𑁧. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀁
𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸
𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀓𑀭𑁂𑀭𑀺𑀓𑀼𑀝𑀺𑀓𑀸𑀬𑀁. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀻 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄’’𑀢𑀺.
𑁨. 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸; 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺?
𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀻 𑀓𑀣𑀸 𑀉𑀤𑀧𑀸𑀤𑀺 𑁋 ‘𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄’𑀢𑀺. 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸. 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.
𑁩. ‘‘𑀇𑀘𑁆𑀙𑁂𑀬𑁆𑀬𑀸𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀢𑀼’’𑀦𑁆𑀢𑀺? ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄; 𑀬𑀁 𑀪𑀕𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬, 𑀪𑀕𑀯𑀢𑁄 𑀲𑀼𑀢𑁆𑀯𑀸 [𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸 (𑀲𑁆𑀬𑀸.)] 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣,𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋
𑁪. ‘‘𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀬𑀁 [𑀏𑀓𑀦𑀯𑀼𑀢𑁄 𑀓𑀧𑁆𑀧𑁄 (𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 [𑀏𑀓𑀢𑀺𑀁 𑀲𑀓𑀧𑁆𑀧𑁄 (𑀲𑀻.) 𑀏𑀓𑀢𑀺𑀁 𑀲𑁄 𑀓𑀧𑁆𑀧𑁄 (𑀲𑁆𑀬𑀸. 𑀓𑀁. 𑀧𑀻.)] 𑀬𑀁 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀯𑁂𑀲𑁆𑀲𑀪𑀽 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 [𑀇𑀫𑀲𑁆𑀫𑀺𑀁 (𑀓𑀢𑁆𑀣𑀘𑀻)] 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀅𑀳𑀁 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄.
𑁫. ‘‘𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀲𑀺𑀔𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀯𑁂𑀲𑁆𑀲𑀪𑀽, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀓𑀓𑀼𑀲𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀤𑀧𑀸𑀤𑀺. 𑀓𑁄𑀡𑀸𑀕𑀫𑀦𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀤𑀧𑀸𑀤𑀺. 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀤𑀧𑀸𑀤𑀺. 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺𑀁, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀧𑁆𑀧𑀦𑁆𑀦𑁄.
𑁬. ‘‘𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀲𑀺𑀔𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀯𑁂𑀲𑁆𑀲𑀪𑀽, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀓𑀓𑀼𑀲𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀲𑁆𑀲𑀧𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀓𑁄𑀡𑀸𑀕𑀫𑀦𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀲𑁆𑀲𑀧𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀲𑁆𑀲𑀧𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺𑀁.
𑁭. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀧𑁆𑀧𑀓𑀁 𑀆𑀬𑀼𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁; 𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄.
𑁮. ‘‘𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀸𑀝𑀮𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀲𑀺𑀔𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀼𑀡𑁆𑀟𑀭𑀻𑀓𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀯𑁂𑀲𑁆𑀲𑀪𑀽, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀸𑀮𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀓𑀓𑀼𑀲𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀺𑀭𑀻𑀲𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀓𑁄𑀡𑀸𑀕𑀫𑀦𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀤𑀼𑀫𑁆𑀩𑀭𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀺𑀕𑁆𑀭𑁄𑀥𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀲𑁆𑀲𑀢𑁆𑀣𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄.
𑁯. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑀡𑁆𑀟𑀢𑀺𑀲𑁆𑀲𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀺𑀪𑀽𑀲𑀫𑁆𑀪𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑁄𑀡𑀼𑀢𑁆𑀢𑀭𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀺𑀥𑀼𑀭𑀲𑀜𑁆𑀚𑀻𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀲𑀼𑀢𑁆𑀢𑀭𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀺𑀲𑁆𑀲𑀪𑀸𑀭𑀤𑁆𑀯𑀸𑀚𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁.
𑁧𑁦. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.
‘‘𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀢𑁆𑀢𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.
‘‘𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀢𑁆𑀢𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.
‘‘𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀘𑀢𑁆𑀢𑀸𑀮𑀻𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.
‘‘𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.
‘‘𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.
‘‘𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.
𑁧𑁧. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑁄𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑁂𑀫𑀗𑁆𑀓𑀭𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀉𑀧𑀲𑀦𑁆𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀼𑀤𑁆𑀥𑀺𑀚𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑁄𑀢𑁆𑀣𑀺𑀚𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀆𑀦𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄.
𑁧𑁨. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺 [𑀚𑀦𑁂𑀢𑁆𑀢𑀻 (𑀲𑁆𑀬𑀸.)]. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.
‘‘𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀭𑀼𑀡𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀧𑀪𑀸𑀯𑀢𑀻 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀅𑀭𑀼𑀡𑀲𑁆𑀲 𑀭𑀜𑁆𑀜𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.
‘‘𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀼𑀧𑁆𑀧𑀢𑀺𑀢𑁄 𑀦𑀸𑀫 [𑀲𑀼𑀧𑁆𑀧𑀢𑀻𑀢𑁄 𑀦𑀸𑀫 (𑀲𑁆𑀬𑀸.)] 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀯𑀲𑁆𑀲𑀯𑀢𑀻 𑀦𑀸𑀫 [𑀬𑀲𑀯𑀢𑀻 𑀦𑀸𑀫 (𑀲𑁆𑀬𑀸. 𑀧𑀻.)] 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀲𑀼𑀧𑁆𑀧𑀢𑀺𑀢𑀲𑁆𑀲 𑀭𑀜𑁆𑀜𑁄 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.
‘‘𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀺𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀅𑀳𑁄𑀲𑀺. 𑀯𑀺𑀲𑀸𑀔𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀔𑁂𑀫𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀔𑁂𑀫𑀲𑁆𑀲 𑀭𑀜𑁆𑀜𑁄 𑀔𑁂𑀫𑀯𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.
‘‘𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑀜𑁆𑀜𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀅𑀳𑁄𑀲𑀺. 𑀉𑀢𑁆𑀢𑀭𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀲𑁄𑀪𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄𑀪𑀲𑁆𑀲 𑀭𑀜𑁆𑀜𑁄 𑀲𑁄𑀪𑀯𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.
‘‘𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀅𑀳𑁄𑀲𑀺. 𑀥𑀦𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀓𑀺𑀓𑀻 𑀦𑀸𑀫 [𑀓𑀺𑀁 𑀓𑀻 𑀦𑀸𑀫 (𑀲𑁆𑀬𑀸.)] 𑀭𑀸𑀚𑀸 𑀅𑀳𑁄𑀲𑀺. 𑀓𑀺𑀓𑀺𑀲𑁆𑀲 𑀭𑀜𑁆𑀜𑁄 𑀩𑀸𑀭𑀸𑀡𑀲𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.
‘‘𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.
𑁧𑁩. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸. 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’’𑀢𑀺.
‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲𑁂𑀯 𑀦𑀼 𑀔𑁄 𑀏𑀲𑀸 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺, 𑀉𑀤𑀸𑀳𑀼 𑀤𑁂𑀯𑀢𑀸 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀬𑁂𑀦 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’’𑀢𑀺. 𑀅𑀬𑀜𑁆𑀘 𑀳𑀺𑀤𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺.
𑁧𑁪. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸; 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺?
𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀬𑀁 𑀅𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺 𑁋 ‘‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’𑀢𑀺. 𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲𑁂𑀯 𑀦𑀼 𑀔𑁄 𑀏𑀲𑀸 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’𑀢𑀺. 𑀉𑀤𑀸𑀳𑀼 𑀤𑁂𑀯𑀢𑀸 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀬𑁂𑀦 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺? 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.
𑁧𑁫. ‘‘𑀢𑀣𑀸𑀕𑀢𑀲𑁆𑀲𑁂𑀯𑁂𑀲𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺. 𑀤𑁂𑀯𑀢𑀸𑀧𑀺 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀬𑁂𑀦 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺.
‘‘𑀇𑀘𑁆𑀙𑁂𑀬𑁆𑀬𑀸𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀢𑀼’’𑀦𑁆𑀢𑀺? ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄; 𑀬𑀁 𑀪𑀕𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬, 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋
𑁧𑁬. ‘‘𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀬𑀁 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀸𑀝𑀮𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑀡𑁆𑀟𑀢𑀺𑀲𑁆𑀲𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑁄𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.
𑀩𑁄𑀥𑀺𑀲𑀢𑁆𑀢𑀥𑀫𑁆𑀫𑀢𑀸
𑁧𑁭. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁧𑁮. ‘‘𑀥𑀫𑁆𑀫𑀢𑀸, 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺. 𑀅𑀣 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑀸𑀧𑀺 𑀢𑀸 𑀮𑁄𑀓𑀦𑁆𑀢𑀭𑀺𑀓𑀸 𑀅𑀖𑀸 𑀅𑀲𑀁𑀯𑀼𑀢𑀸 𑀅𑀦𑁆𑀥𑀓𑀸𑀭𑀸 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸, 𑀬𑀢𑁆𑀣 𑀧𑀺𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀺, 𑀢𑀢𑁆𑀣𑀧𑀺 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸, 𑀢𑁂𑀧𑀺 𑀢𑁂𑀦𑁄𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀺 𑁋 ‘𑀅𑀜𑁆𑀜𑁂𑀧𑀺 𑀓𑀺𑀭, 𑀪𑁄, 𑀲𑀦𑁆𑀢𑀺 𑀲𑀢𑁆𑀢𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁧𑁯. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀘𑀢𑁆𑀢𑀸𑀭𑁄 𑀦𑀁 𑀤𑁂𑀯𑀧𑀼𑀢𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 [𑀘𑀸𑀢𑀼𑀤𑁆𑀤𑀺𑀲𑀁 (𑀲𑁆𑀬𑀸.)] 𑀭𑀓𑁆𑀔𑀸𑀬 𑀉𑀧𑀕𑀘𑁆𑀙𑀦𑁆𑀢𑀺 𑁋 ‘𑀫𑀸 𑀦𑀁 𑀩𑁄𑀥𑀺𑀲𑀢𑁆𑀢𑀁 𑀯𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑀁 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀓𑁄𑀘𑀺 𑀯𑀸 𑀯𑀺𑀳𑁂𑀞𑁂𑀲𑀻’𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁦. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀧𑀓𑀢𑀺𑀬𑀸 𑀲𑀻𑀮𑀯𑀢𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺, 𑀯𑀺𑀭𑀢𑀸 𑀧𑀸𑀡𑀸𑀢𑀺𑀧𑀸𑀢𑀸, 𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸, 𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸, 𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁧. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀼𑀭𑀺𑀲𑁂𑀲𑀼 𑀫𑀸𑀦𑀲𑀁 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢𑀁, 𑀅𑀦𑀢𑀺𑀓𑁆𑀓𑀫𑀦𑀻𑀬𑀸 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀭𑀢𑁆𑀢𑀘𑀺𑀢𑁆𑀢𑁂𑀦. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁨. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀮𑀸𑀪𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁. 𑀲𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁩. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀓𑁄𑀘𑀺𑀤𑁂𑀯 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀲𑀼𑀔𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑀸, 𑀩𑁄𑀥𑀺𑀲𑀢𑁆𑀢𑀜𑁆𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀢𑁆𑀭𑀸𑀲𑁆𑀲 [𑀢𑀢𑁆𑀭𑀲𑁆𑀲 (𑀲𑁆𑀬𑀸.)] 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀳𑀢𑁆𑀣𑁂 𑀓𑀭𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬 𑁋 ‘𑀅𑀬𑀁 𑀔𑁄 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀓𑁄𑀘𑀺𑀤𑁂𑀯 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑀸, 𑀩𑁄𑀥𑀺𑀲𑀢𑁆𑀢𑀜𑁆𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁪. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀚𑀸𑀢𑁂 𑀩𑁄𑀥𑀺𑀲𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀸𑀮𑀗𑁆𑀓𑀭𑁄𑀢𑀺 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁫. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀯 𑀯𑀸 𑀤𑀲 𑀯𑀸 𑀫𑀸𑀲𑁂 𑀕𑀩𑁆𑀪𑀁 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀦𑁆𑀢𑀺, 𑀦 𑀳𑁂𑀯𑀁 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀤𑀲𑁂𑀯 𑀫𑀸𑀲𑀸𑀦𑀺 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁬. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀦𑀺𑀧𑀦𑁆𑀦𑀸 𑀯𑀸 𑀯𑀺𑀚𑀸𑀬𑀦𑁆𑀢𑀺, 𑀦 𑀳𑁂𑀯𑀁 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀞𑀺𑀢𑀸𑀯 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁭. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀤𑁂𑀯𑀸 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁮. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀧𑁆𑀧𑀢𑁆𑀢𑁄𑀯 𑀩𑁄𑀥𑀺𑀲𑀢𑁆𑀢𑁄 𑀧𑀣𑀯𑀺𑀁 𑀳𑁄𑀢𑀺, 𑀘𑀢𑁆𑀢𑀸𑀭𑁄 𑀦𑀁 𑀤𑁂𑀯𑀧𑀼𑀢𑁆𑀢𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀫𑀸𑀢𑀼 𑀧𑀼𑀭𑀢𑁄 𑀞𑀧𑁂𑀦𑁆𑀢𑀺 𑁋 ‘𑀅𑀢𑁆𑀢𑀫𑀦𑀸, 𑀤𑁂𑀯𑀺, 𑀳𑁄𑀳𑀺; 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄’𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁨𑁯. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀺 𑀅𑀫𑀓𑁆𑀔𑀺𑀢𑁄 𑀉𑀤𑁂𑀦 [𑀉𑀤𑁆𑀤𑁂𑀦 (𑀲𑁆𑀬𑀸.), 𑀉𑀤𑀭𑁂𑀦 (𑀓𑀢𑁆𑀣𑀘𑀺)] 𑀅𑀫𑀓𑁆𑀔𑀺𑀢𑁄 𑀲𑁂𑀫𑁆𑀳𑁂𑀦 𑀅𑀫𑀓𑁆𑀔𑀺𑀢𑁄 𑀭𑀼𑀳𑀺𑀭𑁂𑀦 𑀅𑀫𑀓𑁆𑀔𑀺𑀢𑁄 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀲𑀼𑀤𑁆𑀥𑁄 [𑀯𑀺𑀲𑀼𑀤𑁆𑀥𑁄 (𑀲𑁆𑀬𑀸.)] 𑀯𑀺𑀲𑀤𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀡𑀺𑀭𑀢𑀦𑀁 𑀓𑀸𑀲𑀺𑀓𑁂 𑀯𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀁 𑀦𑁂𑀯 𑀫𑀡𑀺𑀭𑀢𑀦𑀁 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀓𑁆𑀔𑁂𑀢𑀺, 𑀦𑀸𑀧𑀺 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀡𑀺𑀭𑀢𑀦𑀁 𑀫𑀓𑁆𑀔𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀪𑀺𑀦𑁆𑀦𑀁 𑀲𑀼𑀤𑁆𑀥𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀺 𑀅𑀫𑀓𑁆𑀔𑀺𑀢𑁄, 𑀉𑀤𑁂𑀦 𑀅𑀫𑀓𑁆𑀔𑀺𑀢𑁄 𑀲𑁂𑀫𑁆𑀳𑁂𑀦 𑀅𑀫𑀓𑁆𑀔𑀺𑀢𑁄 𑀭𑀼𑀳𑀺𑀭𑁂𑀦 𑀅𑀫𑀓𑁆𑀔𑀺𑀢𑁄 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀲𑀼𑀤𑁆𑀥𑁄 𑀯𑀺𑀲𑀤𑁄. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁩𑁦. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀤𑁆𑀯𑁂 𑀉𑀤𑀓𑀲𑁆𑀲 𑀥𑀸𑀭𑀸 𑀅𑀦𑁆𑀢𑀮𑀺𑀓𑁆𑀔𑀸 𑀧𑀸𑀢𑀼𑀪𑀯𑀦𑁆𑀢𑀺 𑁋 𑀏𑀓𑀸 𑀲𑀻𑀢𑀲𑁆𑀲 𑀏𑀓𑀸 𑀉𑀡𑁆𑀳𑀲𑁆𑀲 𑀬𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀤𑀓𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺 𑀫𑀸𑀢𑀼 𑀘. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁩𑁧. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀢𑀺𑀚𑀸𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 [𑀉𑀢𑁆𑀢𑀭𑁂𑀦𑀸𑀪𑀺𑀫𑀼𑀔𑁄 (𑀲𑁆𑀬𑀸.) 𑀉𑀢𑁆𑀢𑀭𑁂𑀦𑀫𑀼𑀔𑁄 (𑀓.)] 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀘𑁆𑀙𑀢𑀺 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂, 𑀲𑀩𑁆𑀩𑀸 𑀘 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀆𑀲𑀪𑀺𑀁 𑀯𑀸𑀘𑀁 𑀪𑀸𑀲𑀢𑀺 ‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑁩𑁨. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀣 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺, 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑀸𑀧𑀺 𑀢𑀸 𑀮𑁄𑀓𑀦𑁆𑀢𑀭𑀺𑀓𑀸 𑀅𑀖𑀸 𑀅𑀲𑀁𑀯𑀼𑀢𑀸 𑀅𑀦𑁆𑀥𑀓𑀸𑀭𑀸 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸, 𑀬𑀢𑁆𑀣 𑀧𑀺𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀺, 𑀢𑀢𑁆𑀣𑀧𑀺 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸, 𑀢𑁂𑀧𑀺 𑀢𑁂𑀦𑁄𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀺 𑁋 ‘𑀅𑀜𑁆𑀜𑁂𑀧𑀺 𑀓𑀺𑀭, 𑀪𑁄, 𑀲𑀦𑁆𑀢𑀺 𑀲𑀢𑁆𑀢𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.
𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸
𑁩𑁩. ‘‘𑀚𑀸𑀢𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀫𑁆𑀳𑀺 𑀓𑀼𑀫𑀸𑀭𑁂 𑀩𑀦𑁆𑀥𑀼𑀫𑀢𑁄 𑀭𑀜𑁆𑀜𑁄 𑀧𑀝𑀺𑀯𑁂𑀤𑁂𑀲𑀼𑀁 𑁋 ‘𑀧𑀼𑀢𑁆𑀢𑁄 𑀢𑁂, 𑀤𑁂𑀯 [𑀤𑁂𑀯 𑀢𑁂 (𑀓.)], 𑀚𑀸𑀢𑁄, 𑀢𑀁 𑀤𑁂𑀯𑁄 𑀧𑀲𑁆𑀲𑀢𑀽’𑀢𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀁 𑀓𑀼𑀫𑀸𑀭𑀁, 𑀤𑀺𑀲𑁆𑀯𑀸 𑀦𑁂𑀫𑀺𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀧𑀲𑁆𑀲𑀦𑁆𑀢𑀼 𑀪𑁄𑀦𑁆𑀢𑁄 𑀦𑁂𑀫𑀺𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀓𑀼𑀫𑀸𑀭’𑀦𑁆𑀢𑀺. 𑀅𑀤𑁆𑀤𑀲𑀁𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀦𑁂𑀫𑀺𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀯𑀺𑀧𑀲𑁆𑀲𑀺𑀁 𑀓𑀼𑀫𑀸𑀭𑀁, 𑀤𑀺𑀲𑁆𑀯𑀸 𑀩𑀦𑁆𑀥𑀼𑀫𑀦𑁆𑀢𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀢𑁆𑀢𑀫𑀦𑁄, 𑀤𑁂𑀯, 𑀳𑁄𑀳𑀺, 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀮𑀸𑀪𑀸 𑀢𑁂, 𑀫𑀳𑀸𑀭𑀸𑀚, 𑀲𑀼𑀮𑀤𑁆𑀥𑀁 𑀢𑁂, 𑀫𑀳𑀸𑀭𑀸𑀚, 𑀬𑀲𑁆𑀲 𑀢𑁂 𑀓𑀼𑀮𑁂 𑀏𑀯𑀭𑀽𑀧𑁄 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄. 𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢𑀭𑀢𑀦𑀸𑀦𑀺 𑀪𑀯𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄.
𑁩𑁪. ‘𑀓𑀢𑀫𑁂𑀳𑀺 𑀘𑀸𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀧𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢𑀭𑀢𑀦𑀸𑀦𑀺 𑀪𑀯𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄.
𑁩𑁫. ‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄. 𑀬𑀁 𑀧𑀸𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄. 𑀇𑀤𑀫𑁆𑀧𑀺𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.
‘𑀇𑀫𑀲𑁆𑀲, 𑀤𑁂𑀯 [𑀇𑀫𑀲𑁆𑀲 𑀳𑀺 𑀤𑁂𑀯 (?)], 𑀓𑀼𑀫𑀸𑀭𑀲𑁆𑀲 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺. 𑀬𑀫𑁆𑀧𑀺, 𑀇𑀫𑀲𑁆𑀲 𑀤𑁂𑀯, 𑀓𑀼𑀫𑀸𑀭𑀲𑁆𑀲 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺, 𑀇𑀤𑀫𑁆𑀧𑀺𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.
‘𑀅𑀬𑀜𑁆𑀳𑀺 𑀤𑁂𑀯, 𑀓𑀼𑀫𑀸𑀭𑁄 𑀆𑀬𑀢𑀧𑀡𑁆𑀳𑀻…𑀧𑁂…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀤𑀻𑀖𑀗𑁆𑀕𑀼𑀮𑀻…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄…
‘𑀅𑀬𑀜𑁆𑀳𑀺, 𑀤𑁂𑀯 𑀓𑀼𑀫𑀸𑀭𑁄 𑀚𑀸𑀮𑀳𑀢𑁆𑀣𑀧𑀸𑀤𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀉𑀲𑁆𑀲𑀗𑁆𑀔𑀧𑀸𑀤𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀏𑀡𑀺𑀚𑀗𑁆𑀖𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀡𑁆𑀡𑀼𑀓𑀸𑀦𑀺 𑀧𑀭𑀺𑀫𑀲𑀢𑀺 [𑀧𑀭𑀸𑀫𑀲𑀢𑀺 (𑀓.)] 𑀧𑀭𑀺𑀫𑀚𑁆𑀚𑀢𑀺…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀔𑀼𑀫𑀘𑁆𑀙𑀯𑀻; 𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸 𑀭𑀚𑁄𑀚𑀮𑁆𑀮𑀁 𑀓𑀸𑀬𑁂 𑀦 𑀉𑀧𑀮𑀺𑀫𑁆𑀧𑀢𑀺 [𑀉𑀧𑀮𑀺𑀧𑁆𑀧𑀢𑀺 (𑀲𑁆𑀬𑀸.)] …
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀏𑀓𑁂𑀓𑀮𑁄𑀫𑁄; 𑀏𑀓𑁂𑀓𑀸𑀦𑀺 𑀮𑁄𑀫𑀸𑀦𑀺 𑀮𑁄𑀫𑀓𑀽𑀧𑁂𑀲𑀼 𑀚𑀸𑀢𑀸𑀦𑀺…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀉𑀤𑁆𑀥𑀕𑁆𑀕𑀮𑁄𑀫𑁄; 𑀉𑀤𑁆𑀥𑀕𑁆𑀕𑀸𑀦𑀺 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀦𑀻𑀮𑀸𑀦𑀺 𑀅𑀜𑁆𑀚𑀦𑀯𑀡𑁆𑀡𑀸𑀦𑀺 𑀓𑀼𑀡𑁆𑀟𑀮𑀸𑀯𑀝𑁆𑀝𑀸𑀦𑀺 𑀤𑀓𑁆𑀔𑀺𑀡𑀸𑀯𑀝𑁆𑀝𑀓𑀚𑀸𑀢𑀸𑀦𑀺…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀢𑁆𑀢𑀼𑀲𑁆𑀲𑀤𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀘𑀺𑀢𑀦𑁆𑀢𑀭𑀁𑀲𑁄 [𑀧𑀺𑀢𑀦𑁆𑀢𑀭𑀁𑀲𑁄 (𑀲𑁆𑀬𑀸.)] …
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀬𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄 𑀢𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀬𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀢𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀭𑀲𑀕𑁆𑀕𑀲𑀕𑁆𑀕𑀻…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀻𑀳𑀳𑀦𑀼…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀫𑀤𑀦𑁆𑀢𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀅𑀯𑀺𑀭𑀴𑀤𑀦𑁆𑀢𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀲𑀼𑀓𑁆𑀓𑀤𑀸𑀞𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀧𑀳𑀽𑀢𑀚𑀺𑀯𑁆𑀳𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀲𑁆𑀲𑀭𑁄 𑀓𑀭𑀯𑀻𑀓𑀪𑀸𑀡𑀻…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀅𑀪𑀺𑀦𑀻𑀮𑀦𑁂𑀢𑁆𑀢𑁄…
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀕𑁄𑀧𑀔𑀼𑀫𑁄…
𑀇𑀫𑀲𑁆𑀲, 𑀤𑁂𑀯, 𑀓𑀼𑀫𑀸𑀭𑀲𑁆𑀲 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸. 𑀬𑀫𑁆𑀧𑀺 𑀇𑀫𑀲𑁆𑀲 𑀤𑁂𑀯 𑀓𑀼𑀫𑀸𑀭𑀲𑁆𑀲 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸, 𑀇𑀤𑀫𑁆𑀧𑀺𑀫𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.
‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀉𑀡𑁆𑀳𑀻𑀲𑀲𑀻𑀲𑁄. 𑀬𑀁 𑀧𑀸𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀉𑀡𑁆𑀳𑀻𑀲𑀲𑀻𑀲𑁄, 𑀇𑀤𑀫𑁆𑀧𑀺𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.
𑁩𑁬. ‘𑀇𑀫𑁂𑀳𑀺 𑀔𑁄 𑀅𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢𑀭𑀢𑀦𑀸𑀦𑀺 𑀪𑀯𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 [𑀥𑀫𑁆𑀫𑁂𑀦 𑀲𑀫𑁂𑀦 (𑀲𑁆𑀬𑀸.)] 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄’𑀢𑀺.
𑀯𑀺𑀧𑀲𑁆𑀲𑀻𑀲𑀫𑀜𑁆𑀜𑀸
𑁩𑁭. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀦𑁂𑀫𑀺𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 𑀅𑀳𑀢𑁂𑀳𑀺 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 [𑀅𑀘𑁆𑀙𑀸𑀤𑁂𑀢𑁆𑀯𑀸 (𑀲𑁆𑀬𑀸.)] 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀥𑀸𑀢𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀺. 𑀅𑀜𑁆𑀜𑀸 𑀔𑀻𑀭𑀁 𑀧𑀸𑀬𑁂𑀦𑁆𑀢𑀺, 𑀅𑀜𑁆𑀜𑀸 𑀦𑁆𑀳𑀸𑀧𑁂𑀦𑁆𑀢𑀺, 𑀅𑀜𑁆𑀜𑀸 𑀥𑀸𑀭𑁂𑀦𑁆𑀢𑀺, 𑀅𑀜𑁆𑀜𑀸 𑀅𑀗𑁆𑀓𑁂𑀦 𑀧𑀭𑀺𑀳𑀭𑀦𑁆𑀢𑀺. 𑀚𑀸𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀺𑀢𑁆𑀣 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘 𑁋 ‘𑀫𑀸 𑀦𑀁 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀢𑀺𑀡𑀁 𑀯𑀸 𑀭𑀚𑁄 𑀯𑀸 𑀉𑀲𑁆𑀲𑀸𑀯𑁄 𑀯𑀸 𑀩𑀸𑀥𑀬𑀺𑀢𑁆𑀣𑀸’𑀢𑀺. 𑀚𑀸𑀢𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀮𑀁 𑀯𑀸 𑀧𑀤𑀼𑀫𑀁 𑀯𑀸 𑀧𑀼𑀡𑁆𑀟𑀭𑀻𑀓𑀁 𑀯𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑀁 𑀫𑀦𑀸𑀧𑀁; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀲𑁆𑀯𑀸𑀲𑁆𑀲𑀼𑀤𑀁 𑀅𑀗𑁆𑀓𑁂𑀦𑁂𑀯 𑀅𑀗𑁆𑀓𑀁 𑀧𑀭𑀺𑀳𑀭𑀺𑀬𑀢𑀺.
𑁩𑁮. ‘‘𑀚𑀸𑀢𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀫𑀜𑁆𑀚𑀼𑀲𑁆𑀲𑀭𑁄 𑀘 [𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀲𑁆𑀲𑀭𑁄 𑀫𑀜𑁆𑀚𑀼𑀲𑁆𑀲𑀭𑁄 𑀘 (𑀲𑀻. 𑀓.)] 𑀅𑀳𑁄𑀲𑀺 𑀯𑀕𑁆𑀕𑀼𑀲𑁆𑀲𑀭𑁄 𑀘 𑀫𑀥𑀼𑀭𑀲𑁆𑀲𑀭𑁄 𑀘 𑀧𑁂𑀫𑀦𑀺𑀬𑀲𑁆𑀲𑀭𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀓𑀭𑀯𑀻𑀓𑀸 𑀦𑀸𑀫 𑀲𑀓𑀼𑀡𑀚𑀸𑀢𑀺 𑀫𑀜𑁆𑀚𑀼𑀲𑁆𑀲𑀭𑀸 𑀘 𑀯𑀕𑁆𑀕𑀼𑀲𑁆𑀲𑀭𑀸 𑀘 𑀫𑀥𑀼𑀭𑀲𑁆𑀲𑀭𑀸 𑀘 𑀧𑁂𑀫𑀦𑀺𑀬𑀲𑁆𑀲𑀭𑀸 𑀘; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀫𑀜𑁆𑀚𑀼𑀲𑁆𑀲𑀭𑁄 𑀘 𑀅𑀳𑁄𑀲𑀺 𑀯𑀕𑁆𑀕𑀼𑀲𑁆𑀲𑀭𑁄 𑀘 𑀫𑀥𑀼𑀭𑀲𑁆𑀲𑀭𑁄 𑀘 𑀧𑁂𑀫𑀦𑀺𑀬𑀲𑁆𑀲𑀭𑁄 𑀘.
𑁩𑁯. ‘‘𑀚𑀸𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼 𑀧𑀸𑀢𑀼𑀭𑀳𑁄𑀲𑀺 𑀬𑁂𑀦 𑀲𑀼𑀤𑀁 [𑀬𑁂𑀦 𑀤𑀽𑀭𑀁 (𑀲𑁆𑀬𑀸.)] 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘.
𑁪𑁦. ‘‘𑀚𑀸𑀢𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑀺𑀫𑀺𑀲𑀦𑁆𑀢𑁄 𑀧𑁂𑀓𑁆𑀔𑀢𑀺 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸. ‘𑀅𑀦𑀺𑀫𑀺𑀲𑀦𑁆𑀢𑁄 𑀓𑀼𑀫𑀸𑀭𑁄 𑀧𑁂𑀓𑁆𑀔𑀢𑀻’𑀢𑀺 𑀔𑁄, 𑀪𑀺𑀓𑁆𑀔𑀯𑁂 [𑀅𑀦𑀺𑀫𑀺𑀲𑀦𑁆𑀢𑁄 𑀧𑁂𑀓𑁆𑀔𑀢𑀺, 𑀚𑀸𑀢𑀲𑁆𑀲 𑀔𑁄 𑀧𑀦 𑀪𑀺𑀓𑁆𑀔𑀯𑁂 (𑀓.)], 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 ‘𑀯𑀺𑀧𑀲𑁆𑀲𑀻 𑀯𑀺𑀧𑀲𑁆𑀲𑀻’ 𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.
𑁪𑁧. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀅𑀢𑁆𑀣𑀓𑀭𑀡𑁂 [𑀅𑀝𑁆𑀝 𑀓𑀭𑀡𑁂 (𑀲𑁆𑀬𑀸.)] 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀺𑀁 𑀓𑀼𑀫𑀸𑀭𑀁 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀢𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀺𑀢𑀼𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀅𑀢𑁆𑀣𑁂 𑀧𑀦𑀸𑀬𑀢𑀺 𑀜𑀸𑀬𑁂𑀦 [𑀅𑀝𑁆𑀝𑁂 𑀧𑀦𑀸𑀬𑀢𑀺 𑀜𑀸𑀡𑁂𑀦 (𑀲𑁆𑀬𑀸.)]. 𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀓𑀼𑀫𑀸𑀭𑁄 𑀅𑀢𑁆𑀣𑁂 𑀧𑀦𑀸𑀬𑀢𑀺 𑀜𑀸𑀬𑁂𑀦𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 ‘𑀯𑀺𑀧𑀲𑁆𑀲𑀻 𑀯𑀺𑀧𑀲𑁆𑀲𑀻’ 𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.
𑁪𑁨. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑀸𑀧𑁂𑀲𑀺, 𑀏𑀓𑀁 𑀯𑀲𑁆𑀲𑀺𑀓𑀁 𑀏𑀓𑀁 𑀳𑁂𑀫𑀦𑁆𑀢𑀺𑀓𑀁 𑀏𑀓𑀁 𑀕𑀺𑀫𑁆𑀳𑀺𑀓𑀁; 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 [𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀯𑀲𑁆𑀲𑀺𑀓𑁂] 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑁄 𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀳𑀢𑀻’’𑀢𑀺.
𑀧𑀞𑀫𑀪𑀸𑀡𑀯𑀸𑀭𑁄.
𑀚𑀺𑀡𑁆𑀡𑀧𑀼𑀭𑀺𑀲𑁄
𑁪𑁩. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁 𑀩𑀳𑀽𑀦𑀁 𑀯𑀲𑁆𑀲𑀲𑀢𑀸𑀦𑀁 𑀩𑀳𑀽𑀦𑀁 𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑁄𑀚𑁂𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫 𑀲𑀼𑀪𑀽𑀫𑀺𑀤𑀲𑁆𑀲𑀦𑀸𑀬𑀸’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘𑀬𑀼𑀢𑁆𑀢𑀸𑀦𑀺 𑀔𑁄 𑀢𑁂, 𑀤𑁂𑀯, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 [𑀪𑀤𑁆𑀭𑀁 𑀬𑀸𑀦𑀁 (𑀲𑁆𑀬𑀸.), 𑀪𑀤𑁆𑀤𑀁 𑀬𑀸𑀦𑀁 (𑀧𑀻.) 𑀘𑀢𑁆𑀢𑀸𑀭𑁄 𑀫𑀸𑀲𑁂 (𑀲𑀻. 𑀧𑀻.)] 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀲𑀺.
𑁪𑁪. ‘‘𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀚𑀺𑀡𑁆𑀡𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁 𑀪𑁄𑀕𑁆𑀕𑀁 [𑀪𑀕𑁆𑀕𑀁 (𑀲𑁆𑀬𑀸.)] 𑀤𑀡𑁆𑀟𑀧𑀭𑀸𑀬𑀦𑀁 𑀧𑀯𑁂𑀥𑀫𑀸𑀦𑀁 𑀕𑀘𑁆𑀙𑀦𑁆𑀢𑀁 𑀆𑀢𑀼𑀭𑀁 𑀕𑀢𑀬𑁄𑀩𑁆𑀩𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄? 𑀓𑁂𑀲𑀸𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀓𑀸𑀬𑁄𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺. ‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀚𑀺𑀡𑁆𑀡𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫. 𑀦 𑀤𑀸𑀦𑀺 𑀢𑁂𑀦 𑀘𑀺𑀭𑀁 𑀚𑀻𑀯𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀚𑀭𑀸𑀥𑀫𑁆𑀫𑁄, 𑀚𑀭𑀁 𑀅𑀦𑀢𑀻𑀢𑁄’𑀢𑀺? ‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀚𑀭𑀸𑀥𑀫𑁆𑀫𑀸, 𑀚𑀭𑀁 𑀅𑀦𑀢𑀻𑀢𑀸’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸. 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘𑀥𑀺𑀭𑀢𑁆𑀣𑀼 𑀓𑀺𑀭, 𑀪𑁄, 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺!
𑁪𑁫. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣? 𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺? ‘𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀤𑁆𑀤𑀲 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄’𑀢𑀺? ‘𑀅𑀤𑁆𑀤𑀲𑀸 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀚𑀺𑀡𑁆𑀡𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁 𑀪𑁄𑀕𑁆𑀕𑀁 𑀤𑀡𑁆𑀟𑀧𑀭𑀸𑀬𑀦𑀁 𑀧𑀯𑁂𑀥𑀫𑀸𑀦𑀁 𑀕𑀘𑁆𑀙𑀦𑁆𑀢𑀁 𑀆𑀢𑀼𑀭𑀁 𑀕𑀢𑀬𑁄𑀩𑁆𑀩𑀦𑀁. 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄, 𑀓𑁂𑀲𑀸𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀓𑀸𑀬𑁄𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫𑀸’’𑀢𑀺. ‘‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀚𑀺𑀡𑁆𑀡𑁄 𑀦𑀸𑀫𑀸’’𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫 𑀦 𑀤𑀸𑀦𑀺 𑀢𑁂𑀦 𑀘𑀺𑀭𑀁 𑀚𑀻𑀯𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀚𑀭𑀸𑀥𑀫𑁆𑀫𑁄, 𑀚𑀭𑀁 𑀅𑀦𑀢𑀻𑀢𑁄’’𑀢𑀺? ‘‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀚𑀭𑀸𑀥𑀫𑁆𑀫𑀸, 𑀚𑀭𑀁 𑀅𑀦𑀢𑀻𑀢𑀸’’𑀢𑀺.
‘‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺𑀁. 𑀲𑁄 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’’𑀢𑀺.
𑀩𑁆𑀬𑀸𑀥𑀺𑀢𑀧𑀼𑀭𑀺𑀲𑁄
𑁪𑁬. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋
‘𑀫𑀸 𑀳𑁂𑀯 𑀔𑁄 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀸 𑀳𑁂𑀯 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺, 𑀫𑀸 𑀳𑁂𑀯 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀅𑀲𑁆𑀲 𑀯𑀘𑀦’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺 𑁋 ‘𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀭𑀚𑁆𑀚𑀁 𑀓𑀭𑁂𑀬𑁆𑀬, 𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀬𑀣𑀸 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸 𑀅𑀲𑁆𑀲 𑀯𑀘𑀦’𑀦𑁆𑀢𑀺.
‘‘𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁…𑀧𑁂…
𑁪𑁭. ‘‘𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑁂𑀫𑀸𑀦𑀁 [𑀲𑀬𑀫𑀸𑀦𑀁 (𑀲𑁆𑀬𑀸. 𑀓.)] 𑀅𑀜𑁆𑀜𑁂𑀳𑀺 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀁 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀺𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄? 𑀅𑀓𑁆𑀔𑀻𑀦𑀺𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀲𑀭𑁄𑀧𑀺𑀲𑁆𑀲 [𑀲𑀺𑀭𑁄𑀧𑀺𑀲𑁆𑀲 (𑀲𑁆𑀬𑀸.)] 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫 𑀅𑀧𑁆𑀧𑁂𑀯 𑀦𑀸𑀫 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬𑀸’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄’𑀢𑀺? ‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀩𑁆𑀬𑀸𑀥𑀺𑀥𑀫𑁆𑀫𑀸, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑀸’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘𑀏𑀯𑀁 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺.
𑁪𑁮. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺? ‘𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀤𑁆𑀤𑀲 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄’𑀢𑀺? ‘𑀅𑀤𑁆𑀤𑀲𑀸 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑁂𑀫𑀸𑀦𑀁 𑀅𑀜𑁆𑀜𑁂𑀳𑀺 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀁 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀺𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄, 𑀅𑀓𑁆𑀔𑀻𑀦𑀺𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀲𑀭𑁄𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’’𑀢𑀺. ‘‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’’𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫 𑀅𑀧𑁆𑀧𑁂𑀯 𑀦𑀸𑀫 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬𑀸’’𑀢𑀺. ‘‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄’’𑀢𑀺? ‘‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀩𑁆𑀬𑀸𑀥𑀺𑀥𑀫𑁆𑀫𑀸, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑀸’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺𑀁. 𑀲𑁄 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘‘‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’’𑀢𑀺.
𑀓𑀸𑀮𑀗𑁆𑀓𑀢𑀧𑀼𑀭𑀺𑀲𑁄
𑁪𑁯. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘𑀫𑀸 𑀳𑁂𑀯 𑀔𑁄 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀸 𑀳𑁂𑀯 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺, 𑀫𑀸 𑀳𑁂𑀯 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀅𑀲𑁆𑀲 𑀯𑀘𑀦’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺 𑁋 ‘𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀭𑀚𑁆𑀚𑀁 𑀓𑀭𑁂𑀬𑁆𑀬, 𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀬𑀣𑀸 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸 𑀅𑀲𑁆𑀲 𑀯𑀘𑀦’𑀦𑁆𑀢𑀺.
‘‘𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁…𑀧𑁂…
𑁫𑁦. ‘‘𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀫𑀸𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀓𑀺𑀁 𑀦𑀼 𑀔𑁄, 𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁄 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀢𑀻’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀬𑁂𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀲𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁, 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀓𑀺𑀁 𑀧𑀦𑀸𑀬𑀁, 𑀲𑀫𑁆𑀫 𑀲𑀸𑀭𑀣𑀺, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫. 𑀦 𑀤𑀸𑀦𑀺 𑀢𑀁 𑀤𑀓𑁆𑀔𑀦𑁆𑀢𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀲𑁄𑀧𑀺 𑀦 𑀤𑀓𑁆𑀔𑀺𑀲𑁆𑀲𑀢𑀺 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀫𑀭𑀡𑀥𑀫𑁆𑀫𑁄 𑀫𑀭𑀡𑀁 𑀅𑀦𑀢𑀻𑀢𑁄; 𑀫𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸; 𑀅𑀳𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’𑀢𑀺? ‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀫𑀭𑀡𑀥𑀫𑁆𑀫𑀸 𑀫𑀭𑀡𑀁 𑀅𑀦𑀢𑀻𑀢𑀸; 𑀢𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸; 𑀢𑁆𑀯𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀲𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘𑀥𑀺𑀭𑀢𑁆𑀣𑀼 𑀓𑀺𑀭, 𑀪𑁄, 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀫𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺.
𑁫𑁧. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺? ‘𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀤𑁆𑀤𑀲 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄’𑀢𑀺? ‘𑀅𑀤𑁆𑀤𑀲𑀸 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀫𑀸𑀦𑀁. 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁄 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀢𑀻’’𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀬𑁂𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀳𑀻’’𑀢𑀺. ‘‘𑀏𑀯𑀁 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀲𑀺𑀁. 𑀅𑀤𑁆𑀤𑀲𑀸 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁, 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀧𑀦𑀸𑀬𑀁, 𑀲𑀫𑁆𑀫 𑀲𑀸𑀭𑀣𑀺, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’’𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫. 𑀦 𑀤𑀸𑀦𑀺 𑀢𑀁 𑀤𑀓𑁆𑀔𑀦𑁆𑀢𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀲𑁄𑀧𑀺 𑀦 𑀤𑀓𑁆𑀔𑀺𑀲𑁆𑀲𑀢𑀺 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’’𑀢𑀺. ‘‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀫𑀭𑀡𑀥𑀫𑁆𑀫𑁄 𑀫𑀭𑀡𑀁 𑀅𑀦𑀢𑀻𑀢𑁄; 𑀫𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸; 𑀅𑀳𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’’𑀢𑀺? ‘‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀫𑀭𑀡𑀥𑀫𑁆𑀫𑀸 𑀫𑀭𑀡𑀁 𑀅𑀦𑀢𑀻𑀢𑀸; 𑀢𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀢𑁆𑀯𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀲𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺𑀁. 𑀲𑁄 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀫𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’’𑀢𑀺.
𑀧𑀩𑁆𑀩𑀚𑀺𑀢𑁄
𑁫𑁨. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘𑀫𑀸 𑀳𑁂𑀯 𑀔𑁄 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀸 𑀳𑁂𑀯 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺, 𑀫𑀸 𑀳𑁂𑀯 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀅𑀲𑁆𑀲 𑀯𑀘𑀦’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺 𑁋 ‘𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀭𑀚𑁆𑀚𑀁 𑀓𑀭𑁂𑀬𑁆𑀬, 𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀬𑀣𑀸 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸 𑀅𑀲𑁆𑀲 𑀯𑀘𑀦’𑀦𑁆𑀢𑀺.
‘‘𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁 𑀩𑀳𑀽𑀦𑀁 𑀯𑀲𑁆𑀲𑀲𑀢𑀸𑀦𑀁 𑀩𑀳𑀽𑀦𑀁 𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑁄𑀚𑁂𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺, 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫 𑀲𑀼𑀪𑀽𑀫𑀺𑀤𑀲𑁆𑀲𑀦𑀸𑀬𑀸’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘𑀬𑀼𑀢𑁆𑀢𑀸𑀦𑀺 𑀔𑁄 𑀢𑁂, 𑀤𑁂𑀯, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀲𑀺.
𑁫𑁩. ‘‘𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀪𑀡𑁆𑀟𑀼𑀁 𑀧𑀩𑁆𑀩𑀚𑀺𑀢𑀁 𑀓𑀸𑀲𑀸𑀬𑀯𑀲𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄? 𑀲𑀻𑀲𑀁𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀯𑀢𑁆𑀣𑀸𑀦𑀺𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 [𑀲𑀫𑁆𑀫𑀘𑀭𑀺𑀬𑀸 (𑀓.)] 𑀲𑀸𑀥𑀼 𑀓𑀼𑀲𑀮𑀓𑀺𑀭𑀺𑀬𑀸 [𑀓𑀼𑀲𑀮𑀘𑀭𑀺𑀬𑀸 (𑀲𑁆𑀬𑀸.)] 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸’𑀢𑀺. ‘𑀲𑀸𑀥𑀼 𑀔𑁄 𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀧𑀩𑁆𑀩𑀚𑀺𑀢𑁄 𑀦𑀸𑀫, 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 𑀲𑀸𑀥𑀼 𑀓𑀼𑀲𑀮𑀓𑀺𑀭𑀺𑀬𑀸 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸. 𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀬𑁂𑀦 𑀲𑁄 𑀧𑀩𑁆𑀩𑀚𑀺𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁄 𑀧𑀩𑁆𑀩𑀚𑀺𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀢𑀁 𑀧𑀩𑁆𑀩𑀚𑀺𑀢𑀁 𑀏𑀢𑀤𑀯𑁄𑀘 𑁋 ‘𑀢𑁆𑀯𑀁 𑀧𑀦, 𑀲𑀫𑁆𑀫, 𑀓𑀺𑀁𑀓𑀢𑁄, 𑀲𑀻𑀲𑀫𑁆𑀧𑀺 𑀢𑁂 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀯𑀢𑁆𑀣𑀸𑀦𑀺𑀧𑀺 𑀢𑁂 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺? ‘𑀅𑀳𑀁 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦 𑀢𑁆𑀯𑀁, 𑀲𑀫𑁆𑀫, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺? ‘𑀅𑀳𑀁 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫, 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 𑀲𑀸𑀥𑀼 𑀓𑀼𑀲𑀮𑀓𑀺𑀭𑀺𑀬𑀸 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸’𑀢𑀺. ‘𑀲𑀸𑀥𑀼 𑀔𑁄 𑀢𑁆𑀯𑀁, 𑀲𑀫𑁆𑀫, 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 𑀲𑀸𑀥𑀼 𑀓𑀼𑀲𑀮𑀓𑀺𑀭𑀺𑀬𑀸 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸’𑀢𑀺.
𑀩𑁄𑀥𑀺𑀲𑀢𑁆𑀢𑀧𑀩𑁆𑀩𑀚𑁆𑀚𑀸
𑁫𑁪. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀭𑀣𑀁 𑀆𑀤𑀸𑀬 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀺. 𑀅𑀳𑀁 𑀧𑀦 𑀇𑀥𑁂𑀯 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀆𑀤𑀸𑀬 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀯𑀺𑀧𑀲𑁆𑀲𑀻 𑀧𑀦 𑀓𑀼𑀫𑀸𑀭𑁄 𑀢𑀢𑁆𑀣𑁂𑀯 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺.
𑀫𑀳𑀸𑀚𑀦𑀓𑀸𑀬𑀅𑀦𑀼𑀧𑀩𑁆𑀩𑀚𑁆𑀚𑀸
𑁫𑁫. ‘‘𑀅𑀲𑁆𑀲𑁄𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀫𑀳𑀸𑀚𑀦𑀓𑀸𑀬𑁄 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑁋 ‘𑀯𑀺𑀧𑀲𑁆𑀲𑀻 𑀓𑀺𑀭 𑀓𑀼𑀫𑀸𑀭𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄’𑀢𑀺. 𑀲𑀼𑀢𑁆𑀯𑀸𑀦 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘𑀦 𑀳𑀺 𑀦𑀽𑀦 𑀲𑁄 𑀑𑀭𑀓𑁄 𑀥𑀫𑁆𑀫𑀯𑀺𑀦𑀬𑁄, 𑀦 𑀲𑀸 𑀑𑀭𑀓𑀸 [𑀑𑀭𑀺𑀓𑀸 (𑀲𑀻. 𑀲𑁆𑀬𑀸.)] 𑀧𑀩𑁆𑀩𑀚𑁆𑀚𑀸, 𑀬𑀢𑁆𑀣 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀯𑀺𑀧𑀲𑁆𑀲𑀻𑀧𑀺 𑀦𑀸𑀫 𑀓𑀼𑀫𑀸𑀭𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀓𑀺𑀫𑀗𑁆𑀕𑀁 [𑀓𑀺𑀫𑀗𑁆𑀕 (𑀲𑀻.)] 𑀧𑀦 𑀫𑀬’𑀦𑁆𑀢𑀺.
‘‘𑀅𑀣 𑀔𑁄, 𑀲𑁄 𑀪𑀺𑀓𑁆𑀔𑀯𑁂, 𑀫𑀳𑀸𑀚𑀦𑀓𑀸𑀬𑁄 [𑀫𑀳𑀸𑀚𑀦𑀓𑀸𑀬𑁄 (𑀲𑁆𑀬𑀸.)] 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀩𑁄𑀥𑀺𑀲𑀢𑁆𑀢𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑀸𑀬 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺.
𑁫𑁬. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀦 𑀔𑁄 𑀫𑁂𑀢𑀁 [𑀦 𑀔𑁄 𑀧𑀦𑁂𑀢𑀁 (𑀲𑁆𑀬𑀸.)] 𑀧𑀢𑀺𑀭𑀽𑀧𑀁 𑀬𑁄𑀳𑀁 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺, 𑀬𑀁𑀦𑀽𑀦𑀸𑀳𑀁 𑀏𑀓𑁄 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀓𑁄 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀸𑀲𑀺, 𑀅𑀜𑁆𑀜𑁂𑀦𑁂𑀯 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀧𑀩𑁆𑀩𑀚𑀺𑀢𑀲𑀳𑀲𑁆𑀲𑀸𑀦𑀺 𑀅𑀕𑀫𑀁𑀲𑀼, 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄.
𑀩𑁄𑀥𑀺𑀲𑀢𑁆𑀢𑀅𑀪𑀺𑀦𑀺𑀯𑁂𑀲𑁄
𑁫𑁭. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀸𑀲𑀽𑀧𑀕𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄, 𑀚𑀸𑀬𑀢𑀺 𑀘 𑀚𑀻𑀬𑀢𑀺 𑀘 𑀫𑀻𑀬𑀢𑀺 𑀘 [𑀚𑀺𑀬𑁆𑀬𑀢𑀺 𑀘 𑀫𑀺𑀬𑁆𑀬𑀢𑀺 𑀘 (𑀓.)] 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘, 𑀅𑀣 𑀘 𑀧𑀦𑀺𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀦𑀧𑁆𑀧𑀚𑀸𑀦𑀸𑀢𑀺 𑀚𑀭𑀸𑀫𑀭𑀡𑀲𑁆𑀲, 𑀓𑀼𑀤𑀸𑀲𑁆𑀲𑀼 𑀦𑀸𑀫 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀚𑀭𑀸𑀫𑀭𑀡𑀲𑁆𑀲𑀸’𑀢𑀺?
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀪𑀯𑁂 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀪𑀯𑁄 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀪𑀯𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀉𑀧𑀸𑀤𑀸𑀦𑁂 𑀔𑁄 𑀲𑀢𑀺 𑀪𑀯𑁄 𑀳𑁄𑀢𑀺, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀉𑀧𑀸𑀤𑀸𑀦𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀢𑀡𑁆𑀳𑀸𑀬 𑀔𑁄 𑀲𑀢𑀺 𑀉𑀧𑀸𑀤𑀸𑀦𑀁 𑀳𑁄𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀢𑀡𑁆𑀳𑀸 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑁂𑀤𑀦𑀸𑀬 𑀔𑁄 𑀲𑀢𑀺 𑀢𑀡𑁆𑀳𑀸 𑀳𑁄𑀢𑀺, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀯𑁂𑀤𑀦𑀸 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀨𑀲𑁆𑀲𑁂 𑀔𑁄 𑀲𑀢𑀺 𑀯𑁂𑀤𑀦𑀸 𑀳𑁄𑀢𑀺, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀲𑀴𑀸𑀬𑀢𑀦𑁂 𑀔𑁄 𑀲𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀲𑀴𑀸𑀬𑀢𑀦𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀲𑀴𑀸𑀬𑀢𑀦𑀁 𑀳𑁄𑀢𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’𑀦𑁆𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀦𑀸𑀫𑀭𑀽𑀧𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑀺𑀜𑁆𑀜𑀸𑀡𑁂 𑀔𑁄 𑀲𑀢𑀺 𑀦𑀸𑀫𑀭𑀽𑀧𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺.
𑁫𑁮. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺 𑀔𑁄 𑀇𑀤𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀫𑁆𑀳𑀸, 𑀦𑀸𑀧𑀭𑀁 𑀕𑀘𑁆𑀙𑀢𑀺. 𑀏𑀢𑁆𑀢𑀸𑀯𑀢𑀸 𑀚𑀸𑀬𑁂𑀣 𑀯𑀸 𑀚𑀺𑀬𑁆𑀬𑁂𑀣 𑀯𑀸 𑀫𑀺𑀬𑁆𑀬𑁂𑀣 𑀯𑀸 𑀘𑀯𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸, 𑀬𑀤𑀺𑀤𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺’.
𑁫𑁯. ‘‘‘𑀲𑀫𑀼𑀤𑀬𑁄 𑀲𑀫𑀼𑀤𑀬𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.
𑁬𑁦. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀚𑀸𑀢𑀺𑀬𑀸 𑀔𑁄 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀚𑀸𑀢𑀺 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀪𑀯𑁂 𑀔𑁄 𑀅𑀲𑀢𑀺 𑀚𑀸𑀢𑀺 𑀦 𑀳𑁄𑀢𑀺, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀪𑀯𑁄 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀉𑀧𑀸𑀤𑀸𑀦𑁂 𑀔𑁄 𑀅𑀲𑀢𑀺 𑀪𑀯𑁄 𑀦 𑀳𑁄𑀢𑀺, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀉𑀧𑀸𑀤𑀸𑀦𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀢𑀡𑁆𑀳𑀸𑀬 𑀔𑁄 𑀅𑀲𑀢𑀺 𑀉𑀧𑀸𑀤𑀸𑀦𑀁 𑀦 𑀳𑁄𑀢𑀺, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑁂𑀤𑀦𑀸𑀬 𑀔𑁄 𑀅𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀯𑁂𑀤𑀦𑀸 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀨𑀲𑁆𑀲𑁂 𑀔𑁄 𑀅𑀲𑀢𑀺 𑀯𑁂𑀤𑀦𑀸 𑀦 𑀳𑁄𑀢𑀺, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀨𑀲𑁆𑀲𑁄 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀲𑀴𑀸𑀬𑀢𑀦𑁂 𑀔𑁄 𑀅𑀲𑀢𑀺 𑀨𑀲𑁆𑀲𑁄 𑀦 𑀳𑁄𑀢𑀺, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀲𑀴𑀸𑀬𑀢𑀦𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀅𑀲𑀢𑀺 𑀲𑀴𑀸𑀬𑀢𑀦𑀁 𑀦 𑀳𑁄𑀢𑀺, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀦𑀸𑀫𑀭𑀽𑀧𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑀺𑀜𑁆𑀜𑀸𑀡𑁂 𑀔𑁄 𑀅𑀲𑀢𑀺 𑀦𑀸𑀫𑀭𑀽𑀧𑀁 𑀦 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’𑀢𑀺.
‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀅𑀲𑀢𑀺 𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀺, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’𑀢𑀺.
𑁬𑁧. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀫𑀕𑁆𑀕𑁄 𑀲𑀫𑁆𑀩𑁄𑀥𑀸𑀬 𑀬𑀤𑀺𑀤𑀁 𑁋 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺’.
𑁬𑁨. ‘‘‘𑀦𑀺𑀭𑁄𑀥𑁄 𑀦𑀺𑀭𑁄𑀥𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.
𑁬𑁩. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀸𑀲𑀺 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸, 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀜𑁆𑀜𑀸, 𑀇𑀢𑀺 𑀲𑀜𑁆𑀜𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀗𑁆𑀔𑀸𑀭𑀸, 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄, 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺, 𑀢𑀲𑁆𑀲 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻’’𑀢𑀺.
𑀤𑀼𑀢𑀺𑀬𑀪𑀸𑀡𑀯𑀸𑀭𑁄.