𑁨. 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀁

𑀦𑀺𑀕𑁆𑀭𑁄𑀥𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼

𑁪𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀉𑀤𑀼𑀫𑁆𑀩𑀭𑀺𑀓𑀸𑀬 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀧𑀝𑀺𑀯𑀲𑀢𑀺 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀺𑀁𑀲𑀫𑀢𑁆𑀢𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀳𑀺. 𑀅𑀣 𑀔𑁄 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 𑀤𑀺𑀯𑀸 𑀤𑀺𑀯𑀲𑁆𑀲 [𑀤𑀺𑀯𑀸𑀤𑀺𑀯𑀲𑁆𑀲𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀅𑀣 𑀔𑁄 𑀲𑀦𑁆𑀥𑀸𑀦𑀲𑁆𑀲 𑀕𑀳𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀓𑀸𑀮𑁄 𑀔𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀧𑀝𑀺𑀲𑀮𑁆𑀮𑀻𑀦𑁄 𑀪𑀕𑀯𑀸. 𑀫𑀦𑁄𑀪𑀸𑀯𑀦𑀻𑀬𑀸𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀅𑀲𑀫𑀬𑁄 𑀤𑀲𑁆𑀲𑀦𑀸𑀬. 𑀧𑀝𑀺𑀲𑀮𑁆𑀮𑀻𑀦𑀸 𑀫𑀦𑁄𑀪𑀸𑀯𑀦𑀻𑀬𑀸 𑀪𑀺𑀓𑁆𑀔𑀽. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀉𑀤𑀼𑀫𑁆𑀩𑀭𑀺𑀓𑀸𑀬 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄, 𑀬𑁂𑀦 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 𑀬𑁂𑀦 𑀉𑀤𑀼𑀫𑁆𑀩𑀭𑀺𑀓𑀸𑀬 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺.

𑁫𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀉𑀦𑁆𑀦𑀸𑀤𑀺𑀦𑀺𑀬𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀬 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀺𑀬𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀬𑀸𑀦𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸.

𑁫𑁧. 𑀅𑀤𑁆𑀤𑀲𑀸 𑀔𑁄 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀦𑁆𑀥𑀸𑀦𑀁 𑀕𑀳𑀧𑀢𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸 𑀲𑀓𑀁 𑀧𑀭𑀺𑀲𑀁 𑀲𑀡𑁆𑀞𑀸𑀧𑁂𑀲𑀺 𑁋 ‘‘𑀅𑀧𑁆𑀧𑀲𑀤𑁆𑀤𑀸 𑀪𑁄𑀦𑁆𑀢𑁄 𑀳𑁄𑀦𑁆𑀢𑀼, 𑀫𑀸 𑀪𑁄𑀦𑁆𑀢𑁄 𑀲𑀤𑁆𑀤𑀫𑀓𑀢𑁆𑀣. 𑀅𑀬𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀆𑀕𑀘𑁆𑀙𑀢𑀺 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺. 𑀬𑀸𑀯𑀢𑀸 𑀔𑁄 𑀧𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀭𑀸𑀚𑀕𑀳𑁂 𑀧𑀝𑀺𑀯𑀲𑀦𑁆𑀢𑀺, 𑀅𑀬𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺. 𑀅𑀧𑁆𑀧𑀲𑀤𑁆𑀤𑀓𑀸𑀫𑀸 𑀔𑁄 𑀧𑀦𑁂𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀧𑁆𑀧𑀲𑀤𑁆𑀤𑀯𑀺𑀦𑀻𑀢𑀸, 𑀅𑀧𑁆𑀧𑀲𑀤𑁆𑀤𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄. 𑀅𑀧𑁆𑀧𑁂𑀯 𑀦𑀸𑀫 𑀅𑀧𑁆𑀧𑀲𑀤𑁆𑀤𑀁 𑀧𑀭𑀺𑀲𑀁 𑀯𑀺𑀤𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑁫𑁨. 𑀅𑀣 𑀔𑁄 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 𑀬𑁂𑀦 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀣𑀸 𑀔𑁄 𑀇𑀫𑁂 𑀪𑁄𑀦𑁆𑀢𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀉𑀦𑁆𑀦𑀸𑀤𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸. 𑀅𑀜𑁆𑀜𑀣𑀸 𑀔𑁄 [𑀘 (𑀲𑀻. 𑀧𑀻.)] 𑀧𑀦 𑀲𑁄 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻’’𑀢𑀺.

𑁫𑁩. 𑀏𑀯𑀁 𑀯𑀼𑀢𑁆𑀢𑁂 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀦𑁆𑀥𑀸𑀦𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀬𑀕𑁆𑀖𑁂 𑀕𑀳𑀧𑀢𑀺, 𑀚𑀸𑀦𑁂𑀬𑁆𑀬𑀸𑀲𑀺, 𑀓𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀺, 𑀓𑁂𑀦 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺, 𑀓𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀺? 𑀲𑀼𑀜𑁆𑀜𑀸𑀕𑀸𑀭𑀳𑀢𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸 𑀅𑀧𑀭𑀺𑀲𑀸𑀯𑀘𑀭𑁄 𑀲𑀫𑀡𑁄 𑀕𑁄𑀢𑀫𑁄 𑀦𑀸𑀮𑀁 𑀲𑀮𑁆𑀮𑀸𑀧𑀸𑀬. 𑀲𑁄 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀲𑁂𑀯𑀢𑀺 [𑀅𑀦𑁆𑀢𑀧𑀦𑁆𑀢𑀸𑀦𑁂𑀯 (𑀲𑁆𑀬𑀸.)]. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑁄𑀓𑀸𑀡𑀸 𑀧𑀭𑀺𑀬𑀦𑁆𑀢𑀘𑀸𑀭𑀺𑀦𑀻 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀲𑁂𑀯𑀢𑀺. 𑀏𑀯𑀫𑁂𑀯 𑀲𑀼𑀜𑁆𑀜𑀸𑀕𑀸𑀭𑀳𑀢𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸; 𑀅𑀧𑀭𑀺𑀲𑀸𑀯𑀘𑀭𑁄 𑀲𑀫𑀡𑁄 𑀕𑁄𑀢𑀫𑁄; 𑀦𑀸𑀮𑀁 𑀲𑀮𑁆𑀮𑀸𑀧𑀸𑀬. 𑀲𑁄 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀲𑁂𑀯𑀢𑀺. 𑀇𑀗𑁆𑀖, 𑀕𑀳𑀧𑀢𑀺, 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀁 𑀧𑀭𑀺𑀲𑀁 𑀆𑀕𑀘𑁆𑀙𑁂𑀬𑁆𑀬, 𑀏𑀓𑀧𑀜𑁆𑀳𑁂𑀦𑁂𑀯 𑀦𑀁 𑀲𑀁𑀲𑀸𑀤𑁂𑀬𑁆𑀬𑀸𑀫 [𑀲𑀁𑀳𑀭𑁂𑀬𑁆𑀬𑀸𑀫 (𑀓.)], 𑀢𑀼𑀘𑁆𑀙𑀓𑀼𑀫𑁆𑀪𑀻𑀯 𑀦𑀁 𑀫𑀜𑁆𑀜𑁂 𑀑𑀭𑁄𑀥𑁂𑀬𑁆𑀬𑀸𑀫𑀸’’𑀢𑀺.

𑁫𑁪. 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀲𑀦𑁆𑀥𑀸𑀦𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀕𑁆𑀭𑁄𑀥𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀲𑀤𑁆𑀥𑀺𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀪𑀕𑀯𑀸 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀺𑀢𑁆𑀯𑀸 𑀬𑁂𑀦 𑀲𑀼𑀫𑀸𑀕𑀥𑀸𑀬 𑀢𑀻𑀭𑁂 𑀫𑁄𑀭𑀦𑀺𑀯𑀸𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀫𑀸𑀕𑀥𑀸𑀬 𑀢𑀻𑀭𑁂 𑀫𑁄𑀭𑀦𑀺𑀯𑀸𑀧𑁂 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀲𑀼𑀫𑀸𑀕𑀥𑀸𑀬 𑀢𑀻𑀭𑁂 𑀫𑁄𑀭𑀦𑀺𑀯𑀸𑀧𑁂 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀲𑀓𑀁 𑀧𑀭𑀺𑀲𑀁 𑀲𑀡𑁆𑀞𑀸𑀧𑁂𑀲𑀺 𑁋 ‘‘𑀅𑀧𑁆𑀧𑀲𑀤𑁆𑀤𑀸 𑀪𑁄𑀦𑁆𑀢𑁄 𑀳𑁄𑀦𑁆𑀢𑀼, 𑀫𑀸 𑀪𑁄𑀦𑁆𑀢𑁄 𑀲𑀤𑁆𑀤𑀫𑀓𑀢𑁆𑀣, 𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀼𑀫𑀸𑀕𑀥𑀸𑀬 𑀢𑀻𑀭𑁂 𑀫𑁄𑀭𑀦𑀺𑀯𑀸𑀧𑁂 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀅𑀧𑁆𑀧𑀲𑀤𑁆𑀤𑀓𑀸𑀫𑁄 𑀔𑁄 𑀧𑀦 𑀲𑁄 𑀆𑀬𑀲𑁆𑀫𑀸, 𑀅𑀧𑁆𑀧𑀲𑀤𑁆𑀤𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀅𑀧𑁆𑀧𑁂𑀯 𑀦𑀸𑀫 𑀅𑀧𑁆𑀧𑀲𑀤𑁆𑀤𑀁 𑀧𑀭𑀺𑀲𑀁 𑀯𑀺𑀤𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬. 𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀁 𑀧𑀭𑀺𑀲𑀁 𑀆𑀕𑀘𑁆𑀙𑁂𑀬𑁆𑀬, 𑀇𑀫𑀁 𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸𑀫 𑁋 ‘𑀓𑁄 𑀦𑀸𑀫 𑀲𑁄, 𑀪𑀦𑁆𑀢𑁂, 𑀪𑀕𑀯𑀢𑁄 𑀥𑀫𑁆𑀫𑁄, 𑀬𑁂𑀦 𑀪𑀕𑀯𑀸 𑀲𑀸𑀯𑀓𑁂 𑀯𑀺𑀦𑁂𑀢𑀺, 𑀬𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸 𑀯𑀺𑀦𑀻𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀧𑀝𑀺𑀚𑀸𑀦𑀦𑁆𑀢𑀺 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑁄

𑁫𑁫. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸, 𑀲𑁆𑀯𑀸𑀕𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄. 𑀘𑀺𑀭𑀲𑁆𑀲𑀁 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀦𑀺𑀲𑀻𑀤𑀢𑀼, 𑀪𑀦𑁆𑀢𑁂, 𑀪𑀕𑀯𑀸, 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀕𑁆𑀭𑁄𑀥𑁄𑀧𑀺 𑀔𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀜𑁆𑀜𑀢𑀭𑀁 𑀦𑀻𑀘𑀸𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀸𑀬 𑀦𑀼𑀢𑁆𑀣, 𑀦𑀺𑀕𑁆𑀭𑁄𑀥, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘, ‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀅𑀤𑁆𑀤𑀲𑀸𑀫 𑀪𑀕𑀯𑀦𑁆𑀢𑀁 𑀲𑀼𑀫𑀸𑀕𑀥𑀸𑀬 𑀢𑀻𑀭𑁂 𑀫𑁄𑀭𑀦𑀺𑀯𑀸𑀧𑁂 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀏𑀯𑀁 𑀅𑀯𑁄𑀘𑀼𑀫𑁆𑀳𑀸 𑁋 ‘𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀁 𑀧𑀭𑀺𑀲𑀁 𑀆𑀕𑀘𑁆𑀙𑁂𑀬𑁆𑀬, 𑀇𑀫𑀁 𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸𑀫 𑁋 𑀓𑁄 𑀦𑀸𑀫 𑀲𑁄, 𑀪𑀦𑁆𑀢𑁂, 𑀪𑀕𑀯𑀢𑁄 𑀥𑀫𑁆𑀫𑁄, 𑀬𑁂𑀦 𑀪𑀕𑀯𑀸 𑀲𑀸𑀯𑀓𑁂 𑀯𑀺𑀦𑁂𑀢𑀺, 𑀬𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸 𑀯𑀺𑀦𑀻𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀧𑀝𑀺𑀚𑀸𑀦𑀦𑁆𑀢𑀺 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬’𑀦𑁆𑀢𑀺? 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸; 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑁫𑁬. ‘‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀁, 𑀦𑀺𑀕𑁆𑀭𑁄𑀥, 𑀢𑀬𑀸 𑀅𑀜𑁆𑀜𑀤𑀺𑀝𑁆𑀞𑀺𑀓𑁂𑀦 𑀅𑀜𑁆𑀜𑀔𑀦𑁆𑀢𑀺𑀓𑁂𑀦 𑀅𑀜𑁆𑀜𑀭𑀼𑀘𑀺𑀓𑁂𑀦 𑀅𑀜𑁆𑀜𑀢𑁆𑀭𑀸𑀬𑁄𑀕𑁂𑀦 𑀅𑀜𑁆𑀜𑀢𑁆𑀭𑀸𑀘𑀭𑀺𑀬𑀓𑁂𑀦, 𑀬𑁂𑀦𑀸𑀳𑀁 𑀲𑀸𑀯𑀓𑁂 𑀯𑀺𑀦𑁂𑀫𑀺, 𑀬𑁂𑀦 𑀫𑀬𑀸 𑀲𑀸𑀯𑀓𑀸 𑀯𑀺𑀦𑀻𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀧𑀝𑀺𑀚𑀸𑀦𑀦𑁆𑀢𑀺 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀗𑁆𑀖 𑀢𑁆𑀯𑀁 𑀫𑀁, 𑀦𑀺𑀕𑁆𑀭𑁄𑀥, 𑀲𑀓𑁂 𑀆𑀘𑀭𑀺𑀬𑀓𑁂 𑀅𑀥𑀺𑀚𑁂𑀕𑀼𑀘𑁆𑀙𑁂 𑀧𑀜𑁆𑀳𑀁 𑀧𑀼𑀘𑁆𑀙 𑁋 ‘𑀓𑀣𑀁 𑀲𑀦𑁆𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺, 𑀓𑀣𑀁 𑀅𑀧𑀭𑀺𑀧𑀼𑀡𑁆𑀡𑀸’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀉𑀦𑁆𑀦𑀸𑀤𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀲𑀓𑀯𑀸𑀤𑀁 𑀞𑀧𑁂𑀲𑁆𑀲𑀢𑀺, 𑀧𑀭𑀯𑀸𑀤𑁂𑀦 𑀧𑀯𑀸𑀭𑁂𑀲𑁆𑀲𑀢𑀻’’𑀢𑀺.

𑁫𑁭. 𑀅𑀣 𑀔𑁄 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀅𑀧𑁆𑀧𑀲𑀤𑁆𑀤𑁂 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑀁 𑀔𑁄, 𑀪𑀦𑁆𑀢𑁂, 𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀸 [𑀢𑀭𑁄𑀚𑀺𑀕𑀼𑀘𑁆𑀙𑀁𑀲𑀸𑀭𑁄𑀤𑀸 (𑀓.)] 𑀢𑀧𑁄𑀚𑀺𑀕𑀼𑀘𑁆𑀙𑀸𑀲𑀸𑀭𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀅𑀮𑁆𑀮𑀻𑀦𑀸 𑀯𑀺𑀳𑀭𑀸𑀫. 𑀓𑀣𑀁 𑀲𑀦𑁆𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺, 𑀓𑀣𑀁 𑀅𑀧𑀭𑀺𑀧𑀼𑀡𑁆𑀡𑀸’’𑀢𑀺?

‘‘𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀅𑀘𑁂𑀮𑀓𑁄 𑀳𑁄𑀢𑀺 𑀫𑀼𑀢𑁆𑀢𑀸𑀘𑀸𑀭𑁄, 𑀳𑀢𑁆𑀣𑀸𑀧𑀮𑁂𑀔𑀦𑁄 [𑀳𑀢𑁆𑀣𑀸𑀯𑀮𑁂𑀔𑀦𑁄 (𑀲𑁆𑀬𑀸.)], 𑀦 𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄, 𑀦 𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄, 𑀦𑀸𑀪𑀺𑀳𑀝𑀁, 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁, 𑀦 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀓𑀴𑁄𑀧𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀏𑀴𑀓𑀫𑀦𑁆𑀢𑀭𑀁, 𑀦 𑀤𑀡𑁆𑀟𑀫𑀦𑁆𑀢𑀭𑀁, 𑀦 𑀫𑀼𑀲𑀮𑀫𑀦𑁆𑀢𑀭𑀁, 𑀦 𑀤𑁆𑀯𑀺𑀦𑁆𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀦 𑀕𑀩𑁆𑀪𑀺𑀦𑀺𑀬𑀸, 𑀦 𑀧𑀸𑀬𑀫𑀸𑀦𑀸𑀬, 𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬, 𑀦 𑀲𑀗𑁆𑀓𑀺𑀢𑁆𑀢𑀻𑀲𑀼, 𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦 𑀬𑀢𑁆𑀣 𑀫𑀓𑁆𑀔𑀺𑀓𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻, 𑀦 𑀫𑀘𑁆𑀙𑀁, 𑀦 𑀫𑀁𑀲𑀁, 𑀦 𑀲𑀼𑀭𑀁, 𑀦 𑀫𑁂𑀭𑀬𑀁, 𑀦 𑀣𑀼𑀲𑁄𑀤𑀓𑀁 𑀧𑀺𑀯𑀢𑀺, 𑀲𑁄 𑀏𑀓𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀏𑀓𑀸𑀮𑁄𑀧𑀺𑀓𑁄, 𑀤𑁆𑀯𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀤𑁆𑀯𑀸𑀮𑁄𑀧𑀺𑀓𑁄, 𑀲𑀢𑁆𑀢𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀲𑀢𑁆𑀢𑀸𑀮𑁄𑀧𑀺𑀓𑁄, 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸 𑀬𑀸𑀧𑁂𑀢𑀺, 𑀤𑁆𑀯𑀻𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺, 𑀲𑀢𑁆𑀢𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺; 𑀏𑀓𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀤𑁆𑀯𑀻𑀳𑀺𑀓𑀫𑁆𑀧𑀺 [𑀤𑁆𑀯𑀸𑀳𑀺𑀓𑀁𑀧𑀺 (𑀲𑀻. 𑀲𑁆𑀬𑀸.)] 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀲𑀸𑀫𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀦𑀻𑀯𑀸𑀭𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀤𑀤𑁆𑀤𑀼𑀮𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀳𑀝𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀓𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀆𑀘𑀸𑀫𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀧𑀺𑀜𑁆𑀜𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀢𑀺𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀕𑁄𑀫𑀬𑀪𑀓𑁆𑀔𑁄 𑀯𑀸 𑀳𑁄𑀢𑀺; 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻. 𑀲𑁄 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀙𑀯𑀤𑀼𑀲𑁆𑀲𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀧𑀁𑀲𑀼𑀓𑀽𑀮𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀢𑀺𑀭𑀻𑀝𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀫𑁆𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀓𑁆𑀔𑀺𑀧𑀫𑁆𑀧𑀺 𑀥𑀸𑀭𑁂𑀢𑀺, 𑀓𑀼𑀲𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀨𑀮𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀴𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀉𑀮𑀽𑀓𑀧𑀓𑁆𑀔𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀫𑀲𑁆𑀲𑀼𑀮𑁄𑀘𑀓𑁄𑀧𑀺 𑀳𑁄𑀢𑀺 𑀓𑁂𑀲𑀫𑀲𑁆𑀲𑀼𑀮𑁄𑀘𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀉𑀩𑁆𑀪𑀝𑁆𑀞𑀓𑁄𑀧𑀺 [𑀉𑀪𑀝𑁆𑀞𑀓𑁄𑀧𑀺 (𑀲𑁆𑀬𑀸.), 𑀉𑀩𑁆𑀪𑀝𑁆𑀞𑀺𑀓𑁄𑀧𑀺 (𑀓.)] 𑀳𑁄𑀢𑀺 𑀆𑀲𑀦𑀧𑀝𑀺𑀓𑁆𑀔𑀺𑀢𑁆𑀢𑁄, 𑀉𑀓𑁆𑀓𑀼𑀝𑀺𑀓𑁄𑀧𑀺 𑀳𑁄𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄, 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀧𑀺 𑀳𑁄𑀢𑀺 𑀓𑀡𑁆𑀝𑀓𑀸𑀧𑀲𑁆𑀲𑀬𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀨𑀮𑀓𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀣𑀡𑁆𑀟𑀺𑀮𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀏𑀓𑀧𑀲𑁆𑀲𑀬𑀺𑀓𑁄𑀧𑀺 𑀳𑁄𑀢𑀺 𑀭𑀚𑁄𑀚𑀮𑁆𑀮𑀥𑀭𑁄, 𑀅𑀩𑁆𑀪𑁄𑀓𑀸𑀲𑀺𑀓𑁄𑀧𑀺 𑀳𑁄𑀢𑀺 𑀬𑀣𑀸𑀲𑀦𑁆𑀣𑀢𑀺𑀓𑁄, 𑀯𑁂𑀓𑀝𑀺𑀓𑁄𑀧𑀺 𑀳𑁄𑀢𑀺 𑀯𑀺𑀓𑀝𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀅𑀧𑀸𑀦𑀓𑁄𑀧𑀺 𑀳𑁄𑀢𑀺 𑀅𑀧𑀸𑀦𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄, 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀺𑀕𑁆𑀭𑁄𑀥, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀧𑀼𑀡𑁆𑀡𑀸 𑀯𑀸 𑀳𑁄𑀢𑀺 𑀅𑀧𑀭𑀺𑀧𑀼𑀡𑁆𑀡𑀸 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺, 𑀦𑁄 𑀅𑀧𑀭𑀺𑀧𑀼𑀡𑁆𑀡𑀸’’𑀢𑀺. ‘‘𑀏𑀯𑀁 𑀧𑀭𑀺𑀧𑀼𑀡𑁆𑀡𑀸𑀬𑀧𑀺 𑀔𑁄 𑀅𑀳𑀁, 𑀦𑀺𑀕𑁆𑀭𑁄𑀥, 𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀅𑀦𑁂𑀓𑀯𑀺𑀳𑀺𑀢𑁂 𑀉𑀧𑀓𑁆𑀓𑀺𑀮𑁂𑀲𑁂 𑀯𑀤𑀸𑀫𑀻’’𑀢𑀺.

𑀉𑀧𑀓𑁆𑀓𑀺𑀮𑁂𑀲𑁄

𑁫𑁮. ‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀏𑀯𑀁 𑀧𑀭𑀺𑀧𑀼𑀡𑁆𑀡𑀸𑀬 𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀅𑀦𑁂𑀓𑀯𑀺𑀳𑀺𑀢𑁂 𑀉𑀧𑀓𑁆𑀓𑀺𑀮𑁂𑀲𑁂 𑀯𑀤𑀢𑀻’’𑀢𑀺? ‘‘𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀧𑀭𑀁 𑀯𑀫𑁆𑀪𑁂𑀢𑀺. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀫𑀚𑁆𑀚𑀢𑀺 𑀫𑀼𑀘𑁆𑀙𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺 [𑀫𑀤𑀫𑀸𑀧𑀚𑁆𑀚𑀢𑀺 (𑀲𑁆𑀬𑀸.)]. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀫𑀚𑁆𑀚𑀢𑀺 𑀫𑀼𑀘𑁆𑀙𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

𑁫𑁯. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀧𑀭𑀁 𑀯𑀫𑁆𑀪𑁂𑀢𑀺. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀧𑀭𑀁 𑀯𑀫𑁆𑀪𑁂𑀢𑀺. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀫𑀚𑁆𑀚𑀢𑀺 𑀫𑀼𑀘𑁆𑀙𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀫𑀚𑁆𑀚𑀢𑀺 𑀫𑀼𑀘𑁆𑀙𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

𑁬𑁦. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀪𑁄𑀚𑀦𑁂𑀲𑀼 𑀯𑁄𑀤𑀸𑀲𑀁 𑀆𑀧𑀚𑁆𑀚𑀢𑀺 𑁋 ‘𑀇𑀤𑀁 𑀫𑁂 𑀔𑀫𑀢𑀺, 𑀇𑀤𑀁 𑀫𑁂 𑀦𑀓𑁆𑀔𑀫𑀢𑀻’𑀢𑀺. 𑀲𑁄 𑀬𑀜𑁆𑀘 [𑀬𑀁 𑀳𑀺 (𑀲𑀻. 𑀧𑀻.)] 𑀔𑁆𑀯𑀲𑁆𑀲 𑀦𑀓𑁆𑀔𑀫𑀢𑀺, 𑀢𑀁 𑀲𑀸𑀧𑁂𑀓𑁆𑀔𑁄 𑀧𑀚𑀳𑀢𑀺. 𑀬𑀁 𑀧𑀦𑀲𑁆𑀲 𑀔𑀫𑀢𑀺, 𑀢𑀁 𑀕𑀥𑀺𑀢𑁄 [𑀕𑀣𑀺𑀢𑁄 (𑀲𑀻. 𑀧𑀻.)] 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑀸𑀧𑀦𑁆𑀦𑁄 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀓𑀦𑁆𑀢𑀺𑀳𑁂𑀢𑀼 𑁋 ‘𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀫𑀁 𑀭𑀸𑀚𑀸𑀦𑁄 𑀭𑀸𑀚𑀫𑀳𑀸𑀫𑀢𑁆𑀢𑀸 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀕𑀳𑀧𑀢𑀺𑀓𑀸 𑀢𑀺𑀢𑁆𑀣𑀺𑀬𑀸’𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

𑁬𑁧. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀅𑀜𑁆𑀜𑀢𑀭𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀅𑀧𑀲𑀸𑀤𑁂𑀢𑀸 [𑀅𑀧𑀲𑀸𑀭𑁂𑀢𑀸 (𑀓.)] 𑀳𑁄𑀢𑀺 𑁋 ‘𑀓𑀺𑀁 𑀧𑀦𑀸𑀬𑀁 𑀲𑀫𑁆𑀩𑀳𑀼𑀮𑀸𑀚𑀻𑀯𑁄 [𑀩𑀳𑀼𑀮𑀸𑀚𑀻𑀯𑁄 (𑀲𑀻. 𑀧𑀻.)] 𑀲𑀩𑁆𑀩𑀁 𑀲𑀁𑀪𑀓𑁆𑀔𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀁, 𑀅𑀲𑀦𑀺𑀯𑀺𑀘𑀓𑁆𑀓𑀁 𑀤𑀦𑁆𑀢𑀓𑀽𑀝𑀁, 𑀲𑀫𑀡𑀧𑁆𑀧𑀯𑀸𑀤𑁂𑀦𑀸’𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀧𑀲𑁆𑀲𑀢𑀺 𑀅𑀜𑁆𑀜𑀢𑀭𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀓𑀼𑀮𑁂𑀲𑀼 𑀲𑀓𑁆𑀓𑀭𑀺𑀬𑀫𑀸𑀦𑀁 𑀕𑀭𑀼𑀓𑀭𑀺𑀬𑀫𑀸𑀦𑀁 𑀫𑀸𑀦𑀺𑀬𑀫𑀸𑀦𑀁 𑀧𑀽𑀚𑀺𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀇𑀫𑀜𑁆𑀳𑀺 𑀦𑀸𑀫 𑀲𑀫𑁆𑀩𑀳𑀼𑀮𑀸𑀚𑀻𑀯𑀁 𑀓𑀼𑀮𑁂𑀲𑀼 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺. 𑀫𑀁 𑀧𑀦 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀓𑀼𑀮𑁂𑀲𑀼 𑀦 𑀲𑀓𑁆𑀓𑀭𑁄𑀦𑁆𑀢𑀺 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀦 𑀫𑀸𑀦𑁂𑀦𑁆𑀢𑀺 𑀦 𑀧𑀽𑀚𑁂𑀦𑁆𑀢𑀻’𑀢𑀺, 𑀇𑀢𑀺 𑀲𑁄 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀓𑀼𑀮𑁂𑀲𑀼 𑀉𑀧𑁆𑀧𑀸𑀤𑁂𑀢𑀸 𑀳𑁄𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

𑁬𑁨. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀆𑀧𑀸𑀣𑀓𑀦𑀺𑀲𑀸𑀤𑀻 𑀳𑁄𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑀬𑀫𑀸𑀦𑁄 𑀓𑀼𑀮𑁂𑀲𑀼 𑀘𑀭𑀢𑀺 𑁋 ‘𑀇𑀤𑀫𑁆𑀧𑀺 𑀫𑁂 𑀢𑀧𑀲𑁆𑀫𑀺𑀁 𑀇𑀤𑀫𑁆𑀧𑀺 𑀫𑁂 𑀢𑀧𑀲𑁆𑀫𑀺’𑀦𑁆𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀓𑀺𑀜𑁆𑀘𑀺𑀤𑁂𑀯 𑀧𑀝𑀺𑀘𑁆𑀙𑀦𑁆𑀦𑀁 𑀲𑁂𑀯𑀢𑀺. 𑀲𑁄 ‘𑀔𑀫𑀢𑀺 𑀢𑁂 𑀇𑀤’𑀦𑁆𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀓𑁆𑀔𑀫𑀫𑀸𑀦𑀁 𑀆𑀳 𑁋 ‘𑀔𑀫𑀢𑀻’𑀢𑀺. 𑀔𑀫𑀫𑀸𑀦𑀁 𑀆𑀳 𑁋 ‘𑀦𑀓𑁆𑀔𑀫𑀢𑀻’𑀢𑀺. 𑀇𑀢𑀺 𑀲𑁄 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀲𑀦𑁆𑀢𑀁𑀬𑁂𑀯 𑀧𑀭𑀺𑀬𑀸𑀬𑀁 𑀅𑀦𑀼𑀜𑁆𑀜𑁂𑀬𑁆𑀬𑀁 𑀦𑀸𑀦𑀼𑀚𑀸𑀦𑀸𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

𑁬𑁩. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻 [𑀧𑀮𑀸𑀲𑀻 (𑀲𑀻. 𑀲𑁆𑀬𑀸. 𑀧𑀻.)] …𑀧𑁂… 𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻… 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻… 𑀣𑀤𑁆𑀥𑁄 𑀳𑁄𑀢𑀺 𑀅𑀢𑀺𑀫𑀸𑀦𑀻… 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑁄… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄… 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀅𑀬𑀫𑁆𑀧𑀺 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀺𑀕𑁆𑀭𑁄𑀥, 𑀬𑀤𑀺𑀫𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 [𑀢𑀧𑁄𑀚𑀺𑀕𑀼𑀘𑁆𑀙𑀸𑀬 (?)] 𑀉𑀧𑀓𑁆𑀓𑀺𑀮𑁂𑀲𑀸 𑀯𑀸 𑀅𑀦𑀼𑀧𑀓𑁆𑀓𑀺𑀮𑁂𑀲𑀸 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄 𑀇𑀫𑁂, 𑀪𑀦𑁆𑀢𑁂, 𑀢𑀧𑁄𑀚𑀺𑀕𑀼𑀘𑁆𑀙𑀸 [𑀢𑀧𑁄𑀚𑀺𑀕𑀼𑀘𑁆𑀙𑀸𑀬 (?)] 𑀉𑀧𑀓𑁆𑀓𑀺𑀮𑁂𑀲𑀸 [𑀉𑀧𑀓𑁆𑀓𑀺𑀮𑁂𑀲𑀸 𑀳𑁄𑀢𑀺 (𑀓.)], 𑀦𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀯𑀺𑀚𑁆𑀚𑀢𑀺 𑀬𑀁 𑀇𑀥𑁂𑀓𑀘𑁆𑀘𑁄 𑀢𑀧𑀲𑁆𑀲𑀻 𑀲𑀩𑁆𑀩𑁂𑀳𑁂𑀯 𑀇𑀫𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲; 𑀓𑁄 𑀧𑀦 𑀯𑀸𑀤𑁄 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦𑀸’’𑀢𑀺.

𑀧𑀭𑀺𑀲𑀼𑀤𑁆𑀥𑀧𑀧𑀝𑀺𑀓𑀧𑁆𑀧𑀢𑁆𑀢𑀓𑀣𑀸

𑁬𑁪. ‘‘𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀦 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀦 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀦 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀦 𑀧𑀭𑀁 𑀯𑀫𑁆𑀪𑁂𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀦 𑀫𑀚𑁆𑀚𑀢𑀺 𑀦 𑀫𑀼𑀘𑁆𑀙𑀢𑀺 𑀦 𑀧𑀫𑀸𑀤𑀫𑀸𑀧𑀚𑁆𑀚𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

𑁬𑁫. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀦 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀦 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀺 𑀦 𑀧𑀭𑀁 𑀯𑀫𑁆𑀪𑁂𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀧𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦 𑀢𑀧𑀲𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀦 𑀫𑀚𑁆𑀚𑀢𑀺 𑀦 𑀫𑀼𑀘𑁆𑀙𑀢𑀺 𑀦 𑀧𑀫𑀸𑀤𑀫𑀸𑀧𑀚𑁆𑀚𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

𑁬𑁬. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀪𑁄𑀚𑀦𑁂𑀲𑀼 𑀦 𑀯𑁄𑀤𑀸𑀲𑀁 𑀆𑀧𑀚𑁆𑀚𑀢𑀺 𑁋 ‘𑀇𑀤𑀁 𑀫𑁂 𑀔𑀫𑀢𑀺, 𑀇𑀤𑀁 𑀫𑁂 𑀦𑀓𑁆𑀔𑀫𑀢𑀻’𑀢𑀺. 𑀲𑁄 𑀬𑀜𑁆𑀘 𑀔𑁆𑀯𑀲𑁆𑀲 𑀦𑀓𑁆𑀔𑀫𑀢𑀺, 𑀢𑀁 𑀅𑀦𑀧𑁂𑀓𑁆𑀔𑁄 𑀧𑀚𑀳𑀢𑀺. 𑀬𑀁 𑀧𑀦𑀲𑁆𑀲 𑀔𑀫𑀢𑀺, 𑀢𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑀸𑀧𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀦 𑀢𑀧𑀁 𑀲𑀫𑀸𑀤𑀺𑀬𑀢𑀺 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀓𑀦𑁆𑀢𑀺𑀳𑁂𑀢𑀼 𑁋 ‘𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀫𑀁 𑀭𑀸𑀚𑀸𑀦𑁄 𑀭𑀸𑀚𑀫𑀳𑀸𑀫𑀢𑁆𑀢𑀸 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀕𑀳𑀧𑀢𑀺𑀓𑀸 𑀢𑀺𑀢𑁆𑀣𑀺𑀬𑀸’𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

𑁬𑁭. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀅𑀜𑁆𑀜𑀢𑀭𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀦𑀸𑀧𑀲𑀸𑀤𑁂𑀢𑀸 𑀳𑁄𑀢𑀺 𑁋 ‘𑀓𑀺𑀁 𑀧𑀦𑀸𑀬𑀁 𑀲𑀫𑁆𑀩𑀳𑀼𑀮𑀸𑀚𑀻𑀯𑁄 𑀲𑀩𑁆𑀩𑀁 𑀲𑀁𑀪𑀓𑁆𑀔𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀁, 𑀅𑀲𑀦𑀺𑀯𑀺𑀘𑀓𑁆𑀓𑀁 𑀤𑀦𑁆𑀢𑀓𑀽𑀝𑀁, 𑀲𑀫𑀡𑀧𑁆𑀧𑀯𑀸𑀤𑁂𑀦𑀸’𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀧𑀲𑁆𑀲𑀢𑀺 𑀅𑀜𑁆𑀜𑀢𑀭𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀓𑀼𑀮𑁂𑀲𑀼 𑀲𑀓𑁆𑀓𑀭𑀺𑀬𑀫𑀸𑀦𑀁 𑀕𑀭𑀼 𑀓𑀭𑀺𑀬𑀫𑀸𑀦𑀁 𑀫𑀸𑀦𑀺𑀬𑀫𑀸𑀦𑀁 𑀧𑀽𑀚𑀺𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀢𑀲𑁆𑀲 𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀫𑀜𑁆𑀳𑀺 𑀦𑀸𑀫 𑀲𑀫𑁆𑀩𑀳𑀼𑀮𑀸𑀚𑀻𑀯𑀁 𑀓𑀼𑀮𑁂𑀲𑀼 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺. 𑀫𑀁 𑀧𑀦 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀓𑀼𑀮𑁂𑀲𑀼 𑀦 𑀲𑀓𑁆𑀓𑀭𑁄𑀦𑁆𑀢𑀺 𑀦 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀦 𑀫𑀸𑀦𑁂𑀦𑁆𑀢𑀺 𑀦 𑀧𑀽𑀚𑁂𑀦𑁆𑀢𑀻’𑀢𑀺, 𑀇𑀢𑀺 𑀲𑁄 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀓𑀼𑀮𑁂𑀲𑀼 𑀦𑀼𑀧𑁆𑀧𑀸𑀤𑁂𑀢𑀸 𑀳𑁄𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

𑁬𑁮. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀦 𑀆𑀧𑀸𑀣𑀓𑀦𑀺𑀲𑀸𑀤𑀻 𑀳𑁄𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀦 𑀅𑀢𑁆𑀢𑀸𑀦𑀁 𑀅𑀤𑀲𑁆𑀲𑀬𑀫𑀸𑀦𑁄 𑀓𑀼𑀮𑁂𑀲𑀼 𑀘𑀭𑀢𑀺 𑁋 ‘𑀇𑀤𑀫𑁆𑀧𑀺 𑀫𑁂 𑀢𑀧𑀲𑁆𑀫𑀺𑀁, 𑀇𑀤𑀫𑁆𑀧𑀺 𑀫𑁂 𑀢𑀧𑀲𑁆𑀫𑀺’𑀦𑁆𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀦 𑀓𑀜𑁆𑀘𑀺𑀤𑁂𑀯 𑀧𑀝𑀺𑀘𑁆𑀙𑀦𑁆𑀦𑀁 𑀲𑁂𑀯𑀢𑀺, 𑀲𑁄 𑁋 ‘𑀔𑀫𑀢𑀺 𑀢𑁂 𑀇𑀤’𑀦𑁆𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀓𑁆𑀔𑀫𑀫𑀸𑀦𑀁 𑀆𑀳 𑁋 ‘𑀦𑀓𑁆𑀔𑀫𑀢𑀻’𑀢𑀺. 𑀔𑀫𑀫𑀸𑀦𑀁 𑀆𑀳 𑁋 ‘𑀔𑀫𑀢𑀻’𑀢𑀺. 𑀇𑀢𑀺 𑀲𑁄 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀸𑀲𑀺𑀢𑀸 𑀳𑁄𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀢𑀣𑀸𑀕𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑀸𑀯𑀓𑀲𑁆𑀲 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀲𑀦𑁆𑀢𑀁𑀬𑁂𑀯 𑀧𑀭𑀺𑀬𑀸𑀬𑀁 𑀅𑀦𑀼𑀜𑁆𑀜𑁂𑀬𑁆𑀬𑀁 𑀅𑀦𑀼𑀚𑀸𑀦𑀸𑀢𑀺…𑀧𑁂… 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

𑁬𑁯. ‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀅𑀓𑁆𑀓𑁄𑀥𑀦𑁄 𑀳𑁄𑀢𑀺 𑀅𑀦𑀼𑀧𑀦𑀸𑀳𑀻. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀅𑀓𑁆𑀓𑁄𑀥𑀦𑁄 𑀳𑁄𑀢𑀺 𑀅𑀦𑀼𑀧𑀦𑀸𑀳𑀻 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀅𑀫𑀓𑁆𑀔𑀻 𑀳𑁄𑀢𑀺 𑀅𑀧𑀴𑀸𑀲𑀻…𑀧𑁂… 𑀅𑀦𑀺𑀲𑁆𑀲𑀼𑀓𑀻 𑀳𑁄𑀢𑀺 𑀅𑀫𑀘𑁆𑀙𑀭𑀻… 𑀅𑀲𑀞𑁄 𑀳𑁄𑀢𑀺 𑀅𑀫𑀸𑀬𑀸𑀯𑀻… 𑀅𑀢𑁆𑀣𑀤𑁆𑀥𑁄 𑀳𑁄𑀢𑀺 𑀅𑀦𑀢𑀺𑀫𑀸𑀦𑀻… 𑀦 𑀧𑀸𑀧𑀺𑀘𑁆𑀙𑁄 𑀳𑁄𑀢𑀺 𑀦 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑁄… 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺 𑀦 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄… 𑀦 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀦 𑀆𑀥𑀸𑀦𑀕𑁆𑀕𑀸𑀳𑀻 𑀲𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑀫𑁆𑀧𑀺, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀦 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻 𑀳𑁄𑀢𑀺 𑀦 𑀆𑀥𑀸𑀦𑀕𑁆𑀕𑀸𑀳𑀻 𑀲𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀺𑀕𑁆𑀭𑁄𑀥, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀯𑀸 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀸 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺 𑀦𑁄 𑀅𑀧𑀭𑀺𑀲𑀼𑀤𑁆𑀥𑀸, 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀲𑀸𑀭𑀧𑁆𑀧𑀢𑁆𑀢𑀸 𑀘𑀸’’𑀢𑀺. ‘‘𑀦 𑀔𑁄, 𑀦𑀺𑀕𑁆𑀭𑁄𑀥, 𑀏𑀢𑁆𑀢𑀸𑀯𑀢𑀸 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘; 𑀅𑀧𑀺 𑀘 𑀔𑁄 𑀧𑀧𑀝𑀺𑀓𑀧𑁆𑀧𑀢𑁆𑀢𑀸 [𑀧𑀧𑁆𑀧𑀝𑀺𑀓𑀧𑀢𑁆𑀢𑀸 (𑀓.)] 𑀳𑁄𑀢𑀻’’𑀢𑀺.

𑀧𑀭𑀺𑀲𑀼𑀤𑁆𑀥𑀢𑀘𑀧𑁆𑀧𑀢𑁆𑀢𑀓𑀣𑀸

𑁭𑁦. ‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘? 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀅𑀕𑁆𑀕𑀜𑁆𑀜𑁂𑀯 𑀧𑀸𑀧𑁂𑀢𑀼, 𑀲𑀸𑀭𑀜𑁆𑀜𑁂𑀯 𑀧𑀸𑀧𑁂𑀢𑀽’’𑀢𑀺. ‘‘𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺. 𑀓𑀣𑀜𑁆𑀘, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺? 𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀦 𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀺 [𑀅𑀢𑀺𑀧𑀸𑀧𑁂𑀢𑀺 (𑀓. 𑀲𑀻. 𑀧𑀻. 𑀓.)], 𑀦 𑀧𑀸𑀡𑀁 𑀅𑀢𑀺𑀧𑀸𑀢𑀬𑀢𑀺, 𑀦 𑀧𑀸𑀡𑀫𑀢𑀺𑀧𑀸𑀢𑀬𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺. 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀸𑀧𑁂𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺. 𑀦 𑀫𑀼𑀲𑀸 𑀪𑀡𑀢𑀺, 𑀦 𑀫𑀼𑀲𑀸 𑀪𑀡𑀸𑀧𑁂𑀢𑀺, 𑀦 𑀫𑀼𑀲𑀸 𑀪𑀡𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺. 𑀦 𑀪𑀸𑀯𑀺𑀢𑀫𑀸𑀲𑀻𑀲𑀢𑀺 [𑀦 𑀪𑀸𑀯𑀺𑀢𑀫𑀸𑀲𑀺𑀁 𑀲𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀦 𑀪𑀸𑀯𑀺𑀢𑀫𑀸𑀲𑀻𑀲𑀸𑀧𑁂𑀢𑀺, 𑀦 𑀪𑀸𑀯𑀺𑀢𑀫𑀸𑀲𑀻𑀲𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺. 𑀏𑀯𑀁 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺.

‘‘𑀬𑀢𑁄 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺, 𑀅𑀤𑀼𑀁 𑀘𑀲𑁆𑀲 𑀳𑁄𑀢𑀺 𑀢𑀧𑀲𑁆𑀲𑀺𑀢𑀸𑀬. 𑀲𑁄 𑀅𑀪𑀺𑀳𑀭𑀢𑀺 𑀦𑁄 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀩𑁆𑀬𑀸𑀧𑀸𑀤𑀧𑁆𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻, 𑀩𑁆𑀬𑀸𑀧𑀸𑀤𑀧𑁆𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀣𑀺𑀦𑀫𑀺𑀤𑁆𑀥𑀁 [𑀣𑀻𑀦𑀫𑀺𑀤𑁆𑀥𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺.

𑁭𑁧. ‘‘𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀣𑀸 𑀤𑀼𑀢𑀺𑀬𑀁. 𑀢𑀣𑀸 𑀢𑀢𑀺𑀬𑀁. 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀣𑀸 𑀤𑀼𑀢𑀺𑀬𑀁. 𑀢𑀣𑀸 𑀢𑀢𑀺𑀬𑀁. 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀺𑀕𑁆𑀭𑁄𑀥. 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀯𑀸 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀸 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺 𑀦𑁄 𑀅𑀧𑀭𑀺𑀲𑀼𑀤𑁆𑀥𑀸, 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀲𑀸𑀭𑀧𑁆𑀧𑀢𑁆𑀢𑀸 𑀘𑀸’’𑀢𑀺. ‘‘𑀦 𑀔𑁄, 𑀦𑀺𑀕𑁆𑀭𑁄𑀥, 𑀏𑀢𑁆𑀢𑀸𑀯𑀢𑀸 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘; 𑀅𑀧𑀺 𑀘 𑀔𑁄 𑀢𑀘𑀧𑁆𑀧𑀢𑁆𑀢𑀸 𑀳𑁄𑀢𑀻’’𑀢𑀺.

𑀧𑀭𑀺𑀲𑀼𑀤𑁆𑀥𑀨𑁂𑀕𑁆𑀕𑀼𑀧𑁆𑀧𑀢𑁆𑀢𑀓𑀣𑀸

𑁭𑁨. ‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘? 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀅𑀕𑁆𑀕𑀜𑁆𑀜𑁂𑀯 𑀧𑀸𑀧𑁂𑀢𑀼, 𑀲𑀸𑀭𑀜𑁆𑀜𑁂𑀯 𑀧𑀸𑀧𑁂𑀢𑀽’’𑀢𑀺. ‘‘𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺. 𑀓𑀣𑀜𑁆𑀘, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺…𑀧𑁂… 𑀬𑀢𑁄 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺, 𑀅𑀤𑀼𑀁 𑀘𑀲𑁆𑀲 𑀳𑁄𑀢𑀺 𑀢𑀧𑀲𑁆𑀲𑀺𑀢𑀸𑀬. 𑀲𑁄 𑀅𑀪𑀺𑀳𑀭𑀢𑀺 𑀦𑁄 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺…𑀧𑁂… 𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁, 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀺𑀕𑁆𑀭𑁄𑀥, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀯𑀸 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀸 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺, 𑀦𑁄 𑀅𑀧𑀭𑀺𑀲𑀼𑀤𑁆𑀥𑀸, 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀲𑀸𑀭𑀧𑁆𑀧𑀢𑁆𑀢𑀸 𑀘𑀸’’𑀢𑀺. ‘‘𑀦 𑀔𑁄, 𑀦𑀺𑀕𑁆𑀭𑁄𑀥, 𑀏𑀢𑁆𑀢𑀸𑀯𑀢𑀸 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘; 𑀅𑀧𑀺 𑀘 𑀔𑁄 𑀨𑁂𑀕𑁆𑀕𑀼𑀧𑁆𑀧𑀢𑁆𑀢𑀸 𑀳𑁄𑀢𑀻’’𑀢𑀺.

𑀧𑀭𑀺𑀲𑀼𑀤𑁆𑀥𑀅𑀕𑁆𑀕𑀧𑁆𑀧𑀢𑁆𑀢𑀲𑀸𑀭𑀧𑁆𑀧𑀢𑁆𑀢𑀓𑀣𑀸

𑁭𑁩. ‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘? 𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀅𑀕𑁆𑀕𑀜𑁆𑀜𑁂𑀯 𑀧𑀸𑀧𑁂𑀢𑀼, 𑀲𑀸𑀭𑀜𑁆𑀜𑁂𑀯 𑀧𑀸𑀧𑁂𑀢𑀽’’𑀢𑀺. ‘‘𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺. 𑀓𑀣𑀜𑁆𑀘, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺…𑀧𑁂… 𑀬𑀢𑁄 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺, 𑀅𑀤𑀼𑀁 𑀘𑀲𑁆𑀲 𑀳𑁄𑀢𑀺 𑀢𑀧𑀲𑁆𑀲𑀺𑀢𑀸𑀬. 𑀲𑁄 𑀅𑀪𑀺𑀳𑀭𑀢𑀺 𑀦𑁄 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺…𑀧𑁂… 𑀲𑁄 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀺𑀕𑁆𑀭𑁄𑀥, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀯𑀸 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀸 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀧𑁄𑀚𑀺𑀕𑀼𑀘𑁆𑀙𑀸 𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺 𑀦𑁄 𑀅𑀧𑀭𑀺𑀲𑀼𑀤𑁆𑀥𑀸, 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀲𑀸𑀭𑀧𑁆𑀧𑀢𑁆𑀢𑀸 𑀘𑀸’’𑀢𑀺.

𑁭𑁪. ‘‘𑀏𑀢𑁆𑀢𑀸𑀯𑀢𑀸 𑀔𑁄, 𑀦𑀺𑀕𑁆𑀭𑁄𑀥, 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘. 𑀇𑀢𑀺 𑀔𑁄, 𑀦𑀺𑀕𑁆𑀭𑁄𑀥 [𑀇𑀢𑀺 𑀦𑀺𑀕𑁆𑀭𑁄𑀥 (𑀲𑁆𑀬𑀸.)], 𑀬𑀁 𑀫𑀁 𑀢𑁆𑀯𑀁 𑀅𑀯𑀘𑀸𑀲𑀺 𑁋 ‘𑀓𑁄 𑀦𑀸𑀫 𑀲𑁄, 𑀪𑀦𑁆𑀢𑁂, 𑀪𑀕𑀯𑀢𑁄 𑀥𑀫𑁆𑀫𑁄, 𑀬𑁂𑀦 𑀪𑀕𑀯𑀸 𑀲𑀸𑀯𑀓𑁂 𑀯𑀺𑀦𑁂𑀢𑀺, 𑀬𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸 𑀯𑀺𑀦𑀻𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀧𑀝𑀺𑀚𑀸𑀦𑀦𑁆𑀢𑀺 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬’𑀦𑁆𑀢𑀺. 𑀇𑀢𑀺 𑀔𑁄 𑀢𑀁, 𑀦𑀺𑀕𑁆𑀭𑁄𑀥, 𑀞𑀸𑀦𑀁 𑀉𑀢𑁆𑀢𑀭𑀺𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘, 𑀬𑁂𑀦𑀸𑀳𑀁 𑀲𑀸𑀯𑀓𑁂 𑀯𑀺𑀦𑁂𑀫𑀺, 𑀬𑁂𑀦 𑀫𑀬𑀸 𑀲𑀸𑀯𑀓𑀸 𑀯𑀺𑀦𑀻𑀢𑀸 𑀅𑀲𑁆𑀲𑀸𑀲𑀧𑁆𑀧𑀢𑁆𑀢𑀸 𑀧𑀝𑀺𑀚𑀸𑀦𑀦𑁆𑀢𑀺 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀉𑀦𑁆𑀦𑀸𑀤𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁 𑁋 ‘‘𑀏𑀢𑁆𑀣 𑀫𑀬𑀁 𑀅𑀦𑀲𑁆𑀲𑀸𑀫 𑀲𑀸𑀘𑀭𑀺𑀬𑀓𑀸, 𑀦 𑀫𑀬𑀁 𑀇𑀢𑁄 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀫𑀸’’𑀢𑀺.

𑀦𑀺𑀕𑁆𑀭𑁄𑀥𑀲𑁆𑀲 𑀧𑀚𑁆𑀛𑀸𑀬𑀦𑀁

𑁭𑁫. 𑀬𑀤𑀸 𑀅𑀜𑁆𑀜𑀸𑀲𑀺 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 𑁋 ‘‘𑀅𑀜𑁆𑀜𑀤𑀢𑁆𑀣𑀼 𑀔𑁄 𑀤𑀸𑀦𑀺𑀫𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀅𑀜𑁆𑀜𑀸𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑀻’’𑀢𑀺. 𑀅𑀣 [𑀅𑀣 𑀦𑀁 (𑀓.)] 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀇𑀢𑀺 𑀔𑁄, 𑀪𑀦𑁆𑀢𑁂 𑀦𑀺𑀕𑁆𑀭𑁄𑀥, 𑀬𑀁 𑀫𑀁 𑀢𑁆𑀯𑀁 𑀅𑀯𑀘𑀸𑀲𑀺 𑁋 ‘𑀬𑀕𑁆𑀖𑁂, 𑀕𑀳𑀧𑀢𑀺, 𑀚𑀸𑀦𑁂𑀬𑁆𑀬𑀸𑀲𑀺, 𑀓𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀺, 𑀓𑁂𑀦 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺, 𑀓𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀲𑀫𑀸𑀧𑀚𑁆𑀚𑀢𑀺, 𑀲𑀼𑀜𑁆𑀜𑀸𑀕𑀸𑀭𑀳𑀢𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸, 𑀅𑀧𑀭𑀺𑀲𑀸𑀯𑀘𑀭𑁄 𑀲𑀫𑀡𑁄 𑀕𑁄𑀢𑀫𑁄 𑀦𑀸𑀮𑀁 𑀲𑀮𑁆𑀮𑀸𑀧𑀸𑀬, 𑀲𑁄 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀲𑁂𑀯𑀢𑀺; 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑁄𑀓𑀸𑀡𑀸 𑀧𑀭𑀺𑀬𑀦𑁆𑀢𑀘𑀸𑀭𑀺𑀦𑀻 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀲𑁂𑀯𑀢𑀺. 𑀏𑀯𑀫𑁂𑀯 𑀲𑀼𑀜𑁆𑀜𑀸𑀕𑀸𑀭𑀳𑀢𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸, 𑀅𑀧𑀭𑀺𑀲𑀸𑀯𑀘𑀭𑁄 𑀲𑀫𑀡𑁄 𑀕𑁄𑀢𑀫𑁄 𑀦𑀸𑀮𑀁 𑀲𑀮𑁆𑀮𑀸𑀧𑀸𑀬; 𑀲𑁄 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀲𑁂𑀯𑀢𑀺; 𑀇𑀗𑁆𑀖, 𑀕𑀳𑀧𑀢𑀺, 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀁 𑀧𑀭𑀺𑀲𑀁 𑀆𑀕𑀘𑁆𑀙𑁂𑀬𑁆𑀬, 𑀏𑀓𑀧𑀜𑁆𑀳𑁂𑀦𑁂𑀯 𑀦𑀁 𑀲𑀁𑀲𑀸𑀤𑁂𑀬𑁆𑀬𑀸𑀫, 𑀢𑀼𑀘𑁆𑀙𑀓𑀼𑀫𑁆𑀪𑀻𑀯 𑀦𑀁 𑀫𑀜𑁆𑀜𑁂 𑀑𑀭𑁄𑀥𑁂𑀬𑁆𑀬𑀸𑀫𑀸’𑀢𑀺. 𑀅𑀬𑀁 𑀔𑁄 𑀲𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀥𑀸𑀦𑀼𑀧𑁆𑀧𑀢𑁆𑀢𑁄, 𑀅𑀧𑀭𑀺𑀲𑀸𑀯𑀘𑀭𑀁 𑀧𑀦 𑀦𑀁 𑀓𑀭𑁄𑀣, 𑀕𑁄𑀓𑀸𑀡𑀁 𑀧𑀭𑀺𑀬𑀦𑁆𑀢𑀘𑀸𑀭𑀺𑀦𑀺𑀁 𑀓𑀭𑁄𑀣, 𑀏𑀓𑀧𑀜𑁆𑀳𑁂𑀦𑁂𑀯 𑀦𑀁 𑀲𑀁𑀲𑀸𑀤𑁂𑀣, 𑀢𑀼𑀘𑁆𑀙𑀓𑀼𑀫𑁆𑀪𑀻𑀯 𑀦𑀁 𑀑𑀭𑁄𑀥𑁂𑀣𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑀼𑀡𑁆𑀳𑀻𑀪𑀽𑀢𑁄 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀅𑀧𑁆𑀧𑀝𑀺𑀪𑀸𑀦𑁄 𑀦𑀺𑀲𑀻𑀤𑀺.

𑁭𑁬. 𑀅𑀣 𑀔𑁄 𑀪𑀕𑀯𑀸 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀢𑀼𑀡𑁆𑀳𑀻𑀪𑀽𑀢𑀁 𑀫𑀗𑁆𑀓𑀼𑀪𑀽𑀢𑀁 𑀧𑀢𑁆𑀢𑀓𑁆𑀔𑀦𑁆𑀥𑀁 𑀅𑀥𑁄𑀫𑀼𑀔𑀁 𑀧𑀚𑁆𑀛𑀸𑀬𑀦𑁆𑀢𑀁 𑀅𑀧𑁆𑀧𑀝𑀺𑀪𑀸𑀦𑀁 𑀯𑀺𑀤𑀺𑀢𑁆𑀯𑀸 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭, 𑀦𑀺𑀕𑁆𑀭𑁄𑀥, 𑀪𑀸𑀲𑀺𑀢𑀸 𑀢𑁂 𑀏𑀲𑀸 𑀯𑀸𑀘𑀸’’𑀢𑀺? ‘‘𑀲𑀘𑁆𑀘𑀁, 𑀪𑀦𑁆𑀢𑁂, 𑀪𑀸𑀲𑀺𑀢𑀸 𑀫𑁂 𑀏𑀲𑀸 𑀯𑀸𑀘𑀸, 𑀬𑀣𑀸𑀩𑀸𑀮𑁂𑀦 𑀬𑀣𑀸𑀫𑀽𑀴𑁆𑀳𑁂𑀦 𑀬𑀣𑀸𑀅𑀓𑀼𑀲𑀮𑁂𑀦𑀸’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀦𑀺𑀕𑁆𑀭𑁄𑀥. 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀟𑁆𑀠𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁂 𑀢𑁂 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀏𑀯𑀁 𑀲𑀼 𑀢𑁂 𑀪𑀕𑀯𑀦𑁆𑀢𑁄 𑀲𑀁𑀕𑀫𑁆𑀫 𑀲𑀫𑀸𑀕𑀫𑁆𑀫 𑀉𑀦𑁆𑀦𑀸𑀤𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸. 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄. 𑀉𑀤𑀸𑀳𑀼, 𑀏𑀯𑀁 𑀲𑀼 𑀢𑁂 𑀪𑀕𑀯𑀦𑁆𑀢𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺, 𑀲𑁂𑀬𑁆𑀬𑀣𑀸𑀧𑀸𑀳𑀁 𑀏𑀢𑀭𑀳𑀻’𑀢𑀺.

‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂. 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀟𑁆𑀠𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁂 𑀢𑁂 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀦 𑀏𑀯𑀁 𑀲𑀼 [𑀦𑀸𑀲𑁆𑀲𑀼 (𑀲𑀻. 𑀧𑀻.)] 𑀢𑁂 𑀪𑀕𑀯𑀦𑁆𑀢𑁄 𑀲𑀁𑀕𑀫𑁆𑀫 𑀲𑀫𑀸𑀕𑀫𑁆𑀫 𑀉𑀦𑁆𑀦𑀸𑀤𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁…𑀧𑁂… 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸, 𑀲𑁂𑀬𑁆𑀬𑀣𑀸𑀧𑀸𑀳𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄. 𑀏𑀯𑀁 𑀲𑀼 𑀢𑁂 𑀪𑀕𑀯𑀦𑁆𑀢𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺, 𑀲𑁂𑀬𑁆𑀬𑀣𑀸𑀧𑀺 𑀪𑀕𑀯𑀸 𑀏𑀢𑀭𑀳𑀻’’’𑀢𑀺.

‘‘𑀢𑀲𑁆𑀲 𑀢𑁂, 𑀦𑀺𑀕𑁆𑀭𑁄𑀥, 𑀯𑀺𑀜𑁆𑀜𑀼𑀲𑁆𑀲 𑀲𑀢𑁄 𑀫𑀳𑀮𑁆𑀮𑀓𑀲𑁆𑀲 𑀦 𑀏𑀢𑀤𑀳𑁄𑀲𑀺 𑁋 ‘𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸 𑀩𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀤𑀦𑁆𑀢𑁄 𑀲𑁄 𑀪𑀕𑀯𑀸 𑀤𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀦𑁆𑀢𑁄 𑀲𑁄 𑀪𑀕𑀯𑀸 𑀲𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀺𑀡𑁆𑀡𑁄 𑀲𑁄 𑀪𑀕𑀯𑀸 𑀢𑀭𑀡𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’’𑀢𑀺?

𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸

𑁭𑁭. 𑀏𑀯𑀁 𑀯𑀼𑀢𑁆𑀢𑁂, 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁆𑀯𑀸𑀳𑀁 𑀏𑀯𑀁 𑀪𑀕𑀯𑀦𑁆𑀢𑀁 𑀅𑀯𑀘𑀸𑀲𑀺𑀁. 𑀢𑀲𑁆𑀲 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺. ‘‘𑀢𑀕𑁆𑀖 𑀢𑁆𑀯𑀁 [𑀢𑀁 (𑀲𑀻. 𑀲𑁆𑀬𑀸. 𑀧𑀻.)], 𑀦𑀺𑀕𑁆𑀭𑁄𑀥, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁄 𑀫𑀁 𑀢𑁆𑀯𑀁 𑀏𑀯𑀁 𑀅𑀯𑀘𑀸𑀲𑀺. 𑀬𑀢𑁄 𑀘 𑀔𑁄 𑀢𑁆𑀯𑀁, 𑀦𑀺𑀕𑁆𑀭𑁄𑀥, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀺, 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀤𑁆𑀥𑀺 𑀳𑁂𑀲𑀸, 𑀦𑀺𑀕𑁆𑀭𑁄𑀥, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂, 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀅𑀳𑀁 𑀔𑁄 𑀧𑀦, 𑀦𑀺𑀕𑁆𑀭𑁄𑀥, 𑀏𑀯𑀁 𑀯𑀤𑀸𑀫𑀺 𑁋

‘𑀏𑀢𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄, 𑀅𑀳𑀫𑀦𑀼𑀲𑀸𑀲𑀸𑀫𑀺 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 [𑀬𑀣𑀸𑀦𑀼𑀲𑀺𑀝𑁆𑀞𑀁 (?)] 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺 𑀲𑀢𑁆𑀢𑀯𑀲𑁆𑀲𑀸𑀦𑀺. 𑀢𑀺𑀝𑁆𑀞𑀦𑁆𑀢𑀼, 𑀦𑀺𑀕𑁆𑀭𑁄𑀥, 𑀲𑀢𑁆𑀢 𑀯𑀲𑁆𑀲𑀸𑀦𑀺. 𑀏𑀢𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄, 𑀅𑀳𑀫𑀦𑀼𑀲𑀸𑀲𑀸𑀫𑀺 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺 𑀙 𑀯𑀲𑁆𑀲𑀸𑀦𑀺. 𑀧𑀜𑁆𑀘 𑀯𑀲𑁆𑀲𑀸𑀦𑀺… 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺… 𑀢𑀻𑀡𑀺 𑀯𑀲𑁆𑀲𑀸𑀦𑀺… 𑀤𑁆𑀯𑁂 𑀯𑀲𑁆𑀲𑀸𑀦𑀺… 𑀏𑀓𑀁 𑀯𑀲𑁆𑀲𑀁. 𑀢𑀺𑀝𑁆𑀞𑀢𑀼, 𑀦𑀺𑀕𑁆𑀭𑁄𑀥, 𑀏𑀓𑀁 𑀯𑀲𑁆𑀲𑀁. 𑀏𑀢𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄 𑀅𑀳𑀫𑀦𑀼𑀲𑀸𑀲𑀸𑀫𑀺 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺 𑀲𑀢𑁆𑀢 𑀫𑀸𑀲𑀸𑀦𑀺. 𑀢𑀺𑀝𑁆𑀞𑀦𑁆𑀢𑀼, 𑀦𑀺𑀕𑁆𑀭𑁄𑀥, 𑀲𑀢𑁆𑀢 𑀫𑀸𑀲𑀸𑀦𑀺… 𑀙 𑀫𑀸𑀲𑀸𑀦𑀺… 𑀧𑀜𑁆𑀘 𑀫𑀸𑀲𑀸𑀦𑀺 … 𑀘𑀢𑁆𑀢𑀸𑀭𑀺 𑀫𑀸𑀲𑀸𑀦𑀺… 𑀢𑀻𑀡𑀺 𑀫𑀸𑀲𑀸𑀦𑀺… 𑀤𑁆𑀯𑁂 𑀫𑀸𑀲𑀸𑀦𑀺… 𑀏𑀓𑀁 𑀫𑀸𑀲𑀁… 𑀅𑀟𑁆𑀠𑀫𑀸𑀲𑀁. 𑀢𑀺𑀝𑁆𑀞𑀢𑀼, 𑀦𑀺𑀕𑁆𑀭𑁄𑀥, 𑀅𑀟𑁆𑀠𑀫𑀸𑀲𑁄. 𑀏𑀢𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄, 𑀅𑀳𑀫𑀦𑀼𑀲𑀸𑀲𑀸𑀫𑀺 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺 𑀲𑀢𑁆𑀢𑀸𑀳𑀁’.

𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀧𑀚𑁆𑀛𑀸𑀬𑀦𑀁

𑁭𑁮. ‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀦𑀺𑀕𑁆𑀭𑁄𑀥, 𑀏𑀯𑀫𑀲𑁆𑀲 𑁋 ‘𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀬𑀢𑀸 𑀦𑁄 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀦𑀺𑀕𑁆𑀭𑁄𑀥, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑁄 𑀏𑀯 𑀯𑁄 [𑀢𑁂 (𑀲𑀻. 𑀲𑁆𑀬𑀸.)] 𑀆𑀘𑀭𑀺𑀬𑁄, 𑀲𑁄 𑀏𑀯 𑀯𑁄 𑀆𑀘𑀭𑀺𑀬𑁄 𑀳𑁄𑀢𑀼. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀦𑀺𑀕𑁆𑀭𑁄𑀥, 𑀏𑀯𑀫𑀲𑁆𑀲 𑁋 ‘𑀉𑀤𑁆𑀤𑁂𑀲𑀸 𑀦𑁄 𑀘𑀸𑀯𑁂𑀢𑀼𑀓𑀸𑀫𑁄 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀦𑀺𑀕𑁆𑀭𑁄𑀥, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑁄 𑀏𑀯 𑀯𑁄 𑀉𑀤𑁆𑀤𑁂𑀲𑁄 𑀲𑁄 𑀏𑀯 𑀯𑁄 𑀉𑀤𑁆𑀤𑁂𑀲𑁄 𑀳𑁄𑀢𑀼. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀦𑀺𑀕𑁆𑀭𑁄𑀥, 𑀏𑀯𑀫𑀲𑁆𑀲 𑁋 ‘𑀆𑀚𑀻𑀯𑀸 𑀦𑁄 𑀘𑀸𑀯𑁂𑀢𑀼𑀓𑀸𑀫𑁄 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀦𑀺𑀕𑁆𑀭𑁄𑀥, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑁄 𑀏𑀯 𑀯𑁄 𑀆𑀚𑀻𑀯𑁄, 𑀲𑁄 𑀏𑀯 𑀯𑁄 𑀆𑀚𑀻𑀯𑁄 𑀳𑁄𑀢𑀼. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀦𑀺𑀕𑁆𑀭𑁄𑀥, 𑀏𑀯𑀫𑀲𑁆𑀲 𑁋 ‘𑀬𑁂 𑀦𑁄 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸 𑀲𑀸𑀘𑀭𑀺𑀬𑀓𑀸𑀦𑀁, 𑀢𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀦𑀺𑀕𑁆𑀭𑁄𑀥, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀅𑀓𑀼𑀲𑀮𑀸 𑀘𑁂𑀯 𑀯𑁄 𑀢𑁂 𑀥𑀫𑁆𑀫𑀸 [𑀯𑁄𑀥𑀫𑁆𑀫𑀸 (𑀓.), 𑀢𑁂 𑀥𑀫𑁆𑀫𑀸 (𑀲𑁆𑀬𑀸.)] 𑀳𑁄𑀦𑁆𑀢𑀼 𑀅𑀓𑀼𑀲𑀮𑀲𑀗𑁆𑀔𑀸𑀢𑀸 𑀘 𑀲𑀸𑀘𑀭𑀺𑀬𑀓𑀸𑀦𑀁. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀦𑀺𑀕𑁆𑀭𑁄𑀥, 𑀏𑀯𑀫𑀲𑁆𑀲 𑁋 ‘𑀬𑁂 𑀦𑁄 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸 𑀲𑀸𑀘𑀭𑀺𑀬𑀓𑀸𑀦𑀁, 𑀢𑁂𑀳𑀺 𑀯𑀺𑀯𑁂𑀘𑁂𑀢𑀼𑀓𑀸𑀫𑁄 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀦𑀺𑀕𑁆𑀭𑁄𑀥, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀓𑀼𑀲𑀮𑀸 𑀘𑁂𑀯 𑀯𑁄 𑀢𑁂 𑀥𑀫𑁆𑀫𑀸 𑀳𑁄𑀦𑁆𑀢𑀼 𑀓𑀼𑀲𑀮𑀲𑀗𑁆𑀔𑀸𑀢𑀸 𑀘 𑀲𑀸𑀘𑀭𑀺𑀬𑀓𑀸𑀦𑀁. 𑀇𑀢𑀺 𑀔𑁆𑀯𑀸𑀳𑀁, 𑀦𑀺𑀕𑁆𑀭𑁄𑀥, 𑀦𑁂𑀯 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀬𑀢𑀸 𑀏𑀯𑀁 𑀯𑀤𑀸𑀫𑀺, 𑀦𑀧𑀺 𑀉𑀤𑁆𑀤𑁂𑀲𑀸 𑀘𑀸𑀯𑁂𑀢𑀼𑀓𑀸𑀫𑁄 𑀏𑀯𑀁 𑀯𑀤𑀸𑀫𑀺, 𑀦𑀧𑀺 𑀆𑀚𑀻𑀯𑀸 𑀘𑀸𑀯𑁂𑀢𑀼𑀓𑀸𑀫𑁄 𑀏𑀯𑀁 𑀯𑀤𑀸𑀫𑀺, 𑀦𑀧𑀺 𑀬𑁂 𑀯𑁄 𑀥𑀫𑁆𑀫𑀸 [𑀦𑀧𑀺 𑀬𑁂 𑀔𑁄 𑀥𑀫𑁆𑀫𑀸 (𑀲𑀻.), 𑀦𑀧𑀺 𑀬𑁂 𑀢𑁂 𑀥𑀫𑁆𑀫𑀸 (𑀲𑁆𑀬𑀸.), 𑀦𑀧𑀺 𑀬𑁂 𑀘 𑀯𑁄 𑀥𑀫𑁆𑀫𑀸 (𑀓.)] 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸 𑀲𑀸𑀘𑀭𑀺𑀬𑀓𑀸𑀦𑀁, 𑀢𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀏𑀯𑀁 𑀯𑀤𑀸𑀫𑀺, 𑀦𑀧𑀺 𑀬𑁂 𑀯𑁄 𑀥𑀫𑁆𑀫𑀸 [𑀦𑀧𑀺 𑀬𑁂 𑀔𑁄 𑀥𑀫𑁆𑀫𑀸 (𑀲𑀻.), 𑀦𑀧𑀺 𑀬𑁂 𑀢𑁂 𑀥𑀫𑁆𑀫𑀸 (𑀲𑁆𑀬𑀸.), 𑀦𑀧𑀺 𑀬𑁂 𑀘 𑀯𑁄 𑀥𑀫𑁆𑀫𑀸 (𑀓.)] 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸 𑀲𑀸𑀘𑀭𑀺𑀬𑀓𑀸𑀦𑀁, 𑀢𑁂𑀳𑀺 𑀯𑀺𑀯𑁂𑀘𑁂𑀢𑀼𑀓𑀸𑀫𑁄 𑀏𑀯𑀁 𑀯𑀤𑀸𑀫𑀺. 𑀲𑀦𑁆𑀢𑀺 𑀘 𑀔𑁄, 𑀦𑀺𑀕𑁆𑀭𑁄𑀥, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀦𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 [𑀧𑁄𑀦𑁄𑀪𑀯𑀺𑀓𑀸 (𑀓.)] 𑀲𑀤𑀭𑀸 [𑀲𑀤𑁆𑀤𑀭𑀸 (𑀧𑀻. 𑀓.), 𑀲𑀤𑀭𑀣𑀸 (𑀲𑁆𑀬𑀸. 𑀓.)] 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸, 𑀬𑁂𑀲𑀸𑀳𑀁 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀻𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺.

𑁭𑁯. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀢𑀼𑀡𑁆𑀳𑀻𑀪𑀽𑀢𑀸 𑀫𑀗𑁆𑀓𑀼𑀪𑀽𑀢𑀸 𑀧𑀢𑁆𑀢𑀓𑁆𑀔𑀦𑁆𑀥𑀸 𑀅𑀥𑁄𑀫𑀼𑀔𑀸 𑀧𑀚𑁆𑀛𑀸𑀬𑀦𑁆𑀢𑀸 𑀅𑀧𑁆𑀧𑀝𑀺𑀪𑀸𑀦𑀸 𑀦𑀺𑀲𑀻𑀤𑀺𑀁𑀲𑀼 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀲𑀩𑁆𑀩𑁂 𑀧𑀺𑀫𑁂 𑀫𑁄𑀖𑀧𑀼𑀭𑀺𑀲𑀸 𑀨𑀼𑀝𑁆𑀞𑀸 𑀧𑀸𑀧𑀺𑀫𑀢𑀸. 𑀬𑀢𑁆𑀭 𑀳𑀺 𑀦𑀸𑀫 𑀏𑀓𑀲𑁆𑀲𑀧𑀺 𑀦 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀳𑀦𑁆𑀤 𑀫𑀬𑀁 𑀅𑀜𑁆𑀜𑀸𑀡𑀢𑁆𑀣𑀫𑁆𑀧𑀺 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫, 𑀓𑀺𑀁 𑀓𑀭𑀺𑀲𑁆𑀲𑀢𑀺 𑀲𑀢𑁆𑀢𑀸𑀳𑁄’’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀉𑀤𑀼𑀫𑁆𑀩𑀭𑀺𑀓𑀸𑀬 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀧𑀘𑁆𑀘𑀼𑀧𑀝𑁆𑀞𑀸𑀲𑀺 [𑀧𑀘𑁆𑀘𑀼𑀝𑁆𑀞𑀸𑀲𑀺 (𑀲𑀻. 𑀲𑁆𑀬𑀸. 𑀧𑀻.)]. 𑀲𑀦𑁆𑀥𑀸𑀦𑁄 𑀧𑀦 𑀕𑀳𑀧𑀢𑀺 𑀢𑀸𑀯𑀤𑁂𑀯 𑀭𑀸𑀚𑀕𑀳𑀁 𑀧𑀸𑀯𑀺𑀲𑀻𑀢𑀺.

𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.