𑁮. 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀁

𑁩𑁪𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺, 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀉𑀤𑀧𑀸𑀤𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀅𑀣 𑀔𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? 𑀅𑀤𑁆𑀤𑀲𑀸 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑀁 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀤𑀺𑀲𑁆𑀯𑀸𑀦 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁, 𑀫𑀸𑀭𑀺𑀲𑀸, 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺, 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀬𑀤𑀺 𑀧𑀦, 𑀫𑀸𑀭𑀺𑀲𑀸, 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺? ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁.

𑁩𑁪𑁫. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 [𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑀁 (𑀲𑁆𑀬𑀸.)] 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁, 𑀢𑀸𑀢 𑀧𑀜𑁆𑀘𑀲𑀺𑀔, 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀬𑀤𑀺 𑀧𑀦, 𑀢𑀸𑀢 𑀧𑀜𑁆𑀘𑀲𑀺𑀔, 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺? ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀅𑀦𑀼𑀘𑀭𑀺𑀬𑀁 𑀉𑀧𑀸𑀕𑀫𑀺.

𑁩𑁪𑁬. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀜𑁆𑀘𑀲𑀺𑀔𑁂𑀦 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁂𑀦 𑀧𑀼𑀭𑀓𑁆𑀔𑀢𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀅𑀦𑁆𑀢𑀭𑀳𑀺𑀢𑁄 𑀫𑀕𑀥𑁂𑀲𑀼 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀅𑀢𑀺𑀭𑀺𑀯 𑀑𑀪𑀸𑀲𑀚𑀸𑀢𑁄 𑀳𑁄𑀢𑀺 𑀅𑀫𑁆𑀩𑀲𑀡𑁆𑀟𑀸 𑀘 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀬𑀣𑀸 𑀢𑀁 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑁂𑀦. 𑀅𑀧𑀺𑀲𑁆𑀲𑀼𑀤𑀁 𑀧𑀭𑀺𑀢𑁄 𑀕𑀸𑀫𑁂𑀲𑀼 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀤𑀺𑀢𑁆𑀢𑀲𑁆𑀲𑀼 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀛𑀸𑀬𑀢𑀺𑀲𑀼 [𑀛𑀸𑀬𑀢𑀲𑁆𑀲𑀼 (𑀲𑁆𑀬𑀸.), 𑀧𑀚𑁆𑀛𑀸𑀬𑀺𑀢𑀲𑁆𑀲𑀼 (𑀲𑀻. 𑀧𑀻.)] 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀚𑀮𑀢𑀺𑀲𑀼 [𑀚𑀮𑀢𑀲𑁆𑀲𑀼 (𑀲𑁆𑀬𑀸.), 𑀚𑀮𑀺𑀢𑀲𑁆𑀲𑀼 (𑀲𑀻. 𑀧𑀻.)] 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀓𑀺𑀁𑀲𑀼 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀅𑀢𑀺𑀭𑀺𑀯 𑀑𑀪𑀸𑀲𑀚𑀸𑀢𑁄 𑀅𑀫𑁆𑀩𑀲𑀡𑁆𑀟𑀸 𑀘 𑀩𑁆𑀭𑀸𑀳𑁆𑀫𑀡𑀕𑀸𑀫𑁄’’𑀢𑀺 𑀲𑀁𑀯𑀺𑀕𑁆𑀕𑀸 𑀮𑁄𑀫𑀳𑀝𑁆𑀞𑀚𑀸𑀢𑀸 𑀅𑀳𑁂𑀲𑀼𑀁.

𑁩𑁪𑁭. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀤𑀼𑀭𑀼𑀧𑀲𑀗𑁆𑀓𑀫𑀸 𑀔𑁄, 𑀢𑀸𑀢 𑀧𑀜𑁆𑀘𑀲𑀺𑀔, 𑀢𑀣𑀸𑀕𑀢𑀸 𑀫𑀸𑀤𑀺𑀲𑁂𑀦, 𑀛𑀸𑀬𑀻 𑀛𑀸𑀦𑀭𑀢𑀸, 𑀢𑀤𑀦𑁆𑀢𑀭𑀁 [𑀢𑀤𑀦𑀦𑁆𑀢𑀭𑀁 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀧𑀝𑀺𑀲𑀮𑁆𑀮𑀻𑀦𑀸. 𑀬𑀤𑀺 𑀧𑀦 𑀢𑁆𑀯𑀁, 𑀢𑀸𑀢 𑀧𑀜𑁆𑀘𑀲𑀺𑀔, 𑀪𑀕𑀯𑀦𑁆𑀢𑀁 𑀧𑀞𑀫𑀁 𑀧𑀲𑀸𑀤𑁂𑀬𑁆𑀬𑀸𑀲𑀺, 𑀢𑀬𑀸, 𑀢𑀸𑀢, 𑀧𑀞𑀫𑀁 𑀧𑀲𑀸𑀤𑀺𑀢𑀁 𑀧𑀘𑁆𑀙𑀸 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀬𑁂𑀦 𑀇𑀦𑁆𑀤𑀲𑀸𑀮𑀕𑀼𑀳𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀏𑀢𑁆𑀢𑀸𑀯𑀢𑀸 𑀫𑁂 𑀪𑀕𑀯𑀸 𑀦𑁂𑀯 𑀅𑀢𑀺𑀤𑀽𑀭𑁂 𑀪𑀯𑀺𑀲𑁆𑀲𑀢𑀺 𑀦𑀸𑀘𑁆𑀘𑀸𑀲𑀦𑁆𑀦𑁂, 𑀲𑀤𑁆𑀤𑀜𑁆𑀘 𑀫𑁂 𑀲𑁄𑀲𑁆𑀲𑀢𑀻’’𑀢𑀺 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀧𑀜𑁆𑀘𑀲𑀺𑀔𑀕𑀻𑀢𑀕𑀸𑀣𑀸

𑁩𑁪𑁮. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 [𑀯𑁂𑀴𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 (𑀲𑁆𑀬𑀸.)] 𑀅𑀲𑁆𑀲𑀸𑀯𑁂𑀲𑀺, 𑀇𑀫𑀸 𑀘 𑀕𑀸𑀣𑀸 𑀅𑀪𑀸𑀲𑀺 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀸 𑀲𑀗𑁆𑀖𑀽𑀧𑀲𑀜𑁆𑀳𑀺𑀢𑀸 𑀅𑀭𑀳𑀦𑁆𑀢𑀽𑀧𑀲𑀜𑁆𑀳𑀺𑀢𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸 𑁋

‘‘𑀯𑀦𑁆𑀤𑁂 𑀢𑁂 𑀧𑀺𑀢𑀭𑀁 𑀪𑀤𑁆𑀤𑁂, 𑀢𑀺𑀫𑁆𑀩𑀭𑀼𑀁 𑀲𑀽𑀭𑀺𑀬𑀯𑀘𑁆𑀙𑀲𑁂;

𑀬𑁂𑀦 𑀚𑀸𑀢𑀸𑀲𑀺 𑀓𑀮𑁆𑀬𑀸𑀡𑀻, 𑀆𑀦𑀦𑁆𑀤𑀚𑀦𑀦𑀻 𑀫𑀫.

‘‘𑀯𑀸𑀢𑁄𑀯 𑀲𑁂𑀤𑀢𑀁 𑀓𑀦𑁆𑀢𑁄, 𑀧𑀸𑀦𑀻𑀬𑀁𑀯 𑀧𑀺𑀧𑀸𑀲𑀢𑁄;

𑀅𑀗𑁆𑀕𑀻𑀭𑀲𑀺 𑀧𑀺𑀬𑀸𑀫𑁂𑀲𑀺, 𑀥𑀫𑁆𑀫𑁄 𑀅𑀭𑀳𑀢𑀸𑀫𑀺𑀯.

‘‘𑀆𑀢𑀼𑀭𑀲𑁆𑀲𑁂𑀯 𑀪𑁂𑀲𑀚𑁆𑀚𑀁, 𑀪𑁄𑀚𑀦𑀁𑀯 𑀚𑀺𑀖𑀘𑁆𑀙𑀢𑁄;

𑀧𑀭𑀺𑀦𑀺𑀩𑁆𑀩𑀸𑀧𑀬 𑀫𑀁 𑀪𑀤𑁆𑀤𑁂, 𑀚𑀮𑀦𑁆𑀢𑀫𑀺𑀯 𑀯𑀸𑀭𑀺𑀦𑀸.

‘‘𑀲𑀻𑀢𑁄𑀤𑀓𑀁 𑀧𑁄𑀓𑁆𑀔𑀭𑀡𑀺𑀁, 𑀬𑀼𑀢𑁆𑀢𑀁 𑀓𑀺𑀜𑁆𑀚𑀓𑁆𑀔𑀭𑁂𑀡𑀼𑀦𑀸;

𑀦𑀸𑀕𑁄 𑀖𑀫𑁆𑀫𑀸𑀪𑀺𑀢𑀢𑁆𑀢𑁄𑀯, 𑀑𑀕𑀸𑀳𑁂 𑀢𑁂 𑀣𑀦𑀽𑀤𑀭𑀁.

‘‘𑀅𑀘𑁆𑀘𑀗𑁆𑀓𑀼𑀲𑁄𑀯 𑀦𑀸𑀕𑁄𑀯, 𑀚𑀺𑀢𑀁 𑀫𑁂 𑀢𑀼𑀢𑁆𑀢𑀢𑁄𑀫𑀭𑀁;

𑀓𑀸𑀭𑀡𑀁 𑀦𑀧𑁆𑀧𑀚𑀸𑀦𑀸𑀫𑀺, 𑀲𑀫𑁆𑀫𑀢𑁆𑀢𑁄 𑀮𑀓𑁆𑀔𑀡𑀽𑀭𑀼𑀬𑀸.

‘‘𑀢𑀬𑀺 𑀕𑁂𑀥𑀺𑀢𑀘𑀺𑀢𑁆𑀢𑁄𑀲𑁆𑀫𑀺, 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀸𑀫𑀺𑀢𑀁;

𑀧𑀝𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀯𑀗𑁆𑀓𑀖𑀲𑁆𑀢𑁄𑀯 𑀅𑀫𑁆𑀩𑀼𑀚𑁄.

‘‘𑀯𑀸𑀫𑀽𑀭𑀼 𑀲𑀚 𑀫𑀁 𑀪𑀤𑁆𑀤𑁂, 𑀲𑀚 𑀫𑀁 𑀫𑀦𑁆𑀤𑀮𑁄𑀘𑀦𑁂;

𑀧𑀮𑀺𑀲𑁆𑀲𑀚 𑀫𑀁 𑀓𑀮𑁆𑀬𑀸𑀡𑀺, 𑀏𑀢𑀁 𑀫𑁂 𑀅𑀪𑀺𑀧𑀢𑁆𑀣𑀺𑀢𑀁.

‘‘𑀅𑀧𑁆𑀧𑀓𑁄 𑀯𑀢 𑀫𑁂 𑀲𑀦𑁆𑀢𑁄, 𑀓𑀸𑀫𑁄 𑀯𑁂𑀮𑁆𑀮𑀺𑀢𑀓𑁂𑀲𑀺𑀬𑀸;

𑀅𑀦𑁂𑀓𑀪𑀸𑀯𑁄 𑀲𑀫𑀼𑀧𑁆𑀧𑀸𑀤𑀺, 𑀅𑀭𑀳𑀦𑁆𑀢𑁂𑀯 𑀤𑀓𑁆𑀔𑀺𑀡𑀸.

‘‘𑀬𑀁 𑀫𑁂 𑀅𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀁, 𑀅𑀭𑀳𑀦𑁆𑀢𑁂𑀲𑀼 𑀢𑀸𑀤𑀺𑀲𑀼;

𑀢𑀁 𑀫𑁂 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀺, 𑀢𑀬𑀸 𑀲𑀤𑁆𑀥𑀺𑀁 𑀯𑀺𑀧𑀘𑁆𑀘𑀢𑀁.

‘‘𑀬𑀁 𑀫𑁂 𑀅𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀁, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂;

𑀢𑀁 𑀫𑁂 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀺, 𑀢𑀬𑀸 𑀲𑀤𑁆𑀥𑀺𑀁 𑀯𑀺𑀧𑀘𑁆𑀘𑀢𑀁.

‘‘𑀲𑀓𑁆𑀬𑀧𑀼𑀢𑁆𑀢𑁄𑀯 𑀛𑀸𑀦𑁂𑀦, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄;

𑀅𑀫𑀢𑀁 𑀫𑀼𑀦𑀺 𑀚𑀺𑀕𑀻𑀲𑀸𑀦𑁄 [𑀚𑀺𑀕𑀺𑀁𑀲𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀢𑀫𑀳𑀁 𑀲𑀽𑀭𑀺𑀬𑀯𑀘𑁆𑀙𑀲𑁂.

‘‘𑀬𑀣𑀸𑀧𑀺 𑀫𑀼𑀦𑀺 𑀦𑀦𑁆𑀤𑁂𑀬𑁆𑀬, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀏𑀯𑀁 𑀦𑀦𑁆𑀤𑁂𑀬𑁆𑀬𑀁 𑀓𑀮𑁆𑀬𑀸𑀡𑀺, 𑀫𑀺𑀲𑁆𑀲𑀻𑀪𑀸𑀯𑀁 𑀕𑀢𑁄 𑀢𑀬𑀸.

‘‘𑀲𑀓𑁆𑀓𑁄 𑀘𑁂 𑀫𑁂 𑀯𑀭𑀁 𑀤𑀚𑁆𑀚𑀸, 𑀢𑀸𑀯𑀢𑀺𑀁𑀲𑀸𑀦𑀫𑀺𑀲𑁆𑀲𑀭𑁄;

𑀢𑀸𑀳𑀁 𑀪𑀤𑁆𑀤𑁂 𑀯𑀭𑁂𑀬𑁆𑀬𑀸𑀳𑁂, 𑀏𑀯𑀁 𑀓𑀸𑀫𑁄 𑀤𑀴𑁆𑀳𑁄 𑀫𑀫.

‘‘𑀲𑀸𑀮𑀁𑀯 𑀦 𑀘𑀺𑀭𑀁 𑀨𑀼𑀮𑁆𑀮𑀁, 𑀧𑀺𑀢𑀭𑀁 𑀢𑁂 𑀲𑀼𑀫𑁂𑀥𑀲𑁂;

𑀯𑀦𑁆𑀤𑀫𑀸𑀦𑁄 𑀦𑀫𑀲𑁆𑀲𑀸𑀫𑀺, 𑀬𑀲𑁆𑀲𑀸 𑀲𑁂𑀢𑀸𑀤𑀺𑀲𑀻 𑀧𑀚𑀸’’𑀢𑀺.

𑁩𑁪𑁯. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀁𑀲𑀦𑁆𑀤𑀢𑀺 𑀔𑁄 𑀢𑁂, 𑀧𑀜𑁆𑀘𑀲𑀺𑀔, 𑀢𑀦𑁆𑀢𑀺𑀲𑁆𑀲𑀭𑁄 𑀕𑀻𑀢𑀲𑁆𑀲𑀭𑁂𑀦, 𑀕𑀻𑀢𑀲𑁆𑀲𑀭𑁄 𑀘 𑀢𑀦𑁆𑀢𑀺𑀲𑁆𑀲𑀭𑁂𑀦; 𑀦 𑀘 𑀧𑀦 [𑀦𑁂𑀯 𑀧𑀦 (𑀲𑁆𑀬𑀸.)] 𑀢𑁂 𑀧𑀜𑁆𑀘𑀲𑀺𑀔, 𑀢𑀦𑁆𑀢𑀺𑀲𑁆𑀲𑀭𑁄 𑀕𑀻𑀢𑀲𑁆𑀲𑀭𑀁 𑀅𑀢𑀺𑀯𑀢𑁆𑀢𑀢𑀺, 𑀕𑀻𑀢𑀲𑁆𑀲𑀭𑁄 𑀘 𑀢𑀦𑁆𑀢𑀺𑀲𑁆𑀲𑀭𑀁. 𑀓𑀤𑀸 𑀲𑀁𑀬𑀽𑀴𑁆𑀳𑀸 𑀧𑀦 𑀢𑁂, 𑀧𑀜𑁆𑀘𑀲𑀺𑀔, 𑀇𑀫𑀸 𑀕𑀸𑀣𑀸 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀸 𑀲𑀗𑁆𑀖𑀽𑀧𑀲𑀜𑁆𑀳𑀺𑀢𑀸 𑀅𑀭𑀳𑀦𑁆𑀢𑀽𑀧𑀲𑀜𑁆𑀳𑀺𑀢𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸’’𑀢𑀺? ‘‘𑀏𑀓𑀫𑀺𑀤𑀁, 𑀪𑀦𑁆𑀢𑁂, 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀢𑁂𑀦 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑁂𑀦 𑀪𑀤𑁆𑀤𑀸 𑀦𑀸𑀫 𑀲𑀽𑀭𑀺𑀬𑀯𑀘𑁆𑀙𑀲𑀸 𑀢𑀺𑀫𑁆𑀩𑀭𑀼𑀦𑁄 𑀕𑀦𑁆𑀥𑀩𑁆𑀩𑀭𑀜𑁆𑀜𑁄 𑀥𑀻𑀢𑀸, 𑀢𑀫𑀪𑀺𑀓𑀗𑁆𑀔𑀸𑀫𑀺. 𑀲𑀸 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀺𑀦𑀻 𑀧𑀭𑀓𑀸𑀫𑀺𑀦𑀻 𑀳𑁄𑀢𑀺; 𑀲𑀺𑀔𑀡𑁆𑀟𑀻 𑀦𑀸𑀫 𑀫𑀸𑀢𑀮𑀺𑀲𑁆𑀲 𑀲𑀗𑁆𑀕𑀸𑀳𑀓𑀲𑁆𑀲 𑀧𑀼𑀢𑁆𑀢𑁄, 𑀢𑀫𑀪𑀺𑀓𑀗𑁆𑀔𑀢𑀺. 𑀬𑀢𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀁 𑀪𑀕𑀺𑀦𑀺𑀁 𑀦𑀸𑀮𑀢𑁆𑀣𑀁 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦. 𑀅𑀣𑀸𑀳𑀁 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀬𑁂𑀦 𑀢𑀺𑀫𑁆𑀩𑀭𑀼𑀦𑁄 𑀕𑀦𑁆𑀥𑀩𑁆𑀩𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀅𑀲𑁆𑀲𑀸𑀯𑁂𑀲𑀺𑀁, 𑀇𑀫𑀸 𑀘 𑀕𑀸𑀣𑀸 𑀅𑀪𑀸𑀲𑀺𑀁 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀸 𑀲𑀗𑁆𑀖𑀽𑀧𑀲𑀜𑁆𑀳𑀺𑀢𑀸 𑀅𑀭𑀳𑀦𑁆𑀢𑀽𑀧𑀲𑀜𑁆𑀳𑀺𑀢𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸 𑁋

‘‘𑀯𑀦𑁆𑀤𑁂 𑀢𑁂 𑀧𑀺𑀢𑀭𑀁 𑀪𑀤𑁆𑀤𑁂, 𑀢𑀺𑀫𑁆𑀩𑀭𑀼𑀁 𑀲𑀽𑀭𑀺𑀬𑀯𑀘𑁆𑀙𑀲𑁂;

𑀬𑁂𑀦 𑀚𑀸𑀢𑀸𑀲𑀺 𑀓𑀮𑁆𑀬𑀸𑀡𑀻, 𑀆𑀦𑀦𑁆𑀤𑀚𑀦𑀦𑀻 𑀫𑀫. …𑀧𑁂…

𑀲𑀸𑀮𑀁𑀯 𑀦 𑀘𑀺𑀭𑀁 𑀨𑀼𑀮𑁆𑀮𑀁, 𑀧𑀺𑀢𑀭𑀁 𑀢𑁂 𑀲𑀼𑀫𑁂𑀥𑀲𑁂;

𑀯𑀦𑁆𑀤𑀫𑀸𑀦𑁄 𑀦𑀫𑀲𑁆𑀲𑀸𑀫𑀺, 𑀬𑀲𑁆𑀲𑀸 𑀲𑁂𑀢𑀸𑀤𑀺𑀲𑀻 𑀧𑀚𑀸’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀪𑀤𑁆𑀤𑀸 𑀲𑀽𑀭𑀺𑀬𑀯𑀘𑁆𑀙𑀲𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀦 𑀔𑁄 𑀫𑁂, 𑀫𑀸𑀭𑀺𑀲, 𑀲𑁄 𑀪𑀕𑀯𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄 𑀅𑀧𑀺 𑀘 𑀲𑀼𑀢𑁄𑀬𑁂𑀯 𑀫𑁂 𑀲𑁄 𑀪𑀕𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀉𑀧𑀦𑀘𑁆𑀘𑀦𑁆𑀢𑀺𑀬𑀸. 𑀬𑀢𑁄 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀢𑀁 𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑁂𑀲𑀺, 𑀳𑁄𑀢𑀼 𑀦𑁄 𑀅𑀚𑁆𑀚 𑀲𑀫𑀸𑀕𑀫𑁄’𑀢𑀺. 𑀲𑁄𑀬𑁂𑀯 𑀦𑁄, 𑀪𑀦𑁆𑀢𑁂, 𑀢𑀲𑁆𑀲𑀸 𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀦 𑀘 𑀤𑀸𑀦𑀺 𑀢𑀢𑁄 𑀧𑀘𑁆𑀙𑀸’’𑀢𑀺.

𑀲𑀓𑁆𑀓𑀽𑀧𑀲𑀗𑁆𑀓𑀫

𑁩𑁫𑁦. 𑀅𑀣 𑀔𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀝𑀺𑀲𑀫𑁆𑀫𑁄𑀤𑀢𑀺 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑀸, 𑀪𑀕𑀯𑀸 𑀘 𑀧𑀜𑁆𑀘𑀲𑀺𑀔𑁂𑀦𑀸’’𑀢𑀺. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀪𑀺𑀯𑀸𑀤𑁂𑀳𑀺 𑀫𑁂 𑀢𑁆𑀯𑀁, 𑀢𑀸𑀢 𑀧𑀜𑁆𑀘𑀲𑀺𑀔, 𑀪𑀕𑀯𑀦𑁆𑀢𑀁 𑁋 ‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺’’. ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑀺 𑁋 ‘‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. ‘‘𑀏𑀯𑀁 𑀲𑀼𑀔𑀻 𑀳𑁄𑀢𑀼, 𑀧𑀜𑁆𑀘𑀲𑀺𑀔, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄; 𑀲𑀼𑀔𑀓𑀸𑀫𑀸 𑀳𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀼𑀣𑀼𑀓𑀸𑀬𑀸’’𑀢𑀺.

𑁩𑁫𑁧. 𑀏𑀯𑀜𑁆𑀘 𑀧𑀦 𑀢𑀣𑀸𑀕𑀢𑀸 𑀏𑀯𑀭𑀽𑀧𑁂 𑀫𑀳𑁂𑀲𑀓𑁆𑀔𑁂 𑀬𑀓𑁆𑀔𑁂 𑀅𑀪𑀺𑀯𑀤𑀦𑁆𑀢𑀺. 𑀅𑀪𑀺𑀯𑀤𑀺𑀢𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀇𑀦𑁆𑀤𑀲𑀸𑀮𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀤𑁂𑀯𑀸𑀧𑀺 𑀢𑀸𑀯𑀢𑀺𑀁𑀲𑀸 𑀇𑀦𑁆𑀤𑀲𑀸𑀮𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀧𑀜𑁆𑀘𑀲𑀺𑀔𑁄𑀧𑀺 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀇𑀦𑁆𑀤𑀲𑀸𑀮𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀇𑀦𑁆𑀤𑀲𑀸𑀮𑀕𑀼𑀳𑀸 𑀯𑀺𑀲𑀫𑀸 𑀲𑀦𑁆𑀢𑀻 𑀲𑀫𑀸 𑀲𑀫𑀧𑀸𑀤𑀺, 𑀲𑀫𑁆𑀩𑀸𑀥𑀸 𑀲𑀦𑁆𑀢𑀻 𑀉𑀭𑀼𑀦𑁆𑀤𑀸 [𑀉𑀭𑀼𑀤𑁆𑀤𑀸 (𑀓.)] 𑀲𑀫𑀧𑀸𑀤𑀺, 𑀅𑀦𑁆𑀥𑀓𑀸𑀭𑁄 𑀕𑀼𑀳𑀸𑀬𑀁 𑀅𑀦𑁆𑀢𑀭𑀥𑀸𑀬𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺 𑀬𑀣𑀸 𑀢𑀁 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑁂𑀦.

𑁩𑁫𑁨. 𑀅𑀣 𑀔𑁄 𑀪𑀕𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀫𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀲𑀺𑀬𑀲𑁆𑀲, 𑀅𑀩𑁆𑀪𑀼𑀢𑀫𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀲𑀺𑀬𑀲𑁆𑀲 𑀢𑀸𑀯 𑀩𑀳𑀼𑀓𑀺𑀘𑁆𑀘𑀲𑁆𑀲 𑀩𑀳𑀼𑀓𑀭𑀡𑀻𑀬𑀲𑁆𑀲 𑀬𑀤𑀺𑀤𑀁 𑀇𑀥𑀸𑀕𑀫𑀦’’𑀦𑁆𑀢𑀺. ‘‘𑀘𑀺𑀭𑀧𑀝𑀺𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄; 𑀅𑀧𑀺 𑀘 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀓𑁂𑀳𑀺𑀘𑀺 𑀓𑁂𑀳𑀺𑀘𑀺 [𑀓𑁂𑀳𑀺𑀘𑀺 (𑀲𑁆𑀬𑀸.)] 𑀓𑀺𑀘𑁆𑀘𑀓𑀭𑀡𑀻𑀬𑁂𑀳𑀺 𑀩𑁆𑀬𑀸𑀯𑀝𑁄; 𑀏𑀯𑀸𑀳𑀁 𑀦𑀸𑀲𑀓𑁆𑀔𑀺𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀏𑀓𑀫𑀺𑀤𑀁, 𑀪𑀦𑁆𑀢𑁂, 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀲𑀮𑀴𑀸𑀕𑀸𑀭𑀓𑁂. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀢𑁂𑀦 𑀔𑁄 𑀧𑀦, 𑀪𑀦𑁆𑀢𑁂, 𑀲𑀫𑀬𑁂𑀦 𑀪𑀕𑀯𑀸 𑀅𑀜𑁆𑀜𑀢𑀭𑁂𑀦 𑀲𑀫𑀸𑀥𑀺𑀦𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀪𑀽𑀚𑀢𑀺 [𑀪𑀼𑀜𑁆𑀚𑀢𑀻 𑀘 (𑀲𑀻. 𑀧𑀻.), 𑀪𑀼𑀚𑀕𑀻 (𑀲𑁆𑀬𑀸.)] 𑀘 𑀦𑀸𑀫 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀢𑀺𑀝𑁆𑀞𑀢𑀺. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀽𑀚𑀢𑀺𑀁 𑀏𑀢𑀤𑀯𑁄𑀘𑀁 𑁋 ‘𑀅𑀪𑀺𑀯𑀸𑀤𑁂𑀳𑀺 𑀫𑁂 𑀢𑁆𑀯𑀁, 𑀪𑀕𑀺𑀦𑀺, 𑀪𑀕𑀯𑀦𑁆𑀢𑀁 𑁋 ‘‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑀸 𑀪𑀽𑀚𑀢𑀺 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀓𑀸𑀮𑁄 𑀔𑁄, 𑀫𑀸𑀭𑀺𑀲, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬; 𑀧𑀝𑀺𑀲𑀮𑁆𑀮𑀻𑀦𑁄 𑀪𑀕𑀯𑀸’𑀢𑀺. ‘𑀢𑁂𑀦 𑀳𑀻, 𑀪𑀕𑀺𑀦𑀺, 𑀬𑀤𑀸 𑀪𑀕𑀯𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺, 𑀅𑀣 𑀫𑀫 𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀳𑀺 𑁋 ‘‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. 𑀓𑀘𑁆𑀘𑀺 𑀫𑁂 𑀲𑀸, 𑀪𑀦𑁆𑀢𑁂, 𑀪𑀕𑀺𑀦𑀻 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀲𑀺? 𑀲𑀭𑀢𑀺 𑀪𑀕𑀯𑀸 𑀢𑀲𑁆𑀲𑀸 𑀪𑀕𑀺𑀦𑀺𑀬𑀸 𑀯𑀘𑀦’’𑀦𑁆𑀢𑀺? ‘‘𑀅𑀪𑀺𑀯𑀸𑀤𑁂𑀲𑀺 𑀫𑀁 𑀲𑀸, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀕𑀺𑀦𑀻, 𑀲𑀭𑀸𑀫𑀳𑀁 𑀢𑀲𑁆𑀲𑀸 𑀪𑀕𑀺𑀦𑀺𑀬𑀸 𑀯𑀘𑀦𑀁. 𑀅𑀧𑀺 𑀘𑀸𑀳𑀁 𑀆𑀬𑀲𑁆𑀫𑀢𑁄 𑀦𑁂𑀫𑀺𑀲𑀤𑁆𑀤𑁂𑀦 [𑀘𑀓𑁆𑀓𑀦𑁂𑀫𑀺𑀲𑀤𑁆𑀤𑁂𑀦 (𑀲𑁆𑀬𑀸.)] 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄’’𑀢𑀺. ‘‘𑀬𑁂 𑀢𑁂, 𑀪𑀦𑁆𑀢𑁂, 𑀤𑁂𑀯𑀸 𑀅𑀫𑁆𑀳𑁂𑀳𑀺 𑀧𑀞𑀫𑀢𑀭𑀁 𑀢𑀸𑀯𑀢𑀺𑀁𑀲𑀓𑀸𑀬𑀁 𑀉𑀧𑀧𑀦𑁆𑀦𑀸, 𑀢𑁂𑀲𑀁 𑀫𑁂 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀤𑀺𑀩𑁆𑀩𑀸 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’𑀢𑀺. 𑀢𑀁 𑀫𑁂 𑀇𑀤𑀁, 𑀪𑀦𑁆𑀢𑁂, 𑀲𑀓𑁆𑀔𑀺𑀤𑀺𑀝𑁆𑀞𑀁 𑀬𑀢𑁄 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀤𑀺𑀩𑁆𑀩𑀸 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸𑀢𑀺.

𑀕𑁄𑀧𑀓𑀯𑀢𑁆𑀣𑀼

𑁩𑁫𑁩. ‘‘𑀇𑀥𑁂𑀯, 𑀪𑀦𑁆𑀢𑁂, 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀕𑁄𑀧𑀺𑀓𑀸 𑀦𑀸𑀫 𑀲𑀓𑁆𑀬𑀥𑀻𑀢𑀸 𑀅𑀳𑁄𑀲𑀺 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀻. 𑀲𑀸 𑀇𑀢𑁆𑀣𑀺𑀢𑁆𑀢𑀁 [𑀇𑀢𑁆𑀣𑀺𑀘𑀺𑀢𑁆𑀢𑀁 (𑀲𑁆𑀬𑀸.)] 𑀯𑀺𑀭𑀸𑀚𑁂𑀢𑁆𑀯𑀸 𑀧𑀼𑀭𑀺𑀲𑀢𑁆𑀢𑀁 [𑀧𑀼𑀭𑀺𑀲𑀘𑀺𑀢𑁆𑀢𑀁 (𑀲𑁆𑀬𑀸.)] 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸. 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀢𑁆𑀢𑀁 𑀅𑀚𑁆𑀛𑀼𑀧𑀕𑀢𑀸. 𑀢𑀢𑁆𑀭𑀧𑀺 𑀦𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄, 𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄’𑀢𑀺. 𑀅𑀜𑁆𑀜𑁂𑀧𑀺, 𑀪𑀦𑁆𑀢𑁂, 𑀢𑀬𑁄 𑀪𑀺𑀓𑁆𑀔𑀽 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀳𑀻𑀦𑀁 𑀕𑀦𑁆𑀥𑀩𑁆𑀩𑀓𑀸𑀬𑀁 𑀉𑀧𑀧𑀦𑁆𑀦𑀸. 𑀢𑁂 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑀬𑀫𑀸𑀦𑀸 𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺 𑀅𑀫𑁆𑀳𑀸𑀓𑀁 𑀧𑀸𑀭𑀺𑀘𑀭𑀺𑀬𑀁. 𑀢𑁂 𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑁂 𑀅𑀫𑁆𑀳𑀸𑀓𑀁 𑀧𑀸𑀭𑀺𑀘𑀭𑀺𑀬𑀁 𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄 𑀧𑀝𑀺𑀘𑁄𑀤𑁂𑀲𑀺 𑁋 ‘𑀓𑀼𑀢𑁄𑀫𑀼𑀔𑀸 𑀦𑀸𑀫 𑀢𑀼𑀫𑁆𑀳𑁂, 𑀫𑀸𑀭𑀺𑀲𑀸, 𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀁 𑀅𑀲𑁆𑀲𑀼𑀢𑁆𑀣 [𑀆𑀬𑀼𑀳𑀺𑀢𑁆𑀣 (𑀲𑁆𑀬𑀸.)] 𑁋 𑀅𑀳𑀜𑁆𑀳𑀺 𑀦𑀸𑀫 𑀇𑀢𑁆𑀣𑀺𑀓𑀸 𑀲𑀫𑀸𑀦𑀸 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀻 𑀇𑀢𑁆𑀣𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸 𑀧𑀼𑀭𑀺𑀲𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀢𑁆𑀢𑀢𑁆𑀢𑀁 𑀅𑀚𑁆𑀛𑀼𑀧𑀕𑀢𑀸. 𑀇𑀥𑀸𑀧𑀺 𑀫𑀁 𑀏𑀯𑀁 𑀚𑀸𑀦𑀦𑁆𑀢𑀺 ‘‘𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄 𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄’𑀢𑀺. 𑀢𑀼𑀫𑁆𑀳𑁂 𑀧𑀦, 𑀫𑀸𑀭𑀺𑀲𑀸, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀳𑀻𑀦𑀁 𑀕𑀦𑁆𑀥𑀩𑁆𑀩𑀓𑀸𑀬𑀁 𑀉𑀧𑀧𑀦𑁆𑀦𑀸. 𑀤𑀼𑀤𑁆𑀤𑀺𑀝𑁆𑀞𑀭𑀽𑀧𑀁 𑀯𑀢, 𑀪𑁄, 𑀅𑀤𑁆𑀤𑀲𑀸𑀫, 𑀬𑁂 𑀫𑀬𑀁 𑀅𑀤𑁆𑀤𑀲𑀸𑀫 𑀲𑀳𑀥𑀫𑁆𑀫𑀺𑀓𑁂 𑀳𑀻𑀦𑀁 𑀕𑀦𑁆𑀥𑀩𑁆𑀩𑀓𑀸𑀬𑀁 𑀉𑀧𑀧𑀦𑁆𑀦𑁂’𑀢𑀺. 𑀢𑁂𑀲𑀁, 𑀪𑀦𑁆𑀢𑁂, 𑀕𑁄𑀧𑀓𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀧𑀝𑀺𑀘𑁄𑀤𑀺𑀢𑀸𑀦𑀁 𑀤𑁆𑀯𑁂 𑀤𑁂𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀢𑀺𑀁 𑀧𑀝𑀺𑀮𑀪𑀺𑀁𑀲𑀼 𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀁, 𑀏𑀓𑁄 𑀧𑀦 𑀤𑁂𑀯𑁄 𑀓𑀸𑀫𑁂 𑀅𑀚𑁆𑀛𑀸𑀯𑀲𑀺.

𑁩𑁫𑁪. ‘‘‘𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄 𑀅𑀳𑁄𑀲𑀺𑀁,

𑀦𑀸𑀫𑀫𑁆𑀧𑀺 𑀫𑀬𑁆𑀳𑀁 𑀅𑀳𑀼 ‘𑀕𑁄𑀧𑀺𑀓𑀸’𑀢𑀺;

𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀅𑀪𑀺𑀧𑁆𑀧𑀲𑀦𑁆𑀦𑀸,

𑀲𑀗𑁆𑀖𑀜𑁆𑀘𑀼𑀧𑀝𑁆𑀞𑀸𑀲𑀺𑀁 𑀧𑀲𑀦𑁆𑀦𑀘𑀺𑀢𑁆𑀢𑀸.

‘‘‘𑀢𑀲𑁆𑀲𑁂𑀯 𑀩𑀼𑀤𑁆𑀥𑀲𑁆𑀲 𑀲𑀼𑀥𑀫𑁆𑀫𑀢𑀸𑀬,

𑀲𑀓𑁆𑀓𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀫𑀳𑀸𑀦𑀼𑀪𑀸𑀯𑁄;

𑀫𑀳𑀸𑀚𑀼𑀢𑀻𑀓𑁄 𑀢𑀺𑀤𑀺𑀯𑀽𑀧𑀧𑀦𑁆𑀦𑁄,

𑀚𑀸𑀦𑀦𑁆𑀢𑀺 𑀫𑀁 𑀇𑀥𑀸𑀧𑀺 ‘𑀕𑁄𑀧𑀓𑁄’𑀢𑀺.

‘‘‘𑀅𑀣𑀤𑁆𑀤𑀲𑀁 𑀪𑀺𑀓𑁆𑀔𑀯𑁄 𑀤𑀺𑀝𑁆𑀞𑀧𑀼𑀩𑁆𑀩𑁂,

𑀕𑀦𑁆𑀥𑀩𑁆𑀩𑀓𑀸𑀬𑀽𑀧𑀕𑀢𑁂 𑀯𑀲𑀻𑀦𑁂;

𑀇𑀫𑁂𑀳𑀺 𑀢𑁂 𑀕𑁄𑀢𑀫𑀲𑀸𑀯𑀓𑀸𑀲𑁂,

𑀬𑁂 𑀘 𑀫𑀬𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸.

‘‘‘𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀺𑀫𑁆𑀳𑀸,

𑀧𑀸𑀤𑀽𑀧𑀲𑀗𑁆𑀕𑀬𑁆𑀳 𑀲𑀓𑁂 𑀦𑀺𑀯𑁂𑀲𑀦𑁂;

𑀓𑀼𑀢𑁄𑀫𑀼𑀔𑀸 𑀦𑀸𑀫 𑀇𑀫𑁂 𑀪𑀯𑀦𑁆𑀢𑁄,

𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀸𑀦𑀺 𑀧𑀝𑀺𑀕𑁆𑀕𑀳𑁂𑀲𑀼𑀁 [𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀁 𑀦 𑀧𑀝𑀺𑀕𑁆𑀕𑀳𑁂𑀲𑀼𑀁 (𑀲𑁆𑀬𑀸.)].

‘‘‘𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀳𑀺 𑀥𑀫𑁆𑀫𑁄,

𑀲𑀼𑀤𑁂𑀲𑀺𑀢𑁄 𑀘𑀓𑁆𑀔𑀼𑀫𑀢𑀸𑀦𑀼𑀩𑀼𑀤𑁆𑀥𑁄;

𑀅𑀳𑀜𑁆𑀳𑀺 𑀢𑀼𑀫𑁆𑀳𑁂𑀯 𑀉𑀧𑀸𑀲𑀫𑀸𑀦𑁄,

𑀲𑀼𑀢𑁆𑀯𑀸𑀦 𑀅𑀭𑀺𑀬𑀸𑀦 𑀲𑀼𑀪𑀸𑀲𑀺𑀢𑀸𑀦𑀺.

‘‘‘𑀲𑀓𑁆𑀓𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀫𑀳𑀸𑀦𑀼𑀪𑀸𑀯𑁄,

𑀫𑀳𑀸𑀚𑀼𑀢𑀻𑀓𑁄 𑀢𑀺𑀤𑀺𑀯𑀽𑀧𑀧𑀦𑁆𑀦𑁄;

𑀢𑀼𑀫𑁆𑀳𑁂 𑀧𑀦 𑀲𑁂𑀝𑁆𑀞𑀫𑀼𑀧𑀸𑀲𑀫𑀸𑀦𑀸,

𑀅𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸.

‘‘‘𑀳𑀻𑀦𑀁 𑀓𑀸𑀬𑀁 𑀉𑀧𑀧𑀦𑁆𑀦𑀸 𑀪𑀯𑀦𑁆𑀢𑁄,

𑀅𑀦𑀸𑀦𑀼𑀮𑁄𑀫𑀸 𑀪𑀯𑀢𑀽𑀧𑀧𑀢𑁆𑀢𑀺;

𑀤𑀼𑀤𑁆𑀤𑀺𑀝𑁆𑀞𑀭𑀽𑀧𑀁 𑀯𑀢 𑀅𑀤𑁆𑀤𑀲𑀸𑀫,

𑀲𑀳𑀥𑀫𑁆𑀫𑀺𑀓𑁂 𑀳𑀻𑀦𑀓𑀸𑀬𑀽𑀧𑀧𑀦𑁆𑀦𑁂.

‘‘‘𑀕𑀦𑁆𑀥𑀩𑁆𑀩𑀓𑀸𑀬𑀽𑀧𑀕𑀢𑀸 𑀪𑀯𑀦𑁆𑀢𑁄,

𑀤𑁂𑀯𑀸𑀦𑀫𑀸𑀕𑀘𑁆𑀙𑀣 𑀧𑀸𑀭𑀺𑀘𑀭𑀺𑀬𑀁;

𑀅𑀕𑀸𑀭𑁂 𑀯𑀲𑀢𑁄 𑀫𑀬𑁆𑀳𑀁,

𑀇𑀫𑀁 𑀧𑀲𑁆𑀲 𑀯𑀺𑀲𑁂𑀲𑀢𑀁.

‘‘‘𑀇𑀢𑁆𑀣𑀻 𑀳𑀼𑀢𑁆𑀯𑀸 𑀲𑁆𑀯𑀚𑁆𑀚 𑀧𑀼𑀫𑁄𑀫𑁆𑀳𑀺 𑀤𑁂𑀯𑁄,

𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄’;

𑀢𑁂 𑀘𑁄𑀤𑀺𑀢𑀸 𑀕𑁄𑀢𑀫𑀲𑀸𑀯𑀓𑁂𑀦,

𑀲𑀁𑀯𑁂𑀕𑀫𑀸𑀧𑀸𑀤𑀼 𑀲𑀫𑁂𑀘𑁆𑀘 𑀕𑁄𑀧𑀓𑀁.

‘‘‘𑀳𑀦𑁆𑀤 𑀯𑀺𑀬𑀸𑀬𑀸𑀫 [𑀯𑀺𑀕𑀸𑀬𑀸𑀫 (𑀲𑁆𑀬𑀸.), 𑀯𑀺𑀢𑀸𑀬𑀸𑀫 (𑀧𑀻.)] 𑀩𑁆𑀬𑀸𑀬𑀸𑀫 [𑀯𑀺𑀬𑀸𑀬𑀫𑀸𑀫 (𑀲𑀻. 𑀧𑀻.)],

𑀫𑀸 𑀦𑁄 𑀫𑀬𑀁 𑀧𑀭𑀧𑁂𑀲𑁆𑀲𑀸 𑀅𑀳𑀼𑀫𑁆𑀳𑀸’;

𑀢𑁂𑀲𑀁 𑀤𑀼𑀯𑁂 𑀯𑀻𑀭𑀺𑀬𑀫𑀸𑀭𑀪𑀺𑀁𑀲𑀼,

𑀅𑀦𑀼𑀲𑁆𑀲𑀭𑀁 𑀕𑁄𑀢𑀫𑀲𑀸𑀲𑀦𑀸𑀦𑀺.

‘‘𑀇𑀥𑁂𑀯 𑀘𑀺𑀢𑁆𑀢𑀸𑀦𑀺 𑀯𑀺𑀭𑀸𑀚𑀬𑀺𑀢𑁆𑀯𑀸,

𑀓𑀸𑀫𑁂𑀲𑀼 𑀆𑀤𑀻𑀦𑀯𑀫𑀤𑁆𑀤𑀲𑀁𑀲𑀼;

𑀢𑁂 𑀓𑀸𑀫𑀲𑀁𑀬𑁄𑀚𑀦𑀩𑀦𑁆𑀥𑀦𑀸𑀦𑀺,

𑀧𑀸𑀧𑀺𑀫𑀬𑁄𑀕𑀸𑀦𑀺 𑀤𑀼𑀭𑀘𑁆𑀘𑀬𑀸𑀦𑀺.

‘‘𑀦𑀸𑀕𑁄𑀯 𑀲𑀦𑁆𑀦𑀸𑀦𑀺 𑀕𑀼𑀡𑀸𑀦𑀺 [𑀲𑀦𑁆𑀤𑀸𑀦𑀕𑀼𑀡𑀸𑀦𑀺 (𑀲𑀻. 𑀧𑀻.), 𑀲𑀦𑁆𑀢𑀸𑀦𑀺 𑀕𑀼𑀡𑀸𑀦𑀺 (𑀲𑁆𑀬𑀸.)] 𑀙𑁂𑀢𑁆𑀯𑀸,

𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀢𑀺𑀓𑁆𑀓𑀫𑀺𑀁𑀲𑀼;

𑀲𑀇𑀦𑁆𑀤𑀸 𑀤𑁂𑀯𑀸 𑀲𑀧𑀚𑀸𑀧𑀢𑀺𑀓𑀸,

𑀲𑀩𑁆𑀩𑁂 𑀲𑀼𑀥𑀫𑁆𑀫𑀸𑀬 𑀲𑀪𑀸𑀬𑀼𑀧𑀯𑀺𑀝𑁆𑀞𑀸.

‘‘𑀢𑁂𑀲𑀁 𑀦𑀺𑀲𑀺𑀦𑁆𑀦𑀸𑀦𑀁 𑀅𑀪𑀺𑀓𑁆𑀓𑀫𑀺𑀁𑀲𑀼,

𑀯𑀻𑀭𑀸 𑀯𑀺𑀭𑀸𑀕𑀸 𑀯𑀺𑀭𑀚𑀁 𑀓𑀭𑁄𑀦𑁆𑀢𑀸;

𑀢𑁂 𑀤𑀺𑀲𑁆𑀯𑀸 𑀲𑀁𑀯𑁂𑀕𑀫𑀓𑀸𑀲𑀺 𑀯𑀸𑀲𑀯𑁄,

𑀤𑁂𑀯𑀸𑀪𑀺𑀪𑀽 𑀤𑁂𑀯𑀕𑀡𑀲𑁆𑀲 𑀫𑀚𑁆𑀛𑁂.

‘‘‘𑀇𑀫𑁂𑀳𑀺 𑀢𑁂 𑀳𑀻𑀦𑀓𑀸𑀬𑀽𑀧𑀧𑀦𑁆𑀦𑀸,

𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀪𑀺𑀓𑁆𑀓𑀫𑀦𑁆𑀢𑀺’;

𑀲𑀁𑀯𑁂𑀕𑀚𑀸𑀢𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫,

𑀲𑁄 𑀕𑁄𑀧𑀓𑁄 𑀯𑀸𑀲𑀯𑀫𑀚𑁆𑀛𑀪𑀸𑀲𑀺.

‘‘‘𑀩𑀼𑀤𑁆𑀥𑁄 𑀚𑀦𑀺𑀦𑁆𑀤𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂,

𑀓𑀸𑀫𑀸𑀪𑀺𑀪𑀽 𑀲𑀓𑁆𑀬𑀫𑀼𑀦𑀻𑀢𑀺 𑀜𑀸𑀬𑀢𑀺;

𑀢𑀲𑁆𑀲𑁂𑀯 𑀢𑁂 𑀧𑀼𑀢𑁆𑀢𑀸 𑀲𑀢𑀺𑀬𑀸 𑀯𑀺𑀳𑀻𑀦𑀸,

𑀘𑁄𑀤𑀺𑀢𑀸 𑀫𑀬𑀸 𑀢𑁂 𑀲𑀢𑀺𑀫𑀚𑁆𑀛𑀮𑀢𑁆𑀣𑀼𑀁.

‘‘‘𑀢𑀺𑀡𑁆𑀡𑀁 𑀢𑁂𑀲𑀁 𑀆𑀯𑀲𑀺𑀦𑁂𑀢𑁆𑀣 [𑀅𑀯𑀲𑀻𑀦𑁂𑀢𑁆𑀣 (𑀧𑀻.)] 𑀏𑀓𑁄,

𑀕𑀦𑁆𑀥𑀩𑁆𑀩𑀓𑀸𑀬𑀽𑀧𑀕𑀢𑁄 𑀯𑀲𑀻𑀦𑁄;

𑀤𑁆𑀯𑁂 𑀘 𑀲𑀫𑁆𑀩𑁄𑀥𑀺𑀧𑀣𑀸𑀦𑀼𑀲𑀸𑀭𑀺𑀦𑁄,

𑀤𑁂𑀯𑁂𑀧𑀺 𑀳𑀻𑀴𑁂𑀦𑁆𑀢𑀺 𑀲𑀫𑀸𑀳𑀺𑀢𑀢𑁆𑀢𑀸.

‘‘‘𑀏𑀢𑀸𑀤𑀺𑀲𑀻 𑀥𑀫𑁆𑀫𑀧𑁆𑀧𑀓𑀸𑀲𑀦𑁂𑀢𑁆𑀣,

𑀦 𑀢𑀢𑁆𑀣 𑀓𑀺𑀁𑀓𑀗𑁆𑀔𑀢𑀺 𑀓𑁄𑀘𑀺 𑀲𑀸𑀯𑀓𑁄;

𑀦𑀺𑀢𑀺𑀡𑁆𑀡𑀑𑀖𑀁 𑀯𑀺𑀘𑀺𑀓𑀺𑀘𑁆𑀙𑀙𑀺𑀦𑁆𑀦𑀁,

𑀩𑀼𑀤𑁆𑀥𑀁 𑀦𑀫𑀲𑁆𑀲𑀸𑀫 𑀚𑀺𑀦𑀁 𑀚𑀦𑀺𑀦𑁆𑀤𑀁’.

‘‘𑀬𑀁 𑀢𑁂 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬,

𑀯𑀺𑀲𑁂𑀲𑀁 𑀅𑀚𑁆𑀛𑀕𑀁𑀲𑀼 [𑀅𑀚𑁆𑀛𑀕𑀫𑀁𑀲𑀼 (𑀲𑁆𑀬𑀸.)] 𑀢𑁂;

𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀁,

𑀤𑀼𑀯𑁂 𑀢𑁂𑀲𑀁 𑀯𑀺𑀲𑁂𑀲𑀕𑀽.

‘‘𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀢𑁆𑀢𑀺𑀬𑀸,

𑀆𑀕𑀢𑀫𑁆𑀳𑀸𑀲𑀺 𑀫𑀸𑀭𑀺𑀲;

𑀓𑀢𑀸𑀯𑀓𑀸𑀲𑀸 𑀪𑀕𑀯𑀢𑀸,

𑀧𑀜𑁆𑀳𑀁 𑀧𑀼𑀘𑁆𑀙𑁂𑀫𑀼 𑀫𑀸𑀭𑀺𑀲𑀸’’𑀢𑀺.

𑁩𑁫𑁫. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀤𑀻𑀖𑀭𑀢𑁆𑀢𑀁 𑀯𑀺𑀲𑀼𑀤𑁆𑀥𑁄 𑀔𑁄 𑀅𑀬𑀁 𑀬𑀓𑁆𑀔𑁄 [𑀲𑀓𑁆𑀓𑁄 (𑀲𑀻. 𑀲𑁆𑀬𑀸. 𑀧𑀻.)], 𑀬𑀁 𑀓𑀺𑀜𑁆𑀘𑀺 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀅𑀢𑁆𑀣𑀲𑀜𑁆𑀳𑀺𑀢𑀁𑀬𑁂𑀯 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑁄 𑀅𑀦𑀢𑁆𑀣𑀲𑀜𑁆𑀳𑀺𑀢𑀁. 𑀬𑀜𑁆𑀘𑀲𑁆𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺.

𑁩𑁫𑁬. 𑀅𑀣 𑀔𑁄 𑀪𑀕𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀧𑀼𑀘𑁆𑀙 𑀯𑀸𑀲𑀯 𑀫𑀁 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁩𑁫𑁭. 𑀓𑀢𑀸𑀯𑀓𑀸𑀲𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑀸 𑀇𑀫𑀁 𑀪𑀕𑀯𑀦𑁆𑀢𑀁 [𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀇𑀫𑀁 (𑀲𑀻. 𑀧𑀻.)] 𑀧𑀞𑀫𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀓𑀺𑀁 𑀲𑀁𑀬𑁄𑀚𑀦𑀸 𑀦𑀼 𑀔𑁄, 𑀫𑀸𑀭𑀺𑀲, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀼𑀣𑀼𑀓𑀸𑀬𑀸, 𑀢𑁂 𑁋 ‘𑀅𑀯𑁂𑀭𑀸 𑀅𑀤𑀡𑁆𑀟𑀸 𑀅𑀲𑀧𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑁂𑀫𑀼 𑀅𑀯𑁂𑀭𑀺𑀦𑁄’𑀢𑀺 𑀇𑀢𑀺 𑀘 𑀦𑁂𑀲𑀁 𑀳𑁄𑀢𑀺, 𑀅𑀣 𑀘 𑀧𑀦 𑀲𑀯𑁂𑀭𑀸 𑀲𑀤𑀡𑁆𑀟𑀸 𑀲𑀲𑀧𑀢𑁆𑀢𑀸 𑀲𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑀦𑁆𑀢𑀺 𑀲𑀯𑁂𑀭𑀺𑀦𑁄’’𑀢𑀺? 𑀇𑀢𑁆𑀣𑀁 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 [𑀇𑀫𑀁 𑀧𑀞𑀫𑀁 𑀧𑀜𑁆𑀳𑀁 (𑀲𑀻. 𑀧𑀻.)] 𑀅𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺 𑁋

‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀸 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀼𑀣𑀼𑀓𑀸𑀬𑀸, 𑀢𑁂 𑁋 ‘𑀅𑀯𑁂𑀭𑀸 𑀅𑀤𑀡𑁆𑀟𑀸 𑀅𑀲𑀧𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑁂𑀫𑀼 𑀅𑀯𑁂𑀭𑀺𑀦𑁄’𑀢𑀺 𑀇𑀢𑀺 𑀘 𑀦𑁂𑀲𑀁 𑀳𑁄𑀢𑀺, 𑀅𑀣 𑀘 𑀧𑀦 𑀲𑀯𑁂𑀭𑀸 𑀲𑀤𑀡𑁆𑀟𑀸 𑀲𑀲𑀧𑀢𑁆𑀢𑀸 𑀲𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑀦𑁆𑀢𑀺 𑀲𑀯𑁂𑀭𑀺𑀦𑁄’’𑀢𑀺. 𑀇𑀢𑁆𑀣𑀁 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺. 𑀅𑀢𑁆𑀢𑀫𑀦𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺 𑀅𑀦𑀼𑀫𑁄𑀤𑀺 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑁩𑁫𑁮. 𑀇𑀢𑀺𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁; 𑀓𑀺𑀲𑁆𑀫𑀺𑀁 𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀦 𑀳𑁄𑀢𑀻’’𑀢𑀺? ‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀧𑀺𑀬𑀸𑀧𑁆𑀧𑀺𑀬𑀦𑀺𑀤𑀸𑀦𑀁 𑀧𑀺𑀬𑀸𑀧𑁆𑀧𑀺𑀬𑀲𑀫𑀼𑀤𑀬𑀁 𑀧𑀺𑀬𑀸𑀧𑁆𑀧𑀺𑀬𑀚𑀸𑀢𑀺𑀓𑀁 𑀧𑀺𑀬𑀸𑀧𑁆𑀧𑀺𑀬𑀧𑀪𑀯𑀁; 𑀧𑀺𑀬𑀸𑀧𑁆𑀧𑀺𑀬𑁂 𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀧𑀺𑀬𑀸𑀧𑁆𑀧𑀺𑀬𑁂 𑀅𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀦 𑀳𑁄𑀢𑀻’’𑀢𑀺.

‘‘𑀧𑀺𑀬𑀸𑀧𑁆𑀧𑀺𑀬𑀁 𑀔𑁄 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁; 𑀓𑀺𑀲𑁆𑀫𑀺𑀁 𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀦 𑀳𑁄𑀢𑀻’’𑀢𑀺? ‘‘𑀧𑀺𑀬𑀸𑀧𑁆𑀧𑀺𑀬𑀁 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀙𑀦𑁆𑀤𑀦𑀺𑀤𑀸𑀦𑀁 𑀙𑀦𑁆𑀤𑀲𑀫𑀼𑀤𑀬𑀁 𑀙𑀦𑁆𑀤𑀚𑀸𑀢𑀺𑀓𑀁 𑀙𑀦𑁆𑀤𑀧𑀪𑀯𑀁; 𑀙𑀦𑁆𑀤𑁂 𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀳𑁄𑀢𑀺; 𑀙𑀦𑁆𑀤𑁂 𑀅𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀦 𑀳𑁄𑀢𑀻’’𑀢𑀺.

‘‘𑀙𑀦𑁆𑀤𑁄 𑀔𑁄 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄; 𑀓𑀺𑀲𑁆𑀫𑀺𑀁 𑀲𑀢𑀺 𑀙𑀦𑁆𑀤𑁄 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀙𑀦𑁆𑀤𑁄 𑀦 𑀳𑁄𑀢𑀻’’𑀢𑀺? ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄 𑀯𑀺𑀢𑀓𑁆𑀓𑀲𑀫𑀼𑀤𑀬𑁄 𑀯𑀺𑀢𑀓𑁆𑀓𑀚𑀸𑀢𑀺𑀓𑁄 𑀯𑀺𑀢𑀓𑁆𑀓𑀧𑀪𑀯𑁄; 𑀯𑀺𑀢𑀓𑁆𑀓𑁂 𑀲𑀢𑀺 𑀙𑀦𑁆𑀤𑁄 𑀳𑁄𑀢𑀺; 𑀯𑀺𑀢𑀓𑁆𑀓𑁂 𑀅𑀲𑀢𑀺 𑀙𑀦𑁆𑀤𑁄 𑀦 𑀳𑁄𑀢𑀻’’𑀢𑀺.

‘‘𑀯𑀺𑀢𑀓𑁆𑀓𑁄 𑀔𑁄 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄; 𑀓𑀺𑀲𑁆𑀫𑀺𑀁 𑀲𑀢𑀺 𑀯𑀺𑀢𑀓𑁆𑀓𑁄 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀯𑀺𑀢𑀓𑁆𑀓𑁄 𑀦 𑀳𑁄𑀢𑀻’’𑀢𑀺? ‘‘𑀯𑀺𑀢𑀓𑁆𑀓𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀤𑀸𑀦𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀲𑀫𑀼𑀤𑀬𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀚𑀸𑀢𑀺𑀓𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀧𑀪𑀯𑁄; 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀬 𑀲𑀢𑀺 𑀯𑀺𑀢𑀓𑁆𑀓𑁄 𑀳𑁄𑀢𑀺; 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀬 𑀅𑀲𑀢𑀺 𑀯𑀺𑀢𑀓𑁆𑀓𑁄 𑀦 𑀳𑁄𑀢𑀻’’𑀢𑀺.

‘‘𑀓𑀣𑀁 𑀧𑀝𑀺𑀧𑀦𑁆𑀦𑁄 𑀧𑀦, 𑀫𑀸𑀭𑀺𑀲, 𑀪𑀺𑀓𑁆𑀔𑀼 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺?

𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀁

𑁩𑁫𑁯. ‘‘𑀲𑁄𑀫𑀦𑀲𑁆𑀲𑀁𑀧𑀸𑀳𑀁 [𑀧𑀳𑀁 (𑀲𑀻. 𑀧𑀻.), 𑀘𑀸𑀳𑀁 (𑀲𑁆𑀬𑀸. 𑀓𑀁.)], 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀤𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀉𑀧𑁂𑀓𑁆𑀔𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺.

𑁩𑁬𑁦. ‘‘𑀲𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀲𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 𑀫𑁂 𑀲𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀲𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 𑀫𑁂 𑀲𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁, 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 [𑀲𑁂 (𑀲𑀻. 𑀧𑀻.)] 𑀧𑀡𑀻𑀢𑀢𑀭𑁂. 𑀲𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁬𑁧. ‘‘𑀤𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀤𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 𑀫𑁂 𑀤𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀤𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 𑀫𑁂 𑀤𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁, 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 𑀧𑀡𑀻𑀢𑀢𑀭𑁂. 𑀤𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁬𑁨. ‘‘𑀉𑀧𑁂𑀓𑁆𑀔𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀉𑀧𑁂𑀓𑁆𑀔𑀁 ‘𑀇𑀫𑀁 𑀔𑁄 𑀫𑁂 𑀉𑀧𑁂𑀓𑁆𑀔𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀉𑀧𑁂𑀓𑁆𑀔𑀁 ‘𑀇𑀫𑀁 𑀔𑁄 𑀫𑁂 𑀉𑀧𑁂𑀓𑁆𑀔𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸 𑀲𑁂𑀯𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁, 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 𑀧𑀡𑀻𑀢𑀢𑀭𑁂. 𑀉𑀧𑁂𑀓𑁆𑀔𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁬𑁩. ‘‘𑀏𑀯𑀁 𑀧𑀝𑀺𑀧𑀦𑁆𑀦𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑀁 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺. 𑀅𑀢𑁆𑀢𑀫𑀦𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺 𑀅𑀦𑀼𑀫𑁄𑀤𑀺 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢, 𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄

𑁩𑁬𑁪. 𑀇𑀢𑀺𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀓𑀣𑀁 𑀧𑀝𑀺𑀧𑀦𑁆𑀦𑁄 𑀧𑀦, 𑀫𑀸𑀭𑀺𑀲, 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀓𑀸𑀬𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀯𑀘𑀻𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀧𑀭𑀺𑀬𑁂𑀲𑀦𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩’’𑀫𑁆𑀧𑀺.

‘‘𑀓𑀸𑀬𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀓𑀸𑀬𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀓𑀸𑀬𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀓𑀸𑀬𑀲𑀫𑀸𑀘𑀸𑀭𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀓𑀸𑀬𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀓𑀸𑀬𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀓𑀸𑀬𑀲𑀫𑀸𑀘𑀸𑀭𑁄 𑀲𑁂𑀯𑀺𑀢𑀩𑁆𑀩𑁄. 𑀓𑀸𑀬𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀯𑀘𑀻𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀯𑀘𑀻𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀯𑀘𑀻𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀯𑀘𑀻𑀲𑀫𑀸𑀘𑀸𑀭𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀯𑀘𑀻𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀯𑀘𑀻𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀯𑀘𑀻𑀲𑀫𑀸𑀘𑀸𑀭𑁄 𑀲𑁂𑀯𑀺𑀢𑀩𑁆𑀩𑁄. 𑀯𑀘𑀻𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀧𑀭𑀺𑀬𑁂𑀲𑀦𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀭𑀺𑀬𑁂𑀲𑀦𑀁 ‘𑀇𑀫𑀁 𑀔𑁄 𑀫𑁂 𑀧𑀭𑀺𑀬𑁂𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀧𑀭𑀺𑀬𑁂𑀲𑀦𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀭𑀺𑀬𑁂𑀲𑀦𑀁 ‘𑀇𑀫𑀁 𑀔𑁄 𑀫𑁂 𑀧𑀭𑀺𑀬𑁂𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀧𑀭𑀺𑀬𑁂𑀲𑀦𑀸 𑀲𑁂𑀯𑀺𑀢𑀩𑁆𑀩𑀸. 𑀧𑀭𑀺𑀬𑁂𑀲𑀦𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.