𑁨. 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀁

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄

𑁯𑁫. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀭𑀽𑀲𑀼 𑀯𑀺𑀳𑀭𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 [𑀓𑀫𑁆𑀫𑀸𑀲𑀤𑀫𑁆𑀫𑀁 𑀦𑀸𑀫 (𑀲𑁆𑀬𑀸.)] 𑀓𑀼𑀭𑀽𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀪𑀦𑁆𑀢𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘, 𑀅𑀣 𑀘 𑀧𑀦 𑀫𑁂 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀻’’𑀢𑀺. ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘, 𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘. 𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘. 𑀏𑀢𑀲𑁆𑀲, 𑀆𑀦𑀦𑁆𑀤, 𑀥𑀫𑁆𑀫𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀬𑀁 𑀧𑀚𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸 𑀓𑀼𑀮𑀕𑀡𑁆𑀞𑀺𑀓𑀚𑀸𑀢𑀸 [𑀕𑀼𑀮𑀸𑀕𑀼𑀡𑁆𑀞𑀺𑀓𑀚𑀸𑀢𑀸 (𑀲𑀻. 𑀧𑀻.), 𑀕𑀼𑀡𑀕𑀡𑁆𑀞𑀺𑀓𑀚𑀸𑀢𑀸 (𑀲𑁆𑀬𑀸.)] 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

𑁯𑁬. ‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

𑁯𑁭. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁯𑁮. ‘‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀚𑀸𑀢𑀺 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑁂𑀯𑀸𑀦𑀁 𑀯𑀸 𑀤𑁂𑀯𑀢𑁆𑀢𑀸𑀬, 𑀕𑀦𑁆𑀥𑀩𑁆𑀩𑀸𑀦𑀁 𑀯𑀸 𑀕𑀦𑁆𑀥𑀩𑁆𑀩𑀢𑁆𑀢𑀸𑀬, 𑀬𑀓𑁆𑀔𑀸𑀦𑀁 𑀯𑀸 𑀬𑀓𑁆𑀔𑀢𑁆𑀢𑀸𑀬, 𑀪𑀽𑀢𑀸𑀦𑀁 𑀯𑀸 𑀪𑀽𑀢𑀢𑁆𑀢𑀸𑀬, 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀫𑀦𑀼𑀲𑁆𑀲𑀢𑁆𑀢𑀸𑀬, 𑀘𑀢𑀼𑀧𑁆𑀧𑀤𑀸𑀦𑀁 𑀯𑀸 𑀘𑀢𑀼𑀧𑁆𑀧𑀤𑀢𑁆𑀢𑀸𑀬, 𑀧𑀓𑁆𑀔𑀻𑀦𑀁 𑀯𑀸 𑀧𑀓𑁆𑀔𑀺𑀢𑁆𑀢𑀸𑀬, 𑀲𑀭𑀻𑀲𑀧𑀸𑀦𑀁 𑀯𑀸 𑀲𑀭𑀻𑀲𑀧𑀢𑁆𑀢𑀸𑀬 [𑀲𑀺𑀭𑀺𑀁𑀲𑀧𑀸𑀦𑀁 𑀲𑀺𑀭𑀺𑀁𑀲𑀧𑀢𑁆𑀢𑀸𑀬 (𑀲𑀻. 𑀲𑁆𑀬𑀸.)], 𑀢𑁂𑀲𑀁 𑀢𑁂𑀲𑀜𑁆𑀘 𑀳𑀺, 𑀆𑀦𑀦𑁆𑀤, 𑀲𑀢𑁆𑀢𑀸𑀦𑀁 𑀢𑀤𑀢𑁆𑀢𑀸𑀬 𑀚𑀸𑀢𑀺 𑀦𑀸𑀪𑀯𑀺𑀲𑁆𑀲. 𑀲𑀩𑁆𑀩𑀲𑁄 𑀚𑀸𑀢𑀺𑀬𑀸 𑀅𑀲𑀢𑀺 𑀚𑀸𑀢𑀺𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀚𑀭𑀸𑀫𑀭𑀡𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀚𑀭𑀸𑀫𑀭𑀡𑀲𑁆𑀲, 𑀬𑀤𑀺𑀤𑀁 𑀚𑀸𑀢𑀺’’.

𑁯𑁯. ‘‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺. 𑀪𑀯𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀪𑀯𑁄 𑀯𑀸 𑀭𑀽𑀧𑀪𑀯𑁄 𑀯𑀸 𑀅𑀭𑀽𑀧𑀪𑀯𑁄 𑀯𑀸, 𑀲𑀩𑁆𑀩𑀲𑁄 𑀪𑀯𑁂 𑀅𑀲𑀢𑀺 𑀪𑀯𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀚𑀸𑀢𑀺 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀚𑀸𑀢𑀺𑀬𑀸, 𑀬𑀤𑀺𑀤𑀁 𑀪𑀯𑁄’’.

𑁧𑁦𑁦. ‘‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄. 𑀉𑀧𑀸𑀤𑀸𑀦𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀼𑀧𑀸𑀤𑀸𑀦𑀁 𑀯𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀯𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀯𑀸 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀯𑀸, 𑀲𑀩𑁆𑀩𑀲𑁄 𑀉𑀧𑀸𑀤𑀸𑀦𑁂 𑀅𑀲𑀢𑀺 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀪𑀯𑀲𑁆𑀲, 𑀬𑀤𑀺𑀤𑀁 𑀉𑀧𑀸𑀤𑀸𑀦𑀁’’.

𑁧𑁦𑁧. ‘‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁. 𑀢𑀡𑁆𑀳𑀸 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸, 𑀲𑀩𑁆𑀩𑀲𑁄 𑀢𑀡𑁆𑀳𑀸𑀬 𑀅𑀲𑀢𑀺 𑀢𑀡𑁆𑀳𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀉𑀧𑀸𑀤𑀸𑀦𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀉𑀧𑀸𑀤𑀸𑀦𑀲𑁆𑀲, 𑀬𑀤𑀺𑀤𑀁 𑀢𑀡𑁆𑀳𑀸’’.

𑁧𑁦𑁨. ‘‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸. 𑀯𑁂𑀤𑀦𑀸 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀲𑀩𑁆𑀩𑀲𑁄 𑀯𑁂𑀤𑀦𑀸𑀬 𑀅𑀲𑀢𑀺 𑀯𑁂𑀤𑀦𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀢𑀡𑁆𑀳𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀢𑀡𑁆𑀳𑀸𑀬, 𑀬𑀤𑀺𑀤𑀁 𑀯𑁂𑀤𑀦𑀸’’.

𑁧𑁦𑁩. ‘‘𑀇𑀢𑀺 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸, 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄, 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑁄. 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺.

𑁧𑁦𑁪. ‘‘‘𑀆𑀭𑀓𑁆𑀔𑀸𑀥𑀺𑀓𑀭𑀡𑀁 [𑀆𑀭𑀓𑁆𑀔𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 (𑀲𑁆𑀬𑀸.)] 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺. 𑀆𑀭𑀓𑁆𑀔𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀆𑀭𑀓𑁆𑀔𑁂 𑀅𑀲𑀢𑀺 𑀆𑀭𑀓𑁆𑀔𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑁂𑀬𑁆𑀬𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸𑀦𑀁 𑀅𑀦𑁂𑀓𑁂𑀲𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑁆𑀪𑀯𑀸𑀬 𑀬𑀤𑀺𑀤𑀁 𑀆𑀭𑀓𑁆𑀔𑁄.

𑁧𑁦𑁫. ‘‘‘𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑁄. 𑀫𑀘𑁆𑀙𑀭𑀺𑀬𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀫𑀘𑁆𑀙𑀭𑀺𑀬𑁂 𑀅𑀲𑀢𑀺 𑀫𑀘𑁆𑀙𑀭𑀺𑀬𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀆𑀭𑀓𑁆𑀔𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀆𑀭𑀓𑁆𑀔𑀲𑁆𑀲, 𑀬𑀤𑀺𑀤𑀁 𑀫𑀘𑁆𑀙𑀭𑀺𑀬𑀁’’.

𑁧𑁦𑁬. ‘‘‘𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁. 𑀧𑀭𑀺𑀕𑁆𑀕𑀳𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀧𑀭𑀺𑀕𑁆𑀕𑀳𑁂 𑀅𑀲𑀢𑀺 𑀧𑀭𑀺𑀕𑁆𑀕𑀳𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀫𑀘𑁆𑀙𑀭𑀺𑀬𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀫𑀘𑁆𑀙𑀭𑀺𑀬𑀲𑁆𑀲, 𑀬𑀤𑀺𑀤𑀁 𑀧𑀭𑀺𑀕𑁆𑀕𑀳𑁄’’.

𑁧𑁦𑁭. ‘‘‘𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄. 𑀅𑀚𑁆𑀛𑁄𑀲𑀸𑀦𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀅𑀚𑁆𑀛𑁄𑀲𑀸𑀦𑁂 𑀅𑀲𑀢𑀺 𑀅𑀚𑁆𑀛𑁄𑀲𑀸𑀦𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀧𑀭𑀺𑀕𑁆𑀕𑀳𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀧𑀭𑀺𑀕𑁆𑀕𑀳𑀲𑁆𑀲 𑁋 𑀬𑀤𑀺𑀤𑀁 𑀅𑀚𑁆𑀛𑁄𑀲𑀸𑀦𑀁’’.

𑁧𑁦𑁮. ‘‘‘𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁. 𑀙𑀦𑁆𑀤𑀭𑀸𑀕𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑁂 𑀅𑀲𑀢𑀺 𑀙𑀦𑁆𑀤𑀭𑀸𑀕𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀅𑀚𑁆𑀛𑁄𑀲𑀸𑀦𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀅𑀚𑁆𑀛𑁄𑀲𑀸𑀦𑀲𑁆𑀲, 𑀬𑀤𑀺𑀤𑀁 𑀙𑀦𑁆𑀤𑀭𑀸𑀕𑁄’’.

𑁧𑁦𑁯. ‘‘‘𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄. 𑀯𑀺𑀦𑀺𑀘𑁆𑀙𑀬𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀯𑀺𑀦𑀺𑀘𑁆𑀙𑀬𑁂 𑀅𑀲𑀢𑀺 𑀯𑀺𑀦𑀺𑀘𑁆𑀙𑀬𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀙𑀦𑁆𑀤𑀭𑀸𑀕𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀙𑀦𑁆𑀤𑀭𑀸𑀕𑀲𑁆𑀲, 𑀬𑀤𑀺𑀤𑀁 𑀯𑀺𑀦𑀺𑀘𑁆𑀙𑀬𑁄’’.

𑁧𑁧𑁦. ‘‘‘𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄. 𑀮𑀸𑀪𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀮𑀸𑀪𑁂 𑀅𑀲𑀢𑀺 𑀮𑀸𑀪𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀯𑀺𑀦𑀺𑀘𑁆𑀙𑀬𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀯𑀺𑀦𑀺𑀘𑁆𑀙𑀬𑀲𑁆𑀲, 𑀬𑀤𑀺𑀤𑀁 𑀮𑀸𑀪𑁄’’.

𑁧𑁧𑁧. ‘‘‘𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄. 𑀧𑀭𑀺𑀬𑁂𑀲𑀦𑀸 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀧𑀭𑀺𑀬𑁂𑀲𑀦𑀸𑀬 𑀅𑀲𑀢𑀺 𑀧𑀭𑀺𑀬𑁂𑀲𑀦𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀮𑀸𑀪𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀮𑀸𑀪𑀲𑁆𑀲, 𑀬𑀤𑀺𑀤𑀁 𑀧𑀭𑀺𑀬𑁂𑀲𑀦𑀸’’.

𑁧𑁧𑁨. ‘‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸. 𑀢𑀡𑁆𑀳𑀸 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸, 𑀲𑀩𑁆𑀩𑀲𑁄 𑀢𑀡𑁆𑀳𑀸𑀬 𑀅𑀲𑀢𑀺 𑀢𑀡𑁆𑀳𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀧𑀭𑀺𑀬𑁂𑀲𑀦𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀧𑀭𑀺𑀬𑁂𑀲𑀦𑀸𑀬, 𑀬𑀤𑀺𑀤𑀁 𑀢𑀡𑁆𑀳𑀸. 𑀇𑀢𑀺 𑀔𑁄, 𑀆𑀦𑀦𑁆𑀤, 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 [𑀇𑀫𑁂 𑀥𑀫𑁆𑀫𑀸 (𑀓.)] 𑀤𑁆𑀯𑀬𑁂𑀦 𑀯𑁂𑀤𑀦𑀸𑀬 𑀏𑀓𑀲𑀫𑁄𑀲𑀭𑀡𑀸 𑀪𑀯𑀦𑁆𑀢𑀺’’.

𑁧𑁧𑁩. ‘‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 ‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸. 𑀨𑀲𑁆𑀲𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑁄𑀢𑀲𑀫𑁆𑀨𑀲𑁆𑀲𑁄 𑀖𑀸𑀦𑀲𑀫𑁆𑀨𑀲𑁆𑀲𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀲𑀩𑁆𑀩𑀲𑁄 𑀨𑀲𑁆𑀲𑁂 𑀅𑀲𑀢𑀺 𑀨𑀲𑁆𑀲𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀯𑁂𑀤𑀦𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀯𑁂𑀤𑀦𑀸𑀬, 𑀬𑀤𑀺𑀤𑀁 𑀨𑀲𑁆𑀲𑁄’’.

𑁧𑁧𑁪. ‘‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄. 𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀦𑀸𑀫𑀓𑀸𑀬𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼 𑀆𑀓𑀸𑀭𑁂𑀲𑀼 𑀢𑁂𑀲𑀼 𑀮𑀺𑀗𑁆𑀕𑁂𑀲𑀼 𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀭𑀽𑀧𑀓𑀸𑀬𑁂 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀭𑀽𑀧𑀓𑀸𑀬𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼 𑀆𑀓𑀸𑀭𑁂𑀲𑀼…𑀧𑁂… 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀦𑀸𑀫𑀓𑀸𑀬𑁂 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺…𑀧𑁂… 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀦𑀸𑀫𑀓𑀸𑀬𑀲𑁆𑀲 𑀘 𑀭𑀽𑀧𑀓𑀸𑀬𑀲𑁆𑀲 𑀘 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼 𑀆𑀓𑀸𑀭𑁂𑀲𑀼…𑀧𑁂… 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀸 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀯𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺…𑀧𑁂… 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀦𑀸𑀫𑀭𑀽𑀧𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼 𑀆𑀓𑀸𑀭𑁂𑀲𑀼 …𑀧𑁂… 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀨𑀲𑁆𑀲𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀨𑀲𑁆𑀲𑀲𑁆𑀲, 𑀬𑀤𑀺𑀤𑀁 𑀦𑀸𑀫𑀭𑀽𑀧𑀁’’.

𑁧𑁧𑁫. ‘‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀦 𑀑𑀓𑁆𑀓𑀫𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀫𑀼𑀘𑁆𑀘𑀺𑀲𑁆𑀲𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑁄𑀓𑁆𑀓𑀫𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀇𑀢𑁆𑀣𑀢𑁆𑀢𑀸𑀬 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀯𑁄𑀘𑁆𑀙𑀺𑀚𑁆𑀚𑀺𑀲𑁆𑀲𑀣 𑀓𑀼𑀫𑀸𑀭𑀓𑀲𑁆𑀲 𑀯𑀸 𑀓𑀼𑀫𑀸𑀭𑀺𑀓𑀸𑀬 𑀯𑀸, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀦𑀸𑀫𑀭𑀽𑀧𑀲𑁆𑀲 𑁋 𑀬𑀤𑀺𑀤𑀁 𑀯𑀺𑀜𑁆𑀜𑀸𑀡𑀁’’.

𑁧𑁧𑁬. ‘‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀫𑀭𑀽𑀧𑁂 𑀧𑀢𑀺𑀝𑁆𑀞𑀁 𑀦 𑀮𑀪𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 [𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀬𑀤𑀺𑀤𑀁 𑀦𑀸𑀫𑀭𑀽𑀧𑀁. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀚𑀸𑀬𑁂𑀣 𑀯𑀸 𑀚𑀻𑀬𑁂𑀣 [𑀚𑀺𑀬𑁆𑀬𑁂𑀣 (𑀓.)] 𑀯𑀸 𑀫𑀻𑀬𑁂𑀣 [𑀫𑀺𑀬𑁆𑀬𑁂𑀣 (𑀓.)] 𑀯𑀸 𑀘𑀯𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸. 𑀏𑀢𑁆𑀢𑀸𑀯𑀢𑀸 𑀅𑀥𑀺𑀯𑀘𑀦𑀧𑀣𑁄, 𑀏𑀢𑁆𑀢𑀸𑀯𑀢𑀸 𑀦𑀺𑀭𑀼𑀢𑁆𑀢𑀺𑀧𑀣𑁄, 𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀢𑁆𑀢𑀺𑀧𑀣𑁄, 𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀸𑀯𑀘𑀭𑀁, 𑀏𑀢𑁆𑀢𑀸𑀯𑀢𑀸 𑀯𑀝𑁆𑀝𑀁 𑀯𑀢𑁆𑀢𑀢𑀺 𑀇𑀢𑁆𑀣𑀢𑁆𑀢𑀁 𑀧𑀜𑁆𑀜𑀸𑀧𑀦𑀸𑀬 𑀬𑀤𑀺𑀤𑀁 𑀦𑀸𑀫𑀭𑀽𑀧𑀁 𑀲𑀳 𑀯𑀺𑀜𑁆𑀜𑀸𑀡𑁂𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸 𑀧𑀯𑀢𑁆𑀢𑀢𑀺.

𑀅𑀢𑁆𑀢𑀧𑀜𑁆𑀜𑀢𑁆𑀢𑀺

𑁧𑁧𑁭. ‘‘𑀓𑀺𑀢𑁆𑀢𑀸𑀯𑀢𑀸 𑀘, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺? 𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘‘𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’’𑀢𑀺. 𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺.

𑁧𑁧𑁮. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 [𑀭𑀽𑀧𑀻 (𑀓.)] 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 [𑀭𑀽𑀧𑀻 (𑀓.)] 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 [𑀅𑀭𑀽𑀧𑀻 (𑀓.)] 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 [𑀅𑀭𑀽𑀧𑀻 (𑀓.)] 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺.

𑀦𑀅𑀢𑁆𑀢𑀧𑀜𑁆𑀜𑀢𑁆𑀢𑀺

𑁧𑁧𑁯. ‘‘𑀓𑀺𑀢𑁆𑀢𑀸𑀯𑀢𑀸 𑀘, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺? 𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’𑀢𑀺. 𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺.

𑁧𑁨𑁦. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺.

𑀅𑀢𑁆𑀢𑀲𑀫𑀦𑀼𑀧𑀲𑁆𑀲𑀦𑀸

𑁧𑁨𑁧. ‘‘𑀓𑀺𑀢𑁆𑀢𑀸𑀯𑀢𑀸 𑀘, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀯𑁂𑀤𑀦𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺. ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸’𑀢𑀺 𑀇𑀢𑀺 𑀯𑀸 𑀳𑀺, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺. ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸, 𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺 𑀇𑀢𑀺 𑀯𑀸 𑀳𑀺, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁨𑁨. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀢𑀺𑀲𑁆𑀲𑁄 𑀔𑁄 𑀇𑀫𑀸, 𑀆𑀯𑀼𑀲𑁄, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀇𑀫𑀸𑀲𑀁 𑀔𑁄 𑀢𑁆𑀯𑀁 𑀢𑀺𑀲𑁆𑀲𑀦𑁆𑀦𑀁 𑀯𑁂𑀤𑀦𑀸𑀦𑀁 𑀓𑀢𑀫𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀲𑀻’𑀢𑀺? 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺; 𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺; 𑀤𑀼𑀓𑁆𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺; 𑀅𑀤𑀼𑀓𑁆𑀔𑀫𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺.

𑁧𑁨𑁩. ‘‘𑀲𑀼𑀔𑀸𑀧𑀺 𑀔𑁄, 𑀆𑀦𑀦𑁆𑀤, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀤𑀼𑀓𑁆𑀔𑀸𑀧𑀺 𑀔𑁄, 𑀆𑀦𑀦𑁆𑀤, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀔𑁄, 𑀆𑀦𑀦𑁆𑀤, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀢𑀲𑁆𑀲 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀲𑁆𑀲 ‘𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀬𑁂𑀯 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 ‘𑀩𑁆𑀬𑀕𑀸 [𑀩𑁆𑀬𑀕𑁆𑀕𑀸 (𑀲𑀻. 𑀓.)] 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀲𑁆𑀲 ‘𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀬𑁂𑀯 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 ‘𑀩𑁆𑀬𑀕𑀸 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀲𑁆𑀲 ‘𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀬𑁂𑀯 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 ‘𑀩𑁆𑀬𑀕𑀸 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀇𑀢𑀺 𑀲𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀦𑀺𑀘𑁆𑀘𑀲𑀼𑀔𑀤𑀼𑀓𑁆𑀔𑀯𑁄𑀓𑀺𑀡𑁆𑀡𑀁 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀢𑁂𑀦 𑀧𑁂𑀢𑀁 𑀦𑀓𑁆𑀔𑀫𑀢𑀺 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀼𑀁.

𑁧𑁨𑁪. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀬𑀢𑁆𑀣 𑀧𑀦𑀸𑀯𑀼𑀲𑁄, 𑀲𑀩𑁆𑀩𑀲𑁄 𑀯𑁂𑀤𑀬𑀺𑀢𑀁 𑀦𑀢𑁆𑀣𑀺 𑀅𑀧𑀺 𑀦𑀼 𑀔𑁄, 𑀢𑀢𑁆𑀣 ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀲𑀺𑀬𑀸’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀢𑁂𑀦 𑀧𑁂𑀢𑀁 𑀦𑀓𑁆𑀔𑀫𑀢𑀺 𑁋 ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀼𑀁.

𑁧𑁨𑁫. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸, 𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀯𑁂𑀤𑀦𑀸 𑀘 𑀳𑀺, 𑀆𑀯𑀼𑀲𑁄, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁. 𑀲𑀩𑁆𑀩𑀲𑁄 𑀯𑁂𑀤𑀦𑀸𑀬 𑀅𑀲𑀢𑀺 𑀯𑁂𑀤𑀦𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀢𑀢𑁆𑀣 ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀲𑀺𑀬𑀸’’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀢𑁂𑀦 𑀧𑁂𑀢𑀁 𑀦𑀓𑁆𑀔𑀫𑀢𑀺 𑁋 ‘‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸, 𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀼𑀁.

𑁧𑁨𑁬. ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀦𑁂𑀯 𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀦𑁄𑀧𑀺 ‘𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁄 𑀏𑀯𑀁 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺, 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀧𑀭𑀺𑀢𑀲𑁆𑀲𑀁 [𑀅𑀧𑀭𑀺𑀢𑀲𑁆𑀲𑀦𑀁 (𑀓.)] 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀁 𑀬𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 [𑀇𑀢𑀺 𑀲𑀸 (𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀁)] 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀥𑀺𑀯𑀘𑀦𑀁 𑀬𑀸𑀯𑀢𑀸 𑀅𑀥𑀺𑀯𑀘𑀦𑀧𑀣𑁄, 𑀬𑀸𑀯𑀢𑀸 𑀦𑀺𑀭𑀼𑀢𑁆𑀢𑀺 𑀬𑀸𑀯𑀢𑀸 𑀦𑀺𑀭𑀼𑀢𑁆𑀢𑀺𑀧𑀣𑁄, 𑀬𑀸𑀯𑀢𑀸 𑀧𑀜𑁆𑀜𑀢𑁆𑀢𑀺 𑀬𑀸𑀯𑀢𑀸 𑀧𑀜𑁆𑀜𑀢𑁆𑀢𑀺𑀧𑀣𑁄, 𑀬𑀸𑀯𑀢𑀸 𑀧𑀜𑁆𑀜𑀸 𑀬𑀸𑀯𑀢𑀸 𑀧𑀜𑁆𑀜𑀸𑀯𑀘𑀭𑀁, 𑀬𑀸𑀯𑀢𑀸 𑀯𑀝𑁆𑀝𑀁 [𑀬𑀸𑀯𑀢𑀸 𑀯𑀝𑁆𑀝𑀁 𑀯𑀝𑁆𑀝𑀢𑀺 (𑀓. 𑀲𑀻.)], 𑀬𑀸𑀯𑀢𑀸 𑀯𑀝𑁆𑀝𑀢𑀺 [𑀬𑀸𑀯𑀢𑀸 𑀯𑀝𑁆𑀝𑀁 𑀯𑀝𑁆𑀝𑀢𑀺 (𑀓. 𑀲𑀻.)], 𑀢𑀤𑀪𑀺𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀪𑀺𑀓𑁆𑀔𑀼, 𑀢𑀤𑀪𑀺𑀜𑁆𑀜𑀸𑀯𑀺𑀫𑀼𑀢𑁆𑀢𑀁 𑀪𑀺𑀓𑁆𑀔𑀼𑀁 ‘𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁.

𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺

𑁧𑁨𑁭. ‘‘𑀲𑀢𑁆𑀢 𑀔𑁄, 𑀆𑀦𑀦𑁆𑀤 [𑀲𑀢𑁆𑀢 𑀔𑁄 𑀇𑀫𑀸 𑀆𑀦𑀦𑁆𑀤 (𑀓. 𑀲𑀻. 𑀲𑁆𑀬𑀸.)], 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀤𑁆𑀯𑁂 𑀆𑀬𑀢𑀦𑀸𑀦𑀺. 𑀓𑀢𑀫𑀸 𑀲𑀢𑁆𑀢? 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸, 𑀏𑀓𑀘𑁆𑀘𑁂 𑀘 𑀤𑁂𑀯𑀸, 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀅𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸. 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀆𑀪𑀲𑁆𑀲𑀭𑀸. 𑀅𑀬𑀁 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸. 𑀅𑀬𑀁 𑀘𑀢𑀼𑀢𑁆𑀣𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀧𑀜𑁆𑀘𑀫𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀙𑀝𑁆𑀞𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀲𑀢𑁆𑀢𑀫𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀫𑁂𑀯 𑀤𑀼𑀢𑀺𑀬𑀁.

𑁧𑁨𑁮. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑀸𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸, 𑀏𑀓𑀘𑁆𑀘𑁂 𑀘 𑀤𑁂𑀯𑀸, 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀬𑁄 𑀦𑀼 𑀔𑁄, 𑀆𑀦𑀦𑁆𑀤, 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀅𑀢𑁆𑀣𑀗𑁆𑀕𑀫𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺, 𑀓𑀮𑁆𑀮𑀁 𑀦𑀼 𑀢𑁂𑀦 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’…𑀧𑁂… ‘‘𑀢𑀢𑁆𑀭𑀸𑀦𑀦𑁆𑀤, 𑀬𑀫𑀺𑀤𑀁 𑀅𑀲𑀜𑁆𑀜𑀲𑀢𑁆𑀢𑀸𑀬𑀢𑀦𑀁. 𑀬𑁄 𑀦𑀼 𑀔𑁄, 𑀆𑀦𑀦𑁆𑀤, 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀅𑀢𑁆𑀣𑀗𑁆𑀕𑀫𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺, 𑀓𑀮𑁆𑀮𑀁 𑀦𑀼 𑀢𑁂𑀦 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑀫𑀺𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀬𑁄 𑀦𑀼 𑀔𑁄, 𑀆𑀦𑀦𑁆𑀤, 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀅𑀢𑁆𑀣𑀗𑁆𑀕𑀫𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺, 𑀓𑀮𑁆𑀮𑀁 𑀦𑀼 𑀢𑁂𑀦 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑀸𑀲𑀜𑁆𑀘 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀦𑀁 𑀇𑀫𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀆𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄.

𑀅𑀝𑁆𑀞 𑀯𑀺𑀫𑁄𑀓𑁆𑀔𑀸

𑁧𑁨𑁯. ‘‘𑀅𑀝𑁆𑀞 𑀔𑁄 𑀇𑀫𑁂, 𑀆𑀦𑀦𑁆𑀤, 𑀯𑀺𑀫𑁄𑀓𑁆𑀔𑀸. 𑀓𑀢𑀫𑁂 𑀅𑀝𑁆𑀞? 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀬𑀁 𑀧𑀞𑀫𑁄 𑀯𑀺𑀫𑁄𑀓𑁆𑀔𑁄. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀬𑀁 𑀤𑀼𑀢𑀺𑀬𑁄 𑀯𑀺𑀫𑁄𑀓𑁆𑀔𑁄. 𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀬𑀁 𑀢𑀢𑀺𑀬𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀧𑀜𑁆𑀘𑀫𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀙𑀝𑁆𑀞𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸’𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀲𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀅𑀝𑁆𑀞𑀫𑁄 𑀯𑀺𑀫𑁄𑀓𑁆𑀔𑁄. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸.

𑁧𑁩𑁦. ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀅𑀦𑀼𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀧𑀝𑀺𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀲𑀫𑀸𑀧𑀚𑁆𑀚𑀢𑀺𑀧𑀺 𑀯𑀼𑀝𑁆𑀞𑀸𑀢𑀺𑀧𑀺. 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀇𑀫𑀸𑀬 𑀘 𑀆𑀦𑀦𑁆𑀤 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀬𑀸 𑀅𑀜𑁆𑀜𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀧𑀡𑀻𑀢𑀢𑀭𑀸 𑀯𑀸 𑀦𑀢𑁆𑀣𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.