𑁩-𑁧𑁦. 𑀆𑀦𑀦𑁆𑀤𑀢𑁆𑀣𑁂𑀭𑀅𑀧𑀤𑀸𑀦𑀁

𑁬𑁪𑁪. ‘‘𑀆𑀭𑀸𑀫𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀫𑀼𑀦𑀺;

𑀯𑀲𑁆𑀲𑁂𑀦𑁆𑀢𑁄 𑀅𑀫𑀢𑀁 𑀯𑀼𑀝𑁆𑀞𑀺𑀁, 𑀦𑀺𑀩𑁆𑀩𑀸𑀧𑁂𑀲𑀺 𑀫𑀳𑀸𑀚𑀦𑀁.

𑁬𑁪𑁫. ‘‘𑀲𑀢𑀲𑀳𑀲𑁆𑀲𑀁 𑀢𑁂 𑀥𑀻𑀭𑀸, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻 [𑀅𑀦𑀼𑀧𑀸𑀬𑀺𑀦𑀻 (𑀲𑁆𑀬𑀸. 𑀓.)].

𑁬𑁪𑁬. ‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀆𑀲𑀺𑀁, 𑀲𑁂𑀢𑀘𑁆𑀙𑀢𑁆𑀢𑀁 𑀯𑀭𑀼𑀢𑁆𑀢𑀫𑀁;

𑀲𑀼𑀘𑀸𑀭𑀼𑀭𑀽𑀧𑀁 𑀤𑀺𑀲𑁆𑀯𑀸𑀦, 𑀯𑀺𑀢𑁆𑀢𑀺 𑀫𑁂 𑀉𑀤𑀧𑀚𑁆𑀚𑀣.

𑁬𑁪𑁭. ‘‘𑀑𑀭𑀼𑀬𑁆𑀳 𑀳𑀢𑁆𑀣𑀺𑀔𑀦𑁆𑀥𑀫𑁆𑀳𑀸, 𑀉𑀧𑀕𑀘𑁆𑀙𑀺𑀁 𑀦𑀭𑀸𑀲𑀪𑀁;

𑀭𑀢𑀦𑀸𑀫𑀬𑀙𑀢𑁆𑀢𑀁 𑀫𑁂, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀥𑀸𑀭𑀬𑀺𑀁.

𑁬𑁪𑁮. ‘‘𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀧𑀤𑀼𑀫𑀼𑀢𑁆𑀢𑀭𑁄 𑀫𑀳𑀸𑀇𑀲𑀺;

𑀢𑀁 𑀓𑀣𑀁 𑀞𑀧𑀬𑀺𑀢𑁆𑀯𑀸𑀦, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁬𑁪𑁯. ‘‘‘𑀬𑁄 𑀲𑁄 𑀙𑀢𑁆𑀢𑀫𑀥𑀸𑀭𑁂𑀲𑀺, 𑀲𑁄𑀡𑁆𑀡𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀁;

𑀢𑀫𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀲𑀼𑀡𑁄𑀣 𑀫𑀫 𑀪𑀸𑀲𑀢𑁄.

𑁬𑁫𑁦. ‘‘‘𑀇𑀢𑁄 𑀕𑀦𑁆𑀢𑁆𑀯𑀸 𑀅𑀬𑀁 𑀧𑁄𑀲𑁄, 𑀢𑀼𑀲𑀺𑀢𑀁 𑀆𑀯𑀲𑀺𑀲𑁆𑀲𑀢𑀺;

𑀅𑀦𑀼𑀪𑁄𑀲𑁆𑀲𑀢𑀺 𑀲𑀫𑁆𑀧𑀢𑁆𑀢𑀺𑀁, 𑀅𑀘𑁆𑀙𑀭𑀸𑀳𑀺 𑀧𑀼𑀭𑀓𑁆𑀔𑀢𑁄.

𑁬𑁫𑁧. ‘‘‘𑀘𑀢𑀼𑀢𑁆𑀢𑀺𑀁𑀲𑀢𑀺𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚𑀁 𑀓𑀭𑀺𑀲𑁆𑀲𑀢𑀺;

𑀩𑀮𑀸𑀥𑀺𑀧𑁄 𑀅𑀝𑁆𑀞𑀲𑀢𑀁, 𑀯𑀲𑀼𑀥𑀁 𑀆𑀯𑀲𑀺𑀲𑁆𑀲𑀢𑀺.

𑁬𑁫𑁨. ‘‘‘𑀅𑀝𑁆𑀞𑀧𑀜𑁆𑀜𑀸𑀲𑀓𑁆𑀔𑀢𑁆𑀢𑀼𑀜𑁆𑀘, 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀲𑁆𑀲𑀢𑀺;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀫𑀳𑀺𑀬𑀸 𑀓𑀸𑀭𑀬𑀺𑀲𑁆𑀲𑀢𑀺.

𑁬𑁫𑁩. ‘‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀳𑀺, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁬𑁫𑁪. ‘‘‘𑀲𑀓𑁆𑀬𑀸𑀦𑀁 𑀓𑀼𑀮𑀓𑁂𑀢𑀼𑀲𑁆𑀲, 𑀜𑀸𑀢𑀺𑀩𑀦𑁆𑀥𑀼 𑀪𑀯𑀺𑀲𑁆𑀲𑀢𑀺;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀉𑀧𑀝𑁆𑀞𑀸𑀓𑁄 𑀫𑀳𑁂𑀲𑀺𑀦𑁄.

𑁬𑁫𑁫. ‘‘‘𑀆𑀢𑀸𑀧𑀻 𑀦𑀺𑀧𑀓𑁄 𑀘𑀸𑀧𑀺, 𑀩𑀸𑀳𑀼𑀲𑀘𑁆𑀘𑁂 𑀲𑀼𑀓𑁄𑀯𑀺𑀤𑁄;

𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀢𑁆𑀣𑀤𑁆𑀥𑁄, 𑀲𑀩𑁆𑀩𑀧𑀸𑀞𑀻 𑀪𑀯𑀺𑀲𑁆𑀲𑀢𑀺.

𑁬𑁫𑁬. ‘‘‘𑀧𑀥𑀸𑀦𑀧𑀳𑀺𑀢𑀢𑁆𑀢𑁄 𑀲𑁄, 𑀉𑀧𑀲𑀦𑁆𑀢𑁄 𑀦𑀺𑀭𑀽𑀧𑀥𑀺;

𑀲𑀩𑁆𑀩𑀸𑀲𑀯𑁂 𑀧𑀭𑀺𑀜𑁆𑀜𑀸𑀬, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺𑀦𑀸𑀲𑀯𑁄.

𑁬𑁫𑁭. ‘‘‘𑀲𑀦𑁆𑀢𑀺 𑀆𑀭𑀜𑁆𑀜𑀓𑀸 𑀦𑀸𑀕𑀸, 𑀓𑀼𑀜𑁆𑀚𑀭𑀸 𑀲𑀝𑁆𑀞𑀺𑀳𑀸𑀬𑀦𑀸;

𑀢𑀺𑀥𑀸𑀧𑀪𑀺𑀦𑁆𑀦𑀸 𑀫𑀸𑀢𑀗𑁆𑀕𑀸, 𑀈𑀲𑀸𑀤𑀦𑁆𑀢𑀸 𑀉𑀭𑀽𑀴𑁆𑀳𑀯𑀸.

𑁬𑁫𑁮. ‘‘‘𑀅𑀦𑁂𑀓𑀲𑀢𑀲𑀳𑀲𑁆𑀲𑀸, 𑀧𑀡𑁆𑀟𑀺𑀢𑀸𑀧𑀺 𑀫𑀳𑀺𑀤𑁆𑀥𑀺𑀓𑀸;

𑀲𑀩𑁆𑀩𑁂 𑀢𑁂 𑀩𑀼𑀤𑁆𑀥𑀦𑀸𑀕𑀲𑁆𑀲, 𑀦 𑀳𑁄𑀦𑁆𑀢𑀼 𑀧𑀡𑀺𑀥𑀺𑀫𑁆𑀳𑀺 𑀢𑁂’ [𑀦 𑀳𑁄𑀦𑁆𑀢𑀺 𑀧𑀭𑀺𑀯𑀺𑀫𑁆𑀪𑀺𑀢𑀸 (𑀲𑁆𑀬𑀸.), 𑀦 𑀳𑁄𑀦𑁆𑀢𑀺 𑀧𑀡𑀺𑀥𑀺𑀫𑁆𑀳𑀺 𑀢𑁂 (𑀓.)].

𑁬𑁫𑁯. ‘‘𑀆𑀤𑀺𑀬𑀸𑀫𑁂 𑀦𑀫𑀲𑁆𑀲𑀸𑀫𑀺, 𑀫𑀚𑁆𑀛𑀺𑀫𑁂 𑀅𑀣 𑀧𑀘𑁆𑀙𑀺𑀫𑁂;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀼𑀫𑀦𑁄, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀉𑀧𑀝𑁆𑀞𑀳𑀺𑀁.

𑁬𑁬𑁦. ‘‘𑀆𑀢𑀸𑀧𑀻 𑀦𑀺𑀧𑀓𑁄 𑀘𑀸𑀧𑀺, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄;

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑁄, 𑀲𑁂𑀔𑀪𑀽𑀫𑀻𑀲𑀼 𑀓𑁄𑀯𑀺𑀤𑁄.

𑁬𑁬𑁧. ‘‘𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀬𑀁 𑀓𑀫𑁆𑀫𑀫𑀪𑀺𑀦𑀻𑀳𑀭𑀺𑀁;

𑀢𑀸𑀳𑀁 𑀪𑀽𑀫𑀺𑀫𑀦𑀼𑀧𑁆𑀧𑀢𑁆𑀢𑁄, 𑀞𑀺𑀢𑀸 𑀲𑀤𑁆𑀥𑀫𑁆𑀫𑀫𑀸𑀘𑀮𑀸 [𑀞𑀺𑀢𑁄 𑀲𑀤𑁆𑀥𑀫𑁆𑀫𑀫𑀸𑀘𑀮𑁄 (𑀲𑀻.), 𑀞𑀺𑀢𑀸 𑀲𑀤𑁆𑀥𑀸 𑀫𑀳𑀧𑁆𑀨𑀮𑀸 (𑀲𑁆𑀬𑀸.)].

𑁬𑁬𑁨. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁬𑁬𑁩. ‘‘𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄, 𑀯𑀺𑀫𑁄𑀓𑁆𑀔𑀸𑀧𑀺 𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁’’.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸𑀧𑀤𑀸𑀦𑀁 𑀤𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀘, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀓𑁄𑀮𑀺𑀢𑁄;

𑀓𑀲𑁆𑀲𑀧𑁄 𑀅𑀦𑀼𑀭𑀼𑀤𑁆𑀥𑁄 𑀘, 𑀧𑀼𑀡𑁆𑀡𑀢𑁆𑀣𑁂𑀭𑁄 𑀉𑀧𑀸𑀮𑀺 𑀘.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀧𑀺𑀡𑁆𑀟𑁄𑀮𑁄, 𑀭𑁂𑀯𑀢𑀸𑀦𑀦𑁆𑀤𑀧𑀡𑁆𑀟𑀺𑀢𑁄;

𑀙𑀲𑀢𑀸𑀦𑀺 𑀘 𑀧𑀜𑁆𑀜𑀸𑀲, 𑀕𑀸𑀣𑀸𑀬𑁄 𑀲𑀩𑁆𑀩𑀧𑀺𑀡𑁆𑀟𑀺𑀢𑀸.

𑀅𑀧𑀤𑀸𑀦𑁂 𑀩𑀼𑀤𑁆𑀥𑀯𑀕𑁆𑀕𑁄 𑀧𑀞𑀫𑁄.