𑁫. 𑀤𑀼𑀢𑀺𑀬𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁬. 𑀧𑀜𑁆𑀘𑀫𑁂 𑀅𑀩𑁆𑀪𑀼𑀬𑁆𑀬𑀸𑀲𑀻𑀢𑀺 𑀧𑀭𑀸𑀚𑀬𑁂 𑀕𑀭𑀳𑀧𑁆𑀧𑀢𑁆𑀢𑁄 ‘‘𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀡𑀸𑀣𑀸’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀩𑀼𑀤𑁆𑀥𑀭𑀓𑁆𑀔𑀺𑀢𑁂𑀦 𑀦𑀸𑀫 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑁆𑀲 ‘‘𑀲𑀘𑁂 𑀭𑀸𑀚𑀸 𑀇𑀫𑀜𑁆𑀘 𑀉𑀧𑀸𑀬𑀁 𑀓𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀧𑀼𑀦 𑀚𑀺𑀦𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀚𑀬𑀓𑀸𑀭𑀡𑀁 𑀲𑀼𑀢𑁆𑀯𑀸 𑀅𑀪𑀺𑀉𑀬𑁆𑀬𑀸𑀲𑀺.

𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀻𑀢𑀺 𑀬𑀸𑀯 𑀢𑀲𑁆𑀲 𑀉𑀧𑀓𑀧𑁆𑀧𑀢𑀺 𑀲𑀬𑁆𑀳𑀁 𑀳𑁄𑀢𑀺. 𑀬𑀤𑀸 𑀘𑀜𑁆𑀜𑁂𑀢𑀺 𑀬𑀤𑀸 𑀅𑀜𑁆𑀜𑁂. 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺 𑀢𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀁 𑀯𑀺𑀮𑀼𑀫𑁆𑀧𑀦𑁆𑀢𑀺. 𑀯𑀺𑀮𑀼𑀫𑁆𑀧𑀢𑀻𑀢𑀺 𑀯𑀺𑀮𑀼𑀫𑁆𑀧𑀺𑀬𑀢𑀺. 𑀞𑀸𑀦𑀁 𑀳𑀺 𑀫𑀜𑁆𑀜𑀢𑀻𑀢𑀺 ‘‘𑀓𑀸𑀭𑀡’’𑀦𑁆𑀢𑀺 𑀳𑀺 𑀫𑀜𑁆𑀜𑀢𑀺. 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀚𑁂𑀢𑀸𑀭𑀁 𑀮𑀪𑀢𑁂 𑀚𑀬𑀦𑁆𑀢𑀺 𑀚𑀬𑀦𑁆𑀢𑁄 𑀧𑀼𑀕𑁆𑀕𑀮𑁄 𑀧𑀘𑁆𑀙𑀸 𑀚𑁂𑀢𑀸𑀭𑀫𑁆𑀧𑀺 𑀮𑀪𑀢𑀺. 𑀭𑁄𑀲𑁂𑀢𑀸𑀭𑀦𑁆𑀢𑀺 𑀖𑀝𑁆𑀝𑁂𑀢𑀸𑀭𑀁. 𑀭𑁄𑀲𑀓𑁄𑀢𑀺 𑀖𑀝𑁆𑀝𑀓𑁄. 𑀓𑀫𑁆𑀫𑀯𑀺𑀯𑀝𑁆𑀝𑁂𑀦𑀸𑀢𑀺 𑀓𑀫𑁆𑀫𑀧𑀭𑀺𑀡𑀸𑀫𑁂𑀦, 𑀢𑀲𑁆𑀲 𑀯𑀺𑀮𑀼𑀫𑁆𑀧𑀦𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀤𑀸𑀦𑁂𑀦. 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀧𑁆𑀧𑀢𑀻𑀢𑀺 𑀲𑁄 𑀯𑀺𑀮𑀼𑀫𑁆𑀧𑀓𑁄 𑀯𑀺𑀮𑀼𑀫𑁆𑀧𑀺𑀬𑀢𑀺. 𑀧𑀜𑁆𑀘𑀫𑀁.