𑁫. 𑀫𑀸𑀦𑀢𑁆𑀣𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁧. 𑀧𑀜𑁆𑀘𑀫𑁂 𑀫𑀸𑀦𑀢𑁆𑀣𑀤𑁆𑀥𑁄𑀢𑀺 𑀯𑀸𑀢𑀪𑀭𑀺𑀢𑀪𑀲𑁆𑀢𑀸 𑀯𑀺𑀬 𑀫𑀸𑀦𑁂𑀦 𑀣𑀤𑁆𑀥𑁄. 𑀆𑀘𑀭𑀺𑀬𑀦𑁆𑀢𑀺 𑀲𑀺𑀧𑁆𑀧𑀼𑀕𑁆𑀕𑀳𑀡𑀓𑀸𑀮𑁂 𑀆𑀘𑀭𑀺𑀬𑁄 𑀅𑀦𑀪𑀺𑀯𑀸𑀤𑁂𑀦𑁆𑀢𑀲𑁆𑀲 𑀲𑀺𑀧𑁆𑀧𑀁 𑀦 𑀤𑁂𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀢𑀁 𑀦 𑀅𑀪𑀺𑀯𑀸𑀤𑁂𑀢𑀺, 𑀅𑀢𑁆𑀣𑀺𑀪𑀸𑀯𑀫𑁆𑀧𑀺𑀲𑁆𑀲 𑀦 𑀚𑀸𑀦𑀸𑀢𑀺. 𑀦𑀸𑀬𑀁 𑀲𑀫𑀡𑁄𑀢𑀺 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀬𑀲𑁆𑀫𑀸 𑀅𑀬𑀁 𑀲𑀫𑀡𑁄 𑀫𑀸𑀤𑀺𑀲𑁂 𑀚𑀸𑀢𑀺𑀲𑀫𑁆𑀧𑀦𑁆𑀦𑀩𑁆𑀭𑀸𑀳𑁆𑀫𑀡𑁂 𑀲𑀫𑁆𑀧𑀢𑁆𑀢𑁂 𑀧𑀝𑀺𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀢𑀲𑁆𑀫𑀸 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻’’𑀢𑀺.

𑀅𑀩𑁆𑀪𑀼𑀢𑀯𑀺𑀢𑁆𑀢𑀚𑀸𑀢𑀸𑀢𑀺 𑀅𑀪𑀽𑀢𑀧𑀼𑀩𑁆𑀩𑀸𑀬 𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀓𑁂𑀲𑀼 𑀘𑀲𑁆𑀲𑀸𑀢𑀺 𑀓𑁂𑀲𑀼 𑀪𑀯𑁂𑀬𑁆𑀬. 𑀓𑁆𑀬𑀲𑁆𑀲𑀸𑀢𑀺 𑀓𑁂 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀅𑀧𑀘𑀺𑀢𑀸 𑀅𑀲𑁆𑀲𑀽𑀢𑀺 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑀼𑀁 𑀬𑀼𑀢𑁆𑀢𑀸 𑀪𑀯𑁂𑀬𑁆𑀬𑀼𑀁. 𑀅𑀭𑀳𑀦𑁆𑀢𑁂𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀤𑁂𑀲𑀦𑀸𑀓𑀼𑀲𑀮𑀢𑁆𑀢𑀸 𑀅𑀢𑁆𑀢𑀸𑀦𑀁 𑀅𑀦𑁆𑀢𑁄𑀓𑀢𑁆𑀯𑀸 𑀧𑀽𑀚𑀦𑁂𑀬𑁆𑀬𑀁 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀫𑀁.