𑁩. 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁

𑁧𑁩𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 [𑀉𑀘𑁆𑀙𑁂𑀚𑁆𑀚𑀸𑀫𑀺 (𑀲𑁆𑀬𑀸. 𑀧𑀻.), 𑀉𑀘𑁆𑀙𑀺𑀚𑁆𑀚𑀸𑀫𑀺 (𑀓.)] 𑀯𑀚𑁆𑀚𑀻, 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀯𑀚𑁆𑀚𑀻, 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀺 𑀯𑀚𑁆𑀚𑀻’’𑀢𑀺 [𑀆𑀧𑀸𑀤𑁂𑀲𑁆𑀲𑀸𑀫𑀺 𑀯𑀚𑁆𑀚𑀻𑀢𑀺 (𑀲𑀩𑁆𑀩𑀢𑁆𑀣) 𑀅. 𑀦𑀺. 𑁭.𑁨𑁨 𑀧𑀲𑁆𑀲𑀺𑀢𑀩𑁆𑀩𑀁].

𑁧𑁩𑁨. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀫𑀕𑀥𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀭𑀸𑀚𑀸, 𑀪𑀦𑁆𑀢𑁂, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀭𑀸𑀚𑀸, 𑀪𑀦𑁆𑀢𑁂, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄. 𑀲𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 𑀯𑀚𑁆𑀚𑀻, 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀯𑀚𑁆𑀚𑀻, 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀻’’’𑀢𑀺. 𑀬𑀣𑀸 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺, 𑀢𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀫𑀫 𑀆𑀭𑁄𑀘𑁂𑀬𑁆𑀬𑀸𑀲𑀺. 𑀦 𑀳𑀺 𑀢𑀣𑀸𑀕𑀢𑀸 𑀯𑀺𑀢𑀣𑀁 𑀪𑀡𑀦𑁆𑀢𑀻’’𑀢𑀺.

𑀯𑀲𑁆𑀲𑀓𑀸𑀭𑀩𑁆𑀭𑀸𑀳𑁆𑀫𑀡𑁄

𑁧𑁩𑁩. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀭𑀸𑀚𑀕𑀳𑀫𑁆𑀳𑀸 𑀦𑀺𑀬𑁆𑀬𑀸𑀲𑀺, 𑀬𑁂𑀦 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀭𑀸𑀚𑀸, 𑀪𑁄 𑀕𑁄𑀢𑀫, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺. 𑀭𑀸𑀚𑀸 [𑀏𑀯𑀜𑁆𑀘 𑀯𑀤𑁂𑀢𑀺 𑀭𑀸𑀚𑀸 (𑀓.)], 𑀪𑁄 𑀕𑁄𑀢𑀫, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄. 𑀲𑁄 𑀏𑀯𑀫𑀸𑀳 𑁋 ‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 𑀯𑀚𑁆𑀚𑀻, 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀯𑀚𑁆𑀚𑀻, 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀻’’’𑀢𑀺.

𑀭𑀸𑀚𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀸

𑁧𑁩𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀞𑀺𑀢𑁄 𑀳𑁄𑀢𑀺 𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄 [𑀯𑀻𑀚𑀬𑀫𑀸𑀦𑁄 (𑀲𑀻.), 𑀯𑀻𑀚𑀺𑀬𑀫𑀸𑀦𑁄 (𑀲𑁆𑀬𑀸.)]. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀻’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, ‘‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸, 𑀢𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 [𑀕𑀭𑀼𑀓𑀭𑁄𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸, 𑀢𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸, 𑀢𑁂 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄, 𑀢𑀸 𑀦 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀢𑀸 𑀦 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄, 𑀢𑀸 𑀦 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺

𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘, 𑀢𑀸𑀦𑀺 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘, 𑀢𑀸𑀦𑀺 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘, 𑀢𑀸𑀦𑀺 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸, 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼’’’𑀦𑁆𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 ‘𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼’’’𑀦𑁆𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼𑀦𑁆𑀢𑀺. 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑁧𑁩𑁫. 𑀅𑀣 𑀔𑁄 𑀪𑀕𑀯𑀸 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀫𑀕𑀥𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀓𑀫𑀺𑀤𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑀬𑀁 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀲𑀸𑀭𑀦𑁆𑀤𑀤𑁂 [𑀲𑀸𑀦𑀦𑁆𑀤𑀭𑁂 (𑀓.)] 𑀘𑁂𑀢𑀺𑀬𑁂. 𑀢𑀢𑁆𑀭𑀸𑀳𑀁 𑀯𑀚𑁆𑀚𑀻𑀦𑀁 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑀺𑀁. 𑀬𑀸𑀯𑀓𑀻𑀯𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀯𑀚𑁆𑀚𑀻𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀚𑁆𑀚𑀻 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀩𑁆𑀭𑀸𑀳𑁆𑀫𑀡, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀓𑀫𑁂𑀓𑁂𑀦𑀧𑀺, 𑀪𑁄 𑀕𑁄𑀢𑀫, 𑀅𑀧𑀭𑀺𑀳𑀸𑀦𑀺𑀬𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁 𑀯𑀚𑁆𑀚𑀻𑀦𑀁 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺. 𑀓𑁄 𑀧𑀦 𑀯𑀸𑀤𑁄 𑀲𑀢𑁆𑀢𑀳𑀺 𑀅𑀧𑀭𑀺𑀳𑀸𑀦𑀺𑀬𑁂𑀳𑀺 𑀥𑀫𑁆𑀫𑁂𑀳𑀺. 𑀅𑀓𑀭𑀡𑀻𑀬𑀸𑀯 [𑀅𑀓𑀭𑀡𑀻𑀬𑀸 𑀘 (𑀲𑁆𑀬𑀸. 𑀓.)], 𑀪𑁄 𑀕𑁄𑀢𑀫, 𑀯𑀚𑁆𑀚𑀻 [𑀯𑀚𑁆𑀚𑀻𑀦𑀁 (𑀓.)] 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀬𑀤𑀺𑀤𑀁 𑀬𑀼𑀤𑁆𑀥𑀲𑁆𑀲, 𑀅𑀜𑁆𑀜𑀢𑁆𑀭 𑀉𑀧𑀮𑀸𑀧𑀦𑀸𑀬 𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸. 𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀪𑁄 𑀕𑁄𑀢𑀫, 𑀕𑀘𑁆𑀙𑀸𑀫, 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀪𑀺𑀓𑁆𑀔𑀼𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀸

𑁧𑁩𑁬. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀯𑀲𑁆𑀲𑀓𑀸𑀭𑁂 𑀩𑁆𑀭𑀸𑀳𑁆𑀫𑀡𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀦𑀺𑀧𑀢𑀺𑀢𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀉𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀲𑀗𑁆𑀖𑀓𑀭𑀡𑀻𑀬𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸, 𑀢𑁂 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀉𑀧𑁆𑀧𑀦𑁆𑀦𑀸𑀬 𑀢𑀡𑁆𑀳𑀸𑀬 𑀧𑁄𑀦𑁄𑀩𑁆𑀪𑀯𑀺𑀓𑀸𑀬 𑀦 𑀯𑀲𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀲𑀸𑀧𑁂𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀲𑀢𑀺𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑁋 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀨𑀸𑀲𑀼 [𑀨𑀸𑀲𑀼𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀳𑀭𑁂𑀬𑁆𑀬𑀼’𑀦𑁆𑀢𑀺. 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁩𑁭. ‘‘𑀅𑀧𑀭𑁂𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀓𑀫𑁆𑀫𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀓𑀫𑁆𑀫𑀭𑀢𑀸 𑀦 𑀓𑀫𑁆𑀫𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀪𑀲𑁆𑀲𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀪𑀲𑁆𑀲𑀭𑀢𑀸 𑀦 𑀪𑀲𑁆𑀲𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀦𑀺𑀤𑁆𑀤𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀦𑀺𑀤𑁆𑀤𑀸𑀭𑀢𑀸 𑀦 𑀦𑀺𑀤𑁆𑀤𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀲𑀗𑁆𑀕𑀡𑀺𑀓𑀭𑀢𑀸 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀧𑀸𑀧𑀺𑀘𑁆𑀙𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀧𑀸𑀧𑀫𑀺𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀧𑀸𑀧𑀲𑀳𑀸𑀬𑀸 𑀦 𑀧𑀸𑀧𑀲𑀫𑁆𑀧𑀯𑀗𑁆𑀓𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁩𑁮. ‘‘𑀅𑀧𑀭𑁂𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺…𑀧𑁂… ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀳𑀺𑀭𑀺𑀫𑀦𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀑𑀢𑁆𑀢𑀧𑁆𑀧𑀻 𑀪𑀯𑀺𑀲𑁆𑀲𑀦𑁆𑀢𑀺… 𑀩𑀳𑀼𑀲𑁆𑀲𑀼𑀢𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀆𑀭𑀤𑁆𑀥𑀯𑀻𑀭𑀺𑀬𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀪𑀯𑀺𑀲𑁆𑀲𑀦𑁆𑀢𑀺… 𑀧𑀜𑁆𑀜𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺. 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁩𑁯. ‘‘𑀅𑀧𑀭𑁂𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺…𑀧𑁂… 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸 𑀦𑁄 𑀧𑀭𑀺𑀳𑀸𑀦𑀺.

𑁧𑁪𑁦. ‘‘𑀅𑀧𑀭𑁂𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺…𑀧𑁂… 𑀅𑀦𑀢𑁆𑀢𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀅𑀲𑀼𑀪𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀆𑀤𑀻𑀦𑀯𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀳𑀸𑀦𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀯𑀺𑀭𑀸𑀕𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀦𑀺𑀭𑁄𑀥𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁪𑁧. ‘‘𑀙, 𑀯𑁄 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺 …𑀧𑁂… 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽, 𑀬𑁂 𑀢𑁂 𑀮𑀸𑀪𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀺 𑀢𑀣𑀸𑀭𑀽𑀧𑁂𑀳𑀺 𑀮𑀸𑀪𑁂𑀳𑀺 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀪𑀯𑀺𑀲𑁆𑀲𑀦𑁆𑀢𑀺 𑀲𑀻𑀮𑀯𑀦𑁆𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀻, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑀸𑀦𑀺 𑀓𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀽𑀧𑀲𑀢𑁆𑀣𑀸𑀦𑀺 [𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 (𑀲𑀻.)] 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀙 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀙𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑁧𑁪𑁨. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑁧𑁪𑁩. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀯𑀺𑀳𑀭𑀢𑀺 𑀭𑀸𑀚𑀸𑀕𑀸𑀭𑀓𑁂. 𑀢𑀢𑁆𑀭𑀸𑀧𑀺 𑀲𑀼𑀤𑀁 𑀪𑀕𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑁄 𑀭𑀸𑀚𑀸𑀕𑀸𑀭𑀓𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁 𑀇𑀢𑀺 𑀲𑀫𑀸𑀥𑀺 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑁧𑁪𑁪. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀦𑀸𑀴𑀦𑁆𑀤𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀸𑀴𑀦𑁆𑀤𑀸 𑀢𑀤𑀯𑀲𑀭𑀺, 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀯𑀺𑀳𑀭𑀢𑀺 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂.

𑀲𑀸𑀭𑀺𑀧𑀼𑀢𑁆𑀢𑀲𑀻𑀳𑀦𑀸𑀤𑁄

𑁧𑁪𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺; 𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’’𑀦𑁆𑀢𑀺. ‘‘𑀉𑀴𑀸𑀭𑀸 𑀔𑁄 𑀢𑁂 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀆𑀲𑀪𑀻 𑀯𑀸𑀘𑀸 [𑀆𑀲𑀪𑀺𑀯𑀸𑀘𑀸 (𑀲𑁆𑀬𑀸.)] 𑀪𑀸𑀲𑀺𑀢𑀸, 𑀏𑀓𑀁𑀲𑁄 𑀕𑀳𑀺𑀢𑁄, 𑀲𑀻𑀳𑀦𑀸𑀤𑁄 𑀦𑀤𑀺𑀢𑁄 𑁋 ‘𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺; 𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’𑀦𑁆𑀢𑀺.

‘‘𑀓𑀺𑀁 𑀢𑁂 [𑀓𑀺𑀁 𑀦𑀼 (𑀲𑁆𑀬𑀸. 𑀧𑀻. 𑀓.)], 𑀲𑀸𑀭𑀺𑀧𑀼𑀢𑁆𑀢, 𑀬𑁂 𑀢𑁂 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀸 𑁋 ‘𑀏𑀯𑀁𑀲𑀻𑀮𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀓𑀺𑀁 𑀧𑀦 𑀢𑁂 [𑀓𑀺𑀁 𑀧𑀦 (𑀲𑁆𑀬𑀸. 𑀧𑀻. 𑀓.)], 𑀲𑀸𑀭𑀺𑀧𑀼𑀢𑁆𑀢, 𑀬𑁂 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀸 𑁋 ‘𑀏𑀯𑀁𑀲𑀻𑀮𑀸 𑀢𑁂 𑀪𑀕𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀢𑀺𑀧𑀺, 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀢𑀺𑀧𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀓𑀺𑀁 𑀧𑀦 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀅𑀳𑀁 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑁋 ‘‘𑀏𑀯𑀁𑀲𑀻𑀮𑁄 𑀪𑀕𑀯𑀸 𑀇𑀢𑀺𑀧𑀺, 𑀏𑀯𑀁𑀥𑀫𑁆𑀫𑁄 𑀏𑀯𑀁𑀧𑀜𑁆𑀜𑁄 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑁄 𑀪𑀕𑀯𑀸 𑀇𑀢𑀺𑀧𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀢𑁆𑀣 𑀘 𑀳𑀺 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 [𑀘𑁂𑀢𑁄𑀧𑀭𑀺𑀜𑁆𑀜𑀸𑀬𑀜𑀸𑀡𑀁 (𑀲𑁆𑀬𑀸.), 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀬𑀸𑀬𑀜𑀸𑀡𑀁 (𑀓.)] 𑀦𑀢𑁆𑀣𑀺. 𑀅𑀣 𑀓𑀺𑀜𑁆𑀘𑀭𑀳𑀺 𑀢𑁂 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀉𑀴𑀸𑀭𑀸 𑀆𑀲𑀪𑀻 𑀯𑀸𑀘𑀸 𑀪𑀸𑀲𑀺𑀢𑀸, 𑀏𑀓𑀁𑀲𑁄 𑀕𑀳𑀺𑀢𑁄, 𑀲𑀻𑀳𑀦𑀸𑀤𑁄 𑀦𑀤𑀺𑀢𑁄 𑁋 ‘𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺; 𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’’’𑀦𑁆𑀢𑀺?

𑁧𑁪𑁬. ‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀅𑀢𑁆𑀣𑀺, 𑀅𑀧𑀺 𑀘 𑀫𑁂 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀤𑀴𑁆𑀳𑀼𑀤𑁆𑀥𑀸𑀧𑀁 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀁 𑀏𑀓𑀤𑁆𑀯𑀸𑀭𑀁, 𑀢𑀢𑁆𑀭𑀲𑁆𑀲 𑀤𑁄𑀯𑀸𑀭𑀺𑀓𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀅𑀜𑁆𑀜𑀸𑀢𑀸𑀦𑀁 𑀦𑀺𑀯𑀸𑀭𑁂𑀢𑀸 𑀜𑀸𑀢𑀸𑀦𑀁 𑀧𑀯𑁂𑀲𑁂𑀢𑀸. 𑀲𑁄 𑀢𑀲𑁆𑀲 𑀦𑀕𑀭𑀲𑁆𑀲 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀬𑀧𑀣𑀁 [𑀅𑀦𑀼𑀘𑀭𑀺𑀬𑀸𑀬𑀧𑀣𑀁 (𑀲𑁆𑀬𑀸.)] 𑀅𑀦𑀼𑀓𑁆𑀓𑀫𑀫𑀸𑀦𑁄 𑀦 𑀧𑀲𑁆𑀲𑁂𑀬𑁆𑀬 𑀧𑀸𑀓𑀸𑀭𑀲𑀦𑁆𑀥𑀺𑀁 𑀯𑀸 𑀧𑀸𑀓𑀸𑀭𑀯𑀺𑀯𑀭𑀁 𑀯𑀸, 𑀅𑀦𑁆𑀢𑀫𑀲𑁄 𑀩𑀺𑀴𑀸𑀭𑀦𑀺𑀓𑁆𑀔𑀫𑀦𑀫𑀢𑁆𑀢𑀫𑁆𑀧𑀺. 𑀢𑀲𑁆𑀲 𑀏𑀯𑀫𑀲𑁆𑀲 [𑀦 𑀧𑀲𑁆𑀲𑁂𑀬𑁆𑀬 𑀢𑀲𑁆𑀲 𑀏𑀯𑀫𑀲𑁆𑀲 (𑀲𑁆𑀬𑀸.)] 𑁋 ‘𑀬𑁂 𑀔𑁄 𑀓𑁂𑀘𑀺 𑀑𑀴𑀸𑀭𑀺𑀓𑀸 𑀧𑀸𑀡𑀸 𑀇𑀫𑀁 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺 𑀯𑀸, 𑀲𑀩𑁆𑀩𑁂 𑀢𑁂 𑀇𑀫𑀺𑀦𑀸𑀯 𑀤𑁆𑀯𑀸𑀭𑁂𑀦 𑀧𑀯𑀺𑀲𑀦𑁆𑀢𑀺 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺 𑀯𑀸’𑀢𑀺. 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄 𑁋 ‘𑀬𑁂 𑀢𑁂, 𑀪𑀦𑁆𑀢𑁂, 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀁𑀲𑀼. 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺. 𑀪𑀕𑀯𑀸𑀧𑀺, 𑀪𑀦𑁆𑀢𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’’𑀢𑀺.

𑁧𑁪𑁭. 𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀯𑀺𑀳𑀭𑀦𑁆𑀢𑁄 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀤𑀼𑀲𑁆𑀲𑀻𑀮𑀆𑀤𑀻𑀦𑀯𑀸

𑁧𑁪𑁮. 𑀅𑀣 𑀔𑁄 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀧𑀸𑀝𑀮𑀺𑀕𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀸𑀝𑀮𑀺𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀧𑀸𑀝𑀮𑀺𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀆𑀯𑀲𑀣𑀸𑀕𑀸𑀭’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑀲𑀦𑁆𑀣𑀭𑀺𑀁 [𑀲𑀩𑁆𑀩𑀲𑀦𑁆𑀣𑀭𑀺𑀢𑀁 𑀲𑀢𑁆𑀣𑀢𑀁 (𑀲𑁆𑀬𑀸.), 𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀢𑀁 (𑀓.)] 𑀆𑀯𑀲𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀮𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀩𑁆𑀩𑀲𑀦𑁆𑀣𑀭𑀺𑀲𑀦𑁆𑀣𑀢𑀁 [𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀢𑀁 (𑀲𑀻. 𑀲𑁆𑀬𑀸. 𑀧𑀻. 𑀓.)], 𑀪𑀦𑁆𑀢𑁂, 𑀆𑀯𑀲𑀣𑀸𑀕𑀸𑀭𑀁, 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀉𑀤𑀓𑀫𑀡𑀺𑀓𑁄 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀢𑁂𑀮𑀧𑀤𑀻𑀧𑁄 𑀆𑀭𑁄𑀧𑀺𑀢𑁄; 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 [𑀇𑀤𑀁 𑀧𑀤𑀁 𑀯𑀺𑀦𑀬𑀫𑀳𑀸𑀯𑀕𑁆𑀕 𑀦 𑀤𑀺𑀲𑁆𑀲𑀢𑀺]. 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀚𑁆𑀛𑀺𑀫𑀁 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 [𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁄 (𑀓.)] 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺 𑀪𑀕𑀯𑀦𑁆𑀢𑀫𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀧𑀸𑀝𑀮𑀺𑀕𑀸𑀫𑀺𑀓𑀸𑀧𑀺 𑀔𑁄 𑀉𑀧𑀸𑀲𑀓𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑀸 𑀦𑀺𑀲𑀻𑀤𑀺𑀁𑀲𑀼 𑀪𑀕𑀯𑀦𑁆𑀢𑀫𑁂𑀯 𑀧𑀼𑀭𑀓𑁆𑀔𑀢𑁆𑀯𑀸.

𑁧𑁪𑁯. 𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀓𑁂 𑀉𑀧𑀸𑀲𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀢𑀺𑀁 𑀪𑁄𑀕𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀅𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀗𑁆𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

𑀲𑀻𑀮𑀯𑀦𑁆𑀢𑀆𑀦𑀺𑀲𑀁𑀲

𑁧𑁫𑁦. ‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀧𑁆𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀗𑁆𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸’’𑀢𑀺.

𑁧𑁫𑁧. 𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀓𑁂 𑀉𑀧𑀸𑀲𑀓𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸 𑀔𑁄, 𑀕𑀳𑀧𑀢𑀬𑁄, 𑀭𑀢𑁆𑀢𑀺, 𑀬𑀲𑁆𑀲𑀤𑀸𑀦𑀺 𑀢𑀼𑀫𑁆𑀳𑁂 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀧𑀸𑀝𑀮𑀺𑀕𑀸𑀫𑀺𑀓𑁂𑀲𑀼 𑀉𑀧𑀸𑀲𑀓𑁂𑀲𑀼 𑀲𑀼𑀜𑁆𑀜𑀸𑀕𑀸𑀭𑀁 𑀧𑀸𑀯𑀺𑀲𑀺.

𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀫𑀸𑀧𑀦𑀁

𑁧𑁫𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 [𑀲𑀼𑀦𑀻𑀥𑀯𑀲𑁆𑀲𑀓𑀸𑀭𑀸 (𑀲𑁆𑀬𑀸. 𑀓.)] 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀢𑁂𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑁂𑀯 [𑀲𑀳𑀲𑁆𑀲𑀲𑁆𑀲𑁂𑀯 (𑀲𑀻. 𑀧𑀻. 𑀓.), 𑀲𑀳𑀲𑁆𑀲𑀲𑁂𑀯 (𑀝𑀻𑀓𑀸𑀬𑀁 𑀧𑀸𑀞𑀦𑁆𑀢𑀭𑀁), 𑀲𑀳𑀲𑁆𑀲𑀲𑀳𑀲𑁆𑀲𑁂𑀯 (𑀉𑀤𑀸𑀦𑀝𑁆𑀞𑀓𑀣𑀸)] 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑁂𑀯 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁂 𑀦𑀼 𑀔𑁄 [𑀓𑁄 𑀦𑀼 𑀔𑁄 (𑀲𑀻. 𑀲𑁆𑀬𑀸. 𑀧𑀻. 𑀓.)], 𑀆𑀦𑀦𑁆𑀤, 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻’’𑀢𑀺 [𑀫𑀸𑀧𑁂𑀢𑀻𑀢𑀺 (𑀲𑀻. 𑀲𑁆𑀬𑀸. 𑀧𑀻. 𑀓.)]? ‘‘𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸, 𑀪𑀦𑁆𑀢𑁂, 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬𑀸’’𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀇𑀥𑀸𑀳𑀁, 𑀆𑀦𑀦𑁆𑀤, 𑀅𑀤𑁆𑀤𑀲𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑁂𑀯 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀭𑀺𑀬𑀁 𑀆𑀬𑀢𑀦𑀁 𑀬𑀸𑀯𑀢𑀸 𑀯𑀡𑀺𑀧𑁆𑀧𑀣𑁄 𑀇𑀤𑀁 𑀅𑀕𑁆𑀕𑀦𑀕𑀭𑀁 𑀪𑀯𑀺𑀲𑁆𑀲𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀁 𑀧𑀼𑀝𑀪𑁂𑀤𑀦𑀁. 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀢𑀬𑁄 𑀅𑀦𑁆𑀢𑀭𑀸𑀬𑀸 𑀪𑀯𑀺𑀲𑁆𑀲𑀦𑁆𑀢𑀺 𑁋 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀫𑀺𑀣𑀼𑀪𑁂𑀤𑀸 𑀯𑀸’’𑀢𑀺.

𑁧𑁫𑁩. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀬𑁂𑀦 𑀲𑀓𑁄 𑀆𑀯𑀲𑀣𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁂 𑀆𑀯𑀲𑀣𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀼𑀁 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀦𑀁 𑀫𑀕𑀥𑀫𑀳𑀸𑀫𑀢𑁆𑀢𑀸𑀦𑀁 𑀆𑀯𑀲𑀣𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀼𑀁 𑀲𑀫𑁆𑀧𑀯𑀸𑀭𑁂𑀲𑀼𑀁. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀪𑀕𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀬𑀲𑁆𑀫𑀺𑀁 𑀧𑀤𑁂𑀲𑁂 𑀓𑀧𑁆𑀧𑁂𑀢𑀺, 𑀯𑀸𑀲𑀁 𑀧𑀡𑁆𑀟𑀺𑀢𑀚𑀸𑀢𑀺𑀬𑁄;

𑀲𑀻𑀮𑀯𑀦𑁆𑀢𑁂𑀢𑁆𑀣 𑀪𑁄𑀚𑁂𑀢𑁆𑀯𑀸, 𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀬𑁄 [𑀩𑁆𑀭𑀳𑁆𑀫𑀘𑀸𑀭𑀺𑀦𑁄 (𑀲𑁆𑀬𑀸.)].

‘‘𑀬𑀸 𑀢𑀢𑁆𑀣 𑀤𑁂𑀯𑀢𑀸 𑀆𑀲𑀼𑀁, 𑀢𑀸𑀲𑀁 𑀤𑀓𑁆𑀔𑀺𑀡𑀫𑀸𑀤𑀺𑀲𑁂;

𑀢𑀸 𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀺 [𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀺 𑀦𑀁 (𑀓.)], 𑀫𑀸𑀦𑀺𑀢𑀸 𑀫𑀸𑀦𑀬𑀦𑁆𑀢𑀺 𑀦𑀁.

‘‘𑀢𑀢𑁄 𑀦𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀑𑀭𑀲𑀁;

𑀤𑁂𑀯𑀢𑀸𑀦𑀼𑀓𑀫𑁆𑀧𑀺𑀢𑁄 𑀧𑁄𑀲𑁄, 𑀲𑀤𑀸 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁧𑁫𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺 𑁋 ‘‘𑀬𑁂𑀦𑀚𑁆𑀚 𑀲𑀫𑀡𑁄 𑀕𑁄𑀢𑀫𑁄 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀺, 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀬𑁂𑀦 𑀢𑀺𑀢𑁆𑀣𑁂𑀦 𑀕𑀗𑁆𑀕𑀁 𑀦𑀤𑀺𑀁 𑀢𑀭𑀺𑀲𑁆𑀲𑀢𑀺, 𑀢𑀁 𑀕𑁄𑀢𑀫𑀢𑀺𑀢𑁆𑀣𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺, 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀧𑀽𑀭𑀸 𑀳𑁄𑀢𑀺 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸. 𑀅𑀧𑁆𑀧𑁂𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑀺 𑀅𑀧𑀸𑀭𑀸 [𑀧𑀸𑀭𑀸 (𑀲𑀻. 𑀲𑁆𑀬𑀸. 𑀓.), 𑀑𑀭𑀸 (𑀯𑀺. 𑀫𑀳𑀸𑀯𑀕𑁆𑀕)], 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀸. 𑀅𑀣 𑀔𑁄 𑀪𑀕𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑁂 𑀅𑀦𑁆𑀢𑀭𑀳𑀺𑀢𑁄 𑀧𑀸𑀭𑀺𑀫𑀢𑀻𑀭𑁂 𑀧𑀘𑁆𑀘𑀼𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑁂 𑀅𑀧𑀸𑀭𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑁂 𑀢𑀭𑀦𑁆𑀢𑀺 𑀅𑀡𑁆𑀡𑀯𑀁 𑀲𑀭𑀁, 𑀲𑁂𑀢𑀼𑀁 𑀓𑀢𑁆𑀯𑀸𑀦 𑀯𑀺𑀲𑀚𑁆𑀚 𑀧𑀮𑁆𑀮𑀮𑀸𑀦𑀺;

𑀓𑀼𑀮𑁆𑀮𑀜𑁆𑀳𑀺 𑀚𑀦𑁄 𑀩𑀦𑁆𑀥𑀢𑀺 [𑀓𑀼𑀮𑁆𑀮𑀁 𑀚𑀦𑁄 𑀘 𑀩𑀦𑁆𑀥𑀢𑀺 (𑀲𑁆𑀬𑀸.), 𑀓𑀼𑀮𑁆𑀮𑀁 𑀳𑀺 𑀚𑀦𑁄 𑀧𑀩𑀦𑁆𑀥𑀢𑀺 (𑀲𑀻. 𑀧𑀻. 𑀓.)], 𑀢𑀺𑀡𑁆𑀡𑀸 [𑀦𑀺𑀢𑀺𑀡𑁆𑀡𑀸, 𑀦 𑀢𑀺𑀡𑁆𑀡𑀸 (𑀓.)] 𑀫𑁂𑀥𑀸𑀯𑀺𑀦𑁄 𑀚𑀦𑀸’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄.

𑀅𑀭𑀺𑀬𑀲𑀘𑁆𑀘𑀓𑀣𑀸

𑁧𑁫𑁫. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀓𑁄𑀝𑀺𑀕𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀓𑁄𑀝𑀺𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀤𑀼𑀓𑁆𑀔𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀉𑀘𑁆𑀙𑀺𑀦𑁆𑀦𑀸 𑀪𑀯𑀢𑀡𑁆𑀳𑀸, 𑀔𑀻𑀡𑀸 𑀪𑀯𑀦𑁂𑀢𑁆𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀦𑀸;

𑀲𑀁𑀲𑀺𑀢𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀢𑀸𑀲𑀼 𑀢𑀸𑀲𑁆𑀯𑁂𑀯 𑀚𑀸𑀢𑀺𑀲𑀼.

𑀢𑀸𑀦𑀺 𑀏𑀢𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸;

𑀉𑀘𑁆𑀙𑀺𑀦𑁆𑀦𑀁 𑀫𑀽𑀮𑀁 𑀤𑀼𑀓𑁆𑀔𑀲𑁆𑀲, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸

𑁧𑁫𑁬. 𑀅𑀣 𑀔𑁄 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀦𑀸𑀢𑀺𑀓𑀸 [𑀦𑀸𑀤𑀺𑀓𑀸 (𑀲𑁆𑀬𑀸. 𑀧𑀻.)] 𑀢𑁂𑀦𑀼𑀧𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀸𑀢𑀺𑀓𑀸 𑀢𑀤𑀯𑀲𑀭𑀺. 𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀴𑁆𑀳𑁄 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀦𑀦𑁆𑀤𑀸 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀻 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑀸, 𑀢𑀲𑁆𑀲𑀸 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀲𑀼𑀤𑀢𑁆𑀢𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀲𑀼𑀚𑀸𑀢𑀸 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑀸, 𑀢𑀲𑁆𑀲𑀸 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀓𑀼𑀓𑁆𑀓𑀼𑀝𑁄 [𑀓𑀓𑀼𑀥𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀓𑀸𑀴𑀺𑀫𑁆𑀩𑁄 [𑀓𑀸𑀮𑀺𑀗𑁆𑀕𑁄 (𑀧𑀻.), 𑀓𑀸𑀭𑀴𑀺𑀫𑁆𑀩𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄…𑀧𑁂… 𑀦𑀺𑀓𑀝𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀓𑀝𑀺𑀲𑁆𑀲𑀳𑁄 [𑀓𑀝𑀺𑀲𑁆𑀲𑀪𑁄 (𑀲𑀻. 𑀧𑀻.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀢𑀼𑀝𑁆𑀞𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀲𑀦𑁆𑀢𑀼𑀝𑁆𑀞𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀪𑀤𑁆𑀤𑁄 [𑀪𑀝𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀲𑀼𑀪𑀤𑁆𑀤𑁄 [𑀲𑀼𑀪𑀝𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺?

𑁧𑁫𑁭. ‘‘𑀲𑀸𑀴𑁆𑀳𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀦𑀦𑁆𑀤𑀸, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀻 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀼𑀤𑀢𑁆𑀢𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺. 𑀲𑀼𑀚𑀸𑀢𑀸, 𑀆𑀦𑀦𑁆𑀤, 𑀉𑀧𑀸𑀲𑀺𑀓𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸 [𑀧𑀭𑀸𑀬𑀦𑀸 (𑀲𑀻. 𑀲𑁆𑀬𑀸. 𑀧𑀻. 𑀓.)]. 𑀓𑀼𑀓𑁆𑀓𑀼𑀝𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀓𑀸𑀴𑀺𑀫𑁆𑀩𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄…𑀧𑁂… 𑀦𑀺𑀓𑀝𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀓𑀝𑀺𑀲𑁆𑀲𑀳𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀢𑀼𑀝𑁆𑀞𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 … 𑀲𑀦𑁆𑀢𑀼𑀝𑁆𑀞𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀪𑀤𑁆𑀤𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀲𑀼𑀪𑀤𑁆𑀤𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀧𑀭𑁄𑀧𑀜𑁆𑀜𑀸𑀲𑀁, 𑀆𑀦𑀦𑁆𑀤, 𑀦𑀸𑀢𑀺𑀓𑁂 𑀉𑀧𑀸𑀲𑀓𑀸 𑀓𑀸𑀮𑀗𑁆𑀓𑀢𑀸, 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 [𑀙𑀸𑀥𑀺𑀓𑀸 𑀦𑀯𑀼𑀢𑀺 (𑀲𑁆𑀬𑀸.)], 𑀆𑀦𑀦𑁆𑀤, 𑀦𑀸𑀢𑀺𑀓𑁂 𑀉𑀧𑀸𑀲𑀓𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 [𑀤𑀲𑀸𑀢𑀺𑀭𑁂𑀓𑀸𑀦𑀺 (𑀲𑁆𑀬𑀸.)], 𑀆𑀦𑀦𑁆𑀤, 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑁂 𑀉𑀧𑀸𑀲𑀓𑀸 𑀓𑀸𑀮𑀗𑁆𑀓𑀢𑀸, 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸.

𑀥𑀫𑁆𑀫𑀸𑀤𑀸𑀲𑀥𑀫𑁆𑀫𑀧𑀭𑀺𑀬𑀸𑀬𑀸

𑁧𑁫𑁮. ‘‘𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀬𑀁 𑀫𑀦𑀼𑀲𑁆𑀲𑀪𑀽𑀢𑁄 𑀓𑀸𑀮𑀗𑁆𑀓𑀭𑁂𑀬𑁆𑀬. 𑀢𑀲𑁆𑀫𑀺𑀁𑀬𑁂𑀯 [𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀘𑁂 (𑀲𑀻. 𑀧𑀻.), 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑁄 (𑀲𑁆𑀬𑀸.)] 𑀓𑀸𑀮𑀗𑁆𑀓𑀢𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀲𑁆𑀲𑀣, 𑀯𑀺𑀳𑁂𑀲𑀸 𑀳𑁂𑀲𑀸, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀥𑀫𑁆𑀫𑀸𑀤𑀸𑀲𑀁 𑀦𑀸𑀫 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’𑀢𑀺.

𑁧𑁫𑁯. ‘‘𑀓𑀢𑀫𑁄 𑀘 𑀲𑁄, 𑀆𑀦𑀦𑁆𑀤, 𑀥𑀫𑁆𑀫𑀸𑀤𑀸𑀲𑁄 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’𑀢𑀺?

‘‘𑀇𑀥𑀸𑀦𑀦𑁆𑀤, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺.

‘‘𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺.

‘‘𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺.

‘‘𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺 𑀅𑀘𑁆𑀙𑀺𑀤𑁆𑀤𑁂𑀳𑀺 𑀅𑀲𑀩𑀮𑁂𑀳𑀺 𑀅𑀓𑀫𑁆𑀫𑀸𑀲𑁂𑀳𑀺 𑀪𑀼𑀚𑀺𑀲𑁆𑀲𑁂𑀳𑀺 𑀯𑀺𑀜𑁆𑀜𑀽𑀧𑀲𑀢𑁆𑀣𑁂𑀳𑀺 𑀅𑀧𑀭𑀸𑀫𑀝𑁆𑀞𑁂𑀳𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺.

‘‘𑀅𑀬𑀁 𑀔𑁄 𑀲𑁄, 𑀆𑀦𑀦𑁆𑀤, 𑀥𑀫𑁆𑀫𑀸𑀤𑀸𑀲𑁄 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’’𑀢𑀺.

𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀦𑁆𑀢𑁄 𑀕𑀺𑀜𑁆𑀚𑀓𑀸𑀯𑀲𑀣𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋

‘‘𑀇𑀢𑀺 𑀲𑀻𑀮𑀁 𑀇𑀢𑀺 𑀲𑀫𑀸𑀥𑀺 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑁧𑁬𑁦. 𑀅𑀣 𑀔𑁄 𑀪𑀕𑀯𑀸 𑀦𑀸𑀢𑀺𑀓𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀅𑀫𑁆𑀩𑀧𑀸𑀮𑀺𑀯𑀦𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬 𑀲𑀫𑁆𑀧𑀚𑀸𑀦𑁄, 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻…𑀧𑁂… 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬 𑀲𑀫𑁆𑀧𑀚𑀸𑀦𑁄, 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺.

𑀅𑀫𑁆𑀩𑀧𑀸𑀮𑀻𑀕𑀡𑀺𑀓𑀸

𑁧𑁬𑁧. 𑀅𑀲𑁆𑀲𑁄𑀲𑀺 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀯𑁂𑀲𑀸𑀮𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀬𑁆𑀳𑀁 𑀅𑀫𑁆𑀩𑀯𑀦𑁂’’𑀢𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀸𑀲𑀺. 𑀬𑁂𑀦 𑀲𑀓𑁄 𑀆𑀭𑀸𑀫𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑁋 ‘‘𑀪𑀕𑀯𑀸 𑀓𑀺𑀭 𑀯𑁂𑀲𑀸𑀮𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀅𑀫𑁆𑀩𑀧𑀸𑀮𑀺𑀯𑀦𑁂’’𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀺𑀁𑀲𑀼. 𑀢𑀢𑁆𑀭 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀦𑀻𑀮𑀸 𑀳𑁄𑀦𑁆𑀢𑀺 𑀦𑀻𑀮𑀯𑀡𑁆𑀡𑀸 𑀦𑀻𑀮𑀯𑀢𑁆𑀣𑀸 𑀦𑀻𑀮𑀸𑀮𑀗𑁆𑀓𑀸𑀭𑀸, 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀧𑀻𑀢𑀸 𑀳𑁄𑀦𑁆𑀢𑀺 𑀧𑀻𑀢𑀯𑀡𑁆𑀡𑀸 𑀧𑀻𑀢𑀯𑀢𑁆𑀣𑀸 𑀧𑀻𑀢𑀸𑀮𑀗𑁆𑀓𑀸𑀭𑀸, 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀮𑁄𑀳𑀺𑀢𑀸 𑀳𑁄𑀦𑁆𑀢𑀺 𑀮𑁄𑀳𑀺𑀢𑀯𑀡𑁆𑀡𑀸 𑀮𑁄𑀳𑀺𑀢𑀯𑀢𑁆𑀣𑀸 𑀮𑁄𑀳𑀺𑀢𑀸𑀮𑀗𑁆𑀓𑀸𑀭𑀸, 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀑𑀤𑀸𑀢𑀸 𑀳𑁄𑀦𑁆𑀢𑀺 𑀑𑀤𑀸𑀢𑀯𑀡𑁆𑀡𑀸 𑀑𑀤𑀸𑀢𑀯𑀢𑁆𑀣𑀸 𑀑𑀤𑀸𑀢𑀸𑀮𑀗𑁆𑀓𑀸𑀭𑀸. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀅𑀓𑁆𑀔𑁂𑀦 𑀅𑀓𑁆𑀔𑀁 𑀘𑀓𑁆𑀓𑁂𑀦 𑀘𑀓𑁆𑀓𑀁 𑀬𑀼𑀕𑁂𑀦 𑀬𑀼𑀕𑀁 𑀧𑀝𑀺𑀯𑀝𑁆𑀝𑁂𑀲𑀺 [𑀧𑀭𑀺𑀯𑀢𑁆𑀢𑁂𑀲𑀺 (𑀯𑀺. 𑀫𑀳𑀸𑀯𑀕𑁆𑀕)]. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀁, 𑀚𑁂 𑀅𑀫𑁆𑀩𑀧𑀸𑀮𑀺, 𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀅𑀓𑁆𑀔𑁂𑀦 𑀅𑀓𑁆𑀔𑀁 𑀘𑀓𑁆𑀓𑁂𑀦 𑀘𑀓𑁆𑀓𑀁 𑀬𑀼𑀕𑁂𑀦 𑀬𑀼𑀕𑀁 𑀧𑀝𑀺𑀯𑀝𑁆𑀝𑁂𑀲𑀻’’𑀢𑀺? ‘‘𑀢𑀣𑀸 𑀳𑀺 𑀧𑀦 𑀫𑁂, 𑀅𑀬𑁆𑀬𑀧𑀼𑀢𑁆𑀢𑀸, 𑀪𑀕𑀯𑀸 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. ‘‘𑀤𑁂𑀳𑀺, 𑀚𑁂 𑀅𑀫𑁆𑀩𑀧𑀸𑀮𑀺, 𑀏𑀢𑀁 [𑀏𑀓𑀁 (𑀓.)] 𑀪𑀢𑁆𑀢𑀁 𑀲𑀢𑀲𑀳𑀲𑁆𑀲𑁂𑀦𑀸’’𑀢𑀺. ‘‘𑀲𑀘𑁂𑀧𑀺 𑀫𑁂, 𑀅𑀬𑁆𑀬𑀧𑀼𑀢𑁆𑀢𑀸, 𑀯𑁂𑀲𑀸𑀮𑀺𑀁 𑀲𑀸𑀳𑀸𑀭𑀁 𑀤𑀲𑁆𑀲𑀣 [𑀤𑀚𑁆𑀚𑁂𑀬𑁆𑀬𑀸𑀣 (𑀯𑀺. 𑀫𑀳𑀸𑀯𑀕𑁆𑀕)], 𑀏𑀯𑀫𑀳𑀁 𑀢𑀁 [𑀏𑀯𑀫𑁆𑀧𑀺 𑀫𑀳𑀦𑁆𑀢𑀁 (𑀲𑁆𑀬𑀸.), 𑀏𑀯𑀁 𑀫𑀳𑀦𑁆𑀢𑀁 (𑀲𑀻. 𑀧𑀻.)] 𑀪𑀢𑁆𑀢𑀁 𑀦 𑀤𑀲𑁆𑀲𑀸𑀫𑀻’’𑀢𑀺 [𑀦𑁂𑀯 𑀤𑀚𑁆𑀚𑀸𑀳𑀁 𑀢𑀁 𑀪𑀢𑁆𑀢𑀦𑁆𑀢𑀺 (𑀯𑀺. 𑀫𑀳𑀸𑀯𑀕𑁆𑀕)]. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀁 𑁋 ‘‘𑀚𑀺𑀢𑀫𑁆𑀳 [𑀚𑀺𑀢𑀫𑁆𑀳𑀸 (𑀩𑀳𑀽𑀲𑀼)] 𑀯𑀢 𑀪𑁄 𑀅𑀫𑁆𑀩𑀓𑀸𑀬, 𑀚𑀺𑀢𑀫𑁆𑀳 𑀯𑀢 𑀪𑁄 𑀅𑀫𑁆𑀩𑀓𑀸𑀬𑀸’’𑀢𑀺 [‘‘𑀚𑀺𑀢𑀫𑁆𑀳𑀸 𑀯𑀢 𑀪𑁄 𑀅𑀫𑁆𑀩𑀧𑀸𑀮𑀺𑀓𑀸𑀬 𑀯𑀜𑁆𑀘𑀺𑀢𑀫𑁆𑀳𑀸 𑀯𑀢 𑀪𑁄 𑀅𑀫𑁆𑀩𑀧𑀸𑀮𑀺𑀓𑀸𑀬𑀸’’𑀢𑀺 (𑀲𑁆𑀬𑀸.)].

𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀬𑁂𑀦 𑀅𑀫𑁆𑀩𑀧𑀸𑀮𑀺𑀯𑀦𑀁 𑀢𑁂𑀦 𑀧𑀸𑀬𑀺𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁂𑀲𑀁 [𑀬𑁂𑀳𑀺 (𑀯𑀺. 𑀫𑀳𑀸𑀯𑀕𑁆𑀕)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸, 𑀑𑀮𑁄𑀓𑁂𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀺𑀧𑀭𑀺𑀲𑀁; 𑀅𑀧𑀮𑁄𑀓𑁂𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀺𑀧𑀭𑀺𑀲𑀁; 𑀉𑀧𑀲𑀁𑀳𑀭𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀺𑀧𑀭𑀺𑀲𑀁 𑁋 𑀢𑀸𑀯𑀢𑀺𑀁𑀲𑀲𑀤𑀺𑀲’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀼𑀢𑁆𑀣𑀁 [𑀅𑀥𑀺𑀯𑀸𑀲𑀺𑀢𑀁 (𑀲𑁆𑀬𑀸.)] 𑀔𑁄 𑀫𑁂, 𑀮𑀺𑀘𑁆𑀙𑀯𑀻, 𑀲𑁆𑀯𑀸𑀢𑀦𑀸𑀬 𑀅𑀫𑁆𑀩𑀧𑀸𑀮𑀺𑀬𑀸 𑀕𑀡𑀺𑀓𑀸𑀬 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀁 𑁋 ‘‘𑀚𑀺𑀢𑀫𑁆𑀳 𑀯𑀢 𑀪𑁄 𑀅𑀫𑁆𑀩𑀓𑀸𑀬, 𑀚𑀺𑀢𑀫𑁆𑀳 𑀯𑀢 𑀪𑁄 𑀅𑀫𑁆𑀩𑀓𑀸𑀬𑀸’’𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑁧𑁬𑁨. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀆𑀭𑀸𑀫𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀅𑀫𑁆𑀩𑀧𑀸𑀮𑀺𑀬𑀸 𑀕𑀡𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸𑀳𑀁, 𑀪𑀦𑁆𑀢𑁂, 𑀆𑀭𑀸𑀫𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀆𑀭𑀸𑀫𑀁. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀫𑁆𑀩𑀧𑀸𑀮𑀺𑀯𑀦𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀯𑁂𑀴𑀼𑀯𑀕𑀸𑀫𑀯𑀲𑁆𑀲𑀽𑀧𑀕𑀫𑀦𑀁

𑁧𑁬𑁩. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀧𑀸𑀮𑀺𑀯𑀦𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀯𑁂𑀴𑀼𑀯𑀕𑀸𑀫𑀓𑁄 [𑀩𑁂𑀴𑀼𑀯𑀕𑀸𑀫𑀓𑁄 (𑀲𑀻. 𑀧𑀻.)] 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀯𑁂𑀴𑀼𑀯𑀕𑀸𑀫𑀓𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀴𑀼𑀯𑀕𑀸𑀫𑀓𑁂 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀫𑀦𑁆𑀢𑀸 𑀯𑁂𑀲𑀸𑀮𑀺𑀁 𑀬𑀣𑀸𑀫𑀺𑀢𑁆𑀢𑀁 𑀬𑀣𑀸𑀲𑀦𑁆𑀤𑀺𑀝𑁆𑀞𑀁 𑀬𑀣𑀸𑀲𑀫𑁆𑀪𑀢𑁆𑀢𑀁 𑀯𑀲𑁆𑀲𑀁 𑀉𑀧𑁂𑀣 [𑀉𑀧𑀕𑀘𑁆𑀙𑀣 (𑀲𑁆𑀬𑀸.)]. 𑀅𑀳𑀁 𑀧𑀦 𑀇𑀥𑁂𑀯 𑀯𑁂𑀴𑀼𑀯𑀕𑀸𑀫𑀓𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀫𑀦𑁆𑀢𑀸 𑀯𑁂𑀲𑀸𑀮𑀺𑀁 𑀬𑀣𑀸𑀫𑀺𑀢𑁆𑀢𑀁 𑀬𑀣𑀸𑀲𑀦𑁆𑀤𑀺𑀝𑁆𑀞𑀁 𑀬𑀣𑀸𑀲𑀫𑁆𑀪𑀢𑁆𑀢𑀁 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀪𑀕𑀯𑀸 𑀧𑀦 𑀢𑀢𑁆𑀣𑁂𑀯 𑀯𑁂𑀴𑀼𑀯𑀕𑀸𑀫𑀓𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺.

𑁧𑁬𑁪. 𑀅𑀣 𑀔𑁄 𑀪𑀕𑀯𑀢𑁄 𑀯𑀲𑁆𑀲𑀽𑀧𑀕𑀢𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀩𑀸𑀴𑁆𑀳𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀫𑀸𑀭𑀡𑀦𑁆𑀢𑀺𑀓𑀸. 𑀢𑀸 𑀲𑀼𑀤𑀁 𑀪𑀕𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀲𑀺 𑀅𑀯𑀺𑀳𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀁. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀆𑀩𑀸𑀥𑀁 𑀯𑀻𑀭𑀺𑀬𑁂𑀦 𑀧𑀝𑀺𑀧𑀡𑀸𑀫𑁂𑀢𑁆𑀯𑀸 𑀚𑀻𑀯𑀺𑀢𑀲𑀗𑁆𑀔𑀸𑀭𑀁 𑀅𑀥𑀺𑀝𑁆𑀞𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀆𑀩𑀸𑀥𑀁 𑀯𑀻𑀭𑀺𑀬𑁂𑀦 𑀧𑀝𑀺𑀧𑀡𑀸𑀫𑁂𑀢𑁆𑀯𑀸 𑀚𑀻𑀯𑀺𑀢𑀲𑀗𑁆𑀔𑀸𑀭𑀁 𑀅𑀥𑀺𑀝𑁆𑀞𑀸𑀬 𑀯𑀺𑀳𑀸𑀲𑀺. 𑀅𑀣 𑀔𑁄 𑀪𑀕𑀯𑀢𑁄 𑀲𑁄 𑀆𑀩𑀸𑀥𑁄 𑀧𑀝𑀺𑀧𑀲𑁆𑀲𑀫𑁆𑀪𑀺. 𑀅𑀣 𑀔𑁄 𑀪𑀕𑀯𑀸 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 [𑀕𑀺𑀮𑀸𑀦𑀯𑀼𑀝𑁆𑀞𑀺𑀢𑁄 (𑀲𑀤𑁆𑀤𑀦𑀻𑀢𑀺)] 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀺𑀝𑁆𑀞𑁄 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀨𑀸𑀲𑀼; 𑀤𑀺𑀝𑁆𑀞𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀔𑀫𑀦𑀻𑀬𑀁, 𑀅𑀧𑀺 𑀘 𑀫𑁂, 𑀪𑀦𑁆𑀢𑁂, 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬 𑀓𑀸𑀬𑁄. 𑀤𑀺𑀲𑀸𑀧𑀺 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀺; 𑀥𑀫𑁆𑀫𑀸𑀧𑀺 𑀫𑀁 𑀦 𑀧𑀝𑀺𑀪𑀦𑁆𑀢𑀺 𑀪𑀕𑀯𑀢𑁄 𑀕𑁂𑀮𑀜𑁆𑀜𑁂𑀦, 𑀅𑀧𑀺 𑀘 𑀫𑁂, 𑀪𑀦𑁆𑀢𑁂, 𑀅𑀳𑁄𑀲𑀺 𑀓𑀸𑀘𑀺𑀤𑁂𑀯 𑀅𑀲𑁆𑀲𑀸𑀲𑀫𑀢𑁆𑀢𑀸 𑁋 ‘𑀦 𑀢𑀸𑀯 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀦 𑀬𑀸𑀯 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀓𑀺𑀜𑁆𑀘𑀺𑀤𑁂𑀯 𑀉𑀤𑀸𑀳𑀭𑀢𑀻’’’𑀢𑀺.

𑁧𑁬𑁫. ‘‘𑀓𑀺𑀁 𑀧𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑀬𑀺 𑀧𑀘𑁆𑀘𑀸𑀲𑀻𑀲𑀢𑀺 [𑀧𑀘𑁆𑀘𑀸𑀲𑀺𑀁𑀲𑀢𑀺 (𑀲𑀻. 𑀲𑁆𑀬𑀸.)]? 𑀤𑁂𑀲𑀺𑀢𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀁 𑀓𑀭𑀺𑀢𑁆𑀯𑀸. 𑀦𑀢𑁆𑀣𑀸𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀲𑀼 𑀆𑀘𑀭𑀺𑀬𑀫𑀼𑀝𑁆𑀞𑀺. 𑀬𑀲𑁆𑀲 𑀦𑀽𑀦, 𑀆𑀦𑀦𑁆𑀤, 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸 ‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑀯𑀸, 𑀲𑁄 𑀦𑀽𑀦, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀓𑀺𑀜𑁆𑀘𑀺𑀤𑁂𑀯 𑀉𑀤𑀸𑀳𑀭𑁂𑀬𑁆𑀬. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀦 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸 ‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑀯𑀸. 𑀲𑀓𑀺𑀁 [𑀓𑀺𑀁 (𑀲𑀻. 𑀧𑀻.)], 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀓𑀺𑀜𑁆𑀘𑀺𑀤𑁂𑀯 𑀉𑀤𑀸𑀳𑀭𑀺𑀲𑁆𑀲𑀢𑀺. 𑀅𑀳𑀁 𑀔𑁄 𑀧𑀦𑀸𑀦𑀦𑁆𑀤, 𑀏𑀢𑀭𑀳𑀺 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀆𑀲𑀻𑀢𑀺𑀓𑁄 𑀫𑁂 𑀯𑀬𑁄 𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀚𑀚𑁆𑀚𑀭𑀲𑀓𑀝𑀁 𑀯𑁂𑀞𑀫𑀺𑀲𑁆𑀲𑀓𑁂𑀦 [𑀯𑁂𑀴𑀼𑀫𑀺𑀲𑁆𑀲𑀓𑁂𑀦 (𑀲𑁆𑀬𑀸.), 𑀯𑁂𑀖𑀫𑀺𑀲𑁆𑀲𑀓𑁂𑀦 (𑀧𑀻.), 𑀯𑁂𑀥𑀫𑀺𑀲𑁆𑀲𑀓𑁂𑀦, 𑀯𑁂𑀔𑀫𑀺𑀲𑁆𑀲𑀓𑁂𑀦 (𑀓.)] 𑀬𑀸𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀯𑁂𑀞𑀫𑀺𑀲𑁆𑀲𑀓𑁂𑀦 𑀫𑀜𑁆𑀜𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀬𑀸𑀧𑁂𑀢𑀺. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑁄 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀏𑀓𑀘𑁆𑀘𑀸𑀦𑀁 𑀯𑁂𑀤𑀦𑀸𑀦𑀁 𑀦𑀺𑀭𑁄𑀥𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀨𑀸𑀲𑀼𑀢𑀭𑁄, 𑀆𑀦𑀦𑁆𑀤, 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀳𑁄𑀢𑀺. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀅𑀢𑁆𑀢𑀤𑀻𑀧𑀸 𑀯𑀺𑀳𑀭𑀣 𑀅𑀢𑁆𑀢𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸, 𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸. 𑀓𑀣𑀜𑁆𑀘𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀤𑀻𑀧𑁄 𑀯𑀺𑀳𑀭𑀢𑀺 𑀅𑀢𑁆𑀢𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄, 𑀥𑀫𑁆𑀫𑀤𑀻𑀧𑁄 𑀥𑀫𑁆𑀫𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀅𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀤𑀻𑀧𑁄 𑀯𑀺𑀳𑀭𑀢𑀺 𑀅𑀢𑁆𑀢𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄, 𑀥𑀫𑁆𑀫𑀤𑀻𑀧𑁄 𑀥𑀫𑁆𑀫𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄. 𑀬𑁂 𑀳𑀺 𑀓𑁂𑀘𑀺, 𑀆𑀦𑀦𑁆𑀤, 𑀏𑀢𑀭𑀳𑀺 𑀯𑀸 𑀫𑀫 𑀯𑀸 𑀅𑀘𑁆𑀘𑀬𑁂𑀦 𑀅𑀢𑁆𑀢𑀤𑀻𑀧𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀅𑀢𑁆𑀢𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸, 𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸, 𑀢𑀫𑀢𑀕𑁆𑀕𑁂 𑀫𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀪𑀯𑀺𑀲𑁆𑀲𑀦𑁆𑀢𑀺 𑀬𑁂 𑀓𑁂𑀘𑀺 𑀲𑀺𑀓𑁆𑀔𑀸𑀓𑀸𑀫𑀸’’𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄.

𑀦𑀺𑀫𑀺𑀢𑁆𑀢𑁄𑀪𑀸𑀲𑀓𑀣𑀸

𑁧𑁬𑁬. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀡𑁆𑀳𑀸𑀳𑀺, 𑀆𑀦𑀦𑁆𑀤, 𑀦𑀺𑀲𑀻𑀤𑀦𑀁, 𑀬𑁂𑀦 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁 [𑀧𑀸𑀯𑀸𑀮𑀁 (𑀘𑁂𑀢𑀺𑀬𑀁 (𑀲𑁆𑀬𑀸.)] 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀤𑀺𑀯𑀸 𑀯𑀺𑀳𑀸𑀭𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀺𑀲𑀻𑀤𑀦𑀁 𑀆𑀤𑀸𑀬 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑁧𑁬𑁭. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀁 [𑀲𑀢𑁆𑀢𑀫𑁆𑀩𑀓𑀁 (𑀧𑀻.)] 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 [𑀆𑀓𑀗𑁆𑀔𑀫𑀸𑀦𑁄 (?)], 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁; 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺 𑁋 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺, 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁; 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺 𑁋 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺, 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺.

𑀫𑀸𑀭𑀬𑀸𑀘𑀦𑀓𑀣𑀸

𑁧𑁬𑁮. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀽 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻 [𑀉𑀢𑁆𑀢𑀸𑀦𑀺𑀁 (𑀓.), 𑀉𑀢𑁆𑀢𑀸𑀦𑀺 (𑀲𑀻. 𑀧𑀻.)] 𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀸𑀯𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀉𑀧𑀸𑀲𑀓𑀸 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀲𑀸𑀯𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀉𑀧𑀸𑀲𑀺𑀓𑀸 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀇𑀤𑁆𑀥𑀁 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀁 𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁, 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀧𑀸𑀧𑀺𑀫, 𑀳𑁄𑀳𑀺, 𑀦 𑀘𑀺𑀭𑀁 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺.

𑀆𑀬𑀼𑀲𑀗𑁆𑀔𑀸𑀭𑀑𑀲𑁆𑀲𑀚𑁆𑀚𑀦𑀁

𑁧𑁬𑁯. 𑀅𑀣 𑀔𑁄 𑀪𑀕𑀯𑀸 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺. 𑀑𑀲𑁆𑀲𑀝𑁆𑀞𑁂 𑀘 𑀪𑀕𑀯𑀢𑀸 𑀆𑀬𑀼𑀲𑀗𑁆𑀔𑀸𑀭𑁂 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺 𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄 [𑀮𑁄𑀫𑀳𑀁𑀲𑁄 (𑀲𑁆𑀬𑀸.)], 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 [𑀤𑁂𑀯𑀤𑀼𑀤𑁆𑀭𑀪𑀺𑀬𑁄 (𑀓.)] 𑀘 𑀨𑀮𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯𑀁, 𑀪𑀯𑀲𑀗𑁆𑀔𑀸𑀭𑀫𑀯𑀲𑁆𑀲𑀚𑀺 𑀫𑀼𑀦𑀺;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺.

𑀫𑀳𑀸𑀪𑀽𑀫𑀺𑀘𑀸𑀮𑀳𑁂𑀢𑀼

𑁧𑁭𑁦. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀫𑀳𑀸 𑀯𑀢𑀸𑀬𑀁 𑀪𑀽𑀫𑀺𑀘𑀸𑀮𑁄; 𑀲𑀼𑀫𑀳𑀸 𑀯𑀢𑀸𑀬𑀁 𑀪𑀽𑀫𑀺𑀘𑀸𑀮𑁄 𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄; 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀼. 𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺?

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀫𑀳𑀸 𑀯𑀢𑀸𑀬𑀁, 𑀪𑀦𑁆𑀢𑁂, 𑀪𑀽𑀫𑀺𑀘𑀸𑀮𑁄; 𑀲𑀼𑀫𑀳𑀸 𑀯𑀢𑀸𑀬𑀁, 𑀪𑀦𑁆𑀢𑁂, 𑀪𑀽𑀫𑀺𑀘𑀸𑀮𑁄 𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄; 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀼. 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺?

𑁧𑁭𑁧. ‘‘𑀅𑀝𑁆𑀞 𑀔𑁄 𑀇𑀫𑁂, 𑀆𑀦𑀦𑁆𑀤, 𑀳𑁂𑀢𑀽, 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬. 𑀓𑀢𑀫𑁂 𑀅𑀝𑁆𑀞? 𑀅𑀬𑀁, 𑀆𑀦𑀦𑁆𑀤, 𑀫𑀳𑀸𑀧𑀣𑀯𑀻 𑀉𑀤𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀉𑀤𑀓𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁, 𑀯𑀸𑀢𑁄 𑀆𑀓𑀸𑀲𑀝𑁆𑀞𑁄. 𑀳𑁄𑀢𑀺 𑀔𑁄 𑀲𑁄, 𑀆𑀦𑀦𑁆𑀤, 𑀲𑀫𑀬𑁄, 𑀬𑀁 𑀫𑀳𑀸𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀫𑀳𑀸𑀯𑀸𑀢𑀸 𑀯𑀸𑀬𑀦𑁆𑀢𑀸 𑀉𑀤𑀓𑀁 𑀓𑀫𑁆𑀧𑁂𑀦𑁆𑀢𑀺. 𑀉𑀤𑀓𑀁 𑀓𑀫𑁆𑀧𑀺𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺. 𑀅𑀬𑀁 𑀧𑀞𑀫𑁄 𑀳𑁂𑀢𑀼 𑀧𑀞𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀲𑀫𑀡𑁄 𑀯𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄, 𑀤𑁂𑀯𑁄 𑀯𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀢𑀲𑁆𑀲 𑀧𑀭𑀺𑀢𑁆𑀢𑀸 𑀧𑀣𑀯𑀻𑀲𑀜𑁆𑀜𑀸 𑀪𑀸𑀯𑀺𑀢𑀸 𑀳𑁄𑀢𑀺, 𑀅𑀧𑁆𑀧𑀫𑀸𑀡𑀸 𑀆𑀧𑁄𑀲𑀜𑁆𑀜𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺 𑀲𑀗𑁆𑀓𑀫𑁆𑀧𑁂𑀢𑀺 𑀲𑀫𑁆𑀧𑀓𑀫𑁆𑀧𑁂𑀢𑀺 𑀲𑀫𑁆𑀧𑀯𑁂𑀥𑁂𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀳𑁂𑀢𑀼 𑀤𑀼𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀢𑀢𑀺𑀬𑁄 𑀳𑁂𑀢𑀼 𑀢𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀸 𑀦𑀺𑀓𑁆𑀔𑀫𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀳𑁂𑀢𑀼 𑀘𑀢𑀼𑀢𑁆𑀣𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀳𑁂𑀢𑀼 𑀧𑀜𑁆𑀘𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀙𑀝𑁆𑀞𑁄 𑀳𑁂𑀢𑀼 𑀙𑀝𑁆𑀞𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀢𑀣𑀸𑀕𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑁆𑀚𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀲𑀢𑁆𑀢𑀫𑁄 𑀳𑁂𑀢𑀼 𑀲𑀢𑁆𑀢𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀢𑀣𑀸𑀕𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀅𑀝𑁆𑀞𑀫𑁄 𑀳𑁂𑀢𑀼 𑀅𑀝𑁆𑀞𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀳𑁂𑀢𑀽, 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺.

𑀅𑀝𑁆𑀞 𑀧𑀭𑀺𑀲𑀸