𑁩-𑁩. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀧𑀤𑀸𑀦𑀁

𑁩𑁯𑁮. ‘‘𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄, 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀦𑀺𑀩𑁆𑀩𑀼𑀢𑁂 𑀮𑁄𑀓𑀦𑀸𑀣𑀫𑁆𑀳𑀺, 𑀧𑀽𑀚𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

𑁩𑁯𑁯. ‘‘𑀉𑀤𑀕𑁆𑀕𑀘𑀺𑀢𑁆𑀢𑀸 𑀚𑀦𑀢𑀸, 𑀆𑀫𑁄𑀤𑀺𑀢𑀧𑀫𑁄𑀤𑀺𑀢𑀸;

𑀢𑁂𑀲𑀼 𑀲𑀁𑀯𑁂𑀕𑀚𑀸𑀢𑁂𑀲𑀼, 𑀧𑀻𑀢𑀺 𑀫𑁂 𑀉𑀤𑀧𑀚𑁆𑀚𑀣.

𑁪𑁦𑁦. ‘‘𑀜𑀸𑀢𑀺𑀫𑀺𑀢𑁆𑀢𑁂 𑀲𑀫𑀸𑀦𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

𑀧𑀭𑀺𑀦𑀺𑀩𑁆𑀩𑀼𑀢𑁄 𑀫𑀳𑀸𑀯𑀻𑀭𑁄, 𑀳𑀦𑁆𑀤 𑀧𑀽𑀚𑀁 𑀓𑀭𑁄𑀫𑀲𑁂.

𑁪𑁦𑁧. ‘‘𑀲𑀸𑀥𑀽𑀢𑀺 𑀢𑁂 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑀁 𑀚𑀦𑀺𑀁𑀲𑀼 𑀫𑁂;

𑀩𑀼𑀤𑁆𑀥𑀲𑁆𑀫𑀺𑀁 𑀮𑁄𑀓𑀦𑀸𑀣𑀫𑁆𑀳𑀺, 𑀓𑀸𑀳𑀸𑀫 𑀧𑀼𑀜𑁆𑀜𑀲𑀜𑁆𑀘𑀬𑀁.

𑁪𑁦𑁨. ‘‘𑀅𑀕𑁆𑀖𑀺𑀬𑀁 𑀲𑀼𑀓𑀢𑀁 𑀓𑀢𑁆𑀯𑀸, 𑀲𑀢𑀳𑀢𑁆𑀣𑀲𑀫𑀼𑀕𑁆𑀕𑀢𑀁;

𑀤𑀺𑀬𑀟𑁆𑀠𑀳𑀢𑁆𑀣𑀧𑀢𑁆𑀣𑀝𑀁, 𑀯𑀺𑀫𑀸𑀦𑀁 𑀦𑀪𑀫𑀼𑀕𑁆𑀕𑀢𑀁.

𑁪𑁦𑁩. ‘‘𑀓𑀢𑁆𑀯𑀸𑀦 𑀳𑀫𑁆𑀫𑀺𑀬𑀁 𑀢𑀢𑁆𑀣, 𑀢𑀸𑀮𑀧𑀦𑁆𑀢𑀻𑀳𑀺 𑀘𑀺𑀢𑁆𑀢𑀺𑀢𑀁;

𑀲𑀓𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀘𑁂𑀢𑀺𑀬𑀁 𑀧𑀽𑀚𑀬𑀼𑀢𑁆𑀢𑀫𑀁.

𑁪𑁦𑁪. ‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 𑀚𑀮𑀺𑀢𑁄, 𑀓𑀺𑀁𑀲𑀼𑀓𑁄 𑀇𑀯 [𑀲𑀸𑀮𑀭𑀸𑀚𑀸𑀯 (𑀲𑀻.)] 𑀨𑀼𑀮𑁆𑀮𑀺𑀢𑁄;

𑀇𑀦𑁆𑀤𑀮𑀝𑁆𑀞𑀻𑀯 𑀆𑀓𑀸𑀲𑁂, 𑀑𑀪𑀸𑀲𑁂𑀢𑀺 𑀘𑀢𑀼𑀤𑁆𑀤𑀺𑀲𑀸.

𑁪𑁦𑁫. ‘‘𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀓𑀢𑁆𑀯𑀸𑀦 𑀓𑀼𑀲𑀮𑀁 𑀩𑀳𑀼𑀁;

𑀧𑀼𑀩𑁆𑀩𑀓𑀫𑁆𑀫𑀁 𑀲𑀭𑀺𑀢𑁆𑀯𑀸𑀦, 𑀢𑀺𑀤𑀲𑀁 𑀉𑀧𑀧𑀚𑁆𑀚𑀳𑀁.

𑁪𑁦𑁬. ‘‘𑀲𑀳𑀲𑁆𑀲𑀬𑀼𑀢𑁆𑀢𑀁 𑀳𑀬𑀯𑀸𑀳𑀺𑀁, 𑀤𑀺𑀩𑁆𑀩𑀬𑀸𑀦𑀫𑀥𑀺𑀝𑁆𑀞𑀺𑀢𑁄;

𑀉𑀩𑁆𑀩𑀺𑀤𑁆𑀥𑀁 𑀪𑀯𑀦𑀁 𑀫𑀬𑁆𑀳𑀁, 𑀲𑀢𑁆𑀢𑀪𑀽𑀫𑀁 𑀲𑀫𑀼𑀕𑁆𑀕𑀢𑀁.

𑁪𑁦𑁭. ‘‘𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀲𑁄𑀡𑁆𑀡𑀫𑀬𑀸 𑀅𑀳𑀼𑀁;

𑀚𑀮𑀦𑁆𑀢𑀺 𑀲𑀓𑀢𑁂𑀚𑁂𑀦, 𑀤𑀺𑀲𑀸 𑀲𑀩𑁆𑀩𑀸 𑀧𑀪𑀸𑀲𑀬𑀁.

𑁪𑁦𑁮. ‘‘𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀦𑀺𑀬𑁆𑀬𑀽𑀳𑀸, 𑀮𑁄𑀳𑀺𑀢𑀗𑁆𑀕𑀫𑀬𑀸 𑀢𑀤𑀸;

𑀢𑁂𑀧𑀺 𑀚𑁄𑀢𑀦𑁆𑀢𑀺 𑀆𑀪𑀸𑀬, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸.

𑁪𑁦𑁯. ‘‘𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸, 𑀓𑀽𑀝𑀸𑀕𑀸𑀭𑀸 𑀲𑀼𑀦𑀺𑀫𑁆𑀫𑀺𑀢𑀸;

𑀫𑀡𑀺𑀫𑀬𑀸𑀧𑀺 𑀚𑁄𑀢𑀦𑁆𑀢𑀺, 𑀤𑀺𑀲𑀸 𑀤𑀲 [𑀤𑀺𑀲𑁄𑀤𑀺𑀲𑀁 (𑀲𑁆𑀬𑀸.)] 𑀲𑀫𑀦𑁆𑀢𑀢𑁄.

𑁪𑁧𑁦. ‘‘𑀢𑁂𑀲𑀁 𑀉𑀚𑁆𑀚𑁄𑀢𑀫𑀸𑀦𑀸𑀦𑀁, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀅𑀳𑀼;

𑀲𑀩𑁆𑀩𑁂 𑀤𑁂𑀯𑁂 𑀅𑀪𑀺𑀪𑁄𑀫𑀺, 𑀧𑀼𑀜𑁆𑀜𑀓𑀫𑁆𑀫𑀲𑁆𑀲𑀺𑀤𑀁 𑀨𑀮𑀁.

𑁪𑁧𑁧. ‘‘𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀉𑀩𑁆𑀩𑀺𑀤𑁆𑀥𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻, 𑀧𑀣𑀯𑀺𑀁 𑀆𑀯𑀲𑀺𑀁 𑀅𑀳𑀁.

𑁪𑁧𑁨. ‘‘𑀢𑀣𑁂𑀯 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀢𑀺𑀁𑀲𑀓𑁆𑀔𑀢𑁆𑀢𑀼𑀁 𑀅𑀳𑁄𑀲𑀳𑀁;

𑀲𑀓𑀓𑀫𑁆𑀫𑀸𑀪𑀺𑀭𑀤𑁆𑀥𑁄𑀫𑁆𑀳𑀺, 𑀘𑀓𑁆𑀓𑀯𑀢𑁆𑀢𑀻 𑀫𑀳𑀩𑁆𑀩𑀮𑁄.

𑁪𑁧𑁩. ‘‘𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄, 𑀘𑀢𑀼𑀤𑀻𑀧𑀫𑁆𑀳𑀺 𑀇𑀲𑁆𑀲𑀭𑁄;

𑀢𑀢𑁆𑀣𑀸𑀧𑀺 𑀪𑀯𑀦𑀁 𑀫𑀬𑁆𑀳𑀁, 𑀇𑀦𑁆𑀤𑀮𑀝𑁆𑀞𑀻𑀯 𑀉𑀕𑁆𑀕𑀢𑀁.

𑁪𑁧𑁪. ‘‘𑀆𑀬𑀸𑀫𑀢𑁄 𑀘𑀢𑀼𑀩𑁆𑀩𑀻𑀲𑀁, 𑀯𑀺𑀢𑁆𑀣𑀸𑀭𑁂𑀦 𑀘 𑀤𑁆𑀯𑀸𑀤𑀲;

𑀭𑀫𑁆𑀫𑀡𑀁 [𑀭𑀫𑁆𑀫𑀓𑀁 (𑀲𑀻. 𑀲𑁆𑀬𑀸.)] 𑀦𑀸𑀫 𑀦𑀕𑀭𑀁, 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀁.

𑁪𑁧𑁫. ‘‘𑀆𑀬𑀸𑀫𑀢𑁄 𑀧𑀜𑁆𑀘𑀲𑀢𑀁, 𑀯𑀺𑀢𑁆𑀣𑀸𑀭𑁂𑀦 𑀢𑀤𑀟𑁆𑀠𑀓𑀁;

𑀆𑀓𑀺𑀡𑁆𑀡𑀁 𑀚𑀦𑀓𑀸𑀬𑁂𑀳𑀺, 𑀢𑀺𑀤𑀲𑀸𑀦𑀁 𑀧𑀼𑀭𑀁 𑀯𑀺𑀬.

𑁪𑁧𑁬. ‘‘𑀬𑀣𑀸 𑀲𑀽𑀘𑀺𑀖𑀭𑁂 𑀲𑀽𑀘𑀻, 𑀧𑀓𑁆𑀔𑀺𑀢𑁆𑀢𑀸 𑀧𑀡𑁆𑀡𑀯𑀻𑀲𑀢𑀺;

𑀅𑀜𑁆𑀜𑀫𑀜𑁆𑀜𑀁 𑀧𑀖𑀝𑁆𑀝𑁂𑀦𑁆𑀢𑀺, 𑀆𑀓𑀺𑀡𑁆𑀡𑀁 𑀳𑁄𑀢𑀺 𑀮𑀗𑁆𑀓𑀢𑀁 [𑀢𑀁 𑀢𑀤𑀸 (𑀲𑀻.), 𑀲𑀢𑀢𑀸 (𑀲𑁆𑀬𑀸.), 𑀲𑀗𑁆𑀓𑀭𑀁 (?)].

𑁪𑁧𑁭. ‘‘𑀏𑀯𑀫𑁆𑀧𑀺 𑀦𑀕𑀭𑀁 𑀫𑀬𑁆𑀳𑀁, 𑀳𑀢𑁆𑀣𑀺𑀲𑁆𑀲𑀭𑀣𑀲𑀁𑀓𑀼𑀮𑀁;

𑀫𑀦𑀼𑀲𑁆𑀲𑁂𑀳𑀺 𑀲𑀤𑀸𑀓𑀺𑀡𑁆𑀡𑀁, 𑀭𑀫𑁆𑀫𑀡𑀁 𑀦𑀕𑀭𑀼𑀢𑁆𑀢𑀫𑀁.

𑁪𑁧𑁮. ‘‘𑀢𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀧𑀼𑀦 𑀤𑁂𑀯𑀢𑁆𑀢𑀦𑀁 𑀕𑀢𑁄 [𑀧𑀼𑀦𑀧𑀺 𑀤𑁂𑀯𑀢𑀗𑁆𑀕𑀢𑁄 (𑀓.)].

𑀪𑀯𑁂 𑀧𑀘𑁆𑀙𑀺𑀫𑀓𑁂 𑀫𑀬𑁆𑀳𑀁, 𑀅𑀳𑁄𑀲𑀺 𑀓𑀼𑀮𑀲𑀫𑁆𑀧𑀤𑀸.

𑁪𑁧𑁯. ‘‘𑀩𑁆𑀭𑀸𑀳𑁆𑀫𑀜𑁆𑀜𑀓𑀼𑀮𑀲𑀫𑁆𑀪𑀽𑀢𑁄, 𑀫𑀳𑀸𑀭𑀢𑀦𑀲𑀜𑁆𑀘𑀬𑁄;

𑀅𑀲𑀻𑀢𑀺𑀓𑁄𑀝𑀺𑀬𑁄 𑀳𑀺𑀢𑁆𑀯𑀸, 𑀳𑀺𑀭𑀜𑁆𑀜𑀲𑁆𑀲𑀸𑀧𑀺 𑀧𑀩𑁆𑀩𑀚𑀺𑀁.

𑁪𑁨𑁦. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀢𑀢𑀺𑀬𑀁.