𑁯. 𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀜𑁆𑀜𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁭𑁨. ‘‘𑀅𑀢𑁆𑀣𑀤𑀲𑁆𑀲𑀺𑀫𑁆𑀳𑀺 𑀲𑀼𑀕𑀢𑁂, 𑀦𑀺𑀩𑁆𑀩𑀼𑀢𑁂 𑀲𑀫𑀦𑀦𑁆𑀢𑀭𑀸;

𑀬𑀓𑁆𑀔𑀬𑁄𑀦𑀺𑀁 𑀉𑀧𑀧𑀚𑁆𑀚𑀺𑀁, 𑀬𑀲𑀁 𑀧𑀢𑁆𑀢𑁄 𑀘𑀳𑀁 𑀢𑀤𑀸.

𑁭𑁩. ‘‘𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂 𑀆𑀲𑀺, 𑀤𑀼𑀧𑁆𑀧𑀪𑀸𑀢𑀁 𑀤𑀼𑀭𑀼𑀝𑁆𑀞𑀺𑀢𑀁;

𑀬𑀁 𑀫𑁂 𑀪𑁄𑀕𑁂 𑀯𑀺𑀚𑁆𑀚𑀫𑀸𑀦𑁂, 𑀧𑀭𑀺𑀦𑀺𑀩𑁆𑀩𑀸𑀬𑀺 𑀘𑀓𑁆𑀔𑀼𑀫𑀸.

𑁭𑁪. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀲𑀸𑀕𑀭𑁄 𑀦𑀸𑀫 𑀲𑀸𑀯𑀓𑁄;

𑀫𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑁄 𑀲𑁄, 𑀆𑀕𑀘𑁆𑀙𑀺 𑀫𑀫 𑀲𑀦𑁆𑀢𑀺𑀓𑀁.

𑁭𑁫. ‘‘𑀓𑀺𑀁 𑀦𑀼 𑀲𑁄𑀘𑀲𑀺 𑀫𑀸 𑀪𑀸𑀬𑀺, 𑀘𑀭 𑀥𑀫𑁆𑀫𑀁 𑀲𑀼𑀫𑁂𑀥𑀲;

𑀅𑀦𑀼𑀧𑁆𑀧𑀤𑀺𑀦𑁆𑀦𑀸 𑀩𑀼𑀤𑁆𑀥𑁂𑀦, 𑀲𑀩𑁆𑀩𑁂𑀲𑀁 𑀩𑀻𑀚𑀲𑀫𑁆𑀧𑀤𑀸.

𑁭𑁬. ‘‘𑀲𑁄 𑀘𑁂 𑀧𑀽𑀚𑁂𑀬𑁆𑀬 𑀲𑀫𑁆𑀩𑀼𑀤𑁆𑀥𑀁, 𑀢𑀺𑀝𑁆𑀞𑀦𑁆𑀢𑀁 𑀮𑁄𑀓𑀦𑀸𑀬𑀓𑀁;

𑀥𑀸𑀢𑀼𑀁 𑀲𑀸𑀲𑀧𑀫𑀢𑁆𑀢𑀫𑁆𑀧𑀺, 𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀧𑀽𑀚𑀬𑁂.

𑁭𑁭. ‘‘𑀲𑀫𑁂 𑀘𑀺𑀢𑁆𑀢𑀧𑁆𑀧𑀲𑀸𑀤𑀫𑁆𑀳𑀺, 𑀲𑀫𑀁 𑀧𑀼𑀜𑁆𑀜𑀁 𑀫𑀳𑀕𑁆𑀕𑀢𑀁;

𑀢𑀲𑁆𑀫𑀸 𑀣𑀽𑀧𑀁 𑀓𑀭𑀺𑀢𑁆𑀯𑀸𑀦, 𑀧𑀽𑀚𑁂𑀳𑀺 𑀚𑀺𑀦𑀥𑀸𑀢𑀼𑀬𑁄.

𑁭𑁮. ‘‘𑀲𑀸𑀕𑀭𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀩𑀼𑀤𑁆𑀥𑀣𑀽𑀧𑀁 𑀅𑀓𑀸𑀲𑀳𑀁;

𑀧𑀜𑁆𑀘𑀯𑀲𑁆𑀲𑁂 𑀧𑀭𑀺𑀘𑀭𑀺𑀁, 𑀫𑀼𑀦𑀺𑀦𑁄 𑀣𑀽𑀧𑀫𑀼𑀢𑁆𑀢𑀫𑀁.

𑁭𑁯. ‘‘𑀢𑁂𑀦 𑀓𑀫𑁆𑀫𑁂𑀦 𑀤𑁆𑀯𑀺𑀧𑀤𑀺𑀦𑁆𑀤, 𑀮𑁄𑀓𑀚𑁂𑀝𑁆𑀞 𑀦𑀭𑀸𑀲𑀪;

𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑁆𑀯𑀸𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁮𑁦. ‘‘𑀪𑀽𑀭𑀺𑀧𑀜𑁆𑀜𑀸 𑀘 𑀘𑀢𑁆𑀢𑀸𑀭𑁄, 𑀲𑀢𑁆𑀢𑀓𑀧𑁆𑀧𑀲𑀢𑁂 𑀇𑀢𑁄;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁮𑁧. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀜𑁆𑀜𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀧𑀘𑁆𑀘𑀼𑀧𑀝𑁆𑀞𑀸𑀦𑀲𑀜𑁆𑀜𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀦𑀯𑀫𑀁.