𑁩. 𑀧𑁂𑀲𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀢𑀢𑀺𑀬𑁂 𑀅𑀢𑀺𑀫𑀜𑁆𑀜𑀢𑀻𑀢𑀺 ‘‘𑀓𑀺𑀁 𑀇𑀫𑁂 𑀫𑀳𑀮𑁆𑀮𑀓𑀸? 𑀦 𑀏𑀢𑁂𑀲𑀁 𑀧𑀸𑀴𑀺, 𑀦 𑀅𑀝𑁆𑀞𑀓𑀣𑀸, 𑀦 𑀧𑀤𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸, 𑀅𑀫𑁆𑀳𑀸𑀓𑀁 𑀧𑀦 𑀧𑀸𑀴𑀺𑀧𑀺 𑀅𑀝𑁆𑀞𑀓𑀣𑀸𑀧𑀺 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀉𑀧𑀝𑁆𑀞𑀸𑀢𑀻’’𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀢𑀺. 𑀕𑁄𑀢𑀫𑀸𑀢𑀺 𑀕𑁄𑀢𑀫𑀩𑀼𑀤𑁆𑀥𑀲𑀸𑀯𑀓𑀢𑁆𑀢𑀸 𑀅𑀢𑁆𑀢𑀸𑀦𑀁 𑀆𑀮𑀧𑀢𑀺. 𑀫𑀸𑀦𑀧𑀣𑀦𑁆𑀢𑀺 𑀫𑀸𑀦𑀸𑀭𑀫𑁆𑀫𑀡𑀜𑁆𑀘𑁂𑀯 𑀫𑀸𑀦𑀲𑀳𑀪𑀼𑀦𑁄 𑀘 𑀥𑀫𑁆𑀫𑁂. 𑀯𑀺𑀧𑁆𑀧𑀝𑀺𑀲𑀸𑀭𑀻𑀳𑀼𑀯𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑀼𑀯𑀸, 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀚𑀺𑀦𑁄𑀢𑀺 𑀫𑀕𑁆𑀕𑁂𑀦 𑀚𑀺𑀢𑀓𑀺𑀮𑁂𑀲𑁄. 𑀓𑀺𑀢𑁆𑀢𑀺𑀜𑁆𑀘 𑀲𑀼𑀔𑀜𑁆𑀘𑀸𑀢𑀺 𑀯𑀡𑁆𑀡𑀪𑀡𑀦𑀜𑁆𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀜𑁆𑀘. 𑀅𑀔𑀺𑀮𑁄𑀥 𑀧𑀥𑀸𑀦𑀯𑀸𑀢𑀺 𑀅𑀔𑀺𑀮𑁄 𑀇𑀥 𑀧𑀥𑀸𑀦𑀯𑀸 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀯𑀺𑀲𑀼𑀤𑁆𑀥𑁄𑀢𑀺 𑀯𑀺𑀲𑀼𑀤𑁆𑀥𑁄 𑀪𑀯𑁂𑀬𑁆𑀬. 𑀅𑀲𑁂𑀲𑀦𑁆𑀢𑀺 𑀦𑀺𑀲𑁆𑀲𑁂𑀲𑀁 𑀦𑀯𑀯𑀺𑀥𑀁. 𑀯𑀺𑀚𑁆𑀚𑀸𑀬𑀦𑁆𑀢𑀓𑀭𑁄𑀢𑀺 𑀯𑀺𑀚𑁆𑀚𑀸𑀬 𑀓𑀺𑀮𑁂𑀲𑀸𑀦𑀁 𑀅𑀦𑁆𑀢𑀓𑀭𑁄. 𑀲𑀫𑀺𑀢𑀸𑀯𑀻𑀢𑀺 𑀭𑀸𑀕𑀸𑀤𑀻𑀦𑀁 𑀲𑀫𑀺𑀢𑀢𑀸𑀬 𑀲𑀫𑀺𑀢𑀸𑀯𑀻. 𑀢𑀢𑀺𑀬𑀁.