𑁩-𑁧. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀅𑀧𑀤𑀸𑀦𑀁

𑀅𑀣 𑀣𑁂𑀭𑀸𑀧𑀤𑀸𑀦𑀁 𑀲𑀼𑀡𑀸𑀣 𑁋

𑁧𑁪𑁧. ‘‘𑀳𑀺𑀫𑀯𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂, 𑀮𑀫𑁆𑀩𑀓𑁄 𑀦𑀸𑀫 𑀧𑀩𑁆𑀩𑀢𑁄;

𑀅𑀲𑁆𑀲𑀫𑁄 𑀲𑀼𑀓𑀢𑁄 𑀫𑀬𑁆𑀳𑀁, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑁧𑁪𑁨. ‘‘𑀉𑀢𑁆𑀢𑀸𑀦𑀓𑀽𑀮𑀸 𑀦𑀤𑀺𑀓𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸;

𑀲𑀼𑀲𑀼𑀤𑁆𑀥𑀧𑀼𑀴𑀺𑀦𑀸𑀓𑀺𑀡𑁆𑀡𑀸, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁧𑁪𑁩. ‘‘𑀅𑀲𑀓𑁆𑀔𑀭𑀸 𑀅𑀧𑀩𑁆𑀪𑀸𑀭𑀸, 𑀲𑀸𑀤𑀼 𑀅𑀧𑁆𑀧𑀝𑀺𑀕𑀦𑁆𑀥𑀺𑀓𑀸;

𑀲𑀦𑁆𑀤𑀢𑀻 𑀦𑀤𑀺𑀓𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁧𑁪𑁪. ‘‘𑀓𑀼𑀫𑁆𑀪𑀻𑀮𑀸 𑀫𑀓𑀭𑀸 𑀘𑁂𑀢𑁆𑀣, 𑀲𑀼𑀲𑀼𑀫𑀸𑀭𑀸 [𑀲𑀼𑀁𑀲𑀼𑀫𑀸𑀭𑀸 (𑀲𑀻. 𑀲𑁆𑀬𑀸. )] 𑀘 𑀓𑀘𑁆𑀙𑀧𑀸;

𑀘𑀭𑀦𑁆𑀢𑀺 𑀦𑀤𑀺𑀬𑀸 𑀢𑀢𑁆𑀣, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁧𑁪𑁫. ‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 [𑀯𑀚𑀮𑀸 (𑀲𑀻. 𑀲𑁆𑀬𑀸.) 𑀚𑀮𑀚𑀸 (𑀧𑀻.)] 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀯𑀕𑁆𑀕𑀴𑀸 [𑀯𑀕𑁆𑀕𑀼𑀮𑀸 (𑀲𑀻.) 𑀯𑀕𑁆𑀕𑀼𑀴𑀸 (𑀲𑁆𑀬𑀸.) 𑀫𑀕𑁆𑀕𑀼𑀭𑀸 (𑀣𑁂𑀭𑀕𑀸𑀣𑀸)] 𑀧𑀧𑀢𑀸𑀬𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 [𑀧𑀧𑀢𑀸𑀬𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 (𑀓.)] 𑀫𑀫𑀲𑁆𑀲𑀫𑀁.

𑁧𑁪𑁬. ‘‘𑀉𑀪𑁄 𑀓𑀽𑀮𑁂𑀲𑀼 𑀦𑀤𑀺𑀬𑀸, 𑀧𑀼𑀧𑁆𑀨𑀺𑀦𑁄 𑀨𑀮𑀺𑀦𑁄 𑀤𑀼𑀫𑀸;

𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 [𑀅𑀪𑀺𑀮𑀫𑁆𑀩𑀦𑁆𑀢𑀺 𑀲𑁄𑀪𑀬𑀦𑁆𑀢𑀸 (𑀓.)] 𑀫𑀫𑀲𑁆𑀲𑀫𑀁.

𑁧𑁪𑁭. ‘‘𑀅𑀫𑁆𑀩𑀸 𑀲𑀸𑀮𑀸 𑀘 𑀢𑀺𑀮𑀓𑀸, 𑀧𑀸𑀝𑀮𑀻 𑀲𑀺𑀦𑁆𑀤𑀼𑀯𑀸𑀭𑀓𑀸 [𑀲𑀺𑀦𑁆𑀤𑀼𑀯𑀸𑀭𑀺𑀓𑀸 (𑀩𑀳𑀽𑀲𑀼)];

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁪𑁮. ‘‘𑀘𑀫𑁆𑀧𑀓𑀸 𑀲𑀴𑀮𑀸 𑀦𑀻𑀧𑀸 [𑀦𑀺𑀫𑁆𑀩𑀸 (𑀓.)], 𑀦𑀸𑀕𑀧𑀼𑀦𑁆𑀦𑀸𑀕𑀓𑁂𑀢𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁪𑁯. ‘‘𑀅𑀢𑀺𑀫𑀼𑀢𑁆𑀢𑀸 𑀅𑀲𑁄𑀓𑀸 𑀘, 𑀪𑀕𑀺𑀦𑀻𑀫𑀸𑀮𑀸 𑀘 𑀧𑀼𑀧𑁆𑀨𑀺𑀢𑀸;

𑀅𑀗𑁆𑀓𑁄𑀮𑀸 𑀩𑀺𑀫𑁆𑀩𑀺𑀚𑀸𑀮𑀸 [𑀩𑀺𑀫𑁆𑀩𑀚𑀸𑀮𑀸 (𑀓.)] 𑀘, 𑀧𑀼𑀧𑁆𑀨𑀺𑀢𑀸 𑀫𑀫 𑀅𑀲𑁆𑀲𑀫𑁂.

𑁧𑁫𑁦. ‘‘𑀓𑁂𑀢𑀓𑀸 𑀓𑀦𑁆𑀤𑀮𑀺 [𑀓𑀤𑀮𑀻 (𑀲𑁆𑀬𑀸.)] 𑀘𑁂𑀯, 𑀕𑁄𑀥𑀼𑀓𑀸 𑀢𑀺𑀡𑀲𑀽𑀮𑀺𑀓𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁧. ‘‘𑀓𑀡𑀺𑀓𑀸𑀭𑀸 𑀓𑀡𑁆𑀡𑀺𑀓𑀸 𑀘, 𑀅𑀲𑀦𑀸 𑀅𑀚𑁆𑀚𑀼𑀦𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁨. ‘‘𑀧𑀼𑀦𑁆𑀦𑀸𑀕𑀸 𑀕𑀺𑀭𑀺𑀧𑀼𑀦𑁆𑀦𑀸𑀕𑀸, 𑀓𑁄𑀯𑀺𑀴𑀸𑀭𑀸 𑀘 𑀧𑀼𑀧𑁆𑀨𑀺𑀢𑀸;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁩. ‘‘𑀉𑀤𑁆𑀥𑀸𑀮𑀓𑀸 𑀘 𑀓𑀼𑀝𑀚𑀸, 𑀓𑀤𑀫𑁆𑀩𑀸 𑀯𑀓𑀼𑀮𑀸 𑀩𑀳𑀽;

𑀤𑀺𑀩𑁆𑀩𑀕𑀦𑁆𑀥𑀁 𑀲𑀫𑁆𑀧𑀯𑀦𑁆𑀢𑀸, 𑀲𑁄𑀪𑀬𑀦𑁆𑀢𑀺 𑀫𑀫𑀲𑁆𑀲𑀫𑀁.

𑁧𑁫𑁪. ‘‘𑀆𑀴𑀓𑀸 𑀇𑀲𑀺𑀫𑀼𑀕𑁆𑀕𑀸 𑀘, 𑀓𑀤𑀮𑀺𑀫𑀸𑀢𑀼𑀮𑀼𑀗𑁆𑀕𑀺𑀬𑁄;

𑀕𑀦𑁆𑀥𑁄𑀤𑀓𑁂𑀦 𑀲𑀁𑀯𑀟𑁆𑀠𑀸, 𑀨𑀮𑀸𑀦𑀺 𑀥𑀸𑀭𑀬𑀦𑁆𑀢𑀺 𑀢𑁂.

𑁧𑁫𑁫. ‘‘𑀅𑀜𑁆𑀜𑁂 𑀧𑀼𑀧𑁆𑀨𑀦𑁆𑀢𑀺 𑀧𑀤𑀼𑀫𑀸, 𑀅𑀜𑁆𑀜𑁂 𑀚𑀸𑀬𑀦𑁆𑀢𑀺 𑀓𑁂𑀲𑀭𑀻;

𑀅𑀜𑁆𑀜𑁂 𑀑𑀧𑀼𑀧𑁆𑀨𑀸 𑀧𑀤𑀼𑀫𑀸, 𑀧𑀼𑀧𑁆𑀨𑀺𑀢𑀸 𑀢𑀴𑀸𑀓𑁂 𑀢𑀤𑀸.

𑁧𑁫𑁬. ‘‘𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺 𑀧𑀤𑀼𑀫𑀸, 𑀦𑀺𑀤𑁆𑀥𑀸𑀯𑀦𑁆𑀢𑀺 𑀫𑀼𑀮𑀸𑀴𑀺𑀬𑁄;

𑀲𑀺𑀁𑀖𑀸𑀝𑀺𑀧𑀢𑁆𑀢𑀫𑀸𑀓𑀺𑀡𑁆𑀡𑀸, 𑀲𑁄𑀪𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸.

𑁧𑁫𑁭. ‘‘𑀦𑀬𑀺𑀢𑀸 𑀅𑀫𑁆𑀩𑀕𑀦𑁆𑀥𑀻 𑀘, 𑀉𑀢𑁆𑀢𑀮𑀻 𑀩𑀦𑁆𑀥𑀼𑀚𑀻𑀯𑀓𑀸;

𑀤𑀺𑀩𑁆𑀩𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀺, 𑀧𑀼𑀧𑁆𑀨𑀺𑀢𑀸 𑀢𑀴𑀸𑀓𑁂 𑀢𑀤𑀸.

𑁧𑁫𑁮. ‘‘𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 𑀫𑀼𑀜𑁆𑀚𑀭𑁄𑀳𑀺𑀢𑀸;

𑀲𑀁𑀕𑀼𑀮𑀸 𑀫𑀕𑁆𑀕𑀼𑀭𑀸 [𑀫𑀗𑁆𑀕𑀼𑀭𑀸 (𑀲𑀻. 𑀓.)] 𑀘𑁂𑀯, 𑀯𑀲𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸.

𑁧𑁫𑁯. ‘‘𑀓𑀼𑀫𑁆𑀪𑀻𑀮𑀸 𑀲𑀼𑀲𑀼𑀫𑀸𑀭𑀸 𑀘, 𑀢𑀦𑁆𑀢𑀺𑀕𑀸𑀳𑀸 𑀘 𑀭𑀓𑁆𑀔𑀲𑀸;

𑀑𑀕𑀼𑀳𑀸 [𑀑𑀕𑀸𑀳𑀸 (𑀲𑁆𑀬𑀸.)] 𑀅𑀚𑀕𑀭𑀸 𑀘, 𑀯𑀲𑀦𑁆𑀢𑀺 𑀢𑀴𑀸𑀓𑁂 𑀢𑀤𑀸.

𑁧𑁬𑁦. ‘‘𑀧𑀸𑀭𑁂𑀯𑀢𑀸 𑀭𑀯𑀺𑀳𑀁𑀲𑀸, 𑀘𑀓𑁆𑀓𑀯𑀸𑀓𑀸 𑀦𑀤𑀻𑀘𑀭𑀸;

𑀓𑁄𑀓𑀺𑀮𑀸 𑀲𑀼𑀓𑀲𑀸𑀴𑀺𑀓𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁧. ‘‘𑀓𑀼𑀓𑁆𑀓𑀼𑀢𑁆𑀣𑀓𑀸 𑀓𑀼𑀴𑀻𑀭𑀓𑀸, 𑀯𑀦𑁂 𑀧𑁄𑀓𑁆𑀔𑀭𑀲𑀸𑀢𑀓𑀸;

𑀤𑀺𑀦𑁆𑀤𑀺𑀪𑀸 𑀲𑀼𑀯𑀧𑁄𑀢𑀸 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁨. ‘‘𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀓𑁄𑀓𑀺𑀮𑀸 𑀢𑀫𑁆𑀩𑀘𑀽𑀴𑀓𑀸 [𑀢𑀫𑁆𑀩𑀘𑀽𑀴𑀺𑀓𑀸 (𑀲𑀻.)];

𑀧𑀫𑁆𑀧𑀓𑀸 𑀚𑀻𑀯𑀁𑀚𑀻𑀯𑀸 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁩. ‘‘𑀓𑁄𑀲𑀺𑀓𑀸 𑀧𑁄𑀝𑁆𑀞𑀲𑀻𑀲𑀸 𑀘, 𑀓𑀼𑀭𑀭𑀸 𑀲𑁂𑀦𑀓𑀸 𑀩𑀳𑀽;

𑀫𑀳𑀸𑀓𑀸𑀴𑀸 𑀘 𑀲𑀓𑀼𑀡𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁪. ‘‘𑀧𑀲𑀤𑀸 𑀘 𑀯𑀭𑀸𑀳𑀸 𑀘, 𑀘𑀫𑀭𑀸 𑀕𑀡𑁆𑀟𑀓𑀸 𑀩𑀳𑀽 [𑀯𑀓𑀸 𑀪𑁂𑀭𑀡𑁆𑀟𑀓𑀸 𑀩𑀳𑀽 (𑀲𑀻. 𑀲𑁆𑀬𑀸.)];

𑀭𑁄𑀳𑀺𑀘𑁆𑀘𑀸 𑀲𑀼𑀓𑀧𑁄𑀢𑀸 [𑀲𑀼𑀢𑁆𑀢𑀧𑁄𑀢𑀸 (𑀲𑁆𑀬𑀸.)] 𑀘, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁫. ‘‘𑀲𑀻𑀳𑀩𑁆𑀬𑀕𑁆𑀖𑀸 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀓𑀸;

𑀢𑀺𑀥𑀸 𑀧𑀪𑀺𑀦𑁆𑀦𑀫𑀸𑀢𑀗𑁆𑀕𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁬. ‘‘𑀓𑀺𑀦𑁆𑀦𑀭𑀸 𑀯𑀸𑀦𑀭𑀸 𑀘𑁂𑀯, 𑀅𑀣𑁄𑀧𑀺 𑀯𑀦𑀓𑀫𑁆𑀫𑀺𑀓𑀸;

𑀘𑁂𑀢𑀸 𑀘 𑀮𑀼𑀤𑁆𑀤𑀓𑀸 𑀘𑁂𑀯, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁬𑁭. ‘‘𑀢𑀺𑀦𑁆𑀤𑀼𑀓𑀸𑀦𑀺 𑀧𑀺𑀬𑀸𑀮𑀸𑀦𑀺, 𑀫𑀥𑀼𑀓𑀸 𑀓𑀸𑀲𑀼𑀫𑀸𑀭𑀬𑁄 [𑀓𑀸𑀲𑀫𑀸𑀭𑀺𑀬𑁄 (𑀲𑁆𑀬𑀸.)];

𑀥𑀼𑀯𑀁 𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁧𑁬𑁮. ‘‘𑀓𑁄𑀲𑀫𑁆𑀩𑀸 [𑀓𑁄𑀲𑀼𑀫𑁆𑀪𑀸 (𑀲𑀻. 𑀲𑁆𑀬𑀸.)] 𑀲𑀴𑀮𑀸 𑀦𑀺𑀫𑁆𑀩𑀸 [𑀲𑀴𑀮𑀸 𑀦𑀻𑀧𑀸 (𑀲𑀻. 𑀲𑁆𑀬𑀸.) 𑀧𑀦𑀲𑀸 𑀅𑀫𑁆𑀩𑀸 (?)], 𑀲𑀸𑀤𑀼𑀨𑀮𑀲𑀫𑀸𑀬𑀼𑀢𑀸;

𑀥𑀼𑀯𑀁 𑀨𑀮𑀸𑀦𑀺 𑀥𑀸𑀭𑁂𑀦𑁆𑀢𑀺, 𑀅𑀯𑀺𑀤𑀽𑀭𑁂 𑀫𑀫𑀲𑁆𑀲𑀫𑀁.

𑁧𑁬𑁯. ‘‘𑀳𑀭𑀻𑀢𑀓𑀸 𑀆𑀫𑀮𑀓𑀸, 𑀅𑀫𑁆𑀩𑀚𑀫𑁆𑀩𑀼𑀯𑀺𑀪𑀻𑀢𑀓𑀸;

𑀓𑁄𑀮𑀸 𑀪𑀮𑁆𑀮𑀸𑀢𑀓𑀸 𑀩𑀺𑀮𑁆𑀮𑀸, 𑀨𑀮𑀸𑀦𑀺 𑀥𑀸𑀭𑀬𑀦𑁆𑀢𑀺 𑀢𑁂.

𑁧𑁭𑁦. ‘‘𑀆𑀮𑀼𑀯𑀸 𑀘 𑀓𑀴𑀫𑁆𑀩𑀸 𑀘, 𑀩𑀺𑀴𑀸𑀮𑀻𑀢𑀓𑁆𑀓𑀴𑀸𑀦𑀺 𑀘;

𑀚𑀻𑀯𑀓𑀸 𑀲𑀼𑀢𑀓𑀸 𑀘𑁂𑀯, 𑀩𑀳𑀼𑀓𑀸 𑀫𑀫 𑀅𑀲𑁆𑀲𑀫𑁂.

𑁧𑁭𑁧. ‘‘𑀅𑀲𑁆𑀲𑀫𑀲𑁆𑀲𑀸𑀯𑀺𑀤𑀽𑀭𑀫𑁆𑀳𑀺, 𑀢𑀴𑀸𑀓𑀸𑀲𑀼𑀁 𑀲𑀼𑀦𑀺𑀫𑁆𑀫𑀺𑀢𑀸;

𑀅𑀘𑁆𑀙𑁄𑀤𑀓𑀸 𑀲𑀻𑀢𑀚𑀮𑀸, 𑀲𑀼𑀧𑀢𑀺𑀢𑁆𑀣𑀸 𑀫𑀦𑁄𑀭𑀫𑀸.

𑁧𑁭𑁨. ‘‘𑀧𑀤𑀼𑀫𑀼𑀧𑁆𑀧𑀮𑀲𑀜𑁆𑀙𑀦𑁆𑀦𑀸, 𑀧𑀼𑀡𑁆𑀟𑀭𑀻𑀓𑀲𑀫𑀸𑀬𑀼𑀢𑀸;

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀤𑀺𑀩𑁆𑀩𑀕𑀦𑁆𑀥𑁄 𑀧𑀯𑀸𑀬𑀢𑀺.

𑁧𑁭𑁩. ‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁂, 𑀧𑀼𑀧𑁆𑀨𑀺𑀢𑁂 𑀨𑀮𑀺𑀢𑁂 𑀯𑀦𑁂;

𑀲𑀼𑀓𑀢𑁂 𑀅𑀲𑁆𑀲𑀫𑁂 𑀭𑀫𑁆𑀫𑁂, 𑀯𑀺𑀳𑀭𑀸𑀫𑀺 𑀅𑀳𑀁 𑀢𑀤𑀸.

𑁧𑁭𑁪. ‘‘𑀲𑀻𑀮𑀯𑀸 𑀯𑀢𑀲𑀫𑁆𑀧𑀦𑁆𑀦𑁄 [𑀯𑀢𑁆𑀢𑀲𑀫𑁆𑀧𑀦𑁆𑀦𑁄 (𑀲𑁆𑀬𑀸.)], 𑀛𑀸𑀬𑀻 𑀛𑀸𑀦𑀭𑀢𑁄 𑀲𑀤𑀸;

𑀧𑀜𑁆𑀘𑀸𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄, 𑀲𑀼𑀭𑀼𑀘𑀺 𑀦𑀸𑀫 𑀢𑀸𑀧𑀲𑁄.

𑁧𑁭𑁫. ‘‘𑀘𑀢𑀼𑀯𑀻𑀲𑀲𑀳𑀲𑁆𑀲𑀸𑀦𑀺, 𑀲𑀺𑀲𑁆𑀲𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀼;

𑀲𑀩𑁆𑀩𑁂𑀯 𑀩𑁆𑀭𑀸𑀳𑁆𑀫𑀡𑀸 𑀏𑀢𑁂, 𑀚𑀸𑀢𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄.

𑁧𑁭𑁬. ‘‘𑀮𑀓𑁆𑀔𑀡𑁂 𑀇𑀢𑀺𑀳𑀸𑀲𑁂 𑀘, 𑀲𑀦𑀺𑀖𑀡𑁆𑀝𑀼𑀲𑀓𑁂𑀝𑀼𑀪𑁂;

𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸, 𑀲𑀥𑀫𑁆𑀫𑁂 𑀧𑀸𑀭𑀫𑀺𑀁 𑀕𑀢𑀸.

𑁧𑁭𑁭. ‘‘𑀉𑀧𑁆𑀧𑀸𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼, 𑀮𑀓𑁆𑀔𑀡𑁂𑀲𑀼 𑀘 𑀓𑁄𑀯𑀺𑀤𑀸;

𑀧𑀣𑀩𑁆𑀬𑀸 𑀪𑀽𑀫𑀦𑁆𑀢𑀮𑀺𑀓𑁆𑀔𑁂, 𑀫𑀫 𑀲𑀺𑀲𑁆𑀲𑀸 𑀲𑀼𑀲𑀺𑀓𑁆𑀔𑀺𑀢𑀸.

𑁧𑁭𑁮. ‘‘𑀅𑀧𑁆𑀧𑀺𑀘𑁆𑀙𑀸 𑀦𑀺𑀧𑀓𑀸 𑀏𑀢𑁂, 𑀅𑀧𑁆𑀧𑀸𑀳𑀸𑀭𑀸 𑀅𑀮𑁄𑀮𑀼𑀧𑀸;

𑀮𑀸𑀪𑀸𑀮𑀸𑀪𑁂𑀦 𑀲𑀦𑁆𑀢𑀼𑀝𑁆𑀞𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁧𑁭𑁯. ‘‘𑀛𑀸𑀬𑀻 𑀛𑀸𑀦𑀭𑀢𑀸 𑀥𑀻𑀭𑀸, 𑀲𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀳𑀺𑀢𑀸;

𑀆𑀓𑀺𑀜𑁆𑀘𑀜𑁆𑀜𑀁 𑀧𑀢𑁆𑀣𑀬𑀦𑁆𑀢𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁧𑁮𑁦. ‘‘𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸, 𑀧𑁂𑀢𑁆𑀢𑀺𑀓𑁂 𑀕𑁄𑀘𑀭𑁂 𑀭𑀢𑀸;

𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀥𑀻𑀭𑀸, 𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀲𑀤𑀸.

𑁧𑁮𑁧. ‘‘𑀲𑀁𑀯𑀼𑀢𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼, 𑀅𑀦𑁂𑀚𑀸 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑀸;

𑀅𑀲𑀁𑀲𑀝𑁆𑀞𑀸 𑀘 𑀢𑁂 𑀥𑀻𑀭𑀸, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁨. ‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀚𑁆𑀚𑀸𑀬, 𑀞𑀸𑀦𑀘𑀗𑁆𑀓𑀫𑀦𑁂𑀦 𑀘;

𑀯𑀻𑀢𑀺𑀦𑀸𑀫𑁂𑀦𑁆𑀢𑀺 𑀢𑁂 𑀭𑀢𑁆𑀢𑀺𑀁, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁩. ‘‘𑀭𑀚𑀦𑀻𑀬𑁂 𑀦 𑀭𑀚𑁆𑀚𑀦𑁆𑀢𑀺, 𑀤𑀼𑀲𑁆𑀲𑀦𑀻𑀬𑁂 𑀦 𑀤𑀼𑀲𑁆𑀲𑀭𑁂;

𑀫𑁄𑀳𑀦𑀻𑀬𑁂 𑀦 𑀫𑀼𑀬𑁆𑀳𑀦𑁆𑀢𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁪. ‘‘𑀇𑀤𑁆𑀥𑀺𑀁 𑀯𑀻𑀫𑀁𑀲𑀫𑀸𑀦𑀸 𑀢𑁂, 𑀯𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀺𑀓𑀁;

𑀧𑀣𑀯𑀺𑀁 [𑀧𑀞𑀯𑀺𑀁 (𑀲𑀻. 𑀲𑁆𑀬𑀸.)] 𑀢𑁂 𑀧𑀓𑀫𑁆𑀧𑁂𑀦𑁆𑀢𑀺, 𑀲𑀸𑀭𑀫𑁆𑀪𑁂𑀦 𑀤𑀼𑀭𑀸𑀲𑀤𑀸.

𑁧𑁮𑁫. ‘‘𑀓𑀻𑀴𑀫𑀸𑀦𑀸 𑀘 𑀢𑁂 𑀲𑀺𑀲𑁆𑀲𑀸, 𑀓𑀻𑀴𑀦𑁆𑀢𑀺 𑀛𑀸𑀦𑀓𑀻𑀴𑀺𑀢𑀁;

𑀚𑀫𑁆𑀩𑀼𑀢𑁄 𑀨𑀮𑀫𑀸𑀦𑁂𑀦𑁆𑀢𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁮𑁬. ‘‘𑀅𑀜𑁆𑀜𑁂 𑀕𑀘𑁆𑀙𑀦𑁆𑀢𑀺 𑀕𑁄𑀬𑀸𑀦𑀁, 𑀅𑀜𑁆𑀜𑁂 𑀧𑀼𑀩𑁆𑀩𑀯𑀺𑀤𑁂𑀳𑀓𑀁 [𑀧𑀼𑀩𑁆𑀩𑀯𑀺𑀤𑁂𑀳𑀦𑀁 (𑀲𑁆𑀬𑀸. 𑀓.)];

𑀅𑀜𑁆𑀜𑁂 𑀘 𑀉𑀢𑁆𑀢𑀭𑀓𑀼𑀭𑀼𑀁, 𑀏𑀲𑀦𑀸𑀬 𑀤𑀼𑀭𑀸𑀲𑀤𑀸.

𑁧𑁮𑁭. ‘‘𑀧𑀼𑀭𑀢𑁄 𑀧𑁂𑀲𑁂𑀦𑁆𑀢𑀺 𑀔𑀸𑀭𑀺𑀁, 𑀧𑀘𑁆𑀙𑀢𑁄 𑀘 𑀯𑀚𑀦𑁆𑀢𑀺 𑀢𑁂;

𑀘𑀢𑀼𑀯𑀻𑀲𑀲𑀳𑀲𑁆𑀲𑁂𑀳𑀺, 𑀙𑀸𑀤𑀺𑀢𑀁 𑀳𑁄𑀢𑀺 𑀅𑀫𑁆𑀩𑀭𑀁.

𑁧𑁮𑁮. ‘‘𑀅𑀕𑁆𑀕𑀺𑀧𑀸𑀓𑀻 𑀅𑀦𑀕𑁆𑀕𑀻 𑀘, 𑀤𑀦𑁆𑀢𑁄𑀤𑀼𑀓𑁆𑀔𑀮𑀺𑀓𑀸𑀧𑀺 𑀘;

𑀅𑀲𑁆𑀫𑁂𑀦 𑀓𑁄𑀝𑁆𑀝𑀺𑀢𑀸 𑀓𑁂𑀘𑀺, 𑀧𑀯𑀢𑁆𑀢𑀨𑀮𑀪𑁄𑀚𑀦𑀸.

𑁧𑁮𑁯. ‘‘𑀉𑀤𑀓𑁄𑀭𑁄𑀳𑀡𑀸 𑀓𑁂𑀘𑀺, 𑀲𑀸𑀬𑀁 𑀧𑀸𑀢𑁄 𑀲𑀼𑀘𑀻𑀭𑀢𑀸;

𑀢𑁄𑀬𑀸𑀪𑀺𑀲𑁂𑀘𑀦𑀓𑀭𑀸, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁯𑁦. ‘‘𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀕𑀦𑁆𑀥𑀺𑀢𑀸 𑀲𑀻𑀮𑀕𑀦𑁆𑀥𑁂𑀦, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁯𑁧. ‘‘𑀧𑀸𑀢𑁄𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, 𑀚𑀝𑀺𑀮𑀸 𑀉𑀕𑁆𑀕𑀢𑀸𑀧𑀦𑀸;

𑀮𑀸𑀪𑀸𑀮𑀸𑀪𑀁 𑀧𑀓𑀺𑀢𑁆𑀢𑁂𑀢𑁆𑀯𑀸, 𑀕𑀘𑁆𑀙𑀦𑁆𑀢𑀺 𑀅𑀫𑁆𑀩𑀭𑁂 𑀢𑀤𑀸.

𑁧𑁯𑁨. ‘‘𑀏𑀢𑁂𑀲𑀁 𑀧𑀓𑁆𑀓𑀫𑀦𑁆𑀢𑀸𑀦𑀁, 𑀫𑀳𑀸𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀅𑀚𑀺𑀦𑀘𑀫𑁆𑀫𑀲𑀤𑁆𑀤𑁂𑀦, 𑀫𑀼𑀤𑀺𑀢𑀸 𑀳𑁄𑀦𑁆𑀢𑀺 𑀤𑁂𑀯𑀢𑀸.

𑁧𑁯𑁩. ‘‘𑀤𑀺𑀲𑁄𑀤𑀺𑀲𑀁 𑀧𑀓𑁆𑀓𑀫𑀦𑁆𑀢𑀺, 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀇𑀲𑀻;

𑀲𑀓𑁂 𑀩𑀮𑁂𑀦𑀼𑀧𑀢𑁆𑀣𑀤𑁆𑀥𑀸, 𑀢𑁂 𑀕𑀘𑁆𑀙𑀦𑁆𑀢𑀺 𑀬𑀤𑀺𑀘𑁆𑀙𑀓𑀁.

𑁧𑁯𑁪. ‘‘𑀧𑀣𑀯𑀻𑀓𑀫𑁆𑀧𑀓𑀸 𑀏𑀢𑁂, 𑀲𑀩𑁆𑀩𑁂𑀯 𑀦𑀪𑀘𑀸𑀭𑀺𑀦𑁄;

𑀉𑀕𑁆𑀕𑀢𑁂𑀚𑀸 𑀤𑀼𑀧𑁆𑀧𑀲𑀳𑀸, 𑀲𑀸𑀕𑀭𑁄𑀯 𑀅𑀔𑁄𑀪𑀺𑀬𑀸.

𑁧𑁯𑁫. ‘‘𑀞𑀸𑀦𑀘𑀗𑁆𑀓𑀫𑀺𑀦𑁄 𑀓𑁂𑀘𑀺, 𑀓𑁂𑀘𑀺 𑀦𑁂𑀲𑀚𑁆𑀚𑀺𑀓𑀸 𑀇𑀲𑀻;

𑀧𑀯𑀢𑁆𑀢𑀪𑁄𑀚𑀦𑀸 𑀓𑁂𑀘𑀺, 𑀫𑀫 𑀲𑀺𑀲𑁆𑀲𑀸 𑀤𑀼𑀭𑀸𑀲𑀤𑀸.

𑁧𑁯𑁬. ‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀏𑀢𑁂, 𑀳𑀺𑀢𑁂𑀲𑀻 𑀲𑀩𑁆𑀩𑀧𑀸𑀡𑀺𑀦𑀁;

𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸 𑀲𑀩𑁆𑀩𑁂, 𑀦 𑀢𑁂 𑀯𑀫𑁆𑀪𑁂𑀦𑁆𑀢𑀺 𑀓𑀲𑁆𑀲𑀘𑀺.

𑁧𑁯𑁭. ‘‘𑀲𑀻𑀳𑀭𑀸𑀚𑀸𑀯𑀲𑀫𑁆𑀪𑀻𑀢𑀸, 𑀕𑀚𑀭𑀸𑀚𑀸𑀯 𑀣𑀸𑀫𑀯𑀸;

𑀤𑀼𑀭𑀸𑀲𑀤𑀸 𑀩𑁆𑀬𑀕𑁆𑀖𑀸𑀭𑀺𑀯, 𑀆𑀕𑀘𑁆𑀙𑀦𑁆𑀢𑀺 𑀫𑀫𑀦𑁆𑀢𑀺𑀓𑁂.

𑁧𑁯𑁮. ‘‘𑀯𑀺𑀚𑁆𑀚𑀸𑀥𑀭𑀸 𑀤𑁂𑀯𑀢𑀸 𑀘, 𑀦𑀸𑀕𑀕𑀦𑁆𑀥𑀩𑁆𑀩𑀭𑀓𑁆𑀔𑀲𑀸;

𑀓𑀼𑀫𑁆𑀪𑀡𑁆𑀟𑀸 𑀤𑀸𑀦𑀯𑀸 𑀕𑀭𑀼𑀴𑀸, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁧𑁯𑁯. ‘‘𑀢𑁂 𑀚𑀝𑀸𑀔𑀸𑀭𑀺𑀪𑀭𑀺𑀢𑀸, 𑀅𑀚𑀺𑀦𑀼𑀢𑁆𑀢𑀭𑀯𑀸𑀲𑀦𑀸;

𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀩𑁆𑀩𑁂, 𑀉𑀧𑀚𑀻𑀯𑀦𑁆𑀢𑀺 𑀢𑀁 𑀲𑀭𑀁.

𑁨𑁦𑁦. ‘‘𑀲𑀤𑀸𑀦𑀼𑀘𑁆𑀙𑀯𑀺𑀓𑀸 [𑀢𑀤𑀸𑀦𑀼𑀘𑁆𑀙𑀯𑀺𑀓𑀸 (𑀲𑁆𑀬𑀸. 𑀓.)] 𑀏𑀢𑁂, 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸;

𑀘𑀢𑀼𑀩𑁆𑀩𑀻𑀲𑀲𑀳𑀲𑁆𑀲𑀸𑀦𑀁, 𑀔𑀺𑀧𑀺𑀢𑀲𑀤𑁆𑀤𑁄 𑀦 𑀯𑀺𑀚𑁆𑀚𑀢𑀺.

𑁨𑁦𑁧. ‘‘𑀧𑀸𑀤𑁂 𑀧𑀸𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑀸, 𑀅𑀧𑁆𑀧𑀲𑀤𑁆𑀤𑀸 𑀲𑀼𑀲𑀁𑀯𑀼𑀢𑀸;

𑀉𑀧𑀲𑀗𑁆𑀓𑀫𑁆𑀫 𑀲𑀩𑁆𑀩𑁂𑀯 [𑀲𑀩𑁆𑀩𑁂 𑀢𑁂 (𑀲𑁆𑀬𑀸.)], 𑀲𑀺𑀭𑀲𑀸 𑀯𑀦𑁆𑀤𑀭𑁂 𑀫𑀫𑀁.

𑁨𑁦𑁨. ‘‘𑀢𑁂𑀳𑀺 𑀲𑀺𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄, 𑀲𑀦𑁆𑀢𑁂𑀳𑀺 𑀘 𑀢𑀧𑀲𑁆𑀲𑀺𑀪𑀺;

𑀯𑀲𑀸𑀫𑀺 𑀅𑀲𑁆𑀲𑀫𑁂 𑀢𑀢𑁆𑀣, 𑀛𑀸𑀬𑀻 𑀛𑀸𑀦𑀭𑀢𑁄 𑀅𑀳𑀁.

𑁨𑁦𑁩. ‘‘𑀇𑀲𑀻𑀦𑀁 𑀲𑀻𑀮𑀕𑀦𑁆𑀥𑁂𑀦, 𑀧𑀼𑀧𑁆𑀨𑀕𑀦𑁆𑀥𑁂𑀦 𑀘𑀽𑀪𑀬𑀁;

𑀨𑀮𑀻𑀦𑀁 𑀨𑀮𑀕𑀦𑁆𑀥𑁂𑀦, 𑀕𑀦𑁆𑀥𑀺𑀢𑁄 𑀳𑁄𑀢𑀺 𑀅𑀲𑁆𑀲𑀫𑁄.

𑁨𑁦𑁪. ‘‘𑀭𑀢𑁆𑀢𑀺𑀦𑁆𑀤𑀺𑀯𑀁 𑀦 𑀚𑀸𑀦𑀸𑀫𑀺, 𑀅𑀭𑀢𑀺 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀓𑁂 𑀲𑀺𑀲𑁆𑀲𑁂 𑀑𑀯𑀤𑀦𑁆𑀢𑁄, 𑀪𑀺𑀬𑁆𑀬𑁄 𑀳𑀸𑀲𑀁 𑀮𑀪𑀸𑀫𑀳𑀁.

𑁨𑁦𑁫. ‘‘𑀧𑀼𑀧𑁆𑀨𑀸𑀦𑀁 𑀧𑀼𑀧𑁆𑀨𑀫𑀸𑀦𑀸𑀦𑀁, 𑀨𑀮𑀸𑀦𑀜𑁆𑀘 𑀯𑀺𑀧𑀘𑁆𑀘𑀢𑀁;

𑀤𑀺𑀩𑁆𑀩𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀲𑁄𑀪𑀬𑀦𑁆𑀢𑀸 𑀫𑀫𑀲𑁆𑀲𑀫𑀁.

𑁨𑁦𑁬. ‘‘𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸, 𑀆𑀢𑀸𑀧𑀻 𑀦𑀺𑀧𑀓𑁄 𑀅𑀳𑀁;

𑀔𑀸𑀭𑀺𑀪𑀸𑀭𑀁 𑀕𑀳𑁂𑀢𑁆𑀯𑀸𑀦, 𑀯𑀦𑀁 𑀅𑀚𑁆𑀛𑁄𑀕𑀳𑀺𑀁 𑀅𑀳𑀁.

𑁨𑁦𑁭. ‘‘𑀉𑀧𑁆𑀧𑀸𑀢𑁂 𑀲𑀼𑀧𑀺𑀦𑁂 𑀘𑀸𑀧𑀺, 𑀮𑀓𑁆𑀔𑀡𑁂𑀲𑀼 𑀲𑀼𑀲𑀺𑀓𑁆𑀔𑀺𑀢𑁄;

𑀧𑀯𑀢𑁆𑀢𑀫𑀸𑀦𑀁 [𑀯𑀢𑁆𑀢𑀫𑀸𑀦𑀁 (𑀓.)] 𑀫𑀦𑁆𑀢𑀧𑀤𑀁, 𑀥𑀸𑀭𑀬𑀸𑀫𑀺 𑀅𑀳𑀁 𑀢𑀤𑀸.

𑁨𑁦𑁮. ‘‘𑀅𑀦𑁄𑀫𑀤𑀲𑁆𑀲𑀻 𑀪𑀕𑀯𑀸, 𑀮𑁄𑀓𑀚𑁂𑀝𑁆𑀞𑁄 𑀦𑀭𑀸𑀲𑀪𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺.

𑁨𑁦𑁯. ‘‘𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁨𑁧𑁦. ‘‘𑀢𑀫𑀤𑁆𑀤𑀲𑀸𑀳𑀁 𑀲𑀫𑁆𑀩𑀼𑀤𑁆𑀥𑀁, 𑀲𑀧𑁆𑀧𑀪𑀸𑀲𑀁 𑀫𑀦𑁄𑀭𑀫𑀁;

𑀇𑀦𑁆𑀤𑀻𑀯𑀭𑀁𑀯 𑀚𑀮𑀺𑀢𑀁, 𑀆𑀤𑀺𑀢𑁆𑀢𑀁𑀯 𑀳𑀼𑀢𑀸𑀲𑀦𑀁.

𑁨𑁧𑁧. ‘‘𑀚𑀮𑀦𑁆𑀢𑀁 𑀤𑀻𑀧𑀭𑀼𑀓𑁆𑀔𑀁𑀯, 𑀯𑀺𑀚𑁆𑀚𑀼𑀢𑀁 𑀕𑀕𑀡𑁂 𑀬𑀣𑀸;

𑀲𑀼𑀨𑀼𑀮𑁆𑀮𑀁 𑀲𑀸𑀮𑀭𑀸𑀚𑀁𑀯, 𑀅𑀤𑁆𑀤𑀲𑀁 𑀮𑁄𑀓𑀦𑀸𑀬𑀓𑀁.

𑁨𑁧𑁨. ‘‘𑀅𑀬𑀁 𑀦𑀸𑀕𑁄 𑀫𑀳𑀸𑀯𑀻𑀭𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀫𑀼𑀦𑀺;

𑀇𑀫𑀁 𑀤𑀲𑁆𑀲𑀦𑀫𑀸𑀕𑀫𑁆𑀫, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀭𑁂.

𑁨𑁧𑁩. ‘‘𑀤𑀺𑀲𑁆𑀯𑀸𑀦𑀸𑀳𑀁 𑀤𑁂𑀯𑀤𑁂𑀯𑀁, 𑀮𑀓𑁆𑀔𑀡𑀁 𑀉𑀧𑀥𑀸𑀭𑀬𑀺𑀁;

𑀩𑀼𑀤𑁆𑀥𑁄 𑀦𑀼 𑀔𑁄 𑀦 𑀯𑀸 𑀩𑀼𑀤𑁆𑀥𑁄, 𑀳𑀦𑁆𑀤 𑀧𑀲𑁆𑀲𑀸𑀫𑀺 𑀘𑀓𑁆𑀔𑀼𑀫𑀁.

𑁨𑁧𑁪. ‘‘𑀲𑀳𑀲𑁆𑀲𑀸𑀭𑀸𑀦𑀺 𑀘𑀓𑁆𑀓𑀸𑀦𑀺, 𑀤𑀺𑀲𑁆𑀲𑀦𑁆𑀢𑀺 𑀘𑀭𑀡𑀼𑀢𑁆𑀢𑀫𑁂;

𑀮𑀓𑁆𑀔𑀡𑀸𑀦𑀺𑀲𑁆𑀲 𑀤𑀺𑀲𑁆𑀯𑀸𑀦, 𑀦𑀺𑀝𑁆𑀞𑀁 𑀕𑀘𑁆𑀙𑀺𑀁 𑀢𑀣𑀸𑀕𑀢𑁂.