(𑁨𑁬-𑁨𑁭) 𑀘𑀢𑁆𑀢𑀸𑀮𑀻𑀲𑀅𑀯𑀺𑀭𑀴𑀤𑀦𑁆𑀢𑀮𑀓𑁆𑀔𑀡𑀸𑀦𑀺

𑁨𑁩𑁪. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀅𑀳𑁄𑀲𑀺. 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬, 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀅𑀳𑁄𑀲𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄 𑀘 𑀳𑁄𑀢𑀺 𑀅𑀯𑀺𑀭𑀴𑀤𑀦𑁆𑀢𑁄 𑀘.

‘‘𑀲𑁄 𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀪𑁂𑀚𑁆𑀚𑀧𑀭𑀺𑀲𑁄 𑀳𑁄𑀢𑀺, 𑀅𑀪𑁂𑀚𑁆𑀚𑀸𑀲𑁆𑀲 𑀳𑁄𑀦𑁆𑀢𑀺 𑀧𑀭𑀺𑀲𑀸, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀚𑀸𑀦𑀧𑀤𑀸 𑀕𑀡𑀓𑀫𑀳𑀸𑀫𑀢𑁆𑀢𑀸 𑀅𑀦𑀻𑀓𑀝𑁆𑀞𑀸 𑀤𑁄𑀯𑀸𑀭𑀺𑀓𑀸 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀭𑀸𑀚𑀸𑀦𑁄 𑀪𑁄𑀕𑀺𑀬𑀸 𑀓𑀼𑀫𑀸𑀭𑀸. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺 … 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀅𑀪𑁂𑀚𑁆𑀚𑀧𑀭𑀺𑀲𑁄 𑀳𑁄𑀢𑀺, 𑀅𑀪𑁂𑀚𑁆𑀚𑀸𑀲𑁆𑀲 𑀳𑁄𑀦𑁆𑀢𑀺 𑀧𑀭𑀺𑀲𑀸, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁩𑁫. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀯𑁂𑀪𑀽𑀢𑀺𑀬𑀁 𑀲𑀳𑀺𑀢𑀪𑁂𑀤𑀓𑀸𑀭𑀺𑀁,

𑀪𑁂𑀤𑀧𑁆𑀧𑀯𑀟𑁆𑀠𑀦𑀯𑀺𑀯𑀸𑀤𑀓𑀸𑀭𑀺𑀁;

𑀓𑀮𑀳𑀧𑁆𑀧𑀯𑀟𑁆𑀠𑀦𑀆𑀓𑀺𑀘𑁆𑀘𑀓𑀸𑀭𑀺𑀁,

𑀲𑀳𑀺𑀢𑀸𑀦𑀁 𑀪𑁂𑀤𑀚𑀦𑀦𑀺𑀁 𑀦 𑀪𑀡𑀺.

‘‘𑀅𑀯𑀺𑀯𑀸𑀤𑀯𑀟𑁆𑀠𑀦𑀓𑀭𑀺𑀁 𑀲𑀼𑀕𑀺𑀭𑀁,

𑀪𑀺𑀦𑁆𑀦𑀸𑀦𑀼𑀲𑀦𑁆𑀥𑀺𑀚𑀦𑀦𑀺𑀁 𑀅𑀪𑀡𑀺;

𑀓𑀮𑀳𑀁 𑀚𑀦𑀲𑁆𑀲 𑀧𑀦𑀼𑀤𑀻 𑀲𑀫𑀗𑁆𑀕𑀻,

𑀲𑀳𑀺𑀢𑁂𑀳𑀺 𑀦𑀦𑁆𑀤𑀢𑀺 𑀧𑀫𑁄𑀤𑀢𑀺 𑀘.

‘‘𑀲𑀼𑀕𑀢𑀻𑀲𑀼 𑀲𑁄 𑀨𑀮𑀯𑀺𑀧𑀸𑀓𑀁,

𑀅𑀦𑀼𑀪𑀯𑀢𑀺 𑀢𑀢𑁆𑀣 𑀫𑁄𑀤𑀢𑀺;

𑀤𑀦𑁆𑀢𑀸 𑀇𑀥 𑀳𑁄𑀦𑁆𑀢𑀺 𑀅𑀯𑀺𑀭𑀴𑀸 𑀲𑀳𑀺𑀢𑀸,

𑀘𑀢𑀼𑀭𑁄 𑀤𑀲𑀲𑁆𑀲 𑀫𑀼𑀔𑀚𑀸 𑀲𑀼𑀲𑀡𑁆𑀞𑀺𑀢𑀸.

‘‘𑀬𑀤𑀺 𑀔𑀢𑁆𑀢𑀺𑀬𑁄 𑀪𑀯𑀢𑀺 𑀪𑀽𑀫𑀺𑀧𑀢𑀺,

𑀅𑀯𑀺𑀪𑁂𑀤𑀺𑀬𑀸𑀲𑁆𑀲 𑀧𑀭𑀺𑀲𑀸 𑀪𑀯𑀢𑀺;

𑀲𑀫𑀡𑁄 𑀘 𑀳𑁄𑀢𑀺 𑀯𑀺𑀭𑀚𑁄 𑀯𑀺𑀫𑀮𑁄,

𑀧𑀭𑀺𑀲𑀸𑀲𑁆𑀲 𑀳𑁄𑀢𑀺 𑀅𑀦𑀼𑀕𑀢𑀸 𑀅𑀘𑀮𑀸’’𑀢𑀺.