𑁧. 𑀧𑀸𑀣𑀺𑀓𑀲𑀼𑀢𑁆𑀢𑀁

𑀲𑀼𑀦𑀓𑁆𑀔𑀢𑁆𑀢𑀯𑀢𑁆𑀣𑀼

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀮𑁆𑀮𑁂𑀲𑀼 𑀯𑀺𑀳𑀭𑀢𑀺 𑀅𑀦𑀼𑀧𑀺𑀬𑀁 𑀦𑀸𑀫 [𑀅𑀦𑀼𑀧𑁆𑀧𑀺𑀬𑀁 𑀦𑀸𑀫 (𑀲𑁆𑀬𑀸.)] 𑀫𑀮𑁆𑀮𑀸𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀦𑀼𑀧𑀺𑀬𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀅𑀦𑀼𑀧𑀺𑀬𑀸𑀬𑀁 [𑀅𑀦𑀼𑀧𑀺𑀬𑀁 (𑀓.)] 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀪𑀕𑁆𑀕𑀯𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀆𑀭𑀸𑀫𑁄, 𑀬𑁂𑀦 𑀪𑀕𑁆𑀕𑀯𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺.

𑁨. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀪𑀕𑁆𑀕𑀯𑀕𑁄𑀢𑁆𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀆𑀭𑀸𑀫𑁄, 𑀬𑁂𑀦 𑀪𑀕𑁆𑀕𑀯𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀪𑀕𑁆𑀕𑀯𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸. 𑀲𑁆𑀯𑀸𑀕𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄. 𑀘𑀺𑀭𑀲𑁆𑀲𑀁 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀦𑀺𑀲𑀻𑀤𑀢𑀼, 𑀪𑀦𑁆𑀢𑁂, 𑀪𑀕𑀯𑀸, 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀪𑀕𑁆𑀕𑀯𑀕𑁄𑀢𑁆𑀢𑁄𑀧𑀺 𑀔𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀪𑀕𑁆𑀕𑀯𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀭𑀺𑀫𑀸𑀦𑀺, 𑀪𑀦𑁆𑀢𑁂, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀧𑀘𑁆𑀘𑀓𑁆𑀔𑀸𑀢𑁄 𑀤𑀸𑀦𑀺 𑀫𑀬𑀸, 𑀪𑀕𑁆𑀕𑀯, 𑀪𑀕𑀯𑀸. 𑀦 𑀤𑀸𑀦𑀸𑀳𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀫𑀻’𑀢𑀺. 𑀓𑀘𑁆𑀘𑁂𑀢𑀁, 𑀪𑀦𑁆𑀢𑁂, 𑀢𑀣𑁂𑀯, 𑀬𑀣𑀸 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀅𑀯𑀘𑀸’’𑀢𑀺? ‘‘𑀢𑀣𑁂𑀯 𑀔𑁄 𑀏𑀢𑀁, 𑀪𑀕𑁆𑀕𑀯, 𑀬𑀣𑀸 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀅𑀯𑀘’’.

𑁩. 𑀧𑀼𑀭𑀺𑀫𑀸𑀦𑀺, 𑀪𑀕𑁆𑀕𑀯, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀧𑀘𑁆𑀘𑀓𑁆𑀔𑀸𑀫𑀺 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁. 𑀦 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. ‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀅𑀧𑀺 𑀦𑀼 𑀢𑀸𑀳𑀁, 𑀲𑀼𑀦𑀓𑁆𑀔𑀢𑁆𑀢, 𑀏𑀯𑀁 𑀅𑀯𑀘𑀁, 𑀏𑀳𑀺 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀳𑀻’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’. ‘𑀢𑁆𑀯𑀁 𑀯𑀸 𑀧𑀦 𑀫𑀁 𑀏𑀯𑀁 𑀅𑀯𑀘 𑁋 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’. ‘𑀇𑀢𑀺 𑀓𑀺𑀭, 𑀲𑀼𑀦𑀓𑁆𑀔𑀢𑁆𑀢, 𑀦𑁂𑀯𑀸𑀳𑀁 𑀢𑀁 𑀯𑀤𑀸𑀫𑀺 𑁋 𑀏𑀳𑀺 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀳𑀻𑀢𑀺. 𑀦𑀧𑀺 𑀓𑀺𑀭 𑀫𑀁 𑀢𑁆𑀯𑀁 𑀯𑀤𑁂𑀲𑀺 𑁋 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺. 𑀏𑀯𑀁 𑀲𑀦𑁆𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀺? 𑀧𑀲𑁆𑀲, 𑀫𑁄𑀖𑀧𑀼𑀭𑀺𑀲, 𑀬𑀸𑀯𑀜𑁆𑀘 [𑀬𑀸𑀯 𑀘 (𑀓.)] 𑀢𑁂 𑀇𑀤𑀁 𑀅𑀧𑀭𑀤𑁆𑀥’𑀦𑁆𑀢𑀺.

𑁪. ‘𑀦 𑀳𑀺 𑀧𑀦 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀻’𑀢𑀺. ‘𑀅𑀧𑀺 𑀦𑀼 𑀢𑀸𑀳𑀁, 𑀲𑀼𑀦𑀓𑁆𑀔𑀢𑁆𑀢, 𑀏𑀯𑀁 𑀅𑀯𑀘𑀁 𑁋 𑀏𑀳𑀺 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀳𑀺, 𑀅𑀳𑀁 𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’. ‘𑀢𑁆𑀯𑀁 𑀯𑀸 𑀧𑀦 𑀫𑀁 𑀏𑀯𑀁 𑀅𑀯𑀘 𑁋 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀪𑀕𑀯𑀸 𑀫𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀻’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’. ‘𑀇𑀢𑀺 𑀓𑀺𑀭, 𑀲𑀼𑀦𑀓𑁆𑀔𑀢𑁆𑀢, 𑀦𑁂𑀯𑀸𑀳𑀁 𑀢𑀁 𑀯𑀤𑀸𑀫𑀺 𑁋 𑀏𑀳𑀺 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀳𑀺, 𑀅𑀳𑀁 𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺; 𑀦𑀧𑀺 𑀓𑀺𑀭 𑀫𑀁 𑀢𑁆𑀯𑀁 𑀯𑀤𑁂𑀲𑀺 𑁋 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀪𑀕𑀯𑀸 𑀫𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀻’𑀢𑀺. 𑀏𑀯𑀁 𑀲𑀦𑁆𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀺? 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀓𑀢𑁂 𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂 𑀅𑀓𑀢𑁂 𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂 𑀬𑀲𑁆𑀲𑀢𑁆𑀣𑀸𑀬 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’𑀢𑀺? ‘𑀓𑀢𑁂 𑀯𑀸, 𑀪𑀦𑁆𑀢𑁂, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂 𑀅𑀓𑀢𑁂 𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂 𑀬𑀲𑁆𑀲𑀢𑁆𑀣𑀸𑀬 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’𑀢𑀺. ‘𑀇𑀢𑀺 𑀓𑀺𑀭, 𑀲𑀼𑀦𑀓𑁆𑀔𑀢𑁆𑀢, 𑀓𑀢𑁂 𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂, 𑀅𑀓𑀢𑁂 𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂, 𑀬𑀲𑁆𑀲𑀢𑁆𑀣𑀸𑀬 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀢𑀢𑁆𑀭, 𑀲𑀼𑀦𑀓𑁆𑀔𑀢𑁆𑀢, 𑀓𑀺𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑀁 𑀓𑀭𑀺𑀲𑁆𑀲𑀢𑀺? 𑀧𑀲𑁆𑀲, 𑀫𑁄𑀖𑀧𑀼𑀭𑀺𑀲, 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥’𑀦𑁆𑀢𑀺.

𑁫. ‘𑀦 𑀳𑀺 𑀧𑀦 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀢𑀻’𑀢𑀺 [𑀧𑀜𑁆𑀜𑀸𑀧𑁂𑀢𑀻𑀢𑀺 (𑀧𑀻.)]? ‘𑀅𑀧𑀺 𑀦𑀼 𑀢𑀸𑀳𑀁, 𑀲𑀼𑀦𑀓𑁆𑀔𑀢𑁆𑀢, 𑀏𑀯𑀁 𑀅𑀯𑀘𑀁 𑁋 𑀏𑀳𑀺 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀳𑀺, 𑀅𑀳𑀁 𑀢𑁂 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’. ‘𑀢𑁆𑀯𑀁 𑀯𑀸 𑀧𑀦 𑀫𑀁 𑀏𑀯𑀁 𑀅𑀯𑀘 𑁋 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀪𑀕𑀯𑀸 𑀫𑁂 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀲𑁆𑀲𑀢𑀻’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’. ‘𑀇𑀢𑀺 𑀓𑀺𑀭, 𑀲𑀼𑀦𑀓𑁆𑀔𑀢𑁆𑀢, 𑀦𑁂𑀯𑀸𑀳𑀁 𑀢𑀁 𑀯𑀤𑀸𑀫𑀺 𑁋 𑀏𑀳𑀺 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀳𑀺, 𑀅𑀳𑀁 𑀢𑁂 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺. 𑀦𑀧𑀺 𑀓𑀺𑀭 𑀫𑀁 𑀢𑁆𑀯𑀁 𑀯𑀤𑁂𑀲𑀺 𑁋 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀪𑀕𑀯𑀸 𑀫𑁂 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀲𑁆𑀲𑀢𑀻’𑀢𑀺. 𑀏𑀯𑀁 𑀲𑀦𑁆𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀺? 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀧𑀜𑁆𑀜𑀢𑁆𑀢𑁂 𑀯𑀸 𑀅𑀕𑁆𑀕𑀜𑁆𑀜𑁂, 𑀅𑀧𑀜𑁆𑀜𑀢𑁆𑀢𑁂 𑀯𑀸 𑀅𑀕𑁆𑀕𑀜𑁆𑀜𑁂, 𑀬𑀲𑁆𑀲𑀢𑁆𑀣𑀸𑀬 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’𑀢𑀺? ‘𑀧𑀜𑁆𑀜𑀢𑁆𑀢𑁂 𑀯𑀸, 𑀪𑀦𑁆𑀢𑁂, 𑀅𑀕𑁆𑀕𑀜𑁆𑀜𑁂, 𑀅𑀧𑀜𑁆𑀜𑀢𑁆𑀢𑁂 𑀯𑀸 𑀅𑀕𑁆𑀕𑀜𑁆𑀜𑁂, 𑀬𑀲𑁆𑀲𑀢𑁆𑀣𑀸𑀬 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’𑀢𑀺. ‘𑀇𑀢𑀺 𑀓𑀺𑀭, 𑀲𑀼𑀦𑀓𑁆𑀔𑀢𑁆𑀢, 𑀧𑀜𑁆𑀜𑀢𑁆𑀢𑁂 𑀯𑀸 𑀅𑀕𑁆𑀕𑀜𑁆𑀜𑁂, 𑀅𑀧𑀜𑁆𑀜𑀢𑁆𑀢𑁂 𑀯𑀸 𑀅𑀕𑁆𑀕𑀜𑁆𑀜𑁂, 𑀬𑀲𑁆𑀲𑀢𑁆𑀣𑀸𑀬 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀢𑀢𑁆𑀭, 𑀲𑀼𑀦𑀓𑁆𑀔𑀢𑁆𑀢, 𑀓𑀺𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀢𑁆𑀢𑀁 𑀓𑀭𑀺𑀲𑁆𑀲𑀢𑀺? 𑀧𑀲𑁆𑀲, 𑀫𑁄𑀖𑀧𑀼𑀭𑀺𑀲, 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥𑀁’.

𑁬. ‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀫𑀫 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀯𑀚𑁆𑀚𑀺𑀕𑀸𑀫𑁂 𑁋 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺. 𑀇𑀢𑀺 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀫𑀫 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀯𑀚𑁆𑀚𑀺𑀕𑀸𑀫𑁂.

‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀯𑀚𑁆𑀚𑀺𑀕𑀸𑀫𑁂 𑁋 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀇𑀢𑀺 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀯𑀚𑁆𑀚𑀺𑀕𑀸𑀫𑁂.

‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀲𑀗𑁆𑀖𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀯𑀚𑁆𑀚𑀺𑀕𑀸𑀫𑁂 𑁋 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸𑀢𑀺. 𑀇𑀢𑀺 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄 𑀯𑀚𑁆𑀚𑀺𑀕𑀸𑀫𑁂.

‘𑀆𑀭𑁄𑀘𑀬𑀸𑀫𑀺 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀧𑀝𑀺𑀯𑁂𑀤𑀬𑀸𑀫𑀺 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢. 𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀯𑀢𑁆𑀢𑀸𑀭𑁄, 𑀦𑁄 𑀯𑀺𑀲𑀳𑀺 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁, 𑀲𑁄 𑀅𑀯𑀺𑀲𑀳𑀦𑁆𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑁄𑀢𑀺. 𑀇𑀢𑀺 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄’𑀢𑀺.

𑀏𑀯𑀁 𑀧𑀺 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 𑀅𑀧𑀓𑁆𑀓𑀫𑁂𑀯 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀬𑀣𑀸 𑀢𑀁 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄.

𑀓𑁄𑀭𑀓𑁆𑀔𑀢𑁆𑀢𑀺𑀬𑀯𑀢𑁆𑀣𑀼

𑁭. ‘‘𑀏𑀓𑀫𑀺𑀤𑀸𑀳𑀁, 𑀪𑀕𑁆𑀕𑀯, 𑀲𑀫𑀬𑀁 𑀣𑀽𑀮𑀽𑀲𑀼 [𑀩𑀼𑀫𑀽𑀲𑀼 (𑀲𑀻. 𑀧𑀻.)] 𑀯𑀺𑀳𑀭𑀸𑀫𑀺 𑀉𑀢𑁆𑀢𑀭𑀓𑀸 𑀦𑀸𑀫 𑀣𑀽𑀮𑀽𑀦𑀁 𑀦𑀺𑀕𑀫𑁄. 𑀅𑀣 𑀔𑁆𑀯𑀸𑀳𑀁, 𑀪𑀕𑁆𑀕𑀯, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀼𑀦𑀓𑁆𑀔𑀢𑁆𑀢𑁂𑀦 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀉𑀢𑁆𑀢𑀭𑀓𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀘𑁂𑀮𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀓𑀼𑀓𑁆𑀓𑀼𑀭𑀯𑀢𑀺𑀓𑁄 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄 [𑀘𑀢𑀼𑀓𑀼𑀡𑁆𑀟𑀺𑀓𑁄 (𑀲𑀻. 𑀧𑀻.) 𑀘𑀢𑀼𑀓𑁄𑀡𑁆𑀟𑀺𑀓𑁄 (𑀲𑁆𑀬𑀸. 𑀓.)] 𑀙𑀫𑀸𑀦𑀺𑀓𑀺𑀡𑁆𑀡𑀁 𑀪𑀓𑁆𑀔𑀲𑀁 𑀫𑀼𑀔𑁂𑀦𑁂𑀯 𑀔𑀸𑀤𑀢𑀺, 𑀫𑀼𑀔𑁂𑀦𑁂𑀯 𑀪𑀼𑀜𑁆𑀚𑀢𑀺. 𑀅𑀤𑁆𑀤𑀲𑀸 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀓𑀼𑀓𑁆𑀓𑀼𑀭𑀯𑀢𑀺𑀓𑀁 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑀁 𑀙𑀫𑀸𑀦𑀺𑀓𑀺𑀡𑁆𑀡𑀁 𑀪𑀓𑁆𑀔𑀲𑀁 𑀫𑀼𑀔𑁂𑀦𑁂𑀯 𑀔𑀸𑀤𑀦𑁆𑀢𑀁 𑀫𑀼𑀔𑁂𑀦𑁂𑀯 𑀪𑀼𑀜𑁆𑀚𑀦𑁆𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀲𑀸𑀥𑀼𑀭𑀽𑀧𑁄 𑀯𑀢, 𑀪𑁄, 𑀅𑀬𑀁 [𑀅𑀭𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀲𑀫𑀡𑁄 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄 𑀙𑀫𑀸𑀦𑀺𑀓𑀺𑀡𑁆𑀡𑀁 𑀪𑀓𑁆𑀔𑀲𑀁 𑀫𑀼𑀔𑁂𑀦𑁂𑀯 𑀔𑀸𑀤𑀢𑀺, 𑀫𑀼𑀔𑁂𑀦𑁂𑀯 𑀪𑀼𑀜𑁆𑀚𑀢𑀻’𑀢𑀺.

‘‘𑀅𑀣 𑀔𑁆𑀯𑀸𑀳𑀁, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀢𑁆𑀯𑀫𑁆𑀧𑀺 𑀦𑀸𑀫, 𑀫𑁄𑀖𑀧𑀼𑀭𑀺𑀲, 𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑀺𑀬𑁄 [𑀫𑁄𑀖𑀧𑀼𑀭𑀺𑀲 𑀲𑀓𑁆𑀬𑀧𑀼𑀢𑁆𑀢𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀝𑀺𑀚𑀸𑀦𑀺𑀲𑁆𑀲𑀲𑀻’𑀢𑀺! ‘𑀓𑀺𑀁 𑀧𑀦 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀢𑁆𑀯𑀫𑁆𑀧𑀺 𑀦𑀸𑀫, 𑀫𑁄𑀖𑀧𑀼𑀭𑀺𑀲, 𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑀺𑀬𑁄 [𑀫𑁄𑀖𑀧𑀼𑀭𑀺𑀲 𑀲𑀓𑁆𑀬𑀧𑀼𑀢𑁆𑀢𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀝𑀺𑀚𑀸𑀦𑀺𑀲𑁆𑀲𑀲𑀻’𑀢𑀺? ‘𑀦𑀦𑀼 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀇𑀫𑀁 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀓𑀼𑀓𑁆𑀓𑀼𑀭𑀯𑀢𑀺𑀓𑀁 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑀁 𑀙𑀫𑀸𑀦𑀺𑀓𑀺𑀡𑁆𑀡𑀁 𑀪𑀓𑁆𑀔𑀲𑀁 𑀫𑀼𑀔𑁂𑀦𑁂𑀯 𑀔𑀸𑀤𑀦𑁆𑀢𑀁 𑀫𑀼𑀔𑁂𑀦𑁂𑀯 𑀪𑀼𑀜𑁆𑀚𑀦𑁆𑀢𑀁 𑀤𑀺𑀲𑁆𑀯𑀸𑀦 𑀏𑀢𑀤𑀳𑁄𑀲𑀺 𑁋 𑀲𑀸𑀥𑀼𑀭𑀽𑀧𑁄 𑀯𑀢, 𑀪𑁄, 𑀅𑀬𑀁 𑀲𑀫𑀡𑁄 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄 𑀙𑀫𑀸𑀦𑀺𑀓𑀺𑀡𑁆𑀡𑀁 𑀪𑀓𑁆𑀔𑀲𑀁 𑀫𑀼𑀔𑁂𑀦𑁂𑀯 𑀔𑀸𑀤𑀢𑀺, 𑀫𑀼𑀔𑁂𑀦𑁂𑀯 𑀪𑀼𑀜𑁆𑀚𑀢𑀻’𑀢𑀺? ‘𑀏𑀯𑀁, 𑀪𑀦𑁆𑀢𑁂. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀅𑀭𑀳𑀢𑁆𑀢𑀲𑁆𑀲 𑀫𑀘𑁆𑀙𑀭𑀸𑀬𑀢𑀻’𑀢𑀺? ‘𑀦 𑀔𑁄 𑀅𑀳𑀁, 𑀫𑁄𑀖𑀧𑀼𑀭𑀺𑀲, 𑀅𑀭𑀳𑀢𑁆𑀢𑀲𑁆𑀲 𑀫𑀘𑁆𑀙𑀭𑀸𑀬𑀸𑀫𑀺. 𑀅𑀧𑀺 𑀘, 𑀢𑀼𑀬𑁆𑀳𑁂𑀯𑁂𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀧𑀚𑀳. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀬𑀁 𑀔𑁄 𑀧𑀦𑁂𑀢𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀜𑁆𑀜𑀲𑀺 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑁋 𑀲𑀸𑀥𑀼𑀭𑀽𑀧𑁄 𑀅𑀬𑀁 𑀲𑀫𑀡𑁄𑀢𑀺 [𑀫𑀜𑁆𑀜𑀲𑀺 ‘‘𑀅𑀘𑁂𑀮𑁄 𑀓𑁄𑀭𑀔𑀢𑁆𑀢𑀺𑀬𑁄 𑀲𑀸𑀥𑀼𑀭𑀽𑀧𑁄 𑀅𑀭𑀳𑀁 𑀲𑀫𑀡𑁄𑀢𑀺’’ (𑀲𑁆𑀬𑀸.)]. 𑀲𑁄 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀅𑀮𑀲𑀓𑁂𑀦 𑀓𑀸𑀮𑀗𑁆𑀓𑀭𑀺𑀲𑁆𑀲𑀢𑀺. 𑀓𑀸𑀮𑀗𑁆𑀓𑀢𑁄 [𑀓𑀸𑀮𑀓𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀘 𑀓𑀸𑀮𑀓𑀜𑁆𑀘𑀺𑀓𑀸 [𑀓𑀸𑀮𑀓𑀜𑁆𑀚𑀸 (𑀲𑀻. 𑀧𑀻.), 𑀓𑀸𑀮𑀓𑀜𑁆𑀚𑀺𑀓𑀸 (𑀲𑁆𑀬𑀸.)] 𑀦𑀸𑀫 𑀅𑀲𑀼𑀭𑀸 𑀲𑀩𑁆𑀩𑀦𑀺𑀳𑀻𑀦𑁄 𑀅𑀲𑀼𑀭𑀓𑀸𑀬𑁄, 𑀢𑀢𑁆𑀭 𑀉𑀧𑀧𑀚𑁆𑀚𑀺𑀲𑁆𑀲𑀢𑀺. 𑀓𑀸𑀮𑀗𑁆𑀓𑀢𑀜𑁆𑀘 𑀦𑀁 𑀩𑀻𑀭𑀡𑀢𑁆𑀣𑀫𑁆𑀩𑀓𑁂 𑀲𑀼𑀲𑀸𑀦𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀺. 𑀆𑀓𑀗𑁆𑀔𑀫𑀸𑀦𑁄 𑀘 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑁂𑀬𑁆𑀬𑀸𑀲𑀺 𑁋 𑀚𑀸𑀦𑀸𑀲𑀺, 𑀆𑀯𑀼𑀲𑁄 𑀓𑁄𑀭𑀓𑁆𑀔𑀢𑁆𑀢𑀺𑀬 [𑀅𑀘𑁂𑀮 𑀓𑁄𑀭𑀔𑀢𑁆𑀢𑀺𑀬 (𑀓.)], 𑀅𑀢𑁆𑀢𑀦𑁄 𑀕𑀢𑀺𑀦𑁆𑀢𑀺? 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀲𑀼𑀦𑀓𑁆𑀔𑀢𑁆𑀢, 𑀯𑀺𑀚𑁆𑀚𑀢𑀺 𑀬𑀁 𑀢𑁂 𑀅𑀘𑁂𑀮𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑁋 𑀚𑀸𑀦𑀸𑀫𑀺, 𑀆𑀯𑀼𑀲𑁄 𑀲𑀼𑀦𑀓𑁆𑀔𑀢𑁆𑀢, 𑀅𑀢𑁆𑀢𑀦𑁄 𑀕𑀢𑀺𑀁; 𑀓𑀸𑀮𑀓𑀜𑁆𑀘𑀺𑀓𑀸 𑀦𑀸𑀫 𑀅𑀲𑀼𑀭𑀸 𑀲𑀩𑁆𑀩𑀦𑀺𑀳𑀻𑀦𑁄 𑀅𑀲𑀼𑀭𑀓𑀸𑀬𑁄, 𑀢𑀢𑁆𑀭𑀸𑀫𑁆𑀳𑀺 𑀉𑀧𑀧𑀦𑁆𑀦𑁄𑀢𑀺.

‘‘𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦 𑀅𑀘𑁂𑀮𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀏𑀢𑀤𑀯𑁄𑀘 𑁋 ‘𑀩𑁆𑀬𑀸𑀓𑀢𑁄 𑀔𑁄𑀲𑀺, 𑀆𑀯𑀼𑀲𑁄 𑀓𑁄𑀭𑀓𑁆𑀔𑀢𑁆𑀢𑀺𑀬, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑁋 𑀅𑀘𑁂𑀮𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀅𑀮𑀲𑀓𑁂𑀦 𑀓𑀸𑀮𑀗𑁆𑀓𑀭𑀺𑀲𑁆𑀲𑀢𑀺. 𑀓𑀸𑀮𑀗𑁆𑀓𑀢𑁄 𑀘 𑀓𑀸𑀮𑀓𑀜𑁆𑀘𑀺𑀓𑀸 𑀦𑀸𑀫 𑀅𑀲𑀼𑀭𑀸 𑀲𑀩𑁆𑀩𑀦𑀺𑀳𑀻𑀦𑁄 𑀅𑀲𑀼𑀭𑀓𑀸𑀬𑁄, 𑀢𑀢𑁆𑀭 𑀉𑀧𑀧𑀚𑁆𑀚𑀺𑀲𑁆𑀲𑀢𑀺. 𑀓𑀸𑀮𑀗𑁆𑀓𑀢𑀜𑁆𑀘 𑀦𑀁 𑀩𑀻𑀭𑀡𑀢𑁆𑀣𑀫𑁆𑀩𑀓𑁂 𑀲𑀼𑀲𑀸𑀦𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀻’𑀢𑀺. 𑀬𑁂𑀦 𑀢𑁆𑀯𑀁, 𑀆𑀯𑀼𑀲𑁄 𑀓𑁄𑀭𑀓𑁆𑀔𑀢𑁆𑀢𑀺𑀬, 𑀫𑀢𑁆𑀢𑀁 𑀫𑀢𑁆𑀢𑀜𑁆𑀘 𑀪𑀢𑁆𑀢𑀁 𑀪𑀼𑀜𑁆𑀚𑁂𑀬𑁆𑀬𑀸𑀲𑀺, 𑀫𑀢𑁆𑀢𑀁 𑀫𑀢𑁆𑀢𑀜𑁆𑀘 𑀧𑀸𑀦𑀻𑀬𑀁 𑀧𑀺𑀯𑁂𑀬𑁆𑀬𑀸𑀲𑀺. 𑀬𑀣𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀺𑀘𑁆𑀙𑀸 𑀅𑀲𑁆𑀲 𑀯𑀘𑀦’𑀦𑁆𑀢𑀺.

𑁮. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀏𑀓𑀤𑁆𑀯𑀻𑀳𑀺𑀓𑀸𑀬 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀺 𑀕𑀡𑁂𑀲𑀺, 𑀬𑀣𑀸 𑀢𑀁 𑀢𑀣𑀸𑀕𑀢𑀲𑁆𑀲 𑀅𑀲𑀤𑁆𑀤𑀳𑀫𑀸𑀦𑁄. 𑀅𑀣 𑀔𑁄, 𑀪𑀕𑁆𑀕𑀯, 𑀅𑀘𑁂𑀮𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀅𑀮𑀲𑀓𑁂𑀦 𑀓𑀸𑀮𑀫𑀓𑀸𑀲𑀺. 𑀓𑀸𑀮𑀗𑁆𑀓𑀢𑁄 𑀘 𑀓𑀸𑀮𑀓𑀜𑁆𑀘𑀺𑀓𑀸 𑀦𑀸𑀫 𑀅𑀲𑀼𑀭𑀸 𑀲𑀩𑁆𑀩𑀦𑀺𑀳𑀻𑀦𑁄 𑀅𑀲𑀼𑀭𑀓𑀸𑀬𑁄, 𑀢𑀢𑁆𑀭 𑀉𑀧𑀧𑀚𑁆𑀚𑀺. 𑀓𑀸𑀮𑀗𑁆𑀓𑀢𑀜𑁆𑀘 𑀦𑀁 𑀩𑀻𑀭𑀡𑀢𑁆𑀣𑀫𑁆𑀩𑀓𑁂 𑀲𑀼𑀲𑀸𑀦𑁂 𑀙𑀟𑁆𑀟𑁂𑀲𑀼𑀁.

𑁯. ‘‘𑀅𑀲𑁆𑀲𑁄𑀲𑀺 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑁋 ‘𑀅𑀘𑁂𑀮𑁄 𑀓𑀺𑀭 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀅𑀮𑀲𑀓𑁂𑀦 𑀓𑀸𑀮𑀗𑁆𑀓𑀢𑁄 𑀩𑀻𑀭𑀡𑀢𑁆𑀣𑀫𑁆𑀩𑀓𑁂 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑁄’𑀢𑀺. 𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦 𑀩𑀻𑀭𑀡𑀢𑁆𑀣𑀫𑁆𑀩𑀓𑀁 𑀲𑀼𑀲𑀸𑀦𑀁, 𑀬𑁂𑀦 𑀅𑀘𑁂𑀮𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀡𑀺𑀦𑀸 𑀆𑀓𑁄𑀝𑁂𑀲𑀺 𑁋 ‘𑀚𑀸𑀦𑀸𑀲𑀺, 𑀆𑀯𑀼𑀲𑁄 𑀓𑁄𑀭𑀓𑁆𑀔𑀢𑁆𑀢𑀺𑀬, 𑀅𑀢𑁆𑀢𑀦𑁄 𑀕𑀢𑀺’𑀦𑁆𑀢𑀺? 𑀅𑀣 𑀔𑁄, 𑀪𑀕𑁆𑀕𑀯, 𑀅𑀘𑁂𑀮𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄 𑀧𑀸𑀡𑀺𑀦𑀸 𑀧𑀺𑀝𑁆𑀞𑀺𑀁 𑀧𑀭𑀺𑀧𑀼𑀜𑁆𑀙𑀦𑁆𑀢𑁄 𑀯𑀼𑀝𑁆𑀞𑀸𑀲𑀺. ‘𑀚𑀸𑀦𑀸𑀫𑀺, 𑀆𑀯𑀼𑀲𑁄 𑀲𑀼𑀦𑀓𑁆𑀔𑀢𑁆𑀢, 𑀅𑀢𑁆𑀢𑀦𑁄 𑀕𑀢𑀺𑀁. 𑀓𑀸𑀮𑀓𑀜𑁆𑀘𑀺𑀓𑀸 𑀦𑀸𑀫 𑀅𑀲𑀼𑀭𑀸 𑀲𑀩𑁆𑀩𑀦𑀺𑀳𑀻𑀦𑁄 𑀅𑀲𑀼𑀭𑀓𑀸𑀬𑁄, 𑀢𑀢𑁆𑀭𑀸𑀫𑁆𑀳𑀺 𑀉𑀧𑀧𑀦𑁆𑀦𑁄’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀉𑀢𑁆𑀢𑀸𑀦𑁄 𑀧𑀧𑀢𑀺 [𑀧𑀭𑀺𑀧𑀢𑀺 (𑀲𑁆𑀬𑀸. 𑀓.)].

𑁧𑁦. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀳𑀁, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀬𑀣𑁂𑀯 𑀢𑁂 𑀅𑀳𑀁 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀆𑀭𑀩𑁆𑀪 𑀩𑁆𑀬𑀸𑀓𑀸𑀲𑀺𑀁, 𑀢𑀣𑁂𑀯 𑀢𑀁 𑀯𑀺𑀧𑀸𑀓𑀁, 𑀅𑀜𑁆𑀜𑀣𑀸 𑀯𑀸’𑀢𑀺? ‘𑀬𑀣𑁂𑀯 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀆𑀭𑀩𑁆𑀪 𑀩𑁆𑀬𑀸𑀓𑀸𑀲𑀺, 𑀢𑀣𑁂𑀯 𑀢𑀁 𑀯𑀺𑀧𑀸𑀓𑀁, 𑀦𑁄 𑀅𑀜𑁆𑀜𑀣𑀸’𑀢𑀺. ‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀓𑀢𑀁 𑀯𑀸 𑀳𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀅𑀓𑀢𑀁 𑀯𑀸𑀢𑀺? ‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀓𑀢𑀁 𑀳𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀦𑁄 𑀅𑀓𑀢’𑀦𑁆𑀢𑀺. ‘𑀏𑀯𑀫𑁆𑀧𑀺 𑀔𑁄 𑀫𑀁 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀁 𑀏𑀯𑀁 𑀯𑀤𑁂𑀲𑀺 𑁋 𑀦 𑀳𑀺 𑀧𑀦 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀻𑀢𑀺. 𑀧𑀲𑁆𑀲, 𑀫𑁄𑀖𑀧𑀼𑀭𑀺𑀲, 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥’𑀦𑁆𑀢𑀺. ‘‘𑀏𑀯𑀫𑁆𑀧𑀺 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 𑀅𑀧𑀓𑁆𑀓𑀫𑁂𑀯 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀬𑀣𑀸 𑀢𑀁 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄.

𑀅𑀘𑁂𑀮𑀓𑀴𑀸𑀭𑀫𑀝𑁆𑀝𑀓𑀯𑀢𑁆𑀣𑀼

𑁧𑁧. ‘‘𑀏𑀓𑀫𑀺𑀤𑀸𑀳𑀁, 𑀪𑀕𑁆𑀕𑀯, 𑀲𑀫𑀬𑀁 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀘𑁂𑀮𑁄 𑀓𑀴𑀸𑀭𑀫𑀝𑁆𑀝𑀓𑁄 𑀯𑁂𑀲𑀸𑀮𑀺𑀬𑀁 𑀧𑀝𑀺𑀯𑀲𑀢𑀺 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀘𑁂𑀯 𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀘 𑀯𑀚𑁆𑀚𑀺𑀕𑀸𑀫𑁂. 𑀢𑀲𑁆𑀲 𑀲𑀢𑁆𑀢𑀯𑀢𑀧𑀤𑀸𑀦𑀺 [𑀲𑀢𑁆𑀢𑀯𑀢𑁆𑀢𑀧𑀤𑀸𑀦𑀺 (𑀲𑁆𑀬𑀸. 𑀧𑀻.)] 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 𑁋 ‘𑀬𑀸𑀯𑀚𑀻𑀯𑀁 𑀅𑀘𑁂𑀮𑀓𑁄 𑀅𑀲𑁆𑀲𑀁, 𑀦 𑀯𑀢𑁆𑀣𑀁 𑀧𑀭𑀺𑀤𑀳𑁂𑀬𑁆𑀬𑀁, 𑀬𑀸𑀯𑀚𑀻𑀯𑀁 𑀩𑁆𑀭𑀳𑁆𑀫𑀘𑀸𑀭𑀻 𑀅𑀲𑁆𑀲𑀁, 𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀁, 𑀬𑀸𑀯𑀚𑀻𑀯𑀁 𑀲𑀼𑀭𑀸𑀫𑀁𑀲𑁂𑀦𑁂𑀯 𑀬𑀸𑀧𑁂𑀬𑁆𑀬𑀁, 𑀦 𑀑𑀤𑀦𑀓𑀼𑀫𑁆𑀫𑀸𑀲𑀁 𑀪𑀼𑀜𑁆𑀚𑁂𑀬𑁆𑀬𑀁. 𑀧𑀼𑀭𑀢𑁆𑀣𑀺𑀫𑁂𑀦 𑀯𑁂𑀲𑀸𑀮𑀺𑀁 𑀉𑀤𑁂𑀦𑀁 𑀦𑀸𑀫 𑀘𑁂𑀢𑀺𑀬𑀁, 𑀢𑀁 𑀦𑀸𑀢𑀺𑀓𑁆𑀓𑀫𑁂𑀬𑁆𑀬𑀁, 𑀤𑀓𑁆𑀔𑀺𑀡𑁂𑀦 𑀯𑁂𑀲𑀸𑀮𑀺𑀁 𑀕𑁄𑀢𑀫𑀓𑀁 𑀦𑀸𑀫 𑀘𑁂𑀢𑀺𑀬𑀁, 𑀢𑀁 𑀦𑀸𑀢𑀺𑀓𑁆𑀓𑀫𑁂𑀬𑁆𑀬𑀁, 𑀧𑀘𑁆𑀙𑀺𑀫𑁂𑀦 𑀯𑁂𑀲𑀸𑀮𑀺𑀁 𑀲𑀢𑁆𑀢𑀫𑁆𑀩𑀁 𑀦𑀸𑀫 𑀘𑁂𑀢𑀺𑀬𑀁, 𑀢𑀁 𑀦𑀸𑀢𑀺𑀓𑁆𑀓𑀫𑁂𑀬𑁆𑀬𑀁, 𑀉𑀢𑁆𑀢𑀭𑁂𑀦 𑀯𑁂𑀲𑀸𑀮𑀺𑀁 𑀩𑀳𑀼𑀧𑀼𑀢𑁆𑀢𑀁 𑀦𑀸𑀫 [𑀩𑀳𑀼𑀧𑀼𑀢𑁆𑀢𑀓𑀁 𑀦𑀸𑀫 (𑀲𑁆𑀬𑀸.)] 𑀘𑁂𑀢𑀺𑀬𑀁 𑀢𑀁 𑀦𑀸𑀢𑀺𑀓𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀲𑁄 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀯𑀢𑀧𑀤𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀘𑁂𑀯 𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀘 𑀯𑀚𑁆𑀚𑀺𑀕𑀸𑀫𑁂.

𑁧𑁨. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦 𑀅𑀘𑁂𑀮𑁄 𑀓𑀴𑀸𑀭𑀫𑀝𑁆𑀝𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑀁 𑀓𑀴𑀸𑀭𑀫𑀝𑁆𑀝𑀓𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺. 𑀢𑀲𑁆𑀲 𑀅𑀘𑁂𑀮𑁄 𑀓𑀴𑀸𑀭𑀫𑀝𑁆𑀝𑀓𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀲𑀫𑁆𑀧𑀸𑀬𑀸𑀲𑀺. 𑀅𑀲𑀫𑁆𑀧𑀸𑀬𑀦𑁆𑀢𑁄 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑁆𑀯𑀸𑀓𑀸𑀲𑀺. 𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀲𑀸𑀥𑀼𑀭𑀽𑀧𑀁 𑀯𑀢 𑀪𑁄 𑀅𑀭𑀳𑀦𑁆𑀢𑀁 𑀲𑀫𑀡𑀁 𑀆𑀲𑀸𑀤𑀺𑀫𑁆𑀳𑀲𑁂 [𑀅𑀲𑀸𑀤𑀺𑀬𑀺𑀫𑁆𑀳𑀲𑁂 (𑀲𑁆𑀬𑀸.)]. 𑀫𑀸 𑀯𑀢 𑀦𑁄 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’𑀢𑀺.

𑁧𑁩. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀳𑀁, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀢𑁆𑀯𑀫𑁆𑀧𑀺 𑀦𑀸𑀫, 𑀫𑁄𑀖𑀧𑀼𑀭𑀺𑀲, 𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀧𑀝𑀺𑀚𑀸𑀦𑀺𑀲𑁆𑀲𑀲𑀻’𑀢𑀺! ‘𑀓𑀺𑀁 𑀧𑀦 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀏𑀯𑀫𑀸𑀳 𑁋 𑀢𑁆𑀯𑀫𑁆𑀧𑀺 𑀦𑀸𑀫, 𑀫𑁄𑀖𑀧𑀼𑀭𑀺𑀲, 𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀧𑀝𑀺𑀚𑀸𑀦𑀺𑀲𑁆𑀲𑀲𑀻’𑀢𑀺? ‘𑀦𑀦𑀼 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀅𑀘𑁂𑀮𑀁 𑀓𑀴𑀸𑀭𑀫𑀝𑁆𑀝𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺. 𑀢𑀲𑁆𑀲 𑀢𑁂 𑀅𑀘𑁂𑀮𑁄 𑀓𑀴𑀸𑀭𑀫𑀝𑁆𑀝𑀓𑁄 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀲𑀫𑁆𑀧𑀸𑀬𑀸𑀲𑀺. 𑀅𑀲𑀫𑁆𑀧𑀸𑀬𑀦𑁆𑀢𑁄 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑁆𑀯𑀸𑀓𑀸𑀲𑀺. 𑀢𑀲𑁆𑀲 𑀢𑁂 𑀏𑀢𑀤𑀳𑁄𑀲𑀺 𑁋 ‘‘𑀲𑀸𑀥𑀼𑀭𑀽𑀧𑀁 𑀯𑀢, 𑀪𑁄, 𑀅𑀭𑀳𑀦𑁆𑀢𑀁 𑀲𑀫𑀡𑀁 𑀆𑀲𑀸𑀤𑀺𑀫𑁆𑀳𑀲𑁂. 𑀫𑀸 𑀯𑀢 𑀦𑁄 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’𑀢𑀺. ‘𑀏𑀯𑀁, 𑀪𑀦𑁆𑀢𑁂. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀅𑀭𑀳𑀢𑁆𑀢𑀲𑁆𑀲 𑀫𑀘𑁆𑀙𑀭𑀸𑀬𑀢𑀻’𑀢𑀺? ‘𑀦 𑀔𑁄 𑀅𑀳𑀁, 𑀫𑁄𑀖𑀧𑀼𑀭𑀺𑀲, 𑀅𑀭𑀳𑀢𑁆𑀢𑀲𑁆𑀲 𑀫𑀘𑁆𑀙𑀭𑀸𑀬𑀸𑀫𑀺, 𑀅𑀧𑀺 𑀘 𑀢𑀼𑀬𑁆𑀳𑁂𑀯𑁂𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁, 𑀢𑀁 𑀧𑀚𑀳. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬. 𑀬𑀁 𑀔𑁄 𑀧𑀦𑁂𑀢𑀁, 𑀲𑀼𑀦𑀓𑁆𑀔𑀢𑁆𑀢, 𑀫𑀜𑁆𑀜𑀲𑀺 𑀅𑀘𑁂𑀮𑀁 𑀓𑀴𑀸𑀭𑀫𑀝𑁆𑀝𑀓𑀁 𑁋 𑀲𑀸𑀥𑀼𑀭𑀽𑀧𑁄 𑀅𑀬𑀁 [𑀅𑀭𑀳𑀁 (𑀲𑁆𑀬𑀸.)] 𑀲𑀫𑀡𑁄𑀢𑀺, 𑀲𑁄 𑀦𑀘𑀺𑀭𑀲𑁆𑀲𑁂𑀯 𑀧𑀭𑀺𑀳𑀺𑀢𑁄 𑀲𑀸𑀦𑀼𑀘𑀸𑀭𑀺𑀓𑁄 𑀯𑀺𑀘𑀭𑀦𑁆𑀢𑁄 𑀑𑀤𑀦𑀓𑀼𑀫𑁆𑀫𑀸𑀲𑀁 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀸𑀦𑁂𑀯 𑀯𑁂𑀲𑀸𑀮𑀺𑀬𑀸𑀦𑀺 𑀘𑁂𑀢𑀺𑀬𑀸𑀦𑀺 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀲𑀸 𑀦𑀺𑀳𑀻𑀦𑁄 [𑀬𑀲𑀸𑀦𑀺𑀓𑀺𑀡𑁆𑀡𑁄 (𑀓.)] 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’𑀢𑀺.

‘‘‘𑀅𑀣 𑀔𑁄, 𑀪𑀕𑁆𑀕𑀯, 𑀅𑀘𑁂𑀮𑁄 𑀓𑀴𑀸𑀭𑀫𑀝𑁆𑀝𑀓𑁄 𑀦𑀘𑀺𑀭𑀲𑁆𑀲𑁂𑀯 𑀧𑀭𑀺𑀳𑀺𑀢𑁄 𑀲𑀸𑀦𑀼𑀘𑀸𑀭𑀺𑀓𑁄 𑀯𑀺𑀘𑀭𑀦𑁆𑀢𑁄 𑀑𑀤𑀦𑀓𑀼𑀫𑁆𑀫𑀸𑀲𑀁 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀸𑀦𑁂𑀯 𑀯𑁂𑀲𑀸𑀮𑀺𑀬𑀸𑀦𑀺 𑀘𑁂𑀢𑀺𑀬𑀸𑀦𑀺 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀲𑀸 𑀦𑀺𑀳𑀻𑀦𑁄 𑀓𑀸𑀮𑀫𑀓𑀸𑀲𑀺.

𑁧𑁪. ‘‘𑀅𑀲𑁆𑀲𑁄𑀲𑀺 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑁋 ‘𑀅𑀘𑁂𑀮𑁄 𑀓𑀺𑀭 𑀓𑀴𑀸𑀭𑀫𑀝𑁆𑀝𑀓𑁄 𑀧𑀭𑀺𑀳𑀺𑀢𑁄 𑀲𑀸𑀦𑀼𑀘𑀸𑀭𑀺𑀓𑁄 𑀯𑀺𑀘𑀭𑀦𑁆𑀢𑁄 𑀑𑀤𑀦𑀓𑀼𑀫𑁆𑀫𑀸𑀲𑀁 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀸𑀦𑁂𑀯 𑀯𑁂𑀲𑀸𑀮𑀺𑀬𑀸𑀦𑀺 𑀘𑁂𑀢𑀺𑀬𑀸𑀦𑀺 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀲𑀸 𑀦𑀺𑀳𑀻𑀦𑁄 𑀓𑀸𑀮𑀗𑁆𑀓𑀢𑁄’𑀢𑀺. 𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀳𑀁, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀬𑀣𑁂𑀯 𑀢𑁂 𑀅𑀳𑀁 𑀅𑀘𑁂𑀮𑀁 𑀓𑀴𑀸𑀭𑀫𑀝𑁆𑀝𑀓𑀁 𑀆𑀭𑀩𑁆𑀪 𑀩𑁆𑀬𑀸𑀓𑀸𑀲𑀺𑀁, 𑀢𑀣𑁂𑀯 𑀢𑀁 𑀯𑀺𑀧𑀸𑀓𑀁, 𑀅𑀜𑁆𑀜𑀣𑀸 𑀯𑀸’𑀢𑀺? ‘𑀬𑀣𑁂𑀯 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁂𑀮𑀁 𑀓𑀴𑀸𑀭𑀫𑀝𑁆𑀝𑀓𑀁 𑀆𑀭𑀩𑁆𑀪 𑀩𑁆𑀬𑀸𑀓𑀸𑀲𑀺, 𑀢𑀣𑁂𑀯 𑀢𑀁 𑀯𑀺𑀧𑀸𑀓𑀁, 𑀦𑁄 𑀅𑀜𑁆𑀜𑀣𑀸’𑀢𑀺. ‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀓𑀢𑀁 𑀯𑀸 𑀳𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀢𑀁 𑀯𑀸’𑀢𑀺? ‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀓𑀢𑀁 𑀳𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀦𑁄 𑀅𑀓𑀢’𑀦𑁆𑀢𑀺. ‘𑀏𑀯𑀫𑁆𑀧𑀺 𑀔𑁄 𑀫𑀁 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀁 𑀏𑀯𑀁 𑀯𑀤𑁂𑀲𑀺 𑁋 𑀦 𑀳𑀺 𑀧𑀦 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀻’’𑀢𑀺. 𑀧𑀲𑁆𑀲, 𑀫𑁄𑀖𑀧𑀼𑀭𑀺𑀲, 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥’𑀦𑁆𑀢𑀺. ‘‘𑀏𑀯’𑀫𑁆𑀧𑀺 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 𑀅𑀧𑀓𑁆𑀓𑀫𑁂𑀯 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀬𑀣𑀸 𑀢𑀁 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄.

𑀅𑀘𑁂𑀮𑀧𑀸𑀣𑀺𑀓𑀧𑀼𑀢𑁆𑀢𑀯𑀢𑁆𑀣𑀼

𑁧𑁫. ‘‘𑀏𑀓𑀫𑀺𑀤𑀸𑀳𑀁, 𑀪𑀕𑁆𑀕𑀯, 𑀲𑀫𑀬𑀁 𑀢𑀢𑁆𑀣𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 [𑀧𑀸𑀝𑀺𑀓𑀧𑀼𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀯𑁂𑀲𑀸𑀮𑀺𑀬𑀁 𑀧𑀝𑀺𑀯𑀲𑀢𑀺 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀘𑁂𑀯 𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀘 𑀯𑀚𑁆𑀚𑀺𑀕𑀸𑀫𑁂. 𑀲𑁄 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀲𑀫𑀡𑁄𑀧𑀺 𑀕𑁄𑀢𑀫𑁄 𑀜𑀸𑀡𑀯𑀸𑀤𑁄, 𑀅𑀳𑀫𑁆𑀧𑀺 𑀜𑀸𑀡𑀯𑀸𑀤𑁄. 𑀜𑀸𑀡𑀯𑀸𑀤𑁄 𑀔𑁄 𑀧𑀦 𑀜𑀸𑀡𑀯𑀸𑀤𑁂𑀦 𑀅𑀭𑀳𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀼𑀁. 𑀲𑀫𑀡𑁄 𑀕𑁄𑀢𑀫𑁄 𑀉𑀧𑀟𑁆𑀠𑀧𑀣𑀁 𑀆𑀕𑀘𑁆𑀙𑁂𑀬𑁆𑀬, 𑀅𑀳𑀫𑁆𑀧𑀺 𑀉𑀧𑀟𑁆𑀠𑀧𑀣𑀁 𑀕𑀘𑁆𑀙𑁂𑀬𑁆𑀬𑀁. 𑀢𑁂 𑀢𑀢𑁆𑀣 𑀉𑀪𑁄𑀧𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁂𑀬𑁆𑀬𑀸𑀫. 𑀏𑀓𑀁 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀤𑁆𑀯𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀤𑁆𑀯𑁂 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺, 𑀘𑀢𑁆𑀢𑀸𑀭𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀘𑀢𑁆𑀢𑀸𑀭𑀺 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺, 𑀅𑀝𑁆𑀞𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀇𑀢𑀺 𑀬𑀸𑀯𑀢𑀓𑀁 𑀬𑀸𑀯𑀢𑀓𑀁 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀸𑀳𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺.

𑁧𑁬. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀘𑁂𑀮𑁄, 𑀪𑀦𑁆𑀢𑁂, 𑀧𑀸𑀣𑀺𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀧𑀝𑀺𑀯𑀲𑀢𑀺 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀘𑁂𑀯 𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀘 𑀯𑀚𑁆𑀚𑀺𑀕𑀸𑀫𑁂. 𑀲𑁄 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀜𑀸𑀡𑀯𑀸𑀤𑁄, 𑀅𑀳𑀫𑁆𑀧𑀺 𑀜𑀸𑀡𑀯𑀸𑀤𑁄. 𑀜𑀸𑀡𑀯𑀸𑀤𑁄 𑀔𑁄 𑀧𑀦 𑀜𑀸𑀡𑀯𑀸𑀤𑁂𑀦 𑀅𑀭𑀳𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀼𑀁. 𑀲𑀫𑀡𑁄 𑀕𑁄𑀢𑀫𑁄 𑀉𑀧𑀟𑁆𑀠𑀧𑀣𑀁 𑀆𑀕𑀘𑁆𑀙𑁂𑀬𑁆𑀬, 𑀅𑀳𑀫𑁆𑀧𑀺 𑀉𑀧𑀟𑁆𑀠𑀧𑀣𑀁 𑀕𑀘𑁆𑀙𑁂𑀬𑁆𑀬𑀁. 𑀢𑁂 𑀢𑀢𑁆𑀣 𑀉𑀪𑁄𑀧𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁂𑀬𑁆𑀬𑀸𑀫. 𑀏𑀓𑀁 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀤𑁆𑀯𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀤𑁆𑀯𑁂 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺, 𑀘𑀢𑁆𑀢𑀸𑀭𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀘𑀢𑁆𑀢𑀸𑀭𑀺 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺, 𑀅𑀝𑁆𑀞𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀇𑀢𑀺 𑀬𑀸𑀯𑀢𑀓𑀁 𑀬𑀸𑀯𑀢𑀓𑀁 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀸𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀅𑀪𑀩𑁆𑀩𑁄 𑀔𑁄, 𑀲𑀼𑀦𑀓𑁆𑀔𑀢𑁆𑀢, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺.

𑁧𑁭. ‘𑀭𑀓𑁆𑀔𑀢𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀸 𑀯𑀸𑀘𑀁, 𑀭𑀓𑁆𑀔𑀢𑁂𑀢𑀁 𑀲𑀼𑀕𑀢𑁄 𑀯𑀸𑀘’𑀦𑁆𑀢𑀺. ‘𑀓𑀺𑀁 𑀧𑀦 𑀫𑀁 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀏𑀯𑀁 𑀯𑀤𑁂𑀲𑀺 𑁋 𑀭𑀓𑁆𑀔𑀢𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀸 𑀯𑀸𑀘𑀁, 𑀭𑀓𑁆𑀔𑀢𑁂𑀢𑀁 𑀲𑀼𑀕𑀢𑁄 𑀯𑀸𑀘’𑀦𑁆𑀢𑀺? ‘𑀪𑀕𑀯𑀢𑀸 𑀘𑀲𑁆𑀲, 𑀪𑀦𑁆𑀢𑁂, 𑀏𑀲𑀸 𑀯𑀸𑀘𑀸 𑀏𑀓𑀁𑀲𑁂𑀦 𑀑𑀥𑀸𑀭𑀺𑀢𑀸 [𑀑𑀯𑀸𑀤𑀺𑀢𑀸 (𑀓.)] 𑁋 𑀅𑀪𑀩𑁆𑀩𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸𑀢𑀺. 𑀅𑀘𑁂𑀮𑁄 𑀘, 𑀪𑀦𑁆𑀢𑁂, 𑀧𑀸𑀣𑀺𑀓𑀧𑀼𑀢𑁆𑀢𑁄 𑀯𑀺𑀭𑀽𑀧𑀭𑀽𑀧𑁂𑀦 𑀪𑀕𑀯𑀢𑁄 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑁂𑀬𑁆𑀬, 𑀢𑀤𑀲𑁆𑀲 𑀪𑀕𑀯𑀢𑁄 𑀫𑀼𑀲𑀸’𑀢𑀺.

𑁧𑁮. ‘𑀅𑀧𑀺 𑀦𑀼, 𑀲𑀼𑀦𑀓𑁆𑀔𑀢𑁆𑀢, 𑀢𑀣𑀸𑀕𑀢𑁄 𑀢𑀁 𑀯𑀸𑀘𑀁 𑀪𑀸𑀲𑁂𑀬𑁆𑀬 𑀬𑀸 𑀲𑀸 𑀯𑀸𑀘𑀸 𑀤𑁆𑀯𑀬𑀕𑀸𑀫𑀺𑀦𑀻’𑀢𑀺? ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀢𑀸 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑁋 𑀅𑀪𑀩𑁆𑀩𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺?

‘𑀉𑀤𑀸𑀳𑀼, 𑀤𑁂𑀯𑀢𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀪𑀩𑁆𑀩𑁄, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺?

𑁧𑁯. ‘𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀘𑁂𑀯 𑀫𑁂, 𑀲𑀼𑀦𑀓𑁆𑀔𑀢𑁆𑀢, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀅𑀪𑀩𑁆𑀩𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺.

‘𑀤𑁂𑀯𑀢𑀸𑀧𑀺 𑀫𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀪𑀩𑁆𑀩𑁄, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺.

‘𑀅𑀚𑀺𑀢𑁄𑀧𑀺 𑀦𑀸𑀫 𑀮𑀺𑀘𑁆𑀙𑀯𑀻𑀦𑀁 𑀲𑁂𑀦𑀸𑀧𑀢𑀺 𑀅𑀥𑀼𑀦𑀸 𑀓𑀸𑀮𑀗𑁆𑀓𑀢𑁄 𑀢𑀸𑀯𑀢𑀺𑀁𑀲𑀓𑀸𑀬𑀁 𑀉𑀧𑀧𑀦𑁆𑀦𑁄. 𑀲𑁄𑀧𑀺 𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀭𑁄𑀘𑁂𑀲𑀺 𑁋 𑀅𑀮𑀚𑁆𑀚𑀻, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄; 𑀫𑀼𑀲𑀸𑀯𑀸𑀤𑀻, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄. 𑀫𑀫𑁆𑀧𑀺, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀩𑁆𑀬𑀸𑀓𑀸𑀲𑀺 𑀯𑀚𑁆𑀚𑀺𑀕𑀸𑀫𑁂 𑁋 𑀅𑀚𑀺𑀢𑁄 𑀮𑀺𑀘𑁆𑀙𑀯𑀻𑀦𑀁 𑀲𑁂𑀦𑀸𑀧𑀢𑀺 𑀫𑀳𑀸𑀦𑀺𑀭𑀬𑀁 𑀉𑀧𑀧𑀦𑁆𑀦𑁄𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀫𑀳𑀸𑀦𑀺𑀭𑀬𑀁 𑀉𑀧𑀧𑀦𑁆𑀦𑁄; 𑀢𑀸𑀯𑀢𑀺𑀁𑀲𑀓𑀸𑀬𑀫𑁆𑀳𑀺 𑀉𑀧𑀧𑀦𑁆𑀦𑁄. 𑀅𑀮𑀚𑁆𑀚𑀻, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄; 𑀫𑀼𑀲𑀸𑀯𑀸𑀤𑀻, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄; 𑀅𑀪𑀩𑁆𑀩𑁄 𑀘, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺.

‘𑀇𑀢𑀺 𑀔𑁄, 𑀲𑀼𑀦𑀓𑁆𑀔𑀢𑁆𑀢, 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀘𑁂𑀯 𑀫𑁂 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀅𑀪𑀩𑁆𑀩𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸𑀢𑀺. 𑀤𑁂𑀯𑀢𑀸𑀧𑀺 𑀫𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 𑀅𑀪𑀩𑁆𑀩𑁄, 𑀪𑀦𑁆𑀢𑁂, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺.

‘𑀲𑁄 𑀔𑁄 𑀧𑀦𑀸𑀳𑀁, 𑀲𑀼𑀦𑀓𑁆𑀔𑀢𑁆𑀢, 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀅𑀘𑁂𑀮𑀲𑁆𑀲 𑀧𑀸𑀣𑀺𑀓𑀧𑀼𑀢𑁆𑀢𑀲𑁆𑀲 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀲𑀼𑀦𑀓𑁆𑀔𑀢𑁆𑀢, 𑀇𑀘𑁆𑀙𑀲𑀺, 𑀢𑀲𑁆𑀲 𑀆𑀭𑁄𑀘𑁂𑀳𑀻’𑀢𑀺.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀓𑀣𑀸

𑁨𑁦. ‘‘𑀅𑀣 𑀔𑁆𑀯𑀸𑀳𑀁 [𑀅𑀣 𑀔𑁄 𑀲𑁆𑀯𑀸𑀳𑀁 (𑀲𑁆𑀬𑀸.)], 𑀪𑀕𑁆𑀕𑀯, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀅𑀘𑁂𑀮𑀲𑁆𑀲 𑀧𑀸𑀣𑀺𑀓𑀧𑀼𑀢𑁆𑀢𑀲𑁆𑀲 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀢𑀭𑀫𑀸𑀦𑀭𑀽𑀧𑁄 𑀯𑁂𑀲𑀸𑀮𑀺𑀁 𑀧𑀯𑀺𑀲𑀺𑀢𑁆𑀯𑀸 𑀬𑁂𑀦 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀜𑁆𑀜𑀸𑀢𑁂 𑀅𑀪𑀺𑀜𑁆𑀜𑀸𑀢𑁂 𑀮𑀺𑀘𑁆𑀙𑀯𑀻 𑀏𑀢𑀤𑀯𑁄𑀘 𑁋 ‘𑀏𑀲𑀸𑀯𑀼𑀲𑁄, 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀅𑀘𑁂𑀮𑀲𑁆𑀲 𑀧𑀸𑀣𑀺𑀓𑀧𑀼𑀢𑁆𑀢𑀲𑁆𑀲 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀲𑀸𑀥𑀼𑀭𑀽𑀧𑀸𑀦𑀁 𑀲𑀫𑀡𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀅𑀣 𑀔𑁄, 𑀪𑀕𑁆𑀕𑀯, 𑀅𑀪𑀺𑀜𑁆𑀜𑀸𑀢𑀸𑀦𑀁 𑀅𑀪𑀺𑀜𑁆𑀜𑀸𑀢𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀏𑀢𑀤𑀳𑁄𑀲𑀺 𑁋 ‘𑀲𑀸𑀥𑀼𑀭𑀽𑀧𑀸𑀦𑀁 𑀓𑀺𑀭, 𑀪𑁄, 𑀲𑀫𑀡𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀺; 𑀳𑀦𑁆𑀤 𑀯𑀢, 𑀪𑁄, 𑀕𑀘𑁆𑀙𑀸𑀫𑀸’𑀢𑀺. 𑀬𑁂𑀦 𑀘 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 [𑀦𑀸𑀦𑀸𑀢𑀺𑀢𑁆𑀣𑀺𑀬 (𑀲𑁆𑀬𑀸.)] 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀜𑁆𑀜𑀸𑀢𑁂 𑀅𑀪𑀺𑀜𑁆𑀜𑀸𑀢𑁂 𑀦𑀸𑀦𑀸𑀢𑀺𑀢𑁆𑀣𑀺𑀬𑁂 [𑀦𑀸𑀦𑀸𑀢𑀺𑀢𑁆𑀣𑀺𑀬 (𑀲𑁆𑀬𑀸.)] 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀏𑀢𑀤𑀯𑁄𑀘 𑁋 ‘𑀏𑀲𑀸𑀯𑀼𑀲𑁄, 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀅𑀘𑁂𑀮𑀲𑁆𑀲 𑀧𑀸𑀣𑀺𑀓𑀧𑀼𑀢𑁆𑀢𑀲𑁆𑀲 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬. 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀲𑀸𑀥𑀼𑀭𑀽𑀧𑀸𑀦𑀁 𑀲𑀫𑀡𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀅𑀣 𑀔𑁄, 𑀪𑀕𑁆𑀕𑀯, 𑀅𑀪𑀺𑀜𑁆𑀜𑀸𑀢𑀸𑀦𑀁 𑀅𑀪𑀺𑀜𑁆𑀜𑀸𑀢𑀸𑀦𑀁 𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀲𑀸𑀥𑀼𑀭𑀽𑀧𑀸𑀦𑀁 𑀓𑀺𑀭, 𑀪𑁄, 𑀲𑀫𑀡𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀪𑀯𑀺𑀲𑁆𑀲𑀢𑀺; 𑀳𑀦𑁆𑀤 𑀯𑀢, 𑀪𑁄, 𑀕𑀘𑁆𑀙𑀸𑀫𑀸’𑀢𑀺.

‘‘𑀅𑀣 𑀔𑁄, 𑀪𑀕𑁆𑀕𑀯, 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻, 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀬𑁂𑀦 𑀅𑀘𑁂𑀮𑀲𑁆𑀲 𑀧𑀸𑀣𑀺𑀓𑀧𑀼𑀢𑁆𑀢𑀲𑁆𑀲 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀲𑀸 𑀏𑀲𑀸, 𑀪𑀕𑁆𑀕𑀯, 𑀧𑀭𑀺𑀲𑀸 𑀫𑀳𑀸 𑀳𑁄𑀢𑀺 [𑀧𑀭𑀺𑀲𑀸 𑀳𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀅𑀦𑁂𑀓𑀲𑀢𑀸 𑀅𑀦𑁂𑀓𑀲𑀳𑀲𑁆𑀲𑀸.

𑁨𑁧. ‘‘𑀅𑀲𑁆𑀲𑁄𑀲𑀺 𑀔𑁄, 𑀪𑀕𑁆𑀕𑀯, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑁋 ‘𑀅𑀪𑀺𑀓𑁆𑀓𑀦𑁆𑀢𑀸 𑀓𑀺𑀭 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀫𑀬𑁆𑀳𑀁 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄’𑀢𑀺. 𑀲𑀼𑀢𑁆𑀯𑀸𑀦𑀲𑁆𑀲 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀉𑀤𑀧𑀸𑀤𑀺. 𑀅𑀣 𑀔𑁄, 𑀪𑀕𑁆𑀕𑀯, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀬𑁂𑀦 𑀢𑀺𑀦𑁆𑀤𑀼𑀓𑀔𑀸𑀡𑀼𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

‘‘𑀅𑀲𑁆𑀲𑁄𑀲𑀺 𑀔𑁄, 𑀪𑀕𑁆𑀕𑀯, 𑀲𑀸 𑀧𑀭𑀺𑀲𑀸 𑁋 ‘𑀅𑀘𑁂𑀮𑁄 𑀓𑀺𑀭 𑀧𑀸𑀣𑀺𑀓𑀧𑀼𑀢𑁆𑀢𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀬𑁂𑀦 𑀢𑀺𑀦𑁆𑀤𑀼𑀓𑀔𑀸𑀡𑀼𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀦𑁆𑀢𑁄’𑀢𑀺 [𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑁄 (𑀲𑀻. 𑀧𑀻. 𑀓.)]. 𑀅𑀣 𑀔𑁄, 𑀪𑀕𑁆𑀕𑀯, 𑀲𑀸 𑀧𑀭𑀺𑀲𑀸 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋

‘𑀏𑀳𑀺 𑀢𑁆𑀯𑀁, 𑀪𑁄 𑀧𑀼𑀭𑀺𑀲, 𑀬𑁂𑀦 𑀢𑀺𑀦𑁆𑀤𑀼𑀓𑀔𑀸𑀡𑀼𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄, 𑀬𑁂𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀏𑀯𑀁 𑀯𑀤𑁂𑀳𑀺 𑁋 𑀅𑀪𑀺𑀓𑁆𑀓𑀫𑀸𑀯𑀼𑀲𑁄, 𑀧𑀸𑀣𑀺𑀓𑀧𑀼𑀢𑁆𑀢, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄; 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂 𑀏𑀲𑀸, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀯𑀸𑀘𑀸 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀜𑀸𑀡𑀯𑀸𑀤𑁄, 𑀅𑀳𑀫𑁆𑀧𑀺 𑀜𑀸𑀡𑀯𑀸𑀤𑁄. 𑀜𑀸𑀡𑀯𑀸𑀤𑁄 𑀔𑁄 𑀧𑀦 𑀜𑀸𑀡𑀯𑀸𑀤𑁂𑀦 𑀅𑀭𑀳𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀼𑀁. 𑀲𑀫𑀡𑁄 𑀕𑁄𑀢𑀫𑁄 𑀉𑀧𑀟𑁆𑀠𑀧𑀣𑀁 𑀆𑀕𑀘𑁆𑀙𑁂𑀬𑁆𑀬 𑀅𑀳𑀫𑁆𑀧𑀺 𑀉𑀧𑀟𑁆𑀠𑀧𑀣𑀁 𑀕𑀘𑁆𑀙𑁂𑀬𑁆𑀬𑀁. 𑀢𑁂 𑀢𑀢𑁆𑀣 𑀉𑀪𑁄𑀧𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁂𑀬𑁆𑀬𑀸𑀫. 𑀏𑀓𑀁 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀤𑁆𑀯𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀤𑁆𑀯𑁂 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺, 𑀘𑀢𑁆𑀢𑀸𑀭𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀘𑀢𑁆𑀢𑀸𑀭𑀺 𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺, 𑀅𑀝𑁆𑀞𑀸𑀳𑀁 𑀓𑀭𑀺𑀲𑁆𑀲𑀸𑀫𑀺. 𑀇𑀢𑀺 𑀬𑀸𑀯𑀢𑀓𑀁 𑀬𑀸𑀯𑀢𑀓𑀁 𑀲𑀫𑀡𑁄 𑀕𑁄𑀢𑀫𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀸𑀳𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀅𑀪𑀺𑀓𑁆𑀓𑀫𑀲𑁆𑀲𑁂𑀯 [𑀅𑀪𑀺𑀓𑁆𑀓𑀫𑀬𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀔𑁄; 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀉𑀧𑀟𑁆𑀠𑀧𑀣𑀁. 𑀲𑀩𑁆𑀩𑀧𑀞𑀫𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄’𑀢𑀺.

𑁨𑁨. ‘‘𑀏𑀯𑀁, 𑀪𑁄𑀢𑀺 𑀔𑁄, 𑀪𑀕𑁆𑀕𑀯, 𑀲𑁄 𑀧𑀼𑀭𑀺𑀲𑁄 𑀢𑀲𑁆𑀲𑀸 𑀧𑀭𑀺𑀲𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀢𑀺𑀦𑁆𑀤𑀼𑀓𑀔𑀸𑀡𑀼𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄, 𑀬𑁂𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀅𑀪𑀺𑀓𑁆𑀓𑀫𑀸𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄. 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂 𑀏𑀲𑀸, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀯𑀸𑀘𑀸 𑁋 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀜𑀸𑀡𑀯𑀸𑀤𑁄; 𑀅𑀳𑀫𑁆𑀧𑀺 𑀜𑀸𑀡𑀯𑀸𑀤𑁄. 𑀜𑀸𑀡𑀯𑀸𑀤𑁄 𑀔𑁄 𑀧𑀦 𑀜𑀸𑀡𑀯𑀸𑀤𑁂𑀦 𑀅𑀭𑀳𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀼𑀁…𑀧𑁂… 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀸𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀅𑀪𑀺𑀓𑁆𑀓𑀫𑀲𑁆𑀲𑁂𑀯 𑀔𑁄, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀉𑀧𑀟𑁆𑀠𑀧𑀣𑀁. 𑀲𑀩𑁆𑀩𑀧𑀞𑀫𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀕𑁆𑀕𑀯, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 ‘𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺 [𑀲𑀁𑀲𑀩𑁆𑀩𑀢𑀺 (𑀓.)], 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼𑀁. 𑀅𑀣 𑀔𑁄 𑀲𑁄, 𑀪𑀕𑁆𑀕𑀯, 𑀧𑀼𑀭𑀺𑀲𑁄 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀓𑀺𑀁 𑀲𑀼 𑀦𑀸𑀫 𑀢𑁂, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀧𑀸𑀯𑀴𑀸 𑀲𑀼 𑀦𑀸𑀫 𑀢𑁂 𑀧𑀻𑀞𑀓𑀲𑁆𑀫𑀺𑀁 𑀅𑀮𑁆𑀮𑀻𑀦𑀸, 𑀧𑀻𑀞𑀓𑀁 𑀲𑀼 𑀦𑀸𑀫 𑀢𑁂 𑀧𑀸𑀯𑀴𑀸𑀲𑀼 𑀅𑀮𑁆𑀮𑀻𑀦𑀁? 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀲𑀺, 𑀦 𑀲𑀓𑁆𑀓𑁄𑀲𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀕𑁆𑀕𑀯, 𑀯𑀼𑀘𑁆𑀘𑀫𑀸𑀦𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 ‘𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼𑀁.

𑁨𑁩. ‘‘𑀬𑀤𑀸 𑀔𑁄 𑀲𑁄, 𑀪𑀕𑁆𑀕𑀯, 𑀧𑀼𑀭𑀺𑀲𑁄 𑀅𑀜𑁆𑀜𑀸𑀲𑀺 𑁋 ‘𑀧𑀭𑀸𑀪𑀽𑀢𑀭𑀽𑀧𑁄 𑀅𑀬𑀁 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄. 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺. 𑀅𑀣 𑀢𑀁 𑀧𑀭𑀺𑀲𑀁 𑀆𑀕𑀦𑁆𑀢𑁆𑀯𑀸 𑀏𑀯𑀫𑀸𑀭𑁄𑀘𑁂𑀲𑀺 𑁋 ‘𑀧𑀭𑀸𑀪𑀽𑀢𑀭𑀽𑀧𑁄, 𑀪𑁄 [𑀧𑀭𑀸𑀪𑀽𑀢𑀭𑀽𑀧𑁄 𑀪𑁄 𑀅𑀬𑀁 (𑀲𑁆𑀬𑀸. 𑀓.), 𑀧𑀭𑀸𑀪𑀽𑀢𑀭𑀽𑀧𑁄 (𑀲𑀻. 𑀧𑀻.)], 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄. 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀕𑁆𑀕𑀯, 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘𑀁 𑁋 ‘𑀅𑀪𑀩𑁆𑀩𑁄 𑀔𑁄, 𑀆𑀯𑀼𑀲𑁄, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬’𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨𑁪. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀅𑀜𑁆𑀜𑀢𑀭𑁄 𑀮𑀺𑀘𑁆𑀙𑀯𑀺𑀫𑀳𑀸𑀫𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘 𑁋 ‘𑀢𑁂𑀦 𑀳𑀺, 𑀪𑁄, 𑀫𑀼𑀳𑀼𑀢𑁆𑀢𑀁 𑀢𑀸𑀯 𑀆𑀕𑀫𑁂𑀣, 𑀬𑀸𑀯𑀸𑀳𑀁 𑀕𑀘𑁆𑀙𑀸𑀫𑀺 [𑀧𑀘𑁆𑀘𑀸𑀕𑀘𑁆𑀙𑀸𑀫𑀺 (?)]. 𑀅𑀧𑁆𑀧𑁂𑀯 𑀦𑀸𑀫 𑀅𑀳𑀫𑁆𑀧𑀺 𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀇𑀫𑀁 𑀧𑀭𑀺𑀲𑀁 𑀆𑀦𑁂𑀢𑀼’𑀦𑁆𑀢𑀺.

‘‘𑀅𑀣 𑀔𑁄 𑀲𑁄, 𑀪𑀕𑁆𑀕𑀯, 𑀮𑀺𑀘𑁆𑀙𑀯𑀺𑀫𑀳𑀸𑀫𑀢𑁆𑀢𑁄 𑀬𑁂𑀦 𑀢𑀺𑀦𑁆𑀤𑀼𑀓𑀔𑀸𑀡𑀼𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄, 𑀬𑁂𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀅𑀪𑀺𑀓𑁆𑀓𑀫𑀸𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀅𑀪𑀺𑀓𑁆𑀓𑀦𑁆𑀢𑀁 𑀢𑁂 𑀲𑁂𑀬𑁆𑀬𑁄, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄. 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂 𑀏𑀲𑀸, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀯𑀸𑀘𑀸 𑁋 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀜𑀸𑀡𑀯𑀸𑀤𑁄…𑀧𑁂… 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀸𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀅𑀪𑀺𑀓𑁆𑀓𑀫𑀲𑁆𑀲𑁂𑀯 𑀔𑁄, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀉𑀧𑀟𑁆𑀠𑀧𑀣𑀁. 𑀲𑀩𑁆𑀩𑀧𑀞𑀫𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀭𑀺𑀲𑀢𑀺 𑀯𑀸𑀘𑀸 𑁋 𑀅𑀪𑀩𑁆𑀩𑁄 𑀔𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸𑀢𑀺. 𑀅𑀪𑀺𑀓𑁆𑀓𑀫𑀸𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀅𑀪𑀺𑀓𑁆𑀓𑀫𑀦𑁂𑀦𑁂𑀯 𑀢𑁂 𑀚𑀬𑀁 𑀓𑀭𑀺𑀲𑁆𑀲𑀸𑀫, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀸𑀚𑀬’𑀦𑁆𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀕𑁆𑀕𑀯, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 ‘𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼𑀁. 𑀅𑀣 𑀔𑁄 𑀲𑁄, 𑀪𑀕𑁆𑀕𑀯, 𑀮𑀺𑀘𑁆𑀙𑀯𑀺𑀫𑀳𑀸𑀫𑀢𑁆𑀢𑁄 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀓𑀺𑀁 𑀲𑀼 𑀦𑀸𑀫 𑀢𑁂, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀧𑀸𑀯𑀴𑀸 𑀲𑀼 𑀦𑀸𑀫 𑀢𑁂 𑀧𑀻𑀞𑀓𑀲𑁆𑀫𑀺𑀁 𑀅𑀮𑁆𑀮𑀻𑀦𑀸, 𑀧𑀻𑀞𑀓𑀁 𑀲𑀼 𑀦𑀸𑀫 𑀢𑁂 𑀧𑀸𑀯𑀴𑀸𑀲𑀼 𑀅𑀮𑁆𑀮𑀻𑀦𑀁? 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀲𑀺, 𑀦 𑀲𑀓𑁆𑀓𑁄𑀲𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀕𑁆𑀕𑀯, 𑀯𑀼𑀘𑁆𑀘𑀫𑀸𑀦𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 ‘𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼𑀁.

𑁨𑁫. ‘‘𑀬𑀤𑀸 𑀔𑁄 𑀲𑁄, 𑀪𑀕𑁆𑀕𑀯, 𑀮𑀺𑀘𑁆𑀙𑀯𑀺𑀫𑀳𑀸𑀫𑀢𑁆𑀢𑁄 𑀅𑀜𑁆𑀜𑀸𑀲𑀺 𑁋 ‘𑀧𑀭𑀸𑀪𑀽𑀢𑀭𑀽𑀧𑁄 𑀅𑀬𑀁 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺. 𑀅𑀣 𑀢𑀁 𑀧𑀭𑀺𑀲𑀁 𑀆𑀕𑀦𑁆𑀢𑁆𑀯𑀸 𑀏𑀯𑀫𑀸𑀭𑁄𑀘𑁂𑀲𑀺 𑁋 ‘𑀧𑀭𑀸𑀪𑀽𑀢𑀭𑀽𑀧𑁄, 𑀪𑁄 [𑀧𑀭𑀸𑀪𑀽𑀢𑀭𑀽𑀧𑁄 (𑀲𑀻. 𑀧𑀻.), 𑀧𑀭𑀸𑀪𑀽𑀢𑀭𑀽𑀧𑁄 𑀅𑀬𑀁 (𑀲𑁆𑀬𑀸.)], 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀕𑁆𑀕𑀯, 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘𑀁 𑁋 ‘𑀅𑀪𑀩𑁆𑀩𑁄 𑀔𑁄, 𑀆𑀯𑀼𑀲𑁄, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬. 𑀲𑀘𑁂 𑀧𑀸𑀬𑀲𑁆𑀫𑀦𑁆𑀢𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀏𑀯𑀫𑀲𑁆𑀲 𑁋 𑀫𑀬𑀁 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀯𑀭𑀢𑁆𑀢𑀸𑀳𑀺 [𑀬𑀸𑀳𑀺 𑀯𑀭𑀢𑁆𑀢𑀸𑀳𑀺 (𑀲𑁆𑀬𑀸. 𑀓.)] 𑀩𑀦𑁆𑀥𑀺𑀢𑁆𑀯𑀸 𑀕𑁄𑀬𑀼𑀕𑁂𑀳𑀺 𑀆𑀯𑀺𑀜𑁆𑀙𑁂𑀬𑁆𑀬𑀸𑀫𑀸𑀢𑀺 [𑀆𑀯𑀺𑀜𑁆𑀚𑁂𑀬𑁆𑀬𑀸𑀫𑀸𑀢𑀺 (𑀲𑁆𑀬𑀸.), 𑀆𑀯𑀺𑀚𑁆𑀛𑁂𑀬𑁆𑀬𑀸𑀫𑀸𑀢𑀺 (𑀲𑀻. 𑀧𑀻.)], 𑀢𑀸 𑀯𑀭𑀢𑁆𑀢𑀸 𑀙𑀺𑀚𑁆𑀚𑁂𑀬𑁆𑀬𑀼𑀁 𑀧𑀸𑀣𑀺𑀓𑀧𑀼𑀢𑁆𑀢𑁄 𑀯𑀸. 𑀅𑀪𑀩𑁆𑀩𑁄 𑀧𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺.

𑁨𑁬. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀉𑀝𑁆𑀞𑀸𑀬𑀸𑀲𑀦𑀸 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘 𑁋 ‘𑀢𑁂𑀦 𑀳𑀺, 𑀪𑁄, 𑀫𑀼𑀳𑀼𑀢𑁆𑀢𑀁 𑀢𑀸𑀯 𑀆𑀕𑀫𑁂𑀣, 𑀬𑀸𑀯𑀸𑀳𑀁 𑀕𑀘𑁆𑀙𑀸𑀫𑀺; 𑀅𑀧𑁆𑀧𑁂𑀯 𑀦𑀸𑀫 𑀅𑀳𑀫𑁆𑀧𑀺 𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀇𑀫𑀁 𑀧𑀭𑀺𑀲𑀁 𑀆𑀦𑁂𑀢𑀼’’𑀦𑁆𑀢𑀺.

‘‘𑀅𑀣 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀬𑁂𑀦 𑀢𑀺𑀦𑁆𑀤𑀼𑀓𑀔𑀸𑀡𑀼𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄, 𑀬𑁂𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀅𑀪𑀺𑀓𑁆𑀓𑀫𑀸𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀅𑀪𑀺𑀓𑁆𑀓𑀦𑁆𑀢𑀁 𑀢𑁂 𑀲𑁂𑀬𑁆𑀬𑁄. 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀮𑀺𑀘𑁆𑀙𑀯𑀻, 𑀅𑀪𑀺𑀓𑁆𑀓𑀦𑁆𑀢𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄. 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂 𑀏𑀲𑀸, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀯𑁂𑀲𑀸𑀮𑀺𑀬𑀁 𑀧𑀭𑀺𑀲𑀢𑀺 𑀯𑀸𑀘𑀸 𑁋 𑀲𑀫𑀡𑁄𑀧𑀺 𑀕𑁄𑀢𑀫𑁄 𑀜𑀸𑀡𑀯𑀸𑀤𑁄…𑀧𑁂… 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀸𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀅𑀪𑀺𑀓𑁆𑀓𑀫𑀲𑁆𑀲𑁂𑀯, 𑀔𑁄 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀉𑀧𑀟𑁆𑀠𑀧𑀣𑀁. 𑀲𑀩𑁆𑀩𑀧𑀞𑀫𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀆𑀬𑀲𑁆𑀫𑀢𑁄 𑀆𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀭𑀺𑀲𑀢𑀺 𑀯𑀸𑀘𑀸 𑁋 𑀅𑀪𑀩𑁆𑀩𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬. 𑀲𑀘𑁂 𑀧𑀸𑀬𑀲𑁆𑀫𑀦𑁆𑀢𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀏𑀯𑀫𑀲𑁆𑀲 𑁋 𑀫𑀬𑀁 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀯𑀭𑀢𑁆𑀢𑀸𑀳𑀺 𑀩𑀦𑁆𑀥𑀺𑀢𑁆𑀯𑀸 𑀕𑁄𑀬𑀼𑀕𑁂𑀳𑀺 𑀆𑀯𑀺𑀜𑁆𑀙𑁂𑀬𑁆𑀬𑀸𑀫𑀸𑀢𑀺. 𑀢𑀸 𑀯𑀭𑀢𑁆𑀢𑀸 𑀙𑀺𑀚𑁆𑀚𑁂𑀬𑁆𑀬𑀼𑀁 𑀧𑀸𑀣𑀺𑀓𑀧𑀼𑀢𑁆𑀢𑁄 𑀯𑀸. 𑀅𑀪𑀩𑁆𑀩𑁄 𑀧𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸𑀢𑀺. 𑀅𑀪𑀺𑀓𑁆𑀓𑀫𑀸𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀅𑀪𑀺𑀓𑁆𑀓𑀫𑀦𑁂𑀦𑁂𑀯 𑀢𑁂 𑀚𑀬𑀁 𑀓𑀭𑀺𑀲𑁆𑀲𑀸𑀫, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀸𑀚𑀬’𑀦𑁆𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀕𑁆𑀕𑀯, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 ‘𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼𑀁. 𑀅𑀣 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀓𑀺𑀁 𑀲𑀼 𑀦𑀸𑀫 𑀢𑁂, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀧𑀸𑀯𑀴𑀸 𑀲𑀼 𑀦𑀸𑀫 𑀢𑁂 𑀧𑀻𑀞𑀓𑀲𑁆𑀫𑀺𑀁 𑀅𑀮𑁆𑀮𑀻𑀦𑀸, 𑀧𑀻𑀞𑀓𑀁 𑀲𑀼 𑀦𑀸𑀫 𑀢𑁂 𑀧𑀸𑀯𑀴𑀸𑀲𑀼 𑀅𑀮𑁆𑀮𑀻𑀦𑀁? 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀲𑀺, 𑀦 𑀲𑀓𑁆𑀓𑁄𑀲𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀕𑁆𑀕𑀯, 𑀯𑀼𑀘𑁆𑀘𑀫𑀸𑀦𑁄 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 ‘‘𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼𑀦𑁆𑀢𑀺.

𑁨𑁭. ‘‘𑀬𑀤𑀸 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀅𑀜𑁆𑀜𑀸𑀲𑀺 𑁋 ‘𑀧𑀭𑀸𑀪𑀽𑀢𑀭𑀽𑀧𑁄 𑀅𑀬𑀁 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 ‘𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺, 𑀅𑀣 𑀦𑀁 𑀏𑀢𑀤𑀯𑁄𑀘 𑁋

‘𑀪𑀽𑀢𑀧𑀼𑀩𑁆𑀩𑀁, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀻𑀳𑀲𑁆𑀲 𑀫𑀺𑀕𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 𑀬𑀁𑀦𑀽𑀦𑀸𑀳𑀁 𑀅𑀜𑁆𑀜𑀢𑀭𑀁 𑀯𑀦𑀲𑀡𑁆𑀟𑀁 𑀦𑀺𑀲𑁆𑀲𑀸𑀬 𑀆𑀲𑀬𑀁 𑀓𑀧𑁆𑀧𑁂𑀬𑁆𑀬𑀁. 𑀢𑀢𑁆𑀭𑀸𑀲𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑁂𑀬𑁆𑀬𑀁, 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑁂𑀬𑁆𑀬𑀁, 𑀯𑀺𑀚𑀫𑁆𑀪𑀺𑀢𑁆𑀯𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀬𑁆𑀬𑀁, 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑁂𑀬𑁆𑀬𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑁂𑀬𑁆𑀬𑀁. 𑀲𑁄 𑀯𑀭𑀁 𑀯𑀭𑀁 𑀫𑀺𑀕𑀲𑀁𑀖𑁂 [𑀫𑀺𑀕𑀲𑀁𑀖𑀁 (𑀲𑁆𑀬𑀸. 𑀓.)] 𑀯𑀥𑀺𑀢𑁆𑀯𑀸 𑀫𑀼𑀤𑀼𑀫𑀁𑀲𑀸𑀦𑀺 𑀫𑀼𑀤𑀼𑀫𑀁𑀲𑀸𑀦𑀺 𑀪𑀓𑁆𑀔𑀬𑀺𑀢𑁆𑀯𑀸 𑀢𑀫𑁂𑀯 𑀆𑀲𑀬𑀁 𑀅𑀚𑁆𑀛𑀼𑀧𑁂𑀬𑁆𑀬’𑀦𑁆𑀢𑀺.

‘𑀅𑀣 𑀔𑁄, 𑀆𑀯𑀼𑀲𑁄, 𑀲𑁄 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀅𑀜𑁆𑀜𑀢𑀭𑀁 𑀯𑀦𑀲𑀡𑁆𑀟𑀁 𑀦𑀺𑀲𑁆𑀲𑀸𑀬 𑀆𑀲𑀬𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀭𑀸𑀲𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑀺, 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀺, 𑀯𑀺𑀚𑀫𑁆𑀪𑀺𑀢𑁆𑀯𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀺, 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀸𑀫𑀺. 𑀲𑁄 𑀯𑀭𑀁 𑀯𑀭𑀁 𑀫𑀺𑀕𑀲𑀗𑁆𑀖𑁂 𑀯𑀥𑀺𑀢𑁆𑀯𑀸 𑀫𑀼𑀤𑀼𑀫𑀁𑀲𑀸𑀦𑀺 𑀫𑀼𑀤𑀼𑀫𑀁𑀲𑀸𑀦𑀺 𑀪𑀓𑁆𑀔𑀬𑀺𑀢𑁆𑀯𑀸 𑀢𑀫𑁂𑀯 𑀆𑀲𑀬𑀁 𑀅𑀚𑁆𑀛𑀼𑀧𑁂𑀲𑀺.

𑁨𑁮. ‘𑀢𑀲𑁆𑀲𑁂𑀯 𑀔𑁄, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀻𑀳𑀲𑁆𑀲 𑀫𑀺𑀕𑀭𑀜𑁆𑀜𑁄 𑀯𑀺𑀖𑀸𑀲𑀲𑀁𑀯𑀟𑁆𑀠𑁄 𑀚𑀭𑀲𑀺𑀗𑁆𑀕𑀸𑀮𑁄 [𑀚𑀭𑀲𑀺𑀕𑀸𑀮𑁄 (𑀲𑀻. 𑀲𑁆𑀬𑀸. 𑀧𑀻.)] 𑀤𑀺𑀢𑁆𑀢𑁄 𑀘𑁂𑀯 𑀩𑀮𑀯𑀸 𑀘. 𑀅𑀣 𑀔𑁄, 𑀆𑀯𑀼𑀲𑁄, 𑀢𑀲𑁆𑀲 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 𑀓𑁄 𑀘𑀸𑀳𑀁, 𑀓𑁄 𑀲𑀻𑀳𑁄 𑀫𑀺𑀕𑀭𑀸𑀚𑀸. 𑀬𑀁𑀦𑀽𑀦𑀸𑀳𑀫𑁆𑀧𑀺 𑀅𑀜𑁆𑀜𑀢𑀭𑀁 𑀯𑀦𑀲𑀡𑁆𑀟𑀁 𑀦𑀺𑀲𑁆𑀲𑀸𑀬 𑀆𑀲𑀬𑀁 𑀓𑀧𑁆𑀧𑁂𑀬𑁆𑀬𑀁. 𑀢𑀢𑁆𑀭𑀸𑀲𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑁂𑀬𑁆𑀬𑀁, 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑁂𑀬𑁆𑀬𑀁, 𑀯𑀺𑀚𑀫𑁆𑀪𑀺𑀢𑁆𑀯𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀬𑁆𑀬𑀁, 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑁂𑀬𑁆𑀬𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑁂𑀬𑁆𑀬𑀁. 𑀲𑁄 𑀯𑀭𑀁 𑀯𑀭𑀁 𑀫𑀺𑀕𑀲𑀗𑁆𑀖𑁂 𑀯𑀥𑀺𑀢𑁆𑀯𑀸 𑀫𑀼𑀤𑀼𑀫𑀁𑀲𑀸𑀦𑀺 𑀫𑀼𑀤𑀼𑀫𑀁𑀲𑀸𑀦𑀺 𑀪𑀓𑁆𑀔𑀬𑀺𑀢𑁆𑀯𑀸 𑀢𑀫𑁂𑀯 𑀆𑀲𑀬𑀁 𑀅𑀚𑁆𑀛𑀼𑀧𑁂𑀬𑁆𑀬’𑀦𑁆𑀢𑀺.

‘𑀅𑀣 𑀔𑁄 𑀲𑁄, 𑀆𑀯𑀼𑀲𑁄, 𑀚𑀭𑀲𑀺𑀗𑁆𑀕𑀸𑀮𑁄 𑀅𑀜𑁆𑀜𑀢𑀭𑀁 𑀯𑀦𑀲𑀡𑁆𑀟𑀁 𑀦𑀺𑀲𑁆𑀲𑀸𑀬 𑀆𑀲𑀬𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀭𑀸𑀲𑀬𑀁 𑀓𑀧𑁆𑀧𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀆𑀲𑀬𑀸 𑀦𑀺𑀓𑁆𑀔𑀫𑀺, 𑀆𑀲𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀚𑀫𑁆𑀪𑀺, 𑀯𑀺𑀚𑀫𑁆𑀪𑀺𑀢𑁆𑀯𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀺, 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀸𑀫𑀻𑀢𑀺 𑀲𑀺𑀗𑁆𑀕𑀸𑀮𑀓𑀁𑀬𑁂𑀯 𑀅𑀦𑀤𑀺 𑀪𑁂𑀭𑀡𑁆𑀟𑀓𑀁𑀬𑁂𑀯 [𑀪𑁂𑀤𑀡𑁆𑀟𑀓𑀁𑀬𑁂𑀯 (𑀓.)] 𑀅𑀦𑀤𑀺, 𑀓𑁂 𑀘 𑀙𑀯𑁂 𑀲𑀺𑀗𑁆𑀕𑀸𑀮𑁂, 𑀓𑁂 𑀧𑀦 𑀲𑀻𑀳𑀦𑀸𑀤𑁂𑀢𑀺 [𑀲𑀻𑀳𑀦𑀸𑀤𑁂 (?)].

‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀼𑀕𑀢𑀸𑀧𑀤𑀸𑀦𑁂𑀲𑀼 𑀚𑀻𑀯𑀫𑀸𑀦𑁄 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀸𑀦𑀺 𑀪𑀼𑀜𑁆𑀚𑀫𑀸𑀦𑁄 𑀢𑀣𑀸𑀕𑀢𑁂 𑀅𑀭𑀳𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀆𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑀲𑀺. 𑀓𑁂 𑀘 𑀙𑀯𑁂 𑀧𑀸𑀣𑀺𑀓𑀧𑀼𑀢𑁆𑀢𑁂, 𑀓𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀆𑀲𑀸𑀤𑀦𑀸’𑀢𑀺.

𑁨𑁯. ‘‘𑀬𑀢𑁄 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀇𑀫𑀺𑀦𑀸 𑀑𑀧𑀫𑁆𑀫𑁂𑀦 𑀦𑁂𑀯 𑀅𑀲𑀓𑁆𑀔𑀺 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀢𑀫𑁆𑀳𑀸 𑀆𑀲𑀦𑀸 𑀘𑀸𑀯𑁂𑀢𑀼𑀁. 𑀅𑀣 𑀦𑀁 𑀏𑀢𑀤𑀯𑁄𑀘 𑁋

‘𑀲𑀻𑀳𑁄𑀢𑀺 𑀅𑀢𑁆𑀢𑀸𑀦𑀁 𑀲𑀫𑁂𑀓𑁆𑀔𑀺𑀬𑀸𑀦,

𑀅𑀫𑀜𑁆𑀜𑀺 𑀓𑁄𑀢𑁆𑀣𑀼 𑀫𑀺𑀕𑀭𑀸𑀚𑀸𑀳𑀫𑀲𑁆𑀫𑀺;

𑀢𑀣𑁂𑀯 [𑀢𑀫𑁂𑀯 (𑀲𑁆𑀬𑀸.)] 𑀲𑁄 𑀲𑀺𑀗𑁆𑀕𑀸𑀮𑀓𑀁 𑀅𑀦𑀤𑀺,

𑀓𑁂 𑀘 𑀙𑀯𑁂 𑀲𑀺𑀗𑁆𑀕𑀸𑀮𑁂 𑀓𑁂 𑀧𑀦 𑀲𑀻𑀳𑀦𑀸𑀤𑁂’𑀢𑀺.

‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀼𑀕𑀢𑀸𑀧𑀤𑀸𑀦𑁂𑀲𑀼 𑀚𑀻𑀯𑀫𑀸𑀦𑁄 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀸𑀦𑀺 𑀪𑀼𑀜𑁆𑀚𑀫𑀸𑀦𑁄 𑀢𑀣𑀸𑀕𑀢𑁂 𑀅𑀭𑀳𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀆𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑀲𑀺. 𑀓𑁂 𑀘 𑀙𑀯𑁂 𑀧𑀸𑀣𑀺𑀓𑀧𑀼𑀢𑁆𑀢𑁂, 𑀓𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀆𑀲𑀸𑀤𑀦𑀸’𑀢𑀺.

𑁩𑁦. ‘‘𑀬𑀢𑁄 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀇𑀫𑀺𑀦𑀸𑀧𑀺 𑀑𑀧𑀫𑁆𑀫𑁂𑀦 𑀦𑁂𑀯 𑀅𑀲𑀓𑁆𑀔𑀺 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀢𑀫𑁆𑀳𑀸 𑀆𑀲𑀦𑀸 𑀘𑀸𑀯𑁂𑀢𑀼𑀁. 𑀅𑀣 𑀦𑀁 𑀏𑀢𑀤𑀯𑁄𑀘 𑁋

‘𑀅𑀜𑁆𑀜𑀁 𑀅𑀦𑀼𑀘𑀗𑁆𑀓𑀫𑀦𑀁, 𑀅𑀢𑁆𑀢𑀸𑀦𑀁 𑀯𑀺𑀖𑀸𑀲𑁂 𑀲𑀫𑁂𑀓𑁆𑀔𑀺𑀬;

𑀬𑀸𑀯 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺, 𑀓𑁄𑀢𑁆𑀣𑀼 𑀢𑀸𑀯 𑀩𑁆𑀬𑀕𑁆𑀖𑁄𑀢𑀺 𑀫𑀜𑁆𑀜𑀢𑀺.

𑀢𑀣𑁂𑀯 𑀲𑁄 𑀲𑀺𑀗𑁆𑀕𑀸𑀮𑀓𑀁 𑀅𑀦𑀤𑀺;

𑀓𑁂 𑀘 𑀙𑀯𑁂 𑀲𑀺𑀗𑁆𑀕𑀸𑀮𑁂 𑀓𑁂 𑀧𑀦 𑀲𑀻𑀳𑀦𑀸𑀤𑁂’𑀢𑀺.

‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀼𑀕𑀢𑀸𑀧𑀤𑀸𑀦𑁂𑀲𑀼 𑀚𑀻𑀯𑀫𑀸𑀦𑁄 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀸𑀦𑀺 𑀪𑀼𑀜𑁆𑀚𑀫𑀸𑀦𑁄 𑀢𑀣𑀸𑀕𑀢𑁂 𑀅𑀭𑀳𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀆𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑀲𑀺. 𑀓𑁂 𑀘 𑀙𑀯𑁂 𑀧𑀸𑀣𑀺𑀓𑀧𑀼𑀢𑁆𑀢𑁂, 𑀓𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀆𑀲𑀸𑀤𑀦𑀸’𑀢𑀺.

𑁩𑁧. ‘‘𑀬𑀢𑁄 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀇𑀫𑀺𑀦𑀸𑀧𑀺 𑀑𑀧𑀫𑁆𑀫𑁂𑀦 𑀦𑁂𑀯 𑀅𑀲𑀓𑁆𑀔𑀺 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀢𑀫𑁆𑀳𑀸 𑀆𑀲𑀦𑀸 𑀘𑀸𑀯𑁂𑀢𑀼𑀁. 𑀅𑀣 𑀦𑀁 𑀏𑀢𑀤𑀯𑁄𑀘 𑁋

‘𑀪𑀼𑀢𑁆𑀯𑀸𑀦 𑀪𑁂𑀓𑁂 [𑀪𑀺𑀗𑁆𑀕𑁂 (𑀓.)] 𑀔𑀮𑀫𑀽𑀲𑀺𑀓𑀸𑀬𑁄,

𑀓𑀝𑀲𑀻𑀲𑀼 𑀔𑀺𑀢𑁆𑀢𑀸𑀦𑀺 𑀘 𑀓𑁄𑀡𑀧𑀸𑀦𑀺 [𑀓𑀽𑀡𑀧𑀸𑀦𑀺 (𑀲𑁆𑀬𑀸.)];

𑀫𑀳𑀸𑀯𑀦𑁂 𑀲𑀼𑀜𑁆𑀜𑀯𑀦𑁂 𑀯𑀺𑀯𑀟𑁆𑀠𑁄,

𑀅𑀫𑀜𑁆𑀜𑀺 𑀓𑁄𑀢𑁆𑀣𑀼 𑀫𑀺𑀕𑀭𑀸𑀚𑀸𑀳𑀫𑀲𑁆𑀫𑀺.

𑀢𑀣𑁂𑀯 𑀲𑁄 𑀲𑀺𑀗𑁆𑀕𑀸𑀮𑀓𑀁 𑀅𑀦𑀤𑀺;

𑀓𑁂 𑀘 𑀙𑀯𑁂 𑀲𑀺𑀗𑁆𑀕𑀸𑀮𑁂 𑀓𑁂 𑀧𑀦 𑀲𑀻𑀳𑀦𑀸𑀤𑁂’𑀢𑀺.

‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀧𑀸𑀣𑀺𑀓𑀧𑀼𑀢𑁆𑀢, 𑀲𑀼𑀕𑀢𑀸𑀧𑀤𑀸𑀦𑁂𑀲𑀼 𑀚𑀻𑀯𑀫𑀸𑀦𑁄 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀸𑀦𑀺 𑀪𑀼𑀜𑁆𑀚𑀫𑀸𑀦𑁄 𑀢𑀣𑀸𑀕𑀢𑁂 𑀅𑀭𑀳𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀆𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑀲𑀺. 𑀓𑁂 𑀘 𑀙𑀯𑁂 𑀧𑀸𑀣𑀺𑀓𑀧𑀼𑀢𑁆𑀢𑁂, 𑀓𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀆𑀲𑀸𑀤𑀦𑀸’𑀢𑀺.

𑁩𑁨. ‘‘𑀬𑀢𑁄 𑀔𑁄, 𑀪𑀕𑁆𑀕𑀯, 𑀚𑀸𑀮𑀺𑀬𑁄 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀇𑀫𑀺𑀦𑀸𑀧𑀺 𑀑𑀧𑀫𑁆𑀫𑁂𑀦 𑀦𑁂𑀯 𑀅𑀲𑀓𑁆𑀔𑀺 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀢𑀫𑁆𑀳𑀸 𑀆𑀲𑀦𑀸 𑀘𑀸𑀯𑁂𑀢𑀼𑀁. 𑀅𑀣 𑀢𑀁 𑀧𑀭𑀺𑀲𑀁 𑀆𑀕𑀦𑁆𑀢𑁆𑀯𑀸 𑀏𑀯𑀫𑀸𑀭𑁄𑀘𑁂𑀲𑀺 𑁋 ‘𑀧𑀭𑀸𑀪𑀽𑀢𑀭𑀽𑀧𑁄, 𑀪𑁄, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀆𑀬𑀸𑀫𑀺 𑀆𑀯𑀼𑀲𑁄, 𑀆𑀬𑀸𑀫𑀺 𑀆𑀯𑀼𑀲𑁄𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀲𑀁𑀲𑀧𑁆𑀧𑀢𑀺, 𑀦 𑀲𑀓𑁆𑀓𑁄𑀢𑀺 𑀆𑀲𑀦𑀸𑀧𑀺 𑀯𑀼𑀝𑁆𑀞𑀸𑀢𑀼’𑀦𑁆𑀢𑀺.

𑁩𑁩. ‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀪𑀕𑁆𑀕𑀯, 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘𑀁 𑁋 ‘𑀅𑀪𑀩𑁆𑀩𑁄 𑀔𑁄, 𑀆𑀯𑀼𑀲𑁄, 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬. 𑀲𑀘𑁂𑀧𑀸𑀬𑀲𑁆𑀫𑀦𑁆𑀢𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀏𑀯𑀫𑀲𑁆𑀲 𑁋 𑀫𑀬𑀁 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀯𑀭𑀢𑁆𑀢𑀸𑀳𑀺 𑀩𑀦𑁆𑀥𑀺𑀢𑁆𑀯𑀸 𑀦𑀸𑀕𑁂𑀳𑀺 [𑀕𑁄𑀬𑀼𑀕𑁂𑀳𑀺 (𑀲𑀩𑁆𑀩𑀢𑁆𑀣) 𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸] 𑀆𑀯𑀺𑀜𑁆𑀙𑁂𑀬𑁆𑀬𑀸𑀫𑀸𑀢𑀺. 𑀢𑀸 𑀯𑀭𑀢𑁆𑀢𑀸 𑀙𑀺𑀚𑁆𑀚𑁂𑀬𑁆𑀬𑀼𑀁 𑀧𑀸𑀣𑀺𑀓𑀧𑀼𑀢𑁆𑀢𑁄 𑀯𑀸. 𑀅𑀪𑀩𑁆𑀩𑁄 𑀧𑀦 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀦𑁆𑀢𑀼𑀁. 𑀲𑀘𑁂𑀧𑀺𑀲𑁆𑀲 𑀏𑀯𑀫𑀲𑁆𑀲 𑁋 𑀅𑀳𑀁 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’𑀢𑀺.

𑁩𑁪. ‘‘𑀅𑀣 𑀔𑁆𑀯𑀸𑀳𑀁, 𑀪𑀕𑁆𑀕𑀯, 𑀢𑀁 𑀧𑀭𑀺𑀲𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺𑀁 𑀲𑀫𑀸𑀤𑀧𑁂𑀲𑀺𑀁 𑀲𑀫𑀼𑀢𑁆𑀢𑁂𑀚𑁂𑀲𑀺𑀁 𑀲𑀫𑁆𑀧𑀳𑀁𑀲𑁂𑀲𑀺𑀁, 𑀢𑀁 𑀧𑀭𑀺𑀲𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀫𑀳𑀸𑀩𑀦𑁆𑀥𑀦𑀸 𑀫𑁄𑀓𑁆𑀔𑀁 𑀓𑀭𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀤𑀼𑀕𑁆𑀕𑀸 𑀉𑀤𑁆𑀥𑀭𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢𑀢𑀸𑀮𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀲𑀢𑁆𑀢𑀢𑀸𑀮𑀫𑁆𑀧𑀺 𑀅𑀘𑁆𑀘𑀺𑀁 [𑀅𑀕𑁆𑀕𑀺𑀁 (𑀲𑁆𑀬𑀸.)] 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀚𑁆𑀚𑀮𑀺𑀢𑁆𑀯𑀸 𑀥𑀽𑀫𑀸𑀬𑀺𑀢𑁆𑀯𑀸 [𑀥𑀽𑀧𑀸𑀬𑀺𑀢𑁆𑀯𑀸 (𑀲𑀻. 𑀧𑀻.)] 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁 𑀧𑀘𑁆𑀘𑀼𑀝𑁆𑀞𑀸𑀲𑀺𑀁.

𑁩𑁫. ‘‘𑀅𑀣 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀳𑀁, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀬𑀣𑁂𑀯 𑀢𑁂 𑀅𑀳𑀁 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀆𑀭𑀩𑁆𑀪 𑀩𑁆𑀬𑀸𑀓𑀸𑀲𑀺𑀁, 𑀢𑀣𑁂𑀯 𑀢𑀁 𑀯𑀺𑀧𑀸𑀓𑀁 𑀅𑀜𑁆𑀜𑀣𑀸 𑀯𑀸’𑀢𑀺? ‘𑀬𑀣𑁂𑀯 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁂𑀮𑀁 𑀧𑀸𑀣𑀺𑀓𑀧𑀼𑀢𑁆𑀢𑀁 𑀆𑀭𑀩𑁆𑀪 𑀩𑁆𑀬𑀸𑀓𑀸𑀲𑀺, 𑀢𑀣𑁂𑀯 𑀢𑀁 𑀯𑀺𑀧𑀸𑀓𑀁, 𑀦𑁄 𑀅𑀜𑁆𑀜𑀣𑀸’𑀢𑀺.

‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀦𑀓𑁆𑀔𑀢𑁆𑀢, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀓𑀢𑀁 𑀯𑀸 𑀳𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀅𑀓𑀢𑀁 𑀯𑀸’𑀢𑀺? ‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀓𑀢𑀁 𑀳𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀦𑁄 𑀅𑀓𑀢’𑀦𑁆𑀢𑀺. ‘𑀏𑀯𑀫𑁆𑀧𑀺 𑀔𑁄 𑀫𑀁 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀁 𑀏𑀯𑀁 𑀯𑀤𑁂𑀲𑀺 𑁋 𑀦 𑀳𑀺 𑀧𑀦 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀢𑀻𑀢𑀺. 𑀧𑀲𑁆𑀲, 𑀫𑁄𑀖𑀧𑀼𑀭𑀺𑀲, 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥𑀁’𑀢𑀺.

‘‘𑀏𑀯𑀫𑁆𑀧𑀺 𑀔𑁄, 𑀪𑀕𑁆𑀕𑀯, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 𑀅𑀧𑀓𑁆𑀓𑀫𑁂𑀯 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀬𑀣𑀸 𑀢𑀁 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄.

𑀅𑀕𑁆𑀕𑀜𑁆𑀜𑀧𑀜𑁆𑀜𑀢𑁆𑀢𑀺𑀓𑀣𑀸

𑁩𑁬. ‘‘𑀅𑀕𑁆𑀕𑀜𑁆𑀜𑀜𑁆𑀘𑀸𑀳𑀁, 𑀪𑀕𑁆𑀕𑀯, 𑀧𑀚𑀸𑀦𑀸𑀫𑀺. 𑀢𑀜𑁆𑀘 𑀧𑀚𑀸𑀦𑀸𑀫𑀺 [‘‘𑀢𑀜𑁆𑀘𑀧𑀚𑀸𑀦𑀸𑀫𑀻’’𑀢𑀺 𑀇𑀤𑀁 𑀲𑁆𑀬𑀸𑀧𑁄𑀢𑁆𑀣𑀓𑁂𑀦𑀢𑁆𑀣𑀺], 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀫𑀺, 𑀢𑀜𑁆𑀘 𑀧𑀚𑀸𑀦𑀁 [𑀧𑀚𑀸𑀦𑀦𑀁 (𑀲𑁆𑀬𑀸. 𑀓.) 𑀅𑀝𑁆𑀞𑀓𑀣𑀸𑀲𑀁𑀯𑀡𑁆𑀡𑀦𑀸 𑀧𑀲𑁆𑀲𑀺𑀢𑀩𑁆𑀩𑀸] 𑀦 𑀧𑀭𑀸𑀫𑀲𑀸𑀫𑀺, 𑀅𑀧𑀭𑀸𑀫𑀲𑀢𑁄 𑀘 𑀫𑁂 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸, 𑀬𑀤𑀪𑀺𑀚𑀸𑀦𑀁 𑀢𑀣𑀸𑀕𑀢𑁄 𑀦𑁄 𑀅𑀦𑀬𑀁 𑀆𑀧𑀚𑁆𑀚𑀢𑀺.

𑁩𑁭. ‘‘𑀲𑀦𑁆𑀢𑀺, 𑀪𑀕𑁆𑀕𑀯, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀇𑀲𑁆𑀲𑀭𑀓𑀼𑀢𑁆𑀢𑀁 𑀩𑁆𑀭𑀳𑁆𑀫𑀓𑀼𑀢𑁆𑀢𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀲𑁆𑀲𑀭𑀓𑀼𑀢𑁆𑀢𑀁 𑀩𑁆𑀭𑀳𑁆𑀫𑀓𑀼𑀢𑁆𑀢𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀘 𑀫𑁂 𑀏𑀯𑀁 𑀧𑀼𑀝𑁆𑀞𑀸, ‘𑀆𑀫𑁄’𑀢𑀺 [𑀆𑀫𑀸𑀢𑀺 (𑀲𑁆𑀬𑀸.)] 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀓𑀣𑀁𑀯𑀺𑀳𑀺𑀢𑀓𑀁 𑀧𑀦 [𑀓𑀣𑀁 𑀯𑀺𑀳𑀺𑀢𑀓𑀁𑀦𑁄 𑀧𑀦 (𑀓.)] 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀲𑁆𑀲𑀭𑀓𑀼𑀢𑁆𑀢𑀁 𑀩𑁆𑀭𑀳𑁆𑀫𑀓𑀼𑀢𑁆𑀢𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀫𑀬𑀸 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀲𑀫𑁆𑀧𑀸𑀬𑀦𑁆𑀢𑀸 𑀫𑀫𑀜𑁆𑀜𑁂𑀯 𑀧𑀝𑀺𑀧𑀼𑀘𑁆𑀙𑀦𑁆𑀢𑀺. 𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀫𑀺 𑁋

𑁩𑁮. ‘𑀳𑁄𑀢𑀺 𑀔𑁄 𑀲𑁄, 𑀆𑀯𑀼𑀲𑁄, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀅𑀬𑀁 𑀮𑁄𑀓𑁄 𑀲𑀁𑀯𑀝𑁆𑀝𑀢𑀺. 𑀲𑀁𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀆𑀪𑀲𑁆𑀲𑀭𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀦𑁆𑀢𑀺. 𑀢𑁂 𑀢𑀢𑁆𑀣 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺.

‘𑀳𑁄𑀢𑀺 𑀔𑁄 𑀲𑁄, 𑀆𑀯𑀼𑀲𑁄, 𑀲𑀫𑀬𑁄 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀅𑀬𑀁 𑀮𑁄𑀓𑁄 𑀯𑀺𑀯𑀝𑁆𑀝𑀢𑀺. 𑀯𑀺𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀲𑀼𑀜𑁆𑀜𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀧𑀸𑀢𑀼𑀪𑀯𑀢𑀺. 𑀅𑀣 𑀔𑁄 [𑀅𑀣 (𑀲𑀻. 𑀲𑁆𑀬𑀸. 𑀧𑀻.)] 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀆𑀪𑀲𑁆𑀲𑀭𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀼𑀜𑁆𑀜𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀢𑁆𑀣 𑀳𑁄𑀢𑀺 𑀫𑀦𑁄𑀫𑀬𑁄 𑀧𑀻𑀢𑀺𑀪𑀓𑁆𑀔𑁄 𑀲𑀬𑀁𑀧𑀪𑁄 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀲𑀼𑀪𑀝𑁆𑀞𑀸𑀬𑀻, 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀢𑀺.

‘𑀢𑀲𑁆𑀲 𑀢𑀢𑁆𑀣 𑀏𑀓𑀓𑀲𑁆𑀲 𑀤𑀻𑀖𑀭𑀢𑁆𑀢𑀁 𑀦𑀺𑀯𑀼𑀲𑀺𑀢𑀢𑁆𑀢𑀸 𑀅𑀦𑀪𑀺𑀭𑀢𑀺 𑀧𑀭𑀺𑀢𑀲𑁆𑀲𑀦𑀸 𑀉𑀧𑁆𑀧𑀚𑁆𑀚𑀢𑀺 𑁋 𑀅𑀳𑁄 𑀯𑀢 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺. 𑀅𑀣 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀆𑀪𑀲𑁆𑀲𑀭𑀓𑀸𑀬𑀸 𑀘𑀯𑀺𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀺 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀲𑀳𑀩𑁆𑀬𑀢𑀁. 𑀢𑁂𑀧𑀺 𑀢𑀢𑁆𑀣 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄, 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺.

𑁩𑁯. ‘𑀢𑀢𑁆𑀭𑀸𑀯𑀼𑀲𑁄, 𑀬𑁄 𑀲𑁄 𑀲𑀢𑁆𑀢𑁄 𑀧𑀞𑀫𑀁 𑀉𑀧𑀧𑀦𑁆𑀦𑁄, 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀅𑀳𑀫𑀲𑁆𑀫𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 [𑀲𑀜𑁆𑀚𑀺𑀢𑀸 (𑀲𑀻. 𑀧𑀻.), 𑀲𑀚𑁆𑀚𑀺𑀢𑀸 (𑀲𑁆𑀬𑀸. 𑀓𑀁.)] 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁, 𑀫𑀬𑀸 𑀇𑀫𑁂 𑀲𑀢𑁆𑀢𑀸 𑀦𑀺𑀫𑁆𑀫𑀺𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀫𑀫𑀜𑁆𑀳𑀺 𑀧𑀼𑀩𑁆𑀩𑁂 𑀏𑀢𑀤𑀳𑁄𑀲𑀺 𑁋 𑀅𑀳𑁄 𑀯𑀢 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺; 𑀇𑀢𑀺 𑀫𑀫 𑀘 𑀫𑀦𑁄𑀧𑀡𑀺𑀥𑀺. 𑀇𑀫𑁂 𑀘 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸𑀢𑀺.

‘𑀬𑁂𑀧𑀺 𑀢𑁂 𑀲𑀢𑁆𑀢𑀸 𑀧𑀘𑁆𑀙𑀸 𑀉𑀧𑀧𑀦𑁆𑀦𑀸, 𑀢𑁂𑀲𑀫𑁆𑀧𑀺 𑀏𑀯𑀁 𑀳𑁄𑀢𑀺 𑁋 𑀅𑀬𑀁 𑀔𑁄 𑀪𑀯𑀁 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁; 𑀇𑀫𑀺𑀦𑀸 𑀫𑀬𑀁 𑀪𑁄𑀢𑀸 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀜𑁆𑀳𑀺 𑀫𑀬𑀁 𑀅𑀤𑁆𑀤𑀲𑀸𑀫 𑀇𑀥 𑀧𑀞𑀫𑀁 𑀉𑀧𑀧𑀦𑁆𑀦𑀁; 𑀫𑀬𑀁 𑀧𑀦𑀸𑀫𑁆𑀳 𑀧𑀘𑁆𑀙𑀸 𑀉𑀧𑀧𑀦𑁆𑀦𑀸𑀢𑀺.

𑁪𑁦. ‘𑀢𑀢𑁆𑀭𑀸𑀯𑀼𑀲𑁄, 𑀬𑁄 𑀲𑁄 𑀲𑀢𑁆𑀢𑁄 𑀧𑀞𑀫𑀁 𑀉𑀧𑀧𑀦𑁆𑀦𑁄, 𑀲𑁄 𑀤𑀻𑀖𑀸𑀬𑀼𑀓𑀢𑀭𑁄 𑀘 𑀳𑁄𑀢𑀺 𑀯𑀡𑁆𑀡𑀯𑀦𑁆𑀢𑀢𑀭𑁄 𑀘 𑀫𑀳𑁂𑀲𑀓𑁆𑀔𑀢𑀭𑁄 𑀘. 𑀬𑁂 𑀧𑀦 𑀢𑁂 𑀲𑀢𑁆𑀢𑀸 𑀧𑀘𑁆𑀙𑀸 𑀉𑀧𑀧𑀦𑁆𑀦𑀸, 𑀢𑁂 𑀅𑀧𑁆𑀧𑀸𑀬𑀼𑀓𑀢𑀭𑀸 𑀘 𑀳𑁄𑀦𑁆𑀢𑀺 𑀤𑀼𑀩𑁆𑀩𑀡𑁆𑀡𑀢𑀭𑀸 𑀘 𑀅𑀧𑁆𑀧𑁂𑀲𑀓𑁆𑀔𑀢𑀭𑀸 𑀘.

‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺; 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺.

‘𑀲𑁄 𑀏𑀯𑀫𑀸𑀳 𑁋 𑀬𑁄 𑀔𑁄 𑀲𑁄 𑀪𑀯𑀁 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁, 𑀬𑁂𑀦 𑀫𑀬𑀁 𑀪𑁄𑀢𑀸 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸. 𑀲𑁄 𑀦𑀺𑀘𑁆𑀘𑁄 𑀥𑀼𑀯𑁄 [𑀲𑀲𑁆𑀲𑀢𑁄 𑀤𑀻𑀖𑀸𑀬𑀼𑀓𑁄 (𑀲𑁆𑀬𑀸. 𑀓.)] 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀺. 𑀬𑁂 𑀧𑀦 𑀫𑀬𑀁 𑀅𑀳𑀼𑀫𑁆𑀳𑀸 𑀢𑁂𑀦 𑀪𑁄𑀢𑀸 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸, 𑀢𑁂 𑀫𑀬𑀁 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 [𑀅𑀤𑁆𑀥𑀼𑀯𑀸 𑀅𑀲𑀲𑁆𑀲𑀢𑀸 (𑀲𑁆𑀬𑀸. 𑀓.)] 𑀅𑀧𑁆𑀧𑀸𑀬𑀼𑀓𑀸 𑀘𑀯𑀦𑀥𑀫𑁆𑀫𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸’𑀢𑀺. 𑀏𑀯𑀁𑀯𑀺𑀳𑀺𑀢𑀓𑀁 𑀦𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀇𑀲𑁆𑀲𑀭𑀓𑀼𑀢𑁆𑀢𑀁 𑀩𑁆𑀭𑀳𑁆𑀫𑀓𑀼𑀢𑁆𑀢𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸𑀢𑀺. ‘𑀢𑁂 𑀏𑀯𑀫𑀸𑀳𑀁𑀲𑀼 𑁋 𑀏𑀯𑀁 𑀔𑁄 𑀦𑁄, 𑀆𑀯𑀼𑀲𑁄 𑀕𑁄𑀢𑀫, 𑀲𑀼𑀢𑀁, 𑀬𑀣𑁂𑀯𑀸𑀬𑀲𑁆𑀫𑀸 𑀕𑁄𑀢𑀫𑁄 𑀆𑀳𑀸’𑀢𑀺. ‘‘𑀅𑀕𑁆𑀕𑀜𑁆𑀜𑀜𑁆𑀘𑀸𑀳𑀁, 𑀪𑀕𑁆𑀕𑀯, 𑀧𑀚𑀸𑀦𑀸𑀫𑀺. 𑀢𑀜𑁆𑀘 𑀧𑀚𑀸𑀦𑀸𑀫𑀺, 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀫𑀺, 𑀢𑀜𑁆𑀘 𑀧𑀚𑀸𑀦𑀁 𑀦 𑀧𑀭𑀸𑀫𑀲𑀸𑀫𑀺, 𑀅𑀧𑀭𑀸𑀫𑀲𑀢𑁄 𑀘 𑀫𑁂 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸. 𑀬𑀤𑀪𑀺𑀚𑀸𑀦𑀁 𑀢𑀣𑀸𑀕𑀢𑁄 𑀦𑁄 𑀅𑀦𑀬𑀁 𑀆𑀧𑀚𑁆𑀚𑀢𑀺.

𑁪𑁧. ‘‘𑀲𑀦𑁆𑀢𑀺, 𑀪𑀕𑁆𑀕𑀯, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀘 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑁄’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀓𑀣𑀁𑀯𑀺𑀳𑀺𑀢𑀓𑀁 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀫𑀬𑀸 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀲𑀫𑁆𑀧𑀸𑀬𑀦𑁆𑀢𑀸 𑀫𑀫𑀜𑁆𑀜𑁂𑀯 𑀧𑀝𑀺𑀧𑀼𑀘𑁆𑀙𑀦𑁆𑀢𑀺, 𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀫𑀺 𑁋

𑁪𑁨. ‘𑀲𑀦𑁆𑀢𑀸𑀯𑀼𑀲𑁄, 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀦𑀸𑀫 𑀤𑁂𑀯𑀸. 𑀢𑁂 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 [𑀳𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 (𑀓.)] 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀁 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺, 𑀲𑀢𑀺𑀬𑀸 𑀲𑀫𑁆𑀫𑁄𑀲𑀸 [𑀲𑀢𑀺𑀬𑀸 𑀲𑀫𑁆𑀫𑁄𑀲𑀸𑀬 (𑀲𑁆𑀬𑀸.)] 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀺.

‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺, 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺; 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺.

‘𑀲𑁄 𑀏𑀯𑀫𑀸𑀳 𑁋 𑀬𑁂 𑀔𑁄 𑀢𑁂 𑀪𑁄𑀦𑁆𑀢𑁄 𑀤𑁂𑀯𑀸 𑀦 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀢𑁂 𑀦 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀁 𑀦𑀸𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀲𑀢𑀺 𑀦 𑀲𑀫𑁆𑀫𑀼𑀲𑁆𑀲𑀢𑀺, 𑀲𑀢𑀺𑀬𑀸 𑀅𑀲𑀫𑁆𑀫𑁄𑀲𑀸 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀦 𑀘𑀯𑀦𑁆𑀢𑀺, 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀫𑀬𑀁 𑀅𑀳𑀼𑀫𑁆𑀳𑀸 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀢𑁂 𑀫𑀬𑀁 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 𑀯𑀺𑀳𑀭𑀺𑀫𑁆𑀳𑀸, 𑀢𑁂𑀲𑀁 𑀦𑁄 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺, 𑀲𑀢𑀺𑀬𑀸 𑀲𑀫𑁆𑀫𑁄𑀲𑀸 𑀏𑀯𑀁 [𑀲𑀫𑁆𑀫𑁄𑀲𑀸 𑀏𑀯 (𑀲𑀻. 𑀧𑀻.) 𑀲𑀫𑁆𑀫𑁄𑀲𑀸 𑀢𑁂 (𑀲𑁆𑀬𑀸. 𑀓.)] 𑀫𑀬𑀁 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸, 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀧𑁆𑀧𑀸𑀬𑀼𑀓𑀸 𑀘𑀯𑀦𑀥𑀫𑁆𑀫𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸𑀢𑀺. 𑀏𑀯𑀁𑀯𑀺𑀳𑀺𑀢𑀓𑀁 𑀦𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺. ‘𑀢𑁂 𑀏𑀯𑀫𑀸𑀳𑀁𑀲𑀼 𑁋 𑀏𑀯𑀁 𑀔𑁄 𑀦𑁄, 𑀆𑀯𑀼𑀲𑁄 𑀕𑁄𑀢𑀫, 𑀲𑀼𑀢𑀁, 𑀬𑀣𑁂𑀯𑀸𑀬𑀲𑁆𑀫𑀸 𑀕𑁄𑀢𑀫𑁄 𑀆𑀳𑀸’𑀢𑀺. ‘‘𑀅𑀕𑁆𑀕𑀜𑁆𑀜𑀜𑁆𑀘𑀸𑀳𑀁, 𑀪𑀕𑁆𑀕𑀯, 𑀧𑀚𑀸𑀦𑀸𑀫𑀺…𑀧𑁂… 𑀬𑀤𑀪𑀺𑀚𑀸𑀦𑀁 𑀢𑀣𑀸𑀕𑀢𑁄 𑀦𑁄 𑀅𑀦𑀬𑀁 𑀆𑀧𑀚𑁆𑀚𑀢𑀺.

𑁪𑁩. ‘‘𑀲𑀦𑁆𑀢𑀺, 𑀪𑀕𑁆𑀕𑀯, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀦𑁄𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀦𑁄𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀘 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑁄’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀓𑀣𑀁𑀯𑀺𑀳𑀺𑀢𑀓𑀁 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀦𑁄𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀫𑀬𑀸 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀲𑀫𑁆𑀧𑀸𑀬𑀦𑁆𑀢𑀸 𑀫𑀫𑀜𑁆𑀜𑁂𑀯 𑀧𑀝𑀺𑀧𑀼𑀘𑁆𑀙𑀦𑁆𑀢𑀺. 𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀫𑀺 𑁋

𑁪𑁪. ‘𑀲𑀦𑁆𑀢𑀸𑀯𑀼𑀲𑁄, 𑀫𑀦𑁄𑀧𑀤𑁄𑀲𑀺𑀓𑀸 𑀦𑀸𑀫 𑀤𑁂𑀯𑀸. 𑀢𑁂 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀺. 𑀢𑁂 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀘𑀺𑀢𑁆𑀢𑀸𑀦𑀺 𑀧𑀤𑀽𑀲𑁂𑀦𑁆𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑀸. 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀺.

‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺.

‘𑀲𑁄 𑀏𑀯𑀫𑀸𑀳 𑁋 𑀬𑁂 𑀔𑁄 𑀢𑁂 𑀪𑁄𑀦𑁆𑀢𑁄 𑀤𑁂𑀯𑀸 𑀦 𑀫𑀦𑁄𑀧𑀤𑁄𑀲𑀺𑀓𑀸 𑀢𑁂 𑀦𑀸𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀺. 𑀢𑁂 𑀦𑀸𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀘𑀺𑀢𑁆𑀢𑀸𑀦𑀺 𑀦𑀧𑁆𑀧𑀤𑀽𑀲𑁂𑀦𑁆𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀧𑁆𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀓𑀺𑀮𑀦𑁆𑀢𑀓𑀸𑀬𑀸 𑀅𑀓𑀺𑀮𑀦𑁆𑀢𑀘𑀺𑀢𑁆𑀢𑀸. 𑀢𑁂 𑀤𑁂𑀯𑀸 𑀢𑀫𑁆𑀳𑀸 [𑀅𑀓𑀺𑀮𑀦𑁆𑀢𑀘𑀺𑀢𑁆𑀢𑀸 𑀢𑀫𑁆𑀳𑀸 (𑀓.)] 𑀓𑀸𑀬𑀸 𑀦 𑀘𑀯𑀦𑁆𑀢𑀺, 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀫𑀬𑀁 𑀅𑀳𑀼𑀫𑁆𑀳𑀸 𑀫𑀦𑁄𑀧𑀤𑁄𑀲𑀺𑀓𑀸, 𑀢𑁂 𑀫𑀬𑀁 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀺𑀫𑁆𑀳𑀸. 𑀢𑁂 𑀫𑀬𑀁 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀘𑀺𑀢𑁆𑀢𑀸𑀦𑀺 𑀧𑀤𑀽𑀲𑀺𑀫𑁆𑀳𑀸 [𑀧𑀤𑁄𑀲𑀺𑀬𑀺𑀫𑁆𑀳𑀸 (𑀲𑁆𑀬𑀸.), 𑀧𑀤𑀽𑀲𑀬𑀺𑀫𑁆𑀳𑀸 (?)]. 𑀢𑁂 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑀸. 𑀏𑀯𑀁 𑀫𑀬𑀁 [𑀓𑀺𑀮𑀦𑁆𑀢𑀘𑀺𑀢𑁆𑀢𑀸𑀏𑀯 𑀫𑀬𑀁 (𑀲𑀻. 𑀧𑀻.), 𑀓𑀺𑀮𑀦𑁆𑀢𑀘𑀺𑀢𑁆𑀢𑀸 (𑀓.)] 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸, 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀧𑁆𑀧𑀸𑀬𑀼𑀓𑀸 𑀘𑀯𑀦𑀥𑀫𑁆𑀫𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸𑀢𑀺. 𑀏𑀯𑀁𑀯𑀺𑀳𑀺𑀢𑀓𑀁 𑀦𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀫𑀦𑁄𑀧𑀤𑁄𑀲𑀺𑀓𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺. ‘𑀢𑁂 𑀏𑀯𑀫𑀸𑀳𑀁𑀲𑀼 𑁋 𑀏𑀯𑀁 𑀔𑁄 𑀦𑁄, 𑀆𑀯𑀼𑀲𑁄 𑀕𑁄𑀢𑀫, 𑀲𑀼𑀢𑀁, 𑀬𑀣𑁂𑀯𑀸𑀬𑀲𑁆𑀫𑀸 𑀕𑁄𑀢𑀫𑁄 𑀆𑀳𑀸’𑀢𑀺. ‘‘𑀅𑀕𑁆𑀕𑀜𑁆𑀜𑀜𑁆𑀘𑀸𑀳𑀁, 𑀪𑀕𑁆𑀕𑀯, 𑀧𑀚𑀸𑀦𑀸𑀫𑀺…𑀧𑁂… 𑀬𑀤𑀪𑀺𑀚𑀸𑀦𑀁 𑀢𑀣𑀸𑀕𑀢𑁄 𑀦𑁄 𑀅𑀦𑀬𑀁 𑀆𑀧𑀚𑁆𑀚𑀢𑀺.

𑁪𑁫. ‘‘𑀲𑀦𑁆𑀢𑀺, 𑀪𑀕𑁆𑀕𑀯, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀘 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑁄’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀓𑀣𑀁𑀯𑀺𑀳𑀺𑀢𑀓𑀁 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? 𑀢𑁂 𑀫𑀬𑀸 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀲𑀫𑁆𑀧𑀸𑀬𑀦𑁆𑀢𑀸 𑀫𑀫𑀜𑁆𑀜𑁂𑀯 𑀧𑀝𑀺𑀧𑀼𑀘𑁆𑀙𑀦𑁆𑀢𑀺. 𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀫𑀺 𑁋

𑁪𑁬. ‘𑀲𑀦𑁆𑀢𑀸𑀯𑀼𑀲𑁄, 𑀅𑀲𑀜𑁆𑀜𑀲𑀢𑁆𑀢𑀸 𑀦𑀸𑀫 𑀤𑁂𑀯𑀸. 𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀺.

‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀯𑀺𑀚𑁆𑀚𑀢𑀺. 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀢𑀁 [𑀇𑀤𑀁 𑀧𑀤𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑁂 𑀦 𑀤𑀺𑀲𑁆𑀲𑀢𑀺. 𑀏𑀯𑀁 (𑀧𑀻. 𑀓.)] 𑀲𑀜𑁆𑀜𑀼𑀧𑁆𑀧𑀸𑀤𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺.

‘𑀲𑁄 𑀏𑀯𑀫𑀸𑀳 𑁋 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀅𑀳𑀼𑀢𑁆𑀯𑀸 𑀲𑀦𑁆𑀢𑀢𑀸𑀬 [𑀲𑀢𑁆𑀢𑀓𑀸𑀬 (𑀲𑀻. 𑀧𑀻.), 𑀲𑀢𑁆𑀢𑀸𑀬 (𑀓. 𑀲𑀻.)] 𑀧𑀭𑀺𑀡𑀢𑁄𑀢𑀺. 𑀏𑀯𑀁𑀯𑀺𑀳𑀺𑀢𑀓𑀁 𑀦𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀆𑀘𑀭𑀺𑀬𑀓𑀁 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀣𑀸’𑀢𑀺? ‘𑀢𑁂 𑀏𑀯𑀫𑀸𑀳𑀁𑀲𑀼 𑁋 𑀏𑀯𑀁 𑀔𑁄 𑀦𑁄, 𑀆𑀯𑀼𑀲𑁄 𑀕𑁄𑀢𑀫, 𑀲𑀼𑀢𑀁 𑀬𑀣𑁂𑀯𑀸𑀬𑀲𑁆𑀫𑀸 𑀕𑁄𑀢𑀫𑁄 𑀆𑀳𑀸’𑀢𑀺. ‘‘𑀅𑀕𑁆𑀕𑀜𑁆𑀜𑀜𑁆𑀘𑀸𑀳𑀁, 𑀪𑀕𑁆𑀕𑀯, 𑀧𑀚𑀸𑀦𑀸𑀫𑀺 𑀢𑀜𑁆𑀘 𑀧𑀚𑀸𑀦𑀸𑀫𑀺, 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀫𑀺, 𑀢𑀜𑁆𑀘 𑀧𑀚𑀸𑀦𑀁 𑀦 𑀧𑀭𑀸𑀫𑀲𑀸𑀫𑀺, 𑀅𑀧𑀭𑀸𑀫𑀲𑀢𑁄 𑀘 𑀫𑁂 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸. 𑀬𑀤𑀪𑀺𑀚𑀸𑀦𑀁 𑀢𑀣𑀸𑀕𑀢𑁄 𑀦𑁄 𑀅𑀦𑀬𑀁 𑀆𑀧𑀚𑁆𑀚𑀢𑀺.

𑁪𑁭. ‘‘𑀏𑀯𑀁𑀯𑀸𑀤𑀺𑀁 𑀔𑁄 𑀫𑀁, 𑀪𑀕𑁆𑀕𑀯, 𑀏𑀯𑀫𑀓𑁆𑀔𑀸𑀬𑀺𑀁 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑁋 ‘𑀯𑀺𑀧𑀭𑀻𑀢𑁄 𑀲𑀫𑀡𑁄 𑀕𑁄𑀢𑀫𑁄 𑀪𑀺𑀓𑁆𑀔𑀯𑁄 𑀘. 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳 𑁋 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀼𑀪𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀲𑀼𑀪𑀦𑁆𑀢𑁆𑀯𑁂𑀯 [𑀅𑀲𑀼𑀪𑀦𑁆𑀢𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀧𑀚𑀸𑀦𑀸𑀢𑀻’𑀢𑀺 [𑀲𑀜𑁆𑀚𑀸𑀦𑀸𑀢𑀻𑀢𑀺 (𑀲𑀻. 𑀧𑀻.)]. 𑀦 𑀔𑁄 𑀧𑀦𑀸𑀳𑀁, 𑀪𑀕𑁆𑀕𑀯, 𑀏𑀯𑀁 𑀯𑀤𑀸𑀫𑀺 𑁋 ‘𑀬𑀲𑁆𑀫𑀺𑀁 𑀲𑀫𑀬𑁂 𑀲𑀼𑀪𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀩𑁆𑀩𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀲𑀼𑀪𑀦𑁆𑀢𑁆𑀯𑁂𑀯 𑀧𑀚𑀸𑀦𑀸𑀢𑀻’𑀢𑀺. 𑀏𑀯𑀜𑁆𑀘 𑀔𑁆𑀯𑀸𑀳𑀁, 𑀪𑀕𑁆𑀕𑀯, 𑀯𑀤𑀸𑀫𑀺 𑁋 ‘𑀬𑀲𑁆𑀫𑀺𑀁 𑀲𑀫𑀬𑁂 𑀲𑀼𑀪𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑀼𑀪𑀦𑁆𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀚𑀸𑀦𑀸𑀢𑀻’𑀢𑀺.

‘‘𑀢𑁂 𑀘, 𑀪𑀦𑁆𑀢𑁂, 𑀯𑀺𑀧𑀭𑀻𑀢𑀸, 𑀬𑁂 𑀪𑀕𑀯𑀦𑁆𑀢𑀁 𑀯𑀺𑀧𑀭𑀻𑀢𑀢𑁄 𑀤𑀳𑀦𑁆𑀢𑀺 𑀪𑀺𑀓𑁆𑀔𑀯𑁄 𑀘. 𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺. 𑀧𑀳𑁄𑀢𑀺 𑀫𑁂 𑀪𑀕𑀯𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁, 𑀬𑀣𑀸 𑀅𑀳𑀁 𑀲𑀼𑀪𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

𑁪𑁮. ‘‘𑀤𑀼𑀓𑁆𑀓𑀭𑀁 𑀔𑁄 𑀏𑀢𑀁, 𑀪𑀕𑁆𑀕𑀯, 𑀢𑀬𑀸 𑀅𑀜𑁆𑀜𑀤𑀺𑀝𑁆𑀞𑀺𑀓𑁂𑀦 𑀅𑀜𑁆𑀜𑀔𑀦𑁆𑀢𑀺𑀓𑁂𑀦 𑀅𑀜𑁆𑀜𑀭𑀼𑀘𑀺𑀓𑁂𑀦 𑀅𑀜𑁆𑀜𑀢𑁆𑀭𑀸𑀬𑁄𑀕𑁂𑀦 𑀅𑀜𑁆𑀜𑀢𑁆𑀭𑀸𑀘𑀭𑀺𑀬𑀓𑁂𑀦 𑀲𑀼𑀪𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀇𑀗𑁆𑀖 𑀢𑁆𑀯𑀁, 𑀪𑀕𑁆𑀕𑀯, 𑀬𑁄 𑀘 𑀢𑁂 𑀅𑀬𑀁 𑀫𑀬𑀺 𑀧𑀲𑀸𑀤𑁄, 𑀢𑀫𑁂𑀯 𑀢𑁆𑀯𑀁 𑀲𑀸𑀥𑀼𑀓𑀫𑀦𑀼𑀭𑀓𑁆𑀔𑀸’’𑀢𑀺. ‘‘𑀲𑀘𑁂 𑀢𑀁, 𑀪𑀦𑁆𑀢𑁂, 𑀫𑀬𑀸 𑀤𑀼𑀓𑁆𑀓𑀭𑀁 𑀅𑀜𑁆𑀜𑀤𑀺𑀝𑁆𑀞𑀺𑀓𑁂𑀦 𑀅𑀜𑁆𑀜𑀔𑀦𑁆𑀢𑀺𑀓𑁂𑀦 𑀅𑀜𑁆𑀜𑀭𑀼𑀘𑀺𑀓𑁂𑀦 𑀅𑀜𑁆𑀜𑀢𑁆𑀭𑀸𑀬𑁄𑀕𑁂𑀦 𑀅𑀜𑁆𑀜𑀢𑁆𑀭𑀸𑀘𑀭𑀺𑀬𑀓𑁂𑀦 𑀲𑀼𑀪𑀁 𑀯𑀺𑀫𑁄𑀓𑁆𑀔𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀬𑁄 𑀘 𑀫𑁂 𑀅𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑀺 𑀧𑀲𑀸𑀤𑁄, 𑀢𑀫𑁂𑀯𑀸𑀳𑀁 𑀲𑀸𑀥𑀼𑀓𑀫𑀦𑀼𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀪𑀕𑁆𑀕𑀯𑀕𑁄𑀢𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀧𑀸𑀣𑀺𑀓𑀲𑀼𑀢𑁆𑀢𑀁 [𑀧𑀸𑀝𑀺𑀓𑀲𑀼𑀢𑁆𑀢𑀦𑁆𑀢𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.