𑁧𑁨. 𑀆𑀴𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀤𑁆𑀯𑀸𑀤𑀲𑀫𑁂 𑀆𑀴𑀯𑀺𑀬𑀦𑁆𑀢𑀺 𑀆𑀴𑀯𑀻𑀢𑀺 𑀢𑀁 𑀭𑀝𑁆𑀞𑀫𑁆𑀧𑀺 𑀦𑀕𑀭𑀫𑁆𑀧𑀺. 𑀢𑀜𑁆𑀘 𑀪𑀯𑀦𑀁 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀕𑀸𑀯𑀼𑀢𑀫𑀢𑁆𑀢𑁂 𑀞𑀺𑀢𑀁. 𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀢𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀆𑀴𑀯𑀺𑀬𑀁 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑁄. 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂𑀢𑀺 𑀏𑀢𑁆𑀣 𑀧𑀦 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀆𑀴𑀯𑀓𑁄 𑀓𑀺𑀭 𑀭𑀸𑀚𑀸 𑀯𑀺𑀯𑀺𑀥𑀦𑀸𑀝𑀓𑀽𑀧𑀪𑁄𑀕𑀁 𑀙𑀟𑁆𑀟𑁂𑀢𑁆𑀯𑀸 𑀘𑁄𑀭𑀧𑀝𑀺𑀩𑀸𑀳𑀦𑀢𑁆𑀣𑀁 𑀧𑀝𑀺𑀭𑀸𑀚𑀦𑀺𑀲𑁂𑀥𑀦𑀢𑁆𑀣𑀁 𑀩𑁆𑀬𑀸𑀬𑀸𑀫𑀓𑀭𑀡𑀢𑁆𑀣𑀜𑁆𑀘 𑀲𑀢𑁆𑀢𑀫𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀺𑀕𑀯𑀁 𑀕𑀘𑁆𑀙𑀦𑁆𑀢𑁄 𑀏𑀓𑀤𑀺𑀯𑀲𑀁 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 𑀓𑀢𑀺𑀓𑀁 𑀅𑀓𑀸𑀲𑀺 𑁋 ‘‘𑀬𑀲𑁆𑀲 𑀧𑀲𑁆𑀲𑁂𑀦 𑀫𑀺𑀕𑁄 𑀧𑀮𑀸𑀬𑀢𑀺, 𑀢𑀲𑁆𑀲𑁂𑀯 𑀲𑁄 𑀪𑀸𑀭𑁄’’𑀢𑀺. 𑀅𑀣 𑀢𑀲𑁆𑀲𑁂𑀯 𑀧𑀲𑁆𑀲𑁂𑀦 𑀫𑀺𑀕𑁄 𑀧𑀮𑀸𑀬𑀺, 𑀚𑀯𑀲𑀫𑁆𑀧𑀦𑁆𑀦𑁄 𑀭𑀸𑀚𑀸 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀢𑀺𑀬𑁄𑀚𑀦𑀁 𑀢𑀁 𑀫𑀺𑀕𑀁 𑀅𑀦𑀼𑀩𑀦𑁆𑀥𑀺. 𑀏𑀡𑀺𑀫𑀺𑀕𑀸 𑀘 𑀢𑀺𑀬𑁄𑀚𑀦𑀯𑁂𑀕𑀸 𑀏𑀯 𑀳𑁄𑀦𑁆𑀢𑀺. 𑀅𑀣 𑀧𑀭𑀺𑀓𑁆𑀔𑀻𑀡𑀚𑀯𑀁 𑀢𑀁 𑀉𑀤𑀓𑀁 𑀯𑀺𑀬 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀁 𑀯𑀥𑀺𑀢𑁆𑀯𑀸 𑀤𑁆𑀯𑀺𑀥𑀸 𑀙𑁂𑀢𑁆𑀯𑀸 𑀅𑀦𑀢𑁆𑀣𑀺𑀓𑁄𑀧𑀺 𑀫𑀁𑀲𑁂𑀦 ‘‘𑀦𑀸𑀲𑀓𑁆𑀔𑀺 𑀫𑀺𑀕𑀁 𑀕𑀳𑁂𑀢𑀼’’𑀦𑁆𑀢𑀺 𑀅𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀓𑀸𑀚𑁂𑀦𑀸𑀤𑀸𑀬 𑀆𑀕𑀘𑁆𑀙𑀦𑁆𑀢𑁄 𑀦𑀕𑀭𑀲𑁆𑀲𑀸𑀯𑀺𑀤𑀽𑀭𑁂 𑀩𑀳𑀮𑀧𑀢𑁆𑀢𑀧𑀮𑀸𑀲𑀁 𑀫𑀳𑀸𑀦𑀺𑀕𑁆𑀭𑁄𑀥𑀁 𑀤𑀺𑀲𑁆𑀯𑀸 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀢𑀲𑁆𑀲 𑀫𑀽𑀮𑀫𑀼𑀧𑀕𑀢𑁄. 𑀢𑀲𑁆𑀫𑀺𑀜𑁆𑀘 𑀦𑀺𑀕𑁆𑀭𑁄𑀥𑁂 𑀆𑀴𑀯𑀓𑁄 𑀬𑀓𑁆𑀔𑁄 𑀫𑀳𑀸𑀭𑀸𑀚𑀲𑀦𑁆𑀢𑀺𑀓𑀸 𑀪𑀯𑀦𑀁 𑀮𑀪𑀺𑀢𑁆𑀯𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀁 𑀧𑀯𑀺𑀝𑁆𑀞𑁂 𑀧𑀸𑀡𑀺𑀦𑁄 𑀔𑀸𑀤𑀦𑁆𑀢𑁄 𑀧𑀝𑀺𑀯𑀲𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀔𑀸𑀤𑀺𑀢𑀼𑀁 𑀉𑀧𑀕𑀢𑁄. 𑀭𑀸𑀚𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀢𑀺𑀓𑀁 𑀅𑀓𑀸𑀲𑀺 𑁋 ‘‘𑀫𑀼𑀜𑁆𑀘 𑀫𑀁, 𑀅𑀳𑀁 𑀢𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀫𑀦𑀼𑀲𑁆𑀲𑀜𑁆𑀘 𑀣𑀸𑀮𑀺𑀧𑀸𑀓𑀜𑁆𑀘 𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀬𑀓𑁆𑀔𑁄 𑁋 ‘‘𑀢𑁆𑀯𑀁 𑀭𑀸𑀚𑀽𑀧𑀪𑁄𑀕𑁂𑀦 𑀧𑀫𑀢𑁆𑀢𑁄 𑀦 𑀲𑀭𑀺𑀲𑁆𑀲𑀲𑀺, 𑀅𑀳𑀁 𑀧𑀦 𑀪𑀯𑀦𑀁 𑀅𑀦𑀼𑀧𑀕𑀢𑀜𑁆𑀘 𑀅𑀦𑀦𑀼𑀜𑁆𑀜𑀸𑀢𑀜𑁆𑀘 𑀔𑀸𑀤𑀺𑀢𑀼𑀁 𑀦 𑀮𑀪𑀸𑀫𑀺, 𑀲𑁆𑀯𑀸𑀳𑀁 𑀪𑀯𑀦𑁆𑀢𑀫𑁆𑀧𑀺 𑀚𑀻𑀬𑁂𑀬𑁆𑀬’’𑀦𑁆𑀢𑀺 𑀦 𑀫𑀼𑀜𑁆𑀘𑀺. 𑀭𑀸𑀚𑀸 ‘‘𑀬𑀁 𑀤𑀺𑀯𑀲𑀁 𑀦 𑀧𑁂𑀲𑁂𑀫𑀺, 𑀢𑀁 𑀤𑀺𑀯𑀲𑀁 𑀫𑀁 𑀕𑀳𑁂𑀢𑁆𑀯𑀸 𑀔𑀸𑀤𑀸’’𑀢𑀺 𑀅𑀢𑁆𑀢𑀸𑀦𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀢𑁂𑀦 𑀫𑀼𑀢𑁆𑀢𑁄 𑀦𑀕𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺.

𑀩𑀮𑀓𑀸𑀬𑁄 𑀫𑀕𑁆𑀕𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀞𑀺𑀢𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸, ‘‘𑀓𑀺𑀁, 𑀫𑀳𑀸𑀭𑀸𑀚, 𑀅𑀬𑀲𑀫𑀢𑁆𑀢𑀪𑀬𑀸 𑀏𑀯𑀁 𑀓𑀺𑀮𑀦𑁆𑀢𑁄𑀲𑀻’’𑀢𑀺? 𑀯𑀤𑀦𑁆𑀢𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀲𑀺. 𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀅𑀦𑀸𑀭𑁄𑀘𑁂𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀓𑀢𑀧𑀸𑀢𑀭𑀸𑀲𑁄 𑀦𑀕𑀭𑀕𑀼𑀢𑁆𑀢𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀦𑀕𑀭𑀕𑀼𑀢𑁆𑀢𑀺𑀓𑁄 𑁋 ‘‘𑀓𑀺𑀁, 𑀤𑁂𑀯, 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀓𑀢𑁄’’𑀢𑀺 𑀆𑀳? 𑀦 𑀓𑀢𑁄 𑀪𑀡𑁂𑀢𑀺. 𑀤𑀼𑀝𑁆𑀞𑀼 𑀓𑀢𑀁, 𑀤𑁂𑀯, 𑀅𑀫𑀦𑀼𑀲𑁆𑀲𑀸 𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀫𑀢𑁆𑀢𑀫𑁂𑀯 𑀮𑀪𑀦𑁆𑀢𑀺, 𑀅𑀧𑀭𑀺𑀘𑁆𑀙𑀺𑀦𑁆𑀦𑁂 𑀧𑀦 𑀚𑀦𑀧𑀤𑀲𑁆𑀲𑀸𑀩𑀸𑀥𑁄 𑀪𑀯𑀺𑀲𑁆𑀲𑀢𑀺, 𑀳𑁄𑀢𑀼 𑀤𑁂𑀯, 𑀓𑀺𑀜𑁆𑀘𑀸𑀧𑀺 𑀏𑀯𑀫𑀓𑀸𑀲𑀺, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁 𑀭𑀚𑁆𑀚𑀲𑀼𑀔𑀫𑀦𑀼𑀪𑁄𑀳𑀺, 𑀅𑀳𑀫𑁂𑀢𑁆𑀣 𑀓𑀸𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀩𑀦𑁆𑀥𑀦𑀸𑀕𑀸𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑀬𑁂 𑀬𑁂 𑀯𑀚𑁆𑀛𑀸 𑀳𑁄𑀦𑁆𑀢𑀺, 𑀢𑁂 𑀢𑁂 𑀲𑀦𑁆𑀥𑀸𑀬 ‘‘𑀬𑁄 𑀚𑀻𑀯𑀺𑀢𑀢𑁆𑀣𑀺𑀓𑁄, 𑀲𑁄 𑀦𑀺𑀓𑁆𑀔𑀫𑀢𑀽’’𑀢𑀺 𑀪𑀡𑀢𑀺. 𑀬𑁄 𑀧𑀞𑀫𑀁 𑀦𑀺𑀓𑁆𑀔𑀫𑀢𑀺, 𑀢𑀁 𑀕𑁂𑀳𑀁 𑀦𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀘 ‘‘𑀇𑀫𑀁 𑀣𑀸𑀮𑀺𑀧𑀸𑀓𑀁 𑀬𑀓𑁆𑀔𑀲𑁆𑀲 𑀤𑁂𑀳𑀻’’𑀢𑀺 𑀧𑁂𑀲𑁂𑀢𑀺. 𑀢𑀁 𑀭𑀼𑀓𑁆𑀔𑀫𑀽𑀮𑀁 𑀧𑀯𑀺𑀝𑁆𑀞𑀫𑀢𑁆𑀢𑀁𑀬𑁂𑀯 𑀬𑀓𑁆𑀔𑁄 𑀪𑁂𑀭𑀯𑀁 𑀅𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀽𑀮𑀓𑀦𑁆𑀤𑀁 𑀯𑀺𑀬 𑀔𑀸𑀤𑀺. 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀓𑀺𑀭 𑀫𑀦𑀼𑀲𑁆𑀲𑀸𑀦𑀁 𑀓𑁂𑀲𑀸𑀤𑀻𑀦𑀺 𑀉𑀧𑀸𑀤𑀸𑀬 𑀲𑀓𑀮𑀲𑀭𑀻𑀭𑀁 𑀦𑀯𑀦𑀻𑀢𑀧𑀺𑀡𑁆𑀟𑀁 𑀯𑀺𑀬 𑀳𑁄𑀢𑀺, 𑀬𑀓𑁆𑀔𑀲𑁆𑀲 𑀪𑀢𑁆𑀢𑀁 𑀕𑀸𑀳𑀸𑀧𑁂𑀢𑀼𑀁 𑀕𑀢𑀧𑀼𑀭𑀺𑀲𑀸 𑀢𑀁 𑀤𑀺𑀲𑁆𑀯𑀸 𑀪𑀻𑀢𑀸 𑀬𑀣𑀸𑀫𑀺𑀢𑁆𑀢𑀁 𑀆𑀭𑁄𑀘𑁂𑀲𑀼𑀁. 𑀢𑀢𑁄 𑀧𑀪𑀼𑀢𑀺 ‘‘𑀭𑀸𑀚𑀸 𑀘𑁄𑀭𑁂 𑀕𑀳𑁂𑀢𑁆𑀯𑀸 𑀬𑀓𑁆𑀔𑀲𑁆𑀲 𑀤𑁂𑀢𑀻’’𑀢𑀺 𑀫𑀦𑀼𑀲𑁆𑀲𑀸 𑀘𑁄𑀭𑀓𑀫𑁆𑀫𑀢𑁄 𑀧𑀝𑀺𑀯𑀺𑀭𑀢𑀸. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀦𑀯𑀘𑁄𑀭𑀸𑀦𑀁 𑀅𑀪𑀸𑀯𑁂𑀦 𑀧𑀼𑀭𑀸𑀡𑀘𑁄𑀭𑀸𑀦𑀜𑁆𑀘 𑀧𑀭𑀺𑀓𑁆𑀔𑀬𑁂𑀦 𑀩𑀦𑁆𑀥𑀦𑀸𑀕𑀸𑀭𑀸𑀦𑀺 𑀲𑀼𑀜𑁆𑀜𑀸𑀦𑀺 𑀅𑀳𑁂𑀲𑀼𑀁.

𑀅𑀣 𑀦𑀕𑀭𑀕𑀼𑀢𑁆𑀢𑀺𑀓𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀥𑀦𑀁 𑀦𑀕𑀭𑀭𑀘𑁆𑀙𑀸𑀲𑀼 𑀙𑀟𑁆𑀟𑀸𑀧𑁂𑀲𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀓𑁄𑀘𑀺 𑀮𑁄𑀪𑁂𑀦 𑀕𑀡𑁆𑀳𑁂𑀬𑁆𑀬𑀸’’𑀢𑀺. 𑀢𑀁 𑀧𑀸𑀤𑁂𑀦𑀧𑀺 𑀓𑁄𑀘𑀺 𑀦𑀘𑁆𑀙𑀼𑀧𑀺. 𑀲𑁄 𑀘𑁄𑀭𑁂 𑀅𑀮𑀪𑀦𑁆𑀢𑁄 𑀅𑀫𑀘𑁆𑀘𑀸𑀦𑀁 𑀆𑀭𑁄𑀘𑁂𑀲𑀺. 𑀅𑀫𑀘𑁆𑀘𑀸 ‘‘𑀓𑀼𑀮𑀧𑀝𑀺𑀧𑀸𑀝𑀺𑀬𑀸 𑀏𑀓𑀫𑁂𑀓𑀁 𑀚𑀺𑀡𑁆𑀡𑀓𑀁 𑀧𑁂𑀲𑁂𑀫, 𑀲𑁄 𑀧𑀓𑀢𑀺𑀬𑀸𑀧𑀺 𑀫𑀘𑁆𑀘𑀼𑀧𑀣𑁂 𑀯𑀢𑁆𑀢𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 ‘‘𑀅𑀫𑁆𑀳𑀸𑀓𑀁 𑀧𑀺𑀢𑀭𑀁 𑀅𑀫𑁆𑀳𑀸𑀓𑀁 𑀧𑀺𑀢𑀸𑀫𑀳𑀁 𑀧𑁂𑀲𑁂𑀢𑀻𑀢𑀺 𑀫𑀦𑀼𑀲𑁆𑀲𑀸 𑀔𑁄𑀪𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀫𑀸 𑀯𑁄 𑀏𑀢𑀁 𑀭𑀼𑀘𑁆𑀘𑀻’’𑀢𑀺 𑀯𑀸𑀭𑁂𑀲𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀤𑀸𑀭𑀓𑀁 𑀧𑁂𑀲𑁂𑀫 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀁, 𑀢𑀣𑀸𑀯𑀺𑀥𑀲𑁆𑀲 𑀳𑀺 ‘𑀫𑀸𑀢𑀸 𑀫𑁂’𑀢𑀺 ‘𑀧𑀺𑀢𑀸 𑀫𑁂’𑀢𑀺 𑀲𑀺𑀦𑁂𑀳𑁄 𑀦𑀢𑁆𑀣𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀅𑀦𑀼𑀚𑀸𑀦𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀦𑀕𑀭𑁂 𑀤𑀸𑀭𑀓𑀫𑀸𑀢𑀭𑁄 𑀘 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀩𑁆𑀪𑀺𑀦𑀺𑀬𑁄 𑀘 𑀧𑀮𑀸𑀬𑀺𑀢𑁆𑀯𑀸 𑀧𑀭𑀚𑀦𑀧𑀤𑁂 𑀤𑀸𑀭𑀓𑁂 𑀲𑀁𑀯𑀟𑁆𑀠𑁂𑀢𑁆𑀯𑀸 𑀆𑀦𑁂𑀦𑁆𑀢𑀺. 𑀏𑀯𑀁 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀕𑀢𑀸𑀦𑀺.

𑀢𑀢𑁄 𑀏𑀓𑀤𑀺𑀯𑀲𑀁 𑀲𑀓𑀮𑀦𑀕𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑁆𑀧𑀺 𑀤𑀸𑀭𑀓𑀁 𑀅𑀮𑀪𑀺𑀢𑁆𑀯𑀸 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑁋 ‘‘𑀦𑀢𑁆𑀣𑀺, 𑀤𑁂𑀯, 𑀦𑀕𑀭𑁂 𑀤𑀸𑀭𑀓𑁄 𑀞𑀧𑁂𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑁂 𑀢𑀯 𑀧𑀼𑀢𑁆𑀢𑀁 𑀆𑀴𑀯𑀓𑀓𑀼𑀫𑀸𑀭’’𑀦𑁆𑀢𑀺. 𑀭𑀸𑀚𑀸 ‘‘𑀬𑀣𑀸 𑀫𑀫 𑀧𑀼𑀢𑁆𑀢𑁄 𑀧𑀺𑀬𑁄, 𑀏𑀯𑀁 𑀲𑀩𑁆𑀩𑀮𑁄𑀓𑀲𑁆𑀲, 𑀅𑀢𑁆𑀢𑀦𑀸 𑀧𑀦 𑀧𑀺𑀬𑀢𑀭𑀁 𑀦𑀢𑁆𑀣𑀺, 𑀕𑀘𑁆𑀙𑀣 𑀢𑀫𑁆𑀧𑀺 𑀤𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁 𑀭𑀓𑁆𑀔𑀣𑀸’’𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀆𑀴𑀯𑀓𑀲𑁆𑀲 𑀫𑀸𑀢𑀸 𑀧𑀼𑀢𑁆𑀢𑀁 𑀦𑁆𑀳𑀸𑀧𑁂𑀢𑁆𑀯𑀸 𑀫𑀡𑁆𑀟𑁂𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀓𑀢𑁆𑀯𑀸 𑀅𑀗𑁆𑀓𑁂 𑀲𑀬𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀢𑀺. 𑀭𑀸𑀚𑀧𑀼𑀭𑀺𑀲𑀸 𑀭𑀜𑁆𑀜𑁄 𑀆𑀡𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀮𑀧𑀦𑁆𑀢𑀺𑀬𑀸 𑀢𑀲𑁆𑀲𑀸 𑀲𑁄𑀴𑀲𑀦𑁆𑀦𑀜𑁆𑀘 𑀤𑁂𑀯𑀺𑀲𑀳𑀲𑁆𑀲𑀸𑀦𑀁 𑀲𑀤𑁆𑀥𑀺𑀁 𑀥𑀸𑀢𑀺𑀬𑀸 𑀢𑀁 𑀆𑀤𑀸𑀬 𑀧𑀓𑁆𑀓𑀫𑀺𑀁𑀲𑀼, ‘‘𑀲𑁆𑀯𑁂 𑀬𑀓𑁆𑀔𑀪𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀁𑀤𑀺𑀯𑀲𑀜𑁆𑀘 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀚𑁂𑀢𑀯𑀦𑀯𑀺𑀳𑀸𑀭𑁂 𑀕𑀦𑁆𑀥𑀓𑀼𑀝𑀺𑀬𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀆𑀴𑀯𑀓𑀲𑁆𑀲 𑀓𑀼𑀫𑀸𑀭𑀲𑁆𑀲 𑀅𑀦𑀸𑀕𑀸𑀫𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀁 𑀬𑀓𑁆𑀔𑀲𑁆𑀲 𑀘 𑀲𑁄𑀢𑀸𑀧𑀢𑁆𑀢𑀺𑀨𑀮𑀼𑀧𑁆𑀧𑀢𑁆𑀢𑀺𑀬𑀸, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲𑀸𑀢𑀺. 𑀲𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀼𑀭𑀺𑀫𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀼𑀦𑀺𑀝𑁆𑀞𑀺𑀢𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑁄 𑀓𑀸𑀴𑀧𑀓𑁆𑀔𑀽𑀧𑁄𑀲𑀣𑀤𑀺𑀯𑀲𑁂 𑀯𑀢𑁆𑀢𑀫𑀸𑀦𑁂 𑀑𑀕𑁆𑀕𑀢𑁂 𑀲𑀽𑀭𑀺𑀬𑁂 𑀏𑀓𑁄 𑀅𑀤𑀼𑀢𑀺𑀬𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀸𑀤𑀫𑀕𑁆𑀕𑁂𑀦𑁂𑀯 𑀲𑀸𑀯𑀢𑁆𑀣𑀺𑀢𑁄 𑀢𑀺𑀁𑀲 𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑀁 𑀧𑀸𑀯𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂’’𑀢𑀺.

𑀓𑀺𑀁 𑀧𑀦 𑀪𑀕𑀯𑀸 𑀬𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑁂 𑀆𑀴𑀯𑀓𑀲𑁆𑀲 𑀪𑀯𑀦𑀁, 𑀢𑀲𑁆𑀲 𑀫𑀽𑀮𑁂 𑀯𑀺𑀳𑀸𑀲𑀺, 𑀉𑀤𑀸𑀳𑀼 𑀪𑀯𑀦𑁂𑀬𑁂𑀯𑀸𑀢𑀺? 𑀪𑀯𑀦𑁂𑀬𑁂𑀯. 𑀬𑀣𑁂𑀯 𑀳𑀺 𑀬𑀓𑁆𑀔𑀸 𑀅𑀢𑁆𑀢𑀦𑁄 𑀪𑀯𑀦𑀁 𑀧𑀲𑁆𑀲𑀦𑁆𑀢𑀺, 𑀢𑀣𑀸 𑀪𑀕𑀯𑀸𑀧𑀺. 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀯𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀢𑀤𑀸 𑀆𑀴𑀯𑀓𑁄 𑀳𑀺𑀫𑀯𑀦𑁆𑀢𑁂 𑀬𑀓𑁆𑀔𑀲𑀫𑀸𑀕𑀫𑀁 𑀕𑀢𑁄 𑀳𑁄𑀢𑀺. 𑀢𑀢𑁄 𑀆𑀴𑀯𑀓𑀲𑁆𑀲 𑀤𑁆𑀯𑀸𑀭𑀧𑀸𑀮𑁄 𑀕𑀤𑁆𑀭𑀪𑁄 𑀦𑀸𑀫 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀓𑀺𑀁, 𑀪𑀦𑁆𑀢𑁂, 𑀪𑀕𑀯𑀸 𑀯𑀺𑀓𑀸𑀮𑁂 𑀆𑀕𑀢𑁄’’𑀢𑀺 𑀆𑀳. 𑀆𑀫, 𑀕𑀤𑁆𑀭𑀪, 𑀆𑀕𑀢𑁄𑀫𑁆𑀳𑀺, 𑀲𑀘𑁂 𑀢𑁂 𑀅𑀕𑀭𑀼, 𑀯𑀺𑀳𑀭𑁂𑀬𑁆𑀬𑀸𑀫𑁂𑀓𑀭𑀢𑁆𑀢𑀁 𑀆𑀴𑀯𑀓𑀲𑁆𑀲 𑀪𑀯𑀦𑁂𑀢𑀺. 𑀦 𑀫𑁂, 𑀪𑀦𑁆𑀢𑁂, 𑀕𑀭𑀼, 𑀅𑀧𑀺𑀘 𑀔𑁄 𑀲𑁄 𑀬𑀓𑁆𑀔𑁄 𑀓𑀓𑁆𑀔𑀴𑁄 𑀨𑀭𑀼𑀲𑁄, 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀦 𑀓𑀭𑁄𑀢𑀺, 𑀫𑀸 𑀭𑀼𑀘𑁆𑀘𑀺 𑀪𑀕𑀯𑀢𑁄 𑀇𑀥 𑀯𑀸𑀲𑁄𑀢𑀺. 𑀚𑀸𑀦𑀸𑀫𑀺, 𑀕𑀤𑁆𑀭𑀪, 𑀢𑀲𑁆𑀲 𑀲𑀪𑀸𑀯𑀁, 𑀦 𑀓𑁄𑀘𑀺 𑀫𑀫𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀢𑁂 𑀅𑀕𑀭𑀼, 𑀯𑀺𑀳𑀭𑁂𑀬𑁆𑀬𑀸𑀫𑁂𑀓𑀭𑀢𑁆𑀢𑀦𑁆𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀕𑀤𑁆𑀭𑀪𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀕𑁆𑀕𑀺𑀢𑀢𑁆𑀢𑀓𑀧𑀸𑀮𑀲𑀤𑀺𑀲𑁄, 𑀪𑀦𑁆𑀢𑁂, 𑀆𑀴𑀯𑀓𑁄, 𑀫𑀸𑀢𑀸𑀧𑀺𑀢𑀭𑁄𑀢𑀺 𑀯𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀯𑀸 𑀥𑀫𑁆𑀫𑁄𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀇𑀥𑀸𑀕𑀢𑀸𑀦𑀁 𑀧𑀦 𑀘𑀺𑀢𑁆𑀢𑀓𑁆𑀔𑁂𑀧𑀫𑁆𑀧𑀺 𑀓𑀭𑁄𑀢𑀺, 𑀳𑀤𑀬𑀫𑁆𑀧𑀺 𑀨𑀸𑀮𑁂𑀢𑀺, 𑀧𑀸𑀤𑁂𑀧𑀺 𑀕𑀳𑁂𑀢𑁆𑀯𑀸 𑀧𑀭𑀲𑀫𑀼𑀤𑁆𑀤𑀁 𑀯𑀸 𑀧𑀭𑀘𑀓𑁆𑀓𑀯𑀸𑀴𑀁 𑀯𑀸 𑀔𑀺𑀧𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀪𑀕𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀺, 𑀕𑀤𑁆𑀭𑀪, 𑀲𑀘𑁂𑀧𑀺 𑀢𑁂 𑀅𑀕𑀭𑀼, 𑀯𑀺𑀳𑀭𑁂𑀬𑁆𑀬𑀸𑀫𑁂𑀓𑀭𑀢𑁆𑀢’’𑀦𑁆𑀢𑀺. 𑀦 𑀫𑁂, 𑀪𑀦𑁆𑀢𑁂, 𑀕𑀭𑀼, 𑀅𑀧𑀺𑀘 𑀔𑁄 𑀲𑁄 𑀬𑀓𑁆𑀔𑁄 𑀅𑀢𑁆𑀢𑀦𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 𑀅𑀦𑀼𑀚𑀸𑀦𑀦𑁆𑀢𑀁 𑀫𑀁 𑀚𑀻𑀯𑀺𑀢𑀸𑀧𑀺 𑀯𑁄𑀭𑁄𑀧𑁂𑀬𑁆𑀬, 𑀆𑀭𑁄𑀘𑁂𑀫𑀺, 𑀪𑀦𑁆𑀢𑁂, 𑀢𑀲𑁆𑀲𑀸𑀢𑀺. 𑀬𑀣𑀸𑀲𑀼𑀔𑀁, 𑀕𑀤𑁆𑀭𑀪, 𑀆𑀭𑁄𑀘𑁂𑀳𑀻𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀢𑁆𑀯𑀫𑁂𑀯 𑀚𑀸𑀦𑀸𑀳𑀻’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑁄 𑀧𑀓𑁆𑀓𑀸𑀫𑀺. 𑀪𑀯𑀦𑀤𑁆𑀯𑀸𑀭𑀫𑁆𑀧𑀺 𑀲𑀬𑀫𑁂𑀯 𑀪𑀕𑀯𑀢𑁄 𑀯𑀺𑀯𑀭𑀫𑀤𑀸𑀲𑀺. 𑀪𑀕𑀯𑀸 𑀅𑀦𑁆𑀢𑁄𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀬𑀢𑁆𑀣 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀫𑀗𑁆𑀕𑀮𑀤𑀺𑀯𑀲𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀆𑀴𑀯𑀓𑁄 𑀲𑀺𑀭𑀺𑀁 𑀅𑀦𑀼𑀪𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀤𑀺𑀩𑁆𑀩𑀭𑀢𑀦𑀫𑀬𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀸𑀪𑀁 𑀫𑀼𑀜𑁆𑀘𑀺. 𑀢𑀁 𑀤𑀺𑀲𑁆𑀯𑀸 𑀬𑀓𑁆𑀔𑀲𑁆𑀲 𑀇𑀢𑁆𑀣𑀺𑀬𑁄 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀪𑀕𑀯𑀸 ‘‘𑀧𑀼𑀩𑁆𑀩𑁂 𑀢𑀼𑀫𑁆𑀳𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀽𑀚𑀦𑁂𑀬𑁆𑀬𑀁 𑀧𑀽𑀚𑁂𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀸, 𑀇𑀤𑀸𑀦𑀺𑀧𑀺 𑀢𑀣𑁂𑀯 𑀓𑀭𑁄𑀣, 𑀫𑀸 𑀅𑀜𑁆𑀜𑀫𑀜𑁆𑀜𑀁 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀪𑀺𑀪𑀽𑀢𑀸 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀸𑀲𑀁 𑀧𑀓𑀺𑀡𑁆𑀡𑀓𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑀸 𑀪𑀕𑀯𑀢𑁄 𑀫𑀥𑀼𑀭𑀦𑀺𑀕𑁆𑀖𑁄𑀲𑀁 𑀲𑀼𑀢𑁆𑀯𑀸 𑀲𑀸𑀥𑀼𑀓𑀸𑀭𑀲𑀳𑀲𑁆𑀲𑀸𑀦𑀺 𑀤𑀢𑁆𑀯𑀸 𑀪𑀕𑀯𑀦𑁆𑀢𑀁 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼𑀬𑁂𑀯. 𑀕𑀤𑁆𑀭𑀪𑁄𑀧𑀺 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀆𑀴𑀯𑀓𑀲𑁆𑀲𑀸𑀭𑁄𑀘𑁂𑀲𑀺 𑁋 ‘‘𑀬𑀕𑁆𑀖𑁂, 𑀫𑀸𑀭𑀺𑀲, 𑀚𑀸𑀦𑁂𑀬𑁆𑀬𑀸𑀲𑀺 𑀯𑀺𑀫𑀸𑀦𑁂 𑀢𑁂 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺. 𑀲𑁄 𑀕𑀤𑁆𑀭𑀪𑀲𑁆𑀲 𑀲𑀜𑁆𑀜𑀁 𑀅𑀓𑀸𑀲𑀺 ‘‘𑀢𑀼𑀡𑁆𑀳𑀻 𑀳𑁄𑀳𑀺, 𑀕𑀦𑁆𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀧𑀼𑀭𑀺𑀲𑀫𑀸𑀦𑁂𑀦 𑀓𑀺𑀭 𑀮𑀚𑁆𑀚𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀫𑀸 𑀓𑁄𑀘𑀺 𑀧𑀭𑀺𑀲𑀫𑀚𑁆𑀛𑁂 𑀲𑀼𑀡𑁂𑀬𑁆𑀬𑀸’’𑀢𑀺 𑀏𑀯𑀫𑀓𑀸𑀲𑀺.

𑀢𑀤𑀸 𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸 𑀪𑀕𑀯𑀦𑁆𑀢𑀁 𑀚𑁂𑀢𑀯𑀦𑁂𑀬𑁂𑀯 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀓𑁆𑀔𑀲𑀫𑀸𑀕𑀫𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀧𑀭𑀺𑀯𑀸𑀭𑀸 𑀦𑀸𑀦𑀸𑀬𑀸𑀦𑁂𑀳𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺. 𑀆𑀓𑀸𑀲𑁂 𑀘 𑀬𑀓𑁆𑀔𑀸𑀦𑀁 𑀲𑀩𑁆𑀩𑀢𑁆𑀣 𑀫𑀕𑁆𑀕𑁄 𑀦𑀢𑁆𑀣𑀺, 𑀆𑀓𑀸𑀲𑀝𑁆𑀞𑀸𑀦𑀺 𑀯𑀺𑀫𑀸𑀦𑀸𑀦𑀺 𑀧𑀭𑀺𑀳𑀭𑀺𑀢𑁆𑀯𑀸 𑀫𑀕𑁆𑀕𑀝𑁆𑀞𑀸𑀦𑁂𑀦𑁂𑀯 𑀫𑀕𑁆𑀕𑁄 𑀳𑁄𑀢𑀺. 𑀆𑀴𑀯𑀓𑀲𑁆𑀲 𑀧𑀦 𑀯𑀺𑀫𑀸𑀦𑀁 𑀪𑀽𑀫𑀝𑁆𑀞𑀁 𑀲𑀼𑀕𑀼𑀢𑁆𑀢𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀼𑀲𑀁𑀯𑀺𑀳𑀺𑀢𑀤𑁆𑀯𑀸𑀭𑀅𑀝𑁆𑀝𑀸𑀮𑀓𑀕𑁄𑀧𑀼𑀭𑀁 𑀉𑀧𑀭𑀺 𑀓𑀁𑀲𑀚𑀸𑀮𑀲𑀜𑁆𑀙𑀦𑁆𑀦𑀁 𑀫𑀜𑁆𑀚𑀽𑀲𑀲𑀤𑀺𑀲𑀁 𑀢𑀺𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦, 𑀢𑀲𑁆𑀲 𑀉𑀧𑀭𑀺 𑀫𑀕𑁆𑀕𑁄 𑀳𑁄𑀢𑀺. 𑀢𑁂 𑀢𑀁 𑀧𑀤𑁂𑀲𑀫𑀸𑀕𑀫𑁆𑀫 𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀩𑀼𑀤𑁆𑀥𑀸𑀦𑀁 𑀳𑀺 𑀦𑀺𑀲𑀺𑀦𑁆𑀦𑁄𑀓𑀸𑀲𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀬𑀸𑀯 𑀪𑀯𑀕𑁆𑀕𑀸 𑀓𑁄𑀘𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂 ‘‘𑀓𑀺𑀫𑀺𑀤’’𑀦𑁆𑀢𑀺? 𑀆𑀯𑀚𑁆𑀚𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀆𑀓𑀸𑀲𑁂 𑀔𑀺𑀢𑁆𑀢𑀮𑁂𑀟𑁆𑀟𑀼 𑀯𑀺𑀬 𑀑𑀭𑀼𑀬𑁆𑀳 𑀯𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, ‘‘𑀬𑀓𑁆𑀔𑀲𑀫𑀸𑀕𑀫𑀁 𑀕𑀘𑁆𑀙𑀸𑀫 𑀪𑀕𑀯𑀸’’𑀢𑀺 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀧𑀲𑀁𑀲𑀦𑁆𑀢𑀸 𑀬𑀓𑁆𑀔𑀲𑀫𑀸𑀕𑀫𑀁 𑀅𑀕𑀫𑀁𑀲𑀼. 𑀆𑀴𑀯𑀓𑁄 𑀢𑁂 𑀤𑀺𑀲𑁆𑀯𑀸, ‘‘𑀇𑀥 𑀦𑀺𑀲𑀻𑀤𑀣𑀸’’𑀢𑀺 𑀧𑀝𑀺𑀓𑁆𑀓𑀫𑁆𑀫 𑀑𑀓𑀸𑀲𑀫𑀤𑀸𑀲𑀺. 𑀢𑁂 𑀆𑀴𑀯𑀓𑀲𑁆𑀲 𑀦𑀺𑀯𑁂𑀤𑁂𑀲𑀼𑀁 𑁋 ‘‘𑀮𑀸𑀪𑀸 𑀢𑁂, 𑀆𑀴𑀯𑀓, 𑀬𑀲𑁆𑀲 𑀢𑁂 𑀪𑀯𑀦𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀕𑀘𑁆𑀙𑀸𑀯𑀼𑀲𑁄, 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀲𑁆𑀲𑀽’’𑀢𑀺. 𑀏𑀯𑀁 𑀪𑀕𑀯𑀸 𑀪𑀯𑀦𑁂𑀬𑁂𑀯 𑀯𑀺𑀳𑀸𑀲𑀺, 𑀦 𑀬𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑁂 𑀆𑀴𑀯𑀓𑀲𑁆𑀲 𑀪𑀯𑀦𑀁, 𑀢𑀲𑁆𑀲 𑀫𑀽𑀮𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂’’𑀢𑀺.

𑀅𑀣 𑀔𑁄 𑀆𑀴𑀯𑀓𑁄…𑀧𑁂… 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀫, 𑀲𑀫𑀡𑀸’’𑀢𑀺 𑀓𑀲𑁆𑀫𑀸 𑀧𑀦𑀸𑀬𑀁 𑀏𑀢𑀤𑀯𑁄𑀘? 𑀭𑁄𑀲𑁂𑀢𑀼𑀓𑀸𑀫𑀢𑀸𑀬. 𑀢𑀢𑁆𑀭𑁂𑀯𑀁 𑀆𑀤𑀺𑀢𑁄 𑀧𑀪𑀼𑀢𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀅𑀬𑀁 𑀳𑀺 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑀲𑁆𑀲 𑀲𑀤𑁆𑀥𑀸𑀓𑀣𑀸 𑀤𑀼𑀓𑁆𑀓𑀣𑀸 𑀳𑁄𑀢𑀺 𑀤𑀼𑀲𑁆𑀲𑀻𑀮𑀸𑀤𑀻𑀦𑀁 𑀲𑀻𑀮𑀸𑀤𑀺𑀓𑀣𑀸 𑀯𑀺𑀬, 𑀢𑀲𑁆𑀫𑀸 𑀢𑁂𑀲𑀁 𑀬𑀓𑁆𑀔𑀸𑀦𑀁 𑀲𑀦𑁆𑀢𑀺𑀓𑀸 𑀪𑀕𑀯𑀢𑁄 𑀧𑀲𑀁𑀲𑀁 𑀲𑀼𑀢𑁆𑀯𑀸𑀬𑁂𑀯 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀓𑁄𑀧𑁂𑀦 𑀢𑀝𑀢𑀝𑀸𑀬𑀫𑀸𑀦𑀳𑀤𑀬𑁄 𑀳𑀼𑀢𑁆𑀯𑀸 ‘‘𑀓𑁄 𑀲𑁄 𑀪𑀕𑀯𑀸 𑀦𑀸𑀫, 𑀬𑁄 𑀫𑀫 𑀪𑀯𑀦𑀁 𑀧𑀯𑀺𑀝𑁆𑀞𑁄’’𑀢𑀺 𑀆𑀳. 𑀢𑁂 𑀅𑀳𑀁𑀲𑀼 𑁋 ‘‘𑀦 𑀢𑁆𑀯𑀁, 𑀆𑀯𑀼𑀲𑁄, 𑀚𑀸𑀦𑀸𑀲𑀺 𑀪𑀕𑀯𑀦𑁆𑀢𑀁 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁, 𑀬𑁄 𑀢𑀼𑀲𑀺𑀢𑀪𑀯𑀦𑁂 𑀞𑀺𑀢𑁄 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀺𑀢𑀁 𑀯𑀺𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀯 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀸 𑀓𑀣𑁂𑀦𑁆𑀢𑀸 𑀧𑀝𑀺𑀲𑀦𑁆𑀥𑀺𑀆𑀤𑀻𑀲𑀼 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀯𑀢𑁆𑀯𑀸, ‘‘𑀇𑀫𑀸𑀦𑀺𑀧𑀺 𑀢𑁆𑀯𑀁, 𑀆𑀯𑀼𑀲𑁄, 𑀅𑀘𑁆𑀙𑀭𑀺𑀬𑀸𑀦𑀺 𑀦𑀸𑀤𑁆𑀤𑀲𑀸’’𑀢𑀺? 𑀘𑁄𑀤𑁂𑀲𑀼𑀁. 𑀲𑁄 𑀤𑀺𑀲𑁆𑀯𑀸𑀧𑀺 𑀓𑁄𑀥𑀯𑀲𑁂𑀦 ‘‘𑀦𑀸𑀤𑁆𑀤𑀲’’𑀦𑁆𑀢𑀺 𑀆𑀳. 𑀆𑀯𑀼𑀲𑁄 𑀆𑀴𑀯𑀓, 𑀧𑀲𑁆𑀲𑁂𑀬𑁆𑀬𑀸𑀲𑀺 𑀯𑀸 𑀢𑁆𑀯𑀁, 𑀦 𑀯𑀸, 𑀓𑁄 𑀢𑀬𑀸 𑀅𑀢𑁆𑀣𑁄 𑀧𑀲𑁆𑀲𑀢𑀸 𑀯𑀸 𑀅𑀧𑀲𑁆𑀲𑀢𑀸 𑀯𑀸? 𑀓𑀺𑀁 𑀢𑁆𑀯𑀁 𑀓𑀭𑀺𑀲𑁆𑀲𑀲𑀺 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄, 𑀬𑁄 𑀢𑁆𑀯𑀁 𑀢𑀁 𑀉𑀧𑀦𑀺𑀥𑀸𑀬 𑀘𑀮𑀓𑁆𑀓𑀓𑀼𑀥-𑀫𑀳𑀸𑀉𑀲𑀪𑀲𑀫𑀻𑀧𑁂 𑀢𑀤𑀳𑀼𑀚𑀸𑀢𑀯𑀘𑁆𑀙𑀓𑁄 𑀯𑀺𑀬, 𑀢𑀺𑀥𑀸 𑀧𑀪𑀺𑀦𑁆𑀦𑀫𑀢𑁆𑀢𑀯𑀸𑀭𑀡𑀲𑀫𑀻𑀧𑁂 𑀪𑀺𑀗𑁆𑀓𑀧𑁄𑀢𑀓𑁄 𑀯𑀺𑀬, 𑀪𑀸𑀲𑀼𑀭𑀯𑀺𑀮𑀫𑁆𑀩𑀺𑀢𑀓𑁂𑀲𑀭𑀲𑁄𑀪𑀺𑀢𑀓𑁆𑀔𑀦𑁆𑀥𑀲𑁆𑀲 𑀫𑀺𑀕𑀭𑀜𑁆𑀜𑁄 𑀲𑀫𑀻𑀧𑁂 𑀚𑀭𑀲𑀺𑀗𑁆𑀕𑀸𑀮𑁄 𑀯𑀺𑀬, 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑀯𑀟𑁆𑀠𑀓𑀸𑀬𑀲𑀼𑀧𑀡𑁆𑀡𑀭𑀸𑀚𑀲𑀫𑀻𑀧𑁂 𑀙𑀺𑀦𑁆𑀦𑀧𑀓𑁆𑀔𑀓𑀸𑀓𑀧𑁄𑀢𑀓𑁄 𑀯𑀺𑀬 𑀔𑀸𑀬𑀲𑀺, 𑀕𑀘𑁆𑀙 𑀬𑀁 𑀢𑁂 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀤𑀼𑀝𑁆𑀞𑁄 𑀆𑀴𑀯𑀓𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀯𑀸𑀫𑀧𑀸𑀤𑁂𑀦 𑀞𑀢𑁆𑀯𑀸 𑁋 ‘‘𑀧𑀲𑁆𑀲𑀣 𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀯𑀸 𑀲𑀢𑁆𑀣𑀸 𑀫𑀳𑀸𑀦𑀼𑀪𑀸𑀯𑁄, 𑀅𑀳𑀁 𑀯𑀸’’𑀢𑀺 𑀤𑀓𑁆𑀔𑀺𑀡𑀧𑀸𑀤𑁂𑀦 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑀁 𑀓𑁂𑀮𑀸𑀲𑀧𑀩𑁆𑀩𑀢𑀓𑀽𑀝𑀁 𑀅𑀓𑁆𑀓𑀫𑀺. 𑀢𑀁 𑀅𑀬𑁄𑀓𑀽𑀝𑀧𑀳𑀝𑁄 𑀯𑀺𑀬 𑀦𑀺𑀤𑁆𑀥𑀦𑁆𑀢𑀅𑀬𑁄𑀧𑀺𑀡𑁆𑀟𑁄 𑀧𑀧𑀝𑀺𑀓𑀸𑀬𑁄 𑀫𑀼𑀜𑁆𑀘𑀺, 𑀲𑁄 𑀢𑀢𑁆𑀭 𑀞𑀢𑁆𑀯𑀸, ‘‘𑀅𑀳𑀁 𑀆𑀴𑀯𑀓𑁄’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀤𑁆𑀤𑁄 𑀨𑀭𑀺.

𑀘𑀢𑁆𑀢𑀸𑀭𑁄 𑀓𑀺𑀭 𑀲𑀤𑁆𑀤𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀽𑀬𑀺𑀁𑀲𑀼 𑁋 𑀬𑀜𑁆𑀘 𑀧𑀼𑀡𑁆𑀡𑀓𑁄 𑀬𑀓𑁆𑀔𑀲𑁂𑀦𑀸𑀧𑀢𑀺 𑀥𑀦𑀜𑁆𑀚𑀬𑀓𑁄𑀭𑀩𑁆𑀬𑀭𑀸𑀚𑀸𑀦𑀁 𑀚𑀽𑀢𑀁 𑀚𑀺𑀦𑀺𑀢𑁆𑀯𑀸 𑀅𑀧𑁆𑀨𑁄𑀝𑁂𑀢𑁆𑀯𑀸 ‘‘𑀅𑀳𑀁 𑀚𑀺𑀦𑀺’’𑀦𑁆𑀢𑀺 𑀉𑀕𑁆𑀖𑁄𑀲𑁂𑀲𑀺; 𑀬𑀜𑁆𑀘 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀓𑀲𑁆𑀲𑀧𑀪𑀕𑀯𑀢𑁄 𑀲𑀸𑀲𑀦𑁂 𑀑𑀲𑀓𑁆𑀓𑀦𑁆𑀢𑁂 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀲𑀼𑀦𑀔𑀁 𑀓𑀭𑀺𑀢𑁆𑀯𑀸 𑁋 ‘‘𑀅𑀳𑀁 𑀧𑀸𑀧𑀪𑀺𑀓𑁆𑀔𑀽 𑀘 𑀧𑀸𑀧𑀪𑀺𑀓𑁆𑀔𑀼𑀦𑀺𑀬𑁄 𑀘 𑀉𑀧𑀸𑀲𑀓𑁂 𑀘 𑀉𑀧𑀸𑀲𑀺𑀓𑀸𑀬𑁄 𑀘 𑀲𑀩𑁆𑀩𑁂𑀯 𑀘 𑀅𑀥𑀫𑁆𑀫𑀯𑀸𑀤𑀺𑀦𑁄 𑀔𑀸𑀤𑀸𑀫𑀻’’𑀢𑀺 𑀉𑀕𑁆𑀖𑁄𑀲𑀸𑀧𑁂𑀲𑀺; 𑀬𑀜𑁆𑀘 𑀓𑀼𑀲𑀚𑀸𑀢𑀓𑁂 𑀧𑀪𑀸𑀯𑀢𑀺𑀳𑁂𑀢𑀼 𑀲𑀢𑁆𑀢𑀳𑀺 𑀭𑀸𑀚𑀽𑀳𑀺 𑀦𑀕𑀭𑁂 𑀉𑀧𑀭𑀼𑀤𑁆𑀥𑁂 𑀧𑀪𑀸𑀯𑀢𑀺𑀁 𑀅𑀢𑁆𑀢𑀦𑀸 𑀲𑀳 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀆𑀭𑁄𑀧𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑁋 ‘‘𑀅𑀳𑀁 𑀲𑀻𑀳𑀲𑁆𑀲𑀭𑀫𑀳𑀸𑀓𑀼𑀲𑀭𑀸𑀚𑀸’’𑀢𑀺 𑀫𑀳𑀸𑀧𑀼𑀭𑀺𑀲𑁄 𑀉𑀕𑁆𑀖𑁄𑀲𑁂𑀲𑀺; 𑀬𑀜𑁆𑀘 𑀓𑁂𑀮𑀸𑀲𑀫𑀼𑀤𑁆𑀥𑀦𑀺 𑀞𑀢𑁆𑀯𑀸 𑀆𑀴𑀯𑀓𑁄𑀢𑀺. 𑀢𑀤𑀸 𑀳𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀉𑀕𑁆𑀖𑁄𑀲𑀺𑀢𑀲𑀤𑀺𑀲𑀁 𑀅𑀳𑁄𑀲𑀺. 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁄 𑀘 𑀳𑀺𑀫𑀯𑀸𑀧𑀺 𑀲𑀗𑁆𑀓𑀫𑁆𑀧𑀺 𑀬𑀓𑁆𑀔𑀲𑁆𑀲𑀸𑀦𑀼𑀪𑀸𑀯𑁂𑀦.

𑀲𑁄 𑀯𑀸𑀢𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 𑁋 ‘‘𑀏𑀢𑁂𑀦𑁂𑀯 𑀲𑀫𑀡𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑁂 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀯𑀸𑀢𑀸 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀤𑀸𑀮𑁂𑀢𑁆𑀯𑀸 𑀯𑀦𑀕𑀘𑁆𑀙𑀭𑀼𑀓𑁆𑀔𑀸𑀤𑀻𑀦𑀺 𑀉𑀫𑁆𑀫𑀽𑀮𑀁 𑀓𑀢𑁆𑀯𑀸, 𑀆𑀴𑀯𑀺𑀦𑀕𑀭𑀁 𑀧𑀓𑁆𑀔𑀦𑁆𑀢𑀸 𑀚𑀺𑀡𑁆𑀡𑀳𑀢𑁆𑀣𑀺𑀲𑀸𑀮𑀸𑀤𑀻𑀦𑀺 𑀘𑀼𑀡𑁆𑀡𑁂𑀦𑁆𑀢𑀸 𑀙𑀤𑀦𑀺𑀝𑁆𑀞𑀓𑀸 𑀆𑀓𑀸𑀲𑁂 𑀯𑀺𑀥𑀫𑁂𑀦𑁆𑀢𑀸. 𑀪𑀕𑀯𑀸 ‘‘𑀫𑀸 𑀓𑀲𑁆𑀲𑀘𑀺 𑀉𑀧𑀭𑁄𑀥𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑁂 𑀯𑀸𑀢𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 𑀫𑀳𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. ‘‘𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀫𑀡𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑀸𑀤𑀺𑀪𑁂𑀤𑀸 𑀯𑀮𑀸𑀳𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀯𑀲𑁆𑀲𑀺𑀁𑀲𑀼. 𑀯𑀼𑀝𑁆𑀞𑀺𑀥𑀸𑀭𑀸𑀯𑁂𑀕𑁂𑀦 𑀧𑀣𑀯𑀻 𑀙𑀺𑀤𑁆𑀤𑀸 𑀅𑀳𑁄𑀲𑀺. 𑀯𑀦𑀭𑀼𑀓𑁆𑀔𑀸𑀤𑀻𑀦𑀁 𑀉𑀧𑀭𑀺 𑀫𑀳𑁄𑀖𑁄 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀘𑀻𑀯𑀭𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀢𑁂𑀫𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀧𑀸𑀲𑀸𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀫𑀳𑀦𑁆𑀢𑀸𑀦𑀺 𑀫𑀳𑀦𑁆𑀢𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀥𑀽𑀫𑀸𑀬𑀦𑁆𑀢𑀸𑀦𑀺 𑀧𑀚𑁆𑀚𑀮𑀦𑁆𑀢𑀸𑀦𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀤𑀺𑀩𑁆𑀩𑀫𑀸𑀮𑀸𑀕𑀼𑀴𑀸𑀦𑀺 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀧𑀳𑀭𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀏𑀓𑀢𑁄𑀥𑀸𑀭𑀸𑀉𑀪𑀢𑁄𑀥𑀸𑀭𑀸𑀅𑀲𑀺𑀲𑀢𑁆𑀢𑀺𑀔𑀼𑀭𑀧𑁆𑀧𑀸𑀤𑀬𑁄 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀅𑀗𑁆𑀕𑀸𑀭𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀓𑀺𑀁𑀲𑀼𑀓 𑀯𑀡𑁆𑀡𑀸 𑀅𑀗𑁆𑀕𑀸𑀭𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀯𑀺𑀓𑀻𑀭𑀬𑀺𑀁𑀲𑀼. 𑀢𑀢𑁄 𑀓𑀼𑀓𑁆𑀓𑀼𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀘𑁆𑀘𑀼𑀡𑁆𑀳𑀸 𑀓𑀼𑀓𑁆𑀓𑀼𑀮𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀘𑀦𑁆𑀤𑀦𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀯𑀸𑀮𑀺𑀓𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀢𑀺𑀲𑀼𑀔𑀼𑀫𑀯𑀸𑀮𑀺𑀓𑀸 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀓𑀮𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀁 𑀓𑀮𑀮𑀯𑀲𑁆𑀲𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀕𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺. 𑀢𑀢𑁄 𑀅𑀦𑁆𑀥𑀓𑀸𑀭𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀪𑀺𑀁𑀲𑁂𑀢𑁆𑀯𑀸 𑀲𑀫𑀡𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀥𑀓𑀸𑀭𑀲𑀤𑀺𑀲𑀁 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀯𑀺𑀳𑀢𑀫𑀺𑀯 𑀅𑀦𑁆𑀥𑀓𑀸𑀭𑀁 𑀅𑀦𑁆𑀢𑀭𑀥𑀸𑀬𑀺.

𑀏𑀯𑀁 𑀬𑀓𑁆𑀔𑁄 𑀇𑀫𑀸𑀳𑀺 𑀦𑀯𑀳𑀺 𑀯𑀸𑀢𑀯𑀲𑁆𑀲𑀧𑀸𑀲𑀸𑀡𑀧𑀳𑀭𑀡𑀗𑁆𑀕𑀸𑀭𑀓𑀼𑀓𑁆𑀓𑀼𑀮𑀯𑀸𑀮𑀺𑀓𑀓𑀮𑀮𑀦𑁆𑀥𑀓𑀸𑀭𑀯𑀼𑀝𑁆𑀞𑀻𑀳𑀺 𑀪𑀕𑀯𑀦𑁆𑀢𑀁 𑀧𑀮𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀸𑀦𑀸𑀯𑀺𑀥𑀧𑀳𑀭𑀡𑀳𑀢𑁆𑀣𑀸𑀬 𑀅𑀦𑁂𑀓𑀧𑁆𑀧𑀓𑀸𑀭𑀭𑀽𑀧𑀪𑀽𑀢𑀕𑀡𑀲𑀫𑀸𑀓𑀼𑀮𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀬𑀫𑁂𑀯 𑀪𑀕𑀯𑀦𑁆𑀢𑀁 𑀅𑀪𑀺𑀕𑀢𑁄. 𑀢𑁂 𑀪𑀽𑀢𑀕𑀡𑀸 𑀅𑀦𑁂𑀓𑀧𑁆𑀧𑀓𑀸𑀭𑁂 𑀯𑀺𑀓𑀸𑀭𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀳𑀦𑀣𑀸’’𑀢𑀺 𑀪𑀕𑀯𑀢𑁄 𑀉𑀧𑀭𑀺 𑀆𑀕𑀘𑁆𑀙𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀅𑀧𑀺𑀘 𑀔𑁄 𑀦𑀺𑀤𑁆𑀥𑀦𑁆𑀢𑀮𑁄𑀳𑀧𑀺𑀡𑁆𑀟𑀁 𑀯𑀺𑀬 𑀫𑀓𑁆𑀔𑀺𑀓𑀸, 𑀪𑀕𑀯𑀦𑁆𑀢𑀁 𑀅𑀮𑁆𑀮𑀻𑀬𑀺𑀢𑀼𑀁 𑀅𑀲𑀫𑀢𑁆𑀣𑀸𑀯 𑀅𑀳𑁂𑀲𑀼𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸 𑀩𑁄𑀥𑀺𑀫𑀡𑁆𑀟𑁂 𑀫𑀸𑀭𑁄 𑀆𑀕𑀢𑀯𑁂𑀮𑀸𑀬𑀫𑁂𑀯 𑀦𑀺𑀯𑀢𑁆𑀢𑁄, 𑀢𑀣𑀸 𑀅𑀦𑀺𑀯𑀢𑁆𑀢𑁂𑀢𑁆𑀯𑀸 𑀉𑀧𑀟𑁆𑀠𑀭𑀢𑁆𑀢𑀺𑀫𑀢𑁆𑀢𑀁 𑀩𑁆𑀬𑀸𑀓𑀼𑀮𑀫𑀓𑀁𑀲𑀼. 𑀏𑀯𑀁 𑀉𑀧𑀟𑁆𑀠𑀭𑀢𑁆𑀢𑀺𑀫𑀢𑁆𑀢𑀁 𑀅𑀦𑁂𑀓𑀧𑁆𑀧𑀓𑀸𑀭𑀯𑀺𑀪𑀺𑀁𑀲𑀦𑀓𑀤𑀲𑁆𑀲𑀦𑁂𑀦𑀧𑀺 𑀪𑀕𑀯𑀦𑁆𑀢𑀁 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀴𑀯𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀓𑁂𑀦𑀘𑀺 𑀅𑀚𑁂𑀬𑁆𑀬𑀁 𑀤𑀼𑀲𑁆𑀲𑀸𑀯𑀼𑀥𑀁 𑀫𑀼𑀜𑁆𑀘𑁂𑀬𑁆𑀬’’𑀦𑁆𑀢𑀺.

𑀘𑀢𑁆𑀢𑀸𑀭𑀺 𑀓𑀺𑀭 𑀆𑀯𑀼𑀥𑀸𑀦𑀺 𑀮𑁄𑀓𑁂 𑀲𑁂𑀝𑁆𑀞𑀸𑀦𑀺 𑁋 𑀲𑀓𑁆𑀓𑀲𑁆𑀲 𑀯𑀚𑀺𑀭𑀸𑀯𑀼𑀥𑀁, 𑀯𑁂𑀲𑁆𑀲𑀯𑀡𑀲𑁆𑀲 𑀕𑀤𑀸𑀯𑀼𑀥𑀁, 𑀬𑀫𑀲𑁆𑀲 𑀦𑀬𑀦𑀸𑀯𑀼𑀥𑀁, 𑀆𑀴𑀯𑀓𑀲𑁆𑀲 𑀤𑀼𑀲𑁆𑀲𑀸𑀯𑀼𑀥𑀦𑁆𑀢𑀺. 𑀬𑀤𑀺 𑀳𑀺 𑀲𑀓𑁆𑀓𑁄 𑀤𑀼𑀝𑁆𑀞𑁄 𑀯𑀚𑀺𑀭𑀸𑀯𑀼𑀥𑀁 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀧𑀳𑀭𑁂𑀬𑁆𑀬, 𑀅𑀝𑁆𑀞𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀬𑁄𑀚𑀦𑀲𑀢𑀲𑀳𑀲𑁆𑀲𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀳𑁂𑀝𑁆𑀞𑀢𑁄 𑀕𑀘𑁆𑀙𑁂𑀬𑁆𑀬. 𑀯𑁂𑀲𑁆𑀲𑀯𑀡𑁂𑀦 𑀓𑀼𑀚𑁆𑀛𑀦𑀓𑀸𑀮𑁂 𑀯𑀺𑀲𑁆𑀲𑀚𑁆𑀚𑀺𑀢𑀁 𑀕𑀤𑀸𑀯𑀼𑀥𑀁 𑀩𑀳𑀽𑀦𑀁 𑀬𑀓𑁆𑀔𑀲𑀳𑀲𑁆𑀲𑀸𑀦𑀁 𑀲𑀻𑀲𑀁 𑀧𑀸𑀢𑁂𑀢𑁆𑀯𑀸 𑀧𑀼𑀦 𑀳𑀢𑁆𑀣𑀧𑀸𑀲𑀁 𑀆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑀫𑁂𑀦 𑀤𑀼𑀝𑁆𑀞𑁂𑀦 𑀦𑀬𑀦𑀸𑀯𑀼𑀥𑁂𑀦 𑀑𑀮𑁄𑀓𑀺𑀢𑀫𑀢𑁆𑀢𑁂 𑀅𑀦𑁂𑀓𑀸𑀦𑀺 𑀓𑀼𑀫𑁆𑀪𑀡𑁆𑀟𑀲𑀳𑀲𑁆𑀲𑀸𑀦𑀺 𑀢𑀢𑁆𑀢𑀓𑀧𑀸𑀮𑁂 𑀢𑀺𑀮𑀸 𑀯𑀺𑀬 𑀨𑀭𑀦𑁆𑀢𑀸𑀦𑀺 𑀯𑀺𑀦𑀲𑁆𑀲𑀦𑁆𑀢𑀺. 𑀆𑀴𑀯𑀓𑁄 𑀤𑀼𑀝𑁆𑀞𑁄 𑀲𑀘𑁂 𑀆𑀓𑀸𑀲𑁂 𑀤𑀼𑀲𑁆𑀲𑀸𑀯𑀼𑀥𑀁 𑀫𑀼𑀜𑁆𑀘𑁂𑀬𑁆𑀬, 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑁂𑀬𑁆𑀬. 𑀲𑀘𑁂 𑀧𑀣𑀯𑀺𑀬𑀁 𑀫𑀼𑀜𑁆𑀘𑁂𑀬𑁆𑀬. 𑀲𑀩𑁆𑀩𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀺 𑀲𑀼𑀲𑁆𑀲𑀺𑀢𑁆𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀦𑁆𑀢𑀭𑁂 𑀦 𑀧𑀼𑀦 𑀯𑀺𑀭𑀼𑀳𑁂𑀬𑁆𑀬𑀼𑀁. 𑀲𑀘𑁂 𑀲𑀫𑀼𑀤𑁆𑀤𑁂 𑀫𑀼𑀜𑁆𑀘𑁂𑀬𑁆𑀬, 𑀢𑀢𑁆𑀢𑀓𑀧𑀸𑀮𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀫𑀼𑀤𑀓𑀁 𑀲𑀼𑀲𑁆𑀲𑁂𑀬𑁆𑀬. 𑀲𑀘𑁂 𑀲𑀺𑀦𑁂𑀭𑀼𑀲𑀤𑀺𑀲𑁂𑀧𑀺 𑀧𑀩𑁆𑀩𑀢𑁂 𑀫𑀼𑀜𑁆𑀘𑁂𑀬𑁆𑀬, 𑀔𑀡𑁆𑀟𑀸𑀔𑀡𑁆𑀟𑀁 𑀳𑀼𑀢𑁆𑀯𑀸 𑀯𑀺𑀓𑀺𑀭𑁂𑀬𑁆𑀬. 𑀲𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑀁 𑀤𑀼𑀲𑁆𑀲𑀸𑀯𑀼𑀥𑀁 𑀉𑀢𑁆𑀢𑀭𑀺𑀲𑀸𑀝𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀬𑁂𑀪𑀼𑀬𑁆𑀬𑁂𑀦 𑀤𑀲𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀤𑁂𑀯𑀢𑀸 𑀯𑁂𑀕𑁂𑀦 𑀲𑀦𑁆𑀦𑀺𑀧𑀢𑀺𑀁𑀲𑀼 ‘‘𑀅𑀚𑁆𑀚 𑀪𑀕𑀯𑀸 𑀆𑀴𑀯𑀓𑀁 𑀤𑀫𑁂𑀲𑁆𑀲𑀢𑀺, 𑀢𑀢𑁆𑀣 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀤𑀲𑁆𑀲𑀦𑀓𑀸𑀫𑀸𑀧𑀺 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀏𑀯𑀁 𑀲𑀓𑀮𑀫𑁆𑀧𑀺 𑀆𑀓𑀸𑀲𑀁 𑀤𑁂𑀯𑀢𑀸𑀳𑀺 𑀧𑀭𑀺𑀧𑀼𑀡𑁆𑀡𑀫𑀳𑁄𑀲𑀺.

𑀅𑀣 𑀆𑀴𑀯𑀓𑁄 𑀪𑀕𑀯𑀢𑁄 𑀲𑀫𑀻𑀧𑁂 𑀉𑀧𑀭𑀽𑀧𑀭𑀺 𑀯𑀺𑀘𑀭𑀺𑀢𑁆𑀯𑀸 𑀯𑀢𑁆𑀣𑀸𑀯𑀼𑀥𑀁 𑀫𑀼𑀜𑁆𑀘𑀺. 𑀢𑀁 𑀅𑀲𑀦𑀺𑀯𑀺𑀘𑀓𑁆𑀓𑀁 𑀯𑀺𑀬 𑀆𑀓𑀸𑀲𑁂 𑀪𑁂𑀭𑀯𑀲𑀤𑁆𑀤𑀁 𑀓𑀭𑁄𑀦𑁆𑀢𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀪𑀕𑀯𑀦𑁆𑀢𑀁 𑀧𑀢𑁆𑀯𑀸 𑀬𑀓𑁆𑀔𑀫𑀸𑀦𑀫𑀤𑁆𑀤𑀦𑀢𑁆𑀣𑀁 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀁 𑀳𑀼𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺. 𑀆𑀴𑀯𑀓𑁄 𑀢𑀁 𑀤𑀺𑀲𑁆𑀯𑀸 𑀙𑀺𑀦𑁆𑀦𑀯𑀺𑀲𑀸𑀡𑁄 𑀯𑀺𑀬 𑀉𑀲𑀪𑁄 𑀉𑀤𑁆𑀥𑀢𑀤𑀸𑀞𑁄 𑀯𑀺𑀬 𑀲𑀧𑁆𑀧𑁄 𑀦𑀺𑀢𑁆𑀢𑁂𑀚𑁄 𑀦𑀺𑀫𑁆𑀫𑀤𑁄 𑀦𑀺𑀧𑀢𑀺𑀢𑀫𑀸𑀦𑀤𑁆𑀥𑀚𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀤𑀼𑀲𑁆𑀲𑀸𑀯𑀼𑀥𑀫𑁆𑀧𑀺 𑀫𑁂 𑀲𑀫𑀡𑀁 𑀦𑀸𑀪𑀺𑀪𑁄𑀲𑀺. 𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺? ‘‘𑀇𑀤𑀁 𑀓𑀸𑀭𑀡𑀁, 𑀫𑁂𑀢𑁆𑀢𑀸𑀯𑀺𑀳𑀸𑀭𑀬𑀼𑀢𑁆𑀢𑁄 𑀲𑀫𑀡𑁄, 𑀳𑀦𑁆𑀤 𑀦𑀁 𑀭𑁄𑀲𑁂𑀢𑁆𑀯𑀸 𑀫𑁂𑀢𑁆𑀢𑀸𑀬 𑀯𑀺𑀬𑁄𑀚𑁂𑀫𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋 𑀅𑀣 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀬𑁂𑀦 𑀪𑀕𑀯𑀸…𑀧𑁂… 𑀦𑀺𑀓𑁆𑀔𑀫 𑀲𑀫𑀡𑀸𑀢𑀺. 𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀓𑀲𑁆𑀫𑀸 𑀫𑀬𑀸 𑀅𑀦𑀦𑀼𑀜𑁆𑀜𑀸𑀢𑁄 𑀫𑀫 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀖𑀭𑀲𑀸𑀫𑀺𑀓𑁄 𑀯𑀺𑀬 𑀇𑀢𑁆𑀣𑀸𑀕𑀸𑀭𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄𑀲𑀺? 𑀅𑀦𑀦𑀼𑀬𑀼𑀢𑁆𑀢𑀫𑁂𑀢𑀁 𑀲𑀫𑀡𑀲𑁆𑀲 𑀬𑀤𑀺𑀤𑀁 𑀅𑀤𑀺𑀦𑁆𑀦𑀧𑀭𑀺𑀪𑁄𑀕𑁄 𑀇𑀢𑁆𑀣𑀺𑀲𑀁𑀲𑀕𑁆𑀕𑁄 𑀘? 𑀢𑀲𑁆𑀫𑀸 𑀬𑀤𑀺 𑀢𑁆𑀯𑀁 𑀲𑀫𑀡𑀥𑀫𑁆𑀫𑁂 𑀞𑀺𑀢𑁄, 𑀦𑀺𑀓𑁆𑀔𑀫 𑀲𑀫𑀡𑀸𑀢𑀺. 𑀏𑀓𑁂 𑀧𑀦 𑁋 ‘‘𑀏𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀨𑀭𑀼𑀲𑀯𑀘𑀦𑀸𑀦𑀺 𑀯𑀢𑁆𑀯𑀸 𑀏𑀯𑀸𑀬𑀁 𑀏𑀢𑀤𑀯𑁄𑀘𑀸’’𑀢𑀺 𑀪𑀡𑀦𑁆𑀢𑀺.

𑀅𑀣 𑀪𑀕𑀯𑀸 𑁋 ‘‘𑀬𑀲𑁆𑀫𑀸 𑀣𑀤𑁆𑀥𑁄 𑀧𑀝𑀺𑀣𑀤𑁆𑀥𑀪𑀸𑀯𑁂𑀦 𑀯𑀺𑀦𑁂𑀢𑀼𑀁 𑀦 𑀲𑀓𑁆𑀓𑀸, 𑀲𑁄 𑀳𑀺 𑀧𑀝𑀺𑀣𑀤𑁆𑀥𑀪𑀸𑀯𑁂 𑀓𑀬𑀺𑀭𑀫𑀸𑀦𑁂, 𑀲𑁂𑀬𑁆𑀬𑀣𑀸𑀧𑀺 𑀘𑀡𑁆𑀟𑀲𑁆𑀲 𑀓𑀼𑀓𑁆𑀓𑀼𑀭𑀲𑁆𑀲 𑀦𑀸𑀲𑀸𑀬 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬, 𑀲𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀘𑀡𑁆𑀟𑀢𑀭𑁄 𑀅𑀲𑁆𑀲, 𑀏𑀯𑀁 𑀣𑀤𑁆𑀥𑀢𑀭𑁄 𑀳𑁄𑀢𑀺, 𑀫𑀼𑀤𑀼𑀦𑀸 𑀧𑀦 𑀲𑁄 𑀲𑀓𑁆𑀓𑀸 𑀯𑀺𑀦𑁂𑀢𑀼’’𑀦𑁆𑀢𑀺 𑀜𑀢𑁆𑀯𑀸, 𑀲𑀸𑀥𑀸𑀯𑀼𑀲𑁄𑀢𑀺 𑀧𑀺𑀬𑀯𑀘𑀦𑁂𑀦 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑀲𑀸𑀥𑀸𑀯𑀼𑀲𑁄𑀢𑀺 𑀪𑀕𑀯𑀸 𑀦𑀺𑀓𑁆𑀔𑀫𑀻𑀢𑀺.

𑀢𑀢𑁄 𑀆𑀴𑀯𑀓𑁄 𑁋 ‘‘𑀲𑀼𑀩𑁆𑀩𑀘𑁄 𑀯𑀢𑀸𑀬𑀁 𑀲𑀫𑀡𑁄 𑀏𑀓𑀯𑀘𑀦𑁂𑀦𑁂𑀯 𑀦𑀺𑀓𑁆𑀔𑀦𑁆𑀢𑁄, 𑀏𑀯𑀁 𑀦𑀸𑀫 𑀦𑀺𑀓𑁆𑀔𑀫𑁂𑀢𑀼𑀁 𑀲𑀼𑀔𑀁 𑀲𑀫𑀡𑀁 𑀅𑀓𑀸𑀭𑀡𑁂𑀦𑁂𑀯𑀸𑀳𑀁 𑀲𑀓𑀮𑀭𑀢𑁆𑀢𑀺𑀁 𑀬𑀼𑀤𑁆𑀥𑁂𑀦 𑀅𑀩𑁆𑀪𑀼𑀬𑁆𑀬𑀸𑀲𑀺’’𑀦𑁆𑀢𑀺 𑀫𑀼𑀤𑀼𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑀺𑀧𑀺 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀓𑀺𑀁 𑀦𑀼 𑀔𑁄 𑀲𑀼𑀩𑁆𑀩𑀘𑀢𑀸𑀬 𑀦𑀺𑀓𑁆𑀔𑀦𑁆𑀢𑁄 𑀉𑀤𑀸𑀳𑀼 𑀓𑁄𑀥𑀦𑁄. 𑀳𑀦𑁆𑀤𑀸𑀳𑀁 𑀯𑀻𑀫𑀁𑀲𑀸𑀫𑀻’’𑀢𑀺. 𑀢𑀢𑁄 𑀧𑀯𑀺𑀲, 𑀲𑀫𑀡𑀸𑀢𑀺 𑀆𑀳. 𑀅𑀣 𑀲𑀼𑀩𑁆𑀩𑀘𑁄𑀢𑀺 𑀫𑀼𑀤𑀼𑀪𑀽𑀢𑀘𑀺𑀢𑁆𑀢𑀯𑀯𑀢𑁆𑀣𑀸𑀦𑀓𑀭𑀡𑀢𑁆𑀣𑀁 𑀧𑀼𑀦 𑀧𑀺𑀬𑀯𑀘𑀦𑀁 𑀯𑀤𑀦𑁆𑀢𑁄 𑀲𑀸𑀥𑀸𑀯𑀼𑀲𑁄𑀢𑀺 𑀪𑀕𑀯𑀸 𑀧𑀸𑀯𑀺𑀲𑀺. 𑀆𑀴𑀯𑀓𑁄 𑀧𑀼𑀦𑀧𑁆𑀧𑀼𑀦𑀁 𑀢𑀫𑁂𑀯 𑀲𑀼𑀩𑁆𑀩𑀘𑀪𑀸𑀯𑀁 𑀯𑀻𑀫𑀁𑀲𑀦𑁆𑀢𑁄 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀦𑀺𑀓𑁆𑀔𑀫 𑀧𑀯𑀺𑀲𑀸𑀢𑀺 𑀆𑀳. 𑀪𑀕𑀯𑀸𑀧𑀺 𑀢𑀣𑀸 𑀅𑀓𑀸𑀲𑀺. 𑀬𑀤𑀺 𑀦 𑀓𑀭𑁂𑀬𑁆𑀬, 𑀧𑀓𑀢𑀺𑀬𑀸𑀧𑀺 𑀣𑀤𑁆𑀥𑀬𑀓𑁆𑀔𑀲𑁆𑀲 𑀘𑀺𑀢𑁆𑀢𑀁 𑀣𑀤𑁆𑀥𑀢𑀭𑀁 𑀳𑀼𑀢𑁆𑀯𑀸 𑀥𑀫𑁆𑀫𑀓𑀣𑀸𑀬 𑀪𑀸𑀚𑀦𑀁 𑀦 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀫𑀸𑀢𑀸 𑀭𑁄𑀤𑀦𑁆𑀢𑀁 𑀧𑀼𑀢𑁆𑀢𑀓𑀁 𑀬𑀁 𑀲𑁄 𑀇𑀘𑁆𑀙𑀢𑀺, 𑀢𑀁 𑀤𑀢𑁆𑀯𑀸 𑀯𑀸 𑀓𑀢𑁆𑀯𑀸 𑀯𑀸 𑀲𑀜𑁆𑀜𑀸𑀧𑁂𑀲𑀺 𑀢𑀣𑀸 𑀪𑀕𑀯𑀸 𑀓𑀺𑀮𑁂𑀲𑀭𑁄𑀤𑀦𑁂𑀦 𑀭𑁄𑀤𑀦𑁆𑀢𑀁 𑀬𑀓𑁆𑀔𑀁 𑀲𑀜𑁆𑀜𑀸𑀧𑁂𑀢𑀼𑀁 𑀬𑀁 𑀲𑁄 𑀪𑀡𑀢𑀺, 𑀢𑀁 𑀅𑀓𑀸𑀲𑀺. 𑀬𑀣𑀸 𑀘 𑀥𑀸𑀢𑀻 𑀣𑀜𑁆𑀜𑀁 𑀅𑀧𑀺𑀯𑀦𑁆𑀢𑀁 𑀤𑀸𑀭𑀓𑀁 𑀓𑀺𑀜𑁆𑀘𑀺 𑀤𑀢𑁆𑀯𑀸 𑀉𑀧𑀮𑀸𑀴𑁂𑀢𑁆𑀯𑀸 𑀧𑀸𑀬𑁂𑀢𑀺, 𑀢𑀣𑀸 𑀪𑀕𑀯𑀸 𑀬𑀓𑁆𑀔𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀔𑀻𑀭𑀁 𑀧𑀸𑀬𑁂𑀢𑀼𑀁 𑀢𑀲𑁆𑀲 𑀧𑀢𑁆𑀣𑀺𑀢𑀯𑀘𑀦𑀓𑀭𑀡𑁂𑀦 𑀉𑀧𑀮𑀸𑀴𑁂𑀦𑁆𑀢𑁄 𑀏𑀯𑀫𑀓𑀸𑀲𑀺. 𑀬𑀣𑀸 𑀘 𑀧𑀼𑀭𑀺𑀲𑁄 𑀮𑀸𑀩𑀼𑀫𑁆𑀳𑀺 𑀘𑀢𑀼𑀫𑀥𑀼𑀭𑀁 𑀧𑀽𑀭𑁂𑀢𑀼𑀓𑀸𑀫𑁄 𑀢𑀲𑁆𑀲𑀩𑁆𑀪𑀦𑁆𑀢𑀭𑀁 𑀲𑁄𑀥𑁂𑀢𑀺, 𑀏𑀯𑀁 𑀪𑀕𑀯𑀸 𑀬𑀓𑁆𑀔𑀲𑁆𑀲 𑀘𑀺𑀢𑁆𑀢𑁂 𑀮𑁄𑀓𑀼𑀢𑁆𑀢𑀭𑀘𑀢𑀼𑀫𑀥𑀼𑀭𑀁 𑀧𑀽𑀭𑁂𑀢𑀼𑀓𑀸𑀫𑁄 𑀢𑀲𑁆𑀲𑀩𑁆𑀪𑀦𑁆𑀢𑀭𑁂 𑀓𑁄𑀥𑀫𑀮𑀁 𑀲𑁄𑀥𑁂𑀢𑀼𑀁 𑀬𑀸𑀯 𑀢𑀢𑀺𑀬𑀁 𑀦𑀺𑀓𑁆𑀔𑀫𑀦𑀧𑀯𑀺𑀲𑀦𑀁 𑀅𑀓𑀸𑀲𑀺.

𑀅𑀣 𑀆𑀴𑀯𑀓𑁄 ‘‘𑀲𑀼𑀩𑁆𑀩𑀘𑁄 𑀅𑀬𑀁 𑀲𑀫𑀡𑁄 ‘𑀦𑀺𑀓𑁆𑀔𑀫𑀸’𑀢𑀺 𑀯𑀼𑀢𑁆𑀢𑁄 𑀦𑀺𑀓𑁆𑀔𑀫𑀢𑀺, ‘𑀧𑀯𑀺𑀲𑀸’𑀢𑀺 𑀯𑀼𑀢𑁆𑀢𑁄 𑀧𑀯𑀺𑀲𑀢𑀺. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀲𑀫𑀡𑀁 𑀏𑀯𑀫𑁂𑀯 𑀲𑀓𑀮𑀭𑀢𑁆𑀢𑀺𑀁 𑀓𑀺𑀮𑀫𑁂𑀢𑁆𑀯𑀸 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑁂𑀬𑁆𑀬’’𑀦𑁆𑀢𑀺? 𑀧𑀸𑀧𑀓𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀢𑀼𑀢𑁆𑀣𑀯𑀸𑀭𑀁 𑀆𑀳 𑀦𑀺𑀓𑁆𑀔𑀫, 𑀲𑀫𑀡𑀸𑀢𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 𑀦 𑀔𑁆𑀯𑀸𑀳𑀁 𑀢𑀦𑁆𑀢𑀺 𑀆𑀳. 𑀏𑀯𑀁 𑀯𑀸 𑀯𑀼𑀢𑁆𑀢𑁂 𑀢𑀤𑀼𑀢𑁆𑀢𑀭𑀺𑀓𑀭𑀡𑀻𑀬𑀁 𑀧𑀭𑀺𑀬𑁂𑀲𑀫𑀸𑀦𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀺. 𑀢𑀁 𑀥𑀫𑁆𑀫𑀓𑀣𑀸𑀬 𑀫𑀼𑀔𑀁 𑀪𑀯𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸, 𑀦 𑀔𑁆𑀯𑀸𑀳𑀁 𑀢𑀦𑁆𑀢𑀺 𑀆𑀳. 𑀢𑀢𑁆𑀣 𑀦-𑀇𑀢𑀺 𑀧𑀝𑀺𑀓𑁆𑀔𑁂𑀧𑁂. 𑀔𑁄𑀢𑀺 𑀅𑀯𑀥𑀸𑀭𑀡𑁂. 𑀅𑀳𑀦𑁆𑀢𑀺 𑀅𑀢𑁆𑀢𑀦𑀺𑀤𑀲𑁆𑀲𑀦𑀁. 𑀢𑀦𑁆𑀢𑀺 𑀳𑁂𑀢𑀼𑀯𑀘𑀦𑀁. 𑀢𑁂𑀦𑁂𑀯𑁂𑀢𑁆𑀣 ‘‘𑀬𑀲𑁆𑀫𑀸 𑀢𑁆𑀯𑀁 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀢𑀲𑁆𑀫𑀸 𑀅𑀳𑀁, 𑀆𑀯𑀼𑀲𑁄, 𑀦𑁂𑀯 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀬𑀁 𑀢𑁂 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻’’𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀢𑁄 𑀆𑀴𑀯𑀓𑁄 𑀬𑀲𑁆𑀫𑀸 𑀧𑀼𑀩𑁆𑀩𑁂𑀧𑀺 𑀆𑀓𑀸𑀲𑁂𑀦 𑀕𑀫𑀦𑀯𑁂𑀮𑀸𑀬 𑁋 ‘‘𑀓𑀺𑀁 𑀦𑀼 𑀔𑁄 𑀏𑀢𑀁 𑀲𑀼𑀯𑀡𑁆𑀡𑀯𑀺𑀫𑀸𑀦𑀁, 𑀉𑀤𑀸𑀳𑀼 𑀭𑀚𑀢𑀫𑀡𑀺𑀯𑀺𑀫𑀸𑀦𑀸𑀦𑀁 𑀅𑀜𑁆𑀜𑀢𑀭𑀁, 𑀳𑀦𑁆𑀤 𑀦𑀁 𑀧𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀆𑀕𑀢𑁂 𑀇𑀤𑁆𑀥𑀺𑀫𑀦𑁆𑀢𑁂 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀘𑀺𑀢𑁆𑀢𑀓𑁆𑀔𑁂𑀧𑀸𑀤𑀻𑀳𑀺 𑀯𑀺𑀳𑁂𑀞𑁂𑀢𑀺, 𑀢𑀲𑁆𑀫𑀸 𑀪𑀕𑀯𑀦𑁆𑀢𑀫𑁆𑀧𑀺 𑀢𑀣𑀸 𑀯𑀺𑀳𑁂𑀞𑁂𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑀫𑀸𑀦𑁄 𑀧𑀜𑁆𑀳𑀁 𑀢𑀦𑁆𑀢𑀺𑀆𑀤𑀺𑀫𑀸𑀳.

𑀓𑀼𑀢𑁄 𑀧𑀦𑀲𑁆𑀲 𑀧𑀜𑁆𑀳𑀸𑀢𑀺? 𑀢𑀲𑁆𑀲 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀅𑀝𑁆𑀞 𑀧𑀜𑁆𑀳𑁂 𑀲𑀳 𑀯𑀺𑀲𑁆𑀲𑀚𑁆𑀚𑀦𑁂𑀦 𑀉𑀕𑁆𑀕𑀳𑁂𑀲𑀼𑀁. 𑀢𑁂 𑀤𑀳𑀭𑀓𑀸𑀮𑁂 𑀆𑀴𑀯𑀓𑀁 𑀧𑀭𑀺𑀬𑀸𑀧𑀼𑀡𑀸𑀧𑁂𑀲𑀼𑀁; 𑀲𑁄 𑀓𑀸𑀮𑀘𑁆𑀘𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀲𑀫𑁆𑀫𑀼𑀲𑁆𑀲𑀺. 𑀢𑀢𑁄 ‘‘𑀇𑀫𑁂 𑀧𑀜𑁆𑀳𑀸𑀧𑀺 𑀫𑀸 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀲𑀼𑀯𑀡𑁆𑀡𑀧𑀝𑁆𑀞𑁂 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀮𑁂𑀔𑀸𑀧𑁂𑀢𑁆𑀯𑀸 𑀯𑀺𑀫𑀸𑀦𑁂 𑀦𑀺𑀓𑁆𑀔𑀺𑀧𑀺. 𑀏𑀯𑀫𑁂𑀢𑁂 𑀧𑀼𑀝𑁆𑀞𑀧𑀜𑁆𑀳𑀸 𑀩𑀼𑀤𑁆𑀥𑀯𑀺𑀲𑀬𑀸𑀯 𑀳𑁄𑀦𑁆𑀢𑀺. 𑀪𑀕𑀯𑀸 𑀢𑀁 𑀲𑀼𑀢𑁆𑀯𑀸 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑀮𑀸𑀪𑀦𑁆𑀢𑀭𑀸𑀬𑁄 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀩𑁆𑀬𑀸𑀫𑀧𑁆𑀧𑀪𑀸𑀤𑀺𑀧𑀝𑀺𑀖𑀸𑀢𑁄 𑀯𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀓𑀸𑀢𑀼𑀁, 𑀢𑀲𑁆𑀫𑀸 𑀦𑀁 𑀮𑁄𑀓𑁂 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀦 𑀔𑁆𑀯𑀸𑀳𑀁 𑀢𑀁, 𑀆𑀯𑀼𑀲𑁄, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀪𑀕𑀯𑀸 𑀢𑀲𑁆𑀲 𑀩𑀸𑀥𑀦𑀘𑀺𑀢𑁆𑀢𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀧𑀜𑁆𑀳𑀸𑀧𑀼𑀘𑁆𑀙𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀆𑀳 𑀅𑀧𑀺𑀘 𑀢𑁆𑀯𑀁, 𑀆𑀯𑀼𑀲𑁄, 𑀧𑀼𑀘𑁆𑀙, 𑀬𑀤𑀸𑀓𑀗𑁆𑀔𑀲𑀻𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀘𑁆𑀙, 𑀬𑀤𑀺 𑀆𑀓𑀸𑀗𑁆𑀔𑀲𑀺, 𑀦 𑀫𑁂 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄 𑀅𑀢𑁆𑀣𑀺. 𑀅𑀣 𑀯𑀸 𑀧𑀼𑀘𑁆𑀙, 𑀬𑀁 𑀆𑀓𑀗𑁆𑀔𑀲𑀺. 𑀲𑀩𑁆𑀩𑀁 𑀢𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺 𑀅𑀲𑀸𑀥𑀸𑀭𑀡𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑁂𑀳𑀺. 𑀏𑀯𑀁 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸𑀬 𑀅𑀣 𑀔𑁄 𑀆𑀴𑀯𑀓𑁄 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺.

𑀢𑀢𑁆𑀣 𑀓𑀺𑀁 𑀲𑀽𑀥 𑀯𑀺𑀢𑁆𑀢𑀦𑁆𑀢𑀺, 𑀓𑀺𑀁 𑀲𑀼 𑀇𑀥 𑀯𑀺𑀢𑁆𑀢𑀁. 𑀯𑀺𑀢𑁆𑀢𑀦𑁆𑀢𑀺 𑀥𑀦𑀁. 𑀢𑀁 𑀳𑀺 𑀧𑀻𑀢𑀺𑀲𑀗𑁆𑀔𑀸𑀢𑀁 𑀯𑀺𑀢𑁆𑀢𑀺𑀁 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀯𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀘𑀺𑀡𑁆𑀡𑀦𑁆𑀢𑀺 𑀲𑀼𑀓𑀢𑀁. 𑀲𑀼𑀔𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀲𑀸𑀢𑀁. 𑀆𑀯𑀳𑀸𑀢𑀻𑀢𑀺 𑀆𑀯𑀳𑀢𑀺 𑀆𑀦𑁂𑀢𑀺 𑀤𑁂𑀢𑀺 𑀅𑀧𑁆𑀧𑁂𑀢𑀺. 𑀳𑀯𑁂-𑀇𑀢𑀺 𑀤𑀴𑁆𑀳𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀸𑀤𑀼𑀢𑀭𑀦𑁆𑀢𑀺 𑀅𑀢𑀺𑀲𑀬𑁂𑀦 𑀲𑀸𑀤𑀼. ‘‘𑀲𑀸𑀥𑀼𑀢𑀭’’𑀦𑁆𑀢𑀺𑀧𑀺 𑀧𑀸𑀞𑁄. 𑀭𑀲𑀸𑀦𑀦𑁆𑀢𑀺 𑀭𑀲𑀲𑀜𑁆𑀜𑀺𑀢𑀸𑀦𑀁 𑀥𑀫𑁆𑀫𑀸𑀦𑀁. 𑀓𑀣𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦. 𑀓𑀣𑀁𑀚𑀻𑀯𑀺𑀦𑁄 𑀚𑀻𑀯𑀺𑀢𑀁 𑀓𑀣𑀁𑀚𑀻𑀯𑀺𑀁𑀚𑀻𑀯𑀺𑀢𑀁. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀧𑀦 𑀲𑀸𑀦𑀼𑀦𑀸𑀲𑀺𑀓𑀁 𑀯𑀼𑀘𑁆𑀘𑀢𑀺. 𑀓𑀣𑀁𑀚𑀻𑀯𑀺𑀁 𑀚𑀻𑀯𑀢𑀦𑁆𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲 ‘‘𑀚𑀻𑀯𑀦𑁆𑀢𑀸𑀦𑀁 𑀓𑀣𑀁𑀚𑀻𑀯𑀺’’𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 ‘‘𑀓𑀺𑀁 𑀲𑀼 𑀇𑀥 𑀮𑁄𑀓𑁂 𑀧𑀼𑀭𑀺𑀲𑀲𑁆𑀲 𑀯𑀺𑀢𑁆𑀢𑀁 𑀲𑁂𑀝𑁆𑀞𑀁? 𑀓𑀺𑀁 𑀲𑀼 𑀲𑀼𑀘𑀺𑀡𑁆𑀡𑀁 𑀲𑀼𑀔𑀫𑀸𑀯𑀳𑀸𑀢𑀺? 𑀓𑀺𑀁 𑀭𑀲𑀸𑀦𑀁 𑀲𑀸𑀤𑀼𑀢𑀭𑀁? 𑀓𑀣𑀁𑀚𑀻𑀯𑀺𑀁 𑀚𑀻𑀯𑀺𑀢𑀁 𑀲𑁂𑀝𑁆𑀞𑀫𑀸𑀳𑀽’’𑀢𑀺? 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺.

𑀅𑀣𑀲𑁆𑀲 𑀪𑀕𑀯𑀸 𑀓𑀲𑁆𑀲𑀧𑀤𑀲𑀩𑀮𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑀲𑀤𑁆𑀥𑀻𑀥 𑀯𑀺𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀯𑀺𑀢𑁆𑀢𑀁 𑀉𑀧𑀪𑁄𑀕𑀲𑀼𑀔𑀁 𑀆𑀯𑀳𑀢𑀺, 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀁 𑀧𑀝𑀺𑀩𑀸𑀳𑀢𑀺, 𑀤𑀸𑀮𑀺𑀤𑁆𑀤𑀺𑀬𑀁 𑀯𑀽𑀧𑀲𑀫𑁂𑀢𑀺, 𑀫𑀼𑀢𑁆𑀢𑀸𑀤𑀺𑀭𑀢𑀦𑀧𑀝𑀺𑀮𑀸𑀪𑀳𑁂𑀢𑀼 𑀳𑁄𑀢𑀺, 𑀮𑁄𑀓𑀲𑀦𑁆𑀢𑀢𑀺𑀜𑁆𑀘 𑀆𑀯𑀳𑀢𑀺, 𑀏𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀤𑁆𑀥𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀯𑀺𑀧𑀸𑀓𑀁 𑀲𑀼𑀔𑀫𑀸𑀯𑀳𑀢𑀺, 𑀲𑀤𑁆𑀥𑀸𑀥𑀼𑀭𑁂𑀦 𑀧𑀝𑀺𑀧𑀦𑁆𑀦𑀸𑀦𑀁 𑀚𑀸𑀢𑀺𑀚𑀭𑀸𑀤𑀺𑀤𑀼𑀓𑁆𑀔𑀁 𑀧𑀝𑀺𑀩𑀸𑀳𑀢𑀺, 𑀕𑀼𑀡𑀤𑀸𑀮𑀺𑀤𑁆𑀤𑀺𑀬𑀁 𑀯𑀽𑀧𑀲𑀫𑁂𑀢𑀺, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀭𑀢𑀦𑀧𑀝𑀺𑀮𑀸𑀪𑀳𑁂𑀢𑀼 𑀳𑁄𑀢𑀺.

‘‘𑀲𑀤𑁆𑀥𑁄 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀬𑀲𑁄 𑀪𑁄𑀕𑀲𑀫𑀧𑁆𑀧𑀺𑀢𑁄;

𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀽𑀚𑀺𑀢𑁄’’𑀢𑀺. (𑀥. 𑀧. 𑁩𑁦𑁩) 𑁋

𑀯𑀘𑀦𑀢𑁄 𑀮𑁄𑀓𑀲𑀦𑁆𑀢𑀢𑀺𑀜𑁆𑀘 𑀆𑀯𑀳𑀢𑀻𑀢𑀺 𑀓𑀢𑁆𑀯𑀸 ‘‘𑀯𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀲𑀤𑁆𑀥𑀸𑀯𑀺𑀢𑁆𑀢𑀁 𑀅𑀦𑀼𑀕𑀸𑀫𑀺𑀓𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀳𑁂𑀢𑀼, 𑀮𑁄𑀓𑀺𑀬𑀲𑁆𑀲 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀯𑀺𑀢𑁆𑀢𑀲𑁆𑀲𑀸𑀧𑀺 𑀦𑀺𑀤𑀸𑀦𑀁. 𑀲𑀤𑁆𑀥𑁄𑀬𑁂𑀯 𑀳𑀺 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀯𑀺𑀢𑁆𑀢𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀲𑁆𑀲𑀤𑁆𑀥𑀲𑁆𑀲 𑀧𑀦 𑀯𑀺𑀢𑁆𑀢𑀁 𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬 𑀳𑁄𑀢𑀺, 𑀢𑀲𑁆𑀫𑀸 𑀲𑁂𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀲𑀲𑁆𑀲𑀸𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀤𑁂𑀲𑀦𑀸. 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀧𑀼𑀭𑀺𑀲𑀲𑁆𑀲, 𑀇𑀢𑁆𑀣𑀺𑀆𑀤𑀻𑀦𑀫𑁆𑀧𑀺 𑀲𑀤𑁆𑀥𑀸𑀯𑀺𑀢𑁆𑀢𑀫𑁂𑀯 𑀲𑁂𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀥𑀫𑁆𑀫𑁄, 𑀤𑀸𑀦𑀲𑀻𑀮𑀪𑀸𑀯𑀦𑀸𑀥𑀫𑁆𑀫𑁄 𑀯𑀸. 𑀲𑀼𑀘𑀺𑀡𑁆𑀡𑁄𑀢𑀺 𑀲𑀼𑀓𑀢𑁄 𑀲𑀼𑀘𑀭𑀺𑀢𑁄. 𑀲𑀼𑀔𑀫𑀸𑀯𑀳𑀢𑀻𑀢𑀺 𑀲𑁄𑀡𑀲𑁂𑀝𑁆𑀞𑀺𑀧𑀼𑀢𑁆𑀢𑀭𑀝𑁆𑀞𑀧𑀸𑀮𑀸𑀤𑀻𑀦𑀁 𑀯𑀺𑀬 𑀫𑀦𑀼𑀲𑁆𑀲𑀲𑀼𑀔𑀁, 𑀲𑀓𑁆𑀓𑀸𑀤𑀻𑀦𑀁 𑀯𑀺𑀬 𑀤𑀺𑀩𑁆𑀩𑀲𑀼𑀔𑀁, 𑀧𑀭𑀺𑀬𑁄𑀲𑀸𑀦𑁂 𑀫𑀳𑀸𑀧𑀤𑀼𑀫𑀸𑀤𑀻𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑀼𑀔𑀜𑁆𑀘 𑀆𑀯𑀳𑀢𑀺.

𑀲𑀘𑁆𑀘𑀦𑁆𑀢𑀺 𑀅𑀬𑀁 𑀲𑀘𑁆𑀘𑀲𑀤𑁆𑀤𑁄 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀲𑀘𑁆𑀘𑀁 𑀪𑀡𑁂 𑀦 𑀓𑀼𑀚𑁆𑀛𑁂𑀬𑁆𑀬𑀸 ’’ 𑀢𑀺𑀆𑀤𑀻𑀲𑀼 (𑀥. 𑀧. 𑁨𑁨𑁪) 𑀯𑀸𑀘𑀸𑀲𑀘𑁆𑀘𑁂. ‘‘𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀸’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁧.𑁪𑁩𑁩) 𑀯𑀺𑀭𑀢𑀺𑀲𑀘𑁆𑀘𑁂. ‘‘𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸 𑀯𑀤𑀸𑀦𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁧) 𑀤𑀺𑀝𑁆𑀞𑀺𑀲𑀘𑁆𑀘𑁂. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑀸𑀦𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁮𑁫) 𑀩𑁆𑀭𑀸𑀳𑁆𑀫𑀡𑀲𑀘𑁆𑀘𑁂. ‘‘𑀏𑀓𑀁 𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀺𑀬𑀫𑀢𑁆𑀣𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁯𑁦; 𑀫𑀳𑀸𑀦𑀺. 𑁧𑁧𑁯) 𑀧𑀭𑀫𑀢𑁆𑀣𑀲𑀘𑁆𑀘𑁂. ‘‘𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨𑁧𑁬) 𑀅𑀭𑀺𑀬𑀲𑀘𑁆𑀘𑁂. 𑀇𑀥 𑀧𑀦 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀁 𑀯𑀺𑀭𑀢𑀺𑀲𑀘𑁆𑀘𑀜𑁆𑀘 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸 𑀯𑀸𑀘𑀸𑀲𑀘𑁆𑀘𑀁 𑀅𑀥𑀺𑀧𑁆𑀧𑁂𑀢𑀁, 𑀬𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀤𑀓𑀸𑀤𑀻𑀦𑀺 𑀯𑀲𑁂 𑀯𑀢𑁆𑀢𑁂𑀦𑁆𑀢𑀺, 𑀚𑀸𑀢𑀺𑀚𑀭𑀸𑀫𑀭𑀡𑀧𑀸𑀭𑀁 𑀢𑀭𑀦𑁆𑀢𑀺. 𑀬𑀣𑀸𑀳 𑁋

‘‘𑀲𑀘𑁆𑀘𑁂𑀦 𑀯𑀸𑀘𑁂𑀦𑀼𑀤𑀓𑀫𑁆𑀳𑀺 𑀥𑀸𑀯𑀢𑀺,

𑀯𑀺𑀲𑀫𑁆𑀧𑀺 𑀲𑀘𑁆𑀘𑁂𑀦 𑀳𑀦𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀲𑀘𑁆𑀘𑁂𑀦 𑀤𑁂𑀯𑁄 𑀣𑀦𑀬𑀁 𑀧𑀯𑀲𑁆𑀲𑀢𑀺,

𑀲𑀘𑁂 𑀞𑀺𑀢𑀸 𑀦𑀺𑀩𑁆𑀩𑀼𑀢𑀺𑀁 𑀧𑀢𑁆𑀣𑀬𑀦𑁆𑀢𑀺.

‘‘𑀬𑁂 𑀓𑁂𑀘𑀺𑀫𑁂 𑀅𑀢𑁆𑀣𑀺 𑀭𑀲𑀸 𑀧𑀣𑀩𑁆𑀬𑀸,

𑀲𑀘𑁆𑀘𑀁 𑀢𑁂𑀲𑀁 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁;

𑀲𑀘𑁆𑀘𑁂 𑀞𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘,

𑀢𑀭𑀦𑁆𑀢𑀺 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭’’𑀦𑁆𑀢𑀺. (𑀚𑀸. 𑁨.𑁨𑁧.𑁪𑁩𑁩);

𑀲𑀸𑀤𑀼𑀢𑀭𑀦𑁆𑀢𑀺 𑀫𑀥𑀼𑀭𑀢𑀭𑀁 𑀧𑀡𑀻𑀢𑀢𑀭𑀁. 𑀭𑀲𑀸𑀦𑀦𑁆𑀢𑀺 𑀬𑁂 𑀇𑀫𑁂 ‘‘𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁨𑁮-𑁬𑁩𑁦) 𑀦𑀬𑁂𑀦 𑀲𑀸𑀬𑀦𑀻𑀬𑀥𑀫𑁆𑀫𑀸, 𑀬𑁂𑀘𑀺𑀫𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀨𑀮𑀭𑀲𑀁 (𑀫𑀳𑀸𑀯. 𑁩𑁦𑁦), 𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄, 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀭𑀽𑀧𑀭𑀲𑀸 𑀲𑀤𑁆𑀤𑀭𑀲𑀸 (𑀧𑀸𑀭𑀸. 𑁩; 𑀅. 𑀦𑀺. 𑁮.𑁧𑁧), 𑀅𑀦𑀸𑀧𑀢𑁆𑀢𑀺 𑀭𑀲𑀭𑀲𑁂 (𑀧𑀸𑀘𑀺. 𑁬𑁦𑁫-𑁬𑁧𑁧), 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀏𑀓𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 (𑀘𑀽𑀴𑀯. 𑁩𑁮𑁫; 𑀅. 𑀦𑀺. 𑁮.𑁧𑁯), 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁪𑁯) 𑀦𑀬𑁂𑀦 𑀭𑀽𑀧𑀸𑀘𑀸𑀭𑀭𑀲𑀼𑀧𑀯𑀚𑁆𑀚𑀸 𑀅𑀯𑀲𑁂𑀲𑀸 𑀩𑁆𑀬𑀜𑁆𑀚𑀦𑀸𑀤𑀬𑁄 ‘‘𑀥𑀫𑁆𑀫𑀭𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀲𑀁 𑀭𑀲𑀸𑀦𑀁 𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀲𑀘𑁆𑀘𑀫𑁂𑀯 𑀲𑀸𑀤𑀼𑀢𑀭𑀁. 𑀲𑀸𑀥𑀼𑀢𑀭𑀁 𑀯𑀸, 𑀲𑁂𑀝𑁆𑀞𑀢𑀭𑀁, 𑀉𑀢𑁆𑀢𑀫𑀢𑀭𑀁. 𑀫𑀽𑀮𑀭𑀲𑀸𑀤𑀬𑁄 𑀳𑀺 𑀲𑀭𑀻𑀭𑀫𑀼𑀧𑀩𑁆𑀭𑀽𑀳𑁂𑀦𑁆𑀢𑀺, 𑀲𑀁𑀓𑀺𑀮𑁂𑀲𑀺𑀓𑀜𑁆𑀘 𑀲𑀼𑀔𑀫𑀸𑀯𑀳𑀦𑁆𑀢𑀺. 𑀲𑀘𑁆𑀘𑀭𑀲𑁂 𑀯𑀺𑀭𑀢𑀺𑀲𑀘𑁆𑀘𑀯𑀸𑀘𑀸𑀲𑀘𑁆𑀘𑀭𑀲𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀳𑀺 𑀘𑀺𑀢𑁆𑀢𑀁 𑀉𑀧𑀩𑁆𑀭𑀽𑀳𑁂𑀢𑀺, 𑀅𑀲𑀁𑀓𑀺𑀮𑁂𑀲𑀺𑀓𑀜𑁆𑀘 𑀲𑀼𑀔𑀫𑀸𑀯𑀳𑀢𑀺. 𑀯𑀺𑀫𑀼𑀢𑁆𑀢𑀺𑀭𑀲𑁄 𑀧𑀭𑀫𑀢𑁆𑀣𑀲𑀘𑁆𑀘𑀭𑀲𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀲𑀸𑀤𑀼, 𑀅𑀢𑁆𑀣𑀭𑀲𑀥𑀫𑁆𑀫𑀭𑀲𑀸 𑀘 𑀢𑀤𑀥𑀺𑀕𑀫𑀽𑀧𑀸𑀬𑀪𑀽𑀢𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀢𑁄𑀢𑀺.

𑀧𑀜𑁆𑀜𑀸𑀚𑀻𑀯𑀺𑀁𑀚𑀻𑀯𑀺𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀬𑁆𑀯𑀸𑀬𑀁 𑀅𑀦𑁆𑀥𑁂𑀓𑀘𑀓𑁆𑀔𑀼𑀤𑁆𑀯𑀺𑀘𑀓𑁆𑀔𑀼𑀓𑁂𑀲𑀼 𑀤𑁆𑀯𑀺𑀘𑀓𑁆𑀔𑀼𑀧𑀼𑀕𑁆𑀕𑀮𑁄 𑀕𑀳𑀝𑁆𑀞𑁄 𑀯𑀸 𑀓𑀫𑁆𑀫𑀦𑁆𑀢𑀸𑀦𑀼𑀝𑁆𑀞𑀸𑀦-𑀲𑀭𑀡𑀕𑀫𑀦𑀤𑀸𑀦-𑀲𑀁𑀯𑀺𑀪𑀸𑀕-𑀲𑀻𑀮𑀲𑀫𑀸𑀤𑀸𑀦𑀼𑀧𑁄𑀲𑀣𑀓𑀫𑁆𑀫𑀸𑀤𑀺 𑀕𑀳𑀝𑁆𑀞𑀧𑀝𑀺𑀧𑀤𑀁, 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀲𑀻𑀮𑀲𑀗𑁆𑀔𑀸𑀢𑀁 𑀢𑀤𑀼𑀢𑁆𑀢𑀭𑀺𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀺𑀪𑁂𑀤𑀫𑁆𑀧𑀺 𑀧𑀩𑁆𑀩𑀚𑀺𑀢𑀧𑀝𑀺𑀧𑀤𑀁 𑀧𑀜𑁆𑀜𑀸𑀬 𑀆𑀭𑀸𑀥𑁂𑀢𑁆𑀯𑀸 𑀚𑀻𑀯𑀢𑀺, 𑀢𑀲𑁆𑀲 𑀧𑀜𑁆𑀜𑀸𑀬 𑀚𑀻𑀯𑀺𑀦𑁄 𑀚𑀻𑀯𑀺𑀢𑀁, 𑀢𑀁 𑀯𑀸 𑀧𑀜𑁆𑀜𑀸𑀚𑀻𑀯𑀺𑀢𑀁 𑀲𑁂𑀝𑁆𑀞𑀫𑀸𑀳𑀽𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀯𑀁 𑀪𑀕𑀯𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑁂 𑀘𑀢𑁆𑀢𑀸𑀭𑁄𑀧𑀺 𑀧𑀜𑁆𑀳𑁂 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑁄 𑀬𑀓𑁆𑀔𑁄 𑀅𑀯𑀲𑁂𑀲𑁂𑀧𑀺 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀦𑁆𑀢𑁄 𑀓𑀣𑀁𑀲𑀼 𑀢𑀭𑀢𑀺 𑀑𑀖𑀦𑁆𑀢𑀺 𑀕𑀸𑀣𑀫𑀸𑀳. 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀤𑁆𑀥𑀸𑀬 𑀢𑀭𑀢𑀻𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑁄 𑀘𑀢𑀼𑀩𑁆𑀩𑀺𑀥𑀫𑁄𑀖𑀁 𑀢𑀭𑀢𑀺, 𑀲𑁄 𑀲𑀁𑀲𑀸𑀭𑀡𑁆𑀡𑀯𑀫𑁆𑀧𑀺 𑀢𑀭𑀢𑀺, 𑀯𑀝𑁆𑀝𑀤𑀼𑀓𑁆𑀔𑀫𑁆𑀧𑀺 𑀅𑀘𑁆𑀘𑁂𑀢𑀺, 𑀓𑀺𑀮𑁂𑀲𑀫𑀮𑀸𑀧𑀺 𑀧𑀭𑀺𑀲𑀼𑀚𑁆𑀛𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀦 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑁄 𑀑𑀖𑀢𑀭𑀡𑀁 𑀅𑀲𑀤𑁆𑀤𑀳𑀦𑁆𑀢𑁄 𑀦 𑀧𑀓𑁆𑀔𑀦𑁆𑀤𑀢𑀺, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑁂𑀦 𑀧𑀫𑀢𑁆𑀢𑁄 𑀢𑀢𑁆𑀣𑁂𑀯 𑀯𑀺𑀲𑀢𑁆𑀢𑀢𑁆𑀢𑀸 𑀲𑀁𑀲𑀸𑀭𑀡𑁆𑀡𑀯𑀁 𑀦 𑀢𑀭𑀢𑀺, 𑀓𑀼𑀲𑀻𑀢𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺 𑀯𑁄𑀓𑀺𑀡𑁆𑀡𑁄 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀅𑀧𑁆𑀧𑀜𑁆𑀜𑁄 𑀲𑀼𑀤𑁆𑀥𑀺𑀫𑀕𑁆𑀕𑀁 𑀅𑀚𑀸𑀦𑀦𑁆𑀢𑁄 𑀦 𑀧𑀭𑀺𑀲𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀧𑁆𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸.

𑀏𑀯𑀁 𑀯𑀼𑀢𑁆𑀢𑀸𑀬 𑀘𑁂𑀢𑀸𑀬 𑀬𑀲𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀧𑀤𑀝𑁆𑀞𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀢𑀲𑁆𑀫𑀸 𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀤𑀺𑀝𑁆𑀞𑁄𑀖𑀢𑀭𑀡𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀲𑁄𑀢𑀸𑀧𑀦𑁆𑀦𑀜𑁆𑀘 𑀧𑀓𑀸𑀲𑁂𑀢𑀺. 𑀬𑀲𑁆𑀫𑀸 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀲𑀸𑀢𑀘𑁆𑀘𑀓𑀺𑀭𑀺𑀬𑀲𑀗𑁆𑀔𑀢𑁂𑀦 𑀅𑀧𑁆𑀧𑀫𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀤𑀼𑀢𑀺𑀬𑀫𑀕𑁆𑀕𑀁 𑀆𑀭𑀸𑀥𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀲𑀓𑀺𑀤𑁂𑀯𑀺𑀫𑀁 𑀮𑁄𑀓𑀁 𑀆𑀕𑀫𑀦𑀫𑀕𑁆𑀕𑀁 𑀅𑀯𑀲𑁂𑀲𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀅𑀢𑀺𑀡𑁆𑀡𑀁 𑀪𑀯𑁄𑀖𑀯𑀢𑁆𑀣𑀼𑀁 𑀲𑀁𑀲𑀸𑀭𑀡𑁆𑀡𑀯𑀁 𑀢𑀭𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀫𑀸𑀤𑁂𑀦 𑀅𑀡𑁆𑀡𑀯𑀦𑁆𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀪𑀯𑁄𑀖𑀢𑀭𑀡𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀲𑀓𑀤𑀸𑀕𑀸𑀫𑀺𑀜𑁆𑀘 𑀧𑀓𑀸𑀲𑁂𑀢𑀺. 𑀬𑀲𑁆𑀫𑀸 𑀘 𑀲𑀓𑀤𑀸𑀕𑀸𑀫𑀻 𑀯𑀻𑀭𑀺𑀬𑁂𑀦 𑀢𑀢𑀺𑀬𑀫𑀕𑁆𑀕𑀁 𑀆𑀭𑀸𑀥𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀢𑀻𑀢𑀁 𑀓𑀸𑀫𑁄𑀖𑀯𑀢𑁆𑀣𑀼𑀁 𑀓𑀸𑀫𑁄𑀖𑀲𑀜𑁆𑀜𑀺𑀢𑀜𑁆𑀘 𑀓𑀸𑀫𑀤𑀼𑀓𑁆𑀔𑀫𑀘𑁆𑀘𑁂𑀢𑀺, 𑀢𑀲𑁆𑀫𑀸 𑀯𑀻𑀭𑀺𑀬𑁂𑀦 𑀤𑀼𑀓𑁆𑀔𑀫𑀘𑁆𑀘𑁂𑀢𑀻𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀓𑀸𑀫𑁄𑀖𑀢𑀭𑀡𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀅𑀦𑀸𑀕𑀸𑀫𑀺𑀜𑁆𑀘 𑀧𑀓𑀸𑀲𑁂𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀸𑀕𑀸𑀫𑀻 𑀯𑀺𑀕𑀢𑀓𑀸𑀫𑀲𑀜𑁆𑀜𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀧𑀜𑁆𑀜𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀁 𑀆𑀭𑀸𑀥𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀧𑀭𑀫𑀫𑀮𑀁 𑀧𑀚𑀳𑀢𑀺, 𑀢𑀲𑁆𑀫𑀸 𑀧𑀜𑁆𑀜𑀸𑀬 𑀧𑀭𑀺𑀲𑀼𑀚𑁆𑀛𑀢𑀻𑀢𑀺, 𑀇𑀫𑀺𑀦𑀸 𑀧𑀤𑁂𑀦 𑀅𑀯𑀺𑀚𑁆𑀚𑁄𑀖𑀢𑀭𑀡𑀁 𑀅𑀭𑀳𑀢𑁆𑀢𑀫𑀕𑁆𑀕𑀜𑁆𑀘 𑀅𑀭𑀳𑀢𑁆𑀢𑀜𑁆𑀘 𑀧𑀓𑀸𑀲𑁂𑀢𑀺. 𑀇𑀫𑀸𑀬 𑀘 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀓𑀣𑀺𑀢𑀸𑀬 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀬𑀓𑁆𑀔𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺.

𑀇𑀤𑀸𑀦𑀺 𑀢𑀫𑁂𑀯 ‘‘𑀧𑀜𑁆𑀜𑀸𑀬 𑀧𑀭𑀺𑀲𑀼𑀚𑁆𑀛𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀧𑀜𑁆𑀜𑀸𑀧𑀤𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀓𑀣𑀁𑀲𑀼 𑀮𑀪𑀢𑁂 𑀧𑀜𑁆𑀜𑀦𑁆𑀢𑀺 𑀇𑀫𑀁 𑀙𑀧𑁆𑀧𑀤𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀓𑀣𑀁𑀲𑀽𑀢𑀺 𑀲𑀩𑁆𑀩𑀢𑁆𑀣𑁂𑀯 𑀅𑀢𑁆𑀣𑀬𑀼𑀢𑁆𑀢𑀺𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀅𑀬𑀁 𑀳𑀺 𑀧𑀜𑁆𑀜𑀸𑀤𑀺𑀅𑀢𑁆𑀣𑀁 𑀜𑀢𑁆𑀯𑀸 𑀢𑀲𑁆𑀲 𑀬𑀼𑀢𑁆𑀢𑀺𑀁 𑀧𑀼𑀘𑁆𑀙𑀢𑀺 𑁋 ‘‘𑀓𑀣𑀁, 𑀓𑀸𑀬 𑀬𑀼𑀢𑁆𑀢𑀺𑀬𑀸, 𑀓𑁂𑀦 𑀓𑀸𑀭𑀡𑁂𑀦 𑀧𑀜𑁆𑀜𑀁 𑀮𑀪𑀢𑀻’’𑀢𑀺? 𑀏𑀲 𑀦𑀬𑁄 𑀥𑀦𑀸𑀤𑀻𑀲𑀼.

𑀅𑀣𑀲𑁆𑀲 𑀪𑀕𑀯𑀸 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀜𑁆𑀜𑀸𑀮𑀸𑀪𑀁 𑀤𑀲𑁆𑀲𑁂𑀦𑁆𑀢𑁄 𑀲𑀤𑁆𑀤𑀳𑀸𑀦𑁄𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁂𑀦 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑁂𑀦 𑀅𑀧𑀭𑀪𑀸𑀕𑁂 𑀘 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀪𑁂𑀤𑁂𑀦 𑀥𑀫𑁆𑀫𑁂𑀦 𑀅𑀭𑀳𑀦𑁆𑀢𑁄 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀸, 𑀢𑀁 𑀲𑀤𑁆𑀤𑀳𑀸𑀦𑁄 𑀅𑀭𑀳𑀢𑀁 𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀁 𑀮𑀪𑀢𑀺, 𑀢𑀜𑁆𑀘 𑀔𑁄 𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯. 𑀬𑀲𑁆𑀫𑀸 𑀧𑀦 𑀲𑀤𑁆𑀥𑀸𑀚𑀸𑀢𑁄 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀢𑀺, 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀲𑁄𑀢𑀁 𑀑𑀤𑀳𑀢𑀺, 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀦𑀢𑁄 𑀧𑀪𑀼𑀢𑀺 𑀬𑀸𑀯 𑀥𑀫𑁆𑀫𑀲𑁆𑀲𑀯𑀦𑁂𑀦 𑀲𑀼𑀲𑁆𑀲𑀽𑀲𑀁 𑀮𑀪𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀁 𑀥𑀫𑁆𑀫𑀁 𑀲𑀤𑁆𑀤𑀳𑀺𑀢𑁆𑀯𑀸𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀓𑀸𑀮𑁂𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀓𑀭𑀡𑁂𑀦 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀬𑀤𑀸 𑀧𑀬𑀺𑀭𑀼𑀧𑀸𑀲𑀦𑀸𑀬 𑀆𑀭𑀸𑀥𑀺𑀢𑀘𑀺𑀢𑁆𑀢𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀅𑀣 𑀅𑀥𑀺𑀕𑀢𑀸𑀬 𑀲𑁄𑀢𑀼𑀓𑀸𑀫𑀢𑀸𑀬 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸 𑀲𑀼𑀡𑀦𑁆𑀢𑁄 𑀮𑀪𑀢𑀻𑀢𑀺. 𑀏𑀯𑀁 𑀲𑀼𑀲𑁆𑀲𑀽𑀲𑀫𑁆𑀧𑀺 𑀘 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀧𑁆𑀧𑀫𑀢𑁆𑀢𑁄 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀜𑁆𑀜𑀼𑀢𑀸𑀬 𑀯𑀺𑀘𑀓𑁆𑀔𑀡𑁄 𑀏𑀯 𑀮𑀪𑀢𑀺, 𑀦 𑀇𑀢𑀭𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄’’𑀢𑀺.

𑀏𑀯𑀁 𑀬𑀲𑁆𑀫𑀸 𑀲𑀤𑁆𑀥𑀸𑀬 𑀧𑀜𑁆𑀜𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀁 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀢𑀺, 𑀲𑀼𑀲𑁆𑀲𑀽𑀲𑀸𑀬 𑀲𑀓𑁆𑀓𑀘𑁆𑀘𑀁 𑀧𑀜𑁆𑀜𑀸𑀥𑀺𑀕𑀫𑀽𑀧𑀸𑀬𑀁 𑀲𑀼𑀡𑀸𑀢𑀺, 𑀅𑀧𑁆𑀧𑀫𑀸𑀤𑁂𑀦 𑀕𑀳𑀺𑀢𑀁 𑀦 𑀧𑀫𑀼𑀲𑁆𑀲𑀢𑀺. 𑀯𑀺𑀘𑀓𑁆𑀔𑀡𑀢𑀸𑀬 𑀅𑀦𑀽𑀦𑀸𑀥𑀺𑀓𑀁 𑀅𑀯𑀺𑀧𑀭𑀻𑀢𑀜𑁆𑀘 𑀕𑀳𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀢𑀺. 𑀲𑀼𑀲𑁆𑀲𑀽𑀲𑀸𑀬 𑀯𑀸 𑀑𑀳𑀺𑀢𑀲𑁄𑀢𑁄 𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀧𑁆𑀧𑀫𑀸𑀤𑁂𑀦 𑀲𑀼𑀢𑀥𑀫𑁆𑀫𑀁 𑀥𑀸𑀭𑁂𑀢𑀺, 𑀯𑀺𑀘𑀓𑁆𑀔𑀡𑀢𑀸𑀬 𑀥𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀫𑀼𑀧𑀧𑀭𑀺𑀓𑁆𑀔𑀢𑀺, 𑀅𑀣𑀸𑀦𑀼𑀧𑀼𑀩𑁆𑀩𑁂𑀦 𑀧𑀭𑀫𑀢𑁆𑀣𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀲𑁆𑀫𑀸𑀲𑁆𑀲 𑀪𑀕𑀯𑀸 ‘‘𑀓𑀣𑀁𑀲𑀼 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 𑀧𑀼𑀝𑁆𑀞𑁄 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳.

𑀇𑀤𑀸𑀦𑀺 𑀢𑀢𑁄 𑀧𑀭𑁂 𑀢𑀬𑁄 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀢𑀺𑀭𑀽𑀧𑀓𑀸𑀭𑀻𑀢𑀺 𑀇𑀫𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀤𑁂𑀲𑀓𑀸𑀮𑀸𑀤𑀻𑀦𑀺 𑀅𑀳𑀸𑀧𑁂𑀢𑁆𑀯𑀸 𑀮𑁄𑀓𑀺𑀬𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑁆𑀲 𑀯𑀸 𑀥𑀦𑀲𑁆𑀲 𑀧𑀢𑀺𑀭𑀽𑀧𑀁 𑀅𑀥𑀺𑀕𑀫𑀽𑀧𑀸𑀬𑀁 𑀓𑀭𑁄𑀢𑀻𑀢𑀺 𑀧𑀢𑀺𑀭𑀽𑀧𑀓𑀸𑀭𑀻. 𑀥𑀼𑀭𑀯𑀸𑀢𑀺 𑀘𑁂𑀢𑀲𑀺𑀓𑀯𑀻𑀭𑀺𑀬𑀯𑀲𑁂𑀦 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄. 𑀉𑀝𑁆𑀞𑀸𑀢𑀸𑀢𑀺, ‘‘𑀬𑁄 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸 𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 (𑀣𑁂𑀭𑀕𑀸. 𑁨𑁩𑁨) 𑀦𑀬𑁂𑀦 𑀓𑀸𑀬𑀺𑀓𑀯𑀻𑀭𑀻𑀬𑀯𑀲𑁂𑀦 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑁄. 𑀯𑀺𑀦𑁆𑀤𑀢𑁂 𑀥𑀦𑀦𑁆𑀢𑀺 𑀏𑀓𑀫𑀽𑀲𑀺𑀓𑀸𑀬 𑀦𑀘𑀺𑀭𑀲𑁆𑀲𑁂𑀯 𑀘𑀢𑀼𑀲𑀢𑀲𑀳𑀲𑁆𑀲𑀲𑀗𑁆𑀔𑀁 𑀘𑀽𑀴𑀦𑁆𑀢𑁂𑀯𑀸𑀲𑀻 𑀯𑀺𑀬 𑀮𑁄𑀓𑀺𑀬𑀥𑀦𑀜𑁆𑀘, 𑀫𑀳𑀮𑁆𑀮𑀓𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬 𑀮𑁄𑀓𑀼𑀢𑁆𑀢𑀭𑀥𑀦𑀜𑁆𑀘 𑀮𑀪𑀢𑀺. 𑀲𑁄 ‘‘𑀢𑀻𑀳𑀺𑀬𑁂𑀯 𑀇𑀭𑀺𑀬𑀸𑀧𑀣𑁂𑀳𑀺 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀁 𑀓𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀸𑀕𑀫𑀦𑀯𑁂𑀮𑀸𑀬 𑀧𑀮𑀸𑀮𑀘𑀼𑀫𑁆𑀩𑀝𑀓𑀁 𑀢𑁂𑀫𑁂𑀢𑁆𑀯𑀸 𑀲𑀻𑀲𑁂 𑀓𑀢𑁆𑀯𑀸 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀧𑀝𑀺𑀩𑀸𑀳𑀦𑁆𑀢𑁄 𑀤𑀲𑀳𑀺 𑀯𑀲𑁆𑀲𑁂𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀘𑁆𑀘𑁂𑀦𑀸𑀢𑀺 𑀯𑀘𑀻𑀲𑀘𑁆𑀘𑁂𑀦𑀸𑀧𑀺 ‘‘𑀲𑀘𑁆𑀘𑀯𑀸𑀤𑀻 𑀪𑀽𑀢𑀯𑀸𑀤𑀻’’𑀢𑀺, 𑀧𑀭𑀫𑀢𑁆𑀣𑀲𑀘𑁆𑀘𑁂𑀦𑀸𑀧𑀺 ‘‘𑀩𑀼𑀤𑁆𑀥𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀭𑀺𑀬𑀲𑀸𑀯𑀓𑁄’’𑀢𑀺 𑀏𑀯𑀁 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺. 𑀤𑀤𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀇𑀘𑁆𑀙𑀺𑀢𑀧𑀢𑁆𑀣𑀺𑀢𑀁 𑀤𑀤𑀦𑁆𑀢𑁄 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺, 𑀲𑀫𑁆𑀧𑀸𑀤𑁂𑀢𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀤𑁆𑀤𑀤𑀁 𑀯𑀸 𑀤𑀤𑀁 𑀢𑀁 𑀕𑀦𑁆𑀣𑀢𑀺. 𑀤𑀸𑀦𑀫𑀼𑀔𑁂𑀦 𑀯𑀸 𑀘𑀢𑁆𑀢𑀸𑀭𑀺𑀧𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀢𑁂𑀳𑀺 𑀫𑀺𑀢𑁆𑀢𑀸𑀦𑀺 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂𑀦 𑀦𑀬𑁂𑀦 𑀘𑀢𑁆𑀢𑀸𑀭𑁄 𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀣𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺 𑀇𑀫𑀁 𑀧𑀜𑁆𑀘𑀫𑀁 𑀧𑀜𑁆𑀳𑀁 𑀕𑀳𑀝𑁆𑀞𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀬𑀲𑁆𑀲𑁂𑀢𑁂𑀢𑀺𑀆𑀤𑀻𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑀲𑁆𑀲 ‘‘𑀲𑀤𑁆𑀤𑀳𑀸𑀦𑁄 𑀅𑀭𑀳𑀢’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀸𑀬 𑀲𑀩𑁆𑀩𑀓𑀮𑁆𑀬𑀸𑀡𑀥𑀫𑁆𑀫𑀼𑀧𑁆𑀧𑀸𑀤𑀺𑀓𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀤𑁆𑀥𑀲𑁆𑀲, 𑀖𑀭𑀫𑁂𑀲𑀺𑀦𑁄𑀢𑀺 𑀖𑀭𑀸𑀯𑀸𑀲𑀁 𑀧𑀜𑁆𑀘 𑀯𑀸 𑀓𑀸𑀫𑀕𑀼𑀡𑁂 𑀏𑀲𑀦𑁆𑀢𑀲𑁆𑀲 𑀕𑀯𑁂𑀲𑀦𑁆𑀢𑀲𑁆𑀲 𑀓𑀸𑀫𑀪𑁄𑀕𑀺𑀦𑁄 𑀕𑀳𑀝𑁆𑀞𑀲𑁆𑀲 ‘‘𑀲𑀘𑁆𑀘𑁂𑀦 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀘𑁆𑀘𑀁. ‘‘𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 𑀏𑀢𑁆𑀣 𑀲𑀼𑀲𑁆𑀲𑀽𑀲𑀧𑀜𑁆𑀜𑀸𑀦𑀸𑀫𑁂𑀦 𑀯𑀼𑀢𑁆𑀢𑁄𑀯 𑀤𑀫𑁄. ‘‘𑀥𑀼𑀭𑀯𑀸 𑀉𑀝𑁆𑀞𑀸𑀢𑀸’’𑀢𑀺 𑀏𑀢𑁆𑀣 𑀥𑀼𑀭𑀦𑀸𑀫𑁂𑀦 𑀉𑀝𑁆𑀞𑀸𑀦𑀦𑀸𑀫𑁂𑀦 𑀘 𑀯𑀼𑀢𑁆𑀢𑀸 𑀥𑀺𑀢𑀺. ‘‘𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀘𑀸𑀕𑁄 𑀘𑀸𑀢𑀺 𑀏𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸 𑀲𑀦𑁆𑀢𑀺. 𑀲 𑀯𑁂 𑀧𑁂𑀘𑁆𑀘 𑀦 𑀲𑁄𑀘𑀢𑀻𑀢𑀺 𑀇𑀥𑀮𑁄𑀓𑀸 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀲 𑀯𑁂 𑀦 𑀲𑁄𑀘𑀢𑀻𑀢𑀺.

𑀏𑀯𑀁 𑀪𑀕𑀯𑀸 𑀧𑀜𑁆𑀘𑀫𑀫𑁆𑀧𑀺 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀁 𑀬𑀓𑁆𑀔𑀁 𑀘𑁄𑀤𑁂𑀦𑁆𑀢𑁄 𑀇𑀗𑁆𑀖 𑀅𑀜𑁆𑀜𑁂𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀜𑁆𑀜𑁂𑀧𑀻𑀢𑀺 𑀅𑀜𑁆𑀜𑁂𑀧𑀺 𑀥𑀫𑁆𑀫𑁂 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀲𑁆𑀲𑀼. 𑀅𑀜𑁆𑀜𑁂𑀧𑀺 𑀯𑀸 𑀧𑀽𑀭𑀡𑀸𑀤𑀬𑁄 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑁂 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀲𑁆𑀲𑀼. 𑀬𑀤𑀺 𑀅𑀫𑁆𑀳𑁂𑀳𑀺 ‘‘𑀲𑀘𑁆𑀘𑁂𑀦 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀲𑀘𑁆𑀘𑀸 𑀪𑀺𑀬𑁆𑀬𑁄 𑀓𑀺𑀢𑁆𑀢𑀺𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀯𑀸, ‘‘𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺 𑀏𑀢𑁆𑀣 𑀲𑀼𑀲𑁆𑀲𑀽𑀲𑀸𑀢𑀺 𑀧𑀜𑁆𑀜𑀸𑀧𑀤𑁂𑀲𑁂𑀦 𑀯𑀼𑀢𑁆𑀢𑀸 𑀤𑀫𑁆𑀫𑀸 𑀪𑀺𑀬𑁆𑀬𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀧𑀝𑀺𑀮𑀸𑀪𑀓𑀸𑀭𑀡𑀁 𑀯𑀸, ‘‘𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀘𑀸𑀕𑀸 𑀪𑀺𑀬𑁆𑀬𑁄 𑀫𑀺𑀢𑁆𑀢𑀕𑀦𑁆𑀣𑀦𑀓𑀸𑀭𑀡𑀁 𑀯𑀸, ‘‘𑀥𑀼𑀭𑀯𑀸 𑀉𑀝𑁆𑀞𑀸𑀢𑀸’’𑀢𑀺 𑀏𑀢𑁆𑀣 𑀢𑀁 𑀢𑀁 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀥𑀼𑀭𑀦𑀸𑀫𑁂𑀦 𑀉𑀝𑁆𑀞𑀸𑀦𑀦𑀸𑀫𑁂𑀦 𑀘 𑀯𑀼𑀢𑁆𑀢𑀸𑀬 𑀫𑀳𑀸𑀪𑀸𑀭𑀲𑀳𑀦𑀢𑁆𑀣𑁂𑀦 𑀉𑀲𑁆𑀲𑁄𑀴𑁆𑀳𑀺𑀪𑀸𑀯𑀧𑁆𑀧𑀢𑁆𑀢𑀸𑀬 𑀯𑀻𑀭𑀺𑀬𑀲𑀗𑁆𑀔𑀸𑀢𑀸𑀬 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀦𑀯𑀺𑀦𑁆𑀤𑀦𑀓𑀸𑀭𑀡𑀁 𑀯𑀸, ‘‘𑀲𑀘𑁆𑀘𑀁 𑀤𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀪𑀺𑀬𑁆𑀬𑁄 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀧𑁂𑀘𑁆𑀘 𑀅𑀲𑁄𑀘𑀦𑀓𑀸𑀭𑀡𑀁 𑀯𑀸 𑀇𑀥 𑀯𑀺𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀤𑁆𑀥𑀺𑀁 𑀲𑀗𑁆𑀔𑁂𑀧𑀬𑁄𑀚𑀦𑀸𑀬 𑀅𑀢𑁆𑀣𑀯𑀡𑁆𑀡𑀦𑀸. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀏𑀓𑀫𑁂𑀓𑀁 𑀧𑀤𑀁 𑀅𑀢𑁆𑀣𑀼𑀤𑁆𑀥𑀸𑀭𑀧𑀤𑀼𑀤𑁆𑀥𑀸𑀭𑀧𑀤𑀯𑀡𑁆𑀡𑀦𑀸𑀦𑀬𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀯𑀼𑀢𑁆𑀢𑁂 𑀬𑀓𑁆𑀔𑁄 𑀬𑁂𑀦 𑀲𑀁𑀲𑀬𑁂𑀦 𑀅𑀜𑁆𑀜𑁂 𑀧𑀼𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀧𑀳𑀻𑀦𑀢𑁆𑀢𑀸 𑀓𑀣𑀁 𑀦𑀼 𑀤𑀸𑀦𑀺 𑀧𑀼𑀘𑁆𑀙𑁂𑀬𑁆𑀬𑀁, 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀢𑀺 𑀯𑀢𑁆𑀯𑀸 𑀬𑁂𑀧𑀺𑀲𑁆𑀲 𑀅𑀧𑀼𑀘𑁆𑀙𑀦𑀓𑀸𑀭𑀡𑀁 𑀦 𑀚𑀸𑀦𑀦𑁆𑀢𑀺, 𑀢𑁂𑀧𑀺 𑀚𑀸𑀦𑀸𑀧𑁂𑀦𑁆𑀢𑁄 𑀬𑁄𑀳𑀁 𑀅𑀚𑁆𑀚𑀧𑀚𑀸𑀦𑀸𑀫𑀺, 𑀬𑁄 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄𑀢𑀺 𑀆𑀳. 𑀢𑀢𑁆𑀣 𑀅𑀚𑁆𑀚𑀸𑀢𑀺 𑀅𑀚𑁆𑀚𑀸𑀤𑀺𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀚𑀸𑀦𑀸𑀫𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀚𑀸𑀦𑀸𑀫𑀺. 𑀬𑁄 𑀅𑀢𑁆𑀣𑁄𑀢𑀺 𑀏𑀢𑁆𑀢𑀸𑀯𑀢𑀸 ‘‘𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀧𑀭𑀸𑀬𑀺𑀓𑁄𑀢𑀺 𑀇𑀫𑀺𑀦𑀸 ‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁 𑀧𑁂𑀘𑁆𑀘 𑀲𑁄𑀓𑀸𑀪𑀸𑀯𑀓𑀸𑀭𑀡𑀁 𑀲𑀫𑁆𑀧𑀭𑀸𑀬𑀺𑀓𑀁. 𑀅𑀢𑁆𑀣𑁄𑀢𑀺 𑀘 𑀓𑀸𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀁 𑀳𑀺 𑀅𑀢𑁆𑀣𑀲𑀤𑁆𑀤𑁄 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧; 𑀤𑀻. 𑀦𑀺. 𑁧.𑁨𑁫𑁫) 𑀧𑀸𑀞𑀢𑁆𑀣𑁂 𑀯𑀢𑁆𑀢𑀢𑀺. ‘‘𑀅𑀢𑁆𑀣𑁄 𑀫𑁂, 𑀕𑀳𑀧𑀢𑀺, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁫𑁦; 𑀫. 𑀦𑀺. 𑁩.𑁨𑁫𑁮) 𑀯𑀺𑀘𑀓𑁆𑀔𑀡𑁂. ‘‘𑀳𑁄𑀢𑀺 𑀲𑀻𑀮𑀯𑀢𑀁 𑀅𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁧𑁧) 𑀯𑀼𑀟𑁆𑀠𑀺𑀫𑁆𑀳𑀺. ‘‘𑀩𑀳𑀼𑀚𑀦𑁄 𑀪𑀚𑀢𑁂 𑀅𑀢𑁆𑀣𑀳𑁂𑀢𑀽’’𑀢𑀺𑀆𑀤𑀻𑀲𑀼 𑀥𑀦𑁂. ‘‘𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁭.𑁬𑁬; 𑀲𑀁. 𑀦𑀺. 𑁧.𑁨𑁫𑁦; 𑀣𑁂𑀭𑀕𑀸. 𑁪𑁪𑁩) 𑀳𑀺𑀢𑁂. ‘‘𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁯𑁨) 𑀓𑀸𑀭𑀡𑁂. 𑀇𑀥 𑀧𑀦 𑀓𑀸𑀭𑀡𑁂. 𑀢𑀲𑁆𑀫𑀸 𑀬𑀁 𑀧𑀜𑁆𑀜𑀸𑀤𑀺𑀮𑀸𑀪𑀸𑀤𑀻𑀦𑀁 𑀓𑀸𑀭𑀡𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁, 𑀬𑀜𑁆𑀘 𑀧𑁂𑀘𑁆𑀘 𑀲𑁄𑀓𑀸𑀪𑀸𑀯𑀲𑁆𑀲 𑀓𑀸𑀭𑀡𑀁 𑀲𑀫𑁆𑀧𑀭𑀸𑀬𑀺𑀓𑀁, 𑀢𑀁 𑀬𑁄𑀳𑀁 𑀅𑀚𑁆𑀚 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦 𑀲𑀸𑀫𑀁𑀬𑁂𑀯 𑀧𑀚𑀸𑀦𑀸𑀫𑀺, 𑀲𑁄 𑀓𑀣𑀁 𑀦𑀼 𑀤𑀸𑀦𑀺 𑀧𑀼𑀘𑁆𑀙𑁂𑀬𑁆𑀬𑀁 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀢𑀺 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀬𑀓𑁆𑀔𑁄 ‘‘𑀧𑀚𑀸𑀦𑀸𑀫𑀺 𑀬𑁄 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀜𑀸𑀡𑀲𑁆𑀲 𑀪𑀕𑀯𑀁𑀫𑀽𑀮𑀓𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀣𑀸𑀬 𑀯𑀢 𑀫𑁂 𑀩𑀼𑀤𑁆𑀥𑁄𑀢𑀺 𑀆𑀳. 𑀢𑀢𑁆𑀣 𑀅𑀢𑁆𑀣𑀸𑀬𑀸𑀢𑀺 𑀳𑀺𑀢𑀸𑀬 𑀯𑀼𑀟𑁆𑀠𑀺𑀬𑀸 𑀘. 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 ‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀘𑀸𑀕𑁂𑀦 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀢𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀁 𑀩𑀼𑀤𑁆𑀥𑀁 𑀧𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀲𑀗𑁆𑀖𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳𑀸’’𑀢𑀺 𑀪𑀡𑀦𑁆𑀢𑀺.

𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀅𑀢𑁆𑀢𑀦𑁄 𑀳𑀺𑀢𑀸𑀥𑀺𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀻𑀧𑁂𑀦𑁆𑀢𑁄 𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀸𑀫𑀸 𑀕𑀸𑀫𑀦𑁆𑀢𑀺 𑀤𑁂𑀯𑀕𑀸𑀫𑀸 𑀤𑁂𑀯𑀕𑀸𑀫𑀁. 𑀧𑀼𑀭𑀸 𑀧𑀼𑀭𑀦𑁆𑀢𑀺 𑀤𑁂𑀯𑀦𑀕𑀭𑀢𑁄 𑀤𑁂𑀯𑀦𑀕𑀭𑀁. 𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀦𑁆𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀯𑀢 𑀪𑀕𑀯𑀢𑁄 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀜𑁆𑀘 𑀥𑀫𑁆𑀫𑀲𑀼𑀥𑀫𑁆𑀫𑀢𑀜𑁆𑀘 𑀘-𑀲𑀤𑁆𑀤𑁂𑀦 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑁄 𑀥𑀫𑁆𑀫𑀖𑁄𑀲𑀓𑁄 𑀳𑀼𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀧𑀭𑀺𑀬𑁄𑀲𑀸𑀦𑀜𑁆𑀘 𑀭𑀢𑁆𑀢𑀺𑀯𑀺𑀪𑀸𑀯𑀦𑀜𑁆𑀘 𑀲𑀸𑀥𑀼𑀓𑀸𑀭𑀲𑀤𑁆𑀤𑀼𑀝𑁆𑀞𑀸𑀦𑀜𑁆𑀘 𑀆𑀴𑀯𑀓𑀓𑀼𑀫𑀸𑀭𑀲𑁆𑀲 𑀬𑀓𑁆𑀔𑀪𑀯𑀦𑀁 𑀆𑀦𑀬𑀦𑀜𑁆𑀘 𑀏𑀓𑀓𑁆𑀔𑀡𑁂𑀬𑁂𑀯 𑀅𑀳𑁄𑀲𑀺. 𑀭𑀸𑀚𑀧𑀼𑀭𑀺𑀲𑀸 𑀲𑀸𑀥𑀼𑀓𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑁋 ‘‘𑀏𑀯𑀭𑀽𑀧𑁄 𑀲𑀸𑀥𑀼𑀓𑀸𑀭𑀲𑀤𑁆𑀤𑁄 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑁂 𑀦 𑀅𑀜𑁆𑀜𑁂𑀲𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀆𑀕𑀢𑁄 𑀦𑀼 𑀔𑁄 𑀪𑀕𑀯𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀸 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑁂 𑀯𑀺𑀬 𑀩𑀳𑀺 𑀅𑀝𑁆𑀞𑀢𑁆𑀯𑀸 𑀦𑀺𑀩𑁆𑀩𑀺𑀲𑀗𑁆𑀓𑀸 𑀅𑀦𑁆𑀢𑁄𑀬𑁂𑀯 𑀧𑀯𑀺𑀲𑀺𑀢𑁆𑀯𑀸 𑀅𑀤𑁆𑀤𑀲𑀁𑀲𑀼 𑀪𑀕𑀯𑀦𑁆𑀢𑀁 𑀬𑀓𑁆𑀔𑀲𑁆𑀲 𑀪𑀯𑀦𑁂 𑀦𑀺𑀲𑀺𑀦𑁆𑀦𑀁, 𑀬𑀓𑁆𑀔𑀜𑁆𑀘 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀬𑀓𑁆𑀔𑀁 𑀆𑀳𑀁𑀲𑀼 𑁋 ‘‘𑀅𑀬𑀁 𑀢𑁂, 𑀫𑀳𑀸𑀬𑀓𑁆𑀔, 𑀭𑀸𑀚𑀓𑀼𑀫𑀸𑀭𑁄 𑀩𑀮𑀺𑀓𑀫𑁆𑀫𑀸𑀬 𑀆𑀦𑀻𑀢𑁄, 𑀳𑀦𑁆𑀤 𑀦𑀁 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸, 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’𑀢𑀺. 𑀲𑁄 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀮𑀚𑁆𑀚𑀺𑀢𑁄 𑀯𑀺𑀲𑁂𑀲𑁂𑀦 𑀘 𑀪𑀕𑀯𑀢𑁄 𑀧𑀼𑀭𑀢𑁄 𑀏𑀯𑀁 𑀯𑀼𑀘𑁆𑀘𑀫𑀸𑀦𑁄 𑀅𑀣 𑀢𑀁 𑀓𑀼𑀫𑀸𑀭𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 ‘‘𑀅𑀬𑀁, 𑀪𑀦𑁆𑀢𑁂, 𑀓𑀼𑀫𑀸𑀭𑁄 𑀫𑀬𑁆𑀳𑀁 𑀧𑁂𑀲𑀺𑀢𑁄, 𑀇𑀫𑀸𑀳𑀁 𑀪𑀕𑀯𑀢𑁄 𑀤𑀫𑁆𑀫𑀺, 𑀳𑀺𑀢𑀸𑀦𑀼𑀓𑀫𑁆𑀧𑀓𑀸 𑀩𑀼𑀤𑁆𑀥𑀸, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀤𑀸𑀭𑀓𑀁 𑀇𑀫𑀲𑁆𑀲 𑀳𑀺𑀢𑀢𑁆𑀣𑀸𑀬 𑀲𑀼𑀔𑀢𑁆𑀣𑀸𑀬𑀸’’𑀢𑀺 𑀇𑀫𑀜𑁆𑀘 𑀕𑀸𑀣𑀫𑀸𑀳 𑁋

‘‘𑀇𑀫𑀁 𑀓𑀼𑀫𑀸𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀁,

𑀲𑀩𑁆𑀩𑀗𑁆𑀕𑀼𑀧𑁂𑀢𑀁 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀁;

𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄 𑀤𑀤𑀸𑀫𑀺 𑀢𑁂,

𑀧𑀝𑀺𑀕𑁆𑀕𑀳 𑀮𑁄𑀓𑀳𑀺𑀢𑀸𑀬 𑀘𑀓𑁆𑀔𑀼𑀫𑀸’’𑀢𑀺.

𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀓𑀼𑀫𑀸𑀭𑀁. 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 𑀬𑀓𑁆𑀔𑀲𑁆𑀲 𑀘 𑀓𑀼𑀫𑀸𑀭𑀲𑁆𑀲 𑀘 𑀫𑀗𑁆𑀕𑀮𑀓𑀭𑀡𑀢𑁆𑀣𑀁 𑀧𑀸𑀤𑀽𑀦𑀕𑀸𑀣𑀁 𑀅𑀪𑀸𑀲𑀺. 𑀢𑀁 𑀬𑀓𑁆𑀔𑁄 𑀓𑀼𑀫𑀸𑀭𑀁 𑀲𑀭𑀡𑀁 𑀕𑀫𑁂𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀘𑀢𑀼𑀢𑁆𑀣𑀧𑀸𑀤𑁂𑀦 𑀧𑀽𑀭𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁 𑁋

‘‘𑀤𑀻𑀖𑀸𑀬𑀼𑀓𑁄 𑀳𑁄𑀢𑀼 𑀅𑀬𑀁 𑀓𑀼𑀫𑀸𑀭𑁄,

𑀢𑀼𑀯𑀜𑁆𑀘 𑀬𑀓𑁆𑀔 𑀲𑀼𑀔𑀺𑀢𑁄 𑀪𑀯𑀸𑀳𑀺;

𑀅𑀩𑁆𑀬𑀸𑀥𑀺𑀢𑀸 𑀮𑁄𑀓𑀳𑀺𑀢𑀸𑀬 𑀢𑀺𑀝𑁆𑀞𑀣,

𑀅𑀬𑀁 𑀓𑀼𑀫𑀸𑀭𑁄 𑀲𑀭𑀡𑀫𑀼𑀧𑁂𑀢𑀺 𑀩𑀼𑀤𑁆𑀥𑀁;

𑀅𑀬𑀁 𑀓𑀼𑀫𑀸𑀭𑁄 𑀲𑀭𑀡𑀫𑀼𑀧𑁂𑀢𑀺 𑀥𑀫𑁆𑀫𑀁;

𑀅𑀬𑀁 𑀓𑀼𑀫𑀸𑀭𑁄 𑀲𑀭𑀡𑀫𑀼𑀧𑁂𑀢𑀺 𑀲𑀗𑁆𑀖’’𑀦𑁆𑀢𑀺.

𑀅𑀣 𑀪𑀕𑀯𑀸 𑀓𑀼𑀫𑀸𑀭𑀁 𑀭𑀸𑀚𑀧𑀼𑀭𑀺𑀲𑀸𑀦𑀁 𑀅𑀤𑀸𑀲𑀺 𑁋 ‘‘𑀇𑀫𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀦 𑀫𑀫𑁂𑀯 𑀤𑁂𑀣𑀸’’𑀢𑀺. 𑀏𑀯𑀁 𑀲𑁄 𑀓𑀼𑀫𑀸𑀭𑁄 𑀭𑀸𑀚𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀢𑁄 𑀬𑀓𑁆𑀔𑀲𑁆𑀲 𑀳𑀢𑁆𑀣𑀁, 𑀬𑀓𑁆𑀔𑀲𑁆𑀲 𑀳𑀢𑁆𑀣𑀢𑁄 𑀪𑀕𑀯𑀢𑁄 𑀳𑀢𑁆𑀣𑀁, 𑀪𑀕𑀯𑀢𑁄 𑀳𑀢𑁆𑀣𑀢𑁄 𑀧𑀼𑀦 𑀭𑀸𑀚𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀁 𑀕𑀢𑀢𑁆𑀢𑀸 𑀦𑀸𑀫𑀢𑁄 ‘‘𑀳𑀢𑁆𑀣𑀓𑁄 𑀆𑀴𑀯𑀓𑁄’’𑀢𑀺 𑀚𑀸𑀢𑁄. 𑀢𑀁 𑀆𑀤𑀸𑀬 𑀧𑀝𑀺𑀦𑀺𑀯𑀢𑁆𑀢𑁂 𑀭𑀸𑀚𑀧𑀼𑀭𑀺𑀲𑁂 𑀤𑀺𑀲𑁆𑀯𑀸 𑀓𑀲𑁆𑀲𑀓𑀯𑀦𑀓𑀫𑁆𑀫𑀺𑀓𑀸𑀤𑀬𑁄 ‘‘𑀓𑀺𑀁 𑀬𑀓𑁆𑀔𑁄 𑀓𑀼𑀫𑀸𑀭𑀁 𑀅𑀢𑀺𑀤𑀳𑀭𑀢𑁆𑀢𑀸 𑀦 𑀇𑀘𑁆𑀙𑀻’’𑀢𑀺? 𑀪𑀻𑀢𑀸 𑀧𑀼𑀘𑁆𑀙𑀺𑀁𑀲𑀼. 𑀭𑀸𑀚𑀧𑀼𑀭𑀺𑀲𑀸 ‘‘𑀫𑀸 𑀪𑀸𑀬𑀣. 𑀔𑁂𑀫𑀁 𑀓𑀢𑀁 𑀪𑀕𑀯𑀢𑀸’’𑀢𑀺 𑀲𑀩𑁆𑀩𑀫𑀸𑀭𑁄𑀘𑁂𑀲𑀼𑀁. 𑀢𑀢𑁄 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀓𑀮𑀁 𑀆𑀴𑀯𑀺𑀦𑀕𑀭𑀁 𑀏𑀓𑀓𑁄𑀮𑀸𑀳𑀮𑁂𑀦 𑀬𑀓𑁆𑀔𑀸𑀪𑀺𑀫𑀼𑀔𑀁 𑀅𑀳𑁄𑀲𑀺. 𑀬𑀓𑁆𑀔𑁄𑀧𑀺 𑀪𑀕𑀯𑀢𑁄 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀅𑀦𑀼𑀧𑁆𑀧𑀢𑁆𑀢𑁂 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀉𑀧𑀟𑁆𑀠𑀫𑀕𑁆𑀕𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺.

𑀅𑀣 𑀪𑀕𑀯𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀦𑀕𑀭𑀤𑁆𑀯𑀸𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀺𑀯𑀺𑀢𑁆𑀢𑁂 𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺. 𑀢𑀢𑁄 𑀫𑀳𑀸𑀚𑀦𑀓𑀸𑀬𑁂𑀦 𑀲𑀤𑁆𑀥𑀺𑀁 𑀭𑀸𑀚𑀸 𑀘 𑀦𑀸𑀕𑀭𑀸 𑀘 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑁋 ‘‘𑀓𑀣𑀁, 𑀪𑀦𑁆𑀢𑁂, 𑀏𑀯𑀁 𑀤𑀸𑀭𑀼𑀡𑀁 𑀬𑀓𑁆𑀔𑀁 𑀤𑀫𑀬𑀺𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀬𑀼𑀤𑁆𑀥𑀫𑀸𑀤𑀺𑀁 𑀓𑀢𑁆𑀯𑀸 ‘‘𑀏𑀯𑀁 𑀦𑀯𑀯𑀺𑀥𑀁 𑀯𑀲𑁆𑀲𑀁 𑀯𑀲𑁆𑀲𑁂𑀢𑁆𑀯𑀸 𑀏𑀯𑀁 𑀯𑀺𑀪𑀺𑀁𑀲𑀦𑀓𑀁 𑀅𑀓𑀸𑀲𑀺, 𑀏𑀯𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀲𑁆𑀲𑀸𑀳𑀁 𑀏𑀯𑀁 𑀯𑀺𑀲𑁆𑀲𑀚𑁆𑀚𑁂𑀲𑀺’’𑀦𑁆𑀢𑀺 𑀢𑀫𑁂𑀯𑀸𑀴𑀯𑀓𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑀢𑁄 𑀭𑀸𑀚𑀸 𑀘𑁂𑀯 𑀦𑀸𑀕𑀭𑀸 𑀘 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀪𑀯𑀦𑀲𑀫𑀻𑀧𑁂 𑀬𑀓𑁆𑀔𑀲𑁆𑀲 𑀪𑀯𑀦𑀁 𑀓𑀢𑁆𑀯𑀸 𑀧𑀼𑀧𑁆𑀨𑀕𑀦𑁆𑀥𑀸𑀤𑀺𑀲𑀓𑁆𑀓𑀸𑀭𑀼𑀧𑁂𑀢𑀁 𑀦𑀺𑀘𑁆𑀘𑀩𑀮𑀺𑀁 𑀧𑀯𑀢𑁆𑀢𑁂𑀲𑀼𑀁. 𑀢𑀜𑁆𑀘 𑀓𑀼𑀫𑀸𑀭𑀁 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀁 ‘‘𑀢𑁆𑀯𑀁 𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺, 𑀕𑀘𑁆𑀙 𑀪𑀕𑀯𑀦𑁆𑀢𑀁𑀬𑁂𑀯 𑀧𑀬𑀺𑀭𑀼𑀧𑀸𑀲𑀲𑁆𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀼𑀁. 𑀲𑁄 𑀪𑀕𑀯𑀦𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀧𑀬𑀺𑀭𑀼𑀧𑀸𑀲𑀫𑀸𑀦𑁄 𑀦𑀘𑀺𑀭𑀲𑁆𑀲𑁂𑀯 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀲𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀘𑀲𑀢𑀉𑀧𑀸𑀲𑀓𑀧𑀭𑀺𑀯𑀸𑀭𑁄 𑀅𑀳𑁄𑀲𑀺. 𑀪𑀕𑀯𑀸 𑀘 𑀦𑀁 𑀏𑀢𑀤𑀕𑁆𑀕𑁂 𑀦𑀺𑀤𑁆𑀤𑀺𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀧𑀭𑀺𑀲𑀁 𑀲𑀗𑁆𑀕𑀡𑁆𑀳𑀦𑁆𑀢𑀸𑀦𑀁 𑀬𑀤𑀺𑀤𑀁 𑀳𑀢𑁆𑀣𑀓𑁄 𑀆𑀴𑀯𑀓𑁄’’𑀢𑀺 (𑀅. 𑀦𑀺. 𑁧.𑁨𑁫𑁧). 𑀤𑁆𑀯𑀸𑀤𑀲𑀫𑀁.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀬𑀓𑁆𑀔𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.