𑁯. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁧. 𑀦𑀯𑀫𑁂 𑀅𑀢𑀺𑀯𑁂𑀮𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀯𑁂𑀮𑀁 𑀓𑀸𑀮𑀁 𑀅𑀢𑀺𑀓𑁆𑀓𑀦𑁆𑀢𑀧𑁆𑀧𑀫𑀸𑀡𑀁 𑀓𑀸𑀮𑀁. 𑀓𑀺𑀫𑀗𑁆𑀕𑀁 𑀧𑀦𑀸𑀳𑀦𑁆𑀢𑀺 𑀅𑀳𑀁 𑀧𑀦 𑀓𑀺𑀁𑀓𑀸𑀭𑀡𑀸 𑀦 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺? 𑀪𑀺𑀲𑀫𑀼𑀴𑀸𑀮𑀦𑁆𑀢𑀺 𑀪𑀺𑀲𑀜𑁆𑀘𑁂𑀯 𑀫𑀼𑀴𑀸𑀮𑀜𑁆𑀘. 𑀅𑀩𑁆𑀩𑀼𑀳𑁂𑀢𑁆𑀯𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸. 𑀪𑀺𑀗𑁆𑀓𑀘𑁆𑀙𑀸𑀧𑀸𑀢𑀺 𑀳𑀢𑁆𑀣𑀺𑀧𑁄𑀢𑀓𑀸. 𑀢𑁂 𑀓𑀺𑀭 𑀅𑀪𑀺𑀡𑁆𑀳𑀁 𑀪𑀺𑀗𑁆𑀓𑀸𑀭𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀪𑀺𑀗𑁆𑀓𑀘𑁆𑀙𑀸𑀧𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀧𑀲𑀦𑁆𑀦𑁂𑀳𑀺 𑀓𑀢𑁆𑀢𑀩𑁆𑀩𑀸𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺. 𑀥𑀫𑁆𑀫𑀁 𑀪𑀸𑀲𑀦𑁆𑀢𑀻𑀢𑀺 𑀏𑀓𑀁 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀯𑀸 𑀲𑀼𑀢𑁆𑀢𑀦𑁆𑀢𑁂 𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑁂𑀦 𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀢𑁂𑀲𑀁 𑀢𑀸𑀬 𑀤𑁂𑀲𑀦𑀸𑀬 𑀧𑀲𑀦𑁆𑀦𑀸 𑀕𑀺𑀳𑀻 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺. 𑀦𑁂𑀯 𑀯𑀡𑁆𑀡𑀸𑀬 𑀳𑁄𑀢𑀺 𑀦 𑀩𑀮𑀸𑀬𑀸𑀢𑀺 𑀦𑁂𑀯 𑀕𑀼𑀡𑀯𑀡𑁆𑀡𑀸𑀬, 𑀦 𑀜𑀸𑀡𑀩𑀮𑀸𑀬 𑀳𑁄𑀢𑀺, 𑀕𑀼𑀡𑀯𑀡𑁆𑀡𑁂 𑀧𑀦 𑀧𑀭𑀺𑀳𑀸𑀬𑀦𑁆𑀢𑁂 𑀲𑀭𑀻𑀭𑀯𑀡𑁆𑀡𑁄𑀧𑀺 𑀲𑀭𑀻𑀭𑀩𑀮𑀫𑁆𑀧𑀺 𑀧𑀭𑀺𑀳𑀸𑀬𑀢𑀺, 𑀢𑀲𑁆𑀫𑀸 𑀲𑀭𑀻𑀭𑀲𑁆𑀲 𑀦𑁂𑀯 𑀯𑀡𑁆𑀡𑀸𑀬 𑀦 𑀩𑀮𑀸𑀬 𑀳𑁄𑀢𑀺. 𑀦𑀯𑀫𑀁.