𑁫. 𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁨𑁧. ‘‘𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀧𑀤𑀼𑀫𑀼𑀢𑁆𑀢𑀭𑀦𑀸𑀬𑀓𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀲𑀻𑀳𑀸𑀲𑀦𑀫𑀤𑀸𑀲𑀳𑀁.

𑁨𑁨. ‘‘𑀩𑀳𑀽𑀳𑀺 𑀕𑀦𑁆𑀥𑀫𑀸𑀮𑁂𑀳𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀸𑀯𑀳𑁂;

𑀢𑀢𑁆𑀣 𑀧𑀽𑀚𑀜𑁆𑀘 𑀓𑀢𑁆𑀯𑀸𑀦, 𑀦𑀺𑀩𑁆𑀩𑀸𑀬𑀢𑀺 𑀩𑀳𑀼𑀚𑁆𑀚𑀦𑁄.

𑁨𑁩. ‘‘𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀯𑀦𑁆𑀤𑀺𑀢𑁆𑀯𑀸 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀤𑀼𑀕𑁆𑀕𑀢𑀺𑀁 𑀦𑀼𑀧𑀧𑀚𑁆𑀚𑀳𑀁.

𑁨𑁪. ‘‘𑀧𑀦𑁆𑀦𑀭𑀲𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑀸𑀦𑀁 𑀅𑀝𑁆𑀞 𑀆𑀲𑀼 𑀢𑁂 [𑀅𑀝𑁆𑀞 𑀆𑀲𑀬𑀼𑀁 (𑀓.)];

𑀲𑀺𑀮𑀼𑀘𑁆𑀘𑀬𑀲𑀦𑀸𑀫𑀸 𑀘, 𑀭𑀸𑀚𑀸𑀦𑁄 𑀘𑀓𑁆𑀓𑀯𑀢𑁆𑀢𑀺𑀦𑁄.

𑁨𑁫. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀳𑀸𑀲𑀦𑀤𑀸𑀬𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺;

𑀲𑀻𑀳𑀸𑀲𑀦𑀤𑀸𑀬𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀧𑀜𑁆𑀘𑀫𑀁.