𑁬. 𑀮𑀸𑀪𑀲𑀓𑁆𑀓𑀸𑀭𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀤𑀸𑀭𑀼𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀮𑀸𑀪𑀲𑀓𑁆𑀓𑀸𑀭𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀤𑀸𑀭𑀼𑀡𑁄𑀢𑀺 𑀣𑀤𑁆𑀥𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄𑀢𑀺 𑀏𑀢𑁆𑀣 𑀮𑀸𑀪𑁄 𑀦𑀸𑀫 𑀘𑀢𑀼𑀧𑀘𑁆𑀘𑀬𑀮𑀸𑀪𑁄. 𑀲𑀓𑁆𑀓𑀸𑀭𑁄𑀢𑀺 𑀢𑁂𑀲𑀁𑀬𑁂𑀯 𑀲𑀼𑀓𑀢𑀸𑀦𑀁 𑀲𑀼𑀲𑀗𑁆𑀔𑀢𑀸𑀦𑀁 𑀮𑀸𑀪𑁄. 𑀲𑀺𑀮𑁄𑀓𑁄𑀢𑀺 𑀯𑀡𑁆𑀡𑀖𑁄𑀲𑁄. 𑀓𑀝𑀼𑀓𑁄𑀢𑀺 𑀢𑀺𑀔𑀺𑀡𑁄. 𑀨𑀭𑀼𑀲𑁄𑀢𑀺 𑀔𑀭𑁄. 𑀅𑀦𑁆𑀢𑀭𑀸𑀬𑀺𑀓𑁄𑀢𑀺 𑀅𑀦𑁆𑀢𑀭𑀸𑀬𑀓𑀭𑁄. 𑀧𑀞𑀫𑀁.

𑁨. 𑀩𑀴𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁮. 𑀤𑀼𑀢𑀺𑀬𑁂 𑀩𑀸𑀴𑀺𑀲𑀺𑀓𑁄𑀢𑀺 𑀩𑀴𑀺𑀲𑀁 𑀕𑀳𑁂𑀢𑁆𑀯𑀸 𑀘𑀭𑀫𑀸𑀦𑁄 𑀫𑀘𑁆𑀙𑀖𑀸𑀢𑀓𑁄. 𑀆𑀫𑀺𑀲𑀕𑀢𑀦𑁆𑀢𑀺 𑀆𑀫𑀺𑀲𑀫𑀓𑁆𑀔𑀺𑀢𑀁. 𑀆𑀫𑀺𑀲𑀘𑀓𑁆𑀔𑀽𑀢𑀺 𑀆𑀫𑀺𑀲𑁂 𑀘𑀓𑁆𑀔𑀼 𑀤𑀲𑁆𑀲𑀦𑀁 𑀅𑀲𑁆𑀲𑀸𑀢𑀺 𑀆𑀫𑀺𑀲𑀘𑀓𑁆𑀔𑀼. 𑀕𑀺𑀮𑀩𑀴𑀺𑀲𑁄𑀢𑀺 𑀕𑀺𑀮𑀺𑀢𑀩𑀴𑀺𑀲𑁄. 𑀅𑀦𑀬𑀁 𑀆𑀧𑀦𑁆𑀦𑁄𑀢𑀺 𑀤𑀼𑀓𑁆𑀔𑀁 𑀧𑀢𑁆𑀢𑁄. 𑀩𑁆𑀬𑀲𑀦𑀁 𑀆𑀧𑀦𑁆𑀦𑁄𑀢𑀺 𑀯𑀺𑀦𑀸𑀲𑀁 𑀧𑀢𑁆𑀢𑁄. 𑀬𑀣𑀸𑀓𑀸𑀫𑀓𑀭𑀡𑀻𑀬𑁄𑀢𑀺 𑀬𑀣𑀸𑀓𑀸𑀫𑁂𑀦 𑀬𑀣𑀸𑀭𑀼𑀘𑀺𑀬𑀸 𑀬𑀣𑁂𑀯 𑀦𑀁 𑀩𑀸𑀴𑀺𑀲𑀺𑀓𑁄 𑀇𑀘𑁆𑀙𑀢𑀺, 𑀢𑀣𑁂𑀯𑀲𑁆𑀲 𑀓𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀧𑀸𑀧𑀺𑀫𑀢𑁄𑀢𑀺 𑀬𑀣𑀸 𑀓𑀺𑀮𑁂𑀲𑀫𑀸𑀭𑀲𑁆𑀲 𑀓𑀸𑀫𑁄, 𑀏𑀯𑀁 𑀓𑀢𑁆𑀢𑀩𑁆𑀩𑁄, 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀯𑀸 𑀧𑀸𑀧𑁂𑀢𑀩𑁆𑀩𑁄. 𑀤𑀼𑀢𑀺𑀬𑀁.

𑁩-𑁪. 𑀓𑀼𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁯-𑁧𑁬𑁦. 𑀢𑀢𑀺𑀬𑁂 𑀫𑀳𑀸𑀓𑀼𑀫𑁆𑀫𑀓𑀼𑀮𑀦𑁆𑀢𑀺 𑀫𑀳𑀦𑁆𑀢𑀁 𑀅𑀝𑁆𑀞𑀺𑀓𑀘𑁆𑀙𑀧𑀓𑀼𑀮𑀁. 𑀅𑀕𑀫𑀸𑀲𑀻𑀢𑀺 ‘‘𑀏𑀢𑁆𑀣 𑀅𑀤𑁆𑀥𑀸 𑀓𑀺𑀜𑁆𑀘𑀺 𑀔𑀸𑀤𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀢𑀁 𑀫𑀘𑁆𑀙𑀭𑀸𑀬𑀦𑁆𑀢𑁄 𑀫𑀁 𑀏𑀲 𑀦𑀺𑀯𑀸𑀭𑁂𑀢𑀻’’𑀢𑀺 𑀲𑀜𑁆𑀜𑀸𑀬 𑀅𑀕𑀫𑀸𑀲𑀺. 𑀧𑀧𑀢𑀸𑀬𑀸𑀢𑀺 𑀧𑀧𑀢𑀸 𑀯𑀼𑀘𑁆𑀘𑀢𑀺 𑀤𑀻𑀖𑀭𑀚𑁆𑀚𑀼𑀓𑀩𑀤𑁆𑀥𑁄 𑀅𑀬𑀓𑀦𑁆𑀢𑀓𑁄𑀲𑀓𑁂 𑀤𑀡𑁆𑀟𑀓𑀁 𑀧𑀯𑁂𑀲𑁂𑀢𑁆𑀯𑀸 𑀕𑀳𑀺𑀢𑁄 𑀓𑀡𑁆𑀡𑀺𑀓𑀲𑀮𑁆𑀮𑀲𑀡𑁆𑀞𑀸𑀦𑁄, 𑀅𑀬𑀓𑀡𑁆𑀝𑀓𑁄, 𑀬𑀲𑁆𑀫𑀺𑀁 𑀯𑁂𑀕𑁂𑀦 𑀧𑀢𑀺𑀢𑁆𑀯𑀸 𑀓𑀝𑀸𑀳𑁂 𑀮𑀕𑁆𑀕𑀫𑀢𑁆𑀢𑁂 𑀤𑀡𑁆𑀟𑀓𑁄 𑀦𑀺𑀓𑁆𑀔𑀫𑀢𑀺, 𑀭𑀚𑁆𑀚𑀼𑀓𑁄 𑀏𑀓𑀸𑀩𑀤𑁆𑀥𑁄 𑀕𑀘𑁆𑀙𑀢𑁂𑀯. 𑀲𑁄 𑀓𑀼𑀫𑁆𑀫𑁄𑀢𑀺 𑀲𑁄 𑀯𑀺𑀤𑁆𑀥𑀓𑀼𑀫𑁆𑀫𑁄. 𑀬𑁂𑀦 𑀲𑁄 𑀓𑀼𑀫𑁆𑀫𑁄𑀢𑀺 𑀉𑀤𑀓𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀸𑀲𑀗𑁆𑀓𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀬𑁂𑀦 𑀲𑁄 𑀅𑀢𑁆𑀣𑀓𑀸𑀫𑁄 𑀓𑀼𑀫𑁆𑀫𑁄. 𑀦 𑀤𑀸𑀦𑀺 𑀢𑁆𑀯𑀁 𑀅𑀫𑁆𑀳𑀸𑀓𑀦𑁆𑀢𑀺 𑀇𑀤𑀸𑀦𑀺 𑀢𑁆𑀯𑀁 𑀅𑀫𑀺𑀢𑁆𑀢𑀳𑀢𑁆𑀣𑀁 𑀕𑀢𑁄, 𑀦 𑀅𑀫𑁆𑀳𑀸𑀓𑀁 𑀲𑀦𑁆𑀢𑀓𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀮𑁆𑀮𑀧𑀦𑁆𑀢𑀸𑀦𑀁𑀬𑁂𑀯 𑀘 𑀦𑁂𑀲𑀁 𑀦𑀸𑀯𑀸𑀬 𑀞𑀺𑀢𑁄 𑀮𑀼𑀤𑁆𑀤𑁄 𑀭𑀚𑁆𑀚𑀼𑀓𑀁 𑀆𑀓𑀟𑁆𑀠𑀺𑀢𑁆𑀯𑀸 𑀓𑀼𑀫𑁆𑀫𑀁 𑀕𑀳𑁂𑀢𑁆𑀯𑀸 𑀬𑀣𑀸𑀓𑀸𑀫𑀁 𑀅𑀓𑀸𑀲𑀺. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀘 𑀉𑀢𑁆𑀢𑀸𑀦𑀫𑁂𑀯. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁫. 𑀫𑀻𑀴𑁆𑀳𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁧. 𑀧𑀜𑁆𑀘𑀫𑁂 𑀫𑀻𑀴𑁆𑀳𑀓𑀸𑀢𑀺 𑀕𑀽𑀣𑀧𑀸𑀡𑀓𑀸. 𑀕𑀽𑀣𑀸𑀤𑀻𑀢𑀺 𑀕𑀽𑀣𑀪𑀓𑁆𑀔𑀸. 𑀕𑀽𑀣𑀧𑀽𑀭𑀸𑀢𑀺 𑀅𑀦𑁆𑀢𑁄 𑀕𑀽𑀣𑁂𑀦 𑀪𑀭𑀺𑀢𑀸. 𑀧𑀼𑀡𑁆𑀡𑀸 𑀕𑀽𑀣𑀲𑁆𑀲𑀸𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀅𑀢𑁆𑀣𑀤𑀻𑀧𑀦𑀁. 𑀅𑀢𑀺𑀫𑀜𑁆𑀜𑁂𑀬𑁆𑀬𑀸𑀢𑀺 𑀧𑀘𑁆𑀙𑀺𑀫𑀧𑀸𑀤𑁂 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑁂 𑀕𑀽𑀣𑀲𑁆𑀲 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀞𑀺𑀢𑀸 ‘‘𑀅𑀳𑀫𑁆𑀳𑀺 𑀕𑀽𑀣𑀸𑀤𑀻’’𑀢𑀺 𑀪𑀡𑀦𑁆𑀢𑀻 𑀅𑀢𑀺𑀫𑀜𑁆𑀜𑁂𑀬𑁆𑀬. 𑀧𑀺𑀡𑁆𑀟𑀧𑀸𑀢𑁄 𑀘𑀲𑁆𑀲 𑀧𑀽𑀭𑁄𑀢𑀺 𑀅𑀧𑀭𑁄𑀧𑀺𑀲𑁆𑀲 𑀧𑀢𑁆𑀢𑀧𑀽𑀭𑁄 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑁄 𑀪𑀯𑁂𑀬𑁆𑀬. 𑀧𑀜𑁆𑀘𑀫𑀁.

𑁬. 𑀅𑀲𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁨. 𑀙𑀝𑁆𑀞𑁂 𑀓𑀁, 𑀪𑀺𑀓𑁆𑀔𑀯𑁂, 𑀅𑀲𑀦𑀺𑀯𑀺𑀘𑀓𑁆𑀓𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀓𑀁 𑀧𑀼𑀕𑁆𑀕𑀮𑀁 𑀫𑀢𑁆𑀣𑀓𑁂 𑀧𑀢𑀺𑀢𑁆𑀯𑀸 𑀫𑀤𑁆𑀤𑀫𑀸𑀦𑀁 𑀲𑀼𑀓𑁆𑀓𑀸𑀲𑀦𑀺𑀘𑀓𑁆𑀓𑀁 𑀆𑀕𑀘𑁆𑀙𑀢𑀼. 𑀅𑀧𑁆𑀧𑀢𑁆𑀢𑀫𑀸𑀦𑀲𑀦𑁆𑀢𑀺 𑀅𑀦𑀥𑀺𑀕𑀢𑀸𑀭𑀳𑀢𑁆𑀢𑀁. 𑀇𑀢𑀺 𑀪𑀕𑀯𑀸 𑀦 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀓𑀸𑀫𑀢𑀸𑀬, 𑀆𑀤𑀻𑀦𑀯𑀁 𑀧𑀦 𑀤𑀲𑁆𑀲𑁂𑀢𑀼𑀁 𑀏𑀯𑀫𑀸𑀳. 𑀅𑀲𑀦𑀺𑀘𑀓𑁆𑀓𑀜𑁆𑀳𑀺 𑀫𑀢𑁆𑀣𑀓𑁂 𑀧𑀢𑀺𑀢𑀁 𑀏𑀓𑀫𑁂𑀯 𑀅𑀢𑁆𑀢𑀪𑀸𑀯𑀁 𑀦𑀸𑀲𑁂𑀢𑀺, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀦𑀺𑀭𑀬𑀸𑀤𑀻𑀲𑀼 𑀅𑀦𑀦𑁆𑀢𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺. 𑀙𑀝𑁆𑀞𑀁.

𑁭. 𑀤𑀺𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁩. 𑀲𑀢𑁆𑀢𑀫𑁂 𑀤𑀺𑀤𑁆𑀥𑀕𑀢𑁂𑀦𑀸𑀢𑀺 𑀕𑀢𑀤𑀺𑀤𑁆𑀥𑁂𑀦. 𑀯𑀺𑀲𑀮𑁆𑀮𑁂𑀦𑀸𑀢𑀺 𑀯𑀺𑀲𑀫𑀓𑁆𑀔𑀺𑀢𑁂𑀦. 𑀲𑀮𑁆𑀮𑁂𑀦𑀸𑀢𑀺 𑀲𑀢𑁆𑀢𑀺𑀬𑀸. 𑀲𑀢𑁆𑀢𑀫𑀁.

𑁮. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁪. 𑀅𑀝𑁆𑀞𑀫𑁂 𑀲𑀺𑀗𑁆𑀕𑀸𑀮𑁄𑀢𑀺 𑀚𑀭𑀲𑀺𑀗𑁆𑀕𑀸𑀮𑁄. 𑀬𑀣𑀸 𑀳𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 𑀧𑀽𑀢𑀺𑀓𑀸𑀬𑁄 𑀢𑁆𑀯𑁂𑀯, 𑀢𑀁𑀔𑀡𑀁 𑀕𑀴𑀺𑀢𑀫𑁆𑀧𑀺 𑀘 𑀫𑀼𑀢𑁆𑀢𑀁 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀤𑀳𑀼𑀚𑀸𑀢𑁄𑀧𑀺 𑀲𑀺𑀗𑁆𑀕𑀸𑀮𑁄 𑀚𑀭𑀲𑀺𑀗𑁆𑀕𑀸𑀮𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀉𑀓𑁆𑀓𑀡𑁆𑀝𑀓𑁂𑀦 𑀦𑀸𑀫𑀸𑀢𑀺 𑀏𑀯𑀁𑀦𑀸𑀫𑀓𑁂𑀦 𑀭𑁄𑀕𑁂𑀦. 𑀲𑁄 𑀓𑀺𑀭 𑀲𑀻𑀢𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀲𑀓𑀮𑀲𑀭𑀻𑀭𑀢𑁄 𑀮𑁄𑀫𑀸𑀦𑀺 𑀧𑀢𑀦𑁆𑀢𑀺, 𑀲𑀓𑀮𑀲𑀭𑀻𑀭𑀁 𑀦𑀺𑀮𑁆𑀮𑁄𑀫𑀁 𑀳𑀼𑀢𑁆𑀯𑀸, 𑀲𑀫𑀦𑁆𑀢𑀢𑁄 𑀨𑀼𑀝𑀢𑀺, 𑀯𑀸𑀢𑀩𑁆𑀪𑀸𑀳𑀢𑀸 𑀯𑀡𑀸 𑀭𑀼𑀚𑁆𑀚𑀦𑁆𑀢𑀺. 𑀬𑀣𑀸 𑀉𑀫𑁆𑀫𑀢𑁆𑀢𑀓𑀲𑀼𑀦𑀔𑁂𑀦 𑀤𑀝𑁆𑀞𑁄 𑀧𑀼𑀭𑀺𑀲𑁄 𑀅𑀦𑀯𑀝𑁆𑀞𑀺𑀢𑁄𑀯 𑀪𑀫𑀢𑀺, 𑀏𑀯𑀁 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀪𑀫𑀺𑀢𑀩𑁆𑀩𑁄 𑀳𑁄𑀢𑀺, 𑀅𑀲𑀼𑀓𑀝𑁆𑀞𑀸𑀦𑁂 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻𑀢𑀺 𑀦 𑀧𑀜𑁆𑀜𑀸𑀬𑀢𑀺. 𑀅𑀝𑁆𑀞𑀫𑀁.

𑁯. 𑀯𑁂𑀭𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁫. 𑀦𑀯𑀫𑁂 𑀯𑁂𑀭𑀫𑁆𑀪𑀯𑀸𑀢𑀸𑀢𑀺 𑀏𑀯𑀁𑀦𑀸𑀫𑀓𑀸 𑀫𑀳𑀸𑀯𑀸𑀢𑀸. 𑀓𑀻𑀤𑀺𑀲𑁂 𑀧𑀦 𑀞𑀸𑀦𑁂 𑀢𑁂 𑀯𑀸𑀢𑀸 𑀯𑀸𑀬𑀦𑁆𑀢𑀻𑀢𑀺? 𑀬𑀢𑁆𑀣 𑀞𑀺𑀢𑀲𑁆𑀲 𑀘𑀢𑁆𑀢𑀸𑀭𑁄 𑀤𑀻𑀧𑀸 𑀉𑀧𑁆𑀧𑀮𑀺𑀦𑀺𑀧𑀢𑁆𑀢𑀫𑀢𑁆𑀢𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀬𑁄 𑀧𑀓𑁆𑀔𑀻 𑀕𑀘𑁆𑀙𑀢𑀻𑀢𑀺 𑀦𑀯𑀯𑀼𑀝𑁆𑀞𑁂 𑀤𑁂𑀯𑁂 𑀯𑀺𑀭𑀯𑀦𑁆𑀢𑁄 𑀯𑀸𑀢𑀲𑀓𑀼𑀡𑁄 𑀢𑀢𑁆𑀣 𑀕𑀘𑁆𑀙𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦𑀸𑀢𑀺𑀆𑀤𑀻𑀲𑀼 𑀳𑀢𑁆𑀣𑀧𑀸𑀤𑁂 𑀓𑀻𑀴𑀸𑀧𑁂𑀦𑁆𑀢𑁄 𑀔𑀦𑁆𑀥𑀝𑁆𑀞𑀺𑀁 𑀯𑀸 𑀦𑀸𑀫𑁂𑀦𑁆𑀢𑁄 𑀓𑀸𑀬𑀁 𑀦 𑀭𑀓𑁆𑀔𑀢𑀺 𑀦𑀸𑀫, 𑀦𑀸𑀦𑀸𑀯𑀺𑀥𑀁 𑀤𑀼𑀝𑁆𑀞𑀼𑀮𑁆𑀮𑀓𑀣𑀁 𑀓𑀣𑁂𑀦𑁆𑀢𑁄 𑀯𑀸𑀘𑀁 𑀦 𑀭𑀓𑁆𑀔𑀢𑀺 𑀦𑀸𑀫, 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀢𑀓𑁆𑀓𑁂𑀦𑁆𑀢𑁄 𑀘𑀺𑀢𑁆𑀢𑀁 𑀦 𑀭𑀓𑁆𑀔𑀢𑀺 𑀦𑀸𑀫. 𑀅𑀦𑀼𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸𑀢𑀺 𑀓𑀸𑀬𑀕𑀢𑀸𑀲𑀢𑀺𑀁 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸. 𑀦𑀯𑀫𑀁.

𑁧𑁦. 𑀲𑀕𑀸𑀣𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. 𑀤𑀲𑀫𑁂 𑀅𑀲𑀓𑁆𑀓𑀸𑀭𑁂𑀦 𑀘𑀽𑀪𑀬𑀦𑁆𑀢𑀺 𑀅𑀲𑀓𑁆𑀓𑀸𑀭𑁂𑀦 𑀘 𑀉𑀪𑀬𑁂𑀦. 𑀲𑀫𑀸𑀥𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺. 𑀲𑁄 𑀳𑀺 𑀢𑁂𑀦 𑀦 𑀯𑀺𑀓𑀫𑁆𑀧𑀢𑀺. 𑀅𑀧𑁆𑀧𑀫𑀸𑀡𑀯𑀺𑀳𑀸𑀭𑀺𑀦𑁄𑀢𑀺 𑀅𑀧𑁆𑀧𑀫𑀸𑀡𑁂𑀦 𑀨𑀮𑀲𑀫𑀸𑀥𑀺𑀦𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀲𑀸𑀢𑀢𑀺𑀓𑀦𑁆𑀢𑀺 𑀲𑀢𑀢𑀓𑀸𑀭𑀺𑀁. 𑀲𑀼𑀔𑀼𑀫𑀁𑀤𑀺𑀝𑁆𑀞𑀺𑀯𑀺𑀧𑀲𑁆𑀲𑀓𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀼𑀔𑀼𑀫𑀤𑀺𑀝𑁆𑀞𑀺𑀨𑀮𑀲𑀫𑀸𑀧𑀢𑁆𑀢𑀺𑀅𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀆𑀕𑀢𑀢𑁆𑀢𑀸 𑀯𑀺𑀧𑀲𑁆𑀲𑀓𑀁. 𑀉𑀧𑀸𑀤𑀸𑀦𑀓𑁆𑀔𑀬𑀸𑀭𑀸𑀫𑀦𑁆𑀢𑀺 𑀉𑀧𑀸𑀤𑀸𑀦𑀓𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀭𑀢𑀁. 𑀆𑀳𑀼 𑀲𑀧𑁆𑀧𑀼𑀭𑀺𑀲𑁄 𑀇𑀢𑀻𑀢𑀺 𑀲𑀧𑁆𑀧𑀼𑀭𑀺𑀲𑁄𑀢𑀺 𑀓𑀣𑁂𑀦𑁆𑀢𑀻𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧-𑁨. 𑀲𑀼𑀯𑀡𑁆𑀡𑀧𑀸𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁭-𑁧𑁬𑁮. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀦𑁆𑀢𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀓𑀸𑀭𑀡𑁂𑀦 𑀲𑀫𑁆𑀧𑀚𑀸𑀦𑀫𑁂𑀯 𑀫𑀼𑀲𑀸 𑀪𑀸𑀲𑀦𑁆𑀢𑀁. ‘‘𑀲𑀻𑀮𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀁𑀯𑀺𑀳𑀺𑀢𑀪𑀺𑀓𑁆𑀔𑀼𑀁 𑀲𑀺𑀦𑁂𑀭𑀼𑀫𑀢𑁆𑀢𑁄𑀧𑀺 𑀧𑀘𑁆𑀘𑀬𑀭𑀸𑀲𑀺 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀤𑀸 𑀧𑀦 𑀲𑀻𑀮𑀁 𑀧𑀳𑀸𑀬 𑀲𑀓𑁆𑀓𑀸𑀭𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀤𑀸 𑀓𑀼𑀡𑁆𑀟𑀓𑀫𑀼𑀝𑁆𑀞𑀺𑀳𑁂𑀢𑀼𑀧𑀺 𑀫𑀼𑀲𑀸 𑀪𑀸𑀲𑀢𑀺, 𑀅𑀜𑁆𑀜𑀁 𑀯𑀸 𑀅𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀧𑀞𑀫𑀤𑀼𑀢𑀺𑀬𑀸𑀦𑀺.

𑁩-𑁧𑁦. 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁯. 𑀢𑀢𑀺𑀬𑀸𑀤𑀻𑀲𑀼 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑁆𑀲𑀸𑀢𑀺 𑀏𑀓𑀲𑁆𑀲 𑀓𑀜𑁆𑀘𑀦𑀦𑀺𑀓𑁆𑀔𑀲𑁆𑀲. 𑀲𑀺𑀗𑁆𑀕𑀻𑀦𑀺𑀓𑁆𑀔𑀲𑁆𑀲𑀸𑀢𑀺 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑁆𑀲. 𑀧𑀣𑀯𑀺𑀬𑀸𑀢𑀺 𑀘𑀓𑁆𑀓𑀯𑀸𑀴𑀩𑁆𑀪𑀦𑁆𑀢𑀭𑀸𑀬 𑀫𑀳𑀸𑀧𑀣𑀯𑀺𑀬𑀸. 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀽𑀢𑀺 𑀓𑀲𑁆𑀲𑀘𑀺𑀤𑁂𑀯 𑀆𑀫𑀺𑀲𑀲𑁆𑀲 𑀳𑁂𑀢𑀼 𑀅𑀦𑁆𑀢𑀫𑀲𑁄 𑀓𑀼𑀡𑁆𑀟𑀓𑀫𑀼𑀝𑁆𑀞𑀺𑀦𑁄𑀧𑀺. 𑀚𑀻𑀯𑀺𑀢𑀳𑁂𑀢𑀽𑀢𑀺 𑀅𑀝𑀯𑀺𑀬𑀁 𑀘𑁄𑀭𑁂𑀳𑀺 𑀕𑀳𑁂𑀢𑁆𑀯𑀸 𑀚𑀻𑀯𑀺𑀢𑁂 𑀯𑁄𑀭𑁄𑀧𑀺𑀬𑀫𑀸𑀦𑁂 𑀢𑀲𑁆𑀲𑀧𑀺 𑀳𑁂𑀢𑀼. 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸𑀢𑀺 𑀚𑀦𑀧𑀤𑁂 𑀉𑀢𑁆𑀢𑀫𑀺𑀢𑁆𑀣𑀺𑀬𑀸. 𑀢𑀢𑀺𑀬𑀸𑀤𑀻𑀦𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀢𑀢𑀺𑀬𑀯𑀕𑁆𑀕𑁄

𑁧-𑁨. 𑀫𑀸𑀢𑀼𑀕𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁦-𑁧𑁭𑁧. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑁄𑀢𑀺 𑀦 𑀢𑀲𑁆𑀲 𑀭𑀳𑁄 𑀏𑀓𑀓𑀲𑁆𑀲 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂𑀦 𑀥𑀫𑁆𑀫𑁂𑀦 𑀅𑀢𑁆𑀣𑀺𑀓𑁄𑀧𑀺 𑀫𑀸𑀢𑀼𑀕𑀸𑀫𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀬𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺, 𑀅𑀢𑁆𑀣𑁄. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀧𑀞𑀫𑀤𑀼𑀢𑀺𑀬𑀸𑀦𑀺.

𑁩-𑁬. 𑀏𑀓𑀧𑀼𑀢𑁆𑀢𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁨-𑁧𑁭𑁫. 𑀢𑀢𑀺𑀬𑁂 𑀲𑀤𑁆𑀥𑀸𑀢𑀺 𑀲𑁄𑀢𑀸𑀧𑀦𑁆𑀦𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀢𑀣𑀸 𑀘𑀢𑀼𑀢𑁆𑀣𑁂 𑀧𑀜𑁆𑀘𑀫𑁂 𑀙𑀝𑁆𑀞𑁂 𑀘. 𑀢𑀢𑀺𑀬𑀸𑀤𑀻𑀦𑀺.

𑁭. 𑀢𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁬. 𑀲𑀢𑁆𑀢𑀫𑁂 𑀲𑀫𑀼𑀤𑀬𑀦𑁆𑀢𑀺𑀆𑀤𑀻𑀲𑀼 𑀲𑀳 𑀧𑀼𑀩𑁆𑀩𑀓𑀫𑁆𑀫𑁂𑀦 𑀅𑀢𑁆𑀢𑀪𑀸𑀯𑁄 𑀓𑁄𑀮𑀧𑀼𑀢𑁆𑀢𑀺𑀬𑀁 𑀯𑀡𑁆𑀡𑀧𑁄𑀓𑁆𑀔𑀭𑀢𑀸 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀢𑀸 𑀥𑀼𑀢𑀕𑀼𑀡𑀸𑀯𑀻𑀓𑀭𑀡𑀁 𑀘𑀻𑀯𑀭𑀥𑀸𑀭𑀡𑀁 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀺 𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀲𑀫𑀼𑀤𑀬𑁄 𑀦𑀸𑀫, 𑀢𑀁 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦 𑀦𑀧𑁆𑀧𑀚𑀸𑀦𑀸𑀢𑀺, 𑀦𑀺𑀭𑁄𑀥𑁄 𑀘 𑀧𑀝𑀺𑀧𑀤𑀸 𑀘 𑀦𑀺𑀭𑁄𑀥𑀲𑀘𑁆𑀘𑀫𑀕𑁆𑀕𑀲𑀘𑁆𑀘𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀫𑀁.

𑁮. 𑀙𑀯𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁭. 𑀅𑀝𑁆𑀞𑀫𑁂 𑀬𑀲𑁆𑀫𑀸 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀦𑀭𑀓𑀸𑀤𑀻𑀲𑀼, 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀲𑀓𑀮𑀫𑁆𑀧𑀺 𑀇𑀫𑀁 𑀅𑀢𑁆𑀢𑀪𑀸𑀯𑀁 𑀦𑀸𑀲𑁂𑀢𑀺, 𑀇𑀥𑀸𑀧𑀺 𑀫𑀭𑀡𑀫𑁆𑀧𑀺 𑀫𑀭𑀡𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁 𑀆𑀯𑀳𑀢𑀺, 𑀢𑀲𑁆𑀫𑀸 𑀙𑀯𑀺𑀁 𑀙𑀺𑀦𑁆𑀤𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀫𑀁.

𑁯. 𑀭𑀚𑁆𑀚𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁮. 𑀦𑀯𑀫𑁂 𑀯𑀸𑀴𑀭𑀚𑁆𑀚𑀼𑀬𑀸𑀢𑀺 𑀲𑀼𑀢𑁆𑀢𑀸𑀤𑀺𑀫𑀬𑀸 𑀭𑀚𑁆𑀚𑀼 𑀫𑀼𑀤𑀼𑀓𑀸 𑀳𑁄𑀢𑀺 𑀯𑀸𑀴𑀭𑀚𑁆𑀚𑀼 𑀔𑀭𑀸 𑀨𑀭𑀼𑀲𑀸, 𑀢𑀲𑁆𑀫𑀸 𑀅𑀬𑀫𑁂𑀯 𑀕𑀳𑀺𑀢𑀸. 𑀦𑀯𑀫𑀁.

𑁧𑁦. 𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁯. 𑀤𑀲𑀫𑁂 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀯𑀺𑀳𑀸𑀭𑀸. 𑀢𑁂𑀲𑀸𑀳𑀫𑀲𑁆𑀲𑀸𑀢𑀺 𑀢𑁂𑀲𑀁 𑀅𑀳𑀁 𑀅𑀲𑁆𑀲. 𑀔𑀻𑀡𑀸𑀲𑀯𑁄 𑀳𑀺 𑀮𑀸𑀪𑀻 𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑁄 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀆𑀕𑀢𑀸𑀕𑀢𑀸𑀦𑀁 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀤𑀲𑀫𑀁.

𑀢𑀢𑀺𑀬𑁄 𑀯𑀕𑁆𑀕𑁄.

𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁧-𑁪. 𑀪𑀺𑀦𑁆𑀤𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮𑁦-𑁧𑁮𑁩. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 𑀧𑀞𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀤𑀼𑀢𑀺𑀬𑀸𑀤𑀻𑀲𑀼 𑀓𑀼𑀲𑀮𑀫𑀽𑀮𑀦𑁆𑀢𑀺 𑀅𑀮𑁄𑀪𑀸𑀤𑀺𑀢𑀺𑀯𑀺𑀥𑀓𑀼𑀲𑀮𑀥𑀫𑁆𑀫𑁄. 𑀲𑀼𑀓𑁆𑀓𑁄 𑀥𑀫𑁆𑀫𑁄𑀢𑀺 𑀢𑀲𑁆𑀲𑁂𑀯 𑀧𑀭𑀺𑀬𑀸𑀬𑀤𑁂𑀲𑀦𑀸. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀲 𑀓𑀼𑀲𑀮𑀫𑀽𑀮𑀸𑀤𑀺𑀲𑀗𑁆𑀔𑀸𑀢𑀲𑁆𑀲 𑀅𑀦𑀯𑀚𑁆𑀚𑀥𑀫𑁆𑀫𑀲𑁆𑀲 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀤𑁂𑀯𑀤𑀢𑁆𑀢𑁄 𑀲𑀕𑁆𑀕𑁂 𑀯𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀫𑀕𑁆𑀕𑀨𑀮𑀸𑀦𑀺 𑀯𑀸 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀲𑁆𑀯𑀸𑀲𑁆𑀲 𑀲𑀫𑀼𑀘𑁆𑀙𑁂𑀤𑀫𑀕𑀫𑀸 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀺𑀦𑀝𑁆𑀞𑁄. 𑀧𑀞𑀫𑀸𑀤𑀻𑀦𑀺.

𑁫. 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁪. 𑀧𑀜𑁆𑀘𑀫𑁂 𑀧𑀭𑀸𑀪𑀯𑀸𑀬𑀸𑀢𑀺 𑀅𑀯𑀟𑁆𑀠𑀺𑀬𑀸 𑀯𑀺𑀦𑀸𑀲𑀸𑀬. 𑀅𑀲𑁆𑀲𑀢𑀭𑀻𑀢𑀺 𑀯𑀴𑀯𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀕𑀤𑁆𑀭𑀪𑀲𑁆𑀲 𑀚𑀸𑀢𑀸. 𑀅𑀢𑁆𑀢𑀯𑀥𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀻𑀢𑀺 𑀢𑀁 𑀅𑀲𑁆𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀚𑁂𑀦𑁆𑀢𑀺, 𑀲𑀸 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀯𑀺𑀚𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀸𑀤𑁂𑀳𑀺 𑀪𑀽𑀫𑀺𑀬𑀁 𑀧𑀳𑀭𑀦𑁆𑀢𑀻 𑀢𑀺𑀝𑁆𑀞𑀢𑀺, 𑀅𑀣𑀲𑁆𑀲𑀸 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀘𑀢𑀽𑀲𑀼 𑀔𑀸𑀡𑀼𑀓𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀧𑁄𑀢𑀁 𑀦𑀻𑀳𑀭𑀦𑁆𑀢𑀺, 𑀲𑀸 𑀢𑀢𑁆𑀣𑁂𑀯 𑀫𑀭𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀧𑀜𑁆𑀘𑀫𑀁.

𑁬. 𑀧𑀜𑁆𑀘𑀭𑀣𑀲𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀙𑀝𑁆𑀞𑁂 𑀪𑀢𑁆𑀢𑀸𑀪𑀺𑀳𑀸𑀭𑁄𑀢𑀺 𑀅𑀪𑀺𑀳𑀭𑀺𑀢𑀩𑁆𑀩𑀁 𑀪𑀢𑁆𑀢𑀁. 𑀢𑀲𑁆𑀲 𑀧𑀦 𑀧𑀫𑀸𑀡𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑁄 𑀣𑀸𑀮𑀺𑀧𑀸𑀓𑁄 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀪𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀦𑀸𑀲𑀸𑀬 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬𑀼𑀦𑁆𑀢𑀺 𑀅𑀘𑁆𑀙𑀧𑀺𑀢𑁆𑀢𑀁 𑀯𑀸 𑀫𑀘𑁆𑀙𑀧𑀺𑀢𑁆𑀢𑀁 𑀯𑀸𑀲𑁆𑀲 𑀦𑀸𑀲𑀧𑀼𑀝𑁂 𑀧𑀓𑁆𑀔𑀺𑀧𑁂𑀬𑁆𑀬𑀁. 𑀙𑀝𑁆𑀞𑀁.

𑁭-𑁧𑁩. 𑀫𑀸𑀢𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮𑁬-𑁧𑁮𑁭. 𑀲𑀢𑁆𑀢𑀫𑁂 𑀫𑀸𑀢𑀼𑀧𑀺 𑀳𑁂𑀢𑀽𑀢𑀺 ‘‘𑀲𑀘𑁂 𑀫𑀼𑀲𑀸 𑀪𑀡𑀲𑀺, 𑀫𑀸𑀢𑀭𑀁 𑀢𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫. 𑀦𑁄 𑀘𑁂 𑀪𑀡𑀲𑀺, 𑀦 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀘𑁄𑀭𑁂𑀳𑀺 𑀅𑀝𑀯𑀺𑀬𑀁 𑀧𑀼𑀘𑁆𑀙𑀫𑀸𑀦𑁄 𑀢𑀲𑁆𑀲𑀸 𑀘𑁄𑀭𑀳𑀢𑁆𑀣𑀕𑀢𑀸𑀬 𑀫𑀸𑀢𑀼𑀬𑀸𑀧𑀺 𑀳𑁂𑀢𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀲𑀢𑁆𑀢𑀫𑀸𑀤𑀻𑀦𑀺.

𑀮𑀸𑀪𑀲𑀓𑁆𑀓𑀸𑀭𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.