𑀼𑀤𑁆𑀥𑀭𑀁𑀲𑁆𑀬𑀸𑀪𑀺𑀨𑀼𑀝𑁆𑀞𑁄𑀫𑁆𑀳𑀺 (𑀲𑀻.), 𑀩𑀼𑀤𑁆𑀥𑀭𑀁𑀲𑀸𑀪𑀺𑀖𑀼𑀝𑁆𑀞𑁄𑀲𑁆𑀫𑀺 (𑀓.)], 𑀧𑀽𑀚𑁂𑀲𑀺𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁.

𑁨𑁧. ‘‘𑀤𑁆𑀯𑁂𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁨. ‘‘𑀇𑀢𑁄 𑀢𑁂𑀭𑀲𑀓𑀧𑁆𑀧𑀫𑁆𑀳𑀺, 𑀧𑀜𑁆𑀘 𑀲𑀼𑀲𑀪𑀲𑀫𑁆𑀫𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁨𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀜𑁆𑀘𑀳𑀢𑁆𑀣𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀜𑁆𑀘𑀳𑀢𑁆𑀣𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀘𑀢𑀼𑀢𑁆𑀣𑀁.