𑁧. 𑀧𑀞𑀫𑀯𑀕𑁆𑀕𑁄

𑁧. 𑀩𑁆𑀭𑀳𑁆𑀫𑀸𑀬𑀸𑀘𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁨. 𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻𑀢𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀅𑀬𑀁 𑀘𑁂𑀢𑀲𑁄 𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀓𑀤𑀸 𑀉𑀤𑀧𑀸𑀤𑀻𑀢𑀺? 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀭𑀸𑀚𑀸𑀬𑀢𑀦𑀫𑀽𑀮𑁂 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀆𑀪𑀢𑀁 𑀤𑀦𑁆𑀢𑀓𑀝𑁆𑀞𑀜𑁆𑀘 𑀑𑀲𑀥𑀳𑀭𑀻𑀢𑀓𑀜𑁆𑀘 𑀔𑀸𑀤𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀘𑀢𑀽𑀳𑀺 𑀮𑁄𑀓𑀧𑀸𑀮𑁂𑀳𑀺 𑀉𑀧𑀦𑀻𑀢𑁂 𑀧𑀘𑁆𑀘𑀕𑁆𑀖𑁂 𑀲𑁂𑀮𑀫𑀬𑀧𑀢𑁆𑀢𑁂 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲.

𑀅𑀥𑀺𑀕𑀢𑁄𑀢𑀺 𑀧𑀝𑀺𑀯𑀺𑀤𑁆𑀥𑁄. 𑀥𑀫𑁆𑀫𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁄. 𑀕𑀫𑁆𑀪𑀻𑀭𑁄𑀢𑀺 𑀉𑀢𑁆𑀢𑀸𑀦𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢𑀁. 𑀤𑀼𑀤𑁆𑀤𑀲𑁄𑀢𑀺 𑀕𑀫𑁆𑀪𑀻𑀭𑀢𑁆𑀢𑀸𑀯 𑀤𑀼𑀤𑁆𑀤𑀲𑁄 𑀤𑀼𑀓𑁆𑀔𑁂𑀦 𑀤𑀝𑁆𑀞𑀩𑁆𑀩𑁄, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀝𑁆𑀞𑀼𑀁. 𑀤𑀼𑀤𑁆𑀤𑀲𑀢𑁆𑀢𑀸𑀯 𑀤𑀼𑀭𑀦𑀼𑀩𑁄𑀥𑁄 𑀤𑀼𑀓𑁆𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀩𑁆𑀩𑁄, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀼𑀁. 𑀲𑀦𑁆𑀢𑁄𑀢𑀺 𑀦𑀺𑀩𑁆𑀩𑀼𑀢𑁄. 𑀧𑀡𑀻𑀢𑁄𑀢𑀺 𑀅𑀢𑀧𑁆𑀧𑀓𑁄. 𑀇𑀤𑀁 𑀤𑁆𑀯𑀬𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑀓𑁆𑀓𑀸𑀯𑀘𑀭𑁄𑀢𑀺 𑀢𑀓𑁆𑀓𑁂𑀦 𑀅𑀯𑀘𑀭𑀺𑀢𑀩𑁆𑀩𑁄 𑀑𑀕𑀸𑀳𑀺𑀢𑀩𑁆𑀩𑁄 𑀦 𑀳𑁄𑀢𑀺, 𑀜𑀸𑀡𑁂𑀦𑁂𑀯 𑀅𑀯𑀘𑀭𑀺𑀢𑀩𑁆𑀩𑁄. 𑀦𑀺𑀧𑀼𑀡𑁄𑀢𑀺 𑀲𑀡𑁆𑀳𑁄. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀮𑀬𑀭𑀸𑀫𑀸𑀢𑀺 𑀲𑀢𑁆𑀢𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀮𑁆𑀮𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀆𑀮𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀯𑀸 𑀅𑀮𑁆𑀮𑀻𑀬𑀦𑁆𑀢𑀺, 𑀢𑀲𑁆𑀫𑀸𑀧𑀺 𑀆𑀮𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀳𑀺 𑀆𑀮𑀬𑁂𑀳𑀺 𑀭𑀫𑀦𑁆𑀢𑀻𑀢𑀺 𑀆𑀮𑀬𑀭𑀸𑀫𑀸. 𑀆𑀮𑀬𑁂𑀲𑀼 𑀭𑀢𑀸𑀢𑀺 𑀆𑀮𑀬𑀭𑀢𑀸. 𑀆𑀮𑀬𑁂𑀲𑀼 𑀲𑀼𑀝𑁆𑀞𑀼 𑀫𑀼𑀤𑀺𑀢𑀸𑀢𑀺 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀬𑀣𑁂𑀯 𑀳𑀺 𑀲𑀼𑀲𑀚𑁆𑀚𑀺𑀢𑀁 𑀧𑀼𑀧𑁆𑀨𑀨𑀮𑀪𑀭𑀺𑀢𑀭𑀼𑀓𑁆𑀔𑀸𑀤𑀺𑀲𑀫𑁆𑀧𑀦𑁆𑀦𑀁 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁄 𑀭𑀸𑀚𑀸 𑀢𑀸𑀬 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀭𑀫𑀢𑀺, 𑀲𑀫𑁆𑀫𑀼𑀤𑀺𑀢𑁄 𑀆𑀫𑁄𑀤𑀺𑀢𑀧𑀫𑁄𑀤𑀺𑀢𑁄 𑀳𑁄𑀢𑀺, 𑀦 𑀉𑀓𑁆𑀓𑀡𑁆𑀞𑀢𑀺, 𑀲𑀸𑀬𑀫𑁆𑀧𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀏𑀯𑀫𑀺𑀫𑁂𑀳𑀺𑀧𑀺 𑀓𑀸𑀫𑀸𑀮𑀬𑀢𑀡𑁆𑀳𑀸𑀮𑀬𑁂𑀳𑀺 𑀲𑀢𑁆𑀢𑀸 𑀭𑀫𑀦𑁆𑀢𑀺, 𑀲𑀁𑀲𑀸𑀭𑀯𑀝𑁆𑀝𑁂 𑀲𑀫𑁆𑀫𑀼𑀤𑀺𑀢𑀸 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀯𑀲𑀦𑁆𑀢𑀺. 𑀢𑁂𑀦 𑀢𑁂𑀲𑀁 𑀪𑀕𑀯𑀸 𑀤𑀼𑀯𑀺𑀥𑀁 𑀆𑀮𑀬𑀁 𑀉𑀬𑁆𑀬𑀸𑀦𑀪𑀽𑀫𑀺𑀁 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀮𑀬𑀭𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀬𑀁 𑀇𑀤’’𑀦𑁆𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 ‘‘𑀬𑁄 𑀅𑀬’’𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀇𑀫𑁂𑀲𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘𑀸𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀩𑁆𑀩𑀸𑀦𑀫𑁂𑀯. 𑀬𑀲𑁆𑀫𑀸 𑀳𑀺 𑀢𑀁 𑀆𑀕𑀫𑁆𑀫 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀲𑀫𑀦𑁆𑀢𑀺, 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀢𑀁 𑀆𑀕𑀫𑁆𑀫 𑀲𑀩𑁆𑀩𑁂 𑀉𑀧𑀥𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀸 𑀢𑀡𑁆𑀳𑀸 𑀔𑀻𑀬𑀦𑁆𑀢𑀺, 𑀲𑀩𑁆𑀩𑁂 𑀓𑀺𑀮𑁂𑀲𑀭𑀸𑀕𑀸 𑀯𑀺𑀭𑀚𑁆𑀚𑀦𑁆𑀢𑀺, 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀸 𑀧𑀦𑁂𑀲𑀸 𑀢𑀡𑁆𑀳𑀸 𑀪𑀯𑁂𑀦 𑀪𑀯𑀁, 𑀨𑀮𑁂𑀦 𑀯𑀸 𑀲𑀤𑁆𑀥𑀺𑀁 𑀓𑀫𑁆𑀫𑀁 𑀯𑀺𑀦𑀢𑀺 𑀲𑀁𑀲𑀺𑀩𑁆𑀩𑀢𑀻𑀢𑀺 𑀓𑀢𑁆𑀯𑀸 𑀯𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀦𑀺𑀓𑁆𑀔𑀦𑁆𑀢𑀁 𑀯𑀸𑀦𑀢𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄𑀢𑀺 𑀬𑀸 𑀅𑀚𑀸𑀦𑀦𑁆𑀢𑀸𑀦𑀁 𑀤𑁂𑀲𑀦𑀸 𑀦𑀸𑀫, 𑀲𑁄 𑀫𑀫 𑀓𑀺𑀮𑀫𑀣𑁄 𑀅𑀲𑁆𑀲, 𑀲𑀸 𑀫𑀫 𑀯𑀺𑀳𑁂𑀲𑀸 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀸𑀬𑀓𑀺𑀮𑀫𑀣𑁄 𑀘𑁂𑀯 𑀓𑀸𑀬𑀯𑀺𑀳𑁂𑀲𑀸 𑀘 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑁂 𑀧𑀦 𑀉𑀪𑀬𑀫𑁆𑀧𑁂𑀢𑀁 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺. 𑀅𑀧𑀺𑀲𑁆𑀲𑀽𑀢𑀺 𑀅𑀦𑀼𑀩𑁆𑀭𑀽𑀳𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁄 ‘‘𑀦 𑀓𑁂𑀯𑀮𑀁 𑀅𑀬𑀁 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀇𑀫𑀸𑀧𑀺 𑀕𑀸𑀣𑀸 𑀧𑀝𑀺𑀪𑀁𑀲𑀽’’𑀢𑀺 𑀤𑀻𑀧𑁂𑀢𑀺. 𑀅𑀦𑀘𑁆𑀙𑀭𑀺𑀬𑀸𑀢𑀺 𑀅𑀦𑀼𑀅𑀘𑁆𑀙𑀭𑀺𑀬𑀸. 𑀧𑀝𑀺𑀪𑀁𑀲𑀽𑀢𑀺 𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀕𑁄𑀘𑀭𑀸 𑀅𑀳𑁂𑀲𑀼𑀁, 𑀧𑀭𑀺𑀯𑀺𑀢𑀓𑁆𑀓𑀬𑀺𑀢𑀩𑁆𑀩𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀓𑀺𑀘𑁆𑀙𑁂𑀦𑀸𑀢𑀺 𑀤𑀼𑀓𑁆𑀔𑁂𑀦, 𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬. 𑀩𑀼𑀤𑁆𑀥𑀸𑀦𑀁 𑀳𑀺 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀼𑀔𑀧𑀝𑀺𑀧𑀤𑀸𑀯 𑀳𑁄𑀦𑁆𑀢𑀺. 𑀧𑀸𑀭𑀫𑀻𑀧𑀽𑀭𑀡𑀓𑀸𑀮𑁂 𑀧𑀦 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀲𑁆𑀲𑁂𑀯 𑀲𑀢𑁄 𑀆𑀕𑀢𑀸𑀕𑀢𑀸𑀦𑀁 𑀬𑀸𑀘𑀓𑀸𑀦𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀻𑀲𑀁 𑀓𑀦𑁆𑀢𑀺𑀢𑁆𑀯𑀸 𑀕𑀮𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀲𑀼𑀅𑀜𑁆𑀚𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀼𑀮𑀯𑀁𑀲𑀧𑁆𑀧𑀤𑀻𑀧𑀁 𑀧𑀼𑀢𑁆𑀢𑀁 𑀫𑀦𑀸𑀧𑀘𑀸𑀭𑀺𑀦𑀺𑀁 𑀪𑀭𑀺𑀬𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀦𑀺 𑀘 𑀔𑀦𑁆𑀢𑀺𑀯𑀸𑀤𑀺𑀲𑀤𑀺𑀲𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀙𑁂𑀚𑁆𑀚𑀪𑁂𑀚𑁆𑀚𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀲𑁆𑀲 𑀆𑀕𑀫𑀦𑀻𑀬𑀧𑀝𑀺𑀧𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀳𑀮𑀦𑁆𑀢𑀺 𑀏𑀢𑁆𑀣 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄, 𑀅𑀮𑀦𑁆𑀢𑀺 𑀅𑀢𑁆𑀣𑁄. 𑀧𑀓𑀸𑀲𑀺𑀢𑀼𑀦𑁆𑀢𑀺 𑀤𑁂𑀲𑀺𑀢𑀼𑀁, 𑀏𑀯𑀁 𑀓𑀺𑀘𑁆𑀙𑁂𑀦 𑀅𑀥𑀺𑀕𑀢𑀲𑁆𑀲 𑀅𑀮𑀁 𑀤𑁂𑀲𑀺𑀢𑀼𑀁 𑀧𑀭𑀺𑀬𑀢𑁆𑀢𑀁 𑀤𑁂𑀲𑀺𑀢𑀼𑀁. 𑀓𑁄 𑀅𑀢𑁆𑀣𑁄 𑀤𑁂𑀲𑀺𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺? 𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀻𑀢𑀺 𑀭𑀸𑀕𑀤𑁄𑀲𑀨𑀼𑀝𑁆𑀞𑁂𑀳𑀺 𑀭𑀸𑀕𑀤𑁄𑀲𑀸𑀦𑀼𑀕𑀢𑁂𑀳𑀺 𑀯𑀸.

𑀧𑀝𑀺𑀲𑁄𑀢𑀕𑀸𑀫𑀺𑀦𑁆𑀢𑀺 𑀦𑀺𑀘𑁆𑀘𑀸𑀤𑀻𑀦𑀁 𑀧𑀝𑀺𑀲𑁄𑀢𑀁, ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀅𑀲𑀼𑀪’’𑀦𑁆𑀢𑀺 𑀏𑀯𑀁 𑀕𑀢𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁. 𑀭𑀸𑀕𑀭𑀢𑁆𑀢𑀸𑀢𑀺 𑀓𑀸𑀫𑀭𑀸𑀕𑁂𑀦 𑀪𑀯𑀭𑀸𑀕𑁂𑀦 𑀤𑀺𑀝𑁆𑀞𑀺𑀭𑀸𑀕𑁂𑀦 𑀘 𑀭𑀢𑁆𑀢𑀸. 𑀦 𑀤𑀓𑁆𑀔𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀅𑀲𑀼𑀪𑀦𑁆𑀢𑀺 𑀇𑀫𑀺𑀦𑀸 𑀲𑀪𑀸𑀯𑁂𑀦 𑀦 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀧𑀲𑁆𑀲𑀦𑁆𑀢𑁂 𑀓𑁄 𑀲𑀓𑁆𑀔𑀺𑀲𑁆𑀲𑀢𑀺 𑀏𑀯𑀁 𑀕𑀸𑀳𑀸𑀧𑁂𑀢𑀼𑀁. 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸𑀢𑀺 𑀅𑀯𑀺𑀚𑁆𑀚𑀸𑀭𑀸𑀲𑀺𑀦𑀸 𑀅𑀚𑁆𑀛𑁄𑀢𑁆𑀣𑀝𑀸.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬𑀸𑀢𑀺 𑀦𑀺𑀭𑀼𑀲𑁆𑀲𑀼𑀓𑁆𑀓𑀪𑀸𑀯𑁂𑀦, 𑀅𑀤𑁂𑀲𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺? 𑀦𑀦𑀼 𑀏𑀲 𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀺, 𑀢𑀺𑀡𑁆𑀡𑁄 𑀢𑀸𑀭𑁂𑀲𑁆𑀲𑀸𑀫𑀺 𑁋

‘‘𑀓𑀺𑀁 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀸𑀭𑀬𑀺𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺. (𑀩𑀼. 𑀯𑀁. 𑁨.𑁫𑁬) 𑁋

𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀤𑁂𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦 𑀧𑀦𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺. 𑀢𑀲𑁆𑀲 𑀳𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀕𑀳𑀦𑀢𑀁, 𑀥𑀫𑁆𑀫𑀲𑁆𑀲 𑀘 𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀕𑀳𑀦𑀢𑀸 𑀘 𑀥𑀫𑁆𑀫𑀕𑀫𑁆𑀪𑀻𑀭𑀢𑀸 𑀘 𑀲𑀩𑁆𑀩𑀸𑀓𑀸𑀭𑁂𑀦 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑀲𑁆𑀲 𑁋 ‘‘𑀇𑀫𑁂 𑀲𑀢𑁆𑀢𑀸 𑀓𑀜𑁆𑀚𑀺𑀬𑀧𑀼𑀡𑁆𑀡𑀸 𑀮𑀸𑀩𑀼 𑀯𑀺𑀬, 𑀢𑀓𑁆𑀓𑀪𑀭𑀺𑀢𑀸 𑀘𑀸𑀝𑀺 𑀯𑀺𑀬, 𑀯𑀲𑀸𑀢𑁂𑀮𑀧𑀻𑀢𑀧𑀺𑀮𑁄𑀢𑀺𑀓𑀸 𑀯𑀺𑀬, 𑀅𑀜𑁆𑀚𑀦𑀫𑀓𑁆𑀔𑀺𑀢𑀳𑀢𑁆𑀣𑁄 𑀯𑀺𑀬 𑀘 𑀓𑀺𑀮𑁂𑀲𑀪𑀭𑀺𑀢𑀸 𑀅𑀢𑀺𑀲𑀁𑀓𑀺𑀮𑀺𑀝𑁆𑀞𑀸 𑀭𑀸𑀕𑀭𑀢𑁆𑀢𑀸 𑀤𑁄𑀲𑀤𑀼𑀝𑁆𑀞𑀸 𑀫𑁄𑀳𑀫𑀽𑀴𑁆𑀳𑀸, 𑀢𑁂 𑀓𑀺𑀁 𑀦𑀸𑀫 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺? 𑀘𑀺𑀦𑁆𑀢𑀬𑀢𑁄 𑀓𑀺𑀮𑁂𑀲𑀕𑀳𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦𑀸𑀧𑀺 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺.

‘‘𑀅𑀬𑀜𑁆𑀘 𑀥𑀫𑁆𑀫𑁄 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀓𑁆𑀔𑀦𑁆𑀥𑁄 𑀯𑀺𑀬 𑀕𑀫𑁆𑀪𑀻𑀭𑁄, 𑀧𑀩𑁆𑀩𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀧𑀺𑀢𑁄 𑀲𑀸𑀲𑀧𑁄 𑀯𑀺𑀬 𑀤𑀼𑀤𑁆𑀤𑀲𑁄, 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀧𑀝𑀺𑀧𑀸𑀤𑀦𑀁 𑀯𑀺𑀬 𑀤𑀼𑀭𑀦𑀼𑀩𑁄𑀥𑁄. 𑀦𑀦𑀼 𑀫𑀬𑀸 𑀳𑀺 𑀇𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀸𑀬𑀫𑀦𑁆𑀢𑁂𑀦 𑀅𑀤𑀺𑀦𑁆𑀦𑀁 𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀭𑀓𑁆𑀔𑀺𑀢𑀁 𑀲𑀻𑀮𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀭𑀺𑀧𑀽𑀭𑀺𑀢𑀸 𑀓𑀸𑀘𑀺 𑀧𑀸𑀭𑀫𑀻 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀲 𑀫𑁂 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀬 𑀫𑀸𑀭𑀩𑀮𑀁 𑀯𑀺𑀥𑀫𑀦𑁆𑀢𑀲𑁆𑀲𑀸𑀧𑀺 𑀧𑀣𑀯𑀻 𑀦 𑀓𑀫𑁆𑀧𑀺𑀢𑁆𑀣, 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀦 𑀓𑀫𑁆𑀧𑀺𑀢𑁆𑀣, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀦𑁆𑀢𑀲𑁆𑀲𑀸𑀧𑀺 𑀦 𑀓𑀫𑁆𑀧𑀺𑀢𑁆𑀣, 𑀧𑀘𑁆𑀙𑀺𑀫𑀬𑀸𑀫𑁂 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲𑁂𑀯 𑀫𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀇𑀢𑀺 𑀫𑀸𑀤𑀺𑀲𑁂𑀦𑀸𑀧𑀺 𑀢𑀺𑀓𑁆𑀔𑀜𑀸𑀡𑁂𑀦 𑀓𑀺𑀘𑁆𑀙𑁂𑀦𑁂𑀯𑀸𑀬𑀁 𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄. 𑀢𑀁 𑀮𑁄𑀓𑀺𑀬𑀫𑀳𑀸𑀚𑀦𑀸 𑀓𑀣𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺? 𑀥𑀫𑁆𑀫𑀕𑀫𑁆𑀪𑀻𑀭𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦𑀸𑀧𑀺 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁂 𑀤𑁂𑀲𑁂𑀢𑀼𑀓𑀸𑀫𑀢𑀸𑀬𑀧𑀺𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺. 𑀚𑀸𑀦𑀸𑀢𑀺 𑀳𑀺 𑀪𑀕𑀯𑀸 𑁋 ‘‘𑀫𑀫 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑁂 𑀦𑀫𑀫𑀸𑀦𑁂 𑀫𑀁 𑀫𑀳𑀸𑀩𑁆𑀭𑀳𑁆𑀫𑀸 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀺𑀲𑁆𑀲𑀢𑀺, 𑀇𑀫𑁂 𑀘 𑀲𑀢𑁆𑀢𑀸 𑀩𑁆𑀭𑀳𑁆𑀫𑀕𑀭𑀼𑀓𑀸. 𑀢𑁂 ‘𑀲𑀢𑁆𑀣𑀸 𑀓𑀺𑀭 𑀥𑀫𑁆𑀫𑀁 𑀦 𑀤𑁂𑀲𑁂𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀦𑀁 𑀫𑀳𑀸𑀩𑁆𑀭𑀳𑁆𑀫𑀸 𑀬𑀸𑀘𑀺𑀢𑁆𑀯𑀸 𑀤𑁂𑀲𑀸𑀧𑁂𑀲𑀺. 𑀲𑀦𑁆𑀢𑁄 𑀯𑀢 𑀪𑁄 𑀥𑀫𑁆𑀫𑁄, 𑀧𑀡𑀻𑀢𑁄 𑀯𑀢 𑀪𑁄 𑀥𑀫𑁆𑀫𑁄’𑀢𑀺 𑀫𑀜𑁆𑀜𑀫𑀸𑀦𑀸 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀳𑀫𑁆𑀧𑀢𑀺𑀲𑁆𑀲𑀸𑀢𑀺 𑀲𑁄 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀳𑀓𑁄 𑀦𑀸𑀫 𑀣𑁂𑀭𑁄 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀓𑀧𑁆𑀧𑀸𑀬𑀼𑀓𑀩𑁆𑀭𑀳𑁆𑀫𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁆𑀭 𑀦𑀁 ‘‘𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀸’’𑀢𑀺 𑀧𑀝𑀺𑀲𑀜𑁆𑀚𑀸𑀦𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀩𑁆𑀭𑀳𑁆𑀫𑀼𑀦𑁄 𑀲𑀳𑀫𑁆𑀧𑀢𑀺𑀲𑁆𑀲𑀸’’𑀢𑀺. 𑀦𑀲𑁆𑀲𑀢𑀺 𑀯𑀢 𑀪𑁄𑀢𑀺 𑀲𑁄 𑀓𑀺𑀭 𑀇𑀫𑀁 𑀲𑀤𑁆𑀤𑀁 𑀢𑀣𑀸 𑀦𑀺𑀘𑁆𑀙𑀸𑀭𑁂𑀲𑀺, 𑀬𑀣𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀩𑁆𑀭𑀳𑁆𑀫𑀸𑀦𑁄 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀲𑁆𑀫𑀺𑀁 𑀦𑀸𑀫 𑀮𑁄𑀓𑁂. 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀻𑀢𑀺 𑀢𑁂𑀳𑀺 𑀤𑀲𑀳𑀺 𑀩𑁆𑀭𑀳𑁆𑀫𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀸𑀢𑀼𑀭𑀳𑁄𑀲𑀺. 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀭𑀚𑀁 𑀏𑀢𑁂𑀲𑀁 𑀏𑀯𑀁𑀲𑀪𑀸𑀯𑀸𑀢𑀺 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸. 𑀅𑀲𑁆𑀲𑀯𑀦𑀢𑀸𑀢𑀺 𑀅𑀲𑁆𑀲𑀯𑀦𑀢𑀸𑀬. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦 𑀓𑀢𑀸𑀥𑀺𑀓𑀸𑀭𑀸 𑀧𑀭𑀺𑀧𑀸𑀓𑀕𑀢𑀸 𑀧𑀤𑀼𑀫𑀸𑀦𑀺 𑀯𑀺𑀬 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁, 𑀥𑀫𑁆𑀫𑀤𑁂𑀲𑀦𑀁𑀬𑁂𑀯 𑀆𑀓𑀗𑁆𑀔𑀫𑀸𑀦𑀸 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀯𑀲𑀸𑀦𑁂 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀦𑀸𑀭𑀳𑀸 𑀦 𑀏𑀓𑁄, 𑀦 𑀤𑁆𑀯𑁂, 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀸𑀢𑀼𑀭𑀳𑁄𑀲𑀻𑀢𑀺 𑀧𑀸𑀢𑀼𑀪𑀯𑀺. 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄𑀢𑀺 𑀲𑀫𑀮𑁂𑀳𑀺 𑀙𑀳𑀺 𑀲𑀢𑁆𑀣𑀸𑀭𑁂𑀳𑀺 𑀘𑀺𑀦𑁆𑀢𑀺𑀢𑁄. 𑀢𑁂 𑀳𑀺 𑀧𑀼𑀭𑁂𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀓𑀡𑁆𑀝𑀓𑁂 𑀧𑀢𑁆𑀣𑀭𑀫𑀸𑀦𑀸 𑀯𑀺𑀬, 𑀯𑀺𑀲𑀁 𑀲𑀺𑀜𑁆𑀘𑀫𑀸𑀦𑀸 𑀯𑀺𑀬 𑀘 𑀲𑀫𑀮𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀁 𑀤𑁂𑀲𑀬𑀺𑀁𑀲𑀼. 𑀅𑀧𑀸𑀧𑀼𑀭𑁂𑀢𑀦𑁆𑀢𑀺 𑀯𑀺𑀯𑀭𑀁 𑀏𑀢𑀁. 𑀅𑀫𑀢𑀲𑁆𑀲 𑀤𑁆𑀯𑀸𑀭𑀦𑁆𑀢𑀺 𑀅𑀫𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀤𑁆𑀯𑀸𑀭𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀁. 𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀦𑁆𑀢𑀺 𑀇𑀫𑁂 𑀲𑀢𑁆𑀢𑀸 𑀭𑀸𑀕𑀸𑀤𑀺𑀫𑀮𑀸𑀦𑀁 𑀅𑀪𑀸𑀯𑀢𑁄 𑀯𑀺𑀫𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀩𑀼𑀤𑁆𑀥𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀼𑀡𑀦𑁆𑀢𑀼 𑀢𑀸𑀯 𑀪𑀕𑀯𑀸𑀢𑀺 𑀬𑀸𑀘𑀢𑀺.

𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄𑀢𑀺 𑀲𑁂𑀮𑀫𑀬𑁂 𑀏𑀓𑀕𑁆𑀖𑀦𑁂 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀬𑀣𑀸𑀞𑀺𑀢𑁄𑀯. 𑀦 𑀳𑀺 𑀢𑀲𑁆𑀲 𑀞𑀺𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀕𑀻𑀯𑀼𑀓𑁆𑀔𑀺𑀧𑀦𑀧𑀲𑀸𑀭𑀡𑀸𑀤𑀺𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀢𑀣𑀽𑀧𑀫𑀦𑁆𑀢𑀺 𑀢𑀧𑁆𑀧𑀝𑀺𑀪𑀸𑀕𑀁 𑀲𑁂𑀮𑀧𑀩𑁆𑀩𑀢𑀽𑀧𑀫𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀲𑁂𑀮𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀞𑀺𑀢𑁄𑀯 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀫𑀦𑁆𑀢𑀢𑁄 𑀚𑀦𑀢𑀁 𑀧𑀲𑁆𑀲𑁂𑀬𑁆𑀬, 𑀢𑀣𑀸 𑀢𑁆𑀯𑀫𑁆𑀧𑀺 𑀲𑀼𑀫𑁂𑀥 𑀲𑀼𑀦𑁆𑀤𑀭𑀧𑀜𑁆𑀜 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀲𑀫𑀦𑁆𑀢𑀘𑀓𑁆𑀔𑀼 𑀪𑀕𑀯𑀸 𑀥𑀫𑁆𑀫𑀫𑀬𑀁 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀬𑀁 𑀅𑀧𑁂𑀢𑀲𑁄𑀓𑁄 𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁 𑀚𑀦𑀢𑀁 𑀅𑀯𑁂𑀓𑁆𑀔𑀲𑁆𑀲𑀼 𑀉𑀧𑀥𑀸𑀭𑀬 𑀉𑀧𑀧𑀭𑀺𑀓𑁆𑀔. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀳𑀺 𑀧𑀩𑁆𑀩𑀢𑀧𑀸𑀤𑁂 𑀲𑀫𑀦𑁆𑀢𑀸 𑀫𑀳𑀦𑁆𑀢𑀁 𑀔𑁂𑀢𑁆𑀢𑀁 𑀓𑀢𑁆𑀯𑀸, 𑀢𑀢𑁆𑀣 𑀓𑁂𑀤𑀸𑀭𑀧𑀸𑀴𑀻𑀲𑀼 𑀓𑀼𑀝𑀺𑀓𑀸𑀬𑁄 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀅𑀕𑁆𑀕𑀺𑀁 𑀚𑀸𑀮𑁂𑀬𑁆𑀬𑀼𑀁, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀜𑁆𑀘 𑀅𑀦𑁆𑀥𑀓𑀸𑀭𑀁 𑀅𑀲𑁆𑀲, 𑀅𑀣 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀫𑀢𑁆𑀣𑀓𑁂 𑀞𑀢𑁆𑀯𑀸 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀪𑀽𑀫𑀺𑀁 𑀑𑀮𑁄𑀓𑀬𑀢𑁄 𑀦𑁂𑀯 𑀔𑁂𑀢𑁆𑀢𑀁 𑀦 𑀓𑁂𑀤𑀸𑀭𑀧𑀸𑀴𑀺𑀬𑁄 𑀦 𑀓𑀼𑀝𑀺𑀬𑁄 𑀦 𑀢𑀢𑁆𑀣 𑀲𑀬𑀺𑀢𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑁂𑀬𑁆𑀬𑀼𑀁. 𑀓𑀼𑀝𑀺𑀓𑀸𑀲𑀼 𑀧𑀦 𑀅𑀕𑁆𑀕𑀺𑀚𑀸𑀮𑀸𑀫𑀢𑁆𑀢𑀓𑀫𑁂𑀯 𑀧𑀜𑁆𑀜𑀸𑀬𑁂𑀬𑁆𑀬, 𑀏𑀯𑀁 𑀥𑀫𑁆𑀫𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀢𑁆𑀢𑀦𑀺𑀓𑀸𑀬𑀁 𑀑𑀮𑁄𑀓𑀬𑀢𑁄 𑀢𑀣𑀸𑀕𑀢𑀲𑁆𑀲 𑀬𑁂 𑀢𑁂 𑀅𑀓𑀢𑀓𑀮𑁆𑀬𑀸𑀡𑀸 𑀲𑀢𑁆𑀢𑀸, 𑀢𑁂 𑀏𑀓𑀯𑀺𑀳𑀸𑀭𑁂 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀸𑀧𑀺 𑀩𑀼𑀤𑁆𑀥𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀦𑀸𑀕𑀘𑁆𑀙𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀲𑀭𑀸 𑀯𑀺𑀬 𑀳𑁄𑀦𑁆𑀢𑀺. 𑀬𑁂 𑀧𑀦 𑀓𑀢𑀓𑀮𑁆𑀬𑀸𑀡𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸, 𑀢𑁂 𑀏𑀯𑀲𑁆𑀲 𑀤𑀽𑀭𑁂𑀧𑀺 𑀞𑀺𑀢𑀸 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀲𑁄 𑀅𑀕𑁆𑀕𑀺 𑀯𑀺𑀬 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀯𑀺𑀬 𑀘. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸’’𑀢𑀺. (𑀥. 𑀧. 𑁩𑁦𑁪);

𑀅𑀚𑁆𑀛𑁂𑀲𑀦𑀦𑁆𑀢𑀺 𑀬𑀸𑀘𑀦𑀁. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀘 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀘. 𑀇𑀫𑁂𑀲𑀁 𑀳𑀺 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀦𑀸𑀫𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 ‘‘𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺, 𑀢𑀺𑀡𑁆𑀡𑀁 𑀫𑀕𑁆𑀕𑀜𑀸𑀡𑀸𑀦𑀁 ‘‘𑀥𑀫𑁆𑀫𑀘𑀓𑁆𑀔𑀽’’𑀢𑀺. 𑀅𑀧𑁆𑀧𑀭𑀚𑀓𑁆𑀔𑁂𑀢𑀺𑀆𑀤𑀻𑀲𑀼 𑀬𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀫𑁆𑀳𑀺 𑀭𑀸𑀕𑀸𑀤𑀺𑀭𑀚𑀁 𑀅𑀧𑁆𑀧𑀁, 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸. 𑀬𑁂𑀲𑀁 𑀢𑀁 𑀫𑀳𑀦𑁆𑀢𑀁, 𑀢𑁂 𑀫𑀳𑀸𑀭𑀚𑀓𑁆𑀔𑀸. 𑀬𑁂𑀲𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺, 𑀢𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑀸𑀦𑀺 𑀫𑀼𑀤𑀽𑀦𑀺, 𑀢𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑁂𑀬𑁂𑀯 𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸. 𑀬𑁂 𑀓𑀣𑀺𑀢𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀢𑁂 𑀲𑀼𑀯𑀺𑀜𑁆𑀜𑀸𑀧𑀬𑀸. 𑀬𑁂 𑀧𑀭𑀮𑁄𑀓𑀜𑁆𑀘𑁂𑀯 𑀯𑀚𑁆𑀚𑀜𑁆𑀘 𑀪𑀬𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀦𑀸𑀫.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺 𑁋 ‘‘𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀭𑀚𑀓𑁆𑀔𑁄, 𑀅𑀲𑁆𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀫𑀳𑀸𑀭𑀚𑀓𑁆𑀔𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀓𑀼𑀲𑀻𑀢𑁄. 𑀉𑀧𑀝𑁆𑀞𑀺𑀢𑀲𑁆𑀲𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺. 𑀲𑀫𑀸𑀳𑀺𑀢𑁄, 𑀅𑀲𑀫𑀸𑀳𑀺𑀢𑁄. 𑀧𑀜𑁆𑀜𑀯𑀸, 𑀤𑀼𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀫𑀳𑀸𑀭𑀚𑀓𑁆𑀔𑁄. 𑀢𑀣𑀸 𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄…𑀧𑁂… 𑀧𑀜𑁆𑀜𑀯𑀸 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀻, 𑀤𑀼𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀻. 𑀮𑁄𑀓𑁄𑀢𑀺 𑀔𑀦𑁆𑀥𑀮𑁄𑀓𑁄, 𑀆𑀬𑀢𑀦𑀮𑁄𑀓𑁄, 𑀥𑀸𑀢𑀼𑀮𑁄𑀓𑁄, 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄, 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄, 𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑁄, 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄. 𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀤𑁆𑀯𑁂 𑀮𑁄𑀓𑀸 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀢𑀬𑁄 𑀮𑁄𑀓𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀮𑁄𑀓𑀸 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑀤𑀲𑀸𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀅𑀝𑁆𑀞𑀸𑀭𑀲 𑀮𑁄𑀓𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀯𑀚𑁆𑀚𑀦𑁆𑀢𑀺 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀯𑀚𑁆𑀚𑀸, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀯𑀚𑁆𑀚𑀸, 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑀸 𑀯𑀚𑁆𑀚𑀸, 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸 𑀯𑀚𑁆𑀚𑀸, 𑀇𑀢𑀺 𑀇𑀫𑀲𑁆𑀫𑀺𑀜𑁆𑀘 𑀮𑁄𑀓𑁂 𑀇𑀫𑀲𑁆𑀫𑀺𑀜𑁆𑀘 𑀯𑀚𑁆𑀚𑁂 𑀢𑀺𑀩𑁆𑀩𑀸 𑀪𑀬𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂 𑀯𑀥𑀓𑁂. 𑀇𑀫𑁂𑀳𑀺 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁧𑁨).

𑀉𑀧𑁆𑀧𑀮𑀺𑀦𑀺𑀬𑀦𑁆𑀢𑀺 𑀉𑀧𑁆𑀧𑀮𑀯𑀦𑁂. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀬𑀸𑀦𑀺 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑁂𑀯 𑀧𑁄𑀲𑀺𑀬𑀦𑁆𑀢𑀺. 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀻 𑀢𑀺 𑀉𑀤𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀺. 𑀢𑀢𑁆𑀣 𑀬𑀸𑀦𑀺 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁 𑀆𑀕𑀫𑀬𑀫𑀸𑀦𑀸𑀦𑀺 𑀞𑀺𑀢𑀸𑀦𑀺 𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀧𑀦 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀢𑀸𑀦𑀺 𑀢𑀢𑀺𑀬𑀤𑀺𑀯𑀲𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀉𑀤𑀓𑀸 𑀧𑀦 𑀅𑀦𑀼𑀕𑁆𑀕𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀲𑀭𑁄𑀕𑀉𑀧𑁆𑀧𑀮𑀸𑀤𑀻𑀦𑀺 𑀦𑀸𑀫 𑀅𑀢𑁆𑀣𑀺, 𑀬𑀸𑀦𑀺 𑀦𑁂𑀯 𑀧𑀼𑀧𑁆𑀨𑀺𑀲𑁆𑀲𑀦𑁆𑀢𑀺, 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑁂𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀧𑀸𑀴𑀺𑀁 𑀦𑀸𑀭𑀼𑀴𑁆𑀳𑀸𑀦𑀺. 𑀆𑀳𑀭𑀺𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸𑀦𑀻𑀢𑀺 𑀤𑀻𑀧𑀺𑀢𑀸𑀦𑀺. 𑀬𑀣𑁂𑀯 𑀳𑀺 𑀢𑀸𑀦𑀺 𑀘𑀢𑀼𑀩𑁆𑀩𑀺𑀥𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀏𑀯𑀫𑁂𑀯𑀁 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄 𑀧𑀤𑀧𑀭𑀫𑁄𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸.

𑀢𑀢𑁆𑀣 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀢𑁄 𑀧𑀭𑀺𑀧𑀼𑀘𑁆𑀙𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀫𑁆𑀧𑀺 𑀲𑀼𑀡𑀢𑁄 𑀩𑀳𑀼𑀫𑁆𑀧𑀺 𑀪𑀡𑀢𑁄 𑀩𑀳𑀼𑀫𑁆𑀧𑀺 𑀥𑀸𑀭𑀬𑀢𑁄 𑀩𑀳𑀼𑀫𑁆𑀧𑀺 𑀯𑀸𑀘𑀬𑀢𑁄 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄 (𑀧𑀼. 𑀧. 𑁧𑁪𑁮-𑁧𑁫𑁧). 𑀢𑀢𑁆𑀣 𑀪𑀕𑀯𑀸 𑀉𑀧𑁆𑀧𑀮𑀯𑀦𑀸𑀤𑀺𑀲𑀤𑀺𑀲𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑁋 ‘‘𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀢𑀢𑀺𑀬𑀤𑀺𑀯𑀲𑁂 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀦𑁂𑀬𑁆𑀬𑁄, 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀧𑀤𑀧𑀭𑀫𑁄’’𑀢𑀺 𑀅𑀤𑁆𑀤𑀲𑁆𑀲. 𑀧𑀲𑁆𑀲𑀦𑁆𑀢𑁄 𑀘 ‘‘𑀏𑀢𑁆𑀢𑀓𑀸 𑀅𑀧𑁆𑀧𑀭𑀚𑀓𑁆𑀔𑀸, 𑀏𑀢𑁆𑀢𑀓𑀸 𑀫𑀳𑀸𑀭𑀚𑀓𑁆𑀔𑀸, 𑀢𑀢𑁆𑀭𑀸𑀧𑀺 𑀏𑀢𑁆𑀢𑀓𑀸 𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑀢𑁄𑀯 𑀅𑀤𑁆𑀤𑀲.

𑀢𑀢𑁆𑀣 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀧𑀤𑀧𑀭𑀫𑀸𑀦𑀁 𑀅𑀦𑀸𑀕𑀢𑀢𑁆𑀣𑀸𑀬 𑀯𑀸𑀲𑀦𑀸 𑀳𑁄𑀢𑀺. 𑀅𑀣 𑀪𑀕𑀯𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀸𑀯𑀳𑀁 𑀥𑀫𑁆𑀫𑀤𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 𑀤𑁂𑀲𑁂𑀢𑀼𑀓𑀫𑁆𑀬𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀲𑀩𑁆𑀩𑁂𑀧𑀺 𑀢𑀻𑀲𑀼 𑀪𑀯𑁂𑀲𑀼 𑀲𑀢𑁆𑀢𑁂 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀓𑀢𑀫𑁂 𑀲𑀢𑁆𑀢𑀸 𑀅𑀪𑀩𑁆𑀩𑀸? 𑀬𑁂 𑀢𑁂 𑀲𑀢𑁆𑀢𑀸 𑀓𑀫𑁆𑀫𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀓𑀺𑀮𑁂𑀲𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀲𑁆𑀲𑀤𑁆𑀥𑀸 𑀅𑀘𑁆𑀙𑀦𑁆𑀤𑀺𑀓𑀸 𑀤𑀼𑀧𑁆𑀧𑀜𑁆𑀜𑀸 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁, 𑀇𑀫𑁂 𑀢𑁂 𑀲𑀢𑁆𑀢𑀸 𑀅𑀪𑀩𑁆𑀩𑀸. 𑀓𑀢𑀫𑁂 𑀲𑀢𑁆𑀢𑀸 𑀪𑀩𑁆𑀩𑀸? 𑀬𑁂 𑀢𑁂 𑀲𑀢𑁆𑀢𑀸 𑀦 𑀓𑀫𑁆𑀫𑀸𑀯𑀭𑀡𑁂𑀦…𑀧𑁂… 𑀇𑀫𑁂 𑀢𑁂 𑀲𑀢𑁆𑀢𑀸 𑀪𑀩𑁆𑀩𑀸’’𑀢𑀺 (𑀯𑀺𑀪. 𑁮𑁨𑁭; 𑀧𑀝𑀺. 𑀫. 𑁧.𑁧𑁧𑁫). 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 𑀧𑀳𑀸𑀬 𑀪𑀩𑁆𑀩𑀧𑀼𑀕𑁆𑀕𑀮𑁂𑀬𑁂𑀯 𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, ‘‘𑀏𑀢𑁆𑀢𑀓𑀸 𑀭𑀸𑀕𑀘𑀭𑀺𑀢𑀸 𑀏𑀢𑁆𑀢𑀓𑀸 𑀤𑁄𑀲-𑀫𑁄𑀳𑀘𑀭𑀺𑀢𑀸 𑀯𑀺𑀢𑀓𑁆𑀓-𑀲𑀤𑁆𑀥𑀸-𑀩𑀼𑀤𑁆𑀥𑀺𑀘𑀭𑀺𑀢𑀸’’𑀢𑀺 𑀙 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀏𑀯𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺.

𑀧𑀘𑁆𑀘𑀪𑀸𑀲𑀻𑀢𑀺 𑀧𑀢𑀺𑀅𑀪𑀸𑀲𑀺. 𑀅𑀧𑀸𑀭𑀼𑀢𑀸𑀢𑀺 𑀯𑀺𑀯𑀝𑀸. 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀳𑀺 𑀅𑀫𑀢𑀲𑀗𑁆𑀔𑀸𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀤𑁆𑀯𑀸𑀭𑀁, 𑀲𑁄 𑀫𑀬𑀸 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀦𑁆𑀢𑀺 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀲𑀤𑁆𑀥𑀁 𑀧𑀫𑀼𑀜𑁆𑀘𑀦𑁆𑀢𑀼 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀼. 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑁂 𑀅𑀬𑀫𑀢𑁆𑀣𑁄 𑁋 𑀅𑀳𑀜𑁆𑀳𑀺 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀲𑀼𑀧𑁆𑀧𑀯𑀢𑁆𑀢𑀺𑀢𑀫𑁆𑀧𑀺 𑀇𑀫𑀁 𑀧𑀡𑀻𑀢𑀁 𑀉𑀢𑁆𑀢𑀫𑀁 𑀥𑀫𑁆𑀫𑀁 𑀓𑀸𑀬𑀯𑀸𑀘𑀸𑀓𑀺𑀮𑀫𑀣𑀲𑀜𑁆𑀜𑀻 𑀳𑀼𑀢𑁆𑀯𑀸 𑀦 𑀪𑀸𑀲𑀺𑀁. 𑀇𑀤𑀸𑀦𑀺 𑀧𑀦 𑀲𑀩𑁆𑀩𑁄 𑀚𑀦𑁄 𑀲𑀤𑁆𑀥𑀸𑀪𑀸𑀚𑀦𑀁 𑀉𑀧𑀦𑁂𑀢𑀼, 𑀧𑀽𑀭𑁂𑀲𑁆𑀲𑀸𑀫𑀺 𑀢𑁂𑀲𑀁 𑀲𑀗𑁆𑀓𑀧𑁆𑀧𑀦𑁆𑀢𑀺.

𑀅𑀦𑁆𑀢𑀭𑀥𑀸𑀬𑀻𑀢𑀺 𑀲𑀢𑁆𑀣𑀸𑀭𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀅𑀦𑁆𑀢𑀭𑀳𑀺𑀢𑁄, 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄𑀢𑀺 𑀅𑀢𑁆𑀣𑁄. 𑀕𑀢𑁂 𑀘 𑀧𑀦 𑀢𑀲𑁆𑀫𑀺𑀁 𑀪𑀕𑀯𑀸 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺? 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀗𑁆𑀓𑀢𑀪𑀸𑀯𑀁, 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀜𑁆𑀘 𑀩𑀳𑀽𑀧𑀓𑀸𑀭𑀪𑀸𑀯𑀁 𑀜𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀓𑀸𑀫𑁄 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀻𑀢𑀺. 𑀧𑀞𑀫𑀁.

𑁨. 𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁩. 𑀤𑀼𑀢𑀺𑀬𑁂 𑀉𑀤𑀧𑀸𑀤𑀻𑀢𑀺 𑀅𑀬𑀁 𑀯𑀺𑀢𑀓𑁆𑀓𑁄 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀉𑀤𑀧𑀸𑀤𑀺. 𑀅𑀕𑀸𑀭𑀯𑁄𑀢𑀺 𑀅𑀜𑁆𑀜𑀲𑁆𑀫𑀺𑀁 𑀕𑀸𑀭𑀯𑀭𑀳𑀺𑀢𑁄, 𑀓𑀜𑁆𑀘𑀺 𑀕𑀭𑀼𑀝𑁆𑀞𑀸𑀦𑁂 𑀅𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀧𑀢𑀺𑀲𑁆𑀲𑀬𑀭𑀳𑀺𑀢𑁄, 𑀓𑀜𑁆𑀘𑀺 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀅𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀲𑀤𑁂𑀯𑀓𑁂𑀢𑀺𑀆𑀤𑀻𑀲𑀼 𑀲𑀤𑁆𑀥𑀺𑀁 𑀤𑁂𑀯𑁂𑀳𑀺 𑀲𑀤𑁂𑀯𑀓𑁂. 𑀤𑁂𑀯𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑀸𑀭𑀩𑁆𑀭𑀳𑁆𑀫𑁂𑀲𑀼 𑀕𑀳𑀺𑀢𑁂𑀲𑀼𑀧𑀺 𑀫𑀸𑀭𑁄 𑀦𑀸𑀫 𑀯𑀲𑀯𑀢𑁆𑀢𑀻 𑀲𑀩𑁆𑀩𑁂𑀲𑀁 𑀉𑀧𑀭𑀺 𑀯𑀲𑀁 𑀯𑀢𑁆𑀢𑁂𑀢𑀺, 𑀩𑁆𑀭𑀳𑁆𑀫𑀸 𑀦𑀸𑀫 𑀫𑀳𑀸𑀦𑀼𑀪𑀸𑀯𑁄 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀆𑀮𑁄𑀓𑀁 𑀨𑀭𑀢𑀺. 𑀤𑁆𑀯𑀻𑀳𑀺 𑀤𑁆𑀯𑀻𑀲𑀼…𑀧𑁂… 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀼𑀧𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀆𑀮𑁄𑀓𑀁 𑀨𑀭𑀢𑀺, 𑀲𑁄 𑀇𑀫𑀺𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑁄𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀢𑀽𑀢𑀺 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀁. 𑀢𑀣𑀸 𑀲𑀫𑀡𑀸 𑀦𑀸𑀫 𑀏𑀓𑀦𑀺𑀓𑀸𑀬𑀸𑀤𑀺𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀸 𑀲𑀻𑀮𑀯𑀦𑁆𑀢𑁄 𑀧𑀡𑁆𑀟𑀺𑀢𑀸, 𑀩𑁆𑀭𑀸𑀳𑁆𑀫𑀡𑀸𑀧𑀺 𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀺𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀸 𑀧𑀡𑁆𑀟𑀺𑀢𑀸, 𑀢𑁂 𑀇𑀫𑀺𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀸𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽𑀢𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸𑀢𑀺 𑀇𑀤𑀁 𑀧𑀦 𑀦𑀺𑀧𑁆𑀧𑀤𑁂𑀲𑀢𑁄 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑀺𑀘𑁂𑀢𑁆𑀣 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀮𑁄𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀧𑀚𑀸𑀯𑀲𑁂𑀦. 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀦𑁆𑀢𑀺 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀢𑀭𑀁, 𑀅𑀥𑀺𑀓𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑀻𑀮𑀸𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀓𑀣𑀺𑀢𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀮𑁄𑀓𑀺𑀬𑀫𑁂𑀯. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀳𑁂𑀢𑀁.

𑀧𑀸𑀢𑀼𑀭𑀳𑁄𑀲𑀻𑀢𑀺 𑁋 ‘‘𑀅𑀬𑀁 𑀲𑀢𑁆𑀣𑀸 𑀅𑀯𑀻𑀘𑀺𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀲𑀻𑀮𑀸𑀤𑀻𑀳𑀺 𑀅𑀢𑁆𑀢𑀦𑀸 𑀅𑀥𑀺𑀓𑀢𑀭𑀁 𑀅𑀧𑀲𑁆𑀲𑀦𑁆𑀢𑁄 ‘𑀫𑀬𑀸 𑀧𑀝𑀺𑀯𑀺𑀤𑁆𑀥𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑀺, 𑀓𑀸𑀭𑀡𑀁 𑀪𑀕𑀯𑀸 𑀘𑀺𑀦𑁆𑀢𑁂𑀢𑀺, 𑀅𑀢𑁆𑀣𑀁 𑀯𑀼𑀟𑁆𑀠𑀺𑀯𑀺𑀲𑁂𑀲𑀁 𑀘𑀺𑀦𑁆𑀢𑁂𑀢𑀺, 𑀕𑀘𑁆𑀙𑀸𑀫𑀺𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀭𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺, 𑀅𑀪𑀺𑀫𑀼𑀔𑁂 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄.

𑀯𑀺𑀳𑀭𑀦𑁆𑀢𑀺 𑀘𑀸𑀢𑀺 𑀏𑀢𑁆𑀣 𑀬𑁄 𑀯𑀤𑁂𑀬𑁆𑀬 ‘‘𑀯𑀺𑀳𑀭𑀦𑁆𑀢𑀻𑀢𑀺 𑀯𑀘𑀦𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀩𑀳𑀽 𑀩𑀼𑀤𑁆𑀥𑀸’’𑀢𑀺, 𑀲𑁄 ‘‘𑀪𑀕𑀯𑀸𑀧𑀺, 𑀪𑀦𑁆𑀢𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑁄.

‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫) 𑁋

𑀆𑀤𑀻𑀳𑀺 𑀘𑀲𑁆𑀲 𑀲𑀼𑀢𑁆𑀢𑁂𑀳𑀺 𑀅𑀜𑁆𑀜𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑁄 𑀤𑀻𑀧𑁂𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀸 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀢𑀲𑁆𑀫𑀸. 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸𑀢𑀺 𑀫𑀳𑀦𑁆𑀢𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁂𑀦. 𑀲𑀭𑀁 𑀩𑀼𑀤𑁆𑀥𑀸𑀦-𑀲𑀸𑀲𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀲𑀭𑀦𑁆𑀢𑁂𑀦. 𑀤𑀼𑀢𑀺𑀬𑀁.

𑁩. 𑀩𑁆𑀭𑀳𑁆𑀫𑀤𑁂𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁪. 𑀢𑀢𑀺𑀬𑁂 𑀏𑀓𑁄𑀢𑀺 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄, 𑀏𑀓𑀯𑀺𑀳𑀸𑀭𑀻𑀢𑀺 𑀅𑀢𑁆𑀣𑁄. 𑀯𑀽𑀧𑀓𑀝𑁆𑀞𑁄𑀢𑀺 𑀓𑀸𑀬𑁂𑀦 𑀯𑀽𑀧𑀓𑀝𑁆𑀞𑁄 𑀦𑀺𑀲𑁆𑀲𑀝𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂 𑀞𑀺𑀢𑁄. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀸𑀢𑀸𑀧𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀳𑀺𑀢𑀢𑁆𑀢𑁄𑀢𑀺 𑀧𑁂𑀲𑀺𑀢𑀢𑁆𑀢𑁄. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸. 𑀲𑀫𑁆𑀫𑀤𑁂𑀯𑀸𑀢𑀺 𑀦 𑀇𑀡𑀝𑁆𑀝𑀸 𑀦 𑀪𑀬𑀝𑁆𑀝𑀸 𑀦 𑀚𑀻𑀯𑀺𑀢𑀧𑀓𑀢𑀸 𑀳𑀼𑀢𑁆𑀯𑀸, 𑀬𑀣𑀸 𑀯𑀸 𑀢𑀣𑀸 𑀯𑀸 𑀧𑀩𑁆𑀩𑀚𑀺𑀢𑀸𑀧𑀺 𑀬𑁂 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑀺, 𑀢𑁂 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀦𑀸𑀫. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀺𑀬𑀨𑀮𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀲𑀸𑀫𑀁 𑀚𑀸𑀦𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀲𑀫𑁆𑀧𑀚𑁆𑀚𑀸𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀸𑀲𑀺. 𑀏𑀯𑀁 𑀯𑀺𑀳𑀭𑀦𑁆𑀢𑁄 𑀘 𑀔𑀻𑀡𑀸 𑀚𑀸𑀢𑀺…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀻𑀢𑀺. 𑀏𑀢𑁂𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺 𑀤𑀲𑁆𑀲𑀺𑀢𑀸.

𑀓𑀢𑀫𑀸 𑀧𑀦𑀲𑁆𑀲 𑀚𑀸𑀢𑀺 𑀔𑀻𑀡𑀸, 𑀓𑀣𑀜𑁆𑀘 𑀦𑀁 𑀅𑀩𑁆𑀪𑀜𑁆𑀜𑀸𑀲𑀻𑀢𑀺? 𑀯𑀼𑀘𑁆𑀘𑀢𑁂, 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸, 𑀦 𑀅𑀦𑀸𑀕𑀢𑀸 𑀢𑀢𑁆𑀣 𑀯𑀸𑀬𑀸𑀫𑀸𑀪𑀸𑀯𑀢𑁄, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀫𑀕𑁆𑀕𑀲𑁆𑀲 𑀧𑀦 𑀅𑀪𑀸𑀯𑀺𑀢𑀢𑁆𑀢𑀸 𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺. 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸. 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑁋 ‘‘𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻’’𑀢𑀺 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀢𑁆𑀣𑀁 𑀧𑀭𑀺𑀯𑀼𑀢𑁆𑀣𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀪𑀸𑀯𑀦𑀸𑀯𑀲𑁂𑀦 𑀲𑁄𑀴𑀲𑀯𑀺𑀥𑀫𑁆𑀧𑀺 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬, 𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬, 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀓𑀢𑀫𑀕𑁆𑀕𑀪𑀸𑀯𑀦𑀸 𑀦𑀢𑁆𑀣𑀻𑀢𑀺. 𑀅𑀣 𑀯𑀸 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀢𑁆𑀢𑀪𑀸𑀯𑀢𑁄, 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀦𑀢𑁆𑀣𑀺, 𑀇𑀫𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑁄 𑀭𑀼𑀓𑁆𑀔𑁄 𑀯𑀺𑀬𑀸𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄𑀢𑀺 𑀏𑀓𑁄. 𑀅𑀭𑀳𑀢𑀦𑁆𑀢𑀺 𑀅𑀭𑀳𑀦𑁆𑀢𑀸𑀦𑀁, 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀭𑀳𑀢𑀁 𑀅𑀩𑁆𑀪𑀦𑁆𑀢𑀭𑁄 𑀅𑀳𑁄𑀲𑀺.

𑀲𑀧𑀤𑀸𑀦𑀦𑁆𑀢𑀺 𑀲𑀧𑀤𑀸𑀦𑀘𑀸𑀭𑀁, 𑀲𑀫𑁆𑀧𑀢𑁆𑀢𑀖𑀭𑀁 𑀅𑀦𑀼𑀓𑁆𑀓𑀫𑁆𑀫 𑀧𑀝𑀺𑀧𑀸𑀝𑀺𑀬𑀸 𑀘𑀭𑀦𑁆𑀢𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀫𑀸𑀢𑀸 𑀧𑀦𑀲𑁆𑀲 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸𑀯 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀲𑀺.

𑀆𑀳𑀼𑀢𑀺𑀁 𑀦𑀺𑀘𑁆𑀘𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀦𑀺𑀘𑁆𑀘𑀓𑀸𑀮𑁂 𑀆𑀳𑀼𑀢𑀺𑀧𑀺𑀡𑁆𑀟𑀁 𑀧𑀕𑁆𑀕𑀡𑁆𑀳𑀸𑀢𑀺. 𑀢𑀁 𑀤𑀺𑀯𑀲𑀁 𑀧𑀦 𑀢𑀲𑁆𑀫𑀺𑀁 𑀖𑀭𑁂 𑀪𑀽𑀢𑀩𑀮𑀺𑀓𑀫𑁆𑀫𑀁 𑀳𑁄𑀢𑀺. 𑀲𑀩𑁆𑀩𑀕𑁂𑀳𑀁 𑀳𑀭𑀺𑀢𑀼𑀧𑀮𑀺𑀢𑁆𑀢𑀁 𑀯𑀺𑀧𑁆𑀧𑀓𑀺𑀡𑁆𑀡𑀮𑀸𑀚𑀁 𑀯𑀦𑀫𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑀁 𑀉𑀲𑁆𑀲𑀺𑀢𑀤𑁆𑀥𑀚𑀧𑀝𑀸𑀓𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀡𑁆𑀡𑀖𑀭𑁂 𑀞𑀧𑁂𑀢𑁆𑀯𑀸 𑀤𑀡𑁆𑀟𑀤𑀻𑀧𑀺𑀓𑀸 𑀚𑀸𑀮𑁂𑀢𑁆𑀯𑀸 𑀕𑀦𑁆𑀥𑀘𑀼𑀡𑁆𑀡𑀫𑀸𑀮𑀸𑀤𑀻𑀳𑀺 𑀅𑀮𑀗𑁆𑀓𑀢𑀁, 𑀲𑀫𑀦𑁆𑀢𑀢𑁄 𑀲𑀜𑁆𑀙𑀸𑀤𑀺𑀬𑀫𑀸𑀦𑀸 𑀥𑀽𑀫𑀓𑀝𑀘𑁆𑀙𑀼 𑀅𑀳𑁄𑀲𑀺. 𑀲𑀸𑀧𑀺 𑀩𑁆𑀭𑀸𑀳𑁆𑀫𑀡𑀻 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀢𑁆𑀢𑀪𑀸𑀯𑀁 𑀅𑀮𑀗𑁆𑀓𑀭𑀺. 𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀔𑀻𑀡𑀸𑀲𑀯𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, 𑀬𑀸𑀕𑀼𑀉𑀴𑀼𑀗𑁆𑀓𑀫𑀢𑁆𑀢𑀫𑁆𑀧𑀺 𑀅𑀤𑀢𑁆𑀯𑀸, ‘‘𑀫𑀳𑀸𑀩𑁆𑀭𑀳𑁆𑀫𑀁 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀬𑀁 𑀧𑀸𑀬𑀸𑀲𑀁 𑀧𑀽𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀦𑀺𑀯𑁂𑀲𑀦𑀲𑁆𑀲 𑀧𑀘𑁆𑀙𑀸𑀪𑀸𑀕𑁂 𑀳𑀭𑀺𑀢𑀼𑀧𑀮𑀺𑀢𑁆𑀢𑀪𑀸𑀯𑀸𑀤𑀻𑀳𑀺 𑀅𑀮𑀗𑁆𑀓𑀢𑀸 𑀪𑀽𑀢𑀧𑀻𑀞𑀺𑀓𑀸 𑀅𑀢𑁆𑀣𑀺. 𑀲𑀸 𑀢𑀁 𑀧𑀸𑀢𑀺𑀁 𑀆𑀤𑀸𑀬, 𑀢𑀢𑁆𑀣 𑀕𑀦𑁆𑀢𑁆𑀯𑀸, 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀫𑀚𑁆𑀛𑁂 𑀘 𑀏𑀓𑁂𑀓𑀁 𑀧𑀸𑀬𑀸𑀲𑀧𑀺𑀡𑁆𑀟𑀁 𑀞𑀧𑁂𑀢𑁆𑀯𑀸, 𑀏𑀓𑀁 𑀧𑀺𑀡𑁆𑀟𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸, 𑀬𑀸𑀯 𑀓𑀧𑁆𑀧𑀭𑀸 𑀲𑀧𑁆𑀧𑀺𑀦𑀸 𑀧𑀕𑁆𑀖𑀭𑀦𑁆𑀢𑁂𑀦 𑀧𑀣𑀯𑀺𑀬𑀁 𑀚𑀸𑀡𑀼𑀫𑀡𑁆𑀟𑀮𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀪𑀼𑀜𑁆𑀚𑀢𑀼 𑀪𑀯𑀁 𑀫𑀳𑀸𑀩𑁆𑀭𑀳𑁆𑀫𑀸, 𑀲𑀸𑀬𑀢𑀼 𑀪𑀯𑀁 𑀫𑀳𑀸𑀩𑁆𑀭𑀳𑁆𑀫𑀸, 𑀢𑀧𑁆𑀧𑁂𑀢𑀼 𑀪𑀯𑀁 𑀫𑀳𑀸𑀩𑁆𑀭𑀳𑁆𑀫𑀸’’𑀢𑀺 𑀯𑀤𑀫𑀸𑀦𑀸 𑀩𑁆𑀭𑀳𑁆𑀫𑀸𑀦𑀁 𑀪𑁄𑀚𑁂𑀢𑀺.

𑀏𑀢𑀤𑀳𑁄𑀲𑀻𑀢𑀺 𑀫𑀳𑀸𑀔𑀻𑀡𑀸𑀲𑀯𑀲𑁆𑀲 𑀲𑀻𑀮𑀕𑀦𑁆𑀥𑀁 𑀙𑀤𑁂𑀯𑀮𑁄𑀓𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀕𑀢𑀁 𑀖𑀸𑀬𑀫𑀸𑀦𑀲𑁆𑀲 𑀏𑀢𑀁 𑀅𑀳𑁄𑀲𑀺. 𑀲𑀁𑀯𑁂𑀚𑁂𑀬𑁆𑀬𑀦𑁆𑀢𑀺 𑀘𑁄𑀤𑁂𑀬𑁆𑀬𑀁, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀬𑁄𑀚𑁂𑀬𑁆𑀬𑀁. ‘𑀅𑀬𑀁 𑀳𑀺 𑀏𑀯𑀭𑀽𑀧𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀁 𑀫𑀳𑀸𑀔𑀻𑀡𑀸𑀲𑀯𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀉𑀴𑀼𑀗𑁆𑀓𑀫𑀢𑁆𑀢𑀫𑁆𑀧𑀺 𑀅𑀤𑀢𑁆𑀯𑀸, ‘‘𑀫𑀳𑀸𑀩𑁆𑀭𑀳𑁆𑀫𑀁 𑀪𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀢𑀼𑀮𑀁 𑀧𑀳𑀸𑀬 𑀳𑀢𑁆𑀣𑁂𑀦 𑀢𑀼𑀮𑀬𑀦𑁆𑀢𑀻 𑀯𑀺𑀬, 𑀪𑁂𑀭𑀺𑀁 𑀧𑀳𑀸𑀬 𑀓𑀼𑀘𑁆𑀙𑀺𑀁 𑀯𑀸𑀤𑁂𑀦𑁆𑀢𑀻 𑀯𑀺𑀬, 𑀅𑀕𑁆𑀕𑀺𑀁 𑀧𑀳𑀸𑀬 𑀔𑀚𑁆𑀚𑁄𑀧𑀦𑀓𑀁 𑀥𑀫𑀫𑀸𑀦𑀸 𑀯𑀺𑀬 𑀪𑀽𑀢𑀩𑀮𑀺𑀁 𑀓𑀼𑀭𑀼𑀫𑀸𑀦𑀸 𑀆𑀳𑀺𑀡𑁆𑀟𑀢𑀺. 𑀕𑀘𑁆𑀙𑀸𑀫𑀺𑀲𑁆𑀲𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀧𑀸𑀬𑀫𑀕𑁆𑀕𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀬𑀣𑀸 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀲𑀕𑁆𑀕𑀫𑀕𑁆𑀕𑀁 𑀆𑀭𑁄𑀳𑀢𑀺, 𑀢𑀣𑀸 𑀓𑀭𑁄𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀤𑀽𑀭𑁂 𑀇𑀢𑁄𑀢𑀺 𑀇𑀫𑀫𑁆𑀳𑀸 𑀞𑀸𑀦𑀸 𑀤𑀽𑀭𑁂 𑀩𑁆𑀭𑀳𑁆𑀫𑀮𑁄𑀓𑁄. 𑀢𑀢𑁄 𑀳𑀺 𑀓𑀽𑀝𑀸𑀕𑀸𑀭𑀫𑀢𑁆𑀢𑀸 𑀲𑀺𑀮𑀸 𑀧𑀸𑀢𑀺𑀢𑀸 𑀏𑀓𑁂𑀦 𑀅𑀳𑁄𑀭𑀢𑁆𑀢𑁂𑀦 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀔𑁂𑀧𑀬𑀫𑀸𑀦𑀸 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑁂𑀬𑁆𑀬, 𑀲𑀩𑁆𑀩𑀳𑁂𑀝𑁆𑀞𑀺𑀫𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁄 𑀏𑀯𑀁 𑀤𑀽𑀭𑁂. 𑀬𑀲𑁆𑀲𑀸𑀳𑀼𑀢𑀺𑀦𑁆𑀢𑀺 𑀬𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀆𑀳𑀼𑀢𑀺𑀁 𑀧𑀕𑁆𑀕𑀡𑁆𑀳𑀸𑀲𑀺, 𑀢𑀲𑁆𑀲 𑀩𑁆𑀭𑀳𑁆𑀫𑀮𑁄𑀓𑁄 𑀤𑀽𑀭𑁂𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀧𑀣𑀦𑁆𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀧𑀣𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀓𑀼𑀲𑀮𑀚𑁆𑀛𑀸𑀦𑀸𑀦𑀺, 𑀯𑀺𑀧𑀸𑀓𑀚𑁆𑀛𑀸𑀦𑀸𑀦𑀺 𑀧𑀦 𑀦𑁂𑀲𑀁 𑀚𑀻𑀯𑀺𑀢𑀧𑀣𑁄 𑀦𑀸𑀫, 𑀢𑀁 𑀩𑁆𑀭𑀳𑁆𑀫𑀧𑀣𑀁 𑀅𑀚𑀸𑀦𑀦𑁆𑀢𑀻 𑀢𑁆𑀯𑀁 𑀓𑀺𑀁 𑀚𑀧𑁆𑀧𑀲𑀺 𑀯𑀺𑀧𑁆𑀧𑀮𑀧𑀲𑀺? 𑀩𑁆𑀭𑀳𑁆𑀫𑀸𑀦𑁄 𑀳𑀺 𑀲𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑁂𑀦 𑀬𑀸𑀧𑁂𑀦𑁆𑀢𑀺, 𑀦 𑀏𑀢𑀁 𑀢𑀺𑀡𑀩𑀻𑀚𑀸𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀦𑁆𑀥𑀁 𑀕𑁄𑀬𑀽𑀲𑀁 𑀔𑀸𑀤𑀦𑁆𑀢𑀺, 𑀫𑀸 𑀅𑀓𑀸𑀭𑀡𑀸 𑀓𑀺𑀮𑀫𑀲𑀻𑀢𑀺.

𑀏𑀯𑀁 𑀯𑀢𑁆𑀯𑀸 𑀧𑀼𑀦 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀯𑀓𑀼𑀚𑁆𑀚𑁄 𑀳𑀼𑀢𑁆𑀯𑀸 𑀣𑁂𑀭𑀁 𑀉𑀧𑀤𑀺𑀲𑀦𑁆𑀢𑁄 𑀏𑀲𑁄 𑀳𑀺 𑀢𑁂 𑀩𑁆𑀭𑀸𑀳𑁆𑀫𑀡𑀺 𑀩𑁆𑀭𑀳𑁆𑀫𑀤𑁂𑀯𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀭𑀽𑀧𑀥𑀺𑀓𑁄𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀓𑀸𑀫𑀕𑀼𑀡𑁄𑀧𑀥𑀻𑀳𑀺 𑀯𑀺𑀭𑀳𑀺𑀢𑁄. 𑀅𑀢𑀺𑀤𑁂𑀯𑀧𑀢𑁆𑀢𑁄𑀢𑀺 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑀪𑀸𑀯𑀁 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀪𑀸𑀯𑀁 𑀧𑀢𑁆𑀢𑁄. 𑀅𑀦𑀜𑁆𑀜𑀧𑁄𑀲𑀻𑀢𑀺 𑀞𑀧𑁂𑀢𑁆𑀯𑀸 𑀇𑀫𑀁 𑀅𑀢𑁆𑀢𑀪𑀸𑀯𑀁 𑀅𑀜𑁆𑀜𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀯𑀸 𑀧𑀼𑀢𑁆𑀢𑀤𑀸𑀭𑀲𑁆𑀲 𑀯𑀸 𑀅𑀧𑁄𑀲𑀦𑀢𑀸𑀬 𑀅𑀦𑀜𑁆𑀜𑀧𑁄𑀲𑀻.

𑀆𑀳𑀼𑀦𑁂𑀬𑁆𑀬𑁄𑀢𑀺 𑀆𑀳𑀼𑀦𑀧𑀺𑀡𑁆𑀟𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑁄. 𑀯𑁂𑀤𑀕𑀽𑀢𑀺 𑀘𑀢𑀼𑀫𑀕𑁆𑀕𑀲𑀗𑁆𑀔𑀸𑀢𑁂𑀳𑀺 𑀯𑁂𑀤𑁂𑀳𑀺 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀕𑀢𑁄. 𑀪𑀸𑀯𑀺𑀢𑀢𑁆𑀢𑁄𑀢𑀺 𑀅𑀢𑁆𑀢𑀸𑀦𑀁 𑀪𑀸𑀯𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀞𑀺𑀢𑁄. 𑀅𑀦𑀽𑀧𑀮𑀺𑀢𑁆𑀢𑁄𑀢𑀺 𑀢𑀡𑁆𑀳𑀸𑀤𑀻𑀳𑀺 𑀮𑁂𑀧𑁂𑀳𑀺 𑀆𑀮𑀺𑀢𑁆𑀢𑁄. 𑀖𑀸𑀲𑁂𑀲𑀦𑀁 𑀇𑀭𑀺𑀬𑀢𑀻𑀢𑀺 𑀆𑀳𑀸𑀭𑀧𑀭𑀺𑀬𑁂𑀲𑀦𑀁 𑀘𑀭𑀢𑀺.

𑀦 𑀢𑀲𑁆𑀲 𑀧𑀘𑁆𑀙𑀸 𑀦 𑀧𑀼𑀭𑀢𑁆𑀣𑀫𑀢𑁆𑀣𑀻𑀢𑀺 𑀧𑀘𑁆𑀙𑀸 𑀯𑀼𑀘𑁆𑀘𑀢𑀺 𑀅𑀢𑀻𑀢𑀁, 𑀧𑀼𑀭𑀢𑁆𑀣𑀁 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀁, 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑀯𑀺𑀭𑀳𑀺𑀢𑀲𑁆𑀲 𑀧𑀘𑁆𑀙𑀸 𑀯𑀸 𑀧𑀼𑀭𑀢𑁆𑀣𑀁 𑀯𑀸 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀲𑀦𑁆𑀢𑁄𑀢𑀺𑀆𑀤𑀻𑀲𑀼 𑀭𑀸𑀕𑀸𑀤𑀺𑀲𑀦𑁆𑀢𑀢𑀸𑀬 𑀲𑀦𑁆𑀢𑁄. 𑀓𑁄𑀥𑀥𑀽𑀫𑀯𑀺𑀕𑀫𑀸 𑀯𑀺𑀥𑀽𑀫𑁄, 𑀤𑀼𑀓𑁆𑀔𑀸𑀪𑀸𑀯𑀸 𑀅𑀦𑀻𑀖𑁄, 𑀓𑀢𑁆𑀢𑀭𑀤𑀡𑁆𑀟𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁄𑀧𑀺 𑀯𑀥𑀓𑀘𑁂𑀢𑀦𑀸𑀬 𑀅𑀪𑀸𑀯𑀸 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁄. 𑀢𑀲𑀣𑀸𑀯𑀭𑁂𑀲𑀽𑀢𑀺 𑀏𑀢𑁆𑀣 𑀧𑀦 𑀧𑀼𑀣𑀼𑀚𑁆𑀚𑀦𑀸 𑀢𑀲𑀸 𑀦𑀸𑀫, 𑀔𑀻𑀡𑀸𑀲𑀯𑀸 𑀣𑀸𑀯𑀭𑀸 𑀦𑀸𑀫. 𑀲𑀢𑁆𑀢 𑀧𑀦 𑀲𑁂𑀔𑀸 𑀢𑀲𑀸𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀣𑀸𑀯𑀭𑀸 𑀦 𑀳𑁄𑀦𑁆𑀢𑀺, 𑀪𑀚𑀫𑀸𑀦𑀸 𑀧𑀦 𑀣𑀸𑀯𑀭𑀧𑀓𑁆𑀔𑀫𑁂𑀯 𑀪𑀚𑀦𑁆𑀢𑀺. 𑀲𑁄 𑀢𑁆𑀬𑀸𑀳𑀼𑀢𑀺𑀦𑁆𑀢𑀺 𑀲𑁄 𑀢𑁂 𑀆𑀳𑀼𑀢𑀺𑀁.

𑀯𑀺𑀲𑁂𑀦𑀺𑀪𑀽𑀢𑁄𑀢𑀺 𑀓𑀺𑀮𑁂𑀲𑀲𑁂𑀦𑀸𑀬 𑀯𑀺𑀲𑁂𑀦𑁄 𑀚𑀸𑀢𑁄. 𑀅𑀦𑁂𑀚𑁄𑀢𑀺 𑀦𑀺𑀢𑁆𑀢𑀡𑁆𑀳𑁄. 𑀲𑀼𑀲𑀻𑀮𑁄𑀢𑀺 𑀔𑀻𑀡𑀸𑀲𑀯𑀲𑀻𑀮𑁂𑀦 𑀲𑀼𑀲𑀻𑀮𑁄. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄. 𑀑𑀖𑀢𑀺𑀡𑁆𑀡𑀦𑁆𑀢𑀺 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀺𑀡𑁆𑀡𑀁. 𑀏𑀢𑁆𑀢𑀓𑁂𑀦 𑀓𑀣𑀸𑀫𑀕𑁆𑀕𑁂𑀦 𑀩𑁆𑀭𑀳𑁆𑀫𑀸 𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀆𑀬𑀢𑀦𑁂 𑀩𑁆𑀭𑀸𑀳𑁆𑀫𑀡𑀺𑀁 𑀦𑀺𑀬𑁄𑀚𑁂𑀲𑀺. 𑀅𑀯𑀲𑀸𑀦𑀕𑀸𑀣𑀸 𑀧𑀦 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸. 𑀧𑀢𑀺𑀝𑁆𑀞𑀧𑁂𑀲𑀺 𑀤𑀓𑁆𑀔𑀺𑀡𑀦𑁆𑀢𑀺 𑀘𑀢𑀼𑀧𑀘𑁆𑀘𑀬𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀲𑀼𑀔𑀫𑀸𑀬𑀢𑀺𑀓𑀦𑁆𑀢𑀺 𑀲𑀼𑀔𑀸𑀬𑀢𑀺𑀓𑀁 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑀁, 𑀲𑀼𑀔𑀸𑀯𑀳𑀦𑁆𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀁.

𑁪. 𑀩𑀓𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁫. 𑀘𑀢𑀼𑀢𑁆𑀣𑁂 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀮𑀸𑀫𑀺𑀓𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀇𑀤𑀁 𑀦𑀺𑀘𑁆𑀘𑀦𑁆𑀢𑀺 𑀇𑀤𑀁 𑀲𑀳 𑀓𑀸𑀬𑁂𑀦 𑀩𑁆𑀭𑀳𑁆𑀫𑀝𑁆𑀞𑀸𑀦𑀁 𑀅𑀦𑀺𑀘𑁆𑀘𑀁 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀤𑀢𑀺. 𑀥𑀼𑀯𑀸𑀤𑀻𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀢𑀢𑁆𑀣 𑀥𑀼𑀯𑀦𑁆𑀢𑀺 𑀣𑀺𑀭𑀁. 𑀲𑀲𑁆𑀲𑀢𑀦𑁆𑀢𑀺 𑀲𑀤𑀸 𑀯𑀺𑀚𑁆𑀚𑀫𑀸𑀦𑀁. 𑀓𑁂𑀯𑀮𑀦𑁆𑀢𑀺 𑀅𑀔𑀡𑁆𑀟𑀁 𑀲𑀓𑀮𑀁. 𑀅𑀘𑀯𑀦𑀥𑀫𑁆𑀫𑀦𑁆𑀢𑀺 𑀅𑀘𑀯𑀦𑀲𑀪𑀸𑀯𑀁. 𑀇𑀤𑀁 𑀳𑀺 𑀦 𑀚𑀸𑀬𑀢𑀻𑀢𑀺𑀆𑀤𑀻𑀲𑀼 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑁄𑀘𑀺 𑀚𑀸𑀬𑀦𑀓𑁄 𑀯𑀸 𑀚𑀻𑀬𑀦𑀓𑁄 𑀯𑀸 𑀫𑀻𑀬𑀦𑀓𑁄 𑀯𑀸 𑀘𑀯𑀦𑀓𑁄 𑀯𑀸 𑀉𑀧𑀧𑀚𑁆𑀚𑀦𑀓𑁄 𑀯𑀸 𑀦𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀢𑁄 𑀘 𑀧𑀦𑀜𑁆𑀜𑀦𑁆𑀢𑀺 𑀇𑀢𑁄 𑀲𑀳𑀓𑀸𑀬𑀸 𑀩𑁆𑀭𑀳𑁆𑀫𑀝𑁆𑀞𑀸𑀦𑀸 𑀉𑀢𑁆𑀢𑀭𑀺 𑀅𑀜𑁆𑀜𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀏𑀯𑀫𑀲𑁆𑀲 𑀣𑀸𑀫𑀕𑀢𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀏𑀯𑀁𑀯𑀸𑀤𑀻 𑀘 𑀧𑀦 𑀲𑁄 𑀉𑀧𑀭𑀺 𑀢𑀺𑀲𑁆𑀲𑁄 𑀛𑀸𑀦𑀪𑀽𑀫𑀺𑀬𑁄 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀩𑁆𑀩𑀁 𑀧𑀝𑀺𑀩𑀸𑀳𑀢𑀺. 𑀓𑀤𑀸 𑀧𑀦𑀲𑁆𑀲 𑀲𑀸 𑀤𑀺𑀝𑁆𑀞𑀺 𑀉𑀧𑁆𑀧𑀦𑁆𑀦𑀸𑀢𑀺? 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑁂. 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀦𑁆𑀢𑀺 𑀏𑀓𑁂.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀳𑁂𑀝𑁆𑀞𑀼𑀧𑀧𑀢𑁆𑀢𑀺𑀓𑁄 𑀓𑀺𑀭𑁂𑀲 𑀩𑁆𑀭𑀳𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑀁 𑀯𑁂𑀳𑀧𑁆𑀨𑀮𑀩𑁆𑀭𑀳𑁆𑀫𑀮𑁄𑀓𑁂 𑀧𑀜𑁆𑀘𑀓𑀧𑁆𑀧𑀲𑀢𑀺𑀓𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀳𑁂𑀝𑁆𑀞𑀼𑀧𑀧𑀢𑁆𑀢𑀺𑀓𑀁 𑀓𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑀁 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑁂 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀤𑀼𑀢𑀺𑀬𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀆𑀪𑀲𑁆𑀲𑀭𑁂 𑀅𑀝𑁆𑀞 𑀓𑀧𑁆𑀧𑁂 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸, 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀓𑀧𑁆𑀧𑀸𑀬𑀼𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀧𑀞𑀫𑀓𑀸𑀮𑁂 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀜𑁆𑀘 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀜𑁆𑀘 𑀅𑀜𑁆𑀜𑀸𑀲𑀺, 𑀓𑀸𑀮𑁂 𑀧𑀦 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀉𑀪𑀬𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀲𑀺.

𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀕𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀦𑁆𑀥𑀻𑀪𑀽𑀢𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫. 𑀯𑀓𑁆𑀔𑀢𑀻𑀢𑀺 𑀪𑀡𑀢𑀺. ‘‘𑀬𑀢𑁆𑀭𑀸’’𑀢𑀺 𑀦𑀺𑀧𑀸𑀢𑀬𑁄𑀕𑁂𑀦 𑀧𑀦 𑀅𑀦𑀸𑀕𑀢𑀯𑀘𑀦𑀁 𑀓𑀢𑀁.

𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀩𑁆𑀭𑀳𑁆𑀫𑀸 𑀬𑀣𑀸 𑀦𑀸𑀫 𑀫𑀕𑁆𑀕𑀘𑁄𑀭𑁄 𑀤𑁆𑀯𑁂 𑀢𑀬𑁄 𑀧𑀳𑀸𑀭𑁂 𑀅𑀥𑀺𑀯𑀸𑀲𑁂𑀦𑁆𑀢𑁄 𑀲𑀳𑀸𑀬𑁂 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀧𑀺 𑀉𑀢𑁆𑀢𑀭𑀺𑀁 𑀧𑀳𑀸𑀭𑀁 𑀧𑀳𑀭𑀺𑀬𑀫𑀸𑀦𑁄 ‘‘𑀅𑀲𑀼𑀓𑁄 𑀘 𑀅𑀲𑀼𑀓𑁄 𑀘 𑀫𑀬𑁆𑀳𑀁 𑀲𑀳𑀸𑀬𑁄’’𑀢𑀺 𑀆𑀘𑀺𑀓𑁆𑀔𑀢𑀺, 𑀏𑀯𑀫𑁂𑀯 𑀪𑀕𑀯𑀢𑀸 𑀲𑀦𑁆𑀢𑀚𑁆𑀚𑀺𑀬𑀫𑀸𑀦𑁄 𑀲𑀢𑀺𑀁 𑀮𑀪𑀺𑀢𑁆𑀯𑀸, ‘‘𑀪𑀕𑀯𑀸 𑀫𑀬𑁆𑀳𑀁 𑀧𑀤𑀸𑀦𑀼𑀧𑀤𑀁 𑀧𑁂𑀓𑁆𑀔𑀦𑁆𑀢𑁄 𑀫𑀁 𑀦𑀺𑀧𑁆𑀧𑀻𑀴𑀺𑀢𑀼𑀓𑀸𑀫𑁄’’𑀢𑀺 𑀪𑀻𑀢𑁄 𑀅𑀢𑁆𑀢𑀦𑁄 𑀲𑀳𑀸𑀬𑁂 𑀆𑀘𑀺𑀓𑁆𑀔𑀦𑁆𑀢𑁄 𑀤𑁆𑀯𑀸𑀲𑀢𑁆𑀢𑀢𑀻𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀪𑁄 𑀕𑁄𑀢𑀫, 𑀫𑀬𑀁 𑀤𑁆𑀯𑀸𑀲𑀢𑁆𑀢𑀢𑀺 𑀚𑀦𑀸 𑀧𑀼𑀜𑁆𑀜𑀓𑀫𑁆𑀫𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀸. 𑀯𑀲𑀯𑀢𑁆𑀢𑀺𑀦𑁄 𑀲𑀬𑀁 𑀅𑀜𑁆𑀜𑁂𑀲𑀁 𑀯𑀲𑁂 𑀅𑀯𑀢𑁆𑀢𑀺𑀢𑁆𑀯𑀸 𑀧𑀭𑁂 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀫, 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀅𑀢𑀻𑀢𑀸, 𑀅𑀬𑀁 𑀦𑁄 𑀯𑁂𑀤𑁂𑀳𑀺 𑀕𑀢𑀢𑁆𑀢𑀸 ‘‘𑀯𑁂𑀤𑀕𑀽’’𑀢𑀺 𑀲𑀗𑁆𑀔𑀁 𑀕𑀢𑀸 𑀪𑀕𑀯𑀸 𑀅𑀦𑁆𑀢𑀺𑀫𑀸 𑀩𑁆𑀭𑀳𑁆𑀫𑀼𑀧𑀧𑀢𑁆𑀢𑀺. 𑀅𑀲𑁆𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀚𑀦𑀸 𑀅𑀦𑁂𑀓𑀸𑀢𑀺 𑀅𑀦𑁂𑀓𑀚𑀦𑀸 𑀅𑀫𑁆𑀳𑁂 𑀅𑀪𑀺𑀚𑀧𑁆𑀧𑀦𑁆𑀢𑀺. ‘‘𑀅𑀬𑀁 𑀔𑁄 𑀪𑀯𑀁 𑀩𑁆𑀭𑀳𑁆𑀫𑀸, 𑀫𑀳𑀸𑀩𑁆𑀭𑀳𑁆𑀫𑀸, 𑀅𑀪𑀺𑀪𑀽, 𑀅𑀦𑀪𑀺𑀪𑀽𑀢𑁄, 𑀅𑀜𑁆𑀜𑀤𑀢𑁆𑀣𑀼𑀤𑀲𑁄, 𑀯𑀲𑀯𑀢𑁆𑀢𑀻, 𑀇𑀲𑁆𑀲𑀭𑁄, 𑀓𑀢𑁆𑀢𑀸, 𑀦𑀺𑀫𑁆𑀫𑀸𑀢𑀸, 𑀲𑁂𑀝𑁆𑀞𑁄, 𑀲𑀚𑀺𑀢𑀸, 𑀯𑀲𑀻, 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’’𑀦𑁆𑀢𑀺 𑀏𑀯𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑁂𑀦𑁆𑀢𑀻𑀢𑀺.

𑀅𑀣 𑀦𑀁 𑀪𑀕𑀯𑀸 𑀅𑀧𑁆𑀧𑀁 𑀳𑀺 𑀏𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑀦𑁆𑀢𑀺 𑀬𑀁 𑀢𑁆𑀯𑀁 𑀇𑀥 𑀢𑀯 𑀆𑀬𑀼𑀁 ‘‘𑀤𑀻𑀖’’𑀦𑁆𑀢𑀺 𑀫𑀜𑁆𑀜𑀲𑀺, 𑀏𑀢𑀁 𑀅𑀧𑁆𑀧𑀁 𑀧𑀭𑀺𑀢𑁆𑀢𑀓𑀁. 𑀲𑀢𑀁 𑀲𑀳𑀲𑁆𑀲𑀸𑀦𑀁 𑀦𑀺𑀭𑀩𑁆𑀩𑀼𑀤𑀸𑀦𑀦𑁆𑀢𑀺 𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬 𑀲𑀢𑀲𑀳𑀲𑁆𑀲𑀦𑀺𑀭𑀩𑁆𑀩𑀼𑀤𑀸𑀦𑀁. 𑀆𑀬𑀼𑀁 𑀧𑀚𑀸𑀦𑀸𑀫𑀻𑀢𑀺, ‘‘𑀇𑀤𑀸𑀦𑀺 𑀢𑀯 𑀅𑀯𑀲𑀺𑀝𑁆𑀞𑀁 𑀏𑀢𑁆𑀢𑀓𑀁 𑀆𑀬𑀽’’𑀢𑀺 𑀅𑀳𑀁 𑀚𑀸𑀦𑀸𑀫𑀺. 𑀅𑀦𑀦𑁆𑀢𑀤𑀲𑁆𑀲𑀻 𑀪𑀕𑀯𑀸 𑀳𑀫𑀲𑁆𑀫𑀻𑀢𑀺, 𑀪𑀕𑀯𑀸, 𑀢𑀼𑀫𑁆𑀳𑁂 ‘‘𑀅𑀳𑀁 𑀅𑀦𑀦𑁆𑀢𑀤𑀲𑁆𑀲𑀻 𑀚𑀸𑀢𑀺𑀆𑀤𑀻𑀦𑀺 𑀉𑀧𑀸𑀢𑀺𑀯𑀢𑁆𑀢𑁄’’𑀢𑀺 𑀯𑀤𑀣. 𑀓𑀺𑀁 𑀫𑁂 𑀧𑀼𑀭𑀸𑀡𑀦𑁆𑀢𑀺, 𑀬𑀤𑀺 𑀢𑁆𑀯𑀁 𑀅𑀦𑀦𑁆𑀢𑀤𑀲𑁆𑀲𑀻, 𑀏𑀯𑀁 𑀲𑀦𑁆𑀢𑁂 𑀇𑀤𑀁 𑀫𑁂 𑀆𑀘𑀺𑀓𑁆𑀔, 𑀓𑀺𑀁 𑀫𑀬𑁆𑀳𑀁 𑀧𑀼𑀭𑀸𑀡𑀁? 𑀯𑀢𑀲𑀻𑀮𑀯𑀢𑁆𑀢𑀦𑁆𑀢𑀺 𑀲𑀻𑀮𑀫𑁂𑀯 𑀯𑀼𑀘𑁆𑀘𑀢𑀺. 𑀬𑀫𑀳𑀁 𑀯𑀺𑀚𑀜𑁆𑀜𑀸𑀢𑀺 𑀬𑀁 𑀅𑀳𑀁 𑀢𑀬𑀸 𑀓𑀣𑀺𑀢𑀁 𑀚𑀸𑀦𑁂𑀬𑁆𑀬𑀁, 𑀢𑀁 𑀫𑁂 𑀆𑀘𑀺𑀓𑁆𑀔𑀸𑀢𑀺 𑀯𑀤𑀢𑀺.

𑀇𑀤𑀸𑀦𑀺𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁄 𑀪𑀕𑀯𑀸 𑀬𑀁 𑀢𑁆𑀯𑀁 𑀅𑀧𑀸𑀬𑁂𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀧𑀼𑀩𑁆𑀩𑁂 𑀓𑀺𑀭𑁂𑀲 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑁋 ‘‘𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑁆𑀫 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀮𑀸𑀪𑀻 𑀳𑀼𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀛𑀸𑀦𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀤𑀸 𑀘 𑀓𑀸𑀮𑁂𑀦𑀓𑀸𑀮𑀁 𑀲𑀢𑁆𑀣𑀯𑀸𑀳𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀫𑀭𑀼𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀫𑀭𑀼𑀓𑀦𑁆𑀢𑀸𑀭𑁂 𑀧𑀦 𑀤𑀺𑀯𑀸 𑀦 𑀲𑀓𑁆𑀓𑀸 𑀕𑀦𑁆𑀢𑀼𑀁, 𑀭𑀢𑁆𑀢𑀺𑀁 𑀕𑀫𑀦𑀁 𑀳𑁄𑀢𑀺. 𑀅𑀣 𑀧𑀼𑀭𑀺𑀫𑀲𑀓𑀝𑀲𑁆𑀲 𑀅𑀕𑁆𑀕𑀬𑀼𑀕𑁂 𑀬𑀼𑀢𑁆𑀢𑀩𑀮𑀺𑀩𑀤𑁆𑀤𑀸 𑀕𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀸𑀪𑀺𑀫𑀼𑀔𑀸 𑀅𑀳𑁂𑀲𑀼𑀁, 𑀲𑀩𑁆𑀩𑀲𑀓𑀝𑀸𑀦𑀺 𑀢𑀣𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀦𑀺𑀯𑀢𑁆𑀢𑀺𑀢𑀪𑀸𑀯𑀁 𑀚𑀸𑀦𑀺𑀁𑀲𑀼. 𑀢𑁂𑀲𑀜𑁆𑀘 𑀢𑀤𑀸 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀦𑀤𑀺𑀯𑀲𑁄 𑀅𑀳𑁄𑀲𑀺. 𑀲𑀩𑁆𑀩𑀁 𑀤𑀸𑀭𑀼𑀤𑀓𑀁 𑀧𑀭𑀺𑀓𑁆𑀔𑀻𑀡𑀁 𑁋 𑀢𑀲𑁆𑀫𑀸 ‘‘𑀦𑀢𑁆𑀣𑀺 𑀤𑀸𑀦𑀺 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀕𑁄𑀡𑁂 𑀘𑀓𑁆𑀓𑁂𑀲𑀼 𑀩𑀦𑁆𑀥𑀺𑀢𑁆𑀯𑀸, 𑀫𑀦𑀼𑀲𑁆𑀲𑀸 𑀲𑀓𑀝𑀘𑁆𑀙𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼.

𑀢𑀸𑀧𑀲𑁄𑀧𑀺 𑀓𑀸𑀮𑀲𑁆𑀲𑁂𑀯 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀕𑀗𑁆𑀕𑀁 𑀑𑀮𑁄𑀓𑀬𑀫𑀸𑀦𑁄 𑀅𑀤𑁆𑀤𑀲 𑀕𑀗𑁆𑀕𑀁 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀧𑀽𑀭𑀺𑀬𑀫𑀸𑀦𑀁 𑀧𑀯𑀢𑁆𑀢𑀺𑀢𑀫𑀡𑀺𑀓𑁆𑀔𑀦𑁆𑀥𑀁 𑀯𑀺𑀬 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀏𑀯𑀭𑀽𑀧𑀲𑁆𑀲 𑀫𑀥𑀼𑀭𑁄𑀤𑀓𑀲𑁆𑀲 𑀅𑀮𑀸𑀪𑁂𑀦 𑀓𑀺𑀮𑀺𑀲𑁆𑀲𑀫𑀸𑀦𑀸 𑀲𑀢𑁆𑀢𑀸’’𑀢𑀺? 𑀲𑁄 𑀏𑀯𑀁 𑀆𑀯𑀚𑁆𑀚𑁂𑀦𑁆𑀢𑁄 𑀫𑀭𑀼𑀓𑀦𑁆𑀢𑀸𑀭𑁂 𑀢𑀁 𑀲𑀢𑁆𑀣𑀁 𑀤𑀺𑀲𑁆𑀯𑀸 ‘𑀇𑀫𑁂 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’𑀢𑀺 ‘‘𑀇𑀢𑁄 𑀘𑀺𑀢𑁄 𑀘 𑀫𑀳𑀸𑀉𑀤𑀓𑀓𑁆𑀔𑀦𑁆𑀥𑁄 𑀙𑀺𑀚𑁆𑀚𑀺𑀢𑁆𑀯𑀸 𑀫𑀭𑀼𑀓𑀦𑁆𑀢𑀸𑀭𑁂 𑀲𑀢𑁆𑀣𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀽’’𑀢𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀲𑀺. 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀫𑀸𑀢𑀺𑀓𑀸𑀭𑀼𑀴𑁆𑀳𑀁 𑀯𑀺𑀬 𑀉𑀤𑀓𑀁 𑀢𑀢𑁆𑀣 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀉𑀤𑀓𑀲𑀤𑁆𑀤𑁂𑀦 𑀯𑀼𑀝𑁆𑀞𑀸𑀬 𑀉𑀤𑀓𑀁 𑀤𑀺𑀲𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀕𑁄𑀡𑁂𑀧𑀺 𑀧𑀸𑀬𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑀁 𑀩𑁆𑀭𑀳𑁆𑀫𑀼𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀧𑀸𑀬𑁂𑀲𑀻𑀢𑀺 𑀧𑀸𑀬𑁂𑀲𑀺. 𑀅-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀕𑀫𑁆𑀫𑀦𑀻𑀢𑀺 𑀕𑀺𑀫𑁆𑀳𑁂. 𑀲𑀫𑁆𑀧𑀭𑁂𑀢𑁂𑀢𑀺 𑀕𑀺𑀫𑁆𑀳𑀸𑀢𑀧𑁂𑀦 𑀨𑀼𑀝𑁆𑀞𑁂 𑀅𑀦𑀼𑀕𑀢𑁂.

𑀅𑀧𑀭𑀲𑁆𑀫𑀺𑀫𑁆𑀧𑀺 𑀲𑀫𑀬𑁂 𑀢𑀸𑀧𑀲𑁄 𑀕𑀗𑁆𑀕𑀸𑀢𑀻𑀭𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀕𑀸𑀫𑀓𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀘𑁄𑀭𑀸 𑀢𑀁 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀕𑀸𑀯𑀺𑀬𑁄 𑀘 𑀓𑀭𑀫𑀭𑁂 𑀘 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀕𑀸𑀯𑁄𑀧𑀺 𑀲𑀼𑀦𑀔𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀦𑁆𑀢𑀺. 𑀢𑀸𑀧𑀲𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀦𑁆𑀦𑀼 𑀔𑁄 𑀏𑀢’’𑀦𑁆𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀜𑀢𑁆𑀯𑀸 ‘‘𑀫𑀬𑀺 𑀧𑀲𑁆𑀲𑀦𑁆𑀢𑁂 𑀇𑀫𑁂 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀘𑁄𑀭𑀸𑀦𑀁 𑀧𑀝𑀺𑀧𑀣𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀫𑀸𑀧𑁂𑀲𑀺. 𑀓𑀫𑁆𑀫𑀲𑀚𑁆𑀚𑀸 𑀆𑀕𑀘𑁆𑀙𑀦𑁆𑀢𑀸 𑀘𑁄𑀭𑀸 𑀤𑀺𑀲𑁆𑀯𑀸, ‘‘𑀭𑀸𑀚𑀸 𑀫𑀜𑁆𑀜𑁂 𑀆𑀕𑀢𑁄’’𑀢𑀺 𑀯𑀺𑀮𑁄𑀧𑀁 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑀸𑀧𑀲𑁄 ‘‘𑀬𑀁 𑀬𑀲𑁆𑀲 𑀲𑀦𑁆𑀢𑀓𑀁, 𑀢𑀁 𑀢𑀲𑁆𑀲𑁂𑀯 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀢𑀁 𑀢𑀣𑁂𑀯 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀲𑁄𑀢𑁆𑀣𑀺𑀪𑀸𑀯𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀇𑀤𑀫𑁆𑀧𑀺 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀏𑀡𑀺𑀓𑀽𑀮𑀲𑁆𑀫𑀺𑀦𑁆𑀢𑀺 𑀕𑀗𑁆𑀕𑀸𑀢𑀻𑀭𑁂. 𑀕𑀬𑁆𑀳𑀓𑀁 𑀦𑀻𑀬𑀫𑀸𑀦𑀦𑁆𑀢𑀺 𑀕𑀳𑁂𑀢𑁆𑀯𑀸 𑀦𑀻𑀬𑀫𑀸𑀦𑀁, 𑀓𑀭𑀫𑀭𑀁 𑀦𑀻𑀬𑀫𑀸𑀦𑀦𑁆𑀢𑀺𑀧𑀺 𑀅𑀢𑁆𑀣𑁄.

𑀧𑀼𑀦 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀉𑀧𑀭𑀺𑀕𑀗𑁆𑀕𑀸𑀯𑀸𑀲𑀺𑀓𑀁 𑀏𑀓𑀁 𑀓𑀼𑀮𑀁 𑀳𑁂𑀝𑁆𑀞𑀸𑀕𑀗𑁆𑀕𑀸𑀯𑀸𑀲𑀺𑀓𑁂𑀦 𑀓𑀼𑀮𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀢𑁆𑀯𑀸, 𑀦𑀸𑀯𑀸𑀲𑀗𑁆𑀖𑀸𑀝𑀁 𑀩𑀦𑁆𑀥𑀺𑀢𑁆𑀯𑀸, 𑀩𑀳𑀼𑀁 𑀔𑀸𑀤𑀦𑀻𑀬𑀜𑁆𑀘𑁂𑀯 𑀪𑁄𑀚𑀦𑀻𑀬𑀜𑁆𑀘 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀘 𑀆𑀭𑁄𑀧𑁂𑀢𑁆𑀯𑀸 𑀕𑀗𑁆𑀕𑀸𑀲𑁄𑀢𑁂𑀦 𑀆𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀔𑀸𑀤𑀫𑀸𑀦𑀸 𑀪𑀼𑀜𑁆𑀚𑀫𑀸𑀦𑀸 𑀦𑀘𑁆𑀘𑀦𑁆𑀢𑀸 𑀕𑀸𑀬𑀦𑁆𑀢𑀸 𑀤𑁂𑀯𑀯𑀺𑀫𑀸𑀦𑁂𑀦 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀩𑀮𑀯𑀲𑁄𑀫𑀦𑀲𑁆𑀲𑀸 𑀅𑀳𑁂𑀲𑀼𑀁. 𑀕𑀗𑁆𑀕𑁂𑀬𑁆𑀬𑀓𑁄 𑀦𑀸𑀕𑁄 𑀤𑀺𑀲𑁆𑀯𑀸 𑀓𑀼𑀧𑀺𑀢𑁄 ‘‘𑀇𑀫𑁂 𑀫𑀬𑀺 𑀲𑀜𑁆𑀜𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺. 𑀇𑀤𑀸𑀦𑀺 𑀦𑁂 𑀲𑀫𑀼𑀤𑁆𑀤𑀫𑁂𑀯 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀉𑀤𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀨𑀡𑀁 𑀓𑀢𑁆𑀯𑀸, 𑀲𑀼𑀲𑀼𑀓𑀸𑀭𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 𑀪𑀻𑀢𑁄 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀢𑀸𑀧𑀲𑁄 𑀧𑀡𑁆𑀡𑀲𑀸𑀮𑀸𑀬𑀁 𑀦𑀺𑀲𑀺𑀦𑁆𑀦𑁄 𑀲𑀼𑀢𑁆𑀯𑀸, ‘‘𑀇𑀫𑁂 𑀕𑀸𑀬𑀦𑁆𑀢𑀸 𑀦𑀘𑁆𑀘𑀦𑁆𑀢𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀆𑀕𑀘𑁆𑀙𑀦𑁆𑀢𑀺. 𑀇𑀤𑀸𑀦𑀺 𑀧𑀦 𑀪𑀬𑀭𑀯𑀁 𑀭𑀯𑀺𑀁𑀲𑀼, 𑀓𑀺𑀦𑁆𑀦𑀼 𑀔𑁄’’𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄 𑀦𑀸𑀕𑀭𑀸𑀚𑀁 𑀤𑀺𑀲𑁆𑀯𑀸, ‘‘𑀫𑀬𑀺 𑀧𑀲𑁆𑀲𑀦𑁆𑀢𑁂 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀧𑀚𑀳𑀺𑀢𑁆𑀯𑀸 𑀲𑀼𑀧𑀡𑁆𑀡𑀯𑀡𑁆𑀡𑀁 𑀫𑀸𑀧𑁂𑀢𑁆𑀯𑀸 𑀦𑀸𑀕𑀭𑀸𑀚𑀲𑁆𑀲 𑀤𑀲𑁆𑀲𑁂𑀲𑀺. 𑀦𑀸𑀕𑀭𑀸𑀚𑀸 𑀪𑀻𑀢𑁄 𑀨𑀡𑀁 𑀲𑀁𑀳𑀭𑀺𑀢𑁆𑀯𑀸 𑀉𑀤𑀓𑀁 𑀧𑀯𑀺𑀝𑁆𑀞𑁄, 𑀫𑀳𑀸𑀚𑀦𑁄 𑀲𑁄𑀢𑁆𑀣𑀺𑀪𑀸𑀯𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀇𑀤𑀫𑁆𑀧𑀺 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀮𑀼𑀤𑁆𑀤𑁂𑀦𑀸𑀢𑀺 𑀤𑀸𑀭𑀼𑀡𑁂𑀦. 𑀫𑀦𑀼𑀲𑁆𑀲𑀓𑀫𑁆𑀬𑀸𑀢𑀺 𑀫𑀦𑀼𑀲𑁆𑀲𑀓𑀸𑀫𑀢𑀸𑀬, 𑀫𑀦𑀼𑀲𑁆𑀲𑁂 𑀯𑀺𑀳𑁂𑀞𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀅𑀢𑁆𑀣𑁄.

𑀅𑀧𑀭𑀲𑁆𑀫𑀺𑀫𑁆𑀧𑀺 𑀲𑀫𑀬𑁂 𑀏𑀲 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑁂𑀲𑀯𑁄 𑀦𑀸𑀫 𑀢𑀸𑀧𑀲𑁄 𑀅𑀳𑁄𑀲𑀺. 𑀢𑁂𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀓𑀧𑁆𑀧𑁄 𑀦𑀸𑀫 𑀫𑀸𑀡𑀯𑁄 𑀓𑁂𑀲𑀯𑀲𑁆𑀲 𑀩𑀤𑁆𑀥𑀘𑀭𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀅𑀢𑁆𑀣𑀘𑀭𑁄 𑀅𑀳𑁄𑀲𑀺. 𑀓𑁂𑀲𑀯𑁄 𑀢𑁂𑀦 𑀯𑀺𑀦𑀸 𑀯𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀁 𑀦𑀺𑀲𑁆𑀲𑀸𑀬𑁂𑀯 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑀢𑁆𑀣𑀸 𑀇𑀤𑀫𑁆𑀧𑀺 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀼𑀢𑁆𑀣𑀁 𑀕𑀸𑀣𑀫𑀸𑀳.

𑀢𑀢𑁆𑀣 𑀩𑀤𑁆𑀥𑀘𑀭𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀲𑁄 𑀧𑀦 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀅𑀳𑁄𑀲𑀺. 𑀲𑀫𑁆𑀩𑀼𑀤𑁆𑀥𑀺𑀫𑀦𑁆𑀢𑀁 𑀯𑀢𑀺𑀦𑀁 𑀅𑀫𑀜𑁆𑀜𑀻𑀢𑀺, ‘‘𑀲𑀫𑁆𑀫𑀸 𑀩𑀼𑀤𑁆𑀥𑀺𑀫𑀸 𑀯𑀢𑀲𑀫𑁆𑀧𑀦𑁆𑀦𑁄 𑀅𑀬’’𑀦𑁆𑀢𑀺 𑀏𑀯𑀁 𑀫𑀜𑁆𑀜𑀫𑀸𑀦𑁄 𑀓𑀧𑁆𑀧𑁄 𑀢𑀯 𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀳𑁄𑀲𑀺𑀁 𑀅𑀳𑀁 𑀲𑁄 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑁂𑀧𑀺 𑀚𑀸𑀦𑀸𑀲𑀻𑀢𑀺 𑀦 𑀓𑁂𑀯𑀮𑀁 𑀫𑀬𑁆𑀳𑀁 𑀆𑀬𑀼𑀫𑁂𑀯, 𑀅𑀜𑁆𑀜𑁂𑀧𑀺 𑀢𑁆𑀯𑀁 𑀚𑀸𑀦𑀸𑀲𑀺𑀬𑁂𑀯. 𑀢𑀣𑀸 𑀳𑀺 𑀩𑀼𑀤𑁆𑀥𑁄𑀢𑀺 𑀢𑀣𑀸 𑀳𑀺 𑀢𑁆𑀯𑀁 𑀩𑀼𑀤𑁆𑀥𑁄, 𑀬𑀲𑁆𑀫𑀸 𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀚𑀸𑀦𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀢𑁆𑀬𑀸𑀬𑀁 𑀚𑀮𑀺𑀢𑀸𑀦𑀼𑀪𑀸𑀯𑁄𑀢𑀺 𑀬𑀲𑁆𑀫𑀸 𑀘 𑀢𑁆𑀯𑀁 𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀢𑁂 𑀅𑀬𑀁 𑀚𑀮𑀺𑀢𑁄 𑀆𑀦𑀼𑀪𑀸𑀯𑁄. 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀻𑀢𑀺 𑀲𑀩𑁆𑀩𑀁 𑀩𑁆𑀭𑀳𑁆𑀫𑀮𑁄𑀓𑀁 𑀑𑀪𑀸𑀲𑀬𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁬. 𑀧𑀜𑁆𑀘𑀫𑁂 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀢𑀺 𑀢𑁂𑀚𑁄𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬, ‘‘𑀲𑀭𑀻𑀭𑀢𑁄 𑀚𑀸𑀮𑀸 𑀦𑀺𑀓𑁆𑀔𑀫𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀦𑁆𑀢𑁄 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀲𑀓𑀮𑀲𑀭𑀻𑀭𑀢𑁄 𑀚𑀸𑀮𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀯𑀁 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀢𑀣𑀸 𑀲𑀫𑀸𑀧𑀚𑁆𑀚𑀺𑀢𑁆𑀯𑀸. 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀓𑀲𑁆𑀫𑀸 𑀣𑁂𑀭𑁄 𑀢𑀢𑁆𑀣 𑀅𑀕𑀫𑀸𑀲𑀺? 𑀣𑁂𑀭𑀲𑁆𑀲 𑀓𑀺𑀭 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀉𑀧𑀭𑀺 𑀦𑀺𑀲𑀺𑀦𑁆𑀦𑀁 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸 ‘‘𑀅𑀝𑁆𑀞𑀺𑀯𑁂𑀥𑀻 𑀅𑀬𑀁 𑀧𑀼𑀕𑁆𑀕𑀮𑁄, 𑀫𑀬𑀸𑀧𑁂𑀢𑁆𑀣 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀅𑀳𑁄𑀲𑀺, 𑀢𑀲𑁆𑀫𑀸 𑀅𑀕𑀫𑀸𑀲𑀺. 𑀲𑁂𑀲𑀸𑀦𑀁 𑀕𑀫𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁄 𑀳𑀺 𑀩𑁆𑀭𑀳𑁆𑀫𑀸 𑀢𑀣𑀸𑀕𑀢𑀲𑁆𑀲 𑀘𑁂𑀯 𑀢𑀣𑀸𑀕𑀢𑀲𑀸𑀯𑀓𑀸𑀦𑀜𑁆𑀘 𑀆𑀦𑀼𑀪𑀸𑀯𑀁 𑀅𑀤𑀺𑀲𑁆𑀯𑀸 𑀅𑀪𑀩𑁆𑀩𑁄 𑀯𑀺𑀦𑀬𑀁 𑀉𑀧𑀕𑀦𑁆𑀢𑀼𑀁, 𑀢𑁂𑀦 𑀲𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑀢𑁆𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀢𑁄 𑀉𑀕𑁆𑀕𑀢𑀚𑀸𑀮𑀸 𑀲𑀓𑀮𑀩𑁆𑀭𑀳𑁆𑀫𑀮𑁄𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀚𑀝𑀸𑀓𑀸𑀲𑁂 𑀧𑀓𑁆𑀔𑀦𑁆𑀤𑀸, 𑀢𑀸 𑀘 𑀧𑀦 𑀙𑀩𑁆𑀩𑀡𑁆𑀡𑀸 𑀅𑀳𑁂𑀲𑀼𑀁, 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀸𑀦𑀁 𑀆𑀪𑀸 𑀧𑀓𑀢𑀺𑀯𑀡𑁆𑀡𑀸𑀯.

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀅𑀜𑁆𑀜𑀩𑁆𑀭𑀳𑁆𑀫𑀲𑀭𑀻𑀭𑀯𑀺𑀫𑀸𑀦𑀸𑀮𑀗𑁆𑀓𑀸𑀭𑀸𑀤𑀻𑀦𑀁 𑀧𑀪𑀸 𑀅𑀢𑀺𑀓𑁆𑀓𑀫𑀫𑀸𑀦𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀪𑀲𑁆𑀲𑀭𑀁 𑀧𑀪𑀁 𑀧𑀲𑁆𑀲𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀦 𑀫𑁂, 𑀫𑀸𑀭𑀺𑀲, 𑀲𑀸 𑀤𑀺𑀝𑁆𑀞𑀻𑀢𑀺 𑀬𑀸 𑀫𑁂𑀲𑀸, ‘‘𑀇𑀥𑀸𑀕𑀦𑁆𑀢𑀼𑀁 𑀲𑀫𑀢𑁆𑀣𑁄 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀦𑀢𑁆𑀣𑀻’’𑀢𑀺 𑀧𑀼𑀭𑁂 𑀤𑀺𑀝𑁆𑀞𑀺, 𑀦𑀢𑁆𑀣𑀺 𑀫𑁂 𑀲𑀸. 𑀓𑀣𑀁 𑀯𑀚𑁆𑀚𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀯𑀤𑁂𑀬𑁆𑀬𑀁. 𑀦𑀺𑀘𑁆𑀘𑁄𑀫𑁆𑀳𑀺 𑀲𑀲𑁆𑀲𑀢𑁄𑀢𑀺 𑀇𑀫𑀲𑁆𑀲 𑀓𑀺𑀭 𑀩𑁆𑀭𑀳𑁆𑀫𑀼𑀦𑁄 𑀮𑀤𑁆𑀥𑀺𑀤𑀺𑀝𑁆𑀞𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘𑀸𑀢𑀺 𑀤𑁆𑀯𑁂 𑀤𑀺𑀝𑁆𑀞𑀺𑀬𑁄. 𑀢𑀢𑁆𑀭𑀸𑀲𑁆𑀲 𑀢𑀣𑀸𑀕𑀢𑀜𑁆𑀘𑁂𑀯 𑀢𑀣𑀸𑀕𑀢𑀲𑀸𑀯𑀓𑁂 𑀘 𑀧𑀲𑁆𑀲𑀢𑁄 𑀮𑀤𑁆𑀥𑀺𑀤𑀺𑀝𑁆𑀞𑀺 𑀧𑀳𑀻𑀦𑀸. 𑀪𑀕𑀯𑀸 𑀧𑀦𑁂𑀢𑁆𑀣 𑀫𑀳𑀦𑁆𑀢𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀲𑀺. 𑀩𑁆𑀭𑀳𑁆𑀫𑀸 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀇𑀢𑀺𑀲𑁆𑀲 𑀫𑀕𑁆𑀕𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺 𑀧𑀳𑀻𑀦𑀸, 𑀢𑀲𑁆𑀫𑀸 𑀏𑀯𑀫𑀸𑀳.

𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀦𑁆𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀘𑀸𑀭𑀺𑀓𑀁. 𑀣𑁂𑀭𑀸𑀦𑀜𑁆𑀳𑀺 𑀪𑀡𑁆𑀟𑀕𑀸𑀳𑀓𑀤𑀳𑀭𑀸 𑀯𑀺𑀬 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀧𑀸𑀭𑀺𑀲𑀚𑁆𑀚𑀸 𑀩𑁆𑀭𑀳𑁆𑀫𑀸𑀦𑁄 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦𑀼𑀧𑀲𑀗𑁆𑀓𑀫𑀸𑀢𑀺 𑀓𑀲𑁆𑀫𑀸 𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺? 𑀣𑁂𑀭𑁂 𑀓𑀺𑀭𑀲𑁆𑀲 𑀢𑀢𑁆𑀢𑀓𑁂𑀦𑁂𑀯 𑀓𑀣𑀸𑀲𑀮𑁆𑀮𑀸𑀧𑁂𑀦 𑀯𑀺𑀲𑁆𑀲𑀸𑀲𑁄 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑀅𑀜𑁆𑀜𑁂𑀧𑀻𑀢𑀺 𑀬𑀣𑀸 𑀢𑀼𑀫𑁆𑀳𑁂 𑀘𑀢𑁆𑀢𑀸𑀭𑁄 𑀚𑀦𑀸, 𑀓𑀺𑀦𑁆𑀦𑀼 𑀔𑁄 𑀏𑀯𑀭𑀽𑀧𑀸 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺, 𑀉𑀤𑀸𑀳𑀼 𑀢𑀼𑀫𑁆𑀳𑁂 𑀘𑀢𑁆𑀢𑀸𑀭𑁄 𑀏𑀯 𑀫𑀳𑀺𑀤𑁆𑀥𑀺𑀓𑀸𑀢𑀺? 𑀢𑁂𑀯𑀺𑀚𑁆𑀚𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀆𑀲𑀯𑀓𑁆𑀔𑀬𑀲𑀗𑁆𑀔𑀸𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀇𑀤𑁆𑀥𑀺𑀧𑀢𑁆𑀢𑀸𑀢𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀧𑀢𑁆𑀢𑀸. 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑀸𑀢𑀺 𑀧𑀭𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑁂 𑀓𑀼𑀲𑀮𑀸. 𑀏𑀯𑀫𑁂𑀢𑁆𑀣 𑀧𑀜𑁆𑀘 𑀅𑀪𑀺𑀜𑁆𑀜𑀸𑀧𑀺 𑀲𑀭𑀽𑀧𑁂𑀦 𑀯𑀼𑀢𑁆𑀢𑀸. 𑀤𑀺𑀩𑁆𑀩𑀲𑁄𑀢𑀁 𑀧𑀦 𑀢𑀸𑀲𑀁 𑀯𑀲𑁂𑀦 𑀆𑀕𑀢𑀫𑁂𑀯 𑀳𑁄𑀢𑀺. 𑀩𑀳𑀽𑀢𑀺 𑀏𑀯𑀭𑀽𑀧𑀸 𑀙𑀴𑀪𑀺𑀜𑁆𑀜𑀸 𑀩𑀼𑀤𑁆𑀥𑀲𑀸𑀯𑀓𑀸 𑀩𑀳𑀽 𑀕𑀡𑀦𑀧𑀣𑀁 𑀅𑀢𑀺𑀓𑁆𑀓𑀦𑁆𑀢𑀸, 𑀲𑀓𑀮𑀁 𑀚𑀫𑁆𑀩𑀼𑀤𑀻𑀧𑀁 𑀓𑀸𑀲𑀸𑀯𑀧𑀚𑁆𑀚𑁄𑀢𑀁 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀻𑀢𑀺. 𑀧𑀜𑁆𑀘𑀫𑀁.

𑁬. 𑀩𑁆𑀭𑀳𑁆𑀫𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁭. 𑀙𑀝𑁆𑀞𑁂 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀩𑀸𑀳𑀦𑁆𑀢𑀺 𑀏𑀓𑁂𑀓𑁄 𑀏𑀓𑁂𑀓𑀁 𑀤𑁆𑀯𑀸𑀭𑀩𑀸𑀳𑀁 𑀦𑀺𑀲𑁆𑀲𑀸𑀬 𑀤𑁆𑀯𑀸𑀭𑀧𑀸𑀮𑀸 𑀯𑀺𑀬 𑀅𑀝𑁆𑀞𑀁𑀲𑀼. 𑀇𑀤𑁆𑀥𑁄𑀢𑀺 𑀛𑀸𑀦𑀲𑀼𑀔𑁂𑀦 𑀲𑀫𑀺𑀤𑁆𑀥𑁄. 𑀨𑀻𑀢𑁄𑀢𑀺 𑀅𑀪𑀺𑀜𑁆𑀜𑀸𑀧𑀼𑀧𑁆𑀨𑁂𑀳𑀺 𑀲𑀼𑀧𑀼𑀧𑁆𑀨𑀺𑀢𑁄. 𑀅𑀦𑀥𑀺𑀯𑀸𑀲𑁂𑀦𑁆𑀢𑁄𑀢𑀺 𑀅𑀲𑀳𑀦𑁆𑀢𑁄. 𑀏𑀢𑀤𑀯𑁄𑀘𑀸𑀢𑀺 𑀏𑀢𑁂𑀲𑀁 𑀦𑀺𑀫𑁆𑀫𑀺𑀢𑀩𑁆𑀭𑀳𑁆𑀫𑀸𑀦𑀁 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀏𑀢𑀁 ‘‘𑀧𑀲𑁆𑀲𑀲𑀺 𑀫𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑀬𑁄 𑀲𑀼𑀧𑀡𑁆𑀡𑀸𑀢𑀺 𑀕𑀸𑀣𑀸𑀬 𑀧𑀜𑁆𑀘𑀲𑀢𑀸𑀢𑀺 𑀲𑀢𑀧𑀤𑀁 𑀭𑀽𑀧𑀯𑀲𑁂𑀦 𑀯𑀸 𑀧𑀦𑁆𑀢𑀺𑀯𑀲𑁂𑀦 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀭𑀽𑀧𑀯𑀲𑁂𑀦 𑀢𑀸𑀯 𑀢𑀬𑁄 𑀲𑀼𑀧𑀡𑁆𑀡𑀸𑀢𑀺 𑀢𑀻𑀡𑀺 𑀲𑀼𑀧𑀡𑁆𑀡𑀭𑀽𑀧𑀲𑀢𑀸𑀦𑀺. 𑀘𑀢𑀼𑀭𑁄 𑀘 𑀳𑀁𑀲𑀸𑀢𑀺 𑀘𑀢𑁆𑀢𑀸𑀭𑀺𑀳𑀁𑀲𑀭𑀽𑀧𑀲𑀢𑀸𑀦𑀺. 𑀩𑀼𑀕𑁆𑀖𑀻𑀦𑀺𑀲𑀸 𑀧𑀜𑁆𑀘𑀲𑀢𑀸𑀢𑀺 𑀩𑁆𑀬𑀕𑁆𑀖𑀲𑀤𑀺𑀲𑀸 𑀏𑀓𑀘𑁆𑀘𑁂 𑀫𑀺𑀕𑀸 𑀩𑁆𑀬𑀕𑁆𑀖𑀻𑀦𑀺𑀲𑀸 𑀦𑀸𑀫, 𑀢𑁂𑀲𑀁 𑀩𑁆𑀬𑀕𑁆𑀖𑀻𑀦𑀺𑀲𑀸𑀭𑀽𑀧𑀓𑀸𑀦𑀁 𑀧𑀜𑁆𑀘𑀲𑀢𑀸𑀦𑀺, 𑀧𑀦𑁆𑀢𑀺𑀯𑀲𑁂𑀦 𑀢𑀬𑁄 𑀲𑀼𑀧𑀡𑁆𑀡𑀸𑀢𑀺 𑀢𑀻𑀡𑀺 𑀲𑀼𑀧𑀡𑁆𑀡𑀧𑀦𑁆𑀢𑀺𑀲𑀢𑀸𑀦𑀺, 𑀘𑀢𑀼𑀭𑁄 𑀳𑀁𑀲𑀸𑀢𑀺 𑀘𑀢𑁆𑀢𑀸𑀭𑀺 𑀳𑀁𑀲𑀧𑀦𑁆𑀢𑀺𑀲𑀢𑀸𑀦𑀺. 𑀩𑁆𑀬𑀕𑁆𑀖𑀻𑀦𑀺𑀲𑀸 𑀧𑀜𑁆𑀘𑀲𑀢𑀸𑀢𑀺 𑀧𑀜𑁆𑀘 𑀩𑁆𑀬𑀕𑁆𑀖𑀻𑀦𑀺𑀲𑀸 𑀧𑀦𑁆𑀢𑀺𑀲𑀢𑀸𑀦𑀺. 𑀛𑀸𑀬𑀺𑀦𑁄𑀢𑀺 𑀛𑀸𑀬𑀺𑀲𑁆𑀲 𑀫𑀬𑁆𑀳𑀁 𑀯𑀺𑀫𑀸𑀦𑁂 𑀅𑀬𑀁 𑀯𑀺𑀪𑀽𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀑𑀪𑀸𑀲𑀬𑀦𑁆𑀢𑀺 𑀑𑀪𑀸𑀲𑀬𑀫𑀸𑀦𑀁. 𑀉𑀢𑁆𑀢𑀭𑀲𑁆𑀲𑀁 𑀤𑀺𑀲𑀸𑀬𑀦𑁆𑀢𑀺 𑀢𑀁 𑀓𑀺𑀭 𑀓𑀦𑀓𑀯𑀺𑀫𑀸𑀦𑀁 𑀢𑁂𑀲𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀉𑀢𑁆𑀢𑀭𑀤𑀺𑀲𑀸𑀬𑀁 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀬𑀁 𑀧𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 𑀏𑀯𑀭𑀽𑀧𑁂 𑀓𑀦𑀓𑀯𑀺𑀫𑀸𑀦𑁂 𑀯𑀲𑀦𑁆𑀢𑁄 𑀅𑀳𑀁 𑀓𑀲𑁆𑀲 𑀅𑀜𑁆𑀜𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀭𑀽𑀧𑁂 𑀭𑀡𑀁 𑀤𑀺𑀲𑁆𑀯𑀸𑀢𑀺 𑀭𑀽𑀧𑀫𑁆𑀳𑀺 𑀚𑀸𑀢𑀺𑀚𑀭𑀸𑀪𑀗𑁆𑀕𑀲𑀗𑁆𑀔𑀸𑀢𑀁 𑀤𑁄𑀲𑀁 𑀤𑀺𑀲𑁆𑀯𑀸. 𑀲𑀤𑀸 𑀧𑀯𑁂𑀥𑀺𑀢𑀦𑁆𑀢𑀺 𑀲𑀻𑀢𑀸𑀤𑀻𑀳𑀺 𑀘 𑀦𑀺𑀘𑁆𑀘𑀁 𑀧𑀯𑁂𑀥𑀺𑀢𑀁 𑀘𑀮𑀺𑀢𑀁 𑀖𑀝𑁆𑀝𑀺𑀢𑀁 𑀭𑀽𑀧𑀁 𑀤𑀺𑀲𑁆𑀯𑀸. 𑀢𑀲𑁆𑀫𑀸 𑀦 𑀭𑀽𑀧𑁂 𑀭𑀫𑀢𑀺 𑀲𑀼𑀫𑁂𑀥𑁄𑀢𑀺 𑀬𑀲𑁆𑀫𑀸 𑀭𑀽𑀧𑁂 𑀭𑀡𑀁 𑀧𑀲𑁆𑀲𑀢𑀺, 𑀲𑀤𑀸 𑀧𑀯𑁂𑀥𑀺𑀢𑀜𑁆𑀘 𑀭𑀽𑀧𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀼𑀫𑁂𑀥𑁄 𑀲𑀼𑀦𑁆𑀤𑀭𑀧𑀜𑁆𑀜𑁄 𑀲𑁄 𑀲𑀢𑁆𑀣𑀸 𑀭𑀽𑀧𑁂 𑀦 𑀭𑀫𑀢𑀻𑀢𑀺. 𑀙𑀝𑁆𑀞𑀁.

𑁭. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁮. 𑀲𑀢𑁆𑀢𑀫𑁂 𑀅𑀧𑁆𑀧𑀫𑁂𑀬𑁆𑀬𑀁 𑀧𑀫𑀺𑀦𑀦𑁆𑀢𑁄𑀢𑀺 𑀅𑀧𑁆𑀧𑀫𑁂𑀬𑁆𑀬𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀁 ‘‘𑀏𑀢𑁆𑀢𑀓𑀁 𑀲𑀻𑀮𑀁, 𑀏𑀢𑁆𑀢𑀓𑁄 𑀲𑀫𑀸𑀥𑀺, 𑀏𑀢𑁆𑀢𑀓𑀸 𑀧𑀜𑁆𑀜𑀸’’𑀢𑀺 𑀏𑀯𑀁 𑀫𑀺𑀦𑀦𑁆𑀢𑁄. 𑀓𑁄𑀥𑀯𑀺𑀤𑁆𑀯𑀸 𑀯𑀺𑀓𑀧𑁆𑀧𑀬𑁂𑀢𑀺 𑀓𑁄 𑀇𑀥 𑀯𑀺𑀤𑁆𑀯𑀸 𑀫𑁂𑀥𑀸𑀯𑀻 𑀯𑀺𑀓𑀧𑁆𑀧𑁂𑀬𑁆𑀬, 𑀔𑀻𑀡𑀸𑀲𑀯𑁄𑀯 𑀔𑀻𑀡𑀸𑀲𑀯𑀁 𑀫𑀺𑀦𑀦𑁆𑀢𑁄 𑀓𑀧𑁆𑀧𑁂𑀬𑁆𑀬𑀸𑀢𑀺 𑀤𑀻𑀧𑁂𑀢𑀺. 𑀦𑀺𑀯𑀼𑀢𑀁 𑀢𑀁 𑀫𑀜𑁆𑀜𑁂𑀢𑀺 𑀬𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄 𑀢𑀁 𑀧𑀫𑁂𑀢𑀼𑀁 𑀆𑀭𑀪𑀢𑀺, 𑀢𑀁 𑀦𑀺𑀯𑀼𑀢𑀁 𑀅𑀯𑀓𑀼𑀚𑁆𑀚𑀧𑀜𑁆𑀜𑀁 𑀫𑀜𑁆𑀜𑀸𑀫𑀻𑀢𑀺. 𑀲𑀢𑁆𑀢𑀫𑀁.

𑁮. 𑀓𑀢𑀫𑁄𑀤𑀓𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁯. 𑀅𑀝𑁆𑀞𑀫𑁂 𑀅𑀓𑀺𑀲𑁆𑀲𑀯𑀦𑁆𑀢𑀺 𑀓𑀺𑀲𑁆𑀲𑀯𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀦𑀺𑀧𑁆𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀫𑀁.

𑁯. 𑀢𑀼𑀭𑀽𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁦. 𑀦𑀯𑀫𑁂 𑀆𑀩𑀸𑀥𑀺𑀓𑁄𑀢𑀺 ‘‘𑀲𑀸𑀲𑀧𑀫𑀢𑁆𑀢𑀻𑀳𑀺 𑀧𑀻𑀴𑀓𑀸𑀳𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀆𑀕𑀢𑁂𑀦 𑀆𑀩𑀸𑀥𑁂𑀦 𑀆𑀩𑀸𑀥𑀺𑀓𑁄. 𑀩𑀸𑀴𑁆𑀳𑀕𑀺𑀮𑀸𑀦𑁄𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄. 𑀢𑀼𑀭𑀽𑀢𑀺 𑀓𑁄𑀓𑀸𑀮𑀺𑀓𑀲𑁆𑀲 𑀉𑀧𑀚𑁆𑀛𑀸𑀬𑁄 𑀢𑀼𑀭𑀼𑀢𑁆𑀣𑁂𑀭𑁄 𑀦𑀸𑀫 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 𑀪𑀽𑀫𑀝𑁆𑀞𑀓𑀤𑁂𑀯𑀢𑀸 𑀆𑀤𑀺𑀁 𑀓𑀢𑁆𑀯𑀸, ‘‘𑀅𑀬𑀼𑀢𑁆𑀢𑀁 𑀓𑁄𑀓𑀸𑀮𑀺𑀓𑁂𑀦 𑀓𑀢𑀁 𑀅𑀕𑁆𑀕𑀲𑀸𑀯𑀓𑁂 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑁂𑀦𑀸’’𑀢𑀺 𑀧𑀭𑀫𑁆𑀧𑀭𑀸𑀬 𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀁 𑀓𑁄𑀓𑀸𑀮𑀺𑀓𑀲𑁆𑀲 𑀧𑀸𑀧𑀓𑀫𑁆𑀫𑀁 𑀲𑀼𑀢𑁆𑀯𑀸 𑁋 ‘‘𑀫𑀸 𑀫𑀬𑁆𑀳𑀁 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀯𑀭𑀸𑀓𑁄 𑀦𑀲𑁆𑀲𑀺, 𑀑𑀯𑀤𑀺𑀲𑁆𑀲𑀸𑀫𑀺 𑀦𑀁 𑀣𑁂𑀭𑁂𑀲𑀼 𑀘𑀺𑀢𑁆𑀢𑀧𑀲𑀸𑀤𑀢𑁆𑀣𑀸𑀬𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀼𑀭𑀽 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸’’𑀢𑀺. 𑀧𑁂𑀲𑀮𑀸𑀢𑀺 𑀧𑀺𑀬𑀲𑀻𑀮𑀸. 𑀓𑁄𑀲𑀺 𑀢𑁆𑀯𑀁, 𑀆𑀯𑀼𑀲𑁄𑀢𑀺 𑀦𑀺𑀧𑀦𑁆𑀦𑀓𑁄𑀯 𑀓𑀩𑀭𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀏𑀯𑀫𑀸𑀳. 𑀧𑀲𑁆𑀲 𑀬𑀸𑀯𑀜𑁆𑀘 𑀢𑁂𑀢𑀺 𑀧𑀲𑁆𑀲 𑀬𑀢𑁆𑀢𑀓𑀁 𑀢𑀬𑀸 𑀅𑀧𑀭𑀤𑁆𑀥𑀁, 𑀅𑀢𑁆𑀢𑀦𑁄 𑀦𑀮𑀸𑀝𑁂 𑀫𑀳𑀸𑀕𑀡𑁆𑀟𑀁 𑀅𑀧𑀲𑁆𑀲𑀦𑁆𑀢𑁄 𑀲𑀸𑀲𑀧𑀫𑀢𑁆𑀢𑀸𑀬 𑀧𑀻𑀴𑀓𑀸𑀬 𑀫𑀁 𑀘𑁄𑀤𑁂𑀢𑀩𑁆𑀩𑀁 𑀫𑀜𑁆𑀜𑀲𑀻𑀢𑀺 𑀆𑀳.

𑀅𑀣 𑀦𑀁 ‘‘𑀅𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀅𑀬𑀁 𑀯𑀭𑀸𑀓𑁄, 𑀕𑀺𑀮𑀯𑀺𑀲𑁄 𑀯𑀺𑀬 𑀓𑀲𑁆𑀲𑀘𑀺 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀧𑀼𑀭𑀺𑀲𑀲𑁆𑀲 𑀳𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀞𑀸𑀭𑀻𑀢𑀺 𑀓𑀼𑀞𑀸𑀭𑀺𑀲𑀤𑀺𑀲𑀸 𑀨𑀭𑀼𑀲𑀸 𑀯𑀸𑀘𑀸. 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑁂 𑀫𑀽𑀮𑁂𑀬𑁂𑀯 𑀦𑀺𑀓𑀦𑁆𑀢𑀢𑀺. 𑀦𑀺𑀦𑁆𑀤𑀺𑀬𑀦𑁆𑀢𑀺 𑀦𑀺𑀦𑁆𑀤𑀺𑀢𑀩𑁆𑀩𑀁 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀁. 𑀧𑀲𑀁𑀲𑀢𑀻𑀢𑀺 𑀉𑀢𑁆𑀢𑀫𑀢𑁆𑀣𑁂 𑀲𑀫𑁆𑀪𑀸𑀯𑁂𑀢𑁆𑀯𑀸 𑀔𑀻𑀡𑀸𑀲𑀯𑁄𑀢𑀺 𑀯𑀤𑀢𑀺. 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄𑀢𑀺, 𑀬𑁄 𑀯𑀸 𑀧𑀲𑀁𑀲𑀺𑀢𑀩𑁆𑀩𑁄 𑀔𑀻𑀡𑀸𑀲𑀯𑁄, 𑀢𑀁 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸 𑀘𑁄𑀤𑁂𑀦𑁆𑀢𑁄 ‘‘𑀤𑀼𑀲𑁆𑀲𑀻𑀮𑁄 𑀅𑀬’’𑀦𑁆𑀢𑀺 𑀯𑀤𑀢𑀺. 𑀯𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀦𑁆𑀢𑀺, 𑀲𑁄 𑀢𑀁 𑀅𑀧𑀭𑀸𑀥𑀁 𑀫𑀼𑀔𑁂𑀦 𑀯𑀺𑀘𑀺𑀦𑀸𑀢𑀺 𑀦𑀸𑀫. 𑀓𑀮𑀺𑀦𑀸 𑀢𑁂𑀦𑀸𑀢𑀺 𑀢𑁂𑀦 𑀅𑀧𑀭𑀸𑀥𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺. 𑀦𑀺𑀦𑁆𑀤𑀺𑀬𑀧𑀲𑀁𑀲𑀸𑀬 𑀳𑀺 𑀧𑀲𑀁𑀲𑀺𑀬𑀦𑀺𑀦𑁆𑀤𑀸𑀬 𑀘 𑀲𑀫𑀓𑁄𑀯 𑀯𑀺𑀧𑀸𑀓𑁄.

𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸𑀢𑀺 𑀲𑀩𑁆𑀩𑁂𑀦 𑀲𑀓𑁂𑀦𑀧𑀺 𑀅𑀢𑁆𑀢𑀦𑀸𑀧𑀺 𑀲𑀤𑁆𑀥𑀺𑀁 𑀬𑁄 𑀅𑀓𑁆𑀔𑁂𑀲𑀼 𑀥𑀦𑀧𑀭𑀸𑀚𑀬𑁄 𑀦𑀸𑀫, 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀅𑀧𑀭𑀸𑀥𑁄. 𑀬𑁄 𑀲𑀼𑀕𑀢𑁂𑀲𑀽𑀢𑀺 𑀬𑁄 𑀧𑀦 𑀲𑀫𑁆𑀫𑀕𑁆𑀕𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀘𑀺𑀢𑁆𑀢𑀁 𑀧𑀤𑀼𑀲𑁆𑀲𑁂𑀬𑁆𑀬, 𑀅𑀬𑀁 𑀘𑀺𑀢𑁆𑀢𑀧𑀤𑁄𑀲𑁄𑀯 𑀢𑀢𑁄 𑀓𑀮𑀺𑀢𑁄 𑀫𑀳𑀦𑁆𑀢𑀢𑀭𑁄 𑀓𑀮𑀺.

𑀇𑀤𑀸𑀦𑀺 𑀢𑀲𑁆𑀲 𑀫𑀳𑀦𑁆𑀢𑀢𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺 𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬 𑀲𑀢𑀲𑀳𑀲𑁆𑀲𑀁. 𑀙𑀢𑁆𑀢𑀺𑀁𑀲𑀢𑀻𑀢𑀺 𑀅𑀧𑀭𑀸𑀦𑀺 𑀙𑀢𑁆𑀢𑀺𑀁𑀲𑀢𑀺 𑀦𑀺𑀭𑀩𑁆𑀩𑀼𑀤𑀸𑀦𑀺. 𑀧𑀜𑁆𑀘 𑀘𑀸𑀢𑀺 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀜𑁆𑀘 𑀅𑀩𑁆𑀩𑀼𑀤𑀸𑀦𑀺. 𑀬𑀫𑀭𑀺𑀬𑀕𑀭𑀳𑀻𑀢𑀺 𑀬𑀁 𑀅𑀭𑀺𑀬𑁂 𑀕𑀭𑀳𑀦𑁆𑀢𑁄 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺, 𑀢𑀢𑁆𑀣 𑀏𑀢𑁆𑀢𑀓𑀁 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺. 𑀦𑀯𑀫𑀁.

𑁧𑁦. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁧. 𑀤𑀲𑀫𑁂 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺, 𑀓𑁄 𑀅𑀬𑀁 𑀓𑁄𑀓𑀸𑀮𑀺𑀓𑁄, 𑀓𑀲𑁆𑀫𑀸 𑀘 𑀉𑀧𑀲𑀗𑁆𑀓𑀫𑀺? 𑀅𑀬𑀁 𑀓𑀺𑀭 𑀓𑁄𑀓𑀸𑀮𑀺𑀓𑀭𑀝𑁆𑀞𑁂 𑀓𑁄𑀓𑀸𑀮𑀺𑀓𑀦𑀕𑀭𑁂 𑀓𑁄𑀓𑀸𑀮𑀺𑀓𑀲𑁂𑀝𑁆𑀞𑀺𑀲𑁆𑀲 𑀧𑀼𑀢𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀧𑀺𑀢𑀭𑀸 𑀓𑀸𑀭𑀸𑀧𑀺𑀢𑁂 𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺 𑀘𑀽𑀴𑀓𑁄𑀓𑀸𑀮𑀺𑀓𑁄𑀢𑀺 𑀦𑀸𑀫𑁂𑀦, 𑀦 𑀤𑁂𑀯𑀤𑀢𑁆𑀢𑀲𑁆𑀲 𑀲𑀺𑀲𑁆𑀲𑁄. 𑀲𑁄 𑀳𑀺 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄 𑀫𑀳𑀸𑀓𑁄𑀓𑀸𑀮𑀺𑀓𑁄 𑀦𑀸𑀫. 𑀪𑀕𑀯𑀢𑀺 𑀧𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀦𑁆𑀢𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀺𑀯𑁂𑀓𑀸𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑀸 𑀢𑁂 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀢𑀁 𑀦𑀕𑀭𑀁 𑀧𑀢𑁆𑀯𑀸 𑀢𑀁 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼. 𑀢𑀢𑁆𑀣 𑀦𑁂𑀲𑀁 𑀓𑁄𑀓𑀸𑀮𑀺𑀓𑁄 𑀯𑀢𑁆𑀢𑀁 𑀤𑀲𑁆𑀲𑁂𑀲𑀺. 𑀢𑁂 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀫𑀬𑀁 𑀇𑀥 𑀢𑁂𑀫𑀸𑀲𑀁 𑀯𑀲𑀺𑀲𑁆𑀲𑀸𑀫, 𑀫𑀸 𑀓𑀲𑁆𑀲𑀘𑀺 𑀆𑀭𑁄𑀘𑁂𑀳𑀻’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀲𑀺𑀁𑀲𑀼. 𑀯𑀲𑀺𑀢𑁆𑀯𑀸 𑀧𑀯𑀸𑀭𑀡𑀸𑀤𑀺𑀯𑀲𑁂 𑀧𑀯𑀸𑀭𑁂𑀢𑁆𑀯𑀸, ‘‘𑀕𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄’’𑀢𑀺 𑀓𑁄𑀓𑀸𑀮𑀺𑀓𑀁 𑀆𑀧𑀼𑀘𑁆𑀙𑀺𑀁𑀲𑀼. 𑀓𑁄𑀓𑀸𑀮𑀺𑀓𑁄 ‘‘𑀅𑀚𑁆𑀚𑁂𑀓𑀤𑀺𑀯𑀲𑀁, 𑀆𑀯𑀼𑀲𑁄, 𑀯𑀲𑀺𑀢𑁆𑀯𑀸 𑀲𑁆𑀯𑁂 𑀕𑀫𑀺𑀲𑁆𑀲𑀣𑀸’’𑀢𑀺 𑀯𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀅𑀕𑁆𑀕𑀲𑀸𑀯𑀓𑁂 𑀇𑀥𑀸𑀕𑀦𑁆𑀢𑁆𑀯𑀸 𑀯𑀲𑀫𑀸𑀦𑁂𑀧𑀺 𑀦 𑀚𑀸𑀦𑀸𑀣, 𑀦 𑀦𑁂 𑀓𑁄𑀘𑀺 𑀧𑀘𑁆𑀘𑀬𑁂𑀦𑀸𑀧𑀺 𑀦𑀺𑀫𑀦𑁆𑀢𑁂𑀢𑀻’’𑀢𑀺. 𑀦𑀕𑀭𑀯𑀸𑀲𑀺𑀦𑁄, ‘‘𑀓𑀳𑀁, 𑀪𑀦𑁆𑀢𑁂, 𑀣𑁂𑀭𑀸, 𑀓𑀲𑁆𑀫𑀸 𑀦𑁄 𑀦 𑀆𑀭𑁄𑀘𑀬𑀺𑀢𑁆𑀣𑀸’’𑀢𑀺? 𑀓𑀺𑀁 𑀆𑀯𑀼𑀲𑁄 𑀆𑀭𑁄𑀘𑀺𑀢𑁂𑀦, 𑀓𑀺𑀁 𑀦 𑀧𑀲𑁆𑀲𑀣 𑀤𑁆𑀯𑁂 𑀪𑀺𑀓𑁆𑀔𑀽 𑀣𑁂𑀭𑀸𑀲𑀦𑁂 𑀦𑀺𑀲𑀻𑀤𑀦𑁆𑀢𑁂, 𑀏𑀢𑁂 𑀅𑀕𑁆𑀕𑀲𑀸𑀯𑀓𑀸𑀢𑀺. 𑀢𑁂 𑀔𑀺𑀧𑁆𑀧𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀘𑁂𑀯 𑀘𑀻𑀯𑀭𑀤𑀼𑀲𑁆𑀲𑀸𑀦𑀺 𑀘 𑀲𑀁𑀳𑀭𑀺𑀁𑀲𑀼.

𑀓𑁄𑀓𑀸𑀮𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀫𑀧𑁆𑀧𑀺𑀘𑁆𑀙𑀸 𑀅𑀕𑁆𑀕𑀲𑀸𑀯𑀓𑀸 𑀧𑀬𑀼𑀢𑁆𑀢𑀯𑀸𑀘𑀸𑀬 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀦 𑀲𑀸𑀤𑀺𑀬𑀺𑀲𑁆𑀲𑀦𑁆𑀢𑀺, 𑀅𑀲𑀸𑀤𑀺𑀬𑀦𑁆𑀢𑀸 ‘𑀆𑀯𑀸𑀲𑀺𑀓𑀲𑁆𑀲 𑀤𑁂𑀣𑀸’𑀢𑀺 𑀯𑀓𑁆𑀔𑀦𑁆𑀢𑀻’’𑀢𑀺. 𑀢𑀁 𑀢𑀁 𑀮𑀸𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀣𑁂𑀭𑀸 𑀤𑀺𑀲𑁆𑀯𑀸𑀯 ‘‘𑀇𑀫𑁂 𑀧𑀘𑁆𑀘𑀬𑀸 𑀦𑁂𑀯 𑀅𑀫𑁆𑀳𑀸𑀓𑀁, 𑀦 𑀓𑁄𑀓𑀸𑀮𑀺𑀓𑀲𑁆𑀲 𑀓𑀧𑁆𑀧𑀦𑁆𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀓𑁄𑀓𑀸𑀮𑀺𑀓𑁄 ‘‘𑀓𑀣𑀁 𑀳𑀺 𑀦𑀸𑀫 𑀅𑀢𑁆𑀢𑀦𑀸 𑀅𑀕𑀡𑁆𑀳𑀦𑁆𑀢𑀸 𑀫𑀬𑁆𑀳𑀫𑁆𑀧𑀺 𑀅𑀤𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺? 𑀆𑀖𑀸𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀤𑀸𑀬 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀢𑀫𑁂𑀯 𑀦𑀕𑀭𑀁 𑀧𑀘𑁆𑀘𑀸𑀕𑀫𑀺𑀁𑀲𑀼. 𑀦𑀸𑀕𑀭𑀸 𑀣𑁂𑀭𑁂 𑀲𑀜𑁆𑀚𑀸𑀦𑀺𑀢𑁆𑀯𑀸 𑀲𑀳 𑀧𑀭𑀺𑀓𑁆𑀔𑀸𑀭𑁂𑀳𑀺 𑀤𑀸𑀦𑀁 𑀲𑀚𑁆𑀚𑀺𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼, 𑀣𑁂𑀭𑀸𑀦𑀜𑁆𑀘 𑀧𑀭𑀺𑀓𑁆𑀔𑀸𑀭𑁂 𑀉𑀧𑀦𑀸𑀫𑁂𑀲𑀼𑀁. 𑀣𑁂𑀭𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑀬𑀺𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀓𑁄𑀓𑀸𑀮𑀺𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀧𑀼𑀩𑁆𑀩𑁂 𑀅𑀧𑁆𑀧𑀺𑀘𑁆𑀙𑀸 𑀅𑀳𑁂𑀲𑀼𑀁, 𑀇𑀤𑀸𑀦𑀺 𑀧𑀸𑀧𑀺𑀘𑁆𑀙𑀸 𑀚𑀸𑀢𑀸, 𑀧𑀼𑀩𑁆𑀩𑁂𑀧𑀺 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀧𑀯𑀺𑀯𑀺𑀢𑁆𑀢𑀲𑀤𑀺𑀲𑀸 𑀫𑀜𑁆𑀜𑁂’’𑀢𑀺 𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀅𑀧𑁆𑀧𑀺𑀘𑁆𑀙𑀸 𑀯𑀺𑀬, 𑀇𑀤𑀸𑀦𑀺 𑀧𑀦 𑀧𑀸𑀧𑀪𑀺𑀓𑁆𑀔𑀽 𑀚𑀸𑀢𑀸’’𑀢𑀺 𑀯𑀢𑁆𑀯𑀸 ‘‘𑀫𑀽𑀮𑀝𑁆𑀞𑀸𑀦𑁂𑀬𑁂𑀯 𑀦𑁂𑀲𑀁 𑀧𑀢𑀺𑀝𑁆𑀞𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀢𑀭𑀫𑀸𑀦𑀭𑀽𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀬𑀫𑁂𑀯 𑀓𑁄𑀓𑀸𑀮𑀺𑀓𑁄 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀪𑀕𑀯𑀸 𑀢𑀁 𑀢𑀼𑀭𑀺𑀢𑀢𑀼𑀭𑀺𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀯 𑀆𑀯𑀚𑁆𑀚𑁂𑀦𑁆𑀢𑁄 𑀅𑀜𑁆𑀜𑀸𑀲𑀺 𑁋 ‘‘𑀅𑀬𑀁 𑀅𑀕𑁆𑀕𑀲𑀸𑀯𑀓𑁂 𑀅𑀓𑁆𑀓𑁄𑀲𑀺𑀢𑀼𑀓𑀸𑀫𑁄 𑀆𑀕𑀢𑁄’’𑀢𑀺. ‘‘𑀲𑀓𑁆𑀓𑀸 𑀦𑀼 𑀔𑁄 𑀧𑀝𑀺𑀲𑁂𑀥𑁂𑀢𑀼’’𑀦𑁆𑀢𑀺 𑀘 𑀆𑀯𑀚𑁆𑀚𑁂𑀦𑁆𑀢𑁄, ‘‘𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑁂𑀢𑀼𑀁, 𑀣𑁂𑀭𑁂𑀲𑀼 𑀅𑀧𑀭𑀚𑁆𑀛𑀺𑀢𑁆𑀯𑀸 𑀓𑀸𑀮𑀗𑁆𑀓𑀢𑁄 𑀏𑀓𑀁𑀲𑁂𑀦 𑀧𑀤𑀼𑀫𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀤𑀺𑀲𑁆𑀯𑀸, ‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀧𑀺 𑀦𑀸𑀫 𑀕𑀭𑀳𑀦𑁆𑀢𑀁 𑀲𑀼𑀢𑁆𑀯𑀸 𑀦 𑀦𑀺𑀲𑁂𑀥𑁂𑀢𑀻’’𑀢𑀺 𑀯𑀸𑀤𑀫𑁄𑀘𑀦𑀢𑁆𑀣𑀁 𑀅𑀭𑀺𑀬𑀽𑀧𑀯𑀸𑀤𑀲𑁆𑀲 𑀘 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀫𑀸 𑀳𑁂𑀯𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀲𑁂𑀥𑁂𑀲𑀺. 𑀢𑀢𑁆𑀣 𑀫𑀸 𑀳𑁂𑀯𑀦𑁆𑀢𑀺 𑀫𑀸 𑀏𑀯𑀁 𑀅𑀪𑀡𑀺. 𑀲𑀤𑁆𑀥𑀸𑀬𑀺𑀓𑁄𑀢𑀺 𑀲𑀤𑁆𑀥𑀸𑀬 𑀆𑀓𑀭𑁄 𑀧𑀲𑀸𑀤𑀸𑀯𑀳𑁄 𑀲𑀤𑁆𑀥𑀸𑀢𑀩𑁆𑀩𑀯𑀘𑀦𑁄 𑀯𑀸. 𑀧𑀘𑁆𑀘𑀬𑀺𑀓𑁄𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀯𑀘𑀦𑁄.

𑀧𑀓𑁆𑀓𑀸𑀫𑀻𑀢𑀺 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀘𑁄𑀤𑀺𑀬𑀫𑀸𑀦𑁄 𑀧𑀓𑁆𑀓𑀸𑀫𑀺. 𑀑𑀓𑀸𑀲𑀓𑀢𑀁 𑀳𑀺 𑀓𑀫𑁆𑀫𑀁 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁, 𑀢𑀁 𑀢𑀲𑁆𑀲 𑀢𑀢𑁆𑀣 𑀞𑀸𑀢𑀼𑀁 𑀦 𑀅𑀤𑀸𑀲𑀺. 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀧𑀓𑁆𑀓𑀦𑁆𑀢𑀲𑁆𑀲 𑀲𑀢𑁄 𑀦 𑀘𑀺𑀭𑁂𑀦𑁂𑀯. 𑀲𑀩𑁆𑀩𑁄 𑀓𑀸𑀬𑁄 𑀨𑀼𑀝𑁄 𑀅𑀳𑁄𑀲𑀻𑀢𑀺 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀑𑀓𑀸𑀲𑀁 𑀆𑀯𑀚𑁆𑀚𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀅𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀢𑀸𑀳𑀺 𑀧𑀻𑀴𑀓𑀸𑀳𑀺 𑀅𑀚𑁆𑀛𑁄𑀢𑁆𑀣𑀝𑀁 𑀅𑀳𑁄𑀲𑀺. 𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑀣𑀸𑀭𑀽𑀧𑀁 𑀓𑀫𑁆𑀫𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀯𑀺𑀧𑀸𑀓𑀁 𑀦 𑀤𑁂𑀢𑀺, 𑀤𑀲𑁆𑀲𑀦𑀽𑀧𑀘𑀸𑀭𑁂 𑀯𑀺𑀚𑀳𑀺𑀢𑀫𑀢𑁆𑀢𑁂 𑀤𑁂𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀧𑀻𑀴𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀓𑀮𑀸𑀬𑀫𑀢𑁆𑀢𑀺𑀬𑁄𑀢𑀺 𑀘𑀡𑀓𑀫𑀢𑁆𑀢𑀺𑀬𑁄. 𑀩𑁂𑀮𑀼𑀯𑀲𑀮𑀸𑀝𑀼𑀓𑀫𑀢𑁆𑀢𑀺𑀬𑁄𑀢𑀺 𑀢𑀭𑀼𑀡𑀩𑁂𑀮𑀼𑀯𑀫𑀢𑁆𑀢𑀺𑀬𑁄. (𑀩𑀺𑀮𑁆𑀮𑀫𑀢𑁆𑀢𑀺𑀬𑁄𑀢𑀺 𑀫𑀳𑀸𑀩𑁂𑀮𑀼𑀯𑀫𑀢𑁆𑀢𑀺𑀬𑁄.) 𑀧𑀪𑀺𑀚𑁆𑀚𑀺𑀁𑀲𑀽𑀢𑀺 𑀪𑀺𑀚𑁆𑀚𑀺𑀁𑀲𑀼. 𑀢𑀸𑀲𑀼 𑀪𑀺𑀦𑁆𑀦𑀸𑀲𑀼 𑀲𑀓𑀮𑀲𑀭𑀻𑀭𑀁 𑀧𑀦𑀲𑀧𑀓𑁆𑀓𑀁 𑀯𑀺𑀬 𑀅𑀳𑁄𑀲𑀺. 𑀲𑁄 𑀧𑀓𑁆𑀓𑁂𑀦 𑀕𑀢𑁆𑀢𑁂𑀦 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀯𑀺𑀲𑀕𑀺𑀮𑀺𑀢𑁄 𑀫𑀘𑁆𑀙𑁄 𑀯𑀺𑀬 𑀓𑀤𑀮𑀺𑀧𑀢𑁆𑀢𑁂𑀲𑀼 𑀲𑀬𑀺. 𑀅𑀣 𑀥𑀫𑁆𑀫𑀲𑀯𑀦𑀢𑁆𑀣𑀁 𑀆𑀕𑀢𑀸𑀕𑀢𑀸 𑀫𑀦𑀼𑀲𑁆𑀲𑀸 𑁋 ‘‘𑀥𑀺 𑀓𑁄𑀓𑀸𑀮𑀺𑀓, 𑀥𑀺 𑀓𑁄𑀓𑀸𑀮𑀺𑀓, 𑀅𑀬𑀼𑀢𑁆𑀢𑀫𑀓𑀸𑀲𑀺, 𑀅𑀢𑁆𑀢𑀦𑁄𑀬𑁂𑀯 𑀫𑀼𑀔𑀁 𑀦𑀺𑀲𑁆𑀲𑀸𑀬 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑁄’’𑀢𑀺 𑀆𑀳𑀁𑀲𑀼. 𑀢𑁂𑀲𑀁 𑀲𑀼𑀢𑁆𑀯𑀸 𑀆𑀭𑀓𑁆𑀔𑀤𑁂𑀯𑀢𑀸 𑀥𑀺-𑀓𑀸𑀭𑀁 𑀅𑀓𑀁𑀲𑀼. 𑀆𑀭𑀓𑁆𑀔𑀓𑀤𑁂𑀯𑀢𑀸𑀦𑀁 𑀆𑀓𑀸𑀲𑀤𑁂𑀯𑀢𑀸𑀢𑀺 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀸 𑀏𑀓𑀥𑀺𑀓𑀸𑀭𑁄 𑀉𑀤𑀧𑀸𑀤𑀺. 𑀅𑀣𑀲𑁆𑀲 𑀉𑀧𑀚𑁆𑀛𑀸𑀬𑁄 𑀆𑀕𑀦𑁆𑀢𑁆𑀯𑀸 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑀁 𑀜𑀢𑁆𑀯𑀸 𑀕𑀭𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀓𑀸𑀮𑀫𑀓𑀸𑀲𑀻𑀢𑀺 𑀉𑀧𑀚𑁆𑀛𑀸𑀬𑁂 𑀧𑀓𑁆𑀓𑀦𑁆𑀢𑁂 𑀓𑀸𑀮𑀫𑀓𑀸𑀲𑀺. 𑀧𑀤𑀼𑀫𑀁 𑀦𑀺𑀭𑀬𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀧𑀤𑀼𑀫𑀦𑀺𑀭𑀬𑁄 𑀦𑀸𑀫 𑀦𑀢𑁆𑀣𑀺, 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀫𑁆𑀳𑀺𑀬𑁂𑀯 𑀧𑀦 𑀧𑀤𑀼𑀫𑀕𑀡𑀦𑀸𑀬 𑀧𑀘𑁆𑀘𑀺𑀢𑀩𑁆𑀩𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀯𑀻𑀲𑀢𑀺𑀔𑀸𑀭𑀺𑀓𑁄𑀢𑀺 𑀫𑀸𑀕𑀥𑀓𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀓𑁄𑀲𑀮𑀭𑀝𑁆𑀞𑁂 𑀏𑀓𑀧𑀢𑁆𑀣𑁄 𑀳𑁄𑀢𑀺, 𑀢𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀆𑀴𑁆𑀳𑀓𑀁, 𑀘𑀢𑁆𑀢𑀸𑀭𑀺 𑀆𑀴𑁆𑀳𑀓𑀸𑀦𑀺 𑀤𑁄𑀡𑀁, 𑀘𑀢𑀼𑀤𑁄𑀡𑀸 𑀫𑀸𑀦𑀺𑀓𑀸, 𑀘𑀢𑀼𑀫𑀸𑀦𑀺𑀓𑀸 𑀔𑀸𑀭𑀻, 𑀢𑀸𑀬 𑀔𑀸𑀭𑀺𑀬𑀸 𑀯𑀻𑀲𑀢𑀺𑀔𑀸𑀭𑀺𑀓𑁄. 𑀢𑀺𑀮𑀯𑀸𑀳𑁄𑀢𑀺 𑀫𑀸𑀕𑀥𑀓𑀸𑀦𑀁 𑀲𑀼𑀔𑀼𑀫𑀢𑀺𑀮𑀸𑀦𑀁 𑀢𑀺𑀮𑀲𑀓𑀝𑀁. 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄𑀢𑀺 𑀅𑀩𑁆𑀩𑀼𑀤𑁄 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀦𑀺𑀭𑀬𑁄 𑀦𑀢𑁆𑀣𑀺. 𑀅𑀯𑀻𑀘𑀺𑀫𑁆𑀳𑀺𑀬𑁂𑀯 𑀧𑀦 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀘𑁆𑀘𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀲𑁆𑀲𑀕𑀡𑀦𑀸𑀧𑀺 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑁂𑀯 𑀳𑀺 𑀲𑀢𑀁 𑀲𑀢𑀲𑀳𑀲𑁆𑀲𑀸𑀦𑀺 𑀓𑁄𑀝𑀺 𑀳𑁄𑀢𑀺, 𑀏𑀯𑀁 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀬𑁄 𑀧𑀓𑁄𑀝𑀺 𑀦𑀸𑀫 𑀳𑁄𑀢𑀺, 𑀲𑀢𑀁 𑀲𑀢𑀲𑀳𑀲𑁆𑀲𑀧𑀓𑁄𑀝𑀺𑀬𑁄 𑀓𑁄𑀝𑀺𑀧𑀓𑁄𑀝𑀺 𑀦𑀸𑀫, 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀧𑀓𑁄𑀝𑀺𑀬𑁄 𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀳𑀼𑀢𑀸𑀦𑀺 𑀦𑀺𑀦𑁆𑀦𑀳𑀼𑀢𑀁, 𑀲𑀢𑀁 𑀲𑀢𑀲𑀳𑀲𑁆𑀲𑀦𑀺𑀦𑁆𑀦𑀳𑀼𑀢𑀸𑀦𑀺 𑀏𑀓𑀁 𑀅𑀩𑁆𑀩𑀼𑀤𑀁, 𑀢𑀢𑁄 𑀯𑀻𑀲𑀢𑀺𑀕𑀼𑀡𑀁 𑀦𑀺𑀭𑀩𑁆𑀩𑀼𑀤𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.