𑁧𑁨. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑀤𑀲𑀯𑀢𑁆𑀣𑀼𑀓𑀣𑀸

𑁪𑁪𑁬. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑁋 𑀪𑀺𑀓𑁆𑀔𑀕𑁆𑀕𑁂𑀦𑀸𑀢𑀺 𑀪𑀺𑀓𑁆𑀔𑀼𑀅𑀕𑁆𑀕𑁂𑀦, 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀢𑀢𑁆𑀢𑀓𑁂 𑀧𑀝𑀺𑀯𑀻𑀲𑁂 𑀞𑀧𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀺𑀬𑀸𑀢𑀺 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑀯𑀮𑀸𑀳𑀓𑀸.

𑁪𑁪𑁭. 𑀅𑀯𑀺𑀚𑁆𑀚𑀸𑀦𑀺𑀯𑀼𑀝𑀸𑀢𑀺 𑀅𑀯𑀺𑀚𑁆𑀚𑀸𑀧𑀝𑀺𑀘𑁆𑀙𑀦𑁆𑀦𑀸. 𑀧𑁄𑀲𑀸𑀢𑀺 𑀧𑀼𑀭𑀺𑀲𑀸. 𑀧𑀺𑀬𑀭𑀽𑀧𑀁 𑀅𑀪𑀺𑀦𑀦𑁆𑀤𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀻𑀢𑀺 𑀧𑀺𑀬𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑁄. 𑀅𑀯𑀺𑀤𑁆𑀤𑀲𑀽𑀢𑀺 𑀅𑀯𑀺𑀚𑀸𑀦𑀦𑁆𑀢𑀸. 𑀭𑀸𑀕𑀭𑀚𑁂𑀳𑀺 𑀲𑀭𑀚𑀸. 𑀫𑀕𑀲𑀤𑀺𑀲𑀸𑀢𑀺 𑀫𑀕𑀸. 𑀲𑀳 𑀦𑁂𑀢𑁆𑀢𑀺𑀬𑀸𑀢𑀺 𑀲𑀦𑁂𑀢𑁆𑀢𑀺𑀓𑀸. 𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀴𑁂𑀯𑀭𑀁 𑀦𑀺𑀓𑁆𑀔𑀺𑀧𑀫𑀸𑀦𑀸 𑀪𑀽𑀫𑀺𑀁 𑀯𑀟𑁆𑀠𑁂𑀦𑁆𑀢𑀺. 𑀏𑀯𑀁 𑀯𑀟𑁆𑀠𑁂𑀦𑁆𑀢𑀸𑀯 𑀖𑁄𑀭𑀁 𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑀁.

𑁪𑁫𑁪. 𑀧𑀸𑀧𑀓𑀁 𑀦𑁄 𑀆𑀯𑀼𑀲𑁄 𑀓𑀢𑀦𑁆𑀢𑀺 𑀆𑀯𑀼𑀲𑁄 𑀅𑀫𑁆𑀳𑁂𑀳𑀺 𑀧𑀸𑀧𑀓𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑁪𑁫𑁫. 𑀓𑀢𑀫𑁂𑀦 𑀢𑁆𑀯𑀁 𑀪𑀽𑀫𑀺 𑀯𑀺𑀳𑀸𑀭𑁂𑀦𑀸𑀢𑀺 𑀏𑀢𑁆𑀣 𑀪𑀽𑀫𑀻𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀧𑀺𑀬𑀁 𑀯𑀢𑁆𑀢𑀼𑀓𑀸𑀫𑁄 𑀓𑀺𑀭 𑀆𑀬𑀲𑁆𑀫𑀸 𑀲𑀩𑁆𑀩𑀓𑀸𑀫𑀻 𑀦𑀯𑀓𑁂 𑀪𑀺𑀓𑁆𑀔𑀽 𑀏𑀯𑀁 𑀆𑀫𑀦𑁆𑀢𑁂𑀢𑀺. 𑀓𑀼𑀮𑁆𑀮𑀓𑀯𑀺𑀳𑀸𑀭𑁂𑀦𑀸𑀢𑀺 𑀉𑀢𑁆𑀢𑀸𑀦𑀯𑀺𑀳𑀸𑀭𑁂𑀦.

𑁪𑁫𑁭. 𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂𑀢𑀺 𑀓𑀣𑀁 𑀲𑀼𑀢𑁆𑀢𑀯𑀺𑀪𑀗𑁆𑀕𑁂 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺? 𑀢𑀢𑁆𑀭 𑀳𑀺 ‘‘𑀲𑀦𑁆𑀦𑀺𑀥𑀺 𑀦𑀸𑀫 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀁 𑀅𑀧𑀭𑀚𑁆𑀚𑀽’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀆𑀧𑀢𑁆𑀢𑀺𑀁 𑀯𑀤𑀦𑁆𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑁂𑀓𑁂 𑀫𑀜𑁆𑀜𑀦𑁆𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀮𑁄𑀡𑀁 𑀦𑀸𑀫 𑀬𑀸𑀯𑀚𑀻𑀯𑀺𑀓𑀢𑁆𑀢𑀸 𑀲𑀦𑁆𑀦𑀺𑀥𑀺𑀪𑀸𑀯𑀁 𑀦𑀸𑀧𑀚𑁆𑀚𑀢𑀺. 𑀬𑀫𑁆𑀧𑀺 𑀅𑀮𑁄𑀡𑀓𑀁 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀫𑁂𑀯, 𑀢𑀲𑁆𑀫𑀸 ‘‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀻’𑀢𑀺 𑀯𑀘𑀦𑀢𑁄 𑀤𑀼𑀓𑁆𑀓𑀝𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀢𑀼𑀫𑁆𑀳𑀸𑀓𑀁 𑀫𑀢𑁂𑀦 𑀤𑀼𑀓𑁆𑀓𑀝𑁂𑀦𑀧𑀺 𑀦 𑀪𑀯𑀺𑀢𑀩𑁆𑀩𑀁, 𑀦 𑀳𑀺 𑀏𑀢𑁆𑀣 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁, 𑀬𑀸𑀯𑀓𑀸𑀮𑀺𑀓𑀫𑁂𑀯 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁, 𑀦 𑀘 𑀢𑀁 𑀯𑀺𑀓𑀸𑀮𑁂 𑀧𑀭𑀺𑀪𑀼𑀢𑁆𑀢𑀁. 𑀬𑀤𑀺 𑀯𑀸 ‘‘𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀻’’𑀢𑀺 𑀯𑀘𑀦𑁂𑀦 𑀢𑀼𑀫𑁆𑀳𑁂 𑀤𑀼𑀓𑁆𑀓𑀝𑀁 𑀫𑀜𑁆𑀜𑁂𑀣, 𑀬𑀸𑀯𑀚𑀻𑀯𑀺𑀓𑀫𑀺𑀲𑁆𑀲𑀁 𑀬𑀸𑀯𑀓𑀸𑀮𑀺𑀓𑀁 𑀯𑀺𑀓𑀸𑀮𑁂 𑀪𑀼𑀜𑁆𑀚𑀦𑁆𑀢𑀲𑁆𑀲 𑀯𑀺𑀓𑀸𑀮𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀁 𑀦 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀦 𑀩𑁆𑀬𑀜𑁆𑀚𑀦𑀫𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀅𑀢𑁆𑀣𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄.

𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀤𑀺 𑀲𑀫𑁆𑀪𑀺𑀦𑁆𑀦𑀭𑀲𑀁 𑀳𑁄𑀢𑀺, 𑀬𑀸𑀯𑀓𑀸𑀮𑀺𑀓𑀕𑀢𑀺𑀓𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀯𑀺𑀓𑀸𑀮𑁂 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀦 𑀇𑀥 ‘‘𑀦 𑀓𑀧𑁆𑀧𑀢𑀻’’𑀢𑀺 𑀯𑀘𑀦𑀫𑀢𑁆𑀢𑁂𑀦𑁂𑀢𑁆𑀣 𑀤𑀼𑀓𑁆𑀓𑀝𑀁 𑀳𑁄𑀢𑀺. 𑀬𑀣𑁂𑀯 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀓𑀸𑀮𑀺𑀓𑁂𑀦 𑀲𑀫𑁆𑀪𑀺𑀦𑁆𑀦𑀭𑀲𑀁 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺, 𑀯𑀺𑀓𑀸𑀮𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀸𑀯𑀳𑀁 𑀳𑁄𑀢𑀺. 𑀏𑀯𑀁 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀅𑀧𑀭𑀚𑁆𑀚𑀼 𑀬𑀸𑀯𑀓𑀸𑀮𑀺𑀓𑁂𑀦 𑀲𑀫𑁆𑀪𑀺𑀦𑁆𑀦𑀭𑀲𑀁 𑀦 𑀓𑀧𑁆𑀧𑀢𑀺, 𑀲𑀦𑁆𑀦𑀺𑀥𑀺𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀸𑀯𑀳𑀁 𑀳𑁄𑀢𑀺. 𑀢𑀁 ‘‘𑀲𑀦𑁆𑀦𑀺𑀥𑀺𑀓𑀢𑀁 𑀇𑀤’’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺. 𑀢𑀲𑁆𑀫𑀸 ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀧𑀼𑀘𑁆𑀙𑀸𑀬 ‘‘𑀧𑀭𑀺𑀲𑀼𑀤𑁆𑀥𑀫𑀺𑀤𑀁 𑀩𑁆𑀬𑀸𑀓𑀭𑀡𑀁 𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺.

𑀭𑀸𑀚𑀕𑀳𑁂 𑀉𑀧𑁄𑀲𑀣𑀲𑀁𑀬𑀼𑀢𑁆𑀢𑁂𑀢𑀺 𑀇𑀤𑀁 ‘‘𑀦 𑀪𑀺𑀓𑁆𑀔𑀯𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀤𑁆𑀯𑁂 𑀉𑀧𑁄𑀲𑀣𑀸𑀕𑀸𑀭𑀸𑀦𑀺 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀦𑀺; 𑀬𑁄 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀦𑀬𑀸𑀢𑀺𑀲𑀸𑀭𑁂 𑀤𑀼𑀓𑁆𑀓𑀝𑀦𑁆𑀢𑀺 ‘‘𑀦 𑀪𑀺𑀓𑁆𑀔𑀯𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀤𑁆𑀯𑁂 𑀉𑀧𑁄𑀲𑀣𑀸𑀕𑀸𑀭𑀸𑀦𑀺 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀦𑀻’’𑀢𑀺 𑀏𑀢𑀲𑁆𑀲 𑀯𑀺𑀦𑀬𑀲𑁆𑀲 𑀅𑀢𑀺𑀲𑀸𑀭𑁂 𑀤𑀼𑀓𑁆𑀓𑀝𑀁. 𑀘𑀫𑁆𑀧𑁂𑀬𑁆𑀬𑀓𑁂 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀇𑀤𑀁 ‘‘𑀅𑀥𑀫𑁆𑀫𑁂𑀦 𑀘𑁂 𑀪𑀺𑀓𑁆𑀔𑀯𑁂 𑀯𑀕𑁆𑀕𑀓𑀫𑁆𑀫𑀁, 𑀅𑀓𑀫𑁆𑀫𑀁 𑀦 𑀘 𑀓𑀭𑀡𑀻𑀬’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀓𑀢𑁆𑀯𑀸 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀆𑀕𑀢𑀁 𑀯𑀺𑀦𑀬𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀏𑀓𑀘𑁆𑀘𑁄 𑀓𑀧𑁆𑀧𑀢𑀻𑀢𑀺 𑀇𑀤𑀁 𑀥𑀫𑁆𑀫𑀺𑀓𑀁 𑀆𑀘𑀺𑀡𑁆𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀙𑁂𑀤𑀦𑀓𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀼𑀢𑁆𑀢𑀯𑀺𑀪𑀗𑁆𑀕𑁂 𑀳𑀺 ‘‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’’𑀢𑀺 𑀆𑀕𑀢𑀁, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀲𑀼𑀕𑀢𑀯𑀺𑀤𑀢𑁆𑀣𑀻𑀦𑀁 𑀉𑀧𑀭𑀺 𑀤𑀲𑀸𑀬𑁂𑀯 𑀯𑀺𑀤𑀢𑁆𑀣𑀺𑀫𑀢𑁆𑀢𑀸 𑀮𑀩𑁆𑀪𑀢𑀺. 𑀤𑀲𑀸𑀬 𑀯𑀺𑀦𑀸 𑀢𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀲𑁆𑀲 𑀇𑀤𑀁 𑀆𑀕𑀢𑀫𑁂𑀯 𑀳𑁄𑀢𑀺 𑁋 ‘‘𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀙𑁂𑀤𑀦𑀓𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀢𑀲𑁆𑀫𑀸 ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀧𑀼𑀝𑁆𑀞𑁄 ‘‘𑀙𑁂𑀤𑀦𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀆𑀳. 𑀙𑁂𑀤𑀦𑀓𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀧𑀸𑀘𑀺𑀢𑁆𑀢𑀺𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀤𑀲𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀺𑀯𑀕𑁆𑀕𑀲𑀗𑁆𑀕𑀳𑀸 𑀯𑀼𑀢𑁆𑀢𑀸, 𑀤𑁆𑀯𑀸𑀯𑀻𑀲𑀢𑀺𑀧𑀪𑁂𑀤𑀦𑀸;

𑀔𑀦𑁆𑀥𑀓𑀸 𑀲𑀸𑀲𑀦𑁂 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀧𑁆𑀧𑀳𑀸𑀬𑀺𑀦𑁄.

𑀬𑀸 𑀢𑁂𑀲𑀁 𑀯𑀡𑁆𑀡𑀦𑀸 𑀏𑀲𑀸, 𑀅𑀦𑁆𑀢𑀭𑀸𑀬𑀁 𑀯𑀺𑀦𑀸 𑀬𑀣𑀸;

𑀲𑀺𑀤𑁆𑀥𑀸 𑀲𑀺𑀚𑁆𑀛𑀦𑁆𑀢𑀼 𑀓𑀮𑁆𑀬𑀸𑀡𑀸, 𑀏𑀯𑀁 𑀆𑀲𑀸𑀧𑀺 𑀧𑀸𑀡𑀺𑀦𑀦𑁆𑀢𑀺.

𑀘𑀽𑀴𑀯𑀕𑁆𑀕-𑀅𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.