𑁧. 𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁪𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀁. 𑀢𑀢𑁆𑀣 𑀓𑀸𑀮𑀬𑀼𑀢𑁆𑀢𑀁 𑀲𑀫𑀼𑀮𑁆𑀮𑀧𑀦𑁆𑀢𑁄𑀢𑀺 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀤𑀸 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀫𑀻𑀧𑁂𑀦 𑀕𑀘𑁆𑀙𑀢𑀺 𑀯𑀸 𑀆𑀕𑀘𑁆𑀙𑀢𑀺 𑀯𑀸 𑀢𑀤𑀸 𑀢𑀤𑀦𑀼𑀭𑀽𑀧𑀁 ‘‘𑀓𑀘𑁆𑀘𑀺 𑀦 𑀉𑀓𑁆𑀓𑀡𑁆𑀞𑀲𑀺, 𑀦 𑀓𑀺𑀮𑀫𑀲𑀺, 𑀦 𑀙𑀸𑀢𑀸𑀲𑀻’’𑀢𑀺𑀆𑀤𑀺𑀓𑀁 𑀕𑁂𑀳𑀲𑁆𑀲𑀺𑀢𑀁 𑀓𑀣𑀁 𑀓𑀣𑁂𑀦𑁆𑀢𑁄. 𑀓𑀸𑀮𑀬𑀼𑀢𑁆𑀢𑀁 𑀥𑀫𑁆𑀫𑀁 𑀪𑀡𑀦𑁆𑀢𑁄𑀢𑀺 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀤𑀸 𑀅𑀜𑁆𑀜𑁄 𑀓𑁄𑀘𑀺 𑀲𑀫𑀻𑀧𑁂𑀦 𑀕𑀘𑁆𑀙𑀢𑀺 𑀯𑀸 𑀆𑀕𑀘𑁆𑀙𑀢𑀺 𑀯𑀸 𑀢𑀤𑀸 𑀢𑀤𑀦𑀼𑀭𑀽𑀧𑀁 ‘‘𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀲𑀺, 𑀲𑀮𑀸𑀓𑀪𑀢𑁆𑀢𑀁 𑀤𑀤𑁂𑀬𑁆𑀬𑀸𑀲𑀻’’𑀢𑀺𑀆𑀤𑀺𑀓𑀁 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄.

𑀩𑀳𑀽 𑀥𑀻𑀢𑀭𑁄 𑀘 𑀧𑀼𑀢𑁆𑀢𑀸 𑀘 𑀅𑀲𑁆𑀲𑀸𑀢𑀺 𑀩𑀳𑀼𑀧𑀼𑀢𑁆𑀢𑀸. 𑀢𑀲𑁆𑀲𑀸 𑀓𑀺𑀭 𑀤𑀲 𑀧𑀼𑀢𑁆𑀢𑀸 𑀤𑀲 𑀥𑀻𑀢𑀭𑁄 𑀅𑀳𑁂𑀲𑀼𑀁, 𑀩𑀳𑀽 𑀦𑀢𑁆𑀢𑀸𑀭𑁄 𑀅𑀲𑁆𑀲𑀸𑀢𑀺 𑀩𑀳𑀼𑀦𑀢𑁆𑀢𑀸. 𑀬𑀣𑁂𑀯 𑀳𑀺 𑀢𑀲𑁆𑀲𑀸 𑀏𑀯𑀫𑀲𑁆𑀲𑀸 𑀧𑀼𑀢𑁆𑀢𑀥𑀻𑀢𑀸𑀦𑀫𑁆𑀧𑀺 𑀯𑀻𑀲𑀢𑀺 𑀯𑀻𑀲𑀢𑀺 𑀤𑀸𑀭𑀓𑀸 𑀅𑀳𑁂𑀲𑀼𑀁, 𑀇𑀢𑀺 𑀲𑀸 𑀯𑀻𑀲𑀼𑀢𑁆𑀢𑀭𑀘𑀢𑀼𑀲𑀢𑀧𑀼𑀢𑁆𑀢𑀦𑀢𑁆𑀢𑀧𑀭𑀺𑀯𑀸𑀭𑀸 𑀅𑀳𑁄𑀲𑀺. 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀸𑀢𑀺 𑀉𑀢𑁆𑀢𑀫𑀫𑀗𑁆𑀕𑀮𑀲𑀫𑁆𑀫𑀢𑀸. 𑀬𑀜𑁆𑀜𑁂𑀲𑀽𑀢𑀺 𑀤𑀸𑀦𑀧𑁆𑀧𑀤𑀸𑀦𑁂𑀲𑀼. 𑀙𑀡𑁂𑀲𑀽𑀢𑀺 𑀆𑀯𑀸𑀳𑀯𑀺𑀯𑀸𑀳𑀫𑀗𑁆𑀕𑀮𑀸𑀤𑀻𑀲𑀼 𑀅𑀦𑁆𑀢𑀭𑀼𑀲𑁆𑀲𑀯𑁂𑀲𑀼. 𑀉𑀲𑁆𑀲𑀯𑁂𑀲𑀽𑀢𑀺 𑀆𑀲𑀸𑀴𑁆𑀳𑀻𑀧𑀯𑀸𑀭𑀡𑀦𑀓𑁆𑀔𑀢𑁆𑀢𑀸𑀤𑀻𑀲𑀼 𑀫𑀳𑀼𑀲𑁆𑀲𑀯𑁂𑀲𑀼. 𑀧𑀞𑀫𑀁 𑀪𑁄𑀚𑁂𑀦𑁆𑀢𑀻𑀢𑀺 ‘‘𑀇𑀫𑁂𑀧𑀺 𑀤𑀸𑀭𑀓𑀸 𑀢𑀬𑀸 𑀲𑀫𑀸𑀦𑀸𑀬𑀼𑀓𑀸 𑀦𑀺𑀭𑁄𑀕𑀸 𑀳𑁄𑀦𑁆𑀢𑀽’’𑀢𑀺 𑀆𑀬𑀸𑀘𑀦𑁆𑀢𑀸 𑀧𑀞𑀫𑀁𑀬𑁂𑀯 𑀪𑁄𑀚𑁂𑀦𑁆𑀢𑀺, 𑀬𑁂𑀧𑀺 𑀲𑀤𑁆𑀥𑀸 𑀳𑁄𑀦𑁆𑀢𑀺 𑀧𑀲𑀦𑁆𑀦𑀸, 𑀢𑁂𑀧𑀺 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀩𑁆𑀩𑀧𑀞𑀫𑀁 𑀢𑀁𑀬𑁂𑀯 𑀪𑁄𑀚𑁂𑀦𑁆𑀢𑀺. 𑀦𑀸𑀤𑀺𑀬𑀻𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀦 𑀆𑀤𑀺𑀬𑀺, 𑀦 𑀕𑀡𑁆𑀳𑀺, 𑀦 𑀯𑀸 𑀆𑀤𑀭𑀫𑀓𑀸𑀲𑀻𑀢𑀺 𑀅𑀢𑁆𑀣𑁄.

𑁪𑁪𑁪-𑁫. 𑀅𑀮𑀁𑀓𑀫𑁆𑀫𑀦𑀺𑀬𑁂𑀢𑀺 𑀓𑀫𑁆𑀫𑀓𑁆𑀔𑀫𑀁 𑀓𑀫𑁆𑀫𑀬𑁄𑀕𑁆𑀕𑀦𑁆𑀢𑀺 𑀓𑀫𑁆𑀫𑀦𑀺𑀬𑀁, 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀓𑀫𑁆𑀫𑀦𑀺𑀬𑀪𑀸𑀯𑀸𑀬𑀸𑀢𑀺 𑀅𑀮𑀁𑀓𑀫𑁆𑀫𑀦𑀺𑀬𑀁, 𑀢𑀲𑁆𑀫𑀺𑀁 𑀅𑀮𑀁𑀓𑀫𑁆𑀫𑀦𑀺𑀬𑁂, 𑀬𑀢𑁆𑀣 𑀅𑀚𑁆𑀛𑀸𑀘𑀸𑀭𑀁 𑀓𑀭𑁄𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺, 𑀢𑀁 𑀓𑀫𑁆𑀫𑀁 𑀓𑀸𑀢𑀼𑀁 𑀢𑀸𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀲𑁆𑀲 𑀧𑀤𑀪𑀸𑀚𑀦𑁂 𑀯𑀼𑀢𑁆𑀢𑀁 𑁋 ‘‘𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼’’𑀦𑁆𑀢𑀺, 𑀬𑀢𑁆𑀣 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀲𑀓𑁆𑀓𑀸 𑀳𑁄𑀢𑀺 𑀧𑀝𑀺𑀲𑁂𑀯𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀦𑀺𑀲𑀚𑁆𑀚𑀁 𑀓𑀭𑁂𑀬𑁆𑀬, 𑀦𑀺𑀲𑀻𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀦𑀺𑀲𑀻𑀤𑀺𑀢𑁆𑀯𑀸𑀯 𑀦𑀺𑀧𑀚𑁆𑀚𑀢𑀺, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 𑀉𑀪𑀬𑀫𑁆𑀧𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀦𑀺𑀲𑀺𑀦𑁆𑀦𑁄𑀢𑀺 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. 𑀏𑀯𑀁 𑀉𑀧𑀦𑀺𑀧𑀦𑁆𑀦𑁄𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂𑀢𑀺 𑀪𑀺𑀓𑁆𑀔𑀼𑀫𑁆𑀳𑀺 𑀦𑀺𑀲𑀺𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀉𑀪𑁄 𑀯𑀸 𑀦𑀺𑀲𑀺𑀦𑁆𑀦𑀸𑀢𑀺 𑀤𑁆𑀯𑁂𑀧𑀺 𑀅𑀧𑀘𑁆𑀙𑀸 𑀅𑀧𑀼𑀭𑀺𑀫𑀁 𑀦𑀺𑀲𑀺𑀦𑁆𑀦𑀸. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 ‘‘𑀲𑁄𑀢𑀲𑁆𑀲 𑀭𑀳𑁄’’𑀢𑀺 𑀆𑀕𑀢𑀁, 𑀘𑀓𑁆𑀔𑀼𑀲𑁆𑀲 𑀭𑀳𑁂𑀦𑁂𑀯 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀘𑁂𑀧𑀺 𑀳𑀺 𑀧𑀺𑀳𑀺𑀢𑀓𑀯𑀸𑀝𑀲𑁆𑀲 𑀕𑀩𑁆𑀪𑀲𑁆𑀲 𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀳𑁄𑀢𑀺, 𑀦𑁂𑀯 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀅𑀧𑀺𑀳𑀺𑀢𑀓𑀯𑀸𑀝𑀲𑁆𑀲 𑀧𑀦 𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀦 𑀓𑁂𑀯𑀮𑀜𑁆𑀘 𑀤𑁆𑀯𑀸𑀭𑁂 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂𑀧𑀺 𑀑𑀓𑀸𑀲𑁂 𑀦𑀺𑀲𑀺𑀦𑁆𑀦𑁄, 𑀲𑀘𑁂 𑀲𑀘𑀓𑁆𑀔𑀼𑀓𑁄 𑀯𑀺𑀓𑁆𑀔𑀺𑀢𑁆𑀢𑁄𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀭𑁄𑀢𑀺. 𑀲𑀫𑀻𑀧𑁂 𑀞𑀺𑀢𑁄𑀧𑀺 𑀅𑀦𑁆𑀥𑁄 𑀦 𑀓𑀭𑁄𑀢𑀺, 𑀘𑀓𑁆𑀔𑀼𑀫𑀸𑀧𑀺 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄 𑀦 𑀓𑀭𑁄𑀢𑀺. 𑀇𑀢𑁆𑀣𑀻𑀦𑀁 𑀧𑀦 𑀲𑀢𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺𑀬𑁂𑀯.

𑀲𑀤𑁆𑀥𑁂𑀬𑁆𑀬𑀯𑀘𑀲𑀸𑀢𑀺 𑀲𑀤𑁆𑀥𑀸𑀢𑀩𑁆𑀩𑀯𑀘𑀦𑀸. 𑀲𑀸 𑀧𑀦 𑀬𑀲𑁆𑀫𑀸 𑀅𑀭𑀺𑀬𑀲𑀸𑀯𑀺𑀓𑀸𑀯 𑀳𑁄𑀢𑀺, 𑀢𑁂𑀦𑀲𑁆𑀲 𑀧𑀤𑀪𑀸𑀚𑀦𑁂 ‘‘𑀆𑀕𑀢𑀨𑀮𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀕𑀢𑀁 𑀨𑀮𑀁 𑀅𑀲𑁆𑀲𑀸𑀢𑀺 𑀆𑀕𑀢𑀨𑀮𑀸 𑀧𑀝𑀺𑀮𑀤𑁆𑀥𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀫𑁂𑀢𑀸𑀯𑀺𑀦𑀻𑀢𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀸. 𑀯𑀺𑀜𑁆𑀜𑀸𑀢𑀁 𑀲𑀺𑀓𑁆𑀔𑀢𑁆𑀢𑀬𑀲𑀸𑀲𑀦𑀁 𑀏𑀢𑀸𑀬𑀸𑀢𑀺 𑀯𑀺𑀜𑁆𑀜𑀸𑀢𑀲𑀸𑀲𑀦𑀸. 𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄𑀢𑀺 𑀓𑀺𑀜𑁆𑀘𑀸𑀧𑀺 𑀏𑀯𑀭𑀽𑀧𑀸 𑀉𑀧𑀸𑀲𑀺𑀓𑀸 𑀤𑀺𑀲𑁆𑀯𑀸 𑀯𑀤𑀢𑀺, 𑀅𑀣 𑀔𑁄 𑀪𑀺𑀓𑁆𑀔𑀼 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀫𑀸𑀦𑁄𑀬𑁂𑀯 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄, 𑀦 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄𑀢𑀺 𑀅𑀢𑁆𑀣𑁄.

𑀬𑁂𑀦 𑀯𑀸 𑀲𑀸 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄𑀢𑀺 𑀦𑀺𑀲𑀚𑁆𑀚𑀸𑀤𑀻𑀲𑀼 𑀆𑀓𑀸𑀭𑁂𑀲𑀼 𑀬𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀤𑁆𑀥𑀺𑀁 𑀫𑁂𑀣𑀼𑀦𑀥𑀫𑁆𑀫𑀸𑀤𑀻𑀦𑀺 𑀆𑀭𑁄𑀧𑁂𑀢𑁆𑀯𑀸 𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬, 𑀧𑀝𑀺𑀚𑀸𑀦𑀫𑀸𑀦𑁄𑀯 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄. 𑀏𑀯𑀭𑀽𑀧𑀸𑀬𑀧𑀺 𑀉𑀧𑀸𑀲𑀺𑀓𑀸𑀬 𑀯𑀘𑀦𑀫𑀢𑁆𑀢𑁂𑀦 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀤𑀺𑀝𑁆𑀞𑀁 𑀦𑀸𑀫 𑀢𑀣𑀸𑀧𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀧𑀺 𑀳𑁄𑀢𑀺.

𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀜𑁆𑀘 𑀇𑀤𑀁 𑀯𑀢𑁆𑀣𑀼𑀁 𑀉𑀤𑀸𑀳𑀭𑀦𑁆𑀢𑀺 𑁋 𑀫𑀮𑁆𑀮𑀸𑀭𑀸𑀫𑀯𑀺𑀳𑀸𑀭𑁂 𑀓𑀺𑀭 𑀏𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀏𑀓𑀤𑀺𑀯𑀲𑀁 𑀉𑀧𑀝𑁆𑀞𑀸𑀓𑀓𑀼𑀮𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑁂 𑀦𑀺𑀲𑀻𑀤𑀺, 𑀉𑀧𑀸𑀲𑀺𑀓𑀸𑀧𑀺 𑀲𑀬𑀦𑀧𑀮𑁆𑀮𑀗𑁆𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 𑀳𑁄𑀢𑀺. 𑀅𑀣𑁂𑀓𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀤𑁆𑀯𑀸𑀭𑁂 𑀞𑀺𑀢𑁄 𑀤𑀺𑀲𑁆𑀯𑀸 ‘‘𑀣𑁂𑀭𑁄 𑀉𑀧𑀸𑀲𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑁄’’𑀢𑀺 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑁂𑀲𑀺. 𑀣𑁂𑀭𑁄𑀧𑀺 ‘‘𑀅𑀬𑀁 𑀫𑀬𑀺 𑀅𑀲𑀼𑀤𑁆𑀥𑀮𑀤𑁆𑀥𑀺𑀓𑁄 𑀚𑀸𑀢𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀯 𑀦𑀺𑀲𑀻𑀤𑀺. 𑀲𑁄𑀧𑀺 𑀪𑀺𑀓𑁆𑀔𑀼 ‘‘𑀣𑁂𑀭𑀁 𑀘𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺. 𑀣𑁂𑀭𑁄 𑀢𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀁 𑀦𑀺𑀲𑁆𑀲𑀸𑀬 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀲𑁄𑀧𑀺 𑀪𑀺𑀓𑁆𑀔𑀼 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀜𑁆𑀘 𑀳𑁂𑀝𑁆𑀞𑀸𑀫𑀜𑁆𑀘𑀜𑁆𑀘 𑀑𑀮𑁄𑀓𑁂𑀢𑁆𑀯𑀸 𑀣𑁂𑀭𑀁 𑀅𑀧𑀲𑁆𑀲𑀦𑁆𑀢𑁄 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀲𑀺, 𑀅𑀣 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑀁 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀪𑀦𑁆𑀢𑁂, 𑀏𑀯𑀁 𑀫𑀳𑀺𑀤𑁆𑀥𑀺𑀓𑀸 𑀦𑀸𑀫 𑀢𑀼𑀫𑁆𑀳𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀪𑀸𑀯𑀁 𑀯𑀤𑀸𑀧𑁂𑀣 𑀏𑀯𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀅𑀦𑁆𑀢𑀭𑀖𑀭𑀲𑁆𑀲𑁂𑀯𑁂𑀲𑁄 𑀆𑀯𑀼𑀲𑁄 𑀤𑁄𑀲𑁄, 𑀅𑀳𑀁 𑀧𑀦 𑀢𑀁 𑀲𑀤𑁆𑀥𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀫𑀓𑀸𑀲𑀺𑀁, 𑀭𑀓𑁆𑀔𑁂𑀬𑁆𑀬𑀸𑀲𑀺 𑀫’’𑀦𑁆𑀢𑀺 𑀯𑀢𑁆𑀯𑀸 𑀑𑀢𑀭𑀻𑀢𑀺.

𑁪𑁪𑁬. 𑀇𑀢𑁄 𑀧𑀭𑀁 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬𑀸𑀢𑀺𑀆𑀤𑀺 𑀲𑀩𑁆𑀩𑀁 𑀧𑀝𑀺𑀜𑁆𑀜𑀸𑀬 𑀓𑀸𑀭𑀡𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄𑀢𑀺 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀓𑀸𑀭𑁂𑀢𑁆𑀯𑀸 𑀦𑀺𑀲𑀚𑁆𑀚𑀸𑀫𑀢𑁆𑀢𑁂𑀦 𑀬𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀢𑀸𑀬 𑀓𑀸𑀭𑁂𑀢𑀩𑁆𑀩𑁄, 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑀬𑁂𑀦 𑀲𑀩𑁆𑀩𑀘𑀢𑀼𑀓𑁆𑀓𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁫𑁧. 𑀲𑀺𑀓𑁆𑀔𑀸𑀧𑀤𑀧𑀭𑀺𑀬𑁄𑀲𑀸𑀦𑁂 𑀧𑀦 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁂𑀲𑀼 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀻𑀢𑀺𑀆𑀤𑀻𑀲𑀼 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 ‘‘𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑀢𑁆𑀣𑀁 𑀕𑀢𑁄𑀫𑁆𑀳𑀻’’𑀢𑀺 𑀏𑀯𑀁 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀦𑁆𑀢𑀺 𑀦𑀺𑀲𑀚𑁆𑀚𑀲𑁆𑀲𑀸𑀤𑁂𑀦𑁂𑀯 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺. 𑀆𑀧𑀢𑁆𑀢𑀺𑀦𑁆𑀢𑀺 𑀢𑀻𑀲𑀼 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁. 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄𑀢𑀺 𑀢𑀻𑀲𑀼 𑀬𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀓𑁆𑀓𑁂 𑀉𑀢𑁆𑀢𑀸𑀦𑀸𑀥𑀺𑀧𑁆𑀧𑀸𑀬𑀫𑁂𑀯. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀧𑀦 𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀻𑀢𑀺 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑀯𑀲𑁂𑀦 𑀦 𑀧𑀝𑀺𑀚𑀸𑀦𑀸𑀢𑀺, ‘‘𑀲𑀮𑀸𑀓𑀪𑀢𑁆𑀢𑀸𑀤𑀺𑀦𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀕𑀢𑁄𑀫𑁆𑀳𑀺, 𑀲𑀸 𑀧𑀦 𑀫𑀬𑁆𑀳𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀆𑀕𑀢𑀸’’𑀢𑀺 𑀯𑀤𑀢𑀺. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀉𑀢𑁆𑀢𑀸𑀦𑀸𑀥𑀺𑀧𑁆𑀧𑀸𑀬𑀫𑁂𑀯.

𑀅𑀬𑀁 𑀧𑀦 𑀲𑀩𑁆𑀩𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀭𑀳𑁄 𑀦𑀺𑀲𑀚𑁆𑀚𑀲𑁆𑀲𑀸𑀤𑁄𑀢𑀺 𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑁄 𑀯𑀼𑀘𑁆𑀘𑀢𑀺. 𑀬𑁄 𑀪𑀺𑀓𑁆𑀔𑀼 𑀢𑁂𑀦𑀲𑁆𑀲𑀸𑀤𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀅𑀓𑁆𑀔𑀺𑀁 𑀅𑀜𑁆𑀚𑁂𑀢𑀺, 𑀤𑀼𑀓𑁆𑀓𑀝𑀁. 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑀺, 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀢𑀺, 𑀘𑀻𑀯𑀭𑀁 𑀧𑀸𑀭𑀼𑀧𑀢𑀺, 𑀲𑀩𑁆𑀩𑀢𑁆𑀣 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀫𑀸𑀢𑀼𑀕𑀸𑀫𑁂 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀫𑀢𑁆𑀢𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀘𑁂 𑀲𑀸 𑀇𑀢𑁆𑀣𑀻 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀢𑀺, 𑀦𑀺𑀲𑀚𑁆𑀚𑀸𑀬 𑀦𑀺𑀲𑀚𑁆𑀚𑀸𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀬𑀁 𑀲𑀦𑁆𑀥𑀸𑀬 𑀕𑀢𑁄, 𑀲𑀸 𑀦 𑀤𑀺𑀝𑁆𑀞𑀸, 𑀅𑀜𑁆𑀜𑀸 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀅𑀲𑁆𑀲𑀸𑀤𑁂 𑀉𑀧𑁆𑀧𑀦𑁆𑀦𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀲𑀫𑁆𑀩𑀳𑀼𑀮𑀸 𑀆𑀕𑀘𑁆𑀙𑀦𑁆𑀢𑀺, 𑀫𑀸𑀢𑀼𑀕𑀸𑀫𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀲𑀘𑁂 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀻𑀤𑀦𑁆𑀢𑀺, 𑀦𑀺𑀲𑀚𑁆𑀚𑀸𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀅𑀦𑀺𑀬𑀫𑁂𑀢𑁆𑀯𑀸 𑀤𑀺𑀝𑁆𑀞𑀤𑀺𑀝𑁆𑀞𑀸𑀬 𑀲𑀤𑁆𑀥𑀺𑀁 𑀭𑀳𑀲𑁆𑀲𑀸𑀤𑀁 𑀓𑀧𑁆𑀧𑁂𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀆𑀕𑀢𑀸𑀕𑀢𑀸𑀦𑀁 𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀚𑁆𑀚𑀸𑀯𑀲𑁂𑀦 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀧𑀢𑁆𑀢𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁂 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬 𑀇𑀢𑁆𑀣𑀺𑀬𑀸 𑀭𑀳𑀲𑁆𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀺 𑀅𑀦𑀸𑀧𑀢𑁆𑀢𑀺.

𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀸𑀦𑁂𑀯𑀸𑀢𑀺.

𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.