𑁨. 𑀢𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀅𑀧𑀤𑀸𑀦𑀁

𑁭. ‘‘𑀧𑀭𑀓𑀫𑁆𑀫𑀸𑀬𑀦𑁂 𑀬𑀼𑀢𑁆𑀢𑁄, 𑀅𑀧𑀭𑀸𑀥𑀁 𑀅𑀓𑀸𑀲𑀳𑀁;

𑀯𑀦𑀦𑁆𑀢𑀁 𑀅𑀪𑀺𑀥𑀸𑀯𑀺𑀲𑁆𑀲𑀁, 𑀪𑀬𑀯𑁂𑀭𑀲𑀫𑀧𑁆𑀧𑀺𑀢𑁄.

𑁮. ‘‘𑀧𑀼𑀧𑁆𑀨𑀺𑀢𑀁 𑀧𑀸𑀤𑀧𑀁 𑀤𑀺𑀲𑁆𑀯𑀸, 𑀧𑀺𑀡𑁆𑀟𑀺𑀩𑀦𑁆𑀥𑀁 𑀲𑀼𑀦𑀺𑀫𑁆𑀫𑀺𑀢𑀁;

𑀢𑀫𑁆𑀩𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀦, 𑀩𑁄𑀥𑀺𑀬𑀁 𑀑𑀓𑀺𑀭𑀺𑀁 𑀅𑀳𑀁.

𑁯. ‘‘𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀢𑀁 𑀩𑁄𑀥𑀺𑀁, 𑀧𑀸𑀝𑀮𑀺𑀁 𑀧𑀸𑀤𑀧𑀼𑀢𑁆𑀢𑀫𑀁;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀩𑁄𑀥𑀺𑀫𑀽𑀮𑁂 𑀉𑀧𑀸𑀯𑀺𑀲𑀺𑀁.

𑁧𑁦. ‘‘𑀕𑀢𑀫𑀕𑁆𑀕𑀁 𑀕𑀯𑁂𑀲𑀦𑁆𑀢𑀸, 𑀆𑀕𑀘𑁆𑀙𑀼𑀁 𑀫𑀫 𑀲𑀦𑁆𑀢𑀺𑀓𑀁;

𑀢𑁂 𑀘 𑀤𑀺𑀲𑁆𑀯𑀸𑀦𑀳𑀁 𑀢𑀢𑁆𑀣, 𑀆𑀯𑀚𑁆𑀚𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁.

𑁧𑁧. ‘‘𑀯𑀦𑁆𑀤𑀺𑀢𑁆𑀯𑀸𑀦 𑀅𑀳𑀁 𑀩𑁄𑀥𑀺𑀁, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀅𑀦𑁂𑀓𑀢𑀸𑀮𑁂 𑀧𑀧𑀢𑀺𑀁, 𑀕𑀺𑀭𑀺𑀤𑀼𑀕𑁆𑀕𑁂 𑀪𑀬𑀸𑀦𑀓𑁂.

𑁧𑁨. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑁄𑀥𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁩. ‘‘𑀇𑀢𑁄 𑀘 𑀢𑀢𑀺𑀬𑁂 𑀓𑀧𑁆𑀧𑁂, 𑀭𑀸𑀚𑀸 𑀲𑀼𑀲𑀜𑁆𑀜𑀢𑁄 𑀅𑀳𑀁 [𑀲𑀁𑀣𑀼𑀲𑀺𑀢𑁄 𑀅𑀳𑀼𑀁 (𑀲𑀻.)];

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁧𑁪. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀢𑀫𑁆𑀩𑀧𑀼𑀧𑁆𑀨𑀺𑀬𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀢𑀫𑁆𑀩𑀧𑀼𑀧𑁆𑀨𑀺𑀬𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.