𑁯. 𑀅𑀭𑀜𑁆𑀜𑀸𑀬𑀢𑀦𑀇𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁫. 𑀦𑀯𑀫𑁂 𑀧𑀡𑁆𑀡𑀓𑀼𑀝𑀻𑀲𑀼 𑀲𑀫𑁆𑀫𑀦𑁆𑀢𑀻𑀢𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀭𑀫𑀡𑀻𑀬𑁂 𑀅𑀭𑀜𑁆𑀜𑀸𑀬𑀢𑀦𑁂 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀦𑀸𑀤𑀻𑀳𑀺 𑀲𑀫𑁆𑀧𑀦𑁆𑀦𑀸𑀲𑀼 𑀧𑀡𑁆𑀡𑀲𑀸𑀮𑀸𑀲𑀼 𑀯𑀲𑀦𑁆𑀢𑀺. 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀧𑀘𑀺𑀢𑁆𑀢𑀺 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀚𑀦𑀸 𑀚𑀸𑀫𑀸𑀢𑀺𑀓𑀲𑀲𑀼𑀭𑀸 𑀓𑀸𑀮𑁂𑀦 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀓𑀸𑀮𑁂𑀦 𑀏𑀓𑀢𑁄 𑀘𑀭𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀏𑀓𑀢𑁄 𑀘𑀭𑀦𑁆𑀢𑀺. 𑀧𑀝𑀮𑀺𑀬𑁄𑀢𑀺 𑀕𑀡𑀗𑁆𑀕𑀡𑀽𑀧𑀸𑀳𑀦𑀸. 𑀔𑀕𑁆𑀕𑀁 𑀑𑀮𑀕𑁆𑀕𑁂𑀢𑁆𑀯𑀸𑀢𑀺 𑀔𑀕𑁆𑀕𑀁 𑀅𑀁𑀲𑁂 𑀑𑀮𑀕𑁆𑀕𑁂𑀢𑁆𑀯𑀸. 𑀙𑀢𑁆𑀢𑁂𑀦𑀸𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂𑀦 𑀫𑀢𑁆𑀣𑀓𑁂 𑀥𑀸𑀭𑀬𑀫𑀸𑀦𑁂𑀦. 𑀅𑀧𑀩𑁆𑀬𑀸𑀫𑀢𑁄 𑀓𑀭𑀺𑀢𑁆𑀯𑀸𑀢𑀺 𑀩𑁆𑀬𑀸𑀫𑀢𑁄 𑀅𑀓𑀢𑁆𑀯𑀸. 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀦𑁆𑀢𑀺 𑀘𑀺𑀭𑀲𑀫𑀸𑀤𑀺𑀡𑁆𑀡𑀯𑀢𑀸𑀦𑀁. 𑀇𑀢𑁄 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 ‘‘𑀇𑀢𑁄 𑀧𑀓𑁆𑀓𑀫 𑀧𑀭𑀺𑀯𑀚𑁆𑀚𑀬, 𑀫𑀸 𑀉𑀧𑀭𑀺𑀯𑀸𑀢𑁂 𑀢𑀺𑀝𑁆𑀞𑀸’’𑀢𑀺 𑀯𑀤𑀦𑁆𑀢𑀺. 𑀦 𑀳𑁂𑀢𑁆𑀣 𑀤𑁂𑀯𑀸𑀢𑀺 𑀏𑀢𑀲𑁆𑀫𑀺𑀁 𑀲𑀻𑀮𑀯𑀦𑁆𑀢𑀸𑀦𑀁 𑀕𑀦𑁆𑀥𑁂 𑀤𑁂𑀯𑀸 𑀦 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀦𑁄, 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀲𑀜𑁆𑀜𑀺𑀦𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀦𑀯𑀫𑀁.