𑁨. 𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁧𑁦. ‘‘𑀯𑀺𑀦𑀢𑀸 𑀦𑀤𑀺𑀬𑀸 [𑀯𑀺𑀢𑁆𑀣𑀢𑀸𑀬 𑀦𑀤𑀺𑀬𑀸 (𑀲𑁆𑀬𑀸.)] 𑀢𑀻𑀭𑁂, 𑀧𑀺𑀮𑀓𑁆𑀔𑀼 [𑀧𑀺𑀮𑀓𑁆𑀔𑁄 (𑀲𑀻. 𑀣𑁂𑀭𑀕𑀸𑀣𑀸 𑀅𑀝𑁆𑀞.)] 𑀨𑀮𑀺𑀢𑁄 𑀅𑀳𑀼;

𑀢𑀸𑀳𑀁 𑀭𑀼𑀓𑁆𑀔𑀁 𑀕𑀯𑁂𑀲𑀦𑁆𑀢𑁄, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁧𑁧. ‘‘𑀓𑁂𑀢𑀓𑀁 𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸, 𑀯𑀡𑁆𑀝𑁂 𑀙𑁂𑀢𑁆𑀯𑀸𑀦𑀳𑀁 𑀢𑀤𑀸;

𑀩𑀼𑀤𑁆𑀥𑀲𑁆𑀲 𑀅𑀪𑀺𑀭𑁄𑀧𑁂𑀲𑀺𑀁, 𑀲𑀺𑀔𑀺𑀦𑁄 𑀮𑁄𑀓𑀩𑀦𑁆𑀥𑀼𑀦𑁄.

𑁧𑁨. ‘‘𑀬𑁂𑀦 𑀜𑀸𑀡𑁂𑀦 𑀧𑀢𑁆𑀢𑁄𑀲𑀺, 𑀅𑀘𑁆𑀘𑀼𑀢𑀁 𑀅𑀫𑀢𑀁 𑀧𑀤𑀁;

𑀢𑀁 𑀜𑀸𑀡𑀁 𑀅𑀪𑀺𑀧𑀽𑀚𑁂𑀫𑀺, 𑀩𑀼𑀤𑁆𑀥𑀲𑁂𑀝𑁆𑀞 𑀫𑀳𑀸𑀫𑀼𑀦𑀺.

𑁧𑁩. ‘‘𑀜𑀸𑀡𑀫𑁆𑀳𑀺 𑀧𑀽𑀚𑀁 𑀓𑀢𑁆𑀯𑀸𑀦, 𑀧𑀺𑀮𑀓𑁆𑀔𑀼𑀫𑀤𑁆𑀤𑀲𑀁 𑀅𑀳𑀁;

𑀧𑀝𑀺𑀮𑀤𑁆𑀥𑁄𑀫𑁆𑀳𑀺 𑀢𑀁 𑀧𑀜𑁆𑀜𑀁 [𑀢𑀁 𑀲𑀜𑁆𑀜𑀁 (𑀲𑁆𑀬𑀸.), 𑀢𑀁 𑀧𑀼𑀜𑁆𑀜𑀁 (𑀓.)], 𑀜𑀸𑀡𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁪. ‘‘𑀏𑀓𑀢𑁆𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀧𑀼𑀧𑁆𑀨𑀫𑀪𑀺𑀭𑁄𑀧𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀜𑀸𑀡𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁧𑁫. ‘‘𑀇𑀢𑁄 𑀢𑁂𑀭𑀲𑀓𑀧𑁆𑀧𑀫𑁆𑀳𑀺, 𑀤𑁆𑀯𑀸𑀤𑀲𑀸𑀲𑀼𑀁 𑀨𑀮𑀼𑀕𑁆𑀕𑀢𑀸;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀧𑁆𑀨𑀮𑀸.

𑁧𑁬. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀤𑀲𑁆𑀲𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀲𑀼𑀤𑀲𑁆𑀲𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.