𑁭. 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧-𑁮. 𑀘𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮𑁮-𑁧𑁯𑁫. 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀏𑀓𑁄𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀯𑀺𑀳𑀸𑀭𑀻. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀺𑀯𑁂𑀓𑀝𑁆𑀞𑁄 𑀦𑀺𑀲𑁆𑀲𑀤𑁆𑀤𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀲𑀦𑁆𑀢𑁄. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬𑀦𑁆𑀢𑀺 𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀸𑀬 𑀧𑁂𑀲𑀺𑀢𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀁. 𑀅𑀦𑀺𑀘𑁆𑀘𑀦𑁆𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦 𑀅𑀦𑀺𑀘𑁆𑀘𑀁. 𑀅𑀣 𑀯𑀸 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑀢𑀸𑀬 𑀢𑀸𑀯𑀓𑀸𑀮𑀺𑀓𑀢𑀸𑀬 𑀯𑀺𑀧𑀭𑀺𑀡𑀸𑀫𑀓𑁄𑀝𑀺𑀬𑀸 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄𑀢𑀺 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑀺 𑀅𑀦𑀺𑀘𑁆𑀘𑀁. 𑀤𑀼𑀓𑁆𑀔𑀦𑁆𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑀁 𑀤𑀼𑀓𑁆𑀔𑀫𑀦𑀝𑁆𑀞𑁂𑀦 𑀤𑀼𑀓𑁆𑀔𑀯𑀢𑁆𑀣𑀼𑀓𑀝𑁆𑀞𑁂𑀦 𑀲𑀢𑀢𑀲𑀫𑁆𑀧𑀻𑀴𑀦𑀝𑁆𑀞𑁂𑀦 𑀲𑀼𑀔𑀧𑀝𑀺𑀓𑁆𑀔𑁂𑀧𑁂𑀦𑀸𑀢𑀺. 𑀓𑀮𑁆𑀮𑀦𑁆𑀢𑀺 𑀬𑀼𑀢𑁆𑀢𑀁. 𑀏𑀢𑀁 𑀫𑀫𑀸𑀢𑀺 𑀢𑀡𑁆𑀳𑀸𑀕𑀸𑀳𑁄. 𑀏𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀕𑀸𑀳𑁄. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀕𑀸𑀳𑁄. 𑀢𑀡𑁆𑀳𑀸𑀕𑀸𑀳𑁄 𑀘𑁂𑀢𑁆𑀣 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀯𑀲𑁂𑀦, 𑀫𑀸𑀦𑀕𑀸𑀳𑁄 𑀦𑀯𑀯𑀺𑀥𑀫𑀸𑀦𑀯𑀲𑁂𑀦, 𑀤𑀺𑀝𑁆𑀞𑀺𑀕𑀸𑀳𑁄 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀻𑀢𑀺 𑀏𑀢𑁆𑀣 𑀯𑀺𑀭𑀸𑀕𑀯𑀲𑁂𑀦 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀓𑀣𑀺𑀢𑀸, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺.

𑀏𑀢𑁆𑀣 𑀘 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀧𑀲𑀸𑀤𑀸𑀯 𑀕𑀳𑀺𑀢𑀸, 𑀫𑀦𑁄𑀢𑀺 𑀇𑀫𑀺𑀦𑀸 𑀢𑁂𑀪𑀽𑀫𑀓𑀁 𑀲𑀫𑁆𑀫𑀲𑀦𑀘𑀸𑀭𑀘𑀺𑀢𑁆𑀢𑀁. 𑀤𑀼𑀢𑀺𑀬𑁂 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀫𑁆𑀫𑀡𑀫𑁂𑀯. 𑀢𑀢𑀺𑀬𑁂 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀧𑀲𑀸𑀤𑀯𑀢𑁆𑀣𑀼𑀓𑀘𑀺𑀢𑁆𑀢𑀫𑁂𑀯, 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀢𑁂𑀪𑀽𑀫𑀓𑀁 𑀲𑀫𑁆𑀫𑀲𑀦𑀘𑀸𑀭𑀘𑀺𑀢𑁆𑀢𑀁 𑀕𑀳𑀺𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀦𑀬𑁄 𑀦𑁂𑀢𑀩𑁆𑀩𑁄. 𑀙𑀝𑁆𑀞𑁂 𑀢𑁂𑀪𑀽𑀫𑀓𑀥𑀫𑁆𑀫𑀸. 𑀅𑀝𑁆𑀞𑀫𑁂 𑀧𑀦 𑀢𑀡𑁆𑀳𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀚𑀯𑀦𑀧𑁆𑀧𑀢𑁆𑀢𑀸𑀯 𑀮𑀩𑁆𑀪𑀢𑀺. 𑀧𑀞𑀫𑀸𑀤𑀻𑀦𑀺.

𑁯. 𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁬. 𑀦𑀯𑀫𑁂 𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀦𑀸𑀫𑀁, 𑀲𑁂𑀲𑀸𑀳𑀺 𑀭𑀽𑀧𑀦𑁆𑀢𑀺 𑀦𑀸𑀫𑀭𑀽𑀧𑀁 𑀓𑀣𑀺𑀢𑀁. 𑀦𑀯𑀫𑀁.

𑁧𑁦. 𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀤𑀲𑀫𑁂 𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄, 𑀲𑁂𑀲𑀸 𑀘𑀢𑁆𑀢𑀸𑀭𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀪𑀽𑀫𑀓𑀸. 𑀇𑀥 𑀧𑀦 𑀢𑁂𑀪𑀽𑀫𑀓𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧-𑁧𑁦. 𑀘𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯𑁮-𑁧𑁯𑁯. 𑀤𑀼𑀢𑀺𑀬𑁂 𑀤𑀲 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀧𑀞𑀫𑀸𑀤𑀻𑀦𑀺.

𑁧𑁧. 𑀅𑀦𑀼𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁦. 𑀏𑀓𑀸𑀤𑀲𑀫𑁂 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂𑀢𑀺 𑀅𑀢𑁆𑀢𑀦𑁄 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑀁 𑀤𑀲𑁆𑀲𑁂𑀢𑀺, 𑀩𑀳𑀺𑀤𑁆𑀥𑀸 𑀘𑀸𑀢𑀺 𑀧𑀭𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑀁 𑀯𑀸 𑀅𑀯𑀺𑀜𑁆𑀜𑀸𑀡𑀓𑀁 𑀯𑀸. 𑀧𑀼𑀭𑀺𑀫𑁂𑀦 𑀯𑀸 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀯𑀺𑀜𑁆𑀜𑀸𑀡𑀫𑁂𑀯 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀩𑀳𑀺𑀤𑁆𑀥𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁. 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸𑀢𑀺 𑀅𑀳𑀁𑀓𑀸𑀭𑀤𑀺𑀝𑁆𑀞𑀺 𑀘 𑀫𑀫𑀁𑀓𑀸𑀭𑀢𑀡𑁆𑀳𑀸 𑀘 𑀫𑀸𑀦𑀸𑀦𑀼𑀲𑀬𑀸 𑀘. 𑀦 𑀳𑁄𑀦𑁆𑀢𑀻𑀢𑀺 𑀏𑀢𑁂 𑀓𑀺𑀮𑁂𑀲𑀸 𑀓𑀣𑀁 𑀚𑀸𑀦𑀦𑁆𑀢𑀲𑁆𑀲 𑀏𑀢𑁂𑀲𑀼 𑀯𑀢𑁆𑀣𑀽𑀲𑀼 𑀦 𑀳𑁄𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀧𑀲𑁆𑀲𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀅𑀧𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁧. 𑀤𑁆𑀯𑀸𑀤𑀲𑀫𑁂 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀦𑁆𑀢𑀺 𑀅𑀳𑀁𑀓𑀸𑀭𑀢𑁄 𑀘 𑀫𑀫𑀁𑀓𑀸𑀭𑀢𑁄 𑀘 𑀫𑀸𑀦𑀢𑁄 𑀘 𑀅𑀧𑀕𑀢𑀁. 𑀯𑀺𑀥𑀸 𑀲𑀫𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀫𑀸𑀦𑀓𑁄𑀝𑁆𑀞𑀸𑀲𑁂 𑀲𑀼𑀝𑁆𑀞𑀼 𑀅𑀢𑀺𑀓𑁆𑀓𑀦𑁆𑀢𑀁. 𑀲𑀦𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀲𑀦𑁆𑀢𑀁, 𑀓𑀺𑀮𑁂𑀲𑁂𑀳𑁂𑀯 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀤𑁆𑀯𑀸𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀤𑁆𑀯𑀻𑀲𑀼𑀧𑀺 𑀅𑀲𑁂𑀓𑁆𑀔𑀪𑀽𑀫𑀺 𑀓𑀣𑀺𑀢𑀸. 𑀧𑀞𑀫𑁄 𑀧𑀦𑁂𑀢𑁆𑀣 𑀆𑀬𑀸𑀘𑀦𑁆𑀢𑀲𑁆𑀲 𑀤𑁂𑀲𑀺𑀢𑁄, 𑀤𑀼𑀢𑀺𑀬𑁄 𑀅𑀦𑀸𑀬𑀸𑀘𑀦𑁆𑀢𑀲𑁆𑀲. 𑀲𑀓𑀮𑁂𑀧𑀺 𑀧𑀦 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑁂 𑀣𑁂𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀸𑀯 𑀓𑀣𑀺𑀢𑀸𑀢𑀺.

𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.