(𑁨𑁩) 𑀉𑀡𑁆𑀳𑀻𑀲𑀲𑀻𑀲𑀮𑀓𑁆𑀔𑀡𑀁

𑁨𑁩𑁦. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀩𑀳𑀼𑀚𑀦𑀧𑀼𑀩𑁆𑀩𑀗𑁆𑀕𑀫𑁄 𑀅𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀩𑀳𑀼𑀚𑀦𑀧𑀸𑀫𑁄𑀓𑁆𑀔𑁄 𑀓𑀸𑀬𑀲𑀼𑀘𑀭𑀺𑀢𑁂 𑀯𑀘𑀻𑀲𑀼𑀘𑀭𑀺𑀢𑁂 𑀫𑀦𑁄𑀲𑀼𑀘𑀭𑀺𑀢𑁂 𑀤𑀸𑀦𑀲𑀁𑀯𑀺𑀪𑀸𑀕𑁂 𑀲𑀻𑀮𑀲𑀫𑀸𑀤𑀸𑀦𑁂 𑀉𑀧𑁄𑀲𑀣𑀼𑀧𑀯𑀸𑀲𑁂 𑀫𑀢𑁆𑀢𑁂𑀬𑁆𑀬𑀢𑀸𑀬 𑀧𑁂𑀢𑁆𑀢𑁂𑀬𑁆𑀬𑀢𑀸𑀬 𑀲𑀸𑀫𑀜𑁆𑀜𑀢𑀸𑀬 𑀩𑁆𑀭𑀳𑁆𑀫𑀜𑁆𑀜𑀢𑀸𑀬 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀢𑀸𑀬 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀘 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺 𑁋 𑀉𑀡𑁆𑀳𑀻𑀲𑀲𑀻𑀲𑁄 𑀳𑁄𑀢𑀺.

‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀫𑀳𑀸𑀲𑁆𑀲 𑀚𑀦𑁄 𑀅𑀦𑁆𑀯𑀸𑀬𑀺𑀓𑁄 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀦𑁂𑀕𑀫𑀚𑀸𑀦𑀧𑀤𑀸 𑀕𑀡𑀓𑀫𑀳𑀸𑀫𑀢𑁆𑀢𑀸 𑀅𑀦𑀻𑀓𑀝𑁆𑀞𑀸 𑀤𑁄𑀯𑀸𑀭𑀺𑀓𑀸 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀭𑀸𑀚𑀸𑀦𑁄 𑀪𑁄𑀕𑀺𑀬𑀸 𑀓𑀼𑀫𑀸𑀭𑀸. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀫𑀳𑀸𑀲𑁆𑀲 𑀚𑀦𑁄 𑀅𑀦𑁆𑀯𑀸𑀬𑀺𑀓𑁄 𑀳𑁄𑀢𑀺, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁩𑁧. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀼𑀩𑁆𑀩𑀗𑁆𑀕𑀫𑁄 𑀲𑀼𑀘𑀭𑀺𑀢𑁂𑀲𑀼 𑀅𑀳𑀼,

𑀥𑀫𑁆𑀫𑁂𑀲𑀼 𑀥𑀫𑁆𑀫𑀘𑀭𑀺𑀬𑀸𑀪𑀺𑀭𑀢𑁄;

𑀅𑀦𑁆𑀯𑀸𑀬𑀺𑀓𑁄 𑀩𑀳𑀼𑀚𑀦𑀲𑁆𑀲 𑀅𑀳𑀼,

𑀲𑀕𑁆𑀕𑁂𑀲𑀼 𑀯𑁂𑀤𑀬𑀺𑀢𑁆𑀣 𑀧𑀼𑀜𑁆𑀜𑀨𑀮𑀁.

‘‘𑀯𑁂𑀤𑀺𑀢𑁆𑀯𑀸 𑀲𑁄 𑀲𑀼𑀘𑀭𑀺𑀢𑀲𑁆𑀲 𑀨𑀮𑀁,

𑀉𑀡𑁆𑀳𑀻𑀲𑀲𑀻𑀲𑀢𑁆𑀢𑀫𑀺𑀥𑀚𑁆𑀛𑀕𑀫𑀸;

𑀩𑁆𑀬𑀸𑀓𑀁𑀲𑀼 𑀩𑁆𑀬𑀜𑁆𑀚𑀦𑀦𑀺𑀫𑀺𑀢𑁆𑀢𑀥𑀭𑀸,

𑀧𑀼𑀩𑁆𑀩𑀗𑁆𑀕𑀫𑁄 𑀩𑀳𑀼𑀚𑀦𑀁 𑀳𑁂𑀲𑁆𑀲𑀢𑀺.

‘‘𑀧𑀝𑀺𑀪𑁄𑀕𑀺𑀬𑀸 𑀫𑀦𑀼𑀚𑁂𑀲𑀼 𑀇𑀥,

𑀧𑀼𑀩𑁆𑀩𑁂𑀯 𑀢𑀲𑁆𑀲 𑀅𑀪𑀺𑀳𑀭𑀦𑁆𑀢𑀺 𑀢𑀤𑀸;

𑀬𑀤𑀺 𑀔𑀢𑁆𑀢𑀺𑀬𑁄 𑀪𑀯𑀢𑀺 𑀪𑀽𑀫𑀺𑀧𑀢𑀺,

𑀧𑀝𑀺𑀳𑀸𑀭𑀓𑀁 𑀩𑀳𑀼𑀚𑀦𑁂 𑀮𑀪𑀢𑀺.

‘‘𑀅𑀣 𑀘𑁂𑀧𑀺 𑀧𑀩𑁆𑀩𑀚𑀢𑀺 𑀲𑁄 𑀫𑀦𑀼𑀚𑁄,

𑀥𑀫𑁆𑀫𑁂𑀲𑀼 𑀳𑁄𑀢𑀺 𑀧𑀕𑀼𑀡𑁄 𑀯𑀺𑀲𑀯𑀻;

𑀢𑀲𑁆𑀲𑀸𑀦𑀼𑀲𑀸𑀲𑀦𑀺𑀕𑀼𑀡𑀸𑀪𑀺𑀭𑀢𑁄,

𑀅𑀦𑁆𑀯𑀸𑀬𑀺𑀓𑁄 𑀩𑀳𑀼𑀚𑀦𑁄 𑀪𑀯𑀢𑀻’’𑀢𑀺.