𑁪. 𑀫𑀸𑀭𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀢𑀧𑁄𑀓𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁭. 𑀫𑀸𑀭𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀻𑀢𑀺 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀉𑀭𑀼𑀯𑁂𑀮𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁 𑀅𑀦𑁆𑀢𑁄𑀲𑀢𑁆𑀢𑀸𑀳𑀲𑁆𑀫𑀺𑀁𑀬𑁂𑀯. 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬𑀸𑀢𑀺 𑀙𑀩𑁆𑀩𑀲𑁆𑀲𑀸𑀦𑀺 𑀓𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬. 𑀫𑀸𑀭𑁄 𑀧𑀸𑀧𑀺𑀫𑀸𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀧𑀝𑀺𑀧𑀦𑁆𑀦𑁂 𑀲𑀢𑁆𑀢𑁂 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀧𑀸𑀧𑁂 𑀦𑀺𑀬𑁄𑀚𑁂𑀢𑀺, 𑀲𑀬𑀁 𑀯𑀸 𑀧𑀸𑀧𑁂 𑀦𑀺𑀬𑀼𑀢𑁆𑀢𑁄𑀢𑀺 𑀧𑀸𑀧𑀺𑀫𑀸. 𑀅𑀜𑁆𑀜𑀸𑀦𑀺𑀧𑀺𑀲𑁆𑀲 𑀓𑀡𑁆𑀳𑁄, 𑀅𑀥𑀺𑀧𑀢𑀺, 𑀯𑀲𑀯𑀢𑁆𑀢𑀻, 𑀅𑀦𑁆𑀢𑀓𑁄, 𑀦𑀫𑀼𑀘𑀺, 𑀧𑀫𑀢𑁆𑀢𑀩𑀦𑁆𑀥𑀽𑀢𑀺𑀆𑀤𑀻𑀦𑀺 𑀩𑀳𑀽𑀦𑀺 𑀦𑀸𑀫𑀸𑀦𑀺, 𑀇𑀥 𑀧𑀦 𑀦𑀸𑀫𑀤𑁆𑀯𑀬𑀫𑁂𑀯 𑀕𑀳𑀺𑀢𑀁. 𑀉𑀧𑀲𑀗𑁆𑀓𑀫𑀻𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 ‘𑀫𑀼𑀢𑁆𑀢𑁄𑀲𑁆𑀫𑀻’𑀢𑀺 𑀫𑀜𑁆𑀜𑀢𑀺, 𑀅𑀫𑀼𑀢𑁆𑀢𑀪𑀸𑀯𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺.

𑀢𑀧𑁄𑀓𑀫𑁆𑀫𑀸 𑀅𑀧𑀓𑁆𑀓𑀫𑁆𑀫𑀸𑀢𑀺 𑀢𑀧𑁄𑀓𑀫𑁆𑀫𑀢𑁄 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀅𑀧𑀭𑀤𑁆𑀥𑁄𑀢𑀺 ‘‘𑀤𑀽𑀭𑁂 𑀢𑁆𑀯𑀁 𑀲𑀼𑀤𑁆𑀥𑀺𑀫𑀕𑁆𑀕𑀸’’𑀢𑀺 𑀯𑀤𑀢𑀺. 𑀅𑀫𑀭𑀁 𑀢𑀧𑀦𑁆𑀢𑀺 𑀅𑀫𑀭𑀢𑀧𑀁 𑀅𑀫𑀭𑀪𑀸𑀯𑀢𑁆𑀣𑀸𑀬 𑀓𑀢𑀁 𑀮𑀽𑀔𑀢𑀧𑀁, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄. 𑀲𑀩𑁆𑀩𑀸𑀦𑀢𑁆𑀣𑀸𑀯𑀳𑀁 𑀳𑁄𑀢𑀻𑀢𑀺, ‘‘𑀲𑀩𑁆𑀩𑀁 𑀢𑀧𑀁 𑀫𑀬𑁆𑀳𑀁 𑀅𑀢𑁆𑀣𑀸𑀯𑀳𑀁 𑀦 𑀪𑀯𑀢𑀻’’𑀢𑀺 𑀜𑀢𑁆𑀯𑀸. 𑀨𑀺𑀬𑀸𑀭𑀺𑀢𑁆𑀢𑀁𑀯 𑀥𑀫𑁆𑀫𑀦𑀻𑀢𑀺 𑀅𑀭𑀜𑁆𑀜𑁂 𑀣𑀮𑁂 𑀨𑀺𑀬𑀸𑀭𑀺𑀢𑁆𑀢𑀁 𑀯𑀺𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀭𑀜𑁆𑀜𑁂 𑀣𑀮𑁂 𑀦𑀸𑀯𑀁 𑀞𑀧𑁂𑀢𑁆𑀯𑀸 𑀪𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀫𑀳𑀸𑀚𑀦𑀸 𑀅𑀪𑀺𑀭𑀽𑀳𑀺𑀢𑁆𑀯𑀸 𑀨𑀺𑀬𑀸𑀭𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀁𑀓𑀟𑁆𑀠𑁂𑀬𑁆𑀬𑀼𑀁 𑀘𑁂𑀯 𑀉𑀧𑁆𑀧𑀻𑀮𑁂𑀬𑁆𑀬𑀼𑀁 𑀘, 𑀲𑁄 𑀫𑀳𑀸𑀚𑀦𑀲𑁆𑀲 𑀯𑀸𑀬𑀸𑀫𑁄 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀦𑀸𑀯𑀸𑀬 𑀕𑀫𑀦𑀁 𑀅𑀲𑀸𑀥𑁂𑀦𑁆𑀢𑁄 𑀦𑀺𑀭𑀢𑁆𑀣𑀓𑁄 𑀪𑀯𑁂𑀬𑁆𑀬 𑀦 𑀅𑀦𑀢𑁆𑀣𑀸𑀯𑀳𑁄, 𑀏𑀯𑀫𑁂𑀯 𑀅𑀳𑀁 ‘𑀲𑀩𑁆𑀩𑀁 𑀅𑀫𑀭𑀁 𑀢𑀧𑀁 𑀅𑀦𑀢𑁆𑀣𑀸𑀯𑀳𑀁 𑀳𑁄𑀢𑀻’𑀢𑀺 𑀜𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺𑀦𑁆𑀢𑀺.

𑀇𑀤𑀸𑀦𑀺 𑀢𑀁 𑀅𑀫𑀭𑀁 𑀢𑀧𑀁 𑀧𑀳𑀸𑀬 𑀬𑁂𑀦 𑀫𑀕𑁆𑀕𑁂𑀦 𑀩𑀼𑀤𑁆𑀥𑁄 𑀚𑀸𑀢𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀻𑀮𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀦𑁆𑀢𑀺 𑀯𑀘𑀦𑁂𑀦 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀕𑀳𑀺𑀢𑀸, 𑀲𑀫𑀸𑀥𑀺𑀦𑀸 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄, 𑀧𑀜𑁆𑀜𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸. 𑀫𑀕𑁆𑀕𑀁 𑀩𑁄𑀥𑀸𑀬 𑀪𑀸𑀯𑀬𑀦𑁆𑀢𑀺 𑀇𑀫𑀁 𑀅𑀝𑁆𑀞𑀗𑁆𑀕𑀺𑀓𑀫𑁂𑀯 𑀅𑀭𑀺𑀬𑀫𑀕𑁆𑀕𑀁 𑀩𑁄𑀥𑀢𑁆𑀣𑀸𑀬 𑀪𑀸𑀯𑀬𑀦𑁆𑀢𑁄. 𑀏𑀢𑁆𑀣 𑀘 𑀩𑁄𑀥𑀸𑀬𑀸𑀢𑀺 𑀫𑀕𑁆𑀕𑀢𑁆𑀣𑀸𑀬. 𑀬𑀣𑀸 𑀳𑀺 𑀬𑀸𑀕𑀼𑀢𑁆𑀣𑀸𑀬 𑀬𑀸𑀕𑀼𑀫𑁂𑀯 𑀧𑀘𑀦𑁆𑀢𑀺, 𑀧𑀽𑀯𑀢𑁆𑀣𑀸𑀬 𑀧𑀽𑀯𑀫𑁂𑀯 𑀧𑀘𑀦𑁆𑀢𑀺, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀺, 𑀏𑀯𑀁 𑀫𑀕𑁆𑀕𑀫𑁂𑀯 𑀫𑀕𑁆𑀕𑀢𑁆𑀣𑀸𑀬 𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀫𑀕𑁆𑀕𑀁 𑀩𑁄𑀥𑀸𑀬 𑀪𑀸𑀯𑀬’’𑀦𑁆𑀢𑀺. 𑀧𑀭𑀫𑀁 𑀲𑀼𑀤𑁆𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀦𑀺𑀳𑀢𑁄𑀢𑀺 𑀢𑁆𑀯𑀁 𑀫𑀬𑀸 𑀦𑀺𑀳𑀢𑁄 𑀧𑀭𑀸𑀚𑀺𑀢𑁄. 𑀧𑀞𑀫𑀁.

𑁨. 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁮. 𑀤𑀼𑀢𑀺𑀬𑁂 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀭𑀢𑁆𑀢𑀺𑀁 𑀅𑀦𑁆𑀥𑀪𑀸𑀯𑀓𑀸𑀭𑀓𑁂 𑀫𑀳𑀸𑀢𑀫𑁂 𑀘𑀢𑀼𑀭𑀗𑁆𑀕𑁂 𑀢𑀫𑀲𑀺. 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀸𑀲𑀸𑀡𑀨𑀮𑀓𑁂 𑀫𑀳𑀸𑀘𑀻𑀯𑀭𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀧𑀥𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀦𑀦𑀼 𑀘 𑀢𑀣𑀸𑀕𑀢𑀲𑁆𑀲 𑀅𑀪𑀸𑀯𑀺𑀢𑁄 𑀯𑀸 𑀫𑀕𑁆𑀕𑁄, 𑀅𑀧𑁆𑀧𑀳𑀻𑀦𑀸 𑀯𑀸 𑀓𑀺𑀮𑁂𑀲𑀸, 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀯𑀸 𑀅𑀓𑀼𑀧𑁆𑀧𑀁, 𑀅𑀲𑀘𑁆𑀙𑀺𑀓𑀢𑁄 𑀯𑀸 𑀦𑀺𑀭𑁄𑀥𑁄 𑀦𑀢𑁆𑀣𑀺, 𑀓𑀲𑁆𑀫𑀸 𑀏𑀯𑀫𑀓𑀸𑀲𑀻𑀢𑀺? 𑀅𑀦𑀸𑀕𑀢𑁂 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀗𑁆𑀓𑀼𑀲𑀢𑁆𑀣𑀁. ‘‘𑀅𑀦𑀸𑀕𑀢𑁂 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀫𑀬𑀸 𑀕𑀢𑀫𑀕𑁆𑀕𑀁 𑀆𑀯𑀚𑁆𑀚𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀯𑀸𑀲𑀁 𑀯𑀲𑀺𑀢𑀩𑁆𑀩𑀁 𑀫𑀜𑁆𑀜𑀫𑀸𑀦𑀸 𑀧𑀥𑀸𑀦𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀲𑀢𑁆𑀣𑀸 𑀏𑀯𑀫𑀓𑀸𑀲𑀺. 𑀫𑀳𑀸𑀢𑀺 𑀫𑀳𑀦𑁆𑀢𑁄. 𑀅𑀭𑀺𑀝𑁆𑀞𑀓𑁄𑀢𑀺 𑀓𑀸𑀴𑀓𑁄. 𑀫𑀡𑀻𑀢𑀺 𑀧𑀸𑀲𑀸𑀡𑁄. 𑀏𑀯𑀫𑀲𑁆𑀲 𑀲𑀻𑀲𑀁 𑀳𑁄𑀢𑀻𑀢𑀺 𑀏𑀯𑀭𑀽𑀧𑀁 𑀢𑀲𑁆𑀲 𑀓𑀸𑀴𑀯𑀡𑁆𑀡𑀁 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁 𑀫𑀳𑀸𑀧𑀸𑀲𑀸𑀡𑀲𑀤𑀺𑀲𑀁 𑀲𑀻𑀲𑀁 𑀳𑁄𑀢𑀺.

𑀲𑀼𑀪𑀸𑀲𑀼𑀪𑀦𑁆𑀢𑀺 𑀤𑀻𑀖𑀫𑀤𑁆𑀥𑀸𑀦𑀁 𑀲𑀁𑀲𑀭𑀦𑁆𑀢𑁄 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀁 𑀯𑀡𑁆𑀡𑀁 𑀓𑀢𑁆𑀯𑀸 𑀆𑀕𑀢𑁄𑀲𑀻𑀢𑀺 𑀯𑀤𑀢𑀺. 𑀅𑀣 𑀯𑀸 𑀲𑀁𑀲𑀭𑀦𑁆𑀢𑀺 𑀲𑀁𑀲𑀭𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑁄. 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀯𑀲𑀯𑀢𑁆𑀢𑀺𑀝𑁆𑀞𑀸𑀦𑀢𑁄 𑀬𑀸𑀯 𑀉𑀭𑀼𑀯𑁂𑀮𑀸𑀬 𑀤𑀻𑀖𑀫𑀕𑁆𑀕𑀁, 𑀧𑀼𑀭𑁂 𑀩𑁄𑀥𑀸𑀬 𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑀲𑀗𑁆𑀔𑀸𑀢𑀁 𑀤𑀻𑀖𑀓𑀸𑀮𑀁. 𑀯𑀡𑁆𑀡𑀁 𑀓𑀢𑁆𑀯𑀸 𑀲𑀼𑀪𑀸𑀲𑀼𑀪𑀦𑁆𑀢𑀺 𑀲𑀼𑀦𑁆𑀤𑀭𑀜𑁆𑀘 𑀅𑀲𑀼𑀦𑁆𑀤𑀭𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀁 𑀯𑀡𑁆𑀡𑀁 𑀓𑀢𑁆𑀯𑀸 𑀅𑀦𑁂𑀓𑀯𑀸𑀭𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀓𑀺𑀭 𑀯𑀡𑁆𑀡𑁄 𑀦𑀸𑀫 𑀦𑀢𑁆𑀣𑀺, 𑀬𑁂𑀦 𑀯𑀡𑁆𑀡𑁂𑀦 𑀫𑀸𑀭𑁄 𑀯𑀺𑀪𑀺𑀁𑀲𑀓𑀢𑁆𑀣𑀸𑀬 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀦 𑀆𑀕𑀢𑀧𑀼𑀩𑁆𑀩𑁄. 𑀢𑁂𑀦 𑀢𑀁 𑀪𑀕𑀯𑀸 𑀏𑀯𑀫𑀸𑀳. 𑀅𑀮𑀁 𑀢𑁂 𑀢𑁂𑀦𑀸𑀢𑀺 𑀅𑀮𑀁 𑀢𑀼𑀬𑁆𑀳𑀁 𑀏𑀢𑁂𑀦 𑀫𑀸𑀭𑀯𑀺𑀪𑀺𑀁𑀲𑀸𑀓𑀸𑀭𑀤𑀲𑁆𑀲𑀦𑀩𑁆𑀬𑀸𑀧𑀸𑀭𑁂𑀦. 𑀤𑀼𑀢𑀺𑀬𑀁.

𑁩. 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀢𑀢𑀺𑀬𑁂 𑀲𑀼𑀲𑀁𑀯𑀼𑀢𑀸𑀢𑀺 𑀲𑀼𑀧𑀺𑀳𑀺𑀢𑀸. 𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸𑀢𑀺, 𑀫𑀸𑀭, 𑀢𑁂 𑀢𑀼𑀬𑁆𑀳𑀁 𑀯𑀲𑀸𑀦𑀼𑀕𑀸 𑀦 𑀳𑁄𑀦𑁆𑀢𑀺. 𑀦 𑀢𑁂 𑀫𑀸𑀭𑀲𑁆𑀲 𑀩𑀤𑁆𑀥𑀕𑀽𑀢𑀺 𑀢𑁂 𑀢𑀼𑀬𑁆𑀳𑀁 𑀫𑀸𑀭𑀲𑁆𑀲 𑀩𑀤𑁆𑀥𑀘𑀭𑀸 𑀲𑀺𑀲𑁆𑀲𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀦 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑁪. 𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀘𑀢𑀼𑀢𑁆𑀣𑁂 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦. 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀉𑀧𑀸𑀬𑀯𑀻𑀭𑀺𑀬𑁂𑀦 𑀓𑀸𑀭𑀡𑀯𑀻𑀭𑀺𑀬𑁂𑀦. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺. 𑀅𑀚𑁆𑀛𑀪𑀸𑀲𑀻𑀢𑀺 ‘‘𑀅𑀬𑀁 𑀅𑀢𑁆𑀢𑀦𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀧𑀺 𑀦 𑀢𑀼𑀲𑁆𑀲𑀢𑀺, 𑀇𑀤𑀸𑀦𑀺 𑀅𑀜𑁆𑀜𑁂𑀲𑀫𑁆𑀧𑀺 ‘𑀧𑀸𑀧𑀼𑀡𑀸𑀣𑀸’𑀢𑀺 𑀉𑀲𑁆𑀲𑀸𑀳𑀁 𑀓𑀭𑁄𑀢𑀺, 𑀧𑀝𑀺𑀩𑀸𑀳𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀪𑀸𑀲𑀺.

𑀫𑀸𑀭𑀧𑀸𑀲𑁂𑀦𑀸𑀢𑀺 𑀓𑀺𑀮𑁂𑀲𑀧𑀸𑀲𑁂𑀦. 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸𑀢𑀺 𑀬𑁂 𑀤𑀺𑀩𑁆𑀩𑀸 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸 𑀫𑀸𑀦𑀼𑀲𑀸 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸 𑀘 𑀫𑀸𑀭𑀧𑀸𑀲𑀸 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁂𑀳𑀺 𑀢𑁂𑀳𑀺 𑀢𑁆𑀯𑀁 𑀩𑀤𑁆𑀥𑁄𑀢𑀺 𑀯𑀤𑀢𑀺. 𑀫𑀸𑀭𑀩𑀦𑁆𑀥𑀦𑀩𑀤𑁆𑀥𑁄𑀢𑀺 𑀫𑀸𑀭𑀩𑀦𑁆𑀥𑀦𑁂𑀦 𑀩𑀤𑁆𑀥𑁄, 𑀫𑀸𑀭𑀩𑀦𑁆𑀥𑀦𑁂 𑀯𑀸 𑀩𑀤𑁆𑀥𑁄. 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻𑀢𑀺 𑀲𑀫𑀡 𑀢𑁆𑀯𑀁 𑀫𑀫 𑀯𑀺𑀲𑀬𑀢𑁄 𑀦 𑀫𑀼𑀘𑁆𑀘𑀺𑀲𑁆𑀲𑀲𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀧𑀜𑁆𑀘𑀫𑁂 𑀫𑀼𑀢𑁆𑀢𑀸𑀳𑀦𑁆𑀢𑀺 𑀫𑀼𑀢𑁆𑀢𑁄 𑀅𑀳𑀁. 𑀧𑀼𑀭𑀺𑀫𑀁 𑀲𑀼𑀢𑁆𑀢𑀁 𑀅𑀦𑁆𑀢𑁄𑀯𑀲𑁆𑀲𑁂 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀧𑀯𑀸𑀭𑁂𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑀓𑀸𑀮𑁂. 𑀘𑀸𑀭𑀺𑀓𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀕𑀫𑀦𑀘𑀸𑀭𑀺𑀓𑀁. (𑀧𑀯𑀸𑀭𑁂𑀢𑁆𑀯𑀸) 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀧𑀭𑀫𑀁 𑀕𑀘𑁆𑀙𑀦𑁆𑀢𑀸 𑀘𑀭𑀣𑀸𑀢𑀺 𑀯𑀤𑀢𑀺. 𑀫𑀸 𑀏𑀓𑁂𑀦 𑀤𑁆𑀯𑁂𑀢𑀺 𑀏𑀓𑀫𑀕𑁆𑀕𑁂𑀦 𑀤𑁆𑀯𑁂 𑀚𑀦𑀸 𑀫𑀸 𑀅𑀕𑀫𑀺𑀢𑁆𑀣. 𑀏𑀯𑀜𑁆𑀳𑀺 𑀕𑀢𑁂𑀲𑀼 𑀏𑀓𑀲𑁆𑀫𑀺𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂, 𑀏𑀓𑁂𑀦 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀆𑀤𑀺𑀓𑀮𑁆𑀬𑀸𑀡𑀦𑁆𑀢𑀺 𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁. 𑀢𑀣𑀸 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀜𑁆𑀘 𑀦𑀸𑀫𑁂𑀢𑀁 𑀲𑀸𑀲𑀦𑀲𑁆𑀲 𑀘 𑀤𑁂𑀲𑀦𑀸𑀬 𑀘 𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀲𑀦𑀲𑁆𑀲 𑀲𑀻𑀮𑀁 𑀆𑀤𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀲𑀻𑀮𑀲𑀫𑀸𑀥𑀬𑁄 𑀯𑀸 𑀆𑀤𑀺, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀯𑀸 𑀆𑀤𑀺, 𑀫𑀕𑁆𑀕𑁄 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀤𑁂𑀲𑀦𑀸𑀬 𑀧𑀦 𑀘𑀢𑀼𑀧𑁆𑀧𑀤𑀺𑀓𑀸𑀬 𑀕𑀸𑀣𑀸𑀬 𑀢𑀸𑀯 𑀧𑀞𑀫𑀧𑀸𑀤𑁄 𑀆𑀤𑀺, 𑀤𑀼𑀢𑀺𑀬𑀢𑀢𑀺𑀬𑀸 𑀫𑀚𑁆𑀛𑀁, 𑀘𑀢𑀼𑀢𑁆𑀣𑁄 𑀧𑀭𑀺𑀬𑁄𑀲𑀸𑀦𑀁. 𑀧𑀜𑁆𑀘𑀧𑀤𑀙𑀧𑁆𑀧𑀤𑀸𑀦𑀁 𑀧𑀞𑀫𑀧𑀸𑀤𑁄 𑀆𑀤𑀺, 𑀅𑀯𑀲𑀸𑀦𑀧𑀸𑀤𑁄 𑀧𑀭𑀺𑀬𑁄𑀲𑀸𑀦𑀁, 𑀅𑀯𑀲𑁂𑀲𑀸 𑀫𑀚𑁆𑀛𑀁. 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀆𑀤𑀺, ‘‘𑀇𑀤𑀫𑀯𑁄𑀘𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀁, 𑀲𑁂𑀲𑀁 𑀫𑀚𑁆𑀛𑀁. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀫𑀚𑁆𑀛𑁂 𑀩𑀳𑀽𑀧𑀺 𑀅𑀦𑀼𑀲𑀦𑁆𑀥𑀺 𑀫𑀚𑁆𑀛𑀫𑁂𑀯, 𑀦𑀺𑀤𑀸𑀦𑀁 𑀆𑀤𑀺, ‘‘𑀇𑀤𑀫𑀯𑁄𑀘𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀁.

𑀲𑀸𑀢𑁆𑀣𑀦𑁆𑀢𑀺 𑀲𑀸𑀢𑁆𑀣𑀓𑀁 𑀓𑀢𑁆𑀯𑀸 𑀤𑁂𑀲𑁂𑀣. 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑁂𑀳𑀺 𑀘𑁂𑀯 𑀧𑀤𑁂𑀳𑀺 𑀘 𑀧𑀭𑀺𑀧𑀽𑀭𑀁 𑀓𑀢𑁆𑀯𑀸 𑀤𑁂𑀲𑁂𑀣. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀓𑀮𑀧𑀭𑀺𑀧𑀼𑀡𑁆𑀡𑀁. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀧𑀓𑀸𑀲𑁂𑀣𑀸𑀢𑀺 𑀆𑀯𑀺𑀓𑀭𑁄𑀣.

𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀫𑁆𑀳𑀺 𑀅𑀧𑁆𑀧𑀓𑀺𑀮𑁂𑀲𑀭𑀚𑀲𑀪𑀸𑀯𑀸, 𑀤𑀼𑀓𑀽𑀮𑀲𑀸𑀡𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀸 𑀯𑀺𑀬 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀸 𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀯𑀦𑀢𑀸𑀢𑀺 𑀅𑀲𑁆𑀲𑀯𑀦𑀢𑀸𑀬. 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀅𑀮𑀸𑀪𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀢𑁄 𑀧𑀭𑀺𑀳𑀸𑀬𑀦𑁆𑀢𑀺. 𑀲𑁂𑀦𑀸𑀦𑀺𑀕𑀫𑁄𑀢𑀺 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀲𑁂𑀦𑀸𑀬 𑀦𑀺𑀯𑀺𑀝𑁆𑀞𑁄𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑀕𑀸𑀫𑁄, 𑀲𑀼𑀚𑀸𑀢𑀸𑀬 𑀯𑀸 𑀧𑀺𑀢𑀼 𑀲𑁂𑀦𑀸𑀦𑀻 𑀦𑀸𑀫 𑀦𑀺𑀕𑀫𑁄. 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀦𑀸𑀳𑀁 𑀢𑀼𑀫𑁆𑀳𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑀸𑀤𑀻𑀳𑀺 𑀧𑀭𑀺𑀘𑀭𑀺𑀬𑀫𑀸𑀦𑁄 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀢𑀺𑀡𑁆𑀡𑀁 𑀧𑀦 𑀚𑀝𑀺𑀮𑀸𑀦𑀁 𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀼𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻𑀢𑀺. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺, ‘‘𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀸𑀬𑀼𑀤𑁆𑀥𑀁 𑀯𑀺𑀘𑀸𑀭𑁂𑀦𑁆𑀢𑁄 𑀯𑀺𑀬, ‘𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣, 𑀥𑀫𑁆𑀫𑀁 𑀤𑁂𑀲𑁂𑀣𑀸’𑀢𑀺 𑀲𑀝𑁆𑀞𑀺 𑀚𑀦𑁂 𑀉𑀬𑁆𑀬𑁄𑀚𑁂𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀏𑀓𑀲𑁆𑀫𑀺𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀫𑀬𑁆𑀳𑀁 𑀘𑀺𑀢𑁆𑀢𑀲𑁆𑀲𑀸𑀤𑀁 𑀦𑀢𑁆𑀣𑀺, 𑀏𑀯𑀁 𑀩𑀳𑀽𑀲𑀼 𑀤𑁂𑀲𑁂𑀦𑁆𑀢𑁂𑀲𑀼 𑀓𑀼𑀢𑁄 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀩𑀸𑀳𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀧𑀜𑁆𑀘𑀫𑀁.

𑁬. 𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁨. 𑀙𑀝𑁆𑀞𑁂 𑀲𑁄𑀡𑁆𑀟𑀺𑀓𑀸𑀓𑀺𑀮𑀜𑁆𑀚𑀦𑁆𑀢𑀺 𑀲𑀼𑀭𑀸𑀓𑀸𑀭𑀓𑀸𑀦𑀁 𑀧𑀺𑀝𑁆𑀞𑀧𑀢𑁆𑀣𑀭𑀡𑀓𑀓𑀺𑀮𑀜𑁆𑀚𑀁. 𑀓𑁄𑀲𑀮𑀺𑀓𑀸 𑀓𑀁𑀲𑀧𑀸𑀢𑀻𑀢𑀺 𑀓𑁄𑀲𑀮𑀭𑀜𑁆𑀜𑁄 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑀸 𑀧𑀭𑀺𑀪𑁄𑀕𑀧𑀸𑀢𑀺. 𑀕𑀴𑀕𑀴𑀸𑀬𑀦𑁆𑀢𑁂𑀢𑀺 𑀕𑀚𑁆𑀚𑀦𑁆𑀢𑁂. 𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀬𑀸𑀢𑀺 𑀓𑀫𑁆𑀫𑀸𑀭𑀼𑀤𑁆𑀥𑀦𑀧𑀡𑀸𑀴𑀺𑀬𑀸. 𑀥𑀫𑀫𑀸𑀦𑀸𑀬𑀸𑀢𑀺 𑀪𑀲𑁆𑀢𑀯𑀸𑀢𑁂𑀦 𑀧𑀽𑀭𑀺𑀬𑀫𑀸𑀦𑀸𑀬. 𑀇𑀢𑀺 𑀯𑀺𑀤𑀺𑀢𑁆𑀯𑀸𑀢𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄 𑀲𑀼𑀔𑁂𑀦 𑀦𑀺𑀲𑀺𑀦𑁆𑀦𑁄, 𑀖𑀝𑁆𑀝𑀬𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀦𑀺𑀬𑀸𑀫𑀪𑀽𑀫𑀺𑀬𑀁 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀦𑁆𑀢𑀁 𑀯𑀺𑀚𑁆𑀚𑀼𑀮𑀢𑀸𑀮𑁄𑀓𑁂𑀦 𑀤𑀺𑀲𑁆𑀯𑀸, ‘‘𑀓𑁄 𑀦𑀼 𑀔𑁄 𑀏𑀲𑁄 𑀲𑀢𑁆𑀢𑁄’’𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄, ‘‘𑀫𑀸𑀭𑁄 𑀅𑀬’’𑀦𑁆𑀢𑀺 𑀏𑀯𑀁 𑀯𑀺𑀤𑀺𑀢𑁆𑀯𑀸.

𑀲𑀼𑀜𑁆𑀜𑀕𑁂𑀳𑀸𑀦𑀻𑀢𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺. 𑀲𑁂𑀬𑁆𑀬𑀸𑀢𑀺 𑀲𑁂𑀬𑁆𑀬𑀢𑁆𑀣𑀸𑀬. 𑀞𑀲𑁆𑀲𑀸𑀫𑀺 𑀘𑀗𑁆𑀓𑀫𑀺𑀲𑁆𑀲𑀸𑀫𑀺 𑀦𑀺𑀲𑀻𑀤𑀺𑀲𑁆𑀲𑀸𑀫𑀺 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀏𑀢𑀤𑀢𑁆𑀣𑀸𑀬 𑀬𑁄 𑀲𑀼𑀜𑁆𑀜𑀸𑀕𑀸𑀭𑀸𑀦𑀺 𑀲𑁂𑀯𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀫𑀼𑀦𑀺 𑀅𑀢𑁆𑀢𑀲𑀜𑁆𑀜𑀢𑁄𑀢𑀺 𑀲𑁄 𑀩𑀼𑀤𑁆𑀥𑀫𑀼𑀦𑀺 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀸𑀪𑀸𑀯𑁂𑀦 𑀲𑀁𑀬𑀢𑀢𑁆𑀢𑀪𑀸𑀯𑁄. 𑀯𑁄𑀲𑁆𑀲𑀚𑁆𑀚 𑀘𑀭𑁂𑀬𑁆𑀬 𑀢𑀢𑁆𑀣 𑀲𑁄𑀢𑀺 𑀲𑁄 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀆𑀮𑀬𑀁 𑀦𑀺𑀓𑀦𑁆𑀢𑀺𑀁 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀳𑀸𑀬 𑀘𑀭𑁂𑀬𑁆𑀬. 𑀧𑀢𑀺𑀭𑀽𑀧𑀁 𑀳𑀺 𑀢𑀣𑀸𑀯𑀺𑀥𑀲𑁆𑀲 𑀢𑀦𑁆𑀢𑀺 𑀢𑀸𑀤𑀺𑀲𑀲𑁆𑀲 𑀢𑀁𑀲𑀡𑁆𑀞𑀺𑀢𑀲𑁆𑀲 𑀩𑀼𑀤𑁆𑀥𑀫𑀼𑀦𑀺𑀦𑁄 𑀢𑀁 𑀅𑀢𑁆𑀢𑀪𑀸𑀯𑁂 𑀦𑀺𑀓𑀦𑁆𑀢𑀺𑀁 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀭𑀡𑀁 𑀦𑀸𑀫 𑀧𑀢𑀺𑀭𑀽𑀧𑀁 𑀬𑀼𑀢𑁆𑀢𑀁 𑀅𑀦𑀼𑀘𑁆𑀙𑀯𑀺𑀓𑀁.

𑀘𑀭𑀓𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀓𑀸 𑀲𑀜𑁆𑀘𑀭𑀡𑀲𑀢𑁆𑀢𑀸. 𑀪𑁂𑀭𑀯𑀸𑀢𑀺 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀪𑁂𑀭𑀯𑀸. 𑀢𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀸 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀅𑀯𑀺𑀜𑁆𑀜𑀸𑀡𑀓𑀸 𑀭𑀢𑁆𑀢𑀺𑀪𑀸𑀕𑁂 𑀔𑀸𑀡𑀼𑀯𑀫𑁆𑀫𑀺𑀓𑀸𑀤𑀬𑁄. 𑀢𑁂𑀧𑀺 𑀳𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀓𑁆𑀔𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀭𑀚𑁆𑀚𑀼𑀯𑀮𑁆𑀮𑀺𑀬𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀧𑁆𑀧𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀪𑁂𑀭𑀯𑁂𑀲𑀼 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀩𑀼𑀤𑁆𑀥𑀫𑀼𑀦𑀺 𑀮𑁄𑀫𑀘𑀮𑀦𑀫𑀢𑁆𑀢𑀓𑀫𑁆𑀧𑀺 𑀦 𑀓𑀭𑁄𑀢𑀺.

𑀇𑀤𑀸𑀦𑀺 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀦𑀪𑀁 𑀨𑀮𑁂𑀬𑁆𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀮𑁂𑀬𑁆𑀬𑀸𑀢𑀺 𑀓𑀸𑀓𑀧𑀤𑀁 𑀯𑀺𑀬 𑀳𑀻𑀭𑀳𑀻𑀭𑀲𑁄 𑀨𑀮𑁂𑀬𑁆𑀬. 𑀘𑀮𑁂𑀬𑁆𑀬𑀸𑀢𑀺 𑀧𑁄𑀓𑁆𑀔𑀭𑀧𑀢𑁆𑀢𑁂 𑀯𑀸𑀢𑀸𑀳𑀢𑁄 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀘𑀮𑁂𑀬𑁆𑀬. 𑀲𑀮𑁆𑀮𑀫𑁆𑀧𑀺 𑀘𑁂 𑀉𑀭𑀲𑀺 𑀧𑀓𑀧𑁆𑀧𑀬𑁂𑀬𑁆𑀬𑀼𑀦𑁆𑀢𑀺 𑀢𑀺𑀔𑀺𑀡𑀲𑀢𑁆𑀢𑀺𑀲𑀮𑁆𑀮𑀁 𑀘𑁂𑀧𑀺 𑀉𑀭𑀲𑁆𑀫𑀺𑀁 𑀘𑀸𑀭𑁂𑀬𑁂𑀬𑁆𑀬𑀼𑀁. 𑀉𑀧𑀥𑀻𑀲𑀽𑀢𑀺 𑀔𑀦𑁆𑀥𑀽𑀧𑀥𑀻𑀲𑀼. 𑀢𑀸𑀡𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀢𑀺𑀔𑀺𑀡𑁂 𑀲𑀮𑁆𑀮𑁂 𑀉𑀭𑀲𑁆𑀫𑀺𑀁 𑀘𑀸𑀭𑀺𑀬𑀫𑀸𑀦𑁂 𑀪𑀬𑁂𑀦 𑀕𑀼𑀫𑁆𑀩𑀦𑁆𑀢𑀭𑀓𑀦𑁆𑀤𑀭𑀸𑀤𑀻𑀦𑀺 𑀧𑀯𑀺𑀲𑀦𑁆𑀢𑀸 𑀢𑀸𑀡𑀁 𑀓𑀭𑁄𑀦𑁆𑀢𑀺 𑀦𑀸𑀫. 𑀩𑀼𑀤𑁆𑀥𑀸 𑀧𑀦 𑀲𑀫𑀼𑀘𑁆𑀙𑀺𑀦𑁆𑀦𑀲𑀩𑁆𑀩𑀪𑀬𑀸 𑀏𑀯𑀭𑀽𑀧𑀁 𑀢𑀸𑀡𑀁 𑀦𑀸𑀫 𑀦 𑀓𑀭𑁄𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀼𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁩. 𑀲𑀢𑁆𑀢𑀫𑁂 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸𑀢𑀺 𑀉𑀢𑀼𑀕𑀸𑀳𑀸𑀧𑀦𑀢𑁆𑀣𑀁 𑀥𑁄𑀯𑀺𑀢𑁆𑀯𑀸. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀦 𑀉𑀧𑀮𑀺𑀫𑁆𑀧𑀢𑀺, 𑀉𑀤𑀓𑀫𑁆𑀧𑀺 𑀧𑁄𑀓𑁆𑀔𑀭𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀯𑀺𑀯𑀝𑁆𑀝𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀧𑀺𑀘 𑀔𑁄 𑀥𑁄𑀢𑀧𑀸𑀤𑀓𑁂 𑀕𑁂𑀳𑁂 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀲𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀯𑀢𑁆𑀢𑀁. 𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀯𑀢𑁆𑀢𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀯𑀢𑁆𑀢𑀲𑀻𑀲𑁂 𑀧𑀦 𑀞𑀢𑁆𑀯𑀸 𑀥𑁄𑀯𑀦𑁆𑀢𑀺. 𑀲𑀘𑁂 𑀳𑀺 𑀢𑀣𑀸𑀕𑀢𑁄 𑀦𑁂𑀯 𑀦𑁆𑀳𑀸𑀬𑁂𑀬𑁆𑀬, 𑀦 𑀧𑀸𑀤𑁂 𑀥𑁄𑀯𑁂𑀬𑁆𑀬, ‘‘𑀦𑀸𑀬𑀁 𑀫𑀦𑀼𑀲𑁆𑀲𑁄’’𑀢𑀺 𑀯𑀤𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀫𑀦𑀼𑀲𑁆𑀲𑀓𑀺𑀭𑀺𑀬𑀁 𑀅𑀫𑀼𑀜𑁆𑀘𑀦𑁆𑀢𑁄 𑀥𑁄𑀯𑀢𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑁄𑀧𑁆𑀧𑀧𑀭𑀺𑀕𑁆𑀕𑀸𑀳𑀓𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺, 𑀅𑀢𑀺𑀯𑀺𑀬 𑀲𑀼𑀔𑀲𑀬𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀖𑀝𑁆𑀝𑀬𑀺𑀲𑁆𑀲𑀸𑀫𑀺 𑀦𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺.

𑀓𑀺𑀁 𑀲𑁄𑀧𑁆𑀧𑀲𑀻𑀢𑀺 𑀓𑀺𑀁 𑀲𑀼𑀧𑀲𑀺, 𑀓𑀺𑀁 𑀲𑁄𑀧𑁆𑀧𑀁 𑀦𑀸𑀫𑀺𑀤𑀁 𑀢𑀯𑀸𑀢𑀺 𑀯𑀤𑀢𑀺. 𑀓𑀺𑀁 𑀦𑀼 𑀲𑁄𑀧𑁆𑀧𑀲𑀻𑀢𑀺 𑀓𑀲𑁆𑀫𑀸 𑀦𑀼 𑀲𑀼𑀧𑀲𑀺? 𑀤𑀼𑀩𑁆𑀪𑀕𑁄 𑀯𑀺𑀬𑀸𑀢𑀺 𑀫𑀢𑁄 𑀯𑀺𑀬, 𑀯𑀺𑀲𑀜𑁆𑀜𑀻 𑀯𑀺𑀬 𑀘. 𑀲𑀼𑀜𑁆𑀜𑀫𑀕𑀸𑀭𑀦𑁆𑀢𑀺 𑀲𑀼𑀜𑁆𑀜𑀁 𑀫𑁂 𑀖𑀭𑀁 𑀮𑀤𑁆𑀥𑀦𑁆𑀢𑀺 𑀲𑁄𑀧𑁆𑀧𑀲𑀻𑀢𑀺 𑀯𑀤𑀢𑀺. 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂𑀢𑀺 𑀲𑀽𑀭𑀺𑀬𑀫𑁆𑀳𑀺 𑀉𑀝𑁆𑀞𑀺𑀢𑁂. 𑀇𑀤𑀸𑀦𑀺 𑀳𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀲𑀫𑁆𑀫𑀚𑁆𑀚𑀦𑁆𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀪𑀺𑀓𑁆𑀔𑀸𑀘𑀸𑀭𑀕𑀫𑀦𑀲𑀚𑁆𑀚𑀸 𑀪𑀯𑀦𑁆𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀲𑁄𑀧𑁆𑀧𑀲𑀺𑀬𑁂𑀯.

𑀚𑀸𑀮𑀺𑀦𑀻𑀢𑀺 𑀢𑀬𑁄 𑀪𑀯𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁂𑀦 ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬 𑀅𑀝𑁆𑀞𑀸𑀭𑀲𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁪𑁨) 𑀢𑁂𑀦 𑀢𑁂𑀦 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀪𑀽𑀢𑁂𑀦 𑀚𑀸𑀮𑁂𑀦 𑀚𑀸𑀮𑀺𑀦𑀻. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀭𑀽𑀧𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀺𑀲𑀢𑁆𑀢𑀢𑀸𑀬 𑀯𑀺𑀲𑀫𑀽𑀮𑀢𑀸𑀬 𑀯𑀺𑀲𑀧𑀭𑀺𑀪𑁄𑀕𑀢𑀸𑀬 𑀘 𑀯𑀺𑀲𑀢𑁆𑀢𑀺𑀓𑀸. 𑀓𑀼𑀳𑀺𑀜𑁆𑀘𑀺 𑀦𑁂𑀢𑀯𑁂𑀢𑀺 𑀓𑀢𑁆𑀣𑀘𑀺 𑀦𑁂𑀢𑀼𑀁. 𑀲𑀩𑁆𑀩𑀽𑀧𑀥𑀺 𑀧𑀭𑀺𑀓𑁆𑀔𑀬𑀸𑀢𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀓𑀸𑀫𑀕𑀼𑀡𑀪𑁂𑀤𑀸𑀦𑀁 𑀉𑀧𑀥𑀻𑀦𑀁 𑀧𑀭𑀺𑀓𑁆𑀔𑀬𑀸. 𑀓𑀺𑀁 𑀢𑀯𑁂𑀢𑁆𑀣, 𑀫𑀸𑀭𑀸𑀢𑀺, 𑀫𑀸𑀭, 𑀢𑀼𑀬𑁆𑀳𑀁 𑀓𑀺𑀁 𑀏𑀢𑁆𑀣? 𑀓𑀲𑁆𑀫𑀸 𑀢𑁆𑀯𑀁 𑀉𑀡𑁆𑀳𑀬𑀸𑀕𑀼𑀬𑀁 𑀦𑀺𑀮𑀻𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀯𑀺𑀬 𑀅𑀦𑁆𑀢𑀦𑁆𑀢𑁂𑀦𑁂𑀯 𑀉𑀚𑁆𑀛𑀸𑀬𑀦𑁆𑀢𑁄 𑀆𑀳𑀺𑀡𑁆𑀟𑀲𑀻𑀢𑀺. 𑀲𑀢𑁆𑀢𑀫𑀁.

𑁮. 𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀅𑀝𑁆𑀞𑀫𑀁 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀝𑁆𑀞𑀫𑀁.

𑁯. 𑀧𑀞𑀫𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁫. 𑀦𑀯𑀫𑁂 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄𑀢𑀺 𑀪𑀺𑀬𑁆𑀬𑁄 𑀚𑀻𑀯𑀦𑁆𑀢𑁄 𑀅𑀧𑀭𑀁 𑀯𑀲𑁆𑀲𑀲𑀢𑀁 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀡𑁆𑀡𑀸𑀲𑀁 𑀯𑀸 𑀲𑀝𑁆𑀞𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺. 𑀅𑀚𑁆𑀛𑀪𑀸𑀲𑀻𑀢𑀺 𑀲𑀫𑀡𑁄 𑀕𑁄𑀢𑀫𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀫𑀸𑀬𑀽’’𑀢𑀺 𑀓𑀣𑁂𑀢𑀺, 𑀤𑀻𑀖𑀪𑀸𑀯𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻𑀢𑀺 𑀧𑀘𑁆𑀘𑀦𑀻𑀓𑀲𑀸𑀢𑀢𑀸𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀪𑀸𑀲𑀺.

𑀦 𑀦𑀁 𑀳𑀻𑀴𑁂𑀢𑀺 𑀢𑀁 𑀆𑀬𑀼𑀁 ‘‘𑀅𑀧𑁆𑀧𑀓𑀫𑀺𑀤’’𑀦𑁆𑀢𑀺 𑀦 𑀳𑀻𑀴𑁂𑀬𑁆𑀬. 𑀔𑀻𑀭𑀫𑀢𑁆𑀢𑁄 𑀯𑀸𑀢𑀺 𑀬𑀣𑀸 𑀤𑀳𑀭𑁄 𑀓𑀼𑀫𑀸𑀭𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀔𑀻𑀭𑀁 𑀧𑀺𑀯𑀺𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀦𑀺𑀧𑀦𑁆𑀦𑁄 𑀅𑀲𑀜𑁆𑀜𑀻 𑀯𑀺𑀬 𑀦𑀺𑀤𑁆𑀤𑀸𑀬𑀢𑀺, 𑀓𑀲𑁆𑀲𑀘𑀺 𑀆𑀬𑀼𑀁 𑀅𑀧𑁆𑀧𑀁 𑀯𑀸 𑀤𑀻𑀖𑀁 𑀯𑀸𑀢𑀺 𑀦 𑀘𑀺𑀦𑁆𑀢𑁂𑀢𑀺, 𑀏𑀯𑀁 𑀲𑀧𑁆𑀧𑀼𑀭𑀺𑀲𑁄. 𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄 𑀯𑀸𑀢𑀺 𑀆𑀬𑀼𑀁 𑀧𑀭𑀺𑀢𑁆𑀢𑀦𑁆𑀢𑀺 𑀜𑀢𑁆𑀯𑀸 𑀧𑀚𑁆𑀚𑀮𑀺𑀢𑀲𑀻𑀲𑁄 𑀯𑀺𑀬 𑀘𑀭𑁂𑀬𑁆𑀬. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀤𑀲𑀫𑁂 𑀦𑁂𑀫𑀻𑀯 𑀭𑀣𑀓𑀼𑀩𑁆𑀩𑀭𑀦𑁆𑀢𑀺 𑀬𑀣𑀸 𑀤𑀺𑀯𑀲𑀁 𑀕𑀘𑁆𑀙𑀦𑁆𑀢𑀲𑁆𑀲 𑀭𑀣𑀲𑁆𑀲 𑀘𑀓𑁆𑀓𑀦𑁂𑀫𑀺 𑀓𑀼𑀩𑁆𑀩𑀭𑀁 𑀅𑀦𑀼𑀧𑀭𑀺𑀬𑀸𑀬𑀢𑀺 𑀦 𑀯𑀺𑀚𑀳𑀢𑀺, 𑀏𑀯𑀁 𑀆𑀬𑀼 𑀅𑀦𑀼𑀧𑀭𑀺𑀬𑀸𑀬𑀢𑀻𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀸𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀺𑀲𑀺𑀦𑁆𑀦𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀥𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀦𑀺𑀲𑀺𑀦𑁆𑀦𑁄. 𑀫𑀸𑀭𑁄𑀧𑀺𑀲𑁆𑀲 𑀲𑀼𑀔𑀦𑀺𑀲𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀖𑀝𑁆𑀝𑀬𑀺𑀲𑁆𑀲𑀸𑀫𑀻𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀧𑀤𑀸𑀮𑁂𑀲𑀻𑀢𑀺 𑀧𑀩𑁆𑀩𑀢𑀧𑀺𑀝𑁆𑀞𑁂 𑀞𑀢𑁆𑀯𑀸 𑀧𑀯𑀺𑀚𑁆𑀛𑀺. 𑀧𑀸𑀲𑀸𑀡𑀸 𑀦𑀺𑀭𑀦𑁆𑀢𑀭𑀸 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀳𑀦𑀦𑁆𑀢𑀸 𑀧𑀢𑀦𑁆𑀢𑀺. 𑀓𑁂𑀯𑀮𑀦𑁆𑀢𑀺 𑀲𑀓𑀮𑀁. 𑀲𑀩𑁆𑀩𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀞𑀫𑀁.

𑁨. 𑀓𑀺𑀦𑁆𑀦𑀼𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀤𑀼𑀢𑀺𑀬𑁂 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸𑀢𑀺 𑀧𑀭𑀺𑀲𑀸𑀬 𑀧𑀜𑁆𑀜𑀸𑀘𑀓𑁆𑀔𑀼𑀁 𑀯𑀺𑀦𑀸𑀲𑁂𑀢𑀼𑀓𑀫𑁆𑀬𑀢𑀸𑀬. 𑀩𑀼𑀤𑁆𑀥𑀸𑀦𑀁 𑀧𑀦𑁂𑀲 𑀧𑀜𑁆𑀜𑀸𑀘𑀓𑁆𑀔𑀼𑀁 𑀯𑀺𑀦𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀭𑀺𑀲𑀸𑀬 𑀪𑁂𑀭𑀯𑀸𑀭𑀫𑁆𑀫𑀡𑀁 𑀲𑀸𑀯𑁂𑀦𑁆𑀢𑁄 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀸 𑀲𑀓𑁆𑀓𑁄𑀢𑀺. 𑀯𑀺𑀚𑀺𑀢𑀸𑀯𑀻 𑀦𑀼 𑀫𑀜𑁆𑀜𑀲𑀻𑀢𑀺 𑀓𑀺𑀁 𑀦𑀼 𑀢𑁆𑀯𑀁 ‘‘𑀯𑀺𑀚𑀺𑀢𑀯𑀺𑀚𑀬𑁄 𑀅𑀳’’𑀦𑁆𑀢𑀺 𑀫𑀜𑁆𑀜𑀲𑀺? 𑀫𑀸 𑀏𑀯𑀁 𑀫𑀜𑁆𑀜𑀺, 𑀦𑀢𑁆𑀣𑀺 𑀢𑁂 𑀚𑀬𑁄. 𑀧𑀭𑀺𑀲𑀸𑀲𑀽𑀢𑀺, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀩𑀮𑀧𑁆𑀧𑀢𑁆𑀢𑀸𑀢𑀺 𑀤𑀲𑀩𑀮𑀧𑁆𑀧𑀢𑁆𑀢𑀸. 𑀤𑀼𑀢𑀺𑀬𑀁.

𑁩. 𑀲𑀓𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀢𑀢𑀺𑀬𑁂 𑀫𑀦𑁆𑀤𑀺𑀬𑀸 𑀦𑀽𑀢𑀺 𑀫𑀦𑁆𑀤𑀪𑀸𑀯𑁂𑀦 𑀫𑁄𑀫𑀽𑀳𑀪𑀸𑀯𑁂𑀦. 𑀉𑀤𑀸𑀳𑀼 𑀓𑀸𑀯𑁂𑀬𑁆𑀬𑀫𑀢𑁆𑀢𑁄𑀢𑀺 𑀉𑀤𑀸𑀳𑀼 𑀬𑀣𑀸 𑀓𑀯𑀺 𑀓𑀩𑁆𑀩𑀁 𑀘𑀺𑀦𑁆𑀢𑁂𑀦𑁆𑀢𑁄 𑀢𑁂𑀦 𑀓𑀩𑁆𑀩𑀓𑀭𑀡𑁂𑀦 𑀫𑀢𑁆𑀢𑁄 𑀲𑀬𑀢𑀺, 𑀏𑀯𑀁 𑀲𑀬𑀲𑀺. 𑀲𑀫𑁆𑀧𑀘𑀼𑀭𑀸𑀢𑀺 𑀩𑀳𑀯𑁄. 𑀓𑀺𑀫𑀺𑀤𑀁 𑀲𑁄𑀧𑁆𑀧𑀲𑁂 𑀯𑀸𑀢𑀺 𑀓𑀲𑁆𑀫𑀸 𑀇𑀤𑀁 𑀲𑁄𑀧𑁆𑀧𑀁 𑀲𑁄𑀧𑁆𑀧𑀲𑀺𑀬𑁂𑀯? 𑀅𑀢𑁆𑀣𑀁 𑀲𑀫𑁂𑀘𑁆𑀘𑀸𑀢𑀺 𑀅𑀢𑁆𑀣𑀁 𑀲𑀫𑀸𑀕𑀦𑁆𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸. 𑀫𑀬𑁆𑀳𑀁 𑀳𑀺 𑀅𑀲𑀗𑁆𑀕𑀳𑁄 𑀦𑀸𑀫 𑀲𑀗𑁆𑀕𑀳𑀯𑀺𑀧𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺. 𑀲𑀮𑁆𑀮𑀦𑁆𑀢𑀺 𑀢𑀺𑀔𑀺𑀡𑀁 𑀲𑀢𑁆𑀢𑀺𑀲𑀮𑁆𑀮𑀁. 𑀚𑀕𑁆𑀕𑀁 𑀦 𑀲𑀗𑁆𑀓𑁂𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀲𑀻𑀳𑀧𑀣𑀸𑀤𑀻𑀲𑀼 𑀚𑀕𑁆𑀕𑀦𑁆𑀢𑁄 𑀲𑀗𑁆𑀓𑀢𑀺, 𑀢𑀣𑀸 𑀅𑀳𑀁 𑀚𑀕𑁆𑀕𑀦𑁆𑀢𑁄𑀧𑀺 𑀦 𑀲𑀗𑁆𑀓𑀸𑀫𑀺. 𑀦𑀧𑀺 𑀪𑁂𑀫𑀺 𑀲𑁄𑀢𑁆𑀢𑀼𑀦𑁆𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀲𑀻𑀳𑀧𑀣𑀸𑀤𑀻𑀲𑀼𑀬𑁂𑀯 𑀲𑀼𑀧𑀺𑀢𑀼𑀁 𑀪𑀸𑀬𑀢𑀺, 𑀏𑀯𑀁 𑀅𑀳𑀁 𑀲𑀼𑀧𑀺𑀢𑀼𑀫𑁆𑀧𑀺 𑀦 𑀪𑀸𑀬𑀸𑀫𑀺. 𑀦𑀸𑀦𑀼𑀢𑀧𑀦𑁆𑀢𑀺 𑀫𑀸𑀫𑀦𑁆𑀢𑀺 𑀬𑀣𑀸 𑀆𑀘𑀭𑀺𑀬𑀲𑁆𑀲 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀸 𑀅𑀨𑀸𑀲𑀼𑀓𑁂 𑀚𑀸𑀢𑁂 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬 𑀞𑀺𑀢𑀢𑁆𑀢𑀸 𑀅𑀦𑁆𑀢𑁂𑀯𑀸𑀲𑀺𑀁 𑀭𑀢𑁆𑀢𑀺𑀦𑁆𑀤𑀺𑀯𑀸 𑀅𑀢𑀺𑀓𑁆𑀓𑀫𑀦𑁆𑀢𑀸 𑀅𑀦𑀼𑀢𑀧𑀦𑁆𑀢𑀺, 𑀏𑀯𑀁 𑀫𑀁 𑀦𑀸𑀦𑀼𑀢𑀧𑀦𑁆𑀢𑀺. 𑀦 𑀳𑀺 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀅𑀧𑀭𑀺𑀦𑀺𑀝𑁆𑀞𑀺𑀢𑀓𑀫𑁆𑀫𑀁 𑀦𑀸𑀫 𑀅𑀢𑁆𑀣𑀺. 𑀢𑁂𑀦𑁂𑀯𑀸𑀳 𑀳𑀸𑀦𑀺𑀁 𑀦 𑀧𑀲𑁆𑀲𑀸𑀫𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺. 𑀢𑀢𑀺𑀬𑀁.

𑁪. 𑀧𑀢𑀺𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁦. 𑀘𑀢𑀼𑀢𑁆𑀣𑁂 𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀲𑀽𑀢𑀺 𑀭𑀸𑀕𑀧𑀝𑀺𑀖𑁂𑀲𑀼. 𑀫𑀸 𑀲𑀚𑁆𑀚𑀺𑀢𑁆𑀣𑁄 𑀢𑀤𑀸𑀘𑀭𑀦𑁆𑀢𑀺 𑀏𑀯𑀁 𑀥𑀫𑁆𑀫𑀓𑀣𑀁 𑀆𑀘𑀭𑀦𑁆𑀢𑁄 𑀫𑀸 𑀮𑀕𑁆𑀕𑀺. 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀳𑀺 𑀏𑀓𑀘𑁆𑀘𑁂 𑀲𑀸𑀥𑀼𑀓𑀸𑀭𑀁 𑀤𑀤𑀦𑁆𑀢𑀺, 𑀢𑁂𑀲𑀼 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀓𑀘𑁆𑀘𑁂 𑀅𑀲𑀓𑁆𑀓𑀘𑁆𑀘𑀁 𑀲𑀼𑀡𑀦𑁆𑀢𑀺, 𑀢𑁂𑀲𑀼 𑀧𑀝𑀺𑀖𑁄 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀥𑀫𑁆𑀫𑀓𑀣𑀺𑀓𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀲𑀼 𑀲𑀚𑁆𑀚𑀢𑀺 𑀦𑀸𑀫. 𑀢𑁆𑀯𑀁 𑀏𑀯𑀁 𑀫𑀸 𑀲𑀚𑁆𑀚𑀺𑀢𑁆𑀣𑁄𑀢𑀺 𑀯𑀤𑀢𑀺. 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀻𑀢𑀺 𑀬𑀁 𑀅𑀜𑁆𑀜𑀁 𑀅𑀦𑀼𑀲𑀸𑀲𑀢𑀺, 𑀢𑀁. 𑀲𑀫𑁆𑀩𑀼𑀤𑁆𑀥𑁄 𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑀺𑀢𑁂𑀦 𑀅𑀦𑀼𑀧𑀓𑀫𑁆𑀧𑀢𑀺. 𑀬𑀲𑁆𑀫𑀸 𑀘 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀢𑀲𑁆𑀫𑀸 𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄 𑀢𑀣𑀸𑀕𑀢𑁄𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀸𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀧𑀜𑁆𑀘𑀫𑁂 𑀆𑀓𑀸𑀲𑁂 𑀘𑀭𑀦𑁆𑀢𑁂𑀧𑀺 𑀩𑀦𑁆𑀥𑀢𑀻𑀢𑀺 𑀅𑀦𑁆𑀢𑀮𑀺𑀓𑁆𑀔𑀘𑀭𑁄. 𑀧𑀸𑀲𑁄𑀢𑀺 𑀭𑀸𑀕𑀧𑀸𑀲𑁄. 𑀫𑀸𑀦𑀲𑁄𑀢𑀺 𑀫𑀦𑀲𑀫𑁆𑀧𑀬𑀼𑀢𑁆𑀢𑁄. 𑀧𑀜𑁆𑀘𑀫𑀁.

𑁬. 𑀧𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁨. 𑀙𑀝𑁆𑀞𑁂 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀧𑀜𑁆𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀆𑀤𑀺𑀬𑀺𑀢𑁆𑀯𑀸, 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄. 𑀲𑀦𑁆𑀤𑀲𑁆𑀲𑁂𑀢𑀻𑀢𑀺 𑀔𑀦𑁆𑀥𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀸𑀤𑀻𑀦𑀺 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 𑀕𑀡𑁆𑀳𑀸𑀧𑁂𑀢𑀺. 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀲𑀫𑀸𑀤𑀸𑀦𑀫𑁆𑀳𑀺 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀦 𑀯𑁄𑀤𑀸𑀧𑁂𑀢𑀺 𑀚𑁄𑀢𑀸𑀧𑁂𑀢𑀺. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀺𑀓𑀁 𑀓𑀢𑁆𑀯𑀸, ‘‘𑀅𑀬𑀁 𑀦𑁄 𑀅𑀥𑀺𑀕𑀦𑁆𑀢𑀩𑁆𑀩𑁄 𑀅𑀢𑁆𑀣𑁄’’𑀢𑀺 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀣𑀺𑀓𑀸 𑀳𑀼𑀢𑁆𑀯𑀸. 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸. 𑀲𑀩𑁆𑀩𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀲𑀩𑁆𑀩𑁂𑀦 𑀢𑁂𑀦 𑀓𑀫𑁆𑀫𑀓𑀸𑀭𑀓𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸. 𑀑𑀳𑀺𑀢𑀲𑁄𑀢𑀸𑀢𑀺 𑀞𑀧𑀺𑀢𑀸𑀲𑁄𑀢𑀸. 𑀅𑀩𑁆𑀪𑁄𑀓𑀸𑀲𑁂 𑀦𑀺𑀓𑁆𑀔𑀺𑀢𑁆𑀢𑀸𑀢𑀺 𑀑𑀢𑀸𑀧𑀦𑀢𑁆𑀣𑀸𑀬 𑀞𑀧𑀺𑀢𑀸.

𑀭𑀽𑀧𑀁 𑀯𑁂𑀤𑀬𑀺𑀢𑀁 𑀲𑀜𑁆𑀜𑀸𑀦𑁆𑀢𑀺, 𑀏𑀢𑁂 𑀭𑀽𑀧𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀬𑀜𑁆𑀘 𑀲𑀗𑁆𑀔𑀢𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀕𑀳𑀺𑀢𑁄. 𑀏𑀯𑀁 𑀢𑀢𑁆𑀣 𑀯𑀺𑀭𑀚𑁆𑀚𑀢𑀻𑀢𑀺 ‘‘𑀏𑀲𑁄 𑀅𑀳𑀁 𑀦 𑀳𑁄𑀫𑀺, 𑀏𑀢𑀁 𑀫𑀬𑁆𑀳𑀁 𑀦 𑀳𑁄𑀢𑀻’’𑀢𑀺 𑀧𑀲𑁆𑀲𑀦𑁆𑀢𑁄 𑀏𑀯𑀁 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀯𑀺𑀭𑀚𑁆𑀚𑀢𑀺. 𑀔𑁂𑀫𑀢𑁆𑀢𑀦𑁆𑀢𑀺 𑀔𑁂𑀫𑀻𑀪𑀽𑀢𑀁 𑀅𑀢𑁆𑀢𑀪𑀸𑀯𑀁. 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀅𑀦𑁆𑀯𑁂𑀲𑀦𑁆𑀢𑀺 𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀗𑁆𑀔𑀸𑀢𑁂𑀲𑀼 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀧𑀭𑀺𑀬𑁂𑀲𑀫𑀸𑀦𑀸. 𑀦𑀸𑀚𑁆𑀛𑀕𑀸𑀢𑀺 𑀦 𑀧𑀲𑁆𑀲𑀻𑀢𑀺. 𑀙𑀝𑁆𑀞𑀁.

𑁭. 𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀲𑀢𑁆𑀢𑀫𑁂 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑁂𑀦 𑀙𑀤𑁆𑀯𑀸𑀭𑀺𑀓𑀲𑁆𑀲 𑀨𑀲𑁆𑀲𑀲𑁆𑀲 𑀆𑀬𑀢𑀦𑀸𑀦𑀁. 𑀪𑀬𑀪𑁂𑀭𑀯𑀁 𑀲𑀤𑁆𑀤𑀦𑁆𑀢𑀺 𑀫𑁂𑀖𑀤𑀼𑀦𑁆𑀤𑀼𑀪𑀺𑀅𑀲𑀦𑀺𑀧𑀸𑀢𑀲𑀤𑁆𑀤𑀲𑀤𑀺𑀲𑀁 𑀪𑀬𑀚𑀦𑀓𑀁 𑀲𑀤𑁆𑀤𑀁. 𑀧𑀣𑀯𑀻 𑀫𑀜𑁆𑀜𑁂 𑀉𑀦𑁆𑀤𑁆𑀭𑀻𑀬𑀢𑀻𑀢𑀺 𑀅𑀬𑀁 𑀫𑀳𑀸𑀧𑀣𑀯𑀻 𑀧𑀝𑀧𑀝𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀯𑀺𑀬 𑀅𑀳𑁄𑀲𑀺. 𑀏𑀢𑁆𑀣 𑀮𑁄𑀓𑁄 𑀯𑀺𑀫𑀼𑀘𑁆𑀙𑀺𑀢𑁄𑀢𑀺 𑀏𑀢𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀮𑁄𑀓𑁄 𑀅𑀥𑀺𑀫𑀼𑀘𑁆𑀙𑀺𑀢𑁄. 𑀫𑀸𑀭𑀥𑁂𑀬𑁆𑀬𑀦𑁆𑀢𑀺 𑀫𑀸𑀭𑀲𑁆𑀲 𑀞𑀸𑀦𑀪𑀽𑀢𑀁 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀲𑀢𑁆𑀢𑀫𑀁.

𑁮. 𑀧𑀺𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁪. 𑀅𑀝𑁆𑀞𑀫𑁂 𑀧𑀸𑀳𑀼𑀦𑀓𑀸𑀦𑀺 𑀪𑀯𑀦𑁆𑀢𑀻𑀢𑀺 𑀢𑀣𑀸𑀭𑀽𑀧𑁂 𑀦𑀓𑁆𑀔𑀢𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀧𑁂𑀲𑁂𑀢𑀩𑁆𑀩𑀸𑀦𑀺 𑀧𑀸𑀳𑀼𑀦𑀓𑀸𑀦𑀺 𑀪𑀯𑀦𑁆𑀢𑀺, 𑀆𑀕𑀦𑁆𑀢𑀼𑀓𑀧𑀡𑁆𑀡𑀸𑀓𑀸𑀭𑀤𑀸𑀦𑀸𑀦𑀺 𑀯𑀸. 𑀲𑀬𑀁𑀘𑀭𑀡𑀤𑀺𑀯𑀲𑁂 𑀲𑀫𑀯𑀬𑀚𑀸𑀢𑀺𑀕𑁄𑀢𑁆𑀢𑀸 𑀓𑀼𑀫𑀸𑀭𑀓𑀸 𑀢𑀢𑁄 𑀢𑀢𑁄 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀓𑀼𑀫𑀸𑀭𑀺𑀓𑀸𑀬𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀅𑀮𑀗𑁆𑀓𑀢𑀸 𑀢𑀳𑀁 𑀢𑀳𑀁 𑀯𑀺𑀘𑀭𑀦𑁆𑀢𑀺. 𑀢𑀢𑁆𑀭 𑀓𑀼𑀫𑀸𑀭𑀺𑀓𑀸𑀬𑁄𑀧𑀺 𑀬𑀣𑀸𑀭𑀼𑀘𑀺𑀓𑀸𑀦𑀁 𑀓𑀼𑀫𑀸𑀭𑀓𑀸𑀦𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀦𑁆𑀢𑀺, 𑀓𑀼𑀫𑀸𑀭𑀓𑀸𑀧𑀺 𑀓𑀼𑀫𑀸𑀭𑀺𑀓𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀅𑀲𑀢𑀺 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑁂𑀦𑀧𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑀺. 𑀅𑀦𑁆𑀯𑀸𑀯𑀺𑀝𑁆𑀞𑀸𑀢𑀺 𑀅𑀦𑀼 𑀆𑀯𑀺𑀝𑁆𑀞𑀸. 𑀢𑀁𑀤𑀺𑀯𑀲𑀁 𑀓𑀺𑀭 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀓𑀸𑀬𑁄 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑀺𑀬𑁄 𑀧𑀝𑀺𑀧𑀣𑁂 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀙𑀡𑀧𑀽𑀯𑀁 𑀤𑀤𑁂𑀬𑁆𑀬𑀼𑀁. 𑀲𑀢𑁆𑀣𑀸 𑀢𑀸𑀲𑀁 𑀤𑀸𑀦𑀸𑀦𑀼𑀫𑁄𑀤𑀦𑀢𑁆𑀣𑀁 𑀧𑀓𑀺𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀬𑁆𑀬, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑁂𑀬𑁆𑀬𑀼𑀁. 𑀫𑀸𑀭𑁄 𑀢𑀸𑀲𑀁 𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀦𑁆𑀯𑀸𑀯𑀺𑀲𑀺. 𑀧𑀸𑀴𑀺𑀬𑀁 𑀧𑀦 𑀫𑀸 𑀲𑀫𑀡𑁄 𑀕𑁄𑀢𑀫𑁄 𑀧𑀺𑀡𑁆𑀟𑀫𑀮𑀢𑁆𑀣𑀸𑀢𑀺 𑀏𑀢𑁆𑀢𑀓𑀁𑀬𑁂𑀯 𑀯𑀼𑀢𑁆𑀢𑀦𑁆𑀢𑀺.

𑀓𑀺𑀁 𑀧𑀦 𑀲𑀢𑁆𑀣𑀸 𑀫𑀸𑀭𑀸𑀯𑀝𑁆𑀝𑀦𑀁 𑀅𑀚𑀸𑀦𑀺𑀢𑁆𑀯𑀸 𑀧𑀯𑀺𑀝𑁆𑀞𑁄𑀢𑀺? 𑀆𑀫 𑀅𑀚𑀸𑀦𑀺𑀢𑁆𑀯𑀸. 𑀓𑀲𑁆𑀫𑀸? 𑀅𑀦𑀸𑀯𑀚𑁆𑀚𑀦𑀢𑀸𑀬. 𑀩𑀼𑀤𑁆𑀥𑀸𑀦𑀜𑁆𑀳𑀺 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀪𑀢𑁆𑀢𑀁 𑀮𑀪𑀺𑀲𑁆𑀲𑀸𑀫, 𑀦 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀆𑀯𑀚𑁆𑀚𑀦𑀁 𑀦 𑀅𑀦𑀦𑀼𑀘𑁆𑀙𑀯𑀺𑀓𑀁. 𑀧𑀯𑀺𑀝𑁆𑀞𑁄 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀉𑀧𑀘𑀸𑀭𑀪𑁂𑀤𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀇𑀤’’𑀦𑁆𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄 𑀜𑀢𑁆𑀯𑀸, ‘‘𑀆𑀫𑀺𑀲𑀢𑁆𑀣𑀁 𑀫𑀸𑀭𑀸𑀯𑀝𑁆𑀝𑀦𑀁 𑀪𑀺𑀦𑁆𑀤𑀺𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀅𑀪𑀺𑀦𑁆𑀤𑀺𑀢𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄.

𑀉𑀧𑀲𑀗𑁆𑀓𑀫𑀻𑀢𑀺 𑀅𑀫𑀺𑀢𑁆𑀢𑀯𑀺𑀚𑀬𑁂𑀦 𑀯𑀺𑀬 𑀢𑀼𑀝𑁆𑀞𑁄 𑀲𑀓𑀮𑀕𑀸𑀫𑁂 𑀓𑀝𑀘𑁆𑀙𑀼𑀫𑀢𑁆𑀢𑀫𑁆𑀧𑀺 𑀪𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀪𑀕𑀯𑀦𑁆𑀢𑀁 𑀕𑀸𑀫𑀺𑀬𑀫𑀦𑀼𑀲𑁆𑀲𑀯𑁂𑀲𑁂𑀦 𑀉𑀧𑀲𑀗𑁆𑀓𑀫𑀺. 𑀢𑀣𑀸𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀇𑀤𑀁 𑀲𑁄 𑀫𑀼𑀲𑀸 𑀪𑀸𑀲𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀬𑀸 𑀏𑀯𑀁 𑀯𑀼𑀢𑁆𑀢𑁂 𑀧𑀼𑀦 𑀧𑀯𑀺𑀲𑀺𑀲𑁆𑀲𑀢𑀺, 𑀅𑀣 𑀦𑀁 𑀕𑀸𑀫𑀤𑀸𑀭𑀓𑀸 ‘𑀲𑀓𑀮𑀕𑀸𑀫𑁂 𑀘𑀭𑀺𑀢𑁆𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑁆𑀫 𑀧𑀼𑀦 𑀧𑀯𑀺𑀝𑁆𑀞𑁄𑀲𑀻’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀉𑀧𑁆𑀧𑀡𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀸 𑀧𑀦 𑁋 ‘‘𑀲𑀘𑀸𑀬𑀁 𑀫𑀁 𑀏𑀯𑀁 𑀯𑀺𑀳𑁂𑀞𑁂𑀲𑁆𑀲𑀢𑀺 𑀫𑀼𑀤𑁆𑀥𑀫𑀲𑁆𑀲𑁂𑀯 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀸𑀬 𑀅𑀧𑀯𑀺𑀲𑀺𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀢𑀢𑁆𑀣 𑀧𑀲𑀯𑀻𑀢𑀺 𑀚𑀦𑁂𑀲𑀺 𑀦𑀺𑀧𑁆𑀨𑀸𑀤𑁂𑀲𑀺. 𑀆𑀲𑀚𑁆𑀚𑀸𑀢𑀺 𑀆𑀲𑀸𑀤𑁂𑀢𑁆𑀯𑀸 𑀖𑀝𑁆𑀝𑁂𑀢𑁆𑀯𑀸. 𑀦 𑀫𑁂 𑀧𑀸𑀧𑀁 𑀯𑀺𑀧𑀘𑁆𑀘𑀢𑀻𑀢𑀺 𑀫𑀫 𑀧𑀸𑀧𑀁 𑀦 𑀧𑀘𑁆𑀘𑀢𑀺. 𑀦𑀺𑀧𑁆𑀨𑀮𑀁 𑀏𑀢𑀦𑁆𑀢𑀺 𑀓𑀺𑀁 𑀦𑀼 𑀢𑁆𑀯𑀁 𑀏𑀯𑀁 𑀫𑀜𑁆𑀜𑀲𑀺? 𑀫𑀸 𑀏𑀯𑀁 𑀫𑀜𑁆𑀜𑀺, 𑀅𑀢𑁆𑀣𑀺 𑀢𑀬𑀸 𑀓𑀢𑀲𑁆𑀲 𑀧𑀸𑀧𑀲𑁆𑀲 𑀨𑀮𑀦𑁆𑀢𑀺 𑀤𑀻𑀧𑁂𑀢𑀺. 𑀓𑀺𑀜𑁆𑀘𑀦𑀦𑁆𑀢𑀺 𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣𑀁 𑀭𑀸𑀕𑀓𑀺𑀜𑁆𑀘𑀦𑀸𑀤𑀺 𑀓𑀺𑀮𑁂𑀲𑀚𑀸𑀢𑀁. 𑀆𑀪𑀲𑁆𑀲𑀭𑀸 𑀬𑀣𑀸𑀢𑀺 𑀬𑀣𑀸 𑀆𑀪𑀲𑁆𑀲𑀭𑀸 𑀤𑁂𑀯𑀸 𑀲𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑁂𑀦 𑀬𑀸𑀧𑁂𑀦𑁆𑀢𑀸 𑀧𑀻𑀢𑀺𑀪𑀓𑁆𑀔𑀸 𑀦𑀸𑀫 𑀳𑁄𑀦𑁆𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀸𑀫𑀸𑀢𑀺. 𑀅𑀝𑁆𑀞𑀫𑀁.

𑁯. 𑀓𑀲𑁆𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁫. 𑀦𑀯𑀫𑁂 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀁 𑀅𑀧𑀤𑀺𑀲𑀺𑀢𑁆𑀯𑀸 𑀧𑀯𑀢𑁆𑀢𑀸𑀬. 𑀳𑀝𑀳𑀝𑀓𑁂𑀲𑁄𑀢𑀺 𑀧𑀼𑀭𑀺𑀫𑀓𑁂𑀲𑁂 𑀧𑀘𑁆𑀙𑀢𑁄, 𑀧𑀘𑁆𑀙𑀺𑀫𑀓𑁂𑀲𑁂 𑀧𑀼𑀭𑀢𑁄 𑀯𑀸𑀫𑀧𑀲𑁆𑀲𑀓𑁂𑀲𑁂 𑀤𑀓𑁆𑀔𑀺𑀡𑀢𑁄, 𑀤𑀓𑁆𑀔𑀺𑀡𑀧𑀲𑁆𑀲𑀓𑁂𑀲𑁂 𑀯𑀸𑀫𑀢𑁄 𑀨𑀭𑀺𑀢𑁆𑀯𑀸 𑀨𑀭𑀺𑀢𑁆𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑀓𑁂𑀲𑁄. 𑀫𑀫 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀧𑀺 𑀯𑀺𑀜𑁆𑀜𑀸𑀡𑀸𑀬𑀢𑀦𑀫𑁆𑀧𑀺 𑀫𑀫𑁂𑀯𑀸𑀢𑀺. 𑀏𑀢𑁆𑀣 𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂𑀦 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀕𑀳𑀺𑀢𑀸, 𑀯𑀺𑀜𑁆𑀜𑀸𑀡𑀸𑀬𑀢𑀦𑁂𑀦 𑀲𑀩𑁆𑀩𑀸𑀦𑀺𑀧𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸𑀦𑀺 𑀆𑀯𑀚𑁆𑀚𑀦𑀸𑀤𑀺𑀯𑀺𑀜𑁆𑀜𑀸𑀡𑀸𑀦𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀫𑀦𑁄𑀢𑀺 𑀲𑀸𑀯𑀚𑁆𑀚𑀦𑀓𑀁 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀲𑀸𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑁄. 𑀯𑀺𑀜𑁆𑀜𑀸𑀡𑀸𑀬𑀢𑀦𑀦𑁆𑀢𑀺 𑀚𑀯𑀦𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀯𑀝𑁆𑀝𑀢𑀺.

𑀢𑀯𑁂𑀯 𑀧𑀸𑀧𑀺𑀫, 𑀘𑀓𑁆𑀔𑀽𑀢𑀺 𑀬𑀁 𑀮𑁄𑀓𑁂 𑀢𑀺𑀫𑀺𑀭𑀓𑀸𑀘𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀁 𑀅𑀦𑁂𑀓𑀭𑁄𑀕𑀸𑀬𑀢𑀦𑀁 𑀉𑀧𑀓𑁆𑀓𑀯𑀺𑀧𑀓𑁆𑀓𑀁 𑀅𑀦𑁆𑀢𑀫𑀲𑁄 𑀓𑀸𑀡𑀘𑀓𑁆𑀔𑀼𑀧𑀺, 𑀲𑀩𑁆𑀩𑀁 𑀢𑀁 𑀢𑀯𑁂𑀯 𑀪𑀯𑀢𑀼. 𑀭𑀽𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑀁 𑀯𑀤𑀦𑁆𑀢𑀻𑀢𑀺 𑀬𑀁 𑀪𑀡𑁆𑀟𑀓𑀁 ‘‘𑀫𑀫 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑁂 𑀯𑀤𑀦𑁆𑀢𑀺 𑀫𑀫𑀦𑁆𑀢𑀺 𑀘𑀸𑀢𑀺 𑀬𑁂 𑀘 𑀧𑀼𑀕𑁆𑀕𑀮𑀸 ‘‘𑀫𑀫’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘𑁂 𑀢𑁂 𑀫𑀦𑁄 𑀅𑀢𑁆𑀣𑀻𑀢𑀺 𑀏𑀢𑁂𑀲𑀼 𑀘 𑀞𑀸𑀦𑁂𑀲𑀼 𑀬𑀤𑀺 𑀘𑀺𑀢𑁆𑀢𑀁 𑀅𑀢𑁆𑀣𑀺. 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻𑀢𑀺 𑀲𑀫𑀡 𑀫𑀬𑁆𑀳𑀁 𑀯𑀺𑀲𑀬𑀢𑁄 𑀦 𑀫𑀼𑀘𑁆𑀘𑀺𑀲𑁆𑀲𑀲𑀺. 𑀬𑀁 𑀯𑀤𑀦𑁆𑀢𑀻𑀢𑀺 𑀬𑀁 𑀪𑀡𑁆𑀟𑀓𑀁 𑀯𑀤𑀦𑁆𑀢𑀺, 𑀦 𑀢𑀁 𑀫𑀬𑁆𑀳𑀁. 𑀬𑁂 𑀯𑀤𑀦𑁆𑀢𑀻𑀢𑀺 𑀬𑁂𑀧𑀺 𑀧𑀼𑀕𑁆𑀕𑀮𑀸 𑀏𑀯𑀁 𑀯𑀤𑀦𑁆𑀢𑀺, 𑀦 𑀢𑁂 𑀅𑀳𑀁. 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀻𑀢𑀺 𑀪𑀯𑀬𑁄𑀦𑀺𑀕𑀢𑀺𑀆𑀤𑀻𑀲𑀼 𑀫𑀬𑁆𑀳𑀁 𑀕𑀢𑀫𑀕𑁆𑀕𑀫𑁆𑀧𑀺 𑀦 𑀧𑀲𑁆𑀲𑀲𑀺. 𑀦𑀯𑀫𑀁.

𑁧𑁦. 𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁬. 𑀤𑀲𑀫𑁂 𑀅𑀳𑀦𑀁 𑀅𑀖𑀸𑀢𑀬𑀦𑁆𑀢𑀺 𑀅𑀳𑀦𑀦𑁆𑀢𑁂𑀦 𑀅𑀖𑀸𑀢𑀬𑀦𑁆𑀢𑁂𑀦. 𑀅𑀚𑀺𑀦𑀁 𑀅𑀚𑀸𑀧𑀬𑀦𑁆𑀢𑀺 𑀧𑀭𑀲𑁆𑀲 𑀥𑀦𑀚𑀸𑀦𑀺𑀁 𑀅𑀓𑀭𑁄𑀦𑁆𑀢𑁂𑀦 𑀅𑀓𑀸𑀭𑀸𑀧𑁂𑀦𑁆𑀢𑁂𑀦. 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀦𑁆𑀢𑀺 𑀅𑀲𑁄𑀘𑀦𑁆𑀢𑁂𑀦 𑀅𑀲𑁄𑀘𑀸𑀧𑀬𑀦𑁆𑀢𑁂𑀦. 𑀇𑀢𑀺 𑀪𑀕𑀯𑀸 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀭𑀚𑁆𑀚𑁂 𑀯𑀺𑀚𑀺𑀢𑁂 𑀤𑀡𑁆𑀟𑀓𑀭𑀧𑀻𑀴𑀺𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑀯𑀲𑁂𑀦 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄 ‘𑀲𑀓𑁆𑀓𑀸 𑀦𑀼 𑀔𑁄 𑀭𑀚𑁆𑀚𑀁 𑀓𑀸𑀭𑁂𑀢𑀼’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺, 𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀭𑀚𑁆𑀚𑀜𑁆𑀘 𑀦𑀸𑀫𑁂𑀢𑀁 𑀧𑀫𑀸𑀤𑀝𑁆𑀞𑀸𑀦𑀁, 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀲𑀓𑁆𑀓𑀸 𑀑𑀢𑀸𑀭𑀁 𑀮𑀪𑀺𑀢𑀼𑀁, 𑀕𑀘𑁆𑀙𑀸𑀫𑀺 𑀉𑀲𑁆𑀲𑀸𑀳𑀫𑀲𑁆𑀲 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀇𑀤𑁆𑀥𑀺𑀧𑀸𑀤𑀸𑀢𑀺 𑀇𑀚𑁆𑀛𑀦𑀓𑀓𑁄𑀝𑁆𑀞𑀸𑀲𑀸. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀝𑁆𑀞𑁂𑀦𑀯𑀢𑁆𑀣𑀼𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀯𑀺𑀚𑀳𑀺𑀢𑀸 𑀦𑀺𑀘𑁆𑀘𑀸𑀦𑀼𑀩𑀤𑁆𑀥𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀲𑀼𑀧𑀭𑀺𑀘𑀺𑀢𑀸 𑀓𑀢𑀸 𑀇𑀲𑁆𑀲𑀸𑀲𑀲𑁆𑀲 𑀅𑀯𑀺𑀭𑀸𑀥𑀺𑀢𑀯𑁂𑀥𑀺𑀳𑀢𑁆𑀣𑁄 𑀯𑀺𑀬. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸 𑀧𑀭𑀺𑀧𑀼𑀡𑁆𑀡𑀪𑀸𑀯𑀦𑀸. 𑀅𑀥𑀺𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀘𑀺𑀦𑁆𑀢𑁂𑀬𑁆𑀬.

𑀧𑀩𑁆𑀩𑀢𑀲𑁆𑀲𑀸𑀢𑀺 𑀧𑀩𑁆𑀩𑀢𑁄 𑀪𑀯𑁂𑀬𑁆𑀬. 𑀤𑁆𑀯𑀺𑀢𑁆𑀢𑀸𑀯𑀸𑀢𑀺 𑀢𑀺𑀝𑁆𑀞𑀢𑀼 𑀏𑀓𑁄 𑀧𑀩𑁆𑀩𑀢𑁄, 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀢𑀸𑀯 𑀫𑀳𑀦𑁆𑀢𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀏𑀓𑀲𑁆𑀲 𑀦𑀸𑀮𑀁, 𑀦 𑀧𑀭𑀺𑀬𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀜𑁆𑀘𑀭𑁂𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄 𑀲𑀫𑀁 𑀘𑀭𑁂𑀬𑁆𑀬. 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀤𑀼𑀓𑁆𑀔𑀁 𑀦𑀸𑀫 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀤𑀸𑀦𑀁, 𑀢𑀁 𑀬𑀢𑁄𑀦𑀺𑀤𑀸𑀦𑀁 𑀳𑁄𑀢𑀺, 𑀏𑀯𑀁 𑀬𑁄 𑀅𑀤𑀓𑁆𑀔𑀺. 𑀓𑀣𑀁 𑀦𑀫𑁂𑀬𑁆𑀬𑀸𑀢𑀺 𑀲𑁄 𑀚𑀦𑁆𑀢𑀼 𑀢𑁂𑀲𑀼 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀪𑀽𑀢𑁂𑀲𑀼 𑀓𑀸𑀫𑁂𑀲𑀼 𑀓𑁂𑀦 𑀓𑀸𑀭𑀡𑁂𑀦 𑀦𑀫𑁂𑀬𑁆𑀬. 𑀉𑀧𑀥𑀺𑀁 𑀯𑀺𑀤𑀺𑀢𑁆𑀯𑀸𑀢𑀺 𑀓𑀸𑀫𑀕𑀼𑀡𑀉𑀧𑀥𑀺𑀁 ‘‘𑀲𑀗𑁆𑀕𑁄 𑀏𑀲𑁄, 𑀮𑀕𑁆𑀕𑀦𑀫𑁂𑀢’’𑀦𑁆𑀢𑀺 𑀏𑀯𑀁 𑀯𑀺𑀤𑀺𑀢𑁆𑀯𑀸. 𑀢𑀲𑁆𑀲𑁂𑀯 𑀚𑀦𑁆𑀢𑀼 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺 𑀢𑀲𑁆𑀲𑁂𑀯 𑀉𑀧𑀥𑀺𑀲𑁆𑀲 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀬𑁆𑀬. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀚𑀝𑀡𑁆𑀟𑀼𑀯𑁂𑀦𑀸𑀢𑀺 𑀚𑀝𑀸𑀘𑀼𑀫𑁆𑀩𑀝𑀓𑁂𑀦. 𑀅𑀚𑀺𑀦𑀓𑁆𑀔𑀺𑀧𑀦𑀺𑀯𑀢𑁆𑀣𑁄𑀢𑀺 𑀲𑀔𑀼𑀭𑀁 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁 𑀦𑀺𑀯𑀢𑁆𑀣𑁄 𑀏𑀓𑀁 𑀧𑀸𑀭𑀼𑀢𑁄. 𑀉𑀤𑀼𑀫𑁆𑀩𑀭𑀤𑀡𑁆𑀟𑀦𑁆𑀢𑀺 𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀈𑀲𑀓𑀁 𑀯𑀗𑁆𑀓𑀁 𑀉𑀤𑀼𑀫𑁆𑀩𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸. 𑀏𑀢𑀤𑀯𑁄𑀘𑀸𑀢𑀺 𑀮𑁄𑀓𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀦𑀸𑀫 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑁂𑀲𑀼𑀧𑀺 𑀧𑀩𑁆𑀩𑀚𑀺𑀢𑀲𑁆𑀲, 𑀧𑀩𑁆𑀩𑀚𑀺𑀢𑁂𑀲𑀼𑀧𑀺 𑀫𑀳𑀮𑁆𑀮𑀓𑀲𑁆𑀲𑀸𑀢𑀺 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀩𑁆𑀩𑀚𑀺𑀢𑀯𑁂𑀲𑀁 𑀕𑀳𑁂𑀢𑁆𑀯𑀸 𑀧𑀥𑀸𑀦𑀪𑀽𑀫𑀺𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀢𑀁 ‘‘𑀤𑀳𑀭𑀸 𑀪𑀯𑀦𑁆𑀢𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀑𑀓𑀫𑁆𑀧𑁂𑀢𑁆𑀯𑀸𑀢𑀺 𑀳𑀦𑀼𑀓𑁂𑀦 𑀉𑀭𑀁 𑀧𑀳𑀭𑀦𑁆𑀢𑁄 𑀅𑀥𑁄𑀦𑀢𑀁 𑀓𑀢𑁆𑀯𑀸. 𑀚𑀺𑀯𑁆𑀳𑀁 𑀦𑀺𑀮𑁆𑀮𑀸𑀮𑁂𑀢𑁆𑀯𑀸𑀢𑀺 𑀓𑀩𑀭𑀫𑀳𑀸𑀚𑀺𑀯𑁆𑀳𑀁 𑀦𑀻𑀳𑀭𑀺𑀢𑁆𑀯𑀸 𑀉𑀤𑁆𑀥𑀫𑀥𑁄 𑀉𑀪𑀬𑀧𑀲𑁆𑀲𑁂𑀲𑀼 𑀘 𑀮𑀸𑀮𑁂𑀢𑁆𑀯𑀸. 𑀢𑀺𑀯𑀺𑀲𑀸𑀔𑀦𑁆𑀢𑀺 𑀢𑀺𑀲𑀸𑀔𑀁. 𑀦𑀮𑀸𑀝𑀺𑀓𑀦𑁆𑀢𑀺 𑀪𑀓𑀼𑀝𑀺𑀁, 𑀦𑀮𑀸𑀝𑁂 𑀉𑀝𑁆𑀞𑀺𑀢𑀁 𑀯𑀮𑀺𑀢𑁆𑀢𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀓𑁆𑀓𑀸𑀫𑀻𑀢𑀺 𑀢𑀼𑀫𑁆𑀳𑁂 𑀚𑀸𑀦𑀦𑁆𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄𑀯 𑀢𑁂𑀮𑁂 𑀧𑀘𑁆𑀘𑀺𑀲𑁆𑀲𑀣𑀸𑀢𑀺 𑀯𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀧𑀞𑀫𑀁.

𑁨. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁮. 𑀤𑀼𑀢𑀺𑀬𑁂 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂𑀢𑀺 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼 𑀘𑁂𑀯 𑀥𑀫𑁆𑀫𑀲𑁆𑀲 𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀜𑁆𑀘 𑀮𑀤𑁆𑀥𑀢𑁆𑀢𑀸 𑀫𑀬𑁆𑀳𑀁 𑀮𑀸𑀪𑀸 𑀫𑀬𑁆𑀳𑀁 𑀲𑀼𑀮𑀤𑁆𑀥𑀦𑁆𑀢𑀺. 𑀲𑁄 𑀓𑀺𑀭𑀸𑀬𑀲𑁆𑀫𑀸 𑀧𑀘𑁆𑀙𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 ‘‘𑀅𑀭𑀳𑀢𑁆𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀺𑀓𑀁 𑀢𑀸𑀯 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀓𑀮𑁆𑀮𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀢𑁆𑀢𑀁 𑀳𑀸𑀲𑁂𑀢𑁆𑀯𑀸 𑀢𑁄𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. 𑀢𑁂𑀦𑀲𑁆𑀲 𑀏𑀯𑀫𑀳𑁄𑀲𑀺. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀅𑀬𑀁 𑀲𑀫𑀺𑀤𑁆𑀥𑀺 𑀪𑀺𑀓𑁆𑀔𑀼 𑀧𑀸𑀲𑀸𑀤𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑀤𑀺𑀲𑁄, 𑀬𑀸𑀯 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀢𑀸𑀯𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺. 𑀕𑀘𑁆𑀙 𑀢𑁆𑀯𑀦𑁆𑀢𑀺 𑀲𑀢𑁆𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲, 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀢𑀺𑀧𑀜𑁆𑀜𑀸 𑀘 𑀫𑁂 𑀩𑀼𑀤𑁆𑀥𑀸𑀢𑀺 𑀫𑀬𑀸 𑀲𑀢𑀺 𑀘 𑀧𑀜𑁆𑀜𑀸 𑀘 𑀜𑀸𑀢𑀸. 𑀓𑀭𑀲𑁆𑀲𑀼 𑀭𑀽𑀧𑀸𑀦𑀻𑀢𑀺 𑀩𑀳𑀽𑀦𑀺𑀧𑀺 𑀯𑀺𑀪𑀺𑀁𑀲𑀓𑀸𑀭𑀳𑀸𑀦𑀺 𑀭𑀽𑀧𑀸𑀦𑀺 𑀓𑀭𑀲𑁆𑀲𑀼. 𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀲𑀻𑀢𑀺 𑀫𑀁 𑀦𑁂𑀯 𑀯𑁂𑀥𑀬𑀺𑀲𑁆𑀲𑀲𑀺 𑀦 𑀓𑀫𑁆𑀧𑀲𑁆𑀲𑁂𑀲𑀺. 𑀤𑀼𑀢𑀺𑀬𑀁.

𑁩. 𑀕𑁄𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁯. 𑀢𑀢𑀺𑀬𑁂 𑀇𑀲𑀺𑀕𑀺𑀮𑀺𑀧𑀲𑁆𑀲𑁂𑀢𑀺 𑀇𑀲𑀺𑀕𑀺𑀮𑀺𑀲𑁆𑀲 𑀦𑀸𑀫 𑀧𑀩𑁆𑀩𑀢𑀲𑁆𑀲 𑀧𑀲𑁆𑀲𑁂. 𑀓𑀸𑀴𑀲𑀺𑀮𑀸𑀬𑀦𑁆𑀢𑀺 𑀓𑀸𑀴𑀯𑀡𑁆𑀡𑀸𑀬 𑀲𑀺𑀮𑀸𑀬𑀁. 𑀲𑀸𑀫𑀬𑀺𑀓𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀆𑀭𑀫𑁆𑀫𑀡𑁂 𑀘 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺 𑀲𑀸𑀫𑀬𑀺𑀓𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀨𑀼𑀲𑀻𑀢𑀺 𑀧𑀝𑀺𑀮𑀪𑀺. 𑀧𑀭𑀺𑀳𑀸𑀬𑀻𑀢𑀺 𑀓𑀲𑁆𑀫𑀸 𑀬𑀸𑀯 𑀙𑀝𑁆𑀞𑀁 𑀧𑀭𑀺𑀳𑀸𑀬𑀺? 𑀲𑀸𑀩𑀸𑀥𑀢𑁆𑀢𑀸. 𑀣𑁂𑀭𑀲𑁆𑀲 𑀓𑀺𑀭 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀯𑀲𑁂𑀦 𑀅𑀦𑀼𑀲𑀸𑀬𑀺𑀓𑁄 𑀆𑀩𑀸𑀥𑁄 𑀅𑀢𑁆𑀣𑀺, 𑀢𑁂𑀦 𑀲𑀫𑀸𑀥𑀺𑀲𑁆𑀲 𑀲𑀧𑁆𑀧𑀸𑀬𑁂 𑀉𑀧𑀓𑀸𑀭𑀓𑀥𑀫𑁆𑀫𑁂 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀧𑁆𑀧𑀺𑀢𑀧𑁆𑀧𑀺𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀢𑀺.

𑀬𑀁𑀦𑀽𑀦𑀸𑀳𑀁 𑀲𑀢𑁆𑀣𑀁 𑀆𑀳𑀭𑁂𑀬𑁆𑀬𑀦𑁆𑀢𑀺 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺, 𑀬𑀲𑁆𑀫𑀸 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀓𑀸𑀮𑀗𑁆𑀓𑀭𑁄𑀢𑁄 𑀅𑀦𑀺𑀩𑀤𑁆𑀥𑀸 𑀕𑀢𑀺 𑀳𑁄𑀢𑀺, 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀦𑀺𑀩𑀤𑁆𑀥𑀸 𑀕𑀢𑀺 𑀳𑁄𑀢𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀢𑁆𑀣𑀁 𑀆𑀳𑀭𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀉𑀧𑀲𑀗𑁆𑀓𑀫𑀻𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀲𑀢𑁆𑀣𑀁 𑀆𑀳𑀭𑀺𑀢𑀼𑀓𑀸𑀫𑁄, 𑀲𑀢𑁆𑀣𑀸𑀳𑀭𑀡𑀜𑁆𑀘 𑀦𑀸𑀫𑁂𑀢𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀲𑁆𑀲 𑀳𑁄𑀢𑀺. 𑀬𑁄 𑀏𑀯𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺, 𑀲𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀫𑁆𑀧𑀺 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀫𑀬𑀸 𑀧𑀦 𑀧𑀝𑀺𑀩𑀸𑀳𑀺𑀢𑁄𑀧𑀺 𑀏𑀲 𑀦 𑀑𑀭𑀫𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀸 𑀧𑀝𑀺𑀩𑀸𑀳𑀺𑀢𑁄 𑀑𑀭𑀫𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀲𑁆𑀲 𑀅𑀢𑁆𑀣𑀓𑀸𑀫𑁄 𑀯𑀺𑀬 𑀳𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀚𑀮𑀸𑀢𑀺 𑀚𑀮𑀫𑀸𑀦𑀸. 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀢𑀯 𑀧𑀸𑀤𑁂 𑀯𑀦𑁆𑀤𑀸𑀫𑀺. 𑀚𑀼𑀢𑀺𑀦𑁆𑀥𑀭𑀸𑀢𑀺 𑀆𑀦𑀼𑀪𑀸𑀯𑀥𑀭𑀸. 𑀅𑀧𑁆𑀧𑀢𑁆𑀢𑀫𑀸𑀦𑀲𑁄𑀢𑀺 𑀅𑀧𑁆𑀧𑀢𑁆𑀢𑀅𑀭𑀳𑀢𑁆𑀢𑁄. 𑀲𑁂𑀔𑁄𑀢𑀺 𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑀫𑀸𑀦𑁄 𑀲𑀓𑀭𑀡𑀻𑀬𑁄. 𑀚𑀦𑁂 𑀲𑀼𑀢𑀸𑀢𑀺 𑀚𑀦𑁂 𑀯𑀺𑀲𑁆𑀲𑀼𑀢𑀸. 𑀲𑀢𑁆𑀣𑀁 𑀆𑀳𑀭𑀺𑀢𑀁 𑀳𑁄𑀢𑀻𑀢𑀺 𑀣𑁂𑀭𑁄 𑀓𑀺𑀭 ‘‘𑀓𑀺𑀁 𑀫𑀬𑁆𑀳𑀁 𑀇𑀫𑀺𑀦𑀸 𑀚𑀻𑀯𑀺𑀢𑁂𑀦𑀸’’𑀢𑀺? 𑀉𑀢𑁆𑀢𑀸𑀦𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀣𑁂𑀦 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀣𑁂𑀭𑁄 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀢𑀁𑀬𑁂𑀯 𑀯𑁂𑀤𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀫𑀲𑀻𑀲𑀻 𑀦𑀸𑀫 𑀢𑀺𑀯𑀺𑀥𑁄 𑀳𑁄𑀢𑀺 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻, 𑀭𑁄𑀕𑀲𑀫𑀲𑀻𑀲𑀻, 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺.

𑀢𑀢𑁆𑀣 𑀬𑁄 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀁 𑀅𑀥𑀺𑀝𑁆𑀞𑀸𑀬 𑁋 ‘‘𑀇𑀫𑀁 𑀅𑀓𑁄𑀧𑁂𑀢𑁆𑀯𑀸𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺, 𑀅𑀣𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀇𑀭𑀺𑀬𑀸𑀧𑀣𑀓𑁄𑀧𑀦𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺. 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑁄 𑀧𑀦 𑀘𑀓𑁆𑀔𑀼𑀭𑁄𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀺 𑁋 ‘‘𑀇𑀢𑁄 𑀅𑀦𑀼𑀝𑁆𑀞𑀺𑀢𑁄𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺, 𑀅𑀣𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀭𑁄𑀕𑀢𑁄 𑀯𑀼𑀝𑁆𑀞𑀸𑀦𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺. 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫. 𑀓𑁂𑀘𑀺 𑀧𑀦 𑀢𑀲𑁆𑀫𑀺𑀁𑀬𑁂𑀯 𑀇𑀭𑀺𑀬𑀸𑀧𑀣𑁂 𑀢𑀲𑁆𑀫𑀺𑀜𑁆𑀘 𑀭𑁄𑀕𑁂 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦𑁂𑀢𑁆𑀣 𑀲𑀫𑀲𑀻𑀲𑀺𑀢𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀬𑀲𑁆𑀲 𑀧𑀦 𑀆𑀲𑀯𑀓𑁆𑀔𑀬𑁄 𑀘 𑀚𑀻𑀯𑀺𑀢𑀓𑁆𑀔𑀬𑁄 𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺. 𑀅𑀬𑀁 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀫𑀲𑀻𑀲𑀻’’𑀢𑀺 (𑀧𑀼. 𑀧. 𑁧𑁬).

𑀏𑀢𑁆𑀣 𑀘 𑀧𑀯𑀢𑁆𑀢𑀺𑀲𑀻𑀲𑀁 𑀓𑀺𑀮𑁂𑀲𑀲𑀻𑀲𑀦𑁆𑀢𑀺 𑀤𑁆𑀯𑁂 𑀲𑀻𑀲𑀸𑀦𑀺. 𑀢𑀢𑁆𑀣 𑀧𑀯𑀢𑁆𑀢𑀺𑀲𑀻𑀲𑀁 𑀦𑀸𑀫 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀓𑀺𑀮𑁂𑀲𑀲𑀻𑀲𑀁 𑀦𑀸𑀫 𑀅𑀯𑀺𑀚𑁆𑀚𑀸. 𑀢𑁂𑀲𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀔𑁂𑀧𑁂𑀢𑀺, 𑀅𑀯𑀺𑀚𑁆𑀚𑀸 𑀫𑀕𑁆𑀕𑀘𑀺𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀦𑀢𑁆𑀣𑀺. 𑀫𑀕𑁆𑀕𑀸𑀦𑀦𑁆𑀢𑀭𑀁 𑀧𑀦 𑀨𑀮𑀁, 𑀨𑀮𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀁, 𑀪𑀯𑀗𑁆𑀕𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀯𑀸 𑀳𑁄𑀢𑀺 𑀅𑀧𑀭𑀺𑀧𑀼𑀡𑁆𑀡𑀁 𑀯𑀸. 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀚𑁆𑀚𑀦𑁆𑀢𑁂𑀧𑀺 𑀳𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯, 𑀘𑀺𑀢𑁆𑀢𑀸𑀦𑀁 𑀧𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀆𑀲𑀯𑀓𑁆𑀔𑀬𑁄 𑀘 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘 𑀏𑀓𑀓𑁆𑀔𑀡𑁂 𑀯𑀺𑀬 𑀧𑀜𑁆𑀜𑀸𑀬𑀢𑀺.

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳𑀸𑀢𑀺 𑀅𑀯𑀺𑀚𑁆𑀚𑀸𑀫𑀽𑀮𑁂𑀦 𑀲𑀫𑀽𑀮𑀓𑀁 𑀢𑀡𑁆𑀳𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀉𑀧𑁆𑀧𑀸𑀝𑁂𑀢𑁆𑀯𑀸. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄.

𑀯𑀺𑀯𑀢𑁆𑀢𑀓𑁆𑀔𑀦𑁆𑀥𑀦𑁆𑀢𑀺 𑀧𑀭𑀺𑀯𑀢𑁆𑀢𑀓𑁆𑀔𑀦𑁆𑀥𑀁. 𑀲𑁂𑀫𑀸𑀦𑀦𑁆𑀢𑀺 𑀉𑀢𑁆𑀢𑀸𑀦𑀁 𑀳𑀼𑀢𑁆𑀯𑀸 𑀲𑀬𑀺𑀢𑀁 𑀳𑁄𑀢𑀺. 𑀣𑁂𑀭𑁄 𑀧𑀦 𑀓𑀺𑀜𑁆𑀘𑀸𑀧𑀺 𑀉𑀢𑁆𑀢𑀸𑀦𑀓𑁄 𑀲𑀬𑀺𑀢𑁄, 𑀢𑀣𑀸𑀧𑀺𑀲𑁆𑀲 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀧𑀭𑀺𑀘𑀺𑀢𑀲𑀬𑀦𑀢𑁆𑀢𑀸 𑀲𑀻𑀲𑀁 𑀤𑀓𑁆𑀔𑀺𑀡𑀢𑁄𑀯 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀁. 𑀥𑀽𑀫𑀸𑀬𑀺𑀢𑀢𑁆𑀢𑀦𑁆𑀢𑀺 𑀥𑀽𑀫𑀸𑀬𑀺𑀢𑀪𑀸𑀯𑀁. 𑀢𑀲𑁆𑀫𑀺𑀁 𑀳𑀺 𑀔𑀡𑁂 𑀥𑀽𑀫𑀯𑀮𑀸𑀳𑀓𑀸 𑀯𑀺𑀬 𑀢𑀺𑀫𑀺𑀭𑀯𑀮𑀸𑀳𑀓𑀸 𑀯𑀺𑀬 𑀘 𑀉𑀝𑁆𑀞𑀳𑀺𑀁𑀲𑀼. 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀭𑀺𑀬𑁂𑀲𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀅𑀧𑁆𑀧𑀢𑀺𑀝𑁆𑀞𑀺𑀢𑁂𑀦, 𑀅𑀧𑁆𑀧𑀢𑀺𑀝𑁆𑀞𑀺𑀢𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀦𑁆𑀢𑀺 𑀩𑁂𑀮𑀼𑀯𑀧𑀓𑁆𑀓𑀁 𑀯𑀺𑀬 𑀧𑀡𑁆𑀟𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀫𑀳𑀸𑀯𑀻𑀡𑀁. 𑀆𑀤𑀸𑀬𑀸𑀢𑀺 𑀓𑀘𑁆𑀙𑁂 𑀞𑀧𑁂𑀢𑁆𑀯𑀸. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀕𑁄𑀥𑀺𑀓𑀢𑁆𑀣𑁂𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀦 𑀚𑀸𑀦𑀸𑀫𑀺, 𑀲𑀫𑀡𑀁 𑀕𑁄𑀢𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀔𑀼𑀤𑁆𑀤𑀓𑀤𑀸𑀭𑀓𑀯𑀡𑁆𑀡𑀻 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀦 𑀧𑀲𑁆𑀲𑀸𑀫𑀺. 𑀲𑁄𑀓𑀧𑀭𑁂𑀢𑀲𑁆𑀲𑀸𑀢𑀺 𑀲𑁄𑀓𑁂𑀦 𑀨𑀼𑀝𑁆𑀞𑀲𑁆𑀲. 𑀅𑀪𑀲𑁆𑀲𑀣𑀸𑀢𑀺 𑀧𑀸𑀤𑀧𑀺𑀝𑁆𑀞𑀺𑀬𑀁 𑀧𑀢𑀺𑀢𑀸. 𑀢𑀢𑀺𑀬𑀁.

𑁪. 𑀲𑀢𑁆𑀢𑀯𑀲𑁆𑀲𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀘𑀢𑀼𑀢𑁆𑀣𑁂 𑀲𑀢𑁆𑀢 𑀯𑀲𑁆𑀲𑀸𑀦𑀻𑀢𑀺 𑀧𑀼𑀭𑁂 𑀩𑁄𑀥𑀺𑀬𑀸 𑀙𑀩𑁆𑀩𑀲𑁆𑀲𑀸𑀦𑀺, 𑀩𑁄𑀥𑀺𑀢𑁄 𑀧𑀘𑁆𑀙𑀸 𑀏𑀓𑀁 𑀯𑀲𑁆𑀲𑀁. 𑀑𑀢𑀸𑀭𑀸𑀧𑁂𑀓𑁆𑀔𑁄𑀢𑀺 ‘‘𑀲𑀘𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀅𑀦𑀦𑀼𑀘𑁆𑀙𑀯𑀺𑀓𑀁 𑀧𑀲𑁆𑀲𑀸𑀫𑀺, 𑀘𑁄𑀤𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀏𑀯𑀁 𑀯𑀺𑀯𑀭𑀁 𑀅𑀧𑁂𑀓𑁆𑀔𑀫𑀸𑀦𑁄. 𑀅𑀮𑀪𑀫𑀸𑀦𑁄𑀢𑀺 𑀭𑀣𑀭𑁂𑀡𑀼𑀫𑀢𑁆𑀢𑀫𑁆𑀧𑀺 𑀅𑀯𑀓𑁆𑀔𑀮𑀺𑀢𑀁 𑀅𑀧𑀲𑁆𑀲𑀦𑁆𑀢𑁄. 𑀢𑁂𑀦𑀸𑀳 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮);

𑀉𑀧𑀲𑀗𑁆𑀓𑀫𑀻𑀢𑀺 ‘‘𑀅𑀚𑁆𑀚 𑀲𑀫𑀡𑀁 𑀕𑁄𑀢𑀫𑀁 𑀅𑀢𑀺𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺.

𑀛𑀸𑀬𑀲𑀻𑀢𑀺 𑀛𑀸𑀬𑀦𑁆𑀢𑁄 𑀅𑀯𑀚𑁆𑀛𑀸𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀲𑀻𑀢𑀺 𑀯𑀤𑀢𑀺. 𑀯𑀺𑀢𑁆𑀢𑀁 𑀦𑀼 𑀚𑀻𑀦𑁄𑀢𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀚𑀺𑀢𑁄𑀲𑀺 𑀦𑀼. 𑀆𑀕𑀼𑀁 𑀦𑀼 𑀕𑀸𑀫𑀲𑁆𑀫𑀺𑀦𑁆𑀢𑀺, 𑀓𑀺𑀁 𑀦𑀼 𑀅𑀦𑁆𑀢𑁄𑀕𑀸𑀫𑁂 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀧𑀸𑀧𑀓𑀫𑁆𑀫𑀁 𑀅𑀓𑀸𑀲𑀺, 𑀬𑁂𑀦 𑀅𑀜𑁆𑀜𑁂𑀲𑀁 𑀫𑀼𑀔𑀁 𑀑𑀮𑁄𑀓𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀅𑀭𑀜𑁆𑀜𑁂 𑀯𑀺𑀘𑀭𑀲𑀺? 𑀲𑀓𑁆𑀔𑀺𑀦𑁆𑀢𑀺 𑀫𑀺𑀢𑁆𑀢𑀪𑀸𑀯𑀁.

𑀧𑀮𑀺𑀔𑀸𑀬𑀸𑀢𑀺 𑀔𑀡𑀺𑀢𑁆𑀯𑀸. 𑀪𑀯𑀮𑁄𑀪𑀚𑀧𑁆𑀧𑀦𑁆𑀢𑀺 𑀪𑀯𑀮𑁄𑀪𑀲𑀗𑁆𑀔𑀸𑀢𑀁 𑀢𑀡𑁆𑀳𑀁. 𑀅𑀦𑀸𑀲𑀯𑁄 𑀛𑀸𑀬𑀸𑀫𑀻𑀢𑀺 𑀦𑀺𑀢𑁆𑀢𑀡𑁆𑀳𑁄 𑀳𑀼𑀢𑁆𑀯𑀸 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺 𑀛𑀸𑀬𑀸𑀫𑀺. 𑀧𑀫𑀢𑁆𑀢𑀩𑀦𑁆𑀥𑀽𑀢𑀺 𑀫𑀸𑀭𑀁 𑀆𑀮𑀧𑀢𑀺. 𑀲𑁄 𑀳𑀺 𑀬𑁂𑀓𑁂𑀘𑀺 𑀮𑁄𑀓𑁂 𑀧𑀫𑀢𑁆𑀢𑀸, 𑀢𑁂𑀲𑀁 𑀩𑀦𑁆𑀥𑀼.

𑀲𑀘𑁂 𑀫𑀕𑁆𑀕𑀁 𑀅𑀦𑀼𑀩𑀼𑀤𑁆𑀥𑀦𑁆𑀢𑀺 𑀬𑀤𑀺 𑀢𑀬𑀸 𑀫𑀕𑁆𑀕𑁄 𑀅𑀦𑀼𑀩𑀼𑀤𑁆𑀥𑁄. 𑀅𑀧𑁂𑀳𑀻𑀢𑀺 𑀅𑀧𑀬𑀸𑀳𑀺. 𑀅𑀫𑀘𑁆𑀘𑀼𑀥𑁂𑀬𑁆𑀬𑀦𑁆𑀢𑀺 𑀫𑀘𑁆𑀘𑀼𑀦𑁄 𑀅𑀦𑁄𑀓𑀸𑀲𑀪𑀽𑀢𑀁 𑀦𑀺𑀩𑁆𑀩𑀸𑀦𑀁. 𑀧𑀸𑀭𑀕𑀸𑀫𑀺𑀦𑁄𑀢𑀺 𑀬𑁂𑀧𑀺 𑀧𑀸𑀭𑀁 𑀕𑀢𑀸, 𑀢𑁂𑀧𑀺 𑀧𑀸𑀭𑀕𑀸𑀫𑀺𑀦𑁄. 𑀬𑁂𑀧𑀺 𑀧𑀸𑀭𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀬𑁂𑀧𑀺 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀸, 𑀢𑁂𑀧𑀺 𑀧𑀸𑀭𑀕𑀸𑀫𑀺𑀦𑁄.

𑀯𑀺𑀲𑀽𑀓𑀸𑀬𑀺𑀓𑀸𑀦𑀻𑀢𑀺 𑀫𑀸𑀭𑀯𑀺𑀲𑀽𑀓𑀸𑀦𑀺. 𑀯𑀺𑀲𑁂𑀯𑀺𑀢𑀸𑀦𑀻𑀢𑀺 𑀯𑀺𑀭𑀼𑀤𑁆𑀥𑀲𑁂𑀯𑀺𑀢𑀸𑀦𑀺, ‘‘𑀅𑀧𑁆𑀧𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂. ‘‘𑀤𑀻𑀖𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀦𑀸𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸’’𑀢𑀺𑀆𑀤𑀻𑀦𑀺 𑀧𑀝𑀺𑀮𑁄𑀫𑀓𑀸𑀭𑀡𑀸𑀦𑀺. 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀻𑀢𑀺, 𑀢𑀫𑁆𑀳𑀺 𑀢𑀫𑁆𑀳𑀺 𑀓𑀸𑀮𑁂 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀲𑀧𑁆𑀧𑀯𑀡𑁆𑀡𑀸𑀤𑀺𑀤𑀲𑁆𑀲𑀦𑀸𑀦𑀺. 𑀦𑀺𑀩𑁆𑀩𑁂𑀚𑀦𑀻𑀬𑀸𑀢𑀺 𑀉𑀓𑁆𑀓𑀡𑁆𑀞𑀦𑀻𑀬𑀸.

𑀅𑀦𑀼𑀧𑀭𑀺𑀬𑀕𑀸𑀢𑀺𑀆𑀤𑀻𑀲𑀼 𑀓𑀺𑀜𑁆𑀘𑀸𑀧𑀺 𑀅𑀢𑀻𑀢𑀯𑀘𑀦𑀁 𑀓𑀢𑀁, 𑀅𑀢𑁆𑀣𑁄 𑀧𑀦 𑀯𑀺𑀓𑀧𑁆𑀧𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀫𑁂𑀤𑀯𑀡𑁆𑀡𑀁 𑀧𑀸𑀲𑀸𑀡𑀁 𑀯𑀸𑀬𑀲𑁄 𑀤𑀺𑀲𑁆𑀯𑀸 𑁋 ‘‘𑀅𑀧𑀺 𑀦𑀸𑀫𑁂𑀢𑁆𑀣 𑀫𑀼𑀤𑀼𑀁 𑀯𑀺𑀦𑁆𑀤𑁂𑀬𑁆𑀬𑀸𑀫, 𑀅𑀧𑀺 𑀅𑀲𑁆𑀲𑀸𑀤𑁄 𑀲𑀺𑀬𑀸’’𑀢𑀺 𑀅𑀦𑀼𑀧𑀭𑀺𑀕𑀘𑁆𑀙𑁂𑀬𑁆𑀬, 𑀅𑀣 𑀲𑁄 𑀢𑀢𑁆𑀣 𑀅𑀲𑁆𑀲𑀸𑀤𑀁 𑀅𑀮𑀪𑀺𑀢𑁆𑀯𑀸𑀯 𑀯𑀸𑀬𑀲𑁄 𑀏𑀢𑁆𑀢𑁄 𑀅𑀧𑀓𑁆𑀓𑀫𑁂𑀬𑁆𑀬, 𑀢𑀢𑁄 𑀧𑀸𑀲𑀸𑀡𑀸 𑀅𑀧𑀕𑀘𑁆𑀙𑁂𑀬𑁆𑀬, 𑀏𑀯𑀁 𑀫𑀬𑀫𑁆𑀧𑀺 𑀲𑁄 𑀓𑀸𑀓𑁄 𑀯𑀺𑀬 𑀲𑁂𑀮𑀁 𑀕𑁄𑀢𑀫𑀁 𑀆𑀲𑀚𑁆𑀚 𑀅𑀲𑁆𑀲𑀸𑀤𑀁 𑀯𑀸 𑀲𑀦𑁆𑀣𑀯𑀁 𑀯𑀸 𑀅𑀮𑀪𑀦𑁆𑀢𑀸 𑀕𑁄𑀢𑀫𑀸 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀅𑀧𑀕𑀘𑁆𑀙𑀸𑀫. 𑀘𑀢𑀼𑀢𑁆𑀣𑀁.

𑁫. 𑀫𑀸𑀭𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁧. 𑀧𑀜𑁆𑀘𑀫𑁂 𑀅𑀪𑀸𑀲𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀪𑀸𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀪𑀸𑀲𑀬𑀺𑀢𑁆𑀯𑀸𑀢𑀺𑀧𑀺 𑀧𑀸𑀞𑁄. 𑀉𑀧𑀲𑀗𑁆𑀓𑀫𑀺𑀁𑀲𑀽𑀢𑀺 ‘‘𑀕𑁄𑀧𑀸𑀮𑀓𑀤𑀸𑀭𑀓𑀁 𑀯𑀺𑀬 𑀤𑀡𑁆𑀟𑀓𑁂𑀦 𑀪𑀽𑀫𑀺𑀁 𑀮𑁂𑀔𑀁 𑀤𑀢𑁆𑀯𑀸 𑀅𑀢𑀺𑀯𑀺𑀬 𑀤𑀼𑀫𑁆𑀫𑀦𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. ‘𑀓𑀺𑀦𑁆𑀦𑀼 𑀔𑁄 𑀓𑀸𑀭𑀡’𑀦𑁆𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸, 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀲𑁄𑀘𑀲𑀻𑀢𑀺 𑀘𑀺𑀦𑁆𑀢𑁂𑀲𑀺. 𑀆𑀭𑀜𑁆𑀜𑀫𑀺𑀯 𑀓𑀼𑀜𑁆𑀚𑀭𑀦𑁆𑀢𑀺 𑀬𑀣𑀸 𑀅𑀭𑀜𑁆𑀜𑀢𑁄 𑀧𑁂𑀲𑀺𑀢𑀕𑀡𑀺𑀓𑀸𑀭𑀳𑀢𑁆𑀣𑀺𑀦𑀺𑀬𑁄 𑀆𑀭𑀜𑁆𑀜𑀓𑀁 𑀓𑀼𑀜𑁆𑀚𑀭𑀁 𑀇𑀢𑁆𑀣𑀺𑀓𑀼𑀢𑁆𑀢𑀤𑀲𑁆𑀲𑀦𑁂𑀦 𑀧𑀮𑁄𑀪𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀆𑀦𑀬𑀦𑁆𑀢𑀺, 𑀏𑀯𑀁 𑀆𑀦𑀬𑀺𑀲𑁆𑀲𑀸𑀫. 𑀫𑀸𑀭𑀥𑁂𑀬𑁆𑀬𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀁.

𑀉𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑁋 ‘‘𑀢𑀼𑀫𑁆𑀳𑁂 𑀣𑁄𑀓𑀁 𑀅𑀥𑀺𑀯𑀸𑀲𑁂𑀣, 𑀫𑀬𑀁 𑀢𑀁 𑀆𑀦𑁂𑀲𑁆𑀲𑀸𑀫𑀸’’𑀢𑀺 𑀧𑀺𑀢𑀭𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀉𑀘𑁆𑀘𑀸𑀯𑀘𑀸𑀢𑀺 𑀦𑀸𑀦𑀸𑀯𑀺𑀥𑀸. 𑀏𑀓𑀲𑀢𑀁 𑀏𑀓𑀲𑀢𑀦𑁆𑀢𑀺 𑀏𑀓𑁂𑀓𑀁 𑀲𑀢𑀁 𑀲𑀢𑀁 𑀓𑀢𑁆𑀯𑀸. 𑀓𑀼𑀫𑀸𑀭𑀺𑀯𑀡𑁆𑀡𑀲𑀢𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀓𑀼𑀫𑀸𑀭𑀺𑀅𑀢𑁆𑀢𑀪𑀸𑀯𑀸𑀦𑀁 𑀲𑀢𑀁.

𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀦𑁆𑀢𑀺, 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀅𑀭𑀳𑀢𑁆𑀢𑀫𑁂𑀯 𑀓𑀣𑁂𑀲𑀺. 𑀲𑁂𑀦𑀦𑁆𑀢𑀺 𑀓𑀺𑀮𑁂𑀲𑀲𑁂𑀦𑀁. 𑀲𑀸 𑀳𑀺 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀸 𑀦𑀸𑀫. 𑀏𑀓𑀸𑀳𑀁 𑀛𑀸𑀬𑀦𑁆𑀢𑀺 𑀏𑀓𑁄 𑀅𑀳𑀁 𑀛𑀸𑀬𑀦𑁆𑀢𑁄. 𑀲𑀼𑀔𑀫𑀦𑀼𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀲𑀼𑀔𑀁 𑀅𑀦𑀼𑀩𑀼𑀚𑁆𑀛𑀺𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀲𑁂𑀦𑀁 𑀚𑀺𑀦𑀺𑀢𑁆𑀯𑀸 𑀅𑀳𑀁 𑀏𑀓𑁄 𑀛𑀸𑀬𑀦𑁆𑀢𑁄 ‘‘𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀅𑀭𑀳𑀢𑁆𑀢𑀲𑀼𑀔𑀁 𑀅𑀦𑀼𑀩𑀼𑀚𑁆𑀛𑀺𑀁. 𑀢𑀲𑁆𑀫𑀸 𑀚𑀦𑁂𑀦 𑀫𑀺𑀢𑁆𑀢𑀲𑀦𑁆𑀣𑀯𑀁 𑀦 𑀓𑀭𑁄𑀫𑀺, 𑀢𑁂𑀦𑁂𑀯 𑀘 𑀫𑁂 𑀓𑀸𑀭𑀡𑁂𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀓𑁆𑀔𑀻 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺.

𑀓𑀣𑀁𑀯𑀺𑀳𑀸𑀭𑀻𑀩𑀳𑀼𑀮𑁄𑀢𑀺 𑀓𑀢𑀫𑁂𑀦 𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 𑀯𑀺𑀳𑀭𑀦𑁆𑀢𑁄. 𑀅𑀮𑀤𑁆𑀥𑀸𑀢𑀺 𑀅𑀮𑀪𑀺𑀢𑁆𑀯𑀸. 𑀬𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀢𑀫𑁂𑀦 𑀛𑀸𑀦𑁂𑀦 𑀩𑀳𑀼𑀮𑀁 𑀛𑀸𑀬𑀦𑁆𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀓𑀸𑀫𑀲𑀜𑁆𑀜𑀸 𑀅𑀮𑀪𑀺𑀢𑁆𑀯𑀸𑀯 𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀻𑀢𑀺.

𑀧𑀲𑁆𑀲𑀤𑁆𑀥𑀓𑀸𑀬𑁄𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀲𑁆𑀲 𑀧𑀲𑁆𑀲𑀤𑁆𑀥𑀢𑁆𑀢𑀸 𑀧𑀲𑁆𑀲𑀤𑁆𑀥𑀓𑀸𑀬𑁄. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄. 𑀅𑀲𑀗𑁆𑀔𑀭𑀸𑀦𑁄𑀢𑀺 𑀢𑀬𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁂 𑀅𑀦𑀪𑀺𑀲𑀗𑁆𑀔𑀭𑁄𑀦𑁆𑀢𑁄. 𑀅𑀦𑁄𑀓𑁄𑀢𑀺 𑀅𑀦𑀸𑀮𑀬𑁄. 𑀅𑀜𑁆𑀜𑀸𑀬 𑀥𑀫𑁆𑀫𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸. 𑀅𑀯𑀺𑀢𑀓𑁆𑀓𑀛𑀸𑀬𑀻𑀢𑀺 𑀅𑀯𑀺𑀢𑀓𑁆𑀓𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀛𑀸𑀬𑀦𑁆𑀢𑁄. 𑀦 𑀓𑀼𑀧𑁆𑀧𑀢𑀻𑀢𑀺𑀆𑀤𑀻𑀲𑀼 𑀤𑁄𑀲𑁂𑀦 𑀦 𑀓𑀼𑀧𑁆𑀧𑀢𑀺, 𑀭𑀸𑀕𑁂𑀦 𑀦 𑀲𑀭𑀢𑀺, 𑀫𑁄𑀳𑁂𑀦 𑀦 𑀣𑀻𑀦𑁄. 𑀇𑀫𑁂𑀲𑀼 𑀢𑀻𑀲𑀼 𑀫𑀽𑀮𑀓𑀺𑀮𑁂𑀲𑁂𑀲𑀼 𑀕𑀳𑀺𑀢𑁂𑀲𑀼 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀧𑀞𑀫𑀧𑀤𑁂𑀦 𑀯𑀸 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀕𑀳𑀺𑀢𑀁, 𑀤𑀼𑀢𑀺𑀬𑁂𑀦 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀢𑀢𑀺𑀬𑁂𑀦 𑀣𑀺𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀲𑁂𑀲𑀦𑀻𑀯𑀭𑀡𑀸𑀦𑀺. 𑀇𑀢𑀺 𑀇𑀫𑀺𑀦𑀸 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀺.

𑀧𑀜𑁆𑀘𑁄𑀖𑀢𑀺𑀡𑁆𑀡𑁄𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀁 𑀓𑀺𑀮𑁂𑀲𑁄𑀖𑀁 𑀢𑀺𑀡𑁆𑀡𑁄. 𑀙𑀝𑁆𑀞𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀫𑁆𑀧𑀺 𑀙𑀝𑁆𑀞𑀁 𑀓𑀺𑀮𑁂𑀲𑁄𑀖𑀁 𑀅𑀢𑀭𑀺. 𑀧𑀜𑁆𑀘𑁄𑀖𑀕𑁆𑀕𑀳𑀡𑁂𑀦 𑀯𑀸 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺, 𑀙𑀝𑁆𑀞𑀕𑁆𑀕𑀳𑀡𑁂𑀦 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀕𑀡𑀲𑀗𑁆𑀖𑀘𑀸𑀭𑀻𑀢𑀺 𑀕𑀡𑁂 𑀘 𑀲𑀗𑁆𑀖𑁂 𑀘 𑀘𑀭𑀢𑀻𑀢𑀺 𑀲𑀢𑁆𑀣𑀸 𑀕𑀡𑀲𑀗𑁆𑀖𑀘𑀸𑀭𑀻 𑀦𑀸𑀫. 𑀅𑀤𑁆𑀥𑀸 𑀘𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀜𑁆𑀜𑁂𑀧𑀺 𑀲𑀤𑁆𑀥𑀸 𑀩𑀳𑀼𑀚𑀦𑀸 𑀏𑀓𑀁𑀲𑁂𑀦 𑀘𑀭𑀺𑀲𑁆𑀲𑀦𑁆𑀢𑀺. 𑀅𑀬𑀦𑁆𑀢𑀺 𑀅𑀬𑀁 𑀲𑀢𑁆𑀣𑀸. 𑀅𑀦𑁄𑀓𑁄𑀢𑀺 𑀅𑀦𑀸𑀮𑀬𑁄.

𑀅𑀘𑁆𑀙𑁂𑀚𑁆𑀚 𑀦𑁂𑀲𑁆𑀲𑀢𑀻𑀢𑀺 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀬𑀺𑀲𑁆𑀲𑀢𑀺, 𑀫𑀘𑁆𑀘𑀼𑀭𑀸𑀚𑀲𑁆𑀲 𑀳𑀢𑁆𑀣𑀢𑁄 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑀬𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀬𑀫𑀸𑀦𑀸𑀦𑀦𑁆𑀢𑀺 𑀦𑀬𑀫𑀸𑀦𑁂𑀲𑀼.

𑀲𑁂𑀮𑀁𑀯 𑀲𑀺𑀭𑀲𑀽𑀳𑀘𑁆𑀘, 𑀧𑀸𑀢𑀸𑀮𑁂 𑀕𑀸𑀥𑀫𑁂𑀲𑀣𑀸𑀢𑀺 𑀫𑀳𑀦𑁆𑀢𑀁 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁 𑀲𑀺𑀮𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀧𑀸𑀢𑀸𑀮𑁂 𑀧𑀢𑀺𑀝𑁆𑀞𑀕𑀯𑁂𑀲𑀦𑀁 𑀯𑀺𑀬. 𑀔𑀸𑀡𑀼𑀁𑀯 𑀉𑀭𑀲𑀸𑀲𑀚𑁆𑀚𑀸𑀢𑀺 𑀉𑀭𑀲𑀺 𑀔𑀸𑀡𑀼𑀁 𑀧𑀳𑀭𑀺𑀢𑁆𑀯𑀸 𑀯𑀺𑀬. 𑀅𑀧𑁂𑀣𑀸𑀢𑀺 𑀅𑀧𑀕𑀘𑁆𑀙𑀣. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀗𑁆𑀕𑀻𑀢𑀺𑀓𑀸𑀭𑀸 ‘‘𑀇𑀤𑀫𑀯𑁄𑀘𑀸’’𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀤𑀤𑁆𑀤𑀮𑁆𑀮𑀫𑀸𑀦𑀸𑀢𑀺 𑀕𑀸𑀣𑀁 𑀆𑀳𑀁𑀲𑀼. 𑀢𑀢𑁆𑀣 𑀤𑀤𑁆𑀤𑀮𑁆𑀮𑀫𑀸𑀦𑀸𑀢𑀺 𑀅𑀢𑀺𑀯𑀺𑀬 𑀚𑀮𑀫𑀸𑀦𑀸 𑀲𑁄𑀪𑀫𑀸𑀦𑀸. 𑀆𑀕𑀜𑁆𑀙𑀼𑀦𑁆𑀢𑀺 𑀆𑀕𑀢𑀸. 𑀧𑀦𑀼𑀤𑀻𑀢𑀺 𑀦𑀻𑀳𑀭𑀺. 𑀢𑀽𑀮𑀁 𑀪𑀝𑁆𑀞𑀁𑀯 𑀫𑀸𑀮𑀼𑀢𑁄𑀢𑀺 𑀬𑀣𑀸 𑀨𑀮𑀢𑁄 𑀪𑀝𑁆𑀞𑀁 𑀲𑀺𑀫𑁆𑀩𑀮𑀺𑀢𑀽𑀮𑀁 𑀯𑀸 𑀧𑁄𑀝𑀓𑀺𑀢𑀽𑀮𑀁 𑀯𑀸 𑀯𑀸𑀢𑁄 𑀧𑀦𑀼𑀤𑀢𑀺 𑀦𑀻𑀳𑀭𑀢𑀺, 𑀏𑀯𑀁 𑀧𑀦𑀼𑀤𑀻𑀢𑀺. 𑀧𑀜𑁆𑀘𑀫𑀁.

𑀢𑀢𑀺𑀬𑁄 𑀯𑀕𑁆𑀕𑁄.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀫𑀸𑀭𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.