𑁪. 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁

𑁨𑁪𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀯𑀺𑀳𑀭𑀢𑀺 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀔𑀼𑀤𑁆𑀤𑀓𑀦𑀕𑀭𑀓𑁂 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑁂 𑀲𑀸𑀔𑀸𑀦𑀕𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀦𑁆𑀢𑀺, 𑀪𑀦𑁆𑀢𑁂, 𑀅𑀜𑁆𑀜𑀸𑀦𑀺 𑀫𑀳𑀸𑀦𑀕𑀭𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀫𑁆𑀧𑀸, 𑀭𑀸𑀚𑀕𑀳𑀁, 𑀲𑀸𑀯𑀢𑁆𑀣𑀺, 𑀲𑀸𑀓𑁂𑀢𑀁, 𑀓𑁄𑀲𑀫𑁆𑀩𑀻, 𑀩𑀸𑀭𑀸𑀡𑀲𑀻; 𑀏𑀢𑁆𑀣 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀼. 𑀏𑀢𑁆𑀣 𑀩𑀳𑀽 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀢𑀣𑀸𑀕𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺.

𑁨𑁪𑁨. ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘; 𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘 𑁋 𑀔𑀼𑀤𑁆𑀤𑀓𑀦𑀕𑀭𑀓𑀁 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑀁 𑀲𑀸𑀔𑀸𑀦𑀕𑀭𑀓’’𑀦𑁆𑀢𑀺.

𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀻

‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀸𑀫 𑀅𑀳𑁄𑀲𑀺 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 [𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 (𑀓.), 𑀘𑀓𑁆𑀓𑀯𑀢𑁆𑀢𑀻𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 (𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢)] 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀬𑀁 𑀓𑀼𑀲𑀺𑀦𑀸𑀭𑀸 𑀓𑀼𑀲𑀸𑀯𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀧𑀼𑀭𑀢𑁆𑀣𑀺𑀫𑁂𑀦 𑀘 𑀧𑀘𑁆𑀙𑀺𑀫𑁂𑀦 𑀘 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀆𑀬𑀸𑀫𑁂𑀦, 𑀉𑀢𑁆𑀢𑀭𑁂𑀦 𑀘 𑀤𑀓𑁆𑀔𑀺𑀡𑁂𑀦 𑀘 𑀲𑀢𑁆𑀢𑀬𑁄𑀚𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀦. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀤𑁂𑀯𑀸𑀦𑀁 𑀆𑀴𑀓𑀫𑀦𑁆𑀤𑀸 𑀦𑀸𑀫 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀻𑀢𑀸 𑀘 [𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 (𑀲𑁆𑀬𑀸.)] 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀬𑀓𑁆𑀔𑀸 𑀘 𑀲𑀼𑀪𑀺𑀓𑁆𑀔𑀸 𑀘; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀓𑀼𑀲𑀸𑀯𑀢𑀻 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀸 𑀅𑀳𑁄𑀲𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘, 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀺𑀲𑀤𑁆𑀤𑁂𑀦 𑀅𑀲𑁆𑀲𑀲𑀤𑁆𑀤𑁂𑀦 𑀭𑀣𑀲𑀤𑁆𑀤𑁂𑀦 𑀪𑁂𑀭𑀺𑀲𑀤𑁆𑀤𑁂𑀦 𑀫𑀼𑀤𑀺𑀗𑁆𑀕𑀲𑀤𑁆𑀤𑁂𑀦 𑀯𑀻𑀡𑀸𑀲𑀤𑁆𑀤𑁂𑀦 𑀕𑀻𑀢𑀲𑀤𑁆𑀤𑁂𑀦 𑀲𑀗𑁆𑀔𑀲𑀤𑁆𑀤𑁂𑀦 𑀲𑀫𑁆𑀫𑀲𑀤𑁆𑀤𑁂𑀦 𑀧𑀸𑀡𑀺𑀢𑀸𑀴𑀲𑀤𑁆𑀤𑁂𑀦 ‘𑀅𑀲𑁆𑀦𑀸𑀣 𑀧𑀺𑀯𑀣 𑀔𑀸𑀤𑀣𑀸’𑀢𑀺 𑀤𑀲𑀫𑁂𑀦 𑀲𑀤𑁆𑀤𑁂𑀦.

‘‘𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀲𑀢𑁆𑀢𑀳𑀺 𑀧𑀸𑀓𑀸𑀭𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺. 𑀏𑀓𑁄 𑀧𑀸𑀓𑀸𑀭𑁄 𑀲𑁄𑀯𑀡𑁆𑀡𑀫𑀬𑁄, 𑀏𑀓𑁄 𑀭𑀽𑀧𑀺𑀬𑀫𑀬𑁄, 𑀏𑀓𑁄 𑀯𑁂𑀴𑀼𑀭𑀺𑀬𑀫𑀬𑁄, 𑀏𑀓𑁄 𑀨𑀮𑀺𑀓𑀫𑀬𑁄, 𑀏𑀓𑁄 𑀮𑁄𑀳𑀺𑀢𑀗𑁆𑀓𑀫𑀬𑁄 [𑀮𑁄𑀳𑀺𑀢𑀗𑁆𑀕𑀫𑀬𑁄 (𑀓.), 𑀮𑁄𑀳𑀺𑀢𑀓𑀫𑀬𑁄 (𑀩𑁆𑀬𑀸𑀓𑀭𑀡𑁂𑀲𑀼)], 𑀏𑀓𑁄 𑀫𑀲𑀸𑀭𑀕𑀮𑁆𑀮𑀫𑀬𑁄, 𑀏𑀓𑁄 𑀲𑀩𑁆𑀩𑀭𑀢𑀦𑀫𑀬𑁄. 𑀓𑀼𑀲𑀸𑀯𑀢𑀺𑀬𑀸, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀺𑀬𑀸 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀤𑁆𑀯𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀏𑀓𑀁 𑀤𑁆𑀯𑀸𑀭𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁. 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀢𑁆𑀢 𑀲𑀢𑁆𑀢 𑀏𑀲𑀺𑀓𑀸 𑀦𑀺𑀔𑀸𑀢𑀸 𑀅𑀳𑁂𑀲𑀼𑀁 𑀢𑀺𑀧𑁄𑀭𑀺𑀲𑀗𑁆𑀕𑀸 𑀢𑀺𑀧𑁄𑀭𑀺𑀲𑀦𑀺𑀔𑀸𑀢𑀸 𑀤𑁆𑀯𑀸𑀤𑀲𑀧𑁄𑀭𑀺𑀲𑀸 𑀉𑀩𑁆𑀩𑁂𑀥𑁂𑀦. 𑀏𑀓𑀸 𑀏𑀲𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸, 𑀏𑀓𑀸 𑀮𑁄𑀳𑀺𑀢𑀗𑁆𑀓𑀫𑀬𑀸, 𑀏𑀓𑀸 𑀫𑀲𑀸𑀭𑀕𑀮𑁆𑀮𑀫𑀬𑀸, 𑀏𑀓𑀸 𑀲𑀩𑁆𑀩𑀭𑀢𑀦𑀫𑀬𑀸. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀲𑀢𑁆𑀢𑀳𑀺 𑀢𑀸𑀮𑀧𑀦𑁆𑀢𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺. 𑀏𑀓𑀸 𑀢𑀸𑀮𑀧𑀦𑁆𑀢𑀺 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸, 𑀏𑀓𑀸 𑀮𑁄𑀳𑀺𑀢𑀗𑁆𑀓𑀫𑀬𑀸, 𑀏𑀓𑀸 𑀫𑀲𑀸𑀭𑀕𑀮𑁆𑀮𑀫𑀬𑀸, 𑀏𑀓𑀸 𑀲𑀩𑁆𑀩𑀭𑀢𑀦𑀫𑀬𑀸. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑁄𑀯𑀡𑁆𑀡𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀭𑀽𑀧𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀭𑀽𑀧𑀺𑀬𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀲𑁄𑀯𑀡𑁆𑀡𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀨𑀮𑀺𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀨𑀮𑀺𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀨𑀮𑀺𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀯𑁂𑀴𑀼𑀭𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀮𑁄𑀳𑀺𑀢𑀗𑁆𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀮𑁄𑀳𑀺𑀢𑀗𑁆𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀫𑀲𑀸𑀭𑀕𑀮𑁆𑀮𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀫𑀲𑀸𑀭𑀕𑀮𑁆𑀮𑀫𑀬𑀲𑁆𑀲 𑀢𑀸𑀮𑀲𑁆𑀲 𑀫𑀲𑀸𑀭𑀕𑀮𑁆𑀮𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀮𑁄𑀳𑀺𑀢𑀗𑁆𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀲𑀩𑁆𑀩𑀭𑀢𑀦𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑀩𑁆𑀩𑀭𑀢𑀦𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀲𑀩𑁆𑀩𑀭𑀢𑀦𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀢𑀸𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 [𑀓𑀫𑀦𑀻𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀘 𑀫𑀤𑀦𑀻𑀬𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀢𑀽𑀭𑀺𑀬𑀲𑁆𑀲 𑀲𑀼𑀯𑀺𑀦𑀻𑀢𑀲𑁆𑀲 𑀲𑀼𑀧𑁆𑀧𑀝𑀺𑀢𑀸𑀴𑀺𑀢𑀲𑁆𑀲 𑀲𑀼𑀓𑀼𑀲𑀮𑁂𑀳𑀺 𑀲𑀫𑀦𑁆𑀦𑀸𑀳𑀢𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀢𑁂𑀦 𑀲𑀫𑀬𑁂𑀦 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀥𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑁄𑀡𑁆𑀟𑀸 𑀧𑀺𑀧𑀸𑀲𑀸, 𑀢𑁂 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁂𑀦 𑀧𑀭𑀺𑀘𑀸𑀭𑁂𑀲𑀼𑀁.

𑀘𑀓𑁆𑀓𑀭𑀢𑀦𑀁

𑁨𑁪𑁩. ‘‘𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀺. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥𑀸𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀲𑀻𑀲𑀁𑀦𑁆𑀳𑀸𑀢𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁. 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀲𑀼𑀢𑀁 𑀔𑁄 𑀧𑀦𑁂𑀢𑀁 𑁋 ‘‘𑀬𑀲𑁆𑀲 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀲𑀻𑀲𑀁𑀦𑁆𑀳𑀸𑀢𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁, 𑀲𑁄 𑀳𑁄𑀢𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’𑀢𑀺. 𑀅𑀲𑁆𑀲𑀁 𑀦𑀼 𑀔𑁄 𑀅𑀳𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’𑀢𑀺.

𑁨𑁪𑁪. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺 𑁋 ‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦𑀁, 𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’𑀦𑁆𑀢𑀺. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀧𑀯𑀢𑁆𑀢𑀺 [𑀧𑀯𑀢𑁆𑀢𑀢𑀺 (𑀲𑁆𑀬𑀸. 𑀓.)], 𑀅𑀦𑁆𑀯𑀤𑁂𑀯 [𑀅𑀦𑀼𑀤𑁂𑀯 (𑀲𑁆𑀬𑀸.)] 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬, 𑀬𑀲𑁆𑀫𑀺𑀁 𑀔𑁄 𑀧𑀦𑀸𑀦𑀦𑁆𑀤, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀲𑀺, 𑀢𑀢𑁆𑀣 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀯𑀸𑀲𑀁 𑀉𑀧𑀕𑀘𑁆𑀙𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀏𑀳𑀺 𑀔𑁄 𑀫𑀳𑀸𑀭𑀸𑀚, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀲𑀓𑀁 𑀢𑁂 𑀫𑀳𑀸𑀭𑀸𑀚, 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 𑁋 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀡𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑀼𑀬𑀦𑁆𑀢𑀸 𑀅𑀳𑁂𑀲𑀼𑀁. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀯𑀢𑁆𑀢𑀺…𑀧𑁂… 𑀤𑀓𑁆𑀔𑀺𑀡𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀧𑀯𑀢𑁆𑀢𑀺…𑀧𑁂… 𑀧𑀘𑁆𑀙𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀉𑀢𑁆𑀢𑀭𑀁 𑀤𑀺𑀲𑀁 𑀧𑀯𑀢𑁆𑀢𑀺, 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑀲𑁆𑀫𑀺𑀁 𑀔𑁄 𑀧𑀦𑀸𑀦𑀦𑁆𑀤, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀲𑀺, 𑀢𑀢𑁆𑀣 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀯𑀸𑀲𑀁 𑀉𑀧𑀕𑀘𑁆𑀙𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀏𑀳𑀺 𑀔𑁄 𑀫𑀳𑀸𑀭𑀸𑀚, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀲𑀓𑀁 𑀢𑁂 𑀫𑀳𑀸𑀭𑀸𑀚, 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 𑁋 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀡𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑀼𑀬𑀦𑁆𑀢𑀸 𑀅𑀳𑁂𑀲𑀼𑀁.

𑁨𑁪𑁫. ‘‘𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀘𑀓𑁆𑀓𑀭𑀢𑀦𑀁 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀓𑀼𑀲𑀸𑀯𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑁂 𑀅𑀢𑁆𑀣𑀓𑀭𑀡𑀧𑀫𑀼𑀔𑁂 𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂 𑀅𑀝𑁆𑀞𑀸𑀲𑀺 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑁆𑀢𑁂𑀧𑀼𑀭𑀁 𑀉𑀧𑀲𑁄𑀪𑀬𑀫𑀸𑀦𑀁. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀳𑀢𑁆𑀣𑀺𑀭𑀢𑀦𑀁

𑁨𑁪𑁬. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀳𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀲𑀩𑁆𑀩𑀲𑁂𑀢𑁄 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸. 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀺 𑁋 ‘𑀪𑀤𑁆𑀤𑀓𑀁 𑀯𑀢 𑀪𑁄 𑀳𑀢𑁆𑀣𑀺𑀬𑀸𑀦𑀁, 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’𑀢𑀺. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀳𑀢𑁆𑀣𑀺𑀭𑀢𑀦𑀁 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀦𑁆𑀥𑀳𑀢𑁆𑀣𑀸𑀚𑀸𑀦𑀺𑀬𑁄 𑀤𑀻𑀖𑀭𑀢𑁆𑀢𑀁 𑀲𑀼𑀧𑀭𑀺𑀤𑀦𑁆𑀢𑁄, 𑀏𑀯𑀫𑁂𑀯 𑀤𑀫𑀣𑀁 𑀉𑀧𑀕𑀘𑁆𑀙𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀳𑀢𑁆𑀣𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀬𑀸𑀬𑀺𑀢𑁆𑀯𑀸 𑀓𑀼𑀲𑀸𑀯𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀸𑀢𑀭𑀸𑀲𑀫𑀓𑀸𑀲𑀺. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀳𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀅𑀲𑁆𑀲𑀭𑀢𑀦𑀁

𑁨𑁪𑁭. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀲𑁆𑀲𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀲𑀩𑁆𑀩𑀲𑁂𑀢𑁄 𑀓𑀸𑀴𑀲𑀻𑀲𑁄 𑀫𑀼𑀜𑁆𑀚𑀓𑁂𑀲𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀯𑀮𑀸𑀳𑀓𑁄 𑀦𑀸𑀫 𑀅𑀲𑁆𑀲𑀭𑀸𑀚𑀸. 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀺 𑁋 ‘𑀪𑀤𑁆𑀤𑀓𑀁 𑀯𑀢 𑀪𑁄 𑀅𑀲𑁆𑀲𑀬𑀸𑀦𑀁 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’𑀢𑀺. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀅𑀲𑁆𑀲𑀭𑀢𑀦𑀁 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀪𑀤𑁆𑀤𑁄 𑀅𑀲𑁆𑀲𑀸𑀚𑀸𑀦𑀺𑀬𑁄 𑀤𑀻𑀖𑀭𑀢𑁆𑀢𑀁 𑀲𑀼𑀧𑀭𑀺𑀤𑀦𑁆𑀢𑁄, 𑀏𑀯𑀫𑁂𑀯 𑀤𑀫𑀣𑀁 𑀉𑀧𑀕𑀘𑁆𑀙𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀅𑀲𑁆𑀲𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀬𑀸𑀬𑀺𑀢𑁆𑀯𑀸 𑀓𑀼𑀲𑀸𑀯𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀸𑀢𑀭𑀸𑀲𑀫𑀓𑀸𑀲𑀺. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀅𑀲𑁆𑀲𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀫𑀡𑀺𑀭𑀢𑀦𑀁

𑁨𑁪𑁮. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀫𑀡𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀅𑀳𑁄𑀲𑀺 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀫𑀡𑀺𑀭𑀢𑀦𑀲𑁆𑀲 𑀆𑀪𑀸 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀨𑀼𑀝𑀸 𑀅𑀳𑁄𑀲𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀫𑀡𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀡𑀺𑀁 𑀥𑀚𑀕𑁆𑀕𑀁 𑀆𑀭𑁄𑀧𑁂𑀢𑁆𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬 𑀧𑀸𑀬𑀸𑀲𑀺. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀲𑀫𑀦𑁆𑀢𑀸 𑀕𑀸𑀫𑀸 𑀅𑀳𑁂𑀲𑀼𑀁, 𑀢𑁂 𑀢𑁂𑀦𑁄𑀪𑀸𑀲𑁂𑀦 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑀼𑀁 𑀤𑀺𑀯𑀸𑀢𑀺 𑀫𑀜𑁆𑀜𑀫𑀸𑀦𑀸. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀫𑀡𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀇𑀢𑁆𑀣𑀺𑀭𑀢𑀦𑀁

𑁨𑁪𑁯. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀺𑀓𑀸 𑀦𑀸𑀘𑁆𑀘𑁄𑀤𑀸𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀺𑀯𑀡𑁆𑀡𑀁 [𑀫𑀸𑀦𑀼𑀲𑁆𑀲𑀺𑀯𑀡𑁆𑀡𑀁 (𑀲𑁆𑀬𑀸.)] 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀏𑀯𑀭𑀽𑀧𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑀽𑀮𑀧𑀺𑀘𑀼𑀦𑁄 𑀯𑀸 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀯𑀸. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀲𑀻𑀢𑁂 𑀉𑀡𑁆𑀳𑀸𑀦𑀺 𑀕𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀡𑁆𑀳𑁂 𑀲𑀻𑀢𑀸𑀦𑀺. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄. 𑀢𑀁 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀁 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻 𑀅𑀳𑁄𑀲𑀺 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻 𑀫𑀦𑀸𑀧𑀘𑀸𑀭𑀺𑀦𑀻 𑀧𑀺𑀬𑀯𑀸𑀤𑀺𑀦𑀻. 𑀢𑀁 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀁 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀫𑀦𑀲𑀸𑀧𑀺 𑀦𑁄 𑀅𑀢𑀺𑀘𑀭𑀺 [𑀅𑀢𑀺𑀘𑀭𑀻 (𑀓.), 𑀅𑀢𑀺𑀘𑀸𑀭𑀻 (𑀲𑀻. 𑀲𑁆𑀬𑀸. 𑀧𑀻.)], 𑀓𑀼𑀢𑁄 𑀧𑀦 𑀓𑀸𑀬𑁂𑀦. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀕𑀳𑀧𑀢𑀺𑀭𑀢𑀦𑀁

𑁨𑁫𑁦. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼 𑀧𑀸𑀢𑀼𑀭𑀳𑁄𑀲𑀺 𑀬𑁂𑀦 𑀦𑀺𑀥𑀺𑀁 𑀧𑀲𑁆𑀲𑀢𑀺 𑀲𑀲𑁆𑀲𑀸𑀫𑀺𑀓𑀫𑁆𑀧𑀺 𑀅𑀲𑁆𑀲𑀸𑀫𑀺𑀓𑀫𑁆𑀧𑀺. 𑀲𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀁 𑀢𑁂 𑀥𑀦𑁂𑀦 𑀥𑀦𑀓𑀭𑀡𑀻𑀬𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀕𑀳𑀧𑀢𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑀁 𑀑𑀕𑀸𑀳𑀺𑀢𑁆𑀯𑀸 𑀕𑀳𑀧𑀢𑀺𑀭𑀢𑀦𑀁 𑀏𑀢𑀤𑀯𑁄𑀘 𑁋 ‘𑀅𑀢𑁆𑀣𑁄 𑀫𑁂, 𑀕𑀳𑀧𑀢𑀺, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’𑀢𑀺. ‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀏𑀓𑀁 𑀢𑀻𑀭𑀁 𑀦𑀸𑀯𑀸 𑀉𑀧𑁂𑀢𑀽’𑀢𑀺. ‘𑀇𑀥𑁂𑀯 𑀫𑁂, 𑀕𑀳𑀧𑀢𑀺, 𑀅𑀢𑁆𑀣𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’𑀢𑀺. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀕𑀳𑀧𑀢𑀺𑀭𑀢𑀦𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀉𑀤𑀓𑀁 𑀑𑀫𑀲𑀺𑀢𑁆𑀯𑀸 𑀧𑀽𑀭𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸 𑀫𑀳𑀸𑀭𑀸𑀚, 𑀓𑀢𑀫𑁂𑀢𑁆𑀢𑀸𑀯𑀢𑀸 𑀫𑀳𑀸𑀭𑀸𑀚, 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸 𑀫𑀳𑀸𑀭𑀸𑀚𑀸’𑀢𑀺? 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸 𑀕𑀳𑀧𑀢𑀺, 𑀓𑀢𑀫𑁂𑀢𑁆𑀢𑀸𑀯𑀢𑀸 𑀕𑀳𑀧𑀢𑀺, 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸 𑀕𑀳𑀧𑀢𑀻’𑀢𑀺. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀧𑀭𑀺𑀡𑀸𑀬𑀓𑀭𑀢𑀦𑀁

𑁨𑁫𑁧. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀬𑀸𑀧𑁂𑀢𑀩𑁆𑀩𑀁 𑀉𑀧𑀬𑀸𑀧𑁂𑀢𑀼𑀁, 𑀅𑀧𑀬𑀸𑀧𑁂𑀢𑀩𑁆𑀩𑀁 𑀅𑀧𑀬𑀸𑀧𑁂𑀢𑀼𑀁, 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀁. 𑀲𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀫𑀦𑀼𑀲𑀸𑀲𑀺𑀲𑁆𑀲𑀸𑀫𑀻’𑀢𑀺. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

‘‘𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

𑀘𑀢𑀼𑀇𑀤𑁆𑀥𑀺𑀲𑀫𑀦𑁆𑀦𑀸𑀕𑀢𑁄

𑁨𑁫𑁨. ‘‘𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺. 𑀓𑀢𑀫𑀸𑀳𑀺 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺? 𑀇𑀥𑀸𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀬 𑀧𑀞𑀫𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀤𑀻𑀖𑀸𑀬𑀼𑀓𑁄 𑀅𑀳𑁄𑀲𑀺 𑀘𑀺𑀭𑀝𑁆𑀞𑀺𑀢𑀺𑀓𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀬 𑀤𑀼𑀢𑀺𑀬𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀧𑁆𑀧𑀸𑀩𑀸𑀥𑁄 𑀅𑀳𑁄𑀲𑀺 𑀅𑀧𑁆𑀧𑀸𑀢𑀗𑁆𑀓𑁄 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀬 𑀢𑀢𑀺𑀬𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀺𑀢𑀸 𑀧𑀼𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀭𑀜𑁆𑀜𑁄𑀧𑀺, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀺𑀬𑀸 𑀅𑀳𑁂𑀲𑀼𑀁 𑀫𑀦𑀸𑀧𑀸. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀺𑀢𑀼 𑀧𑀼𑀢𑁆𑀢𑀸 𑀧𑀺𑀬𑀸 𑀳𑁄𑀦𑁆𑀢𑀺 𑀫𑀦𑀸𑀧𑀸, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄𑀧𑀺 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀺𑀬𑀸 𑀅𑀳𑁂𑀲𑀼𑀁 𑀫𑀦𑀸𑀧𑀸.

‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀢𑀭𑀫𑀸𑀦𑁄, 𑀤𑁂𑀯, 𑀬𑀸𑀳𑀺, 𑀬𑀣𑀸 𑀢𑀁 𑀫𑀬𑀁 𑀘𑀺𑀭𑀢𑀭𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀭𑀸𑀚𑀸𑀧𑀺, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀢𑀭𑀫𑀸𑀦𑁄, 𑀲𑀸𑀭𑀣𑀺, 𑀭𑀣𑀁 𑀧𑁂𑀲𑁂𑀳𑀺, 𑀬𑀣𑀸 𑀅𑀳𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀘𑀺𑀭𑀢𑀭𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀬 𑀘𑀢𑀼𑀢𑁆𑀣𑀺𑀬𑀸 [𑀘𑀢𑀼𑀢𑁆𑀣𑀸𑀬 (𑀲𑁆𑀬𑀸.)] 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀳𑀺 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

𑀥𑀫𑁆𑀫𑀧𑀸𑀲𑀸𑀤𑀧𑁄𑀓𑁆𑀔𑀭𑀡𑀻

𑁨𑁫𑁩. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀼 𑀢𑀸𑀮𑀦𑁆𑀢𑀭𑀺𑀓𑀸𑀲𑀼 𑀥𑀦𑀼𑀲𑀢𑁂 𑀥𑀦𑀼𑀲𑀢𑁂 𑀧𑁄𑀓𑁆𑀔𑀭𑀡𑀺𑀬𑁄 𑀫𑀸𑀧𑁂𑀬𑁆𑀬’𑀦𑁆𑀢𑀺.

‘‘𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀼 𑀢𑀸𑀮𑀦𑁆𑀢𑀭𑀺𑀓𑀸𑀲𑀼 𑀥𑀦𑀼𑀲𑀢𑁂 𑀥𑀦𑀼𑀲𑀢𑁂 𑀧𑁄𑀓𑁆𑀔𑀭𑀡𑀺𑀬𑁄. 𑀢𑀸 𑀔𑁄 𑀧𑀦𑀸𑀦𑀦𑁆𑀤, 𑀧𑁄𑀓𑁆𑀔𑀭𑀡𑀺𑀬𑁄 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀇𑀝𑁆𑀞𑀓𑀸𑀳𑀺 𑀘𑀺𑀢𑀸 𑀅𑀳𑁂𑀲𑀼𑀁 𑁋 𑀏𑀓𑀸 𑀇𑀝𑁆𑀞𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸.

‘‘𑀢𑀸𑀲𑀼 𑀔𑁄 𑀧𑀦𑀸𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻𑀲𑀼 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀲𑁄𑀧𑀸𑀦𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁, 𑀏𑀓𑀁 𑀲𑁄𑀧𑀸𑀦𑀁 𑀲𑁄𑀯𑀡𑁆𑀡𑀫𑀬𑀁 𑀏𑀓𑀁 𑀭𑀽𑀧𑀺𑀬𑀫𑀬𑀁 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀨𑀮𑀺𑀓𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀨𑀮𑀺𑀓𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀨𑀮𑀺𑀓𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀯𑁂𑀴𑀼𑀭𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀢𑀸 𑀔𑁄 𑀧𑀦𑀸𑀦𑀦𑁆𑀤, 𑀧𑁄𑀓𑁆𑀔𑀭𑀡𑀺𑀬𑁄 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁂𑀲𑀼𑀁 𑀏𑀓𑀸 𑀯𑁂𑀤𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸. 𑀲𑁄𑀯𑀡𑁆𑀡𑀫𑀬𑀸𑀬 𑀯𑁂𑀤𑀺𑀓𑀸𑀬 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀸𑀬 𑀯𑁂𑀤𑀺𑀓𑀸𑀬 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀼 𑀧𑁄𑀓𑁆𑀔𑀭𑀡𑀻𑀲𑀼 𑀏𑀯𑀭𑀽𑀧𑀁 𑀫𑀸𑀮𑀁 𑀭𑁄𑀧𑀸𑀧𑁂𑀬𑁆𑀬𑀁 𑀉𑀧𑁆𑀧𑀮𑀁 𑀧𑀤𑀼𑀫𑀁 𑀓𑀼𑀫𑀼𑀤𑀁 𑀧𑀼𑀡𑁆𑀟𑀭𑀻𑀓𑀁 𑀲𑀩𑁆𑀩𑁄𑀢𑀼𑀓𑀁 𑀲𑀩𑁆𑀩𑀚𑀦𑀲𑁆𑀲 𑀅𑀦𑀸𑀯𑀝’𑀦𑁆𑀢𑀺. 𑀭𑁄𑀧𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀼 𑀧𑁄𑀓𑁆𑀔𑀭𑀡𑀻𑀲𑀼 𑀏𑀯𑀭𑀽𑀧𑀁 𑀫𑀸𑀮𑀁 𑀉𑀧𑁆𑀧𑀮𑀁 𑀧𑀤𑀼𑀫𑀁 𑀓𑀼𑀫𑀼𑀤𑀁 𑀧𑀼𑀡𑁆𑀟𑀭𑀻𑀓𑀁 𑀲𑀩𑁆𑀩𑁄𑀢𑀼𑀓𑀁 𑀲𑀩𑁆𑀩𑀚𑀦𑀲𑁆𑀲 𑀅𑀦𑀸𑀯𑀝𑀁.

𑁨𑁫𑁪. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀦𑁆𑀳𑀸𑀧𑀓𑁂 𑀧𑀼𑀭𑀺𑀲𑁂 𑀞𑀧𑁂𑀬𑁆𑀬𑀁, 𑀬𑁂 𑀆𑀕𑀢𑀸𑀕𑀢𑀁 𑀚𑀦𑀁 𑀦𑁆𑀳𑀸𑀧𑁂𑀲𑁆𑀲𑀦𑁆𑀢𑀻’𑀢𑀺. 𑀞𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀦𑁆𑀳𑀸𑀧𑀓𑁂 𑀧𑀼𑀭𑀺𑀲𑁂, 𑀬𑁂 𑀆𑀕𑀢𑀸𑀕𑀢𑀁 𑀚𑀦𑀁 𑀦𑁆𑀳𑀸𑀧𑁂𑀲𑀼𑀁.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀏𑀯𑀭𑀽𑀧𑀁 𑀤𑀸𑀦𑀁 𑀧𑀝𑁆𑀞𑀧𑁂𑀬𑁆𑀬𑀁 𑁋 𑀅𑀦𑁆𑀦𑀁 𑀅𑀦𑁆𑀦𑀝𑁆𑀞𑀺𑀓𑀲𑁆𑀲 [𑀅𑀦𑁆𑀦𑀢𑁆𑀣𑀺𑀢𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀓𑀪𑀺𑀭𑀽𑀧𑁂𑀦𑁂𑀯 𑀤𑀺𑀲𑁆𑀲𑀢𑀺], 𑀧𑀸𑀦𑀁 𑀧𑀸𑀦𑀝𑁆𑀞𑀺𑀓𑀲𑁆𑀲, 𑀯𑀢𑁆𑀣𑀁 𑀯𑀢𑁆𑀣𑀝𑁆𑀞𑀺𑀓𑀲𑁆𑀲, 𑀬𑀸𑀦𑀁 𑀬𑀸𑀦𑀝𑁆𑀞𑀺𑀓𑀲𑁆𑀲, 𑀲𑀬𑀦𑀁 𑀲𑀬𑀦𑀝𑁆𑀞𑀺𑀓𑀲𑁆𑀲, 𑀇𑀢𑁆𑀣𑀺𑀁 𑀇𑀢𑁆𑀣𑀺𑀝𑁆𑀞𑀺𑀓𑀲𑁆𑀲, 𑀳𑀺𑀭𑀜𑁆𑀜𑀁 𑀳𑀺𑀭𑀜𑁆𑀜𑀝𑁆𑀞𑀺𑀓𑀲𑁆𑀲, 𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀝𑁆𑀞𑀺𑀓𑀲𑁆𑀲𑀸’𑀢𑀺. 𑀧𑀝𑁆𑀞𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀏𑀯𑀭𑀽𑀧𑀁 𑀤𑀸𑀦𑀁 𑁋 𑀅𑀦𑁆𑀦𑀁 𑀅𑀦𑁆𑀦𑀝𑁆𑀞𑀺𑀓𑀲𑁆𑀲, 𑀧𑀸𑀦𑀁 𑀧𑀸𑀦𑀝𑁆𑀞𑀺𑀓𑀲𑁆𑀲, 𑀯𑀢𑁆𑀣𑀁 𑀯𑀢𑁆𑀣𑀝𑁆𑀞𑀺𑀓𑀲𑁆𑀲, 𑀬𑀸𑀦𑀁 𑀬𑀸𑀦𑀝𑁆𑀞𑀺𑀓𑀲𑁆𑀲, 𑀲𑀬𑀦𑀁 𑀲𑀬𑀦𑀝𑁆𑀞𑀺𑀓𑀲𑁆𑀲, 𑀇𑀢𑁆𑀣𑀺𑀁 𑀇𑀢𑁆𑀣𑀺𑀝𑁆𑀞𑀺𑀓𑀲𑁆𑀲, 𑀳𑀺𑀭𑀜𑁆𑀜𑀁 𑀳𑀺𑀭𑀜𑁆𑀜𑀝𑁆𑀞𑀺𑀓𑀲𑁆𑀲, 𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀝𑁆𑀞𑀺𑀓𑀲𑁆𑀲.

𑁨𑁫𑁫. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀆𑀤𑀸𑀬 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀁, 𑀤𑁂𑀯, 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀤𑁂𑀯𑀜𑁆𑀜𑁂𑀯 𑀉𑀤𑁆𑀤𑀺𑀲𑁆𑀲 𑀆𑀪𑀢𑀁, 𑀢𑀁 𑀤𑁂𑀯𑁄 𑀧𑀝𑀺𑀕𑁆𑀕𑀡𑁆𑀳𑀢𑀽’𑀢𑀺. ‘𑀅𑀮𑀁 𑀪𑁄, 𑀫𑀫𑀧𑀺𑀤𑀁 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀥𑀫𑁆𑀫𑀺𑀓𑁂𑀦 𑀩𑀮𑀺𑀦𑀸 𑀅𑀪𑀺𑀲𑀗𑁆𑀔𑀢𑀁, 𑀢𑀜𑁆𑀘 𑀯𑁄 𑀳𑁄𑀢𑀼, 𑀇𑀢𑁄 𑀘 𑀪𑀺𑀬𑁆𑀬𑁄 𑀳𑀭𑀣𑀸’𑀢𑀺. 𑀢𑁂 𑀭𑀜𑁆𑀜𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘𑀦 𑀔𑁄 𑀏𑀢𑀁 𑀅𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁, 𑀬𑀁 𑀫𑀬𑀁 𑀇𑀫𑀸𑀦𑀺 𑀲𑀸𑀧𑀢𑁂𑀬𑁆𑀬𑀸𑀦𑀺 𑀧𑀼𑀦𑀤𑁂𑀯 𑀲𑀓𑀸𑀦𑀺 𑀖𑀭𑀸𑀦𑀺 𑀧𑀝𑀺𑀳𑀭𑁂𑀬𑁆𑀬𑀸𑀫. 𑀬𑀁𑀦𑀽𑀦 𑀫𑀬𑀁 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀦𑀺𑀯𑁂𑀲𑀦𑀁 𑀫𑀸𑀧𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀦𑀺𑀯𑁂𑀲𑀦𑀁 𑀢𑁂 𑀤𑁂𑀯, 𑀫𑀸𑀧𑁂𑀲𑁆𑀲𑀸𑀫𑀸’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁨𑁫𑁬. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀯𑀺𑀲𑁆𑀲𑀓𑀫𑁆𑀫𑀁 [𑀯𑀺𑀲𑀼𑀓𑀫𑁆𑀫𑀁 (𑀓.)] 𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀳𑀺 𑀢𑁆𑀯𑀁, 𑀲𑀫𑁆𑀫 𑀯𑀺𑀲𑁆𑀲𑀓𑀫𑁆𑀫, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀦𑀺𑀯𑁂𑀲𑀦𑀁 𑀫𑀸𑀧𑁂𑀳𑀺 𑀥𑀫𑁆𑀫𑀁 𑀦𑀸𑀫 𑀧𑀸𑀲𑀸𑀤’𑀦𑁆𑀢𑀺. ‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’𑀢𑀺 𑀔𑁄, 𑀆𑀦𑀦𑁆𑀤, 𑀯𑀺𑀲𑁆𑀲𑀓𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀅𑀦𑁆𑀢𑀭𑀳𑀺𑀢𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀯𑀺𑀲𑁆𑀲𑀓𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 𑁋 ‘𑀦𑀺𑀯𑁂𑀲𑀦𑀁 𑀢𑁂 𑀤𑁂𑀯, 𑀫𑀸𑀧𑁂𑀲𑁆𑀲𑀸𑀫𑀺 𑀥𑀫𑁆𑀫𑀁 𑀦𑀸𑀫 𑀧𑀸𑀲𑀸𑀤’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀼𑀡𑁆𑀳𑀻𑀪𑀸𑀯𑁂𑀦.

‘‘𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀯𑀺𑀲𑁆𑀲𑀓𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀦𑀺𑀯𑁂𑀲𑀦𑀁 𑀥𑀫𑁆𑀫𑀁 𑀦𑀸𑀫 𑀧𑀸𑀲𑀸𑀤𑀁. 𑀥𑀫𑁆𑀫𑁄, 𑀆𑀦𑀦𑁆𑀤, 𑀧𑀸𑀲𑀸𑀤𑁄 𑀧𑀼𑀭𑀢𑁆𑀣𑀺𑀫𑁂𑀦 𑀧𑀘𑁆𑀙𑀺𑀫𑁂𑀦 𑀘 𑀬𑁄𑀚𑀦𑀁 𑀆𑀬𑀸𑀫𑁂𑀦 𑀅𑀳𑁄𑀲𑀺. 𑀉𑀢𑁆𑀢𑀭𑁂𑀦 𑀤𑀓𑁆𑀔𑀺𑀡𑁂𑀦 𑀘 𑀅𑀟𑁆𑀠𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦. 𑀥𑀫𑁆𑀫𑀲𑁆𑀲, 𑀆𑀦𑀦𑁆𑀤, 𑀧𑀸𑀲𑀸𑀤𑀲𑁆𑀲 𑀢𑀺𑀧𑁄𑀭𑀺𑀲𑀁 𑀉𑀘𑁆𑀘𑀢𑀭𑁂𑀦 𑀯𑀢𑁆𑀣𑀼 𑀘𑀺𑀢𑀁 𑀅𑀳𑁄𑀲𑀺 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀇𑀝𑁆𑀞𑀓𑀸𑀳𑀺 𑁋 𑀏𑀓𑀸 𑀇𑀝𑁆𑀞𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸.

‘‘𑀥𑀫𑁆𑀫𑀲𑁆𑀲, 𑀆𑀦𑀦𑁆𑀤, 𑀧𑀸𑀲𑀸𑀤𑀲𑁆𑀲 𑀘𑀢𑀼𑀭𑀸𑀲𑀻𑀢𑀺 𑀣𑀫𑁆𑀪𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑁄 𑀣𑀫𑁆𑀪𑁄 𑀲𑁄𑀯𑀡𑁆𑀡𑀫𑀬𑁄, 𑀏𑀓𑁄 𑀭𑀽𑀧𑀺𑀬𑀫𑀬𑁄, 𑀏𑀓𑁄 𑀯𑁂𑀴𑀼𑀭𑀺𑀬𑀫𑀬𑁄, 𑀏𑀓𑁄 𑀨𑀮𑀺𑀓𑀫𑀬𑁄. 𑀥𑀫𑁆𑀫𑁄, 𑀆𑀦𑀦𑁆𑀤, 𑀧𑀸𑀲𑀸𑀤𑁄 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀨𑀮𑀓𑁂𑀳𑀺 𑀲𑀦𑁆𑀣𑀢𑁄 𑀅𑀳𑁄𑀲𑀺 𑁋 𑀏𑀓𑀁 𑀨𑀮𑀓𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁.

‘‘𑀥𑀫𑁆𑀫𑀲𑁆𑀲, 𑀆𑀦𑀦𑁆𑀤, 𑀧𑀸𑀲𑀸𑀤𑀲𑁆𑀲 𑀘𑀢𑀼𑀯𑀻𑀲𑀢𑀺 𑀲𑁄𑀧𑀸𑀦𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑀁 𑀲𑁄𑀧𑀸𑀦𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀨𑀮𑀺𑀓𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀨𑀮𑀺𑀓𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀨𑀮𑀺𑀓𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀯𑁂𑀴𑀼𑀭𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘.

‘‘𑀥𑀫𑁆𑀫𑁂, 𑀆𑀦𑀦𑁆𑀤, 𑀧𑀸𑀲𑀸𑀤𑁂 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑀁 𑀓𑀽𑀝𑀸𑀕𑀸𑀭𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑁂 𑀓𑀽𑀝𑀸𑀕𑀸𑀭𑁂 𑀭𑀽𑀧𑀺𑀬𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺, 𑀭𑀽𑀧𑀺𑀬𑀫𑀬𑁂 𑀓𑀽𑀝𑀸𑀕𑀸𑀭𑁂 𑀲𑁄𑀯𑀡𑁆𑀡𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺, 𑀯𑁂𑀴𑀼𑀭𑀺𑀬𑀫𑀬𑁂 𑀓𑀽𑀝𑀸𑀕𑀸𑀭𑁂 𑀤𑀦𑁆𑀢𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺, 𑀨𑀮𑀺𑀓𑀫𑀬𑁂 𑀓𑀽𑀝𑀸𑀕𑀸𑀭𑁂 𑀲𑀸𑀭𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀭𑀽𑀧𑀺𑀬𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀭𑀽𑀧𑀺𑀬𑀫𑀬𑁄 𑀔𑀦𑁆𑀥𑁄 𑀲𑁄𑀯𑀡𑁆𑀡𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀲𑁄𑀯𑀡𑁆𑀡𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀲𑁄𑀯𑀡𑁆𑀡𑀫𑀬𑁄 𑀔𑀦𑁆𑀥𑁄, 𑀭𑀽𑀧𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀨𑀮𑀺𑀓𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀨𑀮𑀺𑀓𑀫𑀬𑁄 𑀔𑀦𑁆𑀥𑁄, 𑀯𑁂𑀴𑀼𑀭𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀨𑀮𑀺𑀓𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀯𑁂𑀴𑀼𑀭𑀺𑀬𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑁄 𑀔𑀦𑁆𑀥𑁄, 𑀨𑀮𑀺𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘.

𑁨𑁫𑁭. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀁 𑀢𑀸𑀮𑀯𑀦𑀁 𑀫𑀸𑀧𑁂𑀬𑁆𑀬𑀁, 𑀬𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’𑀢𑀺. 𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀁 𑀢𑀸𑀮𑀯𑀦𑀁, 𑀬𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀥𑀫𑁆𑀫𑁄, 𑀆𑀦𑀦𑁆𑀤, 𑀧𑀸𑀲𑀸𑀤𑁄 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀅𑀳𑁄𑀲𑀺, 𑀏𑀓𑀸 𑀯𑁂𑀤𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸. 𑀲𑁄𑀯𑀡𑁆𑀡𑀫𑀬𑀸𑀬 𑀯𑁂𑀤𑀺𑀓𑀸𑀬 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀸𑀬 𑀯𑁂𑀤𑀺𑀓𑀸𑀬 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘.

𑁨𑁫𑁮. ‘‘𑀥𑀫𑁆𑀫𑁄, 𑀆𑀦𑀦𑁆𑀤, 𑀧𑀸𑀲𑀸𑀤𑁄 𑀤𑁆𑀯𑀻𑀳𑀺 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑁂𑀳𑀺 [𑀓𑀺𑀗𑁆𑀓𑀡𑀺𑀓𑀚𑀸𑀮𑁂𑀳𑀺 (𑀲𑁆𑀬𑀸. 𑀓.)] 𑀧𑀭𑀺𑀓𑁆𑀔𑀺𑀢𑁆𑀢𑁄 𑀅𑀳𑁄𑀲𑀺 𑁋 𑀏𑀓𑀁 𑀚𑀸𑀮𑀁 𑀲𑁄𑀯𑀡𑁆𑀡𑀫𑀬𑀁 𑀏𑀓𑀁 𑀭𑀽𑀧𑀺𑀬𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀚𑀸𑀮𑀲𑁆𑀲 𑀭𑀽𑀧𑀺𑀬𑀫𑀬𑀸 𑀓𑀺𑀗𑁆𑀓𑀺𑀡𑀺𑀓𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀲𑁆𑀲 𑀚𑀸𑀮𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 𑀓𑀺𑀗𑁆𑀓𑀺𑀡𑀺𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀢𑀽𑀭𑀺𑀬𑀲𑁆𑀲 𑀲𑀼𑀯𑀺𑀦𑀻𑀢𑀲𑁆𑀲 𑀲𑀼𑀧𑁆𑀧𑀝𑀺𑀢𑀸𑀴𑀺𑀢𑀲𑁆𑀲 𑀲𑀼𑀓𑀼𑀲𑀮𑁂𑀳𑀺 [𑀓𑀼𑀲𑀮𑁂𑀳𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀦𑁆𑀦𑀸𑀳𑀢𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺, 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀢𑁂𑀲𑀁 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀢𑁂𑀦 𑀲𑀫𑀬𑁂𑀦 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀥𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑁄𑀡𑁆𑀟𑀸 𑀧𑀺𑀧𑀸𑀲𑀸, 𑀢𑁂 𑀢𑁂𑀲𑀁 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁂𑀦 𑀧𑀭𑀺𑀘𑀸𑀭𑁂𑀲𑀼𑀁. 𑀦𑀺𑀝𑁆𑀞𑀺𑀢𑁄 𑀔𑁄 𑀧𑀦𑀸𑀦𑀦𑁆𑀤, 𑀥𑀫𑁆𑀫𑁄 𑀧𑀸𑀲𑀸𑀤𑁄 𑀤𑀼𑀤𑁆𑀤𑀺𑀓𑁆𑀔𑁄 𑀅𑀳𑁄𑀲𑀺 𑀫𑀼𑀲𑀢𑀺 𑀘𑀓𑁆𑀔𑀽𑀦𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀭𑀤𑀲𑀫𑀬𑁂 𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂 𑀆𑀤𑀺𑀘𑁆𑀘𑁄 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄 [𑀅𑀩𑁆𑀪𑀼𑀕𑁆𑀕𑀫𑀫𑀸𑀦𑁄 (𑀲𑀻. 𑀧𑀻. 𑀓.)] 𑀤𑀼𑀤𑁆𑀤𑀺𑀓𑁆𑀔𑁄 [𑀤𑀼𑀤𑀺𑀓𑁆𑀔𑁄 (𑀧𑀻.)] 𑀳𑁄𑀢𑀺 𑀫𑀼𑀲𑀢𑀺 𑀘𑀓𑁆𑀔𑀽𑀦𑀺; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀥𑀫𑁆𑀫𑁄 𑀧𑀸𑀲𑀸𑀤𑁄 𑀤𑀼𑀤𑁆𑀤𑀺𑀓𑁆𑀔𑁄 𑀅𑀳𑁄𑀲𑀺 𑀫𑀼𑀲𑀢𑀺 𑀘𑀓𑁆𑀔𑀽𑀦𑀺.

𑁨𑁫𑁯. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀲𑁆𑀲 𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁄 𑀥𑀫𑁆𑀫𑀁 𑀦𑀸𑀫 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀬𑁆𑀬’𑀦𑁆𑀢𑀺. 𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀥𑀫𑁆𑀫𑀲𑁆𑀲 𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁄 𑀥𑀫𑁆𑀫𑀁 𑀦𑀸𑀫 𑀧𑁄𑀓𑁆𑀔𑀭𑀡𑀺𑀁. 𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀧𑀼𑀭𑀢𑁆𑀣𑀺𑀫𑁂𑀦 𑀧𑀘𑁆𑀙𑀺𑀫𑁂𑀦 𑀘 𑀬𑁄𑀚𑀦𑀁 𑀆𑀬𑀸𑀫𑁂𑀦 𑀅𑀳𑁄𑀲𑀺, 𑀉𑀢𑁆𑀢𑀭𑁂𑀦 𑀤𑀓𑁆𑀔𑀺𑀡𑁂𑀦 𑀘 𑀅𑀟𑁆𑀠𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦. 𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀇𑀝𑁆𑀞𑀓𑀸𑀳𑀺 𑀘𑀺𑀢𑀸 𑀅𑀳𑁄𑀲𑀺 𑁋 𑀏𑀓𑀸 𑀇𑀝𑁆𑀞𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸.

‘‘𑀥𑀫𑁆𑀫𑀸𑀬, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀺𑀬𑀸 𑀘𑀢𑀼𑀯𑀻𑀲𑀢𑀺 𑀲𑁄𑀧𑀸𑀦𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑀁 𑀲𑁄𑀧𑀸𑀦𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀨𑀮𑀺𑀓𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀨𑀮𑀺𑀓𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀨𑀮𑀺𑀓𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀯𑁂𑀴𑀼𑀭𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘.

‘‘𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺 𑁋 𑀏𑀓𑀸 𑀯𑁂𑀤𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸. 𑀲𑁄𑀯𑀡𑁆𑀡𑀫𑀬𑀸𑀬 𑀯𑁂𑀤𑀺𑀓𑀸𑀬 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀸𑀬 𑀯𑁂𑀤𑀺𑀓𑀸𑀬 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘.

‘‘𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀲𑀢𑁆𑀢𑀳𑀺 𑀢𑀸𑀮𑀧𑀦𑁆𑀢𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺 𑁋 𑀏𑀓𑀸 𑀢𑀸𑀮𑀧𑀦𑁆𑀢𑀺 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸, 𑀏𑀓𑀸 𑀮𑁄𑀳𑀺𑀢𑀗𑁆𑀓𑀫𑀬𑀸, 𑀏𑀓𑀸 𑀫𑀲𑀸𑀭𑀕𑀮𑁆𑀮𑀫𑀬𑀸, 𑀏𑀓𑀸 𑀲𑀩𑁆𑀩𑀭𑀢𑀦𑀫𑀬𑀸. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑁄𑀯𑀡𑁆𑀡𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀭𑀽𑀧𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀭𑀽𑀧𑀺𑀬𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀨𑀮𑀺𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀨𑀮𑀺𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀨𑀮𑀺𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀯𑁂𑀴𑀼𑀭𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀮𑁄𑀳𑀺𑀢𑀗𑁆𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀮𑁄𑀳𑀺𑀢𑀗𑁆𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀫𑀲𑀸𑀭𑀕𑀮𑁆𑀮𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀫𑀲𑀸𑀭𑀕𑀮𑁆𑀮𑀫𑀬𑀲𑁆𑀲 𑀢𑀸𑀮𑀲𑁆𑀲 𑀫𑀲𑀸𑀭𑀕𑀮𑁆𑀮𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀮𑁄𑀳𑀺𑀢𑀗𑁆𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀲𑀩𑁆𑀩𑀭𑀢𑀦𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑀩𑁆𑀩𑀭𑀢𑀦𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀲𑀩𑁆𑀩𑀭𑀢𑀦𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀢𑀸𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺, 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀢𑀽𑀭𑀺𑀬𑀲𑁆𑀲 𑀲𑀼𑀯𑀺𑀦𑀻𑀢𑀲𑁆𑀲 𑀲𑀼𑀧𑁆𑀧𑀝𑀺𑀢𑀸𑀴𑀺𑀢𑀲𑁆𑀲 𑀲𑀼𑀓𑀼𑀲𑀮𑁂𑀳𑀺 𑀲𑀫𑀦𑁆𑀦𑀸𑀳𑀢𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀢𑁂𑀦 𑀲𑀫𑀬𑁂𑀦 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀥𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑁄𑀡𑁆𑀟𑀸 𑀧𑀺𑀧𑀸𑀲𑀸, 𑀢𑁂 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁂𑀦 𑀧𑀭𑀺𑀘𑀸𑀭𑁂𑀲𑀼𑀁.

‘‘𑀦𑀺𑀝𑁆𑀞𑀺𑀢𑁂 𑀔𑁄 𑀧𑀦𑀸𑀦𑀦𑁆𑀤, 𑀥𑀫𑁆𑀫𑁂 𑀧𑀸𑀲𑀸𑀤𑁂 𑀦𑀺𑀝𑁆𑀞𑀺𑀢𑀸𑀬 𑀥𑀫𑁆𑀫𑀸𑀬 𑀘 𑀧𑁄𑀓𑁆𑀔𑀭𑀡𑀺𑀬𑀸 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 ‘𑀬𑁂 [𑀬𑁂 𑀓𑁄 𑀧𑀦𑀸𑀦𑀦𑁆𑀤 (𑀲𑁆𑀬𑀸. 𑀓.)] 𑀢𑁂𑀦 𑀲𑀫𑀬𑁂𑀦 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸’, 𑀢𑁂 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀥𑀫𑁆𑀫𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺.

𑀧𑀞𑀫𑀪𑀸𑀡𑀯𑀸𑀭𑁄.

𑀛𑀸𑀦𑀲𑀫𑁆𑀧𑀢𑁆𑀢𑀺

𑁨𑁬𑁦. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀲𑁆𑀲 𑀦𑀼 𑀔𑁄 𑀫𑁂 𑀇𑀤𑀁 𑀓𑀫𑁆𑀫𑀲𑁆𑀲 𑀨𑀮𑀁 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀏𑀢𑀭𑀳𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’𑀢𑀺? 𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀢𑀺𑀡𑁆𑀡𑀁 𑀔𑁄 𑀫𑁂 𑀇𑀤𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀢𑀺𑀡𑁆𑀡𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀏𑀢𑀭𑀳𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄, 𑀲𑁂𑀬𑁆𑀬𑀣𑀺𑀤𑀁 𑀤𑀸𑀦𑀲𑁆𑀲 𑀤𑀫𑀲𑁆𑀲 𑀲𑀁𑀬𑀫𑀲𑁆𑀲𑀸’𑀢𑀺.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀬𑁂𑀦 𑀫𑀳𑀸𑀯𑀺𑀬𑀽𑀳𑀁 𑀓𑀽𑀝𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀞𑀺𑀢𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀢𑀺𑀝𑁆𑀞, 𑀓𑀸𑀫𑀯𑀺𑀢𑀓𑁆𑀓, 𑀢𑀺𑀝𑁆𑀞, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓, 𑀢𑀺𑀝𑁆𑀞, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓. 𑀏𑀢𑁆𑀢𑀸𑀯𑀢𑀸 𑀓𑀸𑀫𑀯𑀺𑀢𑀓𑁆𑀓, 𑀏𑀢𑁆𑀢𑀸𑀯𑀢𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓, 𑀏𑀢𑁆𑀢𑀸𑀯𑀢𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸’𑀢𑀺.

𑁨𑁬𑁧. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀺𑀬𑀽𑀳𑀁 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑁄𑀯𑀡𑁆𑀡𑀫𑀬𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺.

𑁨𑁬𑁨. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀯𑀡𑁆𑀡𑀫𑀬𑀁 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀽𑀧𑀺𑀬𑀫𑀬𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺. 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺.

𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀤𑀺

𑁨𑁬𑁩. ‘‘𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑀼𑀪𑀤𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀤𑀼𑀳𑀲𑀦𑁆𑀤𑀦𑀸𑀦𑀺 [𑀤𑀼𑀓𑀽𑀮𑀲𑀦𑁆𑀤𑀦𑀸𑀦𑀺(𑀧𑀻.)] 𑀤𑀼𑀓𑀽𑀮𑀲𑀦𑁆𑀤𑀸𑀦𑀸𑀦𑀺 [𑀤𑀼𑀓𑀽𑀮𑀲𑀦𑁆𑀤𑀦𑀸𑀦𑀺 (𑀧𑀻.) 𑀤𑀼𑀓𑀽𑀮𑀲𑀦𑁆𑀤𑀸𑀦𑀸𑀦𑀺 (𑀲𑀁. 𑀦𑀺. 𑁩.𑁯𑁬)] 𑀓𑀁𑀲𑀽𑀧𑀥𑀸𑀭𑀡𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁; (𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲) [( ) 𑀲𑀻. 𑀇𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀺𑀢𑁆𑀣.

𑁨𑁬𑁪. ‘‘𑀢𑁂𑀦 𑀔𑁄 𑀧𑀦𑀸𑀦𑀦𑁆𑀤, 𑀲𑀫𑀬𑁂𑀦 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀇𑀫𑀸𑀦𑀺 𑀔𑁄 𑀫𑁂 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀬𑀁𑀦𑀽𑀦 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀓𑀺𑀁 𑀲𑀓𑀺𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀼’𑀦𑁆𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀧𑀭𑀺𑀡𑀸𑀬𑀓𑀭𑀢𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘𑀇𑀫𑀸𑀦𑀺 𑀔𑁄 𑀫𑁂, 𑀲𑀫𑁆𑀫 𑀧𑀭𑀺𑀡𑀸𑀬𑀓𑀭𑀢𑀦, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀦 𑀳𑀺, 𑀲𑀫𑁆𑀫 𑀧𑀭𑀺𑀡𑀸𑀬𑀓𑀭𑀢𑀦, 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀓𑀺𑀁 𑀲𑀓𑀺𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀽’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀆𑀦𑀦𑁆𑀤, 𑀧𑀭𑀺𑀡𑀸𑀬𑀓𑀭𑀢𑀦𑀁 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀓𑀺𑀁 𑀲𑀓𑀺𑀁 𑀉𑀧𑀝𑁆𑀞𑀸𑀦𑀁 𑀆𑀕𑀫𑀁𑀲𑀼.

𑀲𑀼𑀪𑀤𑁆𑀤𑀸𑀤𑁂𑀯𑀺𑀉𑀧𑀲𑀗𑁆𑀓𑀫𑀦𑀁

𑁨𑁬𑁫. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀩𑀳𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀩𑀳𑀼𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀩𑀳𑀼𑀦𑁆𑀦𑀁 𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀏𑀢𑀤𑀳𑁄𑀲𑀺 𑁋 ‘𑀘𑀺𑀭𑀁 𑀤𑀺𑀝𑁆𑀞𑁄 𑀔𑁄 𑀫𑁂 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄. 𑀬𑀁𑀦𑀽𑀦𑀸𑀳𑀁 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀇𑀢𑁆𑀣𑀸𑀕𑀸𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀣 𑀢𑀼𑀫𑁆𑀳𑁂 𑀲𑀻𑀲𑀸𑀦𑀺 𑀦𑁆𑀳𑀸𑀬𑀣 𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀸𑀭𑀼𑀧𑀣. 𑀘𑀺𑀭𑀁 𑀤𑀺𑀝𑁆𑀞𑁄 𑀦𑁄 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄, 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’𑀢𑀺. ‘𑀏𑀯𑀁, 𑀅𑀬𑁆𑀬𑁂’𑀢𑀺 𑀔𑁄, 𑀆𑀦𑀦𑁆𑀤, 𑀇𑀢𑁆𑀣𑀸𑀕𑀸𑀭𑀁 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀻𑀲𑀸𑀦𑀺 𑀦𑁆𑀳𑀸𑀬𑀺𑀢𑁆𑀯𑀸 𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀸𑀭𑀼𑀧𑀺𑀢𑁆𑀯𑀸 𑀬𑁂𑀦 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀧𑀭𑀺𑀡𑀸𑀬𑀓𑀭𑀢𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘𑀓𑀧𑁆𑀧𑁂𑀳𑀺, 𑀲𑀫𑁆𑀫 𑀧𑀭𑀺𑀡𑀸𑀬𑀓𑀭𑀢𑀦, 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁, 𑀘𑀺𑀭𑀁 𑀤𑀺𑀝𑁆𑀞𑁄 𑀦𑁄 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄, 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’𑀢𑀺. ‘𑀏𑀯𑀁, 𑀤𑁂𑀯𑀻’𑀢𑀺 𑀔𑁄, 𑀆𑀦𑀦𑁆𑀤, 𑀧𑀭𑀺𑀡𑀸𑀬𑀓𑀭𑀢𑀦𑀁 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀧𑀝𑀺𑀲𑁆𑀲𑀼𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀓𑀧𑁆𑀧𑀸𑀧𑁂𑀢𑁆𑀯𑀸 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀧𑀝𑀺𑀯𑁂𑀤𑁂𑀲𑀺 𑁋 ‘𑀓𑀧𑁆𑀧𑀺𑀢𑀸 𑀔𑁄, 𑀤𑁂𑀯𑀺, 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀤𑁆𑀥𑀺𑀁 𑀇𑀢𑁆𑀣𑀸𑀕𑀸𑀭𑁂𑀦 𑀬𑁂𑀦 𑀥𑀫𑁆𑀫𑁄 𑀧𑀸𑀲𑀸𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑁂𑀦 𑀫𑀳𑀸𑀯𑀺𑀬𑀽𑀳𑀁 𑀓𑀽𑀝𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑀩𑀸𑀳𑀁 𑀆𑀮𑀫𑁆𑀩𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 𑁋 ‘𑀓𑀺𑀁 𑀦𑀼 𑀔𑁄 𑀫𑀳𑀢𑁄 𑀯𑀺𑀬 𑀚𑀦𑀓𑀸𑀬𑀲𑁆𑀲 𑀲𑀤𑁆𑀤𑁄’𑀢𑀺 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑁄 𑀅𑀤𑁆𑀤𑀲 𑀲𑀼𑀪𑀤𑁆𑀤𑀁 𑀤𑁂𑀯𑀺𑀁 𑀤𑁆𑀯𑀸𑀭𑀩𑀸𑀳𑀁 𑀆𑀮𑀫𑁆𑀩𑀺𑀢𑁆𑀯𑀸 𑀞𑀺𑀢𑀁, 𑀤𑀺𑀲𑁆𑀯𑀸𑀦 𑀲𑀼𑀪𑀤𑁆𑀤𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘 𑁋 ‘𑀏𑀢𑁆𑀣𑁂𑀯, 𑀤𑁂𑀯𑀺, 𑀢𑀺𑀝𑁆𑀞 𑀫𑀸 𑀧𑀸𑀯𑀺𑀲𑀻’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀲𑁄𑀯𑀡𑁆𑀡𑀫𑀬𑀁 𑀧𑀮𑁆𑀮𑀗𑁆𑀓𑀁 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑁂 𑀢𑀸𑀮𑀯𑀦𑁂 𑀧𑀜𑁆𑀜𑀧𑁂𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀆𑀦𑀦𑁆𑀤, 𑀲𑁄 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀲𑁄𑀯𑀡𑁆𑀡𑀫𑀬𑀁 𑀧𑀮𑁆𑀮𑀗𑁆𑀓𑀁 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑁂 𑀢𑀸𑀮𑀯𑀦𑁂 𑀧𑀜𑁆𑀜𑀧𑁂𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑁨𑁬𑁬. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄, 𑀫𑀸 𑀳𑁂𑀯 𑀔𑁄 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀓𑀸𑀮𑀫𑀓𑀸𑀲𑀻’𑀢𑀺 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 𑁋

‘𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀇𑀢𑁆𑀣𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 𑀓𑀁𑀲𑀽𑀧𑀥𑀸𑀭𑀡𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀢𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀻’𑀢𑀺.

𑁨𑁬𑁭. ‘‘𑀏𑀯𑀁 𑀯𑀼𑀢𑁆𑀢𑁂, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀼𑀪𑀤𑁆𑀤𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘 𑁋

‘𑀤𑀻𑀖𑀭𑀢𑁆𑀢𑀁 𑀔𑁄 𑀫𑀁 𑀢𑁆𑀯𑀁, 𑀤𑁂𑀯𑀺, 𑀇𑀝𑁆𑀞𑁂𑀳𑀺 𑀓𑀦𑁆𑀢𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀲𑀫𑀼𑀤𑀸𑀘𑀭𑀺𑀢𑁆𑀣; 𑀅𑀣 𑀘 𑀧𑀦 𑀫𑀁 𑀢𑁆𑀯𑀁 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀅𑀦𑀺𑀝𑁆𑀞𑁂𑀳𑀺 𑀅𑀓𑀦𑁆𑀢𑁂𑀳𑀺 𑀅𑀧𑁆𑀧𑀺𑀬𑁂𑀳𑀺 𑀅𑀫𑀦𑀸𑀧𑁂𑀳𑀺 𑀲𑀫𑀼𑀤𑀸𑀘𑀭𑀲𑀻’𑀢𑀺. ‘𑀓𑀣𑀁 𑀘𑀭𑀳𑀺 𑀢𑀁, 𑀤𑁂𑀯, 𑀲𑀫𑀼𑀤𑀸𑀘𑀭𑀸𑀫𑀻’𑀢𑀺? ‘𑀏𑀯𑀁 𑀔𑁄 𑀫𑀁 𑀢𑁆𑀯𑀁, 𑀤𑁂𑀯𑀺, 𑀲𑀫𑀼𑀤𑀸𑀘𑀭 𑁋 ‘‘𑀲𑀩𑁆𑀩𑁂𑀳𑁂𑀯, 𑀤𑁂𑀯, 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄, 𑀫𑀸 𑀔𑁄 𑀢𑁆𑀯𑀁, 𑀤𑁂𑀯, 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺, 𑀤𑀼𑀓𑁆𑀔𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀕𑀭𑀳𑀺𑀢𑀸 𑀘 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀼𑀪𑀤𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 𑀓𑀁𑀲𑀽𑀧𑀥𑀸𑀭𑀡𑀸𑀦𑀺. 𑀏𑀢𑁆𑀣 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀢𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀻’’’𑀢𑀺.

𑁨𑁬𑁮. ‘‘𑀏𑀯𑀁 𑀯𑀼𑀢𑁆𑀢𑁂, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀧𑀭𑁄𑀤𑀺 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑁂𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀅𑀲𑁆𑀲𑀽𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 [𑀧𑀫𑀚𑁆𑀚𑀺𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.), 𑀧𑀼𑀜𑁆𑀚𑀺𑀢𑁆𑀯𑀸 (𑀓.)] 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 𑁋

‘𑀲𑀩𑁆𑀩𑁂𑀳𑁂𑀯, 𑀤𑁂𑀯, 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄, 𑀫𑀸 𑀔𑁄 𑀢𑁆𑀯𑀁, 𑀤𑁂𑀯, 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺, 𑀤𑀼𑀓𑁆𑀔𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀕𑀭𑀳𑀺𑀢𑀸 𑀘 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀇𑀢𑁆𑀣𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 𑀓𑀁𑀲𑀽𑀧𑀥𑀸𑀭𑀡𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀢𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀻’𑀢𑀺.

𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀁

𑁨𑁬𑁯. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀫𑀓𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀫𑀦𑀼𑀜𑁆𑀜𑀁 𑀪𑁄𑀚𑀦𑀁 𑀪𑀼𑀢𑁆𑀢𑀸𑀯𑀺𑀲𑁆𑀲 𑀪𑀢𑁆𑀢𑀲𑀫𑁆𑀫𑀤𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀫𑀸𑀭𑀡𑀦𑁆𑀢𑀺𑀓𑀸 𑀯𑁂𑀤𑀦𑀸 𑀅𑀳𑁄𑀲𑀺. 𑀓𑀸𑀮𑀗𑁆𑀓𑀢𑁄 𑀘, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀼𑀕𑀢𑀺𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀼𑀫𑀸𑀭𑀓𑀻𑀴𑀁 [𑀓𑀻𑀴𑀺𑀢𑀁 (𑀓.), 𑀓𑀻𑀴𑀺𑀓𑀁 (𑀲𑀻. 𑀧𑀻.)] 𑀓𑀻𑀴𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀑𑀧𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀺𑀳𑀺𑀪𑀽𑀢𑁄 [𑀕𑀺𑀳𑀻𑀪𑀽𑀢𑁄 (𑀲𑀻. 𑀧𑀻.)] 𑀥𑀫𑁆𑀫𑁂 𑀧𑀸𑀲𑀸𑀤𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺 [𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺 (𑀓.)]. 𑀲𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑁨𑁭𑁦. ‘‘𑀲𑀺𑀬𑀸 𑀔𑁄 𑀧𑀦𑀸𑀦𑀦𑁆𑀤, 𑀏𑀯𑀫𑀲𑁆𑀲 𑁋 ‘𑀅𑀜𑁆𑀜𑁄 𑀦𑀽𑀦 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀳𑁄𑀲𑀻’𑀢𑀺, 𑀦 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀳𑁄𑀲𑀺𑀁. 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀼𑀪𑀤𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 𑀓𑀁𑀲𑀽𑀧𑀥𑀸𑀭𑀡𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀺𑀢𑁆𑀣.

𑁨𑁭𑁧. ‘‘𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑀸𑀦𑀁 𑀏𑀓𑀜𑁆𑀜𑁂𑀯 𑀢𑀁 𑀦𑀕𑀭𑀁 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀚𑁆𑀛𑀸𑀯𑀲𑀸𑀫𑀺 𑀬𑀤𑀺𑀤𑀁 𑀓𑀼𑀲𑀸𑀯𑀢𑀻 𑀭𑀸𑀚𑀥𑀸𑀦𑀻. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀧𑀸𑀲𑀸𑀤𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀚𑁆𑀛𑀸𑀯𑀲𑀸𑀫𑀺 𑀬𑀤𑀺𑀤𑀁 𑀥𑀫𑁆𑀫𑁄 𑀧𑀸𑀲𑀸𑀤𑁄. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀁 𑀏𑀓𑀜𑁆𑀜𑁂𑀯 𑀢𑀁 𑀓𑀽𑀝𑀸𑀕𑀸𑀭𑀁 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀚𑁆𑀛𑀸𑀯𑀲𑀸𑀫𑀺 𑀬𑀤𑀺𑀤𑀁 𑀫𑀳𑀸𑀯𑀺𑀬𑀽𑀳𑀁 𑀓𑀽𑀝𑀸𑀕𑀸𑀭𑀁. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀧𑀮𑁆𑀮𑀗𑁆𑀓𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀧𑀭𑀺𑀪𑀼𑀜𑁆𑀚𑀸𑀫𑀺 𑀬𑀤𑀺𑀤𑀁 𑀲𑁄𑀯𑀡𑁆𑀡𑀫𑀬𑁄 𑀯𑀸 𑀭𑀽𑀧𑀺𑀬𑀫𑀬𑁄 𑀯𑀸 𑀤𑀦𑁆𑀢𑀫𑀬𑁄 𑀯𑀸 𑀲𑀸𑀭𑀫𑀬𑁄 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀦𑀸𑀕𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀦𑀸𑀕𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀪𑀺𑀭𑀼𑀳𑀸𑀫𑀺 𑀬𑀤𑀺𑀤𑀁 𑀉𑀧𑁄𑀲𑀣𑁄 𑀦𑀸𑀕𑀭𑀸𑀚𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀅𑀲𑁆𑀲𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀅𑀲𑁆𑀲𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀪𑀺𑀭𑀼𑀳𑀸𑀫𑀺 𑀬𑀤𑀺𑀤𑀁 𑀯𑀮𑀸𑀳𑀓𑁄 𑀅𑀲𑁆𑀲𑀭𑀸𑀚𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀭𑀣𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀭𑀣𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀪𑀺𑀭𑀼𑀳𑀸𑀫𑀺 𑀬𑀤𑀺𑀤𑀁 𑀯𑁂𑀚𑀬𑀦𑁆𑀢𑀭𑀣𑁄. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀏𑀓𑀸𑀬𑁂𑀯 𑀲𑀸 𑀇𑀢𑁆𑀣𑀻 𑀳𑁄𑀢𑀺, 𑀬𑀸 𑀢𑁂𑀦 𑀲𑀫𑀬𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺 𑀔𑀢𑁆𑀢𑀺𑀬𑀸𑀦𑀻 𑀯𑀸 𑀯𑁂𑀲𑁆𑀲𑀺𑀦𑀻 [𑀯𑁂𑀲𑁆𑀲𑀸𑀬𑀺𑀦𑀻 (𑀲𑁆𑀬𑀸.), 𑀯𑁂𑀮𑀸𑀫𑀺𑀓𑀸𑀦𑀻 (𑀓. 𑀲𑀻. 𑀧𑀻.) 𑀯𑁂𑀮𑀸𑀫𑀺𑀓𑀸 (𑀲𑀁. 𑀦𑀺. 𑁩.𑁯𑁬)] 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀏𑀓𑀁𑀬𑁂𑀯 𑀢𑀁 𑀤𑀼𑀲𑁆𑀲𑀬𑀼𑀕𑀁 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀧𑀭𑀺𑀤𑀳𑀸𑀫𑀺 𑀔𑁄𑀫𑀲𑀼𑀔𑀼𑀫𑀁 𑀯𑀸 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀁 𑀯𑀸 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀁 𑀯𑀸 𑀓𑀫𑁆𑀩𑀮𑀲𑀼𑀔𑀼𑀫𑀁 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀣𑀸𑀮𑀺𑀧𑀸𑀓𑁄 𑀳𑁄𑀢𑀺, 𑀬𑀢𑁄 𑀦𑀸𑀴𑀺𑀓𑁄𑀤𑀦𑀧𑀭𑀫𑀁 𑀪𑀼𑀜𑁆𑀚𑀸𑀫𑀺 𑀢𑀤𑀼𑀧𑀺𑀬𑀜𑁆𑀘 𑀲𑀽𑀧𑁂𑀬𑁆𑀬𑀁.

𑁨𑁭𑁨. ‘‘𑀧𑀲𑁆𑀲𑀸𑀦𑀦𑁆𑀤, 𑀲𑀩𑁆𑀩𑁂𑀢𑁂 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸 𑀦𑀺𑀭𑀼𑀤𑁆𑀥𑀸 𑀯𑀺𑀧𑀭𑀺𑀡𑀢𑀸. 𑀏𑀯𑀁 𑀅𑀦𑀺𑀘𑁆𑀘𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀤𑁆𑀥𑀼𑀯𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀦𑀲𑁆𑀲𑀸𑀲𑀺𑀓𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸! 𑀬𑀸𑀯𑀜𑁆𑀘𑀺𑀤𑀁, 𑀆𑀦𑀦𑁆𑀤, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀙𑀓𑁆𑀔𑀢𑁆𑀢𑀼𑀁 𑀔𑁄 𑀧𑀦𑀸𑀳𑀁, 𑀆𑀦𑀦𑁆𑀤, 𑀅𑀪𑀺𑀚𑀸𑀦𑀸𑀫𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀲𑀭𑀻𑀭𑀁 𑀦𑀺𑀓𑁆𑀔𑀺𑀧𑀺𑀢𑀁, 𑀢𑀜𑁆𑀘 𑀔𑁄 𑀭𑀸𑀚𑀸𑀯 𑀲𑀫𑀸𑀦𑁄 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄, 𑀅𑀬𑀁 𑀲𑀢𑁆𑀢𑀫𑁄 𑀲𑀭𑀻𑀭𑀦𑀺𑀓𑁆𑀔𑁂𑀧𑁄. 𑀦 𑀔𑁄 𑀧𑀦𑀸𑀳𑀁, 𑀆𑀦𑀦𑁆𑀤, 𑀢𑀁 𑀧𑀤𑁂𑀲𑀁 𑀲𑀫𑀦𑀼𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑀢𑁆𑀣 𑀢𑀣𑀸𑀕𑀢𑁄 𑀅𑀝𑁆𑀞𑀫𑀁 𑀲𑀭𑀻𑀭𑀁 𑀦𑀺𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.