𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁

𑀤𑀼𑀢𑀺𑀬𑀁 𑀅𑀤𑀼𑀢𑀺𑀬𑁂𑀦, 𑀬𑀁 𑀚𑀺𑀦𑁂𑀦 𑀧𑀓𑀸𑀲𑀺𑀢𑀁;

𑀧𑀸𑀭𑀸𑀚𑀺𑀓𑀁 𑀢𑀲𑁆𑀲 𑀤𑀸𑀦𑀺, 𑀧𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄.

𑀬𑀲𑁆𑀫𑀸 𑀢𑀲𑁆𑀫𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀬𑀁 𑀧𑀼𑀩𑁆𑀩𑁂 𑀘 𑀧𑀓𑀸𑀲𑀺𑀢𑀁;

𑀢𑀁 𑀲𑀩𑁆𑀩𑀁 𑀯𑀚𑁆𑀚𑀬𑀺𑀢𑁆𑀯𑀸𑀦, 𑀳𑁄𑀢𑀺 𑀲𑀁𑀯𑀡𑁆𑀡𑀦𑀸 𑀅𑀬𑀁.

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸

𑁮𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂𑀢𑀺 𑀢𑀢𑁆𑀣 𑀭𑀸𑀚𑀕𑀳𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂, 𑀢𑀜𑁆𑀳𑀺 𑀫𑀦𑁆𑀥𑀸𑀢𑀼-𑀫𑀳𑀸𑀕𑁄𑀯𑀺𑀦𑁆𑀤𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 ‘‘𑀭𑀸𑀚𑀕𑀳’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂 𑀯𑀡𑁆𑀡𑀬𑀦𑁆𑀢𑀺. 𑀓𑀺𑀁 𑀢𑁂𑀳𑀺! 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲. 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂 𑀘 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀺. 𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀺 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢𑀁, 𑀢𑁂𑀲𑀁 𑀯𑀲𑀦𑁆𑀢𑀯𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀕𑁄𑀘𑀭𑀕𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀲𑀦𑀝𑁆𑀞𑀸𑀦𑀫𑀸𑀳 𑁋 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂𑀢𑀺. 𑀲𑁄 𑀘 𑀕𑀺𑀚𑁆𑀛𑀸 𑀢𑀲𑁆𑀲 𑀓𑀽𑀝𑁂𑀲𑀼 𑀯𑀲𑀺𑀁𑀲𑀼, 𑀕𑀺𑀚𑁆𑀛𑀲𑀤𑀺𑀲𑀸𑀦𑀺 𑀯𑀸 𑀢𑀲𑁆𑀲 𑀓𑀽𑀝𑀸𑀦𑀺; 𑀢𑀲𑁆𑀫𑀸 𑀕𑀺𑀚𑁆𑀛𑀓𑀽𑀝𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀫𑁆𑀩𑀳𑀼𑀮𑀸𑀢𑀺 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀬𑁄 𑀚𑀦𑀸 𑀲𑀫𑁆𑀩𑀳𑀼𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀧𑀭𑀁 𑀲𑀗𑁆𑀖𑁄. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀬𑁄 𑀢𑀬𑁄 𑀏𑀯, 𑀢𑀢𑁄 𑀧𑀝𑁆𑀞𑀸𑀬 𑀲𑀫𑁆𑀩𑀳𑀼𑀮𑀸. 𑀇𑀥 𑀧𑀦 𑀢𑁂 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀫𑁆𑀩𑀳𑀼𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀤𑀺𑀝𑁆𑀞𑀸𑀢𑀺 𑀦𑀸𑀢𑀺𑀯𑀺𑀲𑁆𑀲𑀸𑀲𑀺𑀓𑀸 𑀦 𑀤𑀴𑁆𑀳𑀫𑀺𑀢𑁆𑀢𑀸; 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀕𑀫𑁆𑀫 𑀤𑀺𑀝𑁆𑀞𑀢𑁆𑀢𑀸 𑀳𑀺 𑀢𑁂 𑀲𑀦𑁆𑀤𑀺𑀝𑁆𑀞𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀫𑁆𑀪𑀢𑁆𑀢𑀸𑀢𑀺 𑀅𑀢𑀺𑀯𑀺𑀲𑁆𑀲𑀸𑀲𑀺𑀓𑀸 𑀤𑀴𑁆𑀳𑀫𑀺𑀢𑁆𑀢𑀸; 𑀢𑁂 𑀳𑀺 𑀲𑀼𑀝𑁆𑀞𑀼 𑀪𑀢𑁆𑀢𑀸 𑀪𑀚𑀫𑀸𑀦𑀸 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸𑀢𑀺 𑀓𑀢𑁆𑀯𑀸 ‘‘𑀲𑀫𑁆𑀪𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀲𑀺𑀕𑀺𑀮𑀺𑀧𑀲𑁆𑀲𑁂𑀢𑀺 𑀇𑀲𑀺𑀕𑀺𑀮𑀺 𑀦𑀸𑀫 𑀧𑀩𑁆𑀩𑀢𑁄, 𑀢𑀲𑁆𑀲 𑀧𑀲𑁆𑀲𑁂. 𑀧𑀼𑀩𑁆𑀩𑁂 𑀓𑀺𑀭 𑀧𑀜𑁆𑀘𑀲𑀢𑀫𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀓𑀸𑀲𑀺𑀓𑁄𑀲𑀮𑀸𑀤𑀻𑀲𑀼 𑀚𑀦𑀧𑀤𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀢𑁂 𑀧𑀯𑀺𑀲𑀦𑁆𑀢𑁂𑀯 𑀧𑀲𑁆𑀲𑀦𑁆𑀢𑀺 𑀦 𑀦𑀺𑀓𑁆𑀔𑀫𑀦𑁆𑀢𑁂. 𑀢𑀢𑁄 𑀆𑀳𑀁𑀲𑀼 𑁋 ‘‘𑀅𑀬𑀁 𑀧𑀩𑁆𑀩𑀢𑁄 𑀇𑀫𑁂 𑀇𑀲𑀬𑁄 𑀕𑀺𑀮𑀢𑀻’’𑀢𑀺. 𑀢𑀤𑀼𑀧𑀸𑀤𑀸𑀬 𑀢𑀲𑁆𑀲 ‘‘𑀇𑀲𑀺𑀕𑀺𑀮𑀺’’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺, 𑀢𑀲𑁆𑀲 𑀧𑀲𑁆𑀲𑁂 𑀧𑀩𑁆𑀩𑀢𑀧𑀸𑀤𑁂.

𑀢𑀺𑀡𑀓𑀼𑀝𑀺𑀬𑁄 𑀓𑀭𑀺𑀢𑁆𑀯𑀸𑀢𑀺 𑀢𑀺𑀡𑀘𑁆𑀙𑀤𑀦𑀸 𑀲𑀤𑁆𑀯𑀸𑀭𑀩𑀦𑁆𑀥𑀸 𑀓𑀼𑀝𑀺𑀬𑁄 𑀓𑀢𑁆𑀯𑀸. 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀳𑀺 𑀦𑀸𑀮𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦𑀸𑀧𑀺 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀙𑀦𑁆𑀦𑁂𑀬𑁂𑀯 𑀲𑀤𑁆𑀯𑀸𑀭𑀩𑀦𑁆𑀥𑁂 𑀲𑁂𑀦𑀸𑀲𑀦𑁂 𑀉𑀧𑀕𑀦𑁆𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁪). 𑀢𑀲𑁆𑀫𑀸 𑀯𑀲𑁆𑀲𑀓𑀸𑀮𑁂 𑀲𑀘𑁂 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀮𑀪𑀢𑀺, 𑀳𑀢𑁆𑀣𑀓𑀫𑁆𑀫𑀁 𑀧𑀭𑀺𑀬𑁂𑀲𑀺𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁. 𑀳𑀢𑁆𑀣𑀓𑀫𑁆𑀫𑀁 𑀅𑀮𑀪𑀦𑁆𑀢𑁂𑀦 𑀲𑀸𑀫𑀫𑁆𑀧𑀺 𑀓𑀸𑀢𑀩𑁆𑀩𑀁. 𑀦 𑀢𑁆𑀯𑁂𑀯 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀅𑀬𑀫𑀦𑀼𑀥𑀫𑁆𑀫𑀢𑀸. 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀢𑀺𑀡𑀓𑀼𑀝𑀺𑀬𑁄 𑀓𑀭𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀺𑀓𑀯𑀢𑁆𑀢𑀸𑀦𑀺 𑀘 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀘 𑀅𑀥𑀺𑀝𑁆𑀞𑀸𑀬 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀫𑀸𑀦𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼.

𑀆𑀬𑀲𑁆𑀫𑀸𑀧𑀺 𑀥𑀦𑀺𑀬𑁄𑀢𑀺 𑀦 𑀓𑁂𑀯𑀮𑀁 𑀢𑁂 𑀣𑁂𑀭𑀸𑀯 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄𑀧𑀺. 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄𑀢𑀺 𑀓𑀼𑀫𑁆𑀪𑀓𑀸𑀭𑀲𑁆𑀲 𑀧𑀼𑀢𑁆𑀢𑁄; 𑀢𑀲𑁆𑀲 𑀳𑀺 𑀦𑀸𑀫𑀁 𑀥𑀦𑀺𑀬𑁄, 𑀧𑀺𑀢𑀸 𑀓𑀼𑀫𑁆𑀪𑀓𑀸𑀭𑁄, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀥𑀦𑀺𑀬𑁄 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄’’𑀢𑀺. 𑀯𑀲𑁆𑀲𑀁 𑀉𑀧𑀕𑀘𑁆𑀙𑀻𑀢𑀺 𑀢𑁂𑀳𑀺 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂𑀬𑁂𑀯 𑀢𑀺𑀡𑀓𑀼𑀝𑀺𑀓𑀁 𑀓𑀭𑀺𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺. 𑀯𑀲𑁆𑀲𑀁𑀯𑀼𑀢𑁆𑀣𑀸𑀢𑀺 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 ‘‘𑀯𑀼𑀢𑁆𑀣𑀯𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀯𑀲𑁆𑀲𑀁𑀯𑀼𑀢𑁆𑀣𑀸 𑀳𑀼𑀢𑁆𑀯𑀸.

𑀢𑀺𑀡𑀓𑀼𑀝𑀺𑀬𑁄 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀦 𑀤𑀡𑁆𑀟𑀫𑀼𑀕𑁆𑀕𑀭𑀸𑀤𑀻𑀳𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀢𑁆𑀯𑀸, 𑀯𑀢𑁆𑀢𑀲𑀻𑀲𑁂𑀦 𑀧𑀦 𑀢𑀺𑀡𑀜𑁆𑀘 𑀤𑀸𑀭𑀼𑀯𑀮𑁆𑀮𑀺-𑀆𑀤𑀻𑀦𑀺 𑀘 𑀑𑀭𑁄𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀳𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀓𑀼𑀝𑀺 𑀓𑀢𑀸 𑀳𑁄𑀢𑀺, 𑀢𑁂𑀦 𑀲𑀘𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀢𑁂 𑀆𑀧𑀼𑀘𑁆𑀙𑀺𑀢𑀩𑁆𑀩𑀸. ‘‘𑀲𑀘𑁂 𑀇𑀫𑀁 𑀓𑀼𑀝𑀺𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀓𑁄𑀘𑀺 𑀯𑀲𑀺𑀢𑀼𑀁 𑀉𑀲𑁆𑀲𑀳𑀢𑀺, 𑀢𑀲𑁆𑀲 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀬𑁂𑀦 𑀅𑀭𑀜𑁆𑀜𑁂 𑀯𑀸 𑀓𑀢𑀸 𑀳𑁄𑀢𑀺, 𑀧𑀝𑀺𑀚𑀕𑁆𑀕𑀦𑀓𑀁 𑀯𑀸 𑀦 𑀮𑀪𑀢𑀺, 𑀢𑁂𑀦 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀧𑀭𑀺𑀪𑁄𑀕𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀢𑁂 𑀧𑀦 𑀪𑀺𑀓𑁆𑀔𑀽 𑀅𑀭𑀜𑁆𑀜𑁂 𑀓𑀼𑀝𑀺𑀬𑁄 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑀓𑀁 𑀅𑀮𑀪𑀦𑁆𑀢𑀸 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀧𑀝𑀺𑀲𑀸𑀫𑁂𑀢𑁆𑀯𑀸 𑀲𑀗𑁆𑀕𑁄𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀞𑀧𑀺𑀢𑀁 𑀢𑀁 𑀉𑀧𑀘𑀺𑀓𑀸𑀳𑀺 𑀦 𑀔𑀚𑁆𑀚𑀢𑀺, 𑀅𑀦𑁄𑀯𑀲𑁆𑀲𑀓𑀜𑁆𑀘 𑀳𑁄𑀢𑀺, 𑀢𑀣𑀸 𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀲𑀺𑀢𑀼𑀓𑀸𑀫𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀧𑀓𑀸𑀭𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀫𑀺𑀬𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸.

𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀽𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀘𑀺𑀢𑁆𑀢𑀸𑀦𑀼𑀓𑀽𑀮𑀁 𑀚𑀦𑀧𑀤𑀁 𑀅𑀕𑀫𑀁𑀲𑀼. 𑀆𑀬𑀲𑁆𑀫𑀸 𑀧𑀦 𑀥𑀦𑀺𑀬𑁄 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑁄 𑀢𑀢𑁆𑀣𑁂𑀯 𑀯𑀲𑁆𑀲𑀁 𑀯𑀲𑀻𑀢𑀺𑀆𑀤𑀺 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑀸𑀯𑀢𑀢𑀺𑀬𑀓𑀦𑁆𑀢𑀺 𑀬𑀸𑀯𑀢𑀢𑀺𑀬𑀯𑀸𑀭𑀁. 𑀅𑀦𑀯𑀬𑁄𑀢𑀺 𑀅𑀦𑀼𑀅𑀯𑀬𑁄, 𑀲𑀦𑁆𑀥𑀺𑀯𑀲𑁂𑀦 𑀉𑀓𑀸𑀭𑀮𑁄𑀧𑁄. 𑀅𑀦𑀼 𑀅𑀦𑀼 𑀅𑀯𑀬𑁄, 𑀬𑀁 𑀬𑀁 𑀓𑀼𑀫𑁆𑀪𑀓𑀸𑀭𑁂𑀳𑀺 𑀓𑀢𑁆𑀢𑀩𑁆𑀩𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀅𑀦𑀽𑀦𑁄 𑀧𑀭𑀺𑀧𑀼𑀡𑁆𑀡𑀲𑀺𑀧𑁆𑀧𑁄𑀢𑀺 𑀅𑀢𑁆𑀣𑁄. 𑀲𑀓𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂. 𑀆𑀘𑀭𑀺𑀬𑀓𑁂𑀢𑀺 𑀆𑀘𑀭𑀺𑀬𑀓𑀫𑁆𑀫𑁂. 𑀓𑀼𑀫𑁆𑀪𑀓𑀸𑀭𑀓𑀫𑁆𑀫𑁂𑀢𑀺 𑀓𑀼𑀫𑁆𑀪𑀓𑀸𑀭𑀸𑀦𑀁 𑀓𑀫𑁆𑀫𑁂; 𑀓𑀼𑀫𑁆𑀪𑀓𑀸𑀭𑁂𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑁂𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀓𑀁 𑀆𑀘𑀭𑀺𑀬𑀓𑀁 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀧𑀭𑀺𑀬𑁄𑀤𑀸𑀢𑀲𑀺𑀧𑁆𑀧𑁄𑀢𑀺 𑀧𑀭𑀺𑀲𑀼𑀤𑁆𑀥𑀲𑀺𑀧𑁆𑀧𑁄. 𑀅𑀦𑀯𑀬𑀢𑁆𑀢𑁂𑀧𑀺 𑀲𑀢𑀺 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀲𑀺𑀧𑁆𑀧𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀦𑁆𑀢𑀺 𑀧𑀺𑀝𑁆𑀞𑀲𑀗𑁆𑀖𑀸𑀝𑀓𑀓𑀯𑀸𑀝𑀲𑀽𑀘𑀺𑀖𑀝𑀺𑀓𑀯𑀸𑀢𑀧𑀸𑀦𑀓𑀯𑀸𑀝𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀪𑀺𑀢𑁆𑀢𑀺𑀙𑀤𑀦𑀺𑀝𑁆𑀞𑀓𑀣𑀫𑁆𑀪𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀕𑁂𑀳𑀲𑀫𑁆𑀪𑀸𑀭𑀁 𑀫𑀢𑁆𑀢𑀺𑀓𑀸𑀫𑀬𑀫𑁂𑀯 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀕𑁄𑀫𑀬𑀜𑁆𑀘 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀢𑀁 𑀓𑀼𑀝𑀺𑀓𑀁 𑀧𑀘𑀻𑀢𑀺 𑀢𑀁 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀢𑁆𑀯𑀸 𑀧𑀸𑀡𑀺𑀓𑀸𑀬 𑀖𑀁𑀲𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀢𑁂𑀮𑀢𑀫𑁆𑀩𑀫𑀢𑁆𑀢𑀺𑀓𑀸𑀬 𑀧𑀭𑀺𑀫𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀢𑀺𑀡𑀸𑀤𑀻𑀳𑀺 𑀧𑀽𑀭𑁂𑀢𑁆𑀯𑀸 𑀬𑀣𑀸 𑀧𑀓𑁆𑀓𑀸 𑀲𑀼𑀧𑀓𑁆𑀓𑀸 𑀳𑁄𑀢𑀺, 𑀏𑀯𑀁 𑀧𑀘𑀺. 𑀏𑀯𑀁 𑀧𑀓𑁆𑀓𑀸 𑀘 𑀧𑀦 𑀲𑀸 𑀅𑀳𑁄𑀲𑀺 𑀓𑀼𑀝𑀺𑀓𑀸. 𑀅𑀪𑀺𑀭𑀽𑀧𑀸𑀢𑀺 𑀲𑀼𑀭𑀽𑀧𑀸. 𑀧𑀸𑀲𑀸𑀤𑀺𑀓𑀸𑀢𑀺 𑀧𑀲𑀸𑀤𑀚𑀦𑀺𑀓𑀸. 𑀮𑁄𑀳𑀺𑀢𑀺𑀓𑀸𑀢𑀺 𑀮𑁄𑀳𑀺𑀢𑀯𑀡𑁆𑀡𑀸. 𑀓𑀺𑀗𑁆𑀓𑀡𑀺𑀓𑀲𑀤𑁆𑀤𑁄𑀢𑀺 𑀓𑀺𑀗𑁆𑀓𑀡𑀺𑀓𑀚𑀸𑀮𑀲𑁆𑀲 𑀲𑀤𑁆𑀤𑁄. 𑀬𑀣𑀸 𑀓𑀺𑀭 𑀦𑀸𑀦𑀸𑀭𑀢𑀦𑁂𑀳𑀺 𑀓𑀢𑀲𑁆𑀲 𑀓𑀺𑀗𑁆𑀓𑀡𑀺𑀓𑀚𑀸𑀮𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺, 𑀏𑀯𑀁 𑀢𑀲𑁆𑀲𑀸 𑀓𑀼𑀝𑀺𑀓𑀸𑀬 𑀯𑀸𑀢𑀧𑀸𑀦𑀦𑁆𑀢𑀭𑀺𑀓𑀸𑀤𑀻𑀳𑀺 𑀧𑀯𑀺𑀝𑁆𑀞𑁂𑀦 𑀯𑀸𑀢𑁂𑀦 𑀲𑀫𑀸𑀳𑀢𑀸𑀬 𑀲𑀤𑁆𑀤𑁄 𑀅𑀳𑁄𑀲𑀺. 𑀏𑀢𑁂𑀦𑀲𑁆𑀲𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀼𑀧𑀓𑁆𑀓𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀓𑀺𑀗𑁆𑀓𑀡𑀺𑀓𑀸’’𑀢𑀺 𑀓𑀁𑀲𑀪𑀸𑀚𑀦𑀁, 𑀢𑀲𑁆𑀫𑀸 𑀬𑀣𑀸 𑀅𑀪𑀺𑀳𑀢𑀲𑁆𑀲 𑀓𑀁𑀲𑀪𑀸𑀚𑀦𑀲𑁆𑀲 𑀲𑀤𑁆𑀤𑁄, 𑀏𑀯𑀫𑀲𑁆𑀲𑀸 𑀯𑀸𑀢𑀧𑁆𑀧𑀳𑀢𑀸𑀬 𑀲𑀤𑁆𑀤𑁄 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁.

𑁮𑁫. 𑀓𑀺𑀁 𑀏𑀢𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀚𑀸𑀦𑀦𑁆𑀢𑁄𑀯 𑀪𑀕𑀯𑀸 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀦𑁆𑀢𑀺 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸𑀬 𑀓𑀼𑀝𑀺𑀓𑀸𑀬 𑀓𑀭𑀡𑀪𑀸𑀯𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀓𑀣𑀜𑁆𑀳𑀺 𑀦𑀸𑀫 𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀓𑀼𑀝𑀺𑀓𑀁 𑀓𑀭𑀺𑀲𑁆𑀲𑀢𑀻𑀢𑀺 𑀇𑀤𑀁 𑀅𑀢𑀻𑀢𑀢𑁆𑀣𑁂 𑀅𑀦𑀸𑀕𑀢𑀯𑀘𑀦𑀁; 𑀅𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀦 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀧𑀸𑀡𑁂𑀲𑀼 𑀅𑀦𑀼𑀤𑁆𑀤𑀬𑀸 𑀅𑀦𑀼𑀓𑀫𑁆𑀧𑀸 𑀅𑀯𑀺𑀳𑁂𑀲𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀦𑀼𑀤𑁆𑀤𑀬𑀸𑀢𑀺 𑀅𑀦𑀼𑀭𑀓𑁆𑀔𑀡𑀸; 𑀏𑀢𑁂𑀦 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀅𑀦𑀼𑀓𑀫𑁆𑀧𑀸𑀢𑀺 𑀧𑀭𑀤𑀼𑀓𑁆𑀔𑁂𑀦 𑀘𑀺𑀢𑁆𑀢𑀓𑀫𑁆𑀧𑀦𑀸. 𑀅𑀯𑀺𑀳𑁂𑀲𑀸𑀢𑀺 𑀅𑀯𑀺𑀳𑀺𑀁𑀲𑀦𑀸; 𑀏𑀢𑁂𑀳𑀺 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲 𑀧𑀣𑀯𑀻𑀔𑀡𑀦𑀘𑀺𑀓𑁆𑀔𑀮𑁆𑀮𑀫𑀤𑁆𑀤𑀦𑀅𑀕𑁆𑀕𑀺𑀤𑀸𑀦𑁂𑀲𑀼 𑀩𑀳𑀽 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑁂 𑀧𑀸𑀡𑁂 𑀩𑁆𑀬𑀸𑀩𑀸𑀥𑁂𑀦𑁆𑀢𑀲𑁆𑀲 𑀯𑀺𑀦𑀸𑀲𑁂𑀦𑁆𑀢𑀲𑁆𑀲 𑀢𑁂𑀲𑀼 𑀧𑀸𑀡𑁂𑀲𑀼 𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁 𑀧𑀼𑀩𑁆𑀩𑀪𑀸𑀕𑀫𑀢𑁆𑀢𑀸𑀧𑀺 𑀅𑀦𑀼𑀤𑁆𑀤𑀬𑀸 𑀅𑀦𑀼𑀓𑀫𑁆𑀧𑀸 𑀅𑀯𑀺𑀳𑁂𑀲𑀸 𑀦 𑀳𑀺 𑀦𑀸𑀫 𑀪𑀯𑀺𑀲𑁆𑀲𑀢𑀺 𑀅𑀧𑁆𑀧𑀫𑀢𑁆𑀢𑀓𑀸𑀧𑀺 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀫𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀻𑀢𑀺 𑀧𑀘𑁆𑀙𑀺𑀫𑁄 𑀚𑀦𑀲𑀫𑀽𑀳𑁄 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀪𑀸𑀯𑀁 𑀫𑀸 𑀆𑀧𑀚𑁆𑀚𑀺. ‘‘𑀩𑀼𑀤𑁆𑀥𑀓𑀸𑀮𑁂𑀧𑀺 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀓𑀢𑀁, 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑀸𑀦𑀁 𑀦𑀢𑁆𑀣𑀺 𑀤𑁄𑀲𑁄’’𑀢𑀺 𑀫𑀜𑁆𑀜𑀺𑀢𑁆𑀯𑀸 𑀇𑀫𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀫𑀸𑀦𑀸 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀫𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑁂 𑀖𑀁𑀲𑀺𑀢𑀩𑁆𑀩𑁂 𑀏𑀯𑀁 𑀫𑀜𑁆𑀜𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀥𑀦𑀺𑀬𑀁 𑀕𑀭𑀳𑀺𑀢𑁆𑀯𑀸 𑀦 𑀘, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀸 𑀓𑀼𑀝𑀺𑀓𑀸 𑀓𑀸𑀢𑀩𑁆𑀩𑀸𑀢𑀺 𑀆𑀬𑀢𑀺𑀁 𑀢𑀸𑀤𑀺𑀲𑀸𑀬 𑀓𑀼𑀝𑀺𑀓𑀸𑀬 𑀓𑀭𑀡𑀁 𑀧𑀝𑀺𑀓𑁆𑀔𑀺𑀧𑀺; 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀘 ‘‘𑀬𑁄 𑀓𑀭𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀓𑀼𑀝𑀺𑀓𑀸𑀓𑀭𑀡𑁂 𑀆𑀧𑀢𑁆𑀢𑀺𑀁 𑀞𑀧𑁂𑀲𑀺. 𑀢𑀲𑁆𑀫𑀸 𑀬𑁄𑀧𑀺 𑀧𑀣𑀯𑀻𑀔𑀡𑀦𑀸𑀤𑀺𑀦𑀸 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀅𑀦𑀸𑀧𑀚𑁆𑀚𑀦𑁆𑀢𑁄 𑀢𑀸𑀤𑀺𑀲𑀁 𑀓𑀼𑀝𑀺𑀓𑀁 𑀓𑀭𑁄𑀢𑀺, 𑀲𑁄𑀧𑀺 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀧𑀣𑀯𑀻𑀔𑀡𑀦𑀸𑀤𑀻𑀳𑀺 𑀧𑀦 𑀧𑀸𑀡𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑁄 𑀬𑀁 𑀬𑀁 𑀯𑀢𑁆𑀣𑀼𑀁 𑀯𑀻𑀢𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀥𑀦𑀺𑀬𑀢𑁆𑀣𑁂𑀭𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. 𑀲𑁂𑀲𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀓𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀫𑁂𑀯. 𑀤𑀩𑁆𑀩𑀲𑀫𑁆𑀪𑀸𑀭𑀫𑀺𑀲𑁆𑀲𑀓𑀸 𑀧𑀦 𑀬𑀣𑀸 𑀯𑀸 𑀢𑀣𑀸 𑀯𑀸 𑀫𑀺𑀲𑁆𑀲𑀸 𑀳𑁄𑀢𑀼, 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀫𑀢𑁆𑀢𑀺𑀓𑀸𑀫𑀬𑀸𑀯 𑀦 𑀯𑀝𑁆𑀝𑀢𑀺. 𑀲𑀸𑀧𑀺 𑀇𑀝𑁆𑀞𑀓𑀸𑀳𑀺 𑀕𑀺𑀜𑁆𑀚𑀓𑀸𑀯𑀲𑀣𑀲𑀗𑁆𑀔𑁂𑀧𑁂𑀦 𑀓𑀢𑀸 𑀯𑀝𑁆𑀝𑀢𑀺. 𑀏𑀯𑀁 𑀪𑀦𑁆𑀢𑁂𑀢𑀺 𑀔𑁄…𑀧𑁂… 𑀢𑀁 𑀓𑀼𑀝𑀺𑀁 𑀪𑀺𑀦𑁆𑀤𑀺𑀁𑀲𑀽𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀝𑁆𑀞𑁂𑀳𑀺 𑀘 𑀧𑀸𑀲𑀸𑀡𑁂𑀳𑀺 𑀘 𑀢𑀁 𑀓𑀼𑀝𑀺𑀓𑀁 𑀯𑀺𑀓𑀺𑀭𑀦𑁆𑀢𑀸 𑀪𑀺𑀦𑁆𑀤𑀺𑀁𑀲𑀼.

𑀅𑀣 𑀔𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀥𑀦𑀺𑀬𑁄 𑀏𑀓𑀧𑀲𑁆𑀲𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄 𑀢𑁂𑀦 𑀲𑀤𑁆𑀤𑁂𑀦 𑀆𑀕𑀦𑁆𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 ‘‘𑀓𑀺𑀲𑁆𑀲 𑀫𑁂 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀓𑀼𑀝𑀺𑀁 𑀪𑀺𑀦𑁆𑀤𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀪𑀕𑀯𑀸 𑀪𑁂𑀤𑀸𑀧𑁂𑀢𑀻’’𑀢𑀺 𑀲𑀼𑀢𑁆𑀯𑀸 𑀲𑀼𑀩𑁆𑀩𑀘𑀢𑀸𑀬 𑀲𑀫𑁆𑀧𑀝𑀺𑀘𑁆𑀙𑀺.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀇𑀫𑀺𑀦𑀸 𑀅𑀢𑀺𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀅𑀢𑁆𑀢𑀦𑁄 𑀯𑀲𑀦𑀢𑁆𑀣𑀁 𑀓𑀢𑀁 𑀓𑀼𑀝𑀺𑀓𑀁 𑀪𑁂𑀤𑀸𑀧𑁂𑀲𑀺, 𑀦𑀦𑀼 𑀏𑀢𑀲𑁆𑀲𑁂𑀢𑁆𑀣 𑀯𑀬𑀓𑀫𑁆𑀫𑀫𑁆𑀧𑀺 𑀅𑀢𑁆𑀣𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀺, 𑀅𑀣 𑀔𑁄 𑀦𑀁 𑀪𑀕𑀯𑀸 𑀅𑀓𑀧𑁆𑀧𑀺𑀬𑀸𑀢𑀺 𑀪𑀺𑀦𑁆𑀤𑀸𑀧𑁂𑀲𑀺, 𑀢𑀺𑀢𑁆𑀣𑀺𑀬𑀥𑀚𑁄𑀢𑀺 𑀪𑀺𑀦𑁆𑀤𑀸𑀧𑁂𑀲𑀺. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀜𑁆𑀜𑀸𑀦𑀺𑀧𑀺 𑀓𑀸𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀺 𑁋 𑀲𑀢𑁆𑀢𑀸𑀦𑀼𑀤𑁆𑀤𑀬𑀸𑀬, 𑀧𑀢𑁆𑀢𑀘𑀻𑀯𑀭𑀕𑀼𑀢𑁆𑀢𑀢𑁆𑀣𑀸𑀬, 𑀲𑁂𑀦𑀸𑀲𑀦𑀩𑀸𑀳𑀼𑀮𑁆𑀮𑀧𑀅𑀲𑁂𑀥𑀦𑀸𑀬𑀸𑀢𑀺𑀆𑀤𑀻𑀦𑀺. 𑀢𑀲𑁆𑀫𑀸 𑀇𑀤𑀸𑀦𑀺𑀧𑀺 𑀬𑁄 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀯𑀺𑀦𑀬𑀜𑁆𑀜𑀽 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀅𑀓𑀧𑁆𑀧𑀺𑀬𑀁 𑀧𑀭𑀺𑀓𑁆𑀔𑀸𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑀁 𑀙𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀪𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀅𑀦𑀼𑀧𑀯𑀚𑁆𑀚𑁄, 𑀲𑁄 𑀦𑁂𑀯 𑀘𑁄𑀤𑁂𑀢𑀩𑁆𑀩𑁄 𑀦 𑀲𑀸𑀭𑁂𑀢𑀩𑁆𑀩𑁄; 𑀦 𑀢𑀁 𑀮𑀩𑁆𑀪𑀸 𑀯𑀢𑁆𑀢𑀼𑀁 ‘‘𑀫𑀫 𑀧𑀭𑀺𑀓𑁆𑀔𑀸𑀭𑁄 𑀢𑀬𑀸 𑀦𑀸𑀲𑀺𑀢𑁄, 𑀢𑀁 𑀫𑁂 𑀤𑁂𑀳𑀻’’𑀢𑀺.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄

𑀢𑀢𑁆𑀭𑀸𑀬𑀁 𑀧𑀸𑀴𑀺𑀫𑀼𑀢𑁆𑀢𑀓𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀓𑁆𑀔𑀸𑀭𑀯𑀺𑀦𑀺𑀘𑁆𑀙𑀬𑁄 𑁋 𑀓𑁂𑀘𑀺 𑀢𑀸𑀮𑀧𑀡𑁆𑀡𑀘𑁆𑀙𑀢𑁆𑀢𑀁 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀧𑀜𑁆𑀘𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑀦𑁆𑀢𑀸 𑀯𑀡𑁆𑀡𑀫𑀝𑁆𑀞𑀁 𑀓𑀭𑁄𑀦𑁆𑀢𑀺, 𑀢𑀁 𑀦 𑀯𑀝𑁆𑀝𑀢𑀺. 𑀏𑀓𑀯𑀡𑁆𑀡𑁂𑀦 𑀧𑀦 𑀦𑀻𑀮𑁂𑀦 𑀯𑀸 𑀧𑀻𑀢𑀓𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀼𑀢𑁆𑀢𑁂𑀦 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀲𑀺𑀩𑁆𑀩𑀺𑀢𑀼𑀁 𑀙𑀢𑁆𑀢𑀤𑀡𑁆𑀟𑀕𑁆𑀕𑀸𑀳𑀓𑀁 𑀲𑀮𑀸𑀓𑀧𑀜𑁆𑀚𑀭𑀁 𑀯𑀸 𑀯𑀺𑀦𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀜𑁆𑀘 𑀔𑁄 𑀣𑀺𑀭𑀓𑀭𑀡𑀢𑁆𑀣𑀁, 𑀦 𑀯𑀡𑁆𑀡𑀫𑀝𑁆𑀞𑀢𑁆𑀣𑀸𑀬. 𑀙𑀢𑁆𑀢𑀧𑀡𑁆𑀡𑀓𑁂𑀲𑀼 𑀫𑀓𑀭𑀤𑀦𑁆𑀢𑀓𑀁 𑀯𑀸 𑀅𑀟𑁆𑀠𑀘𑀦𑁆𑀤𑀓𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀙𑀢𑁆𑀢𑀤𑀡𑁆𑀟𑁂 𑀕𑁂𑀳𑀣𑀫𑁆𑀪𑁂𑀲𑀼 𑀯𑀺𑀬 𑀖𑀝𑀓𑁄 𑀯𑀸 𑀯𑀸𑀴𑀭𑀽𑀧𑀓𑀁 𑀯𑀸 𑀦 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀲𑀩𑁆𑀩𑀢𑁆𑀣 𑀆𑀭𑀕𑁆𑀕𑁂𑀦 𑀮𑁂𑀔𑀸 𑀤𑀺𑀦𑁆𑀦𑀸 𑀳𑁄𑀢𑀺, 𑀲𑀸𑀧𑀺 𑀦 𑀯𑀝𑁆𑀝𑀢𑀺. 𑀖𑀝𑀓𑀫𑁆𑀧𑀺 𑀯𑀸𑀴𑀭𑀽𑀧𑀫𑁆𑀧𑀺 𑀪𑀺𑀦𑁆𑀤𑀺𑀢𑁆𑀯𑀸 𑀥𑀸𑀭𑁂𑀢𑀩𑁆𑀩𑀁. 𑀮𑁂𑀔𑀸𑀧𑀺 𑀖𑀁𑀲𑀺𑀢𑁆𑀯𑀸 𑀯𑀸 𑀅𑀧𑀦𑁂𑀢𑀩𑁆𑀩𑀸, 𑀲𑀼𑀢𑁆𑀢𑀓𑁂𑀦 𑀯𑀸 𑀤𑀡𑁆𑀟𑁄 𑀯𑁂𑀞𑁂𑀢𑀩𑁆𑀩𑁄. 𑀤𑀡𑁆𑀟𑀩𑀼𑀦𑁆𑀤𑁂 𑀧𑀦 𑀅𑀳𑀺𑀘𑁆𑀙𑀢𑁆𑀢𑀓𑀲𑀡𑁆𑀞𑀸𑀦𑀁 𑀯𑀝𑁆𑀝𑀢𑀺. 𑀯𑀸𑀢𑀧𑁆𑀧𑀳𑀸𑀭𑁂𑀦 𑀅𑀘𑀮𑀦𑀢𑁆𑀣𑀁 𑀙𑀢𑁆𑀢𑀫𑀡𑁆𑀟𑀮𑀺𑀓𑀁 𑀭𑀚𑁆𑀚𑀼𑀓𑁂𑀳𑀺 𑀕𑀸𑀳𑁂𑀢𑁆𑀯𑀸 𑀤𑀡𑁆𑀟𑁂 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑁂 𑀯𑀮𑀬𑀫𑀺𑀯 𑀉𑀓𑁆𑀓𑀺𑀭𑀺𑀢𑁆𑀯𑀸 𑀮𑁂𑀔𑀁 𑀞𑀧𑁂𑀦𑁆𑀢𑀺, 𑀲𑀸 𑀯𑀝𑁆𑀝𑀢𑀺.

𑀘𑀻𑀯𑀭𑀫𑀡𑁆𑀟𑀦𑀢𑁆𑀣𑀸𑀬 𑀦𑀸𑀦𑀸𑀲𑀼𑀢𑁆𑀢𑀓𑁂𑀳𑀺 𑀲𑀢𑀧𑀤𑀻𑀲𑀤𑀺𑀲𑀁 𑀲𑀺𑀩𑁆𑀩𑀦𑁆𑀢𑀸 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀞𑀧𑁂𑀦𑁆𑀢𑀺, 𑀅𑀜𑁆𑀜𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀲𑀽𑀘𑀺𑀓𑀫𑁆𑀫𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀧𑀝𑁆𑀝𑀫𑀼𑀔𑁂 𑀯𑀸 𑀧𑀭𑀺𑀬𑀦𑁆𑀢𑁂 𑀯𑀸 𑀯𑁂𑀡𑀺𑀁 𑀯𑀸 𑀲𑀗𑁆𑀔𑀮𑀺𑀓𑀁 𑀯𑀸, 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀧𑀓𑀢𑀺𑀲𑀽𑀘𑀺𑀓𑀫𑁆𑀫𑀫𑁂𑀯 𑀯𑀝𑁆𑀝𑀢𑀺. 𑀕𑀡𑁆𑀞𑀺𑀓𑀧𑀝𑁆𑀝𑀓𑀜𑁆𑀘 𑀧𑀸𑀲𑀓𑀧𑀝𑁆𑀝𑀜𑁆𑀘 𑀅𑀝𑁆𑀞𑀓𑁄𑀡𑀫𑁆𑀧𑀺 𑀲𑁄𑀴𑀲𑀓𑁄𑀡𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀣 𑀅𑀕𑁆𑀖𑀺𑀬𑀕𑀬𑀫𑀼𑀕𑁆𑀕𑀭𑀸𑀤𑀻𑀦𑀺 𑀤𑀲𑁆𑀲𑁂𑀦𑁆𑀢𑀺, 𑀓𑀓𑁆𑀓𑀝𑀓𑁆𑀔𑀻𑀦𑀺 𑀉𑀓𑁆𑀓𑀺𑀭𑀦𑁆𑀢𑀺, 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀺, 𑀘𑀢𑀼𑀓𑁄𑀡𑀫𑁂𑀯 𑀯𑀝𑁆𑀝𑀢𑀺. 𑀓𑁄𑀡𑀲𑀼𑀢𑁆𑀢𑀧𑀺𑀴𑀓𑀸 𑀘 𑀘𑀻𑀯𑀭𑁂 𑀭𑀢𑁆𑀢𑁂 𑀤𑀼𑀯𑀺𑀜𑁆𑀜𑁂𑀬𑁆𑀬𑀭𑀽𑀧𑀸 𑀯𑀝𑁆𑀝𑀦𑁆𑀢𑀺. 𑀓𑀜𑁆𑀚𑀺𑀓𑀧𑀺𑀝𑁆𑀞𑀔𑀮𑀺𑀆𑀤𑀻𑀲𑀼 𑀘𑀻𑀯𑀭𑀁 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀘𑀻𑀯𑀭𑀓𑀫𑁆𑀫𑀓𑀸𑀮𑁂 𑀧𑀦 𑀳𑀢𑁆𑀣𑀫𑀮𑀲𑀽𑀘𑀺𑀫𑀮𑀸𑀤𑀻𑀦𑀁 𑀥𑁄𑀯𑀦𑀢𑁆𑀣𑀁 𑀓𑀺𑀮𑀺𑀝𑁆𑀞𑀓𑀸𑀮𑁂 𑀘 𑀥𑁄𑀯𑀦𑀢𑁆𑀣𑀁 𑀯𑀝𑁆𑀝𑀢𑀺. 𑀕𑀦𑁆𑀥𑀁 𑀯𑀸 𑀮𑀸𑀔𑀁 𑀯𑀸 𑀢𑁂𑀮𑀁 𑀯𑀸 𑀭𑀚𑀦𑁂 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀺.

𑀘𑀻𑀯𑀭𑀁 𑀭𑀚𑀺𑀢𑁆𑀯𑀸 𑀲𑀗𑁆𑀔𑁂𑀦 𑀯𑀸 𑀫𑀡𑀺𑀦𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀦 𑀖𑀝𑁆𑀝𑁂𑀢𑀩𑁆𑀩𑀁. 𑀪𑀽𑀫𑀺𑀬𑀁 𑀚𑀸𑀡𑀼𑀓𑀸𑀦𑀺 𑀦𑀺𑀳𑀦𑁆𑀢𑁆𑀯𑀸 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀤𑁄𑀡𑀺𑀬𑀫𑁆𑀧𑀺 𑀦 𑀖𑀁𑀲𑀺𑀢𑀩𑁆𑀩𑀁. 𑀤𑁄𑀡𑀺𑀬𑀁 𑀯𑀸 𑀨𑀮𑀓𑁂 𑀯𑀸 𑀞𑀧𑁂𑀢𑁆𑀯𑀸 𑀅𑀦𑁆𑀢𑁂 𑀕𑀸𑀳𑀸𑀧𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀧𑀳𑀭𑀺𑀢𑀼𑀁 𑀧𑀦 𑀯𑀝𑁆𑀝𑀢𑀺; 𑀢𑀫𑁆𑀧𑀺 𑀫𑀼𑀝𑁆𑀞𑀺𑀦𑀸 𑀦 𑀓𑀸𑀢𑀩𑁆𑀩𑀁. 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀧𑀦 𑀤𑁄𑀡𑀺𑀬𑀫𑁆𑀧𑀺 𑀦 𑀞𑀧𑁂𑀲𑀼𑀁. 𑀏𑀓𑁄 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺; 𑀅𑀧𑀭𑁄 𑀳𑀢𑁆𑀣𑁂 𑀓𑀢𑁆𑀯𑀸 𑀳𑀢𑁆𑀣𑁂𑀦 𑀧𑀳𑀭𑀢𑀺. 𑀘𑀻𑀯𑀭𑀲𑁆𑀲 𑀓𑀡𑁆𑀡𑀲𑀼𑀢𑁆𑀢𑀓𑀁 𑀦 𑀯𑀝𑁆𑀝𑀢𑀺, 𑀭𑀚𑀺𑀢𑀓𑀸𑀮𑁂 𑀙𑀺𑀦𑁆𑀤𑀺𑀢𑀩𑁆𑀩𑀁. 𑀬𑀁 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀡𑁆𑀡𑀲𑀼𑀢𑁆𑀢𑀓’’𑀦𑁆𑀢𑀺 (𑀫𑀳𑀸𑀯. 𑁩𑁪𑁪) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀅𑀦𑀼𑀯𑀸𑀢𑁂 𑀧𑀸𑀲𑀓𑀁 𑀓𑀢𑁆𑀯𑀸 𑀩𑀦𑁆𑀥𑀺𑀢𑀩𑁆𑀩𑀁 𑀭𑀚𑀦𑀓𑀸𑀮𑁂 𑀮𑀕𑁆𑀕𑀦𑀢𑁆𑀣𑀸𑀬. 𑀕𑀡𑁆𑀞𑀺𑀓𑁂𑀧𑀺 𑀲𑁄𑀪𑀸𑀓𑀭𑀡𑀢𑁆𑀣𑀁 𑀮𑁂𑀔𑀸 𑀯𑀸 𑀧𑀺𑀴𑀓𑀸 𑀯𑀸 𑀦 𑀯𑀝𑁆𑀝𑀢𑀺, 𑀦𑀸𑀲𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀧𑀢𑁆𑀢𑁂 𑀯𑀸 𑀣𑀸𑀮𑀓𑁂 𑀯𑀸 𑀆𑀭𑀕𑁆𑀕𑁂𑀦 𑀮𑁂𑀔𑀁 𑀓𑀭𑁄𑀦𑁆𑀢𑀺, 𑀅𑀦𑁆𑀢𑁄 𑀯𑀸 𑀩𑀳𑀺 𑀯𑀸 𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀁 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀫𑀚𑁆𑀚𑀺𑀢𑁆𑀯𑀸 𑀧𑀘𑀦𑁆𑀢𑀺 𑁋 ‘‘𑀫𑀡𑀺𑀯𑀡𑁆𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺, 𑀦 𑀯𑀝𑁆𑀝𑀢𑀺; 𑀢𑁂𑀮𑀯𑀡𑁆𑀡𑁄 𑀧𑀦 𑀯𑀝𑁆𑀝𑀢𑀺. 𑀧𑀢𑁆𑀢𑀫𑀡𑁆𑀟𑀮𑁂 𑀪𑀺𑀢𑁆𑀢𑀺𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺, 𑀫𑀓𑀭𑀤𑀦𑁆𑀢𑀓𑀁 𑀧𑀦 𑀯𑀝𑁆𑀝𑀢𑀺.

𑀥𑀫𑀓𑀭𑀡𑀙𑀢𑁆𑀢𑀓𑀲𑁆𑀲 𑀉𑀧𑀭𑀺 𑀯𑀸 𑀳𑁂𑀝𑁆𑀞𑀸 𑀯𑀸 𑀥𑀫𑀓𑀭𑀡𑀓𑀼𑀘𑁆𑀙𑀺𑀬𑀁 𑀯𑀸 𑀮𑁂𑀔𑀸 𑀦 𑀯𑀝𑁆𑀝𑀢𑀺, 𑀙𑀢𑁆𑀢𑀫𑀼𑀔𑀯𑀝𑁆𑀝𑀺𑀬𑀁 𑀧𑀦𑀲𑁆𑀲 𑀮𑁂𑀔𑀸 𑀯𑀝𑁆𑀝𑀢𑀺.

𑀓𑀸𑀬𑀩𑀦𑁆𑀥𑀦𑀲𑁆𑀲 𑀲𑁄𑀪𑀦𑀢𑁆𑀣𑀁 𑀢𑀳𑀺𑀁 𑀢𑀳𑀺𑀁 𑀤𑀺𑀕𑀼𑀡𑀁 𑀲𑀼𑀢𑁆𑀢𑀁 𑀓𑁄𑀝𑁆𑀝𑁂𑀦𑁆𑀢𑀺, 𑀓𑀓𑁆𑀓𑀝𑀘𑁆𑀙𑀻𑀦𑀺 𑀉𑀝𑁆𑀞𑀧𑁂𑀦𑁆𑀢𑀺, 𑀦 𑀯𑀝𑁆𑀝𑀢𑀺. 𑀉𑀪𑁄𑀲𑀼 𑀧𑀦 𑀅𑀦𑁆𑀢𑁂𑀲𑀼 𑀤𑀲𑀸𑀫𑀼𑀔𑀲𑁆𑀲 𑀣𑀺𑀭𑀪𑀸𑀯𑀸𑀬 𑀤𑀺𑀕𑀼𑀡𑀁 𑀓𑁄𑀝𑁆𑀝𑁂𑀢𑀼𑀁 𑀯𑀝𑁆𑀝𑀢𑀺. 𑀤𑀲𑀸𑀫𑀼𑀔𑁂 𑀧𑀦 𑀖𑀝𑀓𑀁 𑀯𑀸 𑀫𑀓𑀭𑀫𑀼𑀔𑀁 𑀯𑀸 𑀤𑁂𑀟𑁆𑀟𑀼𑀪𑀲𑀻𑀲𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀭𑀽𑀧𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀢𑀢𑁆𑀣 𑀅𑀘𑁆𑀙𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀻𑀦𑀺 𑀯𑀸 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀓𑀸𑀬𑀩𑀦𑁆𑀥𑀦𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀉𑀚𑀼𑀓𑀫𑁂𑀯 𑀧𑀦 𑀫𑀘𑁆𑀙𑀓𑀡𑁆𑀝𑀓𑀁 𑀯𑀸 𑀔𑀚𑁆𑀚𑀼𑀭𑀺𑀧𑀢𑁆𑀢𑀓𑀁 𑀯𑀸 𑀫𑀝𑁆𑀞𑀧𑀝𑁆𑀝𑀺𑀓𑀁 𑀯𑀸 𑀓𑀢𑁆𑀯𑀸 𑀓𑁄𑀝𑁆𑀝𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀸𑀬𑀩𑀦𑁆𑀥𑀦𑀲𑁆𑀲 𑀤𑀲𑀸 𑀏𑀓𑀸 𑀯𑀝𑁆𑀝𑀢𑀺, 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺𑀧𑀺 𑀯𑀝𑁆𑀝𑀦𑁆𑀢𑀺; 𑀢𑀢𑁄 𑀧𑀭𑀁 𑀦 𑀯𑀝𑁆𑀝𑀦𑁆𑀢𑀺. 𑀭𑀚𑁆𑀚𑀼𑀓𑀓𑀸𑀬𑀩𑀦𑁆𑀥𑀦𑀁 𑀏𑀓𑀫𑁂𑀯 𑀯𑀝𑁆𑀝𑀢𑀺. 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀁 𑀧𑀦 𑀏𑀓𑀫𑁆𑀧𑀺 𑀦 𑀯𑀝𑁆𑀝𑀢𑀺. 𑀤𑀲𑀸 𑀧𑀦 𑀧𑀸𑀫𑀗𑁆𑀕𑀲𑀡𑁆𑀞𑀸𑀦𑀸𑀧𑀺 𑀯𑀝𑁆𑀝𑀢𑀺. 𑀩𑀳𑀼𑀭𑀚𑁆𑀚𑀼𑀓𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀓𑁂𑀦 𑀦𑀺𑀭𑀦𑁆𑀢𑀭𑀁 𑀯𑁂𑀞𑁂𑀢𑁆𑀯𑀸 𑀓𑀢𑀁 𑀩𑀳𑀼𑀭𑀚𑁆𑀚𑀼𑀓𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀝𑁆𑀝𑀢𑀺.

𑀓𑀸𑀬𑀩𑀦𑁆𑀥𑀦𑀯𑀺𑀥𑁂 𑀅𑀝𑁆𑀞𑀫𑀗𑁆𑀕𑀮𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀯𑀺𑀓𑀸𑀭𑀭𑀽𑀧𑀁 𑀦 𑀯𑀝𑁆𑀝𑀢𑀺, 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀁 𑀯𑀝𑁆𑀝𑀢𑀺. 𑀯𑀺𑀥𑀓𑀲𑁆𑀲 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀣𑀺𑀭𑀓𑀭𑀡𑀢𑁆𑀣𑀸𑀬 𑀖𑀝𑀓𑀁 𑀓𑀭𑁄𑀦𑁆𑀢𑀺, 𑀅𑀬𑀫𑁆𑀧𑀺 𑀯𑀝𑁆𑀝𑀢𑀺.

𑀅𑀜𑁆𑀚𑀦𑀺𑀬𑀁 𑀇𑀢𑁆𑀣𑀺𑀧𑀼𑀭𑀺𑀲𑀘𑀢𑀼𑀧𑁆𑀧𑀤𑀲𑀓𑀼𑀡𑀭𑀽𑀧𑀁 𑀯𑀸 𑀫𑀸𑀮𑀸𑀓𑀫𑁆𑀫-𑀮𑀢𑀸𑀓𑀫𑁆𑀫𑀫𑀓𑀭𑀤𑀦𑁆𑀢𑀓-𑀕𑁄𑀫𑀼𑀢𑁆𑀢𑀓𑀅𑀟𑁆𑀠𑀘𑀦𑁆𑀤𑀓𑀸𑀤𑀺𑀪𑁂𑀤𑀁 𑀯𑀸 𑀯𑀺𑀓𑀸𑀭𑀭𑀽𑀧𑀁 𑀦 𑀯𑀝𑁆𑀝𑀢𑀺. 𑀖𑀁𑀲𑀺𑀢𑁆𑀯𑀸 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀬𑀣𑀸 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀢𑀣𑀸 𑀲𑀼𑀢𑁆𑀢𑁂𑀦 𑀯𑁂𑀞𑁂𑀢𑁆𑀯𑀸 𑀯𑀴𑀜𑁆𑀚𑁂𑀢𑀩𑁆𑀩𑀸. 𑀉𑀚𑀼𑀓𑀫𑁂𑀯 𑀧𑀦 𑀘𑀢𑀼𑀭𑀁𑀲𑀸 𑀯𑀸 𑀅𑀝𑁆𑀞𑀁𑀲𑀸 𑀯𑀸 𑀲𑁄𑀴𑀲𑀁𑀲𑀸 𑀯𑀸 𑀅𑀜𑁆𑀚𑀦𑀻 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀢𑁄 𑀧𑀺𑀲𑁆𑀲𑀸 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀯𑀝𑁆𑀝𑀮𑁂𑀔𑀸𑀬𑁄 𑀯𑀝𑁆𑀝𑀦𑁆𑀢𑀺. 𑀕𑀻𑀯𑀸𑀬𑀫𑁆𑀧𑀺𑀲𑁆𑀲𑀸 𑀧𑀺𑀥𑀸𑀦𑀓𑀩𑀦𑁆𑀥𑀦𑀢𑁆𑀣𑀁 𑀏𑀓𑀸 𑀯𑀝𑁆𑀝𑀮𑁂𑀔𑀸 𑀯𑀝𑁆𑀝𑀢𑀺.

𑀅𑀜𑁆𑀚𑀦𑀺𑀲𑀮𑀸𑀓𑀸𑀬𑀧𑀺 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀚𑀦𑀺𑀢𑁆𑀣𑀯𑀺𑀓𑀸𑀬𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀦𑀸𑀦𑀸𑀯𑀡𑁆𑀡𑁂𑀦 𑀲𑀼𑀢𑁆𑀢𑁂𑀦 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺. 𑀏𑀲𑁂𑀯 𑀦𑀬𑁄 𑀓𑀼𑀜𑁆𑀘𑀺𑀓𑀸𑀓𑁄𑀲𑀓𑁂𑀧𑀺. 𑀓𑀼𑀜𑁆𑀘𑀺𑀓𑀸𑀬 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺, 𑀢𑀣𑀸 𑀲𑀺𑀧𑀸𑀝𑀺𑀓𑀸𑀬𑀁. 𑀏𑀓𑀯𑀡𑁆𑀡𑀲𑀼𑀢𑁆𑀢𑁂𑀦 𑀧𑀦𑁂𑀢𑁆𑀣 𑀬𑁂𑀦 𑀓𑁂𑀦𑀘𑀺 𑀲𑀺𑀩𑁆𑀩𑀺𑀢𑀼𑀁 𑀯𑀝𑁆𑀝𑀢𑀺.

𑀆𑀭𑀓𑀡𑁆𑀝𑀓𑁂𑀧𑀺 𑀯𑀝𑁆𑀝𑀫𑀡𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺. 𑀕𑀻𑀯𑀸𑀬𑀁 𑀧𑀦 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀯𑀝𑁆𑀝𑀢𑀺. 𑀧𑀺𑀧𑁆𑀨𑀮𑀺𑀓𑁂𑀧𑀺 𑀫𑀡𑀺𑀓𑀁 𑀯𑀸 𑀧𑀺𑀴𑀓𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀉𑀝𑁆𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀤𑀡𑁆𑀟𑀓𑁂 𑀧𑀦 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀯𑀝𑁆𑀝𑀢𑀺. 𑀦𑀔𑀘𑁆𑀙𑁂𑀤𑀦𑀁 𑀯𑀮𑀺𑀢𑀓𑀁𑀬𑁂𑀯 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀯𑀝𑁆𑀝𑀢𑀺. 𑀉𑀢𑁆𑀢𑀭𑀸𑀭𑀡𑀺𑀬𑀁 𑀯𑀸 𑀅𑀥𑀭𑀸𑀭𑀡𑀺𑀬𑀁 𑀯𑀸 𑀅𑀭𑀡𑀺𑀥𑀦𑀼𑀓𑁂 𑀯𑀸 𑀉𑀧𑀭𑀺𑀧𑁂𑀮𑁆𑀮𑀦𑀤𑀡𑁆𑀟𑀓𑁂 𑀯𑀸 𑀫𑀸𑀮𑀸𑀓𑀫𑁆𑀫𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀧𑁂𑀮𑁆𑀮𑀦𑀤𑀡𑁆𑀟𑀓𑀲𑁆𑀲 𑀧𑀦 𑀯𑁂𑀫𑀚𑁆𑀛𑁂 𑀫𑀡𑁆𑀟𑀮𑀁 𑀳𑁄𑀢𑀺, 𑀢𑀢𑁆𑀣 𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀫𑀢𑁆𑀢𑀁 𑀯𑀝𑁆𑀝𑀢𑀺. 𑀲𑀽𑀘𑀺𑀲𑀡𑁆𑀟𑀸𑀲𑀁 𑀓𑀭𑁄𑀦𑁆𑀢𑀺, 𑀬𑁂𑀦 𑀲𑀽𑀘𑀺𑀁 𑀟𑀁𑀲𑀸𑀧𑁂𑀢𑁆𑀯𑀸 𑀖𑀁𑀲𑀦𑁆𑀢𑀺, 𑀢𑀢𑁆𑀣 𑀫𑀓𑀭𑀫𑀼𑀔𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀲𑀽𑀘𑀺𑀟𑀁𑀲𑀦𑀢𑁆𑀣𑀁 𑀧𑀦 𑀫𑀼𑀔𑀫𑀢𑁆𑀢𑀁 𑀳𑁄𑀢𑀺, 𑀢𑀁 𑀯𑀝𑁆𑀝𑀢𑀺.

𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺𑀬𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀉𑀚𑀼𑀓𑀫𑁂𑀯 𑀓𑀧𑁆𑀧𑀺𑀬𑀮𑁄𑀳𑁂𑀦 𑀉𑀪𑁄𑀲𑀼 𑀯𑀸 𑀧𑀲𑁆𑀲𑁂𑀲𑀼 𑀘𑀢𑀼𑀭𑀁𑀲𑀁 𑀯𑀸 𑀅𑀝𑁆𑀞𑀁𑀲𑀁 𑀯𑀸 𑀩𑀦𑁆𑀥𑀺𑀢𑀼𑀁 𑀯𑀝𑁆𑀝𑀢𑀺. 𑀓𑀢𑁆𑀢𑀭𑀤𑀡𑁆𑀟𑁂𑀧𑀺 𑀬𑀁𑀓𑀺𑀜𑁆𑀘𑀺 𑀯𑀡𑁆𑀡𑀫𑀝𑁆𑀞𑀁 𑀦 𑀯𑀝𑁆𑀝𑀢𑀺, 𑀳𑁂𑀝𑁆𑀞𑀸 𑀏𑀓𑀸 𑀯𑀸 𑀤𑁆𑀯𑁂 𑀯𑀸 𑀯𑀝𑁆𑀝𑀮𑁂𑀔𑀸 𑀉𑀧𑀭𑀺 𑀅𑀳𑀺𑀘𑁆𑀙𑀢𑁆𑀢𑀓𑀫𑀓𑀼𑀴𑀫𑀢𑁆𑀢𑀜𑁆𑀘 𑀯𑀝𑁆𑀝𑀢𑀺.

𑀢𑁂𑀮𑀪𑀸𑀚𑀦𑁂𑀲𑀼 𑀯𑀺𑀲𑀸𑀡𑁂 𑀯𑀸 𑀦𑀸𑀴𑀺𑀬𑀁 𑀯𑀸 𑀅𑀮𑀸𑀩𑀼𑀓𑁂 𑀯𑀸 𑀆𑀫𑀡𑁆𑀟𑀲𑀸𑀭𑀓𑁂 𑀯𑀸 𑀞𑀧𑁂𑀢𑁆𑀯𑀸 𑀇𑀢𑁆𑀣𑀺𑀭𑀽𑀧𑀁 𑀧𑀼𑀭𑀺𑀲𑀭𑀽𑀧𑀜𑁆𑀘 𑀅𑀯𑀲𑁂𑀲𑀁 𑀲𑀩𑁆𑀩𑀫𑁆𑀧𑀺 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺.

𑀫𑀜𑁆𑀘𑀧𑀻𑀞𑁂 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑁂 𑀪𑀽𑀫𑀢𑁆𑀣𑀭𑀡𑁂 𑀧𑀸𑀤𑀧𑀼𑀜𑁆𑀙𑀦𑁂 𑀘𑀗𑁆𑀓𑀫𑀦𑀪𑀺𑀲𑀺𑀬𑀸 𑀲𑀫𑁆𑀫𑀼𑀜𑁆𑀚𑀦𑀺𑀬𑀁 𑀓𑀘𑀯𑀭𑀙𑀟𑁆𑀟𑀦𑀓𑁂 𑀭𑀚𑀦𑀤𑁄𑀡𑀺𑀓𑀸𑀬 𑀧𑀸𑀦𑀻𑀬𑀉𑀴𑀼𑀗𑁆𑀓𑁂 𑀧𑀸𑀦𑀻𑀬𑀖𑀝𑁂 𑀧𑀸𑀤𑀓𑀣𑀮𑀺𑀓𑀸𑀬 𑀨𑀮𑀓𑀧𑀻𑀞𑀓𑁂 𑀯𑀮𑀬𑀸𑀥𑀸𑀭𑀓𑁂 𑀤𑀡𑁆𑀟𑀸𑀥𑀸𑀭𑀓𑁂𑀧𑀢𑁆𑀢𑀧𑀺𑀥𑀸𑀦𑁂 𑀢𑀸𑀮𑀯𑀡𑁆𑀝𑁂 𑀯𑀻𑀚𑀦𑁂𑀢𑀺 𑁋 𑀏𑀢𑁂𑀲𑀼 𑀲𑀩𑁆𑀩𑀁 𑀫𑀸𑀮𑀸𑀓𑀫𑁆𑀫𑀸𑀤𑀺𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑁂 𑀧𑀦 𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀓𑀯𑀸𑀝𑀸𑀤𑀻𑀲𑀼 𑀲𑀩𑁆𑀩𑀭𑀢𑀦𑀫𑀬𑀫𑁆𑀧𑀺 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺.

𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀺, 𑀅𑀜𑁆𑀜𑀢𑁆𑀭 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀸. 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀦𑀸𑀫 𑀅𑀜𑁆𑀜𑁂𑀲𑀁 𑀲𑀻𑀫𑀸𑀬 𑀭𑀸𑀚𑀯𑀮𑁆𑀮𑀪𑁂𑀳𑀺 𑀓𑀢𑀲𑁂𑀦𑀸𑀲𑀦𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀬𑁂 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸 𑀅𑀫𑁆𑀳𑀸𑀓𑀁 𑀲𑀻𑀫𑀸𑀬 𑀲𑁂𑀦𑀸𑀲𑀦𑀁 𑀓𑀭𑁄𑀣𑀸’’𑀢𑀺. 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀭𑁄𑀦𑁆𑀢𑀺𑀬𑁂𑀯, 𑀧𑀼𑀦𑀧𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸 𑀏𑀯𑀁 𑀅𑀓𑀢𑁆𑀣, 𑀫𑀸 𑀅𑀫𑁆𑀳𑀸𑀓𑀁 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀅𑀦𑁆𑀢𑀭𑀸𑀬𑀫𑀓𑀢𑁆𑀣, 𑀫𑀸 𑀲𑀸𑀫𑀕𑁆𑀕𑀺𑀁 𑀪𑀺𑀦𑁆𑀤𑀺𑀢𑁆𑀣, 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀓𑀢𑀫𑁆𑀧𑀺 𑀓𑀢𑀝𑁆𑀞𑀸𑀦𑁂 𑀦 𑀞𑀲𑁆𑀲𑀢𑀻’’𑀢𑀺. 𑀲𑀘𑁂 𑀩𑀮𑀓𑁆𑀓𑀸𑀭𑁂𑀦 𑀓𑀭𑁄𑀦𑁆𑀢𑀺𑀬𑁂𑀯, 𑀬𑀤𑀸 𑀢𑁂𑀲𑀁 𑀮𑀚𑁆𑀚𑀺𑀧𑀭𑀺𑀲𑀸 𑀉𑀲𑁆𑀲𑀦𑁆𑀦𑀸 𑀳𑁄𑀢𑀺, 𑀲𑀓𑁆𑀓𑀸 𑀘 𑀳𑁄𑀢𑀺 𑀮𑀤𑁆𑀥𑀼𑀁 𑀥𑀫𑁆𑀫𑀺𑀓𑁄 𑀯𑀺𑀦𑀺𑀘𑁆𑀙𑀬𑁄, 𑀢𑀤𑀸 𑀢𑁂𑀲𑀁 𑀧𑁂𑀲𑁂𑀢𑀩𑁆𑀩𑀁 𑁋 ‘‘𑀢𑀼𑀫𑁆𑀳𑀸𑀓𑀁 𑀆𑀯𑀸𑀲𑀁 𑀳𑀭𑀣𑀸’’𑀢𑀺. 𑀲𑀘𑁂 𑀬𑀸𑀯 𑀢𑀢𑀺𑀬𑀁 𑀧𑁂𑀲𑀺𑀢𑁂 𑀳𑀭𑀦𑁆𑀢𑀺, 𑀲𑀸𑀥𑀼; 𑀦𑁄 𑀘𑁂 𑀳𑀭𑀦𑁆𑀢𑀺, 𑀞𑀧𑁂𑀢𑁆𑀯𑀸 𑀩𑁄𑀥𑀺𑀜𑁆𑀘 𑀘𑁂𑀢𑀺𑀬𑀜𑁆𑀘 𑀅𑀯𑀲𑁂𑀲𑀲𑁂𑀦𑀸𑀲𑀦𑀸𑀦𑀺 𑀪𑀺𑀦𑁆𑀤𑀺𑀢𑀩𑁆𑀩𑀸𑀦𑀺, 𑀦𑁄 𑀘 𑀔𑁄 𑀅𑀧𑀭𑀺𑀪𑁄𑀕𑀁 𑀓𑀭𑁄𑀦𑁆𑀢𑁂𑀳𑀺, 𑀧𑀝𑀺𑀧𑀸𑀝𑀺𑀬𑀸 𑀧𑀦 𑀙𑀤𑀦-𑀕𑁄𑀧𑀸𑀦𑀲𑀻-𑀇𑀝𑁆𑀞𑀓𑀸𑀤𑀻𑀦𑀺 𑀅𑀧𑀦𑁂𑀢𑁆𑀯𑀸 𑀢𑁂𑀲𑀁 𑀧𑁂𑀲𑁂𑀢𑀩𑁆𑀩𑀁 𑁋 ‘‘𑀢𑀼𑀫𑁆𑀳𑀸𑀓𑀁 𑀤𑀩𑁆𑀩𑀲𑀫𑁆𑀪𑀸𑀭𑁂 𑀳𑀭𑀣𑀸’’𑀢𑀺. 𑀲𑀘𑁂 𑀳𑀭𑀦𑁆𑀢𑀺, 𑀲𑀸𑀥𑀼; 𑀦𑁄 𑀘𑁂 𑀳𑀭𑀦𑁆𑀢𑀺, 𑀅𑀣 𑀢𑁂𑀲𑀼 𑀤𑀩𑁆𑀩𑀲𑀫𑁆𑀪𑀸𑀭𑁂𑀲𑀼 𑀳𑀺𑀫𑀯𑀲𑁆𑀲𑀯𑀸𑀢𑀸𑀢𑀧𑀸𑀤𑀻𑀳𑀺 𑀧𑀽𑀢𑀺𑀪𑀽𑀢𑁂𑀲𑀼 𑀯𑀸 𑀘𑁄𑀭𑁂𑀳𑀺 𑀯𑀸 𑀳𑀝𑁂𑀲𑀼 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑁂𑀲𑀼 𑀲𑀻𑀫𑀲𑀸𑀫𑀺𑀓𑀸 𑀪𑀺𑀓𑁆𑀔𑀽 𑀅𑀦𑀼𑀧𑀯𑀚𑁆𑀚𑀸, 𑀦 𑀮𑀩𑁆𑀪𑀸 𑀘𑁄𑀤𑁂𑀢𑀼𑀁 ‘‘𑀢𑀼𑀫𑁆𑀳𑁂𑀳𑀺 𑀅𑀫𑁆𑀳𑀸𑀓𑀁 𑀤𑀩𑁆𑀩𑀲𑀫𑁆𑀪𑀸𑀭𑀸 𑀦𑀸𑀲𑀺𑀢𑀸’’𑀢𑀺 𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀕𑀻𑀯𑀸’’𑀢𑀺 𑀯𑀸. 𑀬𑀁 𑀧𑀦 𑀲𑀻𑀫𑀲𑀸𑀫𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀢𑀁, 𑀢𑀁 𑀲𑀼𑀓𑀢𑀫𑁂𑀯 𑀳𑁄𑀢𑀻𑀢𑀺.

𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄 𑀦𑀺𑀝𑁆𑀞𑀺𑀢𑁄.

𑁮𑁬. 𑀏𑀯𑀁 𑀪𑀺𑀦𑁆𑀦𑀸𑀬 𑀧𑀦 𑀓𑀼𑀝𑀺𑀓𑀸𑀬 𑀥𑀦𑀺𑀬𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀜𑁆𑀘 𑀧𑀼𑀦 𑀓𑀼𑀝𑀺𑀓𑀭𑀡𑀢𑁆𑀣𑀸𑀬 𑀉𑀲𑁆𑀲𑀸𑀳𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀸𑀭𑀼𑀕𑀳𑁂 𑀕𑀡𑀓𑁄𑀢𑀺 𑀭𑀜𑁆𑀜𑁄 𑀤𑀸𑀭𑀼𑀪𑀡𑁆𑀟𑀸𑀕𑀸𑀭𑁂 𑀤𑀸𑀭𑀼𑀕𑁄𑀧𑀓𑁄. 𑀤𑁂𑀯𑀕𑀳𑀤𑀸𑀭𑀽𑀦𑀻𑀢𑀺 𑀤𑁂𑀯𑁂𑀦 𑀕𑀳𑀺𑀢𑀤𑀸𑀭𑀽𑀦𑀺. 𑀭𑀸𑀚𑀧𑀝𑀺𑀕𑁆𑀕𑀳𑀺𑀢𑀪𑀽𑀢𑀸𑀦𑀺 𑀤𑀸𑀭𑀽𑀦𑀻𑀢𑀺 𑀅𑀢𑁆𑀣𑁄. 𑀦𑀕𑀭𑀧𑀝𑀺𑀲𑀗𑁆𑀔𑀸𑀭𑀺𑀓𑀸𑀦𑀻𑀢𑀺 𑀦𑀕𑀭𑀲𑁆𑀲 𑀧𑀝𑀺𑀲𑀗𑁆𑀔𑀸𑀭𑀽𑀧𑀓𑀭𑀡𑀸𑀦𑀺. 𑀆𑀧𑀤𑀢𑁆𑀣𑀸𑀬 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀺𑀤𑀸𑀳𑁂𑀦 𑀯𑀸 𑀧𑀼𑀭𑀸𑀡𑀪𑀸𑀯𑁂𑀦 𑀯𑀸 𑀧𑀝𑀺𑀭𑀸𑀚𑀽𑀧𑀭𑀼𑀦𑁆𑀥𑀦𑀸𑀤𑀺𑀦𑀸 𑀯𑀸 𑀕𑁄𑀧𑀼𑀭𑀝𑁆𑀝𑀸𑀮𑀓𑀭𑀸𑀚𑀦𑁆𑀢𑁂𑀧𑀼𑀭𑀳𑀢𑁆𑀣𑀺𑀲𑀸𑀮𑀸𑀤𑀻𑀦𑀁 𑀯𑀺𑀧𑀢𑁆𑀢𑀺 𑀆𑀧𑀤𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀢𑁆𑀣𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑁂𑀤𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀓𑀼𑀝𑀺𑀬𑀸 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀺𑀜𑁆𑀘𑀺 𑀅𑀕𑁆𑀕𑁂 𑀓𑀺𑀜𑁆𑀘𑀺 𑀫𑀚𑁆𑀛𑁂 𑀓𑀺𑀜𑁆𑀘𑀺 𑀫𑀽𑀮𑁂 𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑁄𑀦𑁆𑀢𑁄 𑀙𑁂𑀤𑀸𑀧𑁂𑀲𑀺.

𑁮𑁭. 𑀯𑀲𑁆𑀲𑀓𑀸𑀭𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁. 𑀫𑀕𑀥𑀫𑀳𑀸𑀫𑀢𑁆𑀢𑁄𑀢𑀺 𑀫𑀕𑀥𑀭𑀝𑁆𑀞𑁂 𑀫𑀳𑀸𑀫𑀢𑁆𑀢𑁄, 𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀫𑀕𑀥𑀭𑀜𑁆𑀜𑁄 𑀯𑀸 𑀫𑀳𑀸𑀫𑀢𑁆𑀢𑁄; 𑀫𑀳𑀸𑀅𑀫𑀘𑁆𑀘𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀲𑀜𑁆𑀜𑀸𑀬𑀫𑀸𑀦𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄. 𑀪𑀡𑁂𑀢𑀺 𑀇𑀲𑁆𑀲𑀭𑀸𑀦𑀁 𑀦𑀻𑀘𑀝𑁆𑀞𑀸𑀦𑀺𑀓𑀧𑀼𑀭𑀺𑀲𑀸𑀮𑀧𑀦𑀁. 𑀩𑀦𑁆𑀥𑀁 𑀆𑀡𑀸𑀧𑁂𑀲𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀧𑀓𑀢𑀺𑀬𑀸𑀧𑀺 𑀢𑀲𑁆𑀫𑀺𑀁 𑀇𑀲𑁆𑀲𑀸𑀧𑀓𑀢𑁄𑀯. 𑀲𑁄 𑀭𑀜𑁆𑀜𑁄 ‘‘𑀆𑀡𑀸𑀧𑁂𑀳𑀻’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀬𑀲𑁆𑀫𑀸 ‘‘𑀧𑀓𑁆𑀓𑁄𑀲𑀸𑀧𑁂𑀳𑀻’’𑀢𑀺 𑀭𑀜𑁆𑀜𑁄 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀦𑀁 𑀳𑀢𑁆𑀣𑁂𑀲𑀼 𑀘 𑀧𑀸𑀤𑁂𑀲𑀼 𑀘 𑀩𑀦𑁆𑀥𑀁 𑀓𑀢𑁆𑀯𑀸 𑀆𑀡𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀩𑀦𑁆𑀥𑀁 𑀆𑀡𑀸𑀧𑁂𑀲𑀺. 𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄𑀢𑀺 𑀓𑀣𑀁 𑀅𑀤𑁆𑀤𑀲? 𑀲𑁄 𑀓𑀺𑀭 𑀅𑀢𑁆𑀢𑀦𑀸 𑀮𑁂𑀲𑁂𑀦 𑀤𑀸𑀭𑀽𑀦𑀁 𑀳𑀝𑀪𑀸𑀯𑀁 𑀜𑀢𑁆𑀯𑀸 ‘‘𑀦𑀺𑀲𑁆𑀲𑀁𑀲𑀬𑀁 𑀏𑀲 𑀤𑀸𑀭𑀽𑀦𑀁 𑀓𑀸𑀭𑀡𑀸 𑀭𑀸𑀚𑀓𑀼𑀮𑀢𑁄 𑀯𑀥𑀁 𑀯𑀸 𑀩𑀦𑁆𑀥𑀁 𑀯𑀸 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀢𑀤𑀸 𑀦𑀁 𑀅𑀳𑀫𑁂𑀯 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀘𑁆𑀘𑀓𑀸𑀮𑀁 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑁄𑀬𑁂𑀯 𑀯𑀺𑀘𑀭𑀢𑀺. 𑀢𑀲𑁆𑀫𑀸 𑀢𑀔𑀡𑀜𑁆𑀜𑁂𑀯 𑀕𑀦𑁆𑀢𑁆𑀯𑀸 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲 𑀔𑁄 𑀆𑀬𑀲𑁆𑀫𑀸 𑀥𑀦𑀺𑀬𑁄’’𑀢𑀺. 𑀤𑀸𑀭𑀽𑀦𑀁 𑀓𑀺𑀘𑁆𑀘𑀸𑀢𑀺 𑀤𑀸𑀭𑀽𑀦𑀁 𑀓𑀸𑀭𑀡𑀸. 𑀧𑀼𑀭𑀸𑀳𑀁 𑀳𑀜𑁆𑀜𑀸𑀫𑀻𑀢𑀺 𑀅𑀳𑀁 𑀧𑀼𑀭𑀸 𑀳𑀜𑁆𑀜𑀸𑀫𑀺; 𑀬𑀸𑀯 𑀅𑀳𑀁 𑀦 𑀳𑀜𑁆𑀜𑀸𑀫𑀺, 𑀢𑀸𑀯 𑀢𑁆𑀯𑀁 𑀏𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄.

𑁮𑁮. 𑀇𑀗𑁆𑀖, 𑀪𑀦𑁆𑀢𑁂, 𑀲𑀭𑀸𑀧𑁂𑀳𑀻𑀢𑀺 𑀏𑀢𑁆𑀣 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀞𑀫𑀸𑀪𑀺𑀲𑀺𑀢𑁆𑀢𑁄𑀢𑀺 𑀅𑀪𑀺𑀲𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀞𑀫𑀁. 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 ‘‘𑀤𑀺𑀦𑁆𑀦𑀜𑁆𑀜𑁂𑀯 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀺𑀡𑀓𑀝𑁆𑀞𑁄𑀤𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀇𑀫𑀁 𑀏𑀯𑀭𑀽𑀧𑀺𑀁 𑀯𑀸𑀘𑀁 𑀅𑀪𑀺𑀲𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀞𑀫𑀫𑁂𑀯 𑀬𑀁 𑀢𑁆𑀯𑀁 𑀅𑀪𑀸𑀲𑀺, 𑀢𑀁 𑀲𑀬𑀫𑁂𑀯 𑀪𑀸𑀲𑀺𑀢𑁆𑀯𑀸 𑀇𑀤𑀸𑀦𑀺 𑀲𑀭𑀲𑀺, 𑀦 𑀲𑀭𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀸𑀚𑀸𑀦𑁄 𑀓𑀺𑀭 𑀅𑀪𑀺𑀲𑀺𑀢𑁆𑀢𑀫𑀢𑁆𑀢𑀸𑀬𑁂𑀯 𑀥𑀫𑁆𑀫𑀪𑁂𑀭𑀺𑀁 𑀘𑀭𑀸𑀧𑁂𑀦𑁆𑀢𑀺 𑁋 ‘‘𑀤𑀺𑀦𑁆𑀦𑀜𑁆𑀜𑁂𑀯 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀺𑀡𑀓𑀝𑁆𑀞𑁄𑀤𑀓𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀢𑀁 𑀲𑀦𑁆𑀥𑀸𑀬 𑀏𑀲 𑀯𑀤𑀢𑀺. 𑀢𑁂𑀲𑀁 𑀫𑀬𑀸 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺 𑀢𑁂𑀲𑀁 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸𑀦𑀁 𑀲𑀫𑀺𑀢𑀩𑀸𑀳𑀺𑀢𑀧𑀸𑀧𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀺𑀡𑀓𑀝𑁆𑀞𑁄𑀤𑀓𑀳𑀭𑀡𑀁 𑀲𑀦𑁆𑀥𑀸𑀬 𑀫𑀬𑀸 𑀏𑀢𑀁 𑀪𑀸𑀲𑀺𑀢𑀁; 𑀦 𑀢𑀼𑀫𑁆𑀳𑀸𑀤𑀺𑀲𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀘 𑀔𑁄 𑀅𑀭𑀜𑁆𑀜𑁂 𑀅𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀢𑀜𑁆𑀘 𑀢𑀺𑀡𑀓𑀝𑁆𑀞𑁄𑀤𑀓𑀁 𑀬𑀁 𑀅𑀭𑀜𑁆𑀜𑁂 𑀅𑀧𑀭𑀺𑀕𑁆𑀕𑀳𑀺𑀢𑀁 𑀳𑁄𑀢𑀺; 𑀏𑀢𑀁 𑀲𑀦𑁆𑀥𑀸𑀬 𑀫𑀬𑀸 𑀪𑀸𑀲𑀺𑀢𑀦𑁆𑀢𑀺 𑀤𑀻𑀧𑁂𑀢𑀺.

𑀮𑁄𑀫𑁂𑀦 𑀢𑁆𑀯𑀁 𑀫𑀼𑀢𑁆𑀢𑁄𑀲𑀻𑀢𑀺 𑀏𑀢𑁆𑀣 𑀮𑁄𑀫𑀫𑀺𑀯 𑀮𑁄𑀫𑀁, 𑀓𑀺𑀁 𑀧𑀦 𑀢𑀁? 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀦𑀸𑀫 𑀥𑀼𑀢𑁆𑀢𑀸 ‘‘𑀫𑀁𑀲𑀁 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀕𑁆𑀖𑀮𑁄𑀫𑀁 𑀏𑀴𑀓𑀁 𑀕𑀡𑁆𑀳𑁂𑀬𑁆𑀬𑀼𑀁. 𑀢𑀫𑁂𑀦𑀁 𑀅𑀜𑁆𑀜𑁄 𑀯𑀺𑀜𑁆𑀜𑀼𑀧𑀼𑀭𑀺𑀲𑁄 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀏𑀴𑀓𑀲𑁆𑀲 𑀫𑀁𑀲𑀁 𑀓𑀳𑀸𑀧𑀡𑀫𑀢𑁆𑀢𑀁 𑀅𑀕𑁆𑀖𑀢𑀺. 𑀮𑁄𑀫𑀸𑀦𑀺 𑀧𑀦 𑀮𑁄𑀫𑀯𑀸𑀭𑁂 𑀮𑁄𑀫𑀯𑀸𑀭𑁂 𑀅𑀦𑁂𑀓𑁂 𑀓𑀳𑀸𑀧𑀡𑁂 𑀅𑀕𑁆𑀖𑀦𑁆𑀢𑀻’’𑀢𑀺 𑀤𑁆𑀯𑁂 𑀅𑀮𑁄𑀫𑀓𑁂 𑀏𑀴𑀓𑁂 𑀤𑀢𑁆𑀯𑀸 𑀕𑀡𑁆𑀳𑁂𑀬𑁆𑀬. 𑀏𑀯𑀁 𑀲𑁄 𑀏𑀴𑀓𑁄 𑀯𑀺𑀜𑁆𑀜𑀼𑀧𑀼𑀭𑀺𑀲𑀫𑀸𑀕𑀫𑁆𑀫 𑀮𑁄𑀫𑁂𑀦 𑀫𑀼𑀘𑁆𑀘𑁂𑀬𑁆𑀬. 𑀏𑀯𑀫𑁂𑀯 𑀢𑁆𑀯𑀁 𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀯𑀥𑀩𑀦𑁆𑀥𑀦𑀸𑀭𑀳𑁄. 𑀬𑀲𑁆𑀫𑀸 𑀧𑀦 𑀅𑀭𑀳𑀤𑁆𑀥𑀚𑁄 𑀲𑀩𑁆𑀪𑀺 𑀅𑀯𑀚𑁆𑀛𑀭𑀽𑀧𑁄, 𑀢𑁆𑀯𑀜𑁆𑀘 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀢𑁆𑀢𑀸 𑀬𑀁 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀪𑀽𑀢𑀁 𑀅𑀭𑀳𑀤𑁆𑀥𑀚𑀁 𑀥𑀸𑀭𑁂𑀲𑀺. 𑀢𑀲𑁆𑀫𑀸 𑀢𑁆𑀯𑀁 𑀇𑀫𑀺𑀦𑀸 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀮𑁄𑀫𑁂𑀦 𑀏𑀴𑀓𑁄 𑀯𑀺𑀬 𑀯𑀺𑀜𑁆𑀜𑀼𑀧𑀼𑀭𑀺𑀲𑀫𑀸𑀕𑀫𑁆𑀫 𑀫𑀼𑀢𑁆𑀢𑁄𑀲𑀻𑀢𑀺.

𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀭𑀜𑁆𑀜𑁄 𑀧𑀭𑀺𑀲𑀢𑀺 𑀪𑀸𑀲𑀫𑀸𑀦𑀲𑁆𑀲 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘 𑀲𑀼𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺, 𑀅𑀯𑀚𑁆𑀛𑀸𑀬𑀦𑁆𑀢𑀺, 𑀅𑀯𑀚𑀸𑀦𑀦𑁆𑀢𑀸 𑀢𑀁 𑀛𑀸𑀬𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀺 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀺𑀬𑁆𑀬𑀦𑁆𑀢𑀻𑀢𑀺 𑀢𑀲𑁆𑀲 𑀅𑀯𑀡𑁆𑀡𑀁 𑀓𑀣𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺. 𑀯𑀺𑀧𑀸𑀘𑁂𑀦𑁆𑀢𑀻𑀢𑀺 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀧𑀢𑁆𑀣𑀭𑀦𑁆𑀢𑀺; 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 ‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸’’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀦𑁆𑀢𑀸 𑀉𑀚𑁆𑀛𑀸𑀬𑀦𑁆𑀢𑀺. ‘‘𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜’’𑀦𑁆𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑀸 𑀔𑀺𑀬𑁆𑀬𑀦𑁆𑀢𑀺. ‘‘𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸’’𑀢𑀺𑀆𑀤𑀻𑀦𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀢𑁆𑀣𑀸𑀭𑁂𑀦𑁆𑀢𑀸 𑀯𑀺𑀧𑀸𑀘𑁂𑀦𑁆𑀢𑀻𑀢𑀺. 𑀏𑀢𑁂𑀦 𑀦𑀬𑁂𑀦 𑀇𑀫𑁂𑀲𑀁 𑀧𑀤𑀸𑀦𑀁 𑀇𑀢𑁄 𑀧𑀭𑀫𑁆𑀧𑀺 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀧𑀤𑀸𑀦𑀼𑀭𑀽𑀧𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 𑀲𑁂𑀝𑁆𑀞𑀘𑀸𑀭𑀺𑀦𑁄. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀪𑀸𑀯𑁄. 𑀩𑁆𑀭𑀳𑁆𑀫𑀜𑁆𑀜𑀦𑁆𑀢𑀺 𑀲𑁂𑀝𑁆𑀞𑀪𑀸𑀯𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀭𑀜𑁆𑀜𑁄 𑀤𑀸𑀭𑀽𑀦𑀻𑀢𑀺𑀆𑀤𑀺𑀫𑁆𑀳𑀺 ‘‘𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀲𑁆𑀲𑀢𑀻’’𑀢𑀺 𑀅𑀬𑀁 𑀉𑀚𑁆𑀛𑀸𑀬𑀦𑀢𑁆𑀣𑁄. 𑀬𑀁 𑀧𑀦𑁂𑀢𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀜𑁆𑀜𑁄 𑀤𑀸𑀭𑀽𑀦𑀻’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀯𑀘𑀦𑀪𑁂𑀤𑁂 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀳𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀸𑀡𑀯𑁄𑀳𑀸𑀭𑀺𑀓𑁄 𑀫𑀳𑀸𑀫𑀢𑁆𑀢𑁄𑀢𑀺 𑀪𑀺𑀓𑁆𑀔𑀼𑀪𑀸𑀯𑀢𑁄 𑀧𑀼𑀭𑀸𑀡𑁂 𑀕𑀺𑀳𑀺𑀓𑀸𑀮𑁂 𑀯𑀺𑀦𑀺𑀘𑁆𑀙𑀬𑀯𑁄𑀳𑀸𑀭𑁂 𑀦𑀺𑀬𑀼𑀢𑁆𑀢𑀢𑁆𑀢𑀸 ‘‘𑀯𑁄𑀳𑀸𑀭𑀺𑀓𑁄’’𑀢𑀺 𑀲𑀗𑁆𑀔𑀁 𑀕𑀢𑁄 𑀫𑀳𑀸𑀅𑀫𑀘𑁆𑀘𑁄.

𑀅𑀣 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀸𑀢𑀺 𑀪𑀕𑀯𑀸 𑀲𑀸𑀫𑀁𑀬𑁂𑀯 𑀮𑁄𑀓𑀯𑁄𑀳𑀸𑀭𑀫𑁆𑀧𑀺 𑀚𑀸𑀦𑀸𑀢𑀺, 𑀅𑀢𑀻𑀢𑀩𑀼𑀤𑁆𑀥𑀸𑀦𑀁 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀚𑀸𑀦𑀸𑀢𑀺 𑁋 ‘‘𑀧𑀼𑀩𑁆𑀩𑁂𑀧𑀺 𑀩𑀼𑀤𑁆𑀥𑀸 𑀏𑀢𑁆𑀢𑀓𑁂𑀦 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀏𑀢𑁆𑀢𑀓𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀏𑀢𑁆𑀢𑀓𑁂𑀦 𑀤𑀼𑀓𑁆𑀓𑀝’’𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀘𑁂 𑀅𑀜𑁆𑀜𑁂𑀳𑀺 𑀮𑁄𑀓𑀯𑁄𑀳𑀸𑀭𑀯𑀺𑀜𑁆𑀜𑀽𑀳𑀺 𑀲𑀤𑁆𑀥𑀺𑀁 𑀅𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀸𑀤𑀫𑀢𑁆𑀢𑁂𑀦 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀬𑁆𑀬, 𑀢𑁂𑀦𑀲𑁆𑀲 𑀲𑀺𑀬𑀼𑀁 𑀯𑀢𑁆𑀢𑀸𑀭𑁄 ‘‘𑀲𑀻𑀮𑀲𑀁𑀯𑀭𑁄 𑀦𑀸𑀫 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀅𑀧𑁆𑀧𑀫𑁂𑀬𑁆𑀬𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄 𑀫𑀳𑀸𑀧𑀣𑀯𑀻-𑀲𑀫𑀼𑀤𑁆𑀤-𑀆𑀓𑀸𑀲𑀸𑀦𑀺 𑀯𑀺𑀬 𑀅𑀢𑀺𑀯𑀺𑀢𑁆𑀣𑀺𑀡𑁆𑀡𑁄, 𑀓𑀣𑀜𑁆𑀳𑀺 𑀦𑀸𑀫 𑀪𑀕𑀯𑀸 𑀧𑀸𑀤𑀫𑀢𑁆𑀢𑀓𑁂𑀦 𑀦𑀸𑀲𑁂𑀲𑀻’’𑀢𑀺! 𑀢𑀢𑁄 𑀢𑀣𑀸𑀕𑀢𑀲𑁆𑀲 𑀜𑀸𑀡𑀩𑀮𑀁 𑀅𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀸𑀧𑀤𑀁 𑀓𑁄𑀧𑁂𑀬𑁆𑀬𑀼𑀁, 𑀧𑀜𑁆𑀜𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀬𑀣𑀸𑀞𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬. 𑀮𑁄𑀓𑀯𑁄𑀳𑀸𑀭𑀯𑀺𑀜𑁆𑀜𑀽𑀳𑀺 𑀧𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀲𑁄 𑀉𑀧𑀯𑀸𑀤𑁄 𑀦 𑀳𑁄𑀢𑀺. 𑀅𑀜𑁆𑀜𑀤𑀢𑁆𑀣𑀼 𑀏𑀯𑀁 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 𑁋 ‘‘𑀇𑀫𑁂𑀳𑀺 𑀦𑀸𑀫 𑀅𑀕𑀸𑀭𑀺𑀓𑀸𑀧𑀺 𑀧𑀸𑀤𑀫𑀢𑁆𑀢𑁂𑀦 𑀘𑁄𑀭𑀁 𑀳𑀦𑀦𑁆𑀢𑀺𑀧𑀺 𑀩𑀦𑁆𑀥𑀦𑁆𑀢𑀺𑀧𑀺 𑀧𑀩𑁆𑀩𑀸𑀚𑁂𑀦𑁆𑀢𑀺𑀧𑀺. 𑀓𑀲𑁆𑀫𑀸 𑀪𑀕𑀯𑀸 𑀧𑀩𑁆𑀩𑀚𑀺𑀢𑀁 𑀦 𑀦𑀸𑀲𑁂𑀲𑁆𑀲𑀢𑀺; 𑀬𑁂𑀦 𑀧𑀭𑀲𑀦𑁆𑀢𑀓𑀁 𑀢𑀺𑀡𑀲𑀮𑀸𑀓𑀫𑀢𑁆𑀢𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺! 𑀢𑀣𑀸𑀕𑀢𑀲𑁆𑀲 𑀘 𑀜𑀸𑀡𑀩𑀮𑀁 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀧𑀜𑁆𑀜𑀢𑁆𑀢𑀫𑁆𑀧𑀺 𑀘 𑀲𑀺𑀓𑁆𑀔𑀸𑀧𑀤𑀁 𑀅𑀓𑀼𑀧𑁆𑀧𑀁 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀞𑀸𑀦𑁂 𑀞𑀲𑁆𑀲𑀢𑀺. 𑀢𑀲𑁆𑀫𑀸 𑀮𑁄𑀓𑀯𑁄𑀳𑀸𑀭𑀯𑀺𑀜𑁆𑀜𑀽𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀧𑁂𑀢𑀼𑀓𑀸𑀫𑁄 𑀲𑀩𑁆𑀩𑀸𑀯𑀦𑁆𑀢𑀁 𑀧𑀭𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀦𑁆𑀢𑁄 𑀅𑀣 𑀔𑁄 𑀪𑀕𑀯𑀸 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 ‘‘𑀓𑀺𑀢𑁆𑀢𑀓𑁂𑀦 𑀔𑁄 𑀪𑀺𑀓𑁆𑀔𑀼 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀳𑀦𑀢𑀺 𑀯𑀸 𑀩𑀦𑁆𑀥𑀢𑀺 𑀯𑀸 𑀧𑀩𑁆𑀩𑀸𑀚𑁂𑀢𑀺 𑀯𑀸’’𑀢𑀺.

𑀢𑀢𑁆𑀣 𑀫𑀸𑀕𑀥𑁄𑀢𑀺 𑀫𑀕𑀥𑀸𑀦𑀁 𑀇𑀲𑁆𑀲𑀭𑁄. 𑀲𑁂𑀦𑀺𑀬𑁄𑀢𑀺 𑀲𑁂𑀦𑀸𑀬 𑀲𑀫𑁆𑀧𑀦𑁆𑀦𑁄. 𑀩𑀺𑀫𑁆𑀩𑀺𑀲𑀸𑀭𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀧𑀩𑁆𑀩𑀸𑀚𑁂𑀢𑀺 𑀯𑀸𑀢𑀺 𑀭𑀝𑁆𑀞𑀢𑁄 𑀦𑀺𑀓𑁆𑀔𑀸𑀫𑁂𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀧𑀜𑁆𑀘𑀫𑀸𑀲𑀓𑁄 𑀧𑀸𑀤𑁄𑀢𑀺 𑀢𑀤𑀸 𑀭𑀸𑀚𑀕𑀳𑁂 𑀯𑀻𑀲𑀢𑀺𑀫𑀸𑀲𑀓𑁄 𑀓𑀳𑀸𑀧𑀡𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀫𑀸𑀲𑀓𑁄 𑀧𑀸𑀤𑁄. 𑀏𑀢𑁂𑀦 𑀮𑀓𑁆𑀔𑀡𑁂𑀦 𑀲𑀩𑁆𑀩𑀚𑀦𑀧𑀤𑁂𑀲𑀼 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄 ‘‘𑀧𑀸𑀤𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀔𑁄 𑀧𑁄𑀭𑀸𑀡𑀲𑁆𑀲 𑀦𑀻𑀮𑀓𑀳𑀸𑀧𑀡𑀲𑁆𑀲 𑀯𑀲𑁂𑀦, 𑀦 𑀇𑀢𑀭𑁂𑀲𑀁 𑀭𑀼𑀤𑁆𑀭𑀤𑀸𑀫𑀓𑀸𑀤𑀻𑀦𑀁. 𑀢𑁂𑀦 𑀳𑀺 𑀧𑀸𑀤𑁂𑀦 𑀅𑀢𑀻𑀢𑀩𑀼𑀤𑁆𑀥𑀸𑀧𑀺 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀼𑀁, 𑀅𑀦𑀸𑀕𑀢𑀸𑀧𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀫𑁆𑀳𑀺 𑀯𑀸 𑀧𑀸𑀭𑀸𑀚𑀺𑀓𑁂 𑀯𑀸 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺. 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀦𑀺. 𑀇𑀫𑀸𑀦𑁂𑀯 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺. 𑀇𑀢𑁄 𑀊𑀦𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀦𑀢𑁆𑀣𑀺. 𑀢𑀲𑁆𑀫𑀸 𑀪𑀕𑀯𑀸𑀧𑀺 𑀥𑀦𑀺𑀬𑀁 𑀯𑀺𑀕𑀭𑀳𑀺𑀢𑁆𑀯𑀸 𑀧𑀸𑀤𑁂𑀦𑁂𑀯 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀭𑀚𑀓𑀪𑀡𑁆𑀟𑀺𑀓𑀯𑀢𑁆𑀣𑀼 𑀉𑀤𑀧𑀸𑀤𑀺, 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑀘 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀫𑁆𑀩𑀦𑁆𑀥𑁄 𑀘 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀇𑀥, 𑀏𑀯𑀁 𑀇𑀢𑁄 𑀧𑀭𑁂𑀲𑀼 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑁂𑀲𑀼. 𑀬𑀁 𑀬𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀁 𑀢𑀁 𑀲𑀩𑁆𑀩𑀁 𑀯𑀚𑁆𑀚𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀅𑀧𑀼𑀩𑁆𑀩𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀬𑀤𑀺 𑀳𑀺 𑀬𑀁 𑀬𑀁 𑀯𑀼𑀢𑁆𑀢𑀦𑀬𑀁, 𑀢𑀁 𑀢𑀁 𑀧𑀼𑀦𑀧𑀺 𑀯𑀡𑁆𑀡𑀬𑀺𑀲𑁆𑀲𑀸𑀫, 𑀓𑀤𑀸 𑀯𑀡𑁆𑀡𑀦𑀸𑀬 𑀅𑀦𑁆𑀢𑀁 𑀕𑀫𑀺𑀲𑁆𑀲𑀸𑀫! 𑀢𑀲𑁆𑀫𑀸 𑀬𑀁 𑀬𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀢𑀁 𑀢𑀁 𑀲𑀩𑁆𑀩𑀁 𑀲𑀸𑀥𑀼𑀓𑀁 𑀉𑀧𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀅𑀢𑁆𑀣𑁄 𑀘 𑀬𑁄𑀚𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀼𑀩𑁆𑀩𑀁 𑀧𑀦 𑀬𑀁𑀓𑀺𑀜𑁆𑀘𑀺 𑀅𑀦𑀼𑀢𑁆𑀢𑀸𑀦𑀢𑁆𑀣𑀁, 𑀢𑀁 𑀲𑀩𑁆𑀩𑀁 𑀫𑀬𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫.

𑀥𑀦𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯𑁦. 𑀭𑀚𑀓𑀢𑁆𑀣𑀭𑀡𑀁 𑀕𑀦𑁆𑀢𑁆𑀯𑀸𑀢𑀺 𑀭𑀚𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸; 𑀢𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀭𑀚𑀓𑀸 𑀯𑀢𑁆𑀣𑀸𑀦𑀺 𑀅𑀢𑁆𑀣𑀭𑀦𑁆𑀢𑀺, 𑀢𑀲𑁆𑀫𑀸 𑀭𑀚𑀓𑀢𑁆𑀣𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀭𑀚𑀓𑀪𑀡𑁆𑀟𑀺𑀓𑀦𑁆𑀢𑀺 𑀭𑀚𑀓𑀸𑀦𑀁 𑀪𑀡𑁆𑀟𑀺𑀓𑀁; 𑀭𑀚𑀓𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑀸 𑀩𑀳𑀽𑀦𑀺 𑀯𑀢𑁆𑀣𑀸𑀦𑀺 𑀏𑀓𑁂𑀓𑀁 𑀪𑀡𑁆𑀟𑀺𑀓𑀁 𑀩𑀦𑁆𑀥𑀦𑁆𑀢𑀺. 𑀢𑀢𑁄 𑀏𑀓𑀁 𑀪𑀡𑁆𑀟𑀺𑀓𑀁 𑀢𑁂𑀲𑀁 𑀧𑀫𑀸𑀤𑁂𑀦 𑀅𑀧𑀲𑁆𑀲𑀦𑁆𑀢𑀸𑀦𑀁 𑀅𑀯𑀳𑀭𑀺𑀢𑁆𑀯𑀸 𑀣𑁂𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁯𑁨. 𑀕𑀸𑀫𑁄𑀦𑀸𑀫𑀸𑀢𑀺 𑀏𑀯𑀫𑀸𑀤𑀺 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀘 𑀅𑀭𑀜𑁆𑀜𑀲𑁆𑀲 𑀘 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀺𑀁 𑀕𑀸𑀫𑁂 𑀏𑀓𑀸 𑀏𑀯 𑀓𑀼𑀝𑀺, 𑀏𑀓𑀁 𑀕𑁂𑀳𑀁 𑀲𑁂𑀬𑁆𑀬𑀣𑀸𑀧𑀺 𑀫𑀮𑀬𑀚𑀦𑀧𑀤𑁂; 𑀅𑀬𑀁 𑀏𑀓𑀓𑀼𑀝𑀺𑀓𑁄 𑀕𑀸𑀫𑁄 𑀦𑀸𑀫. 𑀏𑀢𑁂𑀦 𑀦𑀬𑁂𑀦 𑀅𑀧𑀭𑁂𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀫𑀦𑀼𑀲𑁆𑀲𑁄𑀦𑀸𑀫 𑀬𑁄 𑀲𑀩𑁆𑀩𑀲𑁄 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀪𑀸𑀯𑁂𑀦 𑀬𑀓𑁆𑀔𑀧𑀭𑀺𑀕𑁆𑀕𑀳𑀪𑀽𑀢𑁄; 𑀬𑀢𑁄 𑀯𑀸 𑀫𑀦𑀼𑀲𑁆𑀲𑀸 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀧𑀼𑀦𑀧𑀺 𑀆𑀕𑀦𑁆𑀢𑀼𑀓𑀸𑀫𑀸 𑀏𑀯 𑀅𑀧𑀓𑁆𑀓𑀦𑁆𑀢𑀸. 𑀧𑀭𑀺𑀓𑁆𑀔𑀺𑀢𑁆𑀢𑁄𑀦𑀸𑀫 𑀇𑀝𑁆𑀞𑀓𑀧𑀸𑀓𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑀫𑀲𑁄 𑀓𑀡𑁆𑀝𑀓𑀲𑀸𑀔𑀸𑀳𑀺𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀕𑁄𑀦𑀺𑀲𑀸𑀤𑀺𑀦𑀺𑀯𑀺𑀝𑁆𑀞𑁄𑀦𑀸𑀫 𑀯𑀻𑀣𑀺𑀲𑀦𑁆𑀦𑀺𑀯𑁂𑀲𑀸𑀤𑀺𑀯𑀲𑁂𑀦 𑀅𑀦𑀺𑀯𑀺𑀲𑀺𑀢𑁆𑀯𑀸 𑀬𑀣𑀸 𑀕𑀸𑀯𑁄 𑀢𑀢𑁆𑀣 𑀢𑀢𑁆𑀣 𑀤𑁆𑀯𑁂 𑀢𑀬𑁄 𑀦𑀺𑀲𑀻𑀤𑀦𑁆𑀢𑀺, 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀤𑁆𑀯𑁂 𑀢𑀻𑀡𑀺 𑀖𑀭𑀸𑀦𑀺 𑀓𑀢𑁆𑀯𑀸 𑀦𑀺𑀯𑀺𑀝𑁆𑀞𑁄. 𑀲𑀢𑁆𑀣𑁄𑀢𑀺 𑀚𑀗𑁆𑀖𑀲𑀢𑁆𑀣𑀲𑀓𑀝𑀲𑀢𑁆𑀣𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀇𑀫𑀲𑁆𑀫𑀺𑀜𑁆𑀘 𑀲𑀺𑀓𑁆𑀔𑀸𑀧𑀤𑁂 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺 𑀕𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀕𑀸𑀫𑀽𑀧𑀘𑀸𑀭𑁄𑀢𑀺𑀆𑀤𑀺 𑀅𑀭𑀜𑁆𑀜𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲𑀸𑀢𑀺 𑀬𑀲𑁆𑀲 𑀕𑀸𑀫𑀲𑁆𑀲 𑀅𑀦𑀼𑀭𑀸𑀥𑀧𑀼𑀭𑀲𑁆𑀲𑁂𑀯 𑀤𑁆𑀯𑁂 𑀇𑀦𑁆𑀤𑀔𑀻𑀮𑀸, 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀺𑀫𑁂 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲; 𑀢𑀲𑁆𑀲 𑀳𑀺 𑀩𑀸𑀳𑀺𑀭𑁄 𑀇𑀦𑁆𑀤𑀔𑀻𑀮𑁄 𑀆𑀪𑀺𑀥𑀫𑁆𑀫𑀺𑀓𑀦𑀬𑁂𑀦 𑀅𑀭𑀜𑁆𑀜𑀲𑀗𑁆𑀔𑁂𑀧𑀁 𑀕𑀘𑁆𑀙𑀢𑀺. 𑀬𑀲𑁆𑀲 𑀧𑀦 𑀏𑀓𑁄, 𑀢𑀲𑁆𑀲 𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑁂 𑀞𑀺𑀢𑀲𑁆𑀲. 𑀬𑀢𑁆𑀭𑀸𑀧𑀺 𑀳𑀺 𑀇𑀦𑁆𑀤𑀔𑀻𑀮𑁄 𑀦𑀢𑁆𑀣𑀺, 𑀢𑀢𑁆𑀭 𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑀫𑁂𑀯 ‘‘𑀇𑀦𑁆𑀤𑀔𑀻𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀕𑀸𑀫𑀤𑁆𑀯𑀸𑀭𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑁂 𑀞𑀺𑀢𑀲𑁆𑀲𑀸’’𑀢𑀺. 𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲, 𑀦𑁄 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲, 𑀦𑁂𑀯 𑀅𑀧𑁆𑀧𑀣𑀸𑀫𑀲𑁆𑀲, 𑀦 𑀫𑀳𑀸𑀣𑀸𑀫𑀲𑁆𑀲; 𑀫𑀚𑁆𑀛𑀺𑀫𑀣𑀸𑀫𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁂𑀟𑁆𑀟𑀼𑀧𑀸𑀢𑁄𑀢𑀺 𑀬𑀣𑀸 𑀫𑀸𑀢𑀼𑀕𑀸𑀫𑁄 𑀓𑀸𑀓𑁂 𑀉𑀟𑁆𑀟𑀸𑀧𑁂𑀦𑁆𑀢𑁄 𑀉𑀚𑀼𑀓𑀫𑁂𑀯 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀮𑁂𑀟𑁆𑀟𑀼𑀁 𑀔𑀺𑀧𑀢𑀺, 𑀬𑀣𑀸 𑀘 𑀉𑀤𑀓𑀼𑀓𑁆𑀔𑁂𑀧𑁂 𑀉𑀤𑀓𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀅𑀔𑀺𑀧𑀺𑀢𑁆𑀯𑀸 𑀬𑀣𑀸 𑀢𑀭𑀼𑀡𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀦𑁆𑀢𑀸 𑀩𑀸𑀳𑀁 𑀧𑀲𑀸𑀭𑁂𑀢𑁆𑀯𑀸 𑀮𑁂𑀟𑁆𑀟𑀼𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀔𑀺𑀢𑁆𑀢𑀲𑁆𑀲 𑀮𑁂𑀟𑁆𑀟𑀼𑀲𑁆𑀲 𑀧𑀢𑀦𑀝𑁆𑀞𑀸𑀦𑀁. 𑀧𑀢𑀺𑀢𑁄 𑀧𑀦 𑀮𑀼𑀞𑀺𑀢𑁆𑀯𑀸 𑀬𑀢𑁆𑀣 𑀕𑀘𑁆𑀙𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄𑀢𑀺 𑀏𑀢𑁆𑀣 𑀧𑀦 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀼𑀧𑁆𑀧𑀧𑀸𑀢𑁄 𑀯𑀸 𑀫𑀼𑀲𑀮𑀧𑀸𑀢𑁄 𑀯𑀸 𑀖𑀭𑀽𑀧𑀘𑀸𑀭𑁄 𑀦𑀸𑀫. 𑀢𑀲𑁆𑀫𑀺𑀁 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄 𑀕𑀸𑀫𑀽𑀧𑀘𑀸𑀭𑁄𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀢𑀸𑀤𑀺𑀲𑀫𑁂𑀯. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀖𑀭𑀁 𑀦𑀸𑀫, 𑀖𑀭𑀽𑀧𑀘𑀸𑀭𑁄 𑀦𑀸𑀫, 𑀕𑀸𑀫𑁄 𑀦𑀸𑀫, 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸’’𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀦𑀺𑀩𑁆𑀩𑀓𑁄𑀲𑀲𑁆𑀲 𑀉𑀤𑀓𑀧𑀸𑀢𑀝𑁆𑀞𑀸𑀦𑀩𑁆𑀪𑀦𑁆𑀢𑀭𑀁 𑀖𑀭𑀁 𑀦𑀸𑀫. 𑀬𑀁 𑀧𑀦 𑀤𑁆𑀯𑀸𑀭𑁂 𑀞𑀺𑀢𑁄 𑀫𑀸𑀢𑀼𑀕𑀸𑀫𑁄 𑀪𑀸𑀚𑀦𑀥𑁄𑀯𑀦𑀉𑀤𑀓𑀁 𑀙𑀟𑁆𑀟𑁂𑀢𑀺, 𑀢𑀲𑁆𑀲 𑀧𑀢𑀦𑀝𑁆𑀞𑀸𑀦𑀜𑁆𑀘 𑀫𑀸𑀢𑀼𑀕𑀸𑀫𑁂𑀦𑁂𑀯 𑀅𑀦𑁆𑀢𑁄𑀕𑁂𑀳𑁂 𑀞𑀺𑀢𑁂𑀦 𑀧𑀓𑀢𑀺𑀬𑀸 𑀩𑀳𑀺 𑀔𑀺𑀢𑁆𑀢𑀲𑁆𑀲 𑀲𑀼𑀧𑁆𑀧𑀲𑁆𑀲 𑀯𑀸 𑀲𑀫𑁆𑀫𑀼𑀜𑁆𑀚𑀦𑀺𑀬𑀸 𑀯𑀸 𑀧𑀢𑀦𑀝𑁆𑀞𑀸𑀦𑀜𑁆𑀘, 𑀖𑀭𑀲𑁆𑀲 𑀧𑀼𑀭𑀢𑁄 𑀤𑁆𑀯𑀻𑀲𑀼 𑀓𑁄𑀡𑁂𑀲𑀼 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀫𑀚𑁆𑀛𑁂 𑀭𑀼𑀓𑁆𑀔𑀲𑀽𑀘𑀺𑀤𑁆𑀯𑀸𑀭𑀁 𑀞𑀧𑁂𑀢𑁆𑀯𑀸 𑀕𑁄𑀭𑀽𑀧𑀸𑀦𑀁 𑀧𑀯𑁂𑀲𑀦𑀦𑀺𑀯𑀸𑀭𑀡𑀢𑁆𑀣𑀁 𑀓𑀢𑀧𑀭𑀺𑀓𑁆𑀔𑁂𑀧𑁄 𑀘 𑀅𑀬𑀁 𑀲𑀩𑁆𑀩𑁄𑀧𑀺 𑀖𑀭𑀽𑀧𑀘𑀸𑀭𑁄 𑀦𑀸𑀫. 𑀢𑀲𑁆𑀫𑀺𑀁 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀩𑁆𑀪𑀦𑁆𑀢𑀭𑀁 𑀕𑀸𑀫𑁄 𑀦𑀸𑀫. 𑀢𑀢𑁄 𑀅𑀜𑁆𑀜𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀕𑀸𑀫𑀽𑀧𑀘𑀸𑀭𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀢𑁆𑀣 𑀧𑀫𑀸𑀡𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄 𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑁄 𑀯𑀸 𑀣𑁂𑀭𑀯𑀸𑀤𑁄 𑀯𑀸 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺 𑀲𑁄 𑀧𑀫𑀸𑀡𑀢𑁄 𑀤𑀝𑁆𑀞𑀩𑁆𑀩𑁄.

𑀬𑀜𑁆𑀘𑁂𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀯𑀺𑀭𑀼𑀤𑁆𑀥𑀫𑀺𑀯 𑀤𑀺𑀲𑁆𑀲𑀢𑀺. 𑀧𑀸𑀴𑀺𑀬𑀜𑁆𑀳𑀺 𑁋 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀁 𑀮𑁂𑀟𑁆𑀟𑀼𑀧𑀸𑀢𑀁 𑀕𑀸𑀫𑀲𑀗𑁆𑀔𑁂𑀧𑀁 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀕𑀸𑀫𑀽𑀧𑀘𑀸𑀭𑁄 𑀯𑀼𑀢𑁆𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀘𑁆𑀘𑀫𑁂𑀯 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀅𑀥𑀺𑀧𑁆𑀧𑀸𑀬𑁄 𑀧𑀦𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀫𑁂𑀯 𑀯𑀺𑀤𑀺𑀢𑁄. 𑀢𑀲𑁆𑀫𑀸 𑀬𑀣𑀸 ‘‘𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀖𑀭𑀽𑀧𑀘𑀸𑀭𑀮𑀓𑁆𑀔𑀡𑀁 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀲𑁂𑀦 𑀕𑀳𑀺𑀢𑀁. 𑀏𑀯𑀁 𑀲𑁂𑀲𑀫𑁆𑀧𑀺 𑀕𑀳𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀇𑀥 𑀕𑀸𑀫𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀺 𑁋 𑀧𑀭𑀺𑀓𑁆𑀔𑀺𑀢𑁆𑀢𑁄 𑀘 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀘. 𑀢𑀢𑁆𑀭 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑁄𑀬𑁂𑀯 𑀧𑀭𑀺𑀘𑁆𑀙𑁂𑀤𑁄. 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀲𑀼𑀁 𑀧𑀭𑀺𑀘𑁆𑀙𑁂𑀤𑀁 𑀅𑀯𑀢𑁆𑀯𑀸 ‘‘𑀕𑀸𑀫𑀽𑀧𑀘𑀸𑀭𑁄 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀕𑀸𑀫𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑁄 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀸 𑀢𑀲𑁆𑀲 𑀕𑀸𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀕𑀸𑀫𑀧𑀭𑀺𑀘𑁆𑀙𑁂𑀤𑁂 𑀘 𑀤𑀲𑁆𑀲𑀺𑀢𑁂 𑀕𑀸𑀫𑀽𑀧𑀘𑀸𑀭𑀮𑀓𑁆𑀔𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀧𑀼𑀦 ‘‘𑀢𑀢𑁆𑀣 𑀞𑀺𑀢𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑁄’’𑀢𑀺 𑀦 𑀯𑀼𑀢𑁆𑀢𑀁. 𑀬𑁄 𑀧𑀦 𑀖𑀭𑀽𑀧𑀘𑀸𑀭𑁂 𑀞𑀺𑀢𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀁𑀬𑁂𑀯 ‘‘𑀕𑀸𑀫𑀽𑀧𑀘𑀸𑀭𑁄’’𑀢𑀺 𑀯𑀤𑀢𑀺, 𑀢𑀲𑁆𑀲 𑀖𑀭𑀽𑀧𑀘𑀸𑀭𑁄 𑀕𑀸𑀫𑁄𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀖𑀭𑀁, 𑀖𑀭𑀽𑀧𑀘𑀸𑀭𑁄, 𑀕𑀸𑀫𑁄, 𑀕𑀸𑀫𑀽𑀧𑀘𑀸𑀭𑁄𑀢𑀺 𑀏𑀲 𑀯𑀺𑀪𑀸𑀕𑁄 𑀲𑀗𑁆𑀓𑀭𑀻𑀬𑀢𑀺. 𑀅𑀲𑀗𑁆𑀓𑀭𑀢𑁄 𑀘𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼. 𑀢𑀲𑁆𑀫𑀸 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀕𑀸𑀫𑁄 𑀘 𑀕𑀸𑀫𑀽𑀧𑀘𑀸𑀭𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀬𑁄𑀧𑀺 𑀘 𑀕𑀸𑀫𑁄 𑀧𑀼𑀩𑁆𑀩𑁂 𑀫𑀳𑀸 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀓𑀼𑀮𑁂𑀲𑀼 𑀦𑀝𑁆𑀞𑁂𑀲𑀼 𑀅𑀧𑁆𑀧𑀓𑁄 𑀳𑁄𑀢𑀺, 𑀲𑁄 𑀖𑀭𑀽𑀧𑀘𑀸𑀭𑀢𑁄 𑀮𑁂𑀟𑁆𑀟𑀼𑀧𑀸𑀢𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀧𑀭𑀺𑀘𑁆𑀙𑁂𑀤𑁄 𑀧𑀦𑀲𑁆𑀲 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀧𑀺 𑀅𑀧𑁆𑀧𑀫𑀸𑀡𑀫𑁂𑀯𑀸𑀢𑀺.

𑀅𑀭𑀜𑁆𑀜𑀁 𑀦𑀸𑀫 𑀞𑀧𑁂𑀢𑁆𑀯𑀸 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸𑀢𑀺 𑀇𑀫𑀁 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀁 𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘 𑀞𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀅𑀤𑀺𑀦𑁆𑀦𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑁂 𑀅𑀯𑀲𑁂𑀲𑀁 ‘‘𑀅𑀭𑀜𑁆𑀜𑀁’’ 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀪𑀺𑀥𑀫𑁆𑀫𑁂 𑀧𑀦 ‘‘𑀅𑀭𑀜𑁆𑀜𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀯𑀼𑀢𑁆𑀢𑀁. 𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑁂 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀯𑀼𑀢𑁆𑀢𑀁. 𑀢𑀁 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀆𑀭𑁄𑀧𑀺𑀢𑁂𑀦 𑀆𑀘𑀭𑀺𑀬𑀥𑀦𑀼𑀦𑀸 𑀧𑀜𑁆𑀘𑀥𑀦𑀼𑀲𑀢𑀧𑁆𑀧𑀫𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀪𑀕𑀯𑀢𑀸 ‘‘𑀕𑀸𑀫𑀸 𑀯𑀸 𑀅𑀭𑀜𑁆𑀜𑀸 𑀯𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑁂𑀦 ‘‘𑀖𑀭𑀁, 𑀖𑀭𑀽𑀧𑀘𑀸𑀭𑁄, 𑀕𑀸𑀫𑁄, 𑀕𑀸𑀫𑀽𑀧𑀘𑀸𑀭𑁄 𑀅𑀭𑀜𑁆𑀜’’𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀦𑀺𑀲𑁂𑀥𑀦𑀢𑁆𑀣𑀁 𑀧𑀜𑁆𑀘 𑀓𑁄𑀝𑁆𑀞𑀸𑀲𑀸 𑀤𑀲𑁆𑀲𑀺𑀢𑀸. 𑀢𑀲𑁆𑀫𑀸 𑀖𑀭𑁂 𑀯𑀸 𑀖𑀭𑀽𑀧𑀘𑀸𑀭𑁂 𑀯𑀸 𑀕𑀸𑀫𑁂 𑀯𑀸 𑀕𑀸𑀫𑀽𑀧𑀘𑀸𑀭𑁂 𑀯𑀸 𑀅𑀭𑀜𑁆𑀜𑁂 𑀯𑀸 𑀧𑀸𑀤𑀕𑁆𑀖𑀦𑀓𑀢𑁄 𑀧𑀝𑁆𑀞𑀸𑀬 𑀲𑀲𑁆𑀲𑀸𑀫𑀺𑀓𑀁 𑀪𑀡𑁆𑀟𑀁 𑀅𑀯𑀳𑀭𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 ‘‘𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑁂𑀬𑁆𑀬𑀸’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁 ‘‘𑀅𑀤𑀺𑀦𑁆𑀦𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑁂 𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀓𑀧𑁆𑀧𑀺𑀬𑀁 𑀅𑀚𑁆𑀛𑁄𑀳𑀭𑀡𑀻𑀬𑀁 𑀯𑀼𑀘𑁆𑀘𑀢𑀺. 𑀇𑀥 𑀧𑀦 𑀬𑀁𑀓𑀺𑀜𑁆𑀘𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀲𑀲𑁆𑀲𑀸𑀫𑀺𑀓𑀁 𑀪𑀡𑁆𑀟𑀁, 𑀢𑀤𑁂𑀢𑀁 𑀢𑁂𑀳𑀺 𑀲𑀸𑀫𑀺𑀓𑁂𑀳𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀦 𑀤𑀺𑀦𑁆𑀦𑀦𑁆𑀢𑀺 𑀅𑀤𑀺𑀦𑁆𑀦𑀁. 𑀅𑀢𑁆𑀢𑀦𑁄 𑀳𑀢𑁆𑀣𑀢𑁄 𑀯𑀸 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀯𑀸 𑀦 𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑀅𑀦𑀺𑀲𑁆𑀲𑀝𑁆𑀞𑀁. 𑀬𑀣𑀸𑀞𑀸𑀦𑁂 𑀞𑀺𑀢𑀫𑁆𑀧𑀺 𑀅𑀦𑀧𑁂𑀓𑁆𑀔𑀢𑀸𑀬 𑀦 𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀅𑀧𑀭𑀺𑀘𑁆𑀘𑀢𑁆𑀢𑀁. 𑀆𑀭𑀓𑁆𑀔𑀲𑀁𑀯𑀺𑀥𑀸𑀦𑁂𑀦 𑀭𑀓𑁆𑀔𑀺𑀢𑀢𑁆𑀢𑀸 𑀭𑀓𑁆𑀔𑀺𑀢𑀁. 𑀫𑀜𑁆𑀚𑀽𑀲𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑁄𑀧𑀺𑀢𑀢𑁆𑀢𑀸 𑀕𑁄𑀧𑀺𑀢𑀁. ‘‘𑀫𑀫 𑀇𑀤’’𑀦𑁆𑀢𑀺 𑀢𑀡𑁆𑀳𑀸𑀫𑀫𑀢𑁆𑀢𑁂𑀦 𑀫𑀫𑀸𑀬𑀺𑀢𑀢𑁆𑀢𑀸 𑀫𑀫𑀸𑀬𑀺𑀢𑀁. 𑀢𑀸𑀳𑀺 𑀅𑀧𑀭𑀺𑀘𑁆𑀘𑀸𑀕𑀭𑀓𑁆𑀔𑀡𑀕𑁄𑀧𑀦𑀸𑀳𑀺 𑀢𑁂𑀳𑀺 𑀪𑀡𑁆𑀟𑀲𑀸𑀫𑀺𑀓𑁂𑀳𑀺 𑀧𑀭𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁. 𑀏𑀢𑀁 𑀅𑀤𑀺𑀦𑁆𑀦𑀁 𑀦𑀸𑀫.

𑀣𑁂𑀬𑁆𑀬𑀲𑀗𑁆𑀔𑀸𑀢𑀦𑁆𑀢𑀺 𑀏𑀢𑁆𑀣 𑀣𑁂𑀦𑁄𑀢𑀺 𑀘𑁄𑀭𑁄, 𑀣𑁂𑀦𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁; 𑀅𑀯𑀳𑀭𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. ‘‘𑀲𑀗𑁆𑀔𑀸, 𑀲𑀗𑁆𑀔𑀸𑀢’’𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁; 𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁮𑁦) 𑀯𑀺𑀬. 𑀣𑁂𑀬𑁆𑀬𑀜𑁆𑀘 𑀢𑀁 𑀲𑀗𑁆𑀔𑀸𑀢𑀜𑁆𑀘𑀸𑀢𑀺 𑀣𑁂𑀬𑁆𑀬𑀲𑀗𑁆𑀔𑀸𑀢𑀁, 𑀣𑁂𑀬𑁆𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑁄 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀲𑁆𑀫𑀸 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀅𑀢𑁆𑀣𑀢𑁄 𑀤𑀝𑁆𑀞𑀩𑁆𑀩𑀁. 𑀬𑁄 𑀘 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦 𑀆𑀤𑀺𑀬𑀢𑀺, 𑀲𑁄 𑀬𑀲𑁆𑀫𑀸 𑀣𑁂𑀬𑁆𑀬𑀘𑀺𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀅𑀯𑀳𑀭𑀡𑀘𑀺𑀢𑁆𑀢𑁄𑀢𑀺 𑀏𑀯𑀫𑀲𑁆𑀲 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀤𑀺𑀬𑁂𑀬𑁆𑀬 , 𑀳𑀭𑁂𑀬𑁆𑀬, 𑀅𑀯𑀳𑀭𑁂𑀬𑁆𑀬, 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬, 𑀞𑀸𑀦𑀸 𑀘𑀸𑀯𑁂𑀬𑁆𑀬, 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀧𑀞𑀫𑀧𑀤𑀁 𑀅𑀪𑀺𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀧𑀤𑀁 𑀅𑀜𑁆𑀜𑁂𑀲𑀁 𑀪𑀡𑁆𑀟𑀁 𑀳𑀭𑀦𑁆𑀢𑀲𑁆𑀲 𑀕𑀘𑁆𑀙𑀢𑁄 𑀯𑀲𑁂𑀦, 𑀢𑀢𑀺𑀬𑀧𑀤𑀁 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦, 𑀘𑀢𑀼𑀢𑁆𑀣𑀁 𑀲𑀯𑀺𑀜𑁆𑀜𑀸𑀡𑀓𑀯𑀲𑁂𑀦, 𑀧𑀜𑁆𑀘𑀫𑀁 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀸𑀤𑀺𑀯𑀲𑁂𑀦, 𑀙𑀝𑁆𑀞𑀁 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀸 𑀲𑀼𑀗𑁆𑀓𑀖𑀸𑀢𑀯𑀲𑁂𑀦 𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄𑀚𑀦𑀸 𑀧𑀦𑁂𑀢𑁆𑀣 𑀏𑀓𑀪𑀡𑁆𑀟𑀯𑀲𑁂𑀦𑀧𑀺 𑀦𑀸𑀦𑀸𑀪𑀡𑁆𑀟𑀯𑀲𑁂𑀦𑀧𑀺 𑀳𑁄𑀢𑀺. 𑀏𑀓𑀪𑀡𑁆𑀟𑀯𑀲𑁂𑀦 𑀘 𑀲𑀯𑀺𑀜𑁆𑀜𑀸𑀡𑀓𑁂𑀦𑁂𑀯 𑀮𑀩𑁆𑀪𑀢𑀺, 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀫𑀺𑀲𑁆𑀲𑀓𑁂𑀦.

𑀢𑀢𑁆𑀣 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀢𑀸𑀯 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀆𑀤𑀺𑀬𑁂𑀬𑁆𑀬𑀸𑀢𑀺 𑀆𑀭𑀸𑀫𑀁 𑀅𑀪𑀺𑀬𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀳𑀭𑁂𑀬𑁆𑀬𑀸𑀢𑀺 𑀅𑀜𑁆𑀜𑀲𑁆𑀲 𑀪𑀡𑁆𑀟𑀁 𑀳𑀭𑀦𑁆𑀢𑁄 𑀲𑀻𑀲𑁂 𑀪𑀸𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀔𑀦𑁆𑀥𑀁 𑀑𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀅𑀯𑀳𑀭𑁂𑀬𑁆𑀬𑀸𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀪𑀡𑁆𑀟𑀁 ‘‘𑀤𑁂𑀳𑀺 𑀫𑁂 𑀪𑀡𑁆𑀟’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 ‘‘𑀦𑀸𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸𑀫𑀺𑀓𑀲𑁆𑀲 𑀯𑀺𑀫𑀢𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑀸𑀫𑀺𑀓𑁄 ‘‘𑀦 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀇𑀭𑀺𑀬𑀸𑀧𑀣𑀁𑀯𑀺𑀓𑁄𑀧𑁂𑀬𑁆𑀬𑀸𑀢𑀺 ‘‘𑀲𑀳𑀪𑀡𑁆𑀟𑀳𑀸𑀭𑀓𑀁 𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀞𑀫𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀲𑀗𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀞𑀸𑀦𑀸 𑀘𑀸𑀯𑁂𑀬𑁆𑀬𑀸𑀢𑀺 𑀣𑀮𑀝𑁆𑀞𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀞𑀸𑀦𑀸 𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸𑀢𑀺 𑀧𑀭𑀺𑀓𑀧𑁆𑀧𑀺𑀢𑀝𑁆𑀞𑀸𑀦𑀁 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀣 𑀯𑀸 𑀧𑀞𑀫𑀁 𑀧𑀸𑀤𑀁 𑀲𑀼𑀗𑁆𑀓𑀖𑀸𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑁋 𑀅𑀬𑀫𑁂𑀢𑁆𑀣 𑀦𑀸𑀦𑀸𑀪𑀡𑁆𑀟𑀯𑀲𑁂𑀦 𑀬𑁄𑀚𑀦𑀸.

𑀏𑀓𑀪𑀡𑁆𑀟𑀯𑀲𑁂𑀦 𑀧𑀦 𑀲𑀲𑁆𑀲𑀸𑀫𑀺𑀓𑀁 𑀤𑀸𑀲𑀁 𑀯𑀸 𑀢𑀺𑀭𑀘𑁆𑀙𑀸𑀦𑀁 𑀯𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀪𑀺𑀬𑁄𑀕𑀸𑀤𑀺𑀦𑀸 𑀦𑀬𑁂𑀦 𑀆𑀤𑀺𑀬𑀢𑀺 𑀯𑀸 𑀳𑀭𑀢𑀺 𑀯𑀸 𑀅𑀯𑀳𑀭𑀢𑀺 𑀯𑀸 𑀇𑀭𑀺𑀬𑀸𑀧𑀣𑀁 𑀯𑀸 𑀯𑀺𑀓𑁄𑀧𑁂𑀢𑀺, 𑀞𑀸𑀦𑀸 𑀯𑀸 𑀘𑀸𑀯𑁂𑀢𑀺, 𑀧𑀭𑀺𑀘𑁆𑀙𑁂𑀤𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀢𑀺 𑁋 𑀅𑀬𑀫𑁂𑀢𑁆𑀣 𑀏𑀓𑀪𑀡𑁆𑀟𑀯𑀲𑁂𑀦 𑀬𑁄𑀚𑀦𑀸.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸

𑀅𑀧𑀺𑀘 𑀇𑀫𑀸𑀦𑀺 𑀙 𑀧𑀤𑀸𑀦𑀺 𑀯𑀡𑁆𑀡𑁂𑀦𑁆𑀢𑁂𑀦 𑀧𑀜𑁆𑀘 𑀧𑀜𑁆𑀘𑀓𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀏𑀯𑀁 𑀯𑀡𑁆𑀡𑀬𑀢𑀸 𑀳𑀺 𑀇𑀤𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀁 𑀲𑀼𑀯𑀡𑁆𑀡𑀺𑀢𑀁 𑀳𑁄𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀞𑀸𑀦𑁂 𑀲𑀩𑁆𑀩𑀅𑀝𑁆𑀞𑀓𑀣𑀸 𑀆𑀓𑀼𑀮𑀸 𑀮𑀼𑀴𑀺𑀢𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀸. 𑀢𑀣𑀸 𑀳𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀬𑀸𑀦𑀺 𑀢𑀸𑀦𑀺 𑀧𑀸𑀴𑀺𑀬𑀁 ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀧𑀭𑀧𑀭𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀯𑀳𑀸𑀭𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺𑀧𑀺 𑀕𑀳𑁂𑀢𑁆𑀯𑀸 𑀓𑀢𑁆𑀣𑀘𑀺 𑀏𑀓𑀁 𑀧𑀜𑁆𑀘𑀓𑀁 𑀤𑀲𑁆𑀲𑀺𑀢𑀁, 𑀓𑀢𑁆𑀣𑀘𑀺 ‘‘𑀙𑀳𑀸𑀓𑀸𑀭𑁂𑀳𑀻’’𑀢𑀺 𑀆𑀕𑀢𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑁂 𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀏𑀢𑀸𑀦𑀺 𑀘 𑀧𑀜𑁆𑀘𑀓𑀸𑀦𑀺 𑀦 𑀳𑁄𑀦𑁆𑀢𑀺. 𑀬𑀢𑁆𑀣 𑀳𑀺 𑀏𑀓𑁂𑀓𑁂𑀦 𑀧𑀤𑁂𑀦 𑀅𑀯𑀳𑀸𑀭𑁄 𑀲𑀺𑀚𑁆𑀛𑀢𑀺, 𑀢𑀁 𑀧𑀜𑁆𑀘𑀓𑀁 𑀦𑀸𑀫 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀏𑀓𑁄𑀬𑁂𑀯 𑀅𑀯𑀳𑀸𑀭𑁄. 𑀬𑀸𑀦𑀺 𑀘 𑀢𑀢𑁆𑀣 𑀮𑀩𑁆𑀪𑀫𑀸𑀦𑀸𑀦𑀺𑀬𑁂𑀯 𑀧𑀜𑁆𑀘𑀓𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀢𑁂𑀲𑀫𑁆𑀧𑀺 𑀦 𑀲𑀩𑁆𑀩𑁂𑀲𑀁 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀏𑀯𑀫𑀺𑀫𑀲𑁆𑀫𑀺𑀁 𑀞𑀸𑀦𑁂 𑀲𑀩𑁆𑀩𑀅𑀝𑁆𑀞𑀓𑀣𑀸 𑀆𑀓𑀼𑀮𑀸 𑀮𑀼𑀴𑀺𑀢𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀯𑀺𑀦𑀺𑀘𑁆𑀙𑀬𑀸. 𑀢𑀲𑁆𑀫𑀸 𑀧𑀜𑁆𑀘 𑀧𑀜𑁆𑀘𑀓𑁂𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑀺𑀬𑀫𑀸𑀦𑀸 𑀇𑀫𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸.

𑀧𑀜𑁆𑀘 𑀧𑀜𑁆𑀘𑀓𑀸𑀦𑀺 𑀦𑀸𑀫 𑁋 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀁, 𑀏𑀓𑀪𑀡𑁆𑀟𑀧𑀜𑁆𑀘𑀓𑀁, 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁, 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁, 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀦𑁆𑀢𑀺. 𑀢𑀢𑁆𑀣 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀏𑀓𑀪𑀡𑁆𑀟𑀧𑀜𑁆𑀘𑀓𑀜𑁆𑀘 ‘‘𑀆𑀤𑀺𑀬𑁂𑀬𑁆𑀬, 𑀳𑀭𑁂𑀬𑁆𑀬, 𑀅𑀯𑀳𑀭𑁂𑀬𑁆𑀬, 𑀇𑀭𑀺𑀬𑀸𑀧𑀣𑀁 𑀯𑀺𑀓𑁄𑀧𑁂𑀬𑁆𑀬, 𑀞𑀸𑀦𑀸 𑀘𑀸𑀯𑁂𑀬𑁆𑀬𑀸’’𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀯𑀲𑁂𑀦 𑀮𑀩𑁆𑀪𑀦𑁆𑀢𑀺. 𑀢𑀸𑀦𑀺 𑀧𑀼𑀩𑁆𑀩𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀬𑀁 𑀧𑀦𑁂𑀢𑀁 ‘‘𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺 𑀙𑀝𑁆𑀞𑀁 𑀧𑀤𑀁, 𑀢𑀁 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑀲𑁆𑀲 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀯𑀳𑀸𑀭𑀲𑁆𑀲 𑀘 𑀲𑀸𑀥𑀸𑀭𑀡𑀁. 𑀢𑀲𑁆𑀫𑀸 𑀢𑀁 𑀢𑀢𑀺𑀬𑀧𑀜𑁆𑀘𑀫𑁂𑀲𑀼 𑀧𑀜𑁆𑀘𑀓𑁂𑀲𑀼 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀯𑀼𑀢𑁆𑀢𑀁 𑀦𑀸𑀦𑀸𑀪𑀡𑁆𑀟𑀧𑀜𑁆𑀘𑀓𑀜𑁆𑀘 𑀏𑀓𑀪𑀡𑁆𑀟𑀧𑀜𑁆𑀘𑀓𑀜𑁆𑀘.

𑀓𑀢𑀫𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁? 𑀧𑀜𑁆𑀘 𑀅𑀯𑀳𑀸𑀭𑀸 𑁋 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀢𑁆𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀅𑀢𑁆𑀣𑀲𑀸𑀥𑀓𑁄, 𑀥𑀼𑀭𑀦𑀺𑀓𑁆𑀔𑁂𑀧𑁄𑀢𑀺. 𑀢𑀢𑁆𑀣 𑀲𑀸𑀳𑀢𑁆𑀣𑀺𑀓𑁄 𑀦𑀸𑀫 𑀧𑀭𑀲𑁆𑀲 𑀪𑀡𑁆𑀟𑀁 𑀲𑀳𑀢𑁆𑀣𑀸 𑀅𑀯𑀳𑀭𑀢𑀺. 𑀆𑀡𑀢𑁆𑀢𑀺𑀓𑁄 𑀦𑀸𑀫 ‘‘𑀅𑀲𑀼𑀓𑀲𑁆𑀲 𑀪𑀡𑁆𑀟𑀁 𑀅𑀯𑀳𑀭𑀸’’𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑁄 𑀦𑀸𑀫 𑀅𑀦𑁆𑀢𑁄𑀲𑀼𑀗𑁆𑀓𑀖𑀸𑀢𑁂 𑀞𑀺𑀢𑁄 𑀩𑀳𑀺𑀲𑀼𑀗𑁆𑀓𑀖𑀸𑀢𑀁 𑀧𑀸𑀢𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺, 𑀇𑀫𑀺𑀦𑀸 𑀘 𑀲𑀤𑁆𑀥𑀺𑀁 ‘‘𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺 𑀇𑀤𑀁 𑀧𑀤𑀬𑁄𑀚𑀦𑀁 𑀮𑀪𑀢𑀺. 𑀅𑀢𑁆𑀣𑀲𑀸𑀥𑀓𑁄 𑀦𑀸𑀫 ‘‘𑀅𑀲𑀼𑀓𑀁 𑀦𑀸𑀫 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀅𑀯𑀳𑀭𑀸’’𑀢𑀺 𑀆𑀡𑀸𑀧𑁂𑀢𑀺. 𑀢𑀢𑁆𑀣 𑀲𑀘𑁂 𑀧𑀭𑁄 𑀅𑀦𑀦𑁆𑀢𑀭𑀸𑀬𑀺𑀓𑁄 𑀳𑀼𑀢𑁆𑀯𑀸 𑀢𑀁 𑀅𑀯𑀳𑀭𑀢𑀺, 𑀆𑀡𑀸𑀧𑀓𑁄 𑀆𑀡𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺, 𑀅𑀯𑀳𑀸𑀭𑀓𑁄 𑀧𑀦 𑀅𑀯𑀳𑀝𑀓𑀸𑀮𑁂. 𑀅𑀬𑀁 𑀅𑀢𑁆𑀣𑀲𑀸𑀥𑀓𑁄. 𑀥𑀼𑀭𑀦𑀺𑀓𑁆𑀔𑁂𑀧𑁄 𑀧𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀪𑀡𑁆𑀟𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀲𑀸𑀳𑀢𑁆𑀣𑀺𑀓𑀧𑀜𑁆𑀘𑀓𑀁.

𑀓𑀢𑀫𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁? 𑀅𑀧𑀭𑁂𑀧𑀺 𑀧𑀜𑁆𑀘 𑀅𑀯𑀳𑀸𑀭𑀸 𑁋 𑀧𑀼𑀩𑁆𑀩𑀧𑀬𑁄𑀕𑁄, 𑀲𑀳𑀧𑀬𑁄𑀕𑁄, 𑀲𑀁𑀯𑀺𑀤𑀸𑀯𑀳𑀸𑀭𑁄, 𑀲𑀗𑁆𑀓𑁂𑀢𑀓𑀫𑁆𑀫𑀁, 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀆𑀡𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀞𑀸𑀦𑀸 𑀘𑀸𑀯𑀦𑀯𑀲𑁂𑀦 𑀲𑀳𑀧𑀬𑁄𑀕𑁄. 𑀇𑀢𑀭𑁂 𑀧𑀦 𑀢𑀬𑁄 𑀧𑀸𑀴𑀺𑀬𑀁 (𑀧𑀸𑀭𑀸. 𑁧𑁧𑁮-𑁧𑁨𑁦) 𑀆𑀕𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀇𑀤𑀁 𑀧𑀼𑀩𑁆𑀩𑀧𑀬𑁄𑀕𑀧𑀜𑁆𑀘𑀓𑀁.

𑀓𑀢𑀫𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀁? 𑀅𑀧𑀭𑁂𑀧𑀺 𑀧𑀜𑁆𑀘 𑀅𑀯𑀳𑀸𑀭𑀸 𑁋 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀓𑀼𑀲𑀸𑀯𑀳𑀸𑀭𑁄𑀢𑀺. 𑀢𑁂 𑀧𑀜𑁆𑀘𑀧𑀺 ‘‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀘𑀻𑀯𑀭𑁂 𑀪𑀸𑀚𑀺𑀬𑀫𑀸𑀦𑁂 𑀣𑁂𑀬𑁆𑀬𑀘𑀺𑀢𑁆𑀢𑁄 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀻’’𑀢𑀺 (𑀧𑀸𑀭𑀸. 𑁧𑁩𑁮) 𑀏𑀢𑀲𑁆𑀫𑀺𑀁 𑀓𑀼𑀲𑀲𑀗𑁆𑀓𑀸𑀫𑀦𑀯𑀢𑁆𑀣𑀼𑀲𑁆𑀫𑀺𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀇𑀤𑀁 𑀣𑁂𑀬𑁆𑀬𑀸𑀯𑀳𑀸𑀭𑀧𑀜𑁆𑀘𑀓𑀁. 𑀏𑀯𑀫𑀺𑀫𑀸𑀦𑀺 𑀧𑀜𑁆𑀘 𑀧𑀜𑁆𑀘𑀓𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑁂 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂𑀲𑀼 𑀘 𑀧𑀦 𑀧𑀜𑁆𑀘𑀲𑀼 𑀧𑀜𑁆𑀘𑀓𑁂𑀲𑀼 𑀓𑀼𑀲𑀮𑁂𑀦 𑀯𑀺𑀦𑀬𑀥𑀭𑁂𑀦 𑀑𑀢𑀺𑀡𑁆𑀡𑀁 𑀯𑀢𑁆𑀣𑀼𑀁 𑀲𑀳𑀲𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀧𑀜𑁆𑀘 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑀩𑁆𑀩𑀸𑀦𑀺. 𑀬𑀸𑀦𑀺 𑀲𑀦𑁆𑀥𑀸𑀬 𑀧𑁄𑀭𑀸𑀡𑀸 𑀆𑀳𑀼 𑁋

‘‘𑀯𑀢𑁆𑀣𑀼𑀁 𑀓𑀸𑀮𑀜𑁆𑀘 𑀤𑁂𑀲𑀜𑁆𑀘, 𑀅𑀕𑁆𑀖𑀁 𑀧𑀭𑀺𑀪𑁄𑀕𑀧𑀜𑁆𑀘𑀫𑀁;

𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺, 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄’’𑀢𑀺.

𑀢𑀢𑁆𑀣 𑀯𑀢𑁆𑀣𑀼𑀦𑁆𑀢𑀺 𑀪𑀡𑁆𑀟𑀁; 𑀅𑀯𑀳𑀸𑀭𑀓𑁂𑀦 𑀳𑀺 ‘‘𑀫𑀬𑀸 𑀇𑀤𑀁 𑀦𑀸𑀫 𑀅𑀯𑀳𑀝’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸𑀯 𑀢𑀁 𑀪𑀡𑁆𑀟𑀁 𑀲𑀲𑁆𑀲𑀸𑀫𑀺𑀓𑀁 𑀯𑀸 𑀅𑀲𑁆𑀲𑀸𑀫𑀺𑀓𑀁 𑀯𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀲𑀲𑁆𑀲𑀸𑀫𑀺𑀓𑁂𑀧𑀺 𑀲𑀸𑀫𑀺𑀓𑀸𑀦𑀁 𑀲𑀸𑀮𑀬𑀪𑀸𑀯𑁄 𑀯𑀸 𑀦𑀺𑀭𑀸𑀮𑀬𑀪𑀸𑀯𑁄 𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀲𑀘𑁂 𑀢𑁂𑀲𑀁 𑀲𑀸𑀮𑀬𑀓𑀸𑀮𑁂 𑀅𑀯𑀳𑀝𑀁, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺 𑀓𑀸𑀢𑀩𑁆𑀩𑀸. 𑀲𑀘𑁂 𑀦𑀺𑀭𑀸𑀮𑀬𑀓𑀸𑀮𑁂, 𑀦 𑀧𑀸𑀭𑀸𑀚𑀺𑀓𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀪𑀡𑁆𑀟𑀲𑀸𑀫𑀺𑀓𑁂𑀲𑀼 𑀧𑀦 𑀪𑀡𑁆𑀟𑀁 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀁 𑀤𑀸𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀸𑀫𑀻𑀘𑀺.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀪𑀸𑀢𑀺𑀬𑀭𑀸𑀚𑀓𑀸𑀮𑁂 𑀓𑀺𑀭 𑀫𑀳𑀸𑀘𑁂𑀢𑀺𑀬𑀧𑀽𑀚𑀸𑀬 𑀤𑀓𑁆𑀔𑀺𑀡𑀤𑀺𑀲𑀢𑁄 𑀏𑀓𑁄 𑀪𑀺𑀓𑁆𑀔𑀼 𑀲𑀢𑁆𑀢𑀳𑀢𑁆𑀣𑀁 𑀧𑀡𑁆𑀟𑀼𑀓𑀸𑀲𑀸𑀯𑀁 𑀅𑀁𑀲𑁂 𑀓𑀭𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀧𑀸𑀯𑀺𑀲𑀺; 𑀢𑀗𑁆𑀔𑀡𑀫𑁂𑀯 𑀘 𑀭𑀸𑀚𑀸𑀧𑀺 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀁 𑀆𑀕𑀢𑁄. 𑀢𑀢𑁆𑀣 𑀉𑀲𑁆𑀲𑀸𑀭𑀡𑀸𑀬 𑀯𑀢𑁆𑀢𑀫𑀸𑀦𑀸𑀬 𑀫𑀳𑀸𑀚𑀦𑀲𑀫𑁆𑀫𑀤𑁆𑀤𑁄 𑀅𑀳𑁄𑀲𑀺. 𑀅𑀣 𑀲𑁄 𑀪𑀺𑀓𑁆𑀔𑀼 𑀚𑀦𑀲𑀫𑁆𑀫𑀤𑁆𑀤𑀧𑀻𑀴𑀺𑀢𑁄 𑀅𑀁𑀲𑀢𑁄 𑀧𑀢𑀦𑁆𑀢𑀁 𑀓𑀸𑀲𑀸𑀯𑀁 𑀅𑀤𑀺𑀲𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄; 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀓𑀸𑀲𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑁄 𑀈𑀤𑀺𑀲𑁂 𑀚𑀦𑀲𑀫𑁆𑀫𑀤𑁆𑀤𑁂 𑀓𑀸𑀲𑀸𑀯𑀁 𑀮𑀘𑁆𑀙𑀢𑀺, 𑀦 𑀤𑀸𑀦𑀺 𑀢𑀁 𑀫𑀬𑁆𑀳’’𑀦𑁆𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀕𑀢𑁄. 𑀅𑀣𑀜𑁆𑀜𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀓𑀸𑀲𑀸𑀯𑀁 𑀤𑀺𑀲𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘‘𑀅𑀲𑁆𑀲𑀫𑀡𑁄 𑀤𑀸𑀦𑀺𑀫𑁆𑀳𑀺, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂𑀧𑀺 ‘‘𑀯𑀺𑀦𑀬𑀥𑀭𑁂 𑀧𑀼𑀘𑁆𑀙𑀺𑀢𑁆𑀯𑀸 𑀜𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀢𑁂𑀦 𑀘 𑀲𑀫𑀬𑁂𑀦 𑀘𑀽𑀴𑀲𑀼𑀫𑀦𑀢𑁆𑀣𑁂𑀭𑁄 𑀦𑀸𑀫 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀥𑀭𑁄 𑀯𑀺𑀦𑀬𑀸𑀘𑀭𑀺𑀬𑀧𑀸𑀫𑁄𑀓𑁆𑀔𑁄 𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀲𑁄 𑀪𑀺𑀓𑁆𑀔𑀼 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀢𑁂𑀦 𑀪𑀝𑁆𑀞𑁂 𑀚𑀦𑀓𑀸𑀬𑁂 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀤𑀸𑀦𑀺 𑀏𑀢𑁆𑀣 𑀑𑀓𑀸𑀲𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋 ‘‘𑀲𑀘𑁂 𑀓𑀸𑀲𑀸𑀯𑀲𑀸𑀫𑀺𑀓𑀁 𑀪𑀺𑀓𑁆𑀔𑀼𑀁 𑀆𑀦𑁂𑀬𑁆𑀬𑀸𑀲𑀺, 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀢𑀯 𑀧𑀢𑀺𑀝𑁆𑀞𑀸 𑀓𑀸𑀢𑀼’’𑀦𑁆𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑀁 𑀤𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺? ‘‘𑀢𑀳𑀺𑀁 𑀢𑀳𑀺𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀳𑀻’’𑀢𑀺. 𑀲𑁄 𑀧𑀜𑁆𑀘𑀧𑀺 𑀫𑀳𑀸𑀯𑀺𑀳𑀸𑀭𑁂 𑀑𑀮𑁄𑀓𑁂𑀢𑁆𑀯𑀸 𑀦𑁂𑀯 𑀅𑀤𑁆𑀤𑀓𑁆𑀔𑀺. 𑀢𑀢𑁄 𑀦𑀁 𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀓𑀢𑀭𑀸𑀬 𑀤𑀺𑀲𑀸𑀬 𑀩𑀳𑀽 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀤𑀓𑁆𑀔𑀺𑀡𑀤𑀺𑀲𑀸𑀬, 𑀪𑀦𑁆𑀢𑁂’’𑀢𑀺. ‘‘𑀢𑁂𑀦 𑀳𑀺 𑀓𑀸𑀲𑀸𑀯𑀁 𑀤𑀻𑀖𑀢𑁄 𑀘 𑀢𑀺𑀭𑀺𑀬𑀜𑁆𑀘 𑀫𑀺𑀦𑀺𑀢𑁆𑀯𑀸 𑀞𑀧𑁂𑀳𑀺. 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑀺𑀲𑀸𑀬 𑀯𑀺𑀳𑀸𑀭𑀧𑀝𑀺𑀧𑀸𑀝𑀺𑀬𑀸 𑀯𑀺𑀘𑀺𑀦𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀦𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀦𑁂𑀲𑀺. 𑀣𑁂𑀭𑁄 𑀧𑀼𑀘𑁆𑀙𑀺 𑁋 ‘‘𑀢𑀯𑁂𑀤𑀁 𑀓𑀸𑀲𑀸𑀯’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀓𑀼𑀳𑀺𑀁 𑀢𑁂 𑀧𑀸𑀢𑀺𑀢’’𑀦𑁆𑀢𑀺? 𑀲𑁄 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺. 𑀣𑁂𑀭𑁄 𑀧𑀦 𑀢𑁂𑀦 𑀓𑀢𑀁 𑀥𑀼𑀭𑀦𑀺𑀓𑁆𑀔𑁂𑀧𑀁 𑀲𑀼𑀢𑁆𑀯𑀸 𑀇𑀢𑀭𑀁 𑀧𑀼𑀘𑁆𑀙𑀺 𑁋 ‘‘𑀢𑀬𑀸 𑀇𑀤𑀁 𑀓𑀼𑀳𑀺𑀁 𑀤𑀺𑀲𑁆𑀯𑀸 𑀕𑀳𑀺𑀢’’𑀦𑁆𑀢𑀺? 𑀲𑁄𑀧𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀢𑀢𑁄 𑀦𑀁 𑀣𑁂𑀭𑁄 𑀆𑀳 𑁋 ‘‘𑀲𑀘𑁂 𑀢𑁂 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀁 𑀅𑀪𑀯𑀺𑀲𑁆𑀲, 𑀅𑀦𑀸𑀧𑀢𑁆𑀢𑀺𑀬𑁂𑀯 𑀢𑁂 𑀅𑀲𑁆𑀲. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀆𑀧𑀦𑁆𑀦𑁄𑀲𑀺. 𑀢𑀁 𑀤𑁂𑀲𑁂𑀢𑁆𑀯𑀸 𑀅𑀦𑀸𑀧𑀢𑁆𑀢𑀺𑀓𑁄 𑀳𑁄𑀳𑀺. 𑀇𑀤𑀜𑁆𑀘 𑀓𑀸𑀲𑀸𑀯𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺. 𑀲𑁄 𑀪𑀺𑀓𑁆𑀔𑀼 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑁄 𑀧𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀻𑀢𑀺. 𑀏𑀯𑀁 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁.

𑀓𑀸𑀮𑁄𑀢𑀺 𑀅𑀯𑀳𑀸𑀭𑀓𑀸𑀮𑁄. 𑀢𑀤𑁂𑀯 𑀳𑀺 𑀪𑀡𑁆𑀟𑀁 𑀓𑀤𑀸𑀘𑀺 𑀲𑀫𑀕𑁆𑀖𑀁 𑀳𑁄𑀢𑀺, 𑀓𑀤𑀸𑀘𑀺 𑀫𑀳𑀕𑁆𑀖𑀁. 𑀢𑀲𑁆𑀫𑀸 𑀢𑀁 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄 𑀳𑁄𑀢𑀺, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀏𑀯𑀁 𑀓𑀸𑀮𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀤𑁂𑀲𑁄𑀢𑀺 𑀅𑀯𑀳𑀸𑀭𑀤𑁂𑀲𑁄. 𑀢𑀜𑁆𑀳𑀺 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀤𑁂𑀲𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄 𑀳𑁄𑀢𑀺, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀪𑀡𑁆𑀟𑀼𑀝𑁆𑀞𑀸𑀦𑀤𑁂𑀲𑁂 𑀳𑀺 𑀪𑀡𑁆𑀟𑀁 𑀲𑀫𑀕𑁆𑀖𑀁 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀁.

𑀇𑀫𑀲𑁆𑀲𑀸𑀧𑀺 𑀘 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀅𑀦𑁆𑀢𑀭𑀲𑀫𑀼𑀤𑁆𑀤𑁂 𑀓𑀺𑀭 𑀏𑀓𑁄 𑀪𑀺𑀓𑁆𑀔𑀼 𑀲𑀼𑀲𑀡𑁆𑀞𑀸𑀦𑀁 𑀦𑀸𑀴𑀺𑀓𑁂𑀭𑀁 𑀮𑀪𑀺𑀢𑁆𑀯𑀸 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀣𑀸𑀮𑀓𑀲𑀤𑀺𑀲𑀁 𑀫𑀦𑁄𑀭𑀫𑀁 𑀧𑀸𑀦𑀻𑀬𑀣𑀸𑀮𑀓𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀁 𑀅𑀕𑀫𑀸𑀲𑀺. 𑀅𑀣𑀜𑁆𑀜𑁄 𑀪𑀺𑀓𑁆𑀔𑀼 𑀅𑀦𑁆𑀢𑀭𑀲𑀫𑀼𑀤𑁆𑀤𑀁 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀝𑀺𑀯𑀲𑀦𑁆𑀢𑁄 𑀢𑀁 𑀣𑀸𑀮𑀓𑀁 𑀤𑀺𑀲𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀆𑀕𑀢𑁄. 𑀢𑀲𑁆𑀲 𑀢𑀢𑁆𑀣 𑀬𑀸𑀕𑀼𑀁 𑀧𑀺𑀯𑀦𑁆𑀢𑀲𑁆𑀲 𑀢𑀁 𑀣𑀸𑀮𑀓𑀁 𑀤𑀺𑀲𑁆𑀯𑀸 𑀣𑀸𑀮𑀓𑀲𑀸𑀫𑀺𑀓𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀓𑀼𑀢𑁄 𑀢𑁂 𑀇𑀤𑀁 𑀮𑀤𑁆𑀥’’𑀦𑁆𑀢𑀺? ‘‘𑀅𑀦𑁆𑀢𑀭𑀲𑀫𑀼𑀤𑁆𑀤𑀢𑁄 𑀫𑁂 𑀆𑀦𑀻𑀢’’𑀦𑁆𑀢𑀺. 𑀲𑁄 𑀢𑀁 ‘‘𑀦𑁂𑀢𑀁 𑀢𑀯 𑀲𑀦𑁆𑀢𑀓𑀁, 𑀣𑁂𑀬𑁆𑀬𑀸𑀬 𑀢𑁂 𑀕𑀳𑀺𑀢’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀆𑀓𑀟𑁆𑀠𑀺. 𑀢𑀢𑁆𑀣 𑀘 𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀺𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀅𑀕𑀫𑀺𑀁𑀲𑀼. 𑀢𑀢𑁆𑀣 𑀪𑁂𑀭𑀺𑀁 𑀧𑀳𑀭𑀸𑀧𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀲𑀫𑀻𑀧𑁂 𑀲𑀦𑁆𑀦𑀺𑀧𑀸𑀢𑀁 𑀓𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀆𑀭𑀪𑀺𑀁𑀲𑀼. 𑀯𑀺𑀦𑀬𑀥𑀭𑀢𑁆𑀣𑁂𑀭𑀸 𑀅𑀯𑀳𑀸𑀭𑀁 𑀲𑀜𑁆𑀜𑀸𑀧𑁂𑀲𑀼𑀁.

𑀢𑀲𑁆𑀫𑀺𑀜𑁆𑀘 𑀲𑀦𑁆𑀦𑀺𑀧𑀸𑀢𑁂 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀯𑀺𑀦𑀬𑀓𑀼𑀲𑀮𑁄 𑀳𑁄𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀇𑀫𑀺𑀦𑀸 𑀇𑀤𑀁 𑀣𑀸𑀮𑀓𑀁 𑀓𑀼𑀳𑀺𑀁 𑀅𑀯𑀳𑀝’’𑀦𑁆𑀢𑀺? ‘‘𑀅𑀦𑁆𑀢𑀭𑀲𑀫𑀼𑀤𑁆𑀤𑁂 𑀅𑀯𑀳𑀝’’𑀦𑁆𑀢𑀺. ‘‘𑀢𑀢𑁆𑀭𑀺𑀤𑀁 𑀓𑀺𑀁 𑀅𑀕𑁆𑀖𑀢𑀻’’𑀢𑀺? ‘‘𑀦 𑀓𑀺𑀜𑁆𑀘𑀺 𑀅𑀕𑁆𑀖𑀢𑀺. 𑀢𑀢𑁆𑀭 𑀳𑀺 𑀦𑀸𑀴𑀺𑀓𑁂𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀺𑀜𑁆𑀚𑀁 𑀔𑀸𑀤𑀺𑀢𑁆𑀯𑀸 𑀓𑀧𑀸𑀮𑀁 𑀙𑀟𑁆𑀟𑁂𑀦𑁆𑀢𑀺, 𑀤𑀸𑀭𑀼𑀅𑀢𑁆𑀣𑀁 𑀧𑀦 𑀨𑀭𑀢𑀻’’𑀢𑀺. ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑁆𑀣 𑀳𑀢𑁆𑀣𑀓𑀫𑁆𑀫𑀁 𑀓𑀺𑀁 𑀅𑀕𑁆𑀖𑀢𑀻’’𑀢𑀺? ‘‘𑀫𑀸𑀲𑀓𑀁 𑀯𑀸 𑀊𑀦𑀫𑀸𑀲𑀓𑀁 𑀯𑀸’’𑀢𑀺. ‘‘𑀅𑀢𑁆𑀣𑀺 𑀧𑀦 𑀓𑀢𑁆𑀣𑀘𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀸𑀲𑀓𑁂𑀦 𑀯𑀸 𑀊𑀦𑀫𑀸𑀲𑀓𑁂𑀦 𑀯𑀸 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 ‘‘𑀲𑀸𑀥𑀼! 𑀲𑀸𑀥𑀼! 𑀲𑀼𑀓𑀣𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢’’𑀦𑁆𑀢𑀺 𑀏𑀓𑀲𑀸𑀥𑀼𑀓𑀸𑀭𑁄 𑀅𑀳𑁄𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀸𑀢𑀺𑀬𑀭𑀸𑀚𑀸𑀧𑀺 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀁 𑀦𑀕𑀭𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀧𑀸𑀝𑀺𑀬𑀸 𑀲𑀼𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀫𑀬𑀺 𑀲𑀦𑁆𑀢𑁂 𑀪𑀺𑀓𑁆𑀔𑀽𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀻𑀦𑀫𑁆𑀧𑀺 𑀕𑀺𑀳𑀻𑀦𑀫𑁆𑀧𑀺 𑀅𑀥𑀺𑀓𑀭𑀡𑀁 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁂𑀦 𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀁, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 𑀅𑀢𑀺𑀝𑁆𑀞𑀫𑀸𑀦𑀁 𑀭𑀸𑀚𑀸𑀡𑀸𑀬 𑀞𑀧𑁂𑀫𑀻’’𑀢𑀺. 𑀏𑀯𑀁 𑀤𑁂𑀲𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀅𑀕𑁆𑀖𑁄𑀢𑀺 𑀪𑀡𑁆𑀟𑀕𑁆𑀖𑁄. 𑀦𑀯𑀪𑀡𑁆𑀟𑀲𑁆𑀲 𑀳𑀺 𑀬𑁄 𑀅𑀕𑁆𑀖𑁄 𑀳𑁄𑀢𑀺, 𑀲𑁄 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀺; 𑀬𑀣𑀸 𑀦𑀯𑀥𑁄𑀢𑁄 𑀧𑀢𑁆𑀢𑁄 𑀅𑀝𑁆𑀞 𑀯𑀸 𑀤𑀲 𑀯𑀸 𑀅𑀕𑁆𑀖𑀢𑀺, 𑀲𑁄 𑀧𑀘𑁆𑀙𑀸 𑀪𑀺𑀦𑁆𑀦𑁄 𑀯𑀸 𑀙𑀺𑀤𑁆𑀤𑁄 𑀯𑀸 𑀆𑀡𑀺𑀕𑀡𑁆𑀞𑀺𑀓𑀸𑀳𑀢𑁄 𑀯𑀸 𑀅𑀧𑁆𑀧𑀕𑁆𑀖𑁄 𑀳𑁄𑀢𑀺 𑀢𑀲𑁆𑀫𑀸 𑀦 𑀲𑀩𑁆𑀩𑀤𑀸 𑀪𑀡𑁆𑀟𑀁 𑀧𑀓𑀢𑀺𑀅𑀕𑁆𑀖𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀅𑀕𑁆𑀖𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀧𑀭𑀺𑀪𑁄𑀕𑁄𑀢𑀺 𑀪𑀡𑁆𑀟𑀧𑀭𑀺𑀪𑁄𑀕𑁄. 𑀧𑀭𑀺𑀪𑁄𑀕𑁂𑀦𑀸𑀧𑀺 𑀳𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑀲𑁆𑀲 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀺. 𑀢𑀲𑁆𑀫𑀸 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁, 𑀲𑀘𑁂 𑀓𑁄𑀘𑀺 𑀓𑀲𑁆𑀲𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀸𑀲𑀺𑀁 𑀳𑀭𑀢𑀺, 𑀢𑀢𑁆𑀭 𑀯𑀸𑀲𑀺𑀲𑀸𑀫𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘‘𑀢𑀬𑀸 𑀅𑀬𑀁 𑀯𑀸𑀲𑀺 𑀓𑀺𑀢𑁆𑀢𑀓𑁂𑀦 𑀓𑀻𑀢𑀸’’𑀢𑀺? ‘‘𑀧𑀸𑀤𑁂𑀦, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁂 𑀓𑀺𑀡𑀺𑀢𑁆𑀯𑀸𑀯 𑀞𑀧𑀺𑀢𑀸, 𑀉𑀤𑀸𑀳𑀼 𑀢𑀁 𑀯𑀴𑀜𑁆𑀚𑁂𑀲𑀻’’𑀢𑀺? 𑀲𑀘𑁂 𑀯𑀤𑀢𑀺 ‘‘𑀏𑀓𑀤𑀺𑀯𑀲𑀁 𑀫𑁂 𑀤𑀦𑁆𑀢𑀓𑀝𑁆𑀞𑀁 𑀯𑀸 𑀭𑀚𑀦𑀙𑀮𑁆𑀮𑀺𑀁 𑀯𑀸 𑀧𑀢𑁆𑀢𑀧𑀘𑀦𑀓𑀤𑀸𑀭𑀼𑀁 𑀯𑀸 𑀙𑀺𑀦𑁆𑀦𑀁, 𑀖𑀁𑀲𑀺𑀢𑁆𑀯𑀸 𑀯𑀸 𑀦𑀺𑀲𑀺𑀢𑀸’’𑀢𑀺. 𑀅𑀣𑀲𑁆𑀲𑀸 𑀧𑁄𑀭𑀸𑀡𑁄 𑀅𑀕𑁆𑀖𑁄 𑀪𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀯𑀸𑀲𑀺𑀬𑀸 𑀏𑀯𑀁 𑀅𑀜𑁆𑀚𑀦𑀺𑀬𑀸 𑀯𑀸 𑀅𑀜𑁆𑀚𑀦𑀺𑀲𑀮𑀸𑀓𑀸𑀬 𑀯𑀸 𑀓𑀼𑀜𑁆𑀘𑀺𑀓𑀸𑀬 𑀯𑀸 𑀧𑀮𑀸𑀮𑁂𑀦 𑀯𑀸 𑀣𑀼𑀲𑁂𑀳𑀺 𑀯𑀸 𑀇𑀝𑁆𑀞𑀓𑀘𑀼𑀡𑁆𑀡𑁂𑀦 𑀯𑀸 𑀏𑀓𑀯𑀸𑀭𑀁 𑀖𑀁𑀲𑀺𑀢𑁆𑀯𑀸 𑀥𑁄𑀯𑀦𑀫𑀢𑁆𑀢𑁂𑀦𑀸𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀺𑀧𑀼𑀫𑀡𑁆𑀟𑀮𑀲𑁆𑀲 𑀫𑀓𑀭𑀤𑀦𑁆𑀢𑀘𑁆𑀙𑁂𑀤𑀦𑁂𑀦𑀸𑀧𑀺 𑀧𑀭𑀺𑀫𑀚𑁆𑀚𑀺𑀢𑀫𑀢𑁆𑀢𑁂𑀦𑀸𑀧𑀺, 𑀉𑀤𑀓𑀲𑀸𑀝𑀺𑀓𑀸𑀬 𑀲𑀓𑀺𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀦𑀸𑀧𑀺 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀲𑀻𑀲𑁂 𑀯𑀸 𑀞𑀧𑀦𑀫𑀢𑁆𑀢𑁂𑀦𑀸𑀧𑀺, 𑀢𑀡𑁆𑀟𑀼𑀮𑀸𑀤𑀻𑀦𑀁 𑀧𑀧𑁆𑀨𑁄𑀝𑀦𑁂𑀦𑀸𑀧𑀺 𑀢𑀢𑁄 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀅𑀧𑀦𑀬𑀦𑁂𑀦𑀸𑀧𑀺, 𑀅𑀦𑁆𑀢𑀫𑀲𑁄 𑀏𑀓𑀁 𑀧𑀸𑀲𑀸𑀡𑀲𑀓𑁆𑀔𑀭𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀸𑀧𑀺, 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀪𑀸𑀚𑀦𑀦𑁆𑀢𑀭𑀧𑀅𑀯𑀢𑁆𑀢𑀦𑁂𑀦𑀸𑀧𑀺, 𑀅𑀦𑁆𑀢𑀫𑀲𑁄 𑀢𑀢𑁄 𑀫𑀓𑁆𑀔𑀺𑀓𑀁 𑀯𑀸 𑀓𑀺𑀧𑀺𑀮𑁆𑀮𑀺𑀓𑀁 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀸𑀧𑀺, 𑀕𑀼𑀴𑀧𑀺𑀡𑁆𑀟𑀓𑀲𑁆𑀲 𑀫𑀥𑀼𑀭𑀪𑀸𑀯𑀚𑀸𑀦𑀦𑀢𑁆𑀣𑀁 𑀦𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀡𑀼𑀫𑀢𑁆𑀢𑀁 𑀕𑀳𑀺𑀢𑀫𑀢𑁆𑀢𑁂𑀦𑀸𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀲𑁆𑀫𑀸 𑀬𑀁𑀓𑀺𑀜𑁆𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀸𑀫𑀺𑀓𑁂𑀳𑀺 𑀧𑀭𑀺𑀪𑁄𑀕𑁂𑀦 𑀊𑀦𑀁 𑀓𑀢𑀁 𑀳𑁄𑀢𑀺, 𑀦 𑀢𑀁 𑀅𑀯𑀳𑀝𑁄 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑁂𑀦 𑀓𑀸𑀢𑀩𑁆𑀩𑁄. 𑀏𑀯𑀁 𑀧𑀭𑀺𑀪𑁄𑀕𑁄 𑀑𑀮𑁄𑀓𑁂𑀢𑀩𑁆𑀩𑁄. 𑀏𑀯𑀁 𑀇𑀫𑀸𑀦𑀺 𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄, 𑀆𑀧𑀢𑁆𑀢𑀺𑀁 𑀯𑀸 𑀅𑀦𑀸𑀧𑀢𑁆𑀢𑀺𑀁 𑀯𑀸 𑀕𑀭𑀼𑀓𑀁 𑀯𑀸 𑀮𑀳𑀼𑀓𑀁 𑀯𑀸 𑀆𑀧𑀢𑁆𑀢𑀺𑀁 𑀬𑀣𑀸𑀞𑀸𑀦𑁂 𑀞𑀧𑁂𑀬𑁆𑀬𑀸𑀢𑀺.

𑀦𑀺𑀝𑁆𑀞𑀺𑀢𑁄 ‘‘𑀆𑀤𑀺𑀬𑁂𑀬𑁆𑀬…𑀧𑁂… 𑀲𑀗𑁆𑀓𑁂𑀢𑀁 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺.

𑀇𑀫𑁂𑀲𑀁 𑀧𑀤𑀸𑀦𑀁 𑀯𑀺𑀦𑀺𑀘𑁆𑀙𑀬𑁄.

𑀇𑀤𑀸𑀦𑀺 𑀬𑀤𑀺𑀤𑀁 ‘‘𑀬𑀣𑀸𑀭𑀽𑀧𑁂 𑀅𑀤𑀺𑀦𑁆𑀦𑀸𑀤𑀸𑀦𑁂’’𑀢𑀺𑀆𑀤𑀻𑀦𑀺 𑀯𑀺𑀪𑀚𑀦𑁆𑀢𑁂𑀦 ‘‘𑀬𑀣𑀸𑀭𑀽𑀧𑀁 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸𑀭𑀽𑀧𑀦𑁆𑀢𑀺 𑀬𑀣𑀸𑀚𑀸𑀢𑀺𑀓𑀁. 𑀢𑀁 𑀧𑀦 𑀬𑀲𑁆𑀫𑀸 𑀧𑀸𑀤𑀢𑁄 𑀧𑀝𑁆𑀞𑀸𑀬 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸’’𑀢𑀺 𑀆𑀳. 𑀢𑀢𑁆𑀣 𑀧𑀸𑀤𑁂𑀦 𑀓𑀳𑀸𑀧𑀡𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀁 𑀅𑀓𑀧𑁆𑀧𑀺𑀬𑀪𑀡𑁆𑀟𑀫𑁂𑀯 𑀤𑀲𑁆𑀲𑁂𑀢𑀺. 𑀧𑀸𑀤𑀸𑀭𑀳𑁂𑀦 𑀧𑀸𑀤𑀕𑁆𑀖𑀦𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁. 𑀅𑀢𑀺𑀭𑁂𑀓𑀧𑀸𑀤𑁂𑀦 𑀉𑀪𑀬𑀫𑁆𑀧𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀸𑀓𑀸𑀭𑁂𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀯𑀢𑁆𑀣𑀼 𑀤𑀲𑁆𑀲𑀺𑀢𑀁 𑀳𑁄𑀢𑀺.

𑀧𑀣𑀩𑁆𑀬𑀸 𑀭𑀸𑀚𑀸𑀢𑀺 𑀲𑀓𑀮𑀧𑀣𑀯𑀺𑀬𑀸 𑀭𑀸𑀚𑀸 𑀤𑀻𑀧𑀘𑀓𑁆𑀓𑀯𑀢𑁆𑀢𑀻 𑀅𑀲𑁄𑀓𑀲𑀤𑀺𑀲𑁄, 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀏𑀓𑀤𑀻𑀧𑁂 𑀭𑀸𑀚𑀸, 𑀲𑀻𑀳𑀴𑀭𑀸𑀚𑀲𑀤𑀺𑀲𑁄. 𑀧𑀤𑁂𑀲𑀭𑀸𑀚𑀸𑀢𑀺 𑀏𑀓𑀤𑀻𑀧𑀲𑁆𑀲 𑀧𑀤𑁂𑀲𑀺𑀲𑁆𑀲𑀭𑁄, 𑀩𑀺𑀫𑁆𑀩𑀺𑀲𑀸𑀭-𑀧𑀲𑁂𑀦𑀤𑀺-𑀆𑀤𑀬𑁄 𑀯𑀺𑀬. 𑀫𑀡𑁆𑀟𑀮𑀺𑀓𑀸 𑀦𑀸𑀫 𑀬𑁂 𑀤𑀻𑀧𑀧𑀤𑁂𑀲𑁂𑀧𑀺 𑀏𑀓𑀫𑁂𑀓𑀁 𑀫𑀡𑁆𑀟𑀮𑀁 𑀪𑀼𑀜𑁆𑀚𑀦𑁆𑀢𑀺. 𑀅𑀦𑁆𑀢𑀭𑀪𑁄𑀕𑀺𑀓𑀸 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀅𑀦𑁆𑀢𑀭𑀸 𑀓𑀢𑀺𑀧𑀬𑀕𑀸𑀫𑀲𑀸𑀫𑀺𑀓𑀸. 𑀅𑀓𑁆𑀔𑀤𑀲𑁆𑀲𑀸𑀢𑀺 𑀥𑀫𑁆𑀫𑀯𑀺𑀦𑀺𑀘𑁆𑀙𑀦𑀓𑀸, 𑀢𑁂 𑀥𑀫𑁆𑀫𑀲𑀪𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀧𑀭𑀸𑀥𑀸𑀦𑀼𑀭𑀽𑀧𑀁 𑀘𑁄𑀭𑀸𑀦𑀁 𑀳𑀢𑁆𑀣𑀧𑀸𑀤𑀘𑁆𑀙𑁂𑀚𑁆𑀚𑀸𑀤𑀺𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀬𑁂 𑀧𑀦 𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑀸 𑀅𑀫𑀘𑁆𑀘𑀸 𑀯𑀸 𑀭𑀸𑀚𑀓𑀼𑀫𑀸𑀭𑀸 𑀯𑀸 𑀓𑀢𑀸𑀧𑀭𑀸𑀥𑀸 𑀳𑁄𑀦𑁆𑀢𑀺, 𑀢𑁂 𑀭𑀜𑁆𑀜𑁄 𑀆𑀭𑁄𑀘𑁂𑀦𑁆𑀢𑀺, 𑀕𑀭𑀼𑀓𑀁 𑀞𑀸𑀦𑀁 𑀲𑀬𑀁 𑀦 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺. 𑀫𑀳𑀸𑀫𑀢𑁆𑀢𑀸𑀢𑀺 𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑀸 𑀫𑀳𑀸𑀅𑀫𑀘𑁆𑀘𑀸; 𑀢𑁂𑀧𑀺 𑀢𑀢𑁆𑀣 𑀢𑀢𑁆𑀣 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀭𑀸𑀚𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀬𑁂 𑀯𑀸 𑀧𑀦𑀸𑀢𑀺 𑀅𑀜𑁆𑀜𑁂𑀧𑀺 𑀬𑁂 𑀭𑀸𑀚𑀓𑀼𑀮𑀦𑀺𑀲𑁆𑀲𑀺𑀢𑀸 𑀯𑀸 𑀲𑀓𑀺𑀲𑁆𑀲𑀭𑀺𑀬𑀦𑀺𑀲𑁆𑀲𑀺𑀢𑀸 𑀯𑀸 𑀳𑀼𑀢𑁆𑀯𑀸 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀢𑁂 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀭𑀸𑀚𑀸𑀦𑁄’’𑀢𑀺 𑀤𑀲𑁆𑀲𑁂𑀢𑀺.

𑀳𑀦𑁂𑀬𑁆𑀬𑀼𑀦𑁆𑀢𑀺 𑀧𑁄𑀣𑁂𑀬𑁆𑀬𑀼𑀜𑁆𑀘𑁂𑀯 𑀙𑀺𑀦𑁆𑀤𑁂𑀬𑁆𑀬𑀼𑀜𑁆𑀘. 𑀧𑀩𑁆𑀩𑀸𑀚𑁂𑀬𑁆𑀬𑀼𑀦𑁆𑀢𑀺 𑀦𑀻𑀳𑀭𑁂𑀬𑁆𑀬𑀼𑀁. 𑀘𑁄𑀭𑁄𑀲𑀻𑀢𑀺 𑀏𑀯𑀫𑀸𑀤𑀻𑀦𑀺 𑀘 𑀯𑀢𑁆𑀯𑀸 𑀧𑀭𑀺𑀪𑀸𑀲𑁂𑀬𑁆𑀬𑀼𑀁; 𑀢𑁂𑀦𑁂𑀯𑀸𑀳 𑁋 ‘‘𑀧𑀭𑀺𑀪𑀸𑀲𑁄 𑀏𑀲𑁄’’𑀢𑀺. 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬𑀸𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀉𑀧𑀸𑀤𑀸𑀬. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀧𑀤𑀢𑁆𑀣𑀢𑁆𑀢𑀸 𑀘 𑀧𑀸𑀓𑀝𑀫𑁂𑀯𑀸𑀢𑀺.

𑁯𑁩. 𑀏𑀯𑀁 𑀉𑀤𑁆𑀤𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀧𑀤𑀸𑀦𑀼𑀓𑁆𑀓𑀫𑁂𑀦 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀬𑀁 𑀢𑀁 𑀆𑀤𑀺𑀬𑁂𑀬𑁆𑀬𑀸𑀢𑀺𑀆𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀲𑀗𑁆𑀔𑁂𑀧𑀢𑁄 𑀆𑀤𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀔𑁂𑀧𑀢𑁄𑀏𑀯 ‘‘𑀧𑀸𑀤𑀁 𑀯𑀸 𑀧𑀸𑀤𑀸𑀭𑀳𑀁 𑀯𑀸 𑀅𑀢𑀺𑀭𑁂𑀓𑀧𑀸𑀤𑀁 𑀯𑀸’’𑀢𑀺 𑀆𑀤𑀸𑀢𑀩𑁆𑀩𑀪𑀡𑁆𑀟𑀁 𑀤𑀲𑁆𑀲𑀺𑀢𑀁, 𑀢𑀁 𑀬𑀢𑁆𑀣 𑀬𑀢𑁆𑀣 𑀞𑀺𑀢𑀁, 𑀬𑀣𑀸 𑀬𑀣𑀸 𑀆𑀤𑀸𑀦𑀁 𑀕𑀘𑁆𑀙𑀢𑀺, 𑀅𑀦𑀸𑀕𑀢𑁂 𑀧𑀸𑀧𑀪𑀺𑀓𑁆𑀔𑀽𑀦𑀁 𑀮𑁂𑀲𑁄𑀓𑀸𑀲𑀦𑀺𑀭𑀼𑀦𑁆𑀥𑀦𑀢𑁆𑀣𑀁 𑀢𑀣𑀸 𑀢𑀣𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀪𑀽𑀫𑀝𑁆𑀞𑀁 𑀣𑀮𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 ‘‘𑀪𑀽𑀫𑀝𑁆𑀞𑀁 𑀦𑀸𑀫 𑀪𑀡𑁆𑀟𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀲𑁆𑀲 𑀯𑀺𑀪𑀗𑁆𑀕𑀁 𑀆𑀳.

𑀧𑀜𑁆𑀘𑀯𑀻𑀲𑀢𑀺𑀅𑀯𑀳𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑀽𑀫𑀝𑁆𑀞𑀓𑀣𑀸

𑁯𑁪. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸𑀬 𑀲𑀤𑁆𑀥𑀺𑀁 𑀯𑀺𑀦𑀺𑀘𑁆𑀙𑀬𑀓𑀣𑀸. 𑀦𑀺𑀔𑀸𑀢𑀦𑁆𑀢𑀺 𑀪𑀽𑀫𑀺𑀬𑀁 𑀔𑀡𑀺𑀢𑁆𑀯𑀸 𑀞𑀧𑀺𑀢𑀁. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀧𑀁𑀲𑀼𑀇𑀝𑁆𑀞𑀓𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀁. 𑀪𑀽𑀫𑀝𑁆𑀞𑀁 𑀪𑀡𑁆𑀟𑀁…𑀧𑁂… 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀢𑀁 𑀏𑀯𑀁 𑀦𑀺𑀔𑀡𑀺𑀢𑁆𑀯𑀸 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀸 𑀞𑀧𑀺𑀢𑀢𑁆𑀢𑀸 𑀪𑀽𑀫𑀺𑀬𑀁 𑀞𑀺𑀢𑀁 𑀪𑀡𑁆𑀟𑀁 𑀬𑁄 𑀪𑀺𑀓𑁆𑀔𑀼 𑀓𑁂𑀦𑀘𑀺𑀤𑁂𑀯 𑀉𑀧𑀸𑀬𑁂𑀦 𑀜𑀢𑁆𑀯𑀸 ‘‘𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀉𑀝𑁆𑀞𑀸𑀬 𑀕𑀘𑁆𑀙𑀢𑀺, 𑀲𑁄 𑀪𑀡𑁆𑀟𑀝𑁆𑀞𑀸𑀦𑀁 𑀅𑀧𑁆𑀧𑀢𑁆𑀯𑀸𑀧𑀺 𑀲𑀩𑁆𑀩𑀓𑀸𑀬𑀯𑀘𑀻𑀯𑀺𑀓𑀸𑀭𑁂𑀲𑀼 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀓𑀣𑀁? 𑀲𑁄 𑀳𑀺 𑀢𑀲𑁆𑀲 𑀆𑀳𑀭𑀡𑀢𑁆𑀣𑀸𑀬 𑀉𑀝𑁆𑀞𑀳𑀦𑁆𑀢𑁄 𑀬𑀁 𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀨𑀦𑁆𑀤𑀸𑀧𑁂𑀢𑀺, 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀫𑁂𑀯. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀲𑀡𑁆𑀞𑀧𑁂𑀢𑀺, 𑀳𑀢𑁆𑀣𑀯𑀸𑀭𑁂 𑀳𑀢𑁆𑀣𑀯𑀸𑀭𑁂 𑀤𑀼𑀓𑁆𑀓𑀝𑀁. ‘‘𑀫𑀳𑀦𑁆𑀢𑀁 𑀦𑀺𑀥𑀸𑀦𑀁 𑀦 𑀲𑀓𑁆𑀓𑀸 𑀏𑀓𑁂𑀦 𑀆𑀳𑀭𑀺𑀢𑀼𑀁, 𑀤𑀼𑀢𑀺𑀬𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀓𑀲𑁆𑀲𑀘𑀺 𑀲𑀳𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀤𑁆𑀯𑀸𑀭𑀁 𑀯𑀺𑀯𑀭𑀢𑀺, 𑀧𑀤𑀯𑀸𑀭𑁂 𑀘 𑀳𑀢𑁆𑀣𑀯𑀸𑀭𑁂 𑀘 𑀤𑀼𑀓𑁆𑀓𑀝𑀁. 𑀤𑁆𑀯𑀸𑀭𑀧𑀺𑀤𑀳𑀦𑁂 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀕𑀫𑀦𑀲𑁆𑀲 𑀅𑀦𑀼𑀧𑀓𑀸𑀭𑁂 𑀅𑀦𑀸𑀧𑀢𑁆𑀢𑀺. 𑀢𑀲𑁆𑀲 𑀦𑀺𑀧𑀦𑁆𑀦𑁄𑀓𑀸𑀲𑀁 𑀕𑀦𑁆𑀢𑁆𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀸’’𑀢𑀺 𑀧𑀓𑁆𑀓𑁄𑀲𑀢𑀺, 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀏𑀳𑀺 𑀕𑀘𑁆𑀙𑀸𑀫𑀸’’𑀢𑀺 𑀯𑀤𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. 𑀲𑁄 𑀢𑀲𑁆𑀲 𑀯𑀘𑀦𑁂𑀦 𑀉𑀝𑁆𑀞𑀳𑀢𑀺, 𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀁. 𑀉𑀝𑁆𑀞𑀳𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀓𑀸𑀫𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀲𑀡𑁆𑀞𑀧𑁂𑀢𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀲𑁆𑀲 𑀲𑀫𑀻𑀧𑀁 𑀕𑀘𑁆𑀙𑀢𑀺, 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀁. 𑀲𑁄 𑀢𑀁 𑀧𑀼𑀘𑁆𑀙𑀢𑀺 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀓𑀼𑀳𑀺𑀁, 𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘 𑀧𑀓𑁆𑀓𑁄𑀲𑀸𑀳𑀻’’𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. 𑀲𑀩𑁆𑀩𑁂 𑀲𑀫𑀸𑀕𑀢𑁂 𑀤𑀺𑀲𑁆𑀯𑀸 ‘‘𑀫𑀬𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀏𑀯𑀭𑀽𑀧𑁄 𑀦𑀺𑀥𑀺 𑀉𑀧𑀮𑀤𑁆𑀥𑁄, 𑀕𑀘𑁆𑀙𑀸𑀫 𑀢𑀁 𑀕𑀳𑁂𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀘 𑀓𑀭𑀺𑀲𑁆𑀲𑀸𑀫, 𑀲𑀼𑀔𑀜𑁆𑀘 𑀚𑀻𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀫𑁂𑀯.

𑀏𑀯𑀁 𑀮𑀤𑁆𑀥𑀲𑀳𑀸𑀬𑁄 𑀓𑀼𑀤𑀸𑀮𑀁 𑀧𑀭𑀺𑀬𑁂𑀲𑀢𑀺. 𑀲𑀘𑁂 𑀧𑀦𑀲𑁆𑀲 𑀅𑀢𑁆𑀢𑀦𑁄 𑀓𑀼𑀤𑀸𑀮𑁄 𑀅𑀢𑁆𑀣𑀺, ‘‘𑀢𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀘 𑀕𑀡𑁆𑀳𑀦𑁆𑀢𑁄 𑀘 𑀆𑀳𑀭𑀦𑁆𑀢𑁄 𑀘 𑀲𑀩𑁆𑀩𑀢𑁆𑀣 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀦𑀢𑁆𑀣𑀺, 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀯𑀸 𑀕𑀳𑀝𑁆𑀞𑀁 𑀯𑀸 𑀕𑀦𑁆𑀢𑁆𑀯𑀸 𑀬𑀸𑀘𑀢𑀺, 𑀬𑀸𑀘𑀦𑁆𑀢𑁄 𑀘 𑀲𑀘𑁂 ‘‘𑀓𑀼𑀤𑀸𑀮𑀁 𑀫𑁂 𑀤𑁂𑀳𑀺, 𑀓𑀼𑀤𑀸𑀮𑁂𑀦 𑀫𑁂 𑀅𑀢𑁆𑀣𑁄, 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀫𑀢𑁆𑀣𑀺, 𑀢𑀁 𑀓𑀢𑁆𑀯𑀸 𑀧𑀘𑁆𑀘𑀸𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀼𑀲𑀸 𑀅𑀪𑀡𑀦𑁆𑀢𑁄 𑀬𑀸𑀘𑀢𑀺, 𑀯𑀸𑀘𑀸𑀬 𑀯𑀸𑀘𑀸𑀬 𑀤𑀼𑀓𑁆𑀓𑀝𑀁. 𑀲𑀘𑁂 ‘‘𑀫𑀸𑀢𑀺𑀓𑀸 𑀲𑁄𑀥𑁂𑀢𑀩𑁆𑀩𑀸 𑀅𑀢𑁆𑀣𑀺, 𑀯𑀺𑀳𑀸𑀭𑁂 𑀪𑀽𑀫𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀫𑀼𑀲𑀸𑀧𑀺 𑀪𑀡𑀢𑀺, 𑀬𑀁 𑀬𑀁 𑀯𑀘𑀦𑀁 𑀫𑀼𑀲𑀸, 𑀢𑀢𑁆𑀣 𑀢𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁 𑀦𑀸𑀫 𑀅𑀢𑁆𑀣𑀺. 𑀲𑀘𑁂 𑀧𑀦 𑀓𑀼𑀤𑀸𑀮𑀲𑁆𑀲 𑀤𑀡𑁆𑀟𑁄 𑀦𑀢𑁆𑀣𑀺, ‘‘𑀤𑀡𑁆𑀟𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸𑀲𑀺𑀁 𑀯𑀸 𑀨𑀭𑀲𑀼𑀁 𑀯𑀸 𑀦𑀺𑀲𑁂𑀢𑀺, 𑀢𑀤𑀢𑁆𑀣𑀸𑀬 𑀕𑀘𑁆𑀙𑀢𑀺, 𑀕𑀦𑁆𑀢𑁆𑀯𑀸 𑀲𑀼𑀓𑁆𑀔𑀓𑀝𑁆𑀞𑀁 𑀙𑀺𑀦𑁆𑀤𑀢𑀺 𑀢𑀘𑁆𑀙𑀢𑀺 𑀆𑀓𑁄𑀝𑁂𑀢𑀺, 𑀲𑀩𑁆𑀩𑀢𑁆𑀣 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀤𑀼𑀓𑁆𑀓𑀝𑀁. 𑀅𑀮𑁆𑀮𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁄 𑀧𑀭𑀁 𑀲𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁. 𑀲𑀗𑁆𑀔𑁂𑀧𑀝𑁆𑀞𑀓𑀣𑀸𑀬𑀁 𑀧𑀦 𑀫𑀳𑀸𑀧𑀘𑁆𑀘𑀭𑀺𑀬𑀜𑁆𑀘 𑀢𑀢𑁆𑀣 𑀚𑀸𑀢𑀓𑀓𑀝𑁆𑀞𑀮𑀢𑀸𑀙𑁂𑀤𑀦𑀢𑁆𑀣𑀁 𑀯𑀸𑀲𑀺𑀨𑀭𑀲𑀼𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀫𑁆𑀧𑀺 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀲𑀘𑁂 𑀧𑀦 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀯𑀸𑀲𑀺𑀨𑀭𑀲𑀼𑀓𑀼𑀤𑀸𑀮𑁂 𑀬𑀸𑀘𑀦𑁆𑀢𑀸 𑀆𑀲𑀗𑁆𑀓𑀺𑀢𑀸 𑀪𑀯𑀺𑀲𑁆𑀲𑀸𑀫, 𑀮𑁄𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀭𑁄𑀫𑀸’’𑀢𑀺. 𑀢𑀢𑁄 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀮𑁄𑀳𑀩𑀻𑀚𑀢𑁆𑀣𑀁 𑀧𑀣𑀯𑀺𑀁 𑀔𑀡𑀦𑁆𑀢𑀺, 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑁂𑀳𑀺 𑀲𑀤𑁆𑀥𑀺𑀁 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀸 𑀦 𑀫𑀼𑀘𑁆𑀘𑀢𑀺. 𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑀸𑀦𑀁 𑀤𑀼𑀓𑁆𑀓𑀝𑀸𑀦𑀺𑀬𑁂𑀯. 𑀩𑀻𑀚𑀁 𑀧𑀦 𑀕𑀳𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁.

𑀧𑀺𑀝𑀓𑀧𑀭𑀺𑀬𑁂𑀲𑀦𑁂𑀧𑀺 𑀳𑀢𑁆𑀣𑀯𑀸𑀭𑀧𑀤𑀯𑀸𑀭𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀼𑀓𑁆𑀓𑀝𑀁. 𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀺𑀝𑀓𑀁 𑀓𑀸𑀢𑀼𑀓𑀸𑀫𑀢𑀸𑀬 𑀯𑀮𑁆𑀮𑀺𑀘𑁆𑀙𑁂𑀤𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀕𑀘𑁆𑀙𑀢𑀺 𑀯𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀏𑀯𑀁 𑀧𑀭𑀺𑀬𑀺𑀝𑁆𑀞𑀲𑀳𑀸𑀬𑀓𑀼𑀤𑀸𑀮𑀧𑀺𑀝𑀓𑁄 𑀦𑀺𑀥𑀺𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀲𑀘𑁂 𑀧𑀦 𑀕𑀘𑁆𑀙𑀦𑁆𑀢𑁄 ‘‘𑀇𑀫𑀁 𑀦𑀺𑀥𑀺𑀁 𑀮𑀤𑁆𑀥𑀸 𑀩𑀼𑀤𑁆𑀥𑀧𑀽𑀚𑀁 𑀯𑀸 𑀥𑀫𑁆𑀫𑀧𑀽𑀚𑀁 𑀯𑀸 𑀲𑀗𑁆𑀖𑀪𑀢𑁆𑀢𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀼𑀲𑀮𑀁 𑀉𑀧𑁆𑀧𑀸𑀤𑁂𑀢𑀺, 𑀓𑀼𑀲𑀮𑀘𑀺𑀢𑁆𑀢𑁂𑀦 𑀕𑀫𑀦𑁂 𑀅𑀦𑀸𑀧𑀢𑁆𑀢𑀺. 𑀓𑀲𑁆𑀫𑀸? ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸…𑀧𑁂… 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀫𑀕𑁆𑀕𑀢𑁄 𑀑𑀓𑁆𑀓𑀫𑁆𑀫 𑀦𑀺𑀥𑀸𑀦𑀝𑁆𑀞𑀸𑀦𑀁 𑀕𑀫𑀦𑀢𑁆𑀣𑀸𑀬 𑀫𑀕𑁆𑀕𑀁 𑀓𑀭𑁄𑀦𑁆𑀢𑁄 𑀪𑀽𑀢𑀕𑀸𑀫𑀁 𑀙𑀺𑀦𑁆𑀤𑀢𑀺, 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀼𑀓𑁆𑀔𑀓𑀝𑁆𑀞𑀁 𑀙𑀺𑀦𑁆𑀤𑀢𑀺, 𑀤𑀼𑀓𑁆𑀓𑀝𑀁.

𑀢𑀢𑁆𑀣𑀚𑀸𑀢𑀓𑀦𑁆𑀢𑀺 𑀘𑀺𑀭𑀦𑀺𑀳𑀺𑀢𑀸𑀬 𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀚𑀸𑀢𑀓𑀁. 𑀓𑀝𑁆𑀞𑀁 𑀯𑀸 𑀮𑀢𑀁 𑀯𑀸𑀢𑀺 𑀦 𑀓𑁂𑀯𑀮𑀁 𑀓𑀝𑁆𑀞𑀮𑀢𑀫𑁂𑀯, 𑀬𑀁𑀓𑀺𑀜𑁆𑀘𑀺 𑀅𑀮𑁆𑀮𑀁 𑀯𑀸 𑀲𑀼𑀓𑁆𑀔𑀁 𑀯𑀸 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺.

𑀅𑀝𑁆𑀞𑀯𑀺𑀥𑀁 𑀳𑁂𑀢𑀁 𑀤𑀼𑀓𑁆𑀓𑀝𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀣𑁂𑀭𑁂𑀳𑀺 𑀤𑀲𑁆𑀲𑀺𑀢𑀁 𑁋 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁, 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁, 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁, 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁, 𑀯𑀺𑀦𑀬𑀤𑀼𑀓𑁆𑀓𑀝𑀁, 𑀜𑀸𑀢𑀤𑀼𑀓𑁆𑀓𑀝𑀁, 𑀜𑀢𑁆𑀢𑀺𑀤𑀼𑀓𑁆𑀓𑀝𑀁, 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀦𑁆𑀢𑀺. 𑀢𑀢𑁆𑀣 ‘‘𑀣𑁂𑀬𑁆𑀬𑀘𑀺𑀢𑁆𑀢𑁄 𑀤𑀼𑀢𑀺𑀬𑀁 𑀯𑀸 𑀓𑀼𑀤𑀸𑀮𑀁 𑀯𑀸 𑀧𑀺𑀝𑀓𑀁 𑀯𑀸 𑀧𑀭𑀺𑀬𑁂𑀲𑀢𑀺 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀧𑀼𑀩𑁆𑀩𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀏𑀢𑁆𑀣 𑀳𑀺 𑀤𑀼𑀓𑁆𑀓𑀝𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁, 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀧𑀸𑀘𑀺𑀢𑁆𑀢𑀺𑀬𑀫𑁂𑀯 𑀳𑁄𑀢𑀺. ‘‘𑀢𑀢𑁆𑀣𑀚𑀸𑀢𑀓𑀁 𑀓𑀝𑁆𑀞𑀁 𑀯𑀸 𑀮𑀢𑀁 𑀯𑀸 𑀙𑀺𑀦𑁆𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁 𑀦𑀸𑀫. 𑀏𑀢𑁆𑀣 𑀧𑀦 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼 𑀘 𑀤𑀼𑀓𑁆𑀓𑀝𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀓𑀲𑁆𑀫𑀸? 𑀅𑀯𑀳𑀸𑀭𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸𑀢𑀺. 𑀬𑀁 𑀧𑀦 𑀤𑀲𑀯𑀺𑀥𑀁 𑀭𑀢𑀦𑀁, 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁, 𑀲𑀩𑁆𑀩𑀜𑁆𑀘 𑀆𑀯𑀼𑀥𑀪𑀡𑁆𑀟𑀸𑀤𑀺𑀁 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀤𑀁 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁 𑀦𑀸𑀫. 𑀬𑀁 𑀓𑀤𑀮𑀺𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀢𑀢𑁆𑀣𑀚𑀸𑀢𑀓𑀨𑀮𑀸𑀦𑀺 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀤𑀁 𑀤𑀼𑀭𑀼𑀧𑀘𑀺𑀡𑁆𑀡𑀤𑀼𑀓𑁆𑀓𑀝𑀁 𑀦𑀸𑀫. 𑀬𑀁 𑀧𑀦 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀧𑀢𑁆𑀢𑁂 𑀭𑀚𑁂 𑀧𑀢𑀺𑀢𑁂 𑀧𑀢𑁆𑀢𑀁 𑀅𑀧𑁆𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀥𑁄𑀯𑀺𑀢𑁆𑀯𑀸 𑀯𑀸 𑀢𑀢𑁆𑀣 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀇𑀤𑀁 𑀯𑀺𑀦𑀬𑀤𑀼𑀓𑁆𑀓𑀝𑀁 𑀦𑀸𑀫. ‘‘𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁯) 𑀇𑀤𑀁 𑀜𑀸𑀢𑀤𑀼𑀓𑁆𑀓𑀝𑀁 𑀦𑀸𑀫. 𑀬𑀁 𑀏𑀓𑀸𑀤𑀲𑀲𑀼 𑀲𑀫𑀦𑀼𑀪𑀸𑀲𑀦𑀸𑀲𑀼 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝’’𑀦𑁆𑀢𑀺 (𑀧𑀸𑀭𑀸. 𑁪𑁧𑁪) 𑀯𑀼𑀢𑁆𑀢𑀁, 𑀇𑀤𑀁 𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀦𑀸𑀫. ‘‘𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀺𑀫𑀺𑀓𑀸 𑀘 𑀦 𑀧𑀜𑁆𑀜𑀸𑀬𑀢𑀺, 𑀧𑀝𑀺𑀲𑁆𑀲𑀯𑁂 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁭) 𑀇𑀤𑀁 𑀧𑀝𑀺𑀲𑁆𑀲𑀯𑀤𑀼𑀓𑁆𑀓𑀝𑀁 𑀦𑀸𑀫. 𑀇𑀤𑀁 𑀧𑀦 𑀲𑀳𑀧𑀬𑁄𑀕𑀤𑀼𑀓𑁆𑀓𑀝𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀁𑀓𑀺𑀜𑁆𑀘𑀺 𑀅𑀮𑁆𑀮𑀁 𑀯𑀸 𑀲𑀼𑀓𑁆𑀔𑀁 𑀯𑀸 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻’’𑀢𑀺.

𑀲𑀘𑁂 𑀧𑀦𑀲𑁆𑀲 𑀢𑀢𑁆𑀣𑀚𑀸𑀢𑀓𑁂 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀫𑁆𑀳𑀺 𑀙𑀺𑀦𑁆𑀦𑁂𑀧𑀺 𑀮𑀚𑁆𑀚𑀺𑀥𑀫𑁆𑀫𑁄 𑀑𑀓𑁆𑀓𑀫𑀢𑀺, 𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀙𑁂𑀤𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀣 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀲𑀉𑀲𑁆𑀲𑀸𑀳𑁄𑀯 𑀧𑀁𑀲𑀼𑀁 𑀔𑀡𑀢𑀺, 𑀙𑁂𑀤𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀔𑀡𑀦𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀅𑀓𑀧𑁆𑀧𑀺𑀬𑀧𑀣𑀯𑀺𑀁 𑀔𑀡𑀦𑁆𑀢𑁄𑀧𑀺 𑀳𑀺 𑀇𑀥 𑀲𑀳𑀧𑀬𑁄𑀕𑀢𑁆𑀢𑀸 𑀤𑀼𑀓𑁆𑀓𑀝𑀫𑁂𑀯 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀦𑀲𑁆𑀲 𑀲𑀩𑁆𑀩𑀤𑀺𑀲𑀸𑀲𑀼 𑀔𑀡𑀺𑀢𑁆𑀯𑀸 𑀓𑀼𑀫𑁆𑀪𑀺𑀫𑀽𑀮𑀁 𑀧𑀢𑁆𑀢𑀲𑁆𑀲𑀸𑀧𑀺 𑀮𑀚𑁆𑀚𑀺𑀥𑀫𑁆𑀫𑁄 𑀑𑀓𑁆𑀓𑀫𑀢𑀺, 𑀔𑀡𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺.

𑀩𑁆𑀬𑀽𑀳𑀢𑀺 𑀯𑀸𑀢𑀺 𑀅𑀣 𑀧𑀦 𑀲𑀉𑀲𑁆𑀲𑀸𑀳𑁄𑀯 𑀧𑀁𑀲𑀼𑀁 𑀯𑀺𑀬𑀽𑀳𑀢𑀺, 𑀏𑀓𑀧𑀲𑁆𑀲𑁂 𑀭𑀸𑀲𑀺𑀁 𑀓𑀭𑁄𑀢𑀺, 𑀔𑀡𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀯𑀺𑀬𑀽𑀳𑀦𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀜𑁆𑀘 𑀧𑀁𑀲𑀼𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀜𑁆𑀚𑀁 𑀓𑀭𑁄𑀦𑁆𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀦 𑀭𑀸𑀲𑀺𑀁 𑀓𑀢𑁆𑀯𑀸𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀢𑀺, 𑀮𑀚𑁆𑀚𑀺𑀥𑀫𑁆𑀫𑀁 𑀆𑀧𑀚𑁆𑀚𑀢𑀺, 𑀯𑀺𑀬𑀽𑀳𑀦𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀉𑀤𑁆𑀥𑀭𑀢𑀺 𑀯𑀸𑀢𑀺 𑀅𑀣 𑀧𑀦 𑀲𑀉𑀲𑁆𑀲𑀸𑀳𑁄𑀯 𑀧𑀁𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀩𑀳𑀺 𑀧𑀸𑀢𑁂𑀢𑀺, 𑀯𑀺𑀬𑀽𑀳𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀧𑀁𑀲𑀼𑀁 𑀧𑀦 𑀓𑀼𑀤𑀸𑀮𑁂𑀦 𑀯𑀸 𑀳𑀢𑁆𑀣𑁂𑀳𑀺 𑀯𑀸 𑀧𑀘𑁆𑀙𑀺𑀬𑀸 𑀯𑀸 𑀢𑀳𑀺𑀁 𑀢𑀳𑀺𑀁 𑀧𑀸𑀢𑁂𑀦𑁆𑀢𑁄 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀲𑀘𑁂 𑀧𑀦 𑀲𑀩𑁆𑀩𑀁 𑀧𑀁𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀓𑀼𑀫𑁆𑀪𑀺𑀁 𑀣𑀮𑀝𑁆𑀞𑀁 𑀓𑀢𑁆𑀯𑀸𑀧𑀺 𑀮𑀚𑁆𑀚𑀺𑀥𑀫𑁆𑀫𑀁 𑀆𑀧𑀚𑁆𑀚𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀣 𑀧𑀦 𑀲𑀉𑀲𑁆𑀲𑀸𑀳𑁄𑀯 𑀓𑀼𑀫𑁆𑀪𑀺𑀁 𑀆𑀫𑀲𑀢𑀺, 𑀉𑀤𑁆𑀥𑀭𑀡𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀆𑀫𑀲𑀦𑀤𑀼𑀓𑁆𑀓𑀝𑁂 𑀧𑀢𑀺𑀝𑁆𑀞𑀸𑀢𑀺. 𑀆𑀫𑀲𑀺𑀢𑁆𑀯𑀸𑀧𑀺 𑀘 𑀮𑀚𑁆𑀚𑀺𑀥𑀫𑁆𑀫𑀁 𑀆𑀧𑀚𑁆𑀚𑀦𑁆𑀢𑁄 𑀆𑀫𑀲𑀦𑀤𑀼𑀓𑁆𑀓𑀝𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀅𑀣 𑀲𑀉𑀲𑁆𑀲𑀸𑀳𑁄𑀯 𑀓𑀼𑀫𑁆𑀪𑀺𑀁 𑀨𑀦𑁆𑀤𑀸𑀧𑁂𑀢𑀺, 𑀆𑀫𑀲𑀦𑀤𑀼𑀓𑁆𑀓𑀝𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, ‘‘𑀨𑀦𑁆𑀤𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀣𑀼𑀮𑁆𑀮𑀘𑁆𑀘𑀬𑁂 𑀧𑀢𑀺𑀝𑁆𑀞𑀸𑀢𑀺.

𑀢𑀢𑁆𑀭𑀸𑀬𑀁 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀘𑀦𑀢𑁆𑀣𑁄 𑁋 𑀧𑀞𑀫𑀁 𑀢𑀸𑀯𑁂𑀢𑁆𑀣 𑀤𑀼𑀝𑁆𑀞𑀼 𑀓𑀢𑀁 𑀲𑀢𑁆𑀣𑀸𑀭𑀸 𑀯𑀼𑀢𑁆𑀢𑀓𑀺𑀘𑁆𑀘𑀁 𑀯𑀺𑀭𑀸𑀥𑁂𑀢𑁆𑀯𑀸 𑀓𑀢𑀦𑁆𑀢𑀺 𑀤𑀼𑀓𑁆𑀓𑀝𑀁. 𑀅𑀣 𑀯𑀸 𑀤𑀼𑀝𑁆𑀞𑀁 𑀓𑀢𑀁, 𑀯𑀺𑀭𑀽𑀧𑀸 𑀲𑀸 𑀓𑀺𑀭𑀺𑀬𑀸 𑀪𑀺𑀓𑁆𑀔𑀼𑀓𑀺𑀭𑀺𑀬𑀸𑀦𑀁 𑀫𑀚𑁆𑀛𑁂 𑀦 𑀲𑁄𑀪𑀢𑀻𑀢𑀺 𑀏𑀯𑀫𑁆𑀧𑀺 𑀤𑀼𑀓𑁆𑀓𑀝𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀤𑀼𑀓𑁆𑀓𑀝𑀁 𑀇𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀜𑁆𑀘, 𑀔𑀮𑀺𑀢𑀁 𑀬𑀜𑁆𑀘 𑀤𑀼𑀓𑁆𑀓𑀝𑀁.

‘‘𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂 𑀧𑀸𑀧𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄;

𑀤𑀼𑀓𑁆𑀓𑀝𑀦𑁆𑀢𑀺 𑀧𑀯𑁂𑀤𑁂𑀦𑁆𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯);

𑀇𑀢𑀭𑀁 𑀧𑀦 𑀣𑀽𑀮𑀢𑁆𑀢𑀸, 𑀅𑀘𑁆𑀘𑀬𑀢𑁆𑀢𑀸 𑀘 𑀣𑀼𑀮𑁆𑀮𑀘𑁆𑀘𑀬𑀁. ‘‘𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺’’ (𑀲𑀁. 𑀦𑀺. 𑁧.𑁪𑁯), ‘‘𑀬𑀁 𑀳𑁄𑀢𑀺 𑀓𑀝𑀼𑀓𑀧𑁆𑀨𑀮’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁬𑁬; 𑀦𑁂𑀢𑁆𑀢𑀺. 𑁯𑁧) 𑀯𑀺𑀬 𑀘𑁂𑀢𑁆𑀣 𑀲𑀁𑀬𑁄𑀕𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑁂𑀢𑀩𑁆𑀩𑁂𑀲𑀼 𑀳𑀺 𑀅𑀘𑁆𑀘𑀬𑁂𑀲𑀼 𑀢𑁂𑀦 𑀲𑀫𑁄 𑀣𑀽𑀮𑁄 𑀅𑀘𑁆𑀘𑀬𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀣𑀽𑀮𑀢𑁆𑀢𑀸 𑀅𑀘𑁆𑀘𑀬𑀢𑁆𑀢𑀸 𑀘 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀏𑀓𑀲𑁆𑀲 𑀫𑀽𑀮𑁂 𑀬𑁄 𑀤𑁂𑀲𑁂𑀢𑀺, 𑀬𑁄 𑀘 𑀢𑀁 𑀧𑀝𑀺𑀕𑁆𑀕𑀡𑁆𑀳𑀢𑀺;

𑀅𑀘𑁆𑀘𑀬𑁄 𑀢𑁂𑀦 𑀲𑀫𑁄 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀧𑀭𑀺. 𑁩𑁩𑁯);

𑀨𑀦𑁆𑀤𑀸𑀧𑁂𑀦𑁆𑀢𑀲𑁆𑀲 𑀘 𑀧𑀬𑁄𑀕𑁂 𑀧𑀬𑁄𑀕𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀨𑀦𑁆𑀤𑀸𑀧𑁂𑀢𑁆𑀯𑀸𑀧𑀺 𑀘 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀺. 𑀲𑀳𑀧𑀬𑁄𑀕𑀢𑁄 𑀧𑀝𑁆𑀞𑀸𑀬𑁂𑀯 𑀘𑁂𑀢𑁆𑀣 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀆𑀧𑀢𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀲𑀳𑀧𑀬𑁄𑀕𑀁 𑀧𑀦 𑀅𑀓𑀢𑁆𑀯𑀸 𑀮𑀚𑁆𑀚𑀺𑀥𑀫𑁆𑀫𑀁 𑀑𑀓𑁆𑀓𑀦𑁆𑀢𑁂𑀦 𑀬𑀸 𑀧𑀼𑀩𑁆𑀩𑀧𑀬𑁄𑀕𑁂 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸 𑀆𑀧𑀦𑁆𑀦𑀸, 𑀲𑀩𑁆𑀩𑀸 𑀢𑀸 𑀤𑁂𑀲𑁂𑀢𑀩𑁆𑀩𑀸. 𑀲𑀳𑀧𑀬𑁄𑀕𑁂 𑀘 𑀢𑀢𑁆𑀣𑀚𑀸𑀢𑀓𑀘𑁆𑀙𑁂𑀤𑀦𑁂 𑀩𑀳𑀼𑀓𑀸𑀦𑀺𑀧𑀺 𑀤𑀼𑀓𑁆𑀓𑀝𑀸𑀦𑀺 𑀧𑀁𑀲𑀼𑀔𑀡𑀦𑀁 𑀧𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀏𑀓𑀁 𑀔𑀡𑀦𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀺. 𑀔𑀡𑀦𑁂 𑀩𑀳𑀼𑀓𑀸𑀦𑀺𑀧𑀺 𑀯𑀺𑀬𑀽𑀳𑀦𑀁, 𑀯𑀺𑀬𑀽𑀳𑀦𑁂 𑀩𑀳𑀼𑀓𑀸𑀦𑀺𑀧𑀺 𑀉𑀤𑁆𑀥𑀭𑀡𑀁, 𑀉𑀤𑁆𑀥𑀭𑀡𑁂 𑀩𑀳𑀼𑀓𑀸𑀦𑀺𑀧𑀺 𑀆𑀫𑀲𑀦𑀁, 𑀆𑀫𑀲𑀦𑁂 𑀩𑀳𑀼𑀓𑀸𑀦𑀺𑀧𑀺 𑀨𑀦𑁆𑀤𑀸𑀧𑀦𑀁 𑀧𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀧𑀁𑀲𑀼𑀔𑀡𑀦𑀸𑀤𑀻𑀲𑀼 𑀘 𑀮𑀚𑁆𑀚𑀺𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑁂 𑀩𑀳𑀼𑀓𑀸𑀧𑀺 𑀆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀼, 𑀏𑀓𑀫𑁂𑀯 𑀤𑁂𑀲𑁂𑀢𑁆𑀯𑀸 𑀫𑀼𑀘𑁆𑀘𑀢𑀻𑀢𑀺 𑀓𑀼𑀭𑀼𑀦𑁆𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀸𑀧𑀢𑁆𑀢𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀘 𑀦𑀸𑀫𑁂𑀲𑀸 ‘‘𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻’’𑀢𑀺 (𑀧𑀸𑀭𑀸. 𑁪𑁧𑁪) 𑀏𑀯𑀁 𑀅𑀦𑀼𑀲𑀸𑀯𑀦𑀸𑀲𑀼𑀢𑁆𑀢𑁂𑀲𑀼𑀬𑁂𑀯 𑀆𑀕𑀢𑀸. 𑀇𑀥 𑀧𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑁂 𑀅𑀝𑁆𑀞𑀓𑀣𑀸𑀘𑀭𑀺𑀬𑀧𑁆𑀧𑀫𑀸𑀡𑁂𑀦 𑀕𑀳𑁂𑀢𑀩𑁆𑀩𑀸𑀢𑀺.

𑀞𑀸𑀦𑀸𑀘𑀸𑀯𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸𑀢𑀺 𑀬𑁄 𑀧𑀦 𑀨𑀦𑁆𑀤𑀸𑀧𑁂𑀢𑁆𑀯𑀸𑀧𑀺 𑀮𑀚𑁆𑀚𑀺𑀥𑀫𑁆𑀫𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸𑀯 𑀢𑀁 𑀓𑀼𑀫𑁆𑀪𑀺𑀁 𑀞𑀸𑀦𑀢𑁄 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀞𑀸𑀦𑀸 𑀘𑀸𑀯𑀦𑀜𑁆𑀘𑁂𑀢𑁆𑀣 𑀙𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀓𑀼𑀫𑁆𑀪𑀺𑀁 𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀦𑁆𑀢𑁄 𑀇𑀫𑀺𑀦𑀸 𑀅𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀸𑀭𑀺𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀢𑀣𑁂𑀯 𑀕𑀳𑁂𑀢𑁆𑀯𑀸 𑀧𑀭𑀢𑁄 𑀧𑁂𑀮𑁆𑀮𑁂𑀦𑁆𑀢𑁄 𑀧𑀸𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀇𑀫𑀺𑀦𑀸 𑀅𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑀸𑀫𑀢𑁄 𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀅𑀧𑀦𑀸𑀫𑁂𑀦𑁆𑀢𑁄 𑀯𑀸𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀤𑀓𑁆𑀔𑀺𑀡𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀤𑀓𑁆𑀔𑀺𑀡𑀦𑁆𑀢𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀯𑀸𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀁 𑀉𑀓𑁆𑀔𑀺𑀧𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀪𑀽𑀫𑀺𑀢𑁄 𑀫𑁄𑀘𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀔𑀡𑀺𑀢𑁆𑀯𑀸 𑀳𑁂𑀝𑁆𑀞𑀢𑁄 𑀑𑀲𑀻𑀤𑁂𑀦𑁆𑀢𑁄 𑀩𑀼𑀦𑁆𑀤𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑀼𑀔𑀯𑀝𑁆𑀝𑀺𑀬𑀸 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀦𑁆𑀢𑀺 𑀏𑀯𑀁 𑀏𑀓𑀝𑁆𑀞𑀸𑀦𑁂 𑀞𑀺𑀢𑀸𑀬 𑀓𑀼𑀫𑁆𑀪𑀺𑀬𑀸. 𑀬𑀤𑀺 𑀧𑀦 𑀓𑀼𑀫𑁆𑀪𑀺𑀫𑀼𑀔𑀯𑀝𑁆𑀝𑀺𑀬𑀸 𑀧𑀸𑀲𑀁 𑀓𑀢𑁆𑀯𑀸 𑀮𑁄𑀳𑀔𑀸𑀡𑀼𑀁 𑀯𑀸 𑀔𑀤𑀺𑀭𑀲𑀸𑀭𑀸𑀤𑀺𑀔𑀸𑀡𑀼𑀁 𑀯𑀸 𑀧𑀣𑀯𑀺𑀬𑀁 𑀆𑀓𑁄𑀝𑁂𑀢𑁆𑀯𑀸 𑀢𑀢𑁆𑀣 𑀲𑀗𑁆𑀔𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀏𑀓𑀺𑀲𑁆𑀲𑀸 𑀤𑀺𑀲𑀸𑀬 𑀏𑀓𑀸𑀬 𑀲𑀗𑁆𑀔𑀮𑀺𑀓𑀸𑀬 𑀩𑀤𑁆𑀥𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀤𑁆𑀯𑀻𑀲𑀼 𑀢𑀻𑀲𑀼 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑀽𑀳𑀺 𑀲𑀗𑁆𑀔𑀮𑀺𑀓𑀸𑀳𑀺 𑀩𑀤𑁆𑀥𑀸𑀬 𑀧𑀜𑁆𑀘 𑀞𑀸𑀦𑀸𑀦𑀺 𑀮𑀩𑁆𑀪𑀦𑁆𑀢𑀺.

𑀢𑀢𑁆𑀣 𑀏𑀓𑀔𑀸𑀡𑀼𑀓𑁂 𑀩𑀤𑁆𑀥𑀓𑀼𑀫𑁆𑀪𑀺𑀬𑀸 𑀧𑀞𑀫𑀁 𑀔𑀸𑀡𑀼𑀓𑀁 𑀯𑀸 𑀉𑀤𑁆𑀥𑀭𑀢𑀺, 𑀲𑀗𑁆𑀔𑀮𑀺𑀓𑀁 𑀯𑀸 𑀙𑀺𑀦𑁆𑀤𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀢𑁄 𑀓𑀼𑀫𑁆𑀪𑀺𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀣 𑀧𑀞𑀫𑀁 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀢𑀢𑁄 𑀔𑀸𑀡𑀼𑀓𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀢𑀺, 𑀲𑀗𑁆𑀔𑀮𑀺𑀓𑀁 𑀯𑀸 𑀙𑀺𑀦𑁆𑀤𑀢𑀺, 𑀧𑀸𑀭𑀸𑀚𑀺𑀓𑀁. 𑀏𑀢𑁂𑀦 𑀉𑀧𑀸𑀬𑁂𑀦 𑀤𑁆𑀯𑀻𑀲𑀼 𑀢𑀻𑀲𑀼 𑀘𑀢𑀽𑀲𑀼 𑀔𑀸𑀡𑀼𑀓𑁂𑀲𑀼 𑀩𑀤𑁆𑀥𑀓𑀼𑀫𑁆𑀪𑀺𑀬𑀸𑀧𑀺 𑀧𑀘𑁆𑀙𑀺𑀫𑁂 𑀞𑀸𑀦𑀸𑀘𑀸𑀯𑀦𑁂 𑀧𑀸𑀭𑀸𑀚𑀺𑀓𑀁. 𑀲𑁂𑀲𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀘𑁂 𑀔𑀸𑀡𑀼 𑀦𑀢𑁆𑀣𑀺, 𑀲𑀗𑁆𑀔𑀮𑀺𑀓𑀸𑀬 𑀅𑀕𑁆𑀕𑁂 𑀯𑀮𑀬𑀁 𑀓𑀢𑁆𑀯𑀸 𑀢𑀢𑁆𑀣𑀚𑀸𑀢𑀓𑁂 𑀫𑀽𑀮𑁂 𑀧𑀯𑁂𑀲𑀺𑀢𑀁 𑀳𑁄𑀢𑀺, 𑀧𑀞𑀫𑀁 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀧𑀘𑁆𑀙𑀸 𑀫𑀽𑀮𑀁 𑀙𑁂𑀢𑁆𑀯𑀸 𑀯𑀮𑀬𑀁 𑀦𑀻𑀳𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀣 𑀫𑀽𑀮𑀁 𑀅𑀘𑁆𑀙𑁂𑀢𑁆𑀯𑀸 𑀯𑀮𑀬𑀁 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀺, 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀫𑀽𑀮𑀢𑁄 𑀅𑀦𑀻𑀳𑀭𑀺𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑁂𑀘𑀺 𑀧𑀦 𑀦𑀺𑀫𑀺𑀢𑁆𑀢𑀢𑁆𑀣𑀸𑀬 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀸𑀤𑀻𑀦𑀺 𑀭𑁄𑀧𑁂𑀦𑁆𑀢𑀺, 𑀫𑀽𑀮𑀸𑀦𑀺 𑀓𑀼𑀫𑁆𑀪𑀺𑀁 𑀯𑀺𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀸𑀦𑀺 𑀳𑁄𑀦𑁆𑀢𑀺, ‘‘𑀫𑀽𑀮𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑀼𑀫𑁆𑀪𑀺𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀙𑀺𑀦𑁆𑀤𑀺𑀢𑁆𑀯𑀸 𑀑𑀓𑀸𑀲𑀁 𑀓𑀢𑁆𑀯𑀸 𑀓𑀼𑀫𑁆𑀪𑀺𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀫𑀽𑀮𑀸𑀦𑀺 𑀙𑀺𑀦𑁆𑀤𑀢𑁄𑀯 𑀮𑀼𑀞𑀺𑀢𑁆𑀯𑀸 𑀓𑀼𑀫𑁆𑀪𑀻 𑀦𑀺𑀦𑁆𑀦𑀝𑁆𑀞𑀸𑀦𑀁 𑀕𑀢𑀸, 𑀭𑀓𑁆𑀔𑀢𑀺 𑀢𑀸𑀯. 𑀕𑀢𑀝𑁆𑀞𑀸𑀦𑀢𑁄 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀙𑀺𑀦𑁆𑀦𑁂𑀲𑀼 𑀫𑀽𑀮𑁂𑀲𑀼 𑀏𑀓𑀫𑀽𑀮𑀫𑀢𑁆𑀢𑁂𑀦 𑀓𑀼𑀫𑁆𑀪𑀻 𑀢𑀺𑀝𑁆𑀞𑀢𑀺, 𑀲𑁄 𑀘 𑀢𑀁 ‘‘𑀇𑀫𑀲𑁆𑀫𑀺𑀁 𑀫𑀽𑀮𑁂 𑀙𑀺𑀦𑁆𑀦𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀙𑀺𑀦𑁆𑀤𑀢𑀺, 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀦 𑀏𑀓𑀫𑀽𑀮𑁂𑀦𑁂𑀯 𑀧𑀸𑀲𑁂 𑀩𑀤𑁆𑀥𑀲𑀽𑀓𑀭𑁄 𑀯𑀺𑀬 𑀞𑀺𑀢𑀸 𑀳𑁄𑀢𑀺, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀮𑀕𑁆𑀕𑀦𑀓𑀁 𑀦𑀢𑁆𑀣𑀺, 𑀢𑀲𑁆𑀫𑀺𑀫𑁆𑀧𑀺 𑀫𑀽𑀮𑁂 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀫𑀳𑀸𑀧𑀸𑀲𑀸𑀡𑁄 𑀞𑀧𑀺𑀢𑁄 𑀳𑁄𑀢𑀺, 𑀢𑀁 𑀤𑀡𑁆𑀟𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀧𑀦𑁂𑀢𑀼𑀓𑀸𑀫𑁄 𑀓𑀼𑀫𑁆𑀪𑀺𑀫𑀢𑁆𑀣𑀓𑁂 𑀚𑀸𑀢𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀤𑀼𑀓𑁆𑀓𑀝𑀁. 𑀢𑀲𑁆𑀲𑀸 𑀲𑀫𑀻𑀧𑁂 𑀚𑀸𑀢𑀓𑀁 𑀙𑁂𑀢𑁆𑀯𑀸 𑀆𑀳𑀭𑀢𑀺, 𑀅𑀢𑀢𑁆𑀣𑀚𑀸𑀢𑀓𑀢𑁆𑀢𑀸 𑀢𑀁 𑀙𑀺𑀦𑁆𑀤𑀢𑁄 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀢𑁆𑀢𑀦𑁄 𑀪𑀸𑀚𑀦𑀦𑁆𑀢𑀺 𑀲𑀘𑁂 𑀧𑀦 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀼𑀫𑁆𑀪𑀺𑀕𑀢𑀪𑀡𑁆𑀟𑀕𑁆𑀕𑀳𑀡𑀢𑁆𑀣𑀁 𑀅𑀢𑁆𑀢𑀦𑁄 𑀪𑀸𑀚𑀦𑀁 𑀧𑀯𑁂𑀲𑁂𑀢𑁆𑀯𑀸 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀭𑀺𑀘𑁆𑀙𑁂𑀤𑁄 𑀘𑁂𑀢𑁆𑀣 𑀧𑀸𑀭𑀸𑀚𑀺𑀓𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀊𑀦𑀧𑀜𑁆𑀘𑀫𑀸𑀲𑀓𑀫𑁆𑀧𑀺 𑀆𑀫𑀲𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺𑀬𑁂𑀯.

𑀨𑀦𑁆𑀤𑀸𑀧𑁂𑀢𑀻𑀢𑀺 𑀏𑀢𑁆𑀣 𑀬𑀸𑀯 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀚𑀦𑀁 𑀧𑀯𑁂𑀲𑁂𑀢𑀺, 𑀢𑀸𑀯 𑀨𑀦𑁆𑀤𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺 𑀘 𑀇𑀢𑁄 𑀘𑀺𑀢𑁄 𑀘 𑀅𑀧𑀩𑁆𑀬𑀽𑀳𑀦𑁆𑀢𑁄𑀧𑀺 𑀨𑀦𑁆𑀤𑀸𑀧𑁂𑀢𑀺𑀬𑁂𑀯, 𑀲𑁄 𑀣𑀼𑀮𑁆𑀮𑀘𑁆𑀘𑀬𑀁 𑀆𑀧𑀚𑁆𑀚𑀢𑀺. 𑀬𑀤𑀸 𑀧𑀦 𑀏𑀓𑀸𑀩𑀤𑁆𑀥𑀪𑀸𑀯𑁄 𑀙𑀺𑀦𑁆𑀦𑁄, 𑀓𑀼𑀫𑁆𑀪𑀺𑀕𑀢𑀁 𑀓𑀼𑀫𑁆𑀪𑀺𑀬𑀫𑁂𑀯, 𑀪𑀸𑀚𑀦𑀕𑀢𑀫𑁆𑀧𑀺 𑀪𑀸𑀚𑀦𑁂𑀬𑁂𑀯 𑀳𑁄𑀢𑀺, 𑀢𑀤𑀸 𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀓𑀢𑁆𑀯𑀸 𑀓𑀼𑀫𑁆𑀪𑀺𑀢𑁄 𑀅𑀦𑀻𑀳𑀢𑁂𑀧𑀺 𑀘 𑀪𑀸𑀚𑀦𑁂 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺.

𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻𑀢𑀺 𑀏𑀢𑁆𑀣 𑀬𑀣𑀸 𑀅𑀗𑁆𑀕𑀼𑀮𑀦𑁆𑀢𑀭𑁂𑀳𑀺 𑀦𑀺𑀓𑁆𑀔𑀦𑁆𑀢𑀓𑀳𑀸𑀧𑀡𑀸 𑀓𑀼𑀫𑁆𑀪𑀺𑀕𑀢𑁂 𑀓𑀳𑀸𑀧𑀡𑁂 𑀦 𑀲𑀫𑁆𑀨𑀼𑀲𑀦𑁆𑀢𑀺, 𑀏𑀯𑀁 𑀫𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑁄 𑀫𑀼𑀝𑁆𑀞𑀺𑀁 𑀙𑀺𑀦𑁆𑀤𑀢𑀺 𑀦𑀸𑀫; 𑀲𑁄𑀧𑀺 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀺.

𑀲𑀼𑀢𑁆𑀢𑀸𑀭𑀽𑀴𑁆𑀳𑀦𑁆𑀢𑀺 𑀲𑀼𑀢𑁆𑀢𑁂 𑀆𑀭𑀽𑀴𑁆𑀳𑀁; 𑀲𑀼𑀢𑁆𑀢𑁂𑀦 𑀆𑀯𑀼𑀢𑀲𑁆𑀲𑀸𑀧𑀺 𑀲𑀼𑀢𑁆𑀢𑀫𑀬𑀲𑁆𑀲𑀸𑀧𑀺 𑀏𑀢𑀁 𑀅𑀥𑀺𑀯𑀘𑀦𑀁. 𑀧𑀸𑀫𑀗𑁆𑀕𑀸𑀤𑀻𑀦𑀺𑀳𑀺 𑀲𑁄𑀯𑀡𑁆𑀡𑀫𑀬𑀸𑀦𑀺𑀧𑀺 𑀳𑁄𑀦𑁆𑀢𑀺 𑀭𑀽𑀧𑀺𑀬𑀫𑀬𑀸𑀦𑀺𑀧𑀺 𑀲𑀼𑀢𑁆𑀢𑀫𑀬𑀸𑀦𑀺𑀧𑀺, 𑀫𑀼𑀢𑁆𑀢𑀸𑀯𑀮𑀺𑀆𑀤𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀢𑀸. 𑀯𑁂𑀞𑀦𑀦𑁆𑀢𑀺 𑀲𑀻𑀲𑀯𑁂𑀞𑀦𑀧𑀝𑁄 𑀯𑀼𑀘𑁆𑀘𑀢𑀺. 𑀏𑀢𑁂𑀲𑀼 𑀬𑀁𑀓𑀺𑀜𑁆𑀘𑀺 𑀣𑁂𑀬𑁆𑀬𑀘𑀺𑀢𑁆𑀢𑁄 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀁. 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀸𑀫𑀗𑁆𑀕𑀸𑀤𑀻𑀦𑀺 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀝𑁆𑀞𑀁 𑀅𑀓𑀭𑁄𑀦𑁆𑀢𑁄 𑀉𑀘𑁆𑀘𑀸𑀭𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁.

𑀖𑀁𑀲𑀦𑁆𑀢𑁄 𑀦𑀻𑀳𑀭𑀢𑀻𑀢𑀺 𑀏𑀢𑁆𑀣 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬 𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀲𑀫𑀢𑀺𑀢𑁆𑀢𑀺𑀓𑀁 𑀓𑀼𑀫𑁆𑀪𑀺𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀯𑀸 𑀏𑀓𑀁 𑀓𑁄𑀝𑀺𑀁 𑀩𑀼𑀦𑁆𑀤𑁂 𑀏𑀓𑀁 𑀓𑁄𑀝𑀺𑀁 𑀫𑀼𑀔𑀯𑀝𑁆𑀝𑀺𑀬𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀯𑀸 𑀖𑀁𑀲𑀦𑁆𑀢𑀲𑁆𑀲 𑀦𑀻𑀳𑀭𑀢𑁄 𑀣𑀼𑀮𑁆𑀮𑀘𑁆𑀘𑀬𑀁. 𑀓𑀼𑀫𑁆𑀪𑀺𑀫𑀼𑀔𑀸 𑀫𑁄𑀘𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀬𑀁 𑀧𑀦 𑀉𑀧𑀟𑁆𑀠𑀓𑀼𑀫𑁆𑀪𑀺𑀬𑀁 𑀯𑀸 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀁 𑀯𑀸 𑀞𑀧𑀺𑀢𑀁, 𑀢𑀲𑁆𑀲 𑀅𑀢𑁆𑀢𑀦𑁄 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁, 𑀦 𑀲𑀓𑀮𑀸 𑀓𑀼𑀫𑁆𑀪𑀻, 𑀢𑀲𑁆𑀫𑀸 𑀢𑀁 𑀖𑀁𑀲𑀦𑁆𑀢𑀲𑁆𑀲𑀸𑀧𑀺 𑀦𑀻𑀳𑀭𑀢𑁄 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑁂 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀼𑀫𑁆𑀪𑀺𑀬𑀸 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬 𑀯𑀸 𑀊𑀦𑀸𑀬 𑀯𑀸 𑀉𑀚𑀼𑀓𑀫𑁂𑀯 𑀉𑀤𑁆𑀥𑀭𑀦𑁆𑀢𑀲𑁆𑀲 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀸 𑀫𑀼𑀢𑁆𑀢𑀫𑀢𑁆𑀢𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀞𑀧𑀺𑀢𑀁 𑀬𑀁𑀓𑀺𑀜𑁆𑀘𑀺 𑀧𑀸𑀭𑀸𑀚𑀺𑀓𑀧𑁆𑀧𑀳𑁄𑀦𑀓𑀁 𑀪𑀡𑁆𑀟𑀁 𑀲𑀓𑀮𑀓𑀼𑀫𑁆𑀪𑀺𑀬𑀁 𑀘𑀸𑀭𑁂𑀦𑁆𑀢𑀲𑁆𑀲, 𑀧𑀸𑀫𑀗𑁆𑀕𑀸𑀤𑀺𑀜𑁆𑀘 𑀖𑀁𑀲𑀺𑀢𑁆𑀯𑀸 𑀦𑀻𑀳𑀭𑀦𑁆𑀢𑀲𑁆𑀲 𑀬𑀸𑀯 𑀫𑀼𑀔𑀯𑀝𑁆𑀝𑀺𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀣𑀼𑀮𑁆𑀮𑀘𑁆𑀘𑀬𑀫𑁂𑀯. 𑀢𑀲𑁆𑀲 𑀳𑀺 𑀲𑀩𑁆𑀩𑀸𑀧𑀺 𑀓𑀼𑀫𑁆𑀪𑀻 𑀞𑀸𑀦𑀦𑁆𑀢𑀺 𑀲𑀗𑁆𑀔𑁂𑀧𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀞𑀧𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁, 𑀦 𑀲𑀓𑀮𑀸 𑀓𑀼𑀫𑁆𑀪𑀻. 𑀢𑀲𑁆𑀫𑀸 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀫𑁄𑀘𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀡𑀁. 𑀇𑀢𑀭𑀁 𑀧𑀦 𑀆𑀓𑀸𑀲𑀕𑀢𑀁 𑀅𑀓𑀭𑁄𑀦𑁆𑀢𑀲𑁆𑀲 𑀘𑀻𑀯𑀭𑀯𑀁𑀲𑁂 𑀞𑀧𑀺𑀢𑀘𑀻𑀯𑀭𑀯𑁂𑀞𑀦𑀓𑀦𑀬𑁂𑀦 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀳𑀺 𑀆𑀕𑀢𑁂 𑀕𑀭𑀼𑀓𑁂 𑀞𑀸𑀢𑀩𑁆𑀩𑀁, 𑀏𑀲𑀸 𑀯𑀺𑀦𑀬𑀥𑀫𑁆𑀫𑀢𑀸. 𑀅𑀧𑀺𑀘 ‘‘𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀯𑀸 𑀓𑀭𑁄𑀢𑀺, 𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 𑀯𑀘𑀦𑀢𑁄 𑀧𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀞𑀺𑀢𑀲𑁆𑀲 𑀦 𑀲𑀩𑁆𑀩𑀸 𑀓𑀼𑀫𑁆𑀪𑀻 𑀞𑀸𑀦𑀦𑁆𑀢𑀺.

𑀲𑀧𑁆𑀧𑀺𑀆𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀧𑀺𑀯𑀢𑁄 𑀏𑀓𑀧𑀬𑁄𑀕𑁂𑀦 𑀧𑀻𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀅𑀬𑀁 𑀯𑀺𑀪𑀸𑀕𑁄 𑀤𑀲𑁆𑀲𑀺𑀢𑁄 𑁋 ‘‘𑀫𑀼𑀔𑀁 𑀅𑀦𑀧𑀦𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀺𑀯𑀢𑁄 𑀲𑀘𑁂 𑀧𑀭𑀕𑀮𑀕𑀢𑀁 𑀧𑀸𑀤𑀁 𑀦 𑀅𑀕𑁆𑀖𑀢𑀺, 𑀫𑀼𑀔𑀕𑀢𑁂𑀦 𑀲𑀤𑁆𑀥𑀺𑀁 𑀅𑀕𑁆𑀖𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀓𑀡𑁆𑀞𑁂𑀦 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀬𑁂𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀲𑀘𑁂𑀧𑀺 𑀑𑀝𑁆𑀞𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀑𑀝𑁆𑀞𑁂 𑀧𑀺𑀤𑀳𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀉𑀧𑁆𑀧𑀮𑀤𑀡𑁆𑀟𑀯𑁂𑀴𑀼𑀦𑀸𑀴𑀺𑀦𑀴𑀦𑀸𑀴𑀺𑀆𑀤𑀻𑀳𑀺 𑀧𑀺𑀯𑀦𑁆𑀢𑀲𑁆𑀲𑀸𑀧𑀺 𑀲𑀘𑁂 𑀧𑀭𑀕𑀮𑀕𑀢𑀫𑁂𑀯 𑀧𑀸𑀤𑀁 𑀅𑀕𑁆𑀖𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀲𑀳 𑀫𑀼𑀔𑀕𑀢𑁂𑀦 𑀅𑀕𑁆𑀖𑀢𑀺, 𑀦 𑀢𑀸𑀯 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀉𑀧𑁆𑀧𑀮𑀤𑀡𑁆𑀟𑀸𑀤𑀺𑀕𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀪𑀸𑀯𑀁 𑀓𑁄𑀧𑁂𑀢𑁆𑀯𑀸 𑀑𑀝𑁆𑀞𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀉𑀧𑁆𑀧𑀮𑀤𑀡𑁆𑀟𑀸𑀤𑀺𑀕𑀢𑁂𑀦 𑀲𑀤𑁆𑀥𑀺𑀁 𑀅𑀕𑁆𑀖𑀢𑀺, 𑀉𑀧𑁆𑀧𑀮𑀤𑀡𑁆𑀟𑀸𑀤𑀻𑀦𑀁 𑀩𑀼𑀦𑁆𑀤𑁂 𑀅𑀗𑁆𑀕𑀼𑀮𑀺𑀬𑀸𑀧𑀺 𑀧𑀺𑀳𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀸𑀤𑀕𑁆𑀖𑀦𑀓𑁂 𑀧𑀭𑀕𑀮𑀁 𑀅𑀧𑁆𑀧𑀯𑀺𑀝𑁆𑀞𑁂 𑀉𑀧𑁆𑀧𑀮𑀤𑀡𑁆𑀟𑀸𑀤𑀻𑀲𑀼 𑀘 𑀫𑀼𑀔𑁂 𑀘 𑀅𑀢𑀺𑀭𑁂𑀓𑀧𑀸𑀤𑀸𑀭𑀳𑀫𑁆𑀧𑀺 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀭𑀓𑁆𑀔𑀢𑀺𑀬𑁂𑀯𑀸’’𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀬𑀲𑁆𑀫𑀸 ‘‘𑀅𑀢𑁆𑀢𑀦𑁄 𑀪𑀸𑀚𑀦𑀕𑀢𑀁 𑀯𑀸 𑀓𑀭𑁄𑀢𑀺, 𑀫𑀼𑀝𑁆𑀞𑀺𑀁 𑀯𑀸 𑀙𑀺𑀦𑁆𑀤𑀢𑀻’’𑀢𑀺 𑀇𑀫𑀁 𑀦𑀬𑀁 𑀪𑀚𑀢𑀺, 𑀢𑀲𑁆𑀫𑀸 𑀲𑀼𑀤𑀲𑁆𑀲𑀺𑀢𑀫𑁂𑀯. 𑀏𑀲 𑀢𑀸𑀯 𑀏𑀓𑀸𑀩𑀤𑁆𑀥𑁂 𑀦𑀬𑁄.

𑀲𑀘𑁂 𑀧𑀦 𑀳𑀢𑁆𑀣𑁂𑀦 𑀯𑀸 𑀧𑀢𑁆𑀢𑁂𑀦 𑀯𑀸 𑀣𑀸𑀮𑀓𑀸𑀤𑀺𑀦𑀸 𑀯𑀸 𑀓𑁂𑀦𑀘𑀺 𑀪𑀸𑀚𑀦𑁂𑀦 𑀕𑀳𑁂𑀢𑁆𑀯𑀸 𑀧𑀺𑀯𑀢𑀺, 𑀬𑀫𑁆𑀳𑀺 𑀧𑀬𑁄𑀕𑁂 𑀧𑀸𑀤𑀕𑁆𑀖𑀦𑀓𑀁 𑀧𑀽𑀭𑁂𑀢𑀺, 𑀢𑀫𑁆𑀳𑀺 𑀕𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀣 𑀫𑀳𑀕𑁆𑀖𑀁 𑀳𑁄𑀢𑀺, 𑀲𑀺𑀧𑁆𑀧𑀺𑀓𑀸𑀬𑀧𑀺 𑀏𑀓𑀧𑀬𑁄𑀕𑁂𑀦𑁂𑀯 𑀧𑀸𑀤𑀕𑁆𑀖𑀦𑀓𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺, 𑀏𑀓𑀼𑀤𑁆𑀥𑀸𑀭𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀪𑀸𑀚𑀦𑀁 𑀧𑀦 𑀦𑀺𑀫𑀼𑀚𑁆𑀚𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀬𑀸𑀯 𑀏𑀓𑀸𑀩𑀤𑁆𑀥𑀁 𑀳𑁄𑀢𑀺, 𑀢𑀸𑀯 𑀭𑀓𑁆𑀔𑀢𑀺. 𑀫𑀼𑀔𑀯𑀝𑁆𑀝𑀺𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀉𑀤𑁆𑀥𑀸𑀭𑁂𑀦 𑀯𑀸 𑀧𑀸𑀭𑀸𑀚𑀺𑀓𑀁. 𑀬𑀤𑀸 𑀧𑀦 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀅𑀘𑁆𑀙𑀁 𑀢𑁂𑀮𑀲𑀤𑀺𑀲𑀫𑁂𑀯 𑀫𑀥𑀼𑀨𑀸𑀡𑀺𑀢𑀁 𑀯𑀸 𑀓𑀼𑀫𑁆𑀪𑀺𑀁 𑀆𑀯𑀺𑀜𑁆𑀙𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀚𑀦𑁂 𑀧𑀯𑁂𑀲𑁂𑀢𑀺, 𑀢𑀤𑀸 𑀢𑁂𑀲𑀁 𑀅𑀘𑁆𑀙𑀢𑀸𑀬 𑀏𑀓𑀸𑀩𑀤𑁆𑀥𑀢𑀸 𑀦𑀢𑁆𑀣𑀻𑀢𑀺 𑀧𑀸𑀤𑀕𑁆𑀖𑀦𑀓𑁂 𑀫𑀼𑀔𑀯𑀝𑁆𑀝𑀺𑀢𑁄 𑀕𑀴𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀧𑀘𑀺𑀢𑁆𑀯𑀸 𑀞𑀧𑀺𑀢𑀁 𑀧𑀦 𑀫𑀥𑀼𑀨𑀸𑀡𑀺𑀢𑀁 𑀲𑀺𑀮𑁂𑀲𑁄 𑀯𑀺𑀬 𑀘𑀺𑀓𑁆𑀓𑀦𑀁 𑀆𑀓𑀟𑁆𑀠𑀦𑀯𑀺𑀓𑀟𑁆𑀠𑀦𑀬𑁄𑀕𑁆𑀕𑀁 𑀳𑁄𑀢𑀺, 𑀉𑀧𑁆𑀧𑀦𑁆𑀦𑁂 𑀓𑀼𑀓𑁆𑀓𑀼𑀘𑁆𑀘𑁂 𑀏𑀓𑀸𑀩𑀤𑁆𑀥𑀫𑁂𑀯 𑀳𑀼𑀢𑁆𑀯𑀸 𑀧𑀝𑀺𑀦𑀻𑀳𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀢𑀁 𑀫𑀼𑀔𑀯𑀝𑁆𑀝𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀸𑀚𑀦𑁂 𑀧𑀯𑀺𑀝𑁆𑀞𑀫𑁆𑀧𑀺 𑀩𑀸𑀳𑀺𑀭𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀢𑁆𑀢𑀸 𑀭𑀓𑁆𑀔𑀢𑀺, 𑀫𑀼𑀔𑀯𑀝𑁆𑀝𑀺𑀢𑁄 𑀙𑀺𑀦𑁆𑀦𑀫𑀢𑁆𑀢𑁂 𑀧𑀦 𑀧𑀸𑀭𑀸𑀚𑀺𑀓𑀁. 𑀬𑁄𑀧𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀭𑀲𑁆𑀲 𑀓𑀼𑀫𑁆𑀪𑀺𑀬𑀸 𑀧𑀸𑀤𑀕𑁆𑀖𑀦𑀓𑀁 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀅𑀯𑀲𑁆𑀲𑀧𑀺𑀯𑀦𑀓𑀁 𑀬𑀁𑀓𑀺𑀜𑁆𑀘𑀺 𑀤𑀼𑀓𑀽𑀮𑀲𑀸𑀝𑀓𑀁 𑀯𑀸 𑀘𑀫𑁆𑀫𑀔𑀡𑁆𑀟𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀧𑀓𑁆𑀔𑀺𑀧𑀢𑀺, 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 ‘‘𑀇𑀤𑀸𑀦𑀺 𑀢𑁂𑀮𑀁 𑀆𑀓𑀺𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀧𑀓𑁆𑀔𑀺𑀧𑀢𑀺, 𑀢𑀁 𑀘𑁂 𑀢𑀢𑁆𑀣 𑀢𑁂𑀮𑁂 𑀆𑀓𑀺𑀡𑁆𑀡𑁂 𑀧𑀜𑁆𑀘𑀫𑀸𑀲𑀓𑀅𑀕𑁆𑀖𑀦𑀓𑀁 𑀧𑀺𑀯𑀢𑀺, 𑀧𑀻𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀁 𑀧𑀦 𑀢𑀢𑁆𑀣𑁂𑀯 𑀲𑀼𑀓𑁆𑀔𑀢𑀴𑀸𑀓𑁂 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀭𑀡𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀭𑀼𑀚𑁆𑀛𑀢𑀺, 𑀅𑀯𑀳𑀸𑀭𑀮𑀓𑁆𑀔𑀡𑀜𑁆𑀘𑁂𑀢𑁆𑀣 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀢𑀲𑁆𑀲 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁.

𑀧𑀭𑀲𑁆𑀲 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀲𑀗𑁆𑀕𑁄𑀧𑀦𑀢𑁆𑀣𑀸𑀬 𑀪𑀡𑁆𑀟𑀁 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀢𑁂𑀮𑁂 𑀆𑀓𑀺𑀡𑁆𑀡𑁂 ‘‘𑀲𑀘𑁂 𑀅𑀬𑀁 𑀚𑀸𑀦𑀺𑀲𑁆𑀲𑀢𑀺, 𑀫𑀁 𑀧𑀮𑀺𑀩𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀪𑀻𑀢𑁄 𑀧𑀸𑀤𑀕𑁆𑀖𑀦𑀓𑀁 𑀢𑁂𑀮𑀁 𑀧𑀻𑀢𑀁 𑀪𑀡𑁆𑀟𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀢𑀺, 𑀧𑀭𑁂 𑀆𑀳𑀭𑀸𑀧𑁂𑀦𑁆𑀢𑁂 𑀪𑀡𑁆𑀟𑀤𑁂𑀬𑁆𑀬𑀁. 𑀪𑀡𑁆𑀟𑀤𑁂𑀬𑁆𑀬𑀁 𑀦𑀸𑀫 𑀬𑀁 𑀧𑀭𑀲𑁆𑀲 𑀦𑀝𑁆𑀞𑀁, 𑀢𑀲𑁆𑀲 𑀫𑀽𑀮𑀁 𑀯𑀸 𑀢𑀤𑁂𑀯 𑀯𑀸 𑀪𑀡𑁆𑀟𑀁 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀦𑁄 𑀘𑁂 𑀤𑁂𑀢𑀺, 𑀲𑀸𑀫𑀺𑀓𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂 𑀧𑀸𑀭𑀸𑀚𑀺𑀓𑀁. 𑀲𑀘𑁂 𑀧𑀭𑀲𑁆𑀲 𑀓𑀼𑀫𑁆𑀪𑀺𑀬𑀸 𑀅𑀜𑁆𑀜𑁄 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀆𑀓𑀺𑀭𑀢𑀺, 𑀢𑀢𑁆𑀭 𑀘𑀸𑀬𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑁂𑀮𑀧𑀺𑀯𑀦𑀓𑀁 𑀪𑀡𑁆𑀟𑀁 𑀧𑀓𑁆𑀔𑀺𑀧𑀢𑀺, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀢𑁆𑀢𑀦𑁄 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀧𑀭𑀲𑁆𑀲 𑀲𑀧𑁆𑀧𑀺𑀁 𑀯𑀸 𑀢𑁂𑀮𑀁 𑀯𑀸 𑀆𑀓𑀺𑀭𑀡𑀪𑀸𑀯𑀁 𑀜𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀪𑀡𑁆𑀟𑀁 𑀦𑀺𑀓𑁆𑀔𑀺𑀧𑀢𑀺, 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀤𑁆𑀥𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀲𑀼𑀤𑁆𑀥𑀘𑀺𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀙𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀲𑀼𑀤𑁆𑀥𑀘𑀺𑀢𑁆𑀢𑁄𑀯 𑀉𑀤𑁆𑀥𑀭𑀢𑀺, 𑀦𑁂𑀯 𑀅𑀯𑀳𑀸𑀭𑁄, 𑀦 𑀕𑀻𑀯𑀸; 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀅𑀦𑀸𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. ‘‘‘𑀓𑀺𑀲𑁆𑀲 𑀫𑀫 𑀓𑀼𑀫𑁆𑀪𑀺𑀬𑀁 𑀢𑁂𑀮𑀁 𑀆𑀓𑀺𑀭𑀲𑀻’𑀢𑀺 𑀓𑀼𑀧𑀺𑀢𑁄 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀦𑁄 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀓𑀼𑀫𑁆𑀪𑀺𑀁 𑀆𑀯𑀺𑀜𑁆𑀙𑀢𑀺 𑀢𑁂𑀮𑀁 𑀕𑀴𑁂𑀢𑀼𑀓𑀸𑀫𑁄, 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑁂𑀯 𑀚𑀚𑁆𑀚𑀭𑀁 𑀓𑀭𑁄𑀢𑀺 ‘‘𑀲𑀯𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀸𑀤𑀕𑁆𑀖𑀦𑀓𑁂 𑀲𑀯𑀺𑀢𑁆𑀯𑀸 𑀕𑀢𑁂 𑀧𑀸𑀭𑀸𑀚𑀺𑀓𑀁. 𑀣𑁂𑀬𑁆𑀬𑀘𑀺𑀢𑁆𑀢𑁂𑀦𑁂𑀯 𑀙𑀺𑀤𑁆𑀤𑀁 𑀓𑀭𑁄𑀢𑀺 𑀑𑀫𑀝𑁆𑀞𑀁 𑀯𑀸 𑀉𑀫𑁆𑀫𑀝𑁆𑀞𑀁 𑀯𑀸 𑀯𑁂𑀫𑀝𑁆𑀞𑀁 𑀯𑀸, 𑀇𑀤𑀁 𑀧𑀦 𑀲𑀫𑁆𑀫𑁄𑀳𑀝𑁆𑀞𑀸𑀦𑀁; 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀲𑀮𑁆𑀮𑁂𑀓𑁆𑀔𑁂𑀢𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑁋 𑀑𑀫𑀝𑁆𑀞𑀁 𑀦𑀸𑀫 𑀅𑀥𑁄𑀫𑀼𑀔𑀙𑀺𑀤𑁆𑀤𑀁; 𑀉𑀫𑁆𑀫𑀝𑁆𑀞𑀁 𑀦𑀸𑀫 𑀉𑀤𑁆𑀥𑀁𑀫𑀼𑀔𑀙𑀺𑀤𑁆𑀤𑀁; 𑀯𑁂𑀫𑀝𑁆𑀞𑀁 𑀦𑀸𑀫 𑀉𑀴𑀼𑀗𑁆𑀓𑀲𑁆𑀲𑁂𑀯 𑀉𑀚𑀼𑀕𑀢𑀙𑀺𑀤𑁆𑀤𑀁. 𑀢𑀢𑁆𑀭 𑀑𑀫𑀝𑁆𑀞𑀲𑁆𑀲 𑀩𑀳𑀺 𑀧𑀝𑁆𑀞𑀸𑀬 𑀓𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀢𑁂𑀮𑁂 𑀕𑀴𑀺𑀢𑁂 𑀩𑀳𑀺 𑀅𑀦𑀺𑀓𑁆𑀔𑀦𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀢𑁄 𑀕𑀴𑀺𑀢𑀫𑀢𑁆𑀢𑀫𑁂𑀯 𑀩𑀳𑀺𑀕𑀢𑀁 𑀦𑀸𑀫 𑀳𑁄𑀢𑀺, 𑀦 𑀓𑀼𑀫𑁆𑀪𑀺𑀕𑀢𑀲𑀗𑁆𑀔𑁆𑀬𑀁 𑀮𑀪𑀢𑀺. 𑀅𑀦𑁆𑀢𑁄 𑀧𑀝𑁆𑀞𑀸𑀬 𑀓𑀢𑀲𑁆𑀲 𑀩𑀸𑀳𑀺𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀉𑀫𑁆𑀫𑀝𑁆𑀞𑀲𑁆𑀲 𑀬𑀣𑀸 𑀢𑀣𑀸 𑀯𑀸 𑀓𑀢𑀲𑁆𑀲 𑀩𑀸𑀳𑀺𑀭𑀦𑁆𑀢𑀢𑁄 𑀧𑀸𑀤𑀕𑁆𑀖𑀦𑀓𑁂 𑀕𑀴𑀺𑀢𑁂 𑀧𑀸𑀭𑀸𑀚𑀺𑀓𑀁. 𑀢𑀜𑁆𑀳𑀺 𑀬𑀸𑀯 𑀩𑀸𑀳𑀺𑀭𑀦𑁆𑀢𑀢𑁄 𑀦 𑀕𑀴𑀢𑀺, 𑀢𑀸𑀯 𑀓𑀼𑀫𑁆𑀪𑀺𑀕𑀢𑀫𑁂𑀯 𑀳𑁄𑀢𑀺. ‘‘𑀯𑁂𑀫𑀝𑁆𑀞𑀲𑁆𑀲 𑀘 𑀓𑀧𑀸𑀮𑀫𑀚𑁆𑀛𑀢𑁄 𑀕𑀴𑀺𑀢𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀢𑀁 𑀧𑀦 𑀅𑀦𑁆𑀢𑁄 𑀘 𑀩𑀳𑀺 𑀘 𑀧𑀝𑁆𑀞𑀸𑀬 𑀫𑀚𑁆𑀛𑁂 𑀞𑀧𑁂𑀢𑁆𑀯𑀸 𑀓𑀢𑀙𑀺𑀤𑁆𑀤𑁂 𑀢𑀴𑀸𑀓𑀲𑁆𑀲 𑀘 𑀫𑀭𑀺𑀬𑀸𑀤𑀪𑁂𑀤𑁂𑀦 𑀲𑀫𑁂𑀢𑀺. 𑀅𑀦𑁆𑀢𑁄 𑀧𑀝𑁆𑀞𑀸𑀬 𑀓𑀢𑁂 𑀧𑀦 𑀩𑀸𑀳𑀺𑀭𑀦𑁆𑀢𑁂𑀦, 𑀩𑀳𑀺 𑀧𑀝𑁆𑀞𑀸𑀬 𑀓𑀢𑁂 𑀅𑀩𑁆𑀪𑀦𑁆𑀢𑀭𑀦𑁆𑀢𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀇𑀤𑀫𑁂𑀢𑁆𑀣 𑀬𑀼𑀢𑁆𑀢𑀁. 𑀬𑁄 𑀧𑀦 ‘‘𑀯𑀝𑁆𑀝𑀺𑀢𑁆𑀯𑀸 𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀓𑀼𑀫𑁆𑀪𑀺𑀬𑀸 𑀆𑀥𑀸𑀭𑀓𑀁 𑀯𑀸 𑀉𑀧𑀢𑁆𑀣𑀫𑁆𑀪𑀦𑀮𑁂𑀟𑁆𑀟𑀼𑀓𑁂 𑀯𑀸 𑀅𑀧𑀦𑁂𑀢𑀺, 𑀯𑀝𑁆𑀝𑀺𑀢𑁆𑀯𑀸 𑀕𑀢𑀸𑀬 𑀧𑀸𑀭𑀸𑀚𑀺𑀓𑀁. 𑀢𑁂𑀮𑀸𑀓𑀺𑀭𑀡𑀪𑀸𑀯𑀁 𑀧𑀦 𑀜𑀢𑁆𑀯𑀸 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀚𑀚𑁆𑀚𑀭𑀪𑀸𑀯𑁂 𑀯𑀸 𑀙𑀺𑀤𑁆𑀤𑁂𑀲𑀼 𑀯𑀸 𑀓𑀢𑁂𑀲𑀼 𑀧𑀘𑁆𑀙𑀸 𑀦𑀺𑀓𑁆𑀔𑀦𑁆𑀢𑀢𑁂𑀮𑀧𑁆𑀧𑀫𑀸𑀡𑁂𑀦 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀓𑀢𑁆𑀣𑀘𑀺 𑀧𑀸𑀭𑀸𑀚𑀺𑀓𑀦𑁆𑀢𑀺𑀧𑀺 𑀮𑀺𑀔𑀺𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁.

𑀧𑀭𑀺𑀧𑀼𑀡𑁆𑀡𑀸𑀬 𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀓𑀣𑀮𑀁 𑀯𑀸 𑀧𑀸𑀲𑀸𑀡𑀁 𑀯𑀸 ‘‘𑀧𑀢𑀺𑀢𑁆𑀯𑀸 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀢𑀢𑁄 𑀢𑁂𑀮𑀁 𑀧𑀕𑁆𑀖𑀭𑀺𑀲𑁆𑀲𑀢𑀻’’𑀢𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀤𑀼𑀩𑁆𑀩𑀦𑁆𑀥𑀁 𑀯𑀸 𑀓𑀭𑁄𑀢𑀺, 𑀤𑀼𑀝𑁆𑀞𑀧𑀺𑀢𑀁 𑀯𑀸 𑀞𑀧𑁂𑀢𑀺, 𑀅𑀯𑀲𑁆𑀲𑀧𑀢𑀦𑀓𑀁 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀓𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀭𑀺𑀢𑁆𑀢𑀓𑀼𑀫𑁆𑀪𑀺𑀬𑀸 𑀉𑀧𑀭𑀺 𑀓𑀭𑁄𑀢𑀺, 𑀢𑀁 𑀧𑀘𑁆𑀙𑀸 𑀧𑀼𑀡𑁆𑀡𑀓𑀸𑀮𑁂 𑀧𑀢𑀺𑀢𑁆𑀯𑀸 𑀪𑀺𑀦𑁆𑀤𑀢𑀺, 𑀪𑀡𑁆𑀟𑀤𑁂𑀬𑁆𑀬𑀁. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀪𑀡𑁆𑀟𑀲𑁆𑀲 𑀦𑀢𑁆𑀣𑀺𑀓𑀸𑀮𑁂 𑀓𑀢𑀧𑀬𑁄𑀕𑀢𑁆𑀢𑀸 𑀆𑀤𑀺𑀢𑁄𑀯 𑀧𑀸𑀭𑀸𑀚𑀺𑀓𑀁 𑀦 𑀳𑁄𑀢𑀺. 𑀪𑀡𑁆𑀟𑀯𑀺𑀦𑀸𑀲𑀤𑁆𑀯𑀸𑀭𑀲𑁆𑀲 𑀧𑀦 𑀓𑀢𑀢𑁆𑀢𑀸 𑀪𑀡𑁆𑀟𑀤𑁂𑀬𑁆𑀬𑀁 𑀳𑁄𑀢𑀺. 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀅𑀤𑀤𑀢𑁄 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀭𑀸𑀚𑀺𑀓𑀁.

𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀫𑀸𑀢𑀺𑀓𑀁 𑀉𑀚𑀼𑀓𑀁 𑀓𑀭𑁄𑀢𑀺 ‘‘𑀯𑀝𑁆𑀝𑀺𑀢𑁆𑀯𑀸 𑀯𑀸 𑀕𑀫𑀺𑀲𑁆𑀲𑀢𑀺, 𑀯𑁂𑀮𑀁 𑀯𑀸 𑀉𑀢𑁆𑀢𑀭𑀸𑀧𑁂𑀲𑁆𑀲𑀢𑀻’’𑀢𑀺; 𑀯𑀝𑁆𑀝𑀺𑀢𑁆𑀯𑀸 𑀯𑀸 𑀕𑀘𑁆𑀙𑀢𑀼, 𑀯𑁂𑀮𑀁 𑀯𑀸 𑀉𑀢𑁆𑀢𑀭𑀢𑀼, 𑀉𑀚𑀼𑀓𑀭𑀡𑀓𑀸𑀮𑁂 𑀧𑀸𑀭𑀸𑀚𑀺𑀓𑀁. 𑀈𑀤𑀺𑀲𑀸 𑀳𑀺 𑀧𑀬𑁄𑀕𑀸 𑀧𑀼𑀩𑁆𑀩𑀧𑀬𑁄𑀕𑀸𑀯𑀳𑀸𑀭𑁂 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀲𑀼𑀓𑁆𑀔𑀫𑀸𑀢𑀺𑀓𑀸𑀬 𑀉𑀚𑀼𑀓𑀢𑀸𑀬 𑀧𑀘𑁆𑀙𑀸 𑀉𑀤𑀓𑁂 𑀆𑀕𑀢𑁂 𑀯𑀝𑁆𑀝𑀺𑀢𑁆𑀯𑀸 𑀯𑀸 𑀕𑀘𑁆𑀙𑀢𑀼, 𑀯𑁂𑀮𑀁 𑀯𑀸 𑀉𑀢𑁆𑀢𑀭𑀢𑀼, 𑀪𑀡𑁆𑀟𑀤𑁂𑀬𑁆𑀬𑀁. 𑀓𑀲𑁆𑀫𑀸? 𑀞𑀸𑀦𑀸 𑀘𑀸𑀯𑀦𑀧𑀬𑁄𑀕𑀲𑁆𑀲 𑀅𑀪𑀸𑀯𑀸. 𑀢𑀲𑁆𑀲 𑀮𑀓𑁆𑀔𑀡𑀁 𑀦𑀸𑀯𑀝𑁆𑀞𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀢𑀢𑁆𑀣𑁂𑀯 𑀪𑀺𑀦𑁆𑀤𑀢𑀺 𑀯𑀸𑀢𑀺𑀆𑀤𑀻𑀲𑀼 𑀅𑀝𑁆𑀞𑀓𑀣𑀸𑀬𑀁 𑀢𑀸𑀯 𑀯𑀼𑀢𑁆𑀢𑀁 𑁋 ‘‘𑀪𑀺𑀦𑁆𑀤𑀢𑀺 𑀯𑀸𑀢𑀺 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀢𑁆𑀯𑀸 𑀪𑀺𑀦𑁆𑀤𑀢𑀺. 𑀙𑀟𑁆𑀟𑁂𑀢𑀺 𑀯𑀸𑀢𑀺 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀆𑀓𑀺𑀭𑀺𑀢𑁆𑀯𑀸 𑀉𑀢𑁆𑀢𑀭𑀸𑀧𑁂𑀢𑀺. 𑀛𑀸𑀧𑁂𑀢𑀺 𑀯𑀸𑀢𑀺 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀛𑀸𑀧𑁂𑀢𑀺. 𑀅𑀧𑀭𑀺𑀪𑁄𑀕𑀁 𑀯𑀸 𑀓𑀭𑁄𑀢𑀻𑀢𑀺 𑀅𑀔𑀸𑀤𑀺𑀢𑀩𑁆𑀩𑀁 𑀯𑀸 𑀅𑀧𑀸𑀢𑀩𑁆𑀩𑀁 𑀯𑀸 𑀓𑀭𑁄𑀢𑀺; 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀯𑀺𑀲𑀁 𑀯𑀸 𑀉𑀘𑁆𑀙𑀺𑀝𑁆𑀞𑀁 𑀯𑀸 𑀓𑀼𑀡𑀧𑀁 𑀯𑀸 𑀧𑀸𑀢𑁂𑀲𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀞𑀸𑀦𑀸𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝𑀁, 𑀩𑀼𑀤𑁆𑀥𑀯𑀺𑀲𑀬𑁄 𑀦𑀸𑀫𑁂𑀲𑁄. 𑀓𑀺𑀜𑁆𑀘𑀸𑀧𑀺 𑀤𑀼𑀓𑁆𑀓𑀝𑀁, 𑀆𑀳𑀭𑀸𑀧𑁂𑀦𑁆𑀢𑁂 𑀧𑀦 𑀪𑀡𑁆𑀟𑀤𑁂𑀬𑁆𑀬’’𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀤𑁆𑀯𑀬𑀁 𑀦 𑀲𑀫𑁂𑀢𑀺. 𑀢𑀜𑁆𑀳𑀺 𑀓𑀼𑀫𑁆𑀪𑀺𑀚𑀚𑁆𑀚𑀭𑀓𑀭𑀡𑁂𑀦 𑀘 𑀫𑀸𑀢𑀺𑀓𑀸𑀉𑀚𑀼𑀓𑀭𑀡𑁂𑀦 𑀘 𑀲𑀤𑁆𑀥𑀺𑀁 𑀏𑀓𑀮𑀓𑁆𑀔𑀡𑀁. 𑀧𑀘𑁆𑀙𑀺𑀫𑀁 𑀧𑀦 𑀤𑁆𑀯𑀬𑀁 𑀞𑀸𑀦𑀸 𑀅𑀘𑀸𑀯𑁂𑀦𑁆𑀢𑁂𑀦𑀸𑀧𑀺 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀁 𑀯𑀺𑀦𑀺𑀘𑁆𑀙𑀬𑀁 𑀯𑀤𑀦𑁆𑀢𑀺 𑁋 ‘‘𑀅𑀝𑁆𑀞𑀓𑀣𑀸𑀬𑀁 𑀓𑀺𑀭 ‘𑀞𑀸𑀦𑀸 𑀘𑀸𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀤𑀼𑀓𑁆𑀓𑀝’𑀦𑁆𑀢𑀺 𑀇𑀤𑀁 𑀧𑀘𑁆𑀙𑀺𑀫𑀤𑁆𑀯𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀞𑀸𑀦𑀸 𑀘𑀸𑀯𑀦𑀁 𑀅𑀓𑀭𑁄𑀦𑁆𑀢𑁄𑀬𑁂𑀯 𑀳𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀯𑀸 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬 𑀯𑀸 𑀛𑀸𑀧𑁂𑀬𑁆𑀬𑀧𑀺, 𑀅𑀧𑀭𑀺𑀪𑁄𑀕𑀫𑁆𑀧𑀺 𑀓𑀭𑁂𑀬𑁆𑀬. 𑀧𑀼𑀭𑀺𑀫𑀤𑁆𑀯𑀬𑁂 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀪𑀺𑀦𑁆𑀤𑀦𑁆𑀢𑀲𑁆𑀲 𑀯𑀸 𑀙𑀟𑁆𑀟𑁂𑀦𑁆𑀢𑀲𑁆𑀲 𑀯𑀸 𑀞𑀸𑀦𑀸 𑀘𑀸𑀯𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬 𑀪𑀡𑁆𑀟𑀤𑁂𑀬𑁆𑀬𑀁, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀸𑀭𑀸𑀚𑀺𑀓’’𑀦𑁆𑀢𑀺. 𑀧𑀸𑀴𑀺𑀬𑀁 ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦; 𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀢𑁆𑀣𑀢𑁄. 𑀧𑀸𑀴𑀺𑀬𑀜𑁆𑀳𑀺 𑀣𑁂𑀬𑁆𑀬𑀘𑀺𑀢𑁆𑀢𑀧𑀓𑁆𑀔𑁂 ‘‘𑀪𑀺𑀦𑁆𑀤𑀢𑀺 𑀯𑀸𑀢𑀺 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀢𑀺, 𑀙𑀟𑁆𑀟𑁂𑀢𑀺 𑀯𑀸𑀢𑀺 𑀢𑀢𑁆𑀣 𑀯𑀫𑀢𑀺 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀙𑀟𑁆𑀟𑁂𑀢𑀻’’𑀢𑀺 𑀏𑀯𑀫𑁂𑀓𑁂 𑀯𑀤𑀦𑁆𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀲𑀸𑀭𑁄 𑁋 𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 𑀢𑀺𑀡𑀚𑁆𑀛𑀸𑀧𑀓𑁄 𑀯𑀺𑀬 𑀞𑀸𑀦𑀸 𑀅𑀘𑀸𑀯𑁂𑀢𑀼𑀓𑀸𑀫𑁄𑀯 𑀓𑁂𑀯𑀮𑀁 𑀪𑀺𑀦𑁆𑀤𑀢𑀺, 𑀪𑀺𑀦𑁆𑀦𑀢𑁆𑀢𑀸 𑀧𑀦 𑀢𑁂𑀮𑀸𑀤𑀻𑀦𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀬𑀁 𑀯𑀸 𑀧𑀦𑁂𑀢𑁆𑀣 𑀧𑀢𑁆𑀣𑀺𑀦𑁆𑀦𑀁, 𑀢𑀁 𑀏𑀓𑀸𑀩𑀤𑁆𑀥𑀫𑁂𑀯 𑀢𑀺𑀝𑁆𑀞𑀢𑀺. 𑀅𑀙𑀟𑁆𑀟𑁂𑀢𑀼𑀓𑀸𑀫𑁄𑀬𑁂𑀯 𑀘 𑀓𑁂𑀯𑀮𑀁 𑀢𑀢𑁆𑀣 𑀉𑀤𑀓𑀯𑀸𑀮𑀺𑀓𑀸𑀤𑀻𑀦𑀺 𑀆𑀓𑀺𑀭𑀢𑀺, 𑀆𑀓𑀺𑀡𑁆𑀡𑀢𑁆𑀢𑀸 𑀧𑀦 𑀢𑁂𑀮𑀁 𑀙𑀟𑁆𑀟𑀻𑀬𑀢𑀺. 𑀢𑀲𑁆𑀫𑀸 𑀯𑁄𑀳𑀸𑀭𑀯𑀲𑁂𑀦 ‘‘𑀪𑀺𑀦𑁆𑀤𑀢𑀺 𑀯𑀸 𑀙𑀟𑁆𑀟𑁂𑀢𑀺 𑀯𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀦𑀸𑀲𑁂𑀢𑀼𑀓𑀸𑀫𑀢𑀸𑀧𑀓𑁆𑀔𑁂 𑀧𑀦 𑀇𑀢𑀭𑀣𑀸𑀧𑀺 𑀬𑀼𑀚𑁆𑀚𑀢𑀺. 𑀏𑀯𑀜𑁆𑀳𑀺 𑀓𑀣𑀺𑀬𑀫𑀸𑀦𑁂 𑀧𑀸𑀴𑀺 𑀘 𑀅𑀝𑁆𑀞𑀓𑀣𑀸 𑀘 𑀧𑀼𑀩𑁆𑀩𑀸𑀧𑀭𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸𑀧𑀺 𑀘 𑀲𑀦𑁆𑀢𑁄𑀲𑀁 𑀅𑀓𑀢𑁆𑀯𑀸 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀪𑀽𑀫𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀣𑀮𑀝𑁆𑀞𑀓𑀣𑀸

𑁯𑁫. 𑀣𑀮𑀝𑁆𑀞𑁂 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀪𑀽𑀫𑀺𑀢𑀮𑁂 𑀯𑀸 𑀧𑀸𑀲𑀸𑀡𑀢𑀮𑀧𑀩𑁆𑀩𑀢𑀢𑀮𑀸𑀤𑀻𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀯𑀸 𑀞𑀧𑀺𑀢𑀁 𑀣𑀮𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀲𑀘𑁂 𑀭𑀸𑀲𑀺𑀓𑀢𑀁 𑀳𑁄𑀢𑀺, 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀪𑀸𑀚𑀦𑀕𑀢𑀓𑀭𑀡𑀫𑀼𑀝𑁆𑀞𑀺𑀘𑁆𑀙𑁂𑀤𑀦𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀏𑀓𑀸𑀩𑀤𑁆𑀥𑀁 𑀲𑀺𑀮𑁂𑀲𑀦𑀺𑀬𑁆𑀬𑀸𑀲𑀸𑀤𑀺 𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀕𑀭𑀼𑀓𑀁 𑀳𑁄𑀢𑀺 𑀪𑀸𑀭𑀩𑀤𑁆𑀥𑀁 𑀮𑁄𑀳𑀧𑀺𑀡𑁆𑀟𑀺-𑀕𑀼𑀴𑀧𑀺𑀡𑁆𑀟𑀺-𑀢𑁂𑀮𑀫𑀥𑀼𑀖𑀝𑀸𑀤𑀺 𑀯𑀸, 𑀓𑀼𑀫𑁆𑀪𑀺𑀬𑀁 𑀞𑀸𑀦𑀸𑀘𑀸𑀯𑀦𑀯𑀺𑀦𑀺𑀘𑁆𑀙𑀬𑁂𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀗𑁆𑀔𑀮𑀺𑀓𑀩𑀤𑁆𑀥𑀲𑁆𑀲 𑀘 𑀞𑀸𑀦𑀪𑁂𑀤𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄. 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑀁 𑀧𑀦 𑀧𑀸𑀯𑀸𑀭𑀢𑁆𑀣𑀭𑀡𑀲𑀸𑀝𑀓𑀸𑀤𑀺𑀁 𑀉𑀚𑀼𑀓𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀧𑀸𑀭𑀺𑀫𑀦𑁆𑀢𑁂 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀏𑀯𑀁 𑀲𑀩𑁆𑀩𑀤𑀺𑀲𑀸𑀲𑀼 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀯𑁂𑀞𑁂𑀢𑁆𑀯𑀸 𑀉𑀤𑁆𑀥𑀭𑀢𑀺, 𑀓𑁂𑀲𑀕𑁆𑀕𑀫𑀢𑁆𑀢𑀁 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀣𑀮𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀆𑀓𑀸𑀲𑀝𑁆𑀞𑀓𑀣𑀸

𑁯𑁬. 𑀆𑀓𑀸𑀲𑀝𑁆𑀞𑁂 𑀫𑁄𑀭𑀲𑁆𑀲 𑀙𑀳𑀺 𑀆𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀧𑀼𑀭𑀢𑁄 𑀫𑀼𑀔𑀢𑀼𑀡𑁆𑀟𑀓𑁂𑀦, 𑀧𑀘𑁆𑀙𑀢𑁄 𑀓𑀮𑀸𑀧𑀕𑁆𑀕𑁂𑀦, 𑀉𑀪𑀬𑀧𑀲𑁆𑀲𑁂𑀲𑀼 𑀧𑀓𑁆𑀔𑀧𑀭𑀺𑀬𑀦𑁆𑀢𑁂𑀳𑀺, 𑀅𑀥𑁄 𑀧𑀸𑀤𑀦𑀔𑀲𑀺𑀔𑀸𑀬, 𑀉𑀤𑁆𑀥𑀁 𑀲𑀺𑀔𑀕𑁆𑀕𑁂𑀦𑀸𑀢𑀺. 𑀪𑀺𑀓𑁆𑀔𑀼 ‘‘𑀲𑀲𑁆𑀲𑀸𑀫𑀺𑀓𑀁 𑀆𑀓𑀸𑀲𑀝𑁆𑀞𑀁 𑀫𑁄𑀭𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀢𑁄 𑀯𑀸 𑀢𑀺𑀝𑁆𑀞𑀢𑀺, 𑀳𑀢𑁆𑀣𑀁 𑀯𑀸 𑀧𑀲𑀸𑀭𑁂𑀢𑀺, 𑀫𑁄𑀭𑁄 𑀆𑀓𑀸𑀲𑁂𑀬𑁂𑀯 𑀧𑀓𑁆𑀔𑁂 𑀘𑀸𑀭𑁂𑀢𑀺, 𑀯𑀸𑀢𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀁. 𑀢𑀁 𑀅𑀨𑀦𑁆𑀤𑁂𑀦𑁆𑀢𑁄 𑀳𑀢𑁆𑀣𑁂𑀦 𑀆𑀫𑀲𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀞𑀸𑀦𑀸 𑀅𑀘𑀸𑀯𑁂𑀦𑁆𑀢𑁄 𑀨𑀦𑁆𑀤𑀸𑀧𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀳𑀢𑁆𑀣𑁂𑀦 𑀧𑀦 𑀕𑀳𑁂𑀢𑁆𑀯𑀸 𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀓𑀮𑀸𑀧𑀕𑁆𑀕𑀁, 𑀓𑀮𑀸𑀧𑀕𑁆𑀕𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀫𑀼𑀔𑀢𑀼𑀡𑁆𑀟𑀓𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀢𑀣𑀸 𑀯𑀸𑀫𑀧𑀓𑁆𑀔𑀧𑀭𑀺𑀬𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀤𑀓𑁆𑀔𑀺𑀡𑀧𑀓𑁆𑀔𑀧𑀭𑀺𑀬𑀦𑁆𑀢𑀁, 𑀤𑀓𑁆𑀔𑀺𑀡𑀧𑀓𑁆𑀔𑀧𑀭𑀺𑀬𑀦𑁆𑀢𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀯𑀸𑀫𑀧𑀓𑁆𑀔𑀧𑀭𑀺𑀬𑀦𑁆𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀢𑀣𑀸 𑀧𑀸𑀤𑀦𑀔𑀲𑀺𑀔𑀸𑀬 𑀨𑀼𑀝𑁆𑀞𑁄𑀓𑀸𑀲𑀁 𑀲𑀺𑀔𑀕𑁆𑀕𑀁, 𑀲𑀺𑀔𑀕𑁆𑀕𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀧𑀸𑀤𑀦𑀔𑀲𑀺𑀔𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁.

𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀫𑁄𑀭𑁄 𑀲𑀻𑀲𑀸𑀤𑀻𑀲𑀼 𑀬𑀲𑁆𑀫𑀺𑀁 𑀅𑀗𑁆𑀕𑁂 𑀦𑀺𑀮𑀻𑀬𑀢𑀺, 𑀢𑀁 𑀢𑀲𑁆𑀲 𑀞𑀸𑀦𑀁. 𑀢𑀲𑁆𑀫𑀸 𑀢𑀁 𑀳𑀢𑁆𑀣𑁂 𑀦𑀺𑀮𑀻𑀦𑀁 𑀇𑀢𑁄 𑀘𑀺𑀢𑁄 𑀘 𑀓𑀭𑁄𑀦𑁆𑀢𑁄𑀧𑀺 𑀨𑀦𑁆𑀤𑀸𑀧𑁂𑀢𑀺𑀬𑁂𑀯, 𑀬𑀤𑀺 𑀧𑀦 𑀇𑀢𑀭𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀇𑀢𑀭𑀁 𑀳𑀢𑁆𑀣𑀁 𑀉𑀧𑀦𑁂𑀢𑀺, 𑀫𑁄𑀭𑁄 𑀲𑀬𑀫𑁂𑀯 𑀉𑀟𑁆𑀟𑁂𑀢𑁆𑀯𑀸 𑀢𑀢𑁆𑀣 𑀦𑀺𑀮𑀻𑀬𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀗𑁆𑀕𑁂 𑀦𑀺𑀮𑀻𑀦𑀪𑀸𑀯𑀁 𑀜𑀢𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀏𑀓𑀁 𑀧𑀤𑀯𑀸𑀭𑀁 𑀕𑀘𑁆𑀙𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀤𑀼𑀢𑀺𑀬𑁂 𑀧𑀸𑀭𑀸𑀚𑀺𑀓𑀁.

𑀪𑀽𑀫𑀺𑀬𑀁 𑀞𑀺𑀢𑀫𑁄𑀭𑁄 𑀤𑁆𑀯𑀺𑀦𑁆𑀦𑀁 𑀯𑀸 𑀧𑀸𑀤𑀸𑀦𑀁 𑀓𑀮𑀸𑀧𑀲𑁆𑀲 𑀘 𑀯𑀲𑁂𑀦 𑀢𑀻𑀡𑀺 𑀞𑀸𑀦𑀸𑀦𑀺 𑀮𑀪𑀢𑀺. 𑀢𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀬𑀸𑀯 𑀏𑀓𑀫𑁆𑀧𑀺 𑀞𑀸𑀦𑀁 𑀧𑀣𑀯𑀺𑀁 𑀨𑀼𑀲𑀢𑀺, 𑀢𑀸𑀯 𑀣𑀼𑀮𑁆𑀮𑀘𑁆𑀘𑀬𑀁. 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀧𑀣𑀯𑀺𑀬𑀸 𑀫𑁄𑀘𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀜𑁆𑀚𑀭𑁂 𑀞𑀺𑀢𑀁 𑀲𑀳 𑀧𑀜𑁆𑀚𑀭𑁂𑀦 𑀉𑀤𑁆𑀥𑀭𑀢𑀺, 𑀧𑀸𑀭𑀸𑀚𑀺𑀓𑀁. 𑀬𑀤𑀺 𑀧𑀦 𑀧𑀸𑀤𑀁 𑀦 𑀅𑀕𑁆𑀖𑀢𑀺, 𑀲𑀩𑁆𑀩𑀢𑁆𑀣 𑀅𑀕𑁆𑀖𑀯𑀲𑁂𑀦 𑀓𑀸𑀢𑀩𑁆𑀩𑀁. 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀘𑀭𑀦𑁆𑀢𑀁 𑀫𑁄𑀭𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀤𑀲𑀸 𑀩𑀳𑀺𑀯𑀢𑁆𑀣𑀼𑀁 𑀦𑀻𑀳𑀭𑀦𑁆𑀢𑁄 𑀤𑁆𑀯𑀸𑀭𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑀚𑁂 𑀞𑀺𑀢𑀩𑀮𑀻𑀩𑀤𑁆𑀤𑀲𑁆𑀲 𑀳𑀺 𑀯𑀚𑁄 𑀯𑀺𑀬 𑀅𑀦𑁆𑀢𑁄𑀯𑀢𑁆𑀣𑀼 𑀢𑀲𑁆𑀲 𑀞𑀸𑀦𑀁. 𑀳𑀢𑁆𑀣𑁂𑀦 𑀧𑀦 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀫𑁂𑀯. 𑀅𑀦𑁆𑀢𑁄𑀕𑀸𑀫𑁂 𑀘𑀭𑀦𑁆𑀢𑀫𑁆𑀧𑀺 𑀕𑀸𑀫𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀲𑀬𑀫𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀽𑀧𑀘𑀸𑀭𑁂 𑀯𑀸 𑀯𑀢𑁆𑀣𑀽𑀧𑀘𑀸𑀭𑁂 𑀯𑀸 𑀘𑀭𑀦𑁆𑀢𑀁 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁄 𑀓𑀝𑁆𑀞𑁂𑀦 𑀯𑀸 𑀓𑀣𑀮𑀸𑀬 𑀯𑀸 𑀉𑀢𑁆𑀭𑀸𑀲𑁂𑀢𑁆𑀯𑀸 𑀅𑀝𑀯𑀺𑀫𑀼𑀔𑀁 𑀓𑀭𑁄𑀢𑀺, 𑀫𑁄𑀭𑁄 𑀉𑀟𑁆𑀟𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀫𑁆𑀳𑀺 𑀯𑀸 𑀙𑀤𑀦𑀧𑀺𑀝𑁆𑀞𑁂 𑀯𑀸 𑀦𑀺𑀮𑀻𑀬𑀢𑀺, 𑀭𑀓𑁆𑀔𑀢𑀺. 𑀲𑀘𑁂 𑀧𑀦 𑀅𑀝𑀯𑀺𑀫𑀼𑀔𑁂 𑀉𑀟𑁆𑀟𑁂𑀢𑀺 𑀯𑀸 𑀕𑀘𑁆𑀙𑀢𑀺 𑀯𑀸 ‘‘𑀅𑀝𑀯𑀺𑀁 𑀧𑀯𑁂𑀲𑁂𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀓𑀧𑁆𑀧𑁂 𑀅𑀲𑀢𑀺 𑀧𑀣𑀯𑀺𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀟𑁆𑀟𑀺𑀢𑀫𑀢𑁆𑀢𑁂 𑀯𑀸 𑀤𑀼𑀢𑀺𑀬𑀧𑀤𑀯𑀸𑀭𑁂 𑀯𑀸 𑀧𑀸𑀭𑀸𑀚𑀺𑀓𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀫𑁂𑀯 𑀞𑀸𑀦𑀁 𑀳𑁄𑀢𑀺. 𑀓𑀧𑀺𑀜𑁆𑀚𑀭𑀸𑀤𑀻𑀲𑀼𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀸𑀝𑀓𑀁 𑀯𑀸𑀢𑀺 𑀯𑀸𑀢𑀯𑁂𑀕𑀼𑀓𑁆𑀔𑀺𑀢𑁆𑀢𑀁 𑀧𑀣𑀯𑀺𑀢𑀮𑁂 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑀺𑀢𑀫𑀺𑀯 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀁 𑀔𑀮𑀺𑀩𑀤𑁆𑀥𑀁 𑀲𑀸𑀝𑀓𑀁 𑀅𑀪𑀺𑀫𑀼𑀔𑀸𑀕𑀢𑀁 𑀳𑀢𑁆𑀣𑁂𑀦 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀕𑀡𑁆𑀳𑀸𑀢𑀺, 𑀇𑀢𑁄 𑀘𑀺𑀢𑁄 𑀘 𑀞𑀸𑀦𑀁 𑀅𑀯𑀺𑀓𑁄𑀧𑁂𑀦𑁆𑀢𑁄𑀬𑁂𑀯 𑀕𑀫𑀦𑀼𑀧𑀘𑁆𑀙𑁂𑀤𑁂 𑀤𑀼𑀓𑁆𑀓𑀝𑀁. 𑀞𑀸𑀦𑀸𑀘𑀸𑀯𑀦𑀁 𑀅𑀓𑀭𑁄𑀦𑁆𑀢𑁄 𑀘𑀸𑀮𑁂𑀢𑀺, 𑀨𑀦𑁆𑀤𑀸𑀧𑀦𑁂 𑀣𑀼𑀮𑁆𑀮𑀘𑁆𑀘𑀬𑀁. 𑀞𑀸𑀦𑀸 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀘𑀲𑁆𑀲 𑀫𑁄𑀭𑀲𑁆𑀲𑁂𑀯 𑀙𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀩𑀤𑁆𑀥𑀲𑀸𑀝𑀓𑁄 𑀧𑀦 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀕𑀳𑀺𑀢𑀫𑀢𑁆𑀢𑁂𑀯 𑀤𑀼𑀢𑀺𑀬𑁂𑀦𑀦𑁆𑀢𑁂𑀦 𑀧𑀢𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀢𑀺, 𑀢𑀲𑁆𑀲 𑀤𑁆𑀯𑁂 𑀞𑀸𑀦𑀸𑀦𑀺 𑀳𑁄𑀦𑁆𑀢𑀺 𑁋 𑀳𑀢𑁆𑀣𑁄 𑀘𑁂𑀯 𑀪𑀽𑀫𑀺 𑀘. 𑀢𑀁 𑀬𑀣𑀸𑀕𑀳𑀺𑀢𑀫𑁂𑀯 𑀧𑀞𑀫𑀁 𑀕𑀳𑀺𑀢𑁄𑀓𑀸𑀲𑀧𑁆𑀧𑀤𑁂𑀲𑀢𑁄 𑀘𑀸𑀮𑁂𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀪𑀽𑀫𑀺𑀢𑁄 𑀤𑀼𑀢𑀺𑀬𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀉𑀓𑁆𑀔𑀺𑀧𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀯𑀸 𑀪𑀽𑀫𑀺𑀢𑁄 𑀉𑀤𑁆𑀥𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀕𑀳𑀺𑀢𑁄𑀓𑀸𑀲𑀧𑁆𑀧𑀤𑁂𑀲𑀢𑁄 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀕𑀳𑀡𑀁 𑀯𑀸 𑀅𑀫𑀼𑀜𑁆𑀘𑀦𑁆𑀢𑁄 𑀉𑀚𑀼𑀓𑀫𑁂𑀯 𑀳𑀢𑁆𑀣𑀁 𑀑𑀦𑀸𑀫𑁂𑀢𑁆𑀯𑀸 𑀪𑀽𑀫𑀺𑀕𑀢𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀢𑀺, 𑀧𑀸𑀭𑀸𑀚𑀺𑀓𑀁. 𑀯𑁂𑀞𑀦𑁂𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀙𑀺𑀚𑁆𑀚𑀫𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀅𑀮𑀗𑁆𑀓𑀭𑁄𑀦𑁆𑀢𑀸𑀦𑀁 𑀕𑀻𑀯𑁂𑀬𑁆𑀬𑀓𑀸𑀤𑀺𑀧𑀺𑀴𑀦𑁆𑀥𑀦𑀁 𑀯𑀸 𑀲𑀼𑀯𑀡𑁆𑀡𑀲𑀮𑀸𑀓𑀁 𑀙𑀺𑀦𑁆𑀤𑀦𑁆𑀢𑀸𑀦𑀁 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀲𑀼𑀯𑀡𑁆𑀡𑀔𑀡𑁆𑀟𑀁 𑀯𑀸 𑀙𑀺𑀚𑁆𑀚𑀫𑀸𑀦𑀁 𑀧𑀢𑀢𑀺, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀆𑀓𑀸𑀲𑁂𑀦 𑀆𑀕𑀘𑁆𑀙𑀦𑁆𑀢𑀁 𑀣𑁂𑀬𑁆𑀬𑀘𑀺𑀢𑁆𑀢𑁄 𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺, 𑀕𑀳𑀡𑀫𑁂𑀯 𑀞𑀸𑀦𑀁. 𑀕𑀳𑀺𑀢𑀧𑁆𑀧𑀤𑁂𑀲𑀢𑁄 𑀳𑀢𑁆𑀣𑀁 𑀅𑀧𑀦𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀘𑀻𑀯𑀭𑁂 𑀧𑀢𑀺𑀢𑀁 𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀦𑀼𑀤𑁆𑀥𑀭𑀺𑀢𑁆𑀯𑀸𑀯 𑀬𑀸𑀢𑀺, 𑀤𑀼𑀢𑀺𑀬𑁂 𑀧𑀤𑀯𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀧𑀢𑁆𑀢𑁂 𑀧𑀢𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀲𑁂 𑀯𑀸 𑀫𑀼𑀔𑁂 𑀯𑀸 𑀧𑀸𑀤𑁂 𑀯𑀸 𑀧𑀢𑀺𑀝𑁆𑀞𑀺𑀢𑀁 𑀳𑀢𑁆𑀣𑁂𑀦 𑀕𑀡𑁆𑀳𑀸𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀕𑁆𑀕𑀳𑁂𑀢𑁆𑀯𑀸𑀯 𑀬𑀸𑀢𑀺, 𑀤𑀼𑀢𑀺𑀬𑁂 𑀧𑀤𑀯𑀸𑀭𑁂 𑀧𑀸𑀭𑀸𑀚𑀺𑀓𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀢𑀢𑀺, 𑀢𑀲𑁆𑀲 𑀧𑀢𑀺𑀢𑁄𑀓𑀸𑀲𑁄𑀯 𑀞𑀸𑀦𑀁, 𑀦 𑀲𑀩𑁆𑀩𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀧𑀢𑁆𑀢𑀘𑀻𑀯𑀭𑀁 𑀯𑀸𑀢𑀺.

𑀆𑀓𑀸𑀲𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀳𑀸𑀲𑀝𑁆𑀞𑀓𑀣𑀸

𑁯𑁭. 𑀯𑁂𑀳𑀸𑀲𑀝𑁆𑀞𑁂 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀞𑀧𑀺𑀢𑀁 𑀪𑀡𑁆𑀟𑀁 𑀆𑀫𑀸𑀲𑀁 𑀯𑀸 𑀳𑁄𑀢𑀼 𑀅𑀦𑀸𑀫𑀸𑀲𑀁 𑀯𑀸, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀆𑀫𑀲𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁. 𑀫𑀜𑁆𑀘𑀧𑀻𑀞𑁂𑀲𑀼 𑀞𑀧𑀺𑀢𑀪𑀡𑁆𑀟𑁂𑀲𑀼 𑀧𑀦𑁂𑀢𑁆𑀣 𑀣𑀮𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑀘𑁂 𑀔𑀮𑀺𑀬𑀸 𑀩𑀤𑁆𑀥𑀲𑀸𑀝𑀓𑁄 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀧𑀢𑁆𑀣𑀝𑁄 𑀫𑀚𑁆𑀛𑁂𑀦 𑀫𑀜𑁆𑀘𑀢𑀮𑀁 𑀦 𑀨𑀼𑀲𑀢𑀺, 𑀫𑀜𑁆𑀘𑀧𑀸𑀤𑁂𑀯 𑀨𑀼𑀲𑀢𑀺, 𑀢𑁂𑀲𑀁 𑀯𑀲𑁂𑀦 𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀤𑀸𑀦𑀁 𑀉𑀧𑀭𑀺 𑀨𑀼𑀝𑁆𑀞𑁄𑀓𑀸𑀲𑀫𑁂𑀯 𑀳𑀺 𑀅𑀢𑀺𑀓𑁆𑀓𑀫𑀺𑀢𑀫𑀢𑁆𑀢𑁂𑀦 𑀢𑀢𑁆𑀣 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺. 𑀲𑀳 𑀫𑀜𑁆𑀘𑀧𑀻𑀞𑁂𑀳𑀺 𑀳𑀭𑀦𑁆𑀢𑀲𑁆𑀲 𑀧𑀦 𑀫𑀜𑁆𑀘𑀧𑀻𑀞𑀧𑀸𑀤𑀸𑀦𑀁 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀯𑀲𑁂𑀦 𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀻𑀯𑀭𑀯𑀁𑀲𑁂 𑀯𑀸𑀢𑀺 𑀘𑀻𑀯𑀭𑀞𑀧𑀦𑀢𑁆𑀣𑀸𑀬 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑁂 𑀯𑀁𑀲𑁂 𑀯𑀸 𑀓𑀝𑁆𑀞𑀤𑀡𑁆𑀟𑀓𑁂 𑀯𑀸. 𑀢𑀢𑁆𑀣 𑀲𑀁𑀳𑀭𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂𑀦 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁, 𑀦 𑀲𑀩𑁆𑀩𑁄 𑀘𑀻𑀯𑀭𑀯𑀁𑀲𑁄. 𑀢𑀲𑁆𑀫𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀢𑀁 𑀪𑁄𑀕𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲 𑀧𑀸𑀭𑀢𑁄 𑀯𑀁𑀲𑁂 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀁 𑀑𑀭𑀢𑁄 𑀘𑀻𑀯𑀭𑁂𑀦 𑀯𑀁𑀲𑀲𑁆𑀲 𑀨𑀼𑀝𑁆𑀞𑀧𑁆𑀧𑀤𑁂𑀲𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀏𑀓𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀸𑀓𑀟𑁆𑀠𑀦𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀦𑁆𑀢𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑁂𑀯 𑀧𑀦 𑀘𑀻𑀯𑀭𑀯𑀁𑀲𑁂 𑀯𑀸𑀫𑀢𑁄 𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀲𑀸𑀭𑁂𑀦𑁆𑀢𑀲𑁆𑀲 𑀯𑀸𑀫𑀦𑁆𑀢𑁂𑀦 𑀤𑀓𑁆𑀔𑀺𑀡𑀦𑁆𑀢𑀝𑁆𑀞𑀸𑀦𑀁 𑀤𑀓𑁆𑀔𑀺𑀡𑀦𑁆𑀢𑁂𑀦 𑀯𑀸 𑀯𑀸𑀫𑀦𑁆𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀤𑀲𑀤𑁆𑀯𑀸𑀤𑀲𑀗𑁆𑀕𑀼𑀮𑀫𑀢𑁆𑀢𑀲𑀸𑀭𑀡𑁂𑀦𑁂𑀯 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀁 𑀉𑀓𑁆𑀔𑀺𑀧𑀦𑁆𑀢𑀲𑁆𑀲 𑀓𑁂𑀲𑀕𑁆𑀕𑀫𑀢𑁆𑀢𑀼𑀓𑁆𑀔𑀺𑀧𑀦𑁂𑀦 𑀧𑀸𑀭𑀸𑀚𑀺𑀓𑀁. 𑀘𑀻𑀯𑀭𑀯𑀁𑀲𑀁 𑀨𑀼𑀲𑀦𑁆𑀢𑀁 𑀯𑀸 𑀅𑀨𑀼𑀲𑀦𑁆𑀢𑀁 𑀯𑀸 𑀭𑀚𑁆𑀚𑀼𑀓𑁂𑀦 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀁 𑀫𑁄𑀘𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀫𑀼𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀫𑀼𑀢𑁆𑀢𑀫𑀢𑁆𑀢𑀫𑁂𑀯 𑀳𑀺 𑀢𑀁 ‘‘𑀞𑀸𑀦𑀸 𑀘𑀼𑀢’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀯𑀁𑀲𑁂 𑀯𑁂𑀞𑁂𑀢𑁆𑀯𑀸 𑀞𑀧𑀺𑀢𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀦𑀺𑀩𑁆𑀩𑁂𑀞𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀯𑀮𑀬𑀁 𑀓𑀢𑁆𑀯𑀸 𑀞𑀧𑀺𑀢𑁂 𑀯𑀮𑀬𑀁 𑀙𑀺𑀦𑁆𑀤𑀢𑀺 𑀯𑀸 𑀫𑁄𑀘𑁂𑀢𑀺 𑀯𑀸 𑀏𑀓𑀁 𑀯𑀸 𑀯𑀁𑀲𑀓𑁄𑀝𑀺𑀁 𑀫𑁄𑀘𑁂𑀢𑁆𑀯𑀸 𑀦𑀻𑀳𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀙𑀺𑀦𑁆𑀦𑀫𑀢𑁆𑀢𑁂 𑀫𑀼𑀢𑁆𑀢𑀫𑀢𑁆𑀢𑁂 𑀦𑀻𑀳𑀝𑀫𑀢𑁆𑀢𑁂 𑀘 𑀧𑀸𑀭𑀸𑀚𑀺𑀓𑀁. 𑀢𑀣𑀸 𑀅𑀓𑀢𑁆𑀯𑀸𑀯 𑀘𑀻𑀯𑀭𑀯𑀁𑀲𑁂 𑀇𑀢𑁄 𑀘𑀺𑀢𑁄 𑀘 𑀲𑀸𑀭𑁂𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀯𑀮𑀬𑀲𑁆𑀲 𑀳𑀺 𑀲𑀩𑁆𑀩𑁄𑀧𑀺 𑀘𑀻𑀯𑀭𑀯𑀁𑀲𑁄 𑀞𑀸𑀦𑀁. 𑀓𑀲𑁆𑀫𑀸? 𑀢𑀢𑁆𑀣 𑀲𑀁𑀲𑀭𑀡𑀥𑀫𑁆𑀫𑀢𑀸𑀬. 𑀬𑀤𑀸 𑀧𑀦 𑀦𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀲𑀸𑀭𑁂𑀢𑁆𑀯𑀸 𑀞𑀧𑀺𑀢𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂𑀦 𑀨𑀼𑀝𑁆𑀞𑁄𑀓𑀸𑀲𑁄𑀯 𑀞𑀸𑀦𑀁. 𑀢𑀢𑁆𑀣 𑀲𑀁𑀳𑀭𑀺𑀢𑁆𑀯𑀸 𑀞𑀧𑀺𑀢𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦 𑀏𑀓𑁂𑀦𑀦𑁆𑀢𑁂𑀦 𑀪𑀽𑀫𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀢𑀲𑁆𑀲 𑀘𑀻𑀯𑀭𑀯𑀁𑀲𑁂 𑀘 𑀪𑀽𑀫𑀺𑀬𑀜𑁆𑀘 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀯𑀲𑁂𑀦 𑀤𑁆𑀯𑁂 𑀞𑀸𑀦𑀸𑀦𑀺. 𑀢𑀢𑁆𑀣 𑀪𑀽𑀫𑀺𑀬𑀁 𑀏𑀓𑁂𑀦𑀦𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑁂 𑀅𑀩𑀤𑁆𑀥𑀲𑀸𑀝𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀻𑀯𑀭𑀭𑀚𑁆𑀚𑀼𑀬𑀸𑀧𑀺 𑀅𑀬𑀫𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀅𑀗𑁆𑀓𑀼𑀲𑀓𑁂 𑀮𑀕𑁆𑀕𑁂𑀢𑁆𑀯𑀸 𑀞𑀧𑀺𑀢𑀪𑀡𑁆𑀟𑀁 𑀧𑀦 𑀪𑁂𑀲𑀚𑁆𑀚𑀖𑀝𑁄 𑀯𑀸 𑀪𑁂𑀲𑀚𑁆𑀚𑀢𑁆𑀣𑀯𑀺𑀓𑀸 𑀯𑀸 𑀲𑀘𑁂 𑀪𑀺𑀢𑁆𑀢𑀺𑀁 𑀯𑀸 𑀪𑀽𑀫𑀺𑀁 𑀯𑀸 𑀅𑀨𑀼𑀲𑀺𑀢𑁆𑀯𑀸 𑀞𑀧𑀺𑀢𑀁 𑀮𑀕𑁆𑀕𑀦𑀓𑀁 𑀖𑀁𑀲𑀦𑁆𑀢𑀲𑁆𑀲 𑀦𑀻𑀳𑀭𑀢𑁄 𑀅𑀗𑁆𑀓𑀼𑀲𑀓𑁄𑀝𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀮𑀕𑁆𑀕𑀦𑀓𑀁 𑀩𑀤𑁆𑀥𑀁 𑀳𑁄𑀢𑀺, 𑀩𑀼𑀦𑁆𑀤𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑀕𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀗𑁆𑀓𑀼𑀲𑀓𑁄𑀝𑀺𑀢𑁄 𑀅𑀦𑀺𑀓𑁆𑀔𑀦𑁆𑀢𑁂𑀧𑀺 𑀧𑀸𑀭𑀸𑀚𑀺𑀓𑀁. 𑀪𑀺𑀢𑁆𑀢𑀺𑀦𑀺𑀲𑁆𑀲𑀺𑀢𑀁 𑀳𑁄𑀢𑀺, 𑀧𑀞𑀫𑀁 𑀅𑀗𑁆𑀓𑀼𑀲𑀓𑁄𑀝𑀺𑀢𑁄 𑀦𑀻𑀳𑀭𑀢𑀺, 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀪𑀺𑀢𑁆𑀢𑀺𑀁 𑀫𑁄𑀘𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀪𑀺𑀢𑁆𑀢𑀺𑀁 𑀫𑁄𑀘𑁂𑀢𑁆𑀯𑀸 𑀧𑀘𑁆𑀙𑀸 𑀅𑀗𑁆𑀓𑀼𑀲𑀢𑁄 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀪𑀸𑀭𑀺𑀬𑀁 𑀪𑀡𑁆𑀟𑀁 𑀦𑀻𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀬𑀁 𑀪𑀺𑀢𑁆𑀢𑀺𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀅𑀗𑁆𑀓𑀼𑀲𑀢𑁄 𑀦𑀻𑀳𑀭𑀢𑀺, 𑀧𑀼𑀦 𑀪𑀺𑀢𑁆𑀢𑀺𑀁 𑀅𑀫𑁄𑀘𑁂𑀢𑁆𑀯𑀸𑀧𑀺 𑀅𑀗𑁆𑀓𑀼𑀲𑀢𑁄 𑀦𑀻𑀳𑀝𑀫𑀢𑁆𑀢𑁂𑀬𑁂𑀯 𑀧𑀸𑀭𑀸𑀚𑀺𑀓𑀁. 𑀅𑀢𑁆𑀢𑀦𑀸 𑀓𑀢𑀝𑁆𑀞𑀸𑀦𑀜𑁆𑀳𑀺 𑀞𑀸𑀦𑀁 𑀦 𑀳𑁄𑀢𑀺. 𑀪𑀽𑀫𑀺𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑀲𑁆𑀲 𑀧𑀦 𑀤𑁆𑀯𑁂 𑀏𑀯 𑀞𑀸𑀦𑀸𑀦𑀺. 𑀢𑀢𑁆𑀣 𑀯𑀼𑀢𑁆𑀢𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄. 𑀬𑀁 𑀧𑀦 𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑀕𑁆𑀕𑀺𑀢𑀁 𑀳𑁄𑀢𑀺, 𑀢𑀁 𑀲𑀺𑀓𑁆𑀓𑀸𑀢𑁄 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀲𑀳 𑀲𑀺𑀓𑁆𑀓𑀸𑀬 𑀅𑀗𑁆𑀓𑀼𑀲𑀢𑁄 𑀦𑀻𑀳𑀭𑀦𑁆𑀢𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀁. 𑀪𑀺𑀢𑁆𑀢𑀺𑀪𑀽𑀫𑀺𑀲𑀦𑁆𑀦𑀺𑀲𑁆𑀲𑀺𑀢𑀯𑀲𑁂𑀦 𑀘𑁂𑀢𑁆𑀣 𑀞𑀸𑀦𑀪𑁂𑀤𑁄𑀧𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀺𑀢𑁆𑀢𑀺𑀔𑀻𑀮𑁄𑀢𑀺 𑀉𑀚𑀼𑀓𑀁 𑀓𑀢𑁆𑀯𑀸 𑀪𑀺𑀢𑁆𑀢𑀺𑀬𑀁 𑀆𑀓𑁄𑀝𑀺𑀢𑁄 𑀯𑀸 𑀢𑀢𑁆𑀣𑀚𑀸𑀢𑀓𑁄 𑀏𑀯 𑀯𑀸; 𑀦𑀸𑀕𑀤𑀦𑁆𑀢𑁄 𑀧𑀦 𑀯𑀗𑁆𑀓𑁄 𑀆𑀓𑁄𑀝𑀺𑀢𑁄 𑀏𑀯. 𑀢𑁂𑀲𑀼 𑀮𑀕𑁆𑀕𑁂𑀢𑁆𑀯𑀸 𑀞𑀧𑀺𑀢𑀁 𑀅𑀗𑁆𑀓𑀼𑀲𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀤𑁆𑀯𑀻𑀲𑀼 𑀢𑀻𑀲𑀼 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀁 𑀓𑀼𑀦𑁆𑀢𑀁 𑀯𑀸 𑀪𑀺𑀦𑁆𑀤𑀺𑀯𑀸𑀮𑀁 𑀯𑀸 𑀅𑀕𑁆𑀕𑁂 𑀯𑀸 𑀩𑀼𑀦𑁆𑀤𑁂 𑀯𑀸 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀏𑀓𑀫𑁂𑀓𑀲𑁆𑀲 𑀨𑀼𑀝𑁆𑀞𑁄𑀓𑀸𑀲𑀫𑀢𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀨𑀼𑀝𑁆𑀞𑁄𑀓𑀸𑀲𑀫𑀢𑁆𑀢𑀫𑁂𑀯 𑀳𑀺 𑀢𑁂𑀲𑀁 𑀞𑀸𑀦𑀁 𑀳𑁄𑀢𑀺, 𑀦 𑀲𑀩𑁆𑀩𑁂 𑀔𑀻𑀮𑀸 𑀯𑀸 𑀦𑀸𑀕𑀤𑀦𑁆𑀢𑀸 𑀯𑀸. 𑀪𑀺𑀢𑁆𑀢𑀺𑀅𑀪𑀺𑀫𑀼𑀔𑁄 𑀞𑀢𑁆𑀯𑀸 𑀫𑀚𑁆𑀛𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀢𑀺, 𑀑𑀭𑀺𑀫𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀧𑀸𑀭𑀺𑀫𑀦𑁆𑀢𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀭𑀢𑁄 𑀧𑁂𑀮𑁆𑀮𑁂𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄. 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀉𑀚𑀼𑀓𑀁 𑀉𑀓𑁆𑀔𑀺𑀧𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁. 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀞𑀧𑀺𑀢𑀁 𑀪𑀺𑀢𑁆𑀢𑀺𑀁 𑀖𑀁𑀲𑀦𑁆𑀢𑁄 𑀆𑀓𑀟𑁆𑀠𑀢𑀺, 𑀅𑀕𑁆𑀕𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀩𑀼𑀦𑁆𑀤𑀁, 𑀩𑀼𑀦𑁆𑀤𑁂𑀦 𑀯𑀸 𑀨𑀼𑀝𑁆𑀞𑁄𑀓𑀸𑀲𑀁 𑀅𑀕𑁆𑀕𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀪𑀺𑀢𑁆𑀢𑀺𑀅𑀪𑀺𑀫𑀼𑀔𑁄 𑀞𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑁄 𑀏𑀓𑁂𑀦𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀧𑀭𑀦𑁆𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀉𑀚𑀼𑀓𑀁 𑀉𑀓𑁆𑀔𑀺𑀧𑀦𑁆𑀢𑁄 𑀓𑁂𑀲𑀕𑁆𑀕𑀫𑀢𑁆𑀢𑀁 𑀆𑀓𑀸𑀲𑀕𑀢𑀁 𑀓𑀭𑁄𑀢𑀺, 𑀧𑀸𑀭𑀸𑀚𑀺𑀓𑀁.

𑀭𑀼𑀓𑁆𑀔𑁂 𑀯𑀸 𑀮𑀕𑁆𑀕𑀺𑀢𑀦𑁆𑀢𑀺 𑀢𑀸𑀮𑀭𑀼𑀓𑁆𑀔𑀸𑀤𑀻𑀲𑀼 𑀆𑀭𑁄𑀧𑁂𑀢𑁆𑀯𑀸 𑀮𑀕𑁆𑀕𑀺𑀢𑁂 𑀅𑀗𑁆𑀓𑀼𑀲𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑀚𑀸𑀢𑀓𑀁 𑀧𑀦 𑀢𑀸𑀮𑀧𑀺𑀡𑁆𑀟𑀺𑀁 𑀘𑀸𑀮𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀬𑀲𑁆𑀫𑀺𑀁 𑀨𑀮𑁂 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀩𑀦𑁆𑀥𑀦𑀸 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀺𑀡𑁆𑀟𑀺𑀁 𑀙𑀺𑀦𑁆𑀤𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀕𑁆𑀕𑁂𑀦 𑀧𑀡𑁆𑀡𑀦𑁆𑀢𑀭𑀁 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀸 𑀤𑁆𑀯𑁂 𑀞𑀸𑀦𑀸𑀦𑀺 𑀮𑀪𑀢𑀺 𑁋 𑀞𑀧𑀺𑀢𑀝𑁆𑀞𑀸𑀦𑀜𑁆𑀘 𑀯𑀡𑁆𑀝𑀝𑁆𑀞𑀸𑀦𑀜𑁆𑀘; 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦 ‘‘𑀙𑀺𑀦𑁆𑀦𑀫𑀢𑁆𑀢𑀸 𑀧𑀢𑀫𑀸𑀦𑀸 𑀲𑀤𑁆𑀤𑀁 𑀓𑀭𑁂𑀬𑁆𑀬𑀸’’𑀢𑀺 𑀪𑀬𑁂𑀦 𑀲𑀬𑀁 𑀅𑀕𑁆𑀕𑁂𑀦 𑀧𑀡𑁆𑀡𑀦𑁆𑀢𑀭𑀁 𑀆𑀭𑁄𑀧𑁂𑀢𑁆𑀯𑀸 𑀙𑀺𑀦𑁆𑀤𑀢𑀺, 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀅𑀢𑁆𑀢𑀦𑀸 𑀓𑀢𑀝𑁆𑀞𑀸𑀦𑀜𑁆𑀳𑀺 𑀞𑀸𑀦𑀁 𑀦 𑀳𑁄𑀢𑀺. 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀩𑁆𑀩𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀢𑁆𑀢𑀸𑀥𑀸𑀭𑀓𑁂𑀧𑀻𑀢𑀺 𑀏𑀢𑁆𑀣 𑀭𑀼𑀓𑁆𑀔𑀸𑀥𑀸𑀭𑀓𑁄 𑀯𑀸 𑀳𑁄𑀢𑀼 𑀯𑀮𑀬𑀸𑀥𑀸𑀭𑀓𑁄 𑀯𑀸 𑀤𑀡𑁆𑀟𑀸𑀥𑀸𑀭𑀓𑁄 𑀯𑀸 𑀬𑀁𑀓𑀺𑀜𑁆𑀘𑀺 𑀧𑀢𑁆𑀢𑀝𑁆𑀞𑀧𑀦𑀓𑀁 𑀧𑀘𑁆𑀙𑀺𑀓𑀸𑀧𑀺 𑀳𑁄𑀢𑀼 𑀧𑀢𑁆𑀢𑀸𑀥𑀸𑀭𑀓𑁄 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀢𑁆𑀣 𑀞𑀧𑀺𑀢𑀧𑀢𑁆𑀢𑀲𑁆𑀲 𑀧𑀢𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑁄 𑀏𑀯 𑀞𑀸𑀦𑀁. 𑀢𑀢𑁆𑀣 𑀭𑀼𑀓𑁆𑀔𑀸𑀥𑀸𑀭𑀓𑁂 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺. 𑀢𑀢𑁆𑀣 𑀞𑀺𑀢𑀁 𑀧𑀢𑁆𑀢𑀁 𑀫𑀼𑀔𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀬𑀢𑁄 𑀓𑀼𑀢𑁄𑀘𑀺 𑀓𑀟𑁆𑀠𑀦𑁆𑀢𑁄 𑀏𑀓𑁂𑀦𑀦𑁆𑀢𑁂𑀦 𑀨𑀼𑀝𑁆𑀞𑁄𑀓𑀸𑀲𑀁 𑀅𑀧𑀭𑀦𑁆𑀢𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀉𑀤𑁆𑀥𑀁 𑀓𑁂𑀲𑀕𑁆𑀕𑀫𑀢𑁆𑀢𑀁 𑀉𑀓𑁆𑀔𑀺𑀧𑀢𑁄 𑀧𑀸𑀭𑀸𑀚𑀺𑀓𑀁. 𑀲𑀳𑀸𑀥𑀸𑀭𑀓𑁂𑀦 𑀳𑀭𑀦𑁆𑀢𑀲𑁆𑀲𑀸𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀯𑁂𑀳𑀸𑀲𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀉𑀤𑀓𑀝𑁆𑀞𑀓𑀣𑀸

𑁯𑁮. 𑀉𑀤𑀓𑀝𑁆𑀞𑁂 𑁋 𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻𑀢𑀺 𑀭𑀸𑀚𑀪𑀬𑀸𑀤𑀺𑀪𑀻𑀢𑁂𑀳𑀺 𑀉𑀤𑀓𑁂𑀦 𑀅𑀯𑀺𑀦𑀲𑁆𑀲𑀦𑀥𑀫𑁆𑀫𑁂𑀲𑀼 𑀢𑀫𑁆𑀩𑀮𑁄𑀳𑀪𑀸𑀚𑀦𑀸𑀤𑀻𑀲𑀼 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀅𑀲𑀦𑁆𑀤𑀦𑀓𑁂 𑀉𑀤𑀓𑁂 𑀦𑀺𑀓𑁆𑀔𑀺𑀢𑁆𑀢𑀁. 𑀢𑀲𑁆𑀲 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁄𑀬𑁂𑀯 𑀞𑀸𑀦𑀁, 𑀦 𑀲𑀩𑁆𑀩𑀁 𑀉𑀤𑀓𑀁. 𑀕𑀘𑁆𑀙𑀢𑀺 𑀯𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀅𑀕𑀫𑁆𑀪𑀻𑀭𑁂 𑀉𑀤𑀓𑁂 𑀧𑀤𑀲𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀤𑀯𑀸𑀭𑁂 𑀧𑀤𑀯𑀸𑀭𑁂 𑀤𑀼𑀓𑁆𑀓𑀝𑀁. 𑀕𑀫𑁆𑀪𑀻𑀭𑁂 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀧𑀬𑁄𑀕𑀁 𑀓𑀭𑁄𑀦𑁆𑀢𑀲𑁆𑀲 𑀳𑀢𑁆𑀣𑀯𑀸𑀭𑁂𑀳𑀺 𑀯𑀸 𑀧𑀤𑀯𑀸𑀭𑁂𑀳𑀺 𑀯𑀸 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀏𑀲𑁂𑀯 𑀦𑀬𑁄 𑀓𑀼𑀫𑁆𑀪𑀺𑀕𑀳𑀡𑀢𑁆𑀣𑀁 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑁂𑀲𑀼. 𑀲𑀘𑁂 𑀧𑀦 𑀅𑀦𑁆𑀢𑀭𑀸 𑀓𑀺𑀜𑁆𑀘𑀺 𑀉𑀤𑀓𑀲𑀧𑁆𑀧𑀁 𑀯𑀸 𑀯𑀸𑀴𑀫𑀘𑁆𑀙𑀁 𑀯𑀸 𑀤𑀺𑀲𑁆𑀯𑀸 𑀪𑀻𑀢𑁄 𑀧𑀮𑀸𑀬𑀢𑀺, 𑀅𑀦𑀸𑀧𑀢𑁆𑀢𑀺. 𑀆𑀫𑀲𑀦𑀸𑀤𑀻𑀲𑀼 𑀪𑀽𑀫𑀺𑀕𑀢𑀸𑀬 𑀓𑀼𑀫𑁆𑀪𑀺𑀬𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀪𑀽𑀫𑀺𑀁 𑀔𑀡𑀺𑀢𑁆𑀯𑀸 𑀓𑀟𑁆𑀠𑀢𑀺, 𑀇𑀥 𑀓𑀤𑁆𑀤𑀫𑁂 𑀑𑀲𑀸𑀭𑁂𑀢𑀺. 𑀏𑀯𑀁 𑀙𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺.

𑀉𑀧𑁆𑀧𑀮𑀸𑀤𑀻𑀲𑀼 𑀬𑀲𑁆𑀫𑀺𑀁 𑀧𑀼𑀧𑁆𑀨𑁂 𑀯𑀢𑁆𑀣𑀼𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀙𑀺𑀦𑁆𑀦𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀉𑀧𑁆𑀧𑀮𑀚𑀸𑀢𑀺𑀓𑀸𑀦𑀜𑁆𑀘𑁂𑀢𑁆𑀣 𑀬𑀸𑀯 𑀏𑀓𑀲𑁆𑀫𑀺𑀫𑁆𑀧𑀺 𑀧𑀲𑁆𑀲𑁂 𑀯𑀸𑀓𑁄 𑀦 𑀙𑀺𑀚𑁆𑀚𑀢𑀺, 𑀢𑀸𑀯 𑀭𑀓𑁆𑀔𑀢𑀺. 𑀧𑀤𑀼𑀫𑀚𑀸𑀢𑀺𑀓𑀸𑀦𑀁 𑀧𑀦 𑀤𑀡𑁆𑀟𑁂 𑀙𑀺𑀦𑁆𑀦𑁂 𑀅𑀩𑁆𑀪𑀦𑁆𑀢𑀭𑁂 𑀲𑀼𑀢𑁆𑀢𑀁 𑀅𑀘𑁆𑀙𑀺𑀦𑁆𑀦𑀫𑁆𑀧𑀺 𑀦 𑀭𑀓𑁆𑀔𑀢𑀺. 𑀲𑀸𑀫𑀺𑀓𑁂𑀳𑀺 𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑀸𑀦𑀺 𑀉𑀧𑁆𑀧𑀮𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀬𑀁 𑀯𑀢𑁆𑀣𑀼𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀉𑀤𑁆𑀥𑀝𑁂 𑀧𑀸𑀭𑀸𑀚𑀺𑀓𑀁. 𑀳𑀢𑁆𑀣𑀓𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀬𑀲𑁆𑀫𑀺𑀁 𑀳𑀢𑁆𑀣𑀓𑁂 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀉𑀤𑁆𑀥𑀝𑁂 𑀧𑀸𑀭𑀸𑀚𑀺𑀓𑀁. 𑀪𑀸𑀭𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀢𑀁 𑀪𑀸𑀭𑀁 𑀙𑀦𑁆𑀦𑀁 𑀆𑀓𑀸𑀭𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀞𑀸𑀦𑀸 𑀘𑀸𑀯𑁂𑀦𑁆𑀢𑀲𑁆𑀲 𑀪𑀽𑀫𑀝𑁆𑀞𑀓𑀼𑀫𑁆𑀪𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀸𑀚𑀺𑀓𑀁. 𑀤𑀻𑀖𑀦𑀸𑀴𑀸𑀦𑀺 𑀉𑀧𑁆𑀧𑀮𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀧𑀼𑀧𑁆𑀨𑁂𑀲𑀼 𑀯𑀸 𑀦𑀸𑀴𑁂𑀲𑀼 𑀯𑀸 𑀯𑁂𑀡𑀺𑀁 𑀓𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂 𑀭𑀚𑁆𑀚𑀼𑀓𑁂𑀲𑀼 𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀺 𑀯𑀸 𑀩𑀦𑁆𑀥𑀦𑁆𑀢𑀺 𑀯𑀸, 𑀢𑁂𑀲𑀁 𑀤𑀻𑀖𑀢𑁄 𑀧𑀼𑀧𑁆𑀨𑀕𑁆𑀕𑁂𑀦 𑀘 𑀦𑀸𑀴𑀦𑁆𑀢𑁂𑀦 𑀘 𑀢𑀺𑀭𑀺𑀬𑀁 𑀧𑀭𑀺𑀬𑀦𑁆𑀢𑁂𑀳𑀺 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁂𑀦 𑀉𑀤𑁆𑀥𑀁 𑀉𑀧𑀭𑀺 𑀞𑀺𑀢𑀲𑁆𑀲 𑀧𑀺𑀝𑁆𑀞𑀺𑀬𑀸𑀢𑀺 𑀙𑀳𑀸𑀓𑀸𑀭𑁂𑀳𑀺 𑀞𑀸𑀦𑀸 𑀘𑀸𑀯𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁄𑀧𑀺 𑀉𑀤𑀓𑀧𑀺𑀝𑁆𑀞𑀺𑀬𑀁 𑀞𑀧𑀺𑀢𑀧𑀼𑀧𑁆𑀨𑀓𑀮𑀸𑀧𑀁 𑀉𑀤𑀓𑀁 𑀘𑀸𑀮𑁂𑀢𑁆𑀯𑀸 𑀯𑀻𑀘𑀺𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀘𑀸𑀯𑁂𑀢𑀺, 𑀧𑀸𑀭𑀸𑀚𑀺𑀓𑀁. 𑀅𑀣 𑀧𑀦 𑀧𑀭𑀺𑀓𑀧𑁆𑀧𑁂𑀢𑀺 ‘‘𑀏𑀢𑁆𑀣 𑀕𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺, 𑀭𑀓𑁆𑀔𑀢𑀺 𑀢𑀸𑀯; 𑀕𑀢𑀝𑁆𑀞𑀸𑀦𑁂 𑀧𑀦 𑀉𑀤𑁆𑀥𑀭𑀢𑁄 𑀧𑀸𑀭𑀸𑀚𑀺𑀓𑀁. 𑀉𑀤𑀓𑀢𑁄 𑀅𑀘𑁆𑀘𑀼𑀕𑁆𑀕𑀢𑀲𑁆𑀲 𑀧𑀼𑀧𑁆𑀨𑀲𑁆𑀲 𑀲𑀓𑀮𑀫𑀼𑀤𑀓𑀁 𑀞𑀸𑀦𑀁, 𑀢𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀚𑀼𑀓𑀁 𑀉𑀤𑁆𑀥𑀭𑀦𑁆𑀢𑀲𑁆𑀲 𑀦𑀸𑀴𑀦𑁆𑀢𑁂 𑀓𑁂𑀲𑀕𑁆𑀕𑀫𑀢𑁆𑀢𑀁 𑀉𑀤𑀓𑀢𑁄 𑀅𑀢𑀺𑀓𑁆𑀓𑀦𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀼𑀧𑁆𑀨𑁂 𑀕𑀳𑁂𑀢𑁆𑀯𑀸 𑀅𑀧𑀦𑀸𑀫𑁂𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑁄 𑀉𑀧𑁆𑀧𑀸𑀝𑁂𑀢𑀺, 𑀦 𑀉𑀤𑀓𑀁 𑀞𑀸𑀦𑀁, 𑀉𑀧𑁆𑀧𑀸𑀝𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀓𑀮𑀸𑀧𑀩𑀤𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺 𑀉𑀤𑀓𑀝𑁆𑀞𑀸𑀦𑁂 𑀯𑀸 𑀭𑀼𑀓𑁆𑀔𑁂 𑀯𑀸 𑀕𑀘𑁆𑀙𑁂 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀩𑀦𑁆𑀥𑀦𑀁 𑀅𑀫𑁄𑀘𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀓𑀭𑁄𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁, 𑀩𑀦𑁆𑀥𑀦𑁂 𑀫𑀼𑀢𑁆𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀧𑀞𑀫𑀁 𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀧𑀘𑁆𑀙𑀸 𑀳𑀭𑀢𑀺, 𑀏𑀢𑁆𑀣 𑀙𑀳𑀸𑀓𑀸𑀭𑁂𑀳𑀺 𑀞𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀇𑀤𑀁 𑀉𑀪𑀬𑀁 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀧𑀤𑀼𑀫𑀺𑀦𑀺𑀬𑀁 𑀧𑀼𑀧𑁆𑀨𑀸𑀦𑀺 𑀲𑀳 𑀧𑀤𑀼𑀫𑀺𑀦𑀺𑀁𑀬𑀸 𑀕𑀡𑁆𑀳𑀺𑀢𑀼𑀓𑀸𑀫𑀲𑁆𑀲 𑀧𑀼𑀧𑁆𑀨𑀦𑀸𑀴𑁂𑀳𑀺 𑀘 𑀧𑀢𑁆𑀢𑀦𑀸𑀴𑁂𑀳𑀺 𑀘 𑀨𑀼𑀝𑁆𑀞𑀉𑀤𑀓𑀯𑀲𑁂𑀦 𑀉𑀤𑁆𑀥𑀜𑁆𑀘𑁂𑀯 𑀢𑀺𑀭𑀺𑀬𑀜𑁆𑀘 𑀞𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀧𑀦𑀲𑁆𑀲 𑀧𑀤𑀼𑀫𑀺𑀦𑀺𑀁 𑀅𑀦𑀼𑀧𑁆𑀧𑀸𑀝𑁂𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀸 𑀧𑀢𑁆𑀢𑀸𑀦𑀺 𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀆𑀓𑀟𑁆𑀠𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀉𑀧𑁆𑀧𑀸𑀝𑀺𑀢𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁.

𑀧𑀼𑀧𑁆𑀨𑀧𑀢𑁆𑀢𑀦𑀸𑀴𑁂 𑀞𑀸𑀦𑀢𑁄 𑀅𑀘𑀸𑀯𑁂𑀢𑁆𑀯𑀸𑀧𑀺 𑀧𑀞𑀫𑀁 𑀧𑀤𑀼𑀫𑀺𑀦𑀺𑀁 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁. 𑀧𑀘𑁆𑀙𑀸 𑀧𑀼𑀧𑁆𑀨𑀧𑀢𑁆𑀢𑀦𑀸𑀴𑁂𑀲𑀼 𑀞𑀸𑀦𑀸 𑀘𑀸𑀯𑀺𑀢𑁂𑀲𑀼 𑀧𑀸𑀭𑀸𑀚𑀺𑀓𑀁. 𑀉𑀧𑁆𑀧𑀸𑀝𑀺𑀢𑀸𑀬 𑀧𑀤𑀼𑀫𑀺𑀦𑀺𑀬𑀸 𑀧𑀼𑀧𑁆𑀨𑀁 𑀕𑀡𑁆𑀳𑀦𑁆𑀢𑁄 𑀧𑀦 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄. 𑀩𑀳𑀺 𑀞𑀧𑀺𑀢𑁂 𑀭𑀸𑀲𑀺𑀓𑀢𑀓𑀮𑀸𑀧𑀩𑀤𑁆𑀥𑀪𑀸𑀭𑀩𑀤𑁆𑀥𑀧𑀼𑀧𑁆𑀨𑁂𑀧𑀺 𑀏𑀲𑁂𑀯 𑀦𑀬𑁄. 𑀪𑀺𑀲𑀁 𑀯𑀸 𑀫𑀼𑀴𑀸𑀮𑀁 𑀯𑀸 𑀬𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀁 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀧𑀸𑀭𑀸𑀚𑀺𑀓𑀁. 𑀓𑀤𑁆𑀤𑀫𑁂 𑀨𑀼𑀝𑁆𑀞𑁄𑀓𑀸𑀲𑀯𑀲𑁂𑀦 𑀘𑁂𑀢𑁆𑀣 𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀉𑀧𑁆𑀧𑀸𑀝𑁂𑀦𑁆𑀢𑀲𑁆𑀲 𑀲𑀼𑀔𑀼𑀫𑀫𑁆𑀧𑀺 𑀫𑀽𑀮𑀁 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀺, 𑀭𑀓𑁆𑀔𑀢𑀺 𑀢𑀸𑀯. 𑀪𑀺𑀲𑀧𑀩𑁆𑀩𑁂 𑀚𑀸𑀢𑀁 𑀧𑀢𑁆𑀢𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀳𑁄𑀢𑀺, 𑀢𑀫𑁆𑀧𑀺 𑀭𑀓𑁆𑀔𑀢𑀻𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀪𑀺𑀲𑀕𑀡𑁆𑀞𑀺𑀫𑁆𑀳𑀺 𑀧𑀦 𑀓𑀡𑁆𑀝𑀓𑁄 𑀳𑁄𑀢𑀺 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸𑀦𑀁 𑀫𑀼𑀔𑀧𑀺𑀴𑀓𑀸 𑀯𑀺𑀬, 𑀅𑀬𑀁 𑀅𑀤𑀻𑀖𑀢𑁆𑀢𑀸 𑀦 𑀭𑀓𑁆𑀔𑀢𑀺. 𑀲𑁂𑀲𑀁 𑀉𑀧𑁆𑀧𑀮𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀘𑁆𑀙𑀓𑀘𑁆𑀙𑀧𑀸𑀦𑀁 𑀲𑀲𑁆𑀲𑀸𑀫𑀺𑀓𑀸𑀦𑀁 𑀯𑀸𑀧𑀺𑀆𑀤𑀻𑀲𑀼 𑀲𑀓𑀮𑀫𑀼𑀤𑀓𑀁 𑀞𑀸𑀦𑀁. 𑀢𑀲𑁆𑀫𑀸 𑀬𑁄 𑀧𑀝𑀺𑀚𑀕𑁆𑀕𑀦𑀝𑁆𑀞𑀸𑀦𑁂 𑀲𑀲𑁆𑀲𑀸𑀫𑀺𑀓𑀁 𑀫𑀘𑁆𑀙𑀁 𑀩𑀴𑀺𑀲𑁂𑀦 𑀯𑀸 𑀚𑀸𑀮𑁂𑀦 𑀯𑀸 𑀓𑀼𑀫𑀦𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀬𑁂𑀦 𑀫𑀘𑁆𑀙𑁂𑀦 𑀯𑀢𑁆𑀣𑀼 𑀧𑀽𑀭𑀢𑀺, 𑀢𑀲𑁆𑀫𑀺𑀁 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀉𑀤𑀓𑀢𑁄 𑀉𑀤𑁆𑀥𑀝𑀫𑀢𑁆𑀢𑁂 𑀧𑀸𑀭𑀸𑀚𑀺𑀓𑀁. 𑀓𑁄𑀘𑀺 𑀫𑀘𑁆𑀙𑁄 𑀕𑀬𑁆𑀳𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀥𑀸𑀯𑀢𑀺, 𑀆𑀓𑀸𑀲𑀁 𑀯𑀸 𑀉𑀧𑁆𑀧𑀢𑀢𑀺, 𑀢𑀻𑀭𑁂 𑀯𑀸 𑀧𑀢𑀢𑀺, 𑀆𑀓𑀸𑀲𑁂 𑀯𑀸 𑀞𑀺𑀢𑀁 𑀢𑀻𑀭𑁂 𑀯𑀸 𑀧𑀢𑀺𑀢𑀁 𑀕𑀡𑁆𑀳𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯. 𑀓𑀘𑁆𑀙𑀧𑀫𑁆𑀧𑀺 𑀩𑀳𑀺 𑀕𑁄𑀘𑀭𑀢𑁆𑀣𑀁 𑀕𑀢𑀁 𑀕𑀡𑁆𑀳𑀢𑁄 𑀏𑀲𑁂𑀯 𑀦𑀬𑁄. 𑀉𑀤𑀓𑀝𑁆𑀞𑀁 𑀧𑀦 𑀉𑀤𑀓𑀸 𑀫𑁄𑀘𑀬𑀢𑁄 𑀧𑀸𑀭𑀸𑀚𑀺𑀓𑀁.

𑀢𑁂𑀲𑀼 𑀢𑁂𑀲𑀼 𑀧𑀦 𑀚𑀦𑀧𑀤𑁂𑀲𑀼 𑀲𑀩𑁆𑀩𑀲𑀸𑀥𑀸𑀭𑀡𑀲𑁆𑀲 𑀫𑀳𑀸𑀢𑀴𑀸𑀓𑀲𑁆𑀲 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑀲𑀸𑀥𑀸𑀭𑀡𑀫𑁂𑀯 𑀓𑀼𑀦𑁆𑀦𑀤𑀻𑀲𑀤𑀺𑀲𑀁 𑀉𑀤𑀓𑀯𑀸𑀳𑀓𑀁 𑀔𑀡𑀦𑁆𑀢𑀺. 𑀢𑀢𑁄 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀬𑁄 𑀦𑀻𑀳𑀭𑀺𑀢𑁆𑀯𑀸 𑀫𑀸𑀢𑀺𑀓𑀸𑀓𑁄𑀝𑀺𑀬𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀴𑀜𑁆𑀚𑀦𑀢𑁆𑀣𑀸𑀬 𑀆𑀯𑀸𑀝𑁂 𑀔𑀡𑀦𑁆𑀢𑀺. 𑀢𑁂𑀲𑀁 𑀧𑀦 𑀬𑀤𑀸 𑀉𑀤𑀓𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀆𑀯𑀸𑀝𑁂 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀬𑁄 𑀉𑀤𑀓𑀯𑀸𑀳𑀓𑀜𑁆𑀘 𑀲𑁄𑀥𑁂𑀢𑁆𑀯𑀸 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑀁 𑀉𑀕𑁆𑀖𑀸𑀝𑁂𑀦𑁆𑀢𑀺. 𑀢𑀢𑁄 𑀉𑀤𑀓𑁂𑀦 𑀲𑀤𑁆𑀥𑀺𑀁 𑀫𑀘𑁆𑀙𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀆𑀯𑀸𑀝𑁂 𑀧𑀢𑁆𑀯𑀸 𑀯𑀲𑀦𑁆𑀢𑀺. 𑀢𑀢𑁆𑀣 𑀢𑀴𑀸𑀓𑁂 𑀘 𑀉𑀤𑀓𑀯𑀸𑀳𑀓𑁂𑀲𑀼 𑀘 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁂 𑀦 𑀯𑀸𑀭𑁂𑀦𑁆𑀢𑀺. 𑀔𑀼𑀤𑁆𑀤𑀓𑀸𑀲𑀼 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀸𑀢𑀺𑀓𑀸𑀲𑀼 𑀉𑀤𑀓𑀆𑀯𑀸𑀝𑁂𑀲𑀼 𑀘 𑀧𑀯𑀺𑀝𑁆𑀞𑀫𑀘𑁆𑀙𑁂 𑀕𑀡𑁆𑀳𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀯𑀸𑀭𑁂𑀦𑁆𑀢𑀺; 𑀢𑀢𑁆𑀣 𑀬𑁄 𑀢𑀴𑀸𑀓𑁂 𑀯𑀸 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑁂 𑀯𑀸 𑀉𑀤𑀓𑀯𑀸𑀳𑀓𑁂 𑀯𑀸 𑀫𑀘𑁆𑀙𑁂 𑀕𑀡𑁆𑀳𑀸𑀢𑀺, 𑀅𑀯𑀳𑀸𑀭𑁂𑀦 𑀲𑁄 𑀦 𑀓𑀸𑀭𑁂𑀢𑀩𑁆𑀩𑁄. 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀲𑀼 𑀧𑀦 𑀆𑀯𑀸𑀝𑁂𑀲𑀼 𑀯𑀸 𑀧𑀯𑀺𑀝𑁆𑀞𑀁 𑀕𑀡𑁆𑀳𑀦𑁆𑀢𑁄 𑀕𑀳𑀺𑀢𑀲𑁆𑀲 𑀅𑀕𑁆𑀖𑀯𑀲𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀢𑀢𑁄 𑀕𑀬𑁆𑀳𑀫𑀸𑀦𑁄 𑀫𑀘𑁆𑀙𑁄 𑀆𑀓𑀸𑀲𑁂 𑀯𑀸 𑀉𑀧𑁆𑀧𑀢𑀢𑀺, 𑀢𑀻𑀭𑁂 𑀯𑀸 𑀧𑀢𑀢𑀺, 𑀢𑀁 𑀆𑀓𑀸𑀲𑀝𑁆𑀞𑀁 𑀯𑀸 𑀢𑀻𑀭𑀝𑁆𑀞𑀁 𑀯𑀸 𑀉𑀤𑀓𑀯𑀺𑀦𑀺𑀫𑀼𑀢𑁆𑀢𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀝𑁆𑀞𑀸𑀦𑁂 𑀞𑀺𑀢𑀲𑁆𑀲𑁂𑀯 𑀢𑁂 𑀲𑀸𑀫𑀺𑀓𑀸. 𑀏𑀯𑀭𑀽𑀧𑀸 𑀳𑀺 𑀢𑀢𑁆𑀣 𑀓𑀢𑀺𑀓𑀸. 𑀓𑀘𑁆𑀙𑀧𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀘𑁂 𑀧𑀦 𑀫𑀘𑁆𑀙𑁄 𑀕𑀬𑁆𑀳𑀫𑀸𑀦𑁄 𑀆𑀯𑀸𑀝𑀢𑁄 𑀔𑀼𑀤𑁆𑀤𑀓𑀫𑀸𑀢𑀺𑀓𑀁 𑀆𑀭𑀼𑀳𑀢𑀺, 𑀢𑀢𑁆𑀣 𑀦𑀁 𑀕𑀡𑁆𑀳𑀢𑁄𑀧𑀺 𑀅𑀯𑀳𑀸𑀭𑁄𑀬𑁂𑀯. 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀢𑁄 𑀧𑀦 𑀉𑀤𑀓𑀯𑀸𑀳𑀓𑀁, 𑀢𑀢𑁄 𑀘 𑀢𑀴𑀸𑀓𑀁 𑀆𑀭𑀽𑀴𑁆𑀳𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀬𑁄 𑀆𑀯𑀸𑀝𑀢𑁄 𑀪𑀢𑁆𑀢𑀲𑀺𑀢𑁆𑀣𑁂𑀳𑀺 𑀧𑀮𑁄𑀪𑁂𑀢𑁆𑀯𑀸 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀅𑀯𑀳𑀸𑀭𑁄𑀯. 𑀢𑀢𑁄 𑀧𑀦 𑀧𑀮𑁄𑀪𑁂𑀢𑁆𑀯𑀸 𑀉𑀤𑀓𑀯𑀸𑀳𑀓𑀁 𑀆𑀭𑁄𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲 𑀅𑀯𑀳𑀸𑀭𑁄 𑀦𑀢𑁆𑀣𑀺. 𑀓𑁂𑀘𑀺 𑀧𑀦 𑀓𑀼𑀢𑁄𑀘𑀺𑀤𑁂𑀯 𑀲𑀩𑁆𑀩𑀲𑀸𑀥𑀸𑀭𑀡𑀝𑁆𑀞𑀸𑀦𑀢𑁄 𑀫𑀘𑁆𑀙𑁂 𑀆𑀦𑁂𑀢𑁆𑀯𑀸 𑀧𑀘𑁆𑀙𑀺𑀫𑀯𑀢𑁆𑀣𑀼𑀪𑀸𑀕𑁂 𑀉𑀤𑀓𑀸𑀯𑀸𑀝𑁂 𑀔𑀺𑀧𑀺𑀢𑁆𑀯𑀸 𑀧𑁄𑀲𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁆𑀯𑁂 𑀢𑀻𑀡𑀺 𑀉𑀢𑁆𑀢𑀭𑀺𑀪𑀗𑁆𑀕𑀢𑁆𑀣𑀸𑀬 𑀫𑀸𑀭𑁂𑀦𑁆𑀢𑀺. 𑀏𑀯𑀭𑀽𑀧𑀁 𑀫𑀘𑁆𑀙𑀁 𑀉𑀤𑀓𑁂 𑀯𑀸 𑀆𑀓𑀸𑀲𑁂 𑀯𑀸 𑀢𑀻𑀭𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀁 𑀕𑀡𑁆𑀳𑀢𑁄 𑀅𑀯𑀳𑀸𑀭𑁄 𑀏𑀯. 𑀓𑀘𑁆𑀙𑀧𑁂𑀧𑀺 𑀏𑀲𑁂𑀯 𑀦𑀬𑁄.