𑁬. 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀁

𑁧𑁬𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀯𑁂𑀥𑀜𑁆𑀜𑀸 𑀦𑀸𑀫 𑀲𑀓𑁆𑀬𑀸, 𑀢𑁂𑀲𑀁 𑀅𑀫𑁆𑀩𑀯𑀦𑁂 𑀧𑀸𑀲𑀸𑀤𑁂.

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀓𑀸𑀮𑀗𑁆𑀓𑀺𑀭𑀺𑀬𑀸

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 [𑀦𑀸𑀣𑀧𑀼𑀢𑁆𑀢𑁄 (𑀲𑀻. 𑀧𑀻.)] 𑀧𑀸𑀯𑀸𑀬𑀁 𑀅𑀥𑀼𑀦𑀸𑀓𑀸𑀮𑀗𑁆𑀓𑀢𑁄 𑀳𑁄𑀢𑀺. 𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸𑀬 𑀪𑀺𑀦𑁆𑀦𑀸 𑀦𑀺𑀕𑀡𑁆𑀞𑀸 𑀤𑁆𑀯𑁂𑀥𑀺𑀓𑀚𑀸𑀢𑀸 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀺, 𑀓𑀺𑀁 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀺𑀲𑁆𑀲𑀲𑀺? 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀢𑁆𑀯𑀫𑀲𑀺, 𑀅𑀳𑀫𑀲𑁆𑀫𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄. 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂. 𑀧𑀼𑀭𑁂𑀯𑀘𑀦𑀻𑀬𑀁 𑀧𑀘𑁆𑀙𑀸 𑀅𑀯𑀘, 𑀧𑀘𑁆𑀙𑀸𑀯𑀘𑀦𑀻𑀬𑀁 𑀧𑀼𑀭𑁂 𑀅𑀯𑀘. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀁, 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄, 𑀦𑀺𑀕𑁆𑀕𑀳𑀺𑀢𑁄 𑀢𑁆𑀯𑀫𑀲𑀺, 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬, 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺. 𑀯𑀥𑁄𑀬𑁂𑀯 𑀔𑁄 [𑀯𑀥𑁄𑀬𑁂𑀯𑁂𑀓𑁄 (𑀓.)] 𑀫𑀜𑁆𑀜𑁂 𑀦𑀺𑀕𑀡𑁆𑀞𑁂𑀲𑀼 𑀦𑀸𑀝𑀧𑀼𑀢𑁆𑀢𑀺𑀬𑁂𑀲𑀼 𑀯𑀢𑁆𑀢𑀢𑀺 [𑀅𑀦𑀼𑀯𑀢𑁆𑀢𑀢𑀺 (𑀲𑁆𑀬𑀸. 𑀓.)]. 𑀬𑁂𑀧𑀺 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀲𑀸𑀯𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸, 𑀢𑁂𑀧𑀺 [𑀢𑁂 𑀢𑁂𑀲𑀼 (𑀓.)] 𑀦𑀺𑀕𑀡𑁆𑀞𑁂𑀲𑀼 𑀦𑀸𑀝𑀧𑀼𑀢𑁆𑀢𑀺𑀬𑁂𑀲𑀼 𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑀸 [𑀦𑀺𑀩𑁆𑀩𑀺𑀦𑁆𑀤𑀭𑀽𑀧𑀸 (𑀓.)] 𑀯𑀺𑀭𑀢𑁆𑀢𑀭𑀽𑀧𑀸 𑀧𑀝𑀺𑀯𑀸𑀦𑀭𑀽𑀧𑀸, 𑀬𑀣𑀸 𑀢𑀁 𑀤𑀼𑀭𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀤𑀼𑀧𑁆𑀧𑀯𑁂𑀤𑀺𑀢𑁂 𑀅𑀦𑀺𑀬𑁆𑀬𑀸𑀦𑀺𑀓𑁂 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂 𑀪𑀺𑀦𑁆𑀦𑀣𑀽𑀧𑁂 𑀅𑀧𑁆𑀧𑀝𑀺𑀲𑀭𑀡𑁂.

𑁧𑁬𑁫. 𑀅𑀣 𑀔𑁄 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄 𑀧𑀸𑀯𑀸𑀬𑀁 𑀯𑀲𑁆𑀲𑀁𑀯𑀼𑀝𑁆𑀞𑁄 [𑀯𑀲𑁆𑀲𑀁𑀯𑀼𑀢𑁆𑀣𑁄 (𑀲𑀻. 𑀲𑁆𑀬𑀸. 𑀧𑀻.)] 𑀬𑁂𑀦 𑀲𑀸𑀫𑀕𑀸𑀫𑁄, 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀕𑀡𑁆𑀞𑁄, 𑀪𑀦𑁆𑀢𑁂, 𑀦𑀸𑀝𑀧𑀼𑀢𑁆𑀢𑁄 𑀧𑀸𑀯𑀸𑀬𑀁 𑀅𑀥𑀼𑀦𑀸𑀓𑀸𑀮𑀗𑁆𑀓𑀢𑁄. 𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸𑀬 𑀪𑀺𑀦𑁆𑀦𑀸 𑀦𑀺𑀕𑀡𑁆𑀞𑀸 𑀤𑁆𑀯𑁂𑀥𑀺𑀓𑀚𑀸𑀢𑀸…𑀧𑁂… 𑀪𑀺𑀦𑁆𑀦𑀣𑀽𑀧𑁂 𑀅𑀧𑁆𑀧𑀝𑀺𑀲𑀭𑀡𑁂’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀘𑀼𑀦𑁆𑀤𑀁 𑀲𑀫𑀡𑀼𑀤𑁆𑀤𑁂𑀲𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀔𑁄 𑀇𑀤𑀁, 𑀆𑀯𑀼𑀲𑁄 𑀘𑀼𑀦𑁆𑀤, 𑀓𑀣𑀸𑀧𑀸𑀪𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀆𑀬𑀸𑀫𑀸𑀯𑀼𑀲𑁄 𑀘𑀼𑀦𑁆𑀤, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 [𑀆𑀭𑁄𑀘𑁂𑀬𑁆𑀬𑀸𑀫𑀸𑀢𑀺 (𑀲𑁆𑀬𑀸.)]. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀘𑀼𑀦𑁆𑀤𑁄 𑀘 𑀲𑀫𑀡𑀼𑀤𑁆𑀤𑁂𑀲𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄 𑀏𑀯𑀫𑀸𑀳, ‘𑀦𑀺𑀕𑀡𑁆𑀞𑁄, 𑀪𑀦𑁆𑀢𑁂, 𑀦𑀸𑀝𑀧𑀼𑀢𑁆𑀢𑁄 𑀧𑀸𑀯𑀸𑀬𑀁 𑀅𑀥𑀼𑀦𑀸𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸𑀬 𑀪𑀺𑀦𑁆𑀦𑀸 𑀦𑀺𑀕𑀡𑁆𑀞𑀸…𑀧𑁂… 𑀪𑀺𑀦𑁆𑀦𑀣𑀽𑀧𑁂 𑀅𑀧𑁆𑀧𑀝𑀺𑀲𑀭𑀡𑁂’’’𑀢𑀺.

𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀥𑀫𑁆𑀫𑀯𑀺𑀦𑀬𑁄

𑁧𑁬𑁬. ‘‘𑀏𑀯𑀁 𑀳𑁂𑀢𑀁, 𑀘𑀼𑀦𑁆𑀤, 𑀳𑁄𑀢𑀺 𑀤𑀼𑀭𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀤𑀼𑀧𑁆𑀧𑀯𑁂𑀤𑀺𑀢𑁂 𑀅𑀦𑀺𑀬𑁆𑀬𑀸𑀦𑀺𑀓𑁂 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂. 𑀇𑀥, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀳𑁄𑀢𑀺 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀤𑀼𑀭𑀓𑁆𑀔𑀸𑀢𑁄 𑀤𑀼𑀧𑁆𑀧𑀯𑁂𑀤𑀺𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑁄 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄, 𑀲𑀸𑀯𑀓𑁄 𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀢𑀺 𑀦 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀦 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀯𑁄𑀓𑁆𑀓𑀫𑁆𑀫 𑀘 𑀢𑀫𑁆𑀳𑀸 𑀥𑀫𑁆𑀫𑀸 𑀯𑀢𑁆𑀢𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀢𑀲𑁆𑀲 𑀢𑁂, 𑀆𑀯𑀼𑀲𑁄, 𑀮𑀸𑀪𑀸, 𑀢𑀲𑁆𑀲 𑀢𑁂 𑀲𑀼𑀮𑀤𑁆𑀥𑀁, 𑀲𑀢𑁆𑀣𑀸 𑀘 𑀢𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀤𑀼𑀭𑀓𑁆𑀔𑀸𑀢𑁄 𑀤𑀼𑀧𑁆𑀧𑀯𑁂𑀤𑀺𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑁄 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀢𑁆𑀯𑀜𑁆𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀲𑀺, 𑀦 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄, 𑀦 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀯𑁄𑀓𑁆𑀓𑀫𑁆𑀫 𑀘 𑀢𑀫𑁆𑀳𑀸 𑀥𑀫𑁆𑀫𑀸 𑀯𑀢𑁆𑀢𑀲𑀻’𑀢𑀺. 𑀇𑀢𑀺 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀕𑀸𑀭𑀬𑁆𑀳𑁄, 𑀥𑀫𑁆𑀫𑁄𑀧𑀺 𑀢𑀢𑁆𑀣 𑀕𑀸𑀭𑀬𑁆𑀳𑁄, 𑀲𑀸𑀯𑀓𑁄 𑀘 𑀢𑀢𑁆𑀣 𑀏𑀯𑀁 𑀧𑀸𑀲𑀁𑀲𑁄. 𑀬𑁄 𑀔𑁄, 𑀘𑀼𑀦𑁆𑀤, 𑀏𑀯𑀭𑀽𑀧𑀁 𑀲𑀸𑀯𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀏𑀢𑀸𑀬𑀲𑁆𑀫𑀸 𑀢𑀣𑀸 𑀧𑀝𑀺𑀧𑀚𑁆𑀚𑀢𑀼, 𑀬𑀣𑀸 𑀢𑁂 𑀲𑀢𑁆𑀣𑀸𑀭𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄’𑀢𑀺. 𑀬𑁄 𑀘 𑀲𑀫𑀸𑀤𑀧𑁂𑀢𑀺 [𑀲𑀫𑀸𑀤𑀸𑀧𑁂𑀢𑀺 (𑀲𑀻. 𑀝𑁆𑀞.)], 𑀬𑀜𑁆𑀘 𑀲𑀫𑀸𑀤𑀧𑁂𑀢𑀺, 𑀬𑁄 𑀘 𑀲𑀫𑀸𑀤𑀧𑀺𑀢𑁄 [𑀲𑀫𑀸𑀤𑀸𑀧𑀺𑀢𑁄 (𑀲𑀻. 𑀝𑁆𑀞.)] 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀁 𑀳𑁂𑀢𑀁, 𑀘𑀼𑀦𑁆𑀤, 𑀳𑁄𑀢𑀺 𑀤𑀼𑀭𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀤𑀼𑀧𑁆𑀧𑀯𑁂𑀤𑀺𑀢𑁂 𑀅𑀦𑀺𑀬𑁆𑀬𑀸𑀦𑀺𑀓𑁂 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂.

𑁧𑁬𑁭. ‘‘𑀇𑀥 𑀧𑀦, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀳𑁄𑀢𑀺 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀤𑀼𑀭𑀓𑁆𑀔𑀸𑀢𑁄 𑀤𑀼𑀧𑁆𑀧𑀯𑁂𑀤𑀺𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑁄 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄, 𑀲𑀸𑀯𑀓𑁄 𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀲𑀫𑀸𑀤𑀸𑀬 𑀢𑀁 𑀥𑀫𑁆𑀫𑀁 𑀯𑀢𑁆𑀢𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀢𑀲𑁆𑀲 𑀢𑁂, 𑀆𑀯𑀼𑀲𑁄, 𑀅𑀮𑀸𑀪𑀸, 𑀢𑀲𑁆𑀲 𑀢𑁂 𑀤𑀼𑀮𑁆𑀮𑀤𑁆𑀥𑀁, 𑀲𑀢𑁆𑀣𑀸 𑀘 𑀢𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀤𑀼𑀭𑀓𑁆𑀔𑀸𑀢𑁄 𑀤𑀼𑀧𑁆𑀧𑀯𑁂𑀤𑀺𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑁄 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀢𑁆𑀯𑀜𑁆𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀲𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀲𑀫𑀸𑀤𑀸𑀬 𑀢𑀁 𑀥𑀫𑁆𑀫𑀁 𑀯𑀢𑁆𑀢𑀲𑀻’𑀢𑀺. 𑀇𑀢𑀺 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀕𑀸𑀭𑀬𑁆𑀳𑁄, 𑀥𑀫𑁆𑀫𑁄𑀧𑀺 𑀢𑀢𑁆𑀣 𑀕𑀸𑀭𑀬𑁆𑀳𑁄, 𑀲𑀸𑀯𑀓𑁄𑀧𑀺 𑀢𑀢𑁆𑀣 𑀏𑀯𑀁 𑀕𑀸𑀭𑀬𑁆𑀳𑁄. 𑀬𑁄 𑀔𑁄, 𑀘𑀼𑀦𑁆𑀤, 𑀏𑀯𑀭𑀽𑀧𑀁 𑀲𑀸𑀯𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀤𑁆𑀥𑀸𑀬𑀲𑁆𑀫𑀸 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀜𑀸𑀬𑀫𑀸𑀭𑀸𑀥𑁂𑀲𑁆𑀲𑀢𑀻’𑀢𑀺. 𑀬𑁄 𑀘 𑀧𑀲𑀁𑀲𑀢𑀺, 𑀬𑀜𑁆𑀘 𑀧𑀲𑀁𑀲𑀢𑀺, 𑀬𑁄 𑀘 𑀧𑀲𑀁𑀲𑀺𑀢𑁄 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀯𑀻𑀭𑀺𑀬𑀁 𑀆𑀭𑀪𑀢𑀺. 𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀘𑀼𑀦𑁆𑀤, 𑀳𑁄𑀢𑀺 𑀤𑀼𑀭𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀤𑀼𑀧𑁆𑀧𑀯𑁂𑀤𑀺𑀢𑁂 𑀅𑀦𑀺𑀬𑁆𑀬𑀸𑀦𑀺𑀓𑁂 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀥𑀫𑁆𑀫𑀯𑀺𑀦𑀬𑁄

𑁧𑁬𑁮. ‘‘𑀇𑀥 𑀧𑀦, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄, 𑀲𑀸𑀯𑀓𑁄 𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀢𑀺, 𑀦 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄, 𑀦 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀯𑁄𑀓𑁆𑀓𑀫𑁆𑀫 𑀘 𑀢𑀫𑁆𑀳𑀸 𑀥𑀫𑁆𑀫𑀸 𑀯𑀢𑁆𑀢𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀢𑀲𑁆𑀲 𑀢𑁂, 𑀆𑀯𑀼𑀲𑁄, 𑀅𑀮𑀸𑀪𑀸, 𑀢𑀲𑁆𑀲 𑀢𑁂 𑀤𑀼𑀮𑁆𑀮𑀤𑁆𑀥𑀁, 𑀲𑀢𑁆𑀣𑀸 𑀘 𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀢𑁆𑀯𑀜𑁆𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀲𑀺, 𑀦 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄, 𑀦 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀯𑁄𑀓𑁆𑀓𑀫𑁆𑀫 𑀘 𑀢𑀫𑁆𑀳𑀸 𑀥𑀫𑁆𑀫𑀸 𑀯𑀢𑁆𑀢𑀲𑀻’𑀢𑀺. 𑀇𑀢𑀺 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀧𑀸𑀲𑀁𑀲𑁄, 𑀥𑀫𑁆𑀫𑁄𑀧𑀺 𑀢𑀢𑁆𑀣 𑀧𑀸𑀲𑀁𑀲𑁄, 𑀲𑀸𑀯𑀓𑁄 𑀘 𑀢𑀢𑁆𑀣 𑀏𑀯𑀁 𑀕𑀸𑀭𑀬𑁆𑀳𑁄. 𑀬𑁄 𑀔𑁄, 𑀘𑀼𑀦𑁆𑀤, 𑀏𑀯𑀭𑀽𑀧𑀁 𑀲𑀸𑀯𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀏𑀢𑀸𑀬𑀲𑁆𑀫𑀸 𑀢𑀣𑀸 𑀧𑀝𑀺𑀧𑀚𑁆𑀚𑀢𑀼 𑀬𑀣𑀸 𑀢𑁂 𑀲𑀢𑁆𑀣𑀸𑀭𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄’𑀢𑀺. 𑀬𑁄 𑀘 𑀲𑀫𑀸𑀤𑀧𑁂𑀢𑀺, 𑀬𑀜𑁆𑀘 𑀲𑀫𑀸𑀤𑀧𑁂𑀢𑀺, 𑀬𑁄 𑀘 𑀲𑀫𑀸𑀤𑀧𑀺𑀢𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀘𑀼𑀦𑁆𑀤, 𑀳𑁄𑀢𑀺 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀼𑀧𑁆𑀧𑀯𑁂𑀤𑀺𑀢𑁂 𑀦𑀺𑀬𑁆𑀬𑀸𑀦𑀺𑀓𑁂 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂.

𑁧𑁬𑁯. ‘‘𑀇𑀥 𑀧𑀦, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄, 𑀲𑀸𑀯𑀓𑁄 𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀲𑀫𑀸𑀤𑀸𑀬 𑀢𑀁 𑀥𑀫𑁆𑀫𑀁 𑀯𑀢𑁆𑀢𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀢𑀲𑁆𑀲 𑀢𑁂, 𑀆𑀯𑀼𑀲𑁄, 𑀮𑀸𑀪𑀸, 𑀢𑀲𑁆𑀲 𑀢𑁂 𑀲𑀼𑀮𑀤𑁆𑀥𑀁, 𑀲𑀢𑁆𑀣𑀸 𑀘 𑀢𑁂 [𑀲𑀢𑁆𑀣𑀸 𑀘 𑀢𑁂 𑀅𑀭𑀳𑀁 (𑀲𑁆𑀬𑀸.)] 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀢𑁆𑀯𑀜𑁆𑀘 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀲𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀲𑀫𑀸𑀤𑀸𑀬 𑀢𑀁 𑀥𑀫𑁆𑀫𑀁 𑀯𑀢𑁆𑀢𑀲𑀻’𑀢𑀺. 𑀇𑀢𑀺 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸𑀧𑀺 𑀢𑀢𑁆𑀣 𑀧𑀸𑀲𑀁𑀲𑁄, 𑀥𑀫𑁆𑀫𑁄𑀧𑀺 𑀢𑀢𑁆𑀣 𑀧𑀸𑀲𑀁𑀲𑁄, 𑀲𑀸𑀯𑀓𑁄𑀧𑀺 𑀢𑀢𑁆𑀣 𑀏𑀯𑀁 𑀧𑀸𑀲𑀁𑀲𑁄. 𑀬𑁄 𑀔𑁄, 𑀘𑀼𑀦𑁆𑀤, 𑀏𑀯𑀭𑀽𑀧𑀁 𑀲𑀸𑀯𑀓𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀤𑁆𑀥𑀸𑀬𑀲𑁆𑀫𑀸 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀜𑀸𑀬𑀫𑀸𑀭𑀸𑀥𑁂𑀲𑁆𑀲𑀢𑀻’𑀢𑀺. 𑀬𑁄 𑀘 𑀧𑀲𑀁𑀲𑀢𑀺, 𑀬𑀜𑁆𑀘 𑀧𑀲𑀁𑀲𑀢𑀺, 𑀬𑁄 𑀘 𑀧𑀲𑀁𑀲𑀺𑀢𑁄 [𑀧𑀲𑀢𑁆𑀣𑁄 (𑀲𑁆𑀬𑀸.)] 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀯𑀻𑀭𑀺𑀬𑀁 𑀆𑀭𑀪𑀢𑀺. 𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀘𑀼𑀦𑁆𑀤, 𑀳𑁄𑀢𑀺 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀼𑀧𑁆𑀧𑀯𑁂𑀤𑀺𑀢𑁂 𑀦𑀺𑀬𑁆𑀬𑀸𑀦𑀺𑀓𑁂 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁂.

𑀲𑀸𑀯𑀓𑀸𑀦𑀼𑀢𑀧𑁆𑀧𑀲𑀢𑁆𑀣𑀼

𑁧𑁭𑁦. ‘‘𑀇𑀥 𑀧𑀦, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀮𑁄𑀓𑁂 𑀉𑀤𑀧𑀸𑀤𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄, 𑀅𑀯𑀺𑀜𑁆𑀜𑀸𑀧𑀺𑀢𑀢𑁆𑀣𑀸 𑀘𑀲𑁆𑀲 𑀳𑁄𑀦𑁆𑀢𑀺 𑀲𑀸𑀯𑀓𑀸 𑀲𑀤𑁆𑀥𑀫𑁆𑀫𑁂, 𑀦 𑀘 𑀢𑁂𑀲𑀁 𑀓𑁂𑀯𑀮𑀁 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀯𑀺𑀓𑀢𑀁 𑀳𑁄𑀢𑀺 𑀉𑀢𑁆𑀢𑀸𑀦𑀻𑀓𑀢𑀁 𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑀓𑀢𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀅𑀣 𑀦𑁂𑀲𑀁 𑀲𑀢𑁆𑀣𑀼𑀦𑁄 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺. 𑀏𑀯𑀭𑀽𑀧𑁄 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀓𑀸𑀮𑀗𑁆𑀓𑀢𑁄 𑀅𑀦𑀼𑀢𑀧𑁆𑀧𑁄 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀢𑁆𑀣𑀸 𑀘 𑀦𑁄 𑀮𑁄𑀓𑁂 𑀉𑀤𑀧𑀸𑀤𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄, 𑀅𑀯𑀺𑀜𑁆𑀜𑀸𑀧𑀺𑀢𑀢𑁆𑀣𑀸 𑀘𑀫𑁆𑀳 𑀲𑀤𑁆𑀥𑀫𑁆𑀫𑁂, 𑀦 𑀘 𑀦𑁄 𑀓𑁂𑀯𑀮𑀁 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀯𑀺𑀓𑀢𑀁 𑀳𑁄𑀢𑀺 𑀉𑀢𑁆𑀢𑀸𑀦𑀻𑀓𑀢𑀁 𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑀓𑀢𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀅𑀣 𑀦𑁄 𑀲𑀢𑁆𑀣𑀼𑀦𑁄 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀻𑀢𑀺. 𑀏𑀯𑀭𑀽𑀧𑁄 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀓𑀸𑀮𑀗𑁆𑀓𑀢𑁄 𑀅𑀦𑀼𑀢𑀧𑁆𑀧𑁄 𑀳𑁄𑀢𑀺.

𑀲𑀸𑀯𑀓𑀸𑀦𑀦𑀼𑀢𑀧𑁆𑀧𑀲𑀢𑁆𑀣𑀼

𑁧𑁭𑁧. ‘‘𑀇𑀥 𑀧𑀦, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀮𑁄𑀓𑁂 𑀉𑀤𑀧𑀸𑀤𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀯𑀺𑀜𑁆𑀜𑀸𑀧𑀺𑀢𑀢𑁆𑀣𑀸 𑀘𑀲𑁆𑀲 𑀳𑁄𑀦𑁆𑀢𑀺 𑀲𑀸𑀯𑀓𑀸 𑀲𑀤𑁆𑀥𑀫𑁆𑀫𑁂, 𑀓𑁂𑀯𑀮𑀜𑁆𑀘 𑀢𑁂𑀲𑀁 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀯𑀺𑀓𑀢𑀁 𑀳𑁄𑀢𑀺 𑀉𑀢𑁆𑀢𑀸𑀦𑀻𑀓𑀢𑀁 𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑀓𑀢𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀅𑀣 𑀦𑁂𑀲𑀁 𑀲𑀢𑁆𑀣𑀼𑀦𑁄 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺. 𑀏𑀯𑀭𑀽𑀧𑁄 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀓𑀸𑀮𑀗𑁆𑀓𑀢𑁄 𑀅𑀦𑀦𑀼𑀢𑀧𑁆𑀧𑁄 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀢𑁆𑀣𑀸 𑀘 𑀦𑁄 𑀮𑁄𑀓𑁂 𑀉𑀤𑀧𑀸𑀤𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀯𑀺𑀜𑁆𑀜𑀸𑀧𑀺𑀢𑀢𑁆𑀣𑀸 𑀘𑀫𑁆𑀳 𑀲𑀤𑁆𑀥𑀫𑁆𑀫𑁂, 𑀓𑁂𑀯𑀮𑀜𑁆𑀘 𑀦𑁄 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀯𑀺𑀓𑀢𑀁 𑀳𑁄𑀢𑀺 𑀉𑀢𑁆𑀢𑀸𑀦𑀻𑀓𑀢𑀁 𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑀓𑀢𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀅𑀣 𑀦𑁄 𑀲𑀢𑁆𑀣𑀼𑀦𑁄 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀻𑀢𑀺. 𑀏𑀯𑀭𑀽𑀧𑁄 𑀔𑁄, 𑀘𑀼𑀦𑁆𑀤, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀓𑀸𑀮𑀗𑁆𑀓𑀢𑁄 𑀅𑀦𑀦𑀼𑀢𑀧𑁆𑀧𑁄 𑀳𑁄𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀅𑀧𑀭𑀺𑀧𑀽𑀭𑀸𑀤𑀺𑀓𑀣𑀸

𑁧𑁭𑁨. ‘‘𑀏𑀢𑁂𑀳𑀺 𑀘𑁂𑀧𑀺, 𑀘𑀼𑀦𑁆𑀤, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀳𑁄𑀢𑀺, 𑀦𑁄 𑀘 𑀔𑁄 𑀲𑀢𑁆𑀣𑀸 𑀳𑁄𑀢𑀺 𑀣𑁂𑀭𑁄 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀏𑀯𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀧𑀭𑀺𑀧𑀽𑀭𑀁 𑀳𑁄𑀢𑀺 𑀢𑁂𑀦𑀗𑁆𑀕𑁂𑀦.

‘‘𑀬𑀢𑁄 𑀘 𑀔𑁄, 𑀘𑀼𑀦𑁆𑀤, 𑀏𑀢𑁂𑀳𑀺 𑀘𑁂𑀯 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀳𑁄𑀢𑀺, 𑀲𑀢𑁆𑀣𑀸 𑀘 𑀳𑁄𑀢𑀺 𑀣𑁂𑀭𑁄 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀏𑀯𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀭𑀺𑀧𑀽𑀭𑀁 𑀳𑁄𑀢𑀺 𑀢𑁂𑀦𑀗𑁆𑀕𑁂𑀦.

𑁧𑁭𑁩. ‘‘𑀏𑀢𑁂𑀳𑀺 𑀘𑁂𑀧𑀺, 𑀘𑀼𑀦𑁆𑀤, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀳𑁄𑀢𑀺, 𑀲𑀢𑁆𑀣𑀸 𑀘 𑀳𑁄𑀢𑀺 𑀣𑁂𑀭𑁄 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀦𑁄 𑀘 𑀔𑁆𑀯𑀲𑁆𑀲 𑀣𑁂𑀭𑀸 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀧𑀢𑁆𑀢𑀬𑁄𑀕𑀓𑁆𑀔𑁂𑀫𑀸. 𑀅𑀮𑀁 𑀲𑀫𑀓𑁆𑀔𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑁆𑀲, 𑀅𑀮𑀁 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀳𑀺 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀏𑀯𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀧𑀭𑀺𑀧𑀽𑀭𑀁 𑀳𑁄𑀢𑀺 𑀢𑁂𑀦𑀗𑁆𑀕𑁂𑀦.

‘‘𑀬𑀢𑁄 𑀘 𑀔𑁄, 𑀘𑀼𑀦𑁆𑀤, 𑀏𑀢𑁂𑀳𑀺 𑀘𑁂𑀯 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀳𑁄𑀢𑀺, 𑀲𑀢𑁆𑀣𑀸 𑀘 𑀳𑁄𑀢𑀺 𑀣𑁂𑀭𑁄 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀣𑁂𑀭𑀸 𑀘𑀲𑁆𑀲 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀧𑀢𑁆𑀢𑀬𑁄𑀕𑀓𑁆𑀔𑁂𑀫𑀸. 𑀅𑀮𑀁 𑀲𑀫𑀓𑁆𑀔𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑁆𑀲, 𑀅𑀮𑀁 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀳𑀺 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀏𑀯𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀭𑀺𑀧𑀽𑀭𑀁 𑀳𑁄𑀢𑀺 𑀢𑁂𑀦𑀗𑁆𑀕𑁂𑀦.

𑁧𑁭𑁪. ‘‘𑀏𑀢𑁂𑀳𑀺 𑀘𑁂𑀧𑀺, 𑀘𑀼𑀦𑁆𑀤, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀳𑁄𑀢𑀺, 𑀲𑀢𑁆𑀣𑀸 𑀘 𑀳𑁄𑀢𑀺 𑀣𑁂𑀭𑁄 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀣𑁂𑀭𑀸 𑀘𑀲𑁆𑀲 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀧𑀢𑁆𑀢𑀬𑁄𑀕𑀓𑁆𑀔𑁂𑀫𑀸. 𑀅𑀮𑀁 𑀲𑀫𑀓𑁆𑀔𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑁆𑀲, 𑀅𑀮𑀁 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀳𑀺 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀦𑁄 𑀘 𑀔𑁆𑀯𑀲𑁆𑀲 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺…𑀧𑁂… 𑀫𑀚𑁆𑀛𑀺𑀫𑀸 𑀘𑀲𑁆𑀲 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁆𑀯𑀲𑁆𑀲 𑀦𑀯𑀸 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺…𑀧𑁂… 𑀦𑀯𑀸 𑀘𑀲𑁆𑀲 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁆𑀯𑀲𑁆𑀲 𑀣𑁂𑀭𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺…𑀧𑁂… 𑀣𑁂𑀭𑀸 𑀘𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁆𑀯𑀲𑁆𑀲 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺…𑀧𑁂… 𑀫𑀚𑁆𑀛𑀺𑀫𑀸 𑀘𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁆𑀯𑀲𑁆𑀲 𑀦𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺…𑀧𑁂… 𑀦𑀯𑀸 𑀘𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺, 𑀦𑁄 𑀘 𑀔𑁆𑀯𑀲𑁆𑀲 𑀉𑀧𑀸𑀲𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄…𑀧𑁂… 𑀉𑀧𑀸𑀲𑀓𑀸 𑀘𑀲𑁆𑀲 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄, 𑀦𑁄 𑀘 𑀔𑁆𑀯𑀲𑁆𑀲 𑀉𑀧𑀸𑀲𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑁄…𑀧𑁂… 𑀉𑀧𑀸𑀲𑀓𑀸 𑀘𑀲𑁆𑀲 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑁄, 𑀦𑁄 𑀘 𑀔𑁆𑀯𑀲𑁆𑀲 𑀉𑀧𑀸𑀲𑀺𑀓𑀸 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀺𑀬𑁄…𑀧𑁂… 𑀉𑀧𑀸𑀲𑀺𑀓𑀸 𑀘𑀲𑁆𑀲 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀺𑀬𑁄, 𑀦𑁄 𑀘 𑀔𑁆𑀯𑀲𑁆𑀲 𑀉𑀧𑀸𑀲𑀺𑀓𑀸 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑀺𑀬𑁄…𑀧𑁂… 𑀉𑀧𑀸𑀲𑀺𑀓𑀸 𑀘𑀲𑁆𑀲 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑀺𑀬𑁄, 𑀦𑁄 𑀘 𑀔𑁆𑀯𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀳𑁄𑀢𑀺 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘𑀲𑁆𑀲 𑀳𑁄𑀢𑀺 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁, 𑀦𑁄 𑀘 𑀔𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁. 𑀏𑀯𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀧𑀭𑀺𑀧𑀽𑀭𑀁 𑀳𑁄𑀢𑀺 𑀢𑁂𑀦𑀗𑁆𑀕𑁂𑀦.

‘‘𑀬𑀢𑁄 𑀘 𑀔𑁄, 𑀘𑀼𑀦𑁆𑀤, 𑀏𑀢𑁂𑀳𑀺 𑀘𑁂𑀯 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀳𑁄𑀢𑀺, 𑀲𑀢𑁆𑀣𑀸 𑀘 𑀳𑁄𑀢𑀺 𑀣𑁂𑀭𑁄 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀣𑁂𑀭𑀸 𑀘𑀲𑁆𑀲 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀧𑀢𑁆𑀢𑀬𑁄𑀕𑀓𑁆𑀔𑁂𑀫𑀸. 𑀅𑀮𑀁 𑀲𑀫𑀓𑁆𑀔𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑁆𑀲, 𑀅𑀮𑀁 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀳𑀺 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀫𑀚𑁆𑀛𑀺𑀫𑀸 𑀘𑀲𑁆𑀲 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺…𑀧𑁂… 𑀦𑀯𑀸 𑀘𑀲𑁆𑀲 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺…𑀧𑁂… 𑀣𑁂𑀭𑀸 𑀘𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺…𑀧𑁂… 𑀫𑀚𑁆𑀛𑀺𑀫𑀸 𑀘𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺…𑀧𑁂… 𑀦𑀯𑀸 𑀘𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺…𑀧𑁂… 𑀉𑀧𑀸𑀲𑀓𑀸 𑀘𑀲𑁆𑀲 𑀲𑀸𑀯𑀓𑀸 𑀳𑁄𑀦𑁆𑀢𑀺…𑀧𑁂… 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄. 𑀉𑀧𑀸𑀲𑀓𑀸 𑀘𑀲𑁆𑀲 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑁄…𑀧𑁂… 𑀉𑀧𑀸𑀲𑀺𑀓𑀸 𑀘𑀲𑁆𑀲 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀺𑀬𑁄…𑀧𑁂… 𑀉𑀧𑀸𑀲𑀺𑀓𑀸 𑀘𑀲𑁆𑀲 𑀲𑀸𑀯𑀺𑀓𑀸 𑀳𑁄𑀦𑁆𑀢𑀺 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑀺𑀬𑁄…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘𑀲𑁆𑀲 𑀳𑁄𑀢𑀺 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁, 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑀜𑁆𑀘 𑀬𑀲𑀕𑁆𑀕𑀧𑁆𑀧𑀢𑁆𑀢𑀜𑁆𑀘. 𑀏𑀯𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀭𑀺𑀧𑀽𑀭𑀁 𑀳𑁄𑀢𑀺 𑀢𑁂𑀦𑀗𑁆𑀕𑁂𑀦.

𑁧𑁭𑁫. ‘‘𑀅𑀳𑀁 𑀔𑁄 𑀧𑀦, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀼𑀧𑁆𑀧𑀯𑁂𑀤𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑁄. 𑀯𑀺𑀜𑁆𑀜𑀸𑀧𑀺𑀢𑀢𑁆𑀣𑀸 𑀘 𑀫𑁂 𑀲𑀸𑀯𑀓𑀸 𑀲𑀤𑁆𑀥𑀫𑁆𑀫𑁂, 𑀓𑁂𑀯𑀮𑀜𑁆𑀘 𑀢𑁂𑀲𑀁 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀯𑀺𑀓𑀢𑀁 𑀉𑀢𑁆𑀢𑀸𑀦𑀻𑀓𑀢𑀁 𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑀓𑀢𑀁 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀅𑀳𑀁 𑀔𑁄 𑀧𑀦, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀢𑁆𑀣𑀸 𑀣𑁂𑀭𑁄 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄.

‘‘𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀣𑁂𑀭𑀸 𑀪𑀺𑀓𑁆𑀔𑀽 𑀲𑀸𑀯𑀓𑀸 𑀳𑁄𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀧𑀢𑁆𑀢𑀬𑁄𑀕𑀓𑁆𑀔𑁂𑀫𑀸. 𑀅𑀮𑀁 𑀲𑀫𑀓𑁆𑀔𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑁆𑀲, 𑀅𑀮𑀁 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀳𑀺 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀽 𑀲𑀸𑀯𑀓𑀸…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀦𑀯𑀸 𑀪𑀺𑀓𑁆𑀔𑀽 𑀲𑀸𑀯𑀓𑀸…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀣𑁂𑀭𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀦𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀺𑀓𑀸…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀉𑀧𑀸𑀲𑀓𑀸 𑀲𑀸𑀯𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀉𑀧𑀸𑀲𑀓𑀸 𑀲𑀸𑀯𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑁄…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀉𑀧𑀸𑀲𑀺𑀓𑀸 𑀲𑀸𑀯𑀺𑀓𑀸 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀺𑀬𑁄…𑀧𑁂… 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀉𑀧𑀸𑀲𑀺𑀓𑀸 𑀲𑀸𑀯𑀺𑀓𑀸 𑀕𑀺𑀳𑀺𑀦𑀺𑀬𑁄 𑀑𑀤𑀸𑀢𑀯𑀲𑀦𑀸 𑀓𑀸𑀫𑀪𑁄𑀕𑀺𑀦𑀺𑀬𑁄…𑀧𑁂… 𑀏𑀢𑀭𑀳𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁.

𑁧𑁭𑁬. ‘‘𑀬𑀸𑀯𑀢𑀸 𑀔𑁄, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀢𑁆𑀣𑀸𑀭𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑀸, 𑀦𑀸𑀳𑀁, 𑀘𑀼𑀦𑁆𑀤, 𑀅𑀜𑁆𑀜𑀁 𑀏𑀓𑀲𑀢𑁆𑀣𑀸𑀭𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁 𑀬𑀣𑀭𑀺𑀯𑀸𑀳𑀁. 𑀬𑀸𑀯𑀢𑀸 𑀔𑁄 𑀧𑀦, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀗𑁆𑀖𑁄 𑀯𑀸 𑀕𑀡𑁄 𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄; 𑀦𑀸𑀳𑀁, 𑀘𑀼𑀦𑁆𑀤, 𑀅𑀜𑁆𑀜𑀁 𑀏𑀓𑀁 𑀲𑀁𑀖𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁 𑀬𑀣𑀭𑀺𑀯𑀸𑀬𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀬𑀁 𑀔𑁄 𑀢𑀁, 𑀘𑀼𑀦𑁆𑀤, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀅𑀦𑀽𑀦𑀫𑀦𑀥𑀺𑀓𑀁 𑀲𑁆𑀯𑀸𑀓𑁆𑀔𑀸𑀢𑀁 𑀓𑁂𑀯𑀮𑀁 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺. 𑀇𑀤𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁…𑀧𑁂… 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺.

‘‘𑀉𑀤𑀓𑁄 [𑀉𑀤𑁆𑀤𑀓𑁄 (𑀲𑀻. 𑀲𑁆𑀬𑀸. 𑀧𑀻.)] 𑀲𑀼𑀤𑀁, 𑀘𑀼𑀦𑁆𑀤, 𑀭𑀸𑀫𑀧𑀼𑀢𑁆𑀢𑁄 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻’𑀢𑀺. 𑀓𑀺𑀜𑁆𑀘 𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻𑀢𑀺? 𑀔𑀼𑀭𑀲𑁆𑀲 𑀲𑀸𑀥𑀼𑀦𑀺𑀲𑀺𑀢𑀲𑁆𑀲 𑀢𑀮𑀫𑀲𑁆𑀲 𑀧𑀲𑁆𑀲𑀢𑀺, 𑀥𑀸𑀭𑀜𑁆𑀘 𑀔𑁆𑀯𑀲𑁆𑀲 𑀦 𑀧𑀲𑁆𑀲𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑁋 ‘𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻’𑀢𑀺. 𑀬𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀉𑀤𑀓𑁂𑀦 𑀭𑀸𑀫𑀧𑀼𑀢𑁆𑀢𑁂𑀦 𑀪𑀸𑀲𑀺𑀢𑀁 𑀳𑀻𑀦𑀁 𑀕𑀫𑁆𑀫𑀁 𑀧𑁄𑀣𑀼𑀚𑁆𑀚𑀦𑀺𑀓𑀁 𑀅𑀦𑀭𑀺𑀬𑀁 𑀅𑀦𑀢𑁆𑀣𑀲𑀁𑀳𑀺𑀢𑀁 𑀔𑀼𑀭𑀫𑁂𑀯 𑀲𑀦𑁆𑀥𑀸𑀬. 𑀬𑀜𑁆𑀘 𑀢𑀁 [𑀬𑀜𑁆𑀘𑁂𑀢𑀁 (𑀲𑁆𑀬𑀸. 𑀓.)], 𑀘𑀼𑀦𑁆𑀤, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻’𑀢𑀺, 𑀇𑀤𑀫𑁂𑀯 𑀢𑀁 [𑀇𑀤𑀫𑁂𑀯𑁂𑀢𑀁 (𑀓.)] 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻’𑀢𑀺. 𑀓𑀺𑀜𑁆𑀘 𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻𑀢𑀺? 𑀏𑀯𑀁 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀅𑀦𑀽𑀦𑀫𑀦𑀥𑀺𑀓𑀁 𑀲𑁆𑀯𑀸𑀓𑁆𑀔𑀸𑀢𑀁 𑀓𑁂𑀯𑀮𑀁 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺, 𑀇𑀢𑀺 𑀳𑁂𑀢𑀁 𑀧𑀲𑁆𑀲𑀢𑀺 [𑀲𑀼𑀧𑁆𑀧𑀓𑀸𑀲𑀺𑀢𑀁, 𑀇𑀢𑀺 𑀳𑁂𑀢𑀁 𑀦 𑀧𑀲𑁆𑀲𑀢𑀻𑀢𑀺 (𑀲𑁆𑀬𑀸. 𑀓.)]. 𑀇𑀤𑀫𑁂𑀢𑁆𑀣 𑀅𑀧𑀓𑀟𑁆𑀠𑁂𑀬𑁆𑀬, 𑀏𑀯𑀁 𑀢𑀁 𑀧𑀭𑀺𑀲𑀼𑀤𑁆𑀥𑀢𑀭𑀁 𑀅𑀲𑁆𑀲𑀸𑀢𑀺, 𑀇𑀢𑀺 𑀳𑁂𑀢𑀁 𑀦 𑀧𑀲𑁆𑀲𑀢𑀺 [𑀦 𑀧𑀲𑁆𑀲𑀢𑀻𑀢𑀺 (𑀲𑁆𑀬𑀸. 𑀓.)]. 𑀇𑀤𑀫𑁂𑀢𑁆𑀣 𑀉𑀧𑀓𑀟𑁆𑀠𑁂𑀬𑁆𑀬, 𑀏𑀯𑀁 𑀢𑀁 𑀧𑀭𑀺𑀧𑀽𑀭𑀁 [𑀧𑀭𑀺𑀲𑀼𑀤𑁆𑀥𑀢𑀭𑀁 (𑀲𑁆𑀬𑀸. 𑀓.), 𑀧𑀭𑀺𑀧𑀽𑀭𑀢𑀭𑀁 (?)] 𑀅𑀲𑁆𑀲𑀸𑀢𑀺, 𑀇𑀢𑀺 𑀳𑁂𑀢𑀁 𑀦 𑀧𑀲𑁆𑀲𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺 𑀘𑀼𑀦𑁆𑀤 𑁋 ‘𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻’𑀢𑀺. 𑀬𑀁 𑀔𑁄 𑀢𑀁, 𑀘𑀼𑀦𑁆𑀤, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺. 𑀇𑀤𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀅𑀦𑀽𑀦𑀫𑀦𑀥𑀺𑀓𑀁 𑀲𑁆𑀯𑀸𑀓𑁆𑀔𑀸𑀢𑀁 𑀓𑁂𑀯𑀮𑀁 𑀧𑀭𑀺𑀧𑀽𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺.

𑀲𑀗𑁆𑀕𑀸𑀬𑀺𑀢𑀩𑁆𑀩𑀥𑀫𑁆𑀫𑁄

𑁧𑁭𑁭. 𑀢𑀲𑁆𑀫𑀸𑀢𑀺𑀳, 𑀘𑀼𑀦𑁆𑀤, 𑀬𑁂 𑀯𑁄 𑀫𑀬𑀸 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸, 𑀢𑀢𑁆𑀣 𑀲𑀩𑁆𑀩𑁂𑀳𑁂𑀯 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀅𑀢𑁆𑀣𑁂𑀦 𑀅𑀢𑁆𑀣𑀁 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀗𑁆𑀕𑀸𑀬𑀺𑀢𑀩𑁆𑀩𑀁 𑀦 𑀯𑀺𑀯𑀤𑀺𑀢𑀩𑁆𑀩𑀁, 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁂 𑀘 𑀢𑁂, 𑀘𑀼𑀦𑁆𑀤, 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸, 𑀬𑀢𑁆𑀣 𑀲𑀩𑁆𑀩𑁂𑀳𑁂𑀯 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀅𑀢𑁆𑀣𑁂𑀦 𑀅𑀢𑁆𑀣𑀁 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀗𑁆𑀕𑀸𑀬𑀺𑀢𑀩𑁆𑀩𑀁 𑀦 𑀯𑀺𑀯𑀤𑀺𑀢𑀩𑁆𑀩𑀁, 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁? 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀇𑀫𑁂 𑀔𑁄 𑀢𑁂, 𑀘𑀼𑀦𑁆𑀤, 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸. 𑀬𑀢𑁆𑀣 𑀲𑀩𑁆𑀩𑁂𑀳𑁂𑀯 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀅𑀢𑁆𑀣𑁂𑀦 𑀅𑀢𑁆𑀣𑀁 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀁 𑀲𑀗𑁆𑀕𑀸𑀬𑀺𑀢𑀩𑁆𑀩𑀁 𑀦 𑀯𑀺𑀯𑀤𑀺𑀢𑀩𑁆𑀩𑀁, 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁.

𑀲𑀜𑁆𑀜𑀸𑀧𑁂𑀢𑀩𑁆𑀩𑀯𑀺𑀥𑀺

𑁧𑁭𑁮. ‘‘𑀢𑁂𑀲𑀜𑁆𑀘 𑀯𑁄, 𑀘𑀼𑀦𑁆𑀤, 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀲𑀺𑀓𑁆𑀔𑀢𑀁 [𑀲𑀺𑀓𑁆𑀔𑀺𑀢𑀩𑁆𑀩𑀁 (𑀩𑀳𑀽𑀲𑀼)] 𑀅𑀜𑁆𑀜𑀢𑀭𑁄 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀗𑁆𑀖𑁂 𑀥𑀫𑁆𑀫𑀁 𑀪𑀸𑀲𑁂𑀬𑁆𑀬. 𑀢𑀢𑁆𑀭 𑀘𑁂 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀅𑀢𑁆𑀣𑀜𑁆𑀘𑁂𑀯 𑀫𑀺𑀘𑁆𑀙𑀸 𑀕𑀡𑁆𑀳𑀸𑀢𑀺, 𑀩𑁆𑀬𑀜𑁆𑀚𑀦𑀸𑀦𑀺 𑀘 𑀫𑀺𑀘𑁆𑀙𑀸 𑀭𑁄𑀧𑁂𑀢𑀻’𑀢𑀺. 𑀢𑀲𑁆𑀲 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁, 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀇𑀫𑀲𑁆𑀲 𑀦𑀼 𑀔𑁄, 𑀆𑀯𑀼𑀲𑁄, 𑀅𑀢𑁆𑀣𑀲𑁆𑀲 𑀇𑀫𑀸𑀦𑀺 𑀯𑀸 𑀩𑁆𑀬𑀜𑁆𑀚𑀦𑀸𑀦𑀺 𑀏𑀢𑀸𑀦𑀺 𑀯𑀸 𑀩𑁆𑀬𑀜𑁆𑀚𑀦𑀸𑀦𑀺 𑀓𑀢𑀫𑀸𑀦𑀺 𑀑𑀧𑀸𑀬𑀺𑀓𑀢𑀭𑀸𑀦𑀺, 𑀇𑀫𑁂𑀲𑀜𑁆𑀘 [𑀇𑀫𑁂𑀲𑀁 𑀯𑀸 (𑀲𑁆𑀬𑀸. 𑀧𑀻. 𑀓.), 𑀇𑀫𑁂𑀲𑀁 (𑀲𑀻.)] 𑀩𑁆𑀬𑀜𑁆𑀚𑀦𑀸𑀦𑀁 𑀅𑀬𑀁 𑀯𑀸 𑀅𑀢𑁆𑀣𑁄 𑀏𑀲𑁄 𑀯𑀸 𑀅𑀢𑁆𑀣𑁄 𑀓𑀢𑀫𑁄 𑀑𑀧𑀸𑀬𑀺𑀓𑀢𑀭𑁄’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀅𑀢𑁆𑀣𑀲𑁆𑀲 𑀇𑀫𑀸𑀦𑁂𑀯 𑀩𑁆𑀬𑀜𑁆𑀚𑀦𑀸𑀦𑀺 𑀑𑀧𑀸𑀬𑀺𑀓𑀢𑀭𑀸𑀦𑀺, 𑀬𑀸 𑀘𑁂𑀯 [𑀬𑀜𑁆𑀘𑁂𑀯 (𑀲𑀻. 𑀓.), 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀏𑀢𑀸𑀦𑀺; 𑀇𑀫𑁂𑀲𑀜𑁆𑀘 [𑀇𑀫𑁂𑀤𑀁 (𑀲𑀩𑁆𑀩𑀢𑁆𑀣)] 𑀩𑁆𑀬𑀜𑁆𑀚𑀦𑀸𑀦𑀁 𑀅𑀬𑀫𑁂𑀯 𑀅𑀢𑁆𑀣𑁄 𑀑𑀧𑀸𑀬𑀺𑀓𑀢𑀭𑁄, 𑀬𑀸 𑀘𑁂𑀯 [𑀬𑀜𑁆𑀘𑁂𑀯 (𑀲𑀻. 𑀓.), 𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀏𑀲𑁄’𑀢𑀺. 𑀲𑁄 𑀦𑁂𑀯 𑀉𑀲𑁆𑀲𑀸𑀤𑁂𑀢𑀩𑁆𑀩𑁄 𑀦 𑀅𑀧𑀲𑀸𑀤𑁂𑀢𑀩𑁆𑀩𑁄, 𑀅𑀦𑀼𑀲𑁆𑀲𑀸𑀤𑁂𑀢𑁆𑀯𑀸 𑀅𑀦𑀧𑀲𑀸𑀤𑁂𑀢𑁆𑀯𑀸 𑀲𑁆𑀯𑁂𑀯 𑀲𑀸𑀥𑀼𑀓𑀁 𑀲𑀜𑁆𑀜𑀸𑀧𑁂𑀢𑀩𑁆𑀩𑁄 𑀢𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀢𑁂𑀲𑀜𑁆𑀘 𑀩𑁆𑀬𑀜𑁆𑀚𑀦𑀸𑀦𑀁 𑀦𑀺𑀲𑀦𑁆𑀢𑀺𑀬𑀸.

𑁧𑁭𑁯. ‘‘𑀅𑀧𑀭𑁄𑀧𑀺 𑀘𑁂, 𑀘𑀼𑀦𑁆𑀤, 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀗𑁆𑀖𑁂 𑀥𑀫𑁆𑀫𑀁 𑀪𑀸𑀲𑁂𑀬𑁆𑀬. 𑀢𑀢𑁆𑀭 𑀘𑁂 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀅𑀢𑁆𑀣𑀜𑁆𑀳𑀺 𑀔𑁄 𑀫𑀺𑀘𑁆𑀙𑀸 𑀕𑀡𑁆𑀳𑀸𑀢𑀺 𑀩𑁆𑀬𑀜𑁆𑀚𑀦𑀸𑀦𑀺 𑀲𑀫𑁆𑀫𑀸 𑀭𑁄𑀧𑁂𑀢𑀻’𑀢𑀺. 𑀢𑀲𑁆𑀲 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁, 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀇𑀫𑁂𑀲𑀁 𑀦𑀼 𑀔𑁄, 𑀆𑀯𑀼𑀲𑁄, 𑀩𑁆𑀬𑀜𑁆𑀚𑀦𑀸𑀦𑀁 𑀅𑀬𑀁 𑀯𑀸 𑀅𑀢𑁆𑀣𑁄 𑀏𑀲𑁄 𑀯𑀸 𑀅𑀢𑁆𑀣𑁄 𑀓𑀢𑀫𑁄 𑀑𑀧𑀸𑀬𑀺𑀓𑀢𑀭𑁄’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀫𑁂𑀲𑀁 𑀔𑁄, 𑀆𑀯𑀼𑀲𑁄, 𑀩𑁆𑀬𑀜𑁆𑀚𑀦𑀸𑀦𑀁 𑀅𑀬𑀫𑁂𑀯 𑀅𑀢𑁆𑀣𑁄 𑀑𑀧𑀸𑀬𑀺𑀓𑀢𑀭𑁄, 𑀬𑀸 𑀘𑁂𑀯 𑀏𑀲𑁄’𑀢𑀺. 𑀲𑁄 𑀦𑁂𑀯 𑀉𑀲𑁆𑀲𑀸𑀤𑁂𑀢𑀩𑁆𑀩𑁄 𑀦 𑀅𑀧𑀲𑀸𑀤𑁂𑀢𑀩𑁆𑀩𑁄, 𑀅𑀦𑀼𑀲𑁆𑀲𑀸𑀤𑁂𑀢𑁆𑀯𑀸 𑀅𑀦𑀧𑀲𑀸𑀤𑁂𑀢𑁆𑀯𑀸 𑀲𑁆𑀯𑁂𑀯 𑀲𑀸𑀥𑀼𑀓𑀁 𑀲𑀜𑁆𑀜𑀸𑀧𑁂𑀢𑀩𑁆𑀩𑁄 𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀦𑀺𑀲𑀦𑁆𑀢𑀺𑀬𑀸.

𑁧𑁮𑁦. ‘‘𑀅𑀧𑀭𑁄𑀧𑀺 𑀘𑁂, 𑀘𑀼𑀦𑁆𑀤, 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀗𑁆𑀖𑁂 𑀥𑀫𑁆𑀫𑀁 𑀪𑀸𑀲𑁂𑀬𑁆𑀬. 𑀢𑀢𑁆𑀭 𑀘𑁂 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀅𑀢𑁆𑀣𑀜𑁆𑀳𑀺 𑀔𑁄 𑀲𑀫𑁆𑀫𑀸 𑀕𑀡𑁆𑀳𑀸𑀢𑀺 𑀩𑁆𑀬𑀜𑁆𑀚𑀦𑀸𑀦𑀺 𑀫𑀺𑀘𑁆𑀙𑀸 𑀭𑁄𑀧𑁂𑀢𑀻’𑀢𑀺. 𑀢𑀲𑁆𑀲 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁; 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀇𑀫𑀲𑁆𑀲 𑀦𑀼 𑀔𑁄, 𑀆𑀯𑀼𑀲𑁄, 𑀅𑀢𑁆𑀣𑀲𑁆𑀲 𑀇𑀫𑀸𑀦𑀺 𑀯𑀸 𑀩𑁆𑀬𑀜𑁆𑀚𑀦𑀸𑀦𑀺 𑀏𑀢𑀸𑀦𑀺 𑀯𑀸 𑀩𑁆𑀬𑀜𑁆𑀚𑀦𑀸𑀦𑀺 𑀓𑀢𑀫𑀸𑀦𑀺 𑀑𑀧𑀸𑀬𑀺𑀓𑀢𑀭𑀸𑀦𑀻’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀅𑀢𑁆𑀣𑀲𑁆𑀲 𑀇𑀫𑀸𑀦𑁂𑀯 𑀩𑁆𑀬𑀜𑁆𑀚𑀦𑀸𑀦𑀺 𑀑𑀧𑀬𑀺𑀓𑀢𑀭𑀸𑀦𑀺, 𑀬𑀸𑀦𑀺 𑀘𑁂𑀯 𑀏𑀢𑀸𑀦𑀻’𑀢𑀺. 𑀲𑁄 𑀦𑁂𑀯 𑀉𑀲𑁆𑀲𑀸𑀤𑁂𑀢𑀩𑁆𑀩𑁄 𑀦 𑀅𑀧𑀲𑀸𑀤𑁂𑀢𑀩𑁆𑀩𑁄; 𑀅𑀦𑀼𑀲𑁆𑀲𑀸𑀤𑁂𑀢𑁆𑀯𑀸 𑀅𑀦𑀧𑀲𑀸𑀤𑁂𑀢𑁆𑀯𑀸 𑀲𑁆𑀯𑁂𑀯 𑀲𑀸𑀥𑀼𑀓𑀁 𑀲𑀜𑁆𑀜𑀸𑀧𑁂𑀢𑀩𑁆𑀩𑁄 𑀢𑁂𑀲𑀜𑁆𑀜𑁂𑀯 𑀩𑁆𑀬𑀜𑁆𑀚𑀦𑀸𑀦𑀁 𑀦𑀺𑀲𑀦𑁆𑀢𑀺𑀬𑀸.

𑁧𑁮𑁧. ‘‘𑀅𑀧𑀭𑁄𑀧𑀺 𑀘𑁂, 𑀘𑀼𑀦𑁆𑀤, 𑀲𑀩𑁆𑀭𑀳𑁆𑀫𑀘𑀸𑀭𑀻 𑀲𑀗𑁆𑀖𑁂 𑀥𑀫𑁆𑀫𑀁 𑀪𑀸𑀲𑁂𑀬𑁆𑀬. 𑀢𑀢𑁆𑀭 𑀘𑁂 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀅𑀢𑁆𑀣𑀜𑁆𑀘𑁂𑀯 𑀲𑀫𑁆𑀫𑀸 𑀕𑀡𑁆𑀳𑀸𑀢𑀺 𑀩𑁆𑀬𑀜𑁆𑀚𑀦𑀸𑀦𑀺 𑀘 𑀲𑀫𑁆𑀫𑀸 𑀭𑁄𑀧𑁂𑀢𑀻’𑀢𑀺. 𑀢𑀲𑁆𑀲 ‘𑀲𑀸𑀥𑀽’𑀢𑀺 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀅𑀦𑀼𑀫𑁄𑀤𑀺𑀢𑀩𑁆𑀩𑀁; 𑀢𑀲𑁆𑀲 ‘𑀲𑀸𑀥𑀽’𑀢𑀺 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀮𑀸𑀪𑀸 𑀦𑁄 𑀆𑀯𑀼𑀲𑁄, 𑀲𑀼𑀮𑀤𑁆𑀥𑀁 𑀦𑁄 𑀆𑀯𑀼𑀲𑁄, 𑀬𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀢𑀸𑀤𑀺𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀲𑁆𑀲𑀸𑀫 𑀏𑀯𑀁 𑀅𑀢𑁆𑀣𑀼𑀧𑁂𑀢𑀁 𑀩𑁆𑀬𑀜𑁆𑀚𑀦𑀼𑀧𑁂𑀢’𑀦𑁆𑀢𑀺.

𑀧𑀘𑁆𑀘𑀬𑀸𑀦𑀼𑀜𑁆𑀜𑀸𑀢𑀓𑀸𑀭𑀡𑀁

𑁧𑁮𑁨. ‘‘𑀦 𑀯𑁄 𑀅𑀳𑀁, 𑀘𑀼𑀦𑁆𑀤, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁𑀬𑁂𑀯 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀦 𑀧𑀦𑀸𑀳𑀁, 𑀘𑀼𑀦𑁆𑀤, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁𑀬𑁂𑀯 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀘𑁂𑀯𑀸𑀳𑀁, 𑀘𑀼𑀦𑁆𑀤, 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺; 𑀲𑀫𑁆𑀧𑀭𑀸𑀬𑀺𑀓𑀸𑀦𑀜𑁆𑀘 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀢𑀲𑁆𑀫𑀸𑀢𑀺𑀳, 𑀘𑀼𑀦𑁆𑀤, 𑀬𑀁 𑀯𑁄 𑀫𑀬𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀅𑀮𑀁 𑀯𑁄 𑀢𑀁 𑁋 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧 [𑀲𑀺𑀭𑀺𑀁𑀲𑀧 (𑀲𑁆𑀬𑀸.)] 𑀲𑀫𑁆𑀨𑀲𑁆𑀲𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀬𑁄 𑀯𑁄 𑀫𑀬𑀸 𑀧𑀺𑀡𑁆𑀟𑀧𑀸𑀢𑁄 𑀅𑀦𑀼𑀜𑁆𑀜𑀸𑀢𑁄, 𑀅𑀮𑀁 𑀯𑁄 𑀲𑁄 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘 [𑀘𑀸𑀢𑀺 (𑀩𑀳𑀽𑀲𑀼)]. 𑀬𑀁 𑀯𑁄 𑀫𑀬𑀸 𑀲𑁂𑀦𑀸𑀲𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀅𑀮𑀁 𑀯𑁄 𑀢𑀁 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀉𑀡𑁆𑀳𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀬𑀸𑀯𑀤𑁂𑀯 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁. 𑀬𑁄 𑀯𑁄 𑀫𑀬𑀸 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚 𑀧𑀭𑀺𑀓𑁆𑀔𑀸𑀭𑁄 𑀅𑀦𑀼𑀜𑁆𑀜𑀸𑀢𑁄, 𑀅𑀮𑀁 𑀯𑁄 𑀲𑁄 𑀬𑀸𑀯𑀤𑁂𑀯 𑀉𑀧𑁆𑀧𑀦𑁆𑀦𑀸𑀦𑀁 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀧𑀝𑀺𑀖𑀸𑀢𑀸𑀬 𑀅𑀩𑁆𑀬𑀸𑀧𑀚𑁆𑀚𑀧𑀭𑀫𑀢𑀸𑀬 [𑀅𑀩𑁆𑀬𑀸𑀧𑀚𑁆𑀛𑀧𑀭𑀫𑀢𑀸𑀬𑀸𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬 (?)].

𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄

𑁧𑁮𑁩. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑀺𑀳𑀭𑀦𑁆𑀢𑀻’𑀢𑀺. 𑀏𑀯𑀁𑀯𑀸𑀤𑀺𑀦𑁄 [𑀯𑀤𑀫𑀸𑀦𑀸 (𑀲𑁆𑀬𑀸.)], 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀓𑀢𑀫𑁄 𑀲𑁄, 𑀆𑀯𑀼𑀲𑁄, 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄? 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸 𑀳𑀺 𑀩𑀳𑀽 𑀅𑀦𑁂𑀓𑀯𑀺𑀳𑀺𑀢𑀸 𑀦𑀸𑀦𑀧𑁆𑀧𑀓𑀸𑀭𑀓𑀸’𑀢𑀺.

‘‘𑀘𑀢𑁆𑀢𑀸𑀭𑁄𑀫𑁂, 𑀘𑀼𑀦𑁆𑀤, 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄?

‘‘𑀇𑀥, 𑀘𑀼𑀦𑁆𑀤, 𑀏𑀓𑀘𑁆𑀘𑁄 𑀩𑀸𑀮𑁄 𑀧𑀸𑀡𑁂 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺. 𑀅𑀬𑀁 𑀧𑀞𑀫𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀧𑀼𑀦 𑀘𑀧𑀭𑀁, 𑀘𑀼𑀦𑁆𑀤, 𑀇𑀥𑁂𑀓𑀘𑁆𑀘𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀢𑁆𑀯𑀸 𑀆𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀧𑀼𑀦 𑀘𑀧𑀭𑀁, 𑀘𑀼𑀦𑁆𑀤, 𑀇𑀥𑁂𑀓𑀘𑁆𑀘𑁄 𑀫𑀼𑀲𑀸 𑀪𑀡𑀺𑀢𑁆𑀯𑀸 𑀪𑀡𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀺. 𑀅𑀬𑀁 𑀢𑀢𑀺𑀬𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀧𑀼𑀦 𑀘𑀧𑀭𑀁, 𑀘𑀼𑀦𑁆𑀤, 𑀇𑀥𑁂𑀓𑀘𑁆𑀘𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀇𑀫𑁂 𑀔𑁄, 𑀘𑀼𑀦𑁆𑀤, 𑀘𑀢𑁆𑀢𑀸𑀭𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀁𑀳𑀺𑀢𑀸 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁂 𑀅𑀦𑀼𑀬𑀼𑀢𑁆𑀢𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑀺𑀳𑀭𑀦𑁆𑀢𑀻’𑀢𑀺. 𑀢𑁂 𑀯𑁄 [𑀢𑁂 (𑀲𑀻. 𑀧𑀻.)] ‘𑀫𑀸𑀳𑁂𑀯𑀁’ 𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. 𑀦 𑀢𑁂 𑀯𑁄 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁, 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀼𑀁 𑀅𑀲𑀢𑀸 𑀅𑀪𑀽𑀢𑁂𑀦.

𑁧𑁮𑁪. ‘‘𑀘𑀢𑁆𑀢𑀸𑀭𑁄𑀫𑁂, 𑀘𑀼𑀦𑁆𑀤, 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄?

‘‘𑀇𑀥, 𑀘𑀼𑀦𑁆𑀤, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀧𑀞𑀫𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀧𑀼𑀦 𑀘𑀧𑀭𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀧𑀼𑀦 𑀘𑀧𑀭𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀢𑀢𑀺𑀬𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀧𑀼𑀦 𑀘𑀧𑀭𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄.

‘‘𑀇𑀫𑁂 𑀔𑁄, 𑀘𑀼𑀦𑁆𑀤, 𑀘𑀢𑁆𑀢𑀸𑀭𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁂 𑀅𑀦𑀼𑀬𑀼𑀢𑁆𑀢𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑀺𑀳𑀭𑀦𑁆𑀢𑀻’𑀢𑀺. 𑀢𑁂 𑀯𑁄 ‘𑀏𑀯𑀁’ 𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. 𑀲𑀫𑁆𑀫𑀸 𑀢𑁂 𑀯𑁄 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁, 𑀦 𑀢𑁂 𑀯𑁄 𑀅𑀩𑁆𑀪𑀸𑀘𑀺𑀓𑁆𑀔𑁂𑀬𑁆𑀬𑀼𑀁 𑀅𑀲𑀢𑀸 𑀅𑀪𑀽𑀢𑁂𑀦.

𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸𑀦𑀺𑀲𑀁𑀲𑁄

𑁧𑁮𑁫. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀇𑀫𑁂 𑀧𑀦𑀸𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁂 𑀅𑀦𑀼𑀬𑀼𑀢𑁆𑀢𑀸𑀦𑀁 𑀯𑀺𑀳𑀭𑀢𑀁 𑀓𑀢𑀺 𑀨𑀮𑀸𑀦𑀺 𑀓𑀢𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀇𑀫𑁂 𑀔𑁄, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁂 𑀅𑀦𑀼𑀬𑀼𑀢𑁆𑀢𑀸𑀦𑀁 𑀯𑀺𑀳𑀭𑀢𑀁 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀇𑀤𑀁 𑀧𑀞𑀫𑀁 𑀨𑀮𑀁, 𑀧𑀞𑀫𑁄 𑀆𑀦𑀺𑀲𑀁𑀲𑁄. 𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀇𑀤𑀁 𑀤𑀼𑀢𑀺𑀬𑀁 𑀨𑀮𑀁, 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄. 𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺, 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀇𑀤𑀁 𑀢𑀢𑀺𑀬𑀁 𑀨𑀮𑀁, 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄. 𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀘𑀢𑀼𑀢𑁆𑀣𑀁 𑀨𑀮𑀁 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀘𑀢𑁆𑀢𑀸𑀭𑁄 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁂 𑀅𑀦𑀼𑀬𑀼𑀢𑁆𑀢𑀸𑀦𑀁 𑀯𑀺𑀳𑀭𑀢𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺, 𑀘𑀢𑁆𑀢𑀸𑀭𑁄 𑀆𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺.

𑀔𑀻𑀡𑀸𑀲𑀯𑀅𑀪𑀩𑁆𑀩𑀞𑀸𑀦𑀁

𑁧𑁮𑁬. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀝𑁆𑀞𑀺𑀢𑀥𑀫𑁆𑀫𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀯𑀺𑀳𑀭𑀦𑁆𑀢𑀻’𑀢𑀺. 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀅𑀢𑁆𑀣𑀺 𑀔𑁄, 𑀆𑀯𑀼𑀲𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀯𑀓𑀸𑀦𑀁 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑀸. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀇𑀦𑁆𑀤𑀔𑀻𑀮𑁄 𑀯𑀸 𑀅𑀬𑁄𑀔𑀻𑀮𑁄 𑀯𑀸 𑀕𑀫𑁆𑀪𑀻𑀭𑀦𑁂𑀫𑁄 𑀲𑀼𑀦𑀺𑀔𑀸𑀢𑁄 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀯𑀓𑀸𑀦𑀁 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑀸. 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼𑀁. 𑀅𑀪𑀩𑁆𑀩𑁄, 𑀆𑀯𑀼𑀲𑁄, 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀺𑀢𑀼𑀁; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀼𑀁; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀆𑀕𑀸𑀭𑀺𑀓𑀪𑀽𑀢𑁄; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀙𑀦𑁆𑀤𑀸𑀕𑀢𑀺𑀁 𑀕𑀦𑁆𑀢𑀼𑀁; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀤𑁄𑀲𑀸𑀕𑀢𑀺𑀁 𑀕𑀦𑁆𑀢𑀼𑀁; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀫𑁄𑀳𑀸𑀕𑀢𑀺𑀁 𑀕𑀦𑁆𑀢𑀼𑀁; 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀪𑀬𑀸𑀕𑀢𑀺𑀁 𑀕𑀦𑁆𑀢𑀼𑀁. 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀇𑀫𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼’’𑀦𑁆𑀢𑀺.

𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀁

𑁧𑁮𑁭. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀢𑀻𑀢𑀁 𑀔𑁄 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀲𑀫𑀡𑁄 𑀕𑁄𑀢𑀫𑁄 𑀅𑀢𑀻𑀭𑀓𑀁 𑀜𑀸𑀡𑀤𑀲𑁆𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀦𑁄 𑀘 𑀔𑁄 𑀅𑀦𑀸𑀕𑀢𑀁 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀅𑀢𑀻𑀭𑀓𑀁 𑀜𑀸𑀡𑀤𑀲𑁆𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀢𑀬𑀺𑀤𑀁 𑀓𑀺𑀁𑀲𑀼 𑀢𑀬𑀺𑀤𑀁 𑀓𑀣𑀁𑀲𑀽’𑀢𑀺? 𑀢𑁂 𑀘 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀜𑀸𑀡𑀤𑀲𑁆𑀲𑀦𑁂𑀦 𑀅𑀜𑁆𑀜𑀯𑀺𑀳𑀺𑀢𑀓𑀁 𑀜𑀸𑀡𑀤𑀲𑁆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺 𑀬𑀣𑀭𑀺𑀯 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀅𑀢𑀻𑀢𑀁 𑀔𑁄, 𑀘𑀼𑀦𑁆𑀤, 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀢𑀣𑀸𑀕𑀢𑀲𑁆𑀲 𑀲𑀢𑀸𑀦𑀼𑀲𑀸𑀭𑀺 𑀜𑀸𑀡𑀁 𑀳𑁄𑀢𑀺; 𑀲𑁄 𑀬𑀸𑀯𑀢𑀓𑀁 𑀆𑀓𑀗𑁆𑀔𑀢𑀺 𑀢𑀸𑀯𑀢𑀓𑀁 𑀅𑀦𑀼𑀲𑁆𑀲𑀭𑀢𑀺. 𑀅𑀦𑀸𑀕𑀢𑀜𑁆𑀘 𑀔𑁄 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀚𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑁋 ‘𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’𑀢𑀺. ‘𑀅𑀢𑀻𑀢𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀦 𑀢𑀁 𑀢𑀣𑀸𑀕𑀢𑁄 𑀩𑁆𑀬𑀸𑀓𑀭𑁄𑀢𑀺. 𑀅𑀢𑀻𑀢𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀦 𑀩𑁆𑀬𑀸𑀓𑀭𑁄𑀢𑀺. 𑀅𑀢𑀻𑀢𑀁 𑀘𑁂𑀧𑀺 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀅𑀦𑀸𑀕𑀢𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀦 𑀢𑀁 𑀢𑀣𑀸𑀕𑀢𑁄 𑀩𑁆𑀬𑀸𑀓𑀭𑁄𑀢𑀺…𑀧𑁂… 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀦 𑀢𑀁 𑀢𑀣𑀸𑀕𑀢𑁄 𑀩𑁆𑀬𑀸𑀓𑀭𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀦 𑀩𑁆𑀬𑀸𑀓𑀭𑁄𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑁂𑀧𑀺, 𑀘𑀼𑀦𑁆𑀤, 𑀳𑁄𑀢𑀺 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁, 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀺 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬.

𑁧𑁮𑁮. ‘‘𑀇𑀢𑀺 𑀔𑁄, 𑀘𑀼𑀦𑁆𑀤, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑁄 𑀓𑀸𑀮𑀯𑀸𑀤𑀻 [𑀓𑀸𑀮𑀯𑀸𑀤𑀻 𑀲𑀘𑁆𑀘𑀯𑀸𑀤𑀻 (𑀲𑁆𑀬𑀸.)] 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀔𑁄, 𑀘𑀼𑀦𑁆𑀤, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀲𑀩𑁆𑀩𑀁 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀁, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘, 𑀘𑀼𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀪𑀸𑀲𑀢𑀺 𑀮𑀧𑀢𑀺 𑀦𑀺𑀤𑁆𑀤𑀺𑀲𑀢𑀺. 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺 𑀦𑁄 𑀅𑀜𑁆𑀜𑀣𑀸, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀯𑀸𑀤𑀻, 𑀘𑀼𑀦𑁆𑀤, 𑀢𑀣𑀸𑀕𑀢𑁄 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺. 𑀲𑀤𑁂𑀯𑀓𑁂 𑀮𑁄𑀓𑁂, 𑀘𑀼𑀦𑁆𑀤, 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻, 𑀢𑀲𑁆𑀫𑀸 ‘𑀢𑀣𑀸𑀕𑀢𑁄’𑀢𑀺 𑀯𑀼𑀘𑁆𑀘𑀢𑀺.

𑀅𑀩𑁆𑀬𑀸𑀓𑀢𑀝𑁆𑀞𑀸𑀦𑀁

𑁧𑁮𑁯. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑁋 ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀓𑀺𑀁 𑀧𑀦𑀸𑀯𑀼𑀲𑁄, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀏𑀢𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀁 𑁋 ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀓𑀺𑀁 𑀧𑀦𑀸𑀯𑀼𑀲𑁄, 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑁋 ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀓𑀺𑀁 𑀧𑀦𑀸𑀯𑀼𑀲𑁄, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀏𑀢𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀁 𑁋 ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀓𑀲𑁆𑀫𑀸 𑀧𑀦𑁂𑀢𑀁, 𑀆𑀯𑀼𑀲𑁄, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀅𑀩𑁆𑀬𑀸𑀓𑀢’𑀦𑁆𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀦 𑀳𑁂𑀢𑀁, 𑀆𑀯𑀼𑀲𑁄, 𑀅𑀢𑁆𑀣𑀲𑀁𑀳𑀺𑀢𑀁 𑀦 𑀥𑀫𑁆𑀫𑀲𑀁𑀳𑀺𑀢𑀁 𑀦 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀁 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢’𑀦𑁆𑀢𑀺.

𑀩𑁆𑀬𑀸𑀓𑀢𑀝𑁆𑀞𑀸𑀦𑀁

𑁧𑁯𑁦. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀓𑀺𑀁 𑀧𑀦𑀸𑀯𑀼𑀲𑁄, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀩𑁆𑀬𑀸𑀓𑀢’𑀦𑁆𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑀩𑁆𑀬𑀸𑀓𑀢𑀁, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑀩𑁆𑀬𑀸𑀓𑀢𑀁, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑀩𑁆𑀬𑀸𑀓𑀢𑀁, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑀸 𑀩𑁆𑀬𑀸𑀓𑀢’𑀦𑁆𑀢𑀺.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀓𑀲𑁆𑀫𑀸 𑀧𑀦𑁂𑀢𑀁, 𑀆𑀯𑀼𑀲𑁄, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀩𑁆𑀬𑀸𑀓𑀢’𑀦𑁆𑀢𑀺? 𑀏𑀯𑀁𑀯𑀸𑀤𑀺𑀦𑁄, 𑀘𑀼𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀏𑀢𑀜𑁆𑀳𑀺, 𑀆𑀯𑀼𑀲𑁄, 𑀅𑀢𑁆𑀣𑀲𑀁𑀳𑀺𑀢𑀁, 𑀏𑀢𑀁 𑀥𑀫𑁆𑀫𑀲𑀁𑀳𑀺𑀢𑀁, 𑀏𑀢𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀢𑀁 𑀪𑀕𑀯𑀢𑀸 𑀩𑁆𑀬𑀸𑀓𑀢’𑀦𑁆𑀢𑀺.

𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸

𑁧𑁯𑁧. ‘‘𑀬𑁂𑀧𑀺 𑀢𑁂, 𑀘𑀼𑀦𑁆𑀤, 𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸, 𑀢𑁂𑀧𑀺 𑀯𑁄 𑀫𑀬𑀸 𑀩𑁆𑀬𑀸𑀓𑀢𑀸, 𑀬𑀣𑀸 𑀢𑁂 𑀩𑁆𑀬𑀸𑀓𑀸𑀢𑀩𑁆𑀩𑀸. 𑀬𑀣𑀸 𑀘 𑀢𑁂 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀓𑀺𑀁 𑀯𑁄 𑀅𑀳𑀁 𑀢𑁂 𑀢𑀣𑀸 [𑀢𑀢𑁆𑀣 (𑀲𑁆𑀬𑀸. 𑀓.)] 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺? 𑀬𑁂𑀧𑀺 𑀢𑁂, 𑀘𑀼𑀦𑁆𑀤, 𑀅𑀧𑀭𑀦𑁆𑀢𑀲𑀳𑀕𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸, 𑀢𑁂𑀧𑀺 𑀯𑁄 𑀫𑀬𑀸 𑀩𑁆𑀬𑀸𑀓𑀢𑀸, 𑀬𑀣𑀸 𑀢𑁂 𑀩𑁆𑀬𑀸𑀓𑀸𑀢𑀩𑁆𑀩𑀸. 𑀬𑀣𑀸 𑀘 𑀢𑁂 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀓𑀺𑀁 𑀯𑁄 𑀅𑀳𑀁 𑀢𑁂 𑀢𑀣𑀸 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺? 𑀓𑀢𑀫𑁂 𑀘 𑀢𑁂, 𑀘𑀼𑀦𑁆𑀤, 𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸, 𑀬𑁂 𑀯𑁄 𑀫𑀬𑀸 𑀩𑁆𑀬𑀸𑀓𑀢𑀸, 𑀬𑀣𑀸 𑀢𑁂 𑀩𑁆𑀬𑀸𑀓𑀸𑀢𑀩𑁆𑀩𑀸. (𑀬𑀣𑀸 𑀘 𑀢𑁂 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀓𑀺𑀁 𑀯𑁄 𑀅𑀳𑀁 𑀢𑁂 𑀢𑀣𑀸 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺) [(𑀬𑀣𑀸 𑀘 𑀢𑁂 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸) 𑀲𑀩𑁆𑀩𑀢𑁆𑀣]? 𑀲𑀦𑁆𑀢𑀺 𑀔𑁄, 𑀘𑀼𑀦𑁆𑀤, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀲𑀦𑁆𑀢𑀺 𑀧𑀦, 𑀘𑀼𑀦𑁆𑀤, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀅𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘…𑀧𑁂… 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀦𑁂𑀯 𑀲𑀲𑁆𑀲𑀢𑁄 𑀦𑀸𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀲𑀬𑀁𑀓𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀧𑀭𑀁𑀓𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀲𑀬𑀁𑀓𑀢𑁄 𑀘 𑀧𑀭𑀁𑀓𑀢𑁄 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀅𑀲𑀬𑀁𑀓𑀸𑀭𑁄 𑀅𑀧𑀭𑀁𑀓𑀸𑀭𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀲𑀲𑁆𑀲𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀅𑀲𑀲𑁆𑀲𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀲𑀲𑁆𑀲𑀢𑀜𑁆𑀘 𑀅𑀲𑀲𑁆𑀲𑀢𑀜𑁆𑀘 𑀲𑀼𑀔𑀤𑀼𑀓𑁆𑀔𑀁… 𑀦𑁂𑀯𑀲𑀲𑁆𑀲𑀢𑀁 𑀦𑀸𑀲𑀲𑁆𑀲𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀲𑀼𑀔𑀤𑀼𑀓𑁆𑀔𑀁… 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺.

𑁧𑁯𑁨. ‘‘𑀢𑀢𑁆𑀭, 𑀘𑀼𑀦𑁆𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀇𑀤𑀁, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺 𑁋 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺? 𑀬𑀜𑁆𑀘 𑀔𑁄 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑀁 𑀢𑁂𑀲𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀜𑁆𑀜𑀣𑀸𑀲𑀜𑁆𑀜𑀺𑀦𑁄𑀧𑀺 𑀳𑁂𑀢𑁆𑀣, 𑀘𑀼𑀦𑁆𑀤, 𑀲𑀦𑁆𑀢𑁂𑀓𑁂 𑀲𑀢𑁆𑀢𑀸. 𑀇𑀫𑀸𑀬𑀧𑀺 𑀔𑁄 𑀅𑀳𑀁, 𑀘𑀼𑀦𑁆𑀤, 𑀧𑀜𑁆𑀜𑀢𑁆𑀢𑀺𑀬𑀸 𑀦𑁂𑀯 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺 𑀓𑀼𑀢𑁄 𑀪𑀺𑀬𑁆𑀬𑁄. 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄 𑀬𑀤𑀺𑀤𑀁 𑀅𑀥𑀺𑀧𑀜𑁆𑀜𑀢𑁆𑀢𑀺.

𑁧𑁯𑁩. ‘‘𑀢𑀢𑁆𑀭, 𑀘𑀼𑀦𑁆𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀅𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘…𑀧𑁂… 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀦𑁂𑀯𑀲𑀲𑁆𑀲𑀢𑁄 𑀦𑀸𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀲𑀬𑀁𑀓𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀧𑀭𑀁𑀓𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀲𑀬𑀁𑀓𑀢𑁄 𑀘 𑀧𑀭𑀁𑀓𑀢𑁄 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀅𑀲𑀬𑀁𑀓𑀸𑀭𑁄 𑀅𑀧𑀭𑀁𑀓𑀸𑀭𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘… 𑀲𑀲𑁆𑀲𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀅𑀲𑀲𑁆𑀲𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀲𑀲𑁆𑀲𑀢𑀜𑁆𑀘 𑀅𑀲𑀲𑁆𑀲𑀢𑀜𑁆𑀘 𑀲𑀼𑀔𑀤𑀼𑀓𑁆𑀔𑀁… 𑀦𑁂𑀯𑀲𑀲𑁆𑀲𑀢𑀁 𑀦𑀸𑀲𑀲𑁆𑀲𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔𑀁… 𑀲𑀬𑀁𑀓𑀢𑀜𑁆𑀘 𑀧𑀭𑀁𑀓𑀢𑀜𑁆𑀘 𑀲𑀼𑀔𑀤𑀼𑀓𑁆𑀔𑀁… 𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔𑀁, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀇𑀤𑀁, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺 𑁋 ‘‘𑀅𑀲𑀬𑀁𑀓𑀸𑀭𑀁 𑀅𑀧𑀭𑀁𑀓𑀸𑀭𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀲𑀼𑀔𑀤𑀼𑀓𑁆𑀔’’’𑀦𑁆𑀢𑀺? 𑀬𑀜𑁆𑀘 𑀔𑁄 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑀁 𑀢𑁂𑀲𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀜𑁆𑀜𑀣𑀸𑀲𑀜𑁆𑀜𑀺𑀦𑁄𑀧𑀺 𑀳𑁂𑀢𑁆𑀣, 𑀘𑀼𑀦𑁆𑀤, 𑀲𑀦𑁆𑀢𑁂𑀓𑁂 𑀲𑀢𑁆𑀢𑀸. 𑀇𑀫𑀸𑀬𑀧𑀺 𑀔𑁄 𑀅𑀳𑀁, 𑀘𑀼𑀦𑁆𑀤, 𑀧𑀜𑁆𑀜𑀢𑁆𑀢𑀺𑀬𑀸 𑀦𑁂𑀯 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺 𑀓𑀼𑀢𑁄 𑀪𑀺𑀬𑁆𑀬𑁄. 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄 𑀬𑀤𑀺𑀤𑀁 𑀅𑀥𑀺𑀧𑀜𑁆𑀜𑀢𑁆𑀢𑀺. 𑀇𑀫𑁂 𑀔𑁄 𑀢𑁂, 𑀘𑀼𑀦𑁆𑀤, 𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸, 𑀬𑁂 𑀯𑁄 𑀫𑀬𑀸 𑀩𑁆𑀬𑀸𑀓𑀢𑀸, 𑀬𑀣𑀸 𑀢𑁂 𑀩𑁆𑀬𑀸𑀓𑀸𑀢𑀩𑁆𑀩𑀸. 𑀬𑀣𑀸 𑀘 𑀢𑁂 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀓𑀺𑀁 𑀯𑁄 𑀅𑀳𑀁 𑀢𑁂 𑀢𑀣𑀸 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻𑀢𑀺 [𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻𑀢𑀺 (𑀲𑀻. 𑀓.)]?

𑀅𑀧𑀭𑀦𑁆𑀢𑀲𑀳𑀕𑀢𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸

𑁧𑁯𑁪. ‘‘𑀓𑀢𑀫𑁂 𑀘 𑀢𑁂, 𑀘𑀼𑀦𑁆𑀤, 𑀅𑀧𑀭𑀦𑁆𑀢𑀲𑀳𑀕𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸, 𑀬𑁂 𑀯𑁄 𑀫𑀬𑀸 𑀩𑁆𑀬𑀸𑀓𑀢𑀸, 𑀬𑀣𑀸 𑀢𑁂 𑀩𑁆𑀬𑀸𑀓𑀸𑀢𑀩𑁆𑀩𑀸. (𑀬𑀣𑀸 𑀘 𑀢𑁂 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀓𑀺𑀁 𑀯𑁄 𑀅𑀳𑀁 𑀢𑁂 𑀢𑀣𑀸 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻) [( ) 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀲𑀩𑁆𑀩𑀢𑁆𑀣𑀧𑀺 𑀧𑀭𑀺𑀧𑀼𑀡𑁆𑀡𑁄 𑀤𑀺𑀲𑁆𑀲𑀢𑀺]? 𑀲𑀦𑁆𑀢𑀺, 𑀘𑀼𑀦𑁆𑀤, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀲𑀦𑁆𑀢𑀺 𑀧𑀦, 𑀘𑀼𑀦𑁆𑀤, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀅𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺…𑀧𑁂… 𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀭𑀽𑀧𑀻 𑀦𑀸𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺… 𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑀢𑁆𑀭, 𑀘𑀼𑀦𑁆𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀇𑀤𑀁, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺 𑁋 ‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’’𑀢𑀺? 𑀬𑀜𑁆𑀘 𑀔𑁄 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑀁 𑀢𑁂𑀲𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀜𑁆𑀜𑀣𑀸𑀲𑀜𑁆𑀜𑀺𑀦𑁄𑀧𑀺 𑀳𑁂𑀢𑁆𑀣, 𑀘𑀼𑀦𑁆𑀤, 𑀲𑀦𑁆𑀢𑁂𑀓𑁂 𑀲𑀢𑁆𑀢𑀸. 𑀇𑀫𑀸𑀬𑀧𑀺 𑀔𑁄 𑀅𑀳𑀁, 𑀘𑀼𑀦𑁆𑀤, 𑀧𑀜𑁆𑀜𑀢𑁆𑀢𑀺𑀬𑀸 𑀦𑁂𑀯 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺 𑀓𑀼𑀢𑁄 𑀪𑀺𑀬𑁆𑀬𑁄. 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄 𑀬𑀤𑀺𑀤𑀁 𑀅𑀥𑀺𑀧𑀜𑁆𑀜𑀢𑁆𑀢𑀺.

𑁧𑁯𑁫. ‘‘𑀢𑀢𑁆𑀭, 𑀘𑀼𑀦𑁆𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀅𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺…𑀧𑁂… 𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀭𑀽𑀧𑀻𑀦𑀸𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺… 𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀢𑁆𑀣𑀺 𑀦𑀼 𑀔𑁄 𑀇𑀤𑀁, 𑀆𑀯𑀼𑀲𑁄, 𑀯𑀼𑀘𑁆𑀘𑀢𑀺 𑁋 ‘‘𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’’’𑀢𑀺? 𑀬𑀜𑁆𑀘 𑀔𑁄 𑀢𑁂, 𑀘𑀼𑀦𑁆𑀤, 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑀁 𑀢𑁂𑀲𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀜𑁆𑀜𑀣𑀸𑀲𑀜𑁆𑀜𑀺𑀦𑁄𑀧𑀺 𑀳𑁂𑀢𑁆𑀣, 𑀘𑀼𑀦𑁆𑀤, 𑀲𑀦𑁆𑀢𑁂𑀓𑁂 𑀲𑀢𑁆𑀢𑀸. 𑀇𑀫𑀸𑀬𑀧𑀺 𑀔𑁄 𑀅𑀳𑀁, 𑀘𑀼𑀦𑁆𑀤, 𑀧𑀜𑁆𑀜𑀢𑁆𑀢𑀺𑀬𑀸 𑀦𑁂𑀯 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀓𑀼𑀢𑁄 𑀪𑀺𑀬𑁆𑀬𑁄. 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄 𑀬𑀤𑀺𑀤𑀁 𑀅𑀥𑀺𑀧𑀜𑁆𑀜𑀢𑁆𑀢𑀺. 𑀇𑀫𑁂 𑀔𑁄 𑀢𑁂, 𑀘𑀼𑀦𑁆𑀤, 𑀅𑀧𑀭𑀦𑁆𑀢𑀲𑀳𑀕𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸, 𑀬𑁂 𑀯𑁄 𑀫𑀬𑀸 𑀩𑁆𑀬𑀸𑀓𑀢𑀸, 𑀬𑀣𑀸 𑀢𑁂 𑀩𑁆𑀬𑀸𑀓𑀸𑀢𑀩𑁆𑀩𑀸. 𑀬𑀣𑀸 𑀘 𑀢𑁂 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀓𑀺𑀁 𑀯𑁄 𑀅𑀳𑀁 𑀢𑁂 𑀢𑀣𑀸 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻𑀢𑀺 [𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻𑀢𑀺 (𑀲𑀻. 𑀓.)]?

𑁧𑁯𑁬. ‘‘𑀇𑀫𑁂𑀲𑀜𑁆𑀘, 𑀘𑀼𑀦𑁆𑀤, 𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀸𑀦𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀇𑀫𑁂𑀲𑀜𑁆𑀘 𑀅𑀧𑀭𑀦𑁆𑀢𑀲𑀳𑀕𑀢𑀸𑀦𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀬 𑀏𑀯𑀁 𑀫𑀬𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀘𑀼𑀦𑁆𑀤, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻…𑀧𑁂… 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀇𑀫𑁂𑀲𑀜𑁆𑀘 𑀘𑀼𑀦𑁆𑀤, 𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀸𑀦𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀇𑀫𑁂𑀲𑀜𑁆𑀘 𑀅𑀧𑀭𑀦𑁆𑀢𑀲𑀳𑀕𑀢𑀸𑀦𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀬. 𑀏𑀯𑀁 𑀫𑀬𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸’’𑀢𑀺.

𑁧𑁯𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀞𑀺𑀢𑁄 𑀳𑁄𑀢𑀺 𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀧𑀸𑀲𑀸𑀤𑀺𑀓𑁄 𑀯𑀢𑀸𑀬𑀁, 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑁄; 𑀲𑀼𑀧𑀸𑀲𑀸𑀤𑀺𑀓𑁄 𑀯𑀢𑀸𑀬𑀁 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀓𑁄 𑀦𑀸𑀫𑀸𑀬𑀁 𑀪𑀦𑁆𑀢𑁂 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺? ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀉𑀧𑀯𑀸𑀡, 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 ‘𑀧𑀸𑀲𑀸𑀤𑀺𑀓𑁄’ 𑀢𑁆𑀯𑁂𑀯 𑀦𑀁 𑀥𑀸𑀭𑁂𑀳𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.