𑁯. 𑀢𑀺𑀓𑀺𑀘𑁆𑀙𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯. ‘‘𑀦𑀕𑀭𑁂 𑀩𑀦𑁆𑀥𑀼𑀫𑀢𑀺𑀬𑀸, 𑀯𑁂𑀚𑁆𑀚𑁄 𑀆𑀲𑀺𑀁 𑀲𑀼𑀲𑀺𑀓𑁆𑀔𑀺𑀢𑁄;

𑀆𑀢𑀼𑀭𑀸𑀦𑀁 𑀲𑀤𑀼𑀓𑁆𑀔𑀸𑀦𑀁, 𑀫𑀳𑀸𑀚𑀦𑀲𑀼𑀔𑀸𑀯𑀳𑁄.

𑁪𑁦. ‘‘𑀩𑁆𑀬𑀸𑀥𑀺𑀢𑀁 𑀲𑀫𑀡𑀁 𑀤𑀺𑀲𑁆𑀯𑀸, 𑀲𑀻𑀮𑀯𑀦𑁆𑀢𑀁 𑀫𑀳𑀸𑀚𑀼𑀢𑀺𑀁;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀪𑁂𑀲𑀚𑁆𑀚𑀫𑀤𑀤𑀺𑀁 𑀢𑀤𑀸.

𑁪𑁧. ‘‘𑀅𑀭𑁄𑀕𑁄 𑀆𑀲𑀺 𑀢𑁂𑀦𑁂𑀯, 𑀲𑀫𑀡𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀅𑀲𑁄𑀓𑁄 𑀦𑀸𑀫 𑀦𑀸𑀫𑁂𑀦, 𑀉𑀧𑀝𑁆𑀞𑀸𑀓𑁄 𑀯𑀺𑀧𑀲𑁆𑀲𑀺𑀦𑁄.

𑁪𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀑𑀲𑀥𑀫𑀤𑀸𑀲𑀳𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀪𑁂𑀲𑀚𑁆𑀚𑀲𑁆𑀲 𑀇𑀤𑀁 𑀨𑀮𑀁.

𑁪𑁩. ‘‘𑀇𑀢𑁄 𑀘 𑀅𑀝𑁆𑀞𑀫𑁂 𑀓𑀧𑁆𑀧𑁂, 𑀲𑀩𑁆𑀩𑁄𑀲𑀥𑀲𑀦𑀸𑀫𑀓𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀺𑀓𑀺𑀘𑁆𑀙𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀺𑀓𑀺𑀘𑁆𑀙𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.