𑁩-𑁨. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁭𑁫. ‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀯𑀺𑀳𑀸𑀲𑀺 𑀳𑀺𑀫𑀯𑀦𑁆𑀢𑀫𑁆𑀳𑀺, 𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑁄.

𑁩𑁭𑁬. ‘‘𑀯𑀭𑀼𑀡𑁄 𑀦𑀸𑀫 𑀦𑀸𑀫𑁂𑀦, 𑀦𑀸𑀕𑀭𑀸𑀚𑀸 𑀅𑀳𑀁 𑀢𑀤𑀸;

𑀓𑀸𑀫𑀭𑀽𑀧𑀻 𑀯𑀺𑀓𑀼𑀩𑁆𑀩𑀸𑀫𑀺, 𑀫𑀳𑁄𑀤𑀥𑀺𑀦𑀺𑀯𑀸𑀲𑀳𑀁.

𑁩𑁭𑁭. ‘‘𑀲𑀗𑁆𑀕𑀡𑀺𑀬𑀁 𑀕𑀡𑀁 𑀳𑀺𑀢𑁆𑀯𑀸, 𑀢𑀽𑀭𑀺𑀬𑀁 𑀧𑀝𑁆𑀞𑀧𑁂𑀲𑀳𑀁;

𑀲𑀫𑁆𑀩𑀼𑀤𑁆𑀥𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀯𑀸𑀤𑁂𑀲𑀼𑀁 𑀅𑀘𑁆𑀙𑀭𑀸 𑀢𑀤𑀸.

𑁩𑁭𑁮. ‘‘𑀯𑀚𑁆𑀚𑀫𑀸𑀦𑁂𑀲𑀼 𑀢𑀽𑀭𑁂𑀲𑀼, 𑀤𑁂𑀯𑀸 𑀢𑀽𑀭𑀸𑀦𑀺 [𑀢𑀼𑀭𑀺𑀬𑁂𑀲𑀼, 𑀤𑁂𑀯𑀸 𑀢𑀼𑀭𑀺𑀬𑀸𑀦𑀺 (𑀲𑀻. 𑀲𑁆𑀬𑀸.)] 𑀯𑀚𑁆𑀚𑀬𑀼𑀁;

𑀉𑀪𑀺𑀦𑁆𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦, 𑀩𑀼𑀤𑁆𑀥𑁄𑀧𑀺 𑀲𑀫𑁆𑀧𑀩𑀼𑀚𑁆𑀛𑀣.

𑁩𑁭𑁯. ‘‘𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑀁, 𑀲𑀓𑀁 𑀪𑀯𑀦𑀼𑀧𑀸𑀕𑀫𑀺𑀁;

𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀦, 𑀓𑀸𑀮𑀫𑀸𑀭𑁄𑀘𑀬𑀺𑀁 𑀅𑀳𑀁.

𑁩𑁮𑁦. ‘‘𑀔𑀻𑀡𑀸𑀲𑀯𑀲𑀳𑀲𑁆𑀲𑁂𑀳𑀺, 𑀧𑀭𑀺𑀯𑀼𑀢𑁄 𑀮𑁄𑀓𑀦𑀸𑀬𑀓𑁄;

𑀑𑀪𑀸𑀲𑁂𑀦𑁆𑀢𑁄 𑀤𑀺𑀲𑀸 𑀲𑀩𑁆𑀩𑀸, 𑀪𑀯𑀦𑀁 𑀫𑁂 𑀉𑀧𑀸𑀕𑀫𑀺.

𑁩𑁮𑁧. ‘‘𑀉𑀧𑀯𑀺𑀝𑁆𑀞𑀁 𑀫𑀳𑀸𑀯𑀻𑀭𑀁, 𑀤𑁂𑀯𑀤𑁂𑀯𑀁 𑀦𑀭𑀸𑀲𑀪𑀁;

𑀲𑀪𑀺𑀓𑁆𑀔𑀼𑀲𑀗𑁆𑀖𑀁 𑀢𑀧𑁆𑀧𑁂𑀲𑀺𑀁 [𑀲𑀦𑁆𑀢𑀧𑁆𑀧𑁂𑀲𑀺𑀁 (𑀲𑁆𑀬𑀸.), 𑀢𑀧𑁆𑀧𑁂𑀫𑀺 (𑀓.)], 𑀅𑀦𑁆𑀦𑀧𑀸𑀦𑁂𑀦𑀳𑀁 𑀢𑀤𑀸.

𑁩𑁮𑁨. ‘‘𑀅𑀦𑀼𑀫𑁄𑀤𑀺 𑀫𑀳𑀸𑀯𑀻𑀭𑁄, 𑀲𑀬𑀫𑁆𑀪𑀽 𑀅𑀕𑁆𑀕𑀧𑀼𑀕𑁆𑀕𑀮𑁄;

𑀪𑀺𑀓𑁆𑀔𑀼𑀲𑀗𑁆𑀖𑁂 𑀦𑀺𑀲𑀻𑀤𑀺𑀢𑁆𑀯𑀸, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁮𑁩. ‘‘‘𑀬𑁄 𑀲𑁄 [𑀬𑀁 𑀲𑁄 (𑀓.)] 𑀲𑀗𑁆𑀖𑀁 𑀅𑀧𑀽𑀚𑁂𑀲𑀺, 𑀩𑀼𑀤𑁆𑀥𑀜𑁆𑀘 𑀮𑁄𑀓𑀦𑀸𑀬𑀓𑀁;

𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦, 𑀤𑁂𑀯𑀮𑁄𑀓𑀁 𑀕𑀫𑀺𑀲𑁆𑀲𑀢𑀺.

𑁩𑁮𑁪. ‘‘‘𑀲𑀢𑁆𑀢𑀲𑀢𑁆𑀢𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀧𑀣𑀩𑁆𑀬𑀸 𑀭𑀚𑁆𑀚𑀁 𑀅𑀝𑁆𑀞𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁩𑁮𑁫. ‘‘‘𑀧𑀜𑁆𑀘𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀪𑁄𑀕𑀸 𑀅𑀲𑀗𑁆𑀔𑀺𑀬𑀸 𑀢𑀲𑁆𑀲, 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀢𑀸𑀯𑀤𑁂.

𑁩𑁮𑁬. ‘‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦 [𑀦𑀸𑀫𑁂𑀦 (𑀲𑀻.)], 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁩𑁮𑁭. ‘‘‘𑀦𑀺𑀭𑀬𑀸 𑀲𑁄 𑀘𑀯𑀺𑀢𑁆𑀯𑀸𑀦, 𑀫𑀦𑀼𑀲𑁆𑀲𑀢𑀁 𑀕𑀫𑀺𑀲𑁆𑀲𑀢𑀺;

𑀓𑁄𑀮𑀺𑀢𑁄 𑀦𑀸𑀫 𑀦𑀸𑀫𑁂𑀦, 𑀩𑁆𑀭𑀳𑁆𑀫𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺.

𑁩𑁮𑁮. ‘‘‘𑀲𑁄 𑀧𑀘𑁆𑀙𑀸 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀓𑀼𑀲𑀮𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀕𑁄𑀢𑀫𑀲𑁆𑀲 𑀪𑀕𑀯𑀢𑁄, 𑀤𑀼𑀢𑀺𑀬𑁄 𑀳𑁂𑀲𑁆𑀲𑀢𑀺 𑀲𑀸𑀯𑀓𑁄.

𑁩𑁮𑁯. ‘‘‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄’.

𑁩𑁯𑁦. ‘‘𑀧𑀸𑀧𑀫𑀺𑀢𑁆𑀢𑁄𑀧𑀦𑀺𑀲𑁆𑀲𑀸𑀬, 𑀓𑀸𑀫𑀭𑀸𑀕𑀯𑀲𑀁 𑀕𑀢𑁄;

𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀖𑀸𑀢𑀬𑀺𑀁 𑀤𑀼𑀝𑁆𑀞𑀫𑀸𑀦𑀲𑁄.

𑁩𑁯𑁧. ‘‘𑀬𑀁 𑀬𑀁 𑀬𑁄𑀦𑀼𑀧𑀧𑀚𑁆𑀚𑀸𑀫𑀺, 𑀦𑀺𑀭𑀬𑀁 𑀅𑀣 𑀫𑀸𑀦𑀼𑀲𑀁;

𑀧𑀸𑀧𑀓𑀫𑁆𑀫𑀲𑀫𑀗𑁆𑀕𑀺𑀢𑀸, 𑀪𑀺𑀦𑁆𑀦𑀲𑀻𑀲𑁄 𑀫𑀭𑀸𑀫𑀳𑀁.

𑁩𑁯𑁨. ‘‘𑀇𑀤𑀁 𑀧𑀘𑁆𑀙𑀺𑀫𑀓𑀁 𑀫𑀬𑁆𑀳𑀁, 𑀘𑀭𑀺𑀫𑁄 𑀯𑀢𑁆𑀢𑀢𑁂 𑀪𑀯𑁄;

𑀇𑀥𑀸𑀧𑀺 𑀏𑀤𑀺𑀲𑁄 𑀫𑀬𑁆𑀳𑀁, 𑀫𑀭𑀡𑀓𑀸𑀮𑁂 𑀪𑀯𑀺𑀲𑁆𑀲𑀢𑀺.

𑁩𑁯𑁩. ‘‘𑀧𑀯𑀺𑀯𑁂𑀓𑀫𑀦𑀼𑀬𑀼𑀢𑁆𑀢𑁄, 𑀲𑀫𑀸𑀥𑀺𑀪𑀸𑀯𑀦𑀸𑀭𑀢𑁄;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁯𑁪. ‘‘𑀥𑀭𑀡𑀺𑀫𑁆𑀧𑀺 𑀲𑀼𑀕𑀫𑁆𑀪𑀻𑀭𑀁, 𑀩𑀳𑀮𑀁 𑀤𑀼𑀧𑁆𑀧𑀥𑀁𑀲𑀺𑀬𑀁;

𑀯𑀸𑀫𑀗𑁆𑀕𑀼𑀝𑁆𑀞𑁂𑀦 𑀔𑁄𑀪𑁂𑀬𑁆𑀬𑀁, 𑀇𑀤𑁆𑀥𑀺𑀬𑀸 𑀧𑀸𑀭𑀫𑀺𑀁 𑀕𑀢𑁄.

𑁩𑁯𑁫. ‘‘𑀅𑀲𑁆𑀫𑀺𑀫𑀸𑀦𑀁 𑀦 𑀧𑀲𑁆𑀲𑀸𑀫𑀺, 𑀫𑀸𑀦𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀲𑀸𑀫𑀡𑁂𑀭𑁂 𑀉𑀧𑀸𑀤𑀸𑀬, 𑀕𑀭𑀼𑀘𑀺𑀢𑁆𑀢𑀁 𑀓𑀭𑁄𑀫𑀳𑀁.

𑁩𑁯𑁬. ‘‘𑀅𑀧𑀭𑀺𑀫𑁂𑀬𑁆𑀬𑁂 𑀇𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀪𑀺𑀦𑀻𑀳𑀭𑀺𑀁;

𑀢𑀸𑀳𑀁 𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑁄, 𑀧𑀢𑁆𑀢𑁄𑀫𑁆𑀳𑀺 𑀆𑀲𑀯𑀓𑁆𑀔𑀬𑀁.

𑁩𑁯𑁭. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀼𑀢𑀺𑀬𑀁.