𑀏𑀓𑀼𑀢𑁆𑀢𑀭𑀺𑀓𑀦𑀬𑁄

𑀏𑀓𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁧. 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀚𑀸𑀦𑀺𑀢𑀩𑁆𑀩𑀸𑀢𑀺𑀆𑀤𑀺𑀫𑁆𑀳𑀺 𑀏𑀓𑀼𑀢𑁆𑀢𑀭𑀺𑀓𑀦𑀬𑁂 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀦𑀸𑀫 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺. 𑀏𑀢𑁂𑀲𑀜𑁆𑀳𑀺 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀆𑀧𑀢𑁆𑀢𑀺𑀓𑀭𑀸’’𑀢𑀺 𑀯𑀼𑀢𑁆𑀢𑀸. 𑀅𑀦𑀸𑀧𑀢𑁆𑀢𑀺𑀓𑀭𑀸 𑀦𑀸𑀫 𑀲𑀢𑁆𑀢 𑀲𑀫𑀣𑀸. 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀘 𑀯𑀺𑀪𑀗𑁆𑀕𑁂 𑀘 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀸𑀧𑀢𑁆𑀢𑀻𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀸𑀤𑀺𑀬𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀮𑀳𑀼𑀓𑀸𑀢𑀺 𑀮𑀳𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄 𑀧𑀜𑁆𑀘𑀯𑀺𑀥𑀸 𑀆𑀧𑀢𑁆𑀢𑀺. 𑀕𑀭𑀼𑀓𑀸𑀢𑀺 𑀕𑀭𑀼𑀓𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀦𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺. 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀦𑀸𑀧𑀢𑁆𑀢𑀺𑀪𑀸𑀯𑀁 𑀉𑀧𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀘. 𑀲𑀸𑀯𑀲𑁂𑀲𑀸𑀢𑀺 𑀞𑀧𑁂𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀲𑁂𑀲𑀸. 𑀅𑀦𑀯𑀲𑁂𑀲𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺. 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀤𑀼𑀝𑁆𑀞𑀼𑀮𑁆𑀮𑀸; 𑀅𑀯𑀲𑁂𑀲𑀸 𑀅𑀤𑀼𑀝𑁆𑀞𑀼𑀮𑁆𑀮𑀸. 𑀲𑀧𑁆𑀧𑀝𑀺𑀓𑀫𑁆𑀫𑀤𑀼𑀓𑀁 𑀲𑀸𑀯𑀲𑁂𑀲𑀤𑀼𑀓𑀲𑀤𑀺𑀲𑀁. 𑀤𑁂𑀲𑀦𑀸𑀕𑀸𑀫𑀺𑀦𑀺𑀤𑀼𑀓𑀁 𑀮𑀳𑀼𑀓𑀤𑀼𑀓𑀲𑀗𑁆𑀕𑀳𑀺𑀢𑀁.

𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀬𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀕𑁆𑀕𑀦𑁆𑀢𑀭𑀸𑀬𑀜𑁆𑀘𑁂𑀯 𑀫𑁄𑀓𑁆𑀔𑀦𑁆𑀢𑀭𑀸𑀬𑀜𑁆𑀘 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀅𑀚𑀸𑀦𑀦𑁆𑀢𑁂𑀦 𑀯𑀻𑀢𑀺𑀓𑁆𑀓𑀦𑁆𑀢𑀸 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀧𑀢𑁆𑀢𑀺 𑀦𑁂𑀯 𑀲𑀕𑁆𑀕𑀦𑁆𑀢𑀭𑀸𑀬𑀁 𑀦 𑀫𑁄𑀓𑁆𑀔𑀦𑁆𑀢𑀭𑀸𑀬𑀁 𑀓𑀭𑁄𑀢𑀻𑀢𑀺 𑀅𑀦𑀦𑁆𑀢𑀭𑀸𑀬𑀺𑀓𑀸. 𑀅𑀦𑁆𑀢𑀭𑀸𑀬𑀺𑀓𑀁 𑀆𑀧𑀦𑁆𑀦𑀲𑁆𑀲𑀸𑀧𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀢𑁄 𑀯𑀼𑀝𑁆𑀞𑀸𑀬 𑀲𑀼𑀤𑁆𑀥𑀺𑀧𑀢𑁆𑀢𑀲𑁆𑀲 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀘 𑀅𑀯𑀸𑀭𑀺𑀢𑁄 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑁄𑀢𑀺. 𑀲𑀸𑀯𑀚𑁆𑀚𑀧𑀜𑁆𑀜𑀢𑁆𑀢𑀻𑀢𑀺 𑀮𑁄𑀓𑀯𑀚𑁆𑀚𑀸. 𑀅𑀦𑀯𑀚𑁆𑀚𑀧𑀜𑁆𑀜𑀢𑁆𑀢𑀻𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸. 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀺𑀢𑀸 𑀦𑀸𑀫 𑀬𑀁 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀯𑀺𑀬. 𑀅𑀓𑀺𑀭𑀺𑀬𑀢𑁄𑀢𑀺 𑀬𑀁 𑀅𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀘𑀻𑀯𑀭𑀅𑀦𑀥𑀺𑀝𑁆𑀞𑀸𑀦𑀸𑀧𑀢𑁆𑀢𑀺 𑀯𑀺𑀬. 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄𑀢𑀺 𑀬𑀁 𑀓𑀭𑁄𑀦𑁆𑀢𑁄 𑀘 𑀅𑀓𑀭𑁄𑀦𑁆𑀢𑁄 𑀘 𑀆𑀧𑀚𑁆𑀚𑀢𑀺, 𑀓𑀼𑀝𑀺𑀓𑀸𑀭𑀸𑀧𑀢𑁆𑀢𑀺 𑀯𑀺𑀬.

𑀧𑀼𑀩𑁆𑀩𑀸𑀧𑀢𑁆𑀢𑀻𑀢𑀺 𑀧𑀞𑀫𑀁 𑀆𑀧𑀦𑁆𑀦𑀸𑀧𑀢𑁆𑀢𑀺. 𑀅𑀧𑀭𑀸𑀧𑀢𑁆𑀢𑀻𑀢𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀳𑀺 𑀧𑀘𑁆𑀙𑀸 𑀆𑀧𑀦𑁆𑀦𑀸𑀧𑀢𑁆𑀢𑀺. 𑀧𑀼𑀩𑁆𑀩𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀫𑀽𑀮𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀺. 𑀅𑀧𑀭𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀅𑀕𑁆𑀖𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀧𑀼𑀩𑁆𑀩𑀸𑀧𑀢𑁆𑀢𑀺 𑀦𑀸𑀫 𑀧𑀞𑀫𑀁 𑀆𑀧𑀦𑁆𑀦𑀸. 𑀅𑀧𑀭𑀸𑀧𑀢𑁆𑀢𑀺 𑀦𑀸𑀫 𑀫𑀸𑀦𑀢𑁆𑀢𑀸𑀭𑀳𑀓𑀸𑀮𑁂 𑀆𑀧𑀦𑁆𑀦𑀸. 𑀧𑀼𑀩𑁆𑀩𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀧𑀭𑀺𑀯𑀸𑀲𑁂 𑀆𑀧𑀦𑁆𑀦𑀸. 𑀅𑀧𑀭𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀦𑀸𑀫 𑀫𑀸𑀦𑀢𑁆𑀢𑀘𑀸𑀭𑁂 𑀆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺.

𑀤𑁂𑀲𑀺𑀢𑀸 𑀕𑀡𑀦𑀽𑀧𑀕𑀸 𑀦𑀸𑀫 𑀬𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀧𑀼𑀦 𑀦 𑀆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀤𑁂𑀲𑀺𑀢𑀸 𑀳𑁄𑀢𑀺. 𑀅𑀕𑀡𑀦𑀽𑀧𑀕𑀸 𑀦𑀸𑀫 𑀬𑀸 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀲𑀉𑀲𑁆𑀲𑀸𑀳𑁂𑀦𑁂𑀯 𑀘𑀺𑀢𑁆𑀢𑁂𑀦 𑀅𑀧𑀭𑀺𑀲𑀼𑀤𑁆𑀥𑁂𑀦 𑀤𑁂𑀲𑀺𑀢𑀸 𑀳𑁄𑀢𑀺. 𑀅𑀬𑀜𑁆𑀳𑀺 𑀤𑁂𑀲𑀺𑀢𑀸𑀧𑀺 𑀤𑁂𑀲𑀺𑀢𑀕𑀡𑀦𑀁 𑀦 𑀉𑀧𑁂𑀢𑀺. 𑀅𑀝𑁆𑀞𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀫𑁂𑀯 𑀳𑁄𑀢𑀺. 𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺𑀆𑀤𑀻𑀲𑀼 𑀦𑀯𑀲𑀼 𑀧𑀤𑁂𑀲𑀼 𑀧𑀞𑀫𑀧𑀸𑀭𑀸𑀚𑀺𑀓𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀣𑀼𑀮𑁆𑀮𑀯𑀚𑁆𑀚𑀸𑀢𑀺 𑀣𑀼𑀮𑁆𑀮𑀤𑁄𑀲𑁂 𑀧𑀜𑁆𑀜𑀢𑁆𑀢𑀸 𑀕𑀭𑀼𑀓𑀸𑀧𑀢𑁆𑀢𑀺. 𑀅𑀣𑀼𑀮𑁆𑀮𑀯𑀚𑁆𑀚𑀸𑀢𑀺 𑀮𑀳𑀼𑀓𑀸𑀧𑀢𑁆𑀢𑀺. 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀼𑀥𑀫𑁆𑀫𑀢𑁆𑀣𑁂𑀭𑀲𑁆𑀲 𑀆𑀧𑀢𑁆𑀢𑀺, 𑀬𑀸 𑀘 𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂 𑀆𑀧𑀢𑁆𑀢𑀺, 𑀅𑀯𑀲𑁂𑀲𑀸 𑀦 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀧𑀢𑁆𑀢𑀺 𑀦𑀺𑀬𑀢𑀸, 𑀲𑁂𑀲𑀸 𑀅𑀦𑀺𑀬𑀢𑀸. 𑀆𑀤𑀺𑀓𑀭𑁄𑀢𑀺 𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑀸𑀤𑀺 𑀆𑀤𑀺𑀓𑀫𑁆𑀫𑀺𑀓𑁄. 𑀅𑀦𑀸𑀤𑀺𑀓𑀭𑁄𑀢𑀺 𑀫𑀓𑁆𑀓𑀝𑀺𑀲𑀫𑀡𑀸𑀤𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀓𑀸𑀭𑀓𑁄. 𑀅𑀥𑀺𑀘𑁆𑀘𑀸𑀧𑀢𑁆𑀢𑀺𑀓𑁄 𑀦𑀸𑀫 𑀬𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑁄 𑀦𑀸𑀫 𑀬𑁄 𑀦𑀺𑀘𑁆𑀘𑀁 𑀆𑀧𑀚𑁆𑀚𑀢𑀺.

𑀘𑁄𑀤𑀓𑁄 𑀦𑀸𑀫 𑀬𑁄 𑀯𑀢𑁆𑀣𑀼𑀦𑀸 𑀯𑀸 𑀆𑀧𑀢𑁆𑀢𑀺𑀬𑀸 𑀯𑀸 𑀧𑀭𑀁 𑀘𑁄𑀤𑁂𑀢𑀺. 𑀬𑁄 𑀧𑀦 𑀏𑀯𑀁 𑀘𑁄𑀤𑀺𑀢𑁄 𑀅𑀬𑀁 𑀘𑀼𑀤𑀺𑀢𑀓𑁄 𑀦𑀸𑀫. 𑀧𑀜𑁆𑀘𑀤𑀲𑀲𑀼 𑀥𑀫𑁆𑀫𑁂𑀲𑀼 𑀅𑀧𑁆𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀅𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀦𑁆𑀢𑁄 𑀅𑀥𑀫𑁆𑀫𑀘𑁄𑀤𑀓𑁄 𑀦𑀸𑀫, 𑀢𑁂𑀦 𑀢𑀣𑀸 𑀘𑁄𑀤𑀺𑀢𑁄 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀦𑀸𑀫. 𑀯𑀺𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀘𑁄𑀤𑀓𑀘𑀼𑀤𑀺𑀢𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁂𑀳𑀺 𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑁂𑀳𑀺 𑀯𑀸 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀺𑀬𑀢𑁄, 𑀯𑀺𑀧𑀭𑀻𑀢𑁄 𑀅𑀦𑀺𑀬𑀢𑁄.

𑀲𑀸𑀯𑀓𑀸 𑀪𑀩𑁆𑀩𑀸𑀧𑀢𑁆𑀢𑀺𑀓𑀸 𑀦𑀸𑀫, 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀅𑀪𑀩𑁆𑀩𑀸𑀧𑀢𑁆𑀢𑀺𑀓𑀸 𑀦𑀸𑀫. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄 𑀉𑀓𑁆𑀔𑀺𑀢𑁆𑀢𑀓𑁄 𑀦𑀸𑀫, 𑀅𑀯𑀲𑁂𑀲𑀘𑀢𑀼𑀩𑁆𑀩𑀺𑀥𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑁄 𑀅𑀦𑀼𑀓𑁆𑀔𑀺𑀢𑁆𑀢𑀓𑁄 𑀦𑀸𑀫. 𑀅𑀬𑀜𑁆𑀳𑀺 𑀉𑀧𑁄𑀲𑀣𑀁 𑀯𑀸 𑀧𑀯𑀸𑀭𑀡𑀁 𑀯𑀸 𑀥𑀫𑁆𑀫𑀧𑀭𑀺𑀪𑁄𑀕𑀁 𑀯𑀸 𑀆𑀫𑀺𑀲𑀧𑀭𑀺𑀪𑁄𑀕𑀁 𑀯𑀸 𑀦 𑀓𑁄𑀧𑁂𑀢𑀺. ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣, 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄, 𑀓𑀡𑁆𑀝𑀓𑁄 𑀲𑀫𑀡𑀼𑀤𑁆𑀤𑁂𑀲𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀏𑀯𑀁 𑀮𑀺𑀗𑁆𑀕𑀤𑀡𑁆𑀟𑀓𑀫𑁆𑀫-𑀲𑀁𑀯𑀸𑀲𑀦𑀸𑀲𑀦𑀸𑀳𑀺 𑀦𑀸𑀲𑀺𑀢𑀩𑁆𑀩𑁄 𑀦𑀸𑀲𑀺𑀢𑀓𑁄 𑀦𑀸𑀫. 𑀲𑁂𑀲𑀸 𑀲𑀩𑁆𑀩𑁂 𑀅𑀦𑀸𑀲𑀺𑀢𑀓𑀸. 𑀬𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀸𑀤𑀺𑀓𑁄 𑀲𑀁𑀯𑀸𑀲𑁄 𑀅𑀢𑁆𑀣𑀺, 𑀅𑀬𑀁 𑀲𑀫𑀸𑀦𑀲𑀁𑀯𑀸𑀲𑀓𑁄, 𑀇𑀢𑀭𑁄 𑀦𑀸𑀦𑀸𑀲𑀁𑀯𑀸𑀲𑀓𑁄. 𑀲𑁄 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁄 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀞𑀧𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 ‘‘𑀏𑀓𑀁 𑀪𑀺𑀓𑁆𑀔𑀯𑁂 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀏𑀓𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁨. 𑀤𑀼𑀓𑁂𑀲𑀼 𑀲𑀘𑀺𑀢𑁆𑀢𑀓𑀸 𑀆𑀧𑀢𑁆𑀢𑀺 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸, 𑀅𑀘𑀺𑀢𑁆𑀢𑀓𑀸 𑀦𑁄𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀓𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀺, 𑀅𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀓𑀲𑁆𑀲 𑀆𑀧𑀢𑁆𑀢𑀺 𑀦𑀸𑀫 𑀅𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀺. 𑀲𑀤𑁆𑀥𑀫𑁆𑀫𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀧𑀤𑀲𑁄𑀥𑀫𑁆𑀫𑀸𑀤𑀺𑀓𑀸, 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀢𑁆𑀢𑀺. 𑀲𑀧𑀭𑀺𑀓𑁆𑀔𑀸𑀭𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑁄 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑁄𑀕𑁂, 𑀧𑀢𑁆𑀢𑀘𑀻𑀯𑀭𑀸𑀦𑀁 𑀦𑀺𑀤𑀳𑀦𑁂, 𑀓𑀺𑀮𑀺𑀝𑁆𑀞𑀘𑀻𑀯𑀭𑀸𑀦𑀁 𑀅𑀥𑁄𑀯𑀦𑁂, 𑀫𑀮𑀕𑁆𑀕𑀳𑀺𑀢𑀧𑀢𑁆𑀢𑀲𑁆𑀲 𑀅𑀧𑀘𑀦𑁂𑀢𑀺 𑀏𑀯𑀁 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁂 𑀆𑀧𑀢𑁆𑀢𑀺. 𑀧𑀭𑀧𑀭𑀺𑀓𑁆𑀔𑀸𑀭𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀲𑀗𑁆𑀖𑀺𑀓𑀫𑀜𑁆𑀘𑀧𑀻𑀞𑀸𑀤𑀻𑀦𑀁 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀡𑀅𑀦𑀸𑀧𑀼𑀘𑁆𑀙𑀸𑀕𑀫𑀦𑀸𑀤𑀻𑀲𑀼 𑀆𑀧𑀚𑁆𑀚𑀺𑀢𑀩𑁆𑀩𑀸 𑀆𑀧𑀢𑁆𑀢𑀺. 𑀲𑀧𑀼𑀕𑁆𑀕𑀮𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 ‘‘𑀫𑀼𑀤𑀼𑀧𑀺𑀝𑁆𑀞𑀺𑀓𑀲𑁆𑀲 𑀮𑀫𑁆𑀩𑀺𑀲𑁆𑀲 𑀊𑀭𑀼𑀦𑀸 𑀅𑀗𑁆𑀕𑀚𑀸𑀢𑀁 𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀧𑀢𑁆𑀢𑀺. 𑀧𑀭𑀧𑀼𑀕𑁆𑀕𑀮𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀦𑀸𑀫 𑀫𑁂𑀣𑀼𑀦𑀥𑀫𑁆𑀫𑀓𑀸𑀬𑀲𑀁𑀲𑀕𑁆𑀕𑀧𑀳𑀸𑀭𑀤𑀸𑀦𑀸𑀤𑀻𑀲𑀼 𑀯𑀼𑀢𑁆𑀢𑀸𑀧𑀢𑁆𑀢𑀺, ‘‘𑀲𑀺𑀔𑀭𑀡𑀻𑀲𑀻’’𑀢𑀺 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀕𑀭𑀼𑀓𑀁 𑀆𑀧𑀚𑁆𑀚𑀢𑀺, ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀫𑀼𑀲𑀸 𑀪𑀡𑀦𑁆𑀢𑁄 𑀮𑀳𑀼𑀓𑀁. 𑀅𑀪𑀽𑀢𑀸𑀭𑁄𑀘𑀦𑁂 𑀫𑀼𑀲𑀸 𑀪𑀡𑀦𑁆𑀢𑁄 𑀕𑀭𑀼𑀓𑀁. 𑀪𑀽𑀢𑀸𑀭𑁄𑀘𑀦𑁂 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀮𑀳𑀼𑀓𑀁.

‘‘𑀲𑀗𑁆𑀖𑀓𑀫𑁆𑀫𑀁 𑀯𑀕𑁆𑀕𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀦𑁆𑀢𑁄 𑀪𑀽𑀫𑀺𑀕𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀘𑁂 𑀧𑀦 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀆𑀓𑀸𑀲𑁂 𑀢𑀺𑀝𑁆𑀞𑁂𑀬𑁆𑀬, 𑀦 𑀆𑀧𑀚𑁆𑀚𑁂𑀬𑁆𑀬, 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁄 𑀯𑁂𑀳𑀸𑀲𑀕𑀢𑁄’’𑀢𑀺. 𑀯𑁂𑀳𑀸𑀲𑀓𑀼𑀝𑀺𑀬𑀸 𑀆𑀳𑀘𑁆𑀘𑀧𑀸𑀤𑀓𑀁 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀪𑀺𑀦𑀺𑀲𑀻𑀤𑀦𑁆𑀢𑁄 𑀯𑁂𑀳𑀸𑀲𑀕𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀘𑁂 𑀧𑀦 𑀢𑀁 𑀪𑀽𑀫𑀺𑀬𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑁂𑀬𑁆𑀬 𑀦 𑀆𑀧𑀚𑁆𑀚𑁂𑀬𑁆𑀬, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦𑁄 𑀪𑀽𑀫𑀺𑀕𑀢𑁄’’𑀢𑀺. 𑀕𑀫𑀺𑀬𑁄 𑀕𑀫𑀺𑀬𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, 𑀦𑁄 𑀧𑀯𑀺𑀲𑀦𑁆𑀢𑁄. 𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀲𑀙𑀢𑁆𑀢𑀼𑀧𑀸𑀳𑀦𑁄 𑀧𑀯𑀺𑀲𑀦𑁆𑀢𑁄 𑀧𑀯𑀺𑀲𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, 𑀦𑁄 𑀦𑀺𑀓𑁆𑀔𑀫𑀦𑁆𑀢𑁄.

𑀆𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀫𑀸𑀦𑀸; 𑀤𑀼𑀩𑁆𑀩𑀡𑁆𑀡𑀓𑀭𑀡𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀦 𑀅𑀦𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀫𑀽𑀕𑀩𑁆𑀩𑀢𑀸𑀤𑀻𑀦𑀺 𑀢𑀺𑀢𑁆𑀣𑀺𑀬𑀯𑀢𑁆𑀢𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑁄 𑀲𑀫𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀸𑀭𑀺𑀯𑀸𑀲𑀺𑀓𑀸𑀤𑀬𑁄 𑀧𑀦 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀓𑀢𑀸 𑀯𑀸 𑀅𑀢𑁆𑀢𑀦𑁄 𑀯𑀢𑁆𑀢𑀁 𑀅𑀲𑀫𑀸𑀤𑀺𑀬𑀦𑁆𑀢𑀸 𑀆𑀧𑀚𑁆𑀚𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀦 𑀲𑀫𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀲𑀺𑀩𑁆𑀩𑀦𑁆𑀢𑁄 𑀯𑁂𑀚𑁆𑀚𑀓𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑁄 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁄 𑀅𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀤𑀤𑀫𑀸𑀦𑁄 𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀘𑀻𑀯𑀭𑀸𑀤𑀻𑀦𑀺 𑀅𑀤𑁂𑀦𑁆𑀢𑁄 𑀅𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀕𑀡𑁆𑀳𑀦𑁆𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. ‘‘𑀦 𑀪𑀺𑀓𑁆𑀔𑀯𑁂 𑀑𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑁄 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫.

𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀭𑀺𑀪𑁄𑀕𑁂𑀦 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀜𑁆𑀘𑀸𑀳𑀺𑀓𑀁 𑀲𑀗𑁆𑀖𑀸𑀝𑀺𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑀬𑀫𑀸𑀦𑀸 𑀅𑀧𑀭𑀺𑀪𑁄𑀕𑁂𑀦 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀳𑀕𑀸𑀭𑀲𑁂𑀬𑁆𑀬𑀁 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀦𑀸𑀫, 𑀦𑁄 𑀤𑀺𑀯𑀸, 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁄 𑀤𑀺𑀯𑀸 𑀆𑀧𑀚𑁆𑀚𑀢𑀺, 𑀦𑁄 𑀭𑀢𑁆𑀢𑀺𑀁. 𑀏𑀓𑀭𑀢𑁆𑀢𑀙𑀸𑀭𑀢𑁆𑀢𑀲𑀢𑁆𑀢𑀸𑀳𑀤𑀲𑀸𑀳𑀫𑀸𑀲𑀸𑀢𑀺𑀓𑁆𑀓𑀫𑁂𑀲𑀼 𑀯𑀼𑀢𑁆𑀢𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀅𑀭𑀼𑀡𑀼𑀕𑁆𑀕𑁂 𑀆𑀧𑀚𑁆𑀚𑀢𑀺 𑀦𑀸𑀫, 𑀧𑀯𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀦 𑀅𑀭𑀼𑀡𑀼𑀕𑁆𑀕𑁂 𑀆𑀧𑀚𑁆𑀚𑀢𑀺 𑀦𑀸𑀫.

𑀪𑀽𑀢𑀕𑀸𑀫𑀜𑁆𑀘𑁂𑀯 𑀅𑀗𑁆𑀕𑀚𑀸𑀢𑀜𑁆𑀘 𑀙𑀺𑀦𑁆𑀤𑀦𑁆𑀢𑁄 𑀙𑀺𑀦𑁆𑀤𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, 𑀓𑁂𑀲𑁂 𑀯𑀸 𑀦𑀔𑁂 𑀯𑀸 𑀦 𑀙𑀺𑀦𑁆𑀤𑀦𑁆𑀢𑁄 𑀦 𑀙𑀺𑀦𑁆𑀤𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀆𑀧𑀢𑁆𑀢𑀺𑀁 𑀙𑀸𑀤𑁂𑀦𑁆𑀢𑁄 𑀙𑀸𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀁, 𑀦𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁, 𑀬𑁄 𑀆𑀕𑀘𑁆𑀙𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀫𑀁 𑀧𑀦 𑀆𑀧𑀢𑁆𑀢𑀺𑀁 𑀦 𑀙𑀸𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀓𑀼𑀲𑀘𑀻𑀭𑀸𑀤𑀻𑀦𑀺 𑀥𑀸𑀭𑁂𑀦𑁆𑀢𑁄 𑀥𑀸𑀭𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫, ‘‘𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀧𑀢𑁆𑀢𑁄 𑀬𑀸𑀯 𑀪𑁂𑀤𑀦𑀸𑀬 𑀥𑀸𑀭𑁂𑀢𑀩𑁆𑀩𑁄’’𑀢𑀺 𑀇𑀫𑀁 𑀆𑀧𑀢𑁆𑀢𑀺𑀁 𑀦 𑀥𑀸𑀭𑁂𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑀸𑀫.

‘‘𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀁 𑀓𑀭𑁄𑀢𑀻’’𑀢𑀺 𑀏𑀓𑀲𑀻𑀫𑀸𑀬𑀁 𑀤𑁆𑀯𑀻𑀲𑀼 𑀲𑀗𑁆𑀖𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀧𑀓𑁆𑀔𑀲𑁆𑀲 𑀮𑀤𑁆𑀥𑀺𑀁 𑀕𑀡𑁆𑀳𑀦𑁆𑀢𑁄 𑀬𑀲𑁆𑀫𑀺𑀁 𑀧𑀓𑁆𑀔𑁂 𑀦𑀺𑀲𑀺𑀦𑁆𑀦𑁄 𑀢𑁂𑀲𑀁 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀁 𑀓𑀭𑁄𑀢𑀺 𑀦𑀸𑀫. 𑀬𑁂𑀲𑀁 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀢𑁂𑀲𑀁 𑀕𑀡𑀧𑀽𑀭𑀓𑁄 𑀳𑀼𑀢𑁆𑀯𑀸 𑀓𑀫𑁆𑀫𑀁 𑀓𑁄𑀧𑁂𑀢𑀺, 𑀇𑀢𑀭𑁂𑀲𑀁 𑀳𑀢𑁆𑀣𑀧𑀸𑀲𑀁 𑀅𑀦𑀸𑀕𑀢𑀢𑁆𑀢𑀸. 𑀲𑀫𑀸𑀦𑀲𑀁𑀯𑀸𑀲𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀲𑀜𑁆𑀳𑀺 𑀲𑁄 𑀮𑀤𑁆𑀥𑀺𑀁 𑀭𑁄𑀘𑁂𑀢𑀺, 𑀢𑁂𑀲𑀁 𑀲𑀫𑀸𑀦𑀲𑀁𑀯𑀸𑀲𑀓𑁄 𑀳𑁄𑀢𑀺, 𑀇𑀢𑀭𑁂𑀲𑀁 𑀦𑀸𑀦𑀸𑀲𑀁𑀯𑀸𑀲𑀓𑁄. 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀢𑀺 𑀆𑀧𑀚𑁆𑀚𑀺𑀢𑀩𑁆𑀩𑀢𑁄 𑀆𑀧𑀢𑁆𑀢𑀺𑀬𑁄, 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑀸𑀢𑀺 𑀏𑀯𑀁 𑀤𑁆𑀯𑁂𑀬𑁂𑀯 𑀦𑀸𑀫𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦𑀸𑀫𑀯𑀲𑁂𑀦 𑀤𑀼𑀓𑀁 𑀤𑀲𑁆𑀲𑀺𑀢𑀁. 𑀓𑀫𑁆𑀫𑁂𑀦 𑀯𑀸 𑀲𑀮𑀸𑀓𑀕𑁆𑀕𑀸𑀳𑁂𑀦 𑀯𑀸𑀢𑀺 𑀏𑀢𑁆𑀣 𑀉𑀤𑁆𑀤𑁂𑀲𑁄 𑀘𑁂𑀯 𑀓𑀫𑁆𑀫𑀜𑁆𑀘 𑀏𑀓𑀁, 𑀯𑁄𑀳𑀸𑀭𑁄 𑀘𑁂𑀯 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀲𑀮𑀸𑀓𑀕𑁆𑀕𑀸𑀳𑁄 𑀘 𑀏𑀓𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀼𑀩𑁆𑀩𑀪𑀸𑀕𑀸, 𑀓𑀫𑁆𑀫𑀜𑁆𑀘𑁂𑀯 𑀉𑀤𑁆𑀤𑁂𑀲𑁄 𑀘 𑀧𑀫𑀸𑀡𑀁.

𑀅𑀤𑁆𑀥𑀸𑀦𑀳𑀻𑀦𑁄 𑀦𑀸𑀫 𑀊𑀦𑀯𑀻𑀲𑀢𑀺𑀯𑀲𑁆𑀲𑁄. 𑀅𑀗𑁆𑀕𑀳𑀻𑀦𑁄 𑀦𑀸𑀫 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀪𑁂𑀤𑁄. 𑀯𑀢𑁆𑀣𑀼𑀯𑀺𑀧𑀦𑁆𑀦𑁄 𑀦𑀸𑀫 𑀧𑀡𑁆𑀟𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀘. 𑀅𑀯𑀲𑁂𑀲𑀸 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀤𑀬𑁄 𑀅𑀝𑁆𑀞 𑀅𑀪𑀩𑁆𑀩𑀧𑀼𑀕𑁆𑀕𑀮𑀸 𑀓𑀭𑀡𑀤𑀼𑀓𑁆𑀓𑀝𑀓𑀸 𑀦𑀸𑀫. 𑀤𑀼𑀓𑁆𑀓𑀝𑀓𑀺𑀭𑀺𑀬𑀸 𑀤𑀼𑀓𑁆𑀓𑀝𑀓𑀫𑁆𑀫𑀸, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀓𑀢𑁂𑀦 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀅𑀪𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀧𑀽𑀭𑁄 𑀦𑀸𑀫 𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑁄. 𑀦𑁄 𑀘 𑀬𑀸𑀘𑀢𑀺 𑀦𑀸𑀫 𑀉𑀧𑀲𑀫𑁆𑀧𑀤𑀁 𑀦 𑀬𑀸𑀘𑀢𑀺. 𑀅𑀮𑀚𑁆𑀚𑀺𑀲𑁆𑀲 𑀘 𑀩𑀸𑀮𑀲𑁆𑀲 𑀘𑀸𑀢𑀺 𑀅𑀮𑀚𑁆𑀚𑀻 𑀲𑀘𑁂𑀧𑀺 𑀢𑁂𑀧𑀺𑀝𑀓𑁄 𑀳𑁄𑀢𑀺, 𑀩𑀸𑀮𑁄 𑀘 𑀲𑀘𑁂𑀧𑀺 𑀲𑀝𑁆𑀞𑀺𑀯𑀲𑁆𑀲𑁄 𑀳𑁄𑀢𑀺, 𑀉𑀪𑁄𑀧𑀺 𑀦𑀺𑀲𑁆𑀲𑀸𑀬 𑀦 𑀯𑀢𑁆𑀣𑀩𑁆𑀩𑀁. 𑀩𑀸𑀮𑀲𑁆𑀲 𑀘 𑀮𑀚𑁆𑀚𑀺𑀲𑁆𑀲 𑀘𑀸𑀢𑀺 𑀏𑀢𑁆𑀣 𑀩𑀸𑀮𑀲𑁆𑀲 ‘‘𑀢𑁆𑀯𑀁 𑀦𑀺𑀲𑁆𑀲𑀬𑀁 𑀕𑀡𑁆𑀳𑀸’’𑀢𑀺 𑀆𑀡𑀸𑀬𑀧𑀺 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀮𑀚𑁆𑀚𑀺𑀲𑁆𑀲 𑀧𑀦 𑀬𑀸𑀘𑀦𑁆𑀢𑀲𑁆𑀲𑁂𑀯. 𑀲𑀸𑀢𑀺𑀲𑀸𑀭𑀦𑁆𑀢𑀺 𑀲𑀤𑁄𑀲𑀁; 𑀬𑀁 𑀅𑀚𑁆𑀛𑀸𑀘𑀭𑀦𑁆𑀢𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.

𑀓𑀸𑀬𑁂𑀦 𑀧𑀝𑀺𑀓𑁆𑀓𑁄𑀲𑀦𑀸 𑀦𑀸𑀫 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀧𑀝𑀺𑀓𑁆𑀓𑁄𑀲𑀦𑀸. 𑀓𑀸𑀬𑁂𑀦 𑀧𑀝𑀺𑀚𑀸𑀦𑀸𑀢𑀻𑀢𑀺 𑀳𑀢𑁆𑀣𑀯𑀺𑀓𑀸𑀭𑀸𑀤𑀻𑀳𑀺 𑀧𑀝𑀺𑀚𑀸𑀦𑀸𑀢𑀺. 𑀉𑀧𑀖𑀸𑀢𑀺𑀓𑀸 𑀦𑀸𑀫 𑀉𑀧𑀖𑀸𑀢𑀸. 𑀲𑀺𑀓𑁆𑀔𑀽𑀧𑀖𑀸𑀢𑀺𑀓𑀸 𑀦𑀸𑀫 𑀲𑀺𑀓𑁆𑀔𑀽𑀧𑀖𑀸𑀢𑁄. 𑀪𑁄𑀕𑀽𑀧𑀖𑀸𑀢𑀺𑀓𑀸 𑀦𑀸𑀫 𑀧𑀭𑀺𑀪𑁄𑀕𑀽𑀧𑀖𑀸𑀢𑁄, 𑀢𑀢𑁆𑀣 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀅𑀲𑀺𑀓𑁆𑀔𑀢𑁄 𑀲𑀺𑀓𑁆𑀔𑀽𑀧𑀖𑀸𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀗𑁆𑀖𑀺𑀓𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀯𑀸 𑀤𑀼𑀧𑁆𑀧𑀭𑀺𑀪𑁄𑀕𑀁 𑀪𑀼𑀜𑁆𑀚𑀢𑁄 𑀪𑁄𑀕𑀽𑀧𑀖𑀸𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑁆𑀯𑁂 𑀯𑁂𑀦𑀬𑀺𑀓𑀸𑀢𑀺 𑀤𑁆𑀯𑁂 𑀅𑀢𑁆𑀣𑀸 𑀯𑀺𑀦𑀬𑀲𑀺𑀤𑁆𑀥𑀸. 𑀧𑀜𑁆𑀜𑀢𑁆𑀢𑀁 𑀦𑀸𑀫 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀲𑁂𑀦 𑀧𑀜𑁆𑀜𑀢𑁆𑀢𑀁. 𑀧𑀜𑁆𑀜𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀘𑀢𑀽𑀲𑀼 𑀫𑀳𑀸𑀧𑀤𑁂𑀲𑁂𑀲𑀼 𑀤𑀝𑁆𑀞𑀩𑁆𑀩𑀁. 𑀲𑁂𑀢𑀼𑀖𑀸𑀢𑁄𑀢𑀺 𑀧𑀘𑁆𑀘𑀬𑀖𑀸𑀢𑁄; 𑀬𑁂𑀦 𑀘𑀺𑀢𑁆𑀢𑁂𑀦 𑀅𑀓𑀧𑁆𑀧𑀺𑀬𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀧𑀺 𑀅𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀓𑀸𑀭𑀺𑀢𑀸𑀢𑀺 𑀫𑀢𑁆𑀢𑀸𑀬 𑀧𑀫𑀸𑀡𑁂𑀦 𑀓𑀭𑀡𑀁; 𑀧𑀫𑀸𑀡𑁂 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑁂𑀦 𑀆𑀧𑀚𑁆𑀚𑀢𑀻𑀢𑀺 𑀓𑀸𑀬𑀤𑁆𑀯𑀸𑀭𑀺𑀓𑀁 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺; 𑀯𑀘𑀻𑀤𑁆𑀯𑀸𑀭𑀺𑀓𑀁 𑀯𑀸𑀘𑀸𑀬. 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀻𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂 𑀯𑀺𑀦𑀸𑀧𑀺 𑀤𑁂𑀲𑀦𑀸𑀬 𑀓𑀸𑀬𑁂𑀦𑁂𑀯 𑀯𑀼𑀝𑁆𑀞𑀸𑀢𑀺; 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑁄 𑀧𑀦 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑁄 𑀦𑀸𑀫 𑀅𑀚𑁆𑀛𑁄𑀳𑀭𑀡𑀧𑀭𑀺𑀪𑁄𑀕𑁄. 𑀩𑀸𑀳𑀺𑀭𑀧𑀭𑀺𑀪𑁄𑀕𑁄 𑀦𑀸𑀫 𑀲𑀻𑀲𑀫𑀓𑁆𑀔𑀦𑀸𑀤𑀺.

𑀅𑀦𑀸𑀕𑀢𑀁 𑀪𑀸𑀭𑀁 𑀯𑀳𑀢𑀻𑀢𑀺 𑀅𑀣𑁂𑀭𑁄𑀯 𑀲𑀫𑀸𑀦𑁄 𑀣𑁂𑀭𑁂𑀳𑀺 𑀯𑀳𑀺𑀢𑀩𑁆𑀩𑀁 𑀩𑀻𑀚𑀦𑀕𑀸𑀳𑀥𑀫𑁆𑀫𑀚𑁆𑀛𑁂𑀲𑀦𑀸𑀤𑀺𑀪𑀸𑀭𑀁 𑀯𑀳𑀢𑀺; 𑀢𑀁 𑀦𑀺𑀢𑁆𑀣𑀭𑀺𑀢𑀼𑀁 𑀯𑀻𑀭𑀺𑀬𑀁 𑀆𑀭𑀪𑀢𑀺. 𑀆𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀻𑀢𑀺 𑀣𑁂𑀭𑁄 𑀣𑁂𑀭𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀥𑀫𑁆𑀫𑀁 𑀪𑀸𑀲𑀺𑀢𑀼𑀁, 𑀧𑀭𑀁 𑀯𑀸 𑀅𑀚𑁆𑀛𑁂𑀲𑀺𑀢𑀼𑀁, 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀣𑁂𑀭𑀸𑀥𑁂𑀬𑁆𑀬𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀧𑀭𑀺𑀳𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻𑀢𑀺 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑁆𑀯𑀸 𑀓𑀭𑁄𑀢𑀺. 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑁆𑀯𑀸 𑀓𑀭𑁄𑀢𑀺. 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀆𑀲𑀯𑀸 𑀯𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑀤𑀼𑀓𑁂𑀧𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁩. 𑀢𑀺𑀓𑁂𑀲𑀼 𑀅𑀢𑁆𑀣𑀸𑀧𑀢𑁆𑀢𑀺 𑀢𑀺𑀝𑁆𑀞𑀦𑁆𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑀺 𑀆𑀧𑀢𑁆𑀢𑀺, 𑀬𑀁 𑀢𑀺𑀝𑁆𑀞𑀦𑁆𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀢𑁆𑀣 𑀮𑁄𑀳𑀺𑀢𑀼𑀧𑁆𑀧𑀸𑀤𑀸𑀧𑀢𑁆𑀢𑀺𑀁 𑀢𑀺𑀝𑁆𑀞𑀦𑁆𑀢𑁂 𑀆𑀧𑀚𑁆𑀚𑀢𑀺. ‘‘𑀏𑀢𑀭𑀳𑀺 𑀔𑁄 𑀧𑀦𑀸𑀦𑀦𑁆𑀤, 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀆𑀯𑀼𑀲𑁄𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦 𑀯𑁄 𑀫𑀫𑀘𑁆𑀘𑀬𑁂𑀦 𑀏𑀯𑀁 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑀁, 𑀦𑀯𑀓𑁂𑀦, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀣𑁂𑀭𑁄 𑀪𑀺𑀓𑁆𑀔𑀽 ‘𑀪𑀦𑁆𑀢𑁂’𑀢𑀺 𑀯𑀸 ‘𑀆𑀬𑀲𑁆𑀫𑀸’𑀢𑀺 𑀯𑀸 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑁄’’𑀢𑀺 𑀯𑀘𑀦𑀢𑁄 𑀣𑁂𑀭𑀁 𑀆𑀯𑀼𑀲𑁄𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀦𑁄 𑀢𑀺𑀝𑁆𑀞𑀦𑁆𑀢𑁂. 𑀇𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀥𑀭𑀦𑁆𑀢𑁂𑀧𑀺 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺.

𑀧𑀯𑀸𑀭𑁂𑀢𑁆𑀯𑀸 𑀅𑀦𑀢𑀺𑀭𑀺𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀆𑀧𑀢𑁆𑀢𑀺𑀁 𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀯𑀺𑀓𑀸𑀮𑁂. 𑀯𑀺𑀓𑀸𑀮𑀪𑁄𑀚𑀦𑀸𑀧𑀢𑁆𑀢𑀺𑀁 𑀧𑀦 𑀯𑀺𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀓𑀸𑀮𑁂. 𑀅𑀯𑀲𑁂𑀲𑀸 𑀓𑀸𑀮𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀯𑀺𑀓𑀸𑀮𑁂 𑀘. 𑀲𑀳𑀕𑀸𑀭𑀲𑁂𑀬𑁆𑀬𑀁 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀤𑁆𑀯𑀸𑀭𑀁 𑀅𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑀁 𑀤𑀺𑀯𑀸. 𑀲𑁂𑀲𑀸 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘. ‘‘𑀤𑀲𑀯𑀲𑁆𑀲𑁄𑀫𑁆𑀳𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺 𑀦𑁄 𑀊𑀦𑀤𑀲𑀯𑀲𑁆𑀲𑁄. ‘‘𑀅𑀳𑀁 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄’’𑀢𑀺 𑀦𑀯𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀊𑀦𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺 𑀦𑁄 𑀤𑀲𑀯𑀲𑁆𑀲𑁄. 𑀲𑁂𑀲𑀸 𑀤𑀲𑀯𑀲𑁆𑀲𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀊𑀦𑀤𑀲𑀯𑀲𑁆𑀲𑁄 𑀘. ‘‘𑀧𑀜𑁆𑀘𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀧𑀜𑁆𑀘𑀯𑀲𑁆𑀲𑁄 𑀆𑀧𑀚𑁆𑀚𑀢𑀺. ‘‘𑀅𑀳𑀁 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄’’𑀢𑀺 𑀦𑀯𑀓𑁄 𑀅𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀊𑀦𑀧𑀜𑁆𑀘𑀯𑀲𑁆𑀲𑁄 𑀆𑀧𑀚𑁆𑀚𑀢𑀺. 𑀲𑁂𑀲𑀁 𑀧𑀜𑁆𑀘𑀯𑀲𑁆𑀲𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀊𑀦𑀧𑀜𑁆𑀘𑀯𑀲𑁆𑀲𑁄 𑀘. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀧𑀤𑀲𑁄𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑁄, 𑀫𑀸𑀢𑀼𑀕𑀸𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀏𑀯𑀭𑀽𑀧𑀁 𑀆𑀧𑀢𑁆𑀢𑀺𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀧𑀸𑀭𑀸𑀚𑀺𑀓-𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺-𑀓𑀸𑀬𑀲𑀁𑀲𑀕𑁆𑀕-𑀤𑀼𑀝𑁆𑀞𑀼𑀮𑁆𑀮-𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬-𑀤𑀼𑀝𑁆𑀞𑀤𑁄𑀲-𑀲𑀗𑁆𑀖𑀪𑁂𑀤𑀧𑀳𑀸𑀭𑀤𑀸𑀦-𑀢𑀮𑀲𑀢𑁆𑀢𑀺𑀓𑀸𑀤𑀺𑀪𑁂𑀤𑀁 𑀅𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀲𑀳𑀕𑀸𑀭𑀲𑁂𑀬𑁆𑀬𑀸𑀤𑀺𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀬𑀁 𑀅𑀭𑀳𑀸𑀯 𑀆𑀧𑀚𑁆𑀚𑀢𑀺, 𑀲𑀩𑁆𑀩𑀁 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄𑀯 𑀆𑀧𑀚𑁆𑀚𑀢𑀺, 𑀫𑁂𑀣𑀼𑀦𑀥𑀫𑁆𑀫𑀸𑀤𑀺𑀪𑁂𑀤𑀫𑀸𑀧𑀢𑁆𑀢𑀺𑀁 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺, 𑀤𑀼𑀝𑁆𑀞𑀤𑁄𑀲𑀸𑀤𑀺𑀪𑁂𑀤𑀁 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻, 𑀬𑀁 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺, 𑀢𑀁𑀬𑁂𑀯 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀆𑀧𑀚𑁆𑀚𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺.

𑀢𑀬𑁄 𑀧𑀝𑀺𑀓𑁆𑀔𑁂𑀧𑀸𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀢𑀬𑁄 𑀧𑀝𑀺𑀓𑁆𑀔𑁂𑀧𑀸. 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀫𑀳𑀺𑀘𑁆𑀙𑀢𑀸 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀧𑀝𑀺𑀧𑀢𑁆𑀢𑀺𑀬𑀸 𑀅𑀕𑁄𑀧𑀸𑀬𑀦𑀸, 𑀇𑀫𑁂 𑀳𑀺 𑀢𑀬𑁄 𑀥𑀫𑁆𑀫𑀸 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀧𑀦 𑀢𑀬𑁄 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀬𑁄 𑀅𑀦𑀼𑀜𑁆𑀜𑀸𑀢𑀸’’𑀢𑀺.

‘‘𑀤𑀲𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 ‘‘𑀧𑀜𑁆𑀘𑀯𑀲𑁆𑀲𑁄𑀫𑁆𑀳𑀻’’𑀢𑀺 𑀦𑀺𑀲𑁆𑀲𑀬𑀁 𑀅𑀕𑀡𑁆𑀳𑀦𑁆𑀢𑁄 𑀩𑀸𑀮𑁄 𑀆𑀧𑀚𑁆𑀚𑀢𑀺 𑀦𑁄 𑀧𑀡𑁆𑀟𑀺𑀢𑁄, 𑀊𑀦𑀤𑀲𑀯𑀲𑁆𑀲𑁄 ‘‘𑀩𑁆𑀬𑀢𑁆𑀢𑁄𑀫𑁆𑀳𑀻’’𑀢𑀺 𑀩𑀳𑀼𑀲𑁆𑀲𑀼𑀢𑀢𑁆𑀢𑀸 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀊𑀦𑀧𑀜𑁆𑀘𑀯𑀲𑁆𑀲𑁄 𑀘 𑀦𑀺𑀲𑁆𑀲𑀬𑀁 𑀅𑀕𑀡𑁆𑀳𑀦𑁆𑀢𑁄 𑀧𑀡𑁆𑀟𑀺𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀸𑀮𑁄; 𑀅𑀯𑀲𑁂𑀲𑀁 𑀧𑀡𑁆𑀟𑀺𑀢𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀸𑀮𑁄 𑀘. 𑀯𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀓𑀸𑀴𑁂 𑀆𑀧𑀚𑁆𑀚𑀢𑀺 𑀦𑁄 𑀚𑀼𑀡𑁆𑀳𑁂; 𑀫𑀳𑀸𑀧𑀯𑀸𑀭𑀡𑀸𑀬 𑀅𑀧𑁆𑀧𑀯𑀸𑀭𑁂𑀦𑁆𑀢𑁄 𑀚𑀼𑀡𑁆𑀳𑁂 𑀆𑀧𑀚𑁆𑀚𑀢𑀺 𑀦𑁄 𑀓𑀸𑀴𑁂; 𑀅𑀯𑀲𑁂𑀲𑀁 𑀓𑀸𑀴𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀚𑀼𑀡𑁆𑀳𑁂 𑀘. 𑀯𑀲𑁆𑀲𑀽𑀧𑀕𑀫𑀦𑀁 𑀓𑀸𑀴𑁂 𑀓𑀧𑁆𑀧𑀢𑀺 𑀦𑁄 𑀚𑀼𑀡𑁆𑀳𑁂; 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀡𑀸 𑀚𑀼𑀡𑁆𑀳𑁂 𑀓𑀧𑁆𑀧𑀢𑀺 𑀦𑁄 𑀓𑀸𑀴𑁂; 𑀲𑁂𑀲𑀁 𑀅𑀦𑀼𑀜𑁆𑀜𑀸𑀢𑀓𑀁 𑀓𑀸𑀴𑁂 𑀘𑁂𑀯 𑀓𑀧𑁆𑀧𑀢𑀺 𑀚𑀼𑀡𑁆𑀳𑁂 𑀘.

𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀦𑁆𑀢𑁄 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀁. ‘‘𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀧𑀭𑀺𑀬𑁂𑀲𑀦𑁆𑀢𑁄 𑀅𑀢𑀺𑀭𑁂𑀓𑀟𑁆𑀠𑀫𑀸𑀲𑁂 𑀲𑁂𑀲𑁂 𑀓𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑁄 𑀘 𑀕𑀺𑀫𑁆𑀳𑁂 𑀆𑀧𑀚𑁆𑀚𑀢𑀺 𑀦𑀸𑀫. 𑀲𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑁄 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑁄 𑀯𑀲𑁆𑀲𑁂 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀁 𑀯𑀸 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀁 𑀯𑀸 𑀓𑀭𑁄𑀦𑁆𑀢𑁄 𑀲𑀗𑁆𑀖𑁄 𑀆𑀧𑀚𑁆𑀚𑀢𑀺. 𑀲𑀼𑀢𑁆𑀢𑀼𑀤𑁆𑀤𑁂𑀲𑀜𑁆𑀘 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀜𑁆𑀘 𑀓𑀭𑁄𑀦𑁆𑀢𑁄 𑀕𑀡𑁄 𑀆𑀧𑀚𑁆𑀚𑀢𑀺. 𑀏𑀓𑀓𑁄 𑀲𑀼𑀢𑁆𑀢𑀼𑀤𑁆𑀤𑁂𑀲𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑀜𑁆𑀘 𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀆𑀧𑀚𑁆𑀚𑀢𑀺. 𑀧𑀯𑀸𑀭𑀡𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀲𑀗𑁆𑀖𑀼𑀧𑁄𑀲𑀣𑁄 𑀘 𑀲𑀗𑁆𑀖𑀧𑀯𑀸𑀭𑀡𑀸 𑀘 𑀲𑀗𑁆𑀖𑀲𑁆𑀲𑁂𑀯 𑀓𑀧𑁆𑀧𑀢𑀺. 𑀕𑀡𑀼𑀧𑁄𑀲𑀣𑁄 𑀘 𑀕𑀡𑀧𑀯𑀸𑀭𑀡𑀸 𑀘 𑀕𑀡𑀲𑁆𑀲𑁂𑀯 𑀓𑀧𑁆𑀧𑀢𑀺. 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄 𑀘 𑀅𑀥𑀺𑀝𑁆𑀞𑀸𑀦𑀧𑀯𑀸𑀭𑀡𑀸 𑀘 𑀧𑀼𑀕𑁆𑀕𑀮𑀲𑁆𑀲𑁂𑀯 𑀓𑀧𑁆𑀧𑀢𑀺. ‘‘𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄𑀫𑁆𑀳𑀻’’𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑁄 𑀯𑀢𑁆𑀣𑀼𑀁 𑀙𑀸𑀤𑁂𑀢𑀺 𑀦 𑀆𑀧𑀢𑁆𑀢𑀺𑀁, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺’’𑀦𑁆𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑁄 𑀆𑀧𑀢𑁆𑀢𑀺𑀁 𑀙𑀸𑀤𑁂𑀢𑀺 𑀦𑁄 𑀯𑀢𑁆𑀣𑀼𑀁, 𑀬𑁄 𑀦𑁂𑀯 𑀯𑀢𑁆𑀣𑀼𑀁 𑀦 𑀆𑀧𑀢𑁆𑀢𑀺𑀁 𑀆𑀭𑁄𑀘𑁂𑀢𑀺, 𑀅𑀬𑀁 𑀯𑀢𑁆𑀣𑀼𑀜𑁆𑀘𑁂𑀯 𑀙𑀸𑀤𑁂𑀢𑀺 𑀆𑀧𑀢𑁆𑀢𑀺𑀜𑁆𑀘.

𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑀺. 𑀚𑀦𑁆𑀢𑀸𑀖𑀭𑀫𑁂𑀯 𑀧𑀝𑀺𑀘𑁆𑀙𑀸𑀤𑀺 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺. 𑀇𑀢𑀭𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀅𑀦𑁆𑀢𑁄𑀚𑀦𑁆𑀢𑀸𑀖𑀭𑁂 𑀞𑀺𑀢𑁂𑀦 𑀧𑀭𑀺𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀉𑀤𑀓𑁂 𑀑𑀢𑀺𑀡𑁆𑀡𑁂𑀦𑀸𑀧𑀺 𑀏𑀢𑀤𑁂𑀯 𑀯𑀝𑁆𑀝𑀢𑀺. 𑀉𑀪𑀬𑀢𑁆𑀣 𑀔𑀸𑀤𑀺𑀢𑀼𑀁 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀦 𑀯𑀝𑁆𑀝𑀢𑀺. 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺 𑀲𑀩𑁆𑀩𑀓𑀧𑁆𑀧𑀺𑀬𑀢𑀸𑀬 𑀧𑀝𑀺𑀘𑁆𑀙𑀦𑁆𑀦𑁂𑀦 𑀲𑀩𑁆𑀩𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀯𑀳𑀦𑁆𑀢𑀻𑀢𑀺 𑀬𑀦𑁆𑀢𑀺 𑀦𑀺𑀬𑁆𑀬𑀦𑁆𑀢𑀺; 𑀦𑀺𑀦𑁆𑀤𑀁 𑀯𑀸 𑀧𑀝𑀺𑀓𑁆𑀓𑁄𑀲𑀁 𑀯𑀸 𑀦 𑀮𑀪𑀦𑁆𑀢𑀺. 𑀘𑀦𑁆𑀤𑀫𑀡𑁆𑀟𑀮𑀁 𑀅𑀩𑁆𑀪𑀸𑀫𑀳𑀺𑀓𑀸𑀥𑀽𑀫𑀭𑀚𑀭𑀸𑀳𑀼𑀯𑀺𑀫𑀼𑀢𑁆𑀢𑀁 𑀯𑀺𑀯𑀝𑀁𑀬𑁂𑀯 𑀯𑀺𑀭𑁄𑀘𑀢𑀺, 𑀦 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑀁. 𑀢𑀣𑀸 𑀲𑀽𑀭𑀺𑀬𑀫𑀡𑁆𑀟𑀮𑀁, 𑀥𑀫𑁆𑀫𑀯𑀺𑀦𑀬𑁄𑀧𑀺 𑀯𑀺𑀯𑀭𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑁄𑀯 𑀯𑀺𑀭𑁄𑀘𑀢𑀺 𑀦𑁄 𑀧𑀝𑀺𑀘𑁆𑀙𑀦𑁆𑀦𑁄.

𑀅𑀜𑁆𑀜𑁂𑀦 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀦 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀅𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀅𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀕𑀺𑀮𑀸𑀦𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀅𑀕𑀺𑀮𑀸𑀦𑁄 𑀘.

𑀅𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀳𑀻𑀢𑀺 𑀅𑀦𑀼𑀧𑀔𑀚𑁆𑀚 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑁄 𑀅𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀳𑀺, 𑀩𑀳𑀺 𑀆𑀧𑀚𑁆𑀚𑀢𑀺 𑀦𑁄 𑀅𑀦𑁆𑀢𑁄𑀢𑀺 𑀲𑀗𑁆𑀖𑀺𑀓𑀁 𑀫𑀜𑁆𑀘𑀸𑀤𑀺𑀁 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁄 𑀩𑀳𑀺 𑀆𑀧𑀚𑁆𑀚𑀢𑀺 𑀦𑁄 𑀅𑀦𑁆𑀢𑁄, 𑀅𑀯𑀲𑁂𑀲𑀁 𑀧𑀦 𑀅𑀦𑁆𑀢𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺 𑀘. 𑀅𑀦𑁆𑀢𑁄𑀲𑀻𑀫𑀸𑀬𑀸𑀢𑀺 𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀅𑀤𑀲𑁆𑀲𑁂𑀢𑁆𑀯𑀸 𑀲𑀙𑀢𑁆𑀢𑀼𑀧𑀸𑀳𑀦𑁄 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑀫𑀢𑁆𑀢𑁄𑀯 𑀆𑀧𑀚𑁆𑀚𑀢𑀺. 𑀩𑀳𑀺𑀲𑀻𑀫𑀸𑀬𑀸𑀢𑀺 𑀕𑀫𑀺𑀓𑁄 𑀤𑀸𑀭𑀼𑀪𑀡𑁆𑀟𑀧𑀝𑀺𑀲𑀸𑀫𑀦𑀸𑀤𑀺𑀕𑀫𑀺𑀓𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁄𑀯 𑀆𑀧𑀚𑁆𑀚𑀢𑀺. 𑀅𑀯𑀲𑁂𑀲𑀁 𑀅𑀦𑁆𑀢𑁄𑀲𑀻𑀫𑀸𑀬 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺𑀲𑀻𑀫𑀸𑀬 𑀘. 𑀲𑀢𑀺 𑀯𑀼𑀟𑁆𑀠𑀢𑀭𑁂 𑀅𑀦𑀚𑁆𑀛𑀺𑀝𑁆𑀞𑁄 𑀥𑀫𑁆𑀫𑀁 𑀪𑀸𑀲𑀦𑁆𑀢𑁄 𑀲𑀗𑁆𑀖𑀫𑀚𑁆𑀛𑁂 𑀆𑀧𑀚𑁆𑀚𑀢𑀺 𑀦𑀸𑀫. 𑀕𑀡𑀫𑀚𑁆𑀛𑁂𑀧𑀺 𑀧𑀼𑀕𑁆𑀕𑀮𑀲𑀦𑁆𑀢𑀺𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀻𑀢𑀺 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂𑀦 𑀯𑀼𑀝𑁆𑀞𑀸𑀢𑀺. 𑀓𑀸𑀬𑀁 𑀅𑀘𑀸𑀮𑁂𑀢𑁆𑀯𑀸 𑀯𑀸𑀘𑀸𑀬 𑀤𑁂𑀲𑁂𑀦𑁆𑀢𑀲𑁆𑀲 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀯𑀘𑀻𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀬𑀓𑀺𑀭𑀺𑀬𑀁 𑀓𑀢𑁆𑀯𑀸 𑀤𑁂𑀲𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀲𑀗𑁆𑀖𑀫𑀚𑁆𑀛𑁂 𑀤𑁂𑀲𑀦𑀸𑀕𑀸𑀫𑀺𑀦𑀻𑀧𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀧𑀺 𑀯𑀼𑀝𑁆𑀞𑀸𑀢𑀺. 𑀕𑀡𑀧𑀼𑀕𑁆𑀕𑀮𑀫𑀚𑁆𑀛𑁂 𑀧𑀦 𑀤𑁂𑀲𑀦𑀸𑀕𑀸𑀫𑀺𑀦𑀻𑀬𑁂𑀯 𑀯𑀼𑀝𑁆𑀞𑀸𑀢𑀺.

𑀆𑀕𑀸𑀴𑁆𑀳𑀸𑀬 𑀘𑁂𑀢𑁂𑀬𑁆𑀬𑀸𑀢𑀺 𑀆𑀕𑀸𑀴𑁆𑀳𑀸𑀬 𑀤𑀴𑁆𑀳𑀪𑀸𑀯𑀸𑀬 𑀘𑁂𑀢𑁂𑀬𑁆𑀬; 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀓𑀢𑀲𑁆𑀲 𑀯𑀢𑁆𑀢𑀁 𑀦 𑀧𑀽𑀭𑀬𑀢𑁄 𑀇𑀘𑁆𑀙𑀫𑀸𑀦𑁄 𑀲𑀗𑁆𑀖𑁄 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀮𑀚𑁆𑀚𑀻 𑀘 𑀳𑁄𑀢𑀺 𑀩𑀸𑀮𑁄 𑀘 𑀅𑀧𑀓𑀢𑀢𑁆𑀢𑁄 𑀘𑀸𑀢𑀺 𑀏𑀢𑁆𑀣 𑀩𑀸𑀮𑁄 ‘‘𑀅𑀬𑀁 𑀥𑀫𑁆𑀫𑀸𑀥𑀫𑁆𑀫𑀁 𑀦 𑀚𑀸𑀦𑀸𑀢𑀺’’ 𑀅𑀧𑀓𑀢𑀢𑁆𑀢𑁄 𑀯𑀸 ‘‘𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’’𑀢𑀺 𑀦 𑀏𑀢𑁆𑀢𑀸𑀯𑀢𑀸 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀩𑀸𑀮𑀪𑀸𑀯𑀫𑀽𑀮𑀓𑀁 𑀧𑀦 𑀅𑀧𑀓𑀢𑀢𑁆𑀢𑀪𑀸𑀯𑀫𑀽𑀮𑀓𑀜𑁆𑀘 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀲𑁆𑀲 𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀦𑀸𑀫 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀆𑀧𑀦𑁆𑀦𑁄; 𑀆𑀘𑀸𑀭𑀯𑀺𑀧𑀦𑁆𑀦𑁄 𑀦𑀸𑀫 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀆𑀧𑀦𑁆𑀦𑁄; 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀦𑀸𑀫 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀲𑀁 𑀆𑀧𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑀸𑀦𑀁 𑀅𑀧𑁆𑀧𑀝𑀺𑀓𑀭𑁄𑀦𑁆𑀢𑀸𑀦𑀁 𑀤𑀺𑀝𑁆𑀞𑀺𑀜𑁆𑀘 𑀅𑀦𑀺𑀲𑁆𑀲𑀚𑁆𑀚𑀦𑁆𑀢𑀸𑀦𑀁𑀬𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀓𑀸𑀬𑀺𑀓𑁄 𑀤𑀯𑁄 𑀦𑀸𑀫 𑀧𑀸𑀲𑀓𑀸𑀤𑀻𑀳𑀺 𑀚𑀽𑀢𑀓𑀻𑀴𑀦𑀸𑀤𑀺𑀪𑁂𑀤𑁄 𑀅𑀦𑀸𑀘𑀸𑀭𑁄; 𑀯𑀸𑀘𑀲𑀺𑀓𑁄 𑀤𑀯𑁄 𑀦𑀸𑀫 𑀫𑀼𑀔𑀸𑀮𑀫𑁆𑀩𑀭𑀓𑀭𑀡𑀸𑀤𑀺𑀪𑁂𑀤𑁄 𑀅𑀦𑀸𑀘𑀸𑀭𑁄; 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀦𑀸𑀫 𑀦𑀘𑁆𑀘𑀦𑀕𑀸𑀬𑀦𑀸𑀤𑀺𑀪𑁂𑀤𑁄 𑀤𑁆𑀯𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀅𑀦𑀸𑀘𑀸𑀭𑁄. 𑀓𑀸𑀬𑀺𑀓𑁄 𑀅𑀦𑀸𑀘𑀸𑀭𑁄 𑀦𑀸𑀫 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄; 𑀯𑀸𑀘𑀲𑀺𑀓𑁄 𑀅𑀦𑀸𑀘𑀸𑀭𑁄 𑀦𑀸𑀫 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄; 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀦𑀸𑀫 𑀤𑁆𑀯𑀸𑀭𑀤𑁆𑀯𑀬𑁂𑀧𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄. 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦𑀸𑀢𑀺 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀲𑀺𑀓𑁆𑀔𑀦𑁂𑀦, 𑀬𑁄 𑀳𑀺 𑀢𑀁 𑀦 𑀲𑀺𑀓𑁆𑀔𑀢𑀺, 𑀲𑁄 𑀦𑀁 𑀉𑀧𑀖𑀸𑀢𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀢𑀁 𑀅𑀲𑀺𑀓𑁆𑀔𑀦𑀁 ‘‘𑀓𑀸𑀬𑀺𑀓𑀁 𑀉𑀧𑀖𑀸𑀢𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀬𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦𑀸𑀢𑀺 𑀚𑀗𑁆𑀖𑀧𑁂𑀲𑀦𑀺𑀓𑀸𑀤𑀺𑀦𑀸 𑀯𑀸 𑀕𑀡𑁆𑀟𑀨𑀸𑀮𑀦𑀸𑀤𑀺𑀦𑀸 𑀯𑀸 𑀯𑁂𑀚𑁆𑀚𑀓𑀫𑁆𑀫𑁂𑀦; 𑀯𑀸𑀘𑀲𑀺𑀓𑁂𑀦𑀸𑀢𑀺 𑀲𑀸𑀲𑀦𑀉𑀕𑁆𑀕𑀳𑀡𑀆𑀭𑁄𑀘𑀦𑀸𑀤𑀺𑀦𑀸; 𑀢𑀢𑀺𑀬𑀧𑀤𑀁 𑀉𑀪𑀬𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀮𑀁 𑀪𑀺𑀓𑁆𑀔𑀼 𑀫𑀸 𑀪𑀡𑁆𑀟𑀦𑀦𑁆𑀢𑀺 𑀅𑀮𑀁 𑀪𑀺𑀓𑁆𑀔𑀼 𑀫𑀸 𑀪𑀡𑁆𑀟𑀦𑀁 𑀓𑀭𑀺, 𑀫𑀸 𑀓𑀮𑀳𑀁, 𑀫𑀸 𑀯𑀺𑀯𑀸𑀤𑀁 𑀓𑀭𑀻𑀢𑀺 𑀅𑀢𑁆𑀣𑁄. 𑀦 𑀯𑁄𑀳𑀭𑀺𑀢𑀩𑁆𑀩𑀦𑁆𑀢𑀺 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁; 𑀯𑀤𑀢𑁄𑀧𑀺 𑀳𑀺 𑀢𑀸𑀤𑀺𑀲𑀲𑁆𑀲 𑀯𑀘𑀦𑀁 𑀦 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑁂𑀓𑀝𑁆𑀞𑀸𑀦𑁂𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀩𑀻𑀚𑀦𑀕𑁆𑀕𑀸𑀳𑀸𑀤𑀺𑀓𑁂 𑀏𑀓𑀲𑁆𑀫𑀺𑀫𑁆𑀧𑀺 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀦 𑀞𑀧𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀑𑀓𑀸𑀲𑀓𑀫𑁆𑀫𑀁 𑀓𑀸𑀭𑁂𑀦𑁆𑀢𑀲𑁆𑀲𑀸𑀢𑀺 ‘‘𑀓𑀭𑁄𑀢𑀼 𑀆𑀬𑀲𑁆𑀫𑀸 𑀑𑀓𑀸𑀲𑀁, 𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄’’𑀢𑀺 𑀏𑀯𑀁 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑀲𑁆𑀲. 𑀦𑀸𑀮𑀁 𑀑𑀓𑀸𑀲𑀓𑀫𑁆𑀫𑀁 𑀓𑀸𑀢𑀼𑀦𑁆𑀢𑀺 ‘‘𑀓𑀺𑀁 𑀢𑁆𑀯𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀑𑀓𑀸𑀲𑁄 𑀦 𑀓𑀸𑀢𑀩𑁆𑀩𑁄. 𑀲𑀯𑀘𑀦𑀻𑀬𑀁 𑀦𑀸𑀤𑀸𑀢𑀩𑁆𑀩𑀦𑁆𑀢𑀺 𑀯𑀘𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀯𑀘𑀦𑀫𑁆𑀧𑀺 𑀦 𑀲𑁄𑀢𑀩𑁆𑀩𑀁; 𑀬𑀢𑁆𑀣 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀦 𑀢𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀦𑀬𑁄𑀢𑀺 𑀬𑀁 𑀲𑁄 𑀚𑀸𑀦𑀸𑀢𑀺, 𑀲𑁄 𑀢𑀲𑁆𑀲 𑀯𑀺𑀦𑀬𑁄 𑀦𑀸𑀫 𑀳𑁄𑀢𑀺; 𑀲𑁄 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀬𑁄𑀕𑁄 𑀦 𑀤𑀸𑀢𑀩𑁆𑀩𑁄𑀢𑀺 ‘‘𑀇𑀤𑀁 𑀓𑀧𑁆𑀧𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀼𑀘𑁆𑀙𑀸𑀬 𑀑𑀓𑀸𑀲𑁄 𑀦 𑀤𑀸𑀢𑀩𑁆𑀩𑁄, ‘‘𑀅𑀜𑁆𑀜𑀁 𑀧𑀼𑀘𑁆𑀙𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀇𑀢𑀺 𑀲𑁄 𑀦𑁂𑀯 𑀧𑀼𑀘𑁆𑀙𑀺𑀢𑀩𑁆𑀩𑁄 𑀦𑀸𑀲𑁆𑀲 𑀧𑀼𑀘𑁆𑀙𑀸 𑀲𑁄𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀬𑁄 𑀦 𑀲𑀸𑀓𑀘𑁆𑀙𑀸𑀢𑀩𑁆𑀩𑁄𑀢𑀺 𑀯𑀺𑀦𑀬𑀧𑀜𑁆𑀳𑁄 𑀦 𑀲𑀸𑀓𑀘𑁆𑀙𑀺𑀢𑀩𑁆𑀩𑁄, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀓𑀣𑀸 𑀦 𑀲𑀁𑀲𑀦𑁆𑀤𑁂𑀢𑀩𑁆𑀩𑀸.

𑀇𑀤𑀫𑀧𑁆𑀧𑀳𑀸𑀬𑀸𑀢𑀺 𑀏𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀸𑀢𑀸𑀤𑀺𑀓𑀁 𑀮𑀤𑁆𑀥𑀺𑀁 𑀅𑀯𑀺𑀚𑀳𑀺𑀢𑁆𑀯𑀸. 𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀦𑁆𑀢𑀺 𑀔𑀻𑀡𑀸𑀲𑀯𑀁 𑀪𑀺𑀓𑁆𑀔𑀼𑀁. ‘‘𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀢𑀻’’𑀢𑀺 𑀧𑀸𑀢𑀩𑁆𑀬𑀪𑀸𑀯𑀁 𑀧𑀝𑀺𑀲𑁂𑀯𑀦𑀁 𑀆𑀧𑀚𑁆𑀚𑀢𑀺. ‘‘𑀇𑀤𑀫𑀧𑁆𑀧𑀳𑀸𑀬𑀸’’𑀢𑀺 𑀯𑀘𑀦𑀢𑁄 𑀧𑀦 𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀸𑀢𑀁 𑀧𑀳𑀸𑀬 𑀔𑀻𑀡𑀸𑀲𑀯𑀁 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢𑀁, 𑀔𑀫𑀣 𑀫𑁂’’𑀢𑀺 𑀔𑀫𑀸𑀧𑁂𑀢𑁆𑀯𑀸 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀮𑀤𑁆𑀥𑀺𑀁 𑀯𑀺𑀚𑀳𑀺𑀢𑁆𑀯𑀸 𑀕𑀢𑀺𑀯𑀺𑀲𑁄𑀥𑀦𑀁 𑀓𑀭𑁂𑀬𑁆𑀬. 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀅𑀓𑀼𑀲𑀮𑀸𑀦𑀺 𑀘𑁂𑀯 𑀫𑀽𑀮𑀸𑀦𑀺 𑀘, 𑀅𑀓𑀼𑀲𑀮𑀸𑀦𑀁 𑀯𑀸 𑀫𑀽𑀮𑀸𑀦𑀺 𑀅𑀓𑀼𑀲𑀮𑀫𑀽𑀮𑀸𑀦𑀺. 𑀓𑀼𑀲𑀮𑀫𑀽𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀝𑁆𑀞𑀼 𑀘𑀭𑀺𑀢𑀸𑀦𑀺 𑀯𑀺𑀭𑀽𑀧𑀸𑀦𑀺 𑀯𑀸 𑀘𑀭𑀺𑀢𑀸𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀲𑀼𑀝𑁆𑀞𑀼 𑀘𑀭𑀺𑀢𑀸𑀦𑀺 𑀲𑀼𑀦𑁆𑀤𑀭𑀸𑀦𑀺 𑀯𑀸 𑀘𑀭𑀺𑀢𑀸𑀦𑀺 𑀲𑀼𑀘𑀭𑀺𑀢𑀸𑀦𑀺. 𑀓𑀸𑀬𑁂𑀦 𑀓𑀭𑀡𑀪𑀽𑀢𑁂𑀦 𑀓𑀢𑀁 𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁪. 𑀘𑀢𑀼𑀓𑁆𑀓𑁂𑀲𑀼 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀧𑀭𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀯𑀘𑀻𑀤𑁆𑀯𑀸𑀭𑀺𑀓𑀁 𑀧𑀤𑀲𑁄𑀥𑀫𑁆𑀫𑀸𑀤𑀺𑀪𑁂𑀤𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀝𑁆𑀞𑀸𑀦𑀁 𑀕𑀢𑁄 𑀧𑀭𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀧𑀭𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀧𑀭𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀦𑁆𑀢𑁄 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀯𑀘𑀻𑀤𑁆𑀯𑀸𑀭𑀺𑀓𑀁 𑀧𑀤𑀲𑁄𑀥𑀫𑁆𑀫𑀸𑀤𑀺𑀪𑁂𑀤𑀁 𑀆𑀧𑀢𑁆𑀢𑀺𑀁 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀤𑁂𑀲𑁂𑀢𑁆𑀯𑀸 𑀯𑀼𑀝𑁆𑀞𑀳𑀦𑁆𑀢𑁄𑀧𑀺 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀧𑀭𑀯𑀸𑀘𑀸𑀬 𑀆𑀧𑀚𑁆𑀚𑀢𑀺 𑀧𑀭𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀻𑀢𑀺 𑀬𑀸𑀯𑀢𑀢𑀺𑀬𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀭𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀯𑀼𑀝𑁆𑀞𑀳𑀦𑁆𑀢𑁄𑀧𑀺 𑀧𑀭𑀲𑁆𑀲 𑀧𑀭𑀺𑀯𑀸𑀲𑀓𑀫𑁆𑀫𑀯𑀸𑀘𑀸𑀤𑀻𑀳𑀺 𑀯𑀼𑀝𑁆𑀞𑀸𑀢𑀺. 𑀢𑀢𑁄 𑀧𑀭𑁂𑀲𑀼 𑀓𑀸𑀬𑀤𑁆𑀯𑀸𑀭𑀺𑀓𑀁 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀤𑁂𑀲𑁂𑀦𑁆𑀢𑁄 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀯𑀘𑀻𑀤𑁆𑀯𑀸𑀭𑀺𑀓𑀁 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀢𑀺𑀡𑀯𑀢𑁆𑀣𑀸𑀭𑀓𑁂 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺. 𑀓𑀸𑀬𑀤𑁆𑀯𑀸𑀭𑀺𑀓𑀁 𑀓𑀸𑀬𑁂𑀦𑀆𑀧𑀚𑁆𑀚𑀢𑀺, 𑀢𑀫𑁂𑀯 𑀢𑀺𑀡𑀯𑀢𑁆𑀣𑀸𑀭𑀓𑁂 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺. 𑀯𑀘𑀻𑀤𑁆𑀯𑀸𑀭𑀺𑀓𑀁 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀢𑀫𑁂𑀯 𑀤𑁂𑀲𑁂𑀦𑁆𑀢𑁄 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀲𑀗𑁆𑀖𑀺𑀓𑀫𑀜𑁆𑀘𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀦𑀢𑁆𑀣𑀭𑀢𑁄 𑀓𑀸𑀬𑀲𑀫𑁆𑀨𑀼𑀲𑀦𑁂 𑀮𑁄𑀫𑀕𑀡𑀦𑀸𑀬 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁 𑀲𑀳𑀕𑀸𑀭𑀲𑁂𑀬𑁆𑀬𑀸𑀧𑀢𑁆𑀢𑀺𑀜𑁆𑀘 𑀧𑀲𑀼𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀧𑀩𑀼𑀚𑁆𑀛𑀺𑀢𑁆𑀯𑀸 𑀧𑀦 𑀆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀤𑁂𑀲𑁂𑀦𑁆𑀢𑁄 𑀧𑀝𑀺𑀩𑀼𑀤𑁆𑀥𑁄 𑀯𑀼𑀝𑁆𑀞𑀸𑀢𑀺. 𑀚𑀕𑁆𑀕𑀦𑁆𑀢𑁄 𑀆𑀧𑀚𑁆𑀚𑀺𑀢𑁆𑀯𑀸 𑀧𑀦 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑀝𑁆𑀞𑀸𑀦𑁂 𑀲𑀬𑀦𑁆𑀢𑁄 𑀧𑀝𑀺𑀩𑀼𑀤𑁆𑀥𑁄 𑀆𑀧𑀚𑁆𑀚𑀢𑀺 𑀧𑀲𑀼𑀢𑁆𑀢𑁄 𑀯𑀼𑀝𑁆𑀞𑀸𑀢𑀺 𑀦𑀸𑀫. 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀁 𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀧𑀘𑁆𑀙𑀸 𑀤𑁂𑀲𑁂𑀦𑁆𑀢𑁄 𑀲𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺. 𑀲𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀁 𑀲𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺 𑀦𑀸𑀫. 𑀢𑀺𑀡𑀯𑀢𑁆𑀣𑀸𑀭𑀓𑀝𑁆𑀞𑀸𑀦𑁂 𑀲𑀬𑀦𑁆𑀢𑁄 𑀅𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀧𑀤𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀲𑀪𑀸𑀕𑀁 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀺, 𑀅𑀬𑀁 𑀤𑁂𑀲𑀦𑀸𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀤𑁂𑀲𑁂𑀢𑀺, 𑀢𑀜𑁆𑀘 𑀤𑁂𑀲𑁂𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀢𑀁 𑀧𑀦 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀦𑁆𑀢𑁄 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀢𑁄 𑀯𑀼𑀝𑁆𑀞𑀸𑀢𑀺. 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀢𑁄 𑀘 𑀯𑀼𑀝𑁆𑀞𑀳𑀦𑁆𑀢𑁄 𑀢𑀁 𑀆𑀧𑀚𑁆𑀚𑀢𑀺. 𑀇𑀢𑀺 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀓𑀫𑁂𑀯 𑀧𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀤𑁂𑀲𑁂𑀢𑀻’’𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀫𑁆𑀫𑀘𑀢𑀼𑀓𑁆𑀓𑁂 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀧𑀢𑁆𑀢𑀺𑀁 𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀤𑁂𑀲𑁂𑀦𑁆𑀢𑁄 𑀅𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺. 𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀓𑀁 𑀅𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀧𑀭𑀺𑀯𑀸𑀲𑀸𑀤𑀺𑀦𑀸 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺. 𑀲𑀫𑀦𑀼𑀪𑀸𑀲𑀦𑀁 𑀓𑀫𑁆𑀫𑁂𑀦𑁂𑀯 𑀆𑀧𑀚𑁆𑀚𑀢𑀺, 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀁 𑀅𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺,𑀅𑀓𑀫𑁆𑀫𑁂𑀦𑀯𑀼𑀝𑁆𑀞𑀸𑀢𑀺.

𑀧𑀭𑀺𑀓𑁆𑀔𑀸𑀭𑀘𑀢𑀼𑀓𑁆𑀓𑁂 𑀧𑀞𑀫𑁄 𑀲𑀓𑀧𑀭𑀺𑀓𑁆𑀔𑀸𑀭𑁄, 𑀤𑀼𑀢𑀺𑀬𑁄 𑀲𑀗𑁆𑀖𑀺𑀓𑁄𑀯 𑀢𑀢𑀺𑀬𑁄 𑀘𑁂𑀢𑀺𑀬𑀲𑀦𑁆𑀢𑀓𑁄, 𑀘𑀢𑀼𑀢𑁆𑀣𑁄 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁄. 𑀲𑀘𑁂 𑀧𑀦 𑀲𑁄 𑀧𑀢𑁆𑀢𑀘𑀻𑀯𑀭𑀦𑀯𑀓𑀫𑁆𑀫𑀪𑁂𑀲𑀚𑁆𑀚𑀸𑀦𑀁 𑀅𑀢𑁆𑀣𑀸𑀬 𑀆𑀳𑀝𑁄 𑀳𑁄𑀢𑀺, 𑀅𑀯𑀸𑀧𑀼𑀭𑀡𑀁 𑀤𑀸𑀢𑀼𑀁 𑀅𑀦𑁆𑀢𑁄 𑀞𑀧𑀸𑀧𑁂𑀢𑀼𑀜𑁆𑀘 𑀯𑀝𑁆𑀝𑀢𑀺.

𑀲𑀫𑁆𑀫𑀼𑀔𑀸𑀘𑀢𑀼𑀓𑁆𑀓𑁂 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀧𑀢𑁆𑀢𑀺𑀁 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀯𑀼𑀝𑁆𑀞𑀸𑀦𑀓𑀸𑀮𑁂 𑀧𑀦 𑀲𑀗𑁆𑀖𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀭𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺. 𑀯𑀺𑀲𑁆𑀲𑀝𑁆𑀞𑀺𑀆𑀤𑀺𑀓𑀁 𑀧𑀭𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺. 𑀲𑀫𑀦𑀼𑀪𑀸𑀲𑀦𑀁 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀏𑀯 𑀆𑀧𑀚𑁆𑀚𑀢𑀺, 𑀲𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺. 𑀲𑁂𑀲𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀸𑀤𑀺𑀪𑁂𑀤𑀁 𑀧𑀭𑀫𑁆𑀫𑀼𑀔𑀸𑀯 𑀆𑀧𑀚𑁆𑀚𑀢𑀺, 𑀧𑀭𑀫𑁆𑀫𑀼𑀔𑀸𑀯 𑀯𑀼𑀝𑁆𑀞𑀸𑀢𑀺. 𑀅𑀚𑀸𑀦𑀦𑁆𑀢𑀘𑀢𑀼𑀓𑁆𑀓𑀁 𑀅𑀘𑀺𑀢𑁆𑀢𑀓𑀘𑀢𑀼𑀓𑁆𑀓𑀲𑀤𑀺𑀲𑀁.

𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦𑀸𑀢𑀺 𑀲𑀬𑀺𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀚𑀸𑀢𑁂 𑀲𑀳𑀕𑀸𑀭𑀲𑁂𑀬𑁆𑀬𑀸𑀧𑀢𑁆𑀢𑀺 𑀳𑁄𑀢𑀺 𑀇𑀤𑀫𑁂𑀯 𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀦 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺 𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀯𑀼𑀝𑁆𑀞𑀸𑀢𑀺. 𑀲𑀳𑀧𑀝𑀺𑀮𑀸𑀪𑀘𑀢𑀼𑀓𑁆𑀓𑁂 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀲𑁄 𑀲𑀳 𑀮𑀺𑀗𑁆𑀕𑀧𑀝𑀺𑀮𑀸𑀪𑁂𑀦 𑀧𑀞𑀫𑀁 𑀉𑀧𑁆𑀧𑀦𑁆𑀦𑀯𑀲𑁂𑀦 𑀲𑁂𑀝𑁆𑀞𑀪𑀸𑀯𑁂𑀦 𑀘 𑀧𑀼𑀭𑀺𑀫𑀁 𑀧𑀼𑀭𑀺𑀲𑀮𑀺𑀗𑁆𑀕𑀁 𑀚𑀳𑀢𑀺, 𑀧𑀘𑁆𑀙𑀺𑀫𑁂 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀢𑀺𑀝𑁆𑀞𑀸𑀢𑀺, 𑀧𑀼𑀭𑀺𑀲𑀓𑀼𑀢𑁆𑀢𑀧𑀼𑀭𑀺𑀲𑀸𑀓𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀪𑀺𑀓𑁆𑀔𑀽𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸 𑀏𑀯𑀁 𑀧𑀯𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀬𑀸𑀦𑀺 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀙𑀘𑀢𑁆𑀢𑀸𑀮𑀻𑀲 𑀲𑀺𑀓𑁆𑀔𑀸𑀧𑀤𑀸𑀦𑀺 𑀢𑁂𑀳𑀺 𑀅𑀦𑀸𑀧𑀢𑁆𑀢𑀺𑀬𑁂𑀯 𑀳𑁄𑀢𑀺. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀧𑀦 𑀬𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀢𑀺, 𑀲𑀸 𑀧𑀘𑁆𑀙𑀸𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀳𑀻𑀦𑀪𑀸𑀯𑁂𑀦 𑀯𑀸 𑀧𑀘𑁆𑀙𑀺𑀫𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀁 𑀚𑀳𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀼𑀭𑀺𑀫𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑁂 𑀧𑀼𑀭𑀺𑀲𑀮𑀺𑀗𑁆𑀕𑁂 𑀧𑀢𑀺𑀝𑁆𑀞𑀸𑀢𑀺. 𑀯𑀼𑀢𑁆𑀢𑀯𑀺𑀧𑀭𑀻𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀪𑀺𑀓𑁆𑀔𑀼𑀦𑀻𑀢𑀺 𑀯𑀸 𑀇𑀢𑁆𑀣𑀻𑀢𑀺 𑀯𑀸 𑀏𑀯𑀁 𑀧𑀯𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀬𑁄𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀬𑀸𑀦𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺 𑀲𑀢𑀁 𑀢𑀺𑀁𑀲𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑁂𑀳𑀺 𑀅𑀦𑀸𑀧𑀢𑁆𑀢𑀺𑀬𑁂𑀯 𑀳𑁄𑀢𑀺.

𑀘𑀢𑁆𑀢𑀸𑀭𑁄 𑀲𑀸𑀫𑀼𑀓𑁆𑀓𑀁𑀲𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸, 𑀢𑁂 𑀳𑀺 𑀪𑀕𑀯𑀢𑀸 𑀅𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀫𑁆𑀳𑀺 𑀲𑀬𑀁 𑀉𑀓𑁆𑀓𑀁𑀲𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 ‘‘𑀲𑀸𑀫𑀼𑀓𑁆𑀓𑀁𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀭𑀺𑀪𑁄𑀕𑀸𑀢𑀺 𑀅𑀚𑁆𑀛𑁄𑀳𑀭𑀡𑀻𑀬𑀧𑀭𑀺𑀪𑁄𑀕𑀸, 𑀉𑀤𑀓𑀁 𑀧𑀦 𑀅𑀓𑀸𑀮𑀺𑀓𑀢𑁆𑀢𑀸 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀯𑀝𑁆𑀝𑀢𑀺. 𑀬𑀸𑀯𑀓𑀸𑀮𑀺𑀓𑀸𑀤𑀻𑀦𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀸𑀦𑀺 𑀅𑀚𑁆𑀛𑁄𑀳𑀭𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀺 𑀓𑀸𑀮𑁄𑀤𑀺𑀲𑁆𑀲𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂 𑀓𑀸𑀮𑁂 𑀯𑀝𑁆𑀝𑀦𑁆𑀢𑀺. 𑀉𑀧𑀸𑀲𑀓𑁄 𑀲𑀻𑀮𑀯𑀸𑀢𑀺 𑀧𑀜𑁆𑀘 𑀯𑀸 𑀤𑀲 𑀯𑀸 𑀲𑀻𑀮𑀸𑀦𑀺 𑀕𑁄𑀧𑀬𑀫𑀸𑀦𑁄.

𑀆𑀕𑀦𑁆𑀢𑀼𑀓𑀸𑀤𑀺𑀘𑀢𑀼𑀓𑁆𑀓𑁂 𑀲𑀙𑀢𑁆𑀢𑀼𑀧𑀸𑀳𑀦𑁄 𑀲𑀲𑀻𑀲𑀁 𑀧𑀸𑀭𑀼𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁄 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀘 𑀆𑀕𑀦𑁆𑀢𑀼𑀓𑁄𑀯 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄. 𑀆𑀯𑀸𑀲𑀺𑀓𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁄 𑀧𑀦 𑀆𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀕𑀦𑁆𑀢𑀼𑀓𑁄. 𑀲𑁂𑀲𑀁 𑀓𑀸𑀬𑀯𑀘𑀻𑀤𑁆𑀯𑀸𑀭𑀺𑀓𑀁 𑀆𑀧𑀢𑁆𑀢𑀺𑀁 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀅𑀲𑀸𑀥𑀸𑀭𑀡𑀁 𑀆𑀧𑀢𑁆𑀢𑀺𑀁 𑀦𑁂𑀯 𑀆𑀕𑀦𑁆𑀢𑀼𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄. 𑀕𑀫𑀺𑀬𑀘𑀢𑀼𑀓𑁆𑀓𑁂𑀧𑀺 𑀕𑀫𑀺𑀬𑀯𑀢𑁆𑀢𑀁 𑀅𑀧𑀽𑀭𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀕𑀫𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄. 𑀆𑀯𑀸𑀲𑀺𑀓𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁄 𑀧𑀦 𑀆𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀕𑀫𑀺𑀓𑁄. 𑀲𑁂𑀲𑀁 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀅𑀲𑀸𑀥𑀸𑀭𑀡𑀁 𑀉𑀪𑁄𑀧𑀺 𑀦𑀸𑀧𑀚𑁆𑀚𑀦𑁆𑀢𑀺. 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀤𑀺𑀘𑀢𑀼𑀓𑁆𑀓𑁂 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸𑀯 𑀳𑁄𑀢𑀺,𑀦𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸. 𑀲𑀩𑁆𑀩𑀸𑀧𑀺 𑀳𑀺 𑀲𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑁂𑀯. 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀓𑀸𑀬𑀲𑀁𑀲𑀕𑁆𑀕𑁂 𑀪𑀺𑀓𑁆𑀔𑀼𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀯𑀁 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸𑀯 𑀳𑁄𑀢𑀺, 𑀦 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸, 𑀉𑀪𑀺𑀦𑁆𑀦𑀫𑁆𑀧𑀺 𑀳𑀺 𑀓𑀸𑀬𑀲𑀁𑀲𑀕𑁆𑀕𑁄𑀯 𑀯𑀢𑁆𑀣𑀼. 𑀢𑀣𑀸 ‘‘𑀮𑀲𑀼𑀡𑀓𑁆𑀔𑀸𑀤𑀦𑁂 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸𑀧𑁂𑀢𑁆𑀣 𑀦𑀬𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀘𑀢𑀼𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀢𑁂𑀭𑀲𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀘𑁂𑀯 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸 𑀘. 𑀏𑀯𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀦𑀁 𑀅𑀦𑀺𑀬𑀢𑀸𑀤𑀻𑀳𑀺. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀏𑀓𑀢𑁄 𑀆𑀧𑀚𑁆𑀚𑀦𑁆𑀢𑀸𑀦𑀁 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀦𑁂𑀯 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀦𑁄 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸. 𑀯𑀺𑀲𑀼𑀁 𑀆𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀲𑁂𑀲𑀸 𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀦𑁆𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀢𑁆𑀣𑀼𑀲𑀪𑀸𑀕𑀸𑀤𑀺𑀘𑀢𑀼𑀓𑁆𑀓𑁂 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀓𑀸𑀬𑀲𑀁𑀲𑀕𑁆𑀕𑁂 𑀯𑀢𑁆𑀣𑀼𑀲𑀪𑀸𑀕𑀢𑀸, 𑀦𑁄 𑀆𑀧𑀢𑁆𑀢𑀺𑀲𑀪𑀸𑀕𑀢𑀸, 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀆𑀧𑀢𑁆𑀢𑀺𑀲𑀪𑀸𑀕𑀢𑀸, 𑀦𑁄 𑀯𑀢𑁆𑀣𑀼𑀲𑀪𑀸𑀕𑀢𑀸. 𑀏𑀲 𑀦𑀬𑁄 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀻𑀲𑀼. 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀼 𑀯𑀢𑁆𑀣𑀼𑀲𑀪𑀸𑀕𑀢𑀸 𑀘𑁂𑀯 𑀆𑀧𑀢𑁆𑀢𑀺𑀲𑀪𑀸𑀕𑀢𑀸 𑀘. 𑀏𑀲 𑀦𑀬𑁄 𑀲𑀩𑁆𑀩𑀸𑀲𑀼 𑀲𑀸𑀥𑀸𑀭𑀡𑀸𑀧𑀢𑁆𑀢𑀻𑀲𑀼. 𑀅𑀲𑀸𑀥𑀸𑀭𑀡𑀸𑀧𑀢𑁆𑀢𑀺𑀬𑀁 𑀦𑁂𑀯 𑀯𑀢𑁆𑀣𑀼𑀲𑀪𑀸𑀕𑀢𑀸 𑀦𑁄 𑀆𑀧𑀢𑁆𑀢𑀺𑀲𑀪𑀸𑀕𑀢𑀸. 𑀬𑁄 𑀳𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀧𑀞𑀫𑁄 𑀧𑀜𑁆𑀳𑁄, 𑀲𑁄 𑀇𑀥 𑀤𑀼𑀢𑀺𑀬𑁄; 𑀬𑁄 𑀘 𑀢𑀢𑁆𑀣 𑀤𑀼𑀢𑀺𑀬𑁄, 𑀲𑁄 𑀇𑀥 𑀧𑀞𑀫𑁄. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺.

𑀉𑀧𑀚𑁆𑀛𑀸𑀬𑀘𑀢𑀼𑀓𑁆𑀓𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀉𑀧𑀚𑁆𑀛𑀸𑀬𑁂𑀦 𑀓𑀢𑁆𑀢𑀩𑁆𑀩𑀯𑀢𑁆𑀢𑀲𑁆𑀲 𑀅𑀓𑀭𑀡𑁂 𑀆𑀧𑀢𑁆𑀢𑀺𑀁 𑀉𑀧𑀚𑁆𑀛𑀸𑀬𑁄 𑀆𑀧𑀚𑁆𑀚𑀢𑀺, 𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀅𑀓𑀭𑁄𑀦𑁆𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀉𑀧𑀚𑁆𑀛𑀸𑀬𑁄; 𑀲𑁂𑀲𑀁 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀅𑀲𑀸𑀥𑀸𑀭𑀡𑀁 𑀉𑀪𑁄𑀧𑀺 𑀦𑀸𑀧𑀚𑁆𑀚𑀦𑁆𑀢𑀺. 𑀆𑀘𑀭𑀺𑀬𑀘𑀢𑀼𑀓𑁆𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑀆𑀤𑀺𑀬𑀦𑁆𑀢𑀘𑀢𑀼𑀓𑁆𑀓𑁂 𑀧𑀸𑀤𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸 𑀲𑀳𑀢𑁆𑀣𑀸 𑀆𑀤𑀺𑀬𑀦𑁆𑀢𑁄 𑀕𑀭𑀼𑀓𑀁 𑀆𑀧𑀚𑁆𑀚𑀢𑀺, 𑀊𑀦𑀓𑀧𑀸𑀤𑀁 𑀕𑀡𑁆𑀳𑀸𑀳𑀻𑀢𑀺 𑀆𑀡𑀢𑁆𑀢𑀺𑀬𑀸 𑀅𑀜𑁆𑀜𑀁 𑀧𑀬𑁄𑀚𑁂𑀦𑁆𑀢𑁄 𑀮𑀳𑀼𑀓𑀁 𑀆𑀧𑀚𑁆𑀚𑀢𑀺. 𑀏𑀢𑁂𑀦 𑀦𑀬𑁂𑀦 𑀲𑁂𑀲𑀧𑀤𑀢𑁆𑀢𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀪𑀺𑀯𑀸𑀤𑀦𑀸𑀭𑀳𑀘𑀢𑀼𑀓𑁆𑀓𑁂 𑀪𑀺𑀓𑁆𑀔𑀼𑀦𑀻𑀦𑀁 𑀢𑀸𑀯 𑀪𑀢𑁆𑀢𑀕𑁆𑀕𑁂 𑀦𑀯𑀫𑀪𑀺𑀓𑁆𑀔𑀼𑀦𑀺𑀢𑁄 𑀧𑀝𑁆𑀞𑀸𑀬 𑀉𑀧𑀚𑁆𑀛𑀸𑀬𑀸𑀧𑀺 𑀅𑀪𑀺𑀯𑀸𑀤𑀦𑀸𑀭𑀳𑀸 𑀦𑁄 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑀸. 𑀅𑀯𑀺𑀲𑁂𑀲𑁂𑀦 𑀘 𑀯𑀺𑀧𑁆𑀧𑀓𑀢𑀪𑁄𑀚𑀦𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀬𑁄 𑀓𑁄𑀘𑀺 𑀯𑀼𑀟𑁆𑀠𑀢𑀭𑁄. 𑀲𑀝𑁆𑀞𑀺𑀯𑀲𑁆𑀲𑀲𑁆𑀲𑀸𑀧𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀲𑀫𑀻𑀧𑀕𑀢𑁄 𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑁄𑀧𑀺 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄 𑀦𑁄 𑀅𑀪𑀺𑀯𑀸𑀤𑀦𑀸𑀭𑀳𑁄. 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀞𑀸𑀦𑁂𑀲𑀼 𑀯𑀼𑀟𑁆𑀠𑁄 𑀦𑀯𑀓𑀲𑁆𑀲 𑀅𑀪𑀺𑀯𑀸𑀤𑀦𑀸𑀭𑀳𑁄 𑀘𑁂𑀯 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄 𑀘. 𑀦𑀯𑀓𑁄 𑀧𑀦 𑀯𑀼𑀟𑁆𑀠𑀲𑁆𑀲 𑀦𑁂𑀯 𑀅𑀪𑀺𑀯𑀸𑀤𑀦𑀸𑀭𑀳𑁄 𑀦 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄. 𑀆𑀲𑀦𑀸𑀭𑀳𑀘𑀢𑀼𑀓𑁆𑀓𑀲𑁆𑀲 𑀧𑀞𑀫𑀧𑀤𑀁 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀤𑀼𑀢𑀺𑀬𑀧𑀤𑁂𑀦, 𑀤𑀼𑀢𑀺𑀬𑀧𑀤𑀜𑁆𑀘 𑀧𑀞𑀫𑀧𑀤𑁂𑀦 𑀅𑀢𑁆𑀣𑀢𑁄 𑀲𑀤𑀺𑀲𑀁.

𑀓𑀸𑀮𑀘𑀢𑀼𑀓𑁆𑀓𑁂 𑀧𑀯𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀯𑀺𑀓𑀸𑀮𑁂, 𑀯𑀺𑀓𑀸𑀮𑀪𑁄𑀚𑀦𑀸𑀧𑀢𑁆𑀢𑀺𑀁 𑀯𑀺𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀓𑀸𑀮𑁂, 𑀲𑁂𑀲𑀁 𑀓𑀸𑀮𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀯𑀺𑀓𑀸𑀮𑁂 𑀘, 𑀅𑀲𑀸𑀥𑀸𑀭𑀡𑀁 𑀦𑁂𑀯 𑀓𑀸𑀮𑁂 𑀦𑁄 𑀯𑀺𑀓𑀸𑀮𑁂. 𑀧𑀝𑀺𑀕𑁆𑀕𑀳𑀺𑀢𑀘𑀢𑀼𑀓𑁆𑀓𑁂 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑀸𑀫𑀺𑀲𑀁 𑀓𑀸𑀮𑁂 𑀓𑀧𑁆𑀧𑀢𑀺 𑀦𑁄 𑀯𑀺𑀓𑀸𑀮𑁂. 𑀧𑀸𑀦𑀓𑀁 𑀯𑀺𑀓𑀸𑀮𑁂 𑀓𑀧𑁆𑀧𑀢𑀺, 𑀧𑀼𑀦𑀤𑀺𑀯𑀲𑀫𑁆𑀳𑀺 𑀦𑁄 𑀓𑀸𑀮𑁂. 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀓𑀸𑀮𑁂 𑀘𑁂𑀯 𑀓𑀧𑁆𑀧𑀢𑀺 𑀯𑀺𑀓𑀸𑀮𑁂 𑀘. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀸𑀮𑀸𑀢𑀻𑀢𑀁 𑀬𑀸𑀯𑀓𑀸𑀮𑀺𑀓𑀸𑀤𑀺𑀢𑁆𑀢𑀬𑀁 𑀅𑀓𑀧𑁆𑀧𑀺𑀬𑀫𑀁𑀲𑀁 𑀉𑀕𑁆𑀕𑀳𑀺𑀢𑀓𑀫𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀜𑁆𑀘 𑀦𑁂𑀯 𑀓𑀸𑀮𑁂 𑀓𑀧𑁆𑀧𑀢𑀺 𑀦𑁄 𑀯𑀺𑀓𑀸𑀮𑁂.

𑀧𑀘𑁆𑀘𑀦𑁆𑀢𑀺𑀫𑀘𑀢𑀼𑀓𑁆𑀓𑁂 𑀲𑀫𑀼𑀤𑁆𑀤𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑁄 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀆𑀧𑀚𑁆𑀚𑀢𑀺, 𑀦𑁄 𑀫𑀚𑁆𑀛𑀺𑀫𑁂𑀲𑀼; 𑀧𑀜𑁆𑀘𑀯𑀕𑁆𑀕𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄 𑀕𑀼𑀡𑀗𑁆𑀕𑀼𑀡𑀽𑀧𑀸𑀳𑀦𑀁 𑀥𑀼𑀯𑀦𑀳𑀸𑀦𑀁 𑀘𑀫𑁆𑀫𑀢𑁆𑀣𑀭𑀡𑀸𑀦𑀺 𑀘 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀆𑀧𑀚𑁆𑀚𑀢𑀺 𑀦𑁄 𑀧𑀘𑁆𑀘𑀦𑁆𑀢𑀺𑀫𑁂𑀲𑀼. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 ‘‘𑀇𑀥 𑀦 𑀓𑀧𑁆𑀧𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄𑀧𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀆𑀧𑀚𑁆𑀚𑀢𑀺, ‘‘𑀇𑀥 𑀓𑀧𑁆𑀧𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀧𑀦 𑀫𑀚𑁆𑀛𑀺𑀫𑁂𑀲𑀼 𑀆𑀧𑀚𑁆𑀚𑀢𑀺. 𑀲𑁂𑀲𑀸𑀧𑀢𑁆𑀢𑀺𑀁 𑀉𑀪𑀬𑀢𑁆𑀣 𑀆𑀧𑀚𑁆𑀚𑀢𑀺, 𑀅𑀲𑀸𑀥𑀸𑀭𑀡𑀁 𑀦 𑀓𑀢𑁆𑀣𑀘𑀺 𑀆𑀧𑀚𑁆𑀚𑀢𑀺. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀧𑀜𑁆𑀘𑀯𑀕𑁆𑀕𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀸𑀤𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑀢𑁆𑀣𑀼 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀓𑀧𑁆𑀧𑀢𑀺. ‘‘𑀇𑀤𑀁 𑀓𑀧𑁆𑀧𑀢𑀻’’𑀢𑀺 𑀤𑀻𑀧𑁂𑀢𑀼𑀫𑁆𑀧𑀺 𑀢𑀢𑁆𑀣𑁂𑀯 𑀓𑀧𑁆𑀧𑀢𑀺 𑀦𑁄 𑀫𑀚𑁆𑀛𑀺𑀫𑁂𑀲𑀼. ‘‘𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺 𑀤𑀻𑀧𑁂𑀢𑀼𑀁 𑀧𑀦 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀓𑀧𑁆𑀧𑀢𑀺 𑀦𑁄 𑀧𑀘𑁆𑀘𑀦𑁆𑀢𑀺𑀫𑁂𑀲𑀼. 𑀲𑁂𑀲𑀁 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀜𑁆𑀘 𑀮𑁄𑀡𑀸𑀦𑀻’’𑀢𑀺𑀆𑀤𑀺 𑀅𑀦𑀼𑀜𑁆𑀜𑀸𑀢𑀓𑀁 𑀉𑀪𑀬𑀢𑁆𑀣 𑀓𑀧𑁆𑀧𑀢𑀺. 𑀬𑀁 𑀧𑀦 𑀅𑀓𑀧𑁆𑀧𑀺𑀬𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀉𑀪𑀬𑀢𑁆𑀣𑀸𑀧𑀺 𑀦 𑀓𑀧𑁆𑀧𑀢𑀺.

𑀅𑀦𑁆𑀢𑁄𑀆𑀤𑀺𑀘𑀢𑀼𑀓𑁆𑀓𑁂 𑀅𑀦𑀼𑀧𑀔𑀚𑁆𑀚 𑀲𑁂𑀬𑁆𑀬𑀸𑀤𑀺𑀁 𑀅𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀳𑀺, 𑀅𑀚𑁆𑀛𑁄𑀓𑀸𑀲𑁂 𑀲𑀗𑁆𑀖𑀺𑀓𑀫𑀜𑁆𑀘𑀸𑀤𑀻𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑁄 𑀩𑀳𑀺 𑀆𑀧𑀚𑁆𑀚𑀢𑀺 𑀦𑁄 𑀅𑀦𑁆𑀢𑁄, 𑀲𑁂𑀲𑀁 𑀅𑀦𑁆𑀢𑁄 𑀘𑁂𑀯 𑀩𑀳𑀺 𑀘, 𑀅𑀲𑀸𑀥𑀸𑀭𑀡𑀁 𑀦𑁂𑀯 𑀅𑀦𑁆𑀢𑁄 𑀦 𑀩𑀳𑀺. 𑀅𑀦𑁆𑀢𑁄𑀲𑀻𑀫𑀸𑀤𑀺𑀘𑀢𑀼𑀓𑁆𑀓𑁂 𑀆𑀕𑀦𑁆𑀢𑀼𑀓𑁄 𑀯𑀢𑁆𑀢𑀁 𑀅𑀧𑀽𑀭𑁂𑀦𑁆𑀢𑁄 𑀅𑀦𑁆𑀢𑁄𑀲𑀻𑀫𑀸𑀬 𑀆𑀧𑀚𑁆𑀚𑀢𑀺, 𑀕𑀫𑀺𑀬𑁄 𑀩𑀳𑀺𑀲𑀻𑀫𑀸𑀬 𑀫𑀼𑀲𑀸𑀯𑀸𑀤𑀸𑀤𑀺𑀁 𑀅𑀦𑁆𑀢𑁄𑀲𑀻𑀫𑀸𑀬 𑀘 𑀩𑀳𑀺𑀲𑀻𑀫𑀸𑀬 𑀘 𑀆𑀧𑀚𑁆𑀚𑀢𑀺,𑀅𑀲𑀸𑀥𑀸𑀭𑀡𑀁 𑀦 𑀓𑀢𑁆𑀣𑀘𑀺. 𑀕𑀸𑀫𑀘𑀢𑀼𑀓𑁆𑀓𑁂 𑀅𑀦𑁆𑀢𑀭𑀖𑀭𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑁂𑀔𑀺𑀬𑀧𑀜𑁆𑀜𑀢𑁆𑀢𑀺𑀁 𑀕𑀸𑀫𑁂 𑀆𑀧𑀚𑁆𑀚𑀢𑀺 𑀦𑁄 𑀅𑀭𑀜𑁆𑀜𑁂. 𑀪𑀺𑀓𑁆𑀔𑀼𑀦𑀻 𑀅𑀭𑀼𑀡𑀁 𑀉𑀝𑁆𑀞𑀸𑀧𑀬𑀫𑀸𑀦𑀸 𑀅𑀭𑀜𑁆𑀜𑁂 𑀆𑀧𑀚𑁆𑀚𑀢𑀺 𑀦𑁄 𑀕𑀸𑀫𑁂. 𑀫𑀼𑀲𑀸𑀯𑀸𑀤𑀸𑀤𑀺𑀁 𑀕𑀸𑀫𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀅𑀭𑀜𑁆𑀜𑁂 𑀘, 𑀅𑀲𑀸𑀥𑀸𑀭𑀡𑀁 𑀦 𑀓𑀢𑁆𑀣𑀘𑀺.

𑀘𑀢𑁆𑀢𑀸𑀭𑁄 𑀧𑀼𑀩𑁆𑀩𑀓𑀺𑀘𑁆𑀘𑀸𑀢𑀺 ‘‘𑀲𑀫𑁆𑀫𑀚𑁆𑀚𑀦𑀻 𑀧𑀤𑀻𑀧𑁄 𑀘 𑀉𑀤𑀓𑀁 𑀆𑀲𑀦𑁂𑀦 𑀘𑀸’’𑀢𑀺 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺𑀉𑀢𑀼𑀓𑁆𑀔𑀸𑀦𑀁 𑀪𑀺𑀓𑁆𑀔𑀼𑀕𑀡𑀦𑀸 𑀘 𑀑𑀯𑀸𑀤𑁄’’𑀢𑀺 𑀇𑀫𑁂 𑀧𑀦 ‘‘𑀘𑀢𑁆𑀢𑀸𑀭𑁄 𑀧𑀼𑀩𑁆𑀩𑀓𑀺𑀘𑁆𑀘𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑀢𑁆𑀢𑀸𑀭𑁄 𑀧𑀢𑁆𑀢𑀓𑀮𑁆𑀮𑀸𑀢𑀺 𑀉𑀧𑁄𑀲𑀣𑁄 𑀬𑀸𑀯𑀢𑀺𑀓𑀸 𑀘 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀦 𑀯𑀺𑀚𑁆𑀚𑀦𑁆𑀢𑀺, 𑀯𑀚𑁆𑀚𑀦𑀻𑀬𑀸 𑀘 𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀦 𑀳𑁄𑀦𑁆𑀢𑀺, 𑀧𑀢𑁆𑀢𑀓𑀮𑁆𑀮𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀘𑀢𑁆𑀢𑀸𑀭𑀺 𑀅𑀦𑀜𑁆𑀜𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 ‘‘𑀏𑀢𑀤𑁂𑀯 𑀧𑀘𑁆𑀘𑀬𑀁 𑀓𑀭𑀺𑀢𑁆𑀯𑀸 𑀅𑀦𑀜𑁆𑀜𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀅𑀦𑀼𑀧𑀔𑀚𑁆𑀚𑀲𑁂𑀬𑁆𑀬𑀸𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀁 ‘‘𑀏𑀳𑀸𑀯𑀼𑀲𑁄 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀁, 𑀲𑀜𑁆𑀘𑀺𑀘𑁆𑀘 𑀓𑀼𑀓𑁆𑀓𑀼𑀘𑁆𑀘𑀉𑀧𑀤𑀳𑀦𑀁, 𑀉𑀧𑀲𑁆𑀲𑀼𑀢𑀺𑀢𑀺𑀝𑁆𑀞𑀦𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺. 𑀘𑀢𑀲𑁆𑀲𑁄 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑁄𑀢𑀺 ‘‘𑀏𑀓𑀭𑀢𑁆𑀢𑀫𑁆𑀧𑀺 𑀘𑁂 𑀪𑀺𑀓𑁆𑀔𑀼 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸, 𑀅𑀜𑁆𑀜𑀁 𑀦𑀯𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑁂𑀬𑁆𑀬 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸, 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀺𑀧𑁆𑀧𑀯𑀲𑁂𑀬𑁆𑀬 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀆𑀭𑁄𑀘𑁂𑀬𑁆𑀬 𑀅𑀜𑁆𑀜𑀢𑁆𑀭 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑀸’’𑀢𑀺 𑀏𑀯𑀁 𑀆𑀕𑀢𑀸 𑀢𑁂𑀭𑀲𑀳𑀺 𑀲𑀫𑁆𑀫𑀼𑀢𑀻𑀳𑀺 𑀫𑀼𑀢𑁆𑀢𑀸 𑀲𑀫𑁆𑀫𑀼𑀢𑀺𑀬𑁄. 𑀕𑀺𑀮𑀸𑀦𑀘𑀢𑀼𑀓𑁆𑀓𑁂 𑀅𑀜𑁆𑀜𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦 𑀮𑁄𑀮𑀢𑀸𑀬 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀅𑀪𑁂𑀲𑀚𑁆𑀚𑀓𑀭𑀡𑀻𑀬𑁂𑀦 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀅𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀫𑀼𑀲𑀸𑀯𑀸𑀤𑀸𑀤𑀺𑀁 𑀉𑀪𑁄𑀧𑀺 𑀆𑀧𑀚𑁆𑀚𑀦𑁆𑀢𑀺, 𑀅𑀲𑀸𑀥𑀸𑀭𑀡𑀁 𑀉𑀪𑁄𑀧𑀺 𑀦𑀸𑀧𑀚𑁆𑀚𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁫. 𑀧𑀜𑁆𑀘𑀓𑁂𑀲𑀼 𑀧𑀜𑁆𑀘 𑀧𑀼𑀕𑁆𑀕𑀮𑀸 𑀦𑀺𑀬𑀢𑀸𑀢𑀺 𑀆𑀦𑀦𑁆𑀢𑀭𑀺𑀬𑀸𑀦𑀫𑁂𑀯𑁂𑀢𑀁 𑀕𑀳𑀡𑀁. 𑀧𑀜𑁆𑀘 𑀙𑁂𑀤𑀦𑀓𑀸 𑀆𑀧𑀢𑁆𑀢𑀺𑀬𑁄 𑀦𑀸𑀫 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁂 𑀫𑀜𑁆𑀘𑀧𑀻𑀞𑁂 𑀦𑀺𑀲𑀻𑀤𑀦𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀲𑀼 𑀲𑀼𑀕𑀢𑀘𑀻𑀯𑀭𑁂 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀜𑁆𑀘𑀳𑀸𑀓𑀸𑀭𑁂𑀳𑀻𑀢𑀺 𑀅𑀮𑀚𑁆𑀚𑀺𑀢𑀸, 𑀅𑀜𑁆𑀜𑀸𑀡𑀢𑀸, 𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀓𑀢𑀢𑀸, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸, 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺. 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀫𑀼𑀲𑀸𑀯𑀸𑀤𑀧𑀘𑁆𑀘𑀬𑀸𑀢𑀺 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀲𑀗𑁆𑀖𑀸𑀤𑀺𑀲𑁂𑀲𑀧𑀸𑀘𑀺𑀢𑁆𑀢𑀺𑀬𑀸. 𑀅𑀦𑀸𑀫𑀦𑁆𑀢𑀘𑀸𑀭𑁄𑀢𑀺 ‘‘𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀇𑀫𑀲𑁆𑀲 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑀸𑀭𑀲𑁆𑀲 𑀅𑀪𑀸𑀯𑁄. 𑀅𑀦𑀥𑀺𑀝𑁆𑀞𑀸𑀦𑀦𑁆𑀢𑀺 ‘‘𑀕𑀡𑀪𑁄𑀚𑀦𑁂 𑀅𑀜𑁆𑀜𑀢𑁆𑀭 𑀲𑀫𑀬𑀸’’𑀢𑀺 𑀯𑀼𑀢𑁆𑀢𑀁 𑀲𑀫𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑁄𑀚𑀦𑀁 𑀅𑀥𑀺𑀝𑁆𑀞𑀸𑀦𑀁 𑀦𑀸𑀫; 𑀢𑀣𑀸 𑀅𑀓𑀭𑀡𑀁 𑀅𑀦𑀥𑀺𑀝𑁆𑀞𑀸𑀦𑀁. 𑀅𑀯𑀺𑀓𑀧𑁆𑀧𑀦𑀸 𑀦𑀸𑀫 𑀬𑀸 𑀧𑀭𑀫𑁆𑀧𑀭𑀪𑁄𑀚𑀦𑁂 𑀯𑀺𑀓𑀧𑁆𑀧𑀦𑀸 𑀯𑀼𑀢𑁆𑀢𑀸, 𑀢𑀲𑁆𑀲𑀸 𑀅𑀓𑀭𑀡𑀁. 𑀇𑀫𑀸𑀦𑀺 𑀳𑀺 𑀧𑀜𑁆𑀘 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀥𑀼𑀢𑀗𑁆𑀕𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀬𑁂 𑀧𑀲𑁆𑀲𑀦𑁆𑀢𑀺, 𑀬𑁂 𑀲𑀼𑀡𑀦𑁆𑀢𑀺, 𑀢𑁂𑀳𑀺 𑀉𑀲𑁆𑀲𑀗𑁆𑀓𑀺𑀢𑁄 𑀘𑁂𑀯 𑀧𑀭𑀺𑀲𑀗𑁆𑀓𑀺𑀢𑁄 𑀘. 𑀅𑀧𑀺 𑀅𑀓𑀼𑀧𑁆𑀧𑀥𑀫𑁆𑀫𑁄 𑀔𑀻𑀡𑀸𑀲𑀯𑁄𑀧𑀺 𑀲𑀫𑀸𑀦𑁄, 𑀢𑀲𑁆𑀫𑀸 𑀅𑀕𑁄𑀘𑀭𑀸 𑀧𑀭𑀺𑀳𑀭𑀺𑀢𑀩𑁆𑀩𑀸. 𑀦 𑀳𑀺 𑀏𑀢𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑁄 𑀅𑀬𑀲𑀢𑁄 𑀯𑀸 𑀕𑀭𑀳𑀢𑁄 𑀯𑀸 𑀫𑀼𑀘𑁆𑀘𑀢𑀺. 𑀲𑁄𑀲𑀸𑀦𑀺𑀓𑀦𑁆𑀢𑀺 𑀲𑀼𑀲𑀸𑀦𑁂 𑀧𑀢𑀺𑀢𑀓𑀁. 𑀧𑀸𑀧𑀡𑀺𑀓𑀦𑁆𑀢𑀺 𑀆𑀧𑀡𑀤𑁆𑀯𑀸𑀭𑁂 𑀧𑀢𑀺𑀢𑀓𑀁. 𑀣𑀽𑀧𑀘𑀻𑀯𑀭𑀦𑁆𑀢𑀺 𑀯𑀫𑁆𑀫𑀺𑀓𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀮𑀺𑀓𑀫𑁆𑀫𑀓𑀢𑀁. 𑀆𑀪𑀺𑀲𑁂𑀓𑀺𑀓𑀦𑁆𑀢𑀺 𑀦𑀳𑀸𑀦𑀝𑁆𑀞𑀸𑀦𑁂 𑀯𑀸 𑀭𑀜𑁆𑀜𑁄 𑀅𑀪𑀺𑀲𑁂𑀓𑀝𑁆𑀞𑀸𑀦𑁂 𑀯𑀸 𑀙𑀟𑁆𑀟𑀺𑀢𑀘𑀻𑀯𑀭𑀁. 𑀪𑀢𑀧𑀝𑀺𑀬𑀸𑀪𑀢𑀦𑁆𑀢𑀺 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀧𑀼𑀦 𑀆𑀦𑀻𑀢𑀓𑀁. 𑀧𑀜𑁆𑀘 𑀫𑀳𑀸𑀘𑁄𑀭𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀯𑀼𑀢𑁆𑀢𑀸.

𑀧𑀜𑁆𑀘𑀸𑀧𑀢𑁆𑀢𑀺𑀬𑁄 𑀓𑀸𑀬𑀢𑁄 𑀲𑀫𑀼𑀝𑁆𑀞𑀦𑁆𑀢𑀻𑀢𑀺 𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺, ‘‘𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀢𑀻’’𑀢𑀺 𑀏𑀯𑀁 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁂 𑀯𑀼𑀢𑁆𑀢𑀸𑀧𑀢𑁆𑀢𑀺𑀬𑁄. 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘𑀸𑀢𑀺 𑀢𑀢𑀺𑀬𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺, ‘‘𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀲𑀜𑁆𑀜𑀻 𑀲𑀁𑀯𑀺𑀤𑀳𑀺𑀢𑁆𑀯𑀸 𑀓𑀼𑀝𑀺𑀁 𑀓𑀭𑁄𑀢𑀻’’𑀢𑀺 𑀏𑀯𑀁 𑀢𑀢𑁆𑀣𑁂𑀯 𑀯𑀼𑀢𑁆𑀢𑀸 𑀆𑀧𑀢𑁆𑀢𑀺𑀬𑁄. 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑁄𑀢𑀺 𑀞𑀧𑁂𑀢𑁆𑀯𑀸 𑀧𑀸𑀭𑀸𑀚𑀺𑀓𑀜𑁆𑀘 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘 𑀅𑀯𑀲𑁂𑀲𑀸.

𑀧𑀜𑁆𑀘 𑀓𑀫𑁆𑀫𑀸𑀦𑀻𑀢𑀺 𑀢𑀚𑁆𑀚𑀦𑀻𑀬𑀦𑀺𑀬𑀲𑁆𑀲𑀧𑀩𑁆𑀩𑀸𑀚𑀦𑀻𑀬𑀧𑀝𑀺𑀲𑀸𑀭𑀡𑀻𑀬𑀸𑀦𑀺 𑀘𑀢𑁆𑀢𑀸𑀭𑀺 𑀉𑀓𑁆𑀔𑁂𑀧𑀦𑀻𑀬𑀜𑁆𑀘 𑀢𑀺𑀯𑀺𑀥𑀫𑁆𑀧𑀺 𑀏𑀓𑀦𑁆𑀢𑀺 𑀧𑀜𑁆𑀘. 𑀬𑀸𑀯𑀢𑀢𑀺𑀬𑀓𑁂 𑀧𑀜𑁆𑀘𑀸𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺𑀬𑀸 𑀧𑀸𑀭𑀸𑀚𑀺𑀓𑀁 𑀣𑀼𑀮𑁆𑀮𑀘𑁆𑀘𑀬𑀁 𑀤𑀼𑀓𑁆𑀓𑀝𑀦𑁆𑀢𑀺 𑀢𑀺𑀲𑁆𑀲𑁄, 𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀸𑀤𑀺𑀲𑀫𑀦𑀼𑀪𑀸𑀲𑀦𑀸𑀲𑀼 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀤𑀺𑀦𑁆𑀦𑀦𑁆𑀢𑀺 𑀅𑀜𑁆𑀜𑁂𑀦 𑀅𑀤𑀺𑀦𑁆𑀦𑀁. 𑀅𑀯𑀺𑀤𑀺𑀢𑀦𑁆𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀫𑀻𑀢𑀺 𑀘𑁂𑀢𑀦𑀸𑀬 𑀅𑀪𑀸𑀯𑁂𑀦 𑀅𑀯𑀺𑀤𑀺𑀢𑀁. 𑀅𑀓𑀧𑁆𑀧𑀺𑀬𑀦𑁆𑀢𑀺 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀅𑀓𑀧𑁆𑀧𑀺𑀬𑀓𑀢𑀁; 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀓𑀧𑁆𑀧𑀺𑀬𑀪𑁄𑀚𑀦𑀁. 𑀅𑀓𑀢𑀸𑀢𑀺𑀭𑀺𑀢𑁆𑀢𑀦𑁆𑀢𑀺 𑀧𑀯𑀸𑀭𑁂𑀢𑁆𑀯𑀸 𑀅𑀢𑀺𑀭𑀺𑀢𑁆𑀢𑀁 𑀅𑀓𑀢𑀁. 𑀲𑀫𑀚𑁆𑀚𑀤𑀸𑀦𑀦𑁆𑀢𑀺 𑀦𑀝𑀲𑀫𑀚𑁆𑀚𑀸𑀤𑀺𑀤𑀸𑀦𑀁. 𑀉𑀲𑀪𑀤𑀸𑀦𑀦𑁆𑀢𑀺 𑀕𑁄𑀕𑀡𑀲𑁆𑀲 𑀅𑀦𑁆𑀢𑀭𑁂 𑀉𑀲𑀪𑀯𑀺𑀲𑁆𑀲𑀚𑁆𑀚𑀦𑀁. 𑀘𑀺𑀢𑁆𑀢𑀓𑀫𑁆𑀫𑀤𑀸𑀦𑀦𑁆𑀢𑀺 𑀆𑀯𑀸𑀲𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀘𑀺𑀢𑁆𑀢𑀓𑀫𑁆𑀫𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀧𑀦 𑀧𑀝𑀺𑀪𑀸𑀦𑀘𑀺𑀢𑁆𑀢𑀓𑀫𑁆𑀫𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀳𑀺 𑀧𑀜𑁆𑀘 𑀓𑀺𑀜𑁆𑀘𑀸𑀧𑀺 𑀮𑁄𑀓𑀲𑁆𑀲 𑀧𑀼𑀜𑁆𑀜𑀲𑀫𑁆𑀫𑀢𑀸𑀦𑀺, 𑀅𑀣 𑀔𑁄 𑀅𑀧𑀼𑀜𑁆𑀜𑀸𑀦𑀺 𑀅𑀓𑀼𑀲𑀮𑀸𑀦𑀺𑀬𑁂𑀯. 𑀉𑀧𑁆𑀧𑀦𑁆𑀦𑀁 𑀧𑀝𑀺𑀪𑀸𑀦𑀦𑁆𑀢𑀺 𑀏𑀢𑁆𑀣 𑀧𑀝𑀺𑀪𑀸𑀦𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸 𑀯𑀼𑀘𑁆𑀘𑀢𑀺. 𑀇𑀫𑁂 𑀧𑀜𑁆𑀘 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀸𑀢𑀺 𑀦 𑀲𑀼𑀧𑀝𑀺𑀯𑀺𑀦𑁄𑀤𑀬𑀸; 𑀉𑀧𑀸𑀬𑁂𑀦 𑀧𑀦 𑀓𑀸𑀭𑀡𑁂𑀦 𑀅𑀦𑀼𑀭𑀽𑀧𑀸𑀳𑀺 𑀧𑀘𑁆𑀘𑀯𑁂𑀓𑁆𑀔𑀦𑀸𑀅𑀦𑀼𑀲𑀸𑀲𑀦𑀸𑀤𑀻𑀳𑀺 𑀲𑀓𑁆𑀓𑀸 𑀧𑀝𑀺𑀯𑀺𑀦𑁄𑀤𑁂𑀢𑀼𑀦𑁆𑀢𑀺 𑀅𑀢𑁆𑀣𑁄.

𑀲𑀓𑀘𑀺𑀢𑁆𑀢𑀁 𑀧𑀲𑀻𑀤𑀢𑀻𑀢𑀺 𑀏𑀢𑁆𑀣 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀓𑀝𑀅𑀦𑁆𑀥𑀓𑀸𑀭𑀯𑀸𑀲𑀻 𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀓𑀺𑀭 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀲𑀺𑀦𑁆𑀤𑀼𑀯𑀸𑀭𑀓𑀼𑀲𑀼𑀫𑀲𑀦𑁆𑀣𑀢𑀫𑀺𑀯 𑀲𑀫𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀮𑀺𑀓𑀁 𑀘𑁂𑀢𑀺𑀬𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑁄 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀸𑀭𑁄 𑀧𑀩𑁆𑀩𑀢𑀧𑀸𑀤𑁂 𑀦𑀺𑀩𑁆𑀩𑀢𑁆𑀢𑀓𑀸𑀴𑀫𑀓𑁆𑀓𑀝𑁄 𑀯𑀺𑀬 𑀳𑀼𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀕𑁄𑀫𑀬𑀁 𑀯𑀺𑀧𑁆𑀧𑀓𑀺𑀭𑀦𑁆𑀢𑁄 𑀕𑀢𑁄. 𑀣𑁂𑀭𑁄 𑀦𑀸𑀲𑀓𑁆𑀔𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁, 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀚𑀭𑀕𑁆𑀕𑀯𑁄 𑀳𑀼𑀢𑁆𑀯𑀸 𑀢𑀸𑀤𑀺𑀲𑀫𑁂𑀯 𑀯𑀺𑀧𑁆𑀧𑀓𑀸𑀭𑀁 𑀅𑀓𑀸𑀲𑀺. 𑀢𑀢𑀺𑀬𑀤𑀺𑀯𑀲𑁂 𑀯𑀗𑁆𑀓𑀧𑀸𑀤𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀸𑀤𑁂𑀦 𑀧𑀭𑀺𑀓𑀲𑀦𑁆𑀢𑁄 𑀅𑀕𑀫𑀸𑀲𑀺. 𑀣𑁂𑀭𑁄 ‘‘𑀏𑀯𑀭𑀽𑀧𑁄 𑀩𑀻𑀪𑀘𑁆𑀙𑀧𑀼𑀭𑀺𑀲𑁄 𑀲𑀫𑀦𑁆𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑁂𑀲𑀼 𑀕𑁄𑀘𑀭𑀕𑀸𑀫𑁂𑀲𑀼 𑀦𑀢𑁆𑀣𑀺, 𑀲𑀺𑀬𑀸 𑀦𑀼 𑀔𑁄 𑀫𑀸𑀭𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀸𑀭𑁄𑀲𑀺 𑀢𑁆𑀯’’𑀦𑁆𑀢𑀺 𑀆𑀳. ‘‘𑀆𑀫, 𑀪𑀦𑁆𑀢𑁂, 𑀫𑀸𑀭𑁄𑀫𑁆𑀳𑀺, 𑀦 𑀤𑀸𑀦𑀺 𑀢𑁂 𑀯𑀜𑁆𑀘𑁂𑀢𑀼𑀁 𑀅𑀲𑀓𑁆𑀔𑀺’’𑀦𑁆𑀢𑀺. ‘‘𑀤𑀺𑀝𑁆𑀞𑀧𑀼𑀩𑁆𑀩𑁄 𑀢𑀬𑀸 𑀢𑀣𑀸𑀕𑀢𑁄’’𑀢𑀺? ‘‘𑀆𑀫, 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. ‘‘𑀫𑀸𑀭𑁄 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄 𑀳𑁄𑀢𑀺, 𑀇𑀗𑁆𑀖 𑀢𑀸𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀪𑀸𑀯𑀲𑀤𑀺𑀲𑀁 𑀅𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀸𑀳𑀻’’𑀢𑀺? ‘‘𑀦 𑀲𑀓𑁆𑀓𑀸, 𑀪𑀦𑁆𑀢𑁂, 𑀢𑀸𑀤𑀺𑀲𑀁 𑀭𑀽𑀧𑀁 𑀦𑀺𑀫𑁆𑀫𑀺𑀦𑀺𑀢𑀼𑀁; 𑀅𑀧𑀺𑀘 𑀔𑁄 𑀧𑀦 𑀢𑀁𑀲𑀭𑀺𑀓𑁆𑀔𑀓𑀁 𑀧𑀢𑀺𑀭𑀽𑀧𑀓𑀁 𑀦𑀺𑀫𑁆𑀫𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀓𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀩𑀼𑀤𑁆𑀥𑀭𑀽𑀧𑀲𑀤𑀺𑀲𑁂𑀦 𑀅𑀢𑁆𑀢𑀪𑀸𑀯𑁂𑀦 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀫𑀸𑀭𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀢𑀸𑀯 𑀲𑀭𑀸𑀕𑀤𑁄𑀲𑀫𑁄𑀳𑁄 𑀏𑀯𑀁 𑀲𑁄𑀪𑀢𑀺, 𑀓𑀣𑀁 𑀦𑀼 𑀔𑁄 𑀪𑀕𑀯𑀸 𑀦 𑀲𑁄𑀪𑀢𑀺 𑀲𑀩𑁆𑀩𑀲𑁄 𑀯𑀻𑀢𑀭𑀸𑀕𑀤𑁄𑀲𑀫𑁄𑀳𑁄’’𑀢𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀫𑀸𑀭𑁄 ‘‘𑀯𑀜𑁆𑀘𑀺𑀢𑁄𑀫𑁆𑀳𑀺 𑀢𑀬𑀸, 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄𑀧𑀺 ‘‘𑀓𑀺𑀁 𑀅𑀢𑁆𑀣𑀺 𑀚𑀭𑀫𑀸𑀭, 𑀢𑀸𑀤𑀺𑀲𑀁 𑀯𑀜𑁆𑀘𑁂𑀢𑀼’’𑀦𑁆𑀢𑀺 𑀆𑀳. 𑀮𑁄𑀓𑀦𑁆𑀢𑀭𑀯𑀺𑀳𑀸𑀭𑁂𑀧𑀺 𑀤𑀢𑁆𑀢𑁄 𑀦𑀸𑀫 𑀤𑀳𑀭𑀪𑀺𑀓𑁆𑀔𑀼 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀑𑀤𑀸𑀢𑀓𑀲𑀺𑀡𑀁 𑀧𑀝𑀺𑀮𑀪𑀺. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀨𑀮𑀢𑁆𑀢𑀬𑀁 𑀲𑀘𑁆𑀙𑀸𑀓𑀸𑀲𑀺.

𑀧𑀭𑀘𑀺𑀢𑁆𑀢𑀁 𑀧𑀲𑀻𑀤𑀢𑀻𑀢𑀺 𑀏𑀢𑁆𑀣 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀢𑀺𑀲𑁆𑀲𑁄 𑀦𑀸𑀫 𑀤𑀳𑀭𑀪𑀺𑀓𑁆𑀔𑀼 𑀚𑀫𑁆𑀩𑀼𑀓𑁄𑀮𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀲𑀗𑁆𑀓𑀸𑀭𑀙𑀟𑁆𑀟𑀦𑀺𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸𑀯 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀦𑀸𑀯𑀸𑀢𑁄 𑀑𑀭𑀼𑀬𑁆𑀳 𑀘𑁂𑀢𑀺𑀬𑀗𑁆𑀕𑀡𑀁 𑀑𑀮𑁄𑀓𑁂𑀦𑁆𑀢𑁄 𑀪𑀸𑀯𑀺𑀢𑀘𑀺𑀢𑁆𑀢𑁂𑀦 𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀦𑁆𑀢𑀺 𑀜𑀢𑁆𑀯𑀸 𑀧𑀜𑁆𑀳𑀸𑀲𑀳𑀲𑁆𑀲𑀁 𑀧𑀼𑀘𑁆𑀙𑀺, 𑀇𑀢𑀭𑁄 𑀲𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀜𑁆𑀜𑀢𑀭𑀲𑁆𑀫𑀺𑀫𑁆𑀧𑀺 𑀯𑀺𑀳𑀸𑀭𑁂 𑀣𑁂𑀭𑁄 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀯𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺. 𑀬𑁄𑀦𑀓𑀯𑀺𑀲𑀬𑀢𑁄 𑀘𑁂𑀢𑀺𑀬𑀯𑀦𑁆𑀤𑀓𑀸 𑀘𑀢𑁆𑀢𑀸𑀭𑁄 𑀣𑁂𑀭𑀸 𑀆𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀤𑀺𑀲𑁆𑀯𑀸 𑀅𑀦𑁆𑀢𑁄 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂𑀬𑁂𑀯 𑀞𑀢𑁆𑀯𑀸 𑀏𑀓𑁄 𑀣𑁂𑀭𑁄 𑀅𑀝𑁆𑀞 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀺, 𑀏𑀓𑁄 𑀲𑁄𑀴𑀲, 𑀏𑀓𑁄 𑀯𑀻𑀲𑀢𑀺, 𑀏𑀓𑁄 𑀢𑀺𑀁𑀲 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀺.

𑀤𑁂𑀯𑀢𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀇𑀤𑀁 𑀯𑀢𑁆𑀣𑀼 𑁋 𑀏𑀓𑀲𑁆𑀫𑀺𑀁 𑀓𑀺𑀭 𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀘𑁂𑀢𑀺𑀬𑀗𑁆𑀕𑀡𑀜𑁆𑀘 𑀩𑁄𑀥𑀺𑀬𑀗𑁆𑀕𑀡𑀜𑁆𑀘 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀕𑀢𑁄. 𑀤𑁂𑀯𑀢𑀸 ‘‘𑀇𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀓𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀝𑁆𑀞𑀧𑀼𑀩𑁆𑀩𑁄 𑀪𑀺𑀓𑁆𑀔𑀼 𑀦𑀢𑁆𑀣𑀻’’𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀼𑀧𑁆𑀨𑀳𑀢𑁆𑀣𑀸 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀢𑀭𑀕𑀸𑀫𑀯𑀸𑀲𑀺𑀓𑀸𑀢𑁆𑀣𑀸’’𑀢𑀺 𑀆𑀳. ‘‘𑀪𑀦𑁆𑀢𑁂, 𑀇𑀥𑁂𑀯 𑀯𑀲𑀸𑀫, 𑀇𑀫𑀲𑁆𑀲 𑀯𑀺𑀳𑀸𑀭𑀲𑁆𑀲 𑀓𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀝𑁆𑀞𑀧𑀼𑀩𑁆𑀩𑁄 𑀪𑀺𑀓𑁆𑀔𑀼 𑀦𑀢𑁆𑀣𑀻𑀢𑀺 𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀯𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀧𑀼𑀧𑁆𑀨𑀳𑀢𑁆𑀣𑀸 𑀞𑀺𑀢𑀸𑀫𑁆𑀳𑀸’’𑀢𑀺 𑀤𑁂𑀯𑀢𑀸 𑀆𑀳𑀁𑀲𑀼.

𑀧𑀸𑀲𑀸𑀤𑀺𑀓𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀏𑀢𑁆𑀣 𑀇𑀤𑀁 𑀯𑀢𑁆𑀣𑀼 𑁋 𑀏𑀓𑀁 𑀓𑀺𑀭 𑀅𑀫𑀘𑁆𑀘𑀧𑀼𑀢𑁆𑀢𑀁 𑀅𑀪𑀬𑀢𑁆𑀣𑁂𑀭𑀜𑁆𑀘 𑀆𑀭𑀩𑁆𑀪 𑀅𑀬𑀁 𑀓𑀣𑀸 𑀉𑀤𑀧𑀸𑀤𑀺 ‘‘𑀓𑀺𑀁 𑀦𑀼 𑀔𑁄 𑀅𑀫𑀘𑁆𑀘𑀧𑀼𑀢𑁆𑀢𑁄 𑀧𑀸𑀲𑀸𑀤𑀺𑀓𑁄, 𑀅𑀪𑀬𑀢𑁆𑀣𑁂𑀭𑁄𑀢𑀺 𑀉𑀪𑁄𑀧𑀺 𑀦𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀑𑀮𑁄𑀓𑁂𑀲𑁆𑀲𑀸𑀫𑀸’’𑀢𑀺. 𑀜𑀸𑀢𑀓𑀸 𑀅𑀫𑀘𑁆𑀘𑀧𑀼𑀢𑁆𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀸𑀧𑁂𑀲𑁆𑀲𑀸𑀫𑀸𑀢𑀺 𑀅𑀕𑀫𑀁𑀲𑀼. 𑀣𑁂𑀭𑀫𑀸𑀢𑀸𑀧𑀺 𑀧𑀸𑀲𑀸𑀤𑀺𑀓𑀁 𑀘𑀻𑀯𑀭𑀁 𑀓𑀸𑀭𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀧𑀳𑀺𑀡𑀺, ‘‘𑀧𑀼𑀢𑁆𑀢𑁄 𑀫𑁂 𑀓𑁂𑀲𑁂 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀇𑀫𑀁 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀫𑀳𑀸𑀘𑁂𑀢𑀺𑀬𑀁 𑀯𑀦𑁆𑀤𑀢𑀽’’𑀢𑀺. 𑀅𑀫𑀘𑁆𑀘𑀧𑀼𑀢𑁆𑀢𑁄 𑀜𑀸𑀢𑀺𑀧𑀭𑀺𑀯𑀼𑀢𑁄 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀴𑁆𑀳𑁄, 𑀅𑀪𑀬𑀢𑁆𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀳𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀦𑁆𑀢𑁆𑀯𑀸 𑀆𑀳 𑁋 ‘‘𑀓𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀫𑀳𑀮𑁆𑀮𑀓𑀢𑁆𑀣𑁂𑀭𑀲𑁆𑀲 𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀓𑀘𑀯𑀭𑀁 𑀙𑀟𑁆𑀟𑁂𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀸𑀲𑀻’’𑀢𑀺. 𑀅𑀢𑀻𑀢𑀢𑁆𑀢𑀪𑀸𑀯𑁂 𑀓𑀺𑀭 𑀅𑀪𑀬𑀢𑁆𑀣𑁂𑀭𑁄 𑀫𑀳𑀮𑁆𑀮𑀓𑀢𑁆𑀣𑁂𑀭𑁄 𑀦𑀸𑀫 𑀳𑀼𑀢𑁆𑀯𑀸 𑀕𑁄𑀘𑀭𑀕𑀸𑀫𑁂 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺, 𑀅𑀫𑀘𑁆𑀘𑀧𑀼𑀢𑁆𑀢𑁄 𑀫𑀳𑀸𑀉𑀧𑀸𑀲𑀓𑁄 𑀳𑀼𑀢𑁆𑀯𑀸 𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀓𑀘𑀯𑀭𑀁 𑀕𑀳𑁂𑀢𑁆𑀯𑀸 𑀙𑀟𑁆𑀟𑁂𑀲𑀺.

𑀲𑀢𑁆𑀣𑀼𑀲𑀸𑀲𑀦𑀁 𑀓𑀢𑀁 𑀳𑁄𑀢𑀻𑀢𑀺 𑀇𑀤𑀁 𑀲𑀫𑁆𑀫𑀚𑁆𑀚𑀦𑀯𑀢𑁆𑀢𑀁 𑀦𑀸𑀫 𑀩𑀼𑀤𑁆𑀥𑁂𑀳𑀺 𑀯𑀡𑁆𑀡𑀺𑀢𑀁, 𑀢𑀲𑁆𑀫𑀸 𑀢𑀁 𑀓𑀭𑁄𑀦𑁆𑀢𑁂𑀦 𑀲𑀢𑁆𑀣𑀼𑀲𑀸𑀲𑀦𑀁 𑀓𑀢𑀁 𑀳𑁄𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀆𑀬𑀲𑁆𑀫𑀸 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀏𑀓𑀲𑁆𑀫𑀺𑀁 𑀧𑀩𑁆𑀪𑀸𑀭𑁂 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀯 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀕𑀯𑀸 𑀆𑀯𑀚𑁆𑀚𑀦𑁆𑀢𑁄 𑀣𑁂𑀭𑀲𑁆𑀲 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀼𑀭𑀢𑁄 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑁂 𑀧𑀸𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀘𑀸𑀕𑀜𑁆𑀙𑀺. 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄 𑀪𑀕𑀯𑀢𑁄 𑀧𑀸𑀤𑀸𑀦𑀺 𑀤𑀺𑀲𑁆𑀯𑀸 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀸𑀬 ‘‘𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀸𑀯𑀁 𑀯𑀢 𑀫𑁂 𑀲𑀢𑁆𑀣𑀸 𑀅𑀜𑁆𑀜𑀸𑀲𑀺, 𑀲𑀗𑁆𑀖𑀫𑀚𑁆𑀛𑁂 𑀤𑀸𑀦𑀺 𑀘𑁄𑀤𑀦𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀕𑀯𑀸 ‘‘𑀓𑀼𑀳𑀺𑀁 𑀕𑀢𑁄𑀲𑀺, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 ‘‘𑀦 𑀧𑀢𑀺𑀭𑀽𑀧𑀁 𑀤𑀸𑀦𑀺 𑀢𑁂 𑀫𑀬𑁆𑀳𑀁 𑀅𑀦𑀦𑁆𑀢𑀭𑁂 𑀞𑀸𑀦𑁂 𑀞𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺 𑀆𑀳. 𑀢𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄 𑀕𑀡𑁆𑀞𑀺𑀓𑀧𑀝𑀺𑀫𑀼𑀜𑁆𑀘𑀦𑀝𑁆𑀞𑀸𑀦𑁂𑀧𑀺 𑀢𑀺𑀝𑁆𑀞𑀦𑁆𑀢𑁄 𑀧𑀸𑀤𑁂𑀦 𑀓𑀘𑀯𑀭𑀁 𑀯𑀺𑀬𑀽𑀳𑀺𑀢𑁆𑀯𑀸𑀯 𑀢𑀺𑀝𑁆𑀞𑀢𑀺.

𑀅𑀢𑁆𑀢𑀦𑁄 𑀪𑀸𑀲𑀧𑀭𑀺𑀬𑀦𑁆𑀢𑀁 𑀦 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀏𑀢𑁆𑀢𑀓𑀁 𑀲𑀼𑀢𑁆𑀢𑀁 𑀉𑀧𑀮𑀩𑁆𑀪𑀢𑀺, 𑀏𑀢𑁆𑀢𑀓𑁄 𑀯𑀺𑀦𑀺𑀘𑁆𑀙𑀬𑁄, 𑀏𑀢𑁆𑀢𑀓𑀁 𑀲𑀼𑀢𑁆𑀢𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀯𑀓𑁆𑀔𑀸𑀫𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀪𑀸𑀲𑀧𑀭𑀺𑀬𑀦𑁆𑀢𑀁 𑀦 𑀉𑀕𑁆𑀕𑀡𑁆𑀳𑀸𑀢𑀺. ‘‘𑀅𑀬𑀁 𑀘𑁄𑀤𑀓𑀲𑁆𑀲 𑀧𑀼𑀭𑀺𑀫𑀓𑀣𑀸, 𑀅𑀬𑀁 𑀧𑀘𑁆𑀙𑀺𑀫𑀓𑀣𑀸, 𑀅𑀬𑀁 𑀘𑀼𑀤𑀺𑀢𑀓𑀲𑁆𑀲 𑀧𑀼𑀭𑀺𑀫𑀓𑀣𑀸, 𑀅𑀬𑀁 𑀧𑀘𑁆𑀙𑀺𑀫𑀓𑀣𑀸, 𑀏𑀢𑁆𑀢𑀓𑀁 𑀕𑀬𑁆𑀳𑀽𑀧𑀕𑀁, 𑀏𑀢𑁆𑀢𑀓𑀁 𑀦 𑀕𑀬𑁆𑀳𑀽𑀧𑀕’’𑀦𑁆𑀢𑀺 𑀏𑀯𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀧𑀦 𑀧𑀭𑀲𑁆𑀲 𑀪𑀸𑀲𑀧𑀭𑀺𑀬𑀦𑁆𑀢𑀁 𑀦 𑀉𑀕𑁆𑀕𑀡𑁆𑀳𑀸𑀢𑀺 𑀦𑀸𑀫. 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀧𑀸𑀭𑀸𑀚𑀺𑀓𑀁 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀸𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀦𑀸𑀦𑀸𑀓𑀭𑀡𑀁 𑀦 𑀚𑀸𑀦𑀸𑀢𑀺. 𑀫𑀽𑀮𑀦𑁆𑀢𑀺 𑀤𑁆𑀯𑁂 𑀆𑀧𑀢𑁆𑀢𑀺𑀬𑀸 𑀫𑀽𑀮𑀸𑀦𑀺 𑀓𑀸𑀬𑁄 𑀘 𑀯𑀸𑀘𑀸 𑀘, 𑀢𑀸𑀦𑀺 𑀦 𑀚𑀸𑀦𑀸𑀢𑀺. 𑀲𑀫𑀼𑀤𑀬𑀦𑁆𑀢𑀺 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺 𑀆𑀧𑀢𑁆𑀢𑀺𑀲𑀫𑀼𑀤𑀬𑁄 𑀦𑀸𑀫, 𑀢𑀸𑀦𑀺 𑀦 𑀚𑀸𑀦𑀸𑀢𑀺. 𑀧𑀸𑀭𑀸𑀚𑀺𑀓𑀸𑀤𑀻𑀦𑀁 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀻𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀭𑁄𑀥𑀦𑁆𑀢𑀺 𑀅𑀬𑀁 𑀆𑀧𑀢𑁆𑀢𑀺 𑀤𑁂𑀲𑀦𑀸𑀬 𑀦𑀺𑀭𑀼𑀚𑁆𑀛𑀢𑀺, 𑀯𑀽𑀧𑀲𑀫𑁆𑀫𑀢𑀺, 𑀅𑀬𑀁 𑀯𑀼𑀝𑁆𑀞𑀸𑀦𑁂𑀦𑀸𑀢𑀺 𑀏𑀯𑀁 𑀆𑀧𑀢𑁆𑀢𑀺𑀦𑀺𑀭𑁄𑀥𑀁 𑀦 𑀚𑀸𑀦𑀸𑀢𑀺. 𑀲𑀢𑁆𑀢 𑀲𑀫𑀣𑁂 𑀅𑀚𑀸𑀦𑀦𑁆𑀢𑁄 𑀧𑀦 𑀆𑀧𑀢𑁆𑀢𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀦 𑀚𑀸𑀦𑀸𑀢𑀺.

𑀅𑀥𑀺𑀓𑀭𑀡𑀧𑀜𑁆𑀘𑀓𑁂 𑀅𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺. 𑀅𑀥𑀺𑀓𑀭𑀡𑀲𑁆𑀲 𑀫𑀽𑀮𑀁 𑀦𑀸𑀫 𑀢𑁂𑀢𑁆𑀢𑀺𑀁𑀲 𑀫𑀽𑀮𑀸𑀦𑀺 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀤𑁆𑀯𑀸𑀤𑀲 𑀫𑀽𑀮𑀸𑀦𑀺, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀘𑀼𑀤𑁆𑀤𑀲, 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀙, 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑀁; 𑀢𑀸𑀦𑀺 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀥𑀺𑀓𑀭𑀡𑀲𑀫𑀼𑀤𑀬𑁄 𑀦𑀸𑀫 𑀅𑀥𑀺𑀓𑀭𑀡𑀲𑀫𑀼𑀝𑁆𑀞𑀸𑀦𑀁. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺; 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄; 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂; 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀺𑀘𑁆𑀘𑀸𑀦𑀻𑀢𑀺 𑀇𑀫𑀁 𑀯𑀺𑀪𑀸𑀕𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀓𑀭𑀡𑀦𑀺𑀭𑁄𑀥𑀁 𑀦 𑀚𑀸𑀦𑀸𑀢𑀻𑀢𑀺 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀫𑀽𑀮𑀸𑀫𑀽𑀮𑀁 𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀲𑀫𑀣𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺; ‘‘𑀇𑀤𑀁 𑀅𑀥𑀺𑀓𑀭𑀡𑀁 𑀤𑁆𑀯𑀻𑀳𑀺, 𑀇𑀤𑀁 𑀘𑀢𑀽𑀳𑀺, 𑀇𑀤𑀁 𑀢𑀻𑀳𑀺 𑀇𑀤𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀻’’𑀢𑀺 𑀏𑀯𑀁 𑀲𑀢𑁆𑀢 𑀲𑀫𑀣𑁂 𑀅𑀚𑀸𑀦𑀦𑁆𑀢𑁄 𑀧𑀦 𑀅𑀥𑀺𑀓𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀦 𑀚𑀸𑀦𑀸𑀢𑀺 𑀦𑀸𑀫. 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼, 𑀇𑀤𑀁 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 𑀏𑀯𑀁 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀺. 𑀦𑀺𑀤𑀸𑀦𑀦𑁆𑀢𑀺 ‘‘𑀲𑀢𑁆𑀢𑀦𑁆𑀦𑀁 𑀦𑀺𑀤𑀸𑀦𑀸𑀦𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀏𑀢𑁆𑀣 𑀧𑀜𑁆𑀜𑀢𑁆𑀢𑀁, 𑀇𑀤𑀁 𑀏𑀢𑁆𑀣𑀸’’𑀢𑀺 𑀦 𑀚𑀸𑀦𑀸𑀢𑀺. 𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀞𑀫𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺. 𑀅𑀦𑀼𑀧𑀜𑁆𑀜𑀢𑁆𑀢𑀺𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺. 𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀦𑁆𑀢𑀺 𑀓𑀣𑀸𑀦𑀼𑀲𑀦𑁆𑀥𑀺-𑀯𑀺𑀦𑀺𑀘𑁆𑀙𑀬𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀺. 𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺. 𑀜𑀢𑁆𑀢𑀺𑀬𑀸 𑀓𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀜𑀢𑁆𑀢𑀺𑀓𑀺𑀘𑁆𑀘𑀁 𑀦 𑀚𑀸𑀦𑀸𑀢𑀺, 𑀑𑀲𑀸𑀭𑀡𑀸𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼 𑀜𑀢𑁆𑀢𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺, 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀲𑀼 𑀜𑀢𑁆𑀢𑀺𑀬𑀸 𑀓𑀫𑁆𑀫𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀦 𑀚𑀸𑀦𑀸𑀢𑀺. 𑀦 𑀧𑀼𑀩𑁆𑀩𑀓𑀼𑀲𑀮𑁄 𑀳𑁄𑀢𑀺 𑀦 𑀅𑀧𑀭𑀓𑀼𑀲𑀮𑁄𑀢𑀺 𑀧𑀼𑀩𑁆𑀩𑁂 𑀓𑀣𑁂𑀢𑀩𑁆𑀩𑀜𑁆𑀘 𑀧𑀘𑁆𑀙𑀸 𑀓𑀣𑁂𑀢𑀩𑁆𑀩𑀜𑁆𑀘 𑀦 𑀚𑀸𑀦𑀸𑀢𑀺, 𑀜𑀢𑁆𑀢𑀺 𑀦𑀸𑀫 𑀧𑀼𑀩𑁆𑀩𑁂 𑀞𑀧𑁂𑀢𑀩𑁆𑀩𑀸, 𑀧𑀘𑁆𑀙𑀸 𑀦 𑀞𑀧𑁂𑀢𑀩𑁆𑀩𑀸𑀢𑀺𑀧𑀺 𑀦 𑀚𑀸𑀦𑀸𑀢𑀺. 𑀅𑀓𑀸𑀮𑀜𑁆𑀜𑀽 𑀘 𑀳𑁄𑀢𑀻𑀢𑀺 𑀓𑀸𑀮𑀁 𑀦 𑀚𑀸𑀦𑀸𑀢𑀺, 𑀅𑀦𑀚𑁆𑀛𑀺𑀝𑁆𑀞𑁄 𑀅𑀬𑀸𑀘𑀺𑀢𑁄 𑀪𑀸𑀲𑀢𑀺, 𑀜𑀢𑁆𑀢𑀺𑀓𑀸𑀮𑀫𑁆𑀧𑀺 𑀜𑀢𑁆𑀢𑀺𑀔𑁂𑀢𑁆𑀢𑀫𑁆𑀧𑀺 𑀜𑀢𑁆𑀢𑀺𑀑𑀓𑀸𑀲𑀫𑁆𑀧𑀺 𑀦 𑀚𑀸𑀦𑀸𑀢𑀺.

𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸𑀢𑀺 𑀓𑁂𑀯𑀮𑀁 𑀅𑀜𑁆𑀜𑀸𑀡𑁂𑀦 𑀫𑁄𑀫𑀽𑀳𑀪𑀸𑀯𑁂𑀦 𑀥𑀼𑀢𑀗𑁆𑀕𑁂 𑀆𑀦𑀺𑀲𑀁𑀲𑀁 𑀅𑀚𑀸𑀦𑀺𑀢𑁆𑀯𑀸. 𑀧𑀸𑀧𑀺𑀘𑁆𑀙𑁄𑀢𑀺 𑀢𑁂𑀦 𑀅𑀭𑀜𑁆𑀜𑀯𑀸𑀲𑁂𑀦 𑀧𑀘𑁆𑀘𑀬𑀮𑀸𑀪𑀁 𑀧𑀢𑁆𑀣𑀬𑀫𑀸𑀦𑁄. 𑀧𑀯𑀺𑀯𑁂𑀓𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀁. 𑀇𑀤𑀫𑀢𑁆𑀣𑀺𑀢𑀦𑁆𑀢𑀺 𑀇𑀫𑀸𑀬 𑀓𑀮𑁆𑀬𑀸𑀡𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀇𑀤𑀫𑀢𑁆𑀣𑀺, 𑀇𑀤𑀫𑀢𑁆𑀣𑀺𑀦𑁄 𑀪𑀸𑀯𑁄 𑀇𑀤𑀫𑀢𑁆𑀣𑀺𑀢𑀸; 𑀢𑀁 𑀇𑀤𑀫𑀢𑁆𑀣𑀺𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀮𑁄𑀓𑀸𑀫𑀺𑀲𑀦𑁆𑀢𑀺 𑀅𑀢𑁆𑀣𑁄.

𑀉𑀧𑁄𑀲𑀣𑀁 𑀦 𑀚𑀸𑀦𑀸𑀢𑀻𑀢𑀺 𑀦𑀯𑀯𑀺𑀥𑀁 𑀉𑀧𑁄𑀲𑀣𑀁 𑀦 𑀚𑀸𑀦𑀸𑀢𑀺. 𑀉𑀧𑁄𑀲𑀣𑀓𑀫𑁆𑀫𑀦𑁆𑀢𑀺 𑀅𑀥𑀫𑁆𑀫𑁂𑀦𑀯𑀕𑁆𑀕𑀸𑀤𑀺𑀪𑁂𑀤𑀁 𑀘𑀢𑀼𑀩𑁆𑀩𑀺𑀥𑀁 𑀉𑀧𑁄𑀲𑀣𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺. 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀤𑁆𑀯𑁂 𑀫𑀸𑀢𑀺𑀓𑀸 𑀦 𑀚𑀸𑀦𑀸𑀢𑀺. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀦𑀯𑀯𑀺𑀥𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦 𑀚𑀸𑀦𑀸𑀢𑀺. 𑀧𑀯𑀸𑀭𑀡𑀦𑁆𑀢𑀺 𑀦𑀯𑀯𑀺𑀥𑀁 𑀧𑀯𑀸𑀭𑀡𑀁 𑀦 𑀚𑀸𑀦𑀸𑀢𑀺. 𑀧𑀯𑀸𑀭𑀡𑀸𑀓𑀫𑁆𑀫𑀁 𑀉𑀧𑁄𑀲𑀣𑀓𑀫𑁆𑀫𑀲𑀤𑀺𑀲𑀫𑁂𑀯.

𑀅𑀧𑀸𑀲𑀸𑀤𑀺𑀓𑀧𑀜𑁆𑀘𑀓𑁂 𑁋 𑀅𑀧𑀸𑀲𑀸𑀤𑀺𑀓𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀅𑀓𑀼𑀲𑀮𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀧𑀸𑀲𑀸𑀤𑀺𑀓𑀦𑁆𑀢𑀺 𑀓𑀸𑀬𑀲𑀼𑀘𑀭𑀺𑀢𑀸𑀤𑀺 𑀓𑀼𑀲𑀮𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀅𑀢𑀺𑀯𑁂𑀮𑀦𑁆𑀢𑀺 𑀯𑁂𑀮𑀁 𑀅𑀢𑀺𑀓𑁆𑀓𑀫𑁆𑀫 𑀩𑀳𑀼𑀢𑀭𑀁 𑀓𑀸𑀮𑀁 𑀓𑀼𑀮𑁂𑀲𑀼 𑀅𑀧𑁆𑀧𑀁 𑀯𑀺𑀳𑀸𑀭𑁂𑀢𑀺 𑀅𑀢𑁆𑀣𑁄. 𑀑𑀢𑀸𑀭𑁄𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑁆𑀢𑁄 𑀑𑀢𑀭𑀡𑀁. 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀓𑀸𑀬𑀲𑀁𑀲𑀕𑁆𑀕𑀸𑀤𑀺𑀪𑁂𑀤𑀁. 𑀯𑀺𑀲𑀼𑀤𑁆𑀥𑀺𑀧𑀜𑁆𑀘𑀓𑁂𑀧𑀯𑀸𑀭𑀡𑀸𑀕𑁆𑀕𑀳𑀡𑁂𑀦 𑀦𑀯𑀯𑀺𑀥𑀸𑀧𑀺 𑀧𑀯𑀸𑀭𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁬. 𑀙𑀓𑁆𑀓𑁂𑀲𑀼 𑁋 𑀙 𑀲𑀸𑀫𑀻𑀘𑀺𑀬𑁄𑀢𑀺 ‘‘𑀲𑁄 𑀘 𑀪𑀺𑀓𑁆𑀔𑀼 𑀅𑀦𑀩𑁆𑀪𑀺𑀢𑁄, 𑀢𑁂 𑀘 𑀪𑀺𑀓𑁆𑀔𑀽 𑀕𑀸𑀭𑀬𑁆𑀳𑀸, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺’’, ‘‘𑀬𑀼𑀜𑁆𑀚𑀦𑁆𑀢𑀸𑀬𑀲𑁆𑀫𑀦𑁆𑀢𑁄 𑀲𑀓𑀁, 𑀫𑀸 𑀯𑁄 𑀲𑀓𑀁 𑀯𑀺𑀦𑀲𑁆𑀲𑀸𑀢𑀺 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺’’, ‘‘𑀅𑀬𑀁 𑀢𑁂 𑀪𑀺𑀓𑁆𑀔𑀼 𑀧𑀢𑁆𑀢𑁄 𑀬𑀸𑀯 𑀪𑁂𑀤𑀦𑀸𑀬 𑀥𑀸𑀭𑁂𑀢𑀩𑁆𑀩𑁄𑀢𑀺 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺’’, ‘‘𑀢𑀢𑁄 𑀦𑀻𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺𑀢𑀩𑁆𑀩𑀁, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺’’, ‘‘𑀅𑀜𑁆𑀜𑀸𑀢𑀩𑁆𑀩𑀁 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀭𑀺𑀧𑀜𑁆𑀳𑀺𑀢𑀩𑁆𑀩𑀁, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺’’, ‘‘𑀬𑀲𑁆𑀲 𑀪𑀯𑀺𑀲𑁆𑀲𑀢𑀺 𑀲𑁄 𑀳𑀭𑀺𑀲𑁆𑀲𑀢𑀻𑀢𑀺 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻’’𑀢𑀺 𑀇𑀫𑀸 𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂𑀬𑁂𑀯 𑀙 𑀲𑀸𑀫𑀻𑀘𑀺𑀬𑁄. 𑀙 𑀙𑁂𑀤𑀦𑀓𑀸𑀢𑀺 𑀧𑀜𑁆𑀘𑀓𑁂 𑀯𑀼𑀢𑁆𑀢𑀸 𑀧𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀁 𑀉𑀤𑀓𑀲𑀸𑀝𑀺𑀓𑀸𑀬 𑀲𑀤𑁆𑀥𑀺𑀁 𑀙. 𑀙𑀳𑀸𑀓𑀸𑀭𑁂𑀳𑀻𑀢𑀺 𑀅𑀮𑀚𑁆𑀚𑀺𑀢𑀸 𑀅𑀜𑁆𑀜𑀸𑀡𑀢𑀸 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀢𑀸 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸 𑀲𑀢𑀺𑀲𑀫𑁆𑀫𑁄𑀲𑀸𑀢𑀺. 𑀢𑀢𑁆𑀣 𑀏𑀓𑀭𑀢𑁆𑀢𑀙𑀸𑀭𑀢𑁆𑀢𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑀸𑀤𑀻𑀲𑀼 𑀆𑀧𑀢𑁆𑀢𑀺𑀁 𑀲𑀢𑀺𑀲𑀫𑁆𑀫𑁄𑀲𑁂𑀦 𑀆𑀧𑀚𑁆𑀚𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀙 𑀆𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂𑀢𑀺 𑀧𑀜𑁆𑀘𑀓𑁂 𑀯𑀼𑀢𑁆𑀢𑀸 𑀧𑀜𑁆𑀘 𑀢𑀲𑁆𑀲𑀸𑀥𑁂𑀬𑁆𑀬𑁄 𑀉𑀧𑁄𑀲𑀣𑁄𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀙.

𑀙 𑀧𑀭𑀫𑀸𑀦𑀻𑀢𑀺 ‘‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩𑀁, 𑀫𑀸𑀲𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩𑀁, 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁂𑀦 𑀉𑀤𑁆𑀤𑀺𑀲𑁆𑀲 𑀞𑀸𑀢𑀩𑁆𑀩𑀁, 𑀦𑀯𑀁 𑀧𑀦 𑀪𑀺𑀓𑁆𑀔𑀼𑀦𑀸 𑀲𑀦𑁆𑀣𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀥𑀸𑀭𑁂𑀢𑀩𑁆𑀩𑀁 𑀙𑀩𑁆𑀩𑀲𑁆𑀲𑀧𑀭𑀫𑀢𑀸 𑀥𑀸𑀭𑁂𑀢𑀩𑁆𑀩𑀁, 𑀢𑀺𑀬𑁄𑀚𑀦𑀧𑀭𑀫𑀁 𑀲𑀳𑀢𑁆𑀣𑀸 𑀥𑀸𑀭𑁂𑀢𑀩𑁆𑀩𑀸𑀦𑀺, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀧𑀢𑁆𑀢𑁄 𑀥𑀸𑀭𑁂𑀢𑀩𑁆𑀩𑁄, 𑀲𑀢𑁆𑀢𑀸𑀳𑀧𑀭𑀫𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺, 𑀙𑀸𑀭𑀢𑁆𑀢𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩𑀁, 𑀘𑀢𑀼𑀓𑁆𑀓𑀁𑀲𑀧𑀭𑀫𑀁, 𑀅𑀟𑁆𑀠𑀢𑁂𑀬𑁆𑀬𑀓𑀁𑀲𑀧𑀭𑀫𑀁, 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀸𑀢𑀩𑁆𑀩𑀁, 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁 𑀫𑀜𑁆𑀘𑀧𑀝𑀺𑀧𑀸𑀤𑀓𑀁, 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁 𑀤𑀦𑁆𑀢𑀓𑀝𑁆𑀞’’𑀦𑁆𑀢𑀺 𑀇𑀫𑀸𑀦𑀺 𑀘𑀼𑀤𑁆𑀤𑀲 𑀧𑀭𑀫𑀸𑀦𑀺. 𑀢𑀢𑁆𑀣 𑀧𑀞𑀫𑀸𑀦𑀺 𑀙 𑀏𑀓𑀁 𑀙𑀓𑁆𑀓𑀁, 𑀢𑀢𑁄 𑀏𑀓𑀁 𑀅𑀧𑀦𑁂𑀢𑁆𑀯𑀸 𑀲𑁂𑀲𑁂𑀲𑀼 𑀏𑀓𑁂𑀓𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀜𑁆𑀜𑀸𑀦𑀺𑀧𑀺 𑀙𑀓𑁆𑀓𑀸𑀦𑀺 𑀓𑀸𑀢𑀩𑁆𑀩𑀸𑀦𑀺.

𑀙 𑀆𑀧𑀢𑁆𑀢𑀺𑀬𑁄𑀢𑀺 𑀢𑀻𑀡𑀺 𑀙𑀓𑁆𑀓𑀸𑀦𑀺 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁂 𑀯𑀼𑀢𑁆𑀢𑀸𑀦𑀺. 𑀙 𑀓𑀫𑁆𑀫𑀸𑀦𑀻𑀢𑀺 𑀢𑀚𑁆𑀚𑀦𑀻𑀬-𑀦𑀺𑀬𑀲𑁆𑀲-𑀧𑀩𑁆𑀩𑀸𑀚𑀦𑀻𑀬-𑀧𑀝𑀺𑀲𑀸𑀭𑀡𑀻𑀬𑀸𑀦𑀺 𑀘𑀢𑁆𑀢𑀸𑀭𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀘 𑀅𑀧𑁆𑀧𑀝𑀺𑀓𑀫𑁆𑀫𑁂 𑀘 𑀯𑀼𑀢𑁆𑀢𑀤𑁆𑀯𑀬𑀫𑁆𑀧𑀺 𑀏𑀓𑀁, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀏𑀓𑀦𑁆𑀢𑀺 𑀙. 𑀦𑀳𑀸𑀦𑁂𑀢𑀺 𑀑𑀭𑁂𑀦𑀟𑁆𑀠𑀫𑀸𑀲𑀁 𑀦𑀳𑀸𑀦𑁂; 𑀯𑀺𑀧𑁆𑀧𑀓𑀢𑀘𑀻𑀯𑀭𑀸𑀤𑀺𑀙𑀓𑁆𑀓𑀤𑁆𑀯𑀬𑀁 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀙𑀓𑁆𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁭. 𑀲𑀢𑁆𑀢𑀓𑁂𑀲𑀼 𑁋 𑀲𑀢𑁆𑀢 𑀲𑀸𑀫𑀻𑀘𑀺𑀬𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀙𑀲𑀼 ‘‘𑀲𑀸 𑀘 𑀪𑀺𑀓𑁆𑀔𑀼𑀦𑀻 𑀅𑀦𑀩𑁆𑀪𑀺𑀢𑀸, 𑀢𑀸 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀕𑀸𑀭𑀬𑁆𑀳𑀸, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻’’𑀢𑀺 𑀇𑀫𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢 𑀅𑀥𑀫𑁆𑀫𑀺𑀓𑀸 𑀧𑀝𑀺𑀜𑁆𑀜𑀸𑀢𑀓𑀭𑀡𑀸𑀢𑀺 ‘‘𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺, 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑀺𑀬𑀫𑀸𑀦𑁄 ‘𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺, 𑀢𑀁 𑀲𑀗𑁆𑀖𑁄 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀓𑀸𑀭𑁂𑀢𑀺, 𑀅𑀥𑀫𑁆𑀫𑀺𑀓𑀁 𑀧𑀝𑀺𑀜𑁆𑀜𑀸𑀢𑀓𑀭𑀡’’𑀦𑁆𑀢𑀺 𑀏𑀯𑀁 𑀲𑀫𑀣𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀥𑀫𑁆𑀫𑀺𑀓𑀸𑀧𑀺 𑀢𑀢𑁆𑀣𑁂𑀯 𑀦𑀺𑀤𑁆𑀤𑀺𑀝𑁆𑀞𑀸. 𑀲𑀢𑁆𑀢𑀦𑁆𑀦𑀁 𑀅𑀦𑀸𑀧𑀢𑁆𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑀼𑀦𑁆𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁. 𑀲𑀢𑁆𑀢𑀸𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂𑀢𑀺 ‘‘𑀢𑀲𑁆𑀲𑀸𑀥𑁂𑀬𑁆𑀬𑁄 𑀉𑀧𑁄𑀲𑀣𑁄 𑀧𑀯𑀸𑀭𑀡𑀸’’𑀢𑀺 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘𑀓𑁂 𑀯𑀼𑀢𑁆𑀢𑀸 𑀧𑀜𑁆𑀘 𑀲𑀢𑁆𑀢 𑀳𑁄𑀦𑁆𑀢𑀺. 𑀲𑀢𑁆𑀢 𑀧𑀭𑀫𑀸𑀦𑀻𑀢𑀺 𑀙𑀓𑁆𑀓𑁂 𑀯𑀼𑀢𑁆𑀢𑀸𑀦𑀺𑀬𑁂𑀯 𑀲𑀢𑁆𑀢𑀓𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀓𑀢𑀘𑀻𑀯𑀭𑀦𑁆𑀢𑀺𑀆𑀤𑀻𑀦𑀺 𑀤𑁆𑀯𑁂 𑀲𑀢𑁆𑀢𑀓𑀸𑀦𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺.

𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀪𑀺𑀓𑁆𑀔𑀼𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀲𑀢𑁆𑀢𑀓𑀸𑀦𑀺, 𑀤𑁆𑀯𑁂 𑀅𑀥𑀫𑁆𑀫𑀺𑀓𑀸𑀦𑀺, 𑀏𑀓𑀁 𑀥𑀫𑁆𑀫𑀺𑀓𑀁; 𑀢𑀸𑀦𑀺 𑀢𑀻𑀡𑀺𑀧𑀺 𑀘𑀫𑁆𑀧𑁂𑀬𑁆𑀬𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀅𑀲𑀤𑁆𑀥𑀫𑁆𑀫𑀸𑀢𑀺 𑀅𑀲𑀢𑀁 𑀥𑀫𑁆𑀫𑀸, 𑀅𑀲𑀦𑁆𑀢𑁄 𑀯𑀸 𑀥𑀫𑁆𑀫𑀸; 𑀅𑀲𑁄𑀪𑀦𑀸 𑀳𑀻𑀦𑀸 𑀮𑀸𑀫𑀓𑀸𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀫𑁆𑀫𑀸𑀢𑀺 𑀲𑀢𑀁 𑀩𑀼𑀤𑁆𑀥𑀸𑀤𑀻𑀦𑀁 𑀥𑀫𑁆𑀫𑀸; 𑀲𑀦𑁆𑀢𑁄 𑀯𑀸 𑀥𑀫𑁆𑀫𑀸 𑀲𑀼𑀦𑁆𑀤𑀭𑀸 𑀉𑀢𑁆𑀢𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀢𑁆𑀢𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁮. 𑀅𑀝𑁆𑀞𑀓𑁂𑀲𑀼 𑁋 𑀅𑀝𑁆𑀞𑀸𑀦𑀺𑀲𑀁𑀲𑁂𑀢𑀺 ‘‘𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀸𑀫, 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂 𑀆𑀦𑀺𑀲𑀁𑀲𑁂. 𑀤𑀼𑀢𑀺𑀬𑀅𑀝𑁆𑀞𑀓𑁂𑀧𑀺 𑀏𑀲𑁂𑀯 𑀦𑀬𑁄, 𑀢𑀫𑁆𑀧𑀺 𑀳𑀺 𑀏𑀯𑀫𑁂𑀯 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁.

𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀸𑀢𑀺 𑀪𑀺𑀓𑁆𑀔𑀽𑀦𑀁 𑀢𑁂𑀭𑀲𑀓𑁂 𑀘𑀢𑁆𑀢𑀸𑀭𑁄, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀢𑁆𑀢𑀭𑀲𑀓𑁂 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸 𑀘𑀢𑁆𑀢𑀸𑀭𑁄𑀢𑀺 𑀅𑀝𑁆𑀞. 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀓𑀼𑀮𑀸𑀦𑀺 𑀤𑀽𑀲𑁂𑀢𑀻𑀢𑀺 𑀓𑀼𑀮𑀸𑀦𑀺 𑀤𑀽𑀲𑁂𑀢𑀺 𑀧𑀼𑀧𑁆𑀨𑁂𑀦 𑀯𑀸 𑀨𑀮𑁂𑀦 𑀯𑀸 𑀘𑀼𑀡𑁆𑀡𑁂𑀦 𑀯𑀸 𑀫𑀢𑁆𑀢𑀺𑀓𑀸𑀬 𑀯𑀸 𑀤𑀦𑁆𑀢𑀓𑀝𑁆𑀞𑁂𑀦 𑀯𑀸 𑀯𑁂𑀴𑀼𑀬𑀸 𑀯𑀸 𑀯𑁂𑀚𑁆𑀚𑀺𑀓𑀸𑀬 𑀯𑀸 𑀚𑀗𑁆𑀖𑀧𑁂𑀲𑀦𑀺𑀓𑁂𑀦 𑀯𑀸𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺. 𑀅𑀝𑁆𑀞 𑀫𑀸𑀢𑀺𑀓𑀸 𑀘𑀻𑀯𑀭𑀓𑁆𑀔𑀦𑁆𑀥𑀓𑁂, 𑀅𑀧𑀭𑀸 𑀅𑀝𑁆𑀞 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀸. 𑀅𑀝𑁆𑀞𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀻𑀢𑀺 𑀮𑀸𑀪𑁂𑀦 𑀅𑀮𑀸𑀪𑁂𑀦 𑀬𑀲𑁂𑀦 𑀅𑀬𑀲𑁂𑀦 𑀲𑀓𑁆𑀓𑀸𑀭𑁂𑀦 𑀅𑀲𑀓𑁆𑀓𑀸𑀭𑁂𑀦 𑀧𑀸𑀧𑀺𑀘𑁆𑀙𑀢𑀸𑀬 𑀧𑀸𑀧𑀫𑀺𑀢𑁆𑀢𑀢𑀸𑀬. 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀦𑀸𑀫 𑀮𑀸𑀪𑁂 𑀲𑀸𑀭𑀸𑀕𑁄, 𑀅𑀮𑀸𑀪𑁂 𑀧𑀝𑀺𑀯𑀺𑀭𑁄𑀥𑁄; 𑀏𑀯𑀁 𑀬𑀲𑁂 𑀅𑀬𑀲𑁂, 𑀧𑀲𑀁𑀲𑀸𑀬 𑀦𑀺𑀦𑁆𑀤𑀸𑀬, 𑀲𑀼𑀔𑁂 𑀲𑀸𑀭𑀸𑀕𑁄, 𑀤𑀼𑀓𑁆𑀔𑁂 𑀧𑀝𑀺𑀯𑀺𑀭𑁄𑀥𑁄𑀢𑀺. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀼𑀲𑀸𑀯𑀸𑀤𑁄𑀢𑀺 ‘‘𑀯𑀺𑀦𑀺𑀥𑀸𑀬 𑀲𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀸𑀴𑀺𑀬𑀁 𑀆𑀕𑀢𑁂𑀳𑀺 𑀲𑀢𑁆𑀢𑀳𑀻𑀢𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀝𑁆𑀞𑀗𑁆𑀕𑀺𑀓𑁄.

𑀅𑀝𑁆𑀞 𑀉𑀧𑁄𑀲𑀣𑀗𑁆𑀕𑀸𑀦𑀻𑀢𑀺 𑁋

‘‘𑀧𑀸𑀡𑀁 𑀦 𑀳𑀦𑁂 𑀦 𑀘𑀸𑀤𑀺𑀦𑁆𑀦𑀫𑀸𑀤𑀺𑀬𑁂,

𑀫𑀼𑀲𑀸 𑀦 𑀪𑀸𑀲𑁂 𑀦 𑀘 𑀫𑀚𑁆𑀚𑀧𑁄 𑀲𑀺𑀬𑀸;

𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑀺𑀭𑀫𑁂𑀬𑁆𑀬 𑀫𑁂𑀣𑀼𑀦𑀸,

𑀭𑀢𑁆𑀢𑀺𑀁 𑀦 𑀪𑀼𑀜𑁆𑀚𑁂𑀬𑁆𑀬 𑀯𑀺𑀓𑀸𑀮𑀪𑁄𑀚𑀦𑀁.

‘‘𑀫𑀸𑀮𑀁 𑀦 𑀥𑀸𑀭𑁂 𑀦 𑀘 𑀕𑀦𑁆𑀥𑀫𑀸𑀘𑀭𑁂,

𑀫𑀜𑁆𑀘𑁂 𑀙𑀫𑀸𑀬𑀁𑀯 𑀲𑀬𑁂𑀣 𑀲𑀦𑁆𑀣𑀢𑁂;

𑀏𑀢𑀜𑁆𑀳𑀺 𑀅𑀝𑁆𑀞𑀗𑁆𑀕𑀺𑀓𑀫𑀸𑀳𑀼𑀧𑁄𑀲𑀣𑀁,

𑀩𑀼𑀤𑁆𑀥𑁂𑀦 𑀤𑀼𑀓𑁆𑀔𑀦𑁆𑀢𑀕𑀼𑀦𑀸 𑀧𑀓𑀸𑀲𑀺𑀢’’𑀦𑁆𑀢𑀺. (𑀅. 𑀦𑀺. 𑁩.𑁭𑁧);

𑀏𑀯𑀁 𑀯𑀼𑀢𑁆𑀢𑀸𑀦𑀺 𑀅𑀝𑁆𑀞. 𑀅𑀝𑁆𑀞 𑀤𑀽𑀢𑁂𑀬𑁆𑀬𑀗𑁆𑀕𑀸𑀦𑀻𑀢𑀺 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑀸 𑀘 𑀳𑁄𑀢𑀺 𑀲𑀸𑀯𑁂𑀢𑀸 𑀘𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀗𑁆𑀖𑀪𑁂𑀤𑀓𑁂 𑀯𑀼𑀢𑁆𑀢𑀸𑀦𑀺. 𑀢𑀺𑀢𑁆𑀣𑀺𑀬𑀯𑀢𑁆𑀢𑀸𑀦𑀺 𑀫𑀳𑀸𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀅𑀦𑀢𑀺𑀭𑀺𑀢𑁆𑀢𑀸 𑀘 𑀅𑀢𑀺𑀭𑀺𑀢𑁆𑀢𑀸 𑀘 𑀧𑀯𑀸𑀭𑀡𑀸𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀪𑀢𑁆𑀢𑀕𑁆𑀕𑁂 𑀯𑀼𑀟𑁆𑀠𑀪𑀺𑀓𑁆𑀔𑀼𑀦𑀻𑀦𑀁, 𑀆𑀲𑀦𑀫𑁆𑀧𑀺 𑀢𑀸𑀲𑀁𑀬𑁂𑀯 𑀤𑀸𑀢𑀩𑁆𑀩𑀁. 𑀉𑀧𑀸𑀲𑀺𑀓𑀸𑀢𑀺 𑀯𑀺𑀲𑀸𑀔𑀸. 𑀅𑀝𑁆𑀞𑀸𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂𑀢𑀺 𑀧𑀜𑁆𑀘𑀓𑁂 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 ‘‘𑀢𑀲𑁆𑀲𑀸𑀥𑁂𑀬𑁆𑀬𑁄 𑀉𑀧𑁄𑀲𑀣𑁄, 𑀧𑀯𑀸𑀭𑀡𑀸, 𑀲𑀗𑁆𑀖𑀓𑀫𑁆𑀫’’𑀦𑁆𑀢𑀺 𑀇𑀫𑁂 𑀢𑀬𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞 𑀧𑀭𑀫𑀸𑀦𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀭𑀫𑀸𑀦𑁂𑀯 𑀅𑀝𑁆𑀞𑀓𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 ‘‘𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀣𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀅𑀝𑁆𑀞𑀲𑀼. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀝𑁆𑀞𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁯. 𑀦𑀯𑀓𑁂𑀲𑀼 𑁋 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀻𑀢𑀺 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀻𑀦𑀺 𑀦𑀯. 𑀦𑀯 𑀆𑀖𑀸𑀢𑀧𑀝𑀺𑀯𑀺𑀦𑀬𑀸𑀢𑀺 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀻’’𑀢𑀺𑀆𑀤𑀻𑀦𑀺 𑀦𑀯. 𑀦𑀯 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀦𑀯𑀳𑀺 𑀆𑀖𑀸𑀢𑀯𑀢𑁆𑀣𑀽𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀲𑁂𑀢𑀼𑀖𑀸𑀢𑁄. 𑀦𑀯𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻𑀢𑀺 ‘‘𑀦𑀯𑀦𑁆𑀦𑀁 𑀯𑀸, 𑀉𑀧𑀸𑀮𑀺, 𑀅𑀢𑀺𑀭𑁂𑀓𑀦𑀯𑀦𑁆𑀦𑀁 𑀯𑀸 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘𑀸’’𑀢𑀺. 𑀦𑀯 𑀧𑀭𑀫𑀸𑀦𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀭𑀫𑀸𑀦𑁂𑀯 𑀦𑀯𑀓𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀦𑀸𑀫 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄, 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑀸, 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸. 𑀦𑀯 𑀯𑀺𑀥𑀫𑀸𑀦𑀸𑀢𑀺 ‘‘𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀫𑀸𑀦𑀸𑀤𑀬𑁄. 𑀦𑀯 𑀘𑀻𑀯𑀭𑀸𑀦𑀻𑀢𑀺 𑀢𑀺𑀘𑀻𑀯𑀭𑀦𑁆𑀢𑀺 𑀯𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀢𑀺 𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀦𑀺. 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀺. 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀻𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀘𑁂𑀢𑀺𑀬𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀺.

𑀦𑀯 𑀧𑀝𑀺𑀕𑁆𑀕𑀳𑀧𑀭𑀺𑀪𑁄𑀕𑀸𑀢𑀺 𑀏𑀢𑁂𑀲𑀁𑀬𑁂𑀯 𑀤𑀸𑀦𑀸𑀦𑀁 𑀧𑀝𑀺𑀕𑁆𑀕𑀳𑀸 𑀘 𑀧𑀭𑀺𑀪𑁄𑀕𑀸 𑀘. 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀻𑀢𑀺 𑀲𑀗𑁆𑀖𑀲𑁆𑀲 𑀦𑀺𑀦𑁆𑀦𑀁 𑀲𑀗𑁆𑀖𑀲𑁆𑀲𑁂𑀯 𑀤𑁂𑀢𑀺, 𑀘𑁂𑀢𑀺𑀬𑀲𑁆𑀲 𑀦𑀺𑀦𑁆𑀦𑀁 𑀘𑁂𑀢𑀺𑀬𑀲𑁆𑀲𑁂𑀯, 𑀧𑀼𑀕𑁆𑀕𑀮𑀲𑁆𑀲 𑀦𑀺𑀦𑁆𑀦𑀁 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑁂𑀢𑀻𑀢𑀺 𑀇𑀫𑀸𑀦𑀺 𑀢𑀻𑀡𑀺. 𑀧𑀝𑀺𑀕𑁆𑀕𑀳𑀧𑀝𑀺𑀪𑁄𑀕𑀸𑀧𑀺 𑀢𑁂𑀲𑀁𑀬𑁂𑀯 𑀧𑀝𑀺𑀕𑁆𑀕𑀳𑀸 𑀘 𑀧𑀭𑀺𑀪𑁄𑀕𑀸 𑀘. 𑀦𑀯 𑀅𑀥𑀫𑁆𑀫𑀺𑀓𑀸 𑀲𑀜𑁆𑀜𑀢𑁆𑀢𑀺𑀬𑁄𑀢𑀺 𑀅𑀥𑀫𑁆𑀫𑀯𑀸𑀤𑀺𑀧𑀼𑀕𑁆𑀕𑀮𑁄, 𑀅𑀥𑀫𑁆𑀫𑀯𑀸𑀤𑀺𑀲𑀫𑁆𑀩𑀳𑀼𑀮𑀸, 𑀅𑀥𑀫𑁆𑀫𑀯𑀸𑀤𑀺𑀲𑀗𑁆𑀖𑁄𑀢𑀺 𑀏𑀯𑀁 𑀢𑀻𑀡𑀺 𑀢𑀺𑀓𑀸𑀦𑀺 𑀲𑀫𑀣𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀥𑀫𑁆𑀫𑀺𑀓𑀸 𑀲𑀜𑁆𑀜𑀢𑁆𑀢𑀺𑀬𑁄𑀧𑀺 𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀢𑁆𑀣𑁂𑀯 𑀦𑀺𑀤𑁆𑀤𑀺𑀝𑁆𑀞𑀸. 𑀅𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑁂 𑀦𑀯𑀓𑀸𑀦𑀺 𑀑𑀯𑀸𑀤𑀯𑀕𑁆𑀕𑀲𑁆𑀲 𑀧𑀞𑀫𑀲𑀺𑀓𑁆𑀔𑀸𑀧𑀤𑀦𑀺𑀤𑁆𑀤𑁂𑀲𑁂 𑀧𑀸𑀘𑀺𑀢𑁆𑀢𑀺𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑁂 𑀦𑀯𑀓𑀸𑀦𑀺 𑀢𑀢𑁆𑀣𑁂𑀯 𑀤𑀼𑀓𑁆𑀓𑀝𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀦𑀯𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀲𑀓𑀯𑀸𑀭𑀯𑀡𑁆𑀡𑀦𑀸

𑁩𑁩𑁦. 𑀤𑀲𑀓𑁂𑀲𑀼 𑁋 𑀤𑀲 𑀆𑀖𑀸𑀢𑀯𑀢𑁆𑀣𑀽𑀦𑀻𑀢𑀺 𑀦𑀯𑀓𑁂𑀲𑀼 𑀯𑀼𑀢𑁆𑀢𑀸𑀦𑀺 𑀦𑀯 ‘‘𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀆𑀖𑀸𑀢𑁄 𑀚𑀸𑀬𑀢𑀻’’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀤𑀲 𑀳𑁄𑀦𑁆𑀢𑀺. 𑀆𑀖𑀸𑀢𑀧𑀝𑀺𑀯𑀺𑀦𑀬𑀸𑀧𑀺 𑀢𑀢𑁆𑀣 𑀯𑀼𑀢𑁆𑀢𑀸 𑀦𑀯 ‘‘𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀆𑀖𑀸𑀢𑁄 𑀚𑀸𑀬𑀢𑀺, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀻’’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀤𑀲 𑀯𑁂𑀤𑀺𑀢𑀩𑁆𑀩𑀸. 𑀤𑀲 𑀯𑀺𑀦𑀻𑀢𑀯𑀢𑁆𑀣𑀽𑀦𑀻𑀢𑀺 𑀤𑀲𑀳𑀺 𑀆𑀖𑀸𑀢𑀯𑀢𑁆𑀣𑀽𑀳𑀺 𑀯𑀺𑀭𑀢𑀺𑀲𑀗𑁆𑀔𑀸𑀢𑀸𑀦𑀺 𑀤𑀲. 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺, ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀯𑀲𑁂𑀦 𑀧𑀦 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀲 𑀫𑀺𑀘𑁆𑀙𑀢𑁆𑀢𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸, 𑀯𑀺𑀧𑀭𑀻𑀢𑀸 𑀲𑀫𑁆𑀫𑀢𑁆𑀢𑀸. 𑀲𑀮𑀸𑀓𑀕𑁆𑀕𑀸𑀳𑀸 𑀲𑀫𑀣𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸.

𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄𑀢𑀺 ‘‘𑀲𑀻𑀮𑀯𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂𑀳𑀺 𑀤𑀲𑀳𑀺. 𑀤𑀲 𑀆𑀤𑀻𑀦𑀯𑀸 𑀭𑀸𑀚𑀦𑁆𑀢𑁂𑀧𑀼𑀭𑀧𑁆𑀧𑀯𑁂𑀲𑀦𑁂 𑀭𑀸𑀚𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀤𑀲 𑀤𑀸𑀦𑀯𑀢𑁆𑀣𑀽𑀦𑀻𑀢𑀺 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸 𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀁 𑀧𑀤𑀻𑀧𑁂𑀬𑁆𑀬𑀁. 𑀤𑀲 𑀭𑀢𑀦𑀸𑀦𑀻𑀢𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀸𑀤𑀻𑀦𑀺. 𑀤𑀲 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀲𑁄𑀲𑀸𑀦𑀺𑀓𑀁, 𑀧𑀸𑀧𑀡𑀺𑀓𑀁, 𑀉𑀦𑁆𑀤𑀽𑀭𑀓𑁆𑀔𑀸𑀬𑀺𑀢𑀁, 𑀉𑀧𑀘𑀺𑀓𑀓𑁆𑀔𑀸𑀬𑀺𑀢𑀁, 𑀅𑀕𑁆𑀕𑀺𑀤𑀟𑁆𑀠𑀁, 𑀕𑁄𑀔𑀸𑀬𑀺𑀢𑀁, 𑀅𑀚𑀺𑀓𑀓𑁆𑀔𑀸𑀬𑀺𑀢𑀁, 𑀣𑀽𑀧𑀘𑀻𑀯𑀭𑀁, 𑀆𑀪𑀺𑀲𑁂𑀓𑀺𑀬𑀁, 𑀪𑀢𑀧𑀝𑀺𑀬𑀸𑀪𑀢𑀦𑁆𑀢𑀺 𑀏𑀢𑁂𑀲𑀼 𑀉𑀧𑀲𑀫𑁆𑀧𑀦𑁆𑀦𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁. 𑀤𑀲 𑀘𑀻𑀯𑀭𑀥𑀸𑀭𑀡𑀸𑀢𑀺 ‘‘𑀲𑀩𑁆𑀩𑀦𑀻𑀮𑀓𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀯𑀲𑁂𑀦 𑀤𑀲𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀦𑀯𑀲𑀼 𑀓𑀧𑁆𑀧𑀺𑀬𑀘𑀻𑀯𑀭𑁂𑀲𑀼 𑀉𑀤𑀓𑀲𑀸𑀝𑀺𑀓𑀁 𑀯𑀸 𑀲𑀗𑁆𑀓𑀘𑁆𑀘𑀺𑀓𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀸’’𑀢𑀺 𑀯𑀼𑀢𑁆𑀢𑀁.

𑀅𑀯𑀦𑁆𑀤𑀦𑀻𑀬𑀧𑀼𑀕𑁆𑀕𑀮𑀸 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀤𑀲 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀺 𑀑𑀫𑀲𑀯𑀸𑀤𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀤𑀲 𑀆𑀓𑀸𑀭𑀸 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀤𑀲 𑀲𑁂𑀦𑀸𑀲𑀦𑀸𑀦𑀻𑀢𑀺 𑀫𑀜𑁆𑀘𑁄, 𑀧𑀻𑀞𑀁, 𑀪𑀺𑀲𑀺, 𑀩𑀺𑀫𑁆𑀩𑁄𑀳𑀦𑀁, 𑀘𑀺𑀫𑀺𑀮𑀺𑀓𑀸, 𑀉𑀢𑁆𑀢𑀭𑀢𑁆𑀣𑀭𑀡𑀁, 𑀢𑀝𑁆𑀝𑀺𑀓𑀸, 𑀘𑀫𑁆𑀫𑀔𑀡𑁆𑀟𑁄, 𑀦𑀺𑀲𑀻𑀤𑀦𑀁, 𑀢𑀺𑀡𑀲𑀦𑁆𑀣𑀸𑀭𑁄, 𑀧𑀡𑁆𑀡𑀲𑀦𑁆𑀣𑀸𑀭𑁄𑀢𑀺. 𑀤𑀲 𑀯𑀭𑀸𑀦𑀺 𑀬𑀸𑀘𑀺𑀁𑀲𑀽𑀢𑀺 𑀯𑀺𑀲𑀸𑀔𑀸 𑀅𑀝𑁆𑀞, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀏𑀓𑀁, 𑀚𑀻𑀯𑀓𑁄 𑀏𑀓𑀁. 𑀬𑀸𑀕𑀼𑀆𑀦𑀺𑀲𑀁𑀲𑀸 𑀘 𑀅𑀓𑀧𑁆𑀧𑀺𑀬𑀫𑀁𑀲𑀸𑀦𑀺 𑀘 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀤𑀲𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀸𑀤𑀲𑀓𑀯𑀸𑀭𑀯𑀡𑁆𑀡𑀦𑀸

𑁩𑁩𑁧. 𑀏𑀓𑀸𑀤𑀲𑀓𑁂𑀲𑀼 𑁋 𑀏𑀓𑀸𑀤𑀲𑀸𑀢𑀺 𑀧𑀡𑁆𑀟𑀓𑀸𑀤𑀬𑁄 𑀏𑀓𑀸𑀤𑀲. 𑀏𑀓𑀸𑀤𑀲 𑀧𑀸𑀤𑀼𑀓𑀸𑀢𑀺 𑀤𑀲 𑀭𑀢𑀦𑀫𑀬𑀸, 𑀏𑀓𑀸 𑀓𑀝𑁆𑀞𑀧𑀸𑀤𑀼𑀓𑀸. 𑀢𑀺𑀡𑀧𑀸𑀤𑀼𑀓𑀫𑀼𑀜𑁆𑀚𑀧𑀸𑀤𑀼𑀓𑀧𑀩𑁆𑀩𑀚𑀧𑀸𑀤𑀼𑀓𑀸𑀤𑀬𑁄 𑀧𑀦 𑀓𑀝𑁆𑀞𑀧𑀸𑀤𑀼𑀓𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀏𑀓𑀸𑀤𑀲 𑀧𑀢𑁆𑀢𑀸𑀢𑀺 𑀢𑀫𑁆𑀩𑀮𑁄𑀳𑀫𑀬𑁂𑀦 𑀯𑀸 𑀤𑀸𑀭𑀼𑀫𑀬𑁂𑀦 𑀯𑀸 𑀲𑀤𑁆𑀥𑀺𑀁 𑀤𑀲 𑀭𑀢𑀦𑀫𑀬𑀸. 𑀏𑀓𑀸𑀤𑀲 𑀘𑀻𑀯𑀭𑀸𑀦𑀻𑀢𑀺 𑀲𑀩𑁆𑀩𑀦𑀻𑀮𑀓𑀸𑀤𑀻𑀦𑀺 𑀏𑀓𑀸𑀤𑀲. 𑀬𑀸𑀯𑀢𑀢𑀺𑀬𑀓𑀸𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀪𑀺𑀓𑁆𑀔𑀼𑀦𑀻, 𑀲𑀗𑁆𑀖𑀸𑀤𑀺𑀲𑁂𑀲𑀸 𑀅𑀝𑁆𑀞, 𑀅𑀭𑀺𑀝𑁆𑀞𑁄, 𑀘𑀡𑁆𑀟𑀓𑀸𑀴𑀻𑀢𑀺. 𑀏𑀓𑀸𑀤𑀲 𑀅𑀦𑁆𑀢𑀭𑀸𑀬𑀺𑀓𑀸 𑀦𑀸𑀫 ‘‘𑀦𑀲𑀺 𑀅𑀦𑀺𑀫𑀺𑀢𑁆𑀢𑀸’’𑀢𑀺 𑀆𑀤𑀬𑁄. 𑀏𑀓𑀸𑀤𑀲 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻𑀢𑀺 𑀢𑀺𑀘𑀻𑀯𑀭𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸, 𑀦𑀺𑀲𑀻𑀤𑀦𑀁, 𑀧𑀘𑁆𑀘𑀢𑁆𑀣𑀭𑀡𑀁, 𑀓𑀡𑁆𑀟𑀼𑀧𑁆𑀧𑀝𑀺𑀘𑁆𑀙𑀸𑀤𑀺, 𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁, 𑀧𑀭𑀺𑀓𑁆𑀔𑀸𑀭𑀘𑁄𑀴𑀁, 𑀉𑀤𑀓𑀲𑀸𑀝𑀺𑀓𑀸, 𑀲𑀗𑁆𑀓𑀘𑁆𑀘𑀺𑀓𑀸𑀢𑀺. 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺 𑀏𑀢𑀸𑀦𑁂𑀯 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀺. 𑀕𑀡𑁆𑀞𑀺𑀓𑀸 𑀘 𑀯𑀺𑀥𑀸 𑀘 𑀲𑀼𑀢𑁆𑀢𑀫𑀬𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀔𑀼𑀤𑁆𑀤𑀓𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀧𑀣𑀯𑀺𑀬𑁄 𑀧𑀣𑀯𑀺𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀦𑀺𑀲𑁆𑀲𑀬𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑁄 𑀉𑀧𑀚𑁆𑀛𑀸𑀬𑀫𑁆𑀳𑀸 𑀧𑀜𑁆𑀘, 𑀆𑀘𑀭𑀺𑀬𑀫𑁆𑀳𑀸 𑀙; 𑀏𑀯𑀁 𑀏𑀓𑀸𑀤𑀲. 𑀅𑀯𑀦𑁆𑀤𑀺𑀬𑀧𑀼𑀕𑁆𑀕𑀮𑀸 𑀦𑀕𑁆𑀕𑁂𑀦 𑀲𑀤𑁆𑀥𑀺𑀁 𑀏𑀓𑀸𑀤𑀲, 𑀢𑁂 𑀲𑀩𑁆𑀩𑁂 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀦𑀺𑀤𑁆𑀤𑀺𑀝𑁆𑀞𑀸. 𑀏𑀓𑀸𑀤𑀲 𑀧𑀭𑀫𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀲𑀼 𑀘𑀼𑀤𑁆𑀤𑀲𑀲𑀼 𑀏𑀓𑀸𑀤𑀲𑀓𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀓𑀸𑀤𑀲 𑀯𑀭𑀸𑀦𑀻𑀢𑀺 𑀫𑀳𑀸𑀧𑀚𑀸𑀧𑀢𑀺𑀬𑀸 𑀬𑀸𑀘𑀺𑀢𑀯𑀭𑁂𑀦 𑀲𑀤𑁆𑀥𑀺𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀤𑀲. 𑀏𑀓𑀸𑀤𑀲 𑀲𑀻𑀫𑀸𑀤𑁄𑀲𑀸𑀢𑀺 ‘‘𑀅𑀢𑀺𑀔𑀼𑀤𑁆𑀤𑀓𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀫𑁆𑀫𑀯𑀕𑁆𑀕𑁂 𑀆𑀕𑀫𑀺𑀲𑁆𑀲𑀦𑁆𑀢𑀺.

𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑁂 𑀧𑀼𑀕𑁆𑀕𑀮𑁂 𑀏𑀓𑀸𑀤𑀲𑀸𑀤𑀻𑀦𑀯𑀸 𑀦𑀸𑀫 ‘‘𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀓𑁄 𑀧𑀭𑀺𑀪𑀸𑀲𑀓𑁄 𑀅𑀭𑀺𑀬𑀽𑀧𑀯𑀸𑀤𑀻, 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀲𑁄 𑀏𑀓𑀸𑀤𑀲𑀦𑁆𑀦𑀁 𑀩𑁆𑀬𑀲𑀦𑀸𑀦𑀁 𑀅𑀜𑁆𑀜𑀢𑀭𑀁 𑀩𑁆𑀬𑀲𑀦𑀁 𑀦 𑀦𑀺𑀕𑀘𑁆𑀙𑁂𑀬𑁆𑀬. 𑀓𑀢𑀫𑁂𑀲𑀁 𑀏𑀓𑀸𑀤𑀲𑀦𑁆𑀦𑀁? 𑀅𑀦𑀥𑀺𑀕𑀢𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀅𑀥𑀺𑀕𑀢𑀸 𑀧𑀭𑀺𑀳𑀸𑀬𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦 𑀯𑁄𑀤𑀸𑀬𑀦𑁆𑀢𑀺, 𑀲𑀤𑁆𑀥𑀫𑁆𑀫𑁂𑀲𑀼 𑀯𑀸 𑀅𑀥𑀺𑀫𑀸𑀦𑀺𑀓𑁄 𑀳𑁄𑀢𑀺, 𑀅𑀦𑀪𑀺𑀭𑀢𑁄 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀁 𑀯𑀸 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺, 𑀕𑀸𑀴𑁆𑀳𑀁 𑀯𑀸 𑀭𑁄𑀕𑀸𑀢𑀗𑁆𑀓𑀁 𑀨𑀼𑀲𑀢𑀺, 𑀉𑀫𑁆𑀫𑀸𑀤𑀁 𑀯𑀸 𑀧𑀸𑀧𑀼𑀡𑀸𑀢𑀺 𑀘𑀺𑀢𑁆𑀢𑀓𑁆𑀔𑁂𑀧𑀁 𑀯𑀸, 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀫𑁆𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁧𑁧.𑁬). 𑀏𑀢𑁆𑀣 𑀘 𑀲𑀤𑁆𑀥𑀫𑁆𑀫𑁄𑀢𑀺 𑀩𑀼𑀤𑁆𑀥𑀯𑀘𑀦𑀁 𑀅𑀥𑀺𑀧𑁆𑀧𑁂𑀢𑀁.

𑀆𑀲𑁂𑀯𑀺𑀢𑀸𑀬𑀸𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑁂𑀯𑀺𑀢𑀸𑀬. 𑀪𑀸𑀯𑀺𑀢𑀸𑀬𑀸𑀢𑀺 𑀦𑀺𑀧𑁆𑀨𑀸𑀤𑀺𑀢𑀸𑀬 𑀯𑀟𑁆𑀠𑀺𑀢𑀸𑀬

𑀯𑀸. 𑀩𑀳𑀼𑀮𑀻𑀓𑀢𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀬. 𑀬𑀸𑀦𑀻𑀓𑀢𑀸𑀬𑀸𑀢𑀺 𑀲𑀼𑀬𑀼𑀢𑁆𑀢𑀬𑀸𑀦𑀲𑀤𑀺𑀲𑀸𑀬 𑀓𑀢𑀸𑀬. 𑀯𑀢𑁆𑀣𑀼𑀓𑀢𑀸𑀬𑀸𑀢𑀺 𑀬𑀣𑀸 𑀧𑀢𑀺𑀝𑁆𑀞𑀸 𑀳𑁄𑀢𑀺; 𑀏𑀯𑀁 𑀓𑀢𑀸𑀬. 𑀅𑀦𑀼𑀝𑁆𑀞𑀺𑀢𑀸𑀬𑀸𑀢𑀺 𑀅𑀦𑀼 𑀅𑀦𑀼 𑀧𑀯𑀢𑁆𑀢𑀺𑀢𑀸𑀬; 𑀦𑀺𑀘𑁆𑀘𑀸𑀥𑀺𑀝𑁆𑀞𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀘𑀺𑀢𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸𑀬; 𑀲𑀩𑁆𑀩𑀤𑀺𑀲𑀸𑀲𑀼 𑀘𑀺𑀢𑀸𑀬 𑀆𑀘𑀺𑀢𑀸𑀬 𑀪𑀸𑀯𑀺𑀢𑀸𑀬 𑀅𑀪𑀺𑀯𑀟𑁆𑀠𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀼𑀲𑀫𑀸𑀭𑀤𑁆𑀥𑀸𑀬𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀬; 𑀯𑀲𑀻𑀪𑀸𑀯𑀁 𑀉𑀧𑀦𑀻𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀦𑁆𑀢𑀺 𑀧𑀸𑀧𑀓𑀫𑁂𑀯 𑀦 𑀧𑀲𑁆𑀲𑀢𑀺, 𑀪𑀤𑁆𑀭𑀓𑀁 𑀧𑀦 𑀯𑀼𑀟𑁆𑀠𑀺𑀓𑀸𑀭𑀡𑀪𑀽𑀢𑀁 𑀧𑀲𑁆𑀲𑀢𑀺. 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀻𑀢𑀺 𑀆𑀭𑀓𑁆𑀔𑀤𑁂𑀯𑀢𑀸 𑀥𑀫𑁆𑀫𑀺𑀓𑀁 𑀭𑀓𑁆𑀔𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀺. 𑀢𑀼𑀯𑀝𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻𑀢𑀺 𑀔𑀺𑀧𑁆𑀧𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀉𑀢𑁆𑀢𑀭𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀫𑁂𑀢𑁆𑀢𑀸𑀛𑀸𑀦𑀢𑁄 𑀉𑀢𑁆𑀢𑀭𑀺𑀁 𑀅𑀭𑀳𑀢𑁆𑀢𑀁 𑀅𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑁂𑀔𑁄 𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀸 𑀳𑀼𑀢𑁆𑀯𑀸 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀏𑀓𑀸𑀤𑀲𑀓𑀯𑀸𑀭𑀯𑀡𑁆𑀡𑀦𑀸 𑀧𑀭𑀺𑀬𑁄𑀲𑀸𑀦𑀸

𑀏𑀓𑀼𑀢𑁆𑀢𑀭𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.