𑁯. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁

𑁩𑁭𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀭𑀽𑀲𑀼 𑀯𑀺𑀳𑀭𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁄. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑁆𑀤𑀦𑁆𑀢𑁂’’𑀢𑀺 [𑀪𑀤𑀦𑁆𑀢𑁂𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑀉𑀤𑁆𑀤𑁂𑀲𑁄

𑁩𑁭𑁩. ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸, 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁, 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁.

𑀉𑀤𑁆𑀤𑁂𑀲𑁄 𑀦𑀺𑀝𑁆𑀞𑀺𑀢𑁄.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀆𑀦𑀸𑀧𑀸𑀦𑀧𑀩𑁆𑀩𑀁

𑁩𑁭𑁪. ‘‘𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀺, 𑀲𑀢𑁄𑀯 𑀧𑀲𑁆𑀲𑀲𑀢𑀺. 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀤𑀻𑀖𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀭𑀲𑁆𑀲𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺. ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀪𑀫𑀓𑀸𑀭𑁄 𑀯𑀸 𑀪𑀫𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀤𑀻𑀖𑀁 𑀯𑀸 𑀅𑀜𑁆𑀙𑀦𑁆𑀢𑁄 ‘𑀤𑀻𑀖𑀁 𑀅𑀜𑁆𑀙𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀅𑀜𑁆𑀙𑀦𑁆𑀢𑁄 ‘𑀭𑀲𑁆𑀲𑀁 𑀅𑀜𑁆𑀙𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀤𑀻𑀖𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀓𑀸𑀬𑁄’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄 [𑀏𑀯𑀫𑁆𑀧𑀺 (𑀲𑀻. 𑀲𑁆𑀬𑀸. 𑀧𑀻.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀆𑀦𑀸𑀧𑀸𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀇𑀭𑀺𑀬𑀸𑀧𑀣𑀧𑀩𑁆𑀩𑀁

𑁩𑁭𑁫. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀘𑁆𑀙𑀦𑁆𑀢𑁄 𑀯𑀸 ‘𑀕𑀘𑁆𑀙𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀞𑀺𑀢𑁄 𑀯𑀸 ‘𑀞𑀺𑀢𑁄𑀫𑁆𑀳𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀲𑀺𑀦𑁆𑀦𑁄 𑀯𑀸 ‘𑀦𑀺𑀲𑀺𑀦𑁆𑀦𑁄𑀫𑁆𑀳𑀻’𑀢𑀺 𑀧𑀚𑀸𑀦𑀸𑀢𑀺, 𑀲𑀬𑀸𑀦𑁄 𑀯𑀸 ‘𑀲𑀬𑀸𑀦𑁄𑀫𑁆𑀳𑀻’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀬𑀣𑀸 𑀯𑀸 𑀧𑀦𑀲𑁆𑀲 𑀓𑀸𑀬𑁄 𑀧𑀡𑀺𑀳𑀺𑀢𑁄 𑀳𑁄𑀢𑀺, 𑀢𑀣𑀸 𑀢𑀣𑀸 𑀦𑀁 𑀧𑀚𑀸𑀦𑀸𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀓𑀸𑀬𑁄’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀇𑀭𑀺𑀬𑀸𑀧𑀣𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀫𑁆𑀧𑀚𑀸𑀦𑀧𑀩𑁆𑀩𑀁

𑁩𑁭𑁬. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀲𑀫𑁆𑀧𑀚𑀸𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁

𑁩𑁭𑁭. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄, 𑀫𑀁𑀲𑀁 𑀦𑁆𑀳𑀸𑀭𑀼 𑀅𑀝𑁆𑀞𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀓𑁆𑀓𑀁, 𑀳𑀤𑀬𑀁 𑀬𑀓𑀦𑀁 𑀓𑀺𑀮𑁄𑀫𑀓𑀁 𑀧𑀺𑀳𑀓𑀁 𑀧𑀧𑁆𑀨𑀸𑀲𑀁, 𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 𑀉𑀤𑀭𑀺𑀬𑀁 𑀓𑀭𑀻𑀲𑀁 [𑀓𑀭𑀻𑀲𑀁 𑀫𑀢𑁆𑀣𑀮𑀼𑀗𑁆𑀕𑀁 (𑀓.)], 𑀧𑀺𑀢𑁆𑀢𑀁 𑀲𑁂𑀫𑁆𑀳𑀁 𑀧𑀼𑀩𑁆𑀩𑁄 𑀮𑁄𑀳𑀺𑀢𑀁 𑀲𑁂𑀤𑁄 𑀫𑁂𑀤𑁄, 𑀅𑀲𑁆𑀲𑀼 𑀯𑀲𑀸 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀮𑀲𑀺𑀓𑀸 𑀫𑀼𑀢𑁆𑀢’𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀪𑀢𑁄𑀫𑀼𑀔𑀸 𑀧𑀼𑀢𑁄𑀴𑀺 [𑀫𑀽𑀢𑁄𑀴𑀻 (𑀲𑁆𑀬𑀸.), 𑀫𑀼𑀢𑁄𑀮𑀺 (𑀧𑀻.)] 𑀧𑀽𑀭𑀸 𑀦𑀸𑀦𑀸𑀯𑀺𑀳𑀺𑀢𑀲𑁆𑀲 𑀥𑀜𑁆𑀜𑀲𑁆𑀲, 𑀲𑁂𑀬𑁆𑀬𑀣𑀺𑀤𑀁 𑀲𑀸𑀮𑀻𑀦𑀁 𑀯𑀻𑀳𑀻𑀦𑀁 𑀫𑀼𑀕𑁆𑀕𑀸𑀦𑀁 𑀫𑀸𑀲𑀸𑀦𑀁 𑀢𑀺𑀮𑀸𑀦𑀁 𑀢𑀡𑁆𑀟𑀼𑀮𑀸𑀦𑀁. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀫𑀼𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬 𑁋 ‘𑀇𑀫𑁂 𑀲𑀸𑀮𑀻, 𑀇𑀫𑁂 𑀯𑀻𑀳𑀻 𑀇𑀫𑁂 𑀫𑀼𑀕𑁆𑀕𑀸 𑀇𑀫𑁂 𑀫𑀸𑀲𑀸 𑀇𑀫𑁂 𑀢𑀺𑀮𑀸 𑀇𑀫𑁂 𑀢𑀡𑁆𑀟𑀼𑀮𑀸’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸…𑀧𑁂… 𑀫𑀼𑀢𑁆𑀢’𑀦𑁆𑀢𑀺.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁

𑁩𑁭𑁮. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀘𑀢𑀼𑀫𑀳𑀸𑀧𑀣𑁂 𑀩𑀺𑀮𑀲𑁄 𑀯𑀺𑀪𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀁

𑁩𑁭𑁯. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀏𑀓𑀸𑀳𑀫𑀢𑀁 𑀯𑀸 𑀤𑁆𑀯𑀻𑀳𑀫𑀢𑀁 𑀯𑀸 𑀢𑀻𑀳𑀫𑀢𑀁 𑀯𑀸 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀚𑀸𑀢𑀁. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 …𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀓𑀸𑀓𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀓𑀼𑀮𑀮𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀕𑀺𑀚𑁆𑀛𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀓𑀗𑁆𑀓𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀲𑀼𑀦𑀔𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀩𑁆𑀬𑀕𑁆𑀖𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀤𑀻𑀧𑀻𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀲𑀺𑀗𑁆𑀕𑀸𑀮𑁂𑀳𑀺 𑀯𑀸 [𑀕𑀺𑀚𑁆𑀛𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁, 𑀲𑀼𑀯𑀸𑀦𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁, 𑀲𑀺𑀕𑀸𑀮𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁, (𑀲𑁆𑀬𑀸. 𑀧𑀻.)] 𑀔𑀚𑁆𑀚𑀫𑀸𑀦𑀁 𑀯𑀺𑀯𑀺𑀥𑁂𑀳𑀺 𑀯𑀸 𑀧𑀸𑀡𑀓𑀚𑀸𑀢𑁂𑀳𑀺 𑀔𑀚𑁆𑀚𑀫𑀸𑀦𑀁. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀲𑀫𑀁𑀲𑀮𑁄𑀳𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁…𑀧𑁂… 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀦𑀺𑀫𑀁𑀲𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁…𑀧𑁂… 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀅𑀧𑀕𑀢𑀫𑀁𑀲𑀮𑁄𑀳𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁…𑀧𑁂… 𑀅𑀝𑁆𑀞𑀺𑀓𑀸𑀦𑀺 𑀅𑀧𑀕𑀢𑀲𑀫𑁆𑀩𑀦𑁆𑀥𑀸𑀦𑀺 [𑀅𑀧𑀕𑀢𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀸𑀦𑀺 (𑀲𑁆𑀬𑀸.)] 𑀤𑀺𑀲𑀸 𑀯𑀺𑀤𑀺𑀲𑀸 𑀯𑀺𑀓𑁆𑀔𑀺𑀢𑁆𑀢𑀸𑀦𑀺, 𑀅𑀜𑁆𑀜𑁂𑀦 𑀳𑀢𑁆𑀣𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀧𑀸𑀤𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀕𑁄𑀧𑁆𑀨𑀓𑀝𑁆𑀞𑀺𑀓𑀁 [‘‘𑀅𑀜𑁆𑀜𑁂𑀦 𑀕𑁄𑀧𑁆𑀨𑀓𑀝𑁆𑀞𑀺𑀓’’𑀦𑁆𑀢𑀺 𑀇𑀤𑀁 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀅𑀜𑁆𑀜𑁂𑀦 𑀚𑀗𑁆𑀖𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀊𑀭𑀼𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀓𑀝𑀺𑀝𑁆𑀞𑀺𑀓𑀁 [𑀅𑀜𑁆𑀜𑁂𑀦 𑀓𑀝𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀧𑀺𑀝𑁆𑀞𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀓𑀡𑁆𑀟𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀨𑀸𑀲𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀉𑀭𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀅𑀁𑀲𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀩𑀸𑀳𑀼𑀝𑁆𑀞𑀺𑀓𑀁 (𑀲𑁆𑀬𑀸.)] 𑀅𑀜𑁆𑀜𑁂𑀦 𑀨𑀸𑀲𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀧𑀺𑀝𑁆𑀞𑀺𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀔𑀦𑁆𑀥𑀝𑁆𑀞𑀺𑀓𑀁 [𑀅𑀜𑁆𑀜𑁂𑀦 𑀓𑀝𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀧𑀺𑀝𑁆𑀞𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀓𑀡𑁆𑀟𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀨𑀸𑀲𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀉𑀭𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀅𑀁𑀲𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀩𑀸𑀳𑀼𑀝𑁆𑀞𑀺𑀓𑀁 (𑀲𑁆𑀬𑀸.)] 𑀅𑀜𑁆𑀜𑁂𑀦 𑀕𑀻𑀯𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀳𑀦𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀤𑀦𑁆𑀢𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀲𑀻𑀲𑀓𑀝𑀸𑀳𑀁. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 …𑀧𑁂… 𑀯𑀺𑀳𑀭𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀅𑀝𑁆𑀞𑀺𑀓𑀸𑀦𑀺 𑀲𑁂𑀢𑀸𑀦𑀺 𑀲𑀗𑁆𑀔𑀯𑀡𑁆𑀡𑀧𑀝𑀺𑀪𑀸𑀕𑀸𑀦𑀺…𑀧𑁂… 𑀅𑀝𑁆𑀞𑀺𑀓𑀸𑀦𑀺 𑀧𑀼𑀜𑁆𑀚𑀓𑀺𑀢𑀸𑀦𑀺 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀺 …𑀧𑁂… 𑀅𑀝𑁆𑀞𑀺𑀓𑀸𑀦𑀺 𑀧𑀽𑀢𑀻𑀦𑀺 𑀘𑀼𑀡𑁆𑀡𑀓𑀚𑀸𑀢𑀸𑀦𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀓𑀸𑀬𑁄’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀘𑀼𑀤𑁆𑀤𑀲 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸

𑁩𑁮𑁦. ‘‘𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀔𑀁 𑀯𑀸 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀁 𑀯𑀸 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀲𑀸𑀫𑀺𑀲𑀁 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀸𑀫𑀺𑀲𑀁 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀭𑀸𑀫𑀺𑀲𑀁 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀦𑀺𑀭𑀸𑀫𑀺𑀲𑀁 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀲𑀸𑀫𑀺𑀲𑀁 𑀯𑀸 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀸𑀫𑀺𑀲𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀭𑀸𑀫𑀺𑀲𑀁 𑀯𑀸 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀦𑀺𑀭𑀸𑀫𑀺𑀲𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀲𑀸𑀫𑀺𑀲𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀭𑀸𑀫𑀺𑀲𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀯𑁂𑀤𑀦𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸

𑁩𑁮𑁧. ‘‘𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀲𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀗𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀗𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀲𑀉𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀘𑀺𑀢𑁆𑀢𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀘𑀺𑀢𑁆𑀢𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀘𑀺𑀢𑁆𑀢𑀲𑁆𑀫𑀺𑀁 𑀯𑀺𑀳𑀭𑀢𑀺, ‘𑀅𑀢𑁆𑀣𑀺 𑀘𑀺𑀢𑁆𑀢’𑀦𑁆𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀻𑀯𑀭𑀡𑀧𑀩𑁆𑀩𑀁

𑁩𑁮𑁨. ‘‘𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀸’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀸’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺 ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼.

𑀦𑀻𑀯𑀭𑀡𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀔𑀦𑁆𑀥𑀧𑀩𑁆𑀩𑀁

𑁩𑁮𑁩. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸, 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀜𑁆𑀜𑀸, 𑀇𑀢𑀺 𑀲𑀜𑁆𑀜𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀗𑁆𑀔𑀸𑀭𑀸, 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄, 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺, 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬, 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼.

𑀔𑀦𑁆𑀥𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀆𑀬𑀢𑀦𑀧𑀩𑁆𑀩𑀁

𑁩𑁮𑁪. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀜𑁆𑀘 𑀧𑀚𑀸𑀦𑀸𑀢𑀺, 𑀭𑀽𑀧𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑁄𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀲𑀤𑁆𑀤𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀖𑀸𑀦𑀜𑁆𑀘 𑀧𑀚𑀸𑀦𑀸𑀢𑀺, 𑀕𑀦𑁆𑀥𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀚𑀺𑀯𑁆𑀳𑀜𑁆𑀘 𑀧𑀚𑀸𑀦𑀸𑀢𑀺, 𑀭𑀲𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀓𑀸𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀨𑁄𑀝𑁆𑀞𑀩𑁆𑀩𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀫𑀦𑀜𑁆𑀘 𑀧𑀚𑀸𑀦𑀸𑀢𑀺, 𑀥𑀫𑁆𑀫𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬, 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼.

𑀆𑀬𑀢𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀁

𑁩𑁮𑁫. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺 ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁. [𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁, 𑀧𑀞𑀫𑀪𑀸𑀡𑀯𑀸𑀭𑀁 (𑀲𑁆𑀬𑀸.)]

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀲𑀘𑁆𑀘𑀧𑀩𑁆𑀩𑀁

𑁩𑁮𑁬. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁩𑁮𑁭. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄𑀧𑀺 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄𑀧𑀺 𑀤𑀼𑀓𑁆𑀔𑁄 [𑀅𑀧𑁆𑀧𑀺𑀬𑁂𑀳𑀺…𑀧𑁂… 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄𑀢𑀺𑀧𑀸𑀞𑁄 𑀘𑁂𑀯 𑀢𑀁𑀦𑀺𑀤𑁆𑀤𑁂𑀲𑁄 𑀘 𑀓𑀢𑁆𑀣𑀘𑀺 𑀦 𑀤𑀺𑀲𑁆𑀲𑀢𑀺, 𑀅𑀝𑁆𑀞𑀓𑀣𑀸𑀬𑀁𑀧𑀺 𑀢𑀁𑀲𑀁𑀯𑀡𑁆𑀡𑀦𑀸 𑀦𑀢𑁆𑀣𑀺], 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀗𑁆𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 [𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀧𑀺 (𑀓.)] 𑀤𑀼𑀓𑁆𑀔𑀸.

𑁩𑁮𑁮. ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀺? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀸𑀢𑀺.

𑁩𑁮𑁯. ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀚𑀭𑀸? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀭𑀸.

𑁩𑁯𑁦. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀭𑀡𑀁? 𑀬𑀁 [𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼 𑀫𑀭𑀡𑀁 𑀓𑀸𑀮𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑁄, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀫𑀭𑀡𑀁.

𑁩𑁯𑁧. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑁄𑀓𑁄? 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑁄𑀓𑁄.

𑁩𑁯𑁨. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀤𑁂𑀯𑁄? 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑀧𑀭𑀺𑀤𑁂𑀯𑁄.

𑁩𑁯𑁩. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀓𑀸𑀬𑀺𑀓𑀁 𑀅𑀲𑀸𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀤𑀼𑀓𑁆𑀔𑀁 𑀅𑀲𑀸𑀢𑀁 𑀯𑁂𑀤𑀬𑀺𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁.

𑁩𑁯𑁪. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁄𑀫𑀦𑀲𑁆𑀲𑀁? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀤𑀼𑀓𑁆𑀔𑀁 𑀅𑀲𑀸𑀢𑀁 𑀯𑁂𑀤𑀬𑀺𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑁄𑀫𑀦𑀲𑁆𑀲𑀁.

𑁩𑁯𑁫. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀉𑀧𑀸𑀬𑀸𑀲𑁄? 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄 𑀆𑀬𑀸𑀲𑀺𑀢𑀢𑁆𑀢𑀁 𑀉𑀧𑀸𑀬𑀸𑀲𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀉𑀧𑀸𑀬𑀸𑀲𑁄.

𑁩𑁯𑁬. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀺𑀝𑁆𑀞𑀸 𑀅𑀓𑀦𑁆𑀢𑀸 𑀅𑀫𑀦𑀸𑀧𑀸 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀥𑀫𑁆𑀫𑀸, 𑀬𑁂 𑀯𑀸 𑀧𑀦𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀢𑁆𑀣𑀓𑀸𑀫𑀸 𑀅𑀳𑀺𑀢𑀓𑀸𑀫𑀸 𑀅𑀨𑀸𑀲𑀼𑀓𑀓𑀸𑀫𑀸 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸, 𑀬𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀲𑀫𑁄𑀥𑀸𑀦𑀁 𑀫𑀺𑀲𑁆𑀲𑀻𑀪𑀸𑀯𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄.

𑁩𑁯𑁭. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀥𑀫𑁆𑀫𑀸, 𑀬𑁂 𑀯𑀸 𑀧𑀦𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀯𑀸, 𑀬𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀲𑀗𑁆𑀕𑀢𑀺 𑀅𑀲𑀫𑀸𑀕𑀫𑁄 𑀅𑀲𑀫𑁄𑀥𑀸𑀦𑀁 𑀅𑀫𑀺𑀲𑁆𑀲𑀻𑀪𑀸𑀯𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄.

𑁩𑁯𑁮. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁? 𑀚𑀸𑀢𑀺𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑁋 ‘𑀅𑀳𑁄 𑀯𑀢 𑀫𑀬𑀁 𑀦 𑀚𑀸𑀢𑀺𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀚𑀸𑀢𑀺 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀚𑀭𑀸𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑁋 ‘𑀅𑀳𑁄 𑀯𑀢 𑀫𑀬𑀁 𑀦 𑀚𑀭𑀸𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀚𑀭𑀸 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀩𑁆𑀬𑀸𑀥𑀺𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 ‘𑀅𑀳𑁄 𑀯𑀢 𑀫𑀬𑀁 𑀦 𑀩𑁆𑀬𑀸𑀥𑀺𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀩𑁆𑀬𑀸𑀥𑀺 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀫𑀭𑀡𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 ‘𑀅𑀳𑁄 𑀯𑀢 𑀫𑀬𑀁 𑀦 𑀫𑀭𑀡𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀫𑀭𑀡𑀁 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 ‘𑀅𑀳𑁄 𑀯𑀢 𑀫𑀬𑀁 𑀦 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀆𑀕𑀘𑁆𑀙𑁂𑀬𑁆𑀬𑀼’𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁.

𑁩𑁯𑁯. ‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁.

𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁪𑁦𑁦. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 [𑀧𑁄𑀦𑁄𑀪𑀯𑀺𑀓𑀸 (𑀲𑀻. 𑀧𑀻.)] 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 [𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸.

‘‘𑀲𑀸 𑀔𑁄 𑀧𑀦𑁂𑀲𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸 𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺? 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀸 𑀮𑁄𑀓𑁂… 𑀲𑀤𑁆𑀤𑀸 𑀮𑁄𑀓𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀲𑀜𑁆𑀜𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂… 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂… 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁.

𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁪𑁦𑁧. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁? 𑀬𑁄 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄.

‘‘𑀲𑀸 𑀔𑁄 𑀧𑀦𑁂𑀲𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸 𑀓𑀢𑁆𑀣 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀓𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺? 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀸 𑀮𑁄𑀓𑁂… 𑀲𑀤𑁆𑀤𑀸 𑀮𑁄𑀓𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 … 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀲𑀜𑁆𑀜𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂… 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂… 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁.

𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁪𑁦𑁨. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄? 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸? 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 [𑀯𑁂𑀭𑀫𑀡𑀺 (𑀓.)] 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄? 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀆𑀚𑀻𑀯𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀳𑀸𑀬 𑀲𑀫𑁆𑀫𑀸𑀆𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀆𑀚𑀻𑀯𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀬𑀸𑀫𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀬𑀸𑀫𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀢𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁.

𑁪𑁦𑁩. ‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼.

𑀲𑀘𑁆𑀘𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁦𑁪. ‘‘𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢𑀯𑀲𑁆𑀲𑀸𑀦𑀺, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸; 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸.

‘‘𑀢𑀺𑀝𑁆𑀞𑀦𑁆𑀢𑀼, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀯𑀲𑁆𑀲𑀸𑀦𑀺. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀙 𑀯𑀲𑁆𑀲𑀸𑀦𑀺…𑀧𑁂… 𑀧𑀜𑁆𑀘 𑀯𑀲𑁆𑀲𑀸𑀦𑀺… 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺… 𑀢𑀻𑀡𑀺 𑀯𑀲𑁆𑀲𑀸𑀦𑀺… 𑀤𑁆𑀯𑁂 𑀯𑀲𑁆𑀲𑀸𑀦𑀺… 𑀏𑀓𑀁 𑀯𑀲𑁆𑀲𑀁… 𑀢𑀺𑀝𑁆𑀞𑀢𑀼, 𑀪𑀺𑀓𑁆𑀔𑀯𑁂, 𑀏𑀓𑀁 𑀯𑀲𑁆𑀲𑀁. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢𑀫𑀸𑀲𑀸𑀦𑀺, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸; 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸.

‘‘𑀢𑀺𑀝𑁆𑀞𑀦𑁆𑀢𑀼, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀫𑀸𑀲𑀸𑀦𑀺. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀙 𑀫𑀸𑀲𑀸𑀦𑀺…𑀧𑁂… 𑀧𑀜𑁆𑀘 𑀫𑀸𑀲𑀸𑀦𑀺… 𑀘𑀢𑁆𑀢𑀸𑀭𑀺 𑀫𑀸𑀲𑀸𑀦𑀺… 𑀢𑀻𑀡𑀺 𑀫𑀸𑀲𑀸𑀦𑀺 … 𑀤𑁆𑀯𑁂 𑀫𑀸𑀲𑀸𑀦𑀺… 𑀏𑀓𑀁 𑀫𑀸𑀲𑀁… 𑀅𑀟𑁆𑀠𑀫𑀸𑀲𑀁… 𑀢𑀺𑀝𑁆𑀞𑀢𑀼, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑁄. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢𑀸𑀳𑀁, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸; 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸𑀢𑀺.

𑁪𑁦𑁫. ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.