𑁧. 𑀧𑀞𑀫𑀧𑀸𑀭𑀸𑀚𑀺𑀓𑀁

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑁨𑁪. 𑀇𑀢𑁄 𑀧𑀭𑀁 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂𑀢𑀺𑀆𑀤𑀺 𑀬𑁂𑀪𑀼𑀬𑁆𑀬𑁂𑀦 𑀉𑀢𑁆𑀢𑀸𑀦𑀢𑁆𑀣𑀁. 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀁 𑀧𑀳𑀸𑀬 𑀬𑀢𑁆𑀣 𑀬𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀁 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀓𑀮𑀦𑁆𑀤𑀕𑀸𑀫𑁄𑀢𑀺 𑀓𑀮𑀦𑁆𑀤𑀓𑀸 𑀯𑀼𑀘𑁆𑀘𑀦𑁆𑀢𑀺 𑀓𑀸𑀴𑀓𑀸, 𑀢𑁂𑀲𑀁 𑀯𑀲𑁂𑀦 𑀮𑀤𑁆𑀥𑀦𑀸𑀫𑁄 𑀕𑀸𑀫𑁄. 𑀓𑀮𑀦𑁆𑀤𑀧𑀼𑀢𑁆𑀢𑁄𑀢𑀺 𑀕𑀸𑀫𑀯𑀲𑁂𑀦 𑀮𑀤𑁆𑀥𑀦𑀸𑀫𑀲𑁆𑀲 𑀭𑀸𑀚𑀲𑀫𑁆𑀫𑀢𑀲𑁆𑀲 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑀲𑁆𑀲 𑀓𑀮𑀦𑁆𑀤𑀲𑁂𑀝𑁆𑀞𑀺𑀦𑁄 𑀧𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑁂𑀧𑀺 𑀓𑀮𑀦𑁆𑀤𑀦𑀸𑀫𑀓𑀸 𑀫𑀦𑀼𑀲𑁆𑀲𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀓𑀮𑀦𑁆𑀤𑀧𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀧𑀼𑀦 𑀲𑁂𑀝𑁆𑀞𑀺𑀧𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀩𑀳𑀼𑀮𑁂𑀳𑀻𑀢𑀺 𑀩𑀳𑀼𑀓𑁂𑀳𑀺. 𑀲𑀳𑀸𑀬𑀓𑁂𑀳𑀻𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀲𑀳 𑀆𑀬𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀲𑀳𑀸𑀬𑀸, 𑀲𑀳𑀸𑀬𑀸 𑀏𑀯 𑀲𑀳𑀸𑀬𑀓𑀸, 𑀢𑁂𑀳𑀺 𑀲𑀳𑀸𑀬𑀓𑁂𑀳𑀺. 𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀓𑁂𑀦𑀘𑀺𑀤𑁂𑀯 𑀪𑀡𑁆𑀟𑀧𑁆𑀧𑀬𑁄𑀚𑀦𑀉𑀤𑁆𑀥𑀸𑀭𑀲𑀸𑀭𑀡𑀸𑀤𑀺𑀦𑀸 𑀓𑀺𑀘𑁆𑀘𑁂𑀦; 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀓𑀻𑀴𑀸𑀓𑀺𑀘𑁆𑀘𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀪𑀕𑀯𑀸 𑀳𑀺 𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑁂 𑀯𑁂𑀲𑀸𑀮𑀺𑀁 𑀲𑀫𑁆𑀧𑀸𑀧𑀼𑀡𑀺. 𑀓𑀢𑁆𑀢𑀺𑀓𑀦𑀓𑁆𑀔𑀢𑁆𑀢𑀓𑀻𑀴𑀸 𑀘𑁂𑀢𑁆𑀣 𑀉𑀴𑀸𑀭𑀸 𑀳𑁄𑀢𑀺. 𑀢𑀤𑀢𑁆𑀣𑀁 𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀤𑁆𑀤𑀲 𑀔𑁄𑀢𑀺 𑀓𑀣𑀁 𑀅𑀤𑁆𑀤𑀲? 𑀲𑁄 𑀓𑀺𑀭 𑀦𑀕𑀭𑀢𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑀁 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀳𑀢𑁆𑀣𑀁 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀯𑀦𑀢𑁆𑀣𑀜𑁆𑀘 𑀦𑀺𑀓𑁆𑀔𑀫𑀦𑁆𑀢𑀁 𑀫𑀳𑀸𑀚𑀦𑀁 𑀤𑀺𑀲𑁆𑀯𑀸 ‘‘𑀓𑁆𑀯 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀥𑀫𑁆𑀫𑀲𑀯𑀦𑀢𑁆𑀣𑀜𑁆𑀘𑀸’’𑀢𑀺. 𑀢𑁂𑀦 𑀳𑀺 ‘‘𑀅𑀳𑀫𑁆𑀧𑀺 𑀕𑀘𑁆𑀙𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀘𑀢𑀼𑀩𑁆𑀩𑀺𑀥𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲 𑀔𑁄…𑀧𑁂… 𑀤𑁂𑀲𑁂𑀦𑁆𑀢’’𑀦𑁆𑀢𑀺. 𑀤𑀺𑀲𑁆𑀯𑀸𑀦𑀲𑁆𑀲𑀸𑀢𑀺 𑀤𑀺𑀲𑁆𑀯𑀸𑀦 𑀅𑀲𑁆𑀲. 𑀏𑀢𑀤𑀳𑁄𑀲𑀻𑀢𑀺 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸𑀬 𑀘𑁄𑀤𑀺𑀬𑀫𑀸𑀦𑀲𑁆𑀲 𑀪𑀩𑁆𑀩𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀢𑀁 𑀅𑀳𑁄𑀲𑀺. 𑀓𑀺𑀁 𑀅𑀳𑁄𑀲𑀺? 𑀬𑀁𑀦𑀽𑀦𑀸𑀳𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀦𑁆𑀢𑀺. 𑀢𑀢𑁆𑀣 𑀬𑀦𑁆𑀦𑀽𑀦𑀸𑀢𑀺 𑀧𑀭𑀺𑀯𑀺𑀢𑀓𑁆𑀓𑀤𑀲𑁆𑀲𑀦𑀫𑁂𑀢𑀁. 𑀏𑀯𑀁 𑀓𑀺𑀭𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑁄 𑀉𑀧𑁆𑀧𑀦𑁆𑀦𑁄 ‘‘𑀬𑀫𑀬𑀁 𑀧𑀭𑀺𑀲𑀸 𑀏𑀓𑀕𑁆𑀕𑀘𑀺𑀢𑁆𑀢𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀳𑁄 𑀯𑀢𑀸𑀳𑀫𑁆𑀧𑀺 𑀢𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀬𑁂𑀦 𑀲𑀸 𑀧𑀭𑀺𑀲𑀸𑀢𑀺 𑀇𑀥 𑀓𑀲𑁆𑀫𑀸 ‘‘𑀬𑁂𑀦 𑀪𑀕𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀬𑁂𑀦 𑀲𑀸 𑀧𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂. 𑀪𑀕𑀯𑀦𑁆𑀢𑀜𑁆𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀉𑀴𑀸𑀭𑀼𑀴𑀸𑀭𑀚𑀦𑀸 𑀫𑀳𑀢𑀻 𑀧𑀭𑀺𑀲𑀸 𑀦𑀺𑀲𑀺𑀦𑁆𑀦𑀸, 𑀢𑀢𑁆𑀭 𑀦 𑀲𑀓𑁆𑀓𑀸 𑀇𑀫𑀺𑀦𑀸 𑀧𑀘𑁆𑀙𑀸 𑀆𑀕𑀢𑁂𑀦 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁. 𑀧𑀭𑀺𑀲𑀸𑀬 𑀧𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀲𑀓𑁆𑀓𑀸𑀢𑀺 𑀲𑁄 𑀢𑀁 𑀧𑀭𑀺𑀲𑀁𑀬𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀬𑁂𑀦 𑀲𑀸 𑀧𑀭𑀺𑀲𑀸’’𑀢𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀦 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀅𑀳𑁄𑀲𑀺, 𑀅𑀣 𑀔𑁄 𑀪𑀕𑀯𑀢𑁄 𑀲𑀺𑀢𑁆𑀢𑀬𑀽𑀧𑀲𑀁𑀳𑀺𑀢𑀁 𑀣𑁄𑀓𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸; 𑀢𑀁 𑀧𑀦𑀲𑁆𑀲 𑀬𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀻’’𑀢𑀺. 𑀓𑀺𑀁 𑀅𑀳𑁄𑀲𑀻𑀢𑀺? 𑀬𑀣𑀸 𑀬𑀣𑀸 𑀔𑁄𑀢𑀺𑀆𑀤𑀺.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀅𑀳𑀁 𑀔𑁄 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀢𑁂𑀦 𑀢𑁂𑀦 𑀫𑁂 𑀉𑀧𑀧𑀭𑀺𑀓𑁆𑀔𑀢𑁄 𑀏𑀯𑀁 𑀳𑁄𑀢𑀺 𑀬𑀤𑁂𑀢𑀁 𑀲𑀺𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀘𑀭𑀺𑀢𑀩𑁆𑀩𑀁, 𑀏𑀓𑀤𑀺𑀯𑀲𑀫𑁆𑀧𑀺 𑀘 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁. 𑀲𑀗𑁆𑀔𑀮𑀺𑀔𑀺𑀢𑀁 𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀘𑀭𑀺𑀢𑀩𑁆𑀩𑀁. 𑀇𑀤𑀁 𑀦 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑁂 𑀘 𑀫𑀲𑁆𑀲𑀼𑀜𑁆𑀘 𑀑𑀳𑀸𑀭𑁂𑀢𑁆𑀯𑀸 𑀓𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀤𑀳𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀅𑀕𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺; 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 ‘‘𑀅𑀦𑀕𑀸𑀭𑀺𑀬𑀸’’𑀢𑀺 𑀜𑀸𑀢𑀩𑁆𑀩𑀸. 𑀢𑀁 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁. 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀧𑀭𑀺𑀩𑁆𑀩𑀚𑁂𑀬𑁆𑀬𑀁.

𑁨𑁫. 𑀅𑀘𑀺𑀭𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑀼𑀤𑀺𑀦𑁆𑀦𑁄 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀦 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀓𑀲𑁆𑀫𑀸? 𑀢𑀢𑁆𑀭𑀲𑁆𑀲 𑀩𑀳𑀽 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀲𑀦𑁆𑀢𑀺, 𑀢𑁂 ‘‘‘𑀢𑁆𑀯𑀁 𑀫𑀸𑀢𑀸𑀧𑀺𑀢𑀽𑀦𑀁 𑀏𑀓𑀧𑀼𑀢𑁆𑀢𑀓𑁄, 𑀦 𑀮𑀩𑁆𑀪𑀸 𑀢𑀬𑀸 𑀧𑀩𑁆𑀩𑀚𑀺𑀢𑀼’𑀦𑁆𑀢𑀺 𑀩𑀸𑀳𑀸𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑁂𑀬𑁆𑀬𑀼𑀁, 𑀢𑀢𑁄 𑀧𑀩𑁆𑀩𑀚𑁆𑀚𑀸𑀬 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀳𑁂𑀯 𑀧𑀭𑀺𑀲𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀓𑁂𑀦𑀘𑀺 𑀲𑀭𑀻𑀭𑀓𑀺𑀘𑁆𑀘𑀮𑁂𑀲𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬…𑀧𑁂… 𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀕𑀯𑀸’’𑀢𑀺.

𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀭𑀸𑀳𑀼𑀮𑀓𑀼𑀫𑀸𑀭𑀲𑁆𑀲 𑀧𑀩𑁆𑀩𑀚𑀺𑀢𑀢𑁄 𑀧𑀪𑀼𑀢𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀧𑀼𑀢𑁆𑀢𑀁 𑀦 𑀧𑀩𑁆𑀩𑀸𑀚𑁂𑀢𑀺, 𑀢𑀲𑁆𑀫𑀸 𑀦𑀁 𑀧𑀼𑀘𑁆𑀙𑀺 𑁋 ‘‘𑀅𑀦𑀼𑀜𑁆𑀜𑀸𑀢𑁄𑀲𑀺 𑀧𑀦 𑀢𑁆𑀯𑀁 𑀲𑀼𑀤𑀺𑀦𑁆𑀦 𑀫𑀸𑀢𑀸𑀧𑀺𑀢𑀽𑀳𑀺…𑀧𑁂… 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑁨𑁬. 𑀇𑀢𑁄 𑀧𑀭𑀁 𑀧𑀸𑀞𑀸𑀦𑀼𑀲𑀸𑀭𑁂𑀦𑁂𑀯 𑀕𑀦𑁆𑀢𑁆𑀯𑀸 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸𑀢𑀺 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑁂𑀯 𑀢𑀁 𑀓𑀭𑀡𑀻𑀬𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺; 𑀦 𑀳𑀺 𑀧𑀩𑁆𑀩𑀚𑁆𑀚𑀸𑀬 𑀢𑀺𑀩𑁆𑀩𑀘𑁆𑀙𑀦𑁆𑀤𑀲𑁆𑀲 𑀪𑀡𑁆𑀟𑀧𑁆𑀧𑀬𑁄𑀚𑀦𑀉𑀤𑁆𑀥𑀸𑀭𑀲𑀸𑀭𑀡𑀸𑀤𑀻𑀲𑀼 𑀯𑀸 𑀦𑀓𑁆𑀔𑀢𑁆𑀢𑀓𑀻𑀴𑀸𑀬𑀁 𑀯𑀸 𑀘𑀺𑀢𑁆𑀢𑀁 𑀦𑀫𑀢𑀺. 𑀅𑀫𑁆𑀫 𑀢𑀸𑀢𑀸𑀢𑀺 𑀏𑀢𑁆𑀣 𑀧𑀦 𑀅𑀫𑁆𑀫𑀸𑀢𑀺 𑀫𑀸𑀢𑀭𑀁 𑀆𑀮𑀧𑀢𑀺; 𑀢𑀸𑀢𑀸𑀢𑀺 𑀧𑀺𑀢𑀭𑀁. 𑀢𑁆𑀯𑀁 𑀔𑁄𑀲𑀻𑀢𑀺 𑀢𑁆𑀯𑀁 𑀔𑁄 𑀅𑀲𑀺. 𑀏𑀓𑀧𑀼𑀢𑁆𑀢𑀓𑁄𑀢𑀺 𑀏𑀓𑁄𑀯 𑀧𑀼𑀢𑁆𑀢𑀓𑁄; 𑀅𑀜𑁆𑀜𑁄 𑀢𑁂 𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸 𑀦𑀢𑁆𑀣𑀺. 𑀏𑀢𑁆𑀣 𑀘 ‘‘𑀏𑀓𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀓𑀫𑁆𑀧𑀸𑀯𑀲𑁂𑀦 ‘‘𑀏𑀓𑀧𑀼𑀢𑁆𑀢𑀓𑁄’’𑀢𑀺 𑀯𑀼𑀢𑁆𑀢𑀁. 𑀧𑀺𑀬𑁄𑀢𑀺 𑀧𑀻𑀢𑀺𑀚𑀦𑀦𑀓𑁄. 𑀫𑀦𑀸𑀧𑁄𑀢𑀺 𑀫𑀦𑀯𑀟𑁆𑀠𑀦𑀓𑁄. 𑀲𑀼𑀔𑁂𑀥𑀺𑀢𑁄𑀢𑀺 𑀲𑀼𑀔𑁂𑀦 𑀏𑀥𑀺𑀢𑁄; 𑀲𑀼𑀔𑀲𑀁𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀧𑀭𑀺𑀳𑀢𑁄𑀢𑀺 𑀲𑀼𑀔𑁂𑀦 𑀧𑀭𑀺𑀳𑀢𑁄; 𑀚𑀸𑀢𑀓𑀸𑀮𑀢𑁄 𑀧𑀪𑀼𑀢𑀺 𑀥𑀸𑀢𑀻𑀳𑀺 𑀅𑀗𑁆𑀓𑀢𑁄 𑀅𑀗𑁆𑀓𑀁 𑀳𑀭𑀺𑀢𑁆𑀯𑀸 𑀥𑀸𑀭𑀺𑀬𑀫𑀸𑀦𑁄 𑀅𑀲𑁆𑀲𑀓𑀭𑀣𑀓𑀸𑀤𑀻𑀳𑀺 𑀩𑀸𑀮𑀓𑀻𑀴𑀦𑀓𑁂𑀳𑀺 𑀓𑀻𑀴𑀫𑀸𑀦𑁄 𑀲𑀸𑀤𑀼𑀭𑀲𑀪𑁄𑀚𑀦𑀁 𑀪𑁄𑀚𑀺𑀬𑀫𑀸𑀦𑁄 𑀲𑀼𑀔𑁂𑀦 𑀧𑀭𑀺𑀳𑀢𑁄.

𑀦 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀻𑀢𑀺 𑀢𑁆𑀯𑀁 𑀢𑀸𑀢 𑀲𑀼𑀤𑀺𑀦𑁆𑀦 𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀮𑀪𑀸𑀕𑀁 𑀤𑀼𑀓𑁆𑀔𑀲𑁆𑀲 𑀦 𑀚𑀸𑀦𑀸𑀲𑀺; 𑀅𑀣 𑀯𑀸 𑀓𑀺𑀜𑁆𑀘𑀺 𑀤𑀼𑀓𑁆𑀔𑁂𑀦 𑀦𑀸𑀦𑀼𑀪𑁄𑀲𑀻𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀦𑀼𑀪𑀯𑀦𑀢𑁆𑀣𑁂 𑀘 𑀚𑀸𑀦𑀦𑀸; 𑀅𑀣 𑀯𑀸 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀦𑀲𑁆𑀲𑀭𑀲𑀻𑀢𑀺 𑀅𑀢𑁆𑀣𑁄. 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀲𑀭𑀡𑀢𑁆𑀣𑁂 𑀘 𑀚𑀸𑀦𑀦𑀸. 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀧𑀼𑀭𑀺𑀫𑀧𑀤𑀲𑁆𑀲 𑀉𑀢𑁆𑀢𑀭𑀧𑀤𑁂𑀦 𑀲𑀫𑀸𑀦𑀯𑀺𑀪𑀢𑁆𑀢𑀺𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀲𑀩𑁆𑀩𑀁 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀜𑀸𑀢𑀩𑁆𑀩𑀁. 𑀫𑀭𑀡𑁂𑀦𑀧𑀺 𑀫𑀬𑀁 𑀢𑁂 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀘𑁂𑀧𑀺 𑀢𑀯 𑀅𑀫𑁆𑀳𑁂𑀲𑀼 𑀚𑀻𑀯𑀫𑀸𑀦𑁂𑀲𑀼 𑀫𑀭𑀡𑀁 𑀪𑀯𑁂𑀬𑁆𑀬, 𑀢𑁂𑀦 𑀢𑁂 𑀫𑀭𑀡𑁂𑀦𑀧𑀺 𑀫𑀬𑀁 𑀅𑀓𑀸𑀫𑀓𑀸 𑀅𑀦𑀺𑀘𑁆𑀙𑀓𑀸 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸, 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫; 𑀢𑀬𑀸 𑀯𑀺𑀬𑁄𑀕𑀁 𑀯𑀸 𑀧𑀸𑀧𑀼𑀡𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀫𑀬𑀁 𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀧𑀦 𑀓𑀺𑀁 𑀦𑀸𑀫 𑀢𑀁 𑀓𑀸𑀭𑀡𑀁 𑀬𑁂𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫; 𑀅𑀣 𑀯𑀸 𑀓𑀺𑀁 𑀧𑀦 𑀫𑀬𑀁 𑀢𑀦𑁆𑀢𑀺 𑀓𑁂𑀦 𑀧𑀦 𑀓𑀸𑀭𑀡𑁂𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁨𑁭. 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀦𑀁 𑀞𑀺𑀢𑀁 𑀫𑀸𑀢𑀸𑀧𑀺𑀢𑀭𑁄 𑀦𑀸𑀦𑀼𑀚𑀸𑀦𑀺𑀁𑀲𑀼, 𑀢𑀢𑁆𑀣𑁂𑀯 𑀞𑀸𑀦𑁂. 𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀓𑁂𑀦𑀘𑀺 𑀅𑀢𑁆𑀣𑀭𑀡𑁂𑀦 𑀅𑀦𑀢𑁆𑀣𑀢𑀸𑀬.

𑁨𑁮. 𑀧𑀭𑀺𑀘𑀸𑀭𑁂𑀳𑀻𑀢𑀺 𑀕𑀦𑁆𑀥𑀩𑁆𑀩𑀦𑀝𑀦𑀸𑀝𑀓𑀸𑀤𑀻𑀦𑀺 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀬𑀣𑀸𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀳𑀺 𑀲𑀜𑁆𑀘𑀸𑀭𑁂𑀳𑀺; 𑀇𑀢𑁄 𑀘𑀺𑀢𑁄 𑀘 𑀉𑀧𑀦𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀧𑀭𑀺𑀘𑀸𑀭𑁂𑀳𑀻𑀢𑀺 𑀕𑀦𑁆𑀥𑀩𑁆𑀩𑀦𑀝𑀦𑀸𑀝𑀓𑀸𑀤𑀻𑀦𑀺 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣 𑀲𑀳𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀮𑀴, 𑀉𑀧𑀮𑀴, 𑀭𑀫, 𑀓𑀻𑀴𑀲𑁆𑀲𑀽𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀪𑁄𑀕𑁂 𑀪𑀼𑀜𑁆𑀚𑀦𑁆𑀢𑁄. 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄𑀢𑀺 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀆𑀭𑀩𑁆𑀪 𑀤𑀸𑀦𑀧𑁆𑀧𑀤𑀸𑀦𑀸𑀤𑀻𑀦𑀺 𑀲𑀼𑀕𑀢𑀺𑀫𑀕𑁆𑀕𑀲𑁄𑀥𑀓𑀸𑀦𑀺 𑀓𑀼𑀲𑀮𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑁄. 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀓𑀣𑀸𑀦𑀼𑀧𑁆𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀦𑀢𑁆𑀣𑀁 𑀦𑀺𑀭𑀸𑀮𑀸𑀧𑀲𑀮𑁆𑀮𑀸𑀧𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀧𑀝𑀺𑀯𑀘𑀦𑀫𑁆𑀧𑀺 𑀅𑀮𑀪𑀫𑀸𑀦𑀸 𑀲𑀳𑀸𑀬𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀲 𑀯𑁄 𑀲𑀳𑀸𑀬𑀓𑁄 𑀧𑀩𑁆𑀩𑀚𑀺𑀢𑀼𑀓𑀸𑀫𑁄, 𑀦𑀺𑀯𑀸𑀭𑁂𑀣 𑀦’’𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀧𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀯𑁄𑀘𑀼𑀁, 𑀢𑁂𑀲𑀫𑁆𑀧𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸…𑀧𑁂… 𑀢𑀼𑀡𑁆𑀳𑀻 𑀅𑀳𑁄𑀲𑀻’’𑀢𑀺.

𑁨𑁯. 𑀅𑀣𑀲𑁆𑀲 𑀲𑀳𑀸𑀬𑀓𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀅𑀬𑀁 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑁄 𑀫𑀭𑀺𑀲𑁆𑀲𑀢𑀺 𑀦 𑀓𑁄𑀘𑀺 𑀕𑀼𑀡𑁄 𑀪𑀯𑀺𑀲𑁆𑀲𑀢𑀺. 𑀧𑀩𑁆𑀩𑀚𑀺𑀢𑀁 𑀧𑀦 𑀦𑀁 𑀫𑀸𑀢𑀸𑀧𑀺𑀢𑀭𑁄𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺. 𑀫𑀬𑀫𑁆𑀧𑀺 𑀧𑀲𑁆𑀲𑀺𑀲𑁆𑀲𑀸𑀫. 𑀧𑀩𑁆𑀩𑀚𑁆𑀚𑀸𑀧𑀺 𑀘 𑀦𑀸𑀫𑁂𑀲𑀸 𑀪𑀸𑀭𑀺𑀬𑀸, 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁. 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀢𑀺𑀤𑀼𑀓𑁆𑀓𑀭𑀁. 𑀅𑀬𑀜𑁆𑀘 𑀲𑀼𑀔𑀼𑀫𑀸𑀮𑁄 𑀦𑀸𑀕𑀭𑀺𑀓𑀚𑀸𑀢𑀺𑀬𑁄, 𑀲𑁄 𑀢𑀁 𑀘𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀼𑀦 𑀇𑀥𑁂𑀯 𑀆𑀕𑀫𑀺𑀲𑁆𑀲𑀢𑀺. 𑀳𑀦𑁆𑀤𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀫𑀸𑀢𑀸𑀧𑀺𑀢𑀭𑁄𑀧𑀺 𑀦𑀁 𑀅𑀦𑀼𑀚𑀸𑀦𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀬𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄…𑀧𑁂… 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑁩𑁦. 𑀳𑀝𑁆𑀞𑁄𑀢𑀺 𑀢𑀼𑀝𑁆𑀞𑁄. 𑀉𑀤𑀕𑁆𑀕𑁄𑀢𑀺 𑀧𑀻𑀢𑀺𑀯𑀲𑁂𑀦 𑀅𑀩𑁆𑀪𑀼𑀦𑁆𑀦𑀢𑀓𑀸𑀬𑀘𑀺𑀢𑁆𑀢𑁄. 𑀓𑀢𑀺𑀧𑀸𑀳𑀦𑁆𑀢𑀺 𑀓𑀢𑀺𑀧𑀬𑀸𑀦𑀺 𑀤𑀺𑀯𑀲𑀸𑀦𑀺. 𑀩𑀮𑀁 𑀕𑀸𑀳𑁂𑀢𑁆𑀯𑀸𑀢𑀺 𑀲𑀧𑁆𑀧𑀸𑀬𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀦𑁆𑀢𑁄, 𑀉𑀘𑁆𑀙𑀸𑀤𑀦𑀦𑁆𑀳𑀸𑀧𑀦𑀸𑀤𑀻𑀳𑀺 𑀘 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑁄, 𑀓𑀸𑀬𑀩𑀮𑀁 𑀚𑀦𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀯𑀦𑁆𑀤𑀺𑀢𑁆𑀯𑀸 𑀅𑀲𑁆𑀲𑀼𑀫𑀼𑀔𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺…𑀧𑁂… 𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀦𑁆𑀢𑁂 𑀪𑀕𑀯𑀸𑀢𑀺. 𑀪𑀕𑀯𑀸 𑀲𑀫𑀻𑀧𑁂 𑀞𑀺𑀢𑀁 𑀅𑀜𑁆𑀜𑀢𑀭𑀁 𑀧𑀺𑀡𑁆𑀟𑀘𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀪𑀺𑀓𑁆𑀔𑀼 𑀲𑀼𑀤𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀳𑀺 𑀘𑁂𑀯 𑀉𑀧𑀲𑀫𑁆𑀧𑀸𑀤𑁂𑀳𑀺 𑀘𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀚𑀺𑀦𑀤𑀢𑁆𑀢𑀺𑀬𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀮𑀤𑁆𑀥𑀸 𑀧𑀩𑁆𑀩𑀸𑀚𑁂𑀲𑀺 𑀘𑁂𑀯 𑀉𑀧𑀲𑀫𑁆𑀧𑀸𑀤𑁂𑀲𑀺 𑀘. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀮𑀢𑁆𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑀏𑀢𑁆𑀣 𑀧𑀦 𑀞𑀢𑁆𑀯𑀸 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀓𑀣𑀺𑀢𑀸. 𑀫𑀬𑀁 𑀧𑀦 𑀬𑀣𑀸𑀞𑀺𑀢𑀧𑀸𑀴𑀺𑀯𑀲𑁂𑀦𑁂𑀯 𑀔𑀦𑁆𑀥𑀓𑁂 𑀓𑀣𑀬𑀺𑀲𑁆𑀲𑀸𑀫. 𑀦 𑀓𑁂𑀯𑀮𑀜𑁆𑀘𑁂𑀢𑀁, 𑀅𑀜𑁆𑀜𑀫𑁆𑀧𑀺 𑀬𑀁 𑀔𑀦𑁆𑀥𑀓𑁂 𑀯𑀸 𑀧𑀭𑀺𑀯𑀸𑀭𑁂 𑀯𑀸 𑀓𑀣𑁂𑀢𑀩𑁆𑀩𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑀺𑀪𑀗𑁆𑀕𑁂𑀓𑀣𑀺𑀢𑀁, 𑀢𑀁 𑀲𑀩𑁆𑀩𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀓𑀣𑀬𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀓𑀣𑀺𑀬𑀫𑀸𑀦𑁂 𑀧𑀸𑀴𑀺𑀓𑁆𑀓𑀫𑁂𑀦𑁂𑀯 𑀯𑀡𑁆𑀡𑀦𑀸 𑀓𑀢𑀸 𑀳𑁄𑀢𑀺. 𑀢𑀢𑁄 𑀢𑁂𑀦 𑀢𑁂𑀦 𑀯𑀺𑀦𑀺𑀘𑁆𑀙𑀬𑁂𑀦 𑀅𑀢𑁆𑀣𑀺𑀓𑀸𑀦𑀁 𑀧𑀸𑀴𑀺𑀓𑁆𑀓𑀫𑁂𑀦𑁂𑀯 𑀇𑀫𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀁 𑀑𑀮𑁄𑀓𑁂𑀢𑁆𑀯𑀸 𑀲𑁄 𑀲𑁄 𑀯𑀺𑀦𑀺𑀘𑁆𑀙𑀬𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄𑀢𑀺 𑀅𑀘𑀺𑀭𑀁 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸; 𑀉𑀧𑀲𑀫𑁆𑀧𑀤𑀢𑁄 𑀦𑀘𑀺𑀭𑀓𑀸𑀮𑁂𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀭𑀽𑀧𑁂𑀢𑀺 𑀏𑀯𑀁𑀯𑀺𑀥𑁂 𑀏𑀯𑀁𑀚𑀸𑀢𑀺𑀓𑁂. 𑀥𑀼𑀢𑀕𑀼𑀡𑁂𑀢𑀺 𑀓𑀺𑀮𑁂𑀲𑀦𑀺𑀤𑁆𑀥𑀼𑀦𑀦𑀓𑁂 𑀕𑀼𑀡𑁂. 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻𑀢𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀯𑀢𑁆𑀢𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺. 𑀆𑀭𑀜𑁆𑀜𑀺𑀓𑁄 𑀳𑁄𑀢𑀻𑀢𑀺 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀭𑀜𑁆𑀜𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀅𑀭𑀜𑁆𑀜𑀯𑀸𑀲𑀺𑀓𑁄 𑀳𑁄𑀢𑀺. 𑀧𑀺𑀡𑁆𑀟𑀧𑀸𑀢𑀺𑀓𑁄𑀢𑀺 𑀅𑀢𑀺𑀭𑁂𑀓𑀮𑀸𑀪𑀧𑀝𑀺𑀓𑁆𑀔𑁂𑀧𑁂𑀦 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑁄𑀢𑀺. 𑀧𑀁𑀲𑀼𑀓𑀽𑀮𑀺𑀓𑁄𑀢𑀺 𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺. 𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀧𑀤𑀸𑀦𑀘𑀸𑀭𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀲𑀧𑀤𑀸𑀦𑀘𑀸𑀭𑀺𑀓𑁄 𑀳𑁄𑀢𑀺; 𑀖𑀭𑀧𑀝𑀺𑀧𑀸𑀝𑀺𑀬𑀸 𑀪𑀺𑀓𑁆𑀔𑀸𑀬 𑀧𑀯𑀺𑀲𑀢𑀺. 𑀯𑀚𑁆𑀚𑀺𑀕𑀸𑀫𑀦𑁆𑀢𑀺 𑀯𑀚𑁆𑀚𑀻𑀦𑀁 𑀕𑀸𑀫𑀁 𑀯𑀚𑁆𑀚𑀻𑀲𑀼 𑀯𑀸 𑀕𑀸𑀫𑀁.

𑀅𑀟𑁆𑀠𑀸 𑀫𑀳𑀤𑁆𑀥𑀦𑀸𑀢𑀺𑀆𑀤𑀻𑀲𑀼 𑀉𑀧𑀪𑁄𑀕𑀧𑀭𑀺𑀪𑁄𑀕𑀽𑀧𑀓𑀭𑀡𑀫𑀳𑀦𑁆𑀢𑀢𑀸𑀬 𑀅𑀟𑁆𑀠𑀸; 𑀬𑁂 𑀳𑀺 𑀢𑁂𑀲𑀁 𑀉𑀧𑀪𑁄𑀕𑀸 𑀬𑀸𑀦𑀺 𑀘 𑀉𑀧𑀪𑁄𑀕𑀽𑀧𑀓𑀭𑀡𑀸𑀦𑀺, 𑀢𑀸𑀦𑀺 𑀫𑀳𑀦𑁆𑀢𑀸𑀦𑀺 𑀩𑀳𑀼𑀮𑀸𑀦𑀺 𑀲𑀸𑀭𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀥𑁂𑀢𑁆𑀯𑀸 𑀞𑀧𑀺𑀢𑀥𑀦𑀫𑀳𑀦𑁆𑀢𑀢𑀸𑀬 𑀫𑀳𑀤𑁆𑀥𑀦𑀸. 𑀫𑀳𑀸𑀪𑁄𑀕𑀸𑀢𑀺 𑀤𑀺𑀯𑀲𑀧𑀭𑀺𑀩𑁆𑀩𑀬𑀲𑀗𑁆𑀔𑀸𑀢𑀪𑁄𑀕𑀫𑀳𑀦𑁆𑀢𑀢𑀸𑀬 𑀫𑀳𑀸𑀪𑁄𑀕𑀸. 𑀅𑀜𑁆𑀜𑁂𑀳𑀺 𑀉𑀧𑀪𑁄𑀕𑁂𑀳𑀺 𑀚𑀸𑀢𑀭𑀽𑀧𑀭𑀚𑀢𑀲𑁆𑀲𑁂𑀯 𑀧𑀳𑀽𑀢𑀢𑀸𑀬 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸. 𑀅𑀮𑀗𑁆𑀓𑀸𑀭𑀪𑀽𑀢𑀲𑁆𑀲 𑀯𑀺𑀢𑁆𑀢𑀽𑀧𑀓𑀭𑀡𑀲𑁆𑀲 𑀧𑀻𑀢𑀺𑀧𑀸𑀫𑁄𑀚𑁆𑀚𑀓𑀭𑀡𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸. 𑀯𑁄𑀳𑀸𑀭𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲 𑀥𑀦𑀥𑀜𑁆𑀜𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀥𑀦𑀥𑀜𑁆𑀜𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸𑀢𑀺 𑀲𑁂𑀦𑀸𑀲𑀦𑀁 𑀧𑀝𑀺𑀲𑀸𑀫𑁂𑀢𑁆𑀯𑀸; 𑀬𑀣𑀸 𑀦 𑀯𑀺𑀦𑀲𑁆𑀲𑀢𑀺 𑀢𑀣𑀸 𑀦𑀁 𑀲𑀼𑀝𑁆𑀞𑀼 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀝𑁆𑀞𑀺𑀫𑀢𑁆𑀢𑁂 𑀣𑀸𑀮𑀺𑀧𑀸𑀓𑁂𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄 𑀲𑀝𑁆𑀞𑀺𑀣𑀸𑀮𑀺𑀧𑀸𑀓𑁂. 𑀏𑀓𑀫𑁂𑀓𑁄 𑀘𑁂𑀢𑁆𑀣 𑀣𑀸𑀮𑀺𑀧𑀸𑀓𑁄 𑀤𑀲𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀙𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀪𑀢𑁆𑀢𑀁 𑀳𑁄𑀢𑀺. 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀽𑀢𑀺 𑀏𑀢𑁆𑀣 𑀅𑀪𑀺𑀳𑀭𑀻𑀬𑀢𑀻𑀢𑀺 𑀅𑀪𑀺𑀳𑀸𑀭𑁄. 𑀓𑀺𑀁 𑀅𑀪𑀺𑀳𑀭𑀻𑀬𑀢𑀺? 𑀪𑀢𑁆𑀢𑀁. 𑀪𑀢𑁆𑀢𑀫𑁂𑀯 𑀅𑀪𑀺𑀳𑀸𑀭𑁄 𑀪𑀢𑁆𑀢𑀸𑀪𑀺𑀳𑀸𑀭𑁄, 𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑀁. 𑀅𑀪𑀺𑀳𑀭𑀺𑀁𑀲𑀽𑀢𑀺 𑀅𑀪𑀺𑀫𑀼𑀔𑀸 𑀳𑀭𑀺𑀁𑀲𑀼. 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀳𑁂𑀢𑁆𑀯𑀸 𑀆𑀕𑀫𑀁𑀲𑀽𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 𑀓𑀺𑀁 𑀧𑀫𑀸𑀡𑀦𑁆𑀢𑀺? 𑀲𑀝𑁆𑀞𑀺 𑀣𑀸𑀮𑀺𑀧𑀸𑀓𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀝𑁆𑀞𑀺𑀫𑀢𑁆𑀢𑁂 𑀣𑀸𑀮𑀺𑀧𑀸𑀓𑁂 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀽’’𑀢𑀺. 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀲𑀬𑀁 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀢𑀸 𑀲𑀧𑀤𑀸𑀦𑀘𑀸𑀭𑀁 𑀘𑀭𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀢𑁆𑀯𑀸. 𑀅𑀬𑀁 𑀳𑀺 𑀆𑀬𑀲𑁆𑀫𑀸 ‘‘𑀪𑀺𑀓𑁆𑀔𑀽 𑀘 𑀮𑀸𑀪𑀁 𑀮𑀘𑁆𑀙𑀦𑁆𑀢𑀺 𑀅𑀳𑀜𑁆𑀘 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀤𑀢𑁆𑀣𑀫𑁂𑀯 𑀆𑀕𑀢𑁄. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀆𑀕𑀫𑀦𑀸𑀦𑀼𑀭𑀽𑀧𑀁 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀬𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑁩𑁧. 𑀜𑀸𑀢𑀺𑀤𑀸𑀲𑀻𑀢𑀺 𑀜𑀸𑀢𑀓𑀸𑀦𑀁 𑀤𑀸𑀲𑀻. 𑀆𑀪𑀺𑀤𑁄𑀲𑀺𑀓𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀁 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀁 𑀧𑀽𑀢𑀺𑀪𑀽𑀢𑀁. 𑀢𑀢𑁆𑀭𑀸𑀬𑀁 𑀧𑀤𑀢𑁆𑀣𑁄 𑁋 𑀧𑀽𑀢𑀺𑀪𑀸𑀯𑀤𑁄𑀲𑁂𑀦 𑀅𑀪𑀺𑀪𑀽𑀢𑁄𑀢𑀺 𑀅𑀪𑀺𑀤𑁄𑀲𑁄, 𑀅𑀪𑀺𑀤𑁄𑀲𑁄𑀯 𑀆𑀪𑀺𑀤𑁄𑀲𑀺𑀓𑁄, 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀲𑁆𑀲 𑀯𑀸 𑀦𑀸𑀫𑀲𑀜𑁆𑀜𑀸 𑀏𑀲𑀸, 𑀬𑀤𑀺𑀤𑀁 𑀆𑀪𑀺𑀤𑁄𑀲𑀺𑀓𑁄𑀢𑀺, 𑀢𑀁 𑀆𑀪𑀺𑀤𑁄𑀲𑀺𑀓𑀁. 𑀓𑀼𑀫𑁆𑀫𑀸𑀲𑀦𑁆𑀢𑀺 𑀬𑀯𑀓𑀼𑀫𑁆𑀫𑀸𑀲𑀁. 𑀙𑀟𑁆𑀟𑁂𑀢𑀼𑀓𑀸𑀫𑀸 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀸𑀦𑀫𑁆𑀧𑀺 𑀕𑁄𑀭𑀽𑀧𑀸𑀦𑀫𑁆𑀧𑀺 𑀅𑀧𑀭𑀺𑀪𑁄𑀕𑀸𑀭𑀳𑁄, 𑀢𑀲𑁆𑀫𑀸 𑀢𑀁 𑀓𑀘𑀯𑀭𑀁 𑀯𑀺𑀬 𑀩𑀳𑀺 𑀙𑀟𑁆𑀟𑁂𑀢𑀼𑀓𑀸𑀫𑀸 𑀳𑁄𑀢𑀺. 𑀲𑀘𑁂𑀢𑀦𑁆𑀢𑀺 𑀲𑀘𑁂 𑀏𑀢𑀁. 𑀪𑀕𑀺𑀦𑀻𑀢𑀺 𑀅𑀭𑀺𑀬𑀯𑁄𑀳𑀸𑀭𑁂𑀦 𑀜𑀸𑀢𑀺𑀤𑀸𑀲𑀺𑀁 𑀆𑀮𑀧𑀢𑀺. 𑀙𑀟𑁆𑀟𑀦𑀻𑀬𑀥𑀫𑁆𑀫𑀦𑁆𑀢𑀺 𑀙𑀟𑁆𑀟𑁂𑀢𑀩𑁆𑀩𑀲𑀪𑀸𑀯𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀪𑀕𑀺𑀦𑀺, 𑀏𑀢𑀁 𑀲𑀘𑁂 𑀩𑀳𑀺 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀁, 𑀢𑀁 𑀇𑀥 𑀫𑁂 𑀧𑀢𑁆𑀢𑁂 𑀆𑀓𑀺𑀭𑀸’’𑀢𑀺.

𑀓𑀺𑀁 𑀧𑀦 𑀏𑀯𑀁 𑀯𑀢𑁆𑀢𑀼𑀁 𑀮𑀩𑁆𑀪𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀯𑀸 𑀧𑀬𑀼𑀢𑁆𑀢𑀯𑀸𑀘𑀸 𑀯𑀸 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀢𑁆𑀢𑀸. 𑀬𑀜𑁆𑀳𑀺 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀦𑀺𑀲𑁆𑀲𑀝𑁆𑀞𑀧𑀭𑀺𑀕𑁆𑀕𑀳𑀁, 𑀬𑀢𑁆𑀣 𑀲𑀸𑀫𑀺𑀓𑀸 𑀅𑀦𑀸𑀮𑀬𑀸 𑀳𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 ‘‘𑀤𑁂𑀣 𑀆𑀳𑀭𑀣 𑀇𑀥 𑀆𑀓𑀺𑀭𑀣𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀣𑀸 𑀳𑀺 𑀅𑀕𑁆𑀕𑀅𑀭𑀺𑀬𑀯𑀁𑀲𑀺𑀓𑁄 𑀆𑀬𑀲𑁆𑀫𑀸 𑀭𑀝𑁆𑀞𑀧𑀸𑀮𑁄𑀧𑀺 ‘‘𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀓𑀼𑀫𑁆𑀫𑀸𑀲𑀁 𑀇𑀥 𑀫𑁂 𑀧𑀢𑁆𑀢𑁂 𑀆𑀓𑀺𑀭𑀸’’𑀢𑀺 (𑀫. 𑀦𑀺. 𑁨.𑁨𑁯𑁯) 𑀅𑀯𑀘. 𑀢𑀲𑁆𑀫𑀸 𑀬𑀁 𑀏𑀯𑀭𑀽𑀧𑀁 𑀙𑀟𑁆𑀟𑀦𑀻𑀬𑀥𑀫𑁆𑀫𑀁 𑀅𑀜𑁆𑀜𑀁 𑀯𑀸 𑀅𑀧𑀭𑀺𑀕𑁆𑀕𑀳𑀺𑀢𑀁 𑀯𑀦𑀫𑀽𑀮𑀨𑀮𑀪𑁂𑀲𑀚𑁆𑀚𑀸𑀤𑀺𑀓𑀁 𑀢𑀁 𑀲𑀩𑁆𑀩𑀁 𑀬𑀣𑀸𑀲𑀼𑀔𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁. 𑀳𑀢𑁆𑀣𑀸𑀦𑀦𑁆𑀢𑀺 𑀪𑀺𑀓𑁆𑀔𑀸𑀕𑁆𑀕𑀳𑀡𑀢𑁆𑀣𑀁 𑀧𑀢𑁆𑀢𑀁 𑀉𑀧𑀦𑀸𑀫𑀬𑀢𑁄 𑀫𑀡𑀺𑀩𑀦𑁆𑀥𑀢𑁄 𑀧𑀪𑀼𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀳𑀢𑁆𑀣𑀸𑀦𑀁. 𑀧𑀸𑀤𑀸𑀦𑀦𑁆𑀢𑀺 𑀦𑀺𑀯𑀸𑀲𑀦𑀦𑁆𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀸𑀤𑀸𑀦𑀁. 𑀲𑀭𑀲𑁆𑀲𑀸𑀢𑀺 ‘‘𑀲𑀘𑁂𑀢𑀁 𑀪𑀕𑀺𑀦𑀻’’𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑀬𑀢𑁄 𑀲𑀭𑀲𑁆𑀲 𑀘. 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀻𑀢𑀺 𑀕𑀺𑀳𑀺𑀓𑀸𑀮𑁂 𑀲𑀮𑁆𑀮𑀓𑁆𑀔𑀺𑀢𑀧𑀼𑀩𑁆𑀩𑀁 𑀆𑀓𑀸𑀭𑀁 𑀅𑀕𑁆𑀕𑀳𑁂𑀲𑀺 𑀲𑀜𑁆𑀚𑀸𑀦𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀲𑀼𑀤𑀺𑀦𑁆𑀦𑁄 𑀳𑀺 𑀪𑀕𑀯𑀢𑁄 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀧𑀩𑁆𑀩𑀚𑀺𑀢𑁄 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀜𑀸𑀢𑀺𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀲𑀬𑀁 𑀧𑀩𑁆𑀩𑀚𑁆𑀚𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸; 𑀢𑁂𑀦 𑀦𑀁 𑀲𑀸 𑀜𑀸𑀢𑀺𑀤𑀸𑀲𑀻 𑀤𑀺𑀲𑁆𑀯𑀸𑀯 𑀦 𑀲𑀜𑁆𑀚𑀸𑀦𑀺, 𑀦𑀺𑀫𑀺𑀢𑁆𑀢𑀁 𑀧𑀦 𑀅𑀕𑁆𑀕𑀳𑁂𑀲𑀻𑀢𑀺.

𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀭𑀁 𑀏𑀢𑀤𑀯𑁄𑀘𑀸𑀢𑀺 𑀅𑀢𑀺𑀕𑀭𑀼𑀦𑀸 𑀧𑀩𑁆𑀩𑀚𑁆𑀚𑀽𑀧𑀕𑀢𑁂𑀦 𑀲𑀸𑀫𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 ‘‘𑀢𑁆𑀯𑀁 𑀦𑀼 𑀔𑁄 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀤𑀺𑀦𑁆𑀦𑁄’’𑀢𑀺𑀆𑀤𑀺𑀯𑀘𑀦𑀁 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀯𑁂𑀕𑁂𑀦 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀭𑀁 𑀏𑀢𑀁 𑀅𑀯𑁄𑀘. 𑀬𑀕𑁆𑀖𑁂𑀢𑀺 𑀆𑀭𑁄𑀘𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀘𑁂 𑀚𑁂 𑀲𑀘𑁆𑀘𑀦𑁆𑀢𑀺 𑀏𑀢𑁆𑀣 𑀚𑁂𑀢𑀺 𑀆𑀮𑀧𑀦𑁂 𑀦𑀺𑀧𑀸𑀢𑁄. 𑀏𑀯𑀜𑁆𑀳𑀺 𑀢𑀲𑁆𑀫𑀺𑀁 𑀤𑁂𑀲𑁂 𑀤𑀸𑀲𑀺𑀚𑀦𑀁 𑀆𑀮𑀧𑀦𑁆𑀢𑀺, 𑀢𑀲𑁆𑀫𑀸 ‘‘𑀢𑁆𑀯𑀁, 𑀪𑁄𑀢𑀺 𑀤𑀸𑀲𑀺, 𑀲𑀘𑁂 𑀲𑀘𑁆𑀘𑀁 𑀪𑀡𑀲𑀻’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁩𑁨. 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀦𑁆𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀤𑁂𑀲𑁂 𑀤𑀸𑀦𑀧𑀢𑀻𑀦𑀁 𑀖𑀭𑁂𑀲𑀼 𑀲𑀸𑀮𑀸 𑀳𑁄𑀦𑁆𑀢𑀺, 𑀆𑀲𑀦𑀸𑀦𑀺 𑀘𑁂𑀢𑁆𑀣 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀧𑀝𑁆𑀞𑀸𑀧𑀺𑀢𑀁 𑀉𑀤𑀓𑀓𑀜𑁆𑀚𑀺𑀬𑀁; 𑀢𑀢𑁆𑀣 𑀧𑀩𑁆𑀩𑀚𑀺𑀢𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀲𑀘𑁂 𑀇𑀘𑁆𑀙𑀦𑁆𑀢𑀺, 𑀤𑀸𑀦𑀧𑀢𑀻𑀦𑀫𑁆𑀧𑀺 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀫𑁆𑀧𑀺 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀈𑀤𑀺𑀲𑀸𑀬 𑀲𑀸𑀮𑀸𑀬 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀧𑀩𑁆𑀩𑀚𑀺𑀢𑀸 𑀓𑀧𑀡𑀫𑀦𑀼𑀲𑁆𑀲𑀸 𑀯𑀺𑀬 𑀅𑀲𑀸𑀭𑀼𑀧𑁆𑀧𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻𑀢𑀺.

𑀅𑀢𑁆𑀣𑀺 𑀦𑀸𑀫 𑀢𑀸𑀢𑀸𑀢𑀺 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀫𑀸𑀦𑀢𑁆𑀣𑁂; 𑀦𑀸𑀫𑀸𑀢𑀺 𑀧𑀼𑀘𑁆𑀙𑀦𑀢𑁆𑀣𑁂 𑀫𑀜𑁆𑀜𑀦𑀢𑁆𑀣𑁂 𑀘 𑀦𑀺𑀧𑀸𑀢𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀥𑀦𑀁, 𑀦 𑀫𑀬𑀁 𑀦𑀺𑀤𑁆𑀥𑀦𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀬𑁂𑀲𑀁 𑀦𑁄 𑀢𑁆𑀯𑀁 𑀈𑀤𑀺𑀲𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺’’; 𑀢𑀣𑀸 ‘‘𑀅𑀢𑁆𑀣𑀺 𑀦𑀼 𑀔𑁄, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁, 𑀦 𑀫𑀬𑀁 𑀫𑀢𑀸𑀢𑀺 𑀯𑀢𑁆𑀢𑀩𑁆𑀩𑀸, 𑀬𑁂𑀲𑀁 𑀦𑁄 𑀢𑁆𑀯𑀁 𑀈𑀤𑀺𑀲𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺’’; 𑀢𑀣𑀸 ‘‘𑀅𑀢𑁆𑀣𑀺 𑀫𑀜𑁆𑀜𑁂, 𑀢𑀸𑀢 𑀲𑀼𑀤𑀺𑀦𑁆𑀦, 𑀢𑀯 𑀅𑀩𑁆𑀪𑀦𑁆𑀢𑀭𑁂 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀧𑀝𑀺𑀮𑀤𑁆𑀥𑁄 𑀲𑀫𑀡𑀕𑀼𑀡𑁄, 𑀬𑀁 𑀢𑁆𑀯𑀁 𑀲𑀼𑀪𑁄𑀚𑀦𑀭𑀲𑀲𑀁𑀯𑀟𑁆𑀠𑀺𑀢𑁄𑀧𑀺 𑀇𑀫𑀁 𑀚𑀺𑀕𑀼𑀘𑁆𑀙𑀦𑁂𑀬𑁆𑀬𑀁 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀅𑀫𑀢𑀫𑀺𑀯 𑀦𑀺𑀩𑁆𑀩𑀺𑀓𑀸𑀭𑁄 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺.

𑀲𑁄 𑀧𑀦 𑀕𑀳𑀧𑀢𑀺 𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑀢𑀸𑀬 𑀏𑀢𑀫𑀢𑁆𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑁄 ‘‘𑀅𑀢𑁆𑀣𑀺 𑀦𑀸𑀫, 𑀢𑀸𑀢 𑀲𑀼𑀤𑀺𑀦𑁆𑀦, 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀅𑀯𑁄𑀘. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦𑁂𑀢𑁆𑀣 𑀇𑀫𑀁 𑀮𑀓𑁆𑀔𑀡𑀁 𑀯𑀤𑀦𑁆𑀢𑀺 𑁋 𑀅𑀦𑁄𑀓𑀧𑁆𑀧𑀦𑀸𑀫𑀭𑀺𑀲𑀦𑀢𑁆𑀣𑀯𑀲𑁂𑀦 𑀏𑀢𑀁 𑀅𑀢𑁆𑀣𑀺𑀦𑀸𑀫𑀲𑀤𑁆𑀤𑁂 𑀉𑀧𑀧𑀤𑁂 ‘‘𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀻’’𑀢𑀺 𑀅𑀦𑀸𑀕𑀢𑀯𑀘𑀦𑀁 𑀓𑀢𑀁. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀅𑀢𑁆𑀣𑀺 𑀦𑀸𑀫…𑀧𑁂… 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺, 𑀇𑀤𑀁 𑀧𑀘𑁆𑀘𑀓𑁆𑀔𑀫𑁆𑀧𑀺 𑀅𑀳𑀁 𑀦 𑀲𑀤𑁆𑀤𑀳𑀸𑀫𑀺 𑀦 𑀫𑀭𑀺𑀲𑀬𑀸𑀫𑀻𑀢𑀺. 𑀢𑀢𑀸𑀬𑀁 𑀆𑀪𑀺𑀤𑁄𑀲𑀺𑀓𑁄𑀢𑀺 𑀢𑀢𑁄 𑀢𑀯 𑀕𑁂𑀳𑀢𑁄 𑀅𑀬𑀁 𑀆𑀪𑀺𑀤𑁄𑀲𑀺𑀓𑁄 𑀓𑀼𑀫𑁆𑀫𑀸𑀲𑁄 𑀮𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀢𑀢𑁄𑀬𑀦𑁆𑀢𑀺𑀧𑀺 𑀧𑀸𑀞𑁄. 𑀢𑀤𑀸𑀬𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀬𑁂𑀦 𑀲𑀓𑀧𑀺𑀢𑀼 𑀦𑀺𑀯𑁂𑀲𑀦𑀦𑁆𑀢𑀺 𑀬𑁂𑀦 𑀲𑀓𑀲𑁆𑀲 𑀧𑀺𑀢𑀼 𑀅𑀢𑁆𑀢𑀦𑁄 𑀧𑀺𑀢𑀼 𑀦𑀺𑀯𑁂𑀲𑀦𑀦𑁆𑀢𑀺 𑀅𑀢𑁆𑀣𑁄; 𑀣𑁂𑀭𑁄 𑀧𑀺𑀢𑀭𑀺 𑀧𑁂𑀫𑁂𑀦𑁂𑀯 𑀲𑀼𑀩𑁆𑀩𑀘𑁄 𑀳𑀼𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀥𑀺𑀯𑀸𑀲𑁂𑀲𑀻𑀢𑀺 𑀣𑁂𑀭𑁄 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑁄𑀧𑀺 𑀲𑀫𑀸𑀦𑁄 ‘‘𑀲𑀘𑁂 𑀏𑀓𑀪𑀢𑁆𑀢𑀫𑁆𑀧𑀺 𑀦 𑀕𑀳𑁂𑀲𑁆𑀲𑀸𑀫𑀺, 𑀅𑀢𑀺𑀯𑀺𑀬 𑀦𑁂𑀲𑀁 𑀤𑁄𑀫𑀦𑀲𑁆𑀲𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀸𑀢𑀻𑀦𑀁 𑀅𑀦𑀼𑀓𑀫𑁆𑀧𑀸𑀬 𑀅𑀥𑀺𑀯𑀸𑀲𑁂𑀲𑀺.

𑁩𑁩. 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸𑀢𑀺 𑀉𑀧𑀮𑀺𑀫𑁆𑀧𑀸𑀧𑁂𑀢𑁆𑀯𑀸. 𑀏𑀓𑀁 𑀳𑀺𑀭𑀜𑁆𑀜𑀲𑁆𑀲𑀸𑀢𑀺 𑀏𑀢𑁆𑀣 𑀳𑀺𑀭𑀜𑁆𑀜𑀦𑁆𑀢𑀺 𑀓𑀳𑀸𑀧𑀡𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀲𑁄𑀢𑀺 𑀦𑀸𑀢𑀺𑀤𑀻𑀖𑁄 𑀦𑀸𑀢𑀺𑀭𑀲𑁆𑀲𑁄 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀭𑁄𑀓𑀭𑀡𑀻𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀁; 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀺𑀭𑁄 𑀓𑀭𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀢𑀺𑀭𑁄𑀓𑀭𑀡𑀻𑀬𑀁, 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸; 𑀲𑀫𑀦𑁆𑀢𑀢𑁄 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀻𑀢𑀺 𑀬𑀲𑁆𑀫𑀸 𑀅𑀚𑁆𑀚 𑀲𑀼𑀤𑀺𑀦𑁆𑀦𑁄 𑀆𑀕𑀫𑀺𑀲𑁆𑀲𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀳𑀺 𑀇𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄. 𑀢𑁂𑀦𑀸𑀢𑀺 𑀅𑀬𑀫𑁆𑀧𑀺 𑀯𑀸 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄𑀬𑁂𑀯.

𑁩𑁪. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀓𑀸𑀮𑀸𑀭𑁄𑀘𑀦𑀁 𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀆𑀭𑁄𑀘𑀺𑀢𑁂𑀬𑁂𑀯 𑀓𑀸𑀮𑁂 𑀅𑀕𑀫𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀢𑁂 𑀢𑀸𑀢𑀸𑀢𑀺 𑀤𑁆𑀯𑁂 𑀧𑀼𑀜𑁆𑀚𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀫𑀸𑀢𑀽𑀢𑀺 𑀚𑀦𑁂𑀢𑁆𑀢𑀺𑀬𑀸. 𑀫𑀢𑁆𑀢𑀺𑀓𑀦𑁆𑀢𑀺 𑀫𑀸𑀢𑀺𑀢𑁄 𑀆𑀕𑀢𑀁; 𑀇𑀤𑀁 𑀢𑁂 𑀫𑀸𑀢𑀸𑀫𑀳𑀺𑀬𑀸 𑀫𑀸𑀢𑀼 𑀇𑀫𑀁 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑀺𑀬𑀸 𑀤𑀺𑀦𑁆𑀦𑀥𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀦𑁆𑀢𑀺 𑀳𑀻𑀴𑁂𑀦𑁆𑀢𑁄 𑀆𑀳. 𑀇𑀢𑁆𑀣𑀺𑀓𑀸𑀬 𑀦𑀸𑀫 𑀇𑀢𑁆𑀣𑀺𑀧𑀭𑀺𑀪𑁄𑀕𑀸𑀦𑀁𑀬𑁂𑀯 𑀦𑁆𑀳𑀸𑀦𑀘𑀼𑀡𑁆𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀮𑀤𑁆𑀥𑀁 𑀥𑀦𑀁 𑀓𑀺𑀢𑁆𑀢𑀓𑀁 𑀪𑀯𑁂𑀬𑁆𑀬. 𑀢𑀲𑁆𑀲𑀸𑀧𑀺 𑀢𑀸𑀯 𑀧𑀭𑀺𑀫𑀸𑀡𑀁 𑀧𑀲𑁆𑀲. 𑀅𑀣 𑀯𑀸 𑀇𑀤𑀁 𑀢𑁂 𑀢𑀸𑀢 𑀲𑀼𑀤𑀺𑀦𑁆𑀦 𑀫𑀸𑀢𑀼 𑀥𑀦𑀁, 𑀢𑀜𑁆𑀘 𑀔𑁄 𑀫𑀢𑁆𑀢𑀺𑀓𑀁, 𑀦 𑀫𑀬𑀸 𑀤𑀺𑀦𑁆𑀦𑀁, 𑀢𑀯 𑀫𑀸𑀢𑀼𑀬𑁂𑀯 𑀲𑀦𑁆𑀢𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀦𑁂𑀢𑀁 𑀦 𑀓𑀲𑀺𑀬𑀸 𑀦 𑀯𑀡𑀺𑀚𑁆𑀚𑀸𑀬 𑀲𑀫𑁆𑀪𑀽𑀢𑀁, 𑀅𑀧𑀺𑀘 𑀔𑁄 𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀁. 𑀬𑀁 𑀇𑀢𑁆𑀣𑀺𑀓𑀸𑀬 𑀜𑀸𑀢𑀺𑀓𑀼𑀮𑀢𑁄 𑀲𑀸𑀫𑀺𑀓𑀓𑀼𑀮𑀁 𑀕𑀘𑁆𑀙𑀦𑁆𑀢𑀺𑀬𑀸 𑀮𑀤𑁆𑀥𑀩𑁆𑀩𑀁 𑀦𑁆𑀳𑀸𑀦𑀘𑀼𑀡𑁆𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀇𑀢𑁆𑀣𑀺𑀥𑀦𑀁, 𑀢𑀁 𑀢𑀸𑀯 𑀏𑀢𑁆𑀢𑀓𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀜𑁆𑀜𑀁 𑀧𑁂𑀢𑁆𑀢𑀺𑀓𑀁 𑀅𑀜𑁆𑀜𑀁 𑀧𑀺𑀢𑀸𑀫𑀳𑀦𑁆𑀢𑀺 𑀬𑀁 𑀧𑀦 𑀢𑁂 𑀧𑀺𑀢𑀼 𑀘 𑀧𑀺𑀢𑀸𑀫𑀳𑀸𑀦𑀜𑁆𑀘 𑀲𑀦𑁆𑀢𑀓𑀁, 𑀢𑀁 𑀅𑀜𑁆𑀜𑀁𑀬𑁂𑀯. 𑀦𑀺𑀳𑀺𑀢𑀜𑁆𑀘 𑀧𑀬𑀼𑀢𑁆𑀢𑀜𑁆𑀘 𑀅𑀢𑀺𑀯𑀺𑀬 𑀩𑀳𑀼; 𑀏𑀢𑁆𑀣 𑀘 𑀧𑀺𑀢𑀸𑀫𑀳𑀦𑁆𑀢𑀺 𑀢𑀤𑁆𑀥𑀺𑀢𑀮𑁄𑀧𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀧𑁂𑀢𑀸𑀫𑀳𑀦𑁆𑀢𑀺 𑀯𑀸 𑀧𑀸𑀞𑁄. 𑀮𑀩𑁆𑀪𑀸 𑀢𑀸𑀢 𑀲𑀼𑀤𑀺𑀦𑁆𑀦 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸𑀢𑀺 𑀢𑀸𑀢, 𑀲𑀼𑀤𑀺𑀦𑁆𑀦, 𑀉𑀢𑁆𑀢𑀫𑀁 𑀅𑀭𑀺𑀬𑀤𑁆𑀥𑀚𑀁 𑀧𑀩𑁆𑀩𑀚𑀺𑀢𑀮𑀺𑀗𑁆𑀕𑀁 𑀧𑀳𑀸𑀬 𑀳𑀻𑀦𑀸𑀬 𑀕𑀺𑀳𑀺𑀪𑀸𑀯𑀸𑀬 𑀆𑀯𑀢𑁆𑀢𑀺𑀢𑁆𑀯𑀸 𑀮𑀩𑁆𑀪𑀸 𑀪𑁄𑀕𑀸 𑀪𑀼𑀜𑁆𑀚𑀺𑀢𑀼𑀁, 𑀦𑀸𑀮𑀩𑁆𑀪𑀸 𑀪𑀼𑀜𑁆𑀚𑀺𑀢𑀼𑀁, 𑀦 𑀢𑁆𑀯𑀁 𑀭𑀸𑀚𑀪𑀻𑀢𑁄 𑀧𑀩𑁆𑀩𑀚𑀺𑀢𑁄, 𑀦 𑀇𑀡𑀸𑀬𑀺𑀓𑁂𑀳𑀺 𑀧𑀮𑀺𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀢𑀺. 𑀢𑀸𑀢 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀏𑀢𑁆𑀣 𑀧𑀦 𑀢𑀸𑀢𑀸𑀢𑀺 𑀯𑀘𑀦𑀁 𑀕𑁂𑀳𑀲𑀺𑀢𑀧𑁂𑀫𑁂𑀦 𑀆𑀳, 𑀦 𑀲𑀫𑀡𑀢𑁂𑀚𑁂𑀦. 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀦 𑀲𑀓𑁆𑀓𑁄𑀫𑀺. 𑀦 𑀯𑀺𑀲𑀳𑀸𑀫𑀻𑀢𑀺 𑀦𑀧𑁆𑀧𑀳𑁄𑀫𑀺, 𑀦 𑀲𑀫𑀢𑁆𑀣𑁄𑀫𑁆𑀳𑀺.

‘‘𑀯𑀤𑁂𑀬𑁆𑀬𑀸𑀫 𑀔𑁄 𑀢𑀁 𑀕𑀳𑀧𑀢𑀻’’𑀢𑀺 𑀇𑀤𑀁 𑀧𑀦 𑀯𑀘𑀦𑀁 𑀲𑀫𑀡𑀢𑁂𑀚𑁂𑀦𑀸𑀳. 𑀦𑀸𑀢𑀺𑀓𑀟𑁆𑀠𑁂𑀬𑁆𑀬𑀸𑀲𑀻𑀢𑀺 𑀬𑀁 𑀢𑁂 𑀫𑀬𑀺 𑀧𑁂𑀫𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀁 𑀓𑁄𑀥𑀯𑀲𑁂𑀦 𑀦 𑀅𑀢𑀺𑀓𑀟𑁆𑀠𑁂𑀬𑁆𑀬𑀸𑀲𑀺; 𑀲𑀘𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀲𑁂𑀝𑁆𑀞𑀺 ‘‘𑀧𑀼𑀢𑁆𑀢𑁄 𑀫𑁂 𑀲𑀗𑁆𑀕𑀳𑀁 𑀫𑀜𑁆𑀜𑁂 𑀓𑀢𑁆𑀢𑀼𑀓𑀸𑀫𑁄’’𑀢𑀺 𑀉𑀤𑀕𑁆𑀕𑀘𑀺𑀢𑁆𑀢𑁄 𑀆𑀳 𑁋 ‘‘𑀯𑀤𑁂𑀳𑀺 𑀢𑀸𑀢 𑀲𑀼𑀤𑀺𑀦𑁆𑀦𑀸’’𑀢𑀺. 𑀢𑁂𑀦𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀯𑀺𑀪𑀢𑁆𑀢𑀺𑀧𑀢𑀺𑀭𑀽𑀧𑀓𑁄 𑀦𑀺𑀧𑀸𑀢𑁄. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀢𑀁𑀦𑀺𑀤𑀸𑀦𑀁 𑀢𑀁𑀳𑁂𑀢𑀼𑀓𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀢𑁄-𑀆𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄; 𑀲𑀫𑀸𑀲𑁂 𑀘𑀲𑁆𑀲 𑀮𑁄𑀧𑀸𑀪𑀸𑀯𑁄. 𑀪𑀬𑀁 𑀯𑀸𑀢𑀺 ‘‘𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀭𑀸𑀚𑀸𑀤𑀺𑀪𑀬𑀁; 𑀘𑀺𑀢𑁆𑀢𑀼𑀢𑁆𑀭𑀸𑀲𑁄𑀢𑀺 𑀅𑀢𑁆𑀣𑁄. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀭𑀸𑀚𑀽𑀳𑀺 𑀯𑀸 𑀘𑁄𑀭𑁂𑀳𑀺 𑀯𑀸 ‘‘𑀥𑀦𑀁 𑀤𑁂𑀳𑀻’’𑀢𑀺 𑀓𑀫𑁆𑀫𑀓𑀸𑀭𑀡𑀁 𑀓𑀸𑀭𑀺𑀬𑀫𑀸𑀦𑀲𑁆𑀲 𑀓𑀸𑀬𑀺𑀜𑁆𑀚𑀦𑀁 𑀓𑀸𑀬𑀓𑀫𑁆𑀧𑁄 𑀳𑀤𑀬𑀫𑀁𑀲𑀘𑀮𑀦𑀁. 𑀮𑁄𑀫𑀳𑀁𑀲𑁄𑀢𑀺 𑀉𑀧𑁆𑀧𑀦𑁆𑀦𑁂 𑀪𑀬𑁂 𑀮𑁄𑀫𑀸𑀦𑀁 𑀳𑀁𑀲𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑁄. 𑀆𑀭𑀓𑁆𑀔𑁄𑀢𑀺 𑀅𑀦𑁆𑀢𑁄 𑀘 𑀩𑀳𑀺 𑀘 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀆𑀭𑀓𑁆𑀔𑀡𑀁.

𑁩𑁫. 𑀢𑁂𑀦 𑀳𑀺 𑀯𑀥𑀽𑀢𑀺 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀥𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀢𑁆𑀢𑀁 𑀅𑀢𑁆𑀢𑀦𑀸 𑀕𑀺𑀳𑀺𑀪𑀸𑀯𑀢𑁆𑀣𑀸𑀬 𑀧𑀮𑁄𑀪𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀫𑀸𑀢𑀼𑀕𑀸𑀫𑀲𑀤𑀺𑀲𑀁 𑀤𑀸𑀦𑀺 𑀧𑀼𑀭𑀺𑀲𑀸𑀦𑀁 𑀩𑀦𑁆𑀥𑀦𑀁 𑀦𑀢𑁆𑀣𑀻’’𑀢𑀺 𑀫𑀜𑁆𑀜𑀺𑀢𑁆𑀯𑀸 𑀢𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺 𑀯𑀥𑀽’’𑀢𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀦𑁆𑀢𑀺 𑀧𑀼𑀭𑀸𑀡𑀁 𑀤𑀼𑀢𑀺𑀬𑀺𑀓𑀁 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂 𑀤𑀼𑀢𑀺𑀬𑀺𑀓𑀁, 𑀕𑁂𑀳𑀲𑀺𑀢𑀲𑀼𑀔𑀼𑀧𑀪𑁄𑀕𑀲𑀳𑀸𑀬𑀺𑀓𑀁 𑀪𑀽𑀢𑀧𑀼𑀩𑁆𑀩𑀪𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀫𑀸𑀢𑀼𑀕𑀸𑀫𑀲𑀤𑀺𑀲𑀁 𑀩𑀦𑁆𑀥𑀦𑀁 𑀦𑀢𑁆𑀣𑀺. 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸𑀢𑀺 𑀧𑀸𑀤𑁂 𑀕𑀳𑁂𑀢𑁆𑀯𑀸; 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀧𑀸𑀤𑁂𑀲𑀼 𑀯𑀸 𑀢𑀁 𑀕𑀳𑁂𑀢𑁆𑀯𑀸. ‘‘𑀓𑀻𑀤𑀺𑀲𑀸 𑀦𑀸𑀫 𑀢𑀸 𑀅𑀬𑁆𑀬𑀧𑀼𑀢𑁆𑀢 𑀅𑀘𑁆𑀙𑀭𑀸𑀬𑁄’’𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? 𑀢𑀤𑀸 𑀓𑀺𑀭 𑀲𑀫𑁆𑀩𑀳𑀼𑀮𑁂 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀧𑀺 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂𑀧𑀺 𑀲𑁂𑀝𑁆𑀞𑀺𑀧𑀼𑀢𑁆𑀢𑁂𑀧𑀺 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀧𑀳𑀸𑀬 𑀧𑀩𑁆𑀩𑀚𑀦𑁆𑀢𑁂 𑀤𑀺𑀲𑁆𑀯𑀸 𑀧𑀩𑁆𑀩𑀚𑁆𑀚𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺 𑁋 ‘‘𑀓𑀲𑁆𑀫𑀸 𑀏𑀢𑁂 𑀧𑀩𑁆𑀩𑀚𑀦𑁆𑀢𑀻’’𑀢𑀺. 𑀅𑀣𑀜𑁆𑀜𑁂 𑀯𑀤𑀦𑁆𑀢𑀺 𑁋 ‘‘𑀤𑁂𑀯𑀘𑁆𑀙𑀭𑀸𑀦𑀁 𑀤𑁂𑀯𑀦𑀸𑀝𑀓𑀸𑀦𑀁 𑀓𑀸𑀭𑀡𑀸’’𑀢𑀺. 𑀲𑀸 𑀓𑀣𑀸 𑀯𑀺𑀢𑁆𑀣𑀸𑀭𑀺𑀓𑀸 𑀅𑀳𑁄𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀅𑀬𑀁 𑀏𑀯𑀫𑀸𑀳𑀸𑀢𑀺. 𑀣𑁂𑀭𑁄 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀦 𑀔𑁄 𑀅𑀳𑀁 𑀪𑀕𑀺𑀦𑀻𑀢𑀺 𑀆𑀳. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀯𑁄𑀳𑀭𑀢𑀺 𑀯𑀤𑁂𑀢𑀺. 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑀸 𑀧𑀧𑀢𑀸𑀢𑀺 𑀦𑀁 𑀪𑀕𑀺𑀦𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀦𑀢𑁆𑀣𑀺𑀓𑁄 𑀤𑀸𑀦𑀺 𑀫𑀬𑀸 𑀅𑀬𑀁 𑀬𑁄 𑀫𑀁 𑀧𑀚𑀸𑀧𑀢𑀺𑀁 𑀲𑀫𑀸𑀦𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀫𑀸𑀢𑀼𑀓𑀼𑀘𑁆𑀙𑀺𑀬𑀸 𑀲𑀬𑀺𑀢𑀤𑀸𑀭𑀺𑀓𑀁 𑀯𑀺𑀬 𑀫𑀜𑁆𑀜𑀢𑀻’’𑀢𑀺 𑀲𑀫𑀼𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀸 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀫𑀼𑀘𑁆𑀙𑀺𑀢𑀸 𑀧𑀧𑀢𑀸; 𑀧𑀢𑀺𑀢𑀸𑀢𑀺 𑀅𑀢𑁆𑀣𑁄.

𑀫𑀸 𑀦𑁄 𑀯𑀺𑀳𑁂𑀞𑀬𑀺𑀢𑁆𑀣𑀸𑀢𑀺 𑀫𑀸 𑀅𑀫𑁆𑀳𑁂 𑀥𑀦𑀁 𑀤𑀲𑁆𑀲𑁂𑀢𑁆𑀯𑀸 𑀫𑀸𑀢𑀼𑀕𑀸𑀫𑀜𑁆𑀘 𑀉𑀬𑁆𑀬𑁄𑀚𑁂𑀢𑁆𑀯𑀸 𑀯𑀺𑀳𑁂𑀞𑀬𑀺𑀢𑁆𑀣; 𑀯𑀺𑀳𑁂𑀲𑀸 𑀳𑁂𑀲𑀸 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺. 𑀢𑁂𑀦 𑀳𑀺 𑀢𑀸𑀢 𑀲𑀼𑀤𑀺𑀦𑁆𑀦 𑀩𑀻𑀚𑀓𑀫𑁆𑀧𑀺 𑀤𑁂𑀳𑀻𑀢𑀺 𑀏𑀢𑁆𑀣 𑀢𑁂𑀦 𑀳𑀻𑀢𑀺 𑀅𑀪𑀺𑀭𑀢𑀺𑀬𑀁 𑀉𑀬𑁆𑀬𑁄𑀚𑁂𑀢𑀺. 𑀲𑀘𑁂 𑀢𑁆𑀯𑀁 𑀅𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀺, 𑀘𑀭𑀺𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀸 𑀳𑁄𑀳𑀺, 𑀅𑀫𑁆𑀳𑀸𑀓𑀁 𑀧𑀦 𑀓𑀼𑀮𑀯𑀁𑀲𑀩𑀻𑀚𑀓𑀁 𑀏𑀓𑀁 𑀧𑀼𑀢𑁆𑀢𑀁 𑀤𑁂𑀳𑀺. 𑀫𑀸 𑀦𑁄 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀮𑀺𑀘𑁆𑀙𑀯𑀬𑁄 𑀅𑀢𑀺𑀳𑀭𑀸𑀧𑁂𑀲𑀼𑀦𑁆𑀢𑀺 𑀫𑀬𑀜𑁆𑀳𑀺 𑀮𑀺𑀘𑁆𑀙𑀯𑀻𑀦𑀁 𑀕𑀡𑀭𑀸𑀚𑀽𑀦𑀁 𑀭𑀚𑁆𑀚𑁂 𑀯𑀲𑀸𑀫, 𑀢𑁂 𑀢𑁂 𑀧𑀺𑀢𑀼𑀦𑁄 𑀅𑀘𑁆𑀘𑀬𑁂𑀦 𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀏𑀯𑀁 𑀫𑀳𑀦𑁆𑀢𑀁 𑀅𑀫𑁆𑀳𑀸𑀓𑀁 𑀯𑀺𑀪𑀯𑀁 𑀅𑀧𑀼𑀢𑁆𑀢𑀓𑀁 𑀓𑀼𑀮𑀥𑀦𑀭𑀓𑁆𑀔𑀓𑁂𑀦 𑀧𑀼𑀢𑁆𑀢𑁂𑀦 𑀯𑀺𑀭𑀳𑀺𑀢𑀁 𑀅𑀢𑁆𑀢𑀦𑁄 𑀭𑀸𑀚𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀸𑀧𑁂𑀬𑁆𑀬𑀼𑀦𑁆𑀢𑀺, 𑀢𑀁 𑀢𑁂 𑀫𑀸 𑀅𑀢𑀺𑀳𑀭𑀸𑀧𑁂𑀲𑀼𑀁, 𑀫𑀸 𑀅𑀢𑀺𑀳𑀭𑀸𑀧𑁂𑀦𑁆𑀢𑀽𑀢𑀺.

𑀏𑀢𑀁 𑀔𑁄 𑀫𑁂, 𑀅𑀫𑁆𑀫, 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑁂𑀲𑀁 𑀲𑀸𑀧𑀢𑁂𑀬𑁆𑀬𑀲𑁆𑀲 𑀅𑀳𑀫𑁂𑀯 𑀲𑀸𑀫𑀻, 𑀅𑀜𑁆𑀜𑁄 𑀦𑀢𑁆𑀣𑀺. 𑀢𑁂 𑀫𑀁 𑀲𑀸𑀧𑀢𑁂𑀬𑁆𑀬𑀭𑀓𑁆𑀔𑀡𑀢𑁆𑀣𑀸𑀬 𑀦𑀺𑀘𑁆𑀘𑀁 𑀅𑀦𑀼𑀩𑀦𑁆𑀥𑀺𑀲𑁆𑀲𑀦𑁆𑀢𑀺; 𑀢𑁂𑀦𑀸𑀳𑀁 𑀦 𑀮𑀘𑁆𑀙𑀸𑀫𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁, 𑀧𑀼𑀢𑁆𑀢𑀓𑀁 𑀧𑀦 𑀮𑀪𑀺𑀢𑁆𑀯𑀸 𑀑𑀭𑀫𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀅𑀳𑀁 𑀬𑀣𑀸𑀲𑀼𑀔𑀁 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀦𑀬𑀁 𑀧𑀲𑁆𑀲𑀦𑁆𑀢𑁄 𑀏𑀯𑀫𑀸𑀳𑀸𑀢𑀺.

𑁩𑁬. 𑀧𑀼𑀧𑁆𑀨𑀦𑁆𑀢𑀺 𑀉𑀢𑀼𑀓𑀸𑀮𑁂 𑀉𑀧𑁆𑀧𑀦𑁆𑀦𑀮𑁄𑀳𑀺𑀢𑀲𑁆𑀲 𑀦𑀸𑀫𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀳𑀺 𑀉𑀢𑀼𑀓𑀸𑀮𑁂 𑀕𑀩𑁆𑀪𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑁂 𑀮𑁄𑀳𑀺𑀢𑀯𑀡𑁆𑀡𑀸 𑀧𑀺𑀴𑀓𑀸 𑀲𑀡𑁆𑀞𑀳𑀺𑀢𑁆𑀯𑀸 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀯𑀟𑁆𑀠𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺, 𑀢𑀢𑁄 𑀮𑁄𑀳𑀺𑀢𑀁 𑀧𑀕𑁆𑀖𑀭𑀢𑀺, 𑀢𑀲𑁆𑀲𑁂𑀢𑀁 𑀦𑀸𑀫𑀁 ‘‘𑀧𑀼𑀧𑁆𑀨’’𑀦𑁆𑀢𑀺. 𑀢𑀁 𑀧𑀦 𑀬𑀸𑀯 𑀩𑀮𑀯𑀁 𑀳𑁄𑀢𑀺 𑀩𑀳𑀼 𑀧𑀕𑁆𑀖𑀭𑀢𑀺, 𑀢𑀸𑀯 𑀤𑀺𑀦𑁆𑀦𑀸𑀧𑀺 𑀧𑀝𑀺𑀲𑀦𑁆𑀥𑀺 𑀦 𑀢𑀺𑀝𑁆𑀞𑀢𑀺, 𑀤𑁄𑀲𑁂𑀦𑁂𑀯 𑀲𑀤𑁆𑀥𑀺𑀁 𑀧𑀕𑁆𑀖𑀭𑀢𑀺; 𑀤𑁄𑀲𑁂 𑀧𑀦 𑀧𑀕𑁆𑀖𑀭𑀺𑀢𑁂 𑀲𑀼𑀤𑁆𑀥𑁂 𑀯𑀢𑁆𑀣𑀼𑀫𑁆𑀳𑀺 𑀤𑀺𑀦𑁆𑀦𑀸 𑀧𑀝𑀺𑀲𑀦𑁆𑀥𑀺 𑀔𑀺𑀧𑁆𑀧𑀁 𑀧𑀢𑀺𑀝𑁆𑀞𑀸𑀢𑀺. 𑀧𑀼𑀧𑁆𑀨𑀁𑀲𑀸 𑀉𑀧𑁆𑀧𑀚𑁆𑀚𑀻𑀢𑀺 𑀧𑀼𑀧𑁆𑀨𑀁 𑀅𑀲𑁆𑀲𑀸 𑀉𑀧𑁆𑀧𑀚𑁆𑀚𑀺; 𑀅𑀓𑀸𑀭𑀮𑁄𑀧𑁂𑀦 𑀲𑀦𑁆𑀥𑀺 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸𑀢𑀺 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀬𑀸 𑀩𑀸𑀳𑀸, 𑀢𑀢𑁆𑀭 𑀦𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂 𑀅𑀝𑁆𑀞𑀧𑀺𑀢𑁂. 𑀪𑀕𑀯𑀢𑁄 𑀓𑀺𑀭 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀽 𑀘𑀺𑀢𑁆𑀢𑀁 𑀆𑀭𑀸𑀥𑀬𑀺𑀁𑀲𑀼, 𑀦 𑀏𑀯𑀭𑀽𑀧𑀁 𑀅𑀚𑁆𑀛𑀸𑀘𑀸𑀭𑀫𑀓𑀁𑀲𑀼. 𑀢𑀁 𑀲𑀦𑁆𑀥𑀸𑀬𑁂𑀯 𑀇𑀤𑀁 𑀲𑀼𑀢𑁆𑀢𑀫𑀸𑀳 𑁋 ‘‘𑀆𑀭𑀸𑀥𑀬𑀺𑀁𑀲𑀼 𑀯𑀢 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀏𑀓𑀁 𑀲𑀫𑀬𑀁 𑀘𑀺𑀢𑁆𑀢’’𑀦𑁆𑀢𑀺 (𑀫. 𑀦𑀺. 𑁧.𑁨𑁨𑁫). 𑀅𑀣 𑀪𑀕𑀯𑀸 𑀅𑀚𑁆𑀛𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 𑀧𑀸𑀭𑀸𑀚𑀺𑀓𑀁 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀸 𑀦 𑀧𑀜𑁆𑀜𑀧𑁂𑀲𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀁 𑀅𑀯𑀲𑁂𑀲𑁂 𑀧𑀜𑁆𑀘 𑀔𑀼𑀤𑁆𑀤𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀏𑀯 𑀧𑀜𑁆𑀜𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂’’𑀢𑀺.

𑀅𑀦𑀸𑀤𑀻𑀦𑀯𑀤𑀲𑁆𑀲𑁄𑀢𑀺 𑀬𑀁 𑀪𑀕𑀯𑀸 𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄 𑀆𑀤𑀻𑀦𑀯𑀁 𑀤𑀲𑁆𑀲𑁂𑀲𑁆𑀲𑀢𑀺, 𑀢𑀁 𑀅𑀧𑀲𑁆𑀲𑀦𑁆𑀢𑁄 𑀅𑀦𑀯𑀚𑁆𑀚𑀲𑀜𑁆𑀜𑀻 𑀳𑀼𑀢𑁆𑀯𑀸. 𑀲𑀘𑁂 𑀳𑀺 ‘‘𑀅𑀬𑀁 𑀇𑀤𑀁 𑀦 𑀓𑀭𑀡𑀻𑀬𑀦𑁆𑀢𑀺 𑀯𑀸 𑀫𑀽𑀮𑀘𑁆𑀙𑁂𑀚𑁆𑀚𑀸𑀬 𑀯𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀚𑀸𑀦𑁂𑀬𑁆𑀬, 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀢𑀢𑁄𑀦𑀺𑀤𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑁄𑀧𑀺 𑀦 𑀓𑀭𑁂𑀬𑁆𑀬. 𑀏𑀢𑁆𑀣 𑀧𑀦 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄 𑀦𑀺𑀤𑁆𑀤𑁄𑀲𑀲𑀜𑁆𑀜𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀸𑀤𑀻𑀦𑀯𑀤𑀲𑁆𑀲𑁄’’𑀢𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻𑀢𑀺 𑀧𑀯𑀢𑁆𑀢𑁂𑀲𑀺; 𑀧𑀯𑀢𑁆𑀢𑀦𑀸𑀧𑀺 𑀳𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀘𑁄𑀧𑀦𑀢𑁄 ‘‘𑀯𑀺𑀜𑁆𑀜𑀸𑀧𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀯𑀺𑀜𑁆𑀜𑀸𑀧𑀦𑀜𑁆𑀘𑁂𑀲 𑀕𑀩𑁆𑀪𑀲𑀡𑁆𑀞𑀸𑀦𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀫𑀓𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀻𑀢𑀺 𑀲𑀸 𑀘 𑀢𑁂𑀦𑁂𑀯 𑀅𑀚𑁆𑀛𑀸𑀘𑀸𑀭𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺, 𑀦 𑀅𑀜𑁆𑀜𑀣𑀸. 𑀓𑀺𑀁 𑀧𑀦 𑀅𑀜𑁆𑀜𑀣𑀸𑀧𑀺 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀻𑀢𑀺? 𑀳𑁄𑀢𑀺. 𑀓𑀣𑀁? 𑀓𑀸𑀬𑀲𑀁𑀲𑀕𑁆𑀕𑁂𑀦, 𑀘𑁄𑀴𑀕𑁆𑀕𑀳𑀡𑁂𑀦, 𑀅𑀲𑀼𑀘𑀺𑀧𑀸𑀦𑁂𑀦, 𑀦𑀸𑀪𑀺𑀧𑀭𑀸𑀫𑀲𑀦𑁂𑀦, 𑀭𑀽𑀧𑀤𑀲𑁆𑀲𑀦𑁂𑀦, 𑀲𑀤𑁆𑀤𑁂𑀦, 𑀕𑀦𑁆𑀥𑁂𑀦. 𑀇𑀢𑁆𑀣𑀺𑀬𑁄 𑀳𑀺 𑀏𑀓𑀘𑁆𑀘𑀸 𑀉𑀢𑀼𑀲𑀫𑀬𑁂 𑀙𑀦𑁆𑀤𑀭𑀸𑀕𑀭𑀢𑁆𑀢𑀸 𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀕𑁆𑀕𑀸𑀳-𑀯𑁂𑀡𑀺𑀕𑁆𑀕𑀸𑀳-𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀁 𑀲𑀸𑀤𑀺𑀬𑀦𑁆𑀢𑀺𑀬𑁄𑀧𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀓𑀸𑀬𑀲𑀁𑀲𑀕𑁆𑀕𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀧𑀦 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀢𑀁 𑀅𑀲𑀼𑀘𑀺𑀁 𑀏𑀓𑀤𑁂𑀲𑀁 𑀫𑀼𑀔𑁂𑀦 𑀅𑀕𑁆𑀕𑀳𑁂𑀲𑀺, 𑀏𑀓𑀤𑁂𑀲𑀁 𑀘𑁄𑀴𑀓𑁂𑀦𑁂𑀯 𑀲𑀤𑁆𑀥𑀺𑀁 𑀅𑀗𑁆𑀕𑀚𑀸𑀢𑁂 𑀧𑀓𑁆𑀔𑀺𑀧𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀏𑀯𑀁 𑀘𑁄𑀴𑀕𑁆𑀕𑀳𑀡𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀲𑁆𑀲 𑀫𑀸𑀢𑀸 𑀫𑀺𑀕𑀻 𑀉𑀢𑀼𑀲𑀫𑀬𑁂 𑀢𑀸𑀧𑀲𑀲𑁆𑀲 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀲𑀲𑀫𑁆𑀪𑀯𑀁 𑀧𑀲𑁆𑀲𑀸𑀯𑀁 𑀧𑀺𑀯𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀫𑀺𑀕𑀲𑀺𑀗𑁆𑀕𑀁 𑀯𑀺𑀚𑀸𑀬𑀺. 𑀏𑀯𑀁 𑀅𑀲𑀼𑀘𑀺𑀧𑀸𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀲𑀸𑀫𑀲𑁆𑀲 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀘𑀓𑁆𑀔𑀼𑀧𑀭𑀺𑀳𑀸𑀦𑀺𑀁 𑀜𑀢𑁆𑀯𑀸 𑀲𑀓𑁆𑀓𑁄 𑀧𑀼𑀢𑁆𑀢𑀁 𑀤𑀸𑀢𑀼𑀓𑀸𑀫𑁄 𑀤𑀼𑀓𑀽𑀮𑀧𑀡𑁆𑀟𑀺𑀢𑀁 𑀆𑀳 𑁋 ‘‘𑀯𑀝𑁆𑀝𑀢𑀺 𑀢𑀼𑀫𑁆𑀳𑀸𑀓𑀁 𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺? ‘‘𑀅𑀦𑀢𑁆𑀣𑀺𑀓𑀸 𑀫𑀬𑀁 𑀏𑀢𑁂𑀦, 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸𑀫𑁆𑀳𑀸’’𑀢𑀺. ‘‘𑀢𑁂𑀦 𑀳𑀺 𑀇𑀫𑀺𑀲𑁆𑀲𑀸 𑀉𑀢𑀼𑀲𑀫𑀬𑁂 𑀅𑀗𑁆𑀕𑀼𑀝𑁆𑀞𑁂𑀦 𑀦𑀸𑀪𑀺𑀁 𑀧𑀭𑀸𑀫𑀲𑁂𑀬𑁆𑀬𑀸𑀣𑀸’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀫𑀁 𑀢𑀸𑀧𑀲𑀤𑀸𑀭𑀓𑀁 𑀯𑀺𑀚𑀸𑀬𑀺. 𑀏𑀯𑀁 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀫𑀡𑁆𑀟𑀩𑁆𑀬𑀲𑁆𑀲 𑀘 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀘 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀭𑀽𑀧𑀤𑀲𑁆𑀲𑀦𑁂𑀦 𑀳𑁄𑀢𑀺? 𑀇𑀥𑁂𑀓𑀘𑁆𑀘𑀸 𑀇𑀢𑁆𑀣𑀻 𑀉𑀢𑀼𑀲𑀫𑀬𑁂 𑀧𑀼𑀭𑀺𑀲𑀲𑀁𑀲𑀕𑁆𑀕𑀁 𑀅𑀮𑀪𑀫𑀸𑀦𑀸 𑀙𑀦𑁆𑀤𑀭𑀸𑀕𑀯𑀲𑁂𑀦 𑀅𑀦𑁆𑀢𑁄𑀕𑁂𑀳𑀕𑀢𑀸𑀯 𑀧𑀼𑀭𑀺𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀭𑀸𑀚𑁄𑀭𑁄𑀥𑀸 𑀯𑀺𑀬, 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺. 𑀏𑀯𑀁 𑀭𑀽𑀧𑀤𑀲𑁆𑀲𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀩𑀮𑀸𑀓𑀸𑀲𑀼 𑀧𑀦 𑀧𑀼𑀭𑀺𑀲𑁄 𑀦𑀸𑀫 𑀦𑀢𑁆𑀣𑀺, 𑀢𑀸 𑀉𑀢𑀼𑀲𑀫𑀬𑁂 𑀫𑁂𑀖𑀲𑀤𑁆𑀤𑀁 𑀲𑀼𑀢𑁆𑀯𑀸 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀓𑀼𑀓𑁆𑀓𑀼𑀝𑀺𑀬𑁄𑀧𑀺 𑀓𑀤𑀸𑀘𑀺 𑀏𑀓𑀲𑁆𑀲 𑀓𑀼𑀓𑁆𑀓𑀼𑀝𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑀳𑀼𑀓𑀸𑀧𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀕𑀸𑀯𑀻 𑀉𑀲𑀪𑀲𑁆𑀲. 𑀏𑀯𑀁 𑀲𑀤𑁆𑀤𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀕𑀸𑀯𑀻 𑀏𑀯 𑀘 𑀓𑀤𑀸𑀘𑀺 𑀉𑀲𑀪𑀕𑀦𑁆𑀥𑁂𑀦 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀕𑀦𑁆𑀥𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺.

𑀇𑀥 𑀧𑀦𑀸𑀬𑀁 𑀅𑀚𑁆𑀛𑀸𑀘𑀸𑀭𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀫𑀸𑀢𑀸𑀧𑀺𑀢𑀭𑁄 𑀘 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺, 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀺, 𑀕𑀦𑁆𑀥𑀩𑁆𑀩𑁄 𑀘 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀏𑀯𑀁 𑀢𑀺𑀡𑁆𑀡𑀁 𑀲𑀦𑁆𑀦𑀺𑀧𑀸𑀢𑀸 𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁮).

𑀪𑀼𑀫𑁆𑀫𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺 𑀬𑀲𑁆𑀫𑀸 𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄. 𑀲𑀩𑁆𑀩𑀧𑀞𑀫𑀁 𑀳𑀺𑀲𑁆𑀲 𑀢𑀁 𑀧𑀸𑀧𑀁 𑀅𑀢𑁆𑀢𑀦𑀸 𑀚𑀸𑀦𑀸𑀢𑀺, 𑀢𑀢𑁄 𑀆𑀭𑀓𑁆𑀔𑀤𑁂𑀯𑀢𑀸, 𑀅𑀣𑀜𑁆𑀜𑀸𑀧𑀺 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄 𑀤𑁂𑀯𑀢𑀸. 𑀢𑀲𑁆𑀫𑀸𑀲𑁆𑀲 𑀧𑀭𑀘𑀺𑀢𑁆𑀢𑀯𑀺𑀤𑀽 𑀲𑀓𑀮𑀯𑀦𑀲𑀡𑁆𑀟𑀦𑀺𑀲𑁆𑀲𑀺𑀢𑀸 𑀪𑀼𑀫𑁆𑀫𑀸 𑀤𑁂𑀯𑀸 𑀢𑀁 𑀅𑀚𑁆𑀛𑀸𑀘𑀸𑀭𑀁 𑀤𑀺𑀲𑁆𑀯𑀸 𑀲𑀤𑁆𑀤𑀁 𑀅𑀦𑀼𑀲𑁆𑀲𑀸𑀯𑁂𑀲𑀼𑀁. 𑀬𑀣𑀸 𑀅𑀜𑁆𑀜𑁂𑀧𑀺 𑀤𑁂𑀯𑀸 𑀲𑀼𑀡𑀦𑁆𑀢𑀺, 𑀢𑀣𑀸 𑀦𑀺𑀘𑁆𑀙𑀸𑀭𑁂𑀲𑀼𑀁. 𑀓𑀺𑀦𑁆𑀢𑀺? 𑀦𑀺𑀭𑀩𑁆𑀩𑀼𑀤𑁄 𑀯𑀢, 𑀪𑁄…𑀧𑁂… 𑀆𑀤𑀻𑀦𑀯𑁄 𑀉𑀧𑁆𑀧𑀸𑀤𑀺𑀢𑁄𑀢𑀺. 𑀢𑀲𑁆𑀲𑀢𑁆𑀣𑁄 𑀯𑁂𑀭𑀜𑁆𑀚𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀏𑀢𑁆𑀣 𑀧𑀦 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀆𑀓𑀸𑀲𑀝𑁆𑀞𑀤𑁂𑀯𑀢𑀸 𑀅𑀲𑁆𑀲𑁄𑀲𑀼𑀁; 𑀆𑀓𑀸𑀲𑀝𑁆𑀞𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀢𑀺 𑀅𑀲𑀜𑁆𑀜𑀲𑀢𑁆𑀢𑁂 𑀘 𑀅𑀭𑀽𑀧𑀸𑀯𑀘𑀭𑁂 𑀘 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀸𑀦𑁄 𑀅𑀲𑁆𑀲𑁄𑀲𑀼𑀁; 𑀲𑀼𑀢𑁆𑀯𑀸 𑀘 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺𑀳 𑀢𑁂𑀦 𑀔𑀡𑁂𑀦𑀸𑀢𑀺 𑀏𑀯𑀁 𑀢𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑀓𑁆𑀔𑀡𑁂𑀦. 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦𑀸𑀢𑀺 𑀅𑀚𑁆𑀛𑀸𑀘𑀸𑀭𑀫𑀼𑀳𑀼𑀢𑁆𑀢𑁂𑀦𑁂𑀯. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸. 𑀅𑀩𑁆𑀪𑀼𑀕𑁆𑀕𑀘𑁆𑀙𑀻𑀢𑀺 𑀅𑀪𑀺𑀉𑀕𑁆𑀕𑀘𑁆𑀙𑀺 𑀅𑀩𑁆𑀪𑀼𑀝𑁆𑀞𑀸𑀲𑀺 𑀏𑀓𑀓𑁄𑀮𑀸𑀳𑀮𑀫𑀳𑁄𑀲𑀻𑀢𑀺.

𑀧𑀼𑀢𑁆𑀢𑀁 𑀯𑀺𑀚𑀸𑀬𑀻𑀢𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑀁 𑀚𑀦𑁂𑀲𑀺. 𑀩𑀻𑀚𑀓𑁄𑀢𑀺 𑀦𑀸𑀫𑀫𑀓𑀁𑀲𑀽𑀢𑀺 𑀦 𑀅𑀜𑁆𑀜𑀁 𑀦𑀸𑀫𑀁 𑀓𑀸𑀢𑀼𑀫𑀤𑀁𑀲𑀼, ‘‘𑀩𑀻𑀚𑀓𑀫𑁆𑀧𑀺 𑀤𑁂𑀳𑀻’’𑀢𑀺 𑀫𑀸𑀢𑀸𑀫𑀳𑀺𑀬𑀸 𑀯𑀼𑀢𑁆𑀢𑀪𑀸𑀯𑀲𑁆𑀲 𑀧𑀸𑀓𑀝𑀢𑁆𑀢𑀸 ‘‘𑀩𑀻𑀚𑀓𑁄 𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀳𑁄𑀢𑀽’’𑀢𑀺 ‘‘𑀩𑀻𑀚𑀓𑁄’’𑀢𑀺 𑀦𑀸𑀫𑀫𑀓𑀁𑀲𑀼. 𑀧𑀼𑀢𑁆𑀢𑀲𑁆𑀲 𑀧𑀦 𑀦𑀸𑀫𑀯𑀲𑁂𑀦𑁂𑀯 𑀘 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺𑀲𑁆𑀲 𑀦𑀸𑀫𑀫𑀓𑀁𑀲𑀼. 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀩𑀻𑀚𑀓𑀜𑁆𑀘 𑀩𑀻𑀚𑀓𑀫𑀸𑀢𑀭𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀩𑀻𑀚𑀓𑀲𑁆𑀲 𑀓𑀺𑀭 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂 𑀢𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀦𑀻𑀲𑀼 𑀲𑁄 𑀘 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀉𑀧𑀦𑀺𑀲𑁆𑀲𑀸𑀬 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀁𑀲𑀽’’𑀢𑀺.

𑁩𑁭. 𑀏𑀯𑀁 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀧𑀩𑁆𑀩𑀚𑁆𑀚𑀸 𑀲𑀨𑀮𑀸 𑀅𑀳𑁄𑀲𑀺. 𑀧𑀺𑀢𑀸 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀺𑀪𑀽𑀢𑁄 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀳𑀼𑀤𑁂𑀯𑀸𑀢𑀺 𑀅𑀳𑀼 𑀏𑀯, 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀳𑁄𑀲𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀅𑀚𑁆𑀛𑀸𑀘𑀸𑀭𑀳𑁂𑀢𑀼𑀓𑁄 𑀧𑀘𑁆𑀙𑀸𑀦𑀼𑀢𑀸𑀧𑁄. 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀲𑁄 𑀳𑀺 𑀯𑀺𑀜𑁆𑀜𑀽𑀳𑀺 𑀅𑀓𑀢𑁆𑀢𑀩𑁆𑀩𑀢𑀸𑀬 𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀪𑀸𑀯𑀢𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀓𑀢𑀁 𑀅𑀚𑁆𑀛𑀸𑀘𑀸𑀭𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀢𑀁 𑀧𑀝𑀺𑀘𑁆𑀘 𑀯𑀺𑀭𑀽𑀧𑀁 𑀲𑀭𑀡𑀪𑀸𑀯𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀮𑀸𑀪𑀸 𑀯𑀢 𑀫𑁂𑀢𑀺 𑀫𑀬𑁆𑀳𑀁 𑀯𑀢 𑀅𑀮𑀸𑀪𑀸; 𑀬𑁂 𑀛𑀸𑀦𑀸𑀤𑀻𑀦𑀁 𑀕𑀼𑀡𑀸𑀦𑀁 𑀅𑀮𑀸𑀪𑀸 𑀦𑀸𑀫, 𑀢𑁂 𑀫𑀬𑁆𑀳𑀁, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀯𑀢 𑀫𑁂 𑀮𑀸𑀪𑀸𑀢𑀺 𑀬𑁂𑀧𑀺 𑀫𑁂 𑀧𑀝𑀺𑀮𑀤𑁆𑀥𑀸 𑀧𑀩𑁆𑀩𑀚𑁆𑀚𑀲𑀭𑀡𑀕𑀫𑀦𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀕𑀼𑀡𑀸, 𑀢𑁂𑀧𑀺 𑀦𑁂𑀯 𑀫𑀬𑁆𑀳𑀁 𑀮𑀸𑀪𑀸 𑀅𑀚𑁆𑀛𑀸𑀘𑀸𑀭𑀫𑀮𑀻𑀦𑀢𑁆𑀢𑀸. 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂𑀢𑀺 𑀇𑀤𑀁 𑀲𑀸𑀲𑀦𑀁 𑀮𑀤𑁆𑀥𑀫𑁆𑀧𑀺 𑀫𑁂 𑀤𑀼𑀮𑁆𑀮𑀤𑁆𑀥𑀁. 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀦𑁆𑀢𑀺 𑀬𑀣𑀸 𑀅𑀜𑁆𑀜𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀏𑀯𑀁 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁. 𑀓𑀲𑁆𑀫𑀸? 𑀬𑀫𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂𑀥𑀫𑁆𑀫𑀯𑀺𑀦𑀬𑁂…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀦𑁆𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀺𑀲𑁄 𑀅𑀳𑁄𑀲𑀻𑀢𑀺 𑀔𑀸𑀤𑀺𑀢𑀼𑀁 𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀸 𑀅𑀲𑀓𑁆𑀓𑁄𑀦𑁆𑀢𑁄 𑀢𑀦𑀼𑀓𑁄 𑀅𑀳𑁄𑀲𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑁄. 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄𑀢𑀺 𑀲𑀜𑁆𑀚𑀸𑀢𑀼𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀪𑀸𑀯𑁄 𑀧𑀡𑁆𑀟𑀼𑀧𑀮𑀸𑀲𑀧𑁆𑀧𑀝𑀺𑀪𑀸𑀕𑁄. 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄𑀢𑀺 𑀧𑀭𑀺𑀬𑀸𑀤𑀺𑀦𑁆𑀦𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀲𑀺𑀭𑀸𑀚𑀸𑀮𑁂𑀦𑁂𑀯 𑀲𑀦𑁆𑀣𑀭𑀺𑀢𑀕𑀢𑁆𑀢𑁄. 𑀅𑀦𑁆𑀢𑁄𑀫𑀦𑁄𑀢𑀺 𑀅𑀦𑀼𑀲𑁄𑀘𑀦𑀯𑀲𑁂𑀦 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀞𑀺𑀢𑀘𑀺𑀢𑁆𑀢𑁄. 𑀳𑀤𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀯𑀲𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀅𑀦𑁆𑀢𑁄𑀫𑀦𑀸𑀬𑁂𑀯. 𑀮𑀻𑀦𑀫𑀦𑁄𑀢𑀺 𑀉𑀤𑁆𑀤𑁂𑀲𑁂 𑀧𑀭𑀺𑀧𑀼𑀘𑁆𑀙𑀸𑀬 𑀓𑀫𑁆𑀫𑀝𑁆𑀞𑀸𑀦𑁂 𑀅𑀥𑀺𑀲𑀻𑀮𑁂 𑀅𑀥𑀺𑀘𑀺𑀢𑁆𑀢𑁂 𑀅𑀥𑀺𑀧𑀜𑁆𑀜𑀸𑀬 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑁂 𑀘 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀅𑀯𑀺𑀧𑁆𑀨𑀸𑀭𑀺𑀓𑁄 𑀅𑀜𑁆𑀜𑀤𑀢𑁆𑀣𑀼 𑀓𑁄𑀲𑀚𑁆𑀚𑀯𑀲𑁂𑀦𑁂𑀯 𑀮𑀻𑀦𑁄 𑀲𑀗𑁆𑀓𑀼𑀘𑀺𑀢𑁄 𑀫𑀦𑁄 𑀅𑀲𑁆𑀲𑀸𑀢𑀺 𑀮𑀻𑀦𑀫𑀦𑁄. 𑀤𑀼𑀓𑁆𑀔𑀻𑀢𑀺 𑀘𑁂𑀢𑁄𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀻. 𑀤𑀼𑀫𑁆𑀫𑀦𑁄𑀢𑀺 𑀤𑁄𑀲𑁂𑀦 𑀤𑀼𑀝𑁆𑀞𑀫𑀦𑁄, 𑀯𑀺𑀭𑀽𑀧𑀫𑀦𑁄 𑀯𑀸 𑀤𑁄𑀫𑀦𑀲𑁆𑀲𑀸𑀪𑀺𑀪𑀽𑀢𑀢𑀸𑀬. 𑀧𑀚𑁆𑀛𑀸𑀬𑀻𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀯𑀳𑀘𑁆𑀙𑀺𑀦𑁆𑀦𑁄 𑀯𑀺𑀬 𑀕𑀤𑁆𑀭𑀪𑁄 𑀢𑀁 𑀢𑀁 𑀘𑀺𑀦𑁆𑀢𑀬𑀺.

𑁩𑁮. 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽𑀢𑀺 𑀢𑀁 𑀏𑀯𑀁𑀪𑀽𑀢𑀁 𑀕𑀡𑀲𑀗𑁆𑀕𑀡𑀺𑀓𑀸𑀧𑀧𑀜𑁆𑀘𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀁 𑀤𑀺𑀲𑁆𑀯𑀸 𑀬𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑀸 𑀓𑀣𑀸𑀨𑀸𑀲𑀼𑀓𑀸 𑀪𑀺𑀓𑁆𑀔𑀽 𑀢𑁂 𑀦𑀁 𑀏𑀢𑀤𑀯𑁄𑀘𑀼𑀁. 𑀧𑀻𑀡𑀺𑀦𑁆𑀤𑁆𑀭𑀺𑀬𑁄𑀢𑀺 𑀧𑀲𑀸𑀤𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀲𑁆𑀲 𑀲𑀫𑁆𑀧𑀼𑀡𑁆𑀡𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀘𑀓𑁆𑀔𑀼𑀆𑀤𑀺𑀇𑀦𑁆𑀤𑁆𑀭𑀺𑀬𑁄. 𑀲𑁄 𑀤𑀸𑀦𑀺 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀤𑀸𑀦𑀻𑀢𑀺 𑀦𑀺𑀧𑀸𑀢𑁄, 𑀲𑁄 𑀧𑀦 𑀢𑁆𑀯𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀘𑁆𑀘𑀺𑀦𑁄 𑀢𑁆𑀯𑀦𑁆𑀢𑀺 𑀓𑀘𑁆𑀘𑀺 𑀦𑀼 𑀢𑁆𑀯𑀁. 𑀅𑀦𑀪𑀺𑀭𑀢𑁄𑀢𑀺 𑀉𑀓𑁆𑀓𑀡𑁆𑀞𑀺𑀢𑁄; 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀢𑀫𑁂𑀯 𑀅𑀦𑀪𑀺𑀭𑀢𑀺𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀅𑀦𑀪𑀺𑀭𑀢𑁄’’𑀢𑀺. 𑀅𑀥𑀺𑀓𑀼𑀲𑀮𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀪𑀺𑀭𑀢𑁄𑀯 𑀅𑀳𑀦𑁆𑀢𑀺. 𑀅𑀢𑁆𑀣𑀺 𑀫𑁂 𑀧𑀸𑀧𑀓𑀫𑁆𑀫𑀁 𑀓𑀢𑀦𑁆𑀢𑀺 𑀫𑀬𑀸 𑀓𑀢𑀁 𑀏𑀓𑀁 𑀧𑀸𑀧𑀓𑀫𑁆𑀫𑀁 𑀅𑀢𑁆𑀣𑀺 𑀉𑀧𑀮𑀩𑁆𑀪𑀢𑀺 𑀲𑀁𑀯𑀺𑀚𑁆𑀚𑀢𑀺, 𑀦𑀺𑀘𑁆𑀘𑀓𑀸𑀮𑀁 𑀅𑀪𑀺𑀫𑀼𑀔𑀁 𑀯𑀺𑀬 𑀫𑁂 𑀢𑀺𑀝𑁆𑀞𑀢𑀺. 𑀅𑀣 𑀦𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀅𑀮𑀜𑁆𑀳𑀺 𑀢𑁂, 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀓𑀼𑀓𑁆𑀓𑀼𑀘𑁆𑀘𑀸𑀬𑀸𑀢𑀺 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀢𑀼𑀬𑁆𑀳𑁂𑀢𑀁 𑀧𑀸𑀧𑀓𑀫𑁆𑀫𑀁 𑀅𑀮𑀁 𑀲𑀫𑀢𑁆𑀣𑀁 𑀓𑀼𑀓𑁆𑀓𑀼𑀘𑁆𑀘𑀸𑀬; 𑀧𑀝𑀺𑀩𑀮𑀁 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀢𑁆𑀯𑀦𑁆𑀢𑀺 𑀆𑀤𑀺𑀫𑁆𑀳𑀺 𑀬𑁂𑀦 𑀧𑀸𑀧𑁂𑀦 𑀢𑁆𑀯𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁, 𑀢𑀁 𑀢𑁂 𑀧𑀸𑀧𑀁 𑀅𑀮𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀦𑀁 𑀅𑀦𑀼𑀲𑀸𑀲𑀦𑁆𑀢𑀸 ‘‘𑀦𑀦𑀼 𑀆𑀯𑀼𑀲𑁄 𑀪𑀕𑀯𑀢𑀸’’𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀦𑀦𑀽𑀢𑀺 𑀅𑀦𑀼𑀫𑀢𑀺𑀕𑁆𑀕𑀳𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀦𑁂𑀓𑀓𑀸𑀭𑀡𑁂𑀦. 𑀯𑀺𑀭𑀸𑀕𑀸𑀬𑀸𑀢𑀺 𑀯𑀺𑀭𑀸𑀕𑀢𑁆𑀣𑀸𑀬. 𑀦𑁄 𑀲𑀭𑀸𑀕𑀸𑀬𑀸𑀢𑀺 𑀦𑁄 𑀭𑀸𑀕𑁂𑀦 𑀭𑀚𑁆𑀚𑀦𑀢𑁆𑀣𑀸𑀬. 𑀪𑀕𑀯𑀢𑀸 𑀳𑀺 ‘‘𑀇𑀫𑀁 𑀫𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀢𑀸 𑀲𑀩𑁆𑀩𑀪𑀯𑀪𑁄𑀕𑁂𑀲𑀼 𑀯𑀺𑀭𑀚𑁆𑀚𑀺𑀲𑁆𑀲𑀦𑁆𑀢𑀺, 𑀦𑁄 𑀭𑀚𑁆𑀚𑀺𑀲𑁆𑀲𑀦𑁆𑀢𑀻’’ 𑀏𑀢𑀤𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀇𑀤𑀁 𑀧𑀦𑁂𑀢𑁆𑀣 𑀧𑀭𑀺𑀬𑀸𑀬𑀯𑀘𑀦𑀫𑀢𑁆𑀢𑀁. 𑀯𑀺𑀲𑀁𑀬𑁄𑀕𑀸𑀬𑀸𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬. 𑀦𑁄 𑀲𑀁𑀬𑁄𑀕𑀸𑀬𑀸𑀢𑀺 𑀦 𑀲𑀁𑀬𑀼𑀚𑁆𑀚𑀦𑀢𑁆𑀣𑀸𑀬. 𑀅𑀦𑀼𑀧𑀸𑀤𑀸𑀦𑀸𑀬𑀸𑀢𑀺 𑀅𑀕𑁆𑀕𑀳𑀡𑀢𑁆𑀣𑀸𑀬. 𑀦𑁄𑀲𑀉𑀧𑀸𑀤𑀸𑀦𑀸𑀬𑀸𑀢𑀺 𑀦 𑀲𑀗𑁆𑀕𑀳𑀡𑀢𑁆𑀣𑀸𑀬.

𑀢𑀢𑁆𑀣 𑀦𑀸𑀫 𑀢𑁆𑀯𑀦𑁆𑀢𑀺 𑀢𑀲𑁆𑀫𑀺𑀁 𑀦𑀸𑀫 𑀢𑁆𑀯𑀁. 𑀲𑀭𑀸𑀕𑀸𑀬 𑀘𑁂𑀢𑁂𑀲𑁆𑀲𑀲𑀻𑀢𑀺 𑀲𑀳 𑀭𑀸𑀕𑁂𑀦 𑀯𑀢𑁆𑀢𑀫𑀸𑀦𑀸𑀬 𑀫𑁂𑀣𑀼𑀦𑀥𑀫𑁆𑀫𑀸𑀬 𑀘𑁂𑀢𑁂𑀲𑁆𑀲𑀲𑀺 𑀓𑀧𑁆𑀧𑁂𑀲𑁆𑀲𑀲𑀺 𑀧𑀓𑀧𑁆𑀧𑁂𑀲𑁆𑀲𑀲𑀺; 𑀏𑀢𑀤𑀢𑁆𑀣𑀁 𑀯𑀸𑀬𑀫𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀼𑀦 𑀭𑀸𑀕𑀯𑀺𑀭𑀸𑀕𑀸𑀤𑀻𑀦𑀺 𑀦𑀯 𑀧𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸𑀦𑀺. 𑀢𑀲𑁆𑀫𑀸 𑀭𑀸𑀕𑀯𑀺𑀭𑀸𑀕𑀸𑀬𑀸𑀢𑀺 𑀯𑀸 𑀫𑀤𑀦𑀺𑀫𑁆𑀫𑀤𑀦𑀸𑀬𑀸𑀢𑀺 𑀯𑀸 𑀯𑀼𑀢𑁆𑀢𑁂𑀧𑀺 ‘‘𑀦𑀺𑀩𑁆𑀩𑀸𑀦𑀢𑁆𑀣𑀸𑀬𑀸’’𑀢𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀬𑀲𑁆𑀫𑀸 𑀢𑀁 𑀆𑀕𑀫𑁆𑀫 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀭𑀸𑀕𑀯𑀺𑀭𑀸𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀫𑀸𑀦𑀫𑀤-𑀧𑀼𑀭𑀺𑀲𑀫𑀤𑀸𑀤𑀬𑁄 𑀫𑀤𑀸 𑀦𑀺𑀫𑁆𑀫𑀤𑀸 𑀅𑀫𑀤𑀸 𑀳𑁄𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀤𑀦𑀺𑀫𑁆𑀫𑀤𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀢𑀁 𑀆𑀕𑀫𑁆𑀫 𑀲𑀩𑁆𑀩𑀸𑀧𑀺 𑀓𑀸𑀫𑀧𑀺𑀧𑀸𑀲𑀸 𑀯𑀺𑀦𑀬𑀁 𑀅𑀩𑁆𑀪𑀢𑁆𑀣𑀁 𑀬𑀸𑀢𑀺, 𑀢𑀲𑁆𑀫𑀸 𑀧𑀺𑀧𑀸𑀲𑀯𑀺𑀦𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸𑀮𑀬𑀸 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀆𑀮𑀬𑀲𑀫𑀼𑀕𑁆𑀖𑀸𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀢𑀁 𑀆𑀕𑀫𑁆𑀫 𑀢𑁂𑀪𑀽𑀫𑀓𑀯𑀝𑁆𑀝𑀁 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀼𑀧𑀘𑁆𑀙𑁂𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀢𑀁 𑀆𑀕𑀫𑁆𑀫 𑀲𑀩𑁆𑀩𑀲𑁄 𑀢𑀡𑁆𑀳𑀸 𑀔𑀬𑀁 𑀕𑀘𑁆𑀙𑀢𑀺 𑀯𑀺𑀭𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺 𑀘, 𑀢𑀲𑁆𑀫𑀸 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦𑁂𑀢𑀁 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄, 𑀧𑀜𑁆𑀘 𑀕𑀢𑀺𑀬𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀘 𑀲𑀢𑁆𑀢𑀸𑀯𑀸𑀲𑁂, 𑀅𑀧𑀭𑀸𑀧𑀭𑀪𑀸𑀯𑀸𑀬 𑀯𑀺𑀦𑀦𑀢𑁄 𑀆𑀩𑀦𑁆𑀥𑀦𑀢𑁄 𑀲𑀁𑀲𑀺𑀩𑁆𑀩𑀦𑀢𑁄 𑀯𑀸𑀦𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀁 𑀦𑀺𑀲𑁆𑀲𑀝𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀸𑀫𑀸𑀦𑀁 𑀧𑀳𑀸𑀦𑀁 𑀅𑀓𑁆𑀔𑀸𑀢𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸𑀦𑀁, 𑀓𑀺𑀮𑁂𑀲𑀓𑀸𑀫𑀸𑀦𑀜𑁆𑀘 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀓𑀸𑀫𑀲𑀜𑁆𑀜𑀸𑀦𑀁 𑀧𑀭𑀺𑀜𑁆𑀜𑀸𑀢𑀺 𑀲𑀩𑁆𑀩𑀸𑀲𑀫𑁆𑀧𑀺 𑀓𑀸𑀫𑀲𑀜𑁆𑀜𑀸𑀦𑀁 𑀜𑀸𑀢𑀢𑀻𑀭𑀡𑀧𑀳𑀸𑀦𑀯𑀲𑁂𑀦 𑀢𑀺𑀯𑀺𑀥𑀸 𑀧𑀭𑀺𑀜𑁆𑀜𑀸 𑀅𑀓𑁆𑀔𑀸𑀢𑀸. 𑀓𑀸𑀫𑀧𑀺𑀧𑀸𑀲𑀸𑀦𑀦𑁆𑀢𑀺 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀸𑀦𑀁 𑀓𑀸𑀫𑁂 𑀯𑀸 𑀧𑀸𑀢𑀼𑀫𑀺𑀘𑁆𑀙𑀸𑀦𑀁. 𑀓𑀸𑀫𑀯𑀺𑀢𑀓𑁆𑀓𑀸𑀦𑀦𑁆𑀢𑀺 𑀓𑀸𑀫𑀼𑀧𑀲𑀜𑁆𑀳𑀺𑀢𑀸𑀦𑀁𑀯𑀺𑀢𑀓𑁆𑀓𑀸𑀦𑀁. 𑀓𑀸𑀫𑀧𑀭𑀺𑀴𑀸𑀳𑀸𑀦𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀧𑀭𑀺𑀴𑀸𑀳𑀸𑀦𑀁 𑀅𑀦𑁆𑀢𑁄𑀤𑀸𑀳𑀸𑀦𑀁. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀓𑀺𑀮𑁂𑀲𑀓𑁆𑀔𑀬𑀓𑀭𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄𑀯 𑀓𑀣𑀺𑀢𑁄. 𑀲𑀩𑁆𑀩𑀧𑀞𑀫𑁂𑀲𑀼 𑀧𑀦 𑀢𑀻𑀲𑀼 𑀞𑀸𑀦𑁂𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦𑁂𑀢𑀁 𑀆𑀯𑀼𑀲𑁄𑀢𑀺 𑀦 𑀏𑀢𑀁 𑀆𑀯𑀼𑀲𑁄, 𑀢𑀯 𑀧𑀸𑀧𑀓𑀫𑁆𑀫𑀁 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘 𑀧𑀲𑀸𑀤𑀸𑀬 𑀏𑀯𑀭𑀽𑀧𑀸𑀦𑀁 𑀧𑀲𑀸𑀤𑀢𑁆𑀣𑀸𑀬 𑀦 𑀳𑁄𑀢𑀺. 𑀅𑀣 𑀔𑁆𑀯𑁂𑀢𑀦𑁆𑀢𑀺 𑀅𑀣 𑀔𑁄 𑀏𑀢𑀁. 𑀅𑀣 𑀔𑁄 𑀢𑀦𑁆𑀢𑀺𑀧𑀺 𑀧𑀸𑀞𑁄. 𑀅𑀜𑁆𑀜𑀣𑀢𑁆𑀢𑀸𑀬𑀸𑀢𑀺 𑀧𑀲𑀸𑀤𑀜𑁆𑀜𑀣𑀸𑀪𑀸𑀯𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀸𑀬 𑀳𑁄𑀢𑀺. 𑀬𑁂 𑀫𑀕𑁆𑀕𑁂𑀦 𑀅𑀦𑀸𑀕𑀢𑀲𑀤𑁆𑀥𑀸, 𑀢𑁂𑀲𑀁 𑀯𑀺𑀧𑁆𑀧𑀝𑀺𑀲𑀸𑀭𑀁 𑀓𑀭𑁄𑀢𑀺 𑁋 ‘‘𑀈𑀤𑀺𑀲𑁂𑀧𑀺 𑀦𑀸𑀫 𑀥𑀫𑁆𑀫𑀯𑀺𑀦𑀬𑁂 𑀫𑀬𑀁 𑀧𑀲𑀦𑁆𑀦𑀸, 𑀬𑀢𑁆𑀣𑁂𑀯𑀁 𑀤𑀼𑀧𑁆𑀧𑀝𑀺𑀧𑀦𑁆𑀦𑀸 𑀪𑀺𑀓𑁆𑀔𑀽’’𑀢𑀺. 𑀬𑁂 𑀧𑀦 𑀫𑀕𑁆𑀕𑁂𑀦𑀸𑀕𑀢𑀲𑀤𑁆𑀥𑀸, 𑀢𑁂𑀲𑀁 𑀲𑀺𑀦𑁂𑀭𑀼 𑀯𑀺𑀬 𑀯𑀸𑀢𑁂𑀳𑀺 𑀅𑀘𑀮𑁄 𑀧𑀲𑀸𑀤𑁄 𑀈𑀤𑀺𑀲𑁂𑀳𑀺 𑀯𑀢𑁆𑀣𑀽𑀳𑀺 𑀇𑀢𑁄 𑀯𑀸 𑀤𑀸𑀭𑀼𑀡𑀢𑀭𑁂𑀳𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺.

𑁩𑁯. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀦𑁆𑀢𑀺 𑀪𑀕𑀯𑀢𑁄 𑀏𑀢𑀁 𑀅𑀢𑁆𑀣𑀁 𑀆𑀘𑀺𑀓𑁆𑀔𑀺𑀁𑀲𑀼 𑀧𑀝𑀺𑀯𑁂𑀤𑀬𑀺𑀁𑀲𑀼. 𑀆𑀭𑁄𑀘𑀬𑀫𑀸𑀦𑀸 𑀘 𑀦𑁂𑀯 𑀧𑀺𑀬𑀓𑀫𑁆𑀬𑀢𑀸𑀬 𑀦 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸𑀬, 𑀦 𑀢𑀲𑁆𑀲𑀸𑀬𑀲𑁆𑀫𑀢𑁄 𑀅𑀯𑀡𑁆𑀡𑀧𑀓𑀸𑀲𑀦𑀢𑁆𑀣𑀸𑀬, 𑀦 𑀓𑀮𑀺𑀲𑀸𑀲𑀦𑀸𑀭𑁄𑀧𑀦𑀢𑁆𑀣𑀸𑀬, 𑀦𑀸𑀧𑀺 ‘‘𑀇𑀤𑀁 𑀲𑀼𑀢𑁆𑀯𑀸 𑀪𑀕𑀯𑀸 𑀇𑀫𑀲𑁆𑀲 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀦 𑀤𑀲𑁆𑀲𑀢𑀺, 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑁆𑀲𑀢𑀺 𑀦’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 ‘‘𑀇𑀫𑀁 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀁 𑀅𑀩𑁆𑀩𑀼𑀤𑀁 𑀜𑀢𑁆𑀯𑀸 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀺, 𑀯𑁂𑀮𑀁 𑀫𑀭𑀺𑀬𑀸𑀤𑀁 𑀆𑀡𑀁 𑀞𑀧𑁂𑀲𑁆𑀲𑀢𑀻’’𑀢𑀺 𑀆𑀭𑁄𑀘𑁂𑀲𑀼𑀁.

𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂𑀢𑀺 𑀏𑀢𑁆𑀣 𑀲𑀼𑀤𑀺𑀦𑁆𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑀯𑀻𑀢𑀺𑀓𑁆𑀓𑀫𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀓𑀸𑀭𑀡𑀢𑁆𑀢𑀸 𑀦𑀺𑀤𑀸𑀦𑀜𑁆𑀘𑁂𑀯 𑀧𑀓𑀭𑀡𑀜𑁆𑀘𑀸𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀦𑀺𑀤𑁂𑀢𑀺 𑀅𑀢𑁆𑀢𑀦𑁄 𑀨𑀮𑀁 ‘‘𑀕𑀡𑁆𑀳𑀸𑀣 𑀦’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀁 𑀯𑀺𑀬 𑀅𑀧𑁆𑀧𑁂𑀢𑀺, 𑀧𑀓𑀭𑁄𑀢𑀺 𑀘 𑀦𑀁 𑀓𑀢𑁆𑀢𑀼𑀁 𑀆𑀭𑀪𑀢𑀺, 𑀓𑀭𑁄𑀢𑀺𑀬𑁂𑀯 𑀯𑀸; 𑀢𑀲𑁆𑀫𑀸 𑀦𑀺𑀤𑀸𑀦𑀜𑁆𑀘𑁂𑀯 𑀧𑀓𑀭𑀡𑀜𑁆𑀘𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀩𑀼𑀤𑁆𑀥𑁄 𑀪𑀕𑀯𑀸 𑀯𑀺𑀕𑀭𑀳𑀺 𑀦𑀺𑀦𑁆𑀤𑀺; 𑀬𑀣𑀸 𑀢𑀁 𑀯𑀡𑁆𑀡𑀸𑀯𑀡𑁆𑀡𑀸𑀭𑀳𑀸𑀦𑀁 𑀯𑀡𑁆𑀡𑀜𑁆𑀘 𑀅𑀯𑀡𑁆𑀡𑀜𑁆𑀘 𑀪𑀡𑀦𑁆𑀢𑁂𑀲𑀼 𑀅𑀕𑁆𑀕𑀧𑀼𑀕𑁆𑀕𑀮𑁄. 𑀦 𑀳𑀺 𑀪𑀕𑀯𑀢𑁄 𑀲𑀻𑀮𑀯𑀻𑀢𑀺𑀓𑁆𑀓𑀫𑀓𑀭𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀕𑀦𑁆𑀣𑁂𑀦 𑀯𑀸 𑀥𑀼𑀢𑀗𑁆𑀕𑁂𑀦 𑀯𑀸 𑀜𑀸𑀢𑁄 𑀬𑀲𑀲𑁆𑀲𑀻 𑀈𑀤𑀺𑀲𑀁 𑀧𑀼𑀕𑁆𑀕𑀮𑀁 𑀭𑀓𑁆𑀔𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦𑀸𑀧𑀺 𑀧𑁂𑀲𑀮𑀁 𑀕𑀼𑀡𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀕𑀼𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀔𑁄 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑀢𑀺 𑀏𑀯, 𑀧𑀲𑀁𑀲𑀺𑀢𑀩𑁆𑀩𑀜𑁆𑀘 𑀧𑀲𑀁𑀲𑀢𑀺 𑀏𑀯, 𑀅𑀬𑀜𑁆𑀘 𑀕𑀭𑀳𑀺𑀢𑀩𑁆𑀩𑁄; 𑀢𑀲𑁆𑀫𑀸 𑀢𑀁 𑀢𑀸𑀤𑀺𑀮𑀓𑁆𑀔𑀡𑁂 𑀞𑀺𑀢𑁄 𑀅𑀯𑀺𑀓𑀫𑁆𑀧𑀫𑀸𑀦𑁂𑀦 𑀘𑀺𑀢𑁆𑀢𑁂𑀦 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 ‘‘𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺.

𑀢𑀢𑁆𑀣𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑀤𑀺𑀤𑀁 𑀢𑀬𑀸, 𑀫𑁄𑀖𑀧𑀼𑀭𑀺𑀲, 𑀢𑀼𑀘𑁆𑀙𑀫𑀦𑀼𑀲𑁆𑀲 𑀓𑀫𑁆𑀫𑀁 𑀓𑀢𑀁, 𑀢𑀁 𑀲𑀫𑀡𑀓𑀭𑀡𑀸𑀦𑀁 𑀥𑀫𑁆𑀫𑀸𑀦𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀸𑀲𑀦𑀸𑀦𑀁 𑀯𑀸 𑀦 𑀅𑀦𑀼𑀘𑁆𑀙𑀯𑀺𑀓𑀁, 𑀢𑁂𑀲𑀁 𑀙𑀯𑀺𑀁 𑀙𑀸𑀬𑀁 𑀲𑀼𑀦𑁆𑀤𑀭𑀪𑀸𑀯𑀁 𑀦 𑀅𑀦𑁆𑀯𑁂𑀢𑀺 𑀦𑀸𑀦𑀼𑀕𑀘𑁆𑀙𑀢𑀺, 𑀅𑀣 𑀔𑁄 𑀆𑀭𑀓𑀸𑀯 𑀢𑁂𑀳𑀺 𑀥𑀫𑁆𑀫𑁂𑀳𑀺. 𑀅𑀦𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀏𑀯 𑀘 𑀅𑀦𑀦𑀼𑀮𑁄𑀫𑀺𑀓𑀁, 𑀢𑁂𑀲𑀁 𑀦 𑀅𑀦𑀼𑀮𑁄𑀫𑁂𑀢𑀺; 𑀅𑀣 𑀔𑁄 𑀯𑀺𑀮𑁄𑀫𑀁 𑀧𑀘𑁆𑀘𑀦𑀻𑀓𑀪𑀸𑀯𑁂 𑀞𑀺𑀢𑀁. 𑀅𑀦𑀦𑀼𑀮𑁄𑀫𑀺𑀓𑀢𑁆𑀢𑀸 𑀏𑀯 𑀘 𑀅𑀧𑁆𑀧𑀢𑀺𑀭𑀽𑀧𑀁, 𑀧𑀢𑀺𑀭𑀽𑀧𑀁 𑀲𑀤𑀺𑀲𑀁 𑀧𑀝𑀺𑀪𑀸𑀕𑀁 𑀦 𑀳𑁄𑀢𑀺, 𑀅𑀣 𑀔𑁄 𑀅𑀲𑀤𑀺𑀲𑀁 𑀅𑀧𑁆𑀧𑀝𑀺𑀪𑀸𑀕𑀫𑁂𑀯. 𑀅𑀧𑁆𑀧𑀢𑀺𑀭𑀽𑀧𑀢𑁆𑀢𑀸 𑀏𑀯 𑀘 𑀅𑀲𑁆𑀲𑀸𑀫𑀡𑀓𑀁, 𑀲𑀫𑀡𑀸𑀦𑀁 𑀓𑀫𑁆𑀫𑀁 𑀦 𑀳𑁄𑀢𑀺. 𑀅𑀲𑁆𑀲𑀸𑀫𑀡𑀓𑀢𑁆𑀢𑀸 𑀅𑀓𑀧𑁆𑀧𑀺𑀬𑀁. 𑀬𑀜𑁆𑀳𑀺 𑀲𑀫𑀡𑀓𑀫𑁆𑀫𑀁 𑀦 𑀳𑁄𑀢𑀺, 𑀢𑀁 𑀢𑁂𑀲𑀁 𑀦 𑀓𑀧𑁆𑀧𑀢𑀺. 𑀅𑀓𑀧𑁆𑀧𑀺𑀬𑀢𑁆𑀢𑀸 𑀅𑀓𑀭𑀡𑀻𑀬𑀁. 𑀦 𑀳𑀺 𑀲𑀫𑀡𑀸 𑀬𑀁 𑀦 𑀓𑀧𑁆𑀧𑀢𑀺, 𑀢𑀁 𑀓𑀭𑁄𑀦𑁆𑀢𑀺. 𑀢𑀜𑁆𑀘𑁂𑀢𑀁 𑀢𑀬𑀸 𑀓𑀢𑀁, 𑀢𑀲𑁆𑀫𑀸 𑀅𑀦𑀦𑀼𑀘𑁆𑀙𑀯𑀺𑀓𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑀢𑀁…𑀧𑁂… 𑀅𑀓𑀭𑀡𑀻𑀬𑀦𑁆𑀢𑀺. 𑀓𑀣𑀜𑁆𑀳𑀺 𑀦𑀸𑀫𑀸𑀢𑀺 𑀓𑁂𑀦 𑀦𑀸𑀫 𑀓𑀸𑀭𑀡𑁂𑀦, 𑀓𑀺𑀁 𑀦𑀸𑀫 𑀓𑀸𑀭𑀡𑀁 𑀧𑀲𑁆𑀲𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀓𑀸𑀭𑀡𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀧𑀭𑀢𑁄 ‘‘𑀦𑀦𑀼 𑀫𑀬𑀸 𑀫𑁄𑀖𑀧𑀼𑀭𑀺𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀇𑀤𑀸𑀦𑀺 𑀬𑀲𑁆𑀫𑀸 𑀬𑀁 𑀢𑁂𑀦 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀢𑀁 𑀯𑀺𑀧𑀘𑁆𑀘𑀫𑀸𑀦𑀁 𑀅𑀢𑀺𑀯𑀺𑀬 𑀤𑀼𑀓𑁆𑀔𑀯𑀺𑀧𑀸𑀓𑀁 𑀳𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀢𑀁 𑀯𑀺𑀧𑀸𑀓𑀁 𑀤𑀲𑁆𑀲𑁂𑀢𑀼𑀁 𑀓𑀢𑀸𑀧𑀭𑀸𑀥𑀁 𑀯𑀺𑀬 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀓𑀸 𑀫𑀸𑀢𑀸𑀧𑀺𑀢𑀭𑁄 𑀤𑀬𑀸𑀮𑀼𑀓𑁂𑀦 𑀘𑀺𑀢𑁆𑀢𑁂𑀦 𑀲𑀼𑀤𑀺𑀦𑁆𑀦𑀁 𑀧𑀭𑀺𑀪𑀸𑀲𑀦𑁆𑀢𑁄 ‘‘𑀯𑀭𑀁 𑀢𑁂 𑀫𑁄𑀖𑀧𑀼𑀭𑀺𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀼 𑀲𑀻𑀖𑀁 𑀏𑀢𑀲𑁆𑀲 𑀯𑀺𑀲𑀁 𑀆𑀕𑀘𑁆𑀙𑀢𑀻𑀢𑀺 𑀆𑀲𑀻𑀯𑀺𑀲𑁄. 𑀖𑁄𑀭𑀁 𑀘𑀡𑁆𑀟𑀫𑀲𑁆𑀲 𑀯𑀺𑀲𑀦𑁆𑀢𑀺 𑀖𑁄𑀭𑀯𑀺𑀲𑁄, 𑀢𑀲𑁆𑀲 𑀆𑀲𑀻𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲. ‘‘𑀧𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀏𑀢𑀲𑁆𑀲 ‘‘𑀯𑀭’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀈𑀤𑀺𑀲𑀲𑁆𑀲 𑀆𑀲𑀻𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀯𑀭𑀁 𑀧𑀓𑁆𑀔𑀺𑀢𑁆𑀢𑀁; 𑀲𑀘𑁂 𑀧𑀓𑁆𑀔𑀺𑀢𑁆𑀢𑀁 𑀪𑀯𑁂𑀬𑁆𑀬, 𑀯𑀭𑀁 𑀲𑀺𑀬𑀸; 𑀲𑀼𑀦𑁆𑀤𑀭𑀁 𑀲𑀸𑀥𑀼 𑀲𑀼𑀝𑁆𑀞𑀼 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀦 𑀢𑁆𑀯𑁂𑀯𑀸𑀢𑀺 𑀦 𑀢𑀼 𑀏𑀯 𑀯𑀭𑀁 𑀦 𑀲𑀼𑀦𑁆𑀤𑀭𑀫𑁂𑀯 𑀦 𑀲𑀸𑀥𑀼𑀫𑁂𑀯 𑀦 𑀲𑀼𑀝𑁆𑀞𑀼𑀫𑁂𑀯. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀡𑁆𑀳𑀲𑀧𑁆𑀧𑀲𑁆𑀲𑀸𑀢𑀺 𑀓𑀸𑀴𑀲𑀧𑁆𑀧𑀲𑁆𑀲. 𑀅𑀗𑁆𑀕𑀸𑀭𑀓𑀸𑀲𑀼𑀬𑀸𑀢𑀺 𑀅𑀗𑁆𑀕𑀸𑀭𑀧𑀼𑀡𑁆𑀡𑀓𑀽𑀧𑁂, 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀯𑀸. 𑀆𑀤𑀺𑀢𑁆𑀢𑀸𑀬𑀸𑀢𑀺 𑀧𑀤𑀺𑀢𑁆𑀢𑀸𑀬 𑀕𑀳𑀺𑀢𑀅𑀕𑁆𑀕𑀺𑀯𑀡𑁆𑀡𑀸𑀬. 𑀲𑀫𑁆𑀧𑀚𑁆𑀚𑀮𑀺𑀢𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀺𑀢𑀸𑀬 𑀅𑀘𑁆𑀘𑀺𑀬𑁄 𑀫𑀼𑀘𑁆𑀘𑀦𑁆𑀢𑀺𑀬𑀸. 𑀲𑀚𑁄𑀢𑀺𑀪𑀽𑀢𑀸𑀬𑀸𑀢𑀺 𑀲𑀧𑁆𑀧𑀪𑀸𑀬. 𑀲𑀫𑀦𑁆𑀢𑀢𑁄 𑀉𑀝𑁆𑀞𑀺𑀢𑀸𑀳𑀺 𑀚𑀸𑀮𑀸𑀳𑀺 𑀏𑀓𑀧𑁆𑀧𑀪𑀸𑀲𑀫𑀼𑀤𑀬𑀪𑀽𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀬𑀁 𑀫𑀬𑀸 𑀯𑀼𑀢𑁆𑀢𑀁 ‘‘𑀯𑀭’’𑀦𑁆𑀢𑀺 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀓𑀢𑀭𑁂𑀦 𑀓𑀸𑀭𑀡𑁂𑀦𑀸𑀢𑀺 𑀘𑁂? 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀬𑁄 𑀢𑀢𑁆𑀣 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀧𑁂𑀬𑁆𑀬, 𑀲𑁄 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀇𑀢𑁄𑀦𑀺𑀤𑀸𑀦𑀜𑁆𑀘 𑀔𑁄…𑀧𑁂… 𑀉𑀧𑀧𑀚𑁆𑀚𑁂𑀬𑁆𑀬𑀸𑀢𑀺 𑀬𑀁 𑀇𑀤𑀁 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀧𑀓𑁆𑀔𑀺𑀧𑀦𑀁, 𑀇𑀢𑁄𑀦𑀺𑀤𑀸𑀦𑀁 𑀢𑀲𑁆𑀲 𑀓𑀸𑀭𑀓𑁄 𑀧𑀼𑀕𑁆𑀕𑀮𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬; 𑀏𑀯𑀁 𑀓𑀫𑁆𑀫𑀲𑁆𑀲 𑀫𑀳𑀸𑀲𑀸𑀯𑀚𑁆𑀚𑀢𑀁 𑀧𑀲𑁆𑀲𑀦𑁆𑀢𑁄 𑀢𑀁 𑀕𑀭𑀳𑀺, 𑀦 𑀢𑀲𑁆𑀲 𑀤𑀼𑀓𑁆𑀔𑀸𑀕𑀫𑀁 𑀇𑀘𑁆𑀙𑀫𑀸𑀦𑁄. 𑀢𑀢𑁆𑀣 𑀦𑀸𑀫 𑀢𑁆𑀯𑀦𑁆𑀢𑀺 𑀢𑀲𑁆𑀫𑀺𑀁 𑀦𑀸𑀫 𑀏𑀯𑀭𑀽𑀧𑁂 𑀓𑀫𑁆𑀫𑁂 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑁂 𑀲𑀫𑀸𑀦𑁂𑀧𑀺 𑀢𑁆𑀯𑀁. 𑀬𑀁 𑀢𑁆𑀯𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀳𑀻𑀴𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁆𑀯𑀦𑁆𑀢𑀺 𑀢𑀁-𑀲𑀤𑁆𑀤𑀲𑁆𑀲 𑀯𑁂𑀯𑀘𑀦𑀁; 𑀤𑁆𑀯𑀻𑀳𑀺𑀧𑀺 𑀬𑀁 𑀯𑀸 𑀢𑀁 𑀯𑀸 𑀳𑀻𑀴𑀺𑀢𑀫𑀯𑀜𑁆𑀜𑀸𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑀤𑁆𑀥𑀫𑁆𑀫𑀦𑁆𑀢𑀺 𑀅𑀲𑀢𑀁 𑀦𑀻𑀘𑀚𑀦𑀸𑀦𑀁 𑀥𑀫𑁆𑀫𑀁; 𑀢𑁂𑀳𑀺 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀕𑀸𑀫𑀥𑀫𑁆𑀫𑀦𑁆𑀢𑀺 𑀕𑀸𑀫𑀸𑀦𑀁 𑀥𑀫𑁆𑀫𑀁; 𑀕𑀸𑀫𑀯𑀸𑀲𑀺𑀓𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑀮𑀥𑀫𑁆𑀫𑀦𑁆𑀢𑀺 𑀧𑀸𑀧𑀥𑀫𑁆𑀫𑁂 𑀯𑀲𑀦𑁆𑀢𑀺 𑀧𑀕𑁆𑀖𑀭𑀦𑁆𑀢𑀻𑀢𑀺 𑀯𑀲𑀮𑀸, 𑀢𑁂𑀲𑀁 𑀯𑀲𑀮𑀸𑀦𑀁 𑀳𑀻𑀦𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀁, 𑀯𑀲𑀮𑀁 𑀯𑀸 𑀓𑀺𑀮𑁂𑀲𑀧𑀕𑁆𑀖𑀭𑀡𑀓𑀁 𑀥𑀫𑁆𑀫𑀁. 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀤𑀼𑀝𑁆𑀞𑀼 𑀘 𑀓𑀺𑀮𑁂𑀲𑀤𑀽𑀲𑀺𑀢𑀁 𑀣𑀽𑀮𑀜𑁆𑀘 𑀅𑀲𑀼𑀔𑀼𑀫𑀁, 𑀅𑀦𑀺𑀧𑀼𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀤𑀓𑀦𑁆𑀢𑀺𑀓𑀦𑁆𑀢𑀺 𑀉𑀤𑀓𑀓𑀺𑀘𑁆𑀘𑀁 𑀅𑀦𑁆𑀢𑀺𑀓𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸𑀢𑀺 𑀑𑀤𑀓𑀦𑁆𑀢𑀺𑀓𑁄, 𑀢𑀁 𑀑𑀤𑀓𑀦𑁆𑀢𑀺𑀓𑀁. 𑀭𑀳𑀲𑁆𑀲𑀦𑁆𑀢𑀺 𑀭𑀳𑁄𑀪𑀯𑀁, 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀉𑀧𑁆𑀧𑀚𑁆𑀚𑀦𑀓𑀁. 𑀅𑀬𑀜𑁆𑀳𑀺 𑀥𑀫𑁆𑀫𑁄 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀦 𑀲𑀓𑁆𑀓𑀸 𑀆𑀯𑀺 𑀅𑀜𑁆𑀜𑁂𑀲𑀁 𑀤𑀲𑁆𑀲𑀦𑀯𑀺𑀲𑀬𑁂 𑀓𑀸𑀢𑀼𑀁, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀳𑀲𑁆𑀲’’𑀦𑁆𑀢𑀺. 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀤𑁆𑀯𑀬𑀁 𑀤𑁆𑀯𑀬𑀁 𑀲𑀫𑀸𑀧𑀢𑁆𑀢𑀺𑀦𑁆𑀢𑀺𑀧𑀺 𑀧𑀸𑀞𑁄. 𑀤𑀬𑀁 𑀤𑀬𑀁 𑀲𑀫𑀸𑀧𑀢𑁆𑀢𑀺𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀻𑀢𑀺 𑀏𑀢𑀁 ‘‘𑀢𑀢𑁆𑀣 𑀦𑀸𑀫 𑀢𑁆𑀯’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀸𑀫𑀲𑀤𑁆𑀤𑁂𑀦 𑀬𑁄𑀚𑁂𑀢𑀩𑁆𑀩𑀁 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀺 𑀦𑀸𑀫𑀸’’𑀢𑀺.

𑀩𑀳𑀽𑀦𑀁 𑀔𑁄…𑀧𑁂… 𑀆𑀤𑀺𑀓𑀢𑁆𑀢𑀸 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀲𑀸𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀢𑁆𑀯𑀁 𑀩𑀳𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀤𑀺𑀓𑀢𑁆𑀢𑀸, 𑀲𑀩𑁆𑀩𑀧𑀞𑀫𑀁 𑀓𑀭𑀡𑀢𑁄; 𑀧𑀼𑀩𑁆𑀩𑀗𑁆𑀕𑀫𑁄 𑀲𑀩𑁆𑀩𑀧𑀞𑀫𑀁 𑀏𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀢𑁆𑀢𑀸; 𑀤𑁆𑀯𑀸𑀭𑀁𑀤𑀤𑁄, 𑀉𑀧𑀸𑀬𑀤𑀲𑁆𑀲𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀜𑁆𑀳𑀺 𑀮𑁂𑀲𑀁 𑀮𑀤𑁆𑀥𑀸 𑀢𑀯 𑀅𑀦𑀼𑀲𑀺𑀓𑁆𑀔𑀫𑀸𑀦𑀸 𑀩𑀳𑀽 𑀧𑀼𑀕𑁆𑀕𑀮𑀸 𑀦𑀸𑀦𑀧𑁆𑀧𑀓𑀸𑀭𑀓𑁂 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀧𑀝𑀺𑀲𑁂𑀯𑀦𑀸𑀤𑀺𑀓𑁂 𑀅𑀓𑀼𑀲𑀮𑀥𑀫𑁆𑀫𑁂 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑁂𑀳𑀺 ‘‘𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀳𑀺, 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺. 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀓𑁄𑀲𑀚𑁆𑀚𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸𑀢𑀺 𑀤𑀼𑀩𑁆𑀪𑀭𑀢𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀲𑀁𑀯𑀭𑀲𑁆𑀲 𑀅𑀯𑀡𑁆𑀡𑀁 𑀦𑀺𑀦𑁆𑀤𑀁 𑀕𑀭𑀳𑀁 𑀪𑀸𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀳𑀺 𑀅𑀲𑀁𑀯𑀭𑁂 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀢𑀸 𑀤𑀼𑀩𑁆𑀪𑀭𑀢𑀜𑁆𑀘𑁂𑀯 𑀤𑀼𑀧𑁆𑀧𑁄𑀲𑀢𑀜𑁆𑀘 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀲𑀁𑀯𑀭𑁄 ‘‘𑀤𑀼𑀩𑁆𑀪𑀭𑀢𑀸, 𑀤𑀼𑀧𑁆𑀧𑁄𑀲𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀧𑀦 𑀅𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀫𑀳𑀺𑀘𑁆𑀙𑀢𑀁 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁂𑀧𑀺 𑀘 𑀧𑀘𑁆𑀘𑀬𑁂 𑀮𑀤𑁆𑀥𑀸 𑀅𑀲𑀦𑁆𑀢𑀼𑀝𑁆𑀞𑀺𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀲𑀁𑀯𑀭𑁄 ‘‘𑀫𑀳𑀺𑀘𑁆𑀙𑀢𑀸, 𑀅𑀲𑀦𑁆𑀢𑀼𑀝𑁆𑀞𑀺𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀅𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀕𑀡𑀲𑀗𑁆𑀕𑀡𑀺𑀓𑀸𑀬 𑀘𑁂𑀯 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀓𑁄𑀲𑀚𑁆𑀚𑀸𑀦𑀼𑀕𑀢𑁄 𑀘 𑀳𑁄𑀢𑀺 𑀅𑀝𑁆𑀞𑀓𑀼𑀲𑀻𑀢𑀯𑀢𑁆𑀣𑀼𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀲𑀁𑀯𑀭𑁄 ‘‘𑀲𑀗𑁆𑀕𑀡𑀺𑀓𑀸, 𑀘𑁂𑀯 𑀓𑁄𑀲𑀚𑁆𑀚𑀜𑁆𑀘𑀸’’𑀢𑀺 𑀯𑀼𑀘𑁆𑀘𑀢𑀺.

𑀲𑀼𑀪𑀭𑀢𑀸𑀬…𑀧𑁂… 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸𑀢𑀺 𑀲𑀼𑀪𑀭𑀢𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀲𑁆𑀲 𑀲𑀁𑀯𑀭𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀳𑀺 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀲𑀼𑀪𑀭𑁄 𑀳𑁄𑀢𑀺 𑀲𑀼𑀧𑁄𑀲𑁄, 𑀘𑀢𑀽𑀲𑀼 𑀘 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑀢𑀁 𑀦𑀺𑀢𑁆𑀢𑀡𑁆𑀳𑀪𑀸𑀯𑀁 𑀆𑀧𑀚𑁆𑀚𑀢𑀺, 𑀏𑀓𑀫𑁂𑀓𑀲𑁆𑀫𑀺𑀜𑁆𑀘 𑀧𑀘𑁆𑀘𑀬𑁂 𑀬𑀣𑀸𑀮𑀸𑀪-𑀬𑀣𑀸𑀩𑀮-𑀬𑀣𑀸𑀲𑀸𑀭𑀼𑀧𑁆𑀧𑀯𑀲𑁂𑀦 𑀢𑀺𑀧𑁆𑀧𑀪𑁂𑀤𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀲𑀼𑀪𑀭𑀢𑀸 𑀘𑁂𑀯 𑀲𑀼𑀧𑁄𑀲𑀢𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀘 𑀲𑀦𑁆𑀢𑀼𑀝𑁆𑀞𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀢𑀸𑀬 𑀘𑁂𑀯 𑀦𑀺𑀤𑁆𑀥𑀼𑀦𑀦𑀢𑀸𑀬 𑀘 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀲𑀮𑁆𑀮𑁂𑀔𑁄 𑀘 𑀥𑀼𑀢𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀘 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀓𑀸𑀬𑀯𑀸𑀘𑀸𑀦𑀁 𑀅𑀧𑁆𑀧𑀸𑀲𑀸𑀤𑀺𑀓𑀁 𑀅𑀧𑁆𑀧𑀲𑀸𑀤𑀦𑀻𑀬𑀁 𑀅𑀲𑀦𑁆𑀢𑀁 𑀅𑀲𑀸𑀭𑀼𑀧𑁆𑀧𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀘𑀺𑀢𑁆𑀢𑀲𑁆𑀲 𑀅𑀧𑁆𑀧𑀸𑀲𑀸𑀤𑀺𑀓𑀁 𑀅𑀧𑁆𑀧𑀲𑀸𑀤𑀦𑀻𑀬𑀁 𑀅𑀲𑀦𑁆𑀢𑀁 𑀅𑀲𑀸𑀭𑀼𑀧𑁆𑀧𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀢𑁆𑀢𑀬𑀜𑁆𑀘 𑀅𑀦𑀼𑀧𑀕𑀫𑁆𑀫 𑀢𑀩𑁆𑀩𑀺𑀧𑀭𑀻𑀢𑀲𑁆𑀲 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀲𑁆𑀲 𑀘𑁂𑀯 𑀓𑀼𑀲𑀮𑀯𑀺𑀢𑀓𑁆𑀓𑀢𑁆𑀢𑀬𑀲𑁆𑀲 𑀘 𑀧𑀸𑀲𑀸𑀤𑀺𑀓𑀲𑁆𑀲 𑀧𑀲𑀸𑀤𑀦𑀻𑀬𑀲𑁆𑀲 𑀲𑀦𑁆𑀢𑀲𑁆𑀲 𑀲𑀸𑀭𑀼𑀧𑁆𑀧𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀧𑀸𑀲𑀸𑀤𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺.

𑀬𑀲𑁆𑀫𑀸 𑀧𑀦 𑀅𑀲𑀁𑀯𑀭𑀁 𑀧𑀳𑀸𑀬 𑀲𑀁𑀯𑀭𑁂 𑀞𑀺𑀢𑀲𑁆𑀲 𑀅𑀢𑁆𑀢𑀸 𑀲𑀩𑁆𑀩𑀓𑀺𑀮𑁂𑀲𑀸𑀧𑀘𑀬𑀪𑀽𑀢𑀸𑀬, 𑀯𑀺𑀯𑀝𑁆𑀝𑀸𑀬, 𑀅𑀝𑁆𑀞𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀸𑀭𑀺𑀧𑀽𑀭𑀺𑀬𑀸 𑀘 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀁𑀯𑀭𑁄 ‘‘𑀅𑀧𑀘𑀬𑁄 𑀘𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀦𑁆𑀢𑀺 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀁 𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀢𑀺, 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀜𑁆𑀘𑁂𑀯 𑀅𑀦𑀼𑀮𑁄𑀫𑀺𑀓𑀜𑁆𑀘. 𑀬𑁄 𑀯𑀸 𑀅𑀬𑀁 𑀲𑀼𑀪𑀭𑀢𑀸𑀤𑀻𑀳𑀺 𑀲𑀁𑀯𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀜𑁆𑀘𑁂𑀯 𑀅𑀦𑀼𑀮𑁄𑀫𑀺𑀓𑀜𑁆𑀘 𑀲𑀁𑀯𑀭𑀧𑁆𑀧𑀳𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀅𑀲𑀼𑀢𑁆𑀢𑀦𑁆𑀢𑀯𑀺𑀦𑀺𑀩𑀤𑁆𑀥𑀁 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀁 𑀑𑀓𑁆𑀓𑀦𑁆𑀢𑀺𑀓𑀥𑀫𑁆𑀫𑀤𑁂𑀲𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀓𑀺𑀭 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀫𑀸𑀮𑀁 𑀓𑀭𑁄𑀦𑁆𑀢𑁄 𑀯𑀺𑀬, 𑀭𑀢𑀦𑀤𑀸𑀫𑀁 𑀲𑀚𑁆𑀚𑁂𑀦𑁆𑀢𑁄 𑀯𑀺𑀬, 𑀘 𑀬𑁂 𑀧𑀝𑀺𑀓𑁆𑀔𑀺𑀧𑀦𑀸𑀥𑀺𑀧𑁆𑀧𑀸𑀬𑀸 𑀅𑀲𑀁𑀯𑀭𑀸𑀪𑀺𑀭𑀢𑀸 𑀢𑁂 𑀲𑀫𑁆𑀧𑀭𑀸𑀬𑀺𑀓𑁂𑀦 𑀯𑀝𑁆𑀝𑀪𑀬𑁂𑀦 𑀢𑀚𑁆𑀚𑁂𑀦𑁆𑀢𑁄 𑀅𑀦𑁂𑀓𑀧𑁆𑀧𑀓𑀸𑀭𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄, 𑀬𑁂 𑀲𑀺𑀓𑁆𑀔𑀸𑀓𑀸𑀫𑀸 𑀲𑀁𑀯𑀭𑁂 𑀞𑀺𑀢𑀸 𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀅𑀧𑁆𑀧𑁂𑀓𑀘𑁆𑀘𑁂 𑀅𑀦𑀸𑀕𑀸𑀫𑀺-𑀲𑀓𑀤𑀸𑀕𑀸𑀫𑀺-𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀲𑀼 𑀉𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑁂𑀧𑀺 𑀲𑀕𑁆𑀕𑀫𑀕𑁆𑀕𑁂 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀤𑀻𑀖𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑁆𑀧𑀫𑀸𑀡𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸’’𑀢𑀺.

𑀢𑁂𑀦 𑀳𑀻𑀢𑀺 𑀢𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀅𑀚𑁆𑀛𑀸𑀘𑀸𑀭𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀏𑀢𑁆𑀣 𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀺𑀓𑁆𑀔𑀸, 𑀧𑀚𑁆𑀚𑀢𑁂 𑀇𑀫𑀺𑀦𑀸𑀢𑀺 𑀧𑀤𑀁, 𑀲𑀺𑀓𑁆𑀔𑀸𑀬 𑀧𑀤𑀁 𑀲𑀺𑀓𑁆𑀔𑀸𑀧𑀤𑀁; 𑀲𑀺𑀓𑁆𑀔𑀸𑀬 𑀅𑀥𑀺𑀕𑀫𑀼𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀽𑀮𑀁 𑀦𑀺𑀲𑁆𑀲𑀬𑁄 𑀧𑀢𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑁂𑀣𑀼𑀦𑀯𑀺𑀭𑀢𑀺𑀬𑀸 𑀫𑁂𑀣𑀼𑀦𑀲𑀁𑀯𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀫𑁂𑀣𑀼𑀦𑀲𑀁𑀯𑀭𑁄 𑀳𑀺 𑀢𑀤𑀜𑁆𑀜𑁂𑀲𑀁 𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀁 𑀲𑀻𑀮𑀯𑀺𑀧𑀲𑁆𑀲𑀦𑀸𑀛𑀸𑀦𑀫𑀕𑁆𑀕𑀥𑀫𑁆𑀫𑀸𑀦𑀁 𑀯𑀼𑀢𑁆𑀢𑀢𑁆𑀣𑀯𑀲𑁂𑀦 𑀧𑀤𑀢𑁆𑀢𑀸 𑀇𑀥 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀢𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑀁 𑀯𑀘𑀦𑀫𑁆𑀧𑀺 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀬𑁄 𑀢𑀢𑁆𑀣 𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄 𑀦𑀺𑀭𑀼𑀢𑁆𑀢𑀺𑀓𑀸𑀬𑁄 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺. 𑀅𑀣 𑀯𑀸 𑀬𑀣𑀸 ‘‘𑀅𑀦𑀪𑀺𑀚𑁆𑀛𑀸 𑀥𑀫𑁆𑀫𑀧𑀤’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑀪𑀺𑀚𑁆𑀛𑀸 𑀏𑀓𑁄 𑀥𑀫𑁆𑀫𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁄 𑀲𑀺𑀓𑁆𑀔𑀸𑀬 𑀏𑀓𑁄 𑀧𑀤𑁂𑀲𑁄𑀢𑀺𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀲𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘𑀸𑀢𑀺 𑀤𑀲 𑀓𑀸𑀭𑀡𑀯𑀲𑁂 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼 𑀅𑀥𑀺𑀕𑀫𑀦𑀻𑀬𑁂 𑀳𑀺𑀢𑀯𑀺𑀲𑁂𑀲𑁂 𑀧𑀝𑀺𑀘𑁆𑀘 𑀆𑀕𑀫𑁆𑀫 𑀆𑀭𑀩𑁆𑀪, 𑀤𑀲𑀦𑁆𑀦𑀁 𑀳𑀺𑀢𑀯𑀺𑀲𑁂𑀲𑀸𑀦𑀁 𑀦𑀺𑀧𑁆𑀨𑀢𑁆𑀢𑀺𑀁 𑀲𑀫𑁆𑀧𑀲𑁆𑀲𑀫𑀸𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀢𑁂 𑀤𑀲 𑀅𑀢𑁆𑀣𑀯𑀲𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀖𑀲𑀼𑀝𑁆𑀞𑀼𑀢𑀸 𑀦𑀸𑀫 𑀲𑀗𑁆𑀖𑀲𑁆𑀲 𑀲𑀼𑀝𑁆𑀞𑀼𑀪𑀸𑀯𑁄, ‘‘𑀲𑀼𑀝𑁆𑀞𑀼 𑀤𑁂𑀯𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀺𑀬 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀪𑀸𑀯𑁄. 𑀬𑁄 𑀘 𑀢𑀣𑀸𑀕𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀲𑁆𑀲 ‘‘𑀲𑀼𑀝𑁆𑀞𑀼, 𑀪𑀦𑁆𑀢𑁂’’𑀢𑀺 𑀫𑀫 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀅𑀲𑀫𑁆𑀧𑀝𑀺𑀘𑁆𑀙𑀦𑁂 𑀆𑀤𑀻𑀦𑀯𑀁 𑀲𑀫𑁆𑀧𑀝𑀺𑀘𑁆𑀙𑀦𑁂 𑀘 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸, 𑀦 𑀩𑀮𑀓𑁆𑀓𑀸𑀭𑁂𑀦 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀏𑀢𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀆𑀳 𑁋 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺. 𑀲𑀗𑁆𑀖𑀨𑀸𑀲𑀼𑀢𑀸𑀬𑀸𑀢𑀺 𑀲𑀗𑁆𑀖𑀲𑁆𑀲 𑀨𑀸𑀲𑀼𑀪𑀸𑀯𑀸𑀬; 𑀲𑀳𑀚𑀻𑀯𑀺𑀢𑀸𑀬 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀤𑀼𑀫𑁆𑀫𑀗𑁆𑀓𑀽 𑀦𑀸𑀫 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀸; 𑀬𑁂 𑀫𑀗𑁆𑀓𑀼𑀢𑀁 𑀆𑀧𑀸𑀤𑀺𑀬𑀫𑀸𑀦𑀸𑀧𑀺 𑀤𑀼𑀓𑁆𑀔𑁂𑀦 𑀆𑀧𑀚𑁆𑀚𑀦𑁆𑀢𑀺, 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑀸 𑀯𑀸 𑀓𑀢𑁆𑀯𑀸 𑀯𑀸 𑀦 𑀮𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀦𑀺𑀕𑁆𑀕𑀳𑀢𑁆𑀣𑀸𑀬; 𑀢𑁂 𑀳𑀺 𑀲𑀺𑀓𑁆𑀔𑀸𑀧𑀤𑁂 𑀅𑀲𑀢𑀺 ‘‘𑀓𑀺𑀁 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁, 𑀓𑀺𑀁 𑀲𑀼𑀢𑀁 𑁋 𑀓𑀺𑀁 𑀅𑀫𑁆𑀳𑁂𑀳𑀺 𑀓𑀢𑀁; 𑀓𑀢𑀭𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀢𑀫𑀁 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀅𑀫𑁆𑀳𑁂 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺 𑀲𑀗𑁆𑀖𑀁 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺, 𑀲𑀺𑀓𑁆𑀔𑀸𑀧𑀤𑁂 𑀧𑀦 𑀲𑀢𑀺 𑀢𑁂 𑀲𑀗𑁆𑀖𑁄 𑀲𑀺𑀓𑁆𑀔𑀸𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀦𑀺𑀕𑁆𑀕𑀳𑁂𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺.

𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸𑀢𑀺 𑀧𑁂𑀲𑀮𑀸𑀦𑀁 𑀧𑀺𑀬𑀲𑀻𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬. 𑀧𑀺𑀬𑀲𑀻𑀮𑀸 𑀳𑀺 𑀪𑀺𑀓𑁆𑀔𑀽 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀁 𑀅𑀚𑀸𑀦𑀦𑁆𑀢𑀸 𑀲𑀺𑀓𑁆𑀔𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸 𑀓𑀺𑀮𑀫𑀦𑁆𑀢𑀺, 𑀲𑀦𑁆𑀤𑀺𑀝𑁆𑀞𑀫𑀸𑀦𑀸 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀧𑀦 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀯𑁂𑀮𑀁 𑀫𑀭𑀺𑀬𑀸𑀤𑀁 𑀜𑀢𑁆𑀯𑀸 𑀲𑀺𑀓𑁆𑀔𑀢𑁆𑀢𑀬𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑀫𑀸𑀦𑀸 𑀦 𑀓𑀺𑀮𑀫𑀦𑁆𑀢𑀺, 𑀲𑀦𑁆𑀤𑀺𑀝𑁆𑀞𑀫𑀸𑀦𑀸 𑀦 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺. 𑀢𑁂𑀦 𑀦𑁂𑀲𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀸 𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀁𑀯𑀢𑁆𑀢𑀢𑀺. 𑀬𑁄 𑀯𑀸 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑁄, 𑀲𑁆𑀯𑁂𑀯 𑀏𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑁄. 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁂 𑀦𑀺𑀲𑁆𑀲𑀸𑀬 𑀳𑀺 𑀉𑀧𑁄𑀲𑀣𑁄 𑀦 𑀢𑀺𑀝𑁆𑀞𑀢𑀺, 𑀧𑀯𑀸𑀭𑀡𑀸 𑀦 𑀢𑀺𑀝𑁆𑀞𑀢𑀺, 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀲𑀸𑀫𑀕𑁆𑀕𑀻 𑀦 𑀳𑁄𑀢𑀺, 𑀪𑀺𑀓𑁆𑀔𑀽 𑀅𑀦𑁂𑀓𑀕𑁆𑀕𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀦𑀺 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀤𑀼𑀲𑁆𑀲𑀻𑀮𑁂𑀲𑀼 𑀧𑀦 𑀦𑀺𑀕𑁆𑀕𑀳𑀺𑀢𑁂𑀲𑀼 𑀲𑀩𑁆𑀩𑁄𑀧𑀺 𑀅𑀬𑀁 𑀉𑀧𑀤𑁆𑀤𑀯𑁄 𑀦 𑀳𑁄𑀢𑀺. 𑀢𑀢𑁄 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑀦𑁆𑀢𑀺. 𑀏𑀯𑀁 ‘‘𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼 𑀯𑀺𑀳𑀸𑀭𑀸𑀬𑀸’’𑀢𑀺 𑀏𑀢𑁆𑀣 𑀤𑁆𑀯𑀺𑀥𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀆𑀲𑀯𑀸 𑀦𑀸𑀫 𑀅𑀲𑀁𑀯𑀭𑁂 𑀞𑀺𑀢𑁂𑀦 𑀢𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀸 𑀧𑀸𑀡𑀺𑀧𑁆𑀧𑀳𑀸𑀭-𑀤𑀡𑁆𑀟𑀧𑁆𑀧𑀳𑀸𑀭-𑀳𑀢𑁆𑀣𑀘𑁆𑀙𑁂𑀤-𑀧𑀸𑀤𑀘𑁆𑀙𑁂𑀤-𑀅𑀓𑀺𑀢𑁆𑀢𑀺-𑀅𑀬𑀲𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀬𑁄 𑀤𑀼𑀓𑁆𑀔𑀯𑀺𑀲𑁂𑀲𑀸. 𑀇𑀢𑀺 𑀇𑀫𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬 𑀧𑀺𑀥𑀸𑀦𑀸𑀬 𑀆𑀕𑀫𑀦𑀫𑀕𑁆𑀕𑀣𑀓𑀦𑀸𑀬𑀸𑀢𑀺 𑀅𑀢𑁆𑀣𑁄.

𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬𑀸𑀢𑀺 𑀲𑀫𑁆𑀧𑀭𑀸𑀬𑀺𑀓𑀸 𑀆𑀲𑀯𑀸 𑀦𑀸𑀫 𑀅𑀲𑀁𑀯𑀭𑁂 𑀞𑀺𑀢𑁂𑀦 𑀓𑀢𑀧𑀸𑀧𑀓𑀫𑁆𑀫𑀫𑀽𑀮𑀓𑀸 𑀲𑀫𑁆𑀧𑀭𑀸𑀬𑁂 𑀦𑀭𑀓𑀸𑀤𑀻𑀲𑀼 𑀧𑀢𑁆𑀢𑀩𑁆𑀩𑀸 𑀤𑀼𑀓𑁆𑀔𑀯𑀺𑀲𑁂𑀲𑀸, 𑀢𑁂𑀲𑀁 𑀧𑀝𑀺𑀖𑀸𑀢𑀢𑁆𑀣𑀸𑀬 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀢𑁆𑀣𑀸𑀬 𑀯𑀽𑀧𑀲𑀫𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀯𑀸 𑀬𑁂𑀧𑀺 𑀅𑀧𑁆𑀧𑀲𑀦𑁆𑀦𑀸 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸, 𑀢𑁂 ‘‘𑀬𑀸𑀦𑀺 𑀯𑀢 𑀮𑁄𑀓𑁂 𑀫𑀳𑀸𑀚𑀦𑀲𑁆𑀲 𑀭𑀚𑁆𑀚𑀦-𑀤𑀼𑀲𑁆𑀲𑀦-𑀫𑀼𑀬𑁆𑀳𑀦𑀝𑁆𑀞𑀸𑀦𑀸𑀦𑀺, 𑀢𑁂𑀳𑀺 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀆𑀭𑀓𑀸 𑀯𑀺𑀭𑀢𑀸 𑀯𑀺𑀳𑀭𑀦𑁆𑀢𑀺, 𑀤𑀼𑀓𑁆𑀓𑀭𑀁 𑀯𑀢 𑀓𑀭𑁄𑀦𑁆𑀢𑀺, 𑀪𑀸𑀭𑀺𑀬𑀁 𑀯𑀢 𑀓𑀭𑁄𑀦𑁆𑀢𑀻’’𑀢𑀺 𑀧𑀲𑀸𑀤𑀁 𑀆𑀧𑀚𑁆𑀚𑀦𑁆𑀢𑀺, 𑀯𑀺𑀦𑀬𑀧𑀺𑀝𑀓𑁂 𑀧𑁄𑀢𑁆𑀣𑀓𑀁 𑀤𑀺𑀲𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓-𑀢𑀺𑀯𑁂𑀤𑀻 𑀩𑁆𑀭𑀸𑀳𑁆𑀫𑀡𑁄 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬𑀸’’𑀢𑀺.

𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀬𑁂𑀧𑀺 𑀲𑀸𑀲𑀦𑁂 𑀧𑀲𑀦𑁆𑀦𑀸 𑀓𑀼𑀮𑀧𑀼𑀢𑁆𑀢𑀸 𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀜𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀽 𑀯𑀸 𑀤𑀺𑀲𑁆𑀯𑀸 ‘‘𑀅𑀳𑁄 𑀅𑀬𑁆𑀬𑀸 𑀤𑀼𑀓𑁆𑀓𑀭𑀓𑀸𑀭𑀺𑀦𑁄, 𑀬𑁂 𑀬𑀸𑀯𑀚𑀻𑀯𑀁 𑀏𑀓𑀪𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀺𑀦𑀬𑀲𑀁𑀯𑀭𑀁 𑀅𑀦𑀼𑀧𑀸𑀮𑁂𑀦𑁆𑀢𑀻’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀲𑀻𑀤𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬𑀸’’𑀢𑀺.

𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸𑀢𑀺 𑀢𑀺𑀯𑀺𑀥𑁄 𑀲𑀤𑁆𑀥𑀫𑁆𑀫𑁄 𑁋 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄𑀢𑀺. 𑀢𑀢𑁆𑀣 𑀧𑀺𑀝𑀓𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 ‘‘𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄’’ 𑀦𑀸𑀫. 𑀢𑁂𑀭𑀲 𑀥𑀼𑀢𑀕𑀼𑀡𑀸, 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺, 𑀤𑁆𑀯𑁂𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀺, 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀢𑀺 𑀅𑀬𑀁 ‘‘𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄’’ 𑀦𑀸𑀫. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀅𑀬𑀁 ‘‘𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄’’ 𑀦𑀸𑀫. 𑀲𑁄 𑀲𑀩𑁆𑀩𑁄𑀧𑀺 𑀬𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀪𑀺𑀓𑁆𑀔𑀽 𑀲𑀺𑀓𑁆𑀔𑀸𑀧𑀤𑀜𑁆𑀘 𑀢𑀲𑁆𑀲 𑀯𑀺𑀪𑀗𑁆𑀕𑀜𑁆𑀘 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀅𑀜𑁆𑀜𑀜𑁆𑀘 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑀜𑁆𑀘 𑀧𑀝𑀺𑀧𑀚𑁆𑀚𑀫𑀸𑀦𑀸 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀦𑁆𑀢𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸’’𑀢𑀺.

𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀲𑀁𑀯𑀭𑀯𑀺𑀦𑀬𑁄 𑀘 𑀧𑀳𑀸𑀦𑀯𑀺𑀦𑀬𑁄 𑀘 𑀲𑀫𑀣𑀯𑀺𑀦𑀬𑁄 𑀘 𑀧𑀜𑁆𑀜𑀢𑁆𑀢𑀺𑀯𑀺𑀦𑀬𑁄 𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑁄𑀧𑀺 𑀯𑀺𑀦𑀬𑁄 𑀅𑀦𑀼𑀕𑁆𑀕𑀳𑀺𑀢𑁄 𑀳𑁄𑀢𑀺 𑀉𑀧𑀢𑁆𑀣𑀫𑁆𑀪𑀺𑀢𑁄 𑀲𑀽𑀧𑀢𑁆𑀣𑀫𑁆𑀪𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺.

𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀧𑀤𑀸𑀦𑀺 ‘‘𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀢𑁆𑀭𑀸𑀬𑀁 𑀧𑀞𑀫𑀧𑀘𑁆𑀙𑀺𑀫𑀧𑀤𑀬𑁄𑀚𑀦𑀸 𑁋 ‘‘𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺.

𑀅𑀧𑀺 𑀘𑁂𑀢𑁆𑀣 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀨𑀸𑀲𑀼 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀏𑀯𑀁 𑀲𑀗𑁆𑀔𑀮𑀺𑀓𑀦𑀬𑀁; 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼 𑀢𑀁 𑀲𑀗𑁆𑀖𑀨𑀸𑀲𑀼, 𑀬𑀁 𑀲𑀗𑁆𑀖𑀲𑀼𑀝𑁆𑀞𑀼 𑀢𑀁 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀏𑀯𑀜𑁆𑀘 𑀏𑀓𑁂𑀓𑀧𑀤𑀫𑀽𑀮𑀺𑀓𑀁 𑀤𑀲𑀓𑁆𑀔𑀢𑁆𑀢𑀼𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀬𑀁 𑀯𑀼𑀢𑁆𑀢𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁩𑁪) 𑁋

‘‘𑀅𑀢𑁆𑀣𑀲𑀢𑀁 𑀥𑀫𑁆𑀫𑀲𑀢𑀁, 𑀤𑁆𑀯𑁂 𑀘 𑀦𑀺𑀭𑀼𑀢𑁆𑀢𑀺𑀲𑀢𑀸𑀦𑀺;

𑀘𑀢𑁆𑀢𑀸𑀭𑀺 𑀜𑀸𑀡𑀲𑀢𑀸𑀦𑀺, 𑀅𑀢𑁆𑀣𑀯𑀲𑁂 𑀧𑀓𑀭𑀡𑁂’’𑀢𑀺.

𑀢𑀁 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦𑁂𑀢𑀁 𑀬𑀲𑁆𑀫𑀸 𑀧𑀭𑀺𑀯𑀸𑀭𑁂𑀬𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀇𑀥 𑀦 𑀯𑀡𑁆𑀡𑀺𑀢𑀦𑁆𑀢𑀺.

𑀏𑀯𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀪𑀺𑀓𑁆𑀔𑀽𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀤𑀻𑀧𑁂𑀦𑁆𑀢𑁄 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀦 𑀫𑀬𑀸 𑀇𑀢𑀺 𑀲𑀦𑁆𑀤𑀲𑁆𑀲𑀺𑀢𑀸𑀦𑀺𑀲𑀁𑀲𑀁 𑀲𑀺𑀓𑁆𑀔𑀸𑀧𑀤𑀁 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑀘 𑀧𑀭𑀺𑀬𑀸𑀧𑀼𑀡𑁂𑀬𑁆𑀬𑀸𑀣 𑀘 𑀥𑀸𑀭𑁂𑀬𑁆𑀬𑀸𑀣 𑀘 𑀅𑀜𑁆𑀜𑁂𑀲𑀜𑁆𑀘 𑀯𑀸𑀘𑁂𑀬𑁆𑀬𑀸𑀣𑀸𑀢𑀺. 𑀅𑀢𑀺𑀭𑁂𑀓𑀸𑀦𑀬𑀦𑀢𑁆𑀣𑁄 𑀳𑀺 𑀏𑀢𑁆𑀣 𑀘 𑀲𑀤𑁆𑀤𑁄, 𑀢𑁂𑀦𑀸𑀬𑀫𑀢𑁆𑀣𑁄 𑀆𑀦𑀻𑀢𑁄 𑀳𑁄𑀢𑀻𑀢𑀺.

𑀇𑀤𑀸𑀦𑀺 𑀬𑀁 𑀯𑀼𑀢𑁆𑀢𑀁 ‘‘𑀇𑀫𑀁 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀆𑀳. 𑀏𑀯𑀁 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀧𑀞𑀫𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀫𑀓𑁆𑀓𑀝𑀻𑀯𑀢𑁆𑀣𑀼 𑀉𑀤𑀧𑀸𑀤𑀺. 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀏𑀯𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺 𑀘, 𑀇𑀤𑀜𑁆𑀘 𑀅𑀜𑁆𑀜𑀁 𑀯𑀢𑁆𑀣𑀼 𑀉𑀤𑀧𑀸𑀤𑀻𑀢𑀺.

𑀧𑀞𑀫𑀧𑀜𑁆𑀜𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀁 𑀦𑀺𑀝𑁆𑀞𑀺𑀢𑀁.

𑀫𑀓𑁆𑀓𑀝𑀻𑀯𑀢𑁆𑀣𑀼𑀓𑀣𑀸

𑁪𑁦. 𑀇𑀤𑀸𑀦𑀺 𑀬𑀁 𑀢𑀁 𑀅𑀜𑁆𑀜𑀁 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀫𑀓𑁆𑀓𑀝𑀺𑀁 𑀆𑀫𑀺𑀲𑁂𑀦𑀸𑀢𑀺 𑀫𑀳𑀸𑀯𑀦𑁂 𑀪𑀺𑀓𑁆𑀔𑀽𑀦𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀤𑀺𑀕𑀼𑀡𑀸𑀦𑀼𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀸 𑀩𑀳𑀽 𑀫𑀺𑀕𑀫𑁄𑀭𑀓𑀼𑀓𑁆𑀓𑀼𑀝𑀫𑀓𑁆𑀓𑀝𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀸 𑀧𑀥𑀸𑀦𑀸𑀕𑀸𑀭𑀝𑁆𑀞𑀸𑀦𑁂𑀲𑀼 𑀯𑀺𑀘𑀭𑀦𑁆𑀢𑀺. 𑀢𑀢𑁆𑀭 𑀏𑀓𑀁 𑀫𑀓𑁆𑀓𑀝𑀺𑀁 𑀆𑀫𑀺𑀲𑁂𑀦 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑀸𑀤𑀺𑀦𑀸 𑀉𑀧𑀮𑀸𑀧𑁂𑀢𑁆𑀯𑀸, 𑀲𑀗𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀧𑀝𑀺𑀲𑁂𑀯𑀢𑀻𑀢𑀺 𑀧𑀘𑀼𑀭𑀧𑀝𑀺𑀲𑁂𑀯𑀦𑁄 𑀳𑁄𑀢𑀺; 𑀧𑀘𑀼𑀭𑀢𑁆𑀣𑁂 𑀳𑀺 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀲𑁄 𑀪𑀺𑀓𑁆𑀔𑀽𑀢𑀺 𑀲𑁄 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀦𑀓𑁄 𑀪𑀺𑀓𑁆𑀔𑀼. 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸𑀢𑀺 𑀢𑁂 𑀪𑀺𑀓𑁆𑀔𑀽 𑀆𑀕𑀦𑁆𑀢𑀼𑀓𑀸 𑀩𑀼𑀤𑁆𑀥𑀤𑀲𑁆𑀲𑀦𑀸𑀬 𑀆𑀕𑀢𑀸 𑀧𑀸𑀢𑁄𑀯 𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀦𑀺 𑀮𑀪𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀪𑀺𑀓𑁆𑀔𑀽𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀦𑀺 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀯𑀺𑀘𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸’’𑀢𑀺. 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀦𑀸𑀫 𑀏𑀓𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀁 𑀓𑀢𑁆𑀯𑀸 𑀅𑀜𑁆𑀜𑁂𑀲𑀼𑀧𑀺 𑀢𑀸𑀤𑀺𑀲𑀜𑁆𑀜𑁂𑀯 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀢𑀲𑁆𑀫𑀸 𑀲𑀸 𑀫𑀓𑁆𑀓𑀝𑀻 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘 𑀅𑀢𑁆𑀢𑀦𑁄 𑀯𑀺𑀲𑁆𑀲𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲𑁂𑀯 𑀢𑁂𑀲𑀫𑁆𑀧𑀺 𑀢𑀁 𑀯𑀺𑀓𑀸𑀭𑀁 𑀤𑀲𑁆𑀲𑁂𑀲𑀺.

𑀙𑁂𑀧𑁆𑀧𑀦𑁆𑀢𑀺 𑀦𑀗𑁆𑀕𑀼𑀝𑁆𑀞𑀁. 𑀑𑀟𑁆𑀟𑀻𑀢𑀺 𑀅𑀪𑀺𑀫𑀼𑀔𑀁 𑀞𑀧𑁂𑀲𑀺. 𑀦𑀺𑀫𑀺𑀢𑁆𑀢𑀫𑁆𑀧𑀺 𑀅𑀓𑀸𑀲𑀻𑀢𑀺 𑀬𑁂𑀦 𑀦𑀺𑀬𑀸𑀫𑁂𑀦 𑀬𑀸𑀬 𑀓𑀺𑀭𑀺𑀬𑀸𑀬 𑀫𑁂𑀣𑀼𑀦𑀸𑀥𑀺𑀧𑁆𑀧𑀸𑀬𑀁 𑀢𑁂 𑀚𑀸𑀦𑀦𑁆𑀢𑀺 𑀢𑀁 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀪𑀺𑀓𑁆𑀔𑀽𑀢𑀺 𑀬𑀲𑁆𑀲𑀸𑀬𑀁 𑀯𑀺𑀳𑀸𑀭𑁄. 𑀏𑀓𑀫𑀦𑁆𑀢𑀁 𑀦𑀺𑀮𑀻𑀬𑀺𑀁𑀲𑀽𑀢𑀺 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀧𑀝𑀺𑀘𑁆𑀙𑀦𑁆𑀦𑀸 𑀅𑀘𑁆𑀙𑀺𑀁𑀲𑀼.

𑁪𑁧. 𑀲𑀘𑁆𑀘𑀁, 𑀆𑀯𑀼𑀲𑁄𑀢𑀺 𑀲𑀳𑁄𑀟𑁆𑀠𑀕𑁆𑀕𑀳𑀺𑀢𑁄 𑀘𑁄𑀭𑁄 𑀯𑀺𑀬 𑀧𑀘𑁆𑀘𑀓𑁆𑀔𑀁 𑀤𑀺𑀲𑁆𑀯𑀸 𑀘𑁄𑀤𑀺𑀢𑀢𑁆𑀢𑀸 ‘‘𑀓𑀺𑀁 𑀯𑀸 𑀫𑀬𑀸 𑀓𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀘𑁆𑀘𑀁, 𑀆𑀯𑀼𑀲𑁄’’𑀢𑀺 𑀆𑀳. 𑀦𑀦𑀼, 𑀆𑀯𑀼𑀲𑁄, 𑀢𑀣𑁂𑀯 𑀢𑀁 𑀳𑁄𑀢𑀻𑀢𑀺 𑀆𑀯𑀼𑀲𑁄 𑀬𑀣𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸, 𑀦𑀦𑀼 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀧𑀺 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀢𑀣𑁂𑀯 𑀳𑁄𑀢𑀺. 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸𑀧𑀺 𑀳𑀺 𑀤𑀲𑁆𑀲𑀦𑀫𑁆𑀧𑀺 𑀕𑀳𑀡𑀫𑁆𑀧𑀺 𑀆𑀫𑀲𑀦𑀫𑁆𑀧𑀺 𑀨𑀼𑀲𑀦𑀫𑁆𑀧𑀺 𑀖𑀝𑁆𑀝𑀦𑀫𑁆𑀧𑀺 𑀤𑀼𑀝𑁆𑀞𑀼𑀮𑁆𑀮𑀫𑁂𑀯. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀧𑀺 𑀢𑀁 𑀲𑀩𑁆𑀩𑀁 𑀤𑀼𑀝𑁆𑀞𑀼𑀮𑁆𑀮𑀫𑁂𑀯. 𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄? 𑀅𑀮𑁂𑀲𑀝𑁆𑀞𑀸𑀦𑁂 𑀢𑁆𑀯𑀁 𑀮𑁂𑀲𑀁 𑀑𑀟𑁆𑀟𑁂𑀲𑀻𑀢𑀺.

𑁪𑁨. 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑁄 𑀬𑁂𑀯 𑀳𑁄𑀢𑀻𑀢𑀺 𑀤𑀴𑁆𑀳𑀢𑀭𑀁 𑀲𑀺𑀓𑁆𑀔𑀸𑀧𑀤𑀫𑀓𑀸𑀲𑀺. 𑀤𑀼𑀯𑀺𑀥𑀜𑁆𑀳𑀺 𑀲𑀺𑀓𑁆𑀔𑀸𑀧𑀤𑀁 𑁋 𑀮𑁄𑀓𑀯𑀚𑁆𑀚𑀁, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀜𑁆𑀘. 𑀢𑀢𑁆𑀣 𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀁 𑀮𑁄𑀓𑀯𑀚𑁆𑀚𑀁 𑀦𑀸𑀫. 𑀲𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀢𑀢𑁆𑀣 𑀮𑁄𑀓𑀯𑀚𑁆𑀚𑁂 𑀅𑀦𑀼𑀧𑀜𑁆𑀜𑀢𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀭𑀼𑀦𑁆𑀥𑀦𑁆𑀢𑀻 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸 𑀕𑀸𑀴𑁆𑀳𑀢𑀭𑀁 𑀓𑀭𑁄𑀦𑁆𑀢𑀻 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸, 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸𑀢𑀺 𑀅𑀬𑀁 𑀧𑀦 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑀸 𑀅𑀩𑁆𑀩𑁄𑀳𑀸𑀭𑀺𑀓𑀢𑁆𑀢𑀸 𑀘 𑀯𑀼𑀢𑁆𑀢𑀸. 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂 𑀅𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀻 𑀫𑁄𑀘𑁂𑀦𑁆𑀢𑀻 𑀤𑁆𑀯𑀸𑀭𑀁 𑀤𑀤𑀫𑀸𑀦𑀸 𑀅𑀧𑀭𑀸𑀧𑀭𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀓𑀼𑀭𑀼𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀕𑀡𑀪𑁄𑀚𑀦𑀧𑀭𑀫𑁆𑀧𑀭𑀪𑁄𑀚𑀦𑀸𑀤𑀻𑀲𑀼 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄 𑀯𑀺𑀬. ‘‘𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻’’𑀢𑀺 𑀏𑀯𑀭𑀽𑀧𑀸 𑀧𑀦 𑀓𑀢𑁂 𑀯𑀻𑀢𑀺𑀓𑁆𑀓𑀫𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀕𑀢𑀺𑀓𑀸𑀯 𑀳𑁄𑀢𑀺. 𑀇𑀤𑀁 𑀧𑀦 𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀬𑀲𑁆𑀫𑀸 𑀮𑁄𑀓𑀯𑀚𑁆𑀚𑀁, 𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁; 𑀢𑀲𑁆𑀫𑀸 𑀅𑀬𑀫𑀦𑀼𑀧𑀜𑁆𑀜𑀢𑁆𑀢𑀺 𑀭𑀼𑀦𑁆𑀥𑀦𑁆𑀢𑀻 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑀻 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀫𑀸𑀦𑀸 𑀕𑀸𑀴𑁆𑀳𑀢𑀭𑀁 𑀓𑀭𑁄𑀦𑁆𑀢𑀻 𑀉𑀧𑁆𑀧𑀚𑁆𑀚𑀺.

𑀏𑀯𑀁 𑀤𑁆𑀯𑁂𑀧𑀺 𑀯𑀢𑁆𑀣𑀽𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀧𑀞𑀫𑀧𑀸𑀭𑀸𑀚𑀺𑀓𑁂 𑀧𑀜𑁆𑀜𑀢𑁆𑀢𑁂 𑀅𑀧𑀭𑀫𑁆𑀧𑀺 𑀅𑀦𑀼𑀧𑀜𑁆𑀜𑀢𑁆𑀢𑀢𑁆𑀣𑀸𑀬 𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼 𑀉𑀤𑀧𑀸𑀤𑀺. 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀏𑀯𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺 𑀘 𑀇𑀤𑀜𑁆𑀘 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼 𑀉𑀤𑀧𑀸𑀤𑀻𑀢𑀺.

𑀫𑀓𑁆𑀓𑀝𑀻𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀦𑁆𑀣𑀢𑀪𑀸𑀡𑀯𑀸𑀭𑁄

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁩-𑁪𑁪. 𑀇𑀤𑀸𑀦𑀺 𑀬𑀁 𑀢𑀁 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼 𑀉𑀧𑁆𑀧𑀦𑁆𑀦𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀧𑀺 𑀅𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀯𑁂𑀲𑀸𑀮𑀺𑀓𑀸𑀢𑀺 𑀯𑁂𑀲𑀸𑀮𑀺𑀯𑀸𑀲𑀺𑀦𑁄. 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀢𑀺 𑀯𑀚𑁆𑀚𑀺𑀭𑀝𑁆𑀞𑁂 𑀯𑁂𑀲𑀸𑀮𑀺𑀬𑀁 𑀓𑀼𑀮𑀸𑀦𑀁 𑀧𑀼𑀢𑁆𑀢𑀸. 𑀲𑀸𑀲𑀦𑁂 𑀓𑀺𑀭 𑀬𑁄 𑀬𑁄 𑀉𑀧𑀤𑁆𑀤𑀯𑁄 𑀆𑀤𑀻𑀦𑀯𑁄 𑀅𑀩𑁆𑀩𑀼𑀤𑀫𑀼𑀧𑁆𑀧𑀚𑁆𑀚𑀺, 𑀲𑀩𑁆𑀩𑀁 𑀢𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑁂 𑀦𑀺𑀲𑁆𑀲𑀸𑀬. 𑀢𑀣𑀸 𑀳𑀺 𑀤𑁂𑀯𑀤𑀢𑁆𑀢𑁄𑀧𑀺 𑀯𑀚𑁆𑀚𑀺𑀧𑀼𑀢𑁆𑀢𑀓𑁂 𑀧𑀓𑁆𑀔𑁂 𑀮𑀪𑀺𑀢𑁆𑀯𑀸 𑀲𑀗𑁆𑀖𑀁 𑀪𑀺𑀦𑁆𑀤𑀺. 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀏𑀯 𑀘 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀲𑀼𑀁. 𑀇𑀫𑁂𑀧𑀺 𑀢𑁂𑀲𑀁 𑀬𑁂𑀯 𑀏𑀓𑀘𑁆𑀘𑁂 𑀏𑀯𑀁 𑀧𑀜𑁆𑀜𑀢𑁆𑀢𑁂𑀧𑀺 𑀲𑀺𑀓𑁆𑀔𑀸𑀧𑀤𑁂 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀁𑀲𑀼…𑀧𑁂… 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀽𑀢𑀺.

𑀜𑀸𑀢𑀺𑀩𑁆𑀬𑀲𑀦𑁂𑀦𑀧𑀻𑀢𑀺 𑀏𑀢𑁆𑀣 𑀅𑀲𑀦𑀁 𑀩𑁆𑀬𑀲𑀦𑀁 𑀯𑀺𑀓𑁆𑀔𑁂𑀧𑁄 𑀯𑀺𑀤𑁆𑀥𑀁𑀲𑀦𑀁 𑀯𑀺𑀦𑀸𑀲𑁄𑀢𑀺 𑀲𑀩𑁆𑀩𑀫𑁂𑀢𑀁 𑀏𑀓𑀢𑁆𑀣𑀁. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀜𑀸𑀢𑀺𑀩𑁆𑀬𑀲𑀦𑀁, 𑀢𑁂𑀦 𑀜𑀸𑀢𑀺𑀩𑁆𑀬𑀲𑀦𑁂𑀦, 𑀭𑀸𑀚𑀤𑀡𑁆𑀟𑀩𑁆𑀬𑀸𑀥𑀺𑀫𑀭𑀡𑀯𑀺𑀧𑁆𑀧𑀯𑀸𑀲𑀦𑀺𑀫𑀺𑀢𑁆𑀢𑁂𑀦 𑀜𑀸𑀢𑀺𑀯𑀺𑀦𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀤𑀼𑀢𑀺𑀬𑀧𑀤𑁂𑀧𑀺. 𑀢𑀢𑀺𑀬𑀧𑀤𑁂 𑀧𑀦 𑀆𑀭𑁄𑀕𑁆𑀬𑀯𑀺𑀦𑀸𑀲𑀓𑁄 𑀭𑁄𑀕𑁄 𑀏𑀯 𑀭𑁄𑀕𑀩𑁆𑀬𑀲𑀦𑀁. 𑀲𑁄 𑀳𑀺 𑀆𑀭𑁄𑀕𑁆𑀬𑀁 𑀩𑁆𑀬𑀲𑀢𑀺 𑀯𑀺𑀓𑁆𑀔𑀺𑀧𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀲𑀦𑀁. 𑀭𑁄𑀕𑁄𑀯 𑀩𑁆𑀬𑀲𑀦𑀁 𑀭𑁄𑀕𑀩𑁆𑀬𑀲𑀦𑀁, 𑀢𑁂𑀦 𑀭𑁄𑀕𑀩𑁆𑀬𑀲𑀦𑁂𑀦. 𑀨𑀼𑀝𑁆𑀞𑀸𑀢𑀺 𑀅𑀥𑀺𑀧𑀦𑁆𑀦𑀸 𑀅𑀪𑀺𑀪𑀽𑀢𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄.

𑀦 𑀫𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀩𑀼𑀤𑁆𑀥𑀕𑀭𑀳𑀺𑀦𑁄𑀢𑀺 𑀪𑀦𑁆𑀢𑁂 𑀆𑀦𑀦𑁆𑀤, 𑀫𑀬𑀁 𑀦 𑀩𑀼𑀤𑁆𑀥𑀁 𑀕𑀭𑀳𑀸𑀫, 𑀦 𑀩𑀼𑀤𑁆𑀥𑀲𑁆𑀲 𑀤𑁄𑀲𑀁 𑀤𑁂𑀫. 𑀦 𑀥𑀫𑁆𑀫𑀕𑀭𑀳𑀺𑀦𑁄, 𑀦 𑀲𑀗𑁆𑀖𑀕𑀭𑀳𑀺𑀦𑁄. 𑀅𑀢𑁆𑀢𑀕𑀭𑀳𑀺𑀦𑁄 𑀫𑀬𑀦𑁆𑀢𑀺 𑀅𑀢𑁆𑀢𑀸𑀦𑀫𑁂𑀯 𑀫𑀬𑀁 𑀕𑀭𑀳𑀸𑀫, 𑀅𑀢𑁆𑀢𑀦𑁄 𑀤𑁄𑀲𑀁 𑀤𑁂𑀫. 𑀅𑀮𑀓𑁆𑀔𑀺𑀓𑀸𑀢𑀺 𑀦𑀺𑀲𑁆𑀲𑀺𑀭𑀺𑀓𑀸. 𑀅𑀧𑁆𑀧𑀧𑀼𑀜𑁆𑀜𑀸𑀢𑀺 𑀧𑀭𑀺𑀢𑁆𑀢𑀧𑀼𑀜𑁆𑀜𑀸. 𑀯𑀺𑀧𑀲𑁆𑀲𑀓𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀬𑁂 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀯𑀺𑀪𑀢𑁆𑀢𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀯𑀺𑀧𑀲𑁆𑀲𑀓𑀸; 𑀢𑀢𑁄 𑀢𑀢𑁄 𑀆𑀭𑀫𑁆𑀫𑀡𑀢𑁄 𑀯𑀼𑀝𑁆𑀞𑀸𑀬 𑀢𑁂𑀯 𑀥𑀫𑁆𑀫𑁂 𑀯𑀺𑀧𑀲𑁆𑀲𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀦𑁆𑀢𑀺 𑀭𑀢𑁆𑀢𑀺𑀬𑀸 𑀧𑀼𑀩𑁆𑀩𑀁 𑀧𑀼𑀩𑁆𑀩𑀭𑀢𑁆𑀢𑀁, 𑀭𑀢𑁆𑀢𑀺𑀬𑀸 𑀅𑀧𑀭𑀁 𑀅𑀧𑀭𑀭𑀢𑁆𑀢𑀁, 𑀧𑀞𑀫𑀬𑀸𑀫𑀜𑁆𑀘 𑀧𑀘𑁆𑀙𑀺𑀫𑀬𑀸𑀫𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀦𑁆𑀢𑀺 𑀩𑁄𑀥𑀺𑀲𑁆𑀲 𑀧𑀓𑁆𑀔𑁂 𑀪𑀯𑀸𑀦𑀁, 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀲𑁆𑀲 𑀉𑀧𑀓𑀸𑀭𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀯𑀦𑀸𑀦𑀼𑀬𑁄𑀕𑀦𑁆𑀢𑀺 𑀯𑀟𑁆𑀠𑀦𑀸𑀦𑀼𑀬𑁄𑀕𑀁. 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑁂𑀬𑁆𑀬𑀸𑀫𑀸𑀢𑀺 𑀕𑀺𑀳𑀺𑀧𑀮𑀺𑀩𑁄𑀥𑀁 𑀆𑀯𑀸𑀲𑀧𑀮𑀺𑀩𑁄𑀥𑀜𑁆𑀘 𑀧𑀳𑀸𑀬 𑀯𑀺𑀯𑀺𑀢𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀬𑀼𑀢𑁆𑀢𑀧𑀬𑀼𑀢𑁆𑀢𑀸 𑀅𑀦𑀜𑁆𑀜𑀓𑀺𑀘𑁆𑀘𑀸 𑀯𑀺𑀳𑀭𑁂𑀬𑁆𑀬𑀸𑀫.

𑀏𑀯𑀫𑀸𑀯𑀼𑀲𑁄𑀢𑀺 𑀣𑁂𑀭𑁄 𑀏𑀢𑁂𑀲𑀁 𑀆𑀲𑀬𑀁 𑀅𑀚𑀸𑀦𑀦𑁆𑀢𑁄 𑀇𑀤𑀁 𑀦𑁂𑀲𑀁 𑀫𑀳𑀸𑀕𑀚𑁆𑀚𑀺𑀢𑀁 𑀲𑀼𑀢𑁆𑀯𑀸 ‘‘𑀲𑀘𑁂 𑀇𑀫𑁂 𑀈𑀤𑀺𑀲𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀸𑀥𑀽’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀓𑀸𑀭𑀡𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑁂𑀦 𑀨𑀮𑀁 𑀢𑀺𑀝𑁆𑀞𑀢𑀺. 𑀬𑀲𑁆𑀫𑀸 𑀘𑀲𑁆𑀲 𑀢𑀁 𑀑𑀓𑀸𑀲𑁄 𑀳𑁄𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑁂𑀦, 𑀢𑀲𑁆𑀫𑀸 ‘‘𑀞𑀸𑀦𑀜𑁆𑀘 𑀅𑀯𑀓𑀸𑀲𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄’’𑀢𑀺. 𑀏𑀢𑀁 𑀞𑀸𑀦𑀁 𑀯𑀸 𑀑𑀓𑀸𑀲𑁄 𑀯𑀸 𑀦𑀢𑁆𑀣𑀺. 𑀬𑀁 𑀢𑀣𑀸𑀕𑀢𑁄𑀢𑀺 𑀬𑁂𑀦 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 𑀯𑀸…𑀧𑁂… 𑀲𑀫𑀽𑀳𑀦𑁂𑀬𑁆𑀬, 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀳𑀺 𑀪𑀕𑀯𑀸 𑀏𑀢𑁂𑀲𑀁 ‘‘𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀬𑀸𑀘𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀁 𑀤𑀤𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬. 𑀬𑀲𑁆𑀫𑀸 𑀧𑀦𑁂𑀢𑀁 𑀦 𑀲𑀫𑀽𑀳𑀦𑀢𑀺, 𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 ‘‘𑀬𑀤𑀺 𑀳𑀺 𑀏𑀯𑀁 𑀆𑀕𑀢𑁄 𑀉𑀧𑀲𑀫𑁆𑀧𑀤𑀁 𑀮𑀪𑁂𑀬𑁆𑀬, 𑀲𑀸𑀲𑀦𑁂 𑀅𑀕𑀸𑀭𑀯𑁄 𑀪𑀯𑁂𑀬𑁆𑀬. 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀧𑀦 𑀞𑀺𑀢𑁄 𑀲𑀕𑀸𑀭𑀯𑁄 𑀘 𑀪𑀯𑀺𑀲𑁆𑀲𑀢𑀺, 𑀅𑀢𑁆𑀢𑀢𑁆𑀣𑀜𑁆𑀘 𑀓𑀭𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀅𑀦𑀼𑀓𑀫𑁆𑀧𑀫𑀸𑀦𑁄 𑀪𑀕𑀯𑀸 𑀆𑀳 𑁋 ‘‘𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺. 𑀲𑁄 𑀆𑀕𑀢𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀏𑀯𑀁 𑀆𑀕𑀢𑁄 𑀪𑀺𑀓𑁆𑀔𑀼𑀪𑀸𑀯𑁂 𑀞𑀢𑁆𑀯𑀸 𑀅𑀯𑀺𑀧𑀦𑁆𑀦𑀲𑀻𑀮𑀢𑀸𑀬 𑀲𑀸𑀲𑀦𑁂 𑀲𑀕𑀸𑀭𑀯𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀲𑀢𑀺 𑀉𑀧𑀦𑀺𑀲𑁆𑀲𑀬𑁂 𑀦𑀘𑀺𑀭𑀲𑁆𑀲𑁂𑀯 𑀉𑀢𑁆𑀢𑀫𑀢𑁆𑀣𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀆𑀳.

𑀏𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀆𑀕𑀢𑁂𑀲𑀼 𑀅𑀦𑀼𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀜𑁆𑀘 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀻𑀡𑀺𑀧𑀺 𑀯𑀢𑁆𑀣𑀽𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀼𑀓𑀸𑀫𑁄 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼…𑀧𑁂… 𑀅𑀲𑀁𑀯𑀸𑀲𑁄’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺.

𑀯𑀚𑁆𑀚𑀺𑀧𑀼𑀢𑁆𑀢𑀓𑀯𑀢𑁆𑀣𑀼𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸

𑁪𑁫. 𑀇𑀤𑀸𑀦𑀺𑀲𑁆𑀲 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑁄 ‘‘𑀬𑁄 𑀧𑀦𑀸𑀢𑀺, 𑀬𑁄 𑀬𑀸𑀤𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑁂 𑀘 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀘 𑀲𑀓𑀮𑁂 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑁄𑀲𑀮𑁆𑀮𑀁 𑀧𑀢𑁆𑀣𑀬𑀦𑁆𑀢𑁂𑀦 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄 𑁋

𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀯𑀺𑀦𑀬𑀁, 𑀫𑀳𑀸𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁, 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀧𑀼𑀭𑀸.

𑀓𑀢𑀫𑀁 𑀘𑀢𑀼𑀩𑁆𑀩𑀺𑀥𑀁? 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑀁, 𑀆𑀘𑀭𑀺𑀬𑀯𑀸𑀤𑀁, 𑀅𑀢𑁆𑀢𑀦𑁄𑀫𑀢𑀺𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀆𑀳𑀘𑁆𑀘𑀧𑀤𑁂𑀦 𑀭𑀲𑁂𑀦 𑀆𑀘𑀭𑀺𑀬𑀯𑀁𑀲𑁂𑀦 𑀅𑀥𑀺𑀧𑁆𑀧𑀸𑀬𑀸’’𑀢𑀺, 𑀏𑀢𑁆𑀣 𑀳𑀺 𑀆𑀳𑀘𑁆𑀘𑀧𑀤𑀦𑁆𑀢𑀺 𑀲𑀼𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀭𑀲𑁄𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁, 𑀆𑀘𑀭𑀺𑀬𑀯𑀁𑀲𑁄𑀢𑀺 𑀆𑀘𑀭𑀺𑀬𑀯𑀸𑀤𑁄, 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀢𑀦𑁄𑀫𑀢𑀺.

𑀢𑀢𑁆𑀣 𑀲𑀼𑀢𑁆𑀢𑀁𑀦𑀸𑀫 𑀲𑀓𑀮𑁂 𑀯𑀺𑀦𑀬𑀧𑀺𑀝𑀓𑁂 𑀧𑀸𑀴𑀺.

𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸; 𑀬𑁂 𑀪𑀕𑀯𑀢𑀸 𑀏𑀯𑀁 𑀯𑀼𑀢𑁆𑀢𑀸 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺; 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺; 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀁 𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺; 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀁 𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺; 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫).

𑀆𑀘𑀭𑀺𑀬𑀯𑀸𑀤𑁄 𑀦𑀸𑀫 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀧𑀜𑁆𑀘𑀳𑀺 𑀅𑀭𑀳𑀦𑁆𑀢𑀲𑀢𑁂𑀳𑀺 𑀞𑀧𑀺𑀢𑀸 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀸 𑀑𑀓𑁆𑀓𑀦𑁆𑀢𑀯𑀺𑀦𑀺𑀘𑁆𑀙𑀬𑀧𑁆𑀧𑀯𑀢𑁆𑀢𑀸 𑀅𑀝𑁆𑀞𑀓𑀣𑀸𑀢𑀦𑁆𑀢𑀺.

𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀼𑀢𑁆𑀢-𑀲𑀼𑀢𑁆𑀢𑀸𑀦𑀼𑀮𑁄𑀫-𑀆𑀘𑀭𑀺𑀬𑀯𑀸𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀫𑀸𑀦𑁂𑀦 𑀅𑀢𑁆𑀢𑀦𑁄 𑀅𑀦𑀼𑀩𑀼𑀤𑁆𑀥𑀺𑀬𑀸 𑀦𑀬𑀕𑁆𑀕𑀸𑀳𑁂𑀦 𑀉𑀧𑀝𑁆𑀞𑀺𑀢𑀸𑀓𑀸𑀭𑀓𑀣𑀦𑀁.

𑀅𑀧𑀺𑀘 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀆𑀕𑀢𑁄 𑀲𑀩𑁆𑀩𑁄𑀧𑀺 𑀣𑁂𑀭𑀯𑀸𑀤𑁄 ‘‘𑀅𑀢𑁆𑀢𑀦𑁄𑀫𑀢𑀺’’ 𑀦𑀸𑀫. 𑀢𑀁 𑀧𑀦 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦 𑀦 𑀤𑀴𑁆𑀳𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀺𑀢𑀩𑁆𑀩𑀁. 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀣𑁂𑀦 𑀧𑀸𑀴𑀺𑀁, 𑀧𑀸𑀴𑀺𑀬𑀸 𑀘 𑀅𑀢𑁆𑀣𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀫𑀢𑀺 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀢𑀢𑁆𑀣 𑀑𑀢𑀭𑀢𑀺 𑀘𑁂𑀯 𑀲𑀫𑁂𑀢𑀺 𑀘, 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀦𑁂𑀯 𑀑𑀢𑀭𑀢𑀺 𑀦 𑀲𑀫𑁂𑀢𑀺, 𑀦 𑀕𑀳𑁂𑀢𑀩𑁆𑀩𑀸. 𑀅𑀬𑀜𑁆𑀳𑀺 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀩𑁆𑀩𑀤𑀼𑀩𑁆𑀩𑀮𑀸. 𑀅𑀢𑁆𑀢𑀦𑁄𑀫𑀢𑀺𑀢𑁄 𑀆𑀘𑀭𑀺𑀬𑀯𑀸𑀤𑁄 𑀩𑀮𑀯𑀢𑀭𑁄.

𑀆𑀘𑀭𑀺𑀬𑀯𑀸𑀤𑁄𑀧𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀢𑀢𑁆𑀣 𑀑𑀢𑀭𑀦𑁆𑀢𑁄 𑀲𑀫𑁂𑀦𑁆𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑁄, 𑀇𑀢𑀭𑁄 𑀦 𑀕𑀳𑁂𑀢𑀩𑁆𑀩𑁄. 𑀆𑀘𑀭𑀺𑀬𑀯𑀸𑀤𑀢𑁄 𑀳𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀩𑀮𑀯𑀢𑀭𑀁.

𑀲𑀼𑀢𑁆𑀢𑀸𑀦𑀼𑀮𑁄𑀫𑀫𑁆𑀧𑀺 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀳𑀺 𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭𑀁. 𑀲𑀼𑀢𑁆𑀢𑀜𑁆𑀳𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑀸𑀭𑀓𑀲𑀗𑁆𑀖𑀲𑀤𑀺𑀲𑀁 𑀩𑀼𑀤𑁆𑀥𑀸𑀦𑀁 𑀞𑀺𑀢𑀓𑀸𑀮𑀲𑀤𑀺𑀲𑀁. 𑀢𑀲𑁆𑀫𑀸 𑀬𑀤𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀸𑀓𑀘𑁆𑀙𑀦𑁆𑀢𑀺, 𑀲𑀓𑀯𑀸𑀤𑀻 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑀯𑀸𑀤𑀻 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀁; 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀢𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀆𑀘𑀭𑀺𑀬𑀯𑀸𑀤𑁄 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄. 𑀅𑀦𑁄𑀢𑀭𑀦𑁆𑀢𑁄 𑀅𑀲𑀫𑁂𑀦𑁆𑀢𑁄 𑀘 𑀕𑀸𑀭𑀬𑁆𑀳𑀸𑀘𑀭𑀺𑀬𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄; 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀢𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄𑀫𑀢𑀺 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸. 𑀲𑀼𑀢𑁆𑀢𑀲𑁆𑀫𑀺𑀁 𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀽𑀴𑁆𑀳𑀁 𑀧𑀸𑀴𑀺𑀆𑀕𑀢𑀁 𑀧𑀜𑁆𑀜𑀸𑀬𑀢𑀺, 𑀕𑀳𑁂𑀢𑀩𑁆𑀩𑀁. 𑀦𑁄 𑀘𑁂 𑀢𑀣𑀸 𑀧𑀜𑁆𑀜𑀸𑀬𑀢𑀺 𑀦 𑀑𑀢𑀭𑀢𑀺 𑀦 𑀲𑀫𑁂𑀢𑀺, 𑀩𑀸𑀳𑀺𑀭𑀓𑀲𑀼𑀢𑁆𑀢𑀁 𑀯𑀸 𑀳𑁄𑀢𑀺 𑀲𑀺𑀮𑁄𑀓𑁄 𑀯𑀸 𑀅𑀜𑁆𑀜𑀁 𑀯𑀸 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀕𑀼𑀴𑁆𑀳𑀯𑀺𑀦𑀬𑀯𑁂𑀤𑀮𑁆𑀮𑀸𑀤𑀻𑀦𑀁 𑀅𑀜𑁆𑀜𑀢𑀭𑀢𑁄 𑀆𑀕𑀢𑀁, 𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀭𑀺𑀬𑀯𑀸𑀤𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑁄. 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀅𑀢𑁆𑀢𑀦𑁄𑀫𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸. 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁. 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀅𑀢𑁆𑀢𑀦𑁄𑀫𑀢𑀺 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸. 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑀁. 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀭𑀺𑀬𑀯𑀸𑀤𑁄 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄; 𑀇𑀢𑀭𑁄 𑀕𑀸𑀭𑀬𑁆𑀳𑀸𑀘𑀭𑀺𑀬𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄. 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀕𑀳𑀡𑀫𑁂𑀯 𑀩𑀮𑀺𑀬𑀁 𑀓𑀸𑀢𑀩𑁆𑀩𑀁. 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀘 𑀔𑁂𑀧𑁄 𑀯𑀸 𑀕𑀭𑀳𑀸 𑀯𑀸 𑀦 𑀓𑀸𑀢𑀩𑁆𑀩𑀸𑀢𑀺.

𑀅𑀣 𑀧𑀦𑀸𑀬𑀁 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺. 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀲𑀘𑁂 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀢𑀲𑁆𑀲 𑀓𑀧𑁆𑀧𑀺𑀬𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀢𑀺, 𑀧𑀭𑁄 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺. 𑀓𑀧𑁆𑀧𑀺𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣 𑀧𑀭𑁄 𑀢𑀲𑁆𑀲 𑀅𑀓𑀧𑁆𑀧𑀺𑀬𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀢𑀺, 𑀅𑀦𑁂𑀦 𑀅𑀢𑁆𑀢𑀦𑁄 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸 𑀤𑀴𑁆𑀳𑀁 𑀆𑀤𑀸𑀬 𑀦 𑀞𑀸𑀢𑀩𑁆𑀩𑀁. ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀓𑀧𑁆𑀧𑀺𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑁄𑀬𑁂𑀯 𑀲𑀸𑀥𑀼, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀯𑀺𑀦𑀬𑀜𑁆𑀳𑀺 𑀧𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀘𑀸𑀭𑀡𑀫𑀸𑀕𑀫𑁆𑀫 𑀭𑀼𑀦𑁆𑀥𑀺𑀢𑀩𑁆𑀩𑀁, 𑀕𑀸𑀴𑁆𑀳𑀁 𑀓𑀢𑁆𑀢𑀩𑁆𑀩𑀁, 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁, 𑀕𑀭𑀼𑀓𑀪𑀸𑀯𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 ‘‘𑀅𑀓𑀧𑁆𑀧𑀺𑀬’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 ‘‘𑀓𑀧𑁆𑀧𑀺𑀬’’𑀦𑁆𑀢𑀺. 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀲𑀘𑁂 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀩𑀳𑀽𑀳𑀺 𑀲𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀺 𑀅𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀧𑀭𑁄 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣 𑀧𑀭𑁄 𑀩𑀳𑀽𑀳𑀺 𑀲𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀺 𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀅𑀬𑀁 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀕𑀳𑀡𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀬𑀣𑀸 𑀘𑀸𑀬𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀓𑀧𑁆𑀧𑀺𑀬𑁂 𑀘 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄; 𑀏𑀯𑀁 𑀅𑀦𑀸𑀧𑀢𑁆𑀢𑀺𑀆𑀧𑀢𑁆𑀢𑀺𑀯𑀸𑀤𑁂 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀸𑀤𑁂 𑀘, 𑀮𑀳𑀼𑀓𑀕𑀭𑀼𑀓𑀸𑀧𑀢𑁆𑀢𑀺𑀯𑀸𑀤𑁂 𑀕𑀭𑀼𑀓𑀮𑀳𑀼𑀓𑀸𑀧𑀢𑁆𑀢𑀺𑀯𑀸𑀤𑁂 𑀘𑀸𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀫𑀢𑁆𑀢𑀁𑀬𑁂𑀯 𑀳𑀺 𑀏𑀢𑁆𑀣 𑀦𑀸𑀦𑀁, 𑀬𑁄𑀚𑀦𑀸𑀦𑀬𑁂 𑀦𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑀺𑀢𑀁.

𑀏𑀯𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀤𑀺𑀯𑀺𑀦𑀺𑀘𑁆𑀙𑀬𑁂 𑀉𑀧𑁆𑀧𑀦𑁆𑀦𑁂 𑀬𑁄 𑀲𑀼𑀢𑁆𑀢-𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀻𑀲𑀼 𑀅𑀢𑀺𑀭𑁂𑀓𑀓𑀸𑀭𑀡𑀁 𑀮𑀪𑀢𑀺, 𑀢𑀲𑁆𑀲 𑀯𑀸𑀤𑁂 𑀞𑀸𑀢𑀩𑁆𑀩𑀁. 𑀲𑀩𑁆𑀩𑀲𑁄 𑀧𑀦 𑀓𑀸𑀭𑀡𑀁 𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀦𑁆𑀢𑁂𑀦 𑀲𑀼𑀢𑁆𑀢𑀁 𑀦 𑀚𑀳𑀺𑀢𑀩𑁆𑀩𑀁, 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀘 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀘 𑀲𑀓𑀮𑁂 𑀘 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑁄𑀲𑀮𑁆𑀮𑀁 𑀧𑀢𑁆𑀣𑀬𑀦𑁆𑀢𑁂𑀦 𑀅𑀬𑀁 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄.

𑀇𑀫𑀜𑁆𑀘 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀯𑀺𑀦𑀬𑀁 𑀜𑀢𑁆𑀯𑀸𑀧𑀺 𑀯𑀺𑀦𑀬𑀥𑀭𑁂𑀦 𑀧𑀼𑀕𑁆𑀕𑀮𑁂𑀦 𑀢𑀺𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀻𑀡𑀺 𑀳𑀺 𑀯𑀺𑀦𑀬𑀥𑀭𑀲𑁆𑀲 𑀮𑀓𑁆𑀔𑀡𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? ‘‘𑀲𑀼𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀕𑀢𑀁 𑀳𑁄𑀢𑀺 𑀲𑀼𑀧𑁆𑀧𑀯𑀢𑁆𑀢𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀢𑁆𑀢𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀢𑁄’’𑀢𑀺 𑀇𑀤𑀫𑁂𑀓𑀁 𑀮𑀓𑁆𑀔𑀡𑀁. ‘‘𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 𑀳𑁄𑀢𑀺 𑀅𑀲𑀁𑀳𑀻𑀭𑁄’’𑀢𑀺 𑀇𑀤𑀁 𑀤𑀼𑀢𑀺𑀬𑀁. ‘‘𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀲𑀼𑀫𑀦𑀲𑀺𑀓𑀢𑀸 𑀲𑀽𑀧𑀥𑀸𑀭𑀺𑀢𑀸’’𑀢𑀺 𑀇𑀤𑀁 𑀢𑀢𑀺𑀬𑀁.

𑀢𑀢𑁆𑀣 𑀲𑀼𑀢𑁆𑀢𑀁 𑀦𑀸𑀫 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁. 𑀢𑀜𑁆𑀘𑀲𑁆𑀲 𑀲𑁆𑀯𑀸𑀕𑀢𑀁 𑀳𑁄𑀢𑀻𑀢𑀺 𑀲𑀼𑀝𑁆𑀞𑀼 𑀆𑀕𑀢𑀁. 𑀲𑀼𑀧𑁆𑀧𑀯𑀢𑁆𑀢𑀻𑀢𑀺 𑀲𑀼𑀝𑁆𑀞𑀼 𑀧𑀯𑀢𑁆𑀢𑀁 𑀧𑀕𑀼𑀡𑀁 𑀯𑀸𑀘𑀼𑀕𑁆𑀕𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀁. 𑀲𑀼𑀢𑁆𑀢𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀢𑁄𑀢𑀺 𑀧𑀸𑀴𑀺𑀢𑁄 𑀘 𑀧𑀭𑀺𑀧𑀼𑀘𑁆𑀙𑀢𑁄 𑀘 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀳𑁄𑀢𑀺, 𑀓𑀗𑁆𑀔𑀘𑁆𑀙𑁂𑀤𑀁 𑀓𑀢𑁆𑀯𑀸 𑀉𑀕𑁆𑀕𑀳𑀺𑀢𑀁.

𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 𑀳𑁄𑀢𑀻𑀢𑀺 𑀯𑀺𑀦𑀬𑁂 𑀮𑀚𑁆𑀚𑀻𑀪𑀸𑀯𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀅𑀮𑀚𑁆𑀚𑀻 𑀳𑀺 𑀩𑀳𑀼𑀲𑁆𑀲𑀼𑀢𑁄𑀧𑀺 𑀲𑀫𑀸𑀦𑁄 𑀮𑀸𑀪𑀕𑀭𑀼𑀢𑀸𑀬 𑀢𑀦𑁆𑀢𑀺𑀁 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀢𑁆𑀯𑀸 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀉𑀧𑀤𑁆𑀤𑀯𑀁 𑀓𑀭𑁄𑀢𑀺. 𑀲𑀗𑁆𑀖𑀪𑁂𑀤𑀫𑁆𑀧𑀺 𑀲𑀗𑁆𑀖𑀭𑀸𑀚𑀺𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀺. 𑀮𑀚𑁆𑀚𑀻 𑀧𑀦 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀢𑀦𑁆𑀢𑀺𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀥𑀫𑁆𑀫𑀫𑁂𑀯 𑀯𑀺𑀦𑀬𑀫𑁂𑀯 𑀘 𑀤𑀻𑀧𑁂𑀢𑀺, 𑀲𑀢𑁆𑀣𑀼𑀲𑀸𑀲𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀞𑀧𑁂𑀢𑀺. 𑀢𑀣𑀸 𑀳𑀺 𑀧𑀼𑀩𑁆𑀩𑁂 𑀫𑀳𑀸𑀣𑁂𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀼𑀁 𑁋 ‘‘𑀅𑀦𑀸𑀕𑀢𑁂 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀺, 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀺, 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀬𑁄 𑀮𑀚𑁆𑀚𑀻, 𑀲𑁄 𑀯𑀺𑀦𑀬𑀁 𑀅𑀯𑀺𑀚𑀳𑀦𑁆𑀢𑁄 𑀅𑀯𑁄𑀓𑁆𑀓𑀫𑀦𑁆𑀢𑁄 𑀮𑀚𑁆𑀚𑀻𑀪𑀸𑀯𑁂𑀦 𑀯𑀺𑀦𑀬𑁂 𑀞𑀺𑀢𑁄 𑀳𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺. 𑀅𑀲𑀁𑀳𑀻𑀭𑁄𑀢𑀺 𑀲𑀁𑀳𑀻𑀭𑁄 𑀦𑀸𑀫 𑀬𑁄 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀸 𑀳𑁂𑀝𑁆𑀞𑀢𑁄 𑀯𑀸 𑀉𑀧𑀭𑀺𑀢𑁄 𑀯𑀸 𑀧𑀤𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀯𑀺𑀢𑁆𑀣𑀼𑀦𑀢𑀺 𑀯𑀺𑀧𑁆𑀨𑀦𑁆𑀤𑀢𑀺 𑀲𑀦𑁆𑀢𑀺𑀝𑁆𑀞𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺; 𑀬𑀁 𑀬𑀁 𑀧𑀭𑁂𑀦 𑀯𑀼𑀘𑁆𑀘𑀢𑀺 𑀢𑀁 𑀢𑀁 𑀅𑀦𑀼𑀚𑀸𑀦𑀸𑀢𑀺; 𑀲𑀓𑀯𑀸𑀤𑀁 𑀙𑀟𑁆𑀟𑁂𑀢𑁆𑀯𑀸 𑀧𑀭𑀯𑀸𑀤𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬 𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀯𑀸 𑀧𑀤𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀦 𑀯𑀺𑀢𑁆𑀣𑀼𑀦𑀢𑀺 𑀦 𑀯𑀺𑀧𑁆𑀨𑀦𑁆𑀤𑀢𑀺, 𑀏𑀓𑁂𑀓𑀮𑁄𑀫𑀁 𑀲𑀡𑁆𑀟𑀸𑀲𑁂𑀦 𑀕𑀡𑁆𑀳𑀦𑁆𑀢𑁄 𑀯𑀺𑀬 ‘‘𑀏𑀯𑀁 𑀫𑀬𑀁 𑀯𑀤𑀸𑀫; 𑀏𑀯𑀁 𑀦𑁄 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺; 𑀬𑀫𑁆𑀳𑀺 𑀧𑀸𑀴𑀺 𑀘 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑁄 𑀘 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀅𑀕𑀘𑁆𑀙𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀲𑀁𑀳𑀻𑀭𑁄’’𑀢𑀺.

𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀻𑀢𑀺 𑀣𑁂𑀭𑀧𑀭𑀫𑁆𑀧𑀭𑀸 𑀯𑀁𑀲𑀧𑀭𑀫𑁆𑀧𑀭𑀸 𑀘𑀲𑁆𑀲 𑀲𑀼𑀝𑁆𑀞𑀼 𑀕𑀳𑀺𑀢𑀸 𑀳𑁄𑀢𑀺. 𑀲𑀼𑀫𑀦𑀲𑀺𑀓𑀢𑀸𑀢𑀺 𑀲𑀼𑀝𑁆𑀞𑀼 𑀫𑀦𑀲𑀺𑀓𑀢𑀸; 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀉𑀚𑁆𑀚𑀮𑀺𑀢𑀧𑀤𑀻𑀧𑁄 𑀯𑀺𑀬 𑀳𑁄𑀢𑀺. 𑀲𑀽𑀧𑀥𑀸𑀭𑀺𑀢𑀸𑀢𑀺 𑀲𑀼𑀝𑁆𑀞𑀼 𑀉𑀧𑀥𑀸𑀭𑀺𑀢𑀸 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺𑀢𑁄 𑀅𑀢𑁆𑀣𑀢𑁄 𑀓𑀸𑀭𑀡𑀢𑁄 𑀘 𑀉𑀧𑀥𑀸𑀭𑀺𑀢𑀸; 𑀅𑀢𑁆𑀢𑀦𑁄 𑀫𑀢𑀺𑀁 𑀧𑀳𑀸𑀬 𑀆𑀘𑀭𑀺𑀬𑀲𑀼𑀤𑁆𑀥𑀺𑀬𑀸 𑀯𑀢𑁆𑀢𑀸 𑀳𑁄𑀢𑀺 ‘‘𑀫𑀬𑁆𑀳𑀁 𑀆𑀘𑀭𑀺𑀬𑁄 𑀅𑀲𑀼𑀓𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺, 𑀲𑁄 𑀅𑀲𑀼𑀓𑀲𑁆𑀲𑀸’’𑀢𑀺 𑀏𑀯𑀁 𑀲𑀩𑁆𑀩𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀣𑁂𑀭𑀯𑀸𑀤𑀗𑁆𑀕𑀁 𑀆𑀳𑀭𑀺𑀢𑁆𑀯𑀸 𑀬𑀸𑀯 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀻𑀢𑀺 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀢𑀢𑁄𑀧𑀺 𑀆𑀳𑀭𑀺𑀢𑁆𑀯𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺, 𑀤𑀸𑀲𑀓𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲, 𑀲𑁄𑀡𑀓𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀤𑀸𑀲𑀓𑀢𑁆𑀣𑁂𑀭𑀲𑁆𑀲, 𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑁄𑀡𑀓𑀢𑁆𑀣𑁂𑀭𑀲𑁆𑀲, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑀺𑀕𑁆𑀕𑀯𑀢𑁆𑀣𑁂𑀭𑀲𑁆𑀲 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑀲𑁆𑀲 𑀘𑀸𑀢𑀺. 𑀏𑀯𑀁 𑀲𑀩𑁆𑀩𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀣𑁂𑀭𑀯𑀸𑀤𑀗𑁆𑀕𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀏𑀯𑀁 𑀉𑀕𑁆𑀕𑀳𑀺𑀢𑀸 𑀳𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺. 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀅𑀯𑀲𑁆𑀲𑀁 𑀤𑁆𑀯𑁂 𑀢𑀬𑁄 𑀧𑀭𑀺𑀯𑀝𑁆𑀝𑀸 𑀉𑀕𑁆𑀕𑀳𑁂𑀢𑀩𑁆𑀩𑀸. 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀳𑀺 𑀦𑀬𑁂𑀦 𑀬𑀣𑀸 𑀆𑀘𑀭𑀺𑀬𑁄 𑀘 𑀆𑀘𑀭𑀺𑀬𑀸𑀘𑀭𑀺𑀬𑁄 𑀘 𑀧𑀸𑀴𑀺𑀜𑁆𑀘 𑀧𑀭𑀺𑀧𑀼𑀘𑁆𑀙𑀜𑁆𑀘 𑀯𑀤𑀦𑁆𑀢𑀺, 𑀢𑀣𑀸 𑀜𑀸𑀢𑀼𑀁 𑀯𑀝𑁆𑀝𑀢𑀺.

𑀇𑀫𑁂𑀳𑀺 𑀘 𑀧𑀦 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀯𑀺𑀦𑀬𑀥𑀭𑁂𑀦 𑀯𑀢𑁆𑀣𑀼𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑁄𑀤𑀓𑁂𑀦 𑀘 𑀘𑀼𑀤𑀺𑀢𑀓𑁂𑀦 𑀘 𑀯𑀼𑀢𑁆𑀢𑁂 𑀯𑀢𑁆𑀢𑀩𑁆𑀩𑁂 𑀲𑀳𑀲𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀙 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀙? 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁, 𑀫𑀸𑀢𑀺𑀓𑀸 𑀑𑀮𑁄𑀓𑁂𑀢𑀩𑁆𑀩𑀸, 𑀧𑀤𑀪𑀸𑀚𑀦𑀻𑀬𑀁 𑀑𑀮𑁄𑀓𑁂𑀢𑀩𑁆𑀩𑀁, 𑀢𑀺𑀓𑀧𑀭𑀺𑀘𑁆𑀙𑁂𑀤𑁄 𑀑𑀮𑁄𑀓𑁂𑀢𑀩𑁆𑀩𑁄, 𑀅𑀦𑁆𑀢𑀭𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑀩𑁆𑀩𑀸, 𑀅𑀦𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑀩𑁆𑀩𑀸𑀢𑀺.

𑀯𑀢𑁆𑀣𑀼𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 𑀳𑀺 ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁; 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁧𑁭) 𑀏𑀯𑀁 𑀏𑀓𑀘𑁆𑀘𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺. 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀫𑀸𑀢𑀺𑀓𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁨) 𑀦𑀬𑁂𑀦 𑀧𑀜𑁆𑀘𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀧𑀤𑀪𑀸𑀚𑀦𑀻𑀬𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀅𑀓𑁆𑀔𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀬𑁂𑀪𑀼𑀬𑁆𑀬𑁂𑀦 𑀔𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁯 𑀆𑀤𑀬𑁄, 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀦𑀬𑁂𑀦 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀧𑀤𑀪𑀸𑀚𑀦𑀻𑀬𑀢𑁄 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀢𑀺𑀓𑀧𑀭𑀺𑀘𑁆𑀙𑁂𑀤𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀸 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀸 𑀢𑀺𑀓𑀤𑀼𑀓𑁆𑀓𑀝𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀆𑀧𑀢𑁆𑀢𑀺𑀁 𑀢𑀺𑀓𑀧𑀭𑀺𑀘𑁆𑀙𑁂𑀤𑁂 𑀧𑀲𑁆𑀲𑀢𑀺, 𑀲𑁄 𑀢𑀢𑁄 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀧𑀝𑀺𑀮𑀸𑀢𑀁 𑀉𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁫𑁫) 𑀏𑀯𑀁 𑀬𑀸 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀅𑀦𑁆𑀢𑀭𑀸𑀧𑀢𑁆𑀢𑀺 𑀳𑁄𑀢𑀺 𑀢𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀅𑀦𑀸𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀸𑀤𑀺𑀬𑀦𑁆𑀢𑀲𑁆𑀲, 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲, 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁭𑁨 𑀆𑀤𑀬𑁄) 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀁 𑀅𑀦𑀸𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀬𑁄 𑀳𑀺 𑀪𑀺𑀓𑁆𑀔𑀼 𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑁄𑀯𑀺𑀤𑁄 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑁄, 𑀩𑀼𑀤𑁆𑀥𑁂𑀦 𑀲𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀢𑀲𑀤𑀺𑀲𑁄 𑀳𑁄𑀢𑀺. 𑀢𑀁 𑀘𑁂𑀯𑀁 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀁 𑀪𑀺𑀓𑁆𑀔𑀼𑀁 𑀓𑁄𑀘𑀺 𑀓𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑁂𑀬𑁆𑀬; 𑀢𑁂𑀦 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀅𑀦𑀸𑀧𑀢𑁆𑀢𑀺 𑀳𑁄𑀢𑀺, ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀆𑀧𑀢𑁆𑀢𑀺 𑀳𑁄𑀢𑀺, ‘‘𑀆𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀸 𑀤𑁂𑀲𑀦𑀸𑀕𑀸𑀫𑀺𑀦𑀻 𑀘𑁂, ‘‘𑀤𑁂𑀲𑀦𑀸𑀕𑀸𑀫𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀘𑁂, ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀣𑀲𑁆𑀲 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, ‘‘𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻’’𑀢𑀺 𑀦 𑀢𑀸𑀯 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀫𑁂𑀣𑀼𑀦𑀥𑀫𑁆𑀫𑀯𑀻𑀢𑀺𑀓𑁆𑀓𑀫𑁄 𑀳𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀻𑀢𑀺𑀓𑁆𑀓𑀫𑁄 𑀘 𑀑𑀴𑀸𑀭𑀺𑀓𑁄. 𑀅𑀤𑀺𑀦𑁆𑀦𑀸𑀤𑀸𑀦𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀯𑀻𑀢𑀺𑀓𑁆𑀓𑀫𑀸 𑀧𑀦 𑀲𑀼𑀔𑀼𑀫𑀸 𑀘𑀺𑀢𑁆𑀢𑀮𑀳𑀼𑀓𑀸. 𑀢𑁂 𑀲𑀼𑀔𑀼𑀫𑁂𑀦𑁂𑀯 𑀆𑀧𑀚𑁆𑀚𑀢𑀺, 𑀲𑀼𑀔𑀼𑀫𑁂𑀦 𑀭𑀓𑁆𑀔𑀢𑀺, 𑀢𑀲𑁆𑀫𑀸 𑀯𑀺𑀲𑁂𑀲𑁂𑀦 𑀢𑀁𑀯𑀢𑁆𑀣𑀼𑀓𑀁 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀆𑀧𑀢𑁆𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀘𑀲𑁆𑀲 𑀆𑀘𑀭𑀺𑀬𑁄 𑀥𑀭𑀢𑀺, 𑀢𑀢𑁄 𑀢𑁂𑀦 𑀲𑁄 𑀪𑀺𑀓𑁆𑀔𑀼 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀁 𑀧𑀼𑀘𑁆𑀙𑀸’’𑀢𑀺 𑀧𑁂𑀲𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀧𑀼𑀦 𑀆𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀲𑀼𑀢𑁆𑀢𑀢𑁄 𑀦𑀬𑀢𑁄 𑀑𑀮𑁄𑀓𑁂𑀢𑁆𑀯𑀸 ‘𑀲𑀢𑁂𑀓𑀺𑀘𑁆𑀙𑁄’𑀢𑀺 𑀫𑀁 𑀆𑀳𑀸’’𑀢𑀺 𑀯𑀤𑀢𑀺, 𑀢𑀢𑁄 𑀅𑀦𑁂𑀦 𑀲𑁄 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀬𑀁 𑀆𑀘𑀭𑀺𑀬𑁄 𑀪𑀡𑀢𑀺 𑀢𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀧𑀦𑀲𑁆𑀲 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄 𑀧𑀦 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀩𑁆𑀩𑁄 𑁋 ‘‘𑀅𑀫𑁆𑀳𑁂𑀳𑀺 𑀲𑀳 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄 𑀕𑀡𑀧𑀸𑀫𑁄𑀓𑁆𑀔𑁄, 𑀢𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺. 𑀢𑁂𑀦𑀸𑀧𑀺 ‘‘𑀲𑀢𑁂𑀓𑀺𑀘𑁆𑀙𑁄’’𑀢𑀺 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄𑀧𑀺 𑀦𑀢𑁆𑀣𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀡𑁆𑀟𑀺𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀩𑁆𑀩𑁄 𑁋 ‘‘𑀅𑀲𑀼𑀓𑀤𑀳𑀭𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺. 𑀢𑁂𑀦𑀸𑀧𑀺 ‘‘𑀲𑀢𑁂𑀓𑀺𑀘𑁆𑀙𑁄’’𑀢𑀺 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀤𑀳𑀭𑀲𑁆𑀲𑀸𑀧𑀺 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸𑀯 𑀉𑀧𑀝𑁆𑀞𑀸𑀢𑀺, 𑀢𑁂𑀦𑀸𑀧𑀺 ‘‘𑀧𑀸𑀭𑀸𑀚𑀺𑀓𑁄𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀤𑀼𑀮𑁆𑀮𑀪𑁄 𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀢𑀢𑁄 𑀤𑀼𑀮𑁆𑀮𑀪𑀢𑀭𑀸 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀯𑀺𑀯𑀺𑀢𑁆𑀢𑀁 𑀑𑀓𑀸𑀲𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀻𑀮𑀸𑀦𑀺 𑀲𑁄𑀥𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀢𑀸𑀯 𑀫𑀦𑀲𑀺 𑀓𑀭𑁄𑀳𑀻’’𑀢𑀺. 𑀲𑀘𑁂 𑀢𑀲𑁆𑀲 𑀅𑀭𑁄𑀕𑀁 𑀲𑀻𑀮𑀁 𑀓𑀫𑁆𑀫𑀝𑁆𑀞𑀸𑀦𑀁 𑀖𑀝𑀬𑀢𑀺, 𑀲𑀗𑁆𑀔𑀸𑀭𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀯𑀺𑀬 𑀘𑀺𑀢𑁆𑀢𑀫𑁆𑀧𑀺 𑀏𑀓𑀕𑁆𑀕𑀁 𑀳𑁄𑀢𑀺, 𑀤𑀺𑀯𑀲𑀁 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺. 𑀲𑁄 𑀤𑀺𑀯𑀲𑀸𑀢𑀺𑀓𑁆𑀓𑀫𑁂 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀻𑀤𑀺𑀲𑀸 𑀢𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀻’’𑀢𑀺. 𑀆𑀭𑁄𑀘𑀺𑀢𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀯𑀢𑁆𑀢𑀩𑁆𑀩𑁄 𑁋 ‘‘𑀧𑀩𑁆𑀩𑀚𑁆𑀚𑀸 𑀦𑀸𑀫 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀸𑀬, 𑀅𑀧𑁆𑀧𑀫𑀢𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀳𑀻’’𑀢𑀺.

𑀬𑀲𑁆𑀲 𑀧𑀦 𑀲𑀻𑀮𑀁 𑀪𑀺𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀖𑀝𑀬𑀢𑀺, 𑀧𑀢𑁄𑀤𑀸𑀪𑀺𑀢𑀼𑀦𑁆𑀦𑀁 𑀯𑀺𑀬 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀕𑁆𑀕𑀺𑀦𑀸 𑀟𑀬𑁆𑀳𑀢𑀺, 𑀢𑀢𑁆𑀢𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀢𑀗𑁆𑀔𑀡𑀜𑁆𑀜𑁂𑀯 𑀯𑀼𑀝𑁆𑀞𑀸𑀢𑀺. 𑀲𑁄 𑀆𑀕𑀢𑁄 ‘‘𑀓𑀸 𑀢𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀆𑀭𑁄𑀘𑀺𑀢𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 ‘‘𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄. 𑀲𑀩𑁆𑀩𑀧𑀞𑀫𑀜𑁆𑀳𑀺 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑀸 𑀚𑀸𑀦𑀸𑀢𑀺, 𑀅𑀣𑀲𑁆𑀲 𑀆𑀭𑀓𑁆𑀔𑀤𑁂𑀯𑀢𑀸 𑀧𑀭𑀘𑀺𑀢𑁆𑀢𑀯𑀺𑀤𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑀸 𑀘 𑀤𑁂𑀯𑀢𑀸 𑀚𑀸𑀦𑀦𑁆𑀢𑀺, 𑀢𑁆𑀯𑀁𑀬𑁂𑀯 𑀤𑀸𑀦𑀺 𑀢𑀯 𑀲𑁄𑀢𑁆𑀣𑀺𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄.

𑀦𑀺𑀝𑁆𑀞𑀺𑀢𑀸 𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑀣𑀸

𑀯𑀺𑀦𑀬𑀥𑀭𑀲𑁆𑀲 𑀘 𑀮𑀓𑁆𑀔𑀡𑀸𑀤𑀺𑀓𑀣𑀸.

𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑀇𑀤𑀸𑀦𑀺 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑀲𑁆𑀲 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀬𑀁 𑀯𑀼𑀢𑁆𑀢𑀁 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄𑀢𑀺𑀆𑀤𑀺. 𑀏𑀢𑁆𑀣 𑀬𑁄 𑀧𑀦𑀸𑀢𑀺 𑀯𑀺𑀪𑀚𑀺𑀢𑀩𑁆𑀩𑀧𑀤𑀁; 𑀬𑁄 𑀬𑀸𑀤𑀺𑀲𑁄𑀢𑀺𑀆𑀤𑀻𑀦𑀺 𑀢𑀲𑁆𑀲 𑀯𑀺𑀪𑀚𑀦𑀧𑀤𑀸𑀦𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀧𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁; 𑀬𑁄𑀢𑀺 𑀅𑀢𑁆𑀣𑀧𑀤𑀁; 𑀢𑀜𑁆𑀘 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀺𑀬𑀫𑁂𑀦 𑀧𑀼𑀕𑁆𑀕𑀮𑀤𑀻𑀧𑀓𑀁 𑀬𑁄 𑀲𑀤𑁆𑀤𑀫𑁂𑀯 𑀆𑀳. 𑀢𑀲𑁆𑀫𑀸 𑀏𑀢𑁆𑀣 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀬𑁄 𑀧𑀦𑀸𑀢𑀺 𑀬𑁄 𑀬𑁄𑀓𑁄𑀘𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀬𑁄 𑀬𑁄𑀓𑁄𑀘𑀺 𑀦𑀸𑀫, 𑀲𑁄 𑀅𑀯𑀲𑁆𑀲𑀁 𑀮𑀺𑀗𑁆𑀕-𑀬𑀼𑀢𑁆𑀢-𑀚𑀸𑀢𑀺-𑀦𑀸𑀫-𑀕𑁄𑀢𑁆𑀢-𑀲𑀻𑀮-𑀯𑀺𑀳𑀸𑀭-𑀕𑁄𑀘𑀭𑀯𑀬𑁂𑀲𑀼 𑀏𑀓𑁂𑀦𑀸𑀓𑀸𑀭𑁂𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀁 𑀢𑀣𑀸 𑀜𑀸𑀧𑁂𑀢𑀼𑀁 𑀢𑀁 𑀧𑀪𑁂𑀤𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀬𑀸𑀤𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀤𑀺𑀲𑁄𑀢𑀺 𑀮𑀺𑀗𑁆𑀕𑀯𑀲𑁂𑀦 𑀬𑀸𑀤𑀺𑀲𑁄 𑀯𑀸 𑀢𑀸𑀤𑀺𑀲𑁄 𑀯𑀸 𑀳𑁄𑀢𑀼; 𑀤𑀻𑀖𑁄 𑀯𑀸 𑀭𑀲𑁆𑀲𑁄 𑀯𑀸 𑀓𑀸𑀴𑁄 𑀯𑀸 𑀑𑀤𑀸𑀢𑁄 𑀯𑀸 𑀫𑀗𑁆𑀕𑀼𑀭𑀘𑁆𑀙𑀯𑀺 𑀯𑀸 𑀓𑀺𑀲𑁄 𑀯𑀸 𑀣𑀽𑀮𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀬𑀼𑀢𑁆𑀢𑁄𑀢𑀺 𑀬𑁄𑀕𑀯𑀲𑁂𑀦 𑀬𑁂𑀦 𑀯𑀸 𑀢𑁂𑀦 𑀯𑀸 𑀬𑀼𑀢𑁆𑀢𑁄 𑀳𑁄𑀢𑀼; 𑀦𑀯𑀓𑀫𑁆𑀫𑀬𑀼𑀢𑁆𑀢𑁄 𑀯𑀸 𑀉𑀤𑁆𑀤𑁂𑀲𑀬𑀼𑀢𑁆𑀢𑁄 𑀯𑀸 𑀯𑀸𑀲𑀥𑀼𑀭𑀬𑀼𑀢𑁆𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀚𑀘𑁆𑀘𑁄𑀢𑀺 𑀚𑀸𑀢𑀺𑀯𑀲𑁂𑀦 𑀬𑀁𑀚𑀘𑁆𑀘𑁄 𑀯𑀸 𑀢𑀁𑀚𑀘𑁆𑀘𑁄 𑀯𑀸 𑀳𑁄𑀢𑀼; 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀦𑀸𑀫𑁄𑀢𑀺 𑀦𑀸𑀫𑀯𑀲𑁂𑀦 𑀬𑀣𑀸𑀦𑀸𑀫𑁄 𑀯𑀸 𑀢𑀣𑀸𑀦𑀸𑀫𑁄 𑀯𑀸 𑀳𑁄𑀢𑀼; 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀯𑀸 𑀥𑀫𑁆𑀫𑀭𑀓𑁆𑀔𑀺𑀢𑁄 𑀯𑀸 𑀲𑀗𑁆𑀖𑀭𑀓𑁆𑀔𑀺𑀢𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀕𑁄𑀢𑁆𑀢𑁄𑀢𑀺 𑀕𑁄𑀢𑁆𑀢𑀯𑀲𑁂𑀦 𑀬𑀣𑀸𑀕𑁄𑀢𑁆𑀢𑁄 𑀯𑀸 𑀢𑀣𑀸𑀕𑁄𑀢𑁆𑀢𑁄 𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀕𑁄𑀢𑁆𑀢𑁂𑀦 𑀳𑁄𑀢𑀼; 𑀓𑀘𑁆𑀘𑀸𑀬𑀦𑁄 𑀯𑀸 𑀯𑀸𑀲𑀺𑀝𑁆𑀞𑁄 𑀯𑀸 𑀓𑁄𑀲𑀺𑀬𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀲𑀻𑀮𑁄𑀢𑀺 𑀲𑀻𑀮𑁂𑀲𑀼 𑀬𑀣𑀸𑀲𑀻𑀮𑁄 𑀯𑀸 𑀢𑀣𑀸𑀲𑀻𑀮𑁄 𑀯𑀸 𑀳𑁄𑀢𑀼; 𑀦𑀯𑀓𑀫𑁆𑀫𑀲𑀻𑀮𑁄 𑀯𑀸 𑀉𑀤𑁆𑀤𑁂𑀲𑀲𑀻𑀮𑁄 𑀯𑀸 𑀯𑀸𑀲𑀥𑀼𑀭𑀲𑀻𑀮𑁄 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀺𑀳𑀸𑀭𑀻𑀢𑀺 𑀯𑀺𑀳𑀸𑀭𑁂𑀲𑀼𑀧𑀺 𑀬𑀣𑀸𑀯𑀺𑀳𑀸𑀭𑀻 𑀯𑀸 𑀢𑀣𑀸𑀯𑀺𑀳𑀸𑀭𑀻 𑀯𑀸 𑀳𑁄𑀢𑀼; 𑀦𑀯𑀓𑀫𑁆𑀫𑀯𑀺𑀳𑀸𑀭𑀻 𑀯𑀸 𑀉𑀤𑁆𑀤𑁂𑀲𑀯𑀺𑀳𑀸𑀭𑀻 𑀯𑀸 𑀯𑀸𑀲𑀥𑀼𑀭𑀯𑀺𑀳𑀸𑀭𑀻 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀕𑁄𑀘𑀭𑁄𑀢𑀺 𑀕𑁄𑀘𑀭𑁂𑀲𑀼𑀧𑀺 𑀬𑀣𑀸𑀕𑁄𑀘𑀭𑁄 𑀯𑀸 𑀢𑀣𑀸𑀕𑁄𑀘𑀭𑁄 𑀯𑀸 𑀳𑁄𑀢𑀼; 𑀦𑀯𑀓𑀫𑁆𑀫𑀕𑁄𑀘𑀭𑁄 𑀯𑀸 𑀉𑀤𑁆𑀤𑁂𑀲𑀕𑁄𑀘𑀭𑁄 𑀯𑀸 𑀯𑀸𑀲𑀥𑀼𑀭𑀕𑁄𑀘𑀭𑁄 𑀯𑀸𑀢𑀺 𑀅𑀢𑁆𑀣𑁄. 𑀣𑁂𑀭𑁄 𑀯𑀸𑀢𑀺 𑀆𑀤𑀻𑀲𑀼 𑀯𑀬𑁄𑀯𑀼𑀟𑁆𑀠𑀸𑀤𑀻𑀲𑀼 𑀬𑁄 𑀯𑀸 𑀲𑁄 𑀯𑀸 𑀳𑁄𑀢𑀼; 𑀧𑀭𑀺𑀧𑀼𑀡𑁆𑀡𑀤𑀲𑀯𑀲𑁆𑀲𑀢𑀸𑀬 𑀣𑁂𑀭𑁄 𑀯𑀸 𑀊𑀦𑀧𑀜𑁆𑀘𑀯𑀲𑁆𑀲𑀢𑀸𑀬 𑀦𑀯𑁄 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑀢𑀸𑀬 𑀫𑀚𑁆𑀛𑀺𑀫𑁄 𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀔𑁄 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀏𑀲𑁄 𑀯𑀼𑀘𑁆𑀘𑀢𑀺 ‘‘𑀬𑁄 𑀧𑀦𑀸’’𑀢𑀺.

𑀪𑀺𑀓𑁆𑀔𑀼𑀦𑀺𑀤𑁆𑀤𑁂𑀲𑁂 𑀪𑀺𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀓𑁄; 𑀮𑀪𑀦𑁆𑀢𑁄 𑀯𑀸 𑀅𑀮𑀪𑀦𑁆𑀢𑁄 𑀯𑀸 𑀅𑀭𑀺𑀬𑀸𑀬 𑀬𑀸𑀘𑀦𑀸𑀬 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸𑀤𑀻𑀳𑀺 𑀅𑀚𑁆𑀛𑀼𑀧𑀕𑀢𑀁 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄 𑀦𑀸𑀫. 𑀬𑁄 𑀳𑀺 𑀓𑁄𑀘𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀚𑀻𑀯𑀺𑀓𑀓𑀧𑁆𑀧𑀦𑀁 𑀳𑀺𑀢𑁆𑀯𑀸 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑁂𑀦𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼. 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀓𑀸𑀚𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼; 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀚𑀸𑀢𑀢𑁆𑀢𑀸 𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼. 𑀅𑀕𑁆𑀖𑀨𑀲𑁆𑀲𑀯𑀡𑁆𑀡𑀪𑁂𑀤𑁂𑀦 𑀪𑀺𑀦𑁆𑀦𑀁 𑀧𑀝𑀁 𑀥𑀸𑀭𑁂𑀢𑀻𑀢𑀺 𑀪𑀺𑀦𑁆𑀦𑀧𑀝𑀥𑀭𑁄. 𑀢𑀢𑁆𑀣 𑀲𑀢𑁆𑀣𑀓𑀘𑁆𑀙𑁂𑀤𑀦𑁂𑀦 𑀅𑀕𑁆𑀖𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀳𑀲𑁆𑀲𑀕𑁆𑀖𑀦𑀓𑁄𑀧𑀺 𑀳𑀺 𑀧𑀝𑁄 𑀲𑀢𑁆𑀣𑀓𑁂𑀦 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀦𑁄 𑀪𑀺𑀦𑁆𑀦𑀕𑁆𑀖𑁄 𑀳𑁄𑀢𑀺. 𑀧𑀼𑀭𑀺𑀫𑀕𑁆𑀖𑀢𑁄 𑀉𑀧𑀟𑁆𑀠𑀫𑁆𑀧𑀺 𑀦 𑀅𑀕𑁆𑀖𑀢𑀺. 𑀲𑀼𑀢𑁆𑀢𑀲𑀁𑀲𑀺𑀩𑁆𑀩𑀦𑁂𑀦 𑀨𑀲𑁆𑀲𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀔𑀲𑀫𑁆𑀨𑀲𑁆𑀲𑁄𑀧𑀺 𑀳𑀺 𑀧𑀝𑁄 𑀲𑀼𑀢𑁆𑀢𑁂𑀳𑀺 𑀲𑀁𑀲𑀺𑀩𑁆𑀩𑀺𑀢𑁄 𑀪𑀺𑀦𑁆𑀦𑀨𑀲𑁆𑀲𑁄 𑀳𑁄𑀢𑀺. 𑀔𑀭𑀲𑀫𑁆𑀨𑀲𑁆𑀲𑀢𑀁 𑀧𑀸𑀧𑀼𑀡𑀸𑀢𑀺. 𑀲𑀽𑀘𑀺𑀫𑀮𑀸𑀤𑀻𑀳𑀺 𑀯𑀡𑁆𑀡𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀧𑀭𑀺𑀲𑀼𑀤𑁆𑀥𑁄𑀧𑀺 𑀳𑀺 𑀧𑀝𑁄 𑀲𑀽𑀘𑀺𑀓𑀫𑁆𑀫𑀢𑁄 𑀧𑀝𑁆𑀞𑀸𑀬 𑀲𑀽𑀘𑀺𑀫𑀮𑁂𑀦, 𑀳𑀢𑁆𑀣𑀲𑁂𑀤𑀫𑀮𑀚𑀮𑁆𑀮𑀺𑀓𑀸𑀳𑀺, 𑀅𑀯𑀲𑀸𑀦𑁂 𑀭𑀚𑀦𑀓𑀧𑁆𑀧𑀓𑀭𑀡𑁂𑀳𑀺 𑀘 𑀪𑀺𑀦𑁆𑀦𑀯𑀡𑁆𑀡𑁄 𑀳𑁄𑀢𑀺; 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀢𑀺. 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀪𑀺𑀦𑁆𑀦𑀧𑀝𑀥𑀸𑀭𑀡𑀢𑁄 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼. 𑀕𑀺𑀳𑀺𑀯𑀢𑁆𑀣𑀯𑀺𑀲𑀪𑀸𑀕𑀸𑀦𑀁 𑀯𑀸 𑀓𑀸𑀲𑀸𑀯𑀸𑀦𑀁 𑀥𑀸𑀭𑀡𑀫𑀢𑁆𑀢𑁂𑀦𑁂𑀯 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼.

𑀲𑀫𑀜𑁆𑀜𑀸𑀬𑀸𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀯𑁄𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀜𑁆𑀜𑀸𑀬 𑀏𑀯 𑀳𑀺 𑀏𑀓𑀘𑁆𑀘𑁄 ‘‘𑀪𑀺𑀓𑁆𑀔𑀽’’𑀢𑀺 𑀧𑀜𑁆𑀜𑀸𑀬𑀢𑀺. 𑀢𑀣𑀸 𑀳𑀺 𑀦𑀺𑀫𑀦𑁆𑀢𑀦𑀸𑀤𑀺𑀫𑁆𑀳𑀺 𑀪𑀺𑀓𑁆𑀔𑀽𑀲𑀼 𑀕𑀡𑀺𑀬𑀫𑀸𑀦𑁂𑀲𑀼 𑀲𑀸𑀫𑀡𑁂𑀭𑁂𑀧𑀺 𑀕𑀳𑁂𑀢𑁆𑀯𑀸 ‘‘𑀲𑀢𑀁 𑀪𑀺𑀓𑁆𑀔𑀽 𑀲𑀳𑀲𑁆𑀲𑀁 𑀪𑀺𑀓𑁆𑀔𑀽’’𑀢𑀺 𑀯𑀤𑀦𑁆𑀢𑀺. 𑀧𑀝𑀺𑀜𑁆𑀜𑀸𑀬𑀸𑀢𑀺 𑀅𑀢𑁆𑀢𑀦𑁄 𑀧𑀝𑀺𑀚𑀸𑀦𑀦𑁂𑀦 𑀧𑀝𑀺𑀜𑁆𑀜𑀸𑀬𑀧𑀺 𑀳𑀺 𑀏𑀓𑀘𑁆𑀘𑁄 ‘‘𑀪𑀺𑀓𑁆𑀔𑀽’’𑀢𑀺 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀲 ‘‘𑀓𑁄 𑀏𑀢𑁆𑀣𑀸𑀢𑀺? 𑀅𑀳𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀽’’𑀢𑀺 (𑀅. 𑀦𑀺. 𑁧𑁦.𑁯𑁬) 𑀏𑀯𑀫𑀸𑀤𑀻𑀲𑀼 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀸 𑀥𑀫𑁆𑀫𑀺𑀓𑀸 𑀧𑀝𑀺𑀜𑁆𑀜𑀸. 𑀭𑀢𑁆𑀢𑀺𑀪𑀸𑀕𑁂 𑀧𑀦 𑀤𑀼𑀲𑁆𑀲𑀻𑀮𑀸𑀧𑀺 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 𑀅𑀥𑀫𑁆𑀫𑀺𑀓𑀸𑀬 𑀧𑀝𑀺𑀜𑁆𑀜𑀸𑀬 𑀅𑀪𑀽𑀢𑀸𑀬 ‘‘𑀫𑀬𑀁 𑀪𑀺𑀓𑁆𑀔𑀽’’𑀢𑀺 𑀯𑀤𑀦𑁆𑀢𑀺.

𑀏𑀳𑀺 𑀪𑀺𑀓𑁆𑀔𑀽𑀢𑀺 𑀏𑀳𑀺 𑀪𑀺𑀓𑁆𑀔𑀼 𑀦𑀸𑀫 𑀪𑀕𑀯𑀢𑁄 ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀪𑀺𑀓𑁆𑀔𑀼𑀪𑀸𑀯𑀁 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀁 𑀧𑀢𑁆𑀢𑁄. 𑀪𑀕𑀯𑀸 𑀳𑀺 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑀸𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀭𑀢𑁆𑀢𑀧𑀁𑀲𑀼𑀓𑀽𑀮𑀦𑁆𑀢𑀭𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀓𑁆𑀔𑀺𑀡𑀳𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀏𑀳𑀺, 𑀪𑀺𑀓𑁆𑀔𑀼, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀯𑀤𑀢𑀺. 𑀢𑀲𑁆𑀲 𑀲𑀳𑁂𑀯 𑀪𑀕𑀯𑀢𑁄 𑀯𑀘𑀦𑁂𑀦 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀭𑀼𑀳𑀢𑀺. 𑀪𑀡𑁆𑀟𑀼 𑀓𑀸𑀲𑀸𑀬𑀯𑀲𑀦𑁄 𑀳𑁄𑀢𑀺. 𑀏𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀓𑀁 𑀅𑀁𑀲𑁂 𑀞𑀧𑁂𑀢𑁆𑀯𑀸 𑀯𑀸𑀫𑀁𑀲𑀓𑀽𑀝𑁂 𑀆𑀲𑀢𑁆𑀢𑀦𑀻𑀮𑀼𑀧𑁆𑀧𑀮𑀯𑀡𑁆𑀡𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑁋

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀭𑀻𑀭𑁂 𑀧𑀝𑀺𑀫𑀼𑀓𑁆𑀓𑁂𑀳𑀺𑀬𑁂𑀯 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀣𑁂𑀭𑁄 𑀯𑀺𑀬 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑀸𑀘𑀭𑀺𑀬𑀓𑁄 𑀩𑀼𑀤𑁆𑀥𑀼𑀧𑀚𑁆𑀛𑀸𑀬𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀦𑁆𑀤𑀫𑀸𑀦𑁄𑀬𑁂𑀯 𑀢𑀺𑀝𑁆𑀞𑀢𑀺. 𑀪𑀕𑀯𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀏𑀯 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀏𑀯𑀁 𑀉𑀧𑀲𑀫𑁆𑀧𑀦𑁆𑀦𑀸𑀦𑀺 𑀘 𑀲𑀳𑀲𑁆𑀲𑀼𑀧𑀭𑀺 𑀏𑀓𑀘𑀢𑁆𑀢𑀸𑀮𑀻𑀲𑀼𑀢𑁆𑀢𑀭𑀸𑀦𑀺 𑀢𑀻𑀡𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀳𑁂𑀲𑀼𑀁; 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀜𑁆𑀘 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑀸, 𑀬𑀲𑁄 𑀓𑀼𑀮𑀧𑀼𑀢𑁆𑀢𑁄, 𑀢𑀲𑁆𑀲 𑀧𑀭𑀺𑀯𑀸𑀭𑀸 𑀘𑀢𑀼𑀧𑀡𑁆𑀡𑀸𑀲 𑀲𑀳𑀸𑀬𑀓𑀸, 𑀢𑀺𑀁𑀲 𑀪𑀤𑁆𑀤𑀯𑀕𑁆𑀕𑀺𑀬𑀸, 𑀲𑀳𑀲𑁆𑀲𑀧𑀼𑀭𑀸𑀡𑀚𑀝𑀺𑀮𑀸, 𑀲𑀤𑁆𑀥𑀺𑀁 𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀅𑀟𑁆𑀠𑀢𑁂𑀬𑁆𑀬𑀲𑀢𑀸 𑀧𑀭𑀺𑀩𑁆𑀩𑀸𑀚𑀓𑀸, 𑀏𑀓𑁄 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋

‘‘𑀢𑀻𑀡𑀺 𑀲𑀢𑀁 𑀲𑀳𑀲𑁆𑀲𑀜𑁆𑀘, 𑀘𑀢𑁆𑀢𑀸𑀮𑀻𑀲𑀁 𑀧𑀼𑀦𑀸𑀧𑀭𑁂;

𑀏𑀓𑁄 𑀘 𑀣𑁂𑀭𑁄 𑀲𑀧𑁆𑀧𑀜𑁆𑀜𑁄, 𑀲𑀩𑁆𑀩𑁂 𑀢𑁂 𑀏𑀳𑀺𑀪𑀺𑀓𑁆𑀔𑀼𑀓𑀸’’𑀢𑀺.