𑁫. 𑀚𑀦𑀯𑀲𑀪𑀲𑀼𑀢𑁆𑀢𑀁

𑀦𑀸𑀢𑀺𑀓𑀺𑀬𑀸𑀤𑀺𑀩𑁆𑀬𑀸𑀓𑀭𑀡𑀁

𑁨𑁭𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 [𑀦𑀸𑀤𑀺𑀓𑁂 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 [𑀘𑁂𑀢𑀺𑀬𑀯𑀁𑀲𑁂𑀲𑀼 (𑀓.)] 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 [𑀫𑀘𑁆𑀙𑀲𑀼𑀭𑀲𑁂𑀦𑁂𑀲𑀼 (𑀲𑁆𑀬𑀸.), 𑀫𑀘𑁆𑀙𑀲𑀽𑀭𑀲𑁂𑀦𑁂𑀲𑀼 (𑀲𑀻. 𑀧𑀻.)] 𑁋 ‘‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄 [𑀉𑀧𑀧𑀦𑁆𑀦𑁄𑀢𑀺 (𑀓.)]. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄, 𑀲𑀓𑀺𑀤𑁂𑀯 [𑀲𑀓𑀺𑀁𑀤𑁂𑀯 (𑀓.)] 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’𑀢𑀺.

𑁨𑁭𑁪. 𑀅𑀲𑁆𑀲𑁄𑀲𑀼𑀁 𑀔𑁄 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀢𑁂𑀦 𑀘 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 [𑀧𑀜𑁆𑀳𑀸𑀯𑁂𑀬𑁆𑀬𑀸𑀓𑀭𑀡𑀁 (𑀲𑁆𑀬𑀸. 𑀓.)] 𑀲𑀼𑀢𑁆𑀯𑀸.

𑁨𑁭𑁫. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀪𑀕𑀯𑀸 𑀓𑀺𑀭 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀢𑁂𑀦 𑀘 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑀆𑀦𑀦𑁆𑀤𑀧𑀭𑀺𑀓𑀣𑀸

𑁨𑁭𑁬. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 𑀧𑀦𑀸𑀧𑀺 𑀅𑀳𑁂𑀲𑀼𑀁 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀩𑀳𑀽 𑀘𑁂𑀯 𑀭𑀢𑁆𑀢𑀜𑁆𑀜𑀽 𑀘 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸. 𑀲𑀼𑀜𑁆𑀜𑀸 𑀫𑀜𑁆𑀜𑁂 𑀅𑀗𑁆𑀕𑀫𑀕𑀥𑀸 𑀅𑀗𑁆𑀕𑀫𑀸𑀕𑀥𑀓𑁂𑀳𑀺 [𑀅𑀗𑁆𑀕𑀫𑀸𑀕𑀥𑀺𑀓𑁂𑀳𑀺 (𑀲𑁆𑀬𑀸.)] 𑀧𑀭𑀺𑀘𑀸𑀭𑀓𑁂𑀳𑀺 𑀅𑀩𑁆𑀪𑀢𑀻𑀢𑁂𑀳𑀺 𑀓𑀸𑀮𑀗𑁆𑀓𑀢𑁂𑀳𑀺. 𑀢𑁂 𑀔𑁄 𑀧𑀦𑀸𑀧𑀺 [𑀢𑁂𑀦 𑀔𑁄 𑀧𑀦𑀸𑀧𑀺 (𑀲𑁆𑀬𑀸.)] 𑀅𑀳𑁂𑀲𑀼𑀁 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀢𑁂 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀸; 𑀢𑁂𑀲𑀫𑁆𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁, 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀅𑀬𑀁 𑀔𑁄 𑀧𑀦𑀸𑀧𑀺 𑀅𑀳𑁄𑀲𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀦𑁂𑀕𑀫𑀸𑀦𑀜𑁆𑀘𑁂𑀯 𑀚𑀸𑀦𑀧𑀤𑀸𑀦𑀜𑁆𑀘. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺 𑁋 ‘𑀏𑀯𑀁 𑀦𑁄 𑀲𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀲𑀼𑀔𑀸𑀧𑁂𑀢𑁆𑀯𑀸 𑀓𑀸𑀮𑀗𑁆𑀓𑀢𑁄, 𑀏𑀯𑀁 𑀫𑀬𑀁 𑀢𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀯𑀺𑀚𑀺𑀢𑁂 𑀨𑀸𑀲𑀼 [𑀨𑀸𑀲𑀼𑀓𑀁 (𑀲𑁆𑀬𑀸.)] 𑀯𑀺𑀳𑀭𑀺𑀫𑁆𑀳𑀸’𑀢𑀺. 𑀲𑁄 𑀔𑁄 𑀧𑀦𑀸𑀧𑀺 𑀅𑀳𑁄𑀲𑀺 𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀥𑀫𑁆𑀫𑁂 𑀧𑀲𑀦𑁆𑀦𑁄 𑀲𑀗𑁆𑀖𑁂 𑀧𑀲𑀦𑁆𑀦𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘𑀬𑀸𑀯 𑀫𑀭𑀡𑀓𑀸𑀮𑀸𑀧𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑁄 𑀓𑀸𑀮𑀗𑁆𑀓𑀢𑁄’𑀢𑀺. 𑀲𑁄 𑀅𑀩𑁆𑀪𑀢𑀻𑀢𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑁄. 𑀢𑀲𑁆𑀲𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀪𑀕𑀯𑀢𑁄 𑀔𑁄 𑀧𑀦 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼. 𑀬𑀢𑁆𑀣 𑀔𑁄 𑀧𑀦 𑀪𑀕𑀯𑀢𑁄 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼, 𑀓𑀣𑀁 𑀢𑀢𑁆𑀭 𑀪𑀕𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁂𑀬𑁆𑀬. 𑀪𑀕𑀯𑀸 𑀘𑁂 𑀔𑁄 𑀧𑀦 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁂𑀬𑁆𑀬, 𑀤𑀻𑀦𑀫𑀦𑀸 [𑀦𑀺𑀦𑁆𑀦𑀫𑀦𑀸 (𑀲𑁆𑀬𑀸.), 𑀤𑀻𑀦𑀫𑀸𑀦𑀸 (𑀲𑀻. 𑀧𑀻.)] 𑀢𑁂𑀦𑀲𑁆𑀲𑀼 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸; 𑀬𑁂𑀦 𑀔𑁄 𑀧𑀦𑀲𑁆𑀲𑀼 𑀤𑀻𑀦𑀫𑀦𑀸 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀓𑀣𑀁 𑀢𑁂 𑀪𑀕𑀯𑀸 𑀦 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺?

𑁨𑁭𑁭. 𑀇𑀤𑀫𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀏𑀓𑁄 𑀭𑀳𑁄 𑀅𑀦𑀼𑀯𑀺𑀘𑀺𑀦𑁆𑀢𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀪𑀕𑀯𑀸 𑀓𑀺𑀭 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 𑁋 ‘‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸𑀢𑀺. 𑀢𑁂𑀦 𑀘 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺. 𑀇𑀫𑁂 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁂𑀲𑀼𑀁 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀩𑀳𑀽 𑀘𑁂𑀯 𑀭𑀢𑁆𑀢𑀜𑁆𑀜𑀽 𑀘 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸. 𑀲𑀼𑀜𑁆𑀜𑀸 𑀫𑀜𑁆𑀜𑁂 𑀅𑀗𑁆𑀕𑀫𑀕𑀥𑀸 𑀅𑀗𑁆𑀕𑀫𑀸𑀕𑀥𑀓𑁂𑀳𑀺 𑀧𑀭𑀺𑀘𑀸𑀭𑀓𑁂𑀳𑀺 𑀅𑀩𑁆𑀪𑀢𑀻𑀢𑁂𑀳𑀺 𑀓𑀸𑀮𑀗𑁆𑀓𑀢𑁂𑀳𑀺. 𑀢𑁂 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁂𑀲𑀼𑀁 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄, 𑀢𑁂 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀸. 𑀢𑁂𑀲𑀫𑁆𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁, 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀅𑀬𑀁 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁄𑀲𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀦𑁂𑀕𑀫𑀸𑀦𑀜𑁆𑀘𑁂𑀯 𑀚𑀸𑀦𑀧𑀤𑀸𑀦𑀜𑁆𑀘. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺 𑁋 ‘𑀏𑀯𑀁 𑀦𑁄 𑀲𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀲𑀼𑀔𑀸𑀧𑁂𑀢𑁆𑀯𑀸 𑀓𑀸𑀮𑀗𑁆𑀓𑀢𑁄. 𑀏𑀯𑀁 𑀫𑀬𑀁 𑀢𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑀺𑀫𑁆𑀳𑀸’𑀢𑀺. 𑀲𑁄 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁄𑀲𑀺 𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀥𑀫𑁆𑀫𑁂 𑀧𑀲𑀦𑁆𑀦𑁄 𑀲𑀗𑁆𑀖𑁂 𑀧𑀲𑀦𑁆𑀦𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘𑀬𑀸𑀯 𑀫𑀭𑀡𑀓𑀸𑀮𑀸𑀧𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑁄 𑀓𑀸𑀮𑀗𑁆𑀓𑀢𑁄’𑀢𑀺. 𑀲𑁄 𑀅𑀩𑁆𑀪𑀢𑀻𑀢𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑁄; 𑀢𑀲𑁆𑀲𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁, 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀪𑀕𑀯𑀢𑁄 𑀔𑁄 𑀧𑀦, 𑀪𑀦𑁆𑀢𑁂, 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼. 𑀬𑀢𑁆𑀣 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼, 𑀓𑀣𑀁 𑀢𑀢𑁆𑀭 𑀪𑀕𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁂𑀬𑁆𑀬? 𑀪𑀕𑀯𑀸 𑀘𑁂 𑀔𑁄 𑀧𑀦, 𑀪𑀦𑁆𑀢𑁂, 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁂𑀬𑁆𑀬 𑀤𑀻𑀦𑀫𑀦𑀸 𑀢𑁂𑀦𑀲𑁆𑀲𑀼 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸; 𑀬𑁂𑀦 𑀔𑁄 𑀧𑀦𑀲𑁆𑀲𑀼 𑀤𑀻𑀦𑀫𑀦𑀸 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀓𑀣𑀁 𑀢𑁂 𑀪𑀕𑀯𑀸 𑀦 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺. 𑀇𑀤𑀫𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀧𑀭𑀺𑀓𑀣𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁨𑁭𑁮. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀦𑀸𑀢𑀺𑀓𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀦𑀸𑀢𑀺𑀓𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀕𑀺𑀜𑁆𑀚𑀓𑀸𑀯𑀲𑀣𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀅𑀝𑁆𑀞𑀺𑀁 𑀓𑀢𑁆𑀯𑀸 [𑀅𑀝𑁆𑀞𑀺𑀓𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 [𑀲𑀩𑁆𑀩𑀘𑁂𑀢𑀲𑀸 (𑀧𑀻.)] 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑁋 ‘‘𑀕𑀢𑀺𑀁 𑀦𑁂𑀲𑀁 𑀚𑀸𑀦𑀺𑀲𑁆𑀲𑀸𑀫𑀺 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 ‘‘𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀕𑀺𑀜𑁆𑀚𑀓𑀸𑀯𑀲𑀣𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺.

𑁨𑁭𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀉𑀧𑀲𑀦𑁆𑀢𑀧𑀤𑀺𑀲𑁆𑀲𑁄 [𑀉𑀧𑀲𑀦𑁆𑀢𑀧𑀢𑀺𑀲𑁄 (𑀓.)] 𑀪𑀦𑁆𑀢𑁂 𑀪𑀕𑀯𑀸 𑀪𑀸𑀢𑀺𑀭𑀺𑀯 𑀪𑀕𑀯𑀢𑁄 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀦𑁆𑀦𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀲𑀦𑁆𑀢𑁂𑀦 𑀦𑀽𑀦𑀚𑁆𑀚 𑀪𑀦𑁆𑀢𑁂 𑀪𑀕𑀯𑀸 𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀻’’𑀢𑀺? ‘‘𑀬𑀤𑁂𑀯 𑀔𑁄 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀲𑀫𑁆𑀫𑀼𑀔𑀸 𑀧𑀭𑀺𑀓𑀣𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀦𑁆𑀢𑁄, 𑀢𑀤𑁂𑀯𑀸𑀳𑀁 𑀦𑀸𑀢𑀺𑀓𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀕𑀺𑀜𑁆𑀚𑀓𑀸𑀯𑀲𑀣𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁 𑁋 ‘𑀕𑀢𑀺𑀁 𑀦𑁂𑀲𑀁 𑀚𑀸𑀦𑀺𑀲𑁆𑀲𑀸𑀫𑀺 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’𑀢𑀺. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 ‘𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’’𑀢𑀺.

𑀚𑀦𑀯𑀲𑀪𑀬𑀓𑁆𑀔𑁄

𑁨𑁮𑁦. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀅𑀦𑁆𑀢𑀭𑀳𑀺𑀢𑁄 𑀬𑀓𑁆𑀔𑁄 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋 ‘𑀚𑀦𑀯𑀲𑀪𑁄 𑀅𑀳𑀁 𑀪𑀕𑀯𑀸; 𑀚𑀦𑀯𑀲𑀪𑁄 𑀅𑀳𑀁 𑀲𑀼𑀕𑀢𑀸’𑀢𑀺. 𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁, 𑀆𑀦𑀦𑁆𑀤, 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀦𑀸𑀫𑀥𑁂𑀬𑁆𑀬𑀁 𑀲𑀼𑀢𑀁 [𑀲𑀼𑀢𑁆𑀯𑀸 (𑀧𑀻.)] 𑀬𑀤𑀺𑀤𑀁 𑀚𑀦𑀯𑀲𑀪𑁄’’𑀢𑀺?

‘‘𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀪𑀺𑀚𑀸𑀦𑀸𑀫𑀺 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀦𑀸𑀫𑀥𑁂𑀬𑁆𑀬𑀁 𑀲𑀼𑀢𑀁 𑀬𑀤𑀺𑀤𑀁 𑀚𑀦𑀯𑀲𑀪𑁄𑀢𑀺, 𑀅𑀧𑀺 𑀘 𑀫𑁂, 𑀪𑀦𑁆𑀢𑁂, 𑀮𑁄𑀫𑀸𑀦𑀺 𑀳𑀝𑁆𑀞𑀸𑀦𑀺 ‘𑀚𑀦𑀯𑀲𑀪𑁄’𑀢𑀺 𑀦𑀸𑀫𑀥𑁂𑀬𑁆𑀬𑀁 𑀲𑀼𑀢𑁆𑀯𑀸. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀦 𑀳𑀺 𑀦𑀽𑀦 𑀲𑁄 𑀑𑀭𑀓𑁄 𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀺 𑀬𑀤𑀺𑀤𑀁 𑀏𑀯𑀭𑀽𑀧𑀁 𑀦𑀸𑀫𑀥𑁂𑀬𑁆𑀬𑀁 𑀲𑀼𑀧𑀜𑁆𑀜𑀢𑁆𑀢𑀁 𑀬𑀤𑀺𑀤𑀁 𑀚𑀦𑀯𑀲𑀪𑁄’’𑀢𑀺. ‘‘𑀅𑀦𑀦𑁆𑀢𑀭𑀸 𑀔𑁄, 𑀆𑀦𑀦𑁆𑀤, 𑀲𑀤𑁆𑀤𑀧𑀸𑀢𑀼𑀪𑀸𑀯𑀸 𑀉𑀴𑀸𑀭𑀯𑀡𑁆𑀡𑁄 𑀫𑁂 𑀬𑀓𑁆𑀔𑁄 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋 ‘𑀩𑀺𑀫𑁆𑀩𑀺𑀲𑀸𑀭𑁄 𑀅𑀳𑀁 𑀪𑀕𑀯𑀸; 𑀩𑀺𑀫𑁆𑀩𑀺𑀲𑀸𑀭𑁄 𑀅𑀳𑀁 𑀲𑀼𑀕𑀢𑀸𑀢𑀺. 𑀇𑀤𑀁 𑀲𑀢𑁆𑀢𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀸𑀫𑀺, 𑀲𑁄 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀭𑀸𑀚𑀸 𑀪𑀯𑀺𑀢𑀼𑀁 𑀧𑀳𑁄𑀫𑀺 [𑀲𑁄 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀭𑀸𑀚𑀸, 𑀅𑀫𑀦𑀼𑀲𑁆𑀲𑀭𑀸𑀚𑀸 𑀤𑀺𑀯𑀺 𑀳𑁄𑀫𑀺 (𑀲𑀻. 𑀧𑀻.)].

𑀇𑀢𑁄 𑀲𑀢𑁆𑀢 𑀢𑀢𑁄 𑀲𑀢𑁆𑀢, 𑀲𑀁𑀲𑀸𑀭𑀸𑀦𑀺 𑀘𑀢𑀼𑀤𑁆𑀤𑀲;

𑀦𑀺𑀯𑀸𑀲𑀫𑀪𑀺𑀚𑀸𑀦𑀸𑀫𑀺, 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂.

𑁨𑁮𑁧. ‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀯𑀺𑀦𑀺𑀧𑀸𑀢𑁄 𑀅𑀯𑀺𑀦𑀺𑀧𑀸𑀢𑀁 𑀲𑀜𑁆𑀚𑀸𑀦𑀸𑀫𑀺, 𑀆𑀲𑀸 𑀘 𑀧𑀦 𑀫𑁂 𑀲𑀦𑁆𑀢𑀺𑀝𑁆𑀞𑀢𑀺 𑀲𑀓𑀤𑀸𑀕𑀸𑀫𑀺𑀢𑀸𑀬𑀸’𑀢𑀺. ‘𑀅𑀘𑁆𑀙𑀭𑀺𑀬𑀫𑀺𑀤𑀁 𑀆𑀬𑀲𑁆𑀫𑀢𑁄 𑀚𑀦𑀯𑀲𑀪𑀲𑁆𑀲 𑀬𑀓𑁆𑀔𑀲𑁆𑀲, 𑀅𑀩𑁆𑀪𑀼𑀢𑀫𑀺𑀤𑀁 𑀆𑀬𑀲𑁆𑀫𑀢𑁄 𑀚𑀦𑀯𑀲𑀪𑀲𑁆𑀲 𑀬𑀓𑁆𑀔𑀲𑁆𑀲. ‘‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀯𑀺𑀦𑀺𑀧𑀸𑀢𑁄 𑀅𑀯𑀺𑀦𑀺𑀧𑀸𑀢𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀘 𑀯𑀤𑁂𑀲𑀺, ‘‘𑀆𑀲𑀸 𑀘 𑀧𑀦 𑀫𑁂 𑀲𑀦𑁆𑀢𑀺𑀝𑁆𑀞𑀢𑀺 𑀲𑀓𑀤𑀸𑀕𑀸𑀫𑀺𑀢𑀸𑀬𑀸’’𑀢𑀺 𑀘 𑀯𑀤𑁂𑀲𑀺, 𑀓𑀼𑀢𑁄𑀦𑀺𑀤𑀸𑀦𑀁 𑀧𑀦𑀸𑀬𑀲𑁆𑀫𑀸 𑀚𑀦𑀯𑀲𑀪𑁄 𑀬𑀓𑁆𑀔𑁄 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀲𑀜𑁆𑀚𑀸𑀦𑀸𑀢𑀻𑀢𑀺? 𑀦 𑀅𑀜𑁆𑀜𑀢𑁆𑀭, 𑀪𑀕𑀯𑀸, 𑀢𑀯 𑀲𑀸𑀲𑀦𑀸, 𑀦 𑀅𑀜𑁆𑀜𑀢𑁆𑀭 [𑀅𑀜𑁆𑀜𑀢𑁆𑀣 (𑀲𑀻. 𑀧𑀻.)], 𑀲𑀼𑀕𑀢, 𑀢𑀯 𑀲𑀸𑀲𑀦𑀸; 𑀬𑀤𑀕𑁆𑀕𑁂 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺 𑀏𑀓𑀦𑁆𑀢𑀺𑀓𑀢𑁄 [𑀏𑀓𑀦𑁆𑀢𑀢𑁄 (𑀲𑁆𑀬𑀸.), 𑀏𑀓𑀦𑁆𑀢𑀕𑀢𑁄 (𑀧𑀻.)] 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀢𑀤𑀕𑁆𑀕𑁂 𑀅𑀳𑀁, 𑀪𑀦𑁆𑀢𑁂, 𑀤𑀻𑀖𑀭𑀢𑁆𑀢𑀁 𑀅𑀯𑀺𑀦𑀺𑀧𑀸𑀢𑁄 𑀅𑀯𑀺𑀦𑀺𑀧𑀸𑀢𑀁 𑀲𑀜𑁆𑀚𑀸𑀦𑀸𑀫𑀺, 𑀆𑀲𑀸 𑀘 𑀧𑀦 𑀫𑁂 𑀲𑀦𑁆𑀢𑀺𑀝𑁆𑀞𑀢𑀺 𑀲𑀓𑀤𑀸𑀕𑀸𑀫𑀺𑀢𑀸𑀬. 𑀇𑀥𑀸𑀳𑀁, 𑀪𑀦𑁆𑀢𑁂, 𑀯𑁂𑀲𑁆𑀲𑀯𑀡𑁂𑀦 𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑁄 𑀯𑀺𑀭𑀽𑀴𑁆𑀳𑀓𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀤𑁆𑀤𑀲𑀁 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀺𑀜𑁆𑀚𑀓𑀸𑀯𑀲𑀣𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑁋 ‘‘𑀕𑀢𑀺𑀁 𑀦𑁂𑀲𑀁 𑀚𑀸𑀦𑀺𑀲𑁆𑀲𑀸𑀫𑀺 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀪𑀸𑀲𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘‘𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 𑀪𑀕𑀯𑀦𑁆𑀢𑀜𑁆𑀘 𑀤𑀓𑁆𑀔𑀸𑀫𑀺, 𑀇𑀤𑀜𑁆𑀘 𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺. 𑀇𑀫𑁂 𑀔𑁄 𑀫𑁂, 𑀪𑀦𑁆𑀢𑁂, 𑀤𑁆𑀯𑁂𑀧𑀘𑁆𑀘𑀬𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁’.

𑀤𑁂𑀯𑀲𑀪𑀸

𑁨𑁮𑁨. ‘𑀧𑀼𑀭𑀺𑀫𑀸𑀦𑀺, 𑀪𑀦𑁆𑀢𑁂, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸. 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 [𑀤𑀺𑀩𑁆𑀩𑀸 𑀧𑀭𑀺𑀲𑀸 (𑀲𑀻. 𑀧𑀻.)] 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 [𑀦𑀺𑀲𑀺𑀦𑁆𑀦𑀸 𑀳𑁄𑀢𑀺 (𑀲𑀻.), 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸 (𑀓.)], 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀥𑀢𑀭𑀝𑁆𑀞𑁄 𑀫𑀳𑀸𑀭𑀸𑀚𑀸 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁄 [𑀧𑀘𑁆𑀙𑀸𑀪𑀺𑀫𑀼𑀔𑁄 (𑀓.)] 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀯𑀺𑀭𑀽𑀴𑁆𑀳𑀓𑁄 𑀫𑀳𑀸𑀭𑀸𑀚𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀯𑀺𑀭𑀽𑀧𑀓𑁆𑀔𑁄 𑀫𑀳𑀸𑀭𑀸𑀚𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸. 𑀬𑀤𑀸, 𑀪𑀦𑁆𑀢𑁂, 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀇𑀤𑀁 𑀦𑁂𑀲𑀁 𑀳𑁄𑀢𑀺 𑀆𑀲𑀦𑀲𑁆𑀫𑀺𑀁; 𑀅𑀣 𑀧𑀘𑁆𑀙𑀸 𑀅𑀫𑁆𑀳𑀸𑀓𑀁 𑀆𑀲𑀦𑀁 𑀳𑁄𑀢𑀺. 𑀬𑁂 𑀢𑁂, 𑀪𑀦𑁆𑀢𑁂, 𑀤𑁂𑀯𑀸 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀅𑀥𑀼𑀦𑀽𑀧𑀧𑀦𑁆𑀦𑀸 𑀢𑀸𑀯𑀢𑀺𑀁𑀲𑀓𑀸𑀬𑀁, 𑀢𑁂 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀦𑁆𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀤𑀺𑀩𑁆𑀩𑀸 𑀯𑀢 𑀪𑁄 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀫𑁄𑀤𑀦𑁆𑀢𑀺 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸 [𑀲𑀇𑀦𑁆𑀤𑀓𑀸 (𑀲𑀻.)];

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂 [𑀬𑀲𑀲𑁆𑀲𑀺𑀦𑁄 (𑀲𑁆𑀬𑀸.)];

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

𑀇𑀤𑀁 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’’𑀦𑁆𑀢𑀺.

‘𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀬𑁂𑀦𑀢𑁆𑀣𑁂𑀦 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑀬𑀺𑀢𑁆𑀯𑀸 𑀢𑀁 𑀅𑀢𑁆𑀣𑀁 𑀫𑀦𑁆𑀢𑀬𑀺𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀸𑀧𑀺 𑀢𑀁 [𑀯𑀼𑀢𑁆𑀢𑀯𑀘𑀦𑀸 𑀦𑀸𑀫𑀺𑀤𑀁 (𑀓.)] 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺. 𑀧𑀘𑁆𑀘𑀸𑀦𑀼𑀲𑀺𑀝𑁆𑀞𑀯𑀘𑀦𑀸𑀧𑀺 𑀢𑀁 [𑀧𑀘𑁆𑀘𑀸𑀦𑀼𑀲𑀺𑀝𑁆𑀞𑀯𑀘𑀦𑀸 𑀦𑀸𑀫𑀺𑀤𑀁 (𑀓.)] 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺, 𑀲𑀓𑁂𑀲𑀼 𑀲𑀓𑁂𑀲𑀼 𑀆𑀲𑀦𑁂𑀲𑀼 𑀞𑀺𑀢𑀸 𑀅𑀯𑀺𑀧𑀓𑁆𑀓𑀦𑁆𑀢𑀸 [𑀅𑀥𑀺𑀧𑀓𑁆𑀓𑀦𑁆𑀢𑀸 (𑀓.)].

𑀢𑁂 𑀯𑀼𑀢𑁆𑀢𑀯𑀸𑀓𑁆𑀬𑀸 𑀭𑀸𑀚𑀸𑀦𑁄, 𑀧𑀝𑀺𑀕𑁆𑀕𑀬𑁆𑀳𑀸𑀦𑀼𑀲𑀸𑀲𑀦𑀺𑀁;

𑀯𑀺𑀧𑁆𑀧𑀲𑀦𑁆𑀦𑀫𑀦𑀸 𑀲𑀦𑁆𑀢𑀸, 𑀅𑀝𑁆𑀞𑀁𑀲𑀼 𑀲𑀫𑁆𑀳𑀺 𑀆𑀲𑀦𑁂𑀢𑀺.

𑁨𑁮𑁩. ‘𑀅𑀣 𑀔𑁄, 𑀪𑀦𑁆𑀢𑁂, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀺, 𑀑𑀪𑀸𑀲𑁄 𑀧𑀸𑀢𑀼𑀭𑀳𑁄𑀲𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀔𑁄, 𑀫𑀸𑀭𑀺𑀲𑀸, 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺, 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺. 𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀸𑀢𑀼𑀪𑀸𑀯𑀸𑀬 𑀬𑀤𑀺𑀤𑀁 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀻𑀢𑀺.

‘‘𑀬𑀣𑀸 𑀦𑀺𑀫𑀺𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺;

𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀦𑀺𑀫𑀺𑀢𑁆𑀢𑀁, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀫𑀳𑀸’’𑀢𑀺.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸

𑁨𑁮𑁪. ‘𑀅𑀣 𑀔𑁄, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀏𑀓𑀕𑁆𑀕𑀸 𑀲𑀫𑀸𑀧𑀚𑁆𑀚𑀺𑀁𑀲𑀼 𑁋 ‘‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺.

‘𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀸𑀢𑀼𑀪𑀯𑀢𑀺. 𑀬𑁄 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀧𑀓𑀢𑀺𑀯𑀡𑁆𑀡𑁄 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄 𑀲𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀘𑀓𑁆𑀔𑀼𑀧𑀣𑀲𑁆𑀫𑀺𑀁. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑁄𑀯𑀡𑁆𑀡𑁄 𑀯𑀺𑀕𑁆𑀕𑀳𑁄 𑀫𑀸𑀦𑀼𑀲𑀁 𑀯𑀺𑀕𑁆𑀕𑀳𑀁 𑀅𑀢𑀺𑀭𑁄𑀘𑀢𑀺; 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀤𑀸 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀦 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀓𑁄𑀘𑀺 𑀤𑁂𑀯𑁄 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀲𑀩𑁆𑀩𑁂𑀯 𑀢𑀼𑀡𑁆𑀳𑀻𑀪𑀽𑀢𑀸 𑀧𑀜𑁆𑀚𑀮𑀺𑀓𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑀺 𑁋 ‘‘𑀬𑀲𑁆𑀲𑀤𑀸𑀦𑀺 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑀁 𑀇𑀘𑁆𑀙𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄, 𑀢𑀲𑁆𑀲 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺.

‘𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁; 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀅𑀥𑀼𑀦𑀸𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑁂𑀦, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀲𑁆𑀲 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀼𑀫𑀸𑀭𑀯𑀡𑁆𑀡𑀻 [𑀓𑀼𑀫𑀸𑀭𑀯𑀡𑁆𑀡𑁄 (𑀲𑁆𑀬𑀸. 𑀓.)] 𑀳𑀼𑀢𑁆𑀯𑀸 𑀧𑀜𑁆𑀘𑀲𑀺𑀔𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀼𑀧𑀘𑁆𑀘𑀢𑁆𑀣𑀢𑁂 𑀯𑀸 𑀧𑀮𑁆𑀮𑀗𑁆𑀓𑁂 𑀲𑀫𑁂 𑀯𑀸 𑀪𑀽𑀫𑀺𑀪𑀸𑀕𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀫𑁄𑀤𑀦𑁆𑀢𑀺 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

‘‘𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂;

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

‘‘𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

‘‘𑀇𑀤𑀁 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’’𑀦𑁆𑀢𑀺.

𑁨𑁮𑁫. ‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣; 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺 𑀯𑀺𑀲𑁆𑀲𑀝𑁆𑀞𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄 𑀘 𑀫𑀜𑁆𑀚𑀼 𑀘 𑀲𑀯𑀦𑀻𑀬𑁄 𑀘 𑀩𑀺𑀦𑁆𑀤𑀼 𑀘 𑀅𑀯𑀺𑀲𑀸𑀭𑀻 𑀘 𑀕𑀫𑁆𑀪𑀻𑀭𑁄 𑀘 𑀦𑀺𑀦𑁆𑀦𑀸𑀤𑀻 𑀘. 𑀬𑀣𑀸𑀧𑀭𑀺𑀲𑀁 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺; 𑀦 𑀘𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺. 𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘‘𑀩𑁆𑀭𑀳𑁆𑀫𑀲𑁆𑀲𑀭𑁄’’𑀢𑀺.

‘𑀅𑀣 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀢𑁂𑀢𑁆𑀢𑀺𑀁𑀲𑁂 𑀅𑀢𑁆𑀢𑀪𑀸𑀯𑁂 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀘𑁆𑀘𑁂𑀓𑀧𑀮𑁆𑀮𑀗𑁆𑀓𑁂𑀲𑀼 𑀧𑀮𑁆𑀮𑀗𑁆𑀓𑁂𑀦 [𑀧𑀘𑁆𑀘𑁂𑀓𑀧𑀮𑁆𑀮𑀗𑁆𑀓𑁂𑀦 (𑀓.)] 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀬𑁂 𑀳𑀺 𑀓𑁂𑀘𑀺, 𑀪𑁄, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀬𑁂 𑀲𑀩𑁆𑀩𑀦𑀺𑀳𑀻𑀦𑀁 𑀓𑀸𑀬𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑁂 𑀕𑀦𑁆𑀥𑀩𑁆𑀩𑀓𑀸𑀬𑀁 𑀧𑀭𑀺𑀧𑀽𑀭𑁂𑀦𑁆𑀢𑀻’’’𑀢𑀺.

𑁨𑁮𑁬. ‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣; 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀖𑁄𑀲𑁄𑀬𑁂𑀯 𑀤𑁂𑀯𑀸 𑀫𑀜𑁆𑀜𑀦𑁆𑀢𑀺 𑁋 ‘‘𑀬𑁆𑀯𑀸𑀬𑀁 𑀫𑀫 𑀧𑀮𑁆𑀮𑀗𑁆𑀓𑁂 𑀲𑁆𑀯𑀸𑀬𑀁 𑀏𑀓𑁄𑀯 𑀪𑀸𑀲𑀢𑀻’’𑀢𑀺.

𑀏𑀓𑀲𑁆𑀫𑀺𑀁 𑀪𑀸𑀲𑀫𑀸𑀦𑀲𑁆𑀫𑀺𑀁, 𑀲𑀩𑁆𑀩𑁂 𑀪𑀸𑀲𑀦𑁆𑀢𑀺 𑀦𑀺𑀫𑁆𑀫𑀺𑀢𑀸;

𑀏𑀓𑀲𑁆𑀫𑀺𑀁 𑀢𑀼𑀡𑁆𑀳𑀺𑀫𑀸𑀲𑀻𑀦𑁂, 𑀲𑀩𑁆𑀩𑁂 𑀢𑀼𑀡𑁆𑀳𑀻 𑀪𑀯𑀦𑁆𑀢𑀺 𑀢𑁂.

𑀢𑀤𑀸𑀲𑀼 𑀤𑁂𑀯𑀸 𑀫𑀜𑁆𑀜𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀬𑁆𑀯𑀸𑀬𑀁 𑀫𑀫 𑀧𑀮𑁆𑀮𑀗𑁆𑀓𑀲𑁆𑀫𑀺𑀁, 𑀲𑁆𑀯𑀸𑀬𑀁 𑀏𑀓𑁄𑀯 𑀪𑀸𑀲𑀢𑀻𑀢𑀺.

‘𑀅𑀣 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀏𑀓𑀢𑁆𑀢𑁂𑀦 𑀅𑀢𑁆𑀢𑀸𑀦𑀁 𑀉𑀧𑀲𑀁𑀳𑀭𑀢𑀺, 𑀏𑀓𑀢𑁆𑀢𑁂𑀦 𑀅𑀢𑁆𑀢𑀸𑀦𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀮𑁆𑀮𑀗𑁆𑀓𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀪𑀸𑀯𑀺𑀢𑀇𑀤𑁆𑀥𑀺𑀧𑀸𑀤𑁄

𑁨𑁮𑁭. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀜𑀢𑁆𑀢𑀸 𑀇𑀤𑁆𑀥𑀺𑀧𑀳𑀼𑀢𑀸𑀬 [𑀇𑀤𑁆𑀥𑀺𑀩𑀳𑀼𑀮𑀻𑀓𑀢𑀸𑀬 (𑀲𑁆𑀬𑀸.)] 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 [𑀇𑀤𑁆𑀥𑀺𑀯𑀺𑀲𑁂𑀯𑀺𑀢𑀸𑀬 (𑀲𑁆𑀬𑀸.)] 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑁄 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀫𑁂 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀜𑀢𑁆𑀢𑀸 𑀇𑀤𑁆𑀥𑀺𑀧𑀳𑀼𑀢𑀸𑀬 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬.

‘‘‘𑀬𑁂 𑀳𑀺 𑀓𑁂𑀘𑀺 𑀪𑁄 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑀼𑀁, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂𑀧𑀺 𑀳𑀺 𑀓𑁂𑀘𑀺 𑀪𑁄 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂𑀧𑀺 𑀳𑀺 𑀓𑁂𑀘𑀺 𑀪𑁄 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀧𑀲𑁆𑀲𑀦𑁆𑀢𑀺 𑀦𑁄 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀫𑀫𑀧𑀺𑀫𑀁 𑀏𑀯𑀭𑀽𑀧𑀁 𑀇𑀤𑁆𑀥𑀸𑀦𑀼𑀪𑀸𑀯’’𑀦𑁆𑀢𑀺? ‘‘𑀏𑀯𑀁 𑀫𑀳𑀸𑀩𑁆𑀭𑀳𑁆𑀫𑁂’’𑀢𑀺. ‘‘𑀅𑀳𑀫𑁆𑀧𑀺 𑀔𑁄 𑀪𑁄 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀜𑁆𑀘 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’’𑀢𑀺. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀢𑀺𑀯𑀺𑀥𑁄 𑀑𑀓𑀸𑀲𑀸𑀥𑀺𑀕𑀫𑁄

𑁨𑁮𑁮. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑀸 𑀅𑀦𑀼𑀩𑀼𑀤𑁆𑀥𑀸 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬. 𑀓𑀢𑀫𑁂 𑀢𑀬𑁄? 𑀇𑀥 𑀪𑁄 𑀏𑀓𑀘𑁆𑀘𑁄 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀓𑀸𑀫𑁂𑀳𑀺 𑀲𑀁𑀲𑀝𑁆𑀞𑁄 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀭𑀺𑀬𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺. 𑀲𑁄 𑀅𑀭𑀺𑀬𑀥𑀫𑁆𑀫𑀲𑁆𑀲𑀯𑀦𑀁 𑀆𑀕𑀫𑁆𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀁 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀓𑀸𑀫𑁂𑀳𑀺 𑀅𑀲𑀁𑀲𑀝𑁆𑀞𑁄 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀢𑀲𑁆𑀲 𑀅𑀲𑀁𑀲𑀝𑁆𑀞𑀲𑁆𑀲 𑀓𑀸𑀫𑁂𑀳𑀺 𑀅𑀲𑀁𑀲𑀝𑁆𑀞𑀲𑁆𑀲 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀫𑀼𑀤𑀸 𑀧𑀸𑀫𑁄𑀚𑁆𑀚𑀁 [𑀧𑀸𑀫𑀼𑀚𑁆𑀚𑀁 (𑀧𑀻. 𑀓.)] 𑀚𑀸𑀬𑁂𑀣, 𑀏𑀯𑀫𑁂𑀯 𑀔𑁄, 𑀪𑁄, 𑀅𑀲𑀁𑀲𑀝𑁆𑀞𑀲𑁆𑀲 𑀓𑀸𑀫𑁂𑀳𑀺 𑀅𑀲𑀁𑀲𑀝𑁆𑀞𑀲𑁆𑀲 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀞𑀫𑁄 𑀑𑀓𑀸𑀲𑀸𑀥𑀺𑀕𑀫𑁄 𑀅𑀦𑀼𑀩𑀼𑀤𑁆𑀥𑁄 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬.

‘‘‘𑀧𑀼𑀦 𑀘𑀧𑀭𑀁, 𑀪𑁄, 𑀇𑀥𑁂𑀓𑀘𑁆𑀘𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀬𑀲𑀗𑁆𑀔𑀸𑀭𑀸 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀯𑀘𑀻𑀲𑀗𑁆𑀔𑀸𑀭𑀸 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀭𑀺𑀬𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺. 𑀢𑀲𑁆𑀲 𑀅𑀭𑀺𑀬𑀥𑀫𑁆𑀫𑀲𑁆𑀲𑀯𑀦𑀁 𑀆𑀕𑀫𑁆𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀁 𑀑𑀴𑀸𑀭𑀺𑀓𑀸 𑀓𑀸𑀬𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀯𑀘𑀻𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀢𑀲𑁆𑀲 𑀑𑀴𑀸𑀭𑀺𑀓𑀸𑀦𑀁 𑀓𑀸𑀬𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀫𑀼𑀤𑀸 𑀧𑀸𑀫𑁄𑀚𑁆𑀚𑀁 𑀚𑀸𑀬𑁂𑀣, 𑀏𑀯𑀫𑁂𑀯 𑀔𑁄 𑀪𑁄 𑀑𑀴𑀸𑀭𑀺𑀓𑀸𑀦𑀁 𑀓𑀸𑀬𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑀼𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄 𑀅𑀦𑀼𑀩𑀼𑀤𑁆𑀥𑁄 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬.

‘‘‘𑀧𑀼𑀦 𑀘𑀧𑀭𑀁, 𑀪𑁄, 𑀇𑀥𑁂𑀓𑀘𑁆𑀘𑁄 ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. ‘𑀇𑀤𑀁 𑀲𑀸𑀯𑀚𑁆𑀚𑀁 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀭𑀺𑀬𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺. 𑀲𑁄 𑀅𑀭𑀺𑀬𑀥𑀫𑁆𑀫𑀲𑁆𑀲𑀯𑀦𑀁 𑀆𑀕𑀫𑁆𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀁, ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀤𑀁 𑀲𑀸𑀯𑀚𑁆𑀚𑀁 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺, 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀫𑀼𑀤𑀸 𑀧𑀸𑀫𑁄𑀚𑁆𑀚𑀁 𑀚𑀸𑀬𑁂𑀣, 𑀏𑀯𑀫𑁂𑀯 𑀔𑁄, 𑀪𑁄, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄 𑀅𑀦𑀼𑀩𑀼𑀤𑁆𑀥𑁄 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬. 𑀇𑀫𑁂 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑀸 𑀅𑀦𑀼𑀩𑀼𑀤𑁆𑀥𑀸 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬𑀸’’𑀢𑀺. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣, 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀁

𑁨𑁮𑁯. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀜𑁆𑀜𑀢𑁆𑀢𑀸 𑀓𑀼𑀲𑀮𑀲𑁆𑀲𑀸𑀥𑀺𑀕𑀫𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑁄, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺, 𑀲𑀫𑁆𑀫𑀸 𑀯𑀺𑀧𑁆𑀧𑀲𑀻𑀤𑀢𑀺. 𑀲𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀳𑀺𑀢𑁄 𑀲𑀫𑁆𑀫𑀸 𑀯𑀺𑀧𑁆𑀧𑀲𑀦𑁆𑀦𑁄 𑀩𑀳𑀺𑀤𑁆𑀥𑀸 𑀧𑀭𑀓𑀸𑀬𑁂 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀩𑀳𑀺𑀤𑁆𑀥𑀸 𑀧𑀭𑀯𑁂𑀤𑀦𑀸𑀲𑀼 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀩𑀳𑀺𑀤𑁆𑀥𑀸 𑀧𑀭𑀘𑀺𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺, 𑀲𑀫𑁆𑀫𑀸 𑀯𑀺𑀧𑁆𑀧𑀲𑀻𑀤𑀢𑀺. 𑀲𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀳𑀺𑀢𑁄 𑀲𑀫𑁆𑀫𑀸 𑀯𑀺𑀧𑁆𑀧𑀲𑀦𑁆𑀦𑁄 𑀩𑀳𑀺𑀤𑁆𑀥𑀸 𑀧𑀭𑀥𑀫𑁆𑀫𑁂𑀲𑀼 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀇𑀫𑁂 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀜𑁆𑀜𑀢𑁆𑀢𑀸 𑀓𑀼𑀲𑀮𑀲𑁆𑀲𑀸𑀥𑀺𑀕𑀫𑀸𑀬𑀸’’𑀢𑀺. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀲𑀢𑁆𑀢 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸

𑁨𑁯𑁦. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀢𑁆𑀢 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀧𑀭𑀺𑀪𑀸𑀯𑀦𑀸𑀬 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸. 𑀓𑀢𑀫𑁂 𑀲𑀢𑁆𑀢? 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺. 𑀬𑀸 𑀔𑁄, 𑀪𑁄, 𑀇𑀫𑁂𑀳𑀺 𑀲𑀢𑁆𑀢𑀳𑀗𑁆𑀕𑁂𑀳𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀧𑀭𑀺𑀓𑁆𑀔𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑁄, 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑀸𑀥𑀺 𑀲𑀉𑀧𑀦𑀺𑀲𑁄 𑀇𑀢𑀺𑀧𑀺 𑀲𑀧𑀭𑀺𑀓𑁆𑀔𑀸𑀭𑁄 𑀇𑀢𑀺𑀧𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀪𑁄, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀸 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀢𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀺, 𑀲𑀫𑁆𑀫𑀸𑀜𑀸𑀡𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀺. 𑀬𑀜𑁆𑀳𑀺 𑀢𑀁, 𑀪𑁄, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺 𑀅𑀧𑀸𑀭𑀼𑀢𑀸 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸’𑀢𑀺 𑀇𑀤𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀲𑁆𑀯𑀸𑀓𑁆𑀔𑀸𑀢𑁄 𑀳𑀺, 𑀪𑁄, 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄, 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺 𑀅𑀧𑀸𑀭𑀼𑀢𑀸 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸 [𑀤𑁆𑀯𑀸𑀭𑀸𑀢𑀺 (𑀲𑁆𑀬𑀸. 𑀓.)].

‘‘‘𑀬𑁂 𑀳𑀺 𑀓𑁂𑀘𑀺, 𑀪𑁄, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸, 𑀬𑁂 𑀘𑀺𑀫𑁂 𑀑𑀧𑀧𑀸𑀢𑀺𑀓𑀸 𑀥𑀫𑁆𑀫𑀯𑀺𑀦𑀻𑀢𑀸 𑀲𑀸𑀢𑀺𑀭𑁂𑀓𑀸𑀦𑀺 𑀘𑀢𑀼𑀯𑀻𑀲𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸. 𑀅𑀢𑁆𑀣𑀺 𑀘𑁂𑀯𑁂𑀢𑁆𑀣 𑀲𑀓𑀤𑀸𑀕𑀸𑀫𑀺𑀦𑁄.

‘‘𑀅𑀢𑁆𑀣𑀸𑀬𑀁 [𑀅𑀣𑀸𑀬𑀁 (𑀲𑀻. 𑀲𑁆𑀬𑀸.)] 𑀇𑀢𑀭𑀸 𑀧𑀚𑀸, 𑀧𑀼𑀜𑁆𑀜𑀸𑀪𑀸𑀕𑀸𑀢𑀺 𑀫𑁂 𑀫𑀦𑁄;

𑀲𑀗𑁆𑀔𑀸𑀢𑀼𑀁 𑀦𑁄𑀧𑀺 𑀲𑀓𑁆𑀓𑁄𑀫𑀺, 𑀫𑀼𑀲𑀸𑀯𑀸𑀤𑀲𑁆𑀲 𑀑𑀢𑁆𑀢𑀧𑁆𑀧’’𑀦𑁆𑀢𑀺.

𑁨𑁯𑁧. ‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣, 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀏𑀯𑀭𑀽𑀧𑁄𑀧𑀺 𑀦𑀸𑀫 𑀉𑀴𑀸𑀭𑁄 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁, 𑀏𑀯𑀭𑀽𑀧𑀸 𑀉𑀴𑀸𑀭𑀸 𑀯𑀺𑀲𑁂𑀲𑀸𑀥𑀺𑀕𑀫𑀸 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀯𑁂𑀲𑁆𑀲𑀯𑀡𑀁 𑀫𑀳𑀸𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀢𑀺 𑀪𑀯𑀁 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀏𑀯𑀭𑀽𑀧𑁄 𑀉𑀴𑀸𑀭𑁄 𑀲𑀢𑁆𑀣𑀸 𑀅𑀳𑁄𑀲𑀺, 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁, 𑀏𑀯𑀭𑀽𑀧𑀸 𑀉𑀴𑀸𑀭𑀸 𑀯𑀺𑀲𑁂𑀲𑀸𑀥𑀺𑀕𑀫𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀏𑀯𑀭𑀽𑀧𑁄 𑀉𑀴𑀸𑀭𑁄 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁, 𑀏𑀯𑀭𑀽𑀧𑀸 𑀉𑀴𑀸𑀭𑀸 𑀯𑀺𑀲𑁂𑀲𑀸𑀥𑀺𑀕𑀫𑀸 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻’’’𑀢𑀺.

𑁨𑁯𑁨. ‘‘‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀅𑀪𑀸𑀲𑀺, 𑀇𑀫𑀫𑀢𑁆𑀣𑀁 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀸𑀲𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 [𑀲𑀼𑀢𑁆𑀯𑀸 (𑀲𑀻. 𑀧𑀻.)] 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀲𑀬𑀁 𑀧𑀭𑀺𑀲𑀸𑀬𑀁 𑀆𑀭𑁄𑀘𑁂𑀲𑀺’’.

𑀇𑀫𑀫𑀢𑁆𑀣𑀁 𑀚𑀦𑀯𑀲𑀪𑁄 𑀬𑀓𑁆𑀔𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀬𑀁 𑀧𑀭𑀺𑀲𑀸𑀬𑀁 𑀪𑀸𑀲𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 [𑀧𑀝𑀺𑀕𑁆𑀕𑀳𑁂𑀢𑁆𑀯𑀸 (𑀲𑀻. 𑀧𑀻.)] 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀇𑀫𑀫𑀢𑁆𑀣𑀁 𑀪𑀕𑀯𑀸 𑀚𑀦𑀯𑀲𑀪𑀲𑁆𑀲 𑀬𑀓𑁆𑀔𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑁆𑀯𑀸 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀸𑀫𑀜𑁆𑀘 𑀅𑀪𑀺𑀜𑁆𑀜𑀸𑀬 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀆𑀭𑁄𑀘𑁂𑀲𑀺, 𑀇𑀫𑀫𑀢𑁆𑀣𑀫𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑁆𑀯𑀸 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀆𑀭𑁄𑀘𑁂𑀲𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁. 𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺.

𑀚𑀦𑀯𑀲𑀪𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.