𑁬. 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀁

𑁨𑁯𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀆𑀭𑁄𑀘𑁂𑀫𑀺 𑀢𑀁 𑀪𑀕𑀯𑀢𑁄’’𑀢𑀺. ‘‘𑀆𑀭𑁄𑀘𑁂𑀳𑀺 𑀫𑁂 𑀢𑁆𑀯𑀁, 𑀧𑀜𑁆𑀘𑀲𑀺𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

𑀤𑁂𑀯𑀲𑀪𑀸

𑁨𑁯𑁪. ‘‘𑀧𑀼𑀭𑀺𑀫𑀸𑀦𑀺, 𑀪𑀦𑁆𑀢𑁂, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀯𑀸𑀭𑀡𑀸𑀬 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸; 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺; 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀥𑀢𑀭𑀝𑁆𑀞𑁄 𑀫𑀳𑀸𑀭𑀸𑀚𑀸 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀯𑀺𑀭𑀽𑀴𑁆𑀳𑀓𑁄 𑀫𑀳𑀸𑀭𑀸𑀚𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀯𑀺𑀭𑀽𑀧𑀓𑁆𑀔𑁄 𑀫𑀳𑀸𑀭𑀸𑀚𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸. 𑀬𑀤𑀸 𑀪𑀦𑁆𑀢𑁂, 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀇𑀤𑀁 𑀦𑁂𑀲𑀁 𑀳𑁄𑀢𑀺 𑀆𑀲𑀦𑀲𑁆𑀫𑀺𑀁; 𑀅𑀣 𑀧𑀘𑁆𑀙𑀸 𑀅𑀫𑁆𑀳𑀸𑀓𑀁 𑀆𑀲𑀦𑀁 𑀳𑁄𑀢𑀺.

‘‘𑀬𑁂 𑀢𑁂, 𑀪𑀦𑁆𑀢𑁂, 𑀤𑁂𑀯𑀸 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀅𑀥𑀼𑀦𑀽𑀧𑀧𑀦𑁆𑀦𑀸 𑀢𑀸𑀯𑀢𑀺𑀁𑀲𑀓𑀸𑀬𑀁, 𑀢𑁂 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀦𑁆𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸; ‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’𑀢𑀺.

𑁨𑁯𑁫. ‘‘𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘𑀫𑁄𑀤𑀦𑁆𑀢𑀺 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂;

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

𑀇𑀤𑀁 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’𑀦𑁆𑀢𑀺.

‘‘𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸; ‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’’𑀢𑀺.

𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑀯𑀡𑁆𑀡𑀸

𑁨𑁯𑁬. ‘‘𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘𑀇𑀘𑁆𑀙𑁂𑀬𑁆𑀬𑀸𑀣 𑀦𑁄 𑀢𑀼𑀫𑁆𑀳𑁂, 𑀫𑀸𑀭𑀺𑀲𑀸, 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑁄𑀢𑀼’𑀦𑁆𑀢𑀺? ‘𑀇𑀘𑁆𑀙𑀸𑀫 𑀫𑀬𑀁, 𑀫𑀸𑀭𑀺𑀲, 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑁄𑀢𑀼’𑀦𑁆𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸? 𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀁 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀁 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑁆𑀯𑀸𑀓𑁆𑀔𑀸𑀢𑁄 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺. 𑀏𑀯𑀁 𑀑𑀧𑀦𑁂𑀬𑁆𑀬𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀼𑀧𑀜𑁆𑀜𑀢𑁆𑀢𑀁, 𑀇𑀤𑀁 𑀅𑀓𑀼𑀲𑀮𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁. 𑀇𑀤𑀁 𑀲𑀸𑀯𑀚𑁆𑀚𑀁 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁. 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀳𑀻𑀦-𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸𑀦𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀧𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑀼𑀧𑀜𑁆𑀜𑀢𑁆𑀢𑀸 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀏𑀯𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀧𑀜𑁆𑀜𑀧𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀅𑀪𑀺𑀦𑀺𑀧𑁆𑀨𑀦𑁆𑀦𑁄 [𑀅𑀪𑀺𑀦𑀺𑀧𑁆𑀧𑀦𑁆𑀦𑁄 (𑀧𑀻. 𑀓.)] 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀮𑀸𑀪𑁄 𑀅𑀪𑀺𑀦𑀺𑀧𑁆𑀨𑀦𑁆𑀦𑁄 𑀲𑀺𑀮𑁄𑀓𑁄, 𑀬𑀸𑀯 𑀫𑀜𑁆𑀜𑁂 𑀔𑀢𑁆𑀢𑀺𑀬𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺, 𑀯𑀺𑀕𑀢𑀫𑀤𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀏𑀯𑀁 𑀯𑀺𑀕𑀢𑀫𑀤𑀁 𑀆𑀳𑀸𑀭𑀁 𑀆𑀳𑀭𑀬𑀫𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀮𑀤𑁆𑀥𑀲𑀳𑀸𑀬𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀲𑁂𑀔𑀸𑀦𑀜𑁆𑀘𑁂𑀯 𑀧𑀝𑀺𑀧𑀦𑁆𑀦𑀸𑀦𑀁 𑀔𑀻𑀡𑀸𑀲𑀯𑀸𑀦𑀜𑁆𑀘 𑀯𑀼𑀲𑀺𑀢𑀯𑀢𑀁. 𑀢𑁂 𑀪𑀕𑀯𑀸 𑀅𑀧𑀦𑀼𑀚𑁆𑀚 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀁 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀬𑀣𑀸𑀯𑀸𑀤𑀻 𑀔𑁄 𑀧𑀦 𑀲𑁄 𑀪𑀕𑀯𑀸 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻, 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀏𑀯𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀯𑀺𑀕𑀢𑀓𑀣𑀁𑀓𑀣𑁄 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁. 𑀏𑀯𑀁 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀕𑀢𑀓𑀣𑀁𑀓𑀣𑀁 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀁 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸’𑀢𑀺.

𑁨𑁯𑁭. ‘‘𑀇𑀫𑁂 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑀼𑀢𑁆𑀯𑀸. 𑀢𑀢𑁆𑀭, 𑀪𑀦𑁆𑀢𑁂, 𑀏𑀓𑀘𑁆𑀘𑁂 𑀤𑁂𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀬𑁆𑀬𑀼𑀁 𑀬𑀣𑀭𑀺𑀯 𑀪𑀕𑀯𑀸. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀏𑀓𑀘𑁆𑀘𑁂 𑀤𑁂𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀢𑀺𑀝𑁆𑀞𑀦𑁆𑀢𑀼, 𑀫𑀸𑀭𑀺𑀲𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀢𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀬𑁆𑀬𑀼𑀁 𑀬𑀣𑀭𑀺𑀯 𑀪𑀕𑀯𑀸. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀏𑀓𑀘𑁆𑀘𑁂 𑀤𑁂𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀢𑀺𑀝𑁆𑀞𑀦𑁆𑀢𑀼, 𑀫𑀸𑀭𑀺𑀲𑀸, 𑀢𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀬𑁆𑀬𑀼𑀁 𑀬𑀣𑀭𑀺𑀯 𑀪𑀕𑀯𑀸. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺.

𑁨𑁯𑁮. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀏𑀢𑀤𑀯𑁄𑀘 𑁋 ‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀫𑀸𑀭𑀺𑀲𑀸, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀲𑁄 𑀪𑀕𑀯𑀸 𑀅𑀧𑁆𑀧𑀸𑀩𑀸𑀥𑁄 𑀅𑀧𑁆𑀧𑀸𑀢𑀗𑁆𑀓𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀬𑁂𑀦𑀢𑁆𑀣𑁂𑀦 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑀬𑀺𑀢𑁆𑀯𑀸 𑀢𑀁 𑀅𑀢𑁆𑀣𑀁 𑀫𑀦𑁆𑀢𑀬𑀺𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀸𑀧𑀺 𑀢𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺. 𑀧𑀘𑁆𑀘𑀸𑀦𑀼𑀲𑀺𑀝𑁆𑀞𑀯𑀘𑀦𑀸𑀧𑀺 𑀢𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺, 𑀲𑀓𑁂𑀲𑀼 𑀲𑀓𑁂𑀲𑀼 𑀆𑀲𑀦𑁂𑀲𑀼 𑀞𑀺𑀢𑀸 𑀅𑀯𑀺𑀧𑀓𑁆𑀓𑀦𑁆𑀢𑀸.

𑀢𑁂 𑀯𑀼𑀢𑁆𑀢𑀯𑀸𑀓𑁆𑀬𑀸 𑀭𑀸𑀚𑀸𑀦𑁄, 𑀧𑀝𑀺𑀕𑁆𑀕𑀬𑁆𑀳𑀸𑀦𑀼𑀲𑀸𑀲𑀦𑀺𑀁;

𑀯𑀺𑀧𑁆𑀧𑀲𑀦𑁆𑀦𑀫𑀦𑀸 𑀲𑀦𑁆𑀢𑀸, 𑀅𑀝𑁆𑀞𑀁𑀲𑀼 𑀲𑀫𑁆𑀳𑀺 𑀆𑀲𑀦𑁂𑀢𑀺.

𑁨𑁯𑁯. ‘‘𑀅𑀣 𑀔𑁄, 𑀪𑀦𑁆𑀢𑁂, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀺, 𑀑𑀪𑀸𑀲𑁄 𑀧𑀸𑀢𑀼𑀭𑀳𑁄𑀲𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘𑀬𑀣𑀸 𑀔𑁄, 𑀫𑀸𑀭𑀺𑀲𑀸, 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺, 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺; 𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀸𑀢𑀼𑀪𑀸𑀯𑀸𑀬, 𑀬𑀤𑀺𑀤𑀁 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀻𑀢𑀺.

‘𑀬𑀣𑀸 𑀦𑀺𑀫𑀺𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺;

𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀦𑀺𑀫𑀺𑀢𑁆𑀢𑀁, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀫𑀳𑀸’𑀢𑀺.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸

𑁩𑁦𑁦. ‘‘𑀅𑀣 𑀔𑁄, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀏𑀓𑀕𑁆𑀕𑀸 𑀲𑀫𑀸𑀧𑀚𑁆𑀚𑀺𑀁𑀲𑀼 𑁋 ‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺.

‘‘𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀸𑀢𑀼𑀪𑀯𑀢𑀺. 𑀬𑁄 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀧𑀓𑀢𑀺𑀯𑀡𑁆𑀡𑁄, 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄 𑀲𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀘𑀓𑁆𑀔𑀼𑀧𑀣𑀲𑁆𑀫𑀺𑀁. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑁄𑀯𑀡𑁆𑀡𑁄 𑀯𑀺𑀕𑁆𑀕𑀳𑁄 𑀫𑀸𑀦𑀼𑀲𑀁 𑀯𑀺𑀕𑁆𑀕𑀳𑀁 𑀅𑀢𑀺𑀭𑁄𑀘𑀢𑀺, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀤𑀸 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀦 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀓𑁄𑀘𑀺 𑀤𑁂𑀯𑁄 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀲𑀩𑁆𑀩𑁂𑀯 𑀢𑀼𑀡𑁆𑀳𑀻𑀪𑀽𑀢𑀸 𑀧𑀜𑁆𑀚𑀮𑀺𑀓𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑀺 𑁋 ‘𑀬𑀲𑁆𑀲𑀤𑀸𑀦𑀺 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑀁 𑀇𑀘𑁆𑀙𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄, 𑀢𑀲𑁆𑀲 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’𑀢𑀺. 𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀅𑀥𑀼𑀦𑀸𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑁂𑀦, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀲𑁆𑀲 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀅𑀦𑁆𑀢𑀭𑀳𑀺𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘𑀫𑁄𑀤𑀦𑁆𑀢𑀺 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

‘𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂;

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

‘𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

‘𑀇𑀤𑀁 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’𑀦𑁆𑀢𑀺.

𑁩𑁦𑁧. ‘‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀅𑀪𑀸𑀲𑀺𑀢𑁆𑀣. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺 𑀯𑀺𑀲𑁆𑀲𑀝𑁆𑀞𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄 𑀘 𑀫𑀜𑁆𑀚𑀼 𑀘 𑀲𑀯𑀦𑀻𑀬𑁄 𑀘 𑀩𑀺𑀦𑁆𑀤𑀼 𑀘 𑀅𑀯𑀺𑀲𑀸𑀭𑀻 𑀘 𑀕𑀫𑁆𑀪𑀻𑀭𑁄 𑀘 𑀦𑀺𑀦𑁆𑀦𑀸𑀤𑀻 𑀘. 𑀬𑀣𑀸𑀧𑀭𑀺𑀲𑀁 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀘𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺. 𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀩𑁆𑀭𑀳𑁆𑀫𑀲𑁆𑀲𑀭𑁄’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀏𑀢𑀤𑀯𑁄𑀘𑀼𑀁 𑁋 ‘𑀲𑀸𑀥𑀼, 𑀫𑀳𑀸𑀩𑁆𑀭𑀳𑁆𑀫𑁂, 𑀏𑀢𑀤𑁂𑀯 𑀫𑀬𑀁 𑀲𑀗𑁆𑀔𑀸𑀬 𑀫𑁄𑀤𑀸𑀫; 𑀅𑀢𑁆𑀣𑀺 𑀘 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑀸 𑀯𑀡𑁆𑀡𑀸 𑀪𑀸𑀲𑀺𑀢𑀸; 𑀢𑁂 𑀘 𑀫𑀬𑀁 𑀲𑀗𑁆𑀔𑀸𑀬 𑀫𑁄𑀤𑀸𑀫𑀸’𑀢𑀺.

𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑀯𑀡𑁆𑀡𑀸

𑁩𑁦𑁨. ‘‘𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀲𑀸𑀥𑀼, 𑀤𑁂𑀯𑀸𑀦𑀫𑀺𑀦𑁆𑀤, 𑀫𑀬𑀫𑁆𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑀼𑀡𑁂𑀬𑁆𑀬𑀸𑀫𑀸’𑀢𑀺. ‘𑀏𑀯𑀁 𑀫𑀳𑀸𑀩𑁆𑀭𑀳𑁆𑀫𑁂’𑀢𑀺 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀢𑀺, 𑀪𑀯𑀁 𑀫𑀳𑀸𑀩𑁆𑀭𑀳𑁆𑀫𑀸? 𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀁 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀁 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑁆𑀯𑀸𑀓𑁆𑀔𑀸𑀢𑁄 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺. 𑀏𑀯𑀁 𑀑𑀧𑀦𑁂𑀬𑁆𑀬𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀼𑀧𑀜𑁆𑀜𑀢𑁆𑀢𑀁, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁, ‘𑀇𑀤𑀁 𑀲𑀸𑀯𑀚𑁆𑀚𑀁 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕’𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁. 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀳𑀻𑀦𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸𑀦𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀧𑁂𑀢𑀸𑀭𑀁. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑀼𑀧𑀜𑁆𑀜𑀢𑁆𑀢𑀸 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀏𑀯𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀧𑀜𑁆𑀜𑀸𑀧𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀅𑀪𑀺𑀦𑀺𑀧𑁆𑀨𑀦𑁆𑀦𑁄 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀮𑀸𑀪𑁄 𑀅𑀪𑀺𑀦𑀺𑀧𑁆𑀨𑀦𑁆𑀦𑁄 𑀲𑀺𑀮𑁄𑀓𑁄, 𑀬𑀸𑀯 𑀫𑀜𑁆𑀜𑁂 𑀔𑀢𑁆𑀢𑀺𑀬𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺. 𑀯𑀺𑀕𑀢𑀫𑀤𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀏𑀯𑀁 𑀯𑀺𑀕𑀢𑀫𑀤𑀁 𑀆𑀳𑀸𑀭𑀁 𑀆𑀳𑀭𑀬𑀫𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀮𑀤𑁆𑀥𑀲𑀳𑀸𑀬𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀲𑁂𑀔𑀸𑀦𑀜𑁆𑀘𑁂𑀯 𑀧𑀝𑀺𑀧𑀦𑁆𑀦𑀸𑀦𑀁 𑀔𑀻𑀡𑀸𑀲𑀯𑀸𑀦𑀜𑁆𑀘 𑀯𑀼𑀲𑀺𑀢𑀯𑀢𑀁, 𑀢𑁂 𑀪𑀕𑀯𑀸 𑀅𑀧𑀦𑀼𑀚𑁆𑀚 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀁 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀬𑀣𑀸𑀯𑀸𑀤𑀻 𑀔𑁄 𑀧𑀦 𑀲𑁄 𑀪𑀕𑀯𑀸 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻; 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀏𑀯𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑁆𑀧𑀦𑁆𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀯𑀺𑀕𑀢𑀓𑀣𑀁𑀓𑀣𑁄 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁. 𑀏𑀯𑀁 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀕𑀢𑀓𑀣𑀁𑀓𑀣𑀁 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀁 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸’𑀢𑀺.

𑁩𑁦𑁩. ‘‘𑀇𑀫𑁂 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑀼𑀢𑁆𑀯𑀸. 𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀼𑀫𑀸𑀭𑀯𑀡𑁆𑀡𑀻 𑀳𑀼𑀢𑁆𑀯𑀸 𑀧𑀜𑁆𑀘𑀲𑀺𑀔𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀼𑀧𑀘𑁆𑀘𑀢𑁆𑀣𑀢𑁂 𑀯𑀸 𑀧𑀮𑁆𑀮𑀗𑁆𑀓𑁂 𑀲𑀫𑁂 𑀯𑀸 𑀪𑀽𑀫𑀺𑀪𑀸𑀕𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑁩𑁦𑁪. ‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀤𑀻𑀖𑀭𑀢𑁆𑀢𑀁 𑀫𑀳𑀸𑀧𑀜𑁆𑀜𑁄𑀯 𑀲𑁄 𑀪𑀕𑀯𑀸 𑀅𑀳𑁄𑀲𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑁄, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀦𑀸𑀫 𑀅𑀳𑁄𑀲𑀺. 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀕𑁄𑀯𑀺𑀦𑁆𑀤𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀭𑁂𑀡𑀼 𑀦𑀸𑀫 𑀓𑀼𑀫𑀸𑀭𑁄 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀇𑀢𑀺 𑀭𑁂𑀡𑀼 𑀘 𑀭𑀸𑀚𑀧𑀼𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀘 𑀫𑀸𑀡𑀯𑁄 𑀅𑀜𑁆𑀜𑁂 𑀘 𑀙 𑀔𑀢𑁆𑀢𑀺𑀬𑀸 𑀇𑀘𑁆𑀘𑁂𑀢𑁂 𑀅𑀝𑁆𑀞 𑀲𑀳𑀸𑀬𑀸 𑀅𑀳𑁂𑀲𑀼𑀁. 𑀅𑀣 𑀔𑁄, 𑀪𑁄, 𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦 𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀓𑀸𑀮𑀫𑀓𑀸𑀲𑀺. 𑀕𑁄𑀯𑀺𑀦𑁆𑀤𑁂 𑀩𑁆𑀭𑀸𑀳𑁆𑀫𑀡𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀧𑀭𑀺𑀤𑁂𑀯𑁂𑀲𑀺 𑁋 ‘‘𑀬𑀲𑁆𑀫𑀺𑀁 𑀯𑀢, 𑀪𑁄, 𑀫𑀬𑀁 𑀲𑀫𑀬𑁂 𑀕𑁄𑀯𑀺𑀦𑁆𑀤𑁂 𑀩𑁆𑀭𑀸𑀳𑁆𑀫𑀡𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀸 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀫, 𑀢𑀲𑁆𑀫𑀺𑀁 𑀦𑁄 𑀲𑀫𑀬𑁂 𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀓𑀸𑀮𑀗𑁆𑀓𑀢𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑁄 𑀭𑁂𑀡𑀼 𑀭𑀸𑀚𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀤𑀺𑀲𑀫𑁆𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑁆𑀯𑀁, 𑀤𑁂𑀯, 𑀕𑁄𑀯𑀺𑀦𑁆𑀤𑁂 𑀩𑁆𑀭𑀸𑀳𑁆𑀫𑀡𑁂 𑀓𑀸𑀮𑀗𑁆𑀓𑀢𑁂 𑀅𑀢𑀺𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑁂𑀲𑀺. 𑀅𑀢𑁆𑀣𑀺, 𑀤𑁂𑀯, 𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀧𑀼𑀢𑁆𑀢𑁄 𑀧𑀡𑁆𑀟𑀺𑀢𑀢𑀭𑁄 𑀘𑁂𑀯 𑀧𑀺𑀢𑀭𑀸, 𑀅𑀮𑀫𑀢𑁆𑀣𑀤𑀲𑀢𑀭𑁄 𑀘𑁂𑀯 𑀧𑀺𑀢𑀭𑀸; 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺, 𑀢𑁂𑀧𑀺 𑀚𑁄𑀢𑀺𑀧𑀸𑀮𑀲𑁆𑀲𑁂𑀯 𑀫𑀸𑀡𑀯𑀲𑁆𑀲 𑀅𑀦𑀼𑀲𑀸𑀲𑀦𑀺𑀬𑀸’’𑀢𑀺. ‘‘𑀏𑀯𑀁 𑀓𑀼𑀫𑀸𑀭𑀸’’𑀢𑀺? ‘‘𑀏𑀯𑀁 𑀤𑁂𑀯𑀸’’𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀯𑀢𑁆𑀣𑀼

𑁩𑁦𑁫. ‘‘𑀅𑀣 𑀔𑁄, 𑀪𑁄, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀬𑁂𑀦 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀪𑀯𑀫𑀢𑁆𑀣𑀼 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀆𑀫𑀦𑁆𑀢𑀬𑀢𑀺, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑁄𑀢𑁄 𑀚𑁄𑀢𑀺𑀧𑀸𑀮𑀲𑁆𑀲 𑀫𑀸𑀡𑀯𑀲𑁆𑀲 𑀤𑀲𑁆𑀲𑀦𑀓𑀸𑀫𑁄’’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑁄, 𑀲𑁄 𑀧𑀼𑀭𑀺𑀲𑁄 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀪𑀯𑀫𑀢𑁆𑀣𑀼 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀆𑀫𑀦𑁆𑀢𑀬𑀢𑀺, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑁄𑀢𑁄 𑀚𑁄𑀢𑀺𑀧𑀸𑀮𑀲𑁆𑀲 𑀫𑀸𑀡𑀯𑀲𑁆𑀲 𑀤𑀲𑁆𑀲𑀦𑀓𑀸𑀫𑁄’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀪𑁄 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀲𑀫𑁆𑀧𑀢𑀺𑀦𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺; 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄, 𑀪𑁄, 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀏𑀢𑀤𑀯𑁄𑀘 𑁋 ‘‘𑀅𑀦𑀼𑀲𑀸𑀲𑀢𑀼 𑀦𑁄 𑀪𑀯𑀁 𑀚𑁄𑀢𑀺𑀧𑀸𑀮𑁄, 𑀫𑀸 𑀦𑁄 𑀪𑀯𑀁 𑀚𑁄𑀢𑀺𑀧𑀸𑀮𑁄 𑀅𑀦𑀼𑀲𑀸𑀲𑀦𑀺𑀬𑀸 𑀧𑀘𑁆𑀘𑀩𑁆𑀬𑀸𑀳𑀸𑀲𑀺. 𑀧𑁂𑀢𑁆𑀢𑀺𑀓𑁂 𑀢𑀁 𑀞𑀸𑀦𑁂 𑀞𑀧𑁂𑀲𑁆𑀲𑀸𑀫𑀺, 𑀕𑁄𑀯𑀺𑀦𑁆𑀤𑀺𑀬𑁂 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄, 𑀪𑁄, 𑀲𑁄 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑁄, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀕𑁄𑀯𑀺𑀦𑁆𑀤𑀺𑀬𑁂 𑀅𑀪𑀺𑀲𑀺𑀜𑁆𑀘𑀺, 𑀢𑀁 𑀧𑁂𑀢𑁆𑀢𑀺𑀓𑁂 𑀞𑀸𑀦𑁂 𑀞𑀧𑁂𑀲𑀺. 𑀅𑀪𑀺𑀲𑀺𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀕𑁄𑀯𑀺𑀦𑁆𑀤𑀺𑀬𑁂 𑀧𑁂𑀢𑁆𑀢𑀺𑀓𑁂 𑀞𑀸𑀦𑁂 𑀞𑀧𑀺𑀢𑁄 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺 𑀢𑁂𑀧𑀺 𑀅𑀢𑁆𑀣𑁂 𑀅𑀦𑀼𑀲𑀸𑀲𑀢𑀺, 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀅𑀢𑁆𑀣𑁂 𑀦𑀸𑀦𑀼𑀲𑀸𑀲𑀺, 𑀢𑁂𑀧𑀺 𑀅𑀢𑁆𑀣𑁂 𑀅𑀦𑀼𑀲𑀸𑀲𑀢𑀺; 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀓𑀫𑁆𑀫𑀦𑁆𑀢𑁂 𑀅𑀪𑀺𑀲𑀫𑁆𑀪𑁄𑀲𑀺, 𑀢𑁂𑀧𑀺 𑀓𑀫𑁆𑀫𑀦𑁆𑀢𑁂 𑀅𑀪𑀺𑀲𑀫𑁆𑀪𑁄𑀢𑀺, 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀓𑀫𑁆𑀫𑀦𑁆𑀢𑁂 𑀦𑀸𑀪𑀺𑀲𑀫𑁆𑀪𑁄𑀲𑀺, 𑀢𑁂𑀧𑀺 𑀓𑀫𑁆𑀫𑀦𑁆𑀢𑁂 𑀅𑀪𑀺𑀲𑀫𑁆𑀪𑁄𑀢𑀺. 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀇𑀫𑀺𑀦𑀸 𑀔𑁄 𑀏𑀯𑀁, 𑀪𑁄, 𑀧𑀭𑀺𑀬𑀸𑀬𑁂𑀦 𑀚𑁄𑀢𑀺𑀧𑀸𑀮𑀲𑁆𑀲 𑀫𑀸𑀡𑀯𑀲𑁆𑀲 𑀕𑁄𑀯𑀺𑀦𑁆𑀤𑁄 𑀫𑀳𑀸𑀕𑁄𑀯𑀺𑀦𑁆𑀤𑁄𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

𑀭𑀚𑁆𑀚𑀲𑀁𑀯𑀺𑀪𑀚𑀦𑀁

𑁩𑁦𑁬. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 𑁋 ‘‘𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀁? 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼𑀁. 𑀆𑀬𑀦𑁆𑀢𑀼, 𑀪𑁄𑀦𑁆𑀢𑁄, 𑀬𑁂𑀦 𑀭𑁂𑀡𑀼 𑀭𑀸𑀚𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀣; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀏𑀯𑀁 𑀯𑀤𑁂𑀣 𑁋 ‘‘𑀫𑀬𑀁 𑀔𑁄 𑀪𑁄𑀢𑁄 𑀭𑁂𑀡𑀼𑀲𑁆𑀲 𑀲𑀳𑀸𑀬𑀸 𑀧𑀺𑀬𑀸 𑀫𑀦𑀸𑀧𑀸 𑀅𑀧𑁆𑀧𑀝𑀺𑀓𑀽𑀮𑀸, 𑀬𑀁𑀲𑀼𑀔𑁄 𑀪𑀯𑀁 𑀢𑀁𑀲𑀼𑀔𑀸 𑀫𑀬𑀁, 𑀬𑀁𑀤𑀼𑀓𑁆𑀔𑁄 𑀪𑀯𑀁 𑀢𑀁𑀤𑀼𑀓𑁆𑀔𑀸 𑀫𑀬𑀁. 𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀁? 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀪𑀯𑀦𑁆𑀢𑀁 𑀭𑁂𑀡𑀼𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼𑀁. 𑀲𑀘𑁂 𑀪𑀯𑀁 𑀭𑁂𑀡𑀼 𑀭𑀚𑁆𑀚𑀁 𑀮𑀪𑁂𑀣, 𑀲𑀁𑀯𑀺𑀪𑀚𑁂𑀣 𑀦𑁄 𑀭𑀚𑁆𑀚𑁂𑀦𑀸’’𑀢𑀺. ‘‘𑀏𑀯𑀁 𑀪𑁄’’𑀢𑀺 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑁂𑀡𑀼 𑀭𑀸𑀚𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀬𑀁 𑀔𑁄 𑀪𑁄𑀢𑁄 𑀭𑁂𑀡𑀼𑀲𑁆𑀲 𑀲𑀳𑀸𑀬𑀸 𑀧𑀺𑀬𑀸 𑀫𑀦𑀸𑀧𑀸 𑀅𑀧𑁆𑀧𑀝𑀺𑀓𑀽𑀮𑀸; 𑀬𑀁𑀲𑀼𑀔𑁄 𑀪𑀯𑀁 𑀢𑀁𑀲𑀼𑀔𑀸 𑀫𑀬𑀁, 𑀬𑀁𑀤𑀼𑀓𑁆𑀔𑁄 𑀪𑀯𑀁 𑀢𑀁𑀤𑀼𑀓𑁆𑀔𑀸 𑀫𑀬𑀁. 𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀓𑁄 𑀦𑀼 𑀔𑁄 𑀧𑀦 𑀪𑁄 𑀚𑀸𑀦𑀸𑀢𑀺 𑀚𑀻𑀯𑀺𑀢𑀁? 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀪𑀯𑀦𑁆𑀢𑀁 𑀭𑁂𑀡𑀼𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼𑀁. 𑀲𑀘𑁂 𑀪𑀯𑀁 𑀭𑁂𑀡𑀼 𑀭𑀚𑁆𑀚𑀁 𑀮𑀪𑁂𑀣, 𑀲𑀁𑀯𑀺𑀪𑀚𑁂𑀣 𑀦𑁄 𑀭𑀚𑁆𑀚𑁂𑀦𑀸’’𑀢𑀺. ‘‘𑀓𑁄 𑀦𑀼 𑀔𑁄, 𑀪𑁄, 𑀅𑀜𑁆𑀜𑁄 𑀫𑀫 𑀯𑀺𑀚𑀺𑀢𑁂 𑀲𑀼𑀔𑁄 𑀪𑀯𑁂𑀣 [𑀲𑀼𑀔𑀸 𑀪𑀯𑁂𑀬𑁆𑀬𑀸𑀣 (𑀓.), 𑀲𑀼𑀔𑀁 𑀪𑀯𑁂𑀬𑁆𑀬𑀸𑀣, 𑀲𑀼𑀔𑀫𑁂𑀥𑁂𑀬𑁆𑀬𑀸𑀣 (𑀲𑀻. 𑀧𑀻.),𑀲𑀼𑀔 𑀫𑁂𑀥𑁂𑀣 (?)], 𑀅𑀜𑁆𑀜𑀢𑁆𑀭 𑀪𑀯𑀦𑁆𑀢𑁂𑀪𑀺? 𑀲𑀘𑀸𑀳𑀁, 𑀪𑁄, 𑀭𑀚𑁆𑀚𑀁 𑀮𑀪𑀺𑀲𑁆𑀲𑀸𑀫𑀺, 𑀲𑀁𑀯𑀺𑀪𑀚𑀺𑀲𑁆𑀲𑀸𑀫𑀺 𑀯𑁄 𑀭𑀚𑁆𑀚𑁂𑀦𑀸’’’𑀢𑀺.

𑁩𑁦𑁭. ‘‘𑀅𑀣 𑀔𑁄, 𑀪𑁄, 𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀓𑀸𑀮𑀫𑀓𑀸𑀲𑀺. 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀅𑀪𑀺𑀲𑀺𑀢𑁆𑀢𑁄 𑀭𑁂𑀡𑀼 𑀭𑀚𑁆𑀚𑁂𑀦 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 𑁋 ‘‘𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀓𑀸𑀮𑀗𑁆𑀓𑀢𑁄. 𑀅𑀪𑀺𑀲𑀺𑀢𑁆𑀢𑁄 𑀭𑁂𑀡𑀼 𑀭𑀚𑁆𑀚𑁂𑀦 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺, 𑀫𑀤𑀦𑀻𑀬𑀸 𑀓𑀸𑀫𑀸? 𑀆𑀬𑀦𑁆𑀢𑀼, 𑀪𑁄𑀦𑁆𑀢𑁄, 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀣; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀯𑀁 𑀯𑀤𑁂𑀣 𑁋 𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀓𑀸𑀮𑀗𑁆𑀓𑀢𑁄, 𑀅𑀪𑀺𑀲𑀺𑀢𑁆𑀢𑁄 𑀪𑀯𑀁 𑀭𑁂𑀡𑀼 𑀭𑀚𑁆𑀚𑁂𑀦, 𑀲𑀭𑀢𑀺 𑀪𑀯𑀁 𑀢𑀁 𑀯𑀘𑀦’’’𑀦𑁆𑀢𑀺?

𑁩𑁦𑁮. ‘‘‘𑀏𑀯𑀁, 𑀪𑁄’’𑀢𑀺 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀓𑀸𑀮𑀗𑁆𑀓𑀢𑁄, 𑀅𑀪𑀺𑀲𑀺𑀢𑁆𑀢𑁄 𑀪𑀯𑀁 𑀭𑁂𑀡𑀼 𑀭𑀚𑁆𑀚𑁂𑀦, 𑀲𑀭𑀢𑀺 𑀪𑀯𑀁 𑀢𑀁 𑀯𑀘𑀦’’𑀦𑁆𑀢𑀺? ‘‘𑀲𑀭𑀸𑀫𑀳𑀁, 𑀪𑁄, 𑀢𑀁 𑀯𑀘𑀦𑀁 [𑀯𑀘𑀦𑀦𑁆𑀢𑀺 (𑀲𑁆𑀬𑀸. 𑀓.)]. 𑀓𑁄 𑀦𑀼 𑀔𑁄, 𑀪𑁄, 𑀧𑀳𑁄𑀢𑀺 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀉𑀢𑁆𑀢𑀭𑁂𑀦 𑀆𑀬𑀢𑀁 𑀤𑀓𑁆𑀔𑀺𑀡𑁂𑀦 𑀲𑀓𑀝𑀫𑀼𑀔𑀁 𑀲𑀢𑁆𑀢𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀺𑀢𑀼’’𑀦𑁆𑀢𑀺? ‘‘𑀓𑁄 𑀦𑀼 𑀔𑁄, 𑀪𑁄, 𑀅𑀜𑁆𑀜𑁄 𑀧𑀳𑁄𑀢𑀺, 𑀅𑀜𑁆𑀜𑀢𑁆𑀭 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀩𑁆𑀭𑀸𑀳𑁆𑀫𑀡𑁂𑀦𑀸’’𑀢𑀺? 𑀅𑀣 𑀔𑁄, 𑀪𑁄, 𑀭𑁂𑀡𑀼 𑀭𑀸𑀚𑀸 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀭𑀸𑀚𑀸 𑀢𑀁, 𑀪𑀦𑁆𑀢𑁂, 𑀭𑁂𑀡𑀼 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁 𑀤𑁂𑀯𑀸’’𑀢𑀺 𑀔𑁄, 𑀪𑁄, 𑀲𑁄 𑀧𑀼𑀭𑀺𑀲𑁄 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀭𑀸𑀚𑀸 𑀢𑀁, 𑀪𑀦𑁆𑀢𑁂, 𑀭𑁂𑀡𑀼 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀦𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀭𑁂𑀡𑀼 𑀭𑀸𑀚𑀸 𑀏𑀢𑀤𑀯𑁄𑀘 𑁋 ‘‘𑀏𑀢𑀼, 𑀪𑀯𑀁 𑀕𑁄𑀯𑀺𑀦𑁆𑀤𑁄, 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀉𑀢𑁆𑀢𑀭𑁂𑀦 𑀆𑀬𑀢𑀁 𑀤𑀓𑁆𑀔𑀺𑀡𑁂𑀦 𑀲𑀓𑀝𑀫𑀼𑀔𑀁 𑀲𑀢𑁆𑀢𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀢𑀽’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀉𑀢𑁆𑀢𑀭𑁂𑀦 𑀆𑀬𑀢𑀁 𑀤𑀓𑁆𑀔𑀺𑀡𑁂𑀦 𑀲𑀓𑀝𑀫𑀼𑀔𑀁 𑀲𑀢𑁆𑀢𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀺. 𑀲𑀩𑁆𑀩𑀸𑀦𑀺 𑀲𑀓𑀝𑀫𑀼𑀔𑀸𑀦𑀺 𑀧𑀝𑁆𑀞𑀧𑁂𑀲𑀺 [𑀅𑀝𑁆𑀞𑀧𑁂𑀲𑀺 (𑀲𑀻. 𑀧𑀻.)]. 𑀢𑀢𑁆𑀭 𑀲𑀼𑀤𑀁 𑀫𑀚𑁆𑀛𑁂 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀚𑀦𑀧𑀤𑁄 𑀳𑁄𑀢𑀺.

𑁩𑁦𑁯. 𑀤𑀦𑁆𑀢𑀧𑀼𑀭𑀁 𑀓𑀮𑀺𑀗𑁆𑀕𑀸𑀦𑀁 [𑀓𑀸𑀮𑀺𑀗𑁆𑀕𑀸𑀦𑀁 (𑀲𑁆𑀬𑀸. 𑀧𑀻. 𑀓.)], 𑀅𑀲𑁆𑀲𑀓𑀸𑀦𑀜𑁆𑀘 𑀧𑁄𑀢𑀦𑀁.

𑀫𑀳𑁂𑀲𑀬𑀁 [𑀫𑀸𑀳𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀅𑀯𑀦𑁆𑀢𑀻𑀦𑀁, 𑀲𑁄𑀯𑀻𑀭𑀸𑀦𑀜𑁆𑀘 𑀭𑁄𑀭𑀼𑀓𑀁.

𑀫𑀺𑀣𑀺𑀮𑀸 𑀘 𑀯𑀺𑀤𑁂𑀳𑀸𑀦𑀁, 𑀘𑀫𑁆𑀧𑀸 𑀅𑀗𑁆𑀕𑁂𑀲𑀼 𑀫𑀸𑀧𑀺𑀢𑀸;

𑀩𑀸𑀭𑀸𑀡𑀲𑀻 𑀘 𑀓𑀸𑀲𑀻𑀦𑀁, 𑀏𑀢𑁂 𑀕𑁄𑀯𑀺𑀦𑁆𑀤𑀫𑀸𑀧𑀺𑀢𑀸𑀢𑀺.

𑁩𑁧𑁦. ‘‘𑀅𑀣 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀬𑀣𑀸𑀲𑀓𑁂𑀦 𑀮𑀸𑀪𑁂𑀦 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑁋 ‘‘𑀬𑀁 𑀯𑀢 𑀦𑁄 𑀅𑀳𑁄𑀲𑀺 𑀇𑀘𑁆𑀙𑀺𑀢𑀁, 𑀬𑀁 𑀆𑀓𑀗𑁆𑀔𑀺𑀢𑀁, 𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀬𑀁 𑀅𑀪𑀺𑀧𑀢𑁆𑀣𑀺𑀢𑀁, 𑀢𑀁 𑀦𑁄 𑀮𑀤𑁆𑀥’’𑀦𑁆𑀢𑀺.

‘‘𑀲𑀢𑁆𑀢𑀪𑀽 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘, 𑀯𑁂𑀲𑁆𑀲𑀪𑀽 𑀪𑀭𑀢𑁄 𑀲𑀳;

𑀭𑁂𑀡𑀼 𑀤𑁆𑀯𑁂 𑀥𑀢𑀭𑀝𑁆𑀞𑀸 𑀘, 𑀢𑀤𑀸𑀲𑀼𑀁 𑀲𑀢𑁆𑀢 𑀪𑀸𑀭𑀥𑀸’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀓𑀺𑀢𑁆𑀢𑀺𑀲𑀤𑁆𑀤𑀅𑀩𑁆𑀪𑀼𑀕𑁆𑀕𑀫𑀦𑀁

𑁩𑁧𑁧. ‘‘𑀅𑀣 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀣𑀸 𑀔𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀲𑀳𑀸𑀬𑁄 𑀧𑀺𑀬𑁄 𑀫𑀦𑀸𑀧𑁄 𑀅𑀧𑁆𑀧𑀝𑀺𑀓𑀽𑀮𑁄. 𑀏𑀯𑀫𑁂𑀯 𑀔𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀫𑁆𑀳𑀸𑀓𑀫𑁆𑀧𑀺 𑀲𑀳𑀸𑀬𑁄 𑀧𑀺𑀬𑁄 𑀫𑀦𑀸𑀧𑁄 𑀅𑀧𑁆𑀧𑀝𑀺𑀓𑀽𑀮𑁄, 𑀅𑀦𑀼𑀲𑀸𑀲𑀢𑀼 𑀦𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄; 𑀫𑀸 𑀦𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀦𑀼𑀲𑀸𑀲𑀦𑀺𑀬𑀸 𑀧𑀘𑁆𑀘𑀩𑁆𑀬𑀸𑀳𑀸𑀲𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀲𑀁 𑀙𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀢 𑀘 𑀭𑀸𑀚𑀸𑀦𑁄 𑀔𑀢𑁆𑀢𑀺𑀬𑁂 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁂 𑀭𑀚𑁆𑀚𑁂 [𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁂 𑀭𑀚𑁆𑀚𑁂𑀦 (𑀲𑁆𑀬𑀸.)] 𑀅𑀦𑀼𑀲𑀸𑀲𑀺, 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀲𑀺.

𑁩𑁧𑁨. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺 [𑀅𑀩𑁆𑀪𑀼𑀕𑁆𑀕𑀜𑁆𑀙𑀺 (𑀲𑀻. 𑀧𑀻.)] 𑁋 ‘‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’’𑀢𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑁆𑀳𑀁 𑀔𑁄 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀬𑀁𑀦𑀽𑀦𑀸𑀳𑀁 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑁂𑀬𑁆𑀬𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑁂𑀬𑁆𑀬’’𑀦𑁆𑀢𑀺.

𑁩𑁧𑁩. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑁩𑁧𑁪. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁, ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’’𑀢𑀺.

𑁩𑁧𑁫. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀢𑁂𑀦 𑀳𑀺, 𑀪𑁄, 𑀬𑀣𑀸𑀲𑀼𑀢𑁂 𑀬𑀣𑀸𑀧𑀭𑀺𑀬𑀢𑁆𑀢𑁂 𑀫𑀦𑁆𑀢𑁂 𑀯𑀺𑀢𑁆𑀣𑀸𑀭𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀅𑀜𑁆𑀜𑀫𑀜𑁆𑀜𑀜𑁆𑀘 𑀫𑀦𑁆𑀢𑁂 𑀯𑀸𑀘𑁂𑀣; 𑀇𑀘𑁆𑀙𑀸𑀫𑀳𑀁, 𑀪𑁄, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲 𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑁩𑁧𑁬. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄𑀢𑀻, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄𑀢𑀻, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻𑀢𑀺, 𑀇𑀘𑁆𑀙𑀸𑀫𑀳𑀁, 𑀪𑁄𑀢𑀻, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲 𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’’𑀢𑀺.

𑁩𑁧𑁭. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲 𑀦𑀯𑀁 𑀲𑀦𑁆𑀥𑀸𑀕𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺; 𑀦𑀸𑀲𑁆𑀲𑀼𑀥 𑀓𑁄𑀘𑀺 𑀉𑀧𑀲𑀗𑁆𑀓𑀫𑀢𑀺 [𑀉𑀧𑀲𑀗𑁆𑀓𑀫𑀺 (𑀧𑀻.)] 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀳𑀼𑀤𑁂𑀯 𑀉𑀓𑁆𑀓𑀡𑁆𑀞𑀦𑀸 𑀅𑀳𑀼 𑀧𑀭𑀺𑀢𑀲𑁆𑀲𑀦𑀸 𑁋 ‘‘𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀻’’’𑀢𑀺.

𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑀸

𑁩𑁧𑁮. ‘‘𑀅𑀣 𑀔𑁄, 𑀪𑁄, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯, 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀳𑀼𑀤𑁂𑀯 𑀪𑀬𑀁 𑀅𑀳𑀼 𑀙𑀫𑁆𑀪𑀺𑀢𑀢𑁆𑀢𑀁 𑀅𑀳𑀼 𑀮𑁄𑀫𑀳𑀁𑀲𑁄 𑀬𑀣𑀸 𑀢𑀁 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀭𑀽𑀧𑀁 𑀤𑀺𑀲𑁆𑀯𑀸. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘‘𑀯𑀡𑁆𑀡𑀯𑀸 𑀬𑀲𑀯𑀸 𑀲𑀺𑀭𑀺𑀫𑀸, 𑀓𑁄 𑀦𑀼 𑀢𑁆𑀯𑀫𑀲𑀺 𑀫𑀸𑀭𑀺𑀲;

𑀅𑀚𑀸𑀦𑀦𑁆𑀢𑀸 𑀢𑀁 𑀧𑀼𑀘𑁆𑀙𑀸𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀫𑀁 𑀯𑁂 𑀓𑀼𑀫𑀸𑀭𑀁 𑀚𑀸𑀦𑀦𑁆𑀢𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀲𑀦𑀦𑁆𑀢𑀦𑀁 [𑀲𑀦𑀦𑁆𑀢𑀺𑀘 (𑀓.)];

𑀲𑀩𑁆𑀩𑁂 𑀚𑀸𑀦𑀦𑁆𑀢𑀺 𑀫𑀁 𑀤𑁂𑀯𑀸, 𑀏𑀯𑀁 𑀕𑁄𑀯𑀺𑀦𑁆𑀤 𑀚𑀸𑀦𑀳𑀺’’.

‘‘‘𑀆𑀲𑀦𑀁 𑀉𑀤𑀓𑀁 𑀧𑀚𑁆𑀚𑀁, 𑀫𑀥𑀼𑀲𑀸𑀓𑀜𑁆𑀘 [𑀫𑀥𑀼𑀧𑀸𑀓𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀳𑁆𑀫𑀼𑀦𑁄;

𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯𑀁’’.

‘‘𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀅𑀕𑁆𑀖𑀁, 𑀬𑀁 𑀢𑁆𑀯𑀁 𑀕𑁄𑀯𑀺𑀦𑁆𑀤 𑀪𑀸𑀲𑀲𑀺;

𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬 𑀲𑀼𑀔𑀸𑀬 𑀘;

𑀓𑀢𑀸𑀯𑀓𑀸𑀲𑁄 𑀧𑀼𑀘𑁆𑀙𑀲𑁆𑀲𑀼, 𑀬𑀁 𑀓𑀺𑀜𑁆𑀘𑀺 𑀅𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺.

𑁩𑁧𑁯. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀸𑀯𑀓𑀸𑀲𑁄 𑀔𑁄𑀫𑁆𑀳𑀺 𑀩𑁆𑀭𑀳𑁆𑀫𑀼𑀦𑀸 𑀲𑀦𑀗𑁆𑀓𑀼𑀫𑀸𑀭𑁂𑀦. 𑀓𑀺𑀁 𑀦𑀼 𑀔𑁄 𑀅𑀳𑀁 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀧𑀼𑀘𑁆𑀙𑁂𑀬𑁆𑀬𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑀸 𑀅𑀢𑁆𑀣𑀁 𑀲𑀫𑁆𑀧𑀭𑀸𑀬𑀺𑀓𑀁 𑀯𑀸’𑀢𑀺? 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀼𑀲𑀮𑁄 𑀔𑁄 𑀅𑀳𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀅𑀢𑁆𑀣𑀸𑀦𑀁, 𑀅𑀜𑁆𑀜𑁂𑀧𑀺 𑀫𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀅𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀜𑁂𑀯 𑀅𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀧𑀼𑀘𑁆𑀙𑀸𑀫𑀺 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁,

𑀓𑀗𑁆𑀔𑀻 𑀅𑀓𑀗𑁆𑀔𑀺𑀁 𑀧𑀭𑀯𑁂𑀤𑀺𑀬𑁂𑀲𑀼;

𑀓𑀢𑁆𑀣𑀝𑁆𑀞𑀺𑀢𑁄 𑀓𑀺𑀫𑁆𑀳𑀺 𑀘 𑀲𑀺𑀓𑁆𑀔𑀫𑀸𑀦𑁄,

𑀧𑀧𑁆𑀧𑁄𑀢𑀺 𑀫𑀘𑁆𑀘𑁄 𑀅𑀫𑀢𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺.

‘‘𑀳𑀺𑀢𑁆𑀯𑀸 𑀫𑀫𑀢𑁆𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂,

𑀏𑀓𑁄𑀤𑀺𑀪𑀽𑀢𑁄 𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄 [𑀓𑀭𑀼𑀡𑀸𑀥𑀺𑀫𑀼𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)];

𑀦𑀺𑀭𑀸𑀫𑀕𑀦𑁆𑀥𑁄 𑀯𑀺𑀭𑀢𑁄 𑀫𑁂𑀣𑀼𑀦𑀲𑁆𑀫𑀸,

𑀏𑀢𑁆𑀣𑀝𑁆𑀞𑀺𑀢𑁄 𑀏𑀢𑁆𑀣 𑀘 𑀲𑀺𑀓𑁆𑀔𑀫𑀸𑀦𑁄;

𑀧𑀧𑁆𑀧𑁄𑀢𑀺 𑀫𑀘𑁆𑀘𑁄 𑀅𑀫𑀢𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺.

𑁩𑁨𑁦. ‘‘𑀳𑀺𑀢𑁆𑀯𑀸 𑀫𑀫𑀢𑁆𑀢’𑀦𑁆𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀇𑀥𑁂𑀓𑀘𑁆𑀘𑁄 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, ‘𑀇𑀢𑀺 𑀳𑀺𑀢𑁆𑀯𑀸 𑀫𑀫𑀢𑁆𑀢’𑀦𑁆𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. ‘𑀏𑀓𑁄𑀤𑀺𑀪𑀽𑀢𑁄’𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀇𑀥𑁂𑀓𑀘𑁆𑀘𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁, 𑀇𑀢𑀺 𑀏𑀓𑁄𑀤𑀺𑀪𑀽𑀢𑁄’𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. ‘𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄’𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀇𑀥𑁂𑀓𑀘𑁆𑀘𑁄 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀇𑀢𑀺 ‘𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄’𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀆𑀫𑀕𑀦𑁆𑀥𑁂 𑀘 𑀔𑁄 𑀅𑀳𑀁 𑀪𑁄𑀢𑁄 𑀪𑀸𑀲𑀫𑀸𑀦𑀲𑁆𑀲 𑀦 𑀆𑀚𑀸𑀦𑀸𑀫𑀺.

‘‘𑀓𑁂 𑀆𑀫𑀕𑀦𑁆𑀥𑀸 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂,

𑀏𑀢𑁂 𑀅𑀯𑀺𑀤𑁆𑀯𑀸 𑀇𑀥 𑀩𑁆𑀭𑀽𑀳𑀺 𑀥𑀻𑀭;

𑀓𑁂𑀦𑀸𑀯𑀝𑀸 [𑀓𑁂𑀦𑀸𑀯𑀼𑀝𑀸 (𑀲𑁆𑀬𑀸.)] 𑀯𑀸𑀢𑀺 𑀧𑀚𑀸 𑀓𑀼𑀭𑀼𑀢𑀼 [𑀓𑀼𑀭𑀼𑀭𑀽 (𑀲𑁆𑀬𑀸.), 𑀓𑀼𑀭𑀼𑀝𑁆𑀞𑀭𑀽 (𑀧𑀻.), 𑀓𑀼𑀭𑀽𑀭𑀼 (?)],

𑀆𑀧𑀸𑀬𑀺𑀓𑀸 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑀸’’𑀢𑀺.

‘‘𑀓𑁄𑀥𑁄 𑀫𑁄𑀲𑀯𑀚𑁆𑀚𑀁 𑀦𑀺𑀓𑀢𑀺 𑀘 𑀤𑀼𑀩𑁆𑀪𑁄,

𑀓𑀤𑀭𑀺𑀬𑀢𑀸 𑀅𑀢𑀺𑀫𑀸𑀦𑁄 𑀉𑀲𑀽𑀬𑀸;

𑀇𑀘𑁆𑀙𑀸 𑀯𑀺𑀯𑀺𑀘𑁆𑀙𑀸 𑀧𑀭𑀳𑁂𑀞𑀦𑀸 𑀘,

𑀮𑁄𑀪𑁄 𑀘 𑀤𑁄𑀲𑁄 𑀘 𑀫𑀤𑁄 𑀘 𑀫𑁄𑀳𑁄;

𑀏𑀢𑁂𑀲𑀼 𑀬𑀼𑀢𑁆𑀢𑀸 𑀅𑀦𑀺𑀭𑀸𑀫𑀕𑀦𑁆𑀥𑀸,

𑀆𑀧𑀸𑀬𑀺𑀓𑀸 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑀸’’𑀢𑀺.

‘‘𑀬𑀣𑀸 𑀔𑁄 𑀅𑀳𑀁 𑀪𑁄𑀢𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲 𑀆𑀚𑀸𑀦𑀸𑀫𑀺. 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀭𑁂𑀡𑀼𑀭𑀸𑀚𑀆𑀫𑀦𑁆𑀢𑀦𑀸

𑁩𑁨𑁧. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀁 𑀤𑀸𑀦𑀺 𑀪𑀯𑀁 𑀧𑀼𑀭𑁄𑀳𑀺𑀢𑀁 𑀧𑀭𑀺𑀬𑁂𑀲𑀢𑀼, 𑀬𑁄 𑀪𑁄𑀢𑁄 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀲𑁆𑀲𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺.

‘‘𑀆𑀫𑀦𑁆𑀢𑀬𑀸𑀫𑀺 𑀭𑀸𑀚𑀸𑀦𑀁, 𑀭𑁂𑀡𑀼𑀁 𑀪𑀽𑀫𑀺𑀧𑀢𑀺𑀁 𑀅𑀳𑀁;

𑀢𑁆𑀯𑀁 𑀧𑀚𑀸𑀦𑀲𑁆𑀲𑀼 𑀭𑀚𑁆𑀚𑁂𑀦, 𑀦𑀸𑀳𑀁 𑀧𑁄𑀭𑁄𑀳𑀺𑀘𑁆𑀘𑁂 𑀭𑀫𑁂’’.

‘‘𑀲𑀘𑁂 𑀢𑁂 𑀊𑀦𑀁 𑀓𑀸𑀫𑁂𑀳𑀺, 𑀅𑀳𑀁 𑀧𑀭𑀺𑀧𑀽𑀭𑀬𑀸𑀫𑀺 𑀢𑁂;

𑀬𑁄 𑀢𑀁 𑀳𑀺𑀁𑀲𑀢𑀺 𑀯𑀸𑀭𑁂𑀫𑀺, 𑀪𑀽𑀫𑀺𑀲𑁂𑀦𑀸𑀧𑀢𑀺 𑀅𑀳𑀁;

𑀢𑀼𑀯𑀁 𑀧𑀺𑀢𑀸 𑀅𑀳𑀁 𑀧𑀼𑀢𑁆𑀢𑁄, 𑀫𑀸 𑀦𑁄 𑀕𑁄𑀯𑀺𑀦𑁆𑀤 𑀧𑀸𑀚𑀳𑀺’’ [𑀧𑀸𑀚𑁂𑀳𑀺 (𑀅𑀝𑁆𑀞𑀓𑀣𑀸𑀬𑀁 𑀲𑀁𑀯𑀡𑁆𑀡𑀺𑀢𑀧𑀸𑀞𑀦𑁆𑀢𑀭𑀁)].

‘‘𑀦𑀫𑀢𑁆𑀣𑀺 𑀊𑀦𑀁 𑀓𑀸𑀫𑁂𑀳𑀺, 𑀳𑀺𑀁𑀲𑀺𑀢𑀸 𑀫𑁂 𑀦 𑀯𑀺𑀚𑁆𑀚𑀢𑀺;

𑀅𑀫𑀦𑀼𑀲𑁆𑀲𑀯𑀘𑁄 𑀲𑀼𑀢𑁆𑀯𑀸, 𑀢𑀲𑁆𑀫𑀸𑀳𑀁 𑀦 𑀕𑀳𑁂 𑀭𑀫𑁂’’.

‘‘𑀅𑀫𑀦𑀼𑀲𑁆𑀲𑁄 𑀓𑀣𑀁𑀯𑀡𑁆𑀡𑁄, 𑀓𑀺𑀁 𑀢𑁂 𑀅𑀢𑁆𑀣𑀁 𑀅𑀪𑀸𑀲𑀣;

𑀬𑀜𑁆𑀘 𑀲𑀼𑀢𑁆𑀯𑀸 𑀚𑀳𑀸𑀲𑀺 𑀦𑁄, 𑀕𑁂𑀳𑁂 𑀅𑀫𑁆𑀳𑁂 𑀘 𑀓𑁂𑀯𑀮𑀻’’.

‘‘𑀉𑀧𑀯𑀼𑀢𑁆𑀣𑀲𑁆𑀲 𑀫𑁂 𑀧𑀼𑀩𑁆𑀩𑁂, 𑀬𑀺𑀝𑁆𑀞𑀼𑀓𑀸𑀫𑀲𑁆𑀲 𑀫𑁂 𑀲𑀢𑁄;

𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀆𑀲𑀺, 𑀓𑀼𑀲𑀧𑀢𑁆𑀢𑀧𑀭𑀺𑀢𑁆𑀣𑀢𑁄’’.

‘‘𑀢𑀢𑁄 𑀫𑁂 𑀩𑁆𑀭𑀳𑁆𑀫𑀸 𑀧𑀸𑀢𑀼𑀭𑀳𑀼, 𑀩𑁆𑀭𑀳𑁆𑀫𑀮𑁄𑀓𑀸 𑀲𑀦𑀦𑁆𑀢𑀦𑁄;

𑀲𑁄 𑀫𑁂 𑀧𑀜𑁆𑀳𑀁 𑀯𑀺𑀬𑀸𑀓𑀸𑀲𑀺, 𑀢𑀁 𑀲𑀼𑀢𑁆𑀯𑀸 𑀦 𑀕𑀳𑁂 𑀭𑀫𑁂’’.

‘‘𑀲𑀤𑁆𑀤𑀳𑀸𑀫𑀺 𑀅𑀳𑀁 𑀪𑁄𑀢𑁄, 𑀬𑀁 𑀢𑁆𑀯𑀁 𑀕𑁄𑀯𑀺𑀦𑁆𑀤 𑀪𑀸𑀲𑀲𑀺;

𑀅𑀫𑀦𑀼𑀲𑁆𑀲𑀯𑀘𑁄 𑀲𑀼𑀢𑁆𑀯𑀸, 𑀓𑀣𑀁 𑀯𑀢𑁆𑀢𑁂𑀣 𑀅𑀜𑁆𑀜𑀣𑀸.

‘‘𑀢𑁂 𑀢𑀁 𑀅𑀦𑀼𑀯𑀢𑁆𑀢𑀺𑀲𑁆𑀲𑀸𑀫, 𑀲𑀢𑁆𑀣𑀸 𑀕𑁄𑀯𑀺𑀦𑁆𑀤 𑀦𑁄 𑀪𑀯𑀁;

𑀫𑀡𑀺 𑀬𑀣𑀸 𑀯𑁂𑀴𑀼𑀭𑀺𑀬𑁄, 𑀅𑀓𑀸𑀘𑁄 𑀯𑀺𑀫𑀮𑁄 𑀲𑀼𑀪𑁄;

𑀏𑀯𑀁 𑀲𑀼𑀤𑁆𑀥𑀸 𑀘𑀭𑀺𑀲𑁆𑀲𑀸𑀫, 𑀕𑁄𑀯𑀺𑀦𑁆𑀤𑀲𑁆𑀲𑀸𑀦𑀼𑀲𑀸𑀲𑀦𑁂’’𑀢𑀺.

‘‘‘𑀲𑀘𑁂 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫. 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀙 𑀔𑀢𑁆𑀢𑀺𑀬𑀆𑀫𑀦𑁆𑀢𑀦𑀸

𑁩𑁨𑁨. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀁 𑀤𑀸𑀦𑀺 𑀪𑀯𑀦𑁆𑀢𑁄 𑀧𑀼𑀭𑁄𑀳𑀺𑀢𑀁 𑀧𑀭𑀺𑀬𑁂𑀲𑀦𑁆𑀢𑀼, 𑀬𑁄 𑀪𑀯𑀦𑁆𑀢𑀸𑀦𑀁 𑀭𑀚𑁆𑀚𑁂 𑀅𑀦𑀼𑀲𑀸𑀲𑀺𑀲𑁆𑀲𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. 𑀅𑀣 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀇𑀫𑁂 𑀔𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀥𑀦𑀮𑀼𑀤𑁆𑀥𑀸; 𑀬𑀁𑀦𑀽𑀦 𑀫𑀬𑀁 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀥𑀦𑁂𑀦 𑀲𑀺𑀓𑁆𑀔𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀪𑁄, 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀭𑀚𑁆𑀚𑁂𑀲𑀼 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁, 𑀢𑀢𑁄 𑀪𑁄𑀢𑁄 𑀬𑀸𑀯𑀢𑀓𑁂𑀦 𑀅𑀢𑁆𑀣𑁄, 𑀢𑀸𑀯𑀢𑀓𑀁 𑀆𑀳𑀭𑀻𑀬𑀢’’𑀦𑁆𑀢𑀺. ‘‘𑀅𑀮𑀁, 𑀪𑁄, 𑀫𑀫𑀧𑀺𑀤𑀁 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀪𑀯𑀦𑁆𑀢𑀸𑀦𑀁𑀬𑁂𑀯 𑀯𑀸𑀳𑀲𑀸. 𑀢𑀫𑀳𑀁 𑀲𑀩𑁆𑀩𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. 𑀅𑀣 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀇𑀫𑁂 𑀔𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀇𑀢𑁆𑀣𑀺𑀮𑀼𑀤𑁆𑀥𑀸; 𑀬𑀁𑀦𑀽𑀦 𑀫𑀬𑀁 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀇𑀢𑁆𑀣𑀻𑀳𑀺 𑀲𑀺𑀓𑁆𑀔𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄, 𑀪𑁄, 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀭𑀚𑁆𑀚𑁂𑀲𑀼 𑀧𑀳𑀽𑀢𑀸 𑀇𑀢𑁆𑀣𑀺𑀬𑁄, 𑀢𑀢𑁄 𑀪𑁄𑀢𑁄 𑀬𑀸𑀯𑀢𑀺𑀓𑀸𑀳𑀺 𑀅𑀢𑁆𑀣𑁄, 𑀢𑀸𑀯𑀢𑀺𑀓𑀸 𑀆𑀦𑀻𑀬𑀢’’𑀦𑁆𑀢𑀺. ‘‘𑀅𑀮𑀁, 𑀪𑁄, 𑀫𑀫𑀧𑀺𑀫𑀸 [𑀫𑀫𑀧𑀺𑀢𑀸 (𑀓.), 𑀫𑀫𑀧𑀺 (𑀲𑀻.)] 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄. 𑀢𑀸𑀧𑀸𑀳𑀁 𑀲𑀩𑁆𑀩𑀸 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀦𑁆𑀢𑀺’’.

𑁩𑁨𑁩. ‘‘𑀲𑀘𑁂 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻𑀢𑀺.

‘‘𑀲𑀘𑁂 𑀚𑀳𑀣 𑀓𑀸𑀫𑀸𑀦𑀺, 𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄;

𑀆𑀭𑀫𑁆𑀪𑀯𑁆𑀳𑁄 𑀤𑀴𑁆𑀳𑀸 𑀳𑁄𑀣, 𑀔𑀦𑁆𑀢𑀺𑀩𑀮𑀲𑀫𑀸𑀳𑀺𑀢𑀸.

‘‘𑀏𑀲 𑀫𑀕𑁆𑀕𑁄 𑀉𑀚𑀼𑀫𑀕𑁆𑀕𑁄, 𑀏𑀲 𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑁄;

𑀲𑀤𑁆𑀥𑀫𑁆𑀫𑁄 𑀲𑀩𑁆𑀪𑀺 𑀭𑀓𑁆𑀔𑀺𑀢𑁄, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸𑀢𑀺.

‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼. 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀲𑀢𑁆𑀢 𑀯𑀲𑁆𑀲𑀸𑀦𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺, 𑀪𑀯𑀦𑁆𑀢𑁂, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼𑀁. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁! 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 [𑀫𑀦𑁆𑀢𑀸𑀬 (𑀩𑀳𑀽𑀲𑀼)] 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’’𑀦𑁆𑀢𑀺. ‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀙𑀩𑁆𑀩𑀲𑁆𑀲𑀸𑀦𑀺 𑀆𑀕𑀫𑁂𑀢𑀼…𑀧𑁂… 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀏𑀓𑀁 𑀯𑀲𑁆𑀲𑀁 𑀆𑀕𑀫𑁂𑀢𑀼, 𑀏𑀓𑀲𑁆𑀲 𑀯𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀏𑀓𑀁 𑀯𑀲𑁆𑀲𑀁, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀪𑀯𑀦𑁆𑀢𑁂 𑀏𑀓𑀁 𑀯𑀲𑁆𑀲𑀁 𑀆𑀕𑀫𑁂𑀢𑀼𑀁. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁! 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀲𑀢𑁆𑀢 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼, 𑀲𑀢𑁆𑀢𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀲𑀢𑁆𑀢 𑀫𑀸𑀲𑀸𑀦𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀪𑀯𑀦𑁆𑀢𑁂 𑀲𑀢𑁆𑀢 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼𑀁. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁. 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺.

‘‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀙 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼…𑀧𑁂… 𑀧𑀜𑁆𑀘 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀘𑀢𑁆𑀢𑀸𑀭𑀺 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀢𑀻𑀡𑀺 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀤𑁆𑀯𑁂 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀏𑀓𑀁 𑀫𑀸𑀲𑀁 𑀆𑀕𑀫𑁂𑀢𑀼… 𑀅𑀤𑁆𑀥𑀫𑀸𑀲𑀁 𑀆𑀕𑀫𑁂𑀢𑀼, 𑀅𑀤𑁆𑀥𑀫𑀸𑀲𑀲𑁆𑀲 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀅𑀤𑁆𑀥𑀫𑀸𑀲𑁄, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀪𑀯𑀦𑁆𑀢𑁂 𑀅𑀤𑁆𑀥𑀫𑀸𑀲𑀁 𑀆𑀕𑀫𑁂𑀢𑀼𑀁. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁! 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀲𑀢𑁆𑀢𑀸𑀳𑀁 𑀆𑀕𑀫𑁂𑀢𑀼, 𑀬𑀸𑀯 𑀫𑀬𑀁 𑀲𑀓𑁂 𑀧𑀼𑀢𑁆𑀢𑀪𑀸𑀢𑀭𑁄 𑀭𑀚𑁆𑀚𑁂𑀦 [𑀭𑀚𑁆𑀚𑁂 (𑀲𑁆𑀬𑀸.)] 𑀅𑀦𑀼𑀲𑀸𑀲𑀺𑀲𑁆𑀲𑀸𑀫, 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀦 𑀘𑀺𑀭𑀁 𑀔𑁄, 𑀪𑁄, 𑀲𑀢𑁆𑀢𑀸𑀳𑀁, 𑀆𑀕𑀫𑁂𑀲𑁆𑀲𑀸𑀫𑀳𑀁 𑀪𑀯𑀦𑁆𑀢𑁂 𑀲𑀢𑁆𑀢𑀸𑀳’’𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀤𑀻𑀦𑀁 𑀆𑀫𑀦𑁆𑀢𑀦𑀸

𑁩𑁨𑁪. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀁 𑀤𑀸𑀦𑀺 𑀪𑀯𑀦𑁆𑀢𑁄 𑀆𑀘𑀭𑀺𑀬𑀁 𑀧𑀭𑀺𑀬𑁂𑀲𑀦𑁆𑀢𑀼, 𑀬𑁄 𑀪𑀯𑀦𑁆𑀢𑀸𑀦𑀁 𑀫𑀦𑁆𑀢𑁂 𑀯𑀸𑀘𑁂𑀲𑁆𑀲𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲. 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀫𑀸 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺. 𑀧𑀩𑁆𑀩𑀚𑁆𑀚𑀸, 𑀪𑁄, 𑀅𑀧𑁆𑀧𑁂𑀲𑀓𑁆𑀔𑀸 𑀘 𑀅𑀧𑁆𑀧𑀮𑀸𑀪𑀸 𑀘; 𑀩𑁆𑀭𑀳𑁆𑀫𑀜𑁆𑀜𑀁 𑀫𑀳𑁂𑀲𑀓𑁆𑀔𑀜𑁆𑀘 𑀫𑀳𑀸𑀮𑀸𑀪𑀜𑁆𑀘𑀸’’𑀢𑀺. ‘‘𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣 𑁋 ‘‘𑀧𑀩𑁆𑀩𑀚𑁆𑀚𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘 𑀅𑀧𑁆𑀧𑀮𑀸𑀪𑀸 𑀘, 𑀩𑁆𑀭𑀳𑁆𑀫𑀜𑁆𑀜𑀁 𑀫𑀳𑁂𑀲𑀓𑁆𑀔𑀜𑁆𑀘 𑀫𑀳𑀸𑀮𑀸𑀪𑀜𑁆𑀘𑀸’’𑀢𑀺. 𑀓𑁄 𑀦𑀼 𑀔𑁄, 𑀪𑁄, 𑀅𑀜𑁆𑀜𑀢𑁆𑀭 𑀫𑀬𑀸 𑀫𑀳𑁂𑀲𑀓𑁆𑀔𑀢𑀭𑁄 𑀯𑀸 𑀫𑀳𑀸𑀮𑀸𑀪𑀢𑀭𑁄 𑀯𑀸! 𑀅𑀳𑀜𑁆𑀳𑀺, 𑀪𑁄, 𑀏𑀢𑀭𑀳𑀺 𑀭𑀸𑀚𑀸𑀯 𑀭𑀜𑁆𑀜𑀁 𑀩𑁆𑀭𑀳𑁆𑀫𑀸𑀯 𑀩𑁆𑀭𑀸𑀳𑁆𑀫𑀡𑀸𑀦𑀁 [𑀩𑁆𑀭𑀳𑁆𑀫𑀸𑀦𑀁 (𑀲𑀻. 𑀧𑀻. 𑀓.)] 𑀤𑁂𑀯𑀢𑀸𑀯 𑀕𑀳𑀧𑀢𑀺𑀓𑀸𑀦𑀁. 𑀢𑀫𑀳𑀁 𑀲𑀩𑁆𑀩𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀲𑀘𑁂 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀪𑀭𑀺𑀬𑀸𑀦𑀁 𑀆𑀫𑀦𑁆𑀢𑀦𑀸

𑁩𑁨𑁫. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀏𑀢𑀤𑀯𑁄𑀘 𑁋 ‘‘𑀬𑀸 𑀪𑁄𑀢𑀻𑀦𑀁 𑀇𑀘𑁆𑀙𑀢𑀺, 𑀲𑀓𑀸𑀦𑀺 𑀯𑀸 𑀜𑀸𑀢𑀺𑀓𑀼𑀮𑀸𑀦𑀺 𑀕𑀘𑁆𑀙𑀢𑀼 𑀅𑀜𑁆𑀜𑀁 𑀯𑀸 𑀪𑀢𑁆𑀢𑀸𑀭𑀁 𑀧𑀭𑀺𑀬𑁂𑀲𑀢𑀼. 𑀇𑀘𑁆𑀙𑀸𑀫𑀳𑀁, 𑀪𑁄𑀢𑀻, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄𑀢𑀻, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀢𑁆𑀯𑀜𑁆𑀜𑁂𑀯 𑀦𑁄 𑀜𑀸𑀢𑀺 𑀜𑀸𑀢𑀺𑀓𑀸𑀫𑀸𑀦𑀁, 𑀢𑁆𑀯𑀁 𑀧𑀦 𑀪𑀢𑁆𑀢𑀸 𑀪𑀢𑁆𑀢𑀼𑀓𑀸𑀫𑀸𑀦𑀁. 𑀲𑀘𑁂 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀧𑀩𑁆𑀩𑀚𑁆𑀚𑀸