𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀦𑀗𑁆𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁨. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀧𑁆𑀧𑀺𑀦𑀻𑀢𑀻𑀭𑁂𑀢𑀺 𑀲𑀧𑁆𑀧𑀺𑀦𑀻𑀦𑀸𑀫𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂. 𑀲𑀦𑀗𑁆𑀓𑀼𑀫𑀸𑀭𑁄𑀢𑀺 𑀲𑁄 𑀓𑀺𑀭 𑀧𑀜𑁆𑀘𑀲𑀺𑀔𑀓𑀼𑀫𑀸𑀭𑀓𑀓𑀸𑀮𑁂 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀓𑀼𑀫𑀸𑀭𑀓𑀯𑀡𑁆𑀡𑁂𑀦𑁂𑀯 𑀯𑀺𑀘𑀭𑀢𑀺. 𑀢𑁂𑀦 𑀦𑀁 ‘‘𑀓𑀼𑀫𑀸𑀭𑁄’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺, 𑀧𑁄𑀭𑀸𑀡𑀓𑀢𑁆𑀢𑀸 𑀧𑀦 ‘‘𑀲𑀦𑀗𑁆𑀓𑀼𑀫𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀚𑀦𑁂𑀢𑀲𑁆𑀫𑀺𑀦𑁆𑀢𑀺 𑀚𑀦𑀺𑀢𑀲𑁆𑀫𑀺𑀁, 𑀧𑀚𑀸𑀬𑀸𑀢𑀺 𑀅𑀢𑁆𑀣𑁄. 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄𑀢𑀺 𑀬𑁂 𑀚𑀦𑁂𑀢𑀲𑁆𑀫𑀺𑀁 𑀕𑁄𑀢𑁆𑀢𑀁 𑀧𑀝𑀺𑀲𑀭𑀦𑁆𑀢𑀺 𑀢𑁂𑀲𑀼 𑀮𑁄𑀓𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀻𑀲𑀼 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄. 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄𑀢𑀺 𑀪𑀬𑀪𑁂𑀭𑀯𑀲𑀼𑀢𑁆𑀢𑀧𑀭𑀺𑀬𑀸𑀬𑁂𑀦 (𑀫. 𑀦𑀺. 𑁧.𑁩𑁪 𑀆𑀤𑀬𑁄) 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀺 𑀯𑀸 𑀢𑀻𑀳𑀺, 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀧𑀭𑀺𑀬𑀸𑀬𑁂𑀦 (𑀤𑀻. 𑀦𑀺. 𑁧.𑁨𑁭𑁮 𑀆𑀤𑀬𑁄) 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀦𑁄𑀫𑀬𑀺𑀤𑁆𑀥𑀺 𑀙 𑀅𑀪𑀺𑀜𑁆𑀜𑀸𑀬𑁄𑀢𑀺 𑀇𑀫𑀸𑀳𑀺 𑀯𑀸 𑀅𑀝𑁆𑀞𑀳𑀺 𑀯𑀺𑀚𑁆𑀚𑀸𑀳𑀺, 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀻𑀢𑀺 𑀏𑀯𑀁 𑀧𑀦𑁆𑀦𑀭𑀲𑀥𑀫𑁆𑀫𑀪𑁂𑀤𑁂𑀦 𑀘𑀭𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂𑀢𑀺 𑀲𑁄 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄𑀢𑀺. 𑀧𑀞𑀫𑀁.

𑁨. 𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁩. 𑀤𑀼𑀢𑀺𑀬𑁂 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀢𑀺 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀯𑁂𑀴𑀼𑀯𑀦𑀢𑁄 𑀕𑀬𑀸𑀲𑀻𑀲𑀁 𑀕𑀢𑁂. 𑀅𑀲𑁆𑀲𑀢𑀭𑀺𑀦𑁆𑀢𑀺 𑀕𑀤𑁆𑀭𑀪𑀲𑁆𑀲 𑀯𑀴𑀯𑀸𑀬 𑀚𑀸𑀢𑀁. 𑀤𑀼𑀢𑀺𑀬𑀁.

𑁩. 𑀅𑀦𑁆𑀥𑀓𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁪. 𑀢𑀢𑀺𑀬𑁂 𑀅𑀦𑁆𑀥𑀓𑀯𑀺𑀦𑁆𑀤𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀕𑀸𑀫𑀁. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀲𑀢𑁆𑀣𑀸 𑀇𑀤𑀸𑀦𑀺𑀧𑀺 𑀯𑀻𑀭𑀺𑀬𑀁 𑀓𑀭𑁄𑀢𑀺 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀢𑀺, 𑀕𑀘𑁆𑀙𑀸𑀫𑀺𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀲𑀸𑀲𑀦𑀸𑀦𑀼𑀘𑁆𑀙𑀯𑀺𑀓𑀁 𑀯𑀻𑀭𑀺𑀬𑀧𑀝𑀺𑀲𑀁𑀬𑀼𑀢𑁆𑀢𑀁 𑀕𑀸𑀣𑀁 𑀯𑀓𑁆𑀔𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺.

𑀧𑀦𑁆𑀢𑀸𑀦𑀻𑀢𑀺 𑀚𑀦𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑁂 𑀞𑀺𑀢𑀸𑀦𑀺. 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑁄𑀓𑁆𑀔𑀸𑀢𑀺 𑀢𑀸𑀦𑀺 𑀘 𑀲𑁂𑀦𑀸𑀲𑀦𑀸𑀦𑀺 𑀲𑁂𑀯𑀫𑀸𑀦𑁄 𑀦 𑀘𑀻𑀯𑀭𑀸𑀤𑀻𑀦𑀁 𑀅𑀢𑁆𑀣𑀸𑀬 𑀲𑁂𑀯𑁂𑀬𑁆𑀬, 𑀅𑀣 𑀔𑁄 𑀤𑀲𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑁄𑀓𑁆𑀔𑀢𑁆𑀣𑀸𑀬 𑀘𑀭𑁂𑀬𑁆𑀬. 𑀲𑀗𑁆𑀖𑁂 𑀯𑀲𑁂𑀢𑀺 𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀭𑀢𑀺𑀁 𑀅𑀮𑀪𑀦𑁆𑀢𑁄 𑀉𑀧𑀝𑁆𑀞𑀸𑀓𑀸𑀤𑀻𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀕𑀤𑁆𑀭𑀪𑀧𑀺𑀝𑁆𑀞𑁂 𑀭𑀚𑀁 𑀯𑀺𑀬 𑀉𑀧𑁆𑀧𑀢𑀦𑁆𑀢𑁄 𑀅𑀭𑀜𑁆𑀜𑁂 𑀅𑀘𑀭𑀺𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀯𑀲𑁂𑀬𑁆𑀬. 𑀭𑀓𑁆𑀔𑀺𑀢𑀢𑁆𑀢𑁄 𑀲𑀢𑀻𑀫𑀸𑀢𑀺 𑀢𑀢𑁆𑀣 𑀘 𑀯𑀲𑀦𑁆𑀢𑁄 𑀲𑀕𑀯𑀘𑀡𑁆𑀟𑁄 𑀕𑁄𑀡𑁄 𑀯𑀺𑀬 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀅𑀯𑀺𑀚𑁆𑀛𑀦𑁆𑀢𑁄 𑀅𑀖𑀝𑁆𑀝𑁂𑀦𑁆𑀢𑁄 𑀭𑀓𑁆𑀔𑀺𑀢𑀢𑁆𑀢𑁄 𑀲𑀢𑀺𑀧𑀝𑁆𑀞𑀸𑀦𑀧𑀭𑀸𑀬𑀡𑁄 𑀳𑀼𑀢𑁆𑀯𑀸 𑀯𑀲𑁂𑀬𑁆𑀬.

𑀇𑀤𑀸𑀦𑀺 𑀲𑀗𑁆𑀖𑁂 𑀯𑀲𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 𑀓𑀼𑀮𑀸𑀓𑀼𑀮𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀺𑀡𑁆𑀟𑀺𑀓𑀸𑀬 𑀘𑀭𑀦𑁆𑀢𑁄𑀢𑀺 𑀧𑀺𑀡𑁆𑀟𑀢𑁆𑀣𑀸𑀬 𑀘𑀭𑀫𑀸𑀦𑁄. 𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀻𑀢𑀺 𑀲𑀗𑁆𑀖𑀫𑀚𑁆𑀛𑀁 𑀑𑀢𑀭𑀺𑀢𑁆𑀯𑀸 𑀯𑀲𑀫𑀸𑀦𑁄𑀧𑀺 𑀥𑀼𑀭𑀧𑀭𑀺𑀯𑁂𑀡𑁂 𑀢𑀸𑀮𑀦𑀸𑀴𑀺𑀓𑁂𑀭𑀆𑀤𑀻𑀦𑀺 𑀭𑁄𑀧𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑀸𑀤𑀺𑀲𑀁𑀲𑀝𑁆𑀞𑁄 𑀦 𑀯𑀲𑁂𑀬𑁆𑀬, 𑀘𑀺𑀢𑁆𑀢𑀓𑀮𑁆𑀮𑀢𑀁 𑀧𑀦 𑀚𑀦𑁂𑀢𑁆𑀯𑀸 𑀘𑀺𑀢𑁆𑀢𑀁 𑀳𑀸𑀲𑁂𑀢𑁆𑀯𑀸 𑀢𑁄𑀲𑁂𑀢𑁆𑀯𑀸 𑀧𑀼𑀦 𑀧𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑁂𑀬𑁆𑀬𑀸𑀢𑀺 𑀅𑀭𑀜𑁆𑀜𑀲𑁆𑀲𑁂𑀯 𑀯𑀡𑁆𑀡𑀁 𑀓𑀣𑁂𑀢𑀺. 𑀪𑀬𑀸𑀢𑀺 𑀯𑀝𑁆𑀝𑀪𑀬𑀢𑁄. 𑀅𑀪𑀬𑁂𑀢𑀺 𑀦𑀺𑀩𑁆𑀩𑀸𑀦𑁂. 𑀯𑀺𑀫𑀼𑀢𑁆𑀢𑁄𑀢𑀺 𑀅𑀥𑀺𑀫𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀲𑁂𑀬𑁆𑀬.

𑀬𑀢𑁆𑀣 𑀪𑁂𑀭𑀯𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀪𑀬𑀚𑀦𑀓𑀸 𑀲𑀯𑀺𑀜𑁆𑀜𑀸𑀡𑀓𑀸 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀅𑀯𑀺𑀜𑁆𑀜𑀸𑀡𑀓𑀸 𑀭𑀢𑁆𑀢𑀺𑀪𑀸𑀕𑁂 𑀔𑀸𑀡𑀼𑀯𑀮𑁆𑀮𑀺𑀆𑀤𑀬𑁄 𑀩𑀳𑀽 𑀅𑀢𑁆𑀣𑀺. 𑀲𑀭𑀻𑀲𑀧𑀸𑀢𑀺 𑀤𑀻𑀖𑀚𑀸𑀢𑀺𑀓𑀸𑀤𑀺𑀲𑀭𑀻𑀲𑀧𑀸. 𑀦𑀺𑀲𑀻𑀤𑀺 𑀢𑀢𑁆𑀣 𑀪𑀺𑀓𑁆𑀔𑀽𑀢𑀺 𑀢𑀸𑀤𑀺𑀲𑁂 𑀞𑀸𑀦𑁂 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄. 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 𑁋 𑀪𑀕𑀯𑀸 𑀬𑀣𑀸 𑀢𑀼𑀫𑁆𑀳𑁂 𑀏𑀢𑀭𑀳𑀺 𑀢𑀢𑁆𑀭𑀝𑁆𑀞𑀓𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀺 𑀘𑁂𑀯 𑀲𑀭𑀻𑀲𑀧𑁂 𑀘 𑀯𑀺𑀚𑁆𑀚𑀼𑀦𑀺𑀘𑁆𑀙𑀸𑀭𑀡𑀸𑀤𑀻𑀦𑀺 𑀘 𑀅𑀫𑀦𑀲𑀺𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀏𑀯𑀫𑁂𑀯𑀁 𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑀸 𑀪𑀺𑀓𑁆𑀔𑀽 𑀦𑀺𑀲𑀻𑀤𑀦𑁆𑀢𑀻𑀢𑀺.

𑀚𑀸𑀢𑀼 𑀫𑁂 𑀤𑀺𑀝𑁆𑀞𑀦𑁆𑀢𑀺 𑀏𑀓𑀁𑀲𑁂𑀦 𑀫𑀬𑀸 𑀤𑀺𑀝𑁆𑀞𑀁. 𑀦 𑀬𑀺𑀤𑀁 𑀇𑀢𑀺𑀳𑀻𑀢𑀺𑀳𑀦𑁆𑀢𑀺 𑀇𑀤𑀁 𑀇𑀢𑀺𑀳 𑀇𑀢𑀺𑀳𑀸𑀢𑀺 𑀦 𑀢𑀓𑁆𑀓𑀳𑁂𑀢𑀼 𑀯𑀸 𑀦𑀬𑀳𑁂𑀢𑀼 𑀯𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦 𑀯𑀸 𑀅𑀳𑀁 𑀯𑀤𑀸𑀫𑀺. 𑀏𑀓𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀫𑀺𑀦𑁆𑀢𑀺 𑀏𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬. 𑀥𑀫𑁆𑀫𑀤𑁂𑀲𑀦𑀸 𑀳𑀺 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀫𑀘𑁆𑀘𑀼𑀳𑀸𑀬𑀺𑀦𑀦𑁆𑀢𑀺 𑀫𑀭𑀡𑀧𑀭𑀺𑀘𑁆𑀘𑀸𑀕𑀺𑀦𑀁 𑀔𑀻𑀡𑀸𑀲𑀯𑀸𑀦𑀁.

𑀤𑀲𑀸 𑀘 𑀤𑀲𑀥𑀸 𑀤𑀲𑀸𑀢𑀺 𑀏𑀢𑁆𑀣 𑀤𑀲𑀸𑀢𑀺 𑀤𑀲𑁂𑀯, 𑀤𑀲𑀥𑀸 𑀤𑀲𑀸𑀢𑀺 𑀲𑀢𑀁, 𑀅𑀜𑁆𑀜𑁂 𑀘 𑀤𑀲𑀼𑀢𑁆𑀢𑀭𑀁 𑀲𑁂𑀔𑀲𑀢𑀁 𑀧𑀲𑁆𑀲𑀸𑀫𑀻𑀢𑀺 𑀯𑀤𑀢𑀺. 𑀲𑁄𑀢𑀲𑀫𑀸𑀧𑀦𑁆𑀦𑀸𑀢𑀺 𑀫𑀕𑁆𑀕𑀲𑁄𑀢𑀁 𑀲𑀫𑀸𑀧𑀦𑁆𑀦𑀸. 𑀅𑀢𑀺𑀭𑀘𑁆𑀙𑀸𑀦𑀕𑀸𑀫𑀺𑀦𑁄𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀢𑀼𑀁 𑀦𑁄𑀧𑀺 𑀲𑀓𑁆𑀓𑁄𑀫𑀻𑀢𑀺 𑀫𑀼𑀲𑀸𑀯𑀸𑀤𑀪𑀬𑁂𑀦 𑀏𑀢𑁆𑀢𑀓𑀸 𑀦𑀸𑀫 𑀧𑀼𑀜𑁆𑀜𑀪𑀸𑀕𑀺𑀦𑁄 𑀲𑀢𑁆𑀢𑀸𑀢𑀺 𑀕𑀡𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀩𑀳𑀼𑀁 𑀩𑁆𑀭𑀳𑁆𑀫𑀥𑀫𑁆𑀫𑀤𑁂𑀲𑀦𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀢𑀢𑀺𑀬𑀁.

𑁪. 𑀅𑀭𑀼𑀡𑀯𑀢𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀘𑀢𑀼𑀢𑁆𑀣𑁂 𑀅𑀪𑀺𑀪𑀽𑀲𑀫𑁆𑀪𑀯𑀦𑁆𑀢𑀺 𑀅𑀪𑀺𑀪𑀽 𑀘 𑀲𑀫𑁆𑀪𑀯𑁄 𑀘. 𑀢𑁂𑀲𑀼 𑀅𑀪𑀺𑀪𑀽𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀯𑀺𑀬 𑀧𑀜𑁆𑀜𑀸𑀬 𑀅𑀕𑁆𑀕𑁄, 𑀲𑀫𑁆𑀪𑀯𑀢𑁆𑀣𑁂𑀭𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀺𑀬 𑀲𑀫𑀸𑀥𑀺𑀦𑀸 𑀅𑀕𑁆𑀕𑁄. 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀯𑀚𑁆𑀛𑀸𑀬𑀦𑁆𑀢𑀺, 𑀮𑀸𑀫𑀓𑀢𑁄 𑀯𑀸 𑀘𑀺𑀦𑁆𑀢𑁂𑀦𑁆𑀢𑀺. 𑀔𑀺𑀬𑁆𑀬𑀦𑁆𑀢𑀻𑀢𑀺, 𑀓𑀺𑀦𑁆𑀦𑀸𑀫𑁂𑀢𑀁 𑀓𑀺𑀦𑁆𑀦𑀸𑀫𑁂𑀢𑀦𑁆𑀢𑀺? 𑀅𑀜𑁆𑀜𑀫𑀜𑁆𑀜𑀁 𑀓𑀣𑁂𑀦𑁆𑀢𑀺. 𑀯𑀺𑀧𑀸𑀘𑁂𑀦𑁆𑀢𑀻𑀢𑀺 𑀯𑀺𑀢𑁆𑀣𑀸𑀭𑀬𑀦𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀺. 𑀳𑁂𑀝𑁆𑀞𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦𑀸𑀢𑀺 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀺𑀫𑀓𑀸𑀬𑁂𑀦. 𑀧𑀸𑀴𑀺𑀬𑀁 𑀏𑀢𑁆𑀢𑀓𑀫𑁂𑀯 𑀆𑀕𑀢𑀁. 𑀣𑁂𑀭𑁄 𑀧𑀦 ‘‘𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀦𑀸𑀕𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀲𑀼𑀧𑀡𑁆𑀡𑀯𑀡𑁆𑀡𑀁 𑀕𑀳𑁂𑀢𑁆𑀯𑀸 𑀯𑀸 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁧𑁩) 𑀦𑀬𑁂𑀦 𑀆𑀕𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀲𑀺. 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀻𑀢𑀺 𑀣𑁂𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀣𑀁 𑀤𑁂𑀲𑀺𑀢𑀸 𑀦𑀼 𑀔𑁄 𑀥𑀫𑁆𑀫𑀤𑁂𑀲𑀦𑀸 𑀲𑀩𑁆𑀩𑁂𑀲𑀁 𑀧𑀺𑀬𑀸 𑀅𑀲𑁆𑀲 𑀫𑀦𑀸𑀧𑀸’’𑀢𑀺. 𑀢𑀢𑁄 𑀆𑀯𑀚𑁆𑀚𑁂𑀦𑁆𑀢𑁄 𑁋 ‘‘𑀲𑀩𑁆𑀩𑁂𑀧𑀺 𑀧𑀸𑀲𑀡𑁆𑀟𑀸 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑁂 𑀧𑀼𑀭𑀺𑀲𑀓𑀸𑀭𑀁 𑀯𑀡𑁆𑀡𑀬𑀦𑁆𑀢𑀺, 𑀯𑀻𑀭𑀺𑀬𑀲𑁆𑀲 𑀅𑀯𑀡𑁆𑀡𑀯𑀸𑀤𑀻 𑀦𑀸𑀫 𑀦𑀢𑁆𑀣𑀺, 𑀯𑀻𑀭𑀺𑀬𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑁂𑀲𑁆𑀲𑀸𑀫𑀺, 𑀏𑀯𑀁 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸 𑀲𑀩𑁆𑀩𑁂𑀲𑀁 𑀧𑀺𑀬𑀸 𑀪𑀯𑀺𑀲𑁆𑀲𑀢𑀺 𑀫𑀦𑀸𑀧𑀸’’𑀢𑀺 𑀜𑀢𑁆𑀯𑀸 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀯𑀺𑀘𑀺𑀦𑀺𑀢𑁆𑀯𑀸 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀆𑀭𑀫𑁆𑀪𑀣𑀸𑀢𑀺 𑀆𑀭𑀫𑁆𑀪𑀯𑀻𑀭𑀺𑀬𑀁 𑀓𑀭𑁄𑀣. 𑀦𑀺𑀓𑁆𑀓𑀫𑀣𑀸𑀢𑀺 𑀦𑀺𑀓𑁆𑀓𑀫𑀯𑀻𑀭𑀺𑀬𑀁 𑀓𑀭𑁄𑀣. 𑀬𑀼𑀜𑁆𑀚𑀣𑀸𑀢𑀺 𑀧𑀬𑁄𑀕𑀁 𑀓𑀭𑁄𑀣 𑀧𑀭𑀓𑁆𑀓𑀫𑀣. 𑀫𑀘𑁆𑀘𑀼𑀦𑁄 𑀲𑁂𑀦𑀦𑁆𑀢𑀺 𑀫𑀘𑁆𑀘𑀼𑀦𑁄 𑀲𑁂𑀦𑀸 𑀦𑀸𑀫 𑀓𑀺𑀮𑁂𑀲𑀲𑁂𑀦𑀸, 𑀢𑀁 𑀥𑀼𑀦𑀸𑀣. 𑀚𑀸𑀢𑀺𑀲𑀁𑀲𑀸𑀭𑀦𑁆𑀢𑀺 𑀚𑀸𑀢𑀺𑀜𑁆𑀘 𑀲𑀁𑀲𑀸𑀭𑀜𑁆𑀘, 𑀚𑀸𑀢𑀺𑀲𑀗𑁆𑀔𑀸𑀢𑀁 𑀯𑀸 𑀲𑀁𑀲𑀸𑀭𑀁. 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀘𑁆𑀙𑁂𑀤𑀁 𑀓𑀭𑀺𑀲𑁆𑀲𑀢𑀺. 𑀓𑀺𑀁 𑀧𑀦 𑀓𑀢𑁆𑀯𑀸 𑀣𑁂𑀭𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀺𑀜𑁆𑀜𑀸𑀧𑁂𑀲𑀻𑀢𑀺? 𑀦𑀻𑀮𑀓𑀲𑀺𑀡𑀁 𑀢𑀸𑀯 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀆𑀮𑁄𑀓𑀝𑁆𑀞𑀸𑀦𑁂 𑀅𑀦𑁆𑀥𑀓𑀸𑀭𑀁 𑀨𑀭𑀺, 𑀑𑀤𑀸𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑁂 𑀑𑀪𑀸𑀲𑀁. 𑀢𑀢𑁄 ‘‘𑀓𑀺𑀫𑀺𑀤𑀁 𑀅𑀦𑁆𑀥𑀓𑀸𑀭’’𑀦𑁆𑀢𑀺? 𑀲𑀢𑁆𑀢𑀸𑀦𑀁 𑀆𑀪𑁄𑀕𑁂 𑀉𑀧𑁆𑀧𑀦𑁆𑀦𑁂 𑀆𑀮𑁄𑀓𑀁 𑀤𑀲𑁆𑀲𑁂𑀲𑀺. 𑀆𑀮𑁄𑀓𑀝𑁆𑀞𑀸𑀦𑁂 𑀆𑀮𑁄𑀓𑀓𑀺𑀘𑁆𑀘𑀁 𑀦𑀢𑁆𑀣𑀺, ‘‘𑀓𑀺𑀁 𑀆𑀮𑁄𑀓𑁄 𑀅𑀬’’𑀦𑁆𑀢𑀺? 𑀯𑀺𑀘𑀺𑀦𑀦𑁆𑀢𑀸𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀅𑀣 𑀢𑁂𑀲𑀁 𑀣𑁂𑀭𑁄𑀢𑀺 𑀯𑀤𑀦𑁆𑀢𑀸𑀦𑀁 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺, 𑀲𑀩𑁆𑀩𑁂 𑀑𑀲𑀝𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀯𑀺𑀬 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼. 𑀅𑀢𑁆𑀣𑁄𑀧𑀺 𑀦𑁂𑀲𑀁 𑀧𑀸𑀓𑀝𑁄 𑀅𑀳𑁄𑀲𑀺. 𑀘𑀢𑀼𑀢𑁆𑀣𑀁.

𑁫. 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁬. 𑀧𑀜𑁆𑀘𑀫𑁂 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂𑀢𑀺 𑀬𑀣𑁂𑀯 𑀳𑀺 𑀓𑀤𑀫𑁆𑀩𑀦𑀤𑀻𑀢𑀻𑀭𑀢𑁄 𑀭𑀸𑀚𑀫𑀸𑀢𑀼𑀯𑀺𑀳𑀸𑀭𑀤𑁆𑀯𑀸𑀭𑁂𑀦 𑀣𑀽𑀧𑀸𑀭𑀸𑀫𑀁 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀳𑀺𑀭𑀜𑁆𑀜𑀯𑀢𑀺𑀓𑀸𑀬 𑀦𑀸𑀫 𑀦𑀤𑀺𑀬𑀸 𑀧𑀸𑀭𑀺𑀫𑀢𑀻𑀭𑀢𑁄 𑀲𑀸𑀮𑀯𑀦𑀁 𑀉𑀬𑁆𑀬𑀸𑀦𑀁. 𑀬𑀣𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄, 𑀏𑀯𑀁 𑀢𑀁 𑀓𑀼𑀲𑀺𑀦𑀸𑀭𑀸𑀬 𑀳𑁄𑀢𑀺. 𑀬𑀣𑀸 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀧𑀦𑁆𑀢𑀺 𑀧𑀸𑀘𑀻𑀦𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀸. 𑀢𑀲𑁆𑀫𑀸 𑀢𑀁 ‘‘𑀉𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂. 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀦𑁆𑀢𑀺 𑀫𑀽𑀮𑀓𑁆𑀔𑀦𑁆𑀥𑀯𑀺𑀝𑀧𑀧𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀲𑀸𑀮𑀸𑀦𑀁 𑀅𑀦𑁆𑀢𑀭𑀺𑀓𑀸𑀬. 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸𑀢𑀺 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀧𑀸𑀤𑀬𑀣. 𑀇𑀢𑀺 𑀪𑀕𑀯𑀸 𑀬𑀣𑀸 𑀦𑀸𑀫 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀫𑀳𑀤𑁆𑀥𑀦𑁄 𑀓𑀼𑀝𑀼𑀫𑁆𑀩𑀺𑀓𑁄 𑀧𑀼𑀢𑁆𑀢𑀸𑀦𑀁 𑀥𑀦𑀲𑀸𑀭𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀫𑁂𑀯𑀁 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀲𑀩𑁆𑀩𑀁 𑀏𑀓𑀲𑁆𑀫𑀺𑀁 𑀅𑀧𑁆𑀧𑀫𑀸𑀤𑀧𑀤𑁂𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀪𑀸𑀲𑀺. 𑀅𑀬𑀁 𑀢𑀣𑀸𑀕𑀢𑀲𑁆𑀲 𑀧𑀘𑁆𑀙𑀺𑀫𑀸 𑀯𑀸𑀘𑀸𑀢𑀺 𑀇𑀤𑀁 𑀧𑀦 𑀲𑀗𑁆𑀕𑀻𑀢𑀺𑀓𑀸𑀭𑀸𑀦𑀁 𑀯𑀘𑀦𑀁.

𑀇𑀢𑁄 𑀧𑀭𑀁 𑀬𑀁 𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁, 𑀅𑀣 𑀔𑁄 𑀪𑀕𑀯𑀸 𑀧𑀞𑀫𑀁 𑀛𑀸𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁂 𑀪𑀕𑀯𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀁 𑀤𑀺𑀲𑁆𑀯𑀸, ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀢𑁆𑀣𑀸’’𑀢𑀺 𑀲𑀜𑁆𑀜𑀸𑀬 𑀤𑁂𑀯𑀫𑀦𑀼𑀲𑁆𑀲𑀸 𑀏𑀓𑀧𑁆𑀧𑀳𑀸𑀭𑁂𑀦 𑀯𑀺𑀭𑀯𑀺𑀁𑀲𑀼, 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑁋 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀼 𑀔𑁄, 𑀪𑀦𑁆𑀢𑁂, 𑀅𑀦𑀼𑀭𑀼𑀤𑁆𑀥 𑀪𑀕𑀯𑀸’’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀦 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀧𑀺𑀘 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄’’𑀢𑀺 𑀆𑀳. 𑀓𑀣𑀁 𑀧𑀦 𑀲𑁄 𑀅𑀜𑁆𑀜𑀸𑀲𑀺? 𑀣𑁂𑀭𑁄 𑀓𑀺𑀭 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑀼𑀝𑁆𑀞𑀸𑀦𑀁, 𑀢𑀸𑀯 𑀕𑀦𑁆𑀢𑁆𑀯𑀸, ‘‘𑀇𑀤𑀸𑀦𑀺 𑀪𑀕𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀅𑀦𑁆𑀢𑁄𑀦𑀺𑀭𑁄𑀥𑁂 𑀘 𑀓𑀸𑀮𑀁𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀅𑀜𑁆𑀜𑀸𑀲𑀺.

𑀅𑀣 𑀔𑁄 𑀪𑀕𑀯𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺…𑀧𑁂… 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀻𑀢𑀺 𑀏𑀢𑁆𑀣 𑀧𑀦 𑀪𑀕𑀯𑀸 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀢𑁂𑀭𑀲𑀲𑀼 𑀞𑀸𑀦𑁂𑀲𑀼 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀣𑀸 𑀢𑀢𑀺𑀬𑀁… 𑀧𑀦𑁆𑀦𑀭𑀲𑀲𑀼 𑀞𑀸𑀦𑁂𑀲𑀼 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀓𑀣𑀁? 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑁂𑀲𑀼 𑀆𑀦𑀸𑀧𑀸𑀦𑁂 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁂𑀢𑀺 𑀇𑀫𑁂𑀲𑀼 𑀢𑀸𑀯 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀞𑀧𑁂𑀢𑁆𑀯𑀸 𑀧𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀜𑁆𑀘 𑀤𑀲 𑀘 𑀅𑀲𑀼𑀪𑀸𑀦𑀺 𑀲𑁂𑀲𑁂𑀲𑀼 𑀢𑁂𑀭𑀲𑀲𑀼 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑁂𑀲𑀼𑀬𑁂𑀯 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀅𑀝𑁆𑀞𑀲𑀼 𑀧𑀦 𑀓𑀲𑀺𑀡𑁂𑀲𑀼 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀆𑀦𑀸𑀧𑀸𑀦𑁂 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁂 𑀘𑀢𑀽𑀲𑀼 𑀅𑀭𑀽𑀧𑁂𑀲𑀽𑀢𑀺 𑀇𑀫𑁂𑀲𑀼 𑀧𑀦𑁆𑀦𑀭𑀲𑀲𑀼 𑀞𑀸𑀦𑁂𑀲𑀼 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀅𑀬𑀫𑁆𑀧𑀺 𑀘 𑀲𑀗𑁆𑀔𑁂𑀧𑀓𑀣𑀸𑀯. 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀯𑀺𑀲𑀦𑁆𑀢𑁄 𑀧𑀦 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀺 𑀲𑀩𑁆𑀩𑀸𑀧𑀺 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀧𑀯𑀺𑀲𑀺𑀢𑁆𑀯𑀸 𑀯𑀺𑀤𑁂𑀲𑀁 𑀕𑀘𑁆𑀙𑀦𑁆𑀢𑁄 𑀜𑀸𑀢𑀺𑀚𑀦𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀯𑀺𑀬 𑀲𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀯𑀺𑀝𑁆𑀞𑁄.

𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀦𑀦𑁆𑀢𑀭𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀏𑀢𑁆𑀣 𑀘 𑀛𑀸𑀦𑀲𑀫𑀦𑀦𑁆𑀢𑀭𑀁 𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀦𑀦𑁆𑀢𑀭𑀦𑁆𑀢𑀺, 𑀤𑁆𑀯𑁂 𑀲𑀫𑀦𑀦𑁆𑀢𑀭𑀸𑀦𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑀲𑁆𑀲 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀛𑀸𑀦𑀲𑀫𑀦𑀦𑁆𑀢𑀭𑀁 𑀦𑀸𑀫, 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑀲𑁆𑀲 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀦𑀦𑁆𑀢𑀭𑀁 𑀦𑀸𑀫. 𑀇𑀫𑀸𑀦𑀺 𑀤𑁆𑀯𑁂𑀧𑀺 𑀲𑀫𑀦𑀦𑁆𑀢𑀭𑀸𑀦𑁂𑀯. 𑀪𑀕𑀯𑀸 𑀧𑀦 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀅𑀩𑁆𑀬𑀸𑀓𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀬𑁂 𑀳𑀺 𑀓𑁂𑀘𑀺 𑀩𑀼𑀤𑁆𑀥𑀸 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀸 𑀅𑀭𑀺𑀬𑀲𑀸𑀯𑀓𑀸 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀪𑀯𑀗𑁆𑀕𑀘𑀺𑀢𑁆𑀢𑁂𑀦𑁂𑀯 𑀅𑀩𑁆𑀬𑀸𑀓𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀓𑀸𑀮𑀁 𑀓𑀭𑁄𑀦𑁆𑀢𑀺.

𑀪𑀽𑀢𑀸𑀢𑀺 𑀲𑀢𑁆𑀢𑀸. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀧𑀝𑀺𑀪𑀸𑀕𑀧𑀼𑀕𑁆𑀕𑀮𑀯𑀺𑀭𑀳𑀺𑀢𑁄. 𑀩𑀮𑀧𑁆𑀧𑀢𑁆𑀢𑁄𑀢𑀺 𑀤𑀲𑀯𑀺𑀥𑀁 𑀜𑀸𑀡𑀩𑀮𑀁 𑀧𑀢𑁆𑀢𑁄. 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄𑀢𑀺 𑀉𑀧𑁆𑀧𑀸𑀤𑀯𑀬𑀲𑀪𑀸𑀯𑀸. 𑀢𑁂𑀲𑀁 𑀯𑀽𑀧𑀲𑀫𑁄𑀢𑀺 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑁄. 𑀲𑀼𑀔𑁄𑀢𑀺 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀸𑀲𑀻𑀢𑀺 ‘‘𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀻’’𑀢𑀺 𑀏𑀯𑀁 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 (𑀤𑀻. 𑀦𑀺. 𑁨.𑁨𑁨𑁦) 𑀯𑀼𑀢𑁆𑀢𑀁 𑀪𑀽𑀫𑀺𑀘𑀸𑀮𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀮𑁄𑀫𑀳𑀁𑀲𑀦𑀓𑁄 𑀘 𑀪𑀺𑀁𑀲𑀦𑀓𑁄 𑀘 𑀆𑀲𑀺. 𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁂𑀢𑀺 𑀲𑀩𑁆𑀩𑀸𑀓𑀸𑀭𑀯𑀭𑀕𑀼𑀡𑀽𑀧𑁂𑀢𑁂. 𑀦𑀸𑀳𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄𑀢𑀺 𑀦 𑀚𑀸𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄. 𑀅𑀦𑁂𑀚𑁄𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀏𑀚𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑁄. 𑀲𑀦𑁆𑀢𑀺𑀫𑀸𑀭𑀩𑁆𑀪𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀲𑀦𑁆𑀥𑀸𑀬. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀅𑀲𑀮𑁆𑀮𑀻𑀦𑁂𑀦𑀸𑀢𑀺 𑀅𑀦𑀮𑁆𑀮𑀻𑀦𑁂𑀦 𑀅𑀲𑀗𑁆𑀓𑀼𑀝𑀺𑀢𑁂𑀦 𑀲𑀼𑀯𑀺𑀓𑀲𑀺𑀢𑁂𑀦𑁂𑀯 𑀘𑀺𑀢𑁆𑀢𑁂𑀦. 𑀯𑁂𑀤𑀦𑀁 𑀅𑀚𑁆𑀛𑀯𑀸𑀲𑀬𑀻𑀢𑀺 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀲𑀺, 𑀦 𑀯𑁂𑀤𑀦𑀸𑀦𑀼𑀯𑀢𑁆𑀢𑀻 𑀳𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀲𑀫𑁆𑀧𑀭𑀺𑀯𑀢𑁆𑀢𑀺. 𑀯𑀺𑀫𑁄𑀓𑁆𑀔𑁄𑀢𑀺 𑀓𑁂𑀦𑀘𑀺 𑀥𑀫𑁆𑀫𑁂𑀦 𑀅𑀦𑀸𑀯𑀭𑀡𑀯𑀺𑀫𑁄𑀓𑁆𑀔𑁄 𑀲𑀩𑁆𑀩𑀲𑁄 𑀅𑀧𑀜𑁆𑀜𑀢𑁆𑀢𑀺𑀪𑀸𑀯𑀽𑀧𑀕𑀫𑁄 𑀧𑀚𑁆𑀚𑁄𑀢𑀦𑀺𑀩𑁆𑀩𑀸𑀦𑀲𑀤𑀺𑀲𑁄 𑀚𑀸𑀢𑁄𑀢𑀺. 𑀧𑀜𑁆𑀘𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.