𑁧𑁧. 𑀲𑀓𑁆𑀓𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀲𑀼𑀯𑀻𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁭. 𑀲𑀓𑁆𑀓𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀅𑀪𑀺𑀬𑀁𑀲𑀽𑀢𑀺 𑀓𑀤𑀸 𑀅𑀪𑀺𑀬𑀁𑀲𑀼? 𑀬𑀤𑀸 𑀩𑀮𑀯𑀦𑁆𑀢𑁄 𑀅𑀳𑁂𑀲𑀼𑀁, 𑀢𑀤𑀸. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀓𑁆𑀓𑁄 𑀓𑀺𑀭 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑀓𑁂 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀳𑀼𑀢𑁆𑀯𑀸 𑀢𑁂𑀢𑁆𑀢𑀺𑀁𑀲 𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 𑀓𑀮𑁆𑀬𑀸𑀡𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀩𑀮𑀯𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀧𑀭𑀺𑀲𑀁 𑀲𑁂𑀲𑀤𑁂𑀯𑀢𑀸 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀆𑀕𑀦𑁆𑀢𑀼𑀓𑀤𑁂𑀯𑀧𑀼𑀢𑁆𑀢𑀸 𑀆𑀕𑀢𑀸’’𑀢𑀺 𑀦𑁂𑀯𑀸𑀲𑀺𑀓𑀸 𑀕𑀦𑁆𑀥𑀧𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀲𑀓𑁆𑀓𑁄 𑀲𑀓𑀧𑀭𑀺𑀲𑀸𑀬 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀫𑀸𑀭𑀺𑀲𑀸 𑀫𑀸 𑀕𑀦𑁆𑀥𑀧𑀸𑀦𑀁 𑀧𑀺𑀯𑀺𑀢𑁆𑀣, 𑀧𑀺𑀯𑀦𑀸𑀓𑀸𑀭𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀣𑀸’’𑀢𑀺. 𑀢𑁂 𑀢𑀢𑁆𑀣 𑀅𑀓𑀁𑀲𑀼. 𑀦𑁂𑀯𑀸𑀲𑀺𑀓𑀤𑁂𑀯𑀢𑀸 𑀲𑀼𑀯𑀡𑁆𑀡𑀲𑀭𑀓𑁂𑀳𑀺 𑀉𑀧𑀦𑀻𑀢𑀁 𑀕𑀦𑁆𑀥𑀧𑀸𑀦𑀁 𑀬𑀸𑀯𑀤𑀢𑁆𑀣𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀲𑀼𑀯𑀡𑁆𑀡𑀧𑀣𑀯𑀺𑀬𑀁 𑀧𑀢𑀺𑀢𑁆𑀯𑀸 𑀲𑀬𑀺𑀁𑀲𑀼. 𑀲𑀓𑁆𑀓𑁄 ‘‘𑀕𑀡𑁆𑀳𑀣 𑀧𑀼𑀢𑁆𑀢𑀳𑀢𑀸𑀬 𑀧𑀼𑀢𑁆𑀢𑁂’’𑀢𑀺 𑀢𑁂 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀸𑀤𑁂 𑀔𑀺𑀧𑀸𑀧𑁂𑀲𑀺. 𑀲𑀓𑁆𑀓𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀢𑀤𑀦𑀼𑀯𑀢𑁆𑀢𑀓𑀸𑀧𑀺 𑀲𑀩𑁆𑀩𑁂 𑀢𑀢𑁆𑀣𑁂𑀯 𑀧𑀢𑀺𑀁𑀲𑀼. 𑀢𑁂 𑀲𑀺𑀦𑁂𑀭𑀼𑀯𑁂𑀫𑀚𑁆𑀛𑀓𑀸𑀮𑁂 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸, ‘‘𑀢𑀸𑀢𑀸 𑀦 𑀲𑀼𑀭𑀁 𑀧𑀺𑀯𑀺𑀫𑁆𑀳, 𑀦 𑀲𑀼𑀭𑀁 𑀧𑀺𑀯𑀺𑀫𑁆𑀳𑀸’’𑀢𑀺 𑀆𑀳𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀅𑀲𑀼𑀭𑀸 𑀦𑀸𑀫 𑀚𑀸𑀢𑀸. 𑀅𑀣 𑀦𑁂𑀲𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀅𑀲𑀼𑀭𑀪𑀯𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀓𑁆𑀓𑁄 𑀢𑁂𑀲𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀸𑀕𑀫𑀦𑀢𑁆𑀣𑀸𑀬 𑀆𑀭𑀓𑁆𑀔𑀁 𑀞𑀧𑁂𑀲𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀦𑁆𑀢𑀭𑀸 𑀤𑁆𑀯𑀺𑀦𑁆𑀦𑀁 𑀅𑀬𑀼𑀚𑁆𑀛𑀧𑀼𑀭𑀸𑀦𑀁,

𑀧𑀜𑁆𑀘𑀯𑀺𑀥𑀸 𑀞𑀧𑀺𑀢𑀸 𑀅𑀪𑀺𑀭𑀓𑁆𑀔𑀸;

𑀉𑀤𑀓𑀁 𑀓𑀭𑁄𑀝𑀺-𑀧𑀬𑀲𑁆𑀲 𑀘 𑀳𑀸𑀭𑀻,

𑀫𑀤𑀦𑀬𑀼𑀢𑀸 𑀘𑀢𑀼𑀭𑁄 𑀘 𑀫𑀳𑀢𑁆𑀣𑀸’’𑀢𑀺.

𑀤𑁆𑀯𑁂 𑀦𑀕𑀭𑀸𑀦𑀺 𑀳𑀺 𑀬𑀼𑀤𑁆𑀥𑁂𑀦 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫 𑀚𑀸𑀢𑀸𑀦𑀺 𑀤𑁂𑀯𑀦𑀕𑀭𑀜𑁆𑀘 𑀅𑀲𑀼𑀭𑀦𑀕𑀭𑀜𑁆𑀘. 𑀬𑀤𑀸 𑀳𑀺 𑀅𑀲𑀼𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣 𑀤𑁂𑀯𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀤𑁂𑀯𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀧𑀺𑀤𑀳𑀺𑀢𑁂 𑀅𑀲𑀼𑀭𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀤𑀸 𑀤𑁂𑀯𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣𑀸𑀲𑀼𑀭𑁂𑀳𑀺 𑀧𑀮𑀸𑀬𑀺𑀢𑁆𑀯𑀸 𑀅𑀲𑀼𑀭𑀦𑀕𑀭𑀲𑁆𑀲 𑀤𑁆𑀯𑀸𑀭𑁂 𑀧𑀺𑀤𑀳𑀺𑀢𑁂 𑀲𑀓𑁆𑀓𑀸𑀦𑀁 𑀲𑀢𑀲𑀳𑀲𑁆𑀲𑀫𑁆𑀧𑀺 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀦𑀕𑀭𑀸𑀦𑀺 𑀅𑀬𑀼𑀚𑁆𑀛𑀧𑀼𑀭𑀸𑀦𑀺 𑀦𑀸𑀫. 𑀦𑁂𑀲𑀁 𑀅𑀦𑁆𑀢𑀭𑀸 𑀏𑀢𑁂𑀲𑀼 𑀉𑀤𑀓𑀸𑀤𑀻𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀓𑁆𑀓𑁂𑀦 𑀆𑀭𑀓𑁆𑀔𑀸 𑀞𑀧𑀺𑀢𑀸. 𑀢𑀢𑁆𑀣 𑀉𑀤𑀓𑀲𑀤𑁆𑀤𑁂𑀦 𑀦𑀸𑀕𑀸 𑀕𑀳𑀺𑀢𑀸. 𑀢𑁂 𑀳𑀺 𑀉𑀤𑀓𑁂 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀺𑀦𑁂𑀭𑀼𑀲𑁆𑀲 𑀧𑀞𑀫𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀓𑀭𑁄𑀝𑀺𑀲𑀤𑁆𑀤𑁂𑀦 𑀲𑀼𑀧𑀡𑁆𑀡𑀸 𑀕𑀳𑀺𑀢𑀸. 𑀢𑁂𑀲𑀁 𑀓𑀺𑀭 𑀓𑀭𑁄𑀝𑀺 𑀦𑀸𑀫 𑀧𑀸𑀦𑀪𑁄𑀚𑀦𑀁, 𑀢𑁂𑀦 𑀢𑀁 𑀦𑀸𑀫𑀁 𑀮𑀪𑀺𑀁𑀲𑀼. 𑀤𑀼𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀧𑀬𑀲𑁆𑀲𑀳𑀸𑀭𑀻𑀲𑀤𑁆𑀤𑁂𑀦 𑀓𑀼𑀫𑁆𑀪𑀡𑁆𑀟𑀸 𑀕𑀳𑀺𑀢𑀸. 𑀤𑀸𑀦𑀯𑀭𑀓𑁆𑀔𑀲𑀸 𑀓𑀺𑀭 𑀢𑁂. 𑀢𑀢𑀺𑀬𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀫𑀤𑀦𑀬𑀼𑀢𑀲𑀤𑁆𑀤𑁂𑀦 𑀬𑀓𑁆𑀔𑀸 𑀕𑀳𑀺𑀢𑀸. 𑀯𑀺𑀲𑀫𑀘𑀸𑀭𑀺𑀦𑁄 𑀓𑀺𑀭𑀢𑁂 𑀬𑀼𑀚𑁆𑀛𑀲𑁄𑀡𑁆𑀟𑀸. 𑀘𑀢𑀼𑀢𑁆𑀣𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀘𑀢𑀼𑀭𑁄 𑀘 𑀫𑀳𑀦𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀯𑀼𑀢𑁆𑀢𑀸. 𑀧𑀜𑁆𑀘𑀫𑀸𑀮𑀺𑀦𑁆𑀤𑁂 𑀢𑁂𑀲𑀁 𑀆𑀭𑀓𑁆𑀔𑀸. 𑀢𑀲𑁆𑀫𑀸 𑀬𑀤𑀺 𑀅𑀲𑀼𑀭𑀸 𑀓𑀼𑀧𑀺𑀢𑀸𑀯𑀺𑀮𑀘𑀺𑀢𑁆𑀢𑀸 𑀤𑁂𑀯𑀧𑀼𑀭𑀁 𑀉𑀧𑀬𑀦𑁆𑀢𑀺 𑀬𑀼𑀤𑁆𑀥𑁂𑀲𑀽, 𑀬𑀁 𑀕𑀺𑀭𑀺𑀦𑁄 𑀧𑀞𑀫𑀁 𑀧𑀭𑀺𑀪𑀡𑁆𑀟𑀁, 𑀢𑀁 𑀉𑀭𑀕𑀸 𑀧𑀝𑀺𑀩𑀸𑀳𑀦𑁆𑀢𑀺 𑀏𑀯𑀁 𑀲𑁂𑀲𑁂𑀲𑀼 𑀲𑁂𑀲𑀸.

𑀢𑁂 𑀧𑀦 𑀅𑀲𑀼𑀭𑀸 𑀆𑀬𑀼𑀯𑀡𑁆𑀡𑀭𑀲𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀻𑀳𑀺 𑀢𑀸𑀯𑀢𑀺𑀁𑀲𑀲𑀤𑀺𑀲𑀸𑀯. 𑀢𑀲𑁆𑀫𑀸 𑀅𑀦𑁆𑀢𑀭𑀸 𑀅𑀢𑁆𑀢𑀸𑀦𑀁 𑀅𑀚𑀸𑀦𑀺𑀢𑁆𑀯𑀸 𑀧𑀸𑀝𑀮𑀺𑀬𑀸 𑀧𑀼𑀧𑁆𑀨𑀺𑀢𑀸𑀬, ‘‘𑀦 𑀇𑀤𑀁 𑀤𑁂𑀯𑀦𑀕𑀭𑀁, 𑀢𑀢𑁆𑀣 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀼𑀧𑁆𑀨𑀢𑀺, 𑀇𑀥 𑀧𑀦 𑀘𑀺𑀢𑁆𑀢𑀧𑀸𑀝𑀮𑀻, 𑀚𑀭𑀲𑀓𑁆𑀓𑁂𑀦𑀸𑀫𑁆𑀳𑀸𑀓𑀁 𑀲𑀼𑀭𑀁 𑀧𑀸𑀬𑁂𑀢𑁆𑀯𑀸 𑀯𑀜𑁆𑀘𑀺𑀢𑀸, 𑀤𑁂𑀯𑀦𑀕𑀭𑀜𑁆𑀘 𑀦𑁄 𑀕𑀳𑀺𑀢𑀁, 𑀕𑀘𑁆𑀙𑀸𑀫 𑀢𑁂𑀦 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀲𑁆𑀲𑀸𑀫𑀸’’𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑁂 𑀆𑀭𑀼𑀬𑁆𑀳 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀨𑀮𑀓𑀸𑀦𑀺 𑀕𑀳𑁂𑀢𑁆𑀯𑀸, 𑀬𑀼𑀤𑁆𑀥𑀲𑀚𑁆𑀚𑀸 𑀳𑀼𑀢𑁆𑀯𑀸, 𑀅𑀲𑀼𑀭𑀪𑁂𑀭𑀺𑀬𑁄 𑀯𑀸𑀤𑁂𑀦𑁆𑀢𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀤𑁆𑀯𑀺𑀥𑀸 𑀪𑁂𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀺. 𑀢𑁂 𑀤𑁂𑀯𑁂 𑀯𑀼𑀝𑁆𑀞𑁂 𑀯𑀫𑁆𑀫𑀺𑀓𑀫𑀓𑁆𑀔𑀺𑀓𑀸 𑀯𑀫𑁆𑀫𑀺𑀓𑀁 𑀯𑀺𑀬 𑀲𑀺𑀦𑁂𑀭𑀼𑀁 𑀅𑀪𑀺𑀭𑀼𑀳𑀺𑀢𑀼 𑀆𑀭𑀪𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀞𑀫𑀁 𑀦𑀸𑀕𑁂𑀳𑀺 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀬𑀼𑀤𑁆𑀥𑁂 𑀦 𑀓𑀲𑁆𑀲𑀘𑀺 𑀙𑀯𑀺 𑀯𑀸 𑀘𑀫𑁆𑀫𑀁 𑀯𑀸 𑀙𑀺𑀚𑁆𑀚𑀢𑀺, 𑀦 𑀮𑁄𑀳𑀺𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀁 𑀓𑀼𑀫𑀸𑀭𑀓𑀸𑀦𑀁 𑀤𑀸𑀭𑀼𑀫𑁂𑀡𑁆𑀟𑀓𑀬𑀼𑀤𑁆𑀥𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀦𑁆𑀢𑀸𑀲𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀓𑁄𑀝𑀺𑀲𑀢𑀸𑀧𑀺 𑀓𑁄𑀝𑀺𑀲𑀳𑀲𑁆𑀲𑀸𑀧𑀺 𑀦𑀸𑀕𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸 𑀢𑁂 𑀅𑀲𑀼𑀭𑀧𑀼𑀭𑀁𑀬𑁂𑀯 𑀧𑀯𑁂𑀲𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀺.

𑀬𑀤𑀸 𑀧𑀦 𑀅𑀲𑀼𑀭𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀣 𑀦𑀸𑀕𑀸 𑀑𑀲𑀓𑁆𑀓𑀺𑀢𑁆𑀯𑀸 𑀤𑀼𑀢𑀺𑀬𑁂 𑀆𑀮𑀺𑀦𑁆𑀤𑁂 𑀲𑀼𑀧𑀡𑁆𑀡𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄𑀯 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑀺. 𑀏𑀲 𑀦𑀬𑁄 𑀲𑀼𑀧𑀡𑁆𑀡𑀸𑀤𑀻𑀲𑀽𑀧𑀺. 𑀬𑀤𑀸 𑀧𑀦 𑀢𑀸𑀦𑀺 𑀧𑀜𑁆𑀘𑀧𑀺 𑀞𑀸𑀦𑀸𑀦𑀺 𑀅𑀲𑀼𑀭𑀸 𑀫𑀤𑁆𑀤𑀦𑁆𑀢𑀺, 𑀢𑀤𑀸 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀺𑀧𑀺 𑀧𑀜𑁆𑀘 𑀩𑀮𑀸𑀦𑀺 𑀑𑀲𑀓𑁆𑀓𑀦𑁆𑀢𑀺. 𑀅𑀣 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀕𑀦𑁆𑀢𑁆𑀯𑀸 𑀲𑀓𑁆𑀓𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀦𑁆𑀢𑀺. 𑀲𑀓𑁆𑀓𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀯𑁂𑀚𑀬𑀦𑁆𑀢𑀭𑀣𑀁 𑀆𑀭𑀼𑀬𑁆𑀳 𑀲𑀬𑀁 𑀯𑀸 𑀦𑀺𑀓𑁆𑀔𑀫𑀢𑀺, 𑀏𑀓𑀁 𑀯𑀸 𑀧𑀼𑀢𑁆𑀢𑀁 𑀧𑁂𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀧𑀼𑀢𑁆𑀢𑀁 𑀧𑁂𑀲𑁂𑀢𑀼𑀓𑀸𑀫𑁄, 𑀢𑀸𑀢 𑀲𑀼𑀯𑀻𑀭𑀸𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀪𑀤𑁆𑀤𑀦𑁆𑀢𑀯𑀸𑀢𑀺 𑀔𑁄𑀢𑀺 𑀏𑀯𑀁 𑀳𑁄𑀢𑀼 𑀪𑀤𑁆𑀤𑀁 𑀢𑀯 𑀇𑀢𑀺 𑀔𑁄. 𑀧𑀫𑀸𑀤𑀁 𑀆𑀧𑀸𑀤𑁂𑀲𑀻𑀢𑀺 𑀧𑀫𑀸𑀤𑀁 𑀅𑀓𑀸𑀲𑀺. 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀝𑁆𑀞𑀺𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦 𑀲𑀼𑀯𑀡𑁆𑀡𑀫𑀳𑀸𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑁄 𑀦𑀦𑁆𑀤𑀦𑀯𑀦𑀸𑀤𑀻𑀲𑀼 𑀯𑀺𑀘𑀭𑀢𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀝𑁆𑀞𑀳𑀦𑁆𑀢𑀺 𑀅𑀦𑀼𑀝𑁆𑀞𑀳𑀦𑁆𑀢𑁄. 𑀅𑀯𑀸𑀬𑀸𑀫𑀦𑁆𑀢𑀺 𑀅𑀯𑀸𑀬𑀫𑀦𑁆𑀢𑁄. 𑀅𑀮𑀲𑁆𑀯𑀲𑁆𑀲𑀸𑀢𑀺 𑀅𑀮𑀲𑁄 𑀅𑀲𑁆𑀲. 𑀦 𑀘 𑀓𑀺𑀘𑁆𑀘𑀸𑀦𑀺 𑀓𑀸𑀭𑀬𑁂𑀢𑀺 𑀓𑀺𑀜𑁆𑀘𑀺 𑀓𑀺𑀘𑁆𑀘𑀁 𑀦𑀸𑀫 𑀦 𑀓𑀭𑁂𑀬𑁆𑀬. 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀲𑁆𑀲𑀸𑀢𑀺 𑀲𑀩𑁆𑀩𑀓𑀸𑀫𑁂𑀳𑀺 𑀲𑀫𑀺𑀤𑁆𑀥𑁄 𑀅𑀲𑁆𑀲. 𑀢𑀁 𑀫𑁂, 𑀲𑀓𑁆𑀓, 𑀯𑀭𑀁 𑀤𑀺𑀲𑀸𑀢𑀺, 𑀲𑀓𑁆𑀓 𑀤𑁂𑀯𑀲𑁂𑀝𑁆𑀞, 𑀢𑀁 𑀫𑁂 𑀯𑀭𑀁 𑀉𑀢𑁆𑀢𑀫𑀁 𑀞𑀸𑀦𑀁 𑀑𑀓𑀸𑀲𑀁 𑀤𑀺𑀲𑀁 𑀆𑀘𑀺𑀓𑁆𑀔 𑀓𑀣𑁂𑀳𑀻𑀢𑀺 𑀯𑀤𑀢𑀺. 𑀦𑀺𑀩𑁆𑀩𑀸𑀦𑀲𑁆𑀲 𑀳𑀺 𑀲𑁄 𑀫𑀕𑁆𑀕𑁄𑀢𑀺 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀚𑀻𑀯𑀺𑀢𑀝𑁆𑀞𑀸𑀦𑀁 𑀦𑀸𑀫 𑀦𑀺𑀩𑁆𑀩𑀸𑀦𑀲𑁆𑀲 𑀫𑀕𑁆𑀕𑁄. 𑀧𑀞𑀫𑀁.

𑁨. 𑀲𑀼𑀲𑀻𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁮. 𑀤𑀼𑀢𑀺𑀬𑁂 𑀲𑀼𑀲𑀻𑀫𑀦𑁆𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀲𑀳𑀲𑁆𑀲𑀲𑁆𑀲 𑀅𑀦𑁆𑀢𑀭𑁂 𑀏𑀯𑀁𑀦𑀸𑀫𑀓𑀁 𑀏𑀓𑀁 𑀧𑀼𑀢𑁆𑀢𑀫𑁂𑀯. 𑀤𑀼𑀢𑀺𑀬𑀁.

𑁩. 𑀥𑀚𑀕𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀢𑀢𑀺𑀬𑁂 𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑁄 𑀭𑀸𑀲𑀺𑀪𑀽𑀢𑁄. 𑀥𑀚𑀕𑁆𑀕𑀁𑀉𑀮𑁆𑀮𑁄𑀓𑁂𑀬𑁆𑀬𑀣𑀸𑀢𑀺 𑀲𑀓𑁆𑀓𑀲𑁆𑀲 𑀓𑀺𑀭 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀸𑀬𑀸𑀫𑁄 𑀭𑀣𑁄. 𑀢𑀲𑁆𑀲 𑀳𑀺 𑀧𑀘𑁆𑀙𑀺𑀫𑀦𑁆𑀢𑁄 𑀧𑀡𑁆𑀡𑀸𑀲𑀬𑁄𑀚𑀦𑁄, 𑀫𑀚𑁆𑀛𑁂 𑀭𑀣𑀧𑀜𑁆𑀚𑀭𑁄 𑀧𑀡𑁆𑀡𑀸𑀲𑀬𑁄𑀚𑀦𑁄, 𑀭𑀣𑀲𑀦𑁆𑀥𑀺𑀢𑁄 𑀬𑀸𑀯 𑀭𑀣𑀲𑀻𑀲𑀸 𑀧𑀡𑁆𑀡𑀸𑀲𑀬𑁄𑀚𑀦𑀸𑀦𑀺. 𑀢𑀤𑁂𑀯 𑀧𑀫𑀸𑀡𑀁 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀢𑀺𑀬𑁄𑀚𑀦𑀲𑀢𑀸𑀬𑀸𑀫𑁄𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀢𑀲𑁆𑀫𑀺𑀁 𑀬𑁄𑀚𑀦𑀺𑀓𑀧𑀮𑁆𑀮𑀗𑁆𑀓𑁄 𑀅𑀢𑁆𑀣𑀢𑁄, 𑀢𑀺𑀬𑁄𑀚𑀦𑀺𑀓𑀁 𑀲𑁂𑀢𑀘𑁆𑀙𑀢𑁆𑀢𑀁 𑀫𑀢𑁆𑀣𑀓𑁂 𑀞𑀧𑀺𑀢𑀁, 𑀏𑀓𑀲𑁆𑀫𑀺𑀁𑀬𑁂𑀯 𑀬𑀼𑀕𑁂 𑀲𑀳𑀲𑁆𑀲𑀆𑀚𑀜𑁆𑀜𑀸 𑀬𑀼𑀢𑁆𑀢𑀸, 𑀲𑁂𑀲𑀸𑀮𑀗𑁆𑀓𑀸𑀭𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀺. 𑀥𑀚𑁄 𑀧𑀦𑀲𑁆𑀲 𑀅𑀟𑁆𑀠𑀢𑀺𑀬𑀸𑀦𑀺 𑀬𑁄𑀚𑀦𑀲𑀢𑀸𑀦𑀺 𑀉𑀕𑁆𑀕𑀢𑁄, 𑀬𑀲𑁆𑀲 𑀯𑀸𑀢𑀸𑀳𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑁆𑀲𑁂𑀯 𑀲𑀤𑁆𑀤𑁄 𑀦𑀺𑀘𑁆𑀙𑀭𑀢𑀺, 𑀢𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣𑀸𑀢𑀺 𑀯𑀤𑀢𑀺. 𑀓𑀲𑁆𑀫𑀸? 𑀢𑀁 𑀧𑀲𑁆𑀲𑀦𑁆𑀢𑀸𑀦𑀜𑁆𑀳𑀺 𑀭𑀸𑀚𑀸 𑀦𑁄 𑀆𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀦𑀺𑀔𑀸𑀢𑀣𑀫𑁆𑀪𑁄 𑀯𑀺𑀬 𑀞𑀺𑀢𑁄, 𑀓𑀲𑁆𑀲 𑀫𑀬𑀁 𑀪𑀸𑀬𑀸𑀫𑀸𑀢𑀺 𑀪𑀬𑀁 𑀦 𑀳𑁄𑀢𑀺. 𑀧𑀚𑀸𑀧𑀢𑀺𑀲𑁆𑀲𑀸𑀢𑀺 𑀲𑁄 𑀓𑀺𑀭 𑀲𑀓𑁆𑀓𑁂𑀦 𑀲𑀫𑀸𑀦𑀯𑀡𑁆𑀡𑁄 𑀲𑀫𑀸𑀦𑀸𑀬𑀼𑀓𑁄 𑀤𑀼𑀢𑀺𑀬𑀁 𑀆𑀲𑀦𑀁 𑀮𑀪𑀢𑀺. 𑀢𑀣𑀸 𑀯𑀭𑀼𑀡𑁄 𑀈𑀲𑀸𑀦𑁄 𑀘. 𑀯𑀭𑀼𑀡𑁄 𑀧𑀦 𑀢𑀢𑀺𑀬𑀁 𑀆𑀲𑀦𑀁 𑀮𑀪𑀢𑀺, 𑀈𑀲𑀸𑀦𑁄 𑀘𑀢𑀼𑀢𑁆𑀣𑀁. 𑀧𑀮𑀸𑀬𑀻𑀢𑀺 𑀅𑀲𑀼𑀭𑁂𑀳𑀺 𑀧𑀭𑀸𑀚𑀺𑀢𑁄 𑀢𑀲𑁆𑀫𑀺𑀁 𑀭𑀣𑁂 𑀞𑀺𑀢𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀭𑀚𑀥𑀚𑀁 𑀤𑀺𑀲𑁆𑀯𑀸 𑀧𑀮𑀸𑀬𑀦𑀥𑀫𑁆𑀫𑁄.

𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀇𑀤𑀫𑀯𑁄𑀘𑀸𑀢𑀺 𑀇𑀤𑀁 𑀥𑀚𑀕𑁆𑀕𑀧𑀭𑀺𑀢𑁆𑀢𑀁 𑀦𑀸𑀫 𑀪𑀕𑀯𑀸 𑀅𑀯𑁄𑀘, 𑀬𑀲𑁆𑀲 𑀆𑀡𑀸𑀔𑁂𑀢𑁆𑀢𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀆𑀦𑀼𑀪𑀸𑀯𑁄 𑀯𑀢𑁆𑀢𑀢𑀺. 𑀇𑀤𑀁 𑀆𑀯𑀚𑁆𑀚𑁂𑀢𑁆𑀯𑀸 𑀳𑀺 𑀬𑀓𑁆𑀔𑀪𑀬𑀘𑁄𑀭𑀪𑀬𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀺 𑀫𑀼𑀢𑁆𑀢𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺. 𑀢𑀺𑀝𑁆𑀞𑀢𑀼 𑀅𑀜𑁆𑀜𑀤𑀼𑀓𑁆𑀔𑀯𑀽𑀧𑀲𑀫𑁄, 𑀇𑀤𑀁 𑀆𑀯𑀚𑁆𑀚𑀫𑀸𑀦𑁄 𑀳𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀆𑀓𑀸𑀲𑁂𑀧𑀺 𑀧𑀢𑀺𑀝𑁆𑀞𑀁 𑀮𑀪𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀤𑀻𑀖𑀯𑀸𑀧𑀺𑀘𑁂𑀢𑀺𑀬𑀫𑁆𑀳𑀺 𑀓𑀺𑀭 𑀲𑀼𑀥𑀸𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂 𑀏𑀓𑁄 𑀤𑀳𑀭𑁄 𑀫𑀼𑀤𑁆𑀥𑀯𑁂𑀤𑀺𑀓𑀸𑀧𑀸𑀤𑀢𑁄 𑀧𑀢𑀺𑀢𑁆𑀯𑀸 𑀘𑁂𑀢𑀺𑀬𑀓𑀼𑀘𑁆𑀙𑀺𑀬𑀸 𑀪𑀲𑁆𑀲𑀢𑀺. 𑀳𑁂𑀝𑁆𑀞𑀸 𑀞𑀺𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 ‘‘𑀥𑀚𑀕𑁆𑀕𑀧𑀭𑀺𑀢𑁆𑀢𑀁, 𑀆𑀯𑀼𑀲𑁄, 𑀆𑀯𑀚𑁆𑀚𑀸𑀳𑀻’’𑀢𑀺 𑀆𑀳. 𑀲𑁄 𑀫𑀭𑀡𑀪𑀬𑁂𑀦 𑀢𑀚𑁆𑀚𑀺𑀢𑁄 ‘‘𑀥𑀚𑀕𑁆𑀕𑀧𑀭𑀺𑀢𑁆𑀢𑀁 𑀫𑀁 𑀭𑀓𑁆𑀔𑀢𑀽’’𑀢𑀺 𑀆𑀳. 𑀢𑀸𑀯𑀤𑁂𑀯𑀲𑁆𑀲 𑀘𑁂𑀢𑀺𑀬𑀓𑀼𑀘𑁆𑀙𑀺𑀢𑁄 𑀤𑁆𑀯𑁂 𑀇𑀝𑁆𑀞𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀧𑀸𑀦𑀁 𑀳𑀼𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀉𑀧𑀭𑀺𑀝𑁆𑀞𑀺𑀢𑁄 𑀯𑀮𑁆𑀮𑀺𑀦𑀺𑀲𑁆𑀲𑁂𑀡𑀺𑀁 𑀑𑀢𑀸𑀭𑁂𑀲𑀼𑀁. 𑀢𑀲𑁆𑀫𑀺𑀁 𑀦𑀺𑀲𑁆𑀲𑁂𑀡𑀺𑀬𑀁 𑀞𑀺𑀢𑁂 𑀇𑀝𑁆𑀞𑀓𑀸 𑀬𑀣𑀸𑀝𑁆𑀞𑀸𑀦𑁂𑀬𑁂𑀯 𑀅𑀝𑁆𑀞𑀁𑀲𑀼. 𑀢𑀢𑀺𑀬𑀁.

𑁪. 𑀯𑁂𑀧𑀘𑀺𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁦. 𑀘𑀢𑀼𑀢𑁆𑀣𑁂 𑀯𑁂𑀧𑀘𑀺𑀢𑁆𑀢𑀻𑀢𑀺 𑀲𑁄 𑀓𑀺𑀭 𑀅𑀲𑀼𑀭𑀸𑀦𑀁 𑀲𑀩𑁆𑀩𑀚𑁂𑀝𑁆𑀞𑀓𑁄. 𑀬𑁂𑀦𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀦𑀦𑁆𑀢𑀺 𑀘. 𑀓𑀡𑁆𑀞𑀧𑀜𑁆𑀘𑀫𑁂𑀳𑀻𑀢𑀺 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀧𑀸𑀤𑁂𑀲𑀼 𑀓𑀡𑁆𑀞𑁂 𑀘𑀸𑀢𑀺 𑀏𑀯𑀁 𑀧𑀜𑁆𑀘𑀳𑀺 𑀩𑀦𑁆𑀥𑀦𑁂𑀳𑀺. 𑀢𑀸𑀦𑀺 𑀧𑀦 𑀦𑀴𑀺𑀦𑀲𑀼𑀢𑁆𑀢𑀁 𑀯𑀺𑀬 𑀫𑀓𑁆𑀓𑀝𑀓𑀲𑀼𑀢𑁆𑀢𑀁 𑀯𑀺𑀬 𑀘 𑀘𑀓𑁆𑀔𑀼𑀲𑁆𑀲𑀸𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀇𑀭𑀺𑀬𑀸𑀧𑀣𑀁 𑀭𑀼𑀚𑁆𑀛𑀦𑁆𑀢𑀺. 𑀢𑁂𑀳𑀺 𑀧𑀦 𑀘𑀺𑀢𑁆𑀢𑁂𑀦𑁂𑀯 𑀩𑀚𑁆𑀛𑀢𑀺, 𑀘𑀺𑀢𑁆𑀢𑁂𑀦𑁂𑀯 𑀫𑀼𑀘𑁆𑀘𑀢𑀺. 𑀅𑀓𑁆𑀓𑁄𑀲𑀢𑀻𑀢𑀺 𑀘𑁄𑀭𑁄𑀲𑀺 𑀩𑀸𑀮𑁄𑀲𑀺 𑀫𑀽𑀴𑁆𑀳𑁄𑀲𑀺 𑀣𑁂𑀦𑁄𑀲𑀺 𑀑𑀝𑁆𑀞𑁄𑀲𑀺 𑀕𑁄𑀡𑁄𑀲𑀺 𑀕𑀤𑁆𑀭𑀪𑁄𑀲𑀺 𑀦𑁂𑀭𑀬𑀺𑀓𑁄𑀲𑀺 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀲𑀼𑀕𑀢𑀺, 𑀤𑀼𑀕𑁆𑀕𑀢𑀺𑀬𑁂𑀯 𑀢𑀼𑀬𑁆𑀳𑀁 𑀧𑀸𑀝𑀺𑀓𑀗𑁆𑀔𑀸𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀢𑀺. 𑀧𑀭𑀺𑀪𑀸𑀲𑀢𑀻𑀢𑀺, 𑀚𑀭𑀲𑀓𑁆𑀓, 𑀦 𑀢𑁆𑀯𑀁 𑀲𑀩𑁆𑀩𑀓𑀸𑀮𑀁 𑀚𑀺𑀦𑀺𑀲𑁆𑀲𑀲𑀺, 𑀬𑀤𑀸 𑀅𑀲𑀼𑀭𑀸𑀦𑀁 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀢𑀤𑀸 𑀢𑀫𑁆𑀧𑀺 𑀏𑀯𑀁 𑀩𑀦𑁆𑀥𑀺𑀢𑁆𑀯𑀸 𑀅𑀲𑀼𑀭𑀪𑀯𑀦𑀲𑁆𑀲 𑀤𑁆𑀯𑀸𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀧𑁄𑀣𑀸𑀧𑁂𑀲𑁆𑀲𑀸𑀫𑀻𑀢𑀺 𑀆𑀤𑀻𑀦𑀺 𑀯𑀢𑁆𑀯𑀸 𑀢𑀚𑁆𑀚𑁂𑀢𑀺. 𑀲𑀓𑁆𑀓𑁄 𑀯𑀺𑀚𑀺𑀢𑀯𑀺𑀚𑀬𑁄 𑀦 𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀫𑀳𑀸𑀧𑀝𑀺𑀕𑁆𑀕𑀳𑀡𑀁 𑀧𑀦𑀲𑁆𑀲 𑀫𑀢𑁆𑀣𑀓𑁂 𑀯𑀺𑀥𑀼𑀦𑀦𑁆𑀢𑁄 𑀲𑀼𑀥𑀫𑁆𑀫𑀤𑁂𑀯𑀲𑀪𑀁 𑀧𑀯𑀺𑀲𑀢𑀺 𑀘𑁂𑀯 𑀦𑀺𑀓𑁆𑀔𑀫𑀢𑀺 𑀘. 𑀅𑀚𑁆𑀛𑀪𑀸𑀲𑀻𑀢𑀺 ‘‘𑀓𑀺𑀁 𑀦𑀼 𑀔𑁄 𑀏𑀲 𑀲𑀓𑁆𑀓𑁄 𑀇𑀫𑀸𑀦𑀺 𑀨𑀭𑀼𑀲𑀯𑀘𑀦𑀸𑀦𑀺 𑀪𑀬𑁂𑀦 𑀢𑀺𑀢𑀺𑀓𑁆𑀔𑀢𑀺, 𑀉𑀤𑀸𑀳𑀼 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸’’𑀢𑀺? 𑀯𑀻𑀫𑀁𑀲𑀦𑁆𑀢𑁄 𑀅𑀪𑀸𑀲𑀺.

𑀤𑀼𑀩𑁆𑀩𑀮𑁆𑀬𑀸 𑀦𑁄𑀢𑀺 𑀤𑀼𑀩𑁆𑀩𑀮𑀪𑀸𑀯𑁂𑀦 𑀦𑀼. 𑀧𑀝𑀺𑀲𑀁𑀬𑀼𑀚𑁂𑀢𑀺 𑀧𑀝𑀺𑀲𑀁𑀬𑀼𑀚𑁂𑀬𑁆𑀬 𑀧𑀝𑀺𑀧𑁆𑀨𑀭𑁂𑀬𑁆𑀬. 𑀧𑀪𑀺𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀯𑀺𑀭𑀚𑁆𑀚𑁂𑀬𑁆𑀬𑀼𑀁. 𑀧𑀓𑀼𑀚𑁆𑀛𑁂𑀬𑁆𑀬𑀼𑀦𑁆𑀢𑀺𑀧𑀺 𑀧𑀸𑀞𑁄. 𑀧𑀭𑀦𑁆𑀢𑀺 𑀧𑀘𑁆𑀘𑀢𑁆𑀣𑀺𑀓𑀁. 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀻𑀢𑀺 𑀬𑁄 𑀲𑀢𑀺𑀫𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀺, 𑀢𑀲𑁆𑀲 𑀉𑀧𑀲𑀫𑀁𑀬𑁂𑀯𑀸𑀳𑀁 𑀩𑀸𑀮𑀲𑁆𑀲 𑀧𑀝𑀺𑀲𑁂𑀥𑀦𑀁 𑀫𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀬𑀤𑀸 𑀦𑀁 𑀫𑀜𑁆𑀜𑀢𑀻𑀢𑀺 𑀬𑀲𑁆𑀫𑀸 𑀢𑀁 𑀫𑀜𑁆𑀜𑀢𑀺. 𑀅𑀚𑁆𑀛𑀸𑀭𑀼𑀳𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀕𑁄𑀯 𑀪𑀺𑀬𑁆𑀬𑁄 𑀧𑀮𑀸𑀬𑀺𑀦𑀦𑁆𑀢𑀺 𑀬𑀣𑀸 𑀕𑁄𑀬𑀼𑀤𑁆𑀥𑁂 𑀢𑀸𑀯𑀤𑁂𑀯 𑀤𑁆𑀯𑁂 𑀕𑀸𑀯𑁄 𑀬𑀼𑀚𑁆𑀛𑀦𑁆𑀢𑁂 𑀕𑁄𑀕𑀡𑁄 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀬𑀤𑀸 𑀧𑀦 𑀏𑀓𑁄 𑀧𑀮𑀸𑀬𑀢𑀺, 𑀅𑀣 𑀦𑀁 𑀧𑀮𑀸𑀬𑀦𑁆𑀢𑀁 𑀲𑀩𑁆𑀩𑁄 𑀕𑁄𑀕𑀡𑁄 𑀪𑀺𑀬𑁆𑀬𑁄 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀏𑀯𑀁 𑀤𑀼𑀫𑁆𑀫𑁂𑀥𑁄 𑀔𑀫𑀦𑁆𑀢𑀁 𑀪𑀺𑀬𑁆𑀬𑁄 𑀅𑀚𑁆𑀛𑁄𑀢𑁆𑀣𑀭𑀢𑀻𑀢𑀺 𑀅𑀢𑁆𑀣𑁄.

𑀲𑀤𑀢𑁆𑀣𑀧𑀭𑀫𑀸𑀢𑀺 𑀲𑀓𑀢𑁆𑀣𑀧𑀭𑀫𑀸. 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀲𑀼 𑀲𑀓𑀅𑀢𑁆𑀣𑀧𑀭𑀫𑁂𑀲𑀼 𑀅𑀢𑁆𑀣𑁂𑀲𑀼 𑀔𑀦𑁆𑀢𑀺𑀢𑁄 𑀉𑀢𑁆𑀢𑀭𑀺𑀢𑀭𑁄 𑀅𑀜𑁆𑀜𑁄 𑀅𑀢𑁆𑀣𑁄 𑀦 𑀯𑀺𑀚𑁆𑀚𑀢𑀺. 𑀢𑀫𑀸𑀳𑀼 𑀧𑀭𑀫𑀁 𑀔𑀦𑁆𑀢𑀺𑀦𑁆𑀢𑀺 𑀬𑁄 𑀩𑀮𑀯𑀸 𑀢𑀺𑀢𑀺𑀓𑁆𑀔𑀢𑀺, 𑀢𑀲𑁆𑀲 𑀢𑀁 𑀔𑀦𑁆𑀢𑀺𑀁 𑀧𑀭𑀫𑀁 𑀆𑀳𑀼. 𑀩𑀸𑀮𑀩𑀮𑀁 𑀦𑀸𑀫 𑀅𑀜𑁆𑀜𑀸𑀡𑀩𑀮𑀁. 𑀢𑀁 𑀬𑀲𑁆𑀲 𑀩𑀮𑀁, 𑀅𑀩𑀮𑀫𑁂𑀯 𑀢𑀁 𑀩𑀮𑀦𑁆𑀢𑀺 𑀆𑀳𑀼 𑀓𑀣𑁂𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀥𑀫𑁆𑀫𑀕𑀼𑀢𑁆𑀢𑀲𑁆𑀲𑀸𑀢𑀺 𑀥𑀫𑁆𑀫𑁂𑀦 𑀭𑀓𑁆𑀔𑀺𑀢𑀲𑁆𑀲, 𑀥𑀫𑁆𑀫𑀁 𑀯𑀸 𑀭𑀓𑁆𑀔𑀦𑁆𑀢𑀲𑁆𑀲. 𑀧𑀝𑀺𑀯𑀢𑁆𑀢𑀸𑀢𑀺 𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀯𑀢𑁆𑀢𑀸, 𑀧𑀝𑀺𑀧𑁆𑀨𑀭𑀺𑀢𑁆𑀯𑀸 𑀯𑀸 𑀩𑀸𑀮𑀩𑀮𑀦𑁆𑀢𑀺 𑀯𑀤𑁂𑀬𑁆𑀬𑀸𑀧𑀺, 𑀥𑀫𑁆𑀫𑀝𑁆𑀞𑀁 𑀧𑀦 𑀘𑀸𑀮𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄𑀢𑀺 𑀢𑁂𑀦 𑀓𑁄𑀥𑁂𑀦 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀧𑀸𑀧𑀁. 𑀓𑀢𑀭𑀲𑁆𑀲? 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺. 𑀢𑀺𑀓𑀺𑀘𑁆𑀙𑀦𑁆𑀢𑀸𑀦𑀦𑁆𑀢𑀺 𑀏𑀓𑀯𑀘𑀦𑁂 𑀩𑀳𑀼𑀯𑀘𑀦𑀁, 𑀢𑀺𑀓𑀺𑀘𑁆𑀙𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀚𑀦𑀸 𑀫𑀜𑁆𑀜𑀦𑁆𑀢𑀻𑀢𑀺 𑀏𑀯𑀭𑀽𑀧𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸𑀢𑀺 𑀉𑀪𑀺𑀦𑁆𑀦𑀁 𑀅𑀢𑁆𑀣𑀁 𑀢𑀺𑀓𑀺𑀘𑁆𑀙𑀦𑁆𑀢𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀁 𑀧𑀼𑀕𑁆𑀕𑀮𑀁 ‘‘𑀅𑀦𑁆𑀥𑀩𑀸𑀮𑁄 𑀅𑀬’’𑀦𑁆𑀢𑀺 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀯 𑀏𑀯𑀁 𑀫𑀜𑁆𑀜𑀦𑁆𑀢𑀺. 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀅𑀙𑁂𑀓𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀔𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀘𑀢𑀼𑀢𑁆𑀣𑀁.

𑁫. 𑀲𑀼𑀪𑀸𑀲𑀺𑀢𑀚𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁧. 𑀧𑀜𑁆𑀘𑀫𑁂 𑀅𑀲𑀼𑀭𑀺𑀦𑁆𑀤𑀁 𑀏𑀢𑀤𑀯𑁄𑀘𑀸𑀢𑀺 𑀙𑁂𑀓𑀢𑀸𑀬 𑀏𑀢𑀁 𑀅𑀯𑁄𑀘. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀧𑀭𑀲𑁆𑀲 𑀦𑀸𑀫 𑀕𑀸𑀳𑀁 𑀫𑁄𑀘𑁂𑀢𑁆𑀯𑀸 𑀧𑀞𑀫𑀁 𑀯𑀢𑁆𑀢𑀼𑀁 𑀕𑀭𑀼. 𑀧𑀭𑀲𑁆𑀲 𑀯𑀘𑀦𑀁 𑀅𑀦𑀼𑀕𑀦𑁆𑀢𑁆𑀯𑀸 𑀧𑀦 𑀧𑀘𑁆𑀙𑀸 𑀲𑀼𑀔𑀁 𑀯𑀢𑁆𑀢𑀼’’𑀦𑁆𑀢𑀺. 𑀧𑀼𑀩𑁆𑀩𑀤𑁂𑀯𑀸𑀢𑀺 𑀤𑁂𑀯𑀮𑁄𑀓𑁂 𑀘𑀺𑀭𑀦𑀺𑀯𑀸𑀲𑀺𑀦𑁄 𑀧𑀼𑀩𑁆𑀩𑀲𑀸𑀫𑀺𑀓𑀸, 𑀢𑀼𑀫𑁆𑀳𑀸𑀓𑀁 𑀢𑀸𑀯 𑀧𑀯𑁂𑀡𑀺𑀆𑀕𑀢𑀁 𑀪𑀡𑀣𑀸𑀢𑀺. 𑀅𑀤𑀡𑁆𑀟𑀸𑀯𑀘𑀭𑀸𑀢𑀺 𑀤𑀡𑁆𑀟𑀸𑀯𑀘𑀭𑀡𑀭𑀳𑀺𑀢𑀸, 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀏𑀯𑀫𑁂𑀢𑁆𑀣 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑀁.

𑁬. 𑀓𑀼𑀮𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁨. 𑀙𑀝𑁆𑀞𑁂 𑀅𑀚𑁆𑀛𑀪𑀸𑀲𑀻𑀢𑀺 𑀢𑀲𑁆𑀲 𑀓𑀺𑀭 𑀲𑀺𑀫𑁆𑀩𑀮𑀺𑀯𑀦𑀸𑀪𑀺𑀫𑀼𑀔𑀲𑁆𑀲 𑀚𑀸𑀢𑀲𑁆𑀲 𑀭𑀣𑀲𑀤𑁆𑀤𑁄 𑀘 𑀆𑀚𑀸𑀦𑀻𑀬𑀲𑀤𑁆𑀤𑁄 𑀥𑀚𑀲𑀤𑁆𑀤𑁄 𑀘 𑀲𑀫𑀦𑁆𑀢𑀸 𑀅𑀲𑀦𑀺𑀧𑀸𑀢𑀲𑀤𑁆𑀤𑁄 𑀯𑀺𑀬 𑀅𑀳𑁄𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀺𑀫𑁆𑀩𑀮𑀺𑀯𑀦𑁂 𑀩𑀮𑀯𑀲𑀼𑀧𑀡𑁆𑀡𑀸 𑀧𑀮𑀸𑀬𑀺𑀁𑀲𑀼, 𑀚𑀭𑀸𑀚𑀺𑀡𑁆𑀡𑀸 𑀘𑁂𑀯 𑀭𑁄𑀕𑀤𑀼𑀩𑁆𑀩𑀮𑀸 𑀘 𑀅𑀲𑀜𑁆𑀚𑀸𑀢𑀧𑀓𑁆𑀔𑀧𑁄𑀢𑀓𑀸 𑀘 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸, 𑀫𑀭𑀡𑀪𑀬𑁂𑀦 𑀢𑀚𑁆𑀚𑀺𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀼. 𑀲𑀓𑁆𑀓𑁄 𑀢𑀁 𑀲𑀼𑀢𑁆𑀯𑀸 ‘‘𑀓𑀲𑁆𑀲 𑀲𑀤𑁆𑀤𑁄, 𑀢𑀸𑀢𑀸’’𑀢𑀺? 𑀫𑀸𑀢𑀮𑀺𑀁 𑀧𑀼𑀘𑁆𑀙𑀺. 𑀭𑀣𑀲𑀤𑁆𑀤𑀁, 𑀢𑁂 𑀤𑁂𑀯, 𑀲𑀼𑀢𑁆𑀯𑀸 𑀲𑀼𑀧𑀡𑁆𑀡𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀯𑀺𑀭𑀯𑀦𑁆𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀓𑀭𑀼𑀡𑀸𑀲𑀫𑀸𑀯𑀚𑁆𑀚𑀺𑀢𑀳𑀤𑀬𑁄 𑀅𑀪𑀸𑀲𑀺. 𑀈𑀲𑀸𑀫𑀼𑀔𑁂𑀦𑀸𑀢𑀺 𑀭𑀣𑀲𑁆𑀲 𑀈𑀲𑀸𑀫𑀼𑀔𑁂𑀦. 𑀬𑀣𑀸 𑀓𑀼𑀮𑀸𑀯𑀓𑁂 𑀈𑀲𑀸𑀫𑀼𑀔𑀁 𑀦 𑀲𑀜𑁆𑀘𑀼𑀡𑁆𑀡𑁂𑀢𑀺, 𑀏𑀯𑀁 𑀇𑀫𑀺𑀦𑀸 𑀈𑀲𑀸𑀫𑀼𑀔𑁂𑀦 𑀢𑁂 𑀧𑀭𑀺𑀯𑀚𑁆𑀚𑀬. 𑀲𑁄 𑀳𑀺 𑀭𑀣𑁄 𑀧𑀼𑀜𑁆𑀜𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑁄 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀧𑀺 𑀲𑀺𑀦𑁂𑀭𑀼𑀫𑁆𑀳𑀺𑀧𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀯 𑀕𑀘𑁆𑀙𑀢𑀺 𑀦 𑀲𑀚𑁆𑀚𑀢𑀺, 𑀆𑀓𑀸𑀲𑀕𑀢𑀲𑀤𑀺𑀲𑁂𑀦𑁂𑀯 𑀕𑀘𑁆𑀙𑀢𑀺. 𑀲𑀘𑁂 𑀢𑁂𑀦 𑀲𑀺𑀫𑁆𑀩𑀮𑀺𑀯𑀦𑁂𑀦 𑀕𑀢𑁄 𑀪𑀯𑁂𑀬𑁆𑀬, 𑀬𑀣𑀸 𑀫𑀳𑀸𑀲𑀓𑀝𑁂 𑀓𑀤𑀮𑀺𑀯𑀦𑀫𑀚𑁆𑀛𑁂𑀦 𑀯𑀸 𑀏𑀭𑀡𑁆𑀟𑀯𑀦𑀫𑀚𑁆𑀛𑁂𑀦 𑀯𑀸 𑀕𑀘𑁆𑀙𑀦𑁆𑀢𑁂 𑀲𑀩𑁆𑀩𑀯𑀦𑀁 𑀯𑀺𑀪𑀕𑁆𑀕𑀁 𑀦𑀺𑀫𑁆𑀫𑀣𑀺𑀢𑀁 𑀳𑁄𑀢𑀺, 𑀏𑀯𑀁 𑀢𑀫𑁆𑀧𑀺 𑀲𑀺𑀫𑁆𑀩𑀮𑀺𑀯𑀦𑀁 𑀪𑀯𑁂𑀬𑁆𑀬. 𑀙𑀝𑁆𑀞𑀁.

𑁭. 𑀦𑀤𑀼𑀩𑁆𑀪𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁩. 𑀲𑀢𑁆𑀢𑀫𑁂 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀅𑀬𑀁 𑀲𑀓𑁆𑀓𑁄 ‘𑀬𑁄𑀧𑀺 𑀫𑁂 𑀅𑀲𑁆𑀲 𑀲𑀼𑀧𑀘𑁆𑀘𑀢𑁆𑀣𑀺𑀓𑁄, 𑀢𑀲𑁆𑀲 𑀧𑀸𑀳𑀁 𑀦 𑀤𑀼𑀩𑁆𑀪𑁂𑀬𑁆𑀬’𑀦𑁆𑀢𑀺 𑀘𑀺𑀦𑁆𑀢𑁂𑀢𑀺, 𑀫𑀬𑀸 𑀢𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀢𑀭𑁄 𑀦𑀸𑀫 𑀦𑀢𑁆𑀣𑀺, 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 𑀢𑀸𑀯 𑀦𑀁, 𑀓𑀺𑀁 𑀦𑀼 𑀔𑁄 𑀫𑀁 𑀧𑀲𑁆𑀲𑀺𑀢𑁆𑀯𑀸 𑀤𑀼𑀩𑁆𑀪𑀢𑀺, 𑀦 𑀤𑀼𑀩𑁆𑀪𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀢𑀺𑀝𑁆𑀞 𑀯𑁂𑀧𑀘𑀺𑀢𑁆𑀢𑀺 𑀕𑀳𑀺𑀢𑁄𑀲𑀻𑀢𑀺 𑀯𑁂𑀧𑀘𑀺𑀢𑁆𑀢𑀺, 𑀏𑀢𑁆𑀣𑁂𑀯 𑀢𑀺𑀝𑁆𑀞, 𑀕𑀳𑀺𑀢𑁄 𑀢𑁆𑀯𑀁 𑀫𑀬𑀸𑀢𑀺 𑀯𑀤𑀢𑀺. 𑀲𑀳 𑀯𑀘𑀦𑁂𑀦𑁂𑀯𑀲𑁆𑀲 𑀲𑁄 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑁄𑀯 𑀅𑀳𑁄𑀲𑀺. 𑀲𑀧𑀲𑁆𑀲𑀼 𑀘 𑀫𑁂𑀢𑀺 𑀫𑀬𑀺 𑀅𑀤𑀼𑀩𑁆𑀪𑀢𑁆𑀣𑀸𑀬 𑀲𑀧𑀣𑀁 𑀓𑀭𑁄𑀳𑀻𑀢𑀺 𑀯𑀤𑀢𑀺. 𑀬𑀁 𑀫𑀼𑀲𑀸𑀪𑀡𑀢𑁄 𑀧𑀸𑀧𑀦𑁆𑀢𑀺 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀧𑀞𑀫𑀓𑀧𑁆𑀧𑀺𑀓𑁂𑀲𑀼 𑀘𑁂𑀢𑀺𑀬𑀭𑀜𑁆𑀜𑁄 𑀧𑀸𑀧𑀁 𑀲𑀦𑁆𑀥𑀸𑀬𑀸𑀳. 𑀅𑀭𑀺𑀬𑀽𑀧𑀯𑀸𑀤𑀺𑀦𑁄𑀢𑀺 𑀓𑁄𑀓𑀮𑀺𑀓𑀲𑁆𑀲 𑀯𑀺𑀬 𑀧𑀸𑀧𑀁. 𑀫𑀺𑀢𑁆𑀢𑀤𑁆𑀤𑀼𑀦𑁄 𑀘 𑀬𑀁 𑀧𑀸𑀧𑀦𑁆𑀢𑀺 𑀫𑀳𑀸𑀓𑀧𑀺𑀚𑀸𑀢𑀓𑁂 𑀫𑀳𑀸𑀲𑀢𑁆𑀢𑁂 𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀸𑀧𑀁. 𑀅𑀓𑀢𑀜𑁆𑀜𑀼𑀦𑁄𑀢𑀺 𑀤𑁂𑀯𑀤𑀢𑁆𑀢𑀲𑀤𑀺𑀲𑀲𑁆𑀲 𑀅𑀓𑀢𑀜𑁆𑀜𑀼𑀦𑁄 𑀧𑀸𑀧𑀁. 𑀇𑀫𑀸𑀦𑀺 𑀓𑀺𑀭 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑀺 𑀫𑀳𑀸𑀧𑀸𑀧𑀸𑀦𑀺. 𑀲𑀢𑁆𑀢𑀫𑀁.

𑁮. 𑀯𑁂𑀭𑁄𑀘𑀦𑀅𑀲𑀼𑀭𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁪. 𑀅𑀝𑁆𑀞𑀫𑁂 𑀅𑀝𑁆𑀞𑀁𑀲𑀽𑀢𑀺 𑀤𑁆𑀯𑀸𑀭𑀧𑀸𑀮𑀭𑀽𑀧𑀓𑀸𑀦𑀺 𑀯𑀺𑀬 𑀞𑀺𑀢𑀸. 𑀦𑀺𑀧𑁆𑀨𑀤𑀸𑀢𑀺 𑀦𑀺𑀧𑁆𑀨𑀢𑁆𑀢𑀺, 𑀬𑀸𑀯 𑀅𑀢𑁆𑀣𑁄 𑀦𑀺𑀧𑁆𑀨𑀚𑁆𑀚𑀢𑀺, 𑀢𑀸𑀯 𑀯𑀸𑀬𑀫𑁂𑀣𑁂𑀯𑀸𑀢𑀺 𑀯𑀤𑀢𑀺. 𑀤𑀼𑀢𑀺𑀬𑀕𑀸𑀣𑀸 𑀲𑀓𑁆𑀓𑀲𑁆𑀲. 𑀢𑀢𑁆𑀣 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄𑀢𑀺 𑀦𑀺𑀧𑁆𑀨𑀦𑁆𑀦𑀲𑁄𑀪𑀦𑁂𑀲𑀼 𑀅𑀢𑁆𑀣𑁂𑀲𑀼 𑀔𑀦𑁆𑀢𑀺𑀢𑁄 𑀉𑀢𑁆𑀢𑀭𑀺𑀢𑀭𑁄 𑀅𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀅𑀢𑁆𑀣𑀚𑀸𑀢𑀸𑀢𑀺 𑀓𑀺𑀘𑁆𑀘𑀚𑀸𑀢𑀸. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄𑀧𑀺 𑀳𑀺 𑀉𑀧𑀸𑀤𑀸𑀬 𑀅𑀓𑀺𑀘𑁆𑀘𑀚𑀸𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀇𑀢𑁄 𑀏𑀢𑁆𑀢𑁄 𑀕𑀫𑀦𑀫𑀢𑁆𑀢𑀫𑁆𑀧𑀺 𑀓𑀺𑀘𑁆𑀘𑀫𑁂𑀯 𑀳𑁄𑀢𑀺. 𑀲𑀁𑀬𑁄𑀕𑀧𑀭𑀫𑀸 𑀢𑁆𑀯𑁂𑀯, 𑀲𑀫𑁆𑀪𑁄𑀕𑀸 𑀲𑀩𑁆𑀩𑀧𑀸𑀡𑀺𑀦𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀑𑀤𑀦𑀸𑀤𑀻𑀦𑀺 𑀳𑀺 𑀅𑀲𑀫𑁆𑀪𑁄𑀕𑀸𑀭𑀳𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀧𑀼𑀦 𑀉𑀡𑁆𑀳𑀸𑀧𑁂𑀢𑁆𑀯𑀸 𑀪𑀚𑁆𑀚𑀺𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀲𑀁𑀬𑁄𑀚𑀺𑀢𑀸𑀦𑀺 𑀲𑀫𑁆𑀪𑁄𑀕𑀸𑀭𑀳𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀁𑀬𑁄𑀕𑀧𑀭𑀫𑀸 𑀢𑁆𑀯𑁂𑀯, 𑀲𑀫𑁆𑀪𑁄𑀕𑀸 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺. 𑀦𑀺𑀧𑁆𑀨𑀦𑁆𑀦𑀲𑁄𑀪𑀦𑁄 𑀅𑀢𑁆𑀣𑁄𑀢𑀺 𑀇𑀫𑁂 𑀅𑀢𑁆𑀣𑀸 𑀦𑀸𑀫 𑀦𑀺𑀧𑁆𑀨𑀦𑁆𑀦𑀸𑀯 𑀲𑁄𑀪𑀦𑁆𑀢𑀺. 𑀧𑀼𑀦 𑀘𑀢𑀼𑀢𑁆𑀣𑀕𑀸𑀣𑀸 𑀲𑀓𑁆𑀓𑀲𑁆𑀲. 𑀢𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀝𑁆𑀞𑀫𑀁.

𑁯. 𑀅𑀭𑀜𑁆𑀜𑀸𑀬𑀢𑀦𑀇𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁫. 𑀦𑀯𑀫𑁂 𑀧𑀡𑁆𑀡𑀓𑀼𑀝𑀻𑀲𑀼 𑀲𑀫𑁆𑀫𑀦𑁆𑀢𑀻𑀢𑀺 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀭𑀫𑀡𑀻𑀬𑁂 𑀅𑀭𑀜𑁆𑀜𑀸𑀬𑀢𑀦𑁂 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀦𑀸𑀤𑀻𑀳𑀺 𑀲𑀫𑁆𑀧𑀦𑁆𑀦𑀸𑀲𑀼 𑀧𑀡𑁆𑀡𑀲𑀸𑀮𑀸𑀲𑀼 𑀯𑀲𑀦𑁆𑀢𑀺. 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀯𑁂𑀧𑀘𑀺𑀢𑁆𑀢𑀺 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀚𑀦𑀸 𑀚𑀸𑀫𑀸𑀢𑀺𑀓𑀲𑀲𑀼𑀭𑀸 𑀓𑀸𑀮𑁂𑀦 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀓𑀸𑀮𑁂𑀦 𑀏𑀓𑀢𑁄 𑀘𑀭𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀏𑀓𑀢𑁄 𑀘𑀭𑀦𑁆𑀢𑀺. 𑀧𑀝𑀮𑀺𑀬𑁄𑀢𑀺 𑀕𑀡𑀗𑁆𑀕𑀡𑀽𑀧𑀸𑀳𑀦𑀸. 𑀔𑀕𑁆𑀕𑀁 𑀑𑀮𑀕𑁆𑀕𑁂𑀢𑁆𑀯𑀸𑀢𑀺 𑀔𑀕𑁆𑀕𑀁 𑀅𑀁𑀲𑁂 𑀑𑀮𑀕𑁆𑀕𑁂𑀢𑁆𑀯𑀸. 𑀙𑀢𑁆𑀢𑁂𑀦𑀸𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂𑀦 𑀫𑀢𑁆𑀣𑀓𑁂 𑀥𑀸𑀭𑀬𑀫𑀸𑀦𑁂𑀦. 𑀅𑀧𑀩𑁆𑀬𑀸𑀫𑀢𑁄 𑀓𑀭𑀺𑀢𑁆𑀯𑀸𑀢𑀺 𑀩𑁆𑀬𑀸𑀫𑀢𑁄 𑀅𑀓𑀢𑁆𑀯𑀸. 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀦𑁆𑀢𑀺 𑀘𑀺𑀭𑀲𑀫𑀸𑀤𑀺𑀡𑁆𑀡𑀯𑀢𑀸𑀦𑀁. 𑀇𑀢𑁄 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 ‘‘𑀇𑀢𑁄 𑀧𑀓𑁆𑀓𑀫 𑀧𑀭𑀺𑀯𑀚𑁆𑀚𑀬, 𑀫𑀸 𑀉𑀧𑀭𑀺𑀯𑀸𑀢𑁂 𑀢𑀺𑀝𑁆𑀞𑀸’’𑀢𑀺 𑀯𑀤𑀦𑁆𑀢𑀺. 𑀦 𑀳𑁂𑀢𑁆𑀣 𑀤𑁂𑀯𑀸𑀢𑀺 𑀏𑀢𑀲𑁆𑀫𑀺𑀁 𑀲𑀻𑀮𑀯𑀦𑁆𑀢𑀸𑀦𑀁 𑀕𑀦𑁆𑀥𑁂 𑀤𑁂𑀯𑀸 𑀦 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀦𑁄, 𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀲𑀜𑁆𑀜𑀺𑀦𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀦𑀯𑀫𑀁.

𑁧𑁦. 𑀲𑀫𑀼𑀤𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁬. 𑀤𑀲𑀫𑁂 𑀲𑀫𑀼𑀤𑁆𑀤𑀢𑀻𑀭𑁂 𑀧𑀡𑁆𑀡𑀓𑀼𑀝𑀻𑀲𑀽𑀢𑀺 𑀘𑀓𑁆𑀓𑀯𑀸𑀴𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑀺𑀬𑀁 𑀭𑀚𑀢𑀧𑀝𑁆𑀝𑀯𑀡𑁆𑀡𑁂 𑀯𑀸𑀮𑀼𑀓𑀧𑀼𑀴𑀺𑀦𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀲𑀼 𑀧𑀡𑁆𑀡𑀲𑀸𑀮𑀸𑀲𑀼 𑀯𑀲𑀦𑁆𑀢𑀺. 𑀲𑀺𑀬𑀸𑀧𑀺 𑀦𑁄𑀢𑀺 𑀲𑀺𑀬𑀸𑀧𑀺 𑀅𑀫𑁆𑀳𑀸𑀓𑀁. 𑀅𑀪𑀬𑀤𑀓𑁆𑀔𑀺𑀡𑀁 𑀬𑀸𑀘𑁂𑀬𑁆𑀬𑀸𑀫𑀸𑀢𑀺 𑀅𑀪𑀬𑀤𑀸𑀦𑀁 𑀬𑀸𑀘𑁂𑀬𑁆𑀬𑀸𑀫. 𑀬𑁂𑀪𑀼𑀬𑁆𑀬𑁂𑀦 𑀓𑀺𑀭 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀳𑁄𑀢𑀺. 𑀅𑀲𑀼𑀭𑀸𑀦𑀁 𑀦 𑀲𑀩𑁆𑀩𑀓𑀸𑀮𑀁 𑀚𑀬𑁄 𑀳𑁄𑀢𑀺, 𑀩𑀳𑀼𑀯𑀸𑀭𑁂 𑀧𑀭𑀸𑀚𑀬𑁄𑀯 𑀳𑁄𑀢𑀺. 𑀢𑁂 𑀤𑁂𑀯𑁂𑀳𑀺 𑀧𑀭𑀸𑀚𑀺𑀢𑀸 𑀧𑀮𑀸𑀬𑀦𑁆𑀢𑀸 𑀇𑀲𑀻𑀦𑀁 𑀅𑀲𑁆𑀲𑀫𑀧𑀤𑁂𑀦 𑀕𑀘𑁆𑀙𑀦𑁆𑀢𑀸 ‘‘𑀲𑀓𑁆𑀓𑁄 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀅𑀫𑁆𑀳𑁂 𑀦𑀸𑀲𑁂𑀢𑀺, 𑀕𑀡𑁆𑀳𑀣 𑀧𑀼𑀢𑁆𑀢𑀳𑀢𑀸𑀬 𑀧𑀼𑀢𑁆𑀢𑁂’’𑀢𑀺 𑀓𑀼𑀧𑀺𑀢𑀸 𑀅𑀲𑁆𑀲𑀫𑀧𑀤𑁂 𑀧𑀸𑀦𑀻𑀬𑀖𑀝𑀘𑀗𑁆𑀓𑀫𑀦𑀲𑀸𑀮𑀸𑀤𑀻𑀦𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀺. 𑀇𑀲𑀬𑁄 𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀁 𑀆𑀤𑀸𑀬 𑀆𑀕𑀢𑀸 𑀦𑀁 𑀤𑀺𑀲𑁆𑀯𑀸 𑀧𑀼𑀦 𑀤𑀼𑀓𑁆𑀔𑁂𑀦 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀦𑁆𑀢𑀺. 𑀢𑁂𑀧𑀺 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀯𑀺𑀦𑀸𑀲𑁂𑀦𑁆𑀢𑀺. 𑀢𑀲𑁆𑀫𑀸 ‘‘𑀇𑀤𑀸𑀦𑀺 𑀢𑁂𑀲𑀁 𑀲𑀗𑁆𑀕𑀸𑀫𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄’’𑀢𑀺 𑀲𑀼𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼.

𑀓𑀸𑀫𑀁𑀓𑀭𑁄𑀢𑀺 𑀇𑀘𑁆𑀙𑀺𑀢𑀓𑀭𑁄. 𑀪𑀬𑀲𑁆𑀲 𑀅𑀪𑀬𑀲𑁆𑀲 𑀯𑀸𑀢𑀺 𑀪𑀬𑀁 𑀯𑀸 𑀅𑀪𑀬𑀁 𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀢𑁆𑀯𑀁 𑀅𑀪𑀬𑀁 𑀤𑀸𑀢𑀼𑀓𑀸𑀫𑁄, 𑀅𑀪𑀬𑀁 𑀤𑀸𑀢𑀼𑀁 𑀧𑀳𑁄𑀲𑀺. 𑀲𑀘𑁂 𑀪𑀬𑀁 𑀤𑀸𑀢𑀼𑀓𑀸𑀫𑁄. 𑀪𑀬𑀁 𑀤𑀸𑀢𑀼𑀁 𑀧𑀳𑁄𑀲𑀺. 𑀅𑀫𑁆𑀳𑀸𑀓𑀁 𑀧𑀦 𑀅𑀪𑀬𑀤𑀸𑀦𑀁 𑀤𑁂𑀳𑀻𑀢𑀺. 𑀤𑀼𑀝𑁆𑀞𑀸𑀦𑀦𑁆𑀢𑀺 𑀯𑀺𑀭𑀼𑀤𑁆𑀥𑀸𑀦𑀁. 𑀧𑀯𑀼𑀢𑁆𑀢𑀦𑁆𑀢𑀺 𑀔𑁂𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑀺𑀢𑀁.

𑀢𑀺𑀓𑁆𑀔𑀢𑁆𑀢𑀼𑀁 𑀉𑀩𑁆𑀩𑀺𑀚𑁆𑀚𑀻𑀢𑀺 𑀲𑀸𑀬𑀫𑀸𑀲𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀬𑀦𑀁 𑀅𑀪𑀺𑀭𑀼𑀬𑁆𑀳 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀸𑀬 𑀑𑀓𑁆𑀓𑀦𑁆𑀢𑀫𑀢𑁆𑀢𑀸𑀬 𑀲𑀫𑀦𑁆𑀢𑀸 𑀞𑀢𑁆𑀯𑀸 𑀲𑀢𑁆𑀢𑀺𑀲𑀢𑁂𑀦 𑀧𑀳𑀝𑁄 𑀯𑀺𑀬 𑀯𑀺𑀭𑀯𑀦𑁆𑀢𑁄 𑀉𑀝𑁆𑀞𑀳𑀢𑀺, 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀅𑀲𑀼𑀭𑀪𑀯𑀦𑀁 ‘‘𑀓𑀺𑀫𑀺𑀤’’𑀦𑁆𑀢𑀺 𑀲𑀗𑁆𑀔𑁄𑀪𑀁 𑀆𑀧𑀚𑁆𑀚𑀢𑀺. 𑀅𑀣 𑀦𑀁 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀫𑀺𑀤’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀲𑁄 ‘‘𑀦 𑀓𑀺𑀜𑁆𑀘𑀻’’𑀢𑀺 𑀯𑀤𑀢𑀺. 𑀤𑀼𑀢𑀺𑀬𑀬𑀸𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀅𑀲𑀼𑀭𑀸𑀦𑀁 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚𑀸’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀦𑁆𑀢𑀸𑀦𑀁𑀬𑁂𑀯 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺. 𑀏𑀯𑀫𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 𑀕𑁂𑀮𑀜𑁆𑀜𑀚𑀸𑀢𑀁 𑀘𑀺𑀢𑁆𑀢𑀁 𑀯𑁂𑀧𑀢𑀺. 𑀢𑁂𑀦𑁂𑀯 𑀘𑀲𑁆𑀲 ‘‘𑀯𑁂𑀧𑀘𑀺𑀢𑁆𑀢𑀻’’𑀢𑀺 𑀅𑀧𑀭𑀁 𑀦𑀸𑀫𑀁 𑀉𑀤𑀧𑀸𑀤𑀻𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀯𑀢𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁭. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀯𑀢𑀧𑀤𑀸𑀦𑀻𑀢𑀺 𑀯𑀢𑀓𑁄𑀝𑁆𑀞𑀸𑀲𑀸𑀦𑀺. 𑀲𑀫𑀢𑁆𑀢𑀸𑀦𑀻𑀢𑀺 𑀧𑀭𑀺𑀧𑀼𑀡𑁆𑀡𑀸𑀦𑀺. 𑀲𑀫𑀸𑀤𑀺𑀦𑁆𑀦𑀸𑀦𑀻𑀢𑀺 𑀕𑀳𑀺𑀢𑀸𑀦𑀺. 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀻𑀢𑀺 𑀓𑀼𑀮𑀚𑁂𑀝𑁆𑀞𑀓𑀸𑀦𑀁 𑀫𑀳𑀸𑀧𑀺𑀢𑀸 𑀫𑀳𑀸𑀫𑀸𑀢𑀸 𑀘𑀽𑀴𑀧𑀺𑀢𑀸 𑀘𑀽𑀴𑀫𑀸𑀢𑀸 𑀫𑀸𑀢𑀼𑀮𑁄 𑀫𑀸𑀢𑀼𑀮𑀸𑀦𑀻𑀢𑀺𑀆𑀤𑀻𑀦𑀁 𑀅𑀧𑀘𑀺𑀢𑀺𑀓𑀸𑀭𑀓𑁄. 𑀲𑀡𑁆𑀳𑀯𑀸𑀘𑁄𑀢𑀺 𑀧𑀺𑀬𑀫𑀼𑀤𑀼𑀫𑀥𑀼𑀭𑀯𑀸𑀘𑁄. 𑀫𑀼𑀢𑁆𑀢𑀘𑀸𑀕𑁄𑀢𑀺 𑀯𑀺𑀲𑁆𑀲𑀝𑁆𑀞𑀘𑀸𑀕𑁄. 𑀧𑀬𑀢𑀧𑀸𑀡𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀤𑀸𑀦𑀢𑁆𑀣𑀸𑀬 𑀲𑀤𑀸 𑀥𑁄𑀢𑀳𑀢𑁆𑀣𑁄. 𑀯𑁄𑀲𑁆𑀲𑀕𑁆𑀕𑀭𑀢𑁄𑀢𑀺 𑀯𑁄𑀲𑁆𑀲𑀚𑁆𑀚𑀦𑁂 𑀭𑀢𑁄. 𑀬𑀸𑀘𑀬𑁄𑀕𑁄𑀢𑀺 𑀧𑀭𑁂𑀳𑀺 𑀬𑀸𑀘𑀺𑀢𑀩𑁆𑀩𑀸𑀭𑀳𑁄, 𑀬𑀸𑀘𑀬𑁄𑀕𑁄𑀢𑀺 𑀯𑀸 𑀬𑀸𑀘𑀬𑁄𑀕𑁂𑀦𑁂𑀯 𑀬𑀼𑀢𑁆𑀢𑁄. 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀤𑀸𑀦𑁂 𑀘 𑀲𑀁𑀯𑀺𑀪𑀸𑀕𑁂 𑀘 𑀭𑀢𑁄. 𑀧𑀞𑀫𑀁.

𑁨. 𑀲𑀓𑁆𑀓𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁮. 𑀤𑀼𑀢𑀺𑀬𑁂 𑀫𑀦𑀼𑀲𑁆𑀲𑀪𑀽𑀢𑁄𑀢𑀺 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑁂 𑀫𑀦𑀼𑀲𑁆𑀲𑀪𑀽𑀢𑁄. 𑀆𑀯𑀲𑀣𑀁 𑀅𑀤𑀸𑀲𑀻𑀢𑀺 𑀘𑀢𑀼𑀫𑀳𑀸𑀧𑀣𑁂 𑀫𑀳𑀸𑀚𑀦𑀲𑁆𑀲 𑀆𑀯𑀲𑀣𑀁 𑀓𑀸𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑀳𑀲𑁆𑀲𑀫𑁆𑀧𑀺 𑀅𑀢𑁆𑀣𑀸𑀦𑀦𑁆𑀢𑀺 𑀲𑀳𑀲𑁆𑀲𑀫𑁆𑀧𑀺 𑀓𑀸𑀭𑀡𑀸𑀦𑀁, 𑀚𑀦𑀲𑀳𑀲𑁆𑀲𑁂𑀦 𑀯𑀸 𑀯𑀘𑀦𑀲𑀳𑀲𑁆𑀲𑁂𑀦 𑀯𑀸 𑀑𑀲𑀸𑀭𑀺𑀢𑁂 ‘‘𑀅𑀬𑀁 𑀇𑀫𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀅𑀢𑁆𑀣𑁄’’𑀢𑀺 𑀏𑀓𑀧𑀤𑁂 𑀞𑀺𑀢𑁄𑀯 𑀯𑀺𑀦𑀺𑀘𑁆𑀙𑀺𑀦𑀢𑀺. 𑀤𑀼𑀢𑀺𑀬𑀁.

𑁩. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁯. 𑀢𑀢𑀺𑀬𑁂 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀢𑀺 𑀓𑀣𑁂𑀦𑁆𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀲𑁄 𑀲𑀓𑁆𑀓𑁄, 𑀬𑁂𑀦 𑀲𑁄 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑀩𑀮𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺. 𑀢𑀜𑁆𑀘 𑀧𑀚𑀸𑀦𑀸𑀫𑀻𑀢𑀺 𑀩𑀳𑀼𑀯𑀘𑀦𑁂 𑀏𑀓𑀯𑀘𑀦𑀁, 𑀢𑁂 𑀘 𑀥𑀫𑁆𑀫𑁂 𑀧𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀓𑁆𑀓𑁄 𑀓𑀺𑀭 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑁂 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄, 𑀩𑁄𑀥𑀺𑀲𑀢𑁆𑀢𑀘𑀭𑀺𑀬𑀸 𑀯𑀺𑀬 𑀘 𑀢𑀲𑁆𑀲 𑀘𑀭𑀺𑀬𑀸 𑀅𑀳𑁄𑀲𑀺. 𑀲𑁄 𑀢𑁂𑀢𑁆𑀢𑀺𑀁𑀲 𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 𑀓𑀮𑁆𑀬𑀸𑀡𑀫𑀓𑀸𑀲𑀺. 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄𑀯 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀫𑀳𑀸𑀚𑀦𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑀝𑁆𑀞𑀸𑀦𑁂 𑀓𑀘𑀯𑀭𑀁 𑀉𑀪𑀢𑁄𑀧𑀲𑁆𑀲𑁂𑀲𑀼 𑀅𑀧𑀩𑁆𑀬𑀽𑀳𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀭𑀫𑀡𑀻𑀬𑀁 𑀅𑀓𑀸𑀲𑀺. 𑀧𑀼𑀦 𑀢𑀢𑁆𑀣𑁂𑀯 𑀫𑀡𑁆𑀟𑀧𑀁 𑀓𑀸𑀭𑁂𑀲𑀺. 𑀧𑀼𑀦 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑀸𑀮𑀁 𑀓𑀸𑀭𑁂𑀲𑀺. 𑀕𑀸𑀫𑀢𑁄 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀯𑀼𑀢𑀫𑁆𑀧𑀺 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 𑀢𑀺𑀕𑀸𑀯𑀼𑀢𑀫𑁆𑀧𑀺 𑀬𑁄𑀚𑀦𑀫𑁆𑀧𑀺 𑀯𑀺𑀘𑀭𑀺𑀢𑁆𑀯𑀸 𑀢𑁂𑀳𑀺 𑀲𑀳𑀸𑀬𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑀫𑀁 𑀲𑀫𑀁 𑀅𑀓𑀸𑀲𑀺. 𑀢𑁂 𑀲𑀩𑁆𑀩𑁂𑀯 𑀏𑀓𑀘𑁆𑀙𑀦𑁆𑀤𑀸 𑀢𑀢𑁆𑀣 𑀢𑀢𑁆𑀣 𑀲𑁂𑀢𑀼𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑁂𑀢𑀼𑀁, 𑀫𑀡𑁆𑀟𑀧𑀲𑀸𑀮𑀸𑀧𑁄𑀓𑁆𑀔𑀭𑀡𑀺𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀧𑀤𑀻𑀦𑀁 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀫𑀡𑁆𑀟𑀧𑀲𑀸𑀮𑀸𑀧𑁄𑀓𑁆𑀔𑀭𑀡𑀺𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀩𑀳𑀼𑀁 𑀧𑀼𑀜𑁆𑀜𑀫𑀓𑀁𑀲𑀼. 𑀫𑀖𑁄 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀤𑁆𑀥𑀺𑀁 𑀲𑀳𑀸𑀬𑁂𑀳𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀲𑀩𑁆𑀩𑀁 𑀪𑀕𑀯𑀸 𑀚𑀸𑀦𑀸𑀢𑀺. 𑀢𑁂𑀦𑀸𑀳 𑁋 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸, 𑀢𑀜𑁆𑀘 𑀧𑀚𑀸𑀦𑀸𑀫𑀻𑀢𑀺. 𑀅𑀬𑀁 𑀲𑀓𑁆𑀓𑀲𑁆𑀲 𑀲𑀓𑁆𑀓𑀢𑁆𑀢𑀸𑀥𑀺𑀕𑀫𑁂 𑀲𑀗𑁆𑀔𑁂𑀧𑀓𑀣𑀸, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀓𑁆𑀓𑀧𑀡𑁆𑀳𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄. 𑀢𑀢𑀺𑀬𑀁.

𑁪. 𑀤𑀮𑀺𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁦. 𑀘𑀢𑀼𑀢𑁆𑀣𑁂 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄𑀢𑀺 𑀫𑀦𑀼𑀲𑁆𑀲𑀅𑀥𑀦𑁄. 𑀫𑀦𑀼𑀲𑁆𑀲𑀓𑀧𑀡𑁄𑀢𑀺 𑀫𑀦𑀼𑀲𑁆𑀲𑀓𑀸𑀭𑀼𑀜𑁆𑀜𑀢𑀁 𑀧𑀢𑁆𑀢𑁄. 𑀫𑀦𑀼𑀲𑁆𑀲𑀯𑀭𑀸𑀓𑁄𑀢𑀺 𑀫𑀦𑀼𑀲𑁆𑀲𑀮𑀸𑀫𑀓𑁄. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂, 𑀢𑀲𑁆𑀫𑀺𑀁 𑀯𑀸 𑀅𑀢𑀺𑀭𑁄𑀘𑀦𑁂. 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀯𑀚𑁆𑀛𑀸𑀬𑀦𑁆𑀢𑀺 𑀮𑀸𑀫𑀓𑀢𑁄 𑀘𑀺𑀦𑁆𑀢𑁂𑀦𑁆𑀢𑀺. 𑀔𑀺𑀬𑀦𑁆𑀢𑀻𑀢𑀺 𑀓𑀣𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺. 𑀯𑀺𑀧𑀸𑀘𑁂𑀦𑁆𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀣𑁂𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑀺. 𑀏𑀲𑁄 𑀔𑁄 𑀫𑀸𑀭𑀺𑀲𑀸𑀢𑀺 𑀏𑀢𑁆𑀣 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑁄 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀓𑀸𑀲𑀺𑀭𑀝𑁆𑀞𑁂 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀲𑀫𑀼𑀲𑁆𑀲𑀺𑀢𑀤𑁆𑀥𑀚𑀧𑀝𑀸𑀓𑀦𑀸𑀦𑀸𑀮𑀗𑁆𑀓𑀸𑀭𑁂𑀦 𑀲𑀼𑀝𑁆𑀞𑀼 𑀅𑀮𑀗𑁆𑀓𑀢𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀸𑀓𑀟𑁆𑀠𑀺𑀢𑀦𑁂𑀢𑁆𑀢𑁂𑀦 𑀚𑀦𑀓𑀸𑀬𑁂𑀦 𑀲𑀫𑀼𑀮𑁆𑀮𑁄𑀓𑀺𑀬𑀫𑀸𑀦𑁄. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑀸 𑀆𑀕𑀫𑁆𑀫 𑀢𑀲𑁆𑀫𑀺𑀁 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀉𑀢𑁆𑀢𑀫𑀤𑀫𑀣𑀲𑀫𑀦𑁆𑀦𑀸𑀕𑀢𑁄. 𑀫𑀳𑀸𑀚𑀦𑁄𑀧𑀺 𑀭𑀸𑀚𑀕𑀢𑀁 𑀘𑀺𑀢𑁆𑀢𑀻𑀓𑀸𑀭𑀁 𑀧𑀳𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑁂𑀯 𑀑𑀮𑁄𑀓𑁂𑀲𑀺. 𑀭𑀸𑀚𑀸 𑁋 ‘‘𑀇𑀤𑀸𑀦𑀺 𑀇𑀫𑀲𑁆𑀫𑀺𑀁 𑀚𑀦𑀓𑀸𑀬𑁂 𑀏𑀓𑁄𑀧𑀺 𑀫𑀁 𑀦 𑀑𑀮𑁄𑀓𑁂𑀢𑀺. 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺? 𑀑𑀮𑁄𑀓𑁂𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀤𑁆𑀤𑀲. 𑀲𑁄𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀳𑁄𑀢𑀺 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑁄. 𑀘𑀻𑀯𑀭𑀸𑀦𑀺𑀧𑀺𑀲𑁆𑀲 𑀚𑀺𑀡𑁆𑀡𑀸𑀦𑀺, 𑀢𑀢𑁄 𑀢𑀢𑁄 𑀲𑀼𑀢𑁆𑀢𑀸𑀦𑀺 𑀕𑀴𑀦𑁆𑀢𑀺. 𑀭𑀜𑁆𑀜𑁄 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀧𑀲𑀸𑀤𑀫𑀢𑁆𑀢𑀁 𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀯𑀦𑁆𑀤𑀦𑀫𑀢𑁆𑀢𑀁 𑀯𑀸 𑀦𑀸𑀳𑁄𑀲𑀺. 𑀲𑁄 𑀭𑀸𑀚𑀸 ‘‘𑀧𑀩𑁆𑀩𑀚𑀺𑀢𑁄 𑀫𑀜𑁆𑀜𑁂 𑀏𑀲 𑀉𑀲𑀽𑀬𑀸𑀬 𑀫𑀁 𑀦 𑀑𑀮𑁄𑀓𑁂𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 ‘‘𑀓𑁆𑀯𑀸𑀬𑀁 𑀓𑀼𑀝𑁆𑀞𑀺𑀘𑀻𑀯𑀭𑀸𑀦𑀺 𑀧𑀸𑀭𑀼𑀢𑁄’’𑀢𑀺 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑁄 𑀭𑀸𑀚𑀕𑀳𑁂 𑀧𑀭𑀫𑀓𑀧𑀡𑀸𑀬 𑀇𑀢𑁆𑀣𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀕𑀳𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀸 𑀇𑀢𑁆𑀣𑀻 𑀓𑀜𑁆𑀚𑀺𑀓𑀫𑀢𑁆𑀢𑀫𑁆𑀧𑀺 𑀉𑀤𑀭𑀧𑀽𑀭𑀁 𑀦𑀸𑀮𑀢𑁆𑀣. 𑀢𑀲𑁆𑀲 𑀓𑀼𑀘𑁆𑀙𑀺𑀕𑀢𑀲𑁆𑀲𑁂𑀯 𑀓𑀡𑁆𑀡𑀦𑀸𑀲𑀸 𑀯𑀺𑀮𑀻𑀦𑀸, 𑀲𑀗𑁆𑀔𑀧𑀮𑀺𑀢𑀓𑀼𑀝𑁆𑀞𑀻 𑀳𑀼𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁄. 𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀦𑀲𑁆𑀲 𑀫𑀸𑀢𑀸 𑀬𑀸𑀯 𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀘𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀯𑀲𑁆𑀲 𑀓𑀜𑁆𑀚𑀺𑀓𑀫𑁆𑀧𑀺 𑀉𑀤𑀓𑀫𑁆𑀧𑀺 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀪𑀺𑀓𑁆𑀔𑀸𑀬 𑀘𑀭𑀺𑀢𑀼𑀁 𑀲𑀫𑀢𑁆𑀣𑀓𑀸𑀮𑁂 𑀧𑀦𑀲𑁆𑀲 𑀓𑀧𑀸𑀮𑀁 𑀳𑀢𑁆𑀣𑁂 𑀤𑀢𑁆𑀯𑀸 ‘‘𑀧𑀜𑁆𑀜𑀸𑀬𑀺𑀲𑁆𑀲𑀲𑀺 𑀲𑀓𑁂𑀦 𑀓𑀫𑁆𑀫𑁂𑀦𑀸’’𑀢𑀺 𑀧𑀓𑁆𑀓𑀸𑀫𑀺.

𑀅𑀣𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 𑀲𑀓𑀮𑀲𑀭𑀻𑀭𑀢𑁄 𑀫𑀁𑀲𑀸𑀦𑀺 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀺, 𑀬𑀽𑀲𑀁 𑀧𑀕𑁆𑀖𑀭𑀢𑀺, 𑀫𑀳𑀸𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀬𑀁 𑀬𑀁 𑀭𑀘𑁆𑀙𑀁 𑀦𑀺𑀲𑁆𑀲𑀸𑀬 𑀲𑀬𑀢𑀺, 𑀲𑀩𑁆𑀩𑀭𑀢𑁆𑀢𑀺𑀁 𑀫𑀳𑀸𑀭𑀯𑁂𑀦 𑀭𑀯𑀢𑀺. 𑀢𑀲𑁆𑀲 𑀓𑀸𑀭𑀼𑀜𑁆𑀜𑀧𑀭𑀺𑀤𑁂𑀯𑀺𑀢𑀲𑀤𑁆𑀤𑁂𑀦 𑀲𑀓𑀮𑀯𑀻𑀣𑀺𑀬𑀁 𑀫𑀦𑀼𑀲𑁆𑀲𑀸 𑀲𑀩𑁆𑀩𑀭𑀢𑁆𑀢𑀺𑀁 𑀦𑀺𑀤𑁆𑀤𑀁 𑀦 𑀮𑀪𑀦𑁆𑀢𑀺. 𑀢𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 𑀲𑀼𑀔𑀲𑀬𑀺𑀢𑁂 𑀧𑀩𑁄𑀥𑁂𑀢𑀻𑀢𑀺 𑀲𑀼𑀧𑁆𑀧𑀩𑀼𑀤𑁆𑀥𑁄𑀢𑁆𑀯𑁂𑀯 𑀦𑀸𑀫𑀁 𑀉𑀤𑀧𑀸𑀤𑀺. 𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀪𑀕𑀯𑀢𑀺 𑀭𑀸𑀚𑀕𑀳𑀁 𑀲𑀫𑁆𑀧𑀢𑁆𑀢𑁂 𑀦𑀸𑀕𑀭𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀫𑀳𑀸𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀁𑀲𑀼. 𑀲𑀼𑀧𑁆𑀧𑀩𑀼𑀤𑁆𑀥𑁄𑀧𑀺 𑀓𑀼𑀝𑁆𑀞𑀻 𑀕𑀦𑁆𑀢𑁆𑀯𑀸 𑀤𑀸𑀦𑀕𑁆𑀕𑀫𑀡𑁆𑀟𑀧𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺. 𑀦𑀸𑀕𑀭𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀧𑀭𑀺𑀯𑀺𑀲𑀦𑁆𑀢𑀸 𑀢𑀲𑁆𑀲𑀸𑀧𑀺 𑀬𑀸𑀕𑀼𑀪𑀢𑁆𑀢𑀁 𑀅𑀤𑀁𑀲𑀼. 𑀢𑀲𑁆𑀲 𑀧𑀡𑀻𑀢𑀪𑁄𑀚𑀦𑀁 𑀪𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀲𑀘𑁆𑀘𑀸𑀦𑀺 𑀤𑀻𑀧𑁂𑀲𑀺, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀯 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀲𑀢𑁆𑀣𑀸 𑀉𑀝𑁆𑀞𑀸𑀬 𑀯𑀺𑀳𑀸𑀭𑀁 𑀕𑀢𑁄. 𑀲𑁄𑀧𑀺 𑀘𑀼𑀫𑁆𑀩𑀝𑀁 𑀆𑀭𑀼𑀬𑁆𑀳 𑀓𑀧𑀸𑀮𑀫𑀸𑀤𑀸𑀬 𑀤𑀡𑁆𑀟𑀫𑁄𑀮𑀼𑀩𑁆𑀪 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀯𑀺𑀩𑁆𑀪𑀦𑁆𑀢𑀸𑀬 𑀕𑀸𑀯𑀺𑀬𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑁄 𑀫𑀢𑁆𑀢𑀺𑀓𑀧𑀸𑀢𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀝𑀺𑀮𑀪𑀦𑁆𑀢𑁄 𑀯𑀺𑀬 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀢𑁆𑀢𑀦𑁄 𑀧𑀼𑀜𑁆𑀜𑀁 𑀦𑀺𑀲𑁆𑀲𑀸𑀬 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀓𑁆𑀓𑀫𑁆𑀫 𑀯𑀺𑀭𑁄𑀘𑀺𑀢𑁆𑀣. 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀏𑀲𑁄 𑀔𑁄 𑀫𑀸𑀭𑀺𑀲𑀸𑀢𑀺𑀆𑀤𑀺𑀫𑀸𑀳.

𑀲𑀤𑁆𑀥𑀸𑀢𑀺 𑀫𑀕𑁆𑀕𑁂𑀦𑀸𑀕𑀢𑀲𑀤𑁆𑀥𑀸. 𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀦𑁆𑀢𑀺 𑀓𑀮𑁆𑀬𑀸𑀡𑀲𑀻𑀮𑀁 𑀦𑀸𑀫 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀭𑀺𑀬𑀓𑀦𑁆𑀢𑀲𑀻𑀮𑀁 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀏𑀓𑀲𑀻𑀮𑀫𑁆𑀧𑀺 𑀅𑀓𑀦𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀪𑀯𑀦𑁆𑀢𑀭𑁂𑀧𑀺 𑀅𑀧𑁆𑀧𑀳𑀻𑀦𑀁 𑀧𑀜𑁆𑀘𑀲𑀻𑀮𑀁 𑀅𑀥𑀺𑀧𑁆𑀧𑁂𑀢𑀁. 𑀘𑀢𑀼𑀢𑁆𑀣𑀁.

𑁫. 𑀭𑀸𑀫𑀡𑁂𑀬𑁆𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁧. 𑀧𑀜𑁆𑀘𑀫𑁂 𑀆𑀭𑀸𑀫𑀘𑁂𑀢𑁆𑀬𑀸𑀢𑀺 𑀆𑀭𑀸𑀫𑀘𑁂𑀢𑀺𑀬𑀸𑀦𑀺. 𑀯𑀦𑀘𑁂𑀢𑁆𑀬𑀸𑀢𑀺 𑀯𑀦𑀘𑁂𑀢𑀺𑀬𑀸𑀦𑀺. 𑀉𑀪𑀬𑀢𑁆𑀣𑀸𑀧𑀺 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀘𑁂𑀢𑁆𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀭𑀸𑀫𑀡𑁂𑀬𑁆𑀬𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀭𑀫𑀡𑀻𑀬𑀪𑀸𑀯𑀲𑁆𑀲. 𑀇𑀤𑀸𑀦𑀺 𑀫𑀦𑀼𑀲𑁆𑀲𑀭𑀫𑀡𑀻𑀬𑀓𑀯𑀲𑁂𑀦 𑀪𑀽𑀫𑀺𑀭𑀫𑀡𑀻𑀬𑀓𑀁 𑀤𑀲𑁆𑀲𑁂𑀦𑁆𑀢𑁄 𑀕𑀸𑀫𑁂 𑀯𑀸𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀫𑀁.

𑁬. 𑀬𑀚𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁨. 𑀙𑀝𑁆𑀞𑁂 𑀬𑀚𑀫𑀸𑀦𑀸𑀦𑀦𑁆𑀢𑀺 𑀬𑀚𑀦𑁆𑀢𑀸𑀦𑀁. 𑀢𑀤𑀸 𑀓𑀺𑀭 𑀅𑀗𑁆𑀕𑀫𑀕𑀥𑀯𑀸𑀲𑀺𑀓𑀸 𑀫𑀦𑀼𑀲𑁆𑀲𑀸 𑀅𑀦𑀼𑀲𑀁𑀯𑀘𑁆𑀙𑀭𑀁 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑀸𑀭𑀽𑀦𑀁 𑀲𑀝𑁆𑀞𑀺𑀫𑀢𑁆𑀢𑁂 𑀲𑀓𑀝𑀪𑀸𑀭𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀧𑀚𑁆𑀚𑀮𑀺𑀢𑀓𑀸𑀮𑁂 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀬𑀚𑀸𑀫𑀸’’𑀢𑀺 𑀢𑀁 𑀲𑀩𑁆𑀩𑀁 𑀧𑀓𑁆𑀔𑀺𑀧𑀦𑁆𑀢𑀺. ‘‘𑀏𑀓𑀯𑀸𑀭𑀁 𑀧𑀓𑁆𑀔𑀺𑀢𑁆𑀢𑀁 𑀲𑀳𑀲𑁆𑀲𑀕𑀼𑀡𑀨𑀮𑀁 𑀤𑁂𑀢𑀻’’𑀢𑀺 𑀦𑁂𑀲𑀁 𑀮𑀤𑁆𑀥𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀲𑀩𑁆𑀩𑁂𑀧𑀺𑀫𑁂 𑀲𑀩𑁆𑀩𑀅𑀕𑁆𑀕𑀸𑀦𑀺 𑀕𑀳𑁂𑀢𑁆𑀯𑀸 ‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀬𑀚𑀸𑀫𑀸’𑀢𑀺 𑀅𑀕𑁆𑀕𑀺𑀫𑁆𑀳𑀺 𑀛𑀸𑀧𑁂𑀦𑁆𑀢𑀺. 𑀅𑀨𑀮𑀁 𑀓𑀭𑁄𑀦𑁆𑀢𑀺, 𑀫𑀬𑀺 𑀧𑀲𑁆𑀲𑀦𑁆𑀢𑁂 𑀫𑀸 𑀦𑀲𑁆𑀲𑀦𑁆𑀢𑀼, 𑀬𑀣𑀸 𑀩𑀼𑀤𑁆𑀥𑀲𑁆𑀲 𑀘𑁂𑀯 𑀲𑀗𑁆𑀖𑀲𑁆𑀲 𑀘 𑀤𑀢𑁆𑀯𑀸 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺, 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀸𑀭𑀼𑀭𑀸𑀲𑀺𑀁 𑀚𑀮𑀸𑀧𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀧𑀼𑀡𑁆𑀡𑀫𑀤𑀺𑀯𑀲𑁂 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 ‘‘𑀇𑀫𑀁 𑀬𑀜𑁆𑀜𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀫𑀳𑀸𑀩𑁆𑀭𑀳𑁆𑀫𑀸 𑀆𑀕𑀘𑁆𑀙𑀢𑀻’’𑀢𑀺 𑀚𑀡𑁆𑀡𑀼𑀓𑁂𑀳𑀺 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀬, 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀆𑀳𑀁𑀲𑀼 ‘‘𑀢𑀼𑀫𑁆𑀳𑁂 ‘𑀫𑀬𑀁 𑀢𑀓𑁆𑀓𑁂𑀦 𑀓𑀣𑁂𑀫𑀸’𑀢𑀺 𑀫𑀜𑁆𑀜𑀣, 𑀇𑀤𑀸𑀦𑀺 𑀧𑀲𑁆𑀲𑀣, 𑀅𑀬𑀁 𑀯𑁄 𑀩𑁆𑀭𑀳𑁆𑀫𑀸 𑀲𑀳𑀢𑁆𑀣𑀸 𑀬𑀜𑁆𑀜𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀆𑀕𑀘𑁆𑀙𑀢𑀻’’𑀢𑀺. 𑀲𑀓𑁆𑀓𑁄 𑀆𑀕𑀦𑁆𑀢𑁆𑀯𑀸 𑀤𑀸𑀭𑀼𑀘𑀺𑀢𑀓𑀫𑀢𑁆𑀣𑀓𑁂 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀓𑀲𑁆𑀲𑀸𑀬𑀁 𑀲𑀓𑁆𑀓𑀸𑀭𑁄’’𑀢𑀺 𑀧𑀼𑀘𑁆𑀙𑀺? 𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀧𑀝𑀺𑀕𑁆𑀕𑀡𑁆𑀳𑀣 𑀦𑁄 𑀬𑀜𑁆𑀜𑀦𑁆𑀢𑀺. 𑀢𑁂𑀦 𑀳𑀺 𑀆𑀕𑀘𑁆𑀙𑀣, 𑀫𑀸 𑀢𑀼𑀮𑀁 𑀙𑀟𑁆𑀟𑁂𑀢𑁆𑀯𑀸 𑀳𑀢𑁆𑀣𑁂𑀦 𑀢𑀼𑀮𑀬𑀺𑀢𑁆𑀣, 𑀅𑀬𑀁 𑀲𑀢𑁆𑀣𑀸 𑀥𑀼𑀭𑀯𑀺𑀳𑀸𑀭𑁂 𑀯𑀲𑀢𑀺, 𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫 ‘‘𑀓𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻’’𑀢𑀺? 𑀉𑀪𑀬𑀭𑀝𑁆𑀞𑀯𑀸𑀲𑀺𑀦𑁄 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳.

𑀢𑀢𑁆𑀣 𑀧𑀼𑀜𑁆𑀜𑀧𑁂𑀓𑁆𑀔𑀸𑀦𑀦𑁆𑀢𑀺 𑀧𑀼𑀜𑁆𑀜𑀁 𑀇𑀘𑁆𑀙𑀦𑁆𑀢𑀸𑀦𑀁 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁. 𑀑𑀧𑀥𑀺𑀓𑀁 𑀧𑀼𑀜𑁆𑀜𑀦𑁆𑀢𑀺 𑀉𑀧𑀥𑀺𑀯𑀺𑀧𑀸𑀓𑀁 𑀧𑀼𑀜𑁆𑀜𑀁. 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑁂 𑀤𑀺𑀦𑁆𑀦𑀁 𑀯𑀺𑀧𑁆𑀨𑀸𑀭𑀯𑀦𑁆𑀢𑀁 𑀳𑁄𑀢𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼. 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸 𑀲𑀩𑁆𑀩𑀸𑀦𑀺 𑀅𑀕𑁆𑀕𑀤𑀸𑀦𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀁𑀲𑀼. 𑀙𑀝𑁆𑀞𑀁.

𑁭. 𑀩𑀼𑀤𑁆𑀥𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁩. 𑀲𑀢𑁆𑀢𑀫𑁂 𑀉𑀝𑁆𑀞𑁂𑀳𑀻𑀢𑀺 𑀉𑀝𑁆𑀞𑀳, 𑀖𑀝, 𑀯𑀸𑀬𑀫. 𑀯𑀺𑀚𑀺𑀢𑀲𑀗𑁆𑀕𑀸𑀫𑀸𑀢𑀺 𑀭𑀸𑀕𑀸𑀤𑀻𑀦𑀜𑁆𑀘𑁂𑀯 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀲𑁆𑀲 𑀘 𑀫𑀸𑀭𑀩𑀮𑀲𑁆𑀲 𑀚𑀺𑀢𑀢𑁆𑀢𑀸 𑀪𑀕𑀯𑀦𑁆𑀢𑀁 𑀏𑀯𑀁 𑀆𑀮𑀧𑀢𑀺. 𑀧𑀦𑁆𑀦𑀪𑀸𑀭𑀸𑀢𑀺 𑀑𑀭𑁄𑀧𑀺𑀢𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀪𑀸𑀭. 𑀧𑀦𑁆𑀦𑀭𑀲𑀸𑀬 𑀭𑀢𑁆𑀢𑀺𑀦𑁆𑀢𑀺 𑀧𑀦𑁆𑀦𑀭𑀲𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀁. 𑀲𑀢𑁆𑀢𑀫𑀁.

𑁮. 𑀕𑀳𑀝𑁆𑀞𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁪. 𑀅𑀝𑁆𑀞𑀫𑁂 𑀧𑀼𑀣𑀼𑀤𑁆𑀤𑀺𑀲𑀸𑀢𑀺 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸 𑀘. 𑀪𑀼𑀫𑁆𑀫𑀸𑀢𑀺 𑀪𑀽𑀫𑀺𑀯𑀸𑀲𑀺𑀦𑁄. 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑁂𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀳𑀺 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑀘𑀺𑀢𑁆𑀢𑁂. 𑀯𑀦𑁆𑀤𑁂𑀢𑀺 𑀯𑀦𑁆𑀤𑀸𑀫𑀺. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁂𑀢𑀺 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀧𑀺 𑀯𑀲𑁆𑀲𑀸𑀦𑀺…𑀧𑁂… 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 𑀆𑀧𑀸𑀡𑀓𑁄𑀝𑀺𑀓𑀁 𑀏𑀓𑀲𑁂𑀬𑁆𑀬𑀁 𑀏𑀓𑀪𑀢𑁆𑀢𑀦𑁆𑀢𑀺𑀆𑀤𑀺𑀓𑀁 𑀲𑁂𑀝𑁆𑀞𑀘𑀭𑀺𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀓𑀭𑀸𑀢𑀺 𑀘𑀢𑀼𑀧𑀘𑁆𑀘𑀬𑀤𑀸𑀦𑀁 𑀓𑀼𑀲𑀼𑀫𑁆𑀪𑀲𑀼𑀫𑀦𑀧𑀽𑀚𑀸 𑀤𑀻𑀧𑀲𑀳𑀲𑁆𑀲𑀚𑀸𑀮𑀦𑁆𑀢𑀺 𑀏𑀯𑀫𑀸𑀤𑀺𑀧𑀼𑀜𑁆𑀜𑀓𑀸𑀭𑀓𑀸. 𑀲𑀻𑀮𑀯𑀦𑁆𑀢𑁄𑀢𑀺 𑀉𑀧𑀸𑀲𑀓𑀢𑁆𑀢𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀳𑀺𑀧𑀺 𑀤𑀲𑀳𑀺𑀧𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀥𑀫𑁆𑀫𑁂𑀦 𑀤𑀸𑀭𑀁 𑀧𑁄𑀲𑁂𑀦𑁆𑀢𑀻𑀢𑀺 𑀉𑀫𑀗𑁆𑀕𑀪𑀺𑀦𑁆𑀤𑀦𑀸𑀤𑀻𑀦𑀺 𑀅𑀓𑀢𑁆𑀯𑀸 𑀥𑀫𑁆𑀫𑀺𑀓𑁂𑀳𑀺 𑀓𑀲𑀺𑀕𑁄𑀭𑀓𑁆𑀔𑀯𑀡𑀺𑀚𑁆𑀚𑀸𑀤𑀻𑀳𑀺 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑀺. 𑀧𑀫𑀼𑀔𑁄 𑀭𑀣𑀫𑀸𑀭𑀼𑀳𑀻𑀢𑀺 𑀤𑁂𑀯𑀸𑀦𑀁 𑀧𑀫𑀼𑀔𑁄 𑀲𑁂𑀝𑁆𑀞𑁄 𑀭𑀣𑀁 𑀆𑀭𑀼𑀳𑀺. 𑀅𑀝𑁆𑀞𑀫𑀁.

𑁯. 𑀲𑀢𑁆𑀣𑀸𑀭𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁫. 𑀦𑀯𑀫𑁂 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀢𑀻𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀺𑀬𑀁 𑀤𑀼𑀓𑀼𑀮𑀁 𑀓𑀢𑁆𑀯𑀸, 𑀩𑁆𑀭𑀳𑁆𑀫𑀚𑀸𑀡𑀼𑀓𑁄 𑀳𑀼𑀢𑁆𑀯𑀸 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀦𑀫𑀲𑁆𑀲𑀢𑀺. 𑀲𑁄 𑀬𑀓𑁆𑀔𑁄𑀢𑀺 𑀲𑁄 𑀲𑀓𑁆𑀓𑁄. 𑀅𑀦𑁄𑀫𑀦𑀸𑀫𑀦𑁆𑀢𑀺 𑀲𑀩𑁆𑀩𑀕𑀼𑀡𑁂𑀳𑀺 𑀑𑀫𑀓𑀪𑀸𑀯𑀲𑁆𑀲 𑀦𑀢𑁆𑀣𑀺𑀢𑀸𑀬 𑀲𑀩𑁆𑀩𑀕𑀼𑀡𑀦𑁂𑀫𑀺𑀢𑁆𑀢𑀓𑁂𑀳𑀺 𑀦𑀸𑀫𑁂𑀳𑀺 𑀅𑀦𑁄𑀫𑀦𑀸𑀫𑀁. 𑀅𑀯𑀺𑀚𑁆𑀚𑀸𑀲𑀫𑀢𑀺𑀓𑁆𑀓𑀫𑀸𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀺𑀓𑀸𑀬 𑀯𑀝𑁆𑀝𑀫𑀽𑀮𑀓𑀅𑀯𑀺𑀚𑁆𑀚𑀸𑀬 𑀲𑀫𑀢𑀺𑀓𑁆𑀓𑀫𑁂𑀦. 𑀲𑁂𑀓𑁆𑀔𑀸𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀅𑀧𑀘𑀬𑀸𑀭𑀸𑀫𑀸𑀢𑀺 𑀯𑀝𑁆𑀝𑀯𑀺𑀤𑁆𑀥𑀁𑀲𑀦𑁂 𑀭𑀢𑀸. 𑀲𑀺𑀓𑁆𑀔𑀭𑁂𑀢𑀺 𑀲𑀺𑀓𑁆𑀔𑀦𑁆𑀢𑀺. 𑀦𑀯𑀫𑀁.

𑁧𑁦. 𑀲𑀗𑁆𑀖𑀯𑀦𑁆𑀤𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁬. 𑀤𑀲𑀫𑁂 𑀅𑀚𑁆𑀛𑀪𑀸𑀲𑀻𑀢𑀺 𑀓𑀲𑁆𑀫𑀸 𑀏𑀲 𑀧𑀼𑀦𑀧𑁆𑀧𑀼𑀦𑀁 𑀏𑀯𑀁 𑀪𑀸𑀲𑀢𑀻𑀢𑀺? 𑀲𑀓𑁆𑀓𑀲𑁆𑀲 𑀓𑀺𑀭 𑀤𑁂𑀯𑀭𑀜𑁆𑀜𑁄 𑀲𑀤𑁆𑀤𑁄 𑀫𑀥𑀼𑀭𑁄, 𑀲𑀼𑀨𑀲𑀺𑀢𑀁 𑀤𑀦𑁆𑀢𑀸𑀯𑀭𑀡𑀁, 𑀓𑀣𑀦𑀓𑀸𑀮𑁂 𑀲𑀼𑀯𑀡𑁆𑀡𑀓𑀺𑀗𑁆𑀓𑀺𑀡𑀺𑀓𑀲𑀤𑁆𑀤𑁄 𑀯𑀺𑀬 𑀦𑀺𑀘𑁆𑀙𑀭𑀢𑀺. 𑀢𑀁 𑀧𑀼𑀦𑀧𑁆𑀧𑀼𑀦𑀁 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀪𑀸𑀲𑀢𑀺. 𑀧𑀽𑀢𑀺𑀤𑁂𑀳𑀲𑀬𑀸𑀢𑀺 𑀧𑀽𑀢𑀺𑀫𑁆𑀳𑀺 𑀫𑀸𑀢𑀼𑀲𑀭𑀻𑀭𑁂 𑀯𑀸, 𑀅𑀢𑁆𑀢𑀦𑁄𑀬𑁂𑀯 𑀯𑀸 𑀲𑀭𑀻𑀭𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀲𑀬𑀦𑀢𑁄 𑀧𑀽𑀢𑀺𑀤𑁂𑀳𑀲𑀬𑀸. 𑀦𑀺𑀫𑀼𑀕𑁆𑀕𑀸 𑀓𑀼𑀡𑀧𑀫𑁆𑀳𑁂𑀢𑁂𑀢𑀺 𑀤𑀲𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑁂 𑀓𑀼𑀡𑀧𑀲𑁆𑀫𑀺𑀁 𑀏𑀢𑁂 𑀦𑀺𑀫𑀼𑀕𑁆𑀕𑀸. 𑀏𑀢𑀁 𑀢𑁂𑀲𑀁 𑀧𑀺𑀳𑀬𑀸𑀫𑀻𑀢𑀺 𑀏𑀢𑁂𑀲𑀁 𑀏𑀢𑀁 𑀧𑀺𑀳𑀬𑀸𑀫𑀺 𑀧𑀢𑁆𑀣𑀬𑀸𑀫𑀺. 𑀦 𑀢𑁂 𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀻𑀢𑀺 𑀦 𑀢𑁂 𑀲𑀁 𑀲𑀦𑁆𑀢𑀓𑀁 𑀥𑀜𑁆𑀜𑀁 𑀓𑁄𑀝𑁆𑀞𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀦 𑀳𑀺 𑀏𑀢𑁂𑀲𑀁 𑀥𑀜𑁆𑀜𑀁 𑀅𑀢𑁆𑀣𑀺. 𑀦 𑀓𑀼𑀫𑁆𑀪𑀻𑀢𑀺 𑀦 𑀓𑀼𑀫𑁆𑀪𑀺𑀬𑀁. 𑀦 𑀓𑀴𑁄𑀧𑀺𑀬𑀦𑁆𑀢𑀺 𑀦 𑀧𑀘𑁆𑀙𑀺𑀬𑀁. 𑀧𑀭𑀦𑀺𑀝𑁆𑀞𑀺𑀢𑀫𑁂𑀲𑀸𑀦𑀸𑀢𑀺 𑀧𑀭𑁂𑀲𑀁 𑀦𑀺𑀝𑁆𑀞𑀺𑀢𑀁 𑀧𑀭𑀖𑀭𑁂 𑀧𑀓𑁆𑀓𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀏𑀲𑀫𑀸𑀦𑀸 𑀕𑀯𑁂𑀲𑀫𑀸𑀦𑀸. 𑀢𑁂𑀦𑀸𑀢𑀺 𑀏𑀯𑀁 𑀧𑀭𑀺𑀬𑀺𑀝𑁆𑀞𑁂𑀦. 𑀲𑀼𑀩𑁆𑀩𑀢𑀸𑀢𑀺 𑀤𑀲𑀧𑀺…𑀧𑁂… 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 𑀲𑀼𑀲𑀫𑀸𑀤𑀺𑀦𑁆𑀦𑀲𑀼𑀦𑁆𑀤𑀭𑀯𑀢𑀸.

𑀲𑀼𑀫𑀦𑁆𑀢𑀫𑀦𑁆𑀢𑀺𑀦𑁄𑀢𑀺 𑀥𑀫𑁆𑀫𑀁 𑀲𑀚𑁆𑀛𑀸𑀬𑀺𑀲𑁆𑀲𑀸𑀫, 𑀥𑀼𑀢𑀗𑁆𑀕𑀁 𑀲𑀫𑀸𑀤𑀺𑀬𑀺𑀲𑁆𑀲𑀸𑀫, 𑀅𑀫𑀢𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫, 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀲𑀼𑀪𑀸𑀲𑀺𑀢𑀪𑀸𑀲𑀺𑀦𑁄. 𑀢𑀼𑀡𑁆𑀳𑀻𑀪𑀽𑀢𑀸 𑀲𑀫𑀜𑁆𑀘𑀭𑀸𑀢𑀺 𑀢𑀺𑀬𑀸𑀫𑀭𑀢𑁆𑀢𑀺𑀁 𑀅𑀲𑀦𑀺𑀖𑁄𑀲𑁂𑀦 𑀖𑁄𑀲𑀺𑀢𑀸 𑀯𑀺𑀬 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸𑀧𑀺 𑀢𑀼𑀡𑁆𑀳𑀻𑀪𑀽𑀢𑀸 𑀲𑀫𑀁 𑀘𑀭𑀦𑁆𑀢𑀺𑀬𑁂𑀯 𑀦𑀸𑀫. 𑀓𑀲𑁆𑀫𑀸? 𑀦𑀺𑀭𑀢𑁆𑀣𑀓𑀯𑀘𑀦𑀲𑁆𑀲𑀸𑀪𑀸𑀯𑀸. 𑀧𑀼𑀣𑀼𑀫𑀘𑁆𑀘𑀸 𑀘𑀸𑀢𑀺 𑀩𑀳𑀼𑀲𑀢𑁆𑀢𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀸. 𑀅𑀢𑁆𑀢𑀤𑀡𑁆𑀟𑁂𑀲𑀼 𑀦𑀺𑀩𑁆𑀩𑀼𑀢𑀸𑀢𑀺 𑀧𑀭𑀯𑀺𑀳𑁂𑀞𑀦𑀢𑁆𑀣𑀁 𑀕𑀳𑀺𑀢𑀤𑀡𑁆𑀟𑁂𑀲𑀼 𑀲𑀢𑁆𑀢𑁂𑀲𑀼 𑀦𑀺𑀩𑁆𑀩𑀼𑀢𑀸 𑀯𑀺𑀲𑁆𑀲𑀝𑁆𑀞𑀤𑀡𑁆𑀟𑀸. 𑀲𑀸𑀤𑀸𑀦𑁂𑀲𑀼 𑀅𑀦𑀸𑀤𑀸𑀦𑀸𑀢𑀺 𑀲𑀕𑀳𑀡𑁂𑀲𑀼 𑀲𑀢𑁆𑀢𑁂𑀲𑀼 𑀘 𑀪𑀯𑀬𑁄𑀦𑀺𑀆𑀤𑀻𑀦𑀁 𑀏𑀓𑀓𑁄𑀝𑁆𑀞𑀸𑀲𑀲𑁆𑀲𑀸𑀧𑀺 𑀅𑀕𑀳𑀺𑀢𑀢𑁆𑀢𑀸 𑀅𑀕𑀳𑀡𑀸. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀙𑁂𑀢𑁆𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁭. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀧𑀞𑀫𑀁.

𑁨. 𑀤𑀼𑀩𑁆𑀩𑀡𑁆𑀡𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁮. 𑀤𑀼𑀢𑀺𑀬𑁂 𑀤𑀼𑀩𑁆𑀩𑀡𑁆𑀡𑁄𑀢𑀺 𑀛𑀸𑀫𑀔𑀸𑀡𑀼𑀯𑀡𑁆𑀡𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀮𑀓𑀼𑀡𑁆𑀟𑀓𑁄 𑀫𑀳𑁄𑀤𑀭𑁄. 𑀆𑀲𑀦𑁂𑀢𑀺 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁. 𑀓𑁄𑀥𑀪𑀓𑁆𑀔𑁄𑀢𑀺 𑀲𑀓𑁆𑀓𑁂𑀦 𑀕𑀳𑀺𑀢𑀦𑀸𑀫𑀫𑁂𑀯𑁂𑀢𑀁. 𑀲𑁄 𑀧𑀦 𑀏𑀓𑁄 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀸, ‘‘𑀲𑀓𑁆𑀓𑁄 𑀓𑀺𑀭 𑀔𑀦𑁆𑀢𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀯𑀻𑀫𑀁𑀲𑀦𑀢𑁆𑀣𑀁 𑀆𑀕𑀢𑁄. 𑀅𑀯𑀭𑀼𑀤𑁆𑀥𑀓𑀬𑀓𑁆𑀔𑀸 𑀧𑀦 𑀏𑀯𑀭𑀽𑀧𑀁 𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀁 𑀞𑀸𑀦𑀁 𑀧𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀤𑁂𑀯𑀸𑀦𑀁 𑀲𑀼𑀢𑁆𑀯𑀸 ‘‘𑀦 𑀲𑀓𑁆𑀓𑀸 𑀏𑀲 𑀨𑀭𑀼𑀲𑁂𑀦 𑀘𑀸𑀮𑁂𑀢𑀼𑀁, 𑀦𑀻𑀘𑀯𑀼𑀢𑁆𑀢𑀺𑀦𑀸 𑀧𑀦 𑀔𑀦𑁆𑀢𑀺𑀬𑀁 𑀞𑀺𑀢𑁂𑀦 𑀲𑀓𑁆𑀓𑀸 𑀧𑀮𑀸𑀧𑁂𑀢𑀼’’𑀦𑁆𑀢𑀺 𑀢𑀣𑀸 𑀧𑀮𑀸𑀧𑁂𑀢𑀼𑀓𑀸𑀫𑁄 𑀉𑀧𑀲𑀗𑁆𑀓𑀫𑀺. 𑀅𑀦𑁆𑀢𑀭𑀥𑀸𑀬𑀻𑀢𑀺 𑀔𑀦𑁆𑀢𑀺𑀬𑀁 𑀞𑀢𑁆𑀯𑀸 𑀩𑀮𑀯𑀘𑀺𑀢𑁆𑀢𑀻𑀓𑀸𑀭𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀦𑀻𑀘𑀯𑀼𑀢𑁆𑀢𑀺𑀬𑀸 𑀤𑀲𑁆𑀲𑀺𑀬𑀫𑀸𑀦𑀸𑀬 𑀲𑀓𑁆𑀓𑀸𑀲𑀦𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑁆𑀢𑀭𑀥𑀸𑀬𑀺. 𑀦 𑀲𑀽𑀧𑀳𑀢𑀘𑀺𑀢𑁆𑀢𑁄𑀫𑁆𑀳𑀻𑀢𑀺 𑀏𑀢𑁆𑀣 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀉𑀧𑀳𑀢𑀘𑀺𑀢𑁆𑀢𑁄𑀫𑁆𑀳𑀻𑀢𑀺 𑀆𑀳. 𑀦𑀸𑀯𑀢𑁆𑀢𑁂𑀦 𑀲𑀼𑀯𑀸𑀦𑀬𑁄𑀢𑀺 𑀦 𑀓𑁄𑀥𑀸𑀯𑀢𑁆𑀢𑁂𑀦 𑀲𑀼𑀆𑀦𑀬𑁄, 𑀓𑁄𑀥𑀯𑀲𑁂 𑀯𑀢𑁆𑀢𑁂𑀢𑀼𑀁 𑀦 𑀲𑀼𑀓𑀭𑁄𑀫𑁆𑀳𑀻𑀢𑀺 𑀯𑀤𑀢𑀺. 𑀦 𑀯𑁄 𑀘𑀺𑀭𑀸𑀳𑀦𑁆𑀢𑀺 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀅𑀳𑀁 𑀘𑀺𑀭𑀁 𑀦 𑀓𑀼𑀚𑁆𑀛𑀸𑀫𑀻𑀢𑀺 𑀯𑀤𑀢𑀺. 𑀤𑀼𑀢𑀺𑀬𑀁.

𑁩. 𑀲𑀫𑁆𑀩𑀭𑀺𑀫𑀸𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁯. 𑀢𑀢𑀺𑀬𑁂 𑀆𑀩𑀸𑀥𑀺𑀓𑁄𑀢𑀺 𑀇𑀲𑀺𑀕𑀡𑁂𑀦 𑀅𑀪𑀺𑀲𑀧𑀓𑀸𑀮𑁂 𑀉𑀧𑁆𑀧𑀦𑁆𑀦𑀸𑀩𑀸𑀥𑁂𑀦 𑀆𑀩𑀸𑀥𑀺𑀓𑁄. 𑀯𑀸𑀘𑁂𑀳𑀺 𑀫𑀦𑁆𑀢𑀺 𑀲𑀘𑁂 𑀫𑀁 𑀲𑀫𑁆𑀩𑀭𑀺𑀫𑀸𑀬𑀁 𑀯𑀸𑀘𑁂𑀲𑀺, 𑀏𑀯𑀫𑀳𑀁 𑀢𑀫𑁆𑀧𑀺 𑀢𑀺𑀓𑀺𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺. 𑀫𑀸 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀯𑀸𑀘𑁂𑀲𑀻𑀢𑀺 𑀯𑀺𑀦𑀸𑀧𑀺 𑀢𑀸𑀯 𑀲𑀫𑁆𑀩𑀭𑀺𑀫𑀸𑀬𑀁 𑀲𑀓𑁆𑀓𑁄 𑀅𑀫𑁆𑀳𑁂 𑀩𑀸𑀥𑀢𑀺, 𑀬𑀤𑀺 𑀧𑀦 𑀢𑀁 𑀚𑀸𑀦𑀺𑀲𑁆𑀲𑀢𑀺, 𑀦𑀝𑁆𑀞𑀸 𑀫𑀬𑀁, 𑀫𑀸 𑀅𑀢𑁆𑀢𑀦𑁄 𑀏𑀓𑀲𑁆𑀲 𑀅𑀢𑁆𑀣𑀸𑀬 𑀅𑀫𑁆𑀳𑁂 𑀦𑀸𑀲𑁂𑀳𑀻𑀢𑀺 𑀯𑀢𑁆𑀯𑀸 𑀦𑀺𑀯𑀸𑀭𑀬𑀺𑀁𑀲𑀼. 𑀲𑀫𑁆𑀩𑀭𑁄𑀯 𑀲𑀢𑀁 𑀲𑀫𑀦𑁆𑀢𑀺 𑀬𑀣𑀸 𑀲𑀫𑁆𑀩𑀭𑁄 𑀅𑀲𑀼𑀭𑀺𑀦𑁆𑀤𑁄 𑀫𑀸𑀬𑀸𑀯𑀻 𑀫𑀸𑀬𑀁 𑀧𑀬𑁄𑀚𑁂𑀢𑁆𑀯𑀸 𑀯𑀲𑁆𑀲𑀲𑀢𑀁 𑀦𑀺𑀭𑀬𑁂 𑀧𑀓𑁆𑀓𑁄, 𑀏𑀯𑀁 𑀧𑀘𑁆𑀘𑀢𑀺. 𑀢𑀼𑀫𑁆𑀳𑁂 𑀥𑀫𑁆𑀫𑀺𑀓𑀸𑀯, 𑀅𑀮𑀁 𑀯𑁄 𑀫𑀸𑀬𑀸𑀬𑀸𑀢𑀺 𑀯𑀤𑀢𑀺. 𑀓𑀺𑀁 𑀧𑀦 𑀲𑀓𑁆𑀓𑁄 𑀢𑀲𑁆𑀲 𑀓𑁄𑀥𑀁 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺? 𑀆𑀫 𑀲𑀓𑁆𑀓𑀼𑀡𑁂𑀬𑁆𑀬. 𑀓𑀣𑀁? 𑀢𑀤𑀸 𑀓𑀺𑀭 𑀲𑁄 𑀇𑀲𑀺𑀕𑀡𑁄 𑀥𑀭𑀢𑀺𑀬𑁂𑀯, 𑀢𑀲𑁆𑀫𑀸 𑀦𑀁 𑀇𑀲𑀻𑀦𑀁 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀔𑀫𑀸𑀧𑁂𑀬𑁆𑀬, 𑀏𑀯𑀫𑀲𑁆𑀲 𑀨𑀸𑀲𑀼 𑀪𑀯𑁂𑀬𑁆𑀬. 𑀢𑁂𑀦 𑀧𑀦 𑀯𑀜𑁆𑀘𑀺𑀢𑀢𑁆𑀢𑀸 𑀢𑀣𑀸 𑀅𑀓𑀢𑁆𑀯𑀸 𑀧𑀓𑁆𑀓𑀦𑁆𑀢𑁄𑀯. 𑀢𑀢𑀺𑀬𑀁.

𑁪. 𑀅𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁦. 𑀘𑀢𑀼𑀢𑁆𑀣𑁂 𑀲𑀫𑁆𑀧𑀬𑁄𑀚𑁂𑀲𑀼𑀦𑁆𑀢𑀺 𑀓𑀮𑀳𑀁 𑀅𑀓𑀁𑀲𑀼. 𑀅𑀘𑁆𑀘𑀲𑀭𑀸𑀢𑀺 𑀅𑀢𑀺𑀓𑁆𑀓𑀫𑀺, 𑀏𑀓𑁄 𑀪𑀺𑀓𑁆𑀔𑀼 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀢𑀺𑀓𑁆𑀓𑀫𑁆𑀫 𑀯𑀘𑀦𑀁 𑀅𑀯𑁄𑀘𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀥𑀫𑁆𑀫𑀁 𑀦𑀧𑁆𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀦 𑀔𑀫𑀢𑀺. 𑀓𑁄𑀥𑁄 𑀯𑁄 𑀯𑀲𑀫𑀸𑀬𑀸𑀢𑀽𑀢𑀺 𑀓𑁄𑀥𑁄 𑀢𑀼𑀫𑁆𑀳𑀸𑀓𑀁 𑀯𑀲𑀁 𑀆𑀕𑀘𑁆𑀙𑀢𑀼, 𑀫𑀸 𑀢𑀼𑀫𑁆𑀳𑁂 𑀓𑁄𑀥𑀯𑀲𑀁 𑀕𑀫𑀺𑀢𑁆𑀣𑀸𑀢𑀺 𑀤𑀻𑀧𑁂𑀢𑀺. 𑀫𑀸 𑀘 𑀫𑀺𑀢𑁆𑀢𑁂 𑀳𑀺 𑀯𑁄 𑀚𑀭𑀸𑀢𑀺 𑀏𑀢𑁆𑀣 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀼𑀫𑁆𑀳𑀸𑀓𑀁 𑀫𑀺𑀢𑁆𑀢𑀥𑀫𑁆𑀫𑁂 𑀚𑀭𑀸 𑀦𑀸𑀫 𑀫𑀸 𑀦𑀺𑀩𑁆𑀩𑀢𑁆𑀢𑀺. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁, 𑀫𑀺𑀢𑁆𑀢𑁂𑀲𑀼 𑀯𑁄 𑀚𑀭𑀸 𑀫𑀸 𑀦𑀺𑀩𑁆𑀩𑀢𑁆𑀢𑀺, 𑀫𑀺𑀢𑁆𑀢𑀪𑀸𑀯𑀢𑁄 𑀅𑀜𑁆𑀜𑀣𑀸𑀪𑀸𑀯𑁄 𑀫𑀸 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀅𑀕𑀭𑀳𑀺𑀬𑀁 𑀫𑀸 𑀕𑀭𑀳𑀺𑀢𑁆𑀣𑀸𑀢𑀺 𑀅𑀕𑀸𑀭𑀬𑁆𑀳𑀁 𑀔𑀻𑀡𑀸𑀲𑀯𑀧𑀼𑀕𑁆𑀕𑀮𑀁 𑀫𑀸 𑀕𑀭𑀳𑀺𑀢𑁆𑀣. 𑀘𑀢𑀼𑀢𑁆𑀣𑀁.

𑁫. 𑀅𑀓𑁆𑀓𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁧. 𑀧𑀜𑁆𑀘𑀫𑁂 𑀫𑀸 𑀯𑁄 𑀓𑁄𑀥𑁄 𑀅𑀚𑁆𑀛𑀪𑀯𑀻𑀢𑀺 𑀓𑁄𑀥𑁄 𑀢𑀼𑀫𑁆𑀳𑁂 𑀫𑀸 𑀅𑀪𑀺𑀪𑀯𑀺, 𑀢𑀼𑀫𑁆𑀳𑁂𑀯 𑀓𑁄𑀥𑀁 𑀅𑀪𑀺𑀪𑀯𑀣. 𑀫𑀸 𑀘 𑀓𑀼𑀚𑁆𑀛𑀺𑀢𑁆𑀣 𑀓𑀼𑀚𑁆𑀛𑀺𑀢𑀦𑁆𑀢𑀺 𑀓𑀼𑀚𑁆𑀛𑀦𑁆𑀢𑀸𑀦𑀁 𑀫𑀸 𑀧𑀝𑀺𑀓𑀼𑀚𑁆𑀛𑀺𑀢𑁆𑀣. 𑀅𑀓𑁆𑀓𑁄𑀥𑁄𑀢𑀺 𑀫𑁂𑀢𑁆𑀢𑀸 𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀘. 𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘. 𑀅𑀣 𑀧𑀸𑀧𑀚𑀦𑀁 𑀓𑁄𑀥𑁄, 𑀧𑀩𑁆𑀩𑀢𑁄𑀯𑀸𑀪𑀺𑀫𑀤𑁆𑀤𑀢𑀻𑀢𑀺 𑀮𑀸𑀫𑀓𑀚𑀦𑀁 𑀧𑀩𑁆𑀩𑀢𑁄 𑀯𑀺𑀬 𑀓𑁄𑀥𑁄 𑀅𑀪𑀺𑀫𑀤𑁆𑀤𑀢𑀻𑀢𑀺. 𑀧𑀜𑁆𑀘𑀫𑀁.

𑀢𑀢𑀺𑀬𑁄 𑀯𑀕𑁆𑀕𑁄.

𑀲𑀓𑁆𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀲𑀕𑀸𑀣𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬 𑀧𑀞𑀫𑁄 𑀪𑀸𑀕𑁄.