𑁧𑁦. 𑀚𑀸𑀢𑀺𑀧𑀽𑀚𑀓𑀢𑁆𑀣𑁂𑀭𑀅𑀧𑀤𑀸𑀦𑀁

𑁮𑁨. ‘‘𑀚𑀸𑀬𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲, 𑀆𑀮𑁄𑀓𑁄 𑀯𑀺𑀧𑀼𑀮𑁄 𑀅𑀳𑀼;

𑀧𑀣𑀯𑀻 𑀘 𑀧𑀓𑀫𑁆𑀧𑀺𑀢𑁆𑀣, 𑀲𑀲𑀸𑀕𑀭𑀸 𑀲𑀧𑀩𑁆𑀩𑀢𑀸.

𑁮𑁩. ‘‘𑀦𑁂𑀫𑀺𑀢𑁆𑀢𑀸 𑀘 𑀯𑀺𑀬𑀸𑀓𑀁𑀲𑀼, 𑀩𑀼𑀤𑁆𑀥𑁄 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺;

𑀅𑀕𑁆𑀕𑁄 𑀘 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀚𑀦𑀢𑀁 𑀉𑀤𑁆𑀥𑀭𑀺𑀲𑁆𑀲𑀢𑀺.

𑁮𑁪. ‘‘𑀦𑁂𑀫𑀺𑀢𑁆𑀢𑀸𑀦𑀁 𑀲𑀼𑀡𑀺𑀢𑁆𑀯𑀸𑀦, 𑀚𑀸𑀢𑀺𑀧𑀽𑀚𑀫𑀓𑀸𑀲𑀳𑀁;

𑀏𑀤𑀺𑀲𑀸 𑀧𑀽𑀚𑀦𑀸 𑀦𑀢𑁆𑀣𑀺, 𑀬𑀸𑀤𑀺𑀲𑀸 𑀚𑀸𑀢𑀺𑀧𑀽𑀚𑀦𑀸.

𑁮𑁫. ‘‘𑀲𑀗𑁆𑀔𑀭𑀺𑀢𑁆𑀯𑀸𑀦 [𑀲𑀁𑀳𑀭𑀺𑀢𑁆𑀯𑀸𑀦 (𑀲𑀻. 𑀲𑁆𑀬𑀸.), 𑀲𑀗𑁆𑀓𑀭𑀺𑀢𑁆𑀯𑀸𑀦 (𑀓.)]

𑀓𑀼𑀲𑀮𑀁, 𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑀚𑀸𑀢𑀺𑀧𑀽𑀚𑀁 𑀓𑀭𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀅𑀳𑀁.

𑁮𑁬. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀤𑁂𑀯𑀢𑁆𑀢𑀁 𑀅𑀣 𑀫𑀸𑀦𑀼𑀲𑀁;

𑀲𑀩𑁆𑀩𑁂 𑀲𑀢𑁆𑀢𑁂 𑀅𑀪𑀺𑀪𑁄𑀫𑀺, 𑀚𑀸𑀢𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮𑁭. ‘‘𑀥𑀸𑀢𑀺𑀬𑁄 𑀫𑀁 𑀉𑀧𑀝𑁆𑀞𑀦𑁆𑀢𑀺, 𑀫𑀫 𑀘𑀺𑀢𑁆𑀢𑀯𑀲𑀸𑀦𑀼𑀕𑀸;

𑀦 𑀢𑀸 𑀲𑀓𑁆𑀓𑁄𑀦𑁆𑀢𑀺 𑀓𑁄𑀧𑁂𑀢𑀼𑀁, 𑀚𑀸𑀢𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮𑁮. ‘‘𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀬𑀁 𑀧𑀽𑀚𑀫𑀓𑀭𑀺𑀁 𑀢𑀤𑀸;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀚𑀸𑀢𑀺𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁮𑁯. ‘‘𑀲𑀼𑀧𑀸𑀭𑀺𑀘𑀭𑀺𑀬𑀸 𑀦𑀸𑀫, 𑀘𑀢𑀼𑀢𑁆𑀢𑀺𑀁𑀲 𑀚𑀦𑀸𑀥𑀺𑀧𑀸;

𑀇𑀢𑁄 𑀢𑀢𑀺𑀬𑀓𑀧𑁆𑀧𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑀸.

𑁯𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀚𑀸𑀢𑀺𑀧𑀽𑀚𑀓𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀚𑀸𑀢𑀺𑀧𑀽𑀚𑀓𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀫𑀳𑀸𑀧𑀭𑀺𑀯𑀸𑀭𑀯𑀕𑁆𑀕𑁄 𑀤𑁆𑀯𑀸𑀤𑀲𑀫𑁄.