(𑁧𑁧) 𑀏𑀡𑀺𑀚𑀗𑁆𑀖𑀮𑀓𑁆𑀔𑀡𑀁

𑁨𑁧𑁪. ‘‘𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀼𑀭𑀺𑀫𑀁 𑀚𑀸𑀢𑀺𑀁 𑀧𑀼𑀭𑀺𑀫𑀁 𑀪𑀯𑀁 𑀧𑀼𑀭𑀺𑀫𑀁 𑀦𑀺𑀓𑁂𑀢𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀯𑀸𑀘𑁂𑀢𑀸 𑀅𑀳𑁄𑀲𑀺 𑀲𑀺𑀧𑁆𑀧𑀁 𑀯𑀸 𑀯𑀺𑀚𑁆𑀚𑀁 𑀯𑀸 𑀘𑀭𑀡𑀁 𑀯𑀸 𑀓𑀫𑁆𑀫𑀁 𑀯𑀸 𑁋 ‘𑀓𑀺𑀁 𑀢𑀺𑀫𑁂 𑀔𑀺𑀧𑁆𑀧𑀁 𑀯𑀺𑀚𑀸𑀦𑁂𑀬𑁆𑀬𑀼𑀁, 𑀔𑀺𑀧𑁆𑀧𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀘𑀺𑀭𑀁 𑀓𑀺𑀮𑀺𑀲𑁆𑀲𑁂𑀬𑁆𑀬𑀼’’𑀦𑁆𑀢𑀺. 𑀲𑁄 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀝𑀢𑁆𑀢𑀸…𑀧𑁂… 𑀲𑁄 𑀢𑀢𑁄 𑀘𑀼𑀢𑁄 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀇𑀫𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀺. 𑀏𑀡𑀺𑀚𑀗𑁆𑀖𑁄 𑀳𑁄𑀢𑀺.

‘‘𑀲𑁄 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻…𑀧𑁂… 𑀭𑀸𑀚𑀸 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀬𑀸𑀦𑀺 𑀢𑀸𑀦𑀺 𑀭𑀸𑀚𑀸𑀭𑀳𑀸𑀦𑀺 𑀭𑀸𑀚𑀗𑁆𑀕𑀸𑀦𑀺 𑀭𑀸𑀚𑀽𑀧𑀪𑁄𑀕𑀸𑀦𑀺 𑀭𑀸𑀚𑀸𑀦𑀼𑀘𑁆𑀙𑀯𑀺𑀓𑀸𑀦𑀺 𑀢𑀸𑀦𑀺 𑀔𑀺𑀧𑁆𑀧𑀁 𑀧𑀝𑀺𑀮𑀪𑀢𑀺. 𑀭𑀸𑀚𑀸 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺… 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀓𑀺𑀁 𑀮𑀪𑀢𑀺? 𑀬𑀸𑀦𑀺 𑀢𑀸𑀦𑀺 𑀲𑀫𑀡𑀸𑀭𑀳𑀸𑀦𑀺 𑀲𑀫𑀡𑀗𑁆𑀕𑀸𑀦𑀺 𑀲𑀫𑀡𑀽𑀧𑀪𑁄𑀕𑀸𑀦𑀺 𑀲𑀫𑀡𑀸𑀦𑀼𑀘𑁆𑀙𑀯𑀺𑀓𑀸𑀦𑀺, 𑀢𑀸𑀦𑀺 𑀔𑀺𑀧𑁆𑀧𑀁 𑀧𑀝𑀺𑀮𑀪𑀢𑀺. 𑀩𑀼𑀤𑁆𑀥𑁄 𑀲𑀫𑀸𑀦𑁄 𑀇𑀤𑀁 𑀮𑀪𑀢𑀺’’. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘.

𑁨𑁧𑁫. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀺𑀧𑁆𑀧𑁂𑀲𑀼 𑀯𑀺𑀚𑁆𑀚𑀸𑀘𑀭𑀡𑁂𑀲𑀼 𑀓𑀫𑁆𑀫𑁂𑀲𑀼 [𑀓𑀫𑁆𑀫𑀲𑀼 (𑀲𑀻. 𑀧𑀻.)],

𑀓𑀣𑀁 𑀯𑀺𑀚𑀸𑀦𑁂𑀬𑁆𑀬𑀼𑀁 [𑀯𑀺𑀚𑀸𑀦𑁂𑀬𑁆𑀬 (𑀲𑀻. 𑀧𑀻.), 𑀯𑀺𑀚𑀸𑀦𑁂𑀬𑁆𑀬𑀼 (𑀲𑁆𑀬𑀸.)] 𑀮𑀳𑀼𑀦𑁆𑀢𑀺 𑀇𑀘𑁆𑀙𑀢𑀺;

𑀬𑀤𑀽𑀧𑀖𑀸𑀢𑀸𑀬 𑀦 𑀳𑁄𑀢𑀺 𑀓𑀲𑁆𑀲𑀘𑀺,

𑀯𑀸𑀘𑁂𑀢𑀺 𑀔𑀺𑀧𑁆𑀧𑀁 𑀦 𑀘𑀺𑀭𑀁 𑀓𑀺𑀮𑀺𑀲𑁆𑀲𑀢𑀺.

‘‘𑀢𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀼𑀲𑀮𑀁 𑀲𑀼𑀔𑀼𑀤𑁆𑀭𑀬𑀁 [𑀲𑀼𑀔𑀺𑀦𑁆𑀤𑁆𑀭𑀺𑀬𑀁 (𑀓.)],

𑀚𑀗𑁆𑀖𑀸 𑀫𑀦𑀼𑀜𑁆𑀜𑀸 𑀮𑀪𑀢𑁂 𑀲𑀼𑀲𑀡𑁆𑀞𑀺𑀢𑀸;

𑀯𑀝𑁆𑀝𑀸 𑀲𑀼𑀚𑀸𑀢𑀸 𑀅𑀦𑀼𑀧𑀼𑀩𑁆𑀩𑀫𑀼𑀕𑁆𑀕𑀢𑀸,

𑀉𑀤𑁆𑀥𑀕𑁆𑀕𑀮𑁄𑀫𑀸 𑀲𑀼𑀔𑀼𑀫𑀢𑁆𑀢𑀘𑁄𑀢𑁆𑀣𑀢𑀸.

‘‘𑀏𑀡𑁂𑀬𑁆𑀬𑀚𑀗𑁆𑀖𑁄𑀢𑀺 𑀢𑀫𑀸𑀳𑀼 𑀧𑀼𑀕𑁆𑀕𑀮𑀁,

𑀲𑀫𑁆𑀧𑀢𑁆𑀢𑀺𑀬𑀸 𑀔𑀺𑀧𑁆𑀧𑀫𑀺𑀥𑀸𑀳𑀼 [𑀔𑀺𑀧𑁆𑀧𑀫𑀺𑀤𑀸𑀳𑀼 (?)] 𑀮𑀓𑁆𑀔𑀡𑀁;

𑀕𑁂𑀳𑀸𑀦𑀼𑀮𑁄𑀫𑀸𑀦𑀺 𑀬𑀤𑀸𑀪𑀺𑀓𑀗𑁆𑀔𑀢𑀺,

𑀅𑀧𑀩𑁆𑀩𑀚𑀁 𑀔𑀺𑀧𑁆𑀧𑀫𑀺𑀥𑀸𑀥𑀺𑀕𑀘𑁆𑀙𑀢𑀺 [𑀔𑀺𑀧𑁆𑀧𑀫𑀺𑀤𑀸𑀥𑀺𑀕𑀘𑁆𑀙𑀢𑀺 (?)].

‘‘𑀲𑀘𑁂 𑀘 𑀧𑀩𑁆𑀩𑀚𑁆𑀚𑀫𑀼𑀧𑁂𑀢𑀺 𑀢𑀸𑀤𑀺𑀲𑁄,

𑀦𑁂𑀓𑁆𑀔𑀫𑁆𑀫𑀙𑀦𑁆𑀤𑀸𑀪𑀺𑀭𑀢𑁄 𑀯𑀺𑀘𑀓𑁆𑀔𑀡𑁄;

𑀅𑀦𑀼𑀘𑁆𑀙𑀯𑀺𑀓𑀲𑁆𑀲 𑀬𑀤𑀸𑀦𑀼𑀮𑁄𑀫𑀺𑀓𑀁,

𑀢𑀁 𑀯𑀺𑀦𑁆𑀤𑀢𑀺 𑀔𑀺𑀧𑁆𑀧𑀫𑀦𑁄𑀫𑀯𑀺𑀓𑁆𑀓𑀫𑁄 [𑀦𑀺𑀓𑁆𑀓𑀫𑁄 (𑀲𑀻. 𑀲𑁆𑀬𑀸. 𑀧𑀻.)]’’𑀢𑀺.