𑁫. 𑀪𑀺𑀓𑁆𑀔𑀼𑀦𑀻𑀲𑀁𑀬𑀼𑀢𑁆𑀢𑀁

𑁧. 𑀆𑀴𑀯𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁨. 𑀪𑀺𑀓𑁆𑀔𑀼𑀦𑀻𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀆𑀴𑀯𑀺𑀓𑀸𑀢𑀺 𑀆𑀴𑀯𑀺𑀬𑀁 𑀚𑀸𑀢𑀸 𑀆𑀴𑀯𑀺𑀦𑀕𑀭𑀢𑁄𑀬𑁂𑀯 𑀘 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑀸. 𑀅𑀦𑁆𑀥𑀯𑀦𑀦𑁆𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑁂 𑀦𑀯𑀓𑀫𑁆𑀫𑀢𑁆𑀣𑀸𑀬 𑀥𑀦𑀁 𑀲𑀫𑀸𑀤𑀧𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲 𑀬𑀲𑁄𑀥𑀭𑀲𑁆𑀲 𑀦𑀸𑀫 𑀥𑀫𑁆𑀫𑀪𑀸𑀡𑀓𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀓𑁆𑀔𑀺𑀪𑁂𑀤𑀧𑁆𑀧𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀘𑁄𑀭𑀲𑀢𑁂𑀳𑀺 𑀦𑀺𑀯𑀼𑀢𑁆𑀣𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 ‘‘𑀅𑀦𑁆𑀥𑀯𑀦’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀯𑀦𑀁. 𑀢𑀁 𑀓𑀺𑀭 𑀲𑀸𑀯𑀢𑁆𑀣𑀺𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑁂 𑀕𑀸𑀯𑀼𑀢𑀫𑀢𑁆𑀢𑁂 𑀳𑁄𑀢𑀺 𑀭𑀸𑀚𑀸𑀭𑀓𑁆𑀔𑀸𑀬 𑀕𑀼𑀢𑁆𑀢𑀁. 𑀢𑀢𑁆𑀣 𑀧𑀯𑀺𑀯𑁂𑀓𑀓𑀸𑀫𑀸 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀓𑀸𑀬𑀯𑀺𑀯𑁂𑀓𑀢𑁆𑀣𑀺𑀦𑀻 𑀬𑁂𑀦 𑀢𑀁 𑀯𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀧𑀜𑁆𑀜𑀸𑀬𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦. 𑀦 𑀢𑁆𑀯𑀁 𑀚𑀸𑀦𑀸𑀲𑀺 𑀢𑀁 𑀧𑀤𑀦𑁆𑀢𑀺 𑀢𑁆𑀯𑀁 𑀏𑀢𑀁 𑀦𑀺𑀩𑁆𑀩𑀸𑀦𑀧𑀤𑀁 𑀯𑀸 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀧𑀤𑀁 𑀯𑀸 𑀦 𑀚𑀸𑀦𑀸𑀲𑀺. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸𑀢𑀺 𑀯𑀺𑀦𑀺𑀯𑀺𑀚𑁆𑀛𑀦𑀢𑁆𑀣𑁂𑀦 𑀲𑀢𑁆𑀢𑀺𑀲𑀽𑀮𑀲𑀤𑀺𑀲𑀸. 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸𑀢𑀺 𑀔𑀦𑁆𑀥𑀸 𑀢𑁂𑀲𑀁 𑀅𑀥𑀺𑀓𑀼𑀝𑁆𑀝𑀦𑀪𑀡𑁆𑀟𑀺𑀓𑀸. 𑀧𑀞𑀫𑀁.

𑁨. 𑀲𑁄𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁩. 𑀤𑀼𑀢𑀺𑀬𑁂 𑀞𑀸𑀦𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀤𑀼𑀭𑀪𑀺𑀲𑀫𑁆𑀪𑀯𑀦𑁆𑀢𑀺 𑀤𑀼𑀧𑁆𑀧𑀲𑀳𑀁. 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬𑀸𑀢𑀺 𑀧𑀭𑀺𑀢𑁆𑀢𑀧𑀜𑁆𑀜𑀸𑀬. 𑀬𑀲𑁆𑀫𑀸 𑀯𑀸 𑀤𑁆𑀯𑀻𑀳𑀺 𑀅𑀗𑁆𑀕𑀼𑀮𑁂𑀳𑀺 𑀓𑀧𑁆𑀧𑀸𑀲𑀯𑀝𑁆𑀝𑀺𑀁 𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀇𑀢𑁆𑀣𑀻 ‘‘𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺. 𑀜𑀸𑀡𑀫𑁆𑀳𑀺 𑀯𑀢𑁆𑀢𑀫𑀸𑀦𑀫𑁆𑀳𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀜𑀸𑀡𑁂 𑀧𑀯𑀢𑁆𑀢𑀫𑀸𑀦𑁂. 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀺𑀧𑀲𑁆𑀲𑀦𑁆𑀢𑀲𑁆𑀲, 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀁 𑀔𑀦𑁆𑀥𑀧𑀜𑁆𑀘𑀓𑀫𑁂𑀯. 𑀓𑀺𑀜𑁆𑀘𑀺 𑀯𑀸 𑀧𑀦 𑀅𑀜𑁆𑀜𑀲𑁆𑀫𑀻𑀢𑀺 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 ‘‘𑀅𑀳𑀁 𑀅𑀲𑁆𑀫𑀻’’𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀬𑀲𑁆𑀲 𑀲𑀺𑀬𑀸. 𑀤𑀼𑀢𑀺𑀬𑀁.

𑁩. 𑀓𑀺𑀲𑀸𑀕𑁄𑀢𑀫𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁪. 𑀢𑀢𑀺𑀬𑁂 𑀓𑀺𑀲𑀸𑀕𑁄𑀢𑀫𑀻𑀢𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑀸𑀬 𑀓𑀺𑀲𑀸, 𑀕𑁄𑀢𑀫𑀻𑀢𑀺 𑀧𑀦𑀲𑁆𑀲𑀸 𑀦𑀸𑀫𑀁. 𑀧𑀼𑀩𑁆𑀩𑁂 𑀓𑀺𑀭 𑀲𑀸𑀯𑀢𑁆𑀣𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀲𑀩𑁆𑀩𑀁 𑀅𑀗𑁆𑀕𑀸𑀭𑀸𑀯 𑀚𑀸𑀢𑀁. 𑀓𑀼𑀝𑀼𑀫𑁆𑀩𑀺𑀓𑁄 𑀅𑀗𑁆𑀕𑀸𑀭𑀚𑀸𑀢𑀸𑀦𑀺 𑀅𑀦𑀻𑀳𑀭𑀺𑀢𑁆𑀯𑀸 𑁋 ‘‘𑀅𑀯𑀲𑁆𑀲𑀁 𑀓𑁄𑀘𑀺 𑀧𑀼𑀜𑁆𑀜𑀯𑀸 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲 𑀧𑀼𑀜𑁆𑀜𑁂𑀦 𑀧𑀼𑀦 𑀧𑀸𑀓𑀢𑀺𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀲𑁆𑀲 𑀘𑀸𑀝𑀺𑀬𑁄 𑀧𑀽𑀭𑁂𑀢𑁆𑀯𑀸 𑀆𑀧𑀡𑁂 𑀞𑀧𑁂𑀢𑁆𑀯𑀸 𑀲𑀫𑀻𑀧𑁂 𑀦𑀺𑀲𑀻𑀤𑀺. 𑀅𑀣𑁂𑀓𑀸 𑀤𑀼𑀕𑁆𑀕𑀢𑀓𑀼𑀮𑀲𑁆𑀲 𑀥𑀻𑀢𑀸 𑁋 ‘‘𑀅𑀟𑁆𑀠𑀫𑀸𑀲𑀓𑀁 𑀕𑀳𑁂𑀢𑁆𑀯𑀸 𑀤𑀸𑀭𑀼𑀲𑀸𑀓𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀣𑀺𑀁 𑀕𑀢𑀸 𑀢𑀁 𑀤𑀺𑀲𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑀁 𑀆𑀳 𑁋 ‘‘𑀆𑀧𑀡𑁂 𑀢𑀸𑀯 𑀥𑀦𑀁 𑀏𑀢𑁆𑀢𑀓𑀁, 𑀕𑁂𑀳𑁂 𑀓𑀺𑀢𑁆𑀢𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀓𑀺𑀁 𑀤𑀺𑀲𑁆𑀯𑀸 𑀅𑀫𑁆𑀫 𑀏𑀯𑀁 𑀓𑀣𑁂𑀲𑀻𑀢𑀺? 𑀇𑀫𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀦𑁆𑀢𑀺. 𑀲𑁄 ‘‘𑀧𑀼𑀜𑁆𑀜𑀯𑀢𑀻 𑀏𑀲𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲𑀸 𑀯𑀲𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀧𑀡𑁂 𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀅𑀫𑁆𑀳𑀸𑀓𑀁 𑀕𑁂𑀳𑁂 𑀯𑀬𑀧𑁆𑀧𑀢𑁆𑀢𑁄 𑀤𑀸𑀭𑀓𑁄 𑀅𑀢𑁆𑀣𑀺, 𑀢𑀲𑁆𑀲𑁂𑀢𑀁 𑀤𑀸𑀭𑀺𑀓𑀁 𑀤𑁂𑀣𑀸’’𑀢𑀺. 𑀓𑀺𑀁 𑀲𑀸𑀫𑀺 𑀤𑀼𑀕𑁆𑀕𑀢𑁂𑀳𑀺 𑀲𑀤𑁆𑀥𑀺𑀁 𑀓𑁂𑀴𑀺𑀁 𑀓𑀭𑁄𑀲𑀻𑀢𑀺? 𑀫𑀺𑀢𑁆𑀢𑀲𑀦𑁆𑀣𑀯𑁄 𑀦𑀸𑀫 𑀤𑀼𑀕𑁆𑀕𑀢𑁂𑀳𑀺𑀧𑀺 𑀲𑀤𑁆𑀥𑀺𑀁 𑀳𑁄𑀢𑀺, 𑀤𑁂𑀣 𑀦𑀁, 𑀓𑀼𑀝𑀼𑀫𑁆𑀩𑀲𑀸𑀫𑀺𑀦𑀻 𑀪𑀯𑀺𑀲𑁆𑀲𑀢𑀻𑀢𑀺 𑀦𑀁 𑀕𑀳𑁂𑀢𑁆𑀯𑀸 𑀖𑀭𑀁 𑀆𑀦𑁂𑀲𑀺. 𑀲𑀸 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸. 𑀧𑀼𑀢𑁆𑀢𑁄 𑀧𑀤𑀲𑀸 𑀆𑀳𑀺𑀡𑁆𑀟𑀦𑀓𑀸𑀮𑁂 𑀓𑀸𑀮𑀫𑀓𑀸𑀲𑀺. 𑀲𑀸 𑀤𑀼𑀕𑁆𑀕𑀢𑀓𑀼𑀮𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀫𑀳𑀸𑀓𑀼𑀮𑀁 𑀕𑀦𑁆𑀢𑁆𑀯𑀸𑀧𑀺 ‘‘𑀧𑀼𑀢𑁆𑀢𑀯𑀺𑀦𑀸𑀲𑀁 𑀧𑀢𑁆𑀢𑀸𑀫𑁆𑀳𑀻’’𑀢𑀺 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀸 𑀧𑀼𑀢𑁆𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀯𑀸𑀭𑁂𑀢𑁆𑀯𑀸 𑀢𑀁 𑀫𑀢𑀓𑀴𑁂𑀯𑀭𑀁 𑀆𑀤𑀸𑀬 𑀦𑀕𑀭𑁂 𑀯𑀺𑀧𑁆𑀧𑀮𑀧𑀦𑁆𑀢𑀻 𑀘𑀭𑀢𑀺.

𑀏𑀓𑀤𑀺𑀯𑀲𑀁 𑀫𑀳𑀢𑀺𑀬𑀸 𑀩𑀼𑀤𑁆𑀥𑀯𑀻𑀣𑀺𑀬𑀸 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀅𑀭𑁄𑀕𑀪𑀸𑀯𑀢𑁆𑀣𑀸𑀬 𑀪𑁂𑀲𑀚𑁆𑀚𑀁 𑀤𑁂𑀣 𑀪𑀕𑀯𑀸’’𑀢𑀺 𑀆𑀳. 𑀕𑀘𑁆𑀙 𑀲𑀸𑀯𑀢𑁆𑀣𑀺𑀁 𑀆𑀳𑀺𑀡𑁆𑀟𑀺𑀢𑁆𑀯𑀸 𑀬𑀲𑁆𑀫𑀺𑀁 𑀕𑁂𑀳𑁂 𑀫𑀢𑀧𑀼𑀩𑁆𑀩𑁄 𑀦𑀢𑁆𑀣𑀺, 𑀢𑀢𑁄 𑀲𑀺𑀤𑁆𑀥𑀢𑁆𑀣𑀓𑀁 𑀆𑀳𑀭, 𑀧𑀼𑀢𑁆𑀢𑀲𑁆𑀲 𑀢𑁂 𑀪𑁂𑀲𑀚𑁆𑀚𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀲𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀥𑀼𑀭𑀕𑁂𑀳𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦 𑀕𑀦𑁆𑀢𑁆𑀯𑀸 𑀲𑀺𑀤𑁆𑀥𑀢𑁆𑀣𑀓𑀁 𑀬𑀸𑀘𑀦𑁆𑀢𑀻 𑀖𑀭𑁂 𑀖𑀭𑁂, ‘‘𑀓𑀼𑀢𑁄 𑀢𑁆𑀯𑀁 𑀏𑀯𑀭𑀽𑀧𑀁 𑀖𑀭𑀁 𑀧𑀲𑁆𑀲𑀺𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑀸 𑀓𑀢𑀺𑀧𑀬𑀸𑀦𑀺 𑀕𑁂𑀳𑀸𑀦𑀺 𑀆𑀳𑀺𑀡𑁆𑀟𑀺𑀢𑁆𑀯𑀸 𑁋 ‘‘𑀲𑀩𑁆𑀩𑁂𑀲𑀫𑁆𑀧𑀺 𑀓𑀺𑀭𑀸𑀬𑀁 𑀥𑀫𑁆𑀫𑀢𑀸, 𑀦 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲𑁂𑀯𑀸’’𑀢𑀺 𑀲𑀸𑀮𑀸𑀬𑀁 𑀙𑀯𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 ‘‘𑀇𑀫𑀁 𑀧𑀩𑁆𑀩𑀸𑀚𑁂𑀢𑀽’’𑀢𑀺 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀧𑁂𑀲𑁂𑀲𑀺. 𑀲𑀸 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀇𑀫𑀁 𑀣𑁂𑀭𑀺𑀁 𑀲𑀦𑁆𑀥𑀸𑀬 ‘‘𑀅𑀣 𑀔𑁄 𑀓𑀺𑀲𑀸𑀕𑁄𑀢𑀫𑀻’’𑀢𑀺 𑀯𑀼𑀢𑁆𑀢𑀁.

𑀏𑀓𑀫𑀸𑀲𑀻𑀢𑀺 𑀏𑀓𑀸 𑀆𑀲𑀺. 𑀭𑀼𑀤𑀫𑁆𑀫𑀼𑀔𑀻𑀢𑀺 𑀭𑀼𑀤𑀫𑀸𑀦𑀫𑀼𑀔𑀻 𑀯𑀺𑀬. 𑀅𑀘𑁆𑀘𑀦𑁆𑀢𑀁 𑀫𑀢𑀧𑀼𑀢𑁆𑀢𑀸𑀫𑁆𑀳𑀻𑀢𑀺 𑀏𑀢𑁆𑀣 𑀅𑀦𑁆𑀢𑀁 𑀅𑀢𑀻𑀢𑀁 𑀅𑀘𑁆𑀘𑀦𑁆𑀢𑀁, 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀧𑀼𑀢𑁆𑀢𑀫𑀭𑀡𑀁 𑀅𑀦𑁆𑀢𑀁 𑀅𑀢𑀻𑀢𑀁 𑀳𑁄𑀢𑀺, 𑀏𑀯𑀁 𑀫𑀢𑀧𑀼𑀢𑁆𑀢𑀸 𑀅𑀳𑀁, 𑀇𑀤𑀸𑀦𑀺 𑀫𑀫 𑀧𑀼𑀦 𑀧𑀼𑀢𑁆𑀢𑀫𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀧𑀼𑀭𑀺𑀲𑀸 𑀏𑀢𑀤𑀦𑁆𑀢𑀺𑀓𑀸𑀢𑀺 𑀧𑀼𑀭𑀺𑀲𑀸𑀧𑀺 𑀫𑁂 𑀏𑀢𑀤𑀦𑁆𑀢𑀺𑀓𑀸𑀯. 𑀬𑁄 𑀫𑁂 𑀧𑀼𑀢𑁆𑀢𑀫𑀭𑀡𑀲𑁆𑀲 𑀅𑀦𑁆𑀢𑁄, 𑀧𑀼𑀭𑀺𑀲𑀸𑀦𑀫𑁆𑀧𑀺 𑀫𑁂 𑀏𑀲𑁂𑀯𑀦𑁆𑀢𑁄, 𑀅𑀪𑀩𑁆𑀩𑀸 𑀅𑀳𑀁 𑀇𑀤𑀸𑀦𑀺 𑀧𑀼𑀭𑀺𑀲𑀁 𑀕𑀯𑁂𑀲𑀺𑀢𑀼𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼 𑀫𑀫 𑀢𑀡𑁆𑀳𑀸𑀦𑀦𑁆𑀤𑀻 𑀯𑀺𑀳𑀢𑀸. 𑀢𑀫𑁄𑀓𑁆𑀔𑀦𑁆𑀥𑁄𑀢𑀺 𑀅𑀯𑀺𑀚𑁆𑀚𑀸𑀓𑁆𑀔𑀦𑁆𑀥𑁄. 𑀧𑀤𑀸𑀮𑀺𑀢𑁄𑀢𑀺 𑀜𑀸𑀡𑁂𑀦 𑀪𑀺𑀦𑁆𑀦𑁄. 𑀢𑀢𑀺𑀬𑀁.

𑁪. 𑀯𑀺𑀚𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁫. 𑀘𑀢𑀼𑀢𑁆𑀣𑁂 𑀧𑀜𑁆𑀘𑀗𑁆𑀕𑀺𑀓𑁂𑀦𑀸𑀢𑀺 𑀆𑀢𑀢𑀁 𑀯𑀺𑀢𑀢𑀁 𑀆𑀢𑀢𑀯𑀺𑀢𑀢𑀁 𑀖𑀦𑀁 𑀲𑀼𑀲𑀺𑀭𑀦𑁆𑀢𑀺 𑀏𑀯𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦. 𑀦𑀺𑀬𑁆𑀬𑀸𑀢𑀬𑀸𑀫𑀺 𑀢𑀼𑀬𑁆𑀳𑁂𑀯𑀸𑀢𑀺 𑀲𑀩𑁆𑀩𑁂 𑀢𑀼𑀬𑁆𑀳𑀁𑀬𑁂𑀯 𑀤𑁂𑀫𑀺. 𑀦𑀸𑀳𑀁 𑀢𑁂𑀦𑀢𑁆𑀣𑀺𑀓𑀸𑀢𑀺 𑀦𑀸𑀳𑀁 𑀢𑁂𑀦 𑀅𑀢𑁆𑀣𑀺𑀓𑀸. 𑀧𑀽𑀢𑀺𑀓𑀸𑀬𑁂𑀦𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 𑀦𑀺𑀘𑁆𑀘𑀁 𑀉𑀕𑁆𑀖𑀭𑀺𑀢𑀧𑀕𑁆𑀖𑀭𑀺𑀢𑀝𑁆𑀞𑁂𑀦 𑀧𑀽𑀢𑀺𑀓𑀸𑀬𑁄𑀯, 𑀢𑀲𑁆𑀫𑀸 𑀏𑀯𑀫𑀸𑀳. 𑀪𑀺𑀦𑁆𑀤𑀦𑁂𑀦𑀸𑀢𑀺 𑀪𑀺𑀚𑁆𑀚𑀦𑀲𑀪𑀸𑀯𑁂𑀦. 𑀧𑀪𑀗𑁆𑀕𑀼𑀦𑀸𑀢𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀆𑀧𑀚𑁆𑀚𑀦𑀥𑀫𑁆𑀫𑁂𑀦. 𑀅𑀝𑁆𑀝𑀻𑀬𑀸𑀫𑀻𑀢𑀺 𑀅𑀝𑁆𑀝𑀸 𑀧𑀻𑀴𑀺𑀢𑀸 𑀳𑁄𑀫𑀺. 𑀳𑀭𑀸𑀬𑀸𑀫𑀻𑀢𑀺 𑀮𑀚𑁆𑀚𑀸𑀫𑀺. 𑀲𑀦𑁆𑀢𑀸 𑀲𑀫𑀸𑀧𑀢𑁆𑀢𑀻𑀢𑀺 𑀅𑀝𑁆𑀞𑀯𑀺𑀥𑀸 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀅𑀗𑁆𑀕𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀭𑀽𑀧𑀸𑀭𑀽𑀧𑀪𑀯𑁂𑀲𑀼, 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀪𑀯𑀸𑀦𑀁 𑀕𑀳𑀺𑀢𑀢𑁆𑀢𑀸 𑀕𑀳𑀺𑀢𑁂 𑀓𑀸𑀫𑀪𑀯𑁂 𑀅𑀝𑁆𑀞𑀲𑀼 𑀘 𑀲𑀫𑀸𑀧𑀢𑁆𑀢𑀻𑀲𑀽𑀢𑀺 𑀏𑀢𑁂𑀲𑀼 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀫𑀬𑁆𑀳𑀁 𑀅𑀯𑀺𑀚𑁆𑀚𑀸𑀢𑀫𑁄 𑀯𑀺𑀳𑀢𑁄𑀢𑀺 𑀯𑀤𑀢𑀺. 𑀘𑀢𑀼𑀢𑁆𑀣𑀁.

𑁫. 𑀉𑀧𑁆𑀧𑀮𑀯𑀡𑁆𑀡𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. 𑀧𑀜𑁆𑀘𑀫𑁂 𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀦𑁆𑀢𑀺 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀼𑀝𑁆𑀞𑀼 𑀧𑀼𑀧𑁆𑀨𑀺𑀢𑀁 𑀲𑀸𑀮𑀭𑀼𑀓𑁆𑀔𑀁. 𑀦 𑀘𑀢𑁆𑀣𑀺 𑀢𑁂 𑀤𑀼𑀢𑀺𑀬𑀸 𑀯𑀡𑁆𑀡𑀥𑀸𑀢𑀽𑀢𑀺 𑀢𑀯 𑀯𑀡𑁆𑀡𑀥𑀸𑀢𑀼𑀲𑀤𑀺𑀲𑀸 𑀤𑀼𑀢𑀺𑀬𑀸 𑀯𑀡𑁆𑀡𑀥𑀸𑀢𑀼 𑀦𑀢𑁆𑀣𑀺, 𑀢𑀬𑀸 𑀲𑀤𑀺𑀲𑀸 𑀅𑀜𑁆𑀜𑀸 𑀪𑀺𑀓𑁆𑀔𑀼𑀦𑀻 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀇𑀥𑀸𑀕𑀢𑀸 𑀢𑀸𑀤𑀺𑀲𑀺𑀓𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀬𑀣𑀸 𑀢𑁆𑀯𑀁 𑀇𑀥𑀸𑀕𑀢𑀸 𑀓𑀺𑀜𑁆𑀘𑀺 𑀲𑀦𑁆𑀣𑀯𑀁 𑀯𑀸 𑀲𑀺𑀦𑁂𑀳𑀁 𑀯𑀸 𑀦 𑀮𑀪𑀲𑀺, 𑀏𑀯𑀫𑁂𑀯𑀁 𑀢𑁂𑀧𑀺 𑀢𑀬𑀸𑀯 𑀲𑀤𑀺𑀲𑀸 𑀪𑀯𑁂𑀬𑁆𑀬𑀼𑀁. 𑀧𑀔𑀼𑀫𑀦𑁆𑀢𑀭𑀺𑀓𑀸𑀬𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀅𑀓𑁆𑀔𑀻𑀦𑀁 𑀫𑀚𑁆𑀛𑁂 𑀦𑀸𑀲𑀯𑀁𑀲𑁂𑀧𑀺 𑀢𑀺𑀝𑁆𑀞𑀦𑁆𑀢𑀺𑀁 𑀫𑀁 𑀦 𑀧𑀲𑁆𑀲𑀲𑀺. 𑀯𑀲𑀻𑀪𑀽𑀢𑀫𑁆𑀳𑀻𑀢𑀺 𑀯𑀲𑀻𑀪𑀽𑀢𑀸 𑀅𑀲𑁆𑀫𑀺. 𑀧𑀜𑁆𑀘𑀫𑀁.

𑁬. 𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁭. 𑀙𑀝𑁆𑀞𑁂 𑀓𑁄 𑀦𑀼 𑀢𑀁 𑀇𑀤𑀫𑀸𑀤𑀧𑀬𑀻𑀢𑀺 𑀓𑁄 𑀦𑀼 𑀫𑀦𑁆𑀤𑀩𑀼𑀤𑁆𑀥𑀺 𑀩𑀸𑀮𑁄 𑀢𑀁 𑀏𑀯𑀁 𑀕𑀸𑀳𑀸𑀧𑁂𑀲𑀺? 𑀧𑀭𑀺𑀓𑁆𑀮𑁂𑀲𑀦𑁆𑀢𑀺 𑀅𑀜𑁆𑀜𑀫𑁆𑀧𑀺 𑀦𑀸𑀦𑀧𑁆𑀧𑀓𑀸𑀭𑀁 𑀉𑀧𑀤𑁆𑀤𑀯𑀁. 𑀇𑀤𑀸𑀦𑀺 𑀬𑀁 𑀫𑀸𑀭𑁄 𑀆𑀳 𑁋 ‘‘𑀓𑁄 𑀦𑀼 𑀢𑀁 𑀇𑀤𑀫𑀸𑀤𑀧𑀬𑀻’’𑀢𑀺, 𑀢𑀁 𑀫𑀤𑁆𑀤𑀦𑁆𑀢𑀻 𑁋 ‘‘𑀦 𑀫𑀁 𑀅𑀦𑁆𑀥𑀩𑀸𑀮𑁄 𑀆𑀤𑀧𑁂𑀲𑀺, 𑀮𑁄𑀓𑁂 𑀧𑀦 𑀅𑀕𑁆𑀕𑀧𑀼𑀕𑁆𑀕𑀮𑁄 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺 𑀤𑀲𑁆𑀲𑁂𑀢𑀼𑀁, 𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁆𑀘𑁂 𑀦𑀺𑀯𑁂𑀲𑀬𑀻𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑁂 𑀦𑀺𑀩𑁆𑀩𑀸𑀦𑁂 𑀦𑀺𑀯𑁂𑀲𑁂𑀲𑀺. 𑀦𑀺𑀭𑁄𑀥𑀁 𑀅𑀧𑁆𑀧𑀚𑀸𑀦𑀦𑁆𑀢𑀸𑀢𑀺 𑀦𑀺𑀭𑁄𑀥𑀲𑀘𑁆𑀘𑀁 𑀅𑀚𑀸𑀦𑀦𑁆𑀢𑀸. 𑀙𑀝𑁆𑀞𑀁.

𑁭. 𑀉𑀧𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁮. 𑀲𑀢𑁆𑀢𑀫𑁂 𑀏𑀦𑁆𑀢𑀺 𑀫𑀸𑀭𑀯𑀲𑀁 𑀧𑀼𑀦𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀫𑀭𑀡𑀫𑀸𑀭𑀓𑀺𑀮𑁂𑀲𑀫𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀦𑀁 𑀯𑀲𑀁 𑀆𑀕𑀘𑁆𑀙𑀦𑁆𑀢𑀺. 𑀧𑀥𑀽𑀧𑀺𑀢𑁄𑀢𑀺 𑀲𑀦𑁆𑀢𑀸𑀧𑀺𑀢𑁄. 𑀅𑀕𑀢𑀺 𑀬𑀢𑁆𑀣 𑀫𑀸𑀭𑀲𑁆𑀲𑀸𑀢𑀺 𑀬𑀢𑁆𑀣 𑀢𑀼𑀬𑁆𑀳𑀁 𑀫𑀸𑀭𑀲𑁆𑀲 𑀅𑀕𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂. 𑀲𑀢𑁆𑀢𑀫𑀁.

𑁮. 𑀲𑀻𑀲𑀼𑀧𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁯. 𑀅𑀝𑁆𑀞𑀫𑁂 𑀲𑀫𑀡𑀻 𑀯𑀺𑀬 𑀤𑀺𑀲𑁆𑀲𑀲𑀻𑀢𑀺 𑀲𑀫𑀡𑀺𑀲𑀤𑀺𑀲𑀸 𑀤𑀺𑀲𑁆𑀲𑀲𑀺. 𑀓𑀺𑀫𑀺𑀯 𑀘𑀭𑀲𑀺 𑀫𑁄𑀫𑀽𑀳𑀸𑀢𑀺 𑀓𑀺𑀁 𑀓𑀸𑀭𑀡𑀸 𑀫𑁄𑀫𑀽𑀳𑀸 𑀯𑀺𑀬 𑀘𑀭𑀲𑀺? 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀇𑀫𑀫𑁆𑀳𑀸 𑀲𑀸𑀲𑀦𑀸 𑀩𑀳𑀺. 𑀧𑀸𑀲𑀁 𑀟𑁂𑀦𑁆𑀢𑀻𑀢𑀺 𑀧𑀸𑀲𑀡𑁆𑀟𑀸, 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀧𑀸𑀲𑀁 𑀔𑀺𑀧𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀁 𑀧𑀦 𑀧𑀸𑀲𑁂 𑀫𑁄𑀘𑁂𑀢𑀺, 𑀢𑀲𑁆𑀫𑀸 𑀧𑀸𑀲𑀡𑁆𑀟𑁄𑀢𑀺 𑀦 𑀯𑀼𑀘𑁆𑀘𑀢𑀺, 𑀇𑀢𑁄 𑀩𑀳𑀺𑀤𑁆𑀥𑀸𑀬𑁂𑀯 𑀧𑀸𑀲𑀡𑁆𑀟𑀸 𑀳𑁄𑀦𑁆𑀢𑀺. 𑀧𑀲𑀻𑀤𑀦𑁆𑀢𑀻𑀢𑀺 𑀲𑀁𑀲𑀻𑀤𑀦𑁆𑀢𑀺 𑀮𑀕𑁆𑀕𑀦𑁆𑀢𑀺.

𑀇𑀤𑀸𑀦𑀺 ‘‘𑀓𑀁 𑀦𑀼 𑀉𑀤𑁆𑀤𑀺𑀲𑁆𑀲 𑀫𑀼𑀡𑁆𑀟𑀸𑀲𑀻’’𑀢𑀺 𑀧𑀜𑁆𑀳𑀁 𑀓𑀣𑁂𑀦𑁆𑀢𑀻 𑀅𑀢𑁆𑀣𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀸𑀪𑀺𑀪𑀽𑀢𑀺 𑀲𑀩𑁆𑀩𑀸𑀦𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀪𑀯𑀬𑁄𑀦𑀺𑀕𑀢𑀺𑀆𑀤𑀻𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀫𑀭𑀡𑀫𑀸𑀭𑀸𑀤𑀬𑁄 𑀦𑀼𑀤𑀺 𑀦𑀻𑀳𑀭𑀻𑀢𑀺 𑀫𑀸𑀭𑀦𑀼𑀤𑁄. 𑀲𑀩𑁆𑀩𑀢𑁆𑀣𑀫𑀧𑀭𑀸𑀚𑀺𑀢𑁄𑀢𑀺 𑀲𑀩𑁆𑀩𑁂𑀲𑀼 𑀭𑀸𑀕𑀸𑀤𑀻𑀲𑀼 𑀯𑀸 𑀫𑀸𑀭𑀬𑀼𑀤𑁆𑀥𑁂 𑀯𑀸 𑀅𑀚𑀺𑀢𑁄. 𑀲𑀩𑁆𑀩𑀢𑁆𑀣 𑀫𑀼𑀢𑁆𑀢𑁄𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀫𑀼𑀢𑁆𑀢𑁄. 𑀅𑀲𑀺𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀦 𑀅𑀦𑀺𑀲𑁆𑀲𑀺𑀢𑁄. 𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀁 𑀧𑀢𑁆𑀢𑁄𑀢𑀺 𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀉𑀧𑀥𑀺𑀲𑀗𑁆𑀔𑀬𑁂𑀢𑀺 𑀉𑀧𑀥𑀺𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀢𑁄 𑀯𑀺𑀫𑀼𑀢𑁆𑀢𑁄. 𑀅𑀝𑁆𑀞𑀫𑀁.

𑁯. 𑀲𑁂𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁦. 𑀦𑀯𑀫𑁂 𑀓𑁂𑀦𑀺𑀤𑀁 𑀧𑀓𑀢𑀦𑁆𑀢𑀺 𑀓𑁂𑀦 𑀇𑀤𑀁 𑀓𑀢𑀁. 𑀩𑀺𑀫𑁆𑀩𑀦𑁆𑀢𑀺 𑀅𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀖𑀦𑁆𑀢𑀺 𑀤𑀼𑀓𑁆𑀔𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀅𑀢𑁆𑀢𑀪𑀸𑀯𑀫𑁂𑀯 𑀯𑀤𑀢𑀺. 𑀳𑁂𑀢𑀼𑀪𑀗𑁆𑀕𑀸𑀢𑀺 𑀳𑁂𑀢𑀼𑀦𑀺𑀭𑁄𑀥𑁂𑀦 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦. 𑀦𑀯𑀫𑀁.

𑁧𑁦. 𑀯𑀚𑀺𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁧. 𑀤𑀲𑀫𑁂 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁂 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄 𑀦𑀸𑀫 𑀦 𑀉𑀧𑀮𑀩𑁆𑀪𑀢𑀺. 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀽𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀯𑀯𑀢𑁆𑀣𑀺𑀢𑁂𑀲𑀼. 𑀲𑀫𑁆𑀫𑀼𑀢𑀻𑀢𑀺 𑀲𑀢𑁆𑀢𑁄𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀁. 𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸𑀢𑀺 𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑀁 𑀅𑀜𑁆𑀜𑁄 𑀦𑁂𑀯 𑀲𑀫𑁆𑀪𑁄𑀢𑀺 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺. 𑀤𑀲𑀫𑀁.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀪𑀺𑀓𑁆𑀔𑀼𑀦𑀻𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.